Eermiyaasikaa Raaga18
Ermiyaasi Odolcho Giissinammake Mine'n
1Duuchchi Woddike Goottana'ni Ermyaasiba'a dageeka hiyyichcho;2«Kexxe odolcho giissammake manjichchike mine'n mari; ookko hittattochcho ate'n kulannon» hiyye.3Aninna odolcho giissammakike manijichchike minibaa marenneni; isinna faarinka miyanna moleti hana hujaa'na'a uudenneni.4Dhoqqeti faarinka miya hujaammaxxi huje gorte; odolcho giissammakinna haseexxe wele bifa'ni higgeen giisse.5Duuchchi Woddiki Gootti hiyyichchi anibaa hiyya'n dageeqic:6«Koo, Isira'eelike ardaa odolcho giissammak assemmashshanni, aninna ha'no'n assa dande'abe'nota?» hiyya'neen Duuchchi Woddik Gootti; «Koo Isira'elike arda dhoqqe odolcho giissammakixxe anga'ni hexxemmashshanni ha'nonna ittanni anxe anga'ni hexxineen.7Ani mitte gosaka arda yookaan moyanjo hoyyonna'a, diigemashshanna xereme ba'aasha haaso'ennexxe yanna'n,8Xexxe'achchiisennek gosa gosak ardi fuggoxxenaa'ni higoole, ani assona hedennexxa fuggoxxa yaane'e waalannon.9Wele wodda mitte gosa gosak arda yookaan moyanjo jabeesse kaasonnaa haaso'e'na'a,10ani edo fuggoxxa assoolenna ani'a ajejema gophoole, isi'a assannon hiyye hedennaxxa eloxxa yaane waalannon.11«Ta'anna yoona Yihudake ardi'anna Iyyerusaalemi'i hedha'neeke hitattoqic, ‹Duuchchi Woddik Gootti yoona ba'ne ha'no'a qophpheessate'ni hedhennen fuggoxxa yaane ha'noo'ni i'lannoni. Tennexxee ha'no duuchching fuggoxxe hujenaa'ni higge. Me'injo ha'nokanna huje ha'nooxxa giissedhdhe.›12Insa'ne kinn, ‹Tola eloottoxxe. No'o hendennexxe'n itti jabaantannon mitti mitting fuggoka no'oka yaada hordonfaannen hinaan.› »Isira'elik Ardi Duuchchi Woddika Gootta Waaleexxa
13Tennexxee Duuchchi Woddiki Gootti hiyya'nee qici,«Abboo gosa gosaka arda,tenne labbaaxxi yaane ha'no giddo laqqine egende? Hitine qorre.Duuddo dubarichcho Isira'eeli,hara fuggoxxe yaane assiteen.14Libaanoosixxe koobanaa'ni lumollannakaade gophendee'e egendee?Koobatenaa'ni yaa'ak qiidaki wodi'iyaa'a waala?15Anki ardi kinni ane'e dedheen;woyi fulabaachchuwwi'a hixaana gubeen;Ifike yaada'n gorre,edike oranaa'ni guggufante;Dhuqidhuqqiyeeke ora'n,giissemebaaka elobaaka orainna me'ineen.16Bogi insa'neki duuchchi woddi'a,urume gataan;Ookkone sa'aki duuchchi mambe'a hiyya'niafo'o abixxe umo wirsaan.17Boroti darree'n gandammaxxe diidalloshsha,insa'nenge naaphi edo xeerannon;Ba'ne insa'ne'ni geltaaxxa barra,dudduro malee'e alba anka insa'ne'ni leellishabe'non» hiyye.Ermiyaasi'a Mari'anteeka Daba
18«Insa'nenna, Seeri qeesoletenaa'ni, gorsikinna beekoletenaa'n, hiyyichchikinna wabeekkoletena'ni gophemabaaxxe amme mee Eermiyaasixxe mallo: ammeyya: afo'iki miino, isi haaso'a'neexxa duuchcha laqa waalo» hiyye.19Koo Duuchchi Woddike Gootta ani hiyyaanexxa laqi;naaphi anee hiyya'neexxa caqasi.20Eloxxa hujeekik galati fuggoxxe?Insa'ne'n kinn bale ani'a qonte;Insa'ne'ni mufataboxxoshsha,ani ati edo uurre,insa'nexxe'e haaso'enaxxa hedi.21Tennexxee oose insa'nexxa solo'okeenna,wolaantichchakee sa'issite uwwi;Aruwwa insa'nexinna ila belo maseentotenna aro'i shi'witeexxe hiyyeette kanduun;labballi insa'nek qooma reyowwaal;ka'umikinna bagedoke'ni wolaantichchik mudowwaal.22Ani'e abishotee'e bale qonteemmaxxe'elekka anixxee sho'ik fonxoro fannemmaxxe'eKeekkantebaaba lolii manna ergitatto wodda;mini insa'nekenaa'ni raare kexxowwal.23Ati kinni Koo Duuchchi Woddike Gootta,ane'e shinno'a mari'anteexxe mari'e duuchcha egendeetten;Balleessa insa'nexanna gattowwaal hitoxxe;cubbo insa'nexxa deetoxxe;Insa'ne'e ati edo jibbemeke kandowwaal;mufattatto wodda insa'ne'a marartoxxe.The Word for the World International