Eermiyaasikaa Raaga17

Yihudake Ardixxa Cubbonna Insa'ne'n Geyeeka Xixichcho

1«Yihudaxxi cubbo sibiljnxe tiikkonni,afo'o qa'latteexxe Almaazi hinaake fiixe kinjinni, borreessendee'en;Godobi insa'neki giddo,insa'neke tolchimalchike cunnuchchuwwa'n borreesse'ne'en.2Oosuwwa insa'nexxi midde gatteebaang,shafi callixxe haqqe hunda,Qeerrake tulluchchuwwi hana hedheeka,tolchimalchuwwanna Asheera hiyyendaaxxe fukkuwwa hendaan.3Boga atike duuchcha'ni hujenedeexxe cubbonaa'ni kexxeexxa,boga atike'ni hexxeexxe kooba anxe'ni,Horattetteechcho duuchcha,magenooffattattaxxe tulluchchiwwininni,saamemaashsha assannon.4Hujjetaxxe balleessa'aati'a uwwennaka geego gophphatton;Egendeboxxoke boga'n,naapha atike garba atee assannon;Duuchchi woddi'a ha'itaaxxa,mufe anxixxa giira ati ha'ishetten» hiyye.

Gargar Hedheeka Hiyyichchuwwa

5Duuchchi Woddiki Gootti hiyya'nee qici,«Manjoke'ni adde assedhaak,manjoke'ni irkataak,godobik Duuchchi Woddike Goottana'n bayyataak badinemmeeken.6Qiilla gammoojje'ni hedheeke waaccoshsha kadaan;eloxxa yaane uudabaan;Manji hedhebaake maxinetike boga'ni,mittichchi hedhebaake qiilla gammoojje giddo hedhaan.
7«Yaane kinn Duuchchi Woddika Gootta adde assedhaak,adde isixxinna Duuchchi Woddike Gootta kaddeek manji eebbiseme'eken.8Isi galaani qarqara lateemmakenna,hidda wodi'i giddo olteeke haqichchishshaten;Jabaxxi arishsho gandaa wodda sodaatabaan;shafikinna duuchchi wodda haanjedha'n hedhaani,Xeeni ganammabaake baro'ni midde ruphphi hiyyabaan;gummatanna gummisa'ne hedhaan» hiyye.
9«Manjiinka godoba ayyete ege'na;xaqartichchakenna hara fuggokenayyete ege'naak?
10«Ani Duuchchi Woddiki Gootti manjo duuchcha me'inji isikishshanni,huje isixika hira uwwatee,Godobi giddika yaada memmekisannon;wodana isikanna geeqqishshanon» hiyye.
11Oribeloxxa karra bukki assedhaak manji,ifike kadebaaka quuphphe kabbexxee quqquussitammaxxe'e gogorreshshaten;Harumaanxe wogga'ni waale me'aan;gowwumma ifixxinna uduma iso'o'n leellitaan.
12Galmi ho'noki hedheek boonchi,olmii'ninn lumoxxe ulfinnixxe moote'niten.13Koo Isira'eeli'a adde kaddeettek Duuchchi Woddike Gootta;atenani finqile me'aaki duuchchi salphataan;Dudduro ate'ni wirri hiyyeek duuchchi butta wabbi hiyyaan;hedhotike wodi'ixxa muumme,Duuchchi Woddika Gootta waalemmaxxeten.

Ermiyaasi Duuchchi Wooddika Gootta Addato'a Soodatee qico

14Koo Duuchchi Woddike Gootta ati anee fayyissottole fayyisi,anjirtottole anjiremannon;atee galateeffatonnaa'a.15Insa'nenna lenbe lebeexxi,«Duuchchi Woddike Goottiki hiyyichchi habata hedhe?Ta'ani kunn muuxemowwaali» ane'e hinaani.16Allalsanjoke kade ati'a ergatematenaa'n udumi'a higebo'noni;fuggoxxa hedebo'noxxa atinni egendeetteni;anke afo'onaa'n fulda'neexxi ate'n sho'ondeexxebaani.17Ati rakkotixxe barrake anke golla kaddettaxxee,ane'e bararassitattoke kaddoxxe.18Anee shorra'neekiri shookowwaali;ane kinn shookishshoxxe;Insa'ne alannaashsha assi;ane kinn alayyokenaa'n gatisi;Fuggoxxi insa'ne'n geltaashsha assi;jabaxxa ba'ne insa'ne'n geessisi.

Sanbatinxa Barra Ulfeessatixxee

19Duuchchi Woddiki Gootti ane'e hiyyee qici, «Martettexxi Yihudiinki moyanjuwwi fulammaxxenna e'yammaxxe ardiinxe hula'n, wele Iyyerusaalemixxe huluwwa duuchcha'n uurri.20Insa'ne hitatto qici, ‹Tenne huluwa'n e'yitina'neeke Yihudiinke moyanjuwwa; Yihudinke ardanna Iyyerusaalemi giddo hexxina'neeki duuchchi; Duuchchi Woddike Goottika hiyyichcho laqqe.21Duuchchi Woddiki Gootti hiyya'nee qici, «Sanbatiinxa barra ba'o ba'exxine Iyyerusaalemixxe huluwwa'ni e'yishinabaashsha ifi'a heqqedhdhe.22Edika ha'noka annuwwa ajajennashshanni; sanbatiinxi barra woyyitette kaddeemmaxxe ulfeesse malee'e sanbatiinxa barra ba'o ba'exxinnee ifiifinge minenaa'ni ba'o ba'exxine fuldinnoqqe'e; mitte hujenna hujinnoqqee» hiyye.23Insa'ne kinn hiyyichcho anka lanqebaan; kassinna hinebaani; godobake'n fuggoxxa uggudhdhine ani'a ajajema ginbe.
24« ‹Yaane kinni ifi xexxe'achchoti an'a ajajendina'noole hiyya'neeni Duuchchi Woddiki Gootti; sanbatiinxa barra konne qachchixxe huluwaa'n ba'o ba'exxine e'ya gophphinoole; sanbatiniinxa barra mittechchonna hujjinebaang woyyoossitinoole;25Daawwitixxe moote'n hana ofo'lammaki moyanjuwwinna insa'neki jalqabuwwi konne qachchixxe huluwwa'n e'yinaani; fadhaduwwake'ninna fadhadiniinxe gaaruwwa'n ofole Yihudiinkinna Iyyerusaalemiki manni erqe kayyi'ni qoqqobee'na dangaani; kunni qachchinna duuchchi wodda ard hedhaake qachcha kadaan.26Ardi Yihudiinke qachchuwwanaa'n, Iyyerusaalemike qarqarii'n, Biniyaamike boganaa'n, qiilla gammoojjena'ninna Suubbichcha boganaa'n ittanni Negebii'n ciincatika tolchanna wele tolcha, midhatika tolcha, hixaanakanna galatinka tolcha abixxine Duuchchi Woddike Goottike minba'a dangaani.27Yaane kinni sanbatiniinxa barra Woyyitte barra assa gophphine; sanbatiniinxa barra ba'o ba'exxine Iyyerusaalemike qachchixxe huluwwaa'n e'yitine'e ajaja anka gibbinoole; Iyyerussaalemixxe huluwwa'ni kolluwwa ittaaxxa; xoxxabaaxxa giira ha'ishannoni.› »

The Word for the World International

https://app.library.bible/content/2b894378475c6aea