Filipai1
1Edi ami Pọl ye Timoti, mme isuñutom Kraist Jisọs enọ ñwed emi esọk ikọt Abasi emi edude ke Filipai, emi enyuñ edianade kiet ye Kraist Jisọs, inyuñ inọ ñko esọk mme adausuñ ye mme andiñwam ke utom ufọk Abasi.2Abasi Ete ñnyin ye Ọbọñ ñnyin Jisọs Kraist akpakam ọnọ mbufo mfọn ye emem.3Ami ñkọkọm Abasi mi mbaña mbufo kpukpru ini emi ami ntide mbufo.4Ndien ini kiet ekededi emi ami mbọñde akam mbaña kpukpru mbufo, ami nsibọñ ye inemesit.5Oto ke usuñ ye edu emi mbufo ekeñwamde mi ke utom edisuan Eti Etop emi, ọtọñọde ke akpa usen tutu esim emi.6Ke ntre, ami metim mfiọk nte ke Abasi emi ọkọtọñọde eti utom emi ke idem mbufo eyeda aka iso tutu ekesim utit ke usen Kraist Jisọs.
Ima Emi Pọl Enyenede Ọnọ Mmọ
7Mbufo ededu mi ke esit kpukpru ini! Ntak edi oro ami ñnyenede udọñ mbaña mbufo. Koro mbufo emebuana ye ami ke ifet emi Abasi ọnọde mi, ke idahaemi ami ndude ke ufọk ñkpọkọbi, ye ke ini emi ñkenyenede ifet ndifaña mfaña, ñnyuñ nnam Eti Etop Kraist ọsọñọ ada,8Abasi ọfiọk ete ke ami ntiñ akpanikọ ke emi ndọhọde nte ke ntọtuñọ ekikere emi ñnyenede mbaña mbufo oto ke esit Kraist Jisọs ke idem Esie.9Emi edi akam emi ami mbọñde mbaña mbufo. Ami mbeñe Abasi nte ima mbufo akpakam aka iso ndikọri kpukpru ini, asaña ye ata ifiọk ye mfọnmma ikike,10man otodo mbufo ekeme ndimek se ifọnde ikan. Do ke mbufo edibọhọ kpukpru se idehede ye ubiomikpe ke usen Kraist.11Uwem mbufo eyeyọhọ ye kpukpru nti edu emi edide Jisọs Kraist ikpọñ ikpọñ ekeme ndinọ, ke ntak ubọñ ye itoro Abasi.12Ami ñyom mbufo efiọk, nditọ ete mi, ete ke mme ñkpọ emi etibede enọ mi eneñede eñwam ñkọri Eti Mbuk Ọbọñ Jisọs.13Ke ntak emi kpukpru mme ekpeme ufọk Ọbọñ ye kpukpru mme mmọ eken efiọk ete ke ami ndu ke ufọk ñkpọkọbi, koro ami ndide isuñutom Kraist.14Ndien edidu mi ke ufọk ñkpọkọbi ọnọ ata ediwak nditọ ete isọñesit ke Ọbọñ, emi anamde mmọ etetim enyene uko kpukpru ini ke edikwọrọ Eti Mbuk emi, inyeneke ndik.15Okposuk edi oro ubak mmọ ekwọrọ Kraist oto ke ufup ye ke ido utọk, edi mme mmọ eken ekwọrọ ke ofuri eti esit.16Mme mmọ emi enam utom eto ke ima koro mmọ efiọkde ete ke Abasi ọkọnọ mi utom edinam Eti Mbuk emi ọsọñọ ada.17Mme mmọ eken ikwọrọke Kraist ke ofuri esit, edi ekwọrọ ke ntak idiọkitọñ obukidem, mmọ ekere ete ke mmimọ iyetim ida mi isin ke afanikọñ ke adaña emi ami ndude ke ufọk ñkpọkọbi18Oro inamke baba ñkpọ ndomokiet! Esit adat mi kabaña edinam mmọ, se idide akpan ñkpọ edi, ke ekwọrọ Kraist ke kpukpru ebiet, mme ke eti ntak, mme ke idiọk ntak. Ami ñyeka iso ndikop inemesit ke ntak oro.Ntak Emi Anade Ami Ñka Iso Ndidu Uwem
19Koro ami mọfiọk nte ke ntak akam mbufo ye uñwam emi otode Spirit Jisọs Kraist, eyesana mi eyak.20Ntọtuñọ udọñ mi ye idorenyin edi ami ndikpuhu ke utom mi, edi ke kpukpru ini, akpan akpan idahaemi ami ñkpakam ñnyene uko, man otodo ami nda ofuri idem mi nda ukpono nnọ Kraist ke ndude uwem mme ke ñkpade kpa.21Uwem edi nso ọnọ mi? Se ibehede mi edi Kraist. Ñkpa ndien eyeda ediwak udori ọsọk mi.22Edi, edieke ke edidu uwem ñka iso, ami ñyekeme ndika iso ndinam mme nti utom emi edotde, ami ndiọñọke ewe ke ñkpemek.23Ami nsine ufọt ufọt. Ọdọñ mi eti eti ndikpọñ uwem emi ñkodu ye Kraist, emi edide se ifọnde ikan,24edi etim edi ata akpan ñkpọ ke ntak mbufo ami ndika iso ndidu uwem.25Ami mọyuhọ ke emi ndien, ke ntre ami mọfiọk nte ke ami ñyesuk ñka iso ndidu. Ami ñyeka iso ndidu ye kpukpru mbufo, man ami ndian ñkpọ ke ñkọri mbufo ye inemesit ke mbuọtidem mbufo.26Ke ntre, ke ami mma ntọñọ ntak ndu ye mbufo, eyenyene ediwak ntak ndibure mbure ke ami, ke uwem mbufo ke Kraist Jisọs.27Ke emi, idem akpan ntak edi emi: nte ido uwem mbufo asaña ekekem nte Eti Etop Kraist oyomde, man otodo ye ami ndide ndise mbufo ye ami meñnyuñ ndighe, ami ñyekop nte mbufo esọñọde eda ye iwuk kiet, eñwana eñwan ọtọ kiet ye ñkpasip uduak kiet, kabaña mbuọtidem emi otode ke Eti Etop Kraist.28Ekukop ndik ebaña mme asua mbufo, enyene uko kpukpru ini, ndien emi eyenam mmọ efiọk ete ke mmimọ iyekpu, ndien mbufo eyekan, koro Abasi edi Enye emi ọnọde mbufo edikan.29Koro enọ mbufo ifet ndinam ñkpọ nnọ Kraist, idighe ke ndibuọt idem ye Enye ikpọñ ikpọñ, edi, edi ke edikut ukut nnọ Enye ñko.30Ke emi mbufo emekeme ndida ye ami ke eñwan emi. Edi ukem ukem eñwan emi mbufo ekekutde nte ami ñwanade ke mme ini emi ekebede, kpa enye ke ñka iso ndiñwana, nte mbufo ekopde.Biblica, Inc.