LUKAS11
1Tei isa andrau Yesus bodoa tei isa uneng. Rahat ne tupon bodoa, isa neke murid-Ne kuhui lukun-Ne, “Tuhan, ngalajar kamin bodoa, sama ngunau Yohanes ngalajar murid-muridne bodoa.”2Maka Yesus kuhui, “Amun kon kakan bodoa, nguhui ngunau ti:‘Bapa, madahan aran-Nu tanango,Kerajaan-Nu hulet.3Okoi tiap andrau okan kamin susukupne.4Ngampun dosa-dosa kamin,gana kamin gin ngampun sitiap lun sa basala lukun kamin.Ada koit kamin tong huang pencobaan.’”5Libas hiyo tahui Uhui-Ne, “Misalne naan lun neke antara kon selenga naan kawal sa tunuk tei blai nu gana ne rahat huang pangalan oro. Tapi nu awe naan okan hiye-hiye de sinidia delane. Jari, ble haot botuk malem, nu harus tulak tong blai tetangga nu, konok telu bulot roti.7jakane tetangga nu hiyo neke huang blai ne nyamut ngunau ti, ‘Ada peheka ku! Jawong haot kununsi, ku lukun anak-anak ku haot mandre. Ku mo inuh buat lukun ngokoi hiye-hiye tong nu.’8“Tahui ngunau awe?” uhui Yesus libas hiyo.” Ku kuhui, oi! Ble nu tetanggane, ne mo kakan sele lukun ngokoi roti tong nu. Tapi gana nu mo kinam mangan talalahui onok, maka ne sagar sele, de ngokoi lukun nu hiye sa penerlu nu.9Jari Ku kuhui lukun nu: Onok bo, maka kon sagar dokoi; elo, maka kon sagar halu; ngatok, maka jawong sagar tenengau dela nu.10Gana lun sa onok sagar nirime, lun sa kelo sagar halu, lukun lun sa ngatok, sagar tenengau jawong.11Tei antara kon hiye naan amai sa ngokoi nipe tong anak ne, amun ne onok kenah?12Atawa ngokoi puyakala, amun ne onok telui?13Amun kon lun sa bodosa bo tau ngokoi sa asuh tong anak kon, nahani Allah Bapa sa tei sorga! Ne sagar ngokoi Roh-Ne tong ire sa onok tong-Ne.”14Tei isa andrau, Yesus ngusir roh jahat losek neke erai kulun lun sa bisu. Libas roh jahat hiyo losek ne malai tau bapaner. Deo lun tei hiyo emah lukun sanganga.15Tapi antara ire naan sa kuhui, “Ne ngusir roh jahat pakai kuasa beelsebul, kapala roh jahat hiyo.16Tapi naan lei lun sa onok Yesus gawi mujisat de ngubukti kuasa-Ne neke Allah.17Tapi Yesus tanau pikiran kongoreng ire. Uhui-Ne, “Amun isa negara pisai darai tei huang kolompok-kolompok sa saling bukumusuh, sareh negara hiyo sagar binasa. Amun anggota keluarga saling bukumusuh, sareh keluarga hiyo sagar hancur.18Ngunau hiyo lei tei huang kerajaan Setan; amun isa kolompok bulo lukun kolompok sa lain, kerajaan hiyo sagar runtuh. Kon kuhui Ku ngusir roh jahat pakai kuasa Beelsebul.19Amun ngunauhiyo, lukun kuasa lun-lun sa uma nu ngusir roh-roh jahat hiyo? Lun-lun sa uma nu hiyo gagalo sa ngubukti bahwa kon sala!20Tapi, sa bujur nehiyo Ku ngusir roh jahat pakai kuasa Allah. Maka, hiyo baarti Kerajaan Allah haot hulet tong kon. 21Naan lun sa kuat, basanjata lengkap. Amun ne ngajaga blaine, maka aman kongoreng milikne.22Tapi amun lun sa labih kuat manyarang lukun pakalah ne, maka lun sa labih kuat hiyo sagar ngarampas kongoreng sanjata sa kanaharapne, tahui nyabagi kongoreng barang-barangne. 23Lun sa mo uma Ku, subujurne ngalawan Ku, lukun lun sa mo kawat Ku, subujurne pibijat gawian-Ku!”24Yesus kuhui eso, “Amun roh jahat losek neke lun, roh hiyo bikililing tong uneng sa meang de elo uneng tihut. Tapi ne mo halu. Tahui, ne kuhui, ‘Ku sagar waleng tong lun sa haot dewelah ku!’25Rahat hampe tong lun hiyo, ne neau lun hiyo sama ngunau blai sa barasih lukun taatur.26Tahui ne tulak, lukun koit pitu roh sa lain sa labih jahat neke ne ire huluk tong huang lun hiyo muneng tei hiyo. Ahirne, leon lun hiyo jari labih dat neke sa temane.”27Rahat Yesus ngajar lun deo hiyo, naan wawei neke antara ire sa kuhui lukun Yesus. Uhui wawei hiyo, “Keneberkat inai-Nu, gana ne melahirkan lukun pagaya Nu!”28Tapi Yesus kuhui, “Subujurne, labih keneberkat kongoreng lun sa kiringo Punguhui Allah lukun ngagawine!”29Rahat labih deo eso lun hulet tong uneng Yesus ngalajar, Ne kuhui, “Bujur jahat lun-lun jaman ti. Ire onok Ku gawi mujisat de ire tau prasaya lukun Ku. Tapi mujisat mo sagar dokokoi tong ire sama sakali kecuali mujisat nabi Yunus. 30Sama ngunau hiyo nabi Yunus jari mujisat dela lun-lun Niniwe, ngunauhiyo lei Anak Mirisia sagar jari mujisat dela lun-lun hayak ti.31Tei jaman hurap naan ratu Seba tei tuhi selatan Israel. Ne malan oro bebene. De tau kiringo punguhui sa bijaksana neke Raja Salomo. Tapi hayakti naan sa labih bijaksana neke Raja Salomo. Jari, tei Andrau Penghakiman Allah nireh, Ratu Syeba sagar mindri lukun bersaksi dela ire.32Ngunau hiyo lei, tei andrau penghakiman Allah lun-lun Niniwe sagar mindri lukun basaksi dela ire, gana lun-lun Niniwe botobat waktu Yunus ngibirita punguhui Allah. Tapi tei ti naan sa labih gaya neke Yunus.33“Amun naan lun sa nutung pilita, ne mo nyiok atawa nalou ne pakai pahat. Tapi, ne melah pilita hiyo tei uneng sa tubuka de kongoreng lun sa huluk tong huang blai tau neau cahayane.34Mate ngunau pilita dela tenga. Amun mate lun asuh baarti kongoreng tenga ne tarawa. Tapi amun mate lun mo asuh, baarti kongoreng tenga ne mieng.35Gana hiyo, ati-ati! Ada hampe nu bipikir naan tarawa tei nu, tapi subujurne lain tarawa tapi mieng.36Amun kongoreng tenga nu tarawa, lukun awe naan mehene sa mieng, maka kongoreng tenga nu hiyo tarawa ngunau pilita.”37Libas Yesus tupon bapaner, naan lun Parisi ngunang Ne de kuman tei blaine. Tahui, Yesus tulak tong blaine, tahui maharung kuman tei hiyo.38Lun Parisi hiyo lengon neau Yesus kuman tapi Ne mo mui tangan.39Tahui Tuhan Yesus kuhui lukun lun Parisi hiyo, kon lun Parisi biasa ne ngarasih sangkir lukun lumah tuhi ongon ne bo. Tapi tei huang aheng nu gagalo eso mangagou lukun jahat.40Kon pangong! Allah sa gawi tuhi ongon, sareh gawi tuhi huangne lei, behene?41Dari pada ngarasih tuhi ongon sangkir lukun lumah hiyo, labih asuh okoi bo sa naan tei huang tong lun-lun susah. Japo kon sagar bujur-bujur barasih tei tama Allah.42Allah sagar nguhukum kon lun-lun Parisi gana gawian kon ngunau ti. Kon ngokoi tong Allah perpuluhan neke hasil kongoreng pumule hampe sa kidik ngunau rarampah. Tapi kon mo adil lukun lun lain. Kon mo bujur sinta Allah. Tapi ada hampe kelot gawi sa adil lukun lun lain lukun sinta Allah!43Allah sagar nguhukum kon lun-lun Parisi gana gawian kon ngunau ti: tei huang blai simihiang kon jorih maharung tei tama, uneng sa terhormat. Tei pasar kon jorih tanango tei tama lun deo.44Allah sagar nguhukum kon lun-lun Parisi. Kon ngunau ogang sa awe bapatuk, sa tanajek-tanajek lun mo ire sadari.45Tahui naan guru agama Yahudi kuhui lukun Yesus, “Bapa Guru, gana punguhui ti kamin guru-guru agama kinihina.”46Yesus nyamut, “Allah sagar nguhukum kon guru-guru agama Yahudi, gana kon peweat lun-lun lukun deo praturan agama sa heka. Tapi kon gagalo mo kakan kawat ire dodoho de praturan hiyo tau dakawi ire!47Allah sagar nguhukum kon guru-guru agama Yahudi. Tei jaman hurap, datu-nini kon munu nabi-nabi, tahui kon ngabangun tugu de ngingatne48Jari gawian kon baarti sama gunau gawian datu-nini kon sa munu nabi-nabi hiyo, tahui mangun tugu de ngingatne.49Hiyo ganane, Allah sa bijaksana kuhui bahwa Ne sagar ngirim nabi-nabi lukun wakil-wakil tong kon lun Israel, Tapi kon sagar munu mehene lukun kon sagar patais mehene.50Allah gawi hiyo de lun-lun jaman ti duhukum gana pumunu sa dakawi nama kongoreng nabi malai neke dinia tenempa,51malai munu Habel hampe munu Jakaria tei antara mesbah lukun Blai Allah. Prasaya: Lun-lun jaman ti pasti sagar duhukum gana kongorengne hiyo.52Allah sagar nguhukum kon guru-guru agama Yahudi, gana kunci de nengau jawong pengetahuan neke Allah dintu kon. Tapi kon gagalo mo huluk tong huang de kelo pengetahuan hiyo. Kon gin nahalang lun-lun sa burusaha huluk.”53Libas Yesus tupon kuhui kongoreng hiyo, Ne tulak neke blai lun Parisi hiyo. Neke hiyo, lun-lun Parisi lukun guru-guru agama Yahudi sangit nantang Ne. Ire talalahui tane lukun Yesus de nguji Ne.54Ire kakan Ne kuhui sa sala, sa tau pakai ire de nandrah Ne.
Pioneer Bible Translators