2 KOLINTO3
Luwawanu lumoona
1Bwedi, tuna sosila dyaka mu kitambika yeto bende e? Hoti tuu na nsatu, bonso bantu bahiika, yi mikanda mina bahaana luve mu batambula, hoti tululomba mikanda mina tuhaana luve mu lutambula e?2Yebende ludi mukanda weto wu basonikini mu mitima myeto, mpe bantu bamvimba balendi zaba na kutanga wo.3Wukedika ti, yeno mukanda wusonika Klisto ludi, mu kisalu kyeto. Mu sonika mukanda bewowo, kasadila ntinta ko, kansi wusadila Mpeve yi Nzambi yimoyo, mpe kasonika mu matadi ko, kansi mu mitima myeno.4Tuzonzila bobo mu dyambu di kivuvu kii neto mu Nzambi mu Klisto.5Ka mu ngolo zi yeto bende ko tulendi sadila kisalu ki bobo. Kansi ngolo zeto zikwe fumanga ku Nzambi,6ni Nzambi wu tuheeni ngolo mu ba bisadi bi luwawanu lumoona, tudi ku nsye lutumu lu Misiku misonama ko, kansi lu Mpeve yi Nzambi. Mu dyambu ti Misiku mikwe natanga ku lufwa, kansi Mpeve yi Nzambi yikwe haananga luzingu.7Misiku miba misonama ha yulu matadi na Mose wuba kisadi ki Misiku bemyomyo mikwe natanga ku lufwa. Mpeleko bobobo bubela, kansi kisalu bekyokyo kyedi muhaananga nkembo yiyinene. Mu dyambu di nkembo yedi lezima mu kizizi kyandi, ba-Isaeli balembakana mu musungimina. Mpe kulezima bekoko kwedi zingilanga ko,8bwedi bwabu kisalu ki Mpeve yi Nzambi kyaalembolo beela na nkembo yihyokidi e?9Tala ti kisalu ki Misiku kikwe twadilanga bantu nsembolo kinata nkembo, bwedi kisalu ki lunungu kyaalembolo vudila nkembo e?10Mu dyambu ti, nkembo wulezima mu ntama wuzimbisa kulezima kwandi ha ntadisi yi nkembo wumoona wu bubedidi wutomini hyokila kitezo.11Tala ti kyokyokyo kilembolo zingila kiba na nkembo, bwedi bwabu kyokyokyo kyaatatamana kyaalembolo lutila nkembo e?12Butudi na kivuvu kibobobo, tuna toma lonkisa kibakala kyeto kikingi.13Tusandi bonso Mose wufuka kiini kyandi mu kitambala, mwanki ba-Isaeli balembolo sungimina bwedi bwaazimbidila nkembo yalembolo zingila.14Kansi babisa kwawu mu bakula. Mu dyambu ti natee mu kilumbu bekiki, bu bakwe tanganga Luwawanu Luntama, kitambala bekyokyo kyakidi na kilendi katuka ko. Kadi ni mu Klisto kaka kilendi zimbidila.15Natee mu kilumbu ki bubedidi, ntangu zimvimba zi bakwe tanganga mabuuku masonika Mose, kitambala kikwe kanganga mitima myawu.16Kansi, bonso bu wudi wusonama ti: «Tala ti muntu viludi madyela mu sadila Mfumu, kitambala kikatukidi.»17Mu dyambu ti Mfumu wudi Mpeve, mpe ho ha kwe banga Mpeve yi Mfumu, hahoho ha kimpwanza.18Yeto bamvimba tudi na kiini kilembolo fuku kitambala, tuna kiyenikisa bonso mu kitala-tala, nkembo yi Mfumu, tukitukidi mu kifwani bekyokyo, mu nkembo ha yulu nkembo yihyokidi dyaka kitezo. Kyokyo ni kisalu ki Mfumu wudi Mpeve.Wycliffe Bible Translators, Inc.