Efisọs6
1Ñkpri nditọ, edi utom mbufo nte ikọt Abasi ndisuk ibuot nnọ mme ete ye mme eka mbufo, koro emi edide nnen nnen ñkpọ ndinam.2“Kpono usọ ye uka” edi akpa ewuhọ emi asañade ye eñwọñọ,3“man otodo kpukpru ñkpọ ọfọn ye mbufo, enyuñ edu anyan uwem ke isọñ emi.”4Mme ete ye mme eka, ekunam ñkpọ ye nditọ mbufo nte ekemede ndinam mmọ eyat esit. Utu ke oro, enam mmọ ekọri ke idak ntunọ ye item ikọt Abasi.5Mme ifin esuk ibuot enọ mme eteufọk mbufo, ke ndik ye ñnyekidem enam ñkpọ enọ mmọ ke ofuri esit, nte enam enọ Kraist.6Enam ntem, idighe ke ini emi mmọ edade ese mbufo ke enyin ikpọñ man mbufo edep ima eto mmọ, edi ke ofuri esit mbufo enam se Abasi oyomde nte mme ifin Kraist.7Enam utom mbufo nte ifin ke idara, nte enam enọ Ọbọñ; inamke inọ ikpuikpu owo.8Eti ete ke Abasi eyenọ owo kiet kiet utib, mme ofin, mme eyen, ke kpukpru nti utom emi enye anamde.9Mme eteufọk, enam ñkpọ ke ukem usuñ emi ye mme ifin mbufo, ndien etre ndidighe mmọ. Ekufre ete ke mbufo ye ifin mbufo enyene Ete ufin kiet ke enyọñ, emi ekpede ikpe ye kpukpru owo ke ukem ukem usuñ.
Odudu Ñnyin Oto Abasi
10Ke akpatre, esọñ idem ke edidiana kiet ye Ọbọñ Jisọs, ye ke akwa odudu Esie.11Emen kpukpru mme mbọbọ ekọñ emi Abasi ọnọde mbufo ebọbọ, man mbufo ekpekeme ndisọñọ nda ke iso ndiọi ñkari Setan.12Koro ñnyin iñwanake eñwan ye mme owo, edi iñwana ye mme oburobut odudu spirit emi edude ke ererimbot enyọñ, mme andikara, mme odudu, ye mme odudu ufum enyọñ ke ñkim ñkim emana emi.13Ke ntre, ebọbọ mbọbọ ekọñ Abasi idahaemi. Ndien ke ini mme idiọk usen oro ema edi, mbufo eyekeme ndisọñọ nda mberi eñwan mme asua mbufo mfiak edem, ndien ke ema ekeñwana esim utit, mbufo eyesuk ekeme ndisọñọ nda ke isọñ mbufo.14Do eda ke mbeñeidem, eda akpanikọ ebọbọ nte mbọbọ isin, ebọp ọsọñ ke isin mbufo; eda edinen ido enam mbọbọ ikpanesit mbufo,15ye mbeñeidem edisuan Eti Etop emem emi nte ikpaukot mbufo.16Ekama mbuọtidem nte otuekọñ kpukpru ini; edi enye ke mbufo edida inime mme idañ emi asakde ye ikañ emi Setan otopde.17Ndien eda ubọhọ nte uyaraibuot, ndien ikọ Abasi nte akañkañ emi Spirit ọnọde mbufo.18Enam kpukpru emi ye akam, ebeñe uñwam Abasi. Ebọñ akam ke kpukpru ifet nte Spirit adade usuñ. Ke ntak emi edu ke mbeñe idem, ekukpa mba, ebọñ akam kpukpru ini ebaña kpukpru ikọt Abasi.19Enyuñ ebọñ akam ñko ebaña mi, ete yak Abasi ọnọ mi etop, ke ini ami mbeñede idem nditiñ ikọ man ami ntiñ ikọ uko uko ñnyuñ ñyararede mme ndedibe ñkpọ Eti Etop Kraist.20Ami ndi isuñutom Kraist ke ntak Eti Etop emi, okposuk edi emi ami ndude idahaemi ke ñkpọkọbi. Ebọñ akam ete yak ami ntiñ ikọ mbaña Enye uko uko nte anade nte ami nnam.21Taikikọs, edima eyen eka ñnyin ye asañautom anam akpanikọ ke utom Ọbọñ, eyenọ mbufo kpukpru mme mbuk emi otukde mi, man mbufo efiọk nte ñkpọ akade iso ye ami.22Ntak edi oro ami ndọñde enye edi ebine mbufo, man enye etiñ ọnọ mbufo nte ñkpọ etiede ye ñnyin, man ọnọ mbufo idọñesit.23Yak Abasi Ete, ye Ọbọñ Jisọs Kraist ọnọ kpukpru mme nditọ ete emem ye ima, ye mbuọtidem.24Yak mfọn Abasi odu ye kpukpru mme mmọ emi emade Ọbọñ ñnyin Jisọs Kraist ye ima emi midikpaha.Biblica, Inc.