LUKAS6
1Tei isa andrau sabat, Yesus lukun murid-murid-Ne malan nangkah ume gandum. Murid-murid-Ne ngutik insoi gandum, ngisune pakai tangan de ngelepak apene, tahui kuman usi gandumne.2Pipire pimimpin agama Yahudi neke kolompok Parisi kuhui, “Gawian hiyo sala! Praturan agama taka ngai lun bagawi tei andrau Sabat.”3Samut Yesus lukun ire, “Sareh kon piji ngabasa Kitab Suci tentang kesah Raja Daud lukun lun-lun sa ngumane. Hayak ire lau,4Daud huluk tong huang Blai Allah, nigo roti sa haot dokokoi tong Allah. Munurut praturan agama taka kohoi Imam agama bo sa tau kuman roti hiyo. Tapi tei hayak hiyo, Daud kumanne tahui ne gin ngokoi roti hiyo tong lun-lun sa umane.5Tahui Yesus kuhui, “Anak Mirisia nguasa andrau Sabat.”6Tei isa andrau Sabat sa lain, Yesus huluk tong huang blai uneng simihiang de ngalajar. Tei hiyo naan lun sa tangan sananne lumpuh.7Naan guru-guru agama Yahudi lukun lun-lun Parisi. Ire kelo kasala Yesus de tau nandrah Ne. Munurut praturan agama, lun dakai bagawi tei andrau Sabat. Jari ire niliti Yesus, kakan neau amun Ne sagar pamaeh lun hiyo tei andrau Sabat.8Tapi Yesus tanau pikiran ire. Ne kuhui lukun lun sa tanganne lumpuh hiyo, “Ayu tong tama ti. Mindri tei ti.” Tahui lun hiyo mindri, maju tong tama.9Uhui Yesus lukun ire, “Ku naan panane dela kon, ngunau ti: Hiye sa mo dakai tei andrau Sabat, gawi sa asuh atawa gawi sa dat; nyalamat lun atawa ngajanganne?”10Yesus neau tong kililing kongoreng ire. Uhuine lukun lun sa tanganne lumpuh hiyo, “Oloi tangan nu!” Lun hiyo ngoloi tanganne, tahui tanganne maeh.11Guru-guru agama lukun lun-lun Parisi hiyo sangit bebene. Ire malai mampakat ngunau awe sara ngalawan Yesus. Yesus medi kuduablas rasul-Ne.12Tei waktu hiyo, Yesus tulak tong bontot de bodoa. Sakamau malem Ne bodoa tong Allah.13Andrau isane libas mateandrau hulet, Ne nerau murid-murid-Ne hawi, tahui Ne medi dua blas lun neke ire. Lun-lun ti dukuhui Ne ‘rasul.’14Simon (sa dukuhui-Ne Petrus), lukun Andreas puloksanai Simon; Yakobus lukun Yohanes, Pilipus lukun Bartolomeus,15Matius lukun Tomas, Yakobus anak Alpeus, lukun Simon (lun Jelot),16Yudas anak Yakobus lukun Yudas Iskariot sa tahui jari penghianat.17Libas hiyo Yesus minau neke bontot dadayo lukun rasul-rasul hiyo. Ire tunuk tei uneng sa rata. Tei hiyo haot simpun deo murid-Ne lukun deo lun lain neke kongoreng daerah Yudea, Yerusalem, lukun neke kota tei iring tahik, nehiyo Tirus lukun Sidon.18Ire hulet de kiringo Yesus, lukun de panamaeh neke reten ire. Ire sa duhuluk roh jahat hawi lei tahui panamaeh.19Kongoreng lun burusaha tangku Yesus, gana naan kuasa losek neke Ne sa pamaeh kongoreng ire.20Libas hiyo, Yesus neau murid-murid-Ne, tahui kuhui,Keneberkat kon sa susah, gana kon hiyo warga Kerajaan Allah!21Keneberkat kon sa lau hayakti;gana kon sagar piniwising nireh!Keneberkat kon sa nangis hayakti;gana kon sagar kimihi nireh!22Keneberkat kon sa kunule, tunulak, kinihina, tanandrah jahat gana prasaya Anak Mirisia!23Begoh bo tei rahat kon dakawi ngunau hiyo. Mensit lukun begoh, gana kon sagar halu upa gaya tei sorga! Gana tei jaman hurap datu-nini ire gawi sara sa sama ngunau nabi-nabi.24Tapi Allah sagar nguhukum kon sa sugih, gana kasanang kon kohoi tei dinia ti bo.25Allah sagar nguhukum kon sa wising hayakti, gana kon sagar lau nireh.Allah sagar nguhukum kon sa kimihi hayakti,gana kon nangis hampe nitir nirinak nireh.26Tapi Allah sagar nguhukum kon sa sugih hayakti, tanango kongoreng lun, gana ngunau hiyo lei nabi-nabi palsu tanango awi datu-nini kon.”27“Tapi lukun kon sa kiringo Ku, Ku kuhui: Sinta bo musuh kon. Gawi bo sa asuh lukun lun sa gli lukun kon.28Uhui bo kongoreng sa asuh tentang lun sa nyumpah kon, lukun bodoa bo dela lun sa gawi jahat lukun kon.29Amun lun ngapek pahu nu sa isane, dihene ne ngapek pahu nu sa tuhine. Amun jubah nu darampas, okoi hapi nu.30Amun naan sa onok hiye bo tong nu, okoi! Amun lanu dikigo lun, ada onokne waleng!31Gawi sa asuh lukun lun lain, sama ngunau kon kakan lun lain gawi sa asuh lukun kon.32Amun kon sinta kohoi lukun lun sa sinta kon, hiyo mo susuatu sa istimewa hampe patut halu tango. Gana lun sa bodosa gin sinta lun-lun sa sinta ire.33Amun kon gawi asuh kohoi lukun lun-lun sa gawi asuh lukun kon, hiyo mo susuatu sa istimewa hampe patut halu tango, gana lun bodosa gin gawi ngunau hiyo.34Amun kon pitihau duit kohoi lukun lun-lun sa inuh nyumpudine hiyo mo istimewa hampe halu tango. Gana lun sa bodosa gin pitihau duit ne lukun sasamane. Amun duit hiyo sagar sunumpudi.35Tapi kon harus sinta musuh. Gawi asuh lukun ire. Pitihau lukun ire ada ngaharap waleng. Amun kon gawi ngunau hiyo, kon sagar halu upa sa gaya. Kon sagar jari anak-anak Allah Sa Paling Bukuasa. Gana, Ne asuh lukun lun-lun sa mo tanau berterima kasih. Ne asuh lukun lun jahat.36Kon harus ngahi, sama ngunau Allah Bapa kon ngahi.”37“Ada nu ngahakim lun lain, maka kon mo sagar dahakim Allah. Ada pasala lun lain, maka kon mo sagar panasala, Allah sagar ngampun kon.38Okoi tong lun lain, maka Allah sagar ngokoi lukun kon pongokoi sa bilimpah-limpah. Ingat: Ukuran kon dapakai de ngukur lun lain, Allah sagar pakai ukuran sa sama hiyo de ngukur kon.”39Yesus ngesah perumpamaan ti lukun ire. Uhui-Ne, “Amun lun pehe kinam ngayak lun pehe sa lain, sareh kuruehne sagar ratu tong huang luang.40Murid mo jari labih moh neke gurune. Tapi amun tupon kongoreng pelajaranne, ne jari sama lukun guru ne.41Kunohiye kon neau kuruping kayu huang mate puloksanai nu, padahal baluk sa tei mate nu gagalo mo kon kite?42Ngunauawe kon inuh kuhui lukun puloksanai nu, ‘Ayu, puloksanai, ku ngolosek kuruping kayu hiyo neke mate nu,’ padahal huang mate nu gagalo naan baluk sa mo kon kite? Eei lun munapik! Losek bo dele baluk sa naan tei mate nu gagalo. Japo kon inuh neau jelas lukun inuh ngolosek kuruping kayu neke mate puloksanai nu.”43“Poneng sa subur mo ngahasil bua sa boto. Ngunau hiyo lei poneng sa mo subur mo ngahasil bua sa asuh.44Tiap poneng dikinut neke buane. Jeung sa buruhi mo ngahasil bua ara, lukun haket buruhi mo ngahasil bua angur.45Lun sa asuh ngolosek kongoreng sa asuh gana ahengne bilimpah lukun kangasuh. Lun sa jahat ngolosek hal-hal sa jahat gana ahengne penu kajahat. Gana sa dukuhui mulut hiyo sa losek neke aheng ne.”46“Ukohiye kon kohoi nerau Ku ‘Tuhan, Tuhan,’ tapi mo ngagawi punguhui Ku?47Hayakti Ku sagar ngokoi perumpamaan tentang lun-lun sa hawi tong-Ku, ringo punguhui-Ku, lukun ngagawine lei.48Ire sama ngunau lun sa rahat mangun blai, ire ngadi lalalem tahui gawi dasar ne tei munan watu. Rahat juhu lukun ranu ruap tahui nampuh blai hiyo, blai hiyo mo guguong, gana panangun lukun kuat.49Tapi lun sa kiringo punguhui-Ku tahui mo ngagawine, ire sama ngunau lun sa pikindri blai awe dasar sa kuat. Rahat naan juhu, nampuh maka blai hiyo tempong lukun bujur-bujur rapai.”
Pioneer Bible Translators