FILIPI1
Beihlangnaw
1Jesu Khri see hae Paul te Timote nynh Filipi khua um hae paw, Jesu Khri kya-e mithyaa hae balyn, pastor hae te Khriccaaw piccan hae kalan ccaw kae ky oh.2Ah Paaw Pachia te Bawipaw Jesu Khri kyate thawccinaw te daenaw tuh nae tungvaw kya la um sah.Filipi hae elang Paul Sawsangnaw3Nanning kae liathui oh takyhte ka Pachia kalan lungtuabya ka ho,4saw ka sang takyhte nae balyn hanlan lungtuate tyty saw ka sang,5pawccecize nanning tuh atakaw te atu cia thehoypaw ryalaw kya nae bawm oh.6Nanning kya ahoypaw ryalaw a thotu Pachia nynh Jesu Khri Nin a thua cia tuh-e rya tuh a ccingsah cih cite zynkunaw ka hoi.7Nanning balyn konglang hynhte ka tuapaw tuh ka hanlan accanpaw nynh thua, pawccecize thehoypaw kong thong ka ccawnaw kya thuasah, thehoypaw ka thadynkhaenaw kya thuasah, thehoypaw ka tynsahnaw kya thuasah nanning balyn tuh kamaw ryte Pachia thawccinaw a neethungkuh bua hae paw na thua oh keiccu nanning tuh ka thinlung kya na um oh.8Pawccecize Jesu Khri thawccinaw te nanning balyn kha pawcih baban nynh kae ngae oh cipaw Pachia tuh ka ccaekia nynh thua.9Saw ka sangpaw tuh, nae kya-e sungsakunaw tuh nynaw te byakhupaw phiathyanaw balyn kya houhouh alungthung nawlan,10ahoy huaccepaw uccaw hae kha phiathyate na nythya nawlan oh, te Khri nin kyacia athyaapaw te ccaenaw um leipaw lang na tang nawlan oh,11Pachia phu-e nawlan te thehoysah nawlan, Jesu Khri liate oun thuapaw dingnaw kya-e athae hae khate phe na bia nawlan oh saw ka sang. Khri hanlan Hiin12Uteno hae, ka tungvaw acyihkuhpaw uccaw hae tuh thehoypaw houh a pazaeku nawlan nynh acyiku cipaw kha nyh oh ci ka ry.13Ou tuhte Khri keiccu thong ka ccawpaw tuh siapharan inn a rintu hae balyn te tuhlaepaw miakaw nynh a ny hae.14Uteno hae alunghua tuh, thong ka ccaw keiccuze Bawipaw kya zynkunaw hoi hae zah, Pachia byaho lan ri leite rawthungnaw houh a hoi hae.15Abang nynh eiungnaw te pekunaw lante Khri kong kha a ho hae, thuasalama abang nynh thinlung hoypaw te a ho hae.16Tuhte a ho hae paw nynh kae tuh thehoypaw kha thadynkhae khylan khang ka thuapaw kha nyh hae zah sungsakunaw te a ho hae.17Mingccang hae nynh thinlung ccaccing te thua leite, mimaw hanlan karankute, thong ka ccawnaw kya houh ka teing nawlan Khri kong kha a ho hae.18Tuhteze pawte? Pawpawte a ho hae zemah, vawnin bya te athua zemah, thanccingte athua zemah, Khri kong tuh ho athua mamin; tuin kya kae tuh ka lungtua. Athua, ka lungtua ung cih.19Pawccecize nanning sawsangnaw liate thuasah, Jesu Khri Muisaw bawmnaw liate thuasah tuh-e tuh ka lue nawlan yn tang cih cipaw ka ny.20Kae nynh pawpawte mah maethya leite, ka cyimae hawte myarya rawhoyte ka hiin zemah, ka chi zemah Khri tuh atu mah ka pyn kya hangthung athua zungzae cih cite kou ka ngaehoi.21Pawccecize kae ka hanlan tuh, hiinnaw hynh Khri thua zah chinaw hynh amia.22Thuasalama pynsaw kya ka hiin ze, tuh-e tuh ka ryalaw kya-e athae nynh thua, tuhzemah pawmou ka poku cih cipaw ka nyh khyh.23Kae tuh tuh-e ccangning laku areihkunaw kya nynh ka um. E hiinnaw hynh cciatawte Khri ryte umkheih lan ka ry, tuh-e tuh myarya ahoy huapaw nynh thua.24Thuasalama pynsaw kya ka hiin ung lanpaw tuh nae hanlan aho huapaw nynh thua.25Tuh-e tuh ccaerarih lan ka ny keiccuze, zynnaw kya na lethung nawlan oh te nae lungtua nawlan kae tuh nanning balyn ryte ka um ung cih cipaw ka ny.26Tetuh nae kalan bua kae thua te, kae ka liate nanning tuh Khri Jesu kya houh na pookuh cih oh.27Pawpawte athua zemah, Khri thehoypaw te angaekuhpaw ziazae khate hiin oh, tuhteze nynh kamaw kae thua zah kae muih oh ze thuasah, kamaw ka um khyh zemah thuasah nanning tuh thehoypaw te asekuhpaw zynnaw hanlan tuanaw ccangkheit te na zuakuh oh zah, thinlung ccangkheit te tynkaring lan na thadyn oh cipaw ka thae cih.28Nae rhaw hae kha rih nan oh. Tuh-e tuh minmin ronaw hanlan a langsakuhpaw muihsahnaw nynh thua, thuasalama nanning hanlan tuh khumnaw nynh thua, tuh-e tuh Pachia nynh a cyipaw nynh thua.29Pawccecize Khri zyn lanpaw kyalya thua leite, Khri hanlan teingbia lanpaw kha mah aning nynh ae pyabia oh,30ka la teingpaw kha na muih vae oh zah atu na thae oh hawte ka teingpaw rhawdounaw te alokuhpaw kha na teingbua oh. Khri Zakawsangsakunaw Dosuinkunaw1Tukeiccuze Khri kya thawzung pyakunaw ccangkhakheit, sungsakunaw kya-e ngaengannaw ccangkhakheit te Muisaw kya-e vaeccawkunaw ccangkhakheit, thawccikunaw te ngaethyaumsakunaw ccangkhakheit a um ze,2lunglokute alokuhpaw sungsakunaw hoi biate, nawccawkheihnaw te tuanaw ccangkheit hoi biate nanning nynh ka lungtuanaw kha yn ccingsah oh.3Karankunaw, pooku minthaan rynaw te pawsang mah cyih nan oh, ming hae kha naemaw laeze ahoy huapaw lante zakawsangsakunaw thinlung te tua oh.4Nanning lu raveih nynh mawmaw thanenaw kyalya kha do leite ming hae thanenaw kha mah dobia oh.5Khri Jesu kya a umpaw hynh-e tuanaw hynh nanning kya mah la um sah,6Khri tuh Pachia muinsanphang a ke pite,Pachia ryte nginkunaw khaluade lante tuakuh khyh,7tuhlaeze amaw a thuanawbalyn kha vua zah,see muinsan kha lawkuteccungccaw alo lante yn pui.8Ccungccaw muinsan lanteyn langkuh zah zakawsangsakutechinaw kyacia—vaelantung kya chi ciate heizekaw a ngae.9Tukeiccuze Pachia nynh mahamaw kha kou hangthung zahmin balyn laezealesae huapaw min kha a pya,10tukeiccuze vaawlang um hae paw,laephi vaw um hae paw telae kaw um hae paw miakaw nynhJesu min kyaccukharu a tung cih hae zah,11Paaw Pachia phu-enaw hanlanmunglae miakaw nynhJesu Khri tuh Bawi nynh thua,a ci cih hae.12Tukeiccuze ka sungsah hae paw, ka kaw zungzae na ngae oh zah, kamaw ka um lya kyalya thua leite, atu kamaw ka um khyh lya mah kaw houh na ngae oh hawte, rawri thyngku biate naemaw khumnaw elang ryalah oh;13pawccecize amaw kya-e ahoypaw eenaw kha ry khylan te cyi khylan nae lungkhu kya ryalahpaw tuh Pachia nynh thua.14Ccohku leite, eiku leite pawpaw balyn kha cyih oh,15tuhteze nynh a thyaruhpaw te a ccouseikuhpaw she kya ccaenaw um leipaw, seinaw a hoi leipaw, a minthu leipaw, Pachia ccaaw hae lang na tang cih oh zah, laephi kya awsi hawte tuh-e hae laku na aw cih oh.16Hiinnaw bya kha varyng kyngkuh oh; tuhteze nynh kae tuh alakaw lan ka ccuehan khyh zah rya ka lahhan khyh cite Khri nin kya ka pookuh kho cih.17Nae zynnaw te asekuhpaw pyapaw te silawnaw vawlan khe kamaw hynh niapaw silawnaw lante bu a la thua heize, ka lungtua zah nanning balyn ryte ka lungtua.18Tuhawte nanning mah nae lungtua sah lah, kamaw ryte nae lungtua sah. Timote te Epafroditas19Nae konglang kha he ka thae te ka ngaengan nawlan aro mawze Timote kha nae kalan saw lan Bawipaw Jesu kya ngaehoinaw ka hoi.20Aning hawte nanning thanenaw hanlan hoyte peki cih paw lu kheit san ka hoi khyh.21Ming hae balyn nynh Jesu Khri hanlan tua leite mimaw hanlan nynh a tuaku hae.22Thuasalama ccapaw nynh paaw ryte rya a law hawte, Timote tuh kae te thehoypaw rya kae lawkheih keiccuze a ryalawnaw kha na ny oh.23Tukeiccuze ka konglang pawte nynh acyiku cipaw ccahe ka nyh te, amaw kha nae kalan palou saw lan ka ngaehoi,24kamaw mah aro mawze nae kalan kae thua cih cite Bawipaw kha ka doliaku.25Te Epafroditas hynh nae kalan saw aho cite ka tua, aning tuh ka neitaw, rya kae lahkheihpaw, rhaw kae doukheihpaw, ka hobounaw kya rya yn lawpahpaw, nae zeccuetu nynh thua,26pawccecize aning tuh accih cipaw na thae oh keiccuze nae balynte kou ae ngae oh zah a lungriathae.27Aning tuh vya chih lan a ccih ccaccing. Thuasalama Pachia nynh ngaethya a umsah, amaw kyalya thua leite, kae zemah ngaethyanaw ka tungchih khyh nawlan ngaethya yn umsah.28Tukeiccuze amaw kha bua na muih oh te nae lungtua nawlan te kae mah ka lungriathaenaw azyahua nawlan amaw kha thawmuinte kae saw.29Tukeiccuze Bawipaw kya amaw kha myarya lungtuate la ccou oh; te khahcihawpaw ccungccaw hae kha sawtuanaw la pya oh.30Pawccecize nanning nynh nae pya kho lei oh paw bawmnaw kha pya khylan a hiinnaw kha duaaku leite, Khri ryalaw hanlan vya a chibia. Ahmepaw Dingnaw1Uteno hae, nyathyakou ka ho rypaw tuh, Bawipaw kya nae lungtua sah. Phe alokuhpaw kha nae kalan bua zei lanpaw hynh kae ka hanlan pawtua-ung khyh zah nae hanlan khynnaw nynh thua.2Ui hae kha la raeringkuh oh, ahoy leipaw rya a lahtu hae kha la raeringkuh oh, mih vingdung a awkuh hae paw kha la raeringkuh oh.3Pawccecize aening tuh Muisaw kya Pachia beik hae paw, Khri Jesu kya lungtua hae paw, te pynsaw lante zynkunaw a hoi lei hae paw, vingdungawkuh ccaccing hae paw nynh ah thua oh.4Tuhzemah kae mah pynsaw kya zynkunaw a hoipaw nynh ka thua. Lukhakheit nynh pynsaw kya zynkunaw ka hoi cite a tuaku ze kae tuh houh ka hoi:5nin taryanaw kya vingdungawkuhpaw, Israel minphuin, Benjamin ciihan, Hebru hae kyate yn thopaw Hebru paw, Kawbya te asekuh lante Farasipaw;6beiknaw kya lungthawsaenaw te asekuh lante khriccaawbuu tungvaw a tuaasahtupaw, Kawbya kya umpaw dingnaw te asekuh lante ccaenaw um leipaw nynh ka thua.7Thuasalama ka hanlan a la thanepaw tuh-e hae balyn tuh Khri keiccuze shungnawpaw lang nynh ka tua vae.8Tuhpiaze, ka Bawipaw Khri Jesu nynaw asung-e huaccepaw keiccuze pawpaw balyn kha shungnawpaw lang ka tua. Khri keiccuze pawpaw balyn marya ka shung zah, amaw kha mue kho nawlan tuh-e hae tuh athupaw lang nynh ka ria,9amaw te tynkaring lan kyngku nawlan Kawbya liate muepaw kamaw dingnaw kha ka hoi khyh, thuasalama Khri zynnaw liate muepaw dingnaw, zynnaw liate athuapaw Pachia kya-e dingnaw kha nynh ka hoi.10Ka rypaw tuh Khri te a thoothuinaw kya-e thungnaw kha nyte, a teingnaw kha neethungkubua te a chinaw kya chibua kha nynh thua.11A chih hae paw kyate thoothuinaw kalan pawpawte zemah phyabua ka ry. Eenaw Kuetung kalan Ccue12Kae nynh tuh-e tuh phe ka mue vae, tuhkhyhze eenaw kya phe ka thua vae cipaw thua khyh; thuasalama Khri Jesu nynh kae kha amaw kya-e lang yn raeku vae keiccuze kae nynh tuh-e tuh ccou kho nawlan palei ka zuaku.13Uteno hae, tuh-e tuh phe ka ccou vae cite ka tuakuh khyh, thuasalama ka cyipaw uccaw ccangkheit tuh: nulang e uccaw hae kha ningte, malang umpaw uccaw hae kha phya lan ka zuaku,14Khri Jesu liate Pachia nynh vaawlang oun konaw te asekuhpaw lasung kha mue khylan eenaw kuetung kalan ka ccuebua.15Tukeiccuze piccan athua vae paw aening nynh tuhcihawpaw tuanaw kha hoi oh sih; te nanning nynh hankhakheit kya ccanglang te na tua oh ze, tuh-e maw tuh Pachia nynh nae kya ae phypah cih oh.16Pawpawte athua zemah, ah zui vae oh paw phung thyhte tynkaring lan po cceih oh sih.17Uteno hae, kamaw thydokuh hae paw thua oh, kaening kyate na mue oh paw dosuinku lanpaw thyhte a hiin hae paw kha la dokuh oh.18Pawccecize ccungccaw patae tuh Khri vaelantung kha rawsete a hiin hae, tuhte a hiin hae cipaw; minmin kong kha palei kae hopah vae oh, atu mitphi te bua kae hopya oh.19Tuh-e hae athangnaw tuh ronaw nynh thua; mih pachia tuh mih vuebua nynh thua, maethya lan umpaw kyakhe a pookuh hae, mih thinlung kya laephi uccaw hae kha nynh a um.20Thuasalama aening kya-e ramccungccaw thuanaw tuh vaawlang khua kya nynh a um; tuin kyate yn thua lanpaw Khumtu, Bawipaw Jesu Khri kha ah ngaehoi oh.21Pawpaw balyn kha amaw zakaw nung khonawpaw thungnaw liate, anyaapaw aening pyn hynh aphu-epaw amaw pyn alo lante oun rulae cih.1Tukeiccuze ka lungtuanaw te ka bawilukhung na thua oh paw, ka sungsah hae zah kou ka ngae hae paw, ka uno hae, Bawipaw kya tynkaring lan thadyn oh, kou ka sungsah hae paw. Hyynaw2Euodia te Syntykhe nynh Bawipaw kya tuanaw a loku nawlan hae thawte ka ngia hae.3Alungzipaw ryalahkheihtu nang kha mah, hynh-e nopi hae hynh na bawm nawlan hae kae ngia; pawccecize minmin tuh kamaw ry, Klement ry, hiinnaw ccauh kya mih min um hae paw tuhlaepaw kae te rya kae lahkheih hae paw ryte thehoypaw rya kya ryalahtu hae nynh thua hae.4Bawipaw kya nae lungtua zungzae sah. Bua kae ho hin, nae lungtua sah.5Ccungccaw miakaw nynh nae lungnenaw kha nyh hae sah. Bawipaw tuh nae pe a um.6Pawpaw konglang mah nae thinphang nan sah; pawpaw balyn kya lungtuabya hote, sawsangnaw te ngianaw liate na ngia ry oh paw kha Pachia nysah oh.7Ccungccaw tuanaw balyn nynh a phya kho leipaw Pachia kya-e daenaw nynh Jesu Khri liate nae thinlung te nae tuanaw kha ae khynsah cih oh.8Nyathyakou lang uteno hae, ahmepaw, sawtua lan umpaw, adingpaw, athyaapaw, ry lan umpaw, thehoysah lan umpaw; ccangkhakheit tuh aphute lanze, thehoysah lan angaeku lanze tuh-e hae tuh nae thinlung kya la tua oh.9Kamaw kyate na ccangku oh paw, na lawku oh paw, na thae oh paw te na muih oh paw kha la cyih oh, te daenaw Pachia tuh nae kya a um cih. Lasung hanlan Luungkunaw10Kamaw nae do-oihnaw oh kha atu nyathya kya bua na langsakuh oh zah Bawipaw kya myarya ka lungtua; thanccingte, kamaw do-oih rynaw na la hoi oh salamah, ccyhhoypaw na la mue khyh oh.11Ka hobou keiccuze ka hopaw thua khyh, pawccecize kae tuh pawcihawpaw kya ka um zemah lungccingkhaeku lan phe ka ccangku vae.12Ryachinaw kya hiinzia ka thya zah hoirumnaw kya hiinzia ka thya; vueso zemah, vuelaw zemah, hoirum zemah, ryachi zemah teitei balyn kya te atyn-are kya umzia byaphi kha ka ccangkuh vae.13Thawzung yn pyatupaw Khri liate pawpaw balyn ka cyih kho.14Thuasalama ka vawsawnaw kha neethungkubua te kou hoy lan na cyi vae oh.15Thehoypaw honaw ka thotakaw lyaze, Mesidonia ram kyate he ka pou lya kha, ahlu pyanaw te muenaw kya nanning holeite pawpaw khriccaawbuu mah yn bawmpaw um khyh cipaw kha nanning Filipi hae nynh hoyte na ny oh.16Pawccecize Thesalonika khua ka um lya heize, ka hanlan ahoboupaw bawmnaw kha vaekheit lae alung lan nae ky oh.17Lasung kha ka ccungkupaw thua khyh, na ccykunaw oh ccazing kya amia kha nynh kae ccungpya oh.18Kae tuh phe beih lan nae pya oh zah azaw laelan ka hoi; amynkhuhpaw, Pachia lungrytungsahpaw, douccahpaw silawkunaw athuapaw, nae ky oh paw lasung hae kha Epafroditas kyate ka mue zah phe beih lan ka hoi.19Te ka Pachia nynh a phu-enaw kya a hoirum thyhte nae hanlan ahoboupaw miakaw kha Khri Jesu liate ae ccingsahpah cih oh.20Ah Paaw Pachia tuh zungzae te zungzae cia a phu-e sah. Amen. Nyathyakou Beihlangnaw21Khri Jesu kya umpaw mithyaa hae balyn kha la beihlang oh. Kamaw te kae umkheihpaw uno hae nynh nanning kha ae beihlang oh.22Mithyaa hae balyn nynh ae beihlang oh, abyapi lante Sizar siapharan inn kya um hae paw nynh ae beihlang oh.23Bawipaw Jesu Khri kya-e thawccinaw tuh nae balyn kya la um sah. Amen.
Bible Society of Myanmar