Efisọs5
Biere Ndinem Abasi Esit
1Sia mbufo edide mme ndima nditọ emi Abasi obonde, mbufo enyene ndidomo ndibiet Enye.2Ana nte ima akara uwem mbufo, kpa nte Kraist akamade ñnyin okonyuñ ayakde uwem Esie ọnọ ñnyin, nte enem ufuọñ enọ ye uwa emi enemde Abasi esit.3Sia mbufo edide ikọt Abasi, ikpenaha mme owo etiñ ikọ ebaña mbufo ke se itukde use, mme mme etime etime ido, mme idiọkitọñ.4Inyuñ inenke mbufo ebuk mme ndedehe mbuk, enyuñ enam mme ndedehe mbuburu ikọ inua. Utu ke oro, mbufo ekpenyene ndinọ Abasi ekọm.5Akpana mbufo etim efiọk emi ete, ke baba owo ndomokiet emi edide owo use, owo emi misanake mme owo idiọkitọñ (koro idiọkitọñ edide edikpono ndem) idinyeneke udeme ke Obio Ubọñ Kraist ye eke Abasi.6Ekuyak owo baba kiet abiaña mbufo ye ndisime ikọ, edi ke ntak mme ñkpọ emi ke iyaresit Abasi edisim mme mmọ emi misukke ibuot inọ Enye.7Ke ntem ekunyene ñkpọ baba kiet ndinam ye mme utọ mbon oro.8Mbufo ke idem mbufo ekesidu ke ekim, edi, sia mbufo ema ekekabade edi ikọt Ọbọñ Jisọs, mbufo eyedu ke uñwana. Ke ntre mbufo enyene ndidu uwem nte mme mmọ emi edude ke uñwana.9Koro edi uñwana ada uforo mbuñwum nti ido, edinen ido, ye akpanikọ edi.10Ñwana ndikpep se inemde Abasi esit.11Ekunyene ñkpọ ndomokiet ndinam ye mme ikpuikpu ñkpọ emi mme owo enamde, emi edide utom ekim. Edi ekam eduri mmọ ewọrọ edi ke uñwana.12Edi ata ñkpọ but nditetiñ mbaña se mmọ enamde ke ndibe.13Ndien ke ema ekeda kpukpru ñkpọ ewọrọ edi ke uñwana, do ke ediyararede ata obot mmọ,14koro kpukpru se ema eketim eyarade, akabade edi uñwana. Ntak edi oro edọhọde ete, “Demede ke idap afo emi edede, ñnyuñ set ke ñkpa! Ndien Kraist eyeyama ọnọ fi.”15Ke ntem, ekpeme eti eti nte mbufo edude uwem. Ekudu uwem nte mme ọkọi edi edu uwem nte mme enyene ibuot owo.16Eda kpukpru nti ifet emi mbufo enyenede esin ke nti edinam, koro mme usen emi ediọkde.17Ekudi mme ndisime, edi edomo ndifiọk se Abasi oyomde mbufo enam.18Ekukpa mmin, emi edisinde mbufo ke nditaha, utu ke oro, eyọhọ ye Edisana Spirit.19Etiñ ikọ ye kiet eken eto ke mme ikọ mme Sam enọ Ọbọñ, ye itoro ke esit mbufo.20Enọ Abasi Ete ekọm kpukpru ini ke kpukpru ñkpọ ke enyiñ Ọbọñ ñnyin Jisọs Kraist.Mme Ibet Nte Ekemede Ndinam Ufọk Fo Odu Ke Emem
21Esuhọde idem mbufo enọ kiet eken, ke ntak editeñe emi mbufo eteñede Kraist.22Iban, esuk idem enọ mme ebe mbufo, nte esuk enọ Ọbọñ23Koro ebe enyenede ukara ke idem añwan esie, kpa nte Kraist akarade ufọk Abasi ndien Kraist ke idem Esie edi Andinyaña ufọk Abasi emi edide ikpọkidem Esie.24Ndien ke ntre iban enyene ndisuk idem mmọ ofuri ofuri nnọ mme ebe mmọ, ukem ukem nte ufọk Abasi osukde idem ọnọ Kraist.25Mme ebe, ema iban mbufo ke ukem ukem usuñ emi Kraist akamade ufọk Abasi okonyuñ ayakde uwem Esie ọnọ ke ntak esie.26Enye akanam emi ndidiañade ufọk Abasi nnim nnọ Abasi, oto ke edida ikọ nte mmọñ ñyet enye asana,27man Enye akpada ufọk Abasi ọnọ idem Esie, ye kpukpru uyai Esie, emi asanade onyuñ ananade ndo, inyuñ inyeneke mme mbiara efen ye ediñwune.28Akpana mme ebe ema mme iban mmọ ukem ukem nte mmọ emade ikpọkidem mmọ. Ebe emi amade ñwan esie ama idem esie.29Akananam owo ndomokiet isuaha idem esie. Utu ke oro, enye ọnọ enye udia onyuñ ekpeme enye eti eti, ukem ukem nte Kraist anamde ye ufọk Abasi;30koro ñnyin idi mme andibuana kiet ke ikpọkidem Esie.31Nte ikọ Abasi etiñde, ete, “Ke ntak emi, eyen erenowo eyekpọñ ete esie ye eka esie, ndien adiana ye ñwan esie, ndien mmọ mbiba eyekabade edi kiet.”32Itie ñwed Abasi emi ayarade ata ntọtuñọ, akpanikọ, ndien ami mọdiọñọ nte ke itie emi otuk Kraist ye ufọk Abasi.33Edi onyuñ otuk mbufo ñko, ebe kiet ekededi enyene ndima ñwan esie nte idem esie, ndien ñwan kiet ekededi enyene ndikpono ebe esie.Biblica, Inc.