Eermiyaasikaa Raaga16

Ermiyaasixxe Hedhoxxe'e Duuchchi Woddike Goottixxa Fedhi

1Duuchchi Woddike Goottiki hiyyichchi anibaa dageexxi,2«Konne boonchonaa'ni dubarte aaxoxxe'e; labbaxxanna meyyaxxa oose i'litoxxe'e»3konne boga'ni ilendaaxxe labbaxxenna meyyaxxe oose'aittanni insa'neke annuwwixxeenna amuwwaxxee'e Duuchchi Woddik Gootti,4«Duuchching fuggoke dhukkubinn mudaan; insa'ne'anna oo'nabaan;insa'neenna moongabaani; rensha insa'neka koriinsha hunnaani. Wolaantichikinna beelik mundaan; rensha insa'neka allaattenna biniinchake itaan» hiyye.
5Duuchchi Woddik Goottinna, «Eebba, jaalalanna gattowwaal anixxa konne ardanaa'n bayyiseennaxxe'e; oodhishshati mine e'yitottexxe; yaadda'ni ooxxota'a martoxxe» hiyya'nen Duuchchi Woddik Gootti.6«Konne boga'n hedheeki shiixxo lumoki reyaan; oodhaakanna moogaaka alfinabaan; insa'ne'a yaadexxi ifi ci'laakinna umo haaxxaaki hedhabaan.7Manjo shi'weeka jajjabeessate'e qore ra'isse iyyemaraaki hedhebaan; anna ama shi'weeka jajjabessatee ha'winaachcho iyyemaraaki hedhebaan.
8«Insa'nenni welti ofolde ittottaanna ha'witottaa jila hexxee mine'ni e'yitoxxe;9Ani dada duuchcha ajajanoki Duuchchi Woddiki Gootti Isira'eliki Magen hiyyannexxa caqasi: ati hexxetteke konne baro'ni; gammashshotikinna ilileettetik, meellatike sirbik hafuuri konne booncho'ni laqemabaashsha assannoni.
10«Tenne duuchcha konne ardi'n kuldatto wodda insa'ne; ‹Duuchchi woddiki Gootti tenne lumoxxa ba'ne no'on mayee'e lallabe? Balleessa no'oxxi maachcho? Duuchchi Woddike Goota no'oke Mageno'ni hunjennexxi cubbo heente?› hine'e ate'e qorroole;11Ookkone wodda atinna insa'ne'e hittato qici, ‹Ha'nok edik annuwwi ane'e waalemaxeeten› hiyya'neen Duuchchi Woddik Gootti ‹Wele magenuwwa hordofiyyoti ergatememmaxxeenna magenooffantemaxeeten; insa'ne ane'e waaleexxi finqille; seera ankanna heqqe'neba'a.12Ha'no kinni edike ha'noke annuwwi caala fuggoxxa assitine; mitti mitti ha'nong ani'a ajajendinammaxxa bakka godoba ha'noke'n fuggoxxa abixxitine me'itina'neexxa uudde.13Tennexxee ha'noo konne boginaa'n fulchennexxi ha'notenna kadde ha'noki annuwwa egendinebaake boga'n ha'no'o fugussannon; ha'no'a gattowwaal hiyyabe'non; ookkonna wele dharichcha magenuwwa hashshanna barra magenooffattinaan.

Isira'eliki Ardixxa Boo'ji'otenaa'n Higa

14«Tennexxee manni, ‹Isira'eel'i Gibtsee'ni fulcheeki hedhaake Duuchchi Woddiki Goottaa› hiyye kakatabaak bari dagaan; hiyya'neen Duuchchi Woddik Gootti.15Yaane kinn ‹Isira'eelika ardi middike boganaa'inna insa'ne'e xexeeremmake wele boga duuchchanaa'n fulcheeke hedhaak Duuchchi Woddike Goottaa› hinaan; edike annuwwa insa'neke uwwennake bogibaa insa'ne hiissannon.»

Daga'neeka Xixxichcho

16«Ta'a kinn heddo quluxu'me abidaaka manna ergannon» hiyya'neen Duuchchi Woddiki Gootti; «Insa'neenna abindaan. Okkonechchi uduma heddo adamaaka manna ergannon; insa'nenna kooba koobanaa'ni tullichchuwwi duuchchanaa'ni kinjuwiinxe wolo'uwwanaa'ni insa'ne adammee abindaan.17Assina'neexxa duuchcha uudannen; ani edo sho'ondaaxxi hexxebaan; cubbo insa'nexxi ani'a barraten.18Boga anka renchiishsha kaddeexxe battitte fakkuwwanni battoossinemmaxxe'e geego anka shookkishshaaxxe yaanuwanni wonshinemmaxxe'e hunjeexxe fuggoxena cubboxxe lame anga insa'ne'e xixannon» hiyye.

Ermiyaasixxa Soodachcho

19Jabeenna ankenna kollo anixxee,rakkotixxa barra irkote kaddeetteke Duuchchi Woddike Goottaa,Gosa gosaki ardi boginxe gabalanaa'ni,atiba'a dageexxi hiyyaaqic,«Ediki no'oki annuwwi mitte la'o fulabaaxxe,toliinxe fakkuwa'a dharichcha magenuwwa ifike asse'ne.20Manni umo ifike'e magenuwwa giissedhaa?Giissedha dande'aan iita hedheechchuwi kinni magenuwakebaan» hiyye.21«Tennexxee insa'nee barsiisannonhunna anixxanna lumminne ankata'a insa'ne'a barsiisannonSummi anki Duuchchi Woddike Goottakadeexxa konkaan» hiyye.

The Word for the World International

https://app.library.bible/content/2b894378475c6aea