Eermiyaasikaa Raaga15
Yihudake Arda'n murendaaxxa Murte
1Duuchchi Woddiki Gootti anee hiyyee qici: «Muusenna Saamu'eeli midde ani edo uurrinoole konne ardi'a godobi anki marara gophaammaxxee ani edii'n me'inaashsha assi.2Insa'neena atee'e, ‹Habaa'ata me'inanno?› hinoole; insa'ne'n hite kuldato qici: ‹Duuchchi Woddiki Gootti hiyya'nee qic:« ‹Dhukubiki reyaashsha murte uwwendeeki dhukubiki reyaan;Wolaantichchik reyaashsha murte uwwendeeki wolaatichinginn reyaan,Solo'iki reyaashsha murte uwwendeeki solo'iki reyaan;Booji'emaashsha murte uwwendeeki booji'eme'e me'aan.›3«Aninna shoole insa'ne biraachcho ergannoni,» hiyya'neen Duuchchi Woddik Gootti, «Kunnchchuwinna insa'ne shiye biraaka wolaantichcha rensha harkisaaka worsha; ittanni itte birtaaxxa allaattuwwanna binichchuwakeeran.4Yihudiink moyanji Hiziqiyaasik belti Minaase Iyyerusaalemi giddo hujeexxe balleessanaa'n kexxeexxa insa'ne'n iyyedagannoxxa yaane bogi duuchchik moyanjuwwi uude sodataashsha asannoni.5«Tee, Iyyerusaalemi ayyete ati'a marara?Ayyete ati'a oodha?Ayyete atibaa gore'e nage'a ate'e aadha?6Ane'e gibbeetteni,» hiyya'neeni Duuchchi Woddiki Gootti.«Dudduro wirri hiteetteni;Tennexxee anga anixxenn ate'e ganee balleessannon;ta'anni edi'a ati'a mararabe'no.7Midha diidallote'ni darbina'naa diidalessitammashsha,bogi giddike qachchuwwa duuchcha'n insa'ne xeerannon;Fuggoxxa assa waala gibeemmaxxe'e,arda anke'n yaaddo worannon;balatanna insa'ne'ni ibisannon.8Aro'i reyeexxe melaalleka laakkossa,abbaayyatike maanchi caala bira sa'issannon;Barra saafo'a dargageeyyetixxe amuwwa'n,ba'ne iyyedannon;Weekenshanna alayyo;dedhange'n insa'ne'n ibisannoni.9Torbaane ifixxa oose gopheexxi ama gaggabbaani,hafuura hiisedha dandettabaani;Barrandi ise'n hashshitaani;isenna salphatte shookkaani;Lubboti gatemmaka naaphi insa'neki edo,wolaantichchake sa'isse uwwannoni»hiyya'neni Duuchchi Woddiki Gootti.10Anixxamayyoo! Bogi duuchchi'a,moronshatikenna loli callike manjo kadenneka ane'e mayee'e, ildette!Ayyi'ana liqa uwweebe'non; ayyenaa'ninna liqeessedheebe'non;yaane kinni manji duuchchi ane'e yowa'neen.11Duuchchi Woddiki Gootti hiyyee qici:«Ee'e ate'e eloke yaadi'a woxxeenneken;rakkote'ninna fuggoxxe yanna'ni,dhugaandinn naaphi ate'e safataashsha assannon.12«Manji sibilo, middii'ni dageeka;sageettotika sibilo enqa dande'a?13Boga atike duuchcha'n,hexxeexxe cubbo atixxe duuchcha'a,Karranna qabeenna duuchcha,tola boddichcha boojinaashsha assannon.14Mufe anixxi ha'no'ni,giiratishsha ha'noo'ni bubbaan;Egendebexxoke boga'ni;naapha atike garba kadattoshsha assannon.»15Koo Duuchchi Woddike Gootta ati egende'etten;yoona ati ane'e hedhi; anee to'ati;anee shorrammakeera'ni halo fuli.Ati ossaamessake kaddeettaxxe'e ba'annoshsha assitoxxe'e;kunni yowwichchi duuchchi ane'e geye'eki atixxe buuto'a kadeexxa hedi.16Hiyyichchi atiki aniba dagee wodda gammadik adhdhennen;Koo Duuchchi Woddike Gootta Mageno;Summi atiki ye'ennaxxee,hiyyichchi atik ilileetetenna gammashshote ani'a kade.17Shaa shanbalaqqi hiyyaake manninni welti guddeebe'non;insa'nenni burraaqebe'noni;Anga atixxi ane'ni hana hexxemmaxxe'e, mufe atixxa ane'ni wonshiteettaxxe'e,qofinni ofo'lennen.18Dhibo ane'ni mayee jabaatte?Mada anixxi bukki hita'nebaachchi? Mayeete fayyita'nebaachchi mayeete?Ati baxxa'neexxe gootoshsha,dedhissammaxxe muumme mayee ane'e haakissatto?19Tennexxee Duuchchi Woddiki Gootti hiyya'nee qici,«Heduma atika anibaa hiissitottole aninna ati'a higannon;ani'aanna ergattatton;La'o afeeka haaso'a la'o afebaakenaa'n gargar hissite haasottottole,ati anke afo'o kaddatton;Ardi atibaa'a higa male,ati ardib'a martabexxon.20Konne ardi'a sageettotike sibiljike dalla'a,kollifantammake sageettotike dalla'ike sibiljo atee'e assannon;Atee anjironnaanna wodonna'a;ani atin welti hedhennaxxe'e,Ate'e lolloolenna middeate'e injifantabaan»hiyya'neen Duuchchi Woddik Gootti.21«Fuggaaleyyetenaa'ni ate'e wodannon;mararte afebaakerana'n atee anjirannon.»The Word for the World International