2 KOLINTO1
Zimbote
1Meno ni Pawuli, Nzambi wu katumisa mu luzolo lwandi, mu ba ntumwa yi Klisto Yesu na mpangi eto Timote, nilusonikini yeno dibundu di Nzambi dii ku mbanza yi Kolinto na bantu bamvimba bavwihulu ku Nzambi baa mu kizunga kimvimba ki Akayi:2Bika Nzambi Tata dyeto na Mfumu eto Yesu Klisto kalusakumuna na kaluhaana kiyenge!3Nzitusu ku Nzambi, Yandi wudi Tata di Mfumu eto Yesu-Klisto, Tata difulukidi mu nkenda na Nzambi yikwe syamisanga bantu ntangu zimvimba!4Wukwe tusyamisanga mu mpasi zeto zimvimba, mwanki yeto mpe tusyamisa yobobo baa mu mpasi zi mumpila-mumpila mu nsyamusu yi tukwe tambulanga yeto bende ku Nzambi .5Bonso bu tuna yenina mpasi zizingi mu kintwadi kyeto na Klisto, ni bwabobo mpe tuna syamusu bubwingi mu Klisto.6Ni mu dyambu dye lusyamisa na mu lutabila, tuna kwe yenini mpasi. Tala ti tusyamusu, mwanki lubaka mbombolo, yaaluhaana ngolo mu vibidila mpasi zimosi na zo zi tuna vibidila yeto mpe.7Ni hahoho, kivuvu kyeto mu yeno kisyama kidi, tuzebi ti bu ludi kintwadi mu mpasi zeto, yeno mpe ludi kintwadi mu nsyamusu eto.8Mpangi zeto, tutiidi luzaba mfyetokoso zizingi zi tuyena ku kizunga ki Aziya. Mfyetokoso bezozo zihyoka kitezo na ngolo zeto. Zizimbisa kivuvu kyeto na tubanza ti twaabwesa ba bamoyo ko.9Kansi ku nsye mitima myeto, tuyena ti tufwidi na tusa dyaka kivuvu mu yeto bende ko, kansi mu Nzambi kwe fulukisanga bafwa.10Yandi wutukuula mu lufwa lubobo, waatukuula dyaka. Ninga, tudi na kivuvu mu yandi ti waatukuula dyaka mu lufwa.11Yeno mpe lutusadisa mu zinsambulu zeno. Bwabobo, Nzambi kaavutudila mvutu mu zinsambulu zi bantu babingi mu dyambu dyeto, waatuhidikila mambote, mwanki bantu babingi baavutudila Nzambi matondo mu dyambu dyeto.Vema na Makani ma Pawuli
12Musamu wumosi wuna tuyangidika, ni ndinga yina kwe te kimbangi ku nsye mitima myeto ti tudyata mu nza, sungula ha ntadisi eno, tudyatila mu makedika na mu ludedomo lukwe fumanga ku Nzambi. Ka tutwadusulu mu ndwenga zi kimuntu ko, kansi mu mulemvo wu Nzambi.13Mu mikanda myeto tuna lusonikina misamu mihiika ko, kansi ni myo mi lukwe tanganga momo na mi lutekidi zaba. Mpe nii na kivuvu ti lwaabakula myo bonso bufwanakani,14mu dyambu ti lubakudi ndambu. Lulendi kiyangidika mu dyambu dyeto, bumosi yeto mpe tulendi kiyangidika mu dyambu dyeno, mu kilumbu kyaakwiza Mfumu eto Yesu-Klisto.15Ni mu kivuvu bekyokyo natya ti niza ntete ku yeno, mwanki lubaka lusakumunu nkumbu yinzole,16bu naahyokila ku yeno mu kwenda ku kizunga Masedwani, mboki bu nafuma ku Masedwani, mbo nahyokila dyaka ku yeno, mpe na kivuvu kye baka lusadusu ku yeno, mu nzyetolo ani ku kizunga ki Yuda.17Bu nabaka mayindu bemomo, nganunu naba wuzitama ko e? Hoti nzengolo zani, ziba kwandi zi kimuntu, mwanki meno nata ha kimosi ti «ninga» mpe «kaani» e?18Nzambi wukwikama kadi na wudi mbangi ani: misamu mi nina luteela mii ha kimosi ko «ninga» mpe «kaani».19Mu dyambu ti Yesu-Klisto, Mwana Nzambi, meno bende, Sila na Timote wutulusamunina, kaba ha kimosi ko «ninga» mpe «kaani». Kansi mu yandi «ninga» kaka ntangu zimvimba.20Mu dyambu ti, zinsilulu zimvimba zi Nzambi, mu yandi muu «ninga», mpe mu yandi tukwe telanga ti «ameni» mu kembisa Nzambi.21Nzambi yandi bende wuna tusyamisa ha kimosi neeno mu kintwadi kyeto na Klisto. Yandi mpe wutusoodidi mu kisalu kyandi,22Yandi mpe wututuula kinyemo kyandi mu lonka ti yandi wutuvwidi na wutuula mu mitima myeto Mpeve Yilongo bonso kikunku ki kateekisa mu bimwama bi kaatuhaana.23Mu meno, nina bongila Nzambi bonso mbangi yi kizingu kyani, navutukila ku mbanza yi Kolinto ko, mwanki lulembolo yena mpasi.24Yeto tuna sosa mu lutuma misamu mi luna kwikila ko, mu dyambu ti luu kweno bakwikama mu kiminu, kansi tutiidi kwandi mu luhaana kyese kihyokidi.Wycliffe Bible Translators, Inc.