2 KOLINTO2
1Ni hahoho, nabongidi nzengolo meno bende mu lembolo vutuka ku yeno, mwanki lulembolo yena dyaka kyadi.2Tala ti nina luyenisa kyadi, buna nani waanyenisa dyaka kyese e? Tala ti ka ni yeno kaka ko ba naayenisi kyadi e?3Ni hahoho, nalusonikini bonso bu nasidi, mwanki bu nina kwiza tula, bantu baketi nyenisa kyese balembolo nyenisa kyadi. Bwabu nsiidi kiminu ti kyese kyani kidi mpe kyese ki yeno bamvimba.4Nina lusonikina mu manyongo na kyadi kikingi mu mutima, mpe na manswela mu meso. Ka mu luyenisa kyadi ko, kansi mwanki luzaba bwedi nalutiidi bubwingi.5Tala ti muntu wumosi ha kati dyeno wuyenisi munandi kyadi, ka mu dyambu dyani ko kayenini kyadi, kansi mu dyambu di yeno bamvimba, hoti mwa ndambu ha kati dyeno, mu lembolo hyokisa kitezo.6Muntu wu bobobo wufwanakani ba mubamina ku bantu babingi ha kati dyeno.7Kansi bwabu lufweti mulemvokila, na mu musyamisa, mwanki kalembolo kota mu kyadi kikingi kilendi mu zimbisa.8Ni hahoho, nina lulomba lumulonka ti lumutiidi bubwingi,9mu dyambu ti nalusonikina dyaka ebu: ntiidi mu lutonta mu tala ti lukwe vuminanga ntumunu.10Bu lwalemvokila muntu, meno mpe nina mulemvokila. Tala ti nalemvokidi muntu, hoti nkatika dyambu di hoho dye mulemvokila, mu dyambu dyeno nasididi bobo ha ntadisi yi Klisto,11mwanki tulembolo bika Satana katuyaala, mu dyambu ti makani mandi matuzebi.12Bu natula ku mbanza Towasi mu samuna Musamu wumbote wu Klisto, mpeleko Mfumu wunzibudila mwelo,13kansi mayindu mani maba mazuna ko, mu dyambu ti nayenda bata mpangi ani Tito ko. Ni hahoho nasala basisila mbote ni nayenda ku kizunga ki Masedwani.
Nungunu mu Yesu-Klisto
14Matondo ku Nzambi kwe tatamananga mu tunungisa mu Klisto na kwe tusadilanga mu mwangisa mu bibuka bimvimba nzayilu andi bonso mananasi ma mfuku yimbote.15Mu dyambu ti, mu Nzambi tudi bonso mananasi ma mfuku yimbote ma Klisto ha kati di yobobo bavulusu, na ha kati di yobobo bana zimbala:16Ku bantu eba mfuku yi lufwa yikwe natanga ku lufwa, mpe ku bantu bahiika mfuku yi luzingu yikwe natanga ku luzingu. Buna nani kwandi wudi wulunga mu kisalu kibubu e?17Mu dyambu ti, tuu bonso bantu bahiika ko, bakwe kitulanga Mambu ma Nzambi mumbungu. Kansi yeto Nzambi wutufidisa na tukwe zonzanga mu makedika mu nkumbu Nzambi ha ntadisi andi mu kintwadi na Klisto.Wycliffe Bible Translators, Inc.