Read EFESA 1

EFESA1

Beihlangnaw

¹Pachia rynaw thyhte Khri Jesu locceihtu athuapaw Paul nynh Efesa khua e mithyaa hae te Khri Jesu kya lungzi hae paw kalan ccaw kae ky oh.

²Ah Paaw Pachia te Bawipaw Jesu Khri kya-e thawccinaw te daenaw tuh nae kya la um vae sah. Khri kya Muisaw Hythuanaw

³Ah Bawipaw Jesu Khri a Paaw Pachia tuh thehoyte um sah. Pawccecize Khri liate vaawlang e muisaw hythuanaw aphuinphuin kha aening oun pya vae.⁴Aening tuh Pachia malang ah thyaa nawlan oh te ccaenaw um leipaw ah thua nawlan oh, laephi rae mawze aening kha Khri kya phe oun po vae.⁵Pachia nynh amaw a rynaw thyhte, Jesu Khri liate aening kha a ccaaw hae lang phe oun la paccynde vae,⁶a sungsahpaw Ccapaw liate alakaw te aening oun pyapaw aphu-epaw a thawccinaw kha thehoysah khylan nynh thua.⁷Khri chiise liate shawkhawnaw athuapaw aening seinaw ngaethyanaw kha myarya lepaw Pachia thawccinaw thyhte Ccapaw liate ah mue oh,⁸tuh-e thawccinaw tuh aening kha paepae lui lan oun pya vae.⁹Pachia nynh Khri kya a paccyn ty vae paw ahoypaw a lungrythuanaw thyhte, hawnaw te thaethyanaw balyn khate a rynaw kya-e byakhupaw kha aening phe oun nysah vae,¹⁰tuhcite accyh yn ccing te, vaawlang umpaw te laephi vaw umpaw pawpaw balyn kha Khri kya marya suelua lan a paccyn.¹¹Amaw a rynaw te a khuakhannaw thyhte pawpaw balyn a cyihtupaw Pachia nynh a eenaw thyhte a paccyn ty vae hawte aening mah Khri liate rhoccounaw kha ah mue oh,¹²tuh-e tuh Khri kha masaty a ngaehoi hae paw aening nynh a phu-enaw kha thehoysah khylan ah hiin nawlan oh nynh thua.¹³Nae kya-e khumnaw thehoypaw athuapaw byaccing bya kha he na thae oh te, amaw kha na zyn oh zah Pachia nynh bya a kinkupaw Thyaa Muisaw khate tazeihkhia na thua vae oh.¹⁴Pachia nynh amaw ccungccaw lang oun shawkhawnaw konglang te, Muisaw tuh aening rho hanlan aamahkhan nynh thua, tuh-e tuh Pachia phu-enaw kha thehoysah nawlan nynh thua. Paul Sawsangnaw

¹⁵Bawipaw Jesu na zynnaw oh paw te mithyaa hae balyn na sungsahnaw oh paw kha he ka thae tuh,¹⁶nanning hanlan Pachia kalan dae leite lungtuabya ka ho zah ka sawsangnaw kya tyty kae lia oh.¹⁷Ah Bawipaw Jesu Khri a Pachia, phu-enaw Paaw nynh amaw ny nawlan hawnaw muisaw te byaphy kha ae pya nawlan oh thuasah,¹⁸thaethya nawlan nae thinlung mit ae awsah oh zah, nanning ae konua oh paw ngaehoinaw tuh pawmou athua cipaw na ny nawlan oh thuasah, mithyaa hae nynh a ccou hae paw rho a phu-enaw tuh hohcihmou ale cipaw na ny nawlan oh thuasah,¹⁹alesaepaw a thungnaw nynh rya a law thyhte, a zyn hae paw aening hanlan a thungnaw tuh tou kho um lei lan hohcihmou ale cipaw na ny nawlan oh thuasah saw kae sangpya oh.²⁰Khri kha chinaw kyate thoosah zah vaawlang khua kya a ranglang khe a haungsah lya, Pachia nynh tuh-e thungnaw khate Khri kya rya a law,²¹Khri kha uknaw, kawhoinaw, thungnaw te peenaw kaw balyn kya ahanghua lante a haungsah, atu she kyalya thua leite yn thua cih paw she kyacia minphukuhpaw min miakaw kya ahanghua lante a nung.²²Pawpaw balyn kha Khri a ccuphe kaw marya nung zah khriccaawbuu hanlan pawpaw balyn kya lu lang a nung,²³tuh-e khriccaawbuu tuh Khri pyn thua zah pawpaw balyn kha pawpaw balyn kyakhe phe a ccingsahtupaw Khri accingnaw nynh thua. Chinaw kyate Hiinnaw lang

¹Langmawlya tuh kawngae leinaw te seinaw hae keiccu na la chih oh,²tuh-e seinaw hae kyakhe na la hiin oh zah hynh-e laephi laanpi hynh na la zui oh, khivae kya-e thungnaw a uktu, kawngae lei hae paw kya atu ryalahpaw muisaw nulang zuikute na la hiin oh.³Aening balyn tuh langmawlya tuh-e hae kyakhe pynsaw rynaw te thinlung rynaw kha zuite, ah pynsaw duaanaw kyakhe ah la ciakuh bua oh; mingccang hae hawte aening mah aphung thyhte thinrianaw a ccou hae paw ccaaw hae nynh ah la thua oh.⁴Thuasalama ngaethyaumsahnaw te phe beihpaw Pachia nynh aening kha myarya alepaw a sungsahnaw te oun sungsah keiccuze,⁵ah seinaw kya ah chi lya oh khe, Khri ryte pynkheihlan oun hiinsah vae—thawccinaw liate nanning tuh khum na thua vae oh—⁶Khri Jesu ryte oun thoosah zah vaawlang khua kya amaw ryte oun haungsah vae,⁷tuh-e tuh Khri Jesu liate aening ngaethya oun umsahnawpaw a thawccinaw myarya alepaw kha yn thua lanpaw she kya oun langsahpya nawlan nynh thua.⁸Pawccecize thawccinaw keiccuze zynnaw liate khum na thua vae oh, tuh-e tuh naemaw nynh na cyiku oh paw thua khyh, Pachia lasung nynh thua.⁹Ryalawnaw liate thua khyh, tukeiccuze hum nynh sanmah pooku lanpaw um khyh.¹⁰Pawccecize aening tuh ahoypaw ryalaw law khylan Khri Jesu kya amaw nynh oun raepaw nynh ah thua oh; tuh-e ahoypaw ryalaw hae kya ah hiin nawlan oh Pachia nynh a la paccyn ty vae. Khri kya Ccangkheit

¹¹Tukeiccuze pynsaw kya kuih te vingdungawkuh hae paw nynh “vingdungawkuh lei hae paw” cite ae la ko oh paw nanning tuh langmawlya pynsaw lante Zenta hae na la thua oh paw kha liathui oh.¹²Tuh ccyh lyaze nanning tuh Khri leite na la um oh paw, Israel ccazing kya umbua leite ramccang hae na thua oh paw, byakinpyakupaw byakinnaw te asekuh leipaw mikhia hae na la thua oh paw te ngaehoinaw hoi leite Pachia leite laephi kya na la um oh paw kha liathui oh.¹³Thuasalama langmawlya kou na la sawkuh oh paw nanning kha atu tuh Khri chiise liate Khri Jesu kya naesaku na thua vae oh.¹⁴Pawccecize aning tuh aening daenaw nynh thua; minphuin phuin ning kha amaw a pynsaw kyakhe phuin kheit lang rae zah aening laku arihkhawpaw rhawkunaw lungrua kha pong a tingsah vae.¹⁵Aning nynh ccangpyakunaw hae kya a umpaw kawbya hae te phungzae hae kha roh zah, minphuin phuin ning kha amaw kya minphuin thawpaw phuin kheit lang rae zah daenaw kha a umsah.¹⁶Aning nynh vaelantung liate minphuin phuin ning kha pyn pynkheit lang sueluate Pachia te bua ccawsakuthui hae zah rhawkunaw kha a maemih.¹⁷Khri tuh yn thua zah asawnaw na um oh paw nanning te anaenaw a um hae paw kyakhe daenaw thehoypaw kha a ho.¹⁸Pawccecize aening minphuin phuin ning tuh Khri liate Muisaw ccangkheit kyakhe Paaw kalan thua khonaw ah hoi oh.¹⁹Tukeiccuze atu nanning tuh mikhia hae te minphuin ccang hae na thua vae khyh oh, mithyaa hae ryte khuaccaaw hae na thuakheih oh zah Pachia innbyn kya-e hae nynh na thua vae oh.²⁰Nanning tuh locceihtu hae te profeh hae nynh a bing hae paw aleihpaw vawlan sakthinpaw na thua oh zah, Khri Jesu tuh apaki lang e abyapi huapaw lung nynh thua.²¹Amaw kya sakpaw inn tuh abalyn mawte rekuhmamia lan sak thua zah Bawipaw kya athyaapaw beikinn lang a lethung.²²Nanning kha mah Muisaw liate Pachia a umnaw hmin lang amaw kya pynkheihlan sak na thua oh. Zenta hae hanlan Paul Ryalawnaw

¹Tuh-e keiccuze kae, Paul tuh nanning Zenta hae hanlan Khri Jesu keiccu thongccahpaw nynh ka thua.²Nanning hanlan Pachia nynh a thawccinaw liate kae yn pyapaw rya kong kha phe na thae mamin vae cih oh.³Pachia nynh byakhupaw kha byaphy liate phe yn nysah vae; tuh-e kong tuh aluki kya dyntari te ccaw phe ka zei vae,⁴tuh-e ccaw he na ria oh te, Khri kya-e byakhupaw ka nynaw kong kha na thaethya cih oh,⁵tuh-e byakhupaw tuh atu lya Muisaw liate athyaapaw a locceihtu hae te a profeh hae kya a phypya hae hawte, langmaw she lya-e ccungccaw hae kha la phypah khyh hae.⁶Tuh-e tuh: Thehoypaw liate Zenta hae mah rho a ccou buapaw lang a tang hae, pyn pynkheit kya-e hae thua hae zah byakinpyakunaw kha Khri Jesu kya a neethungkuh bua hae paw nynh thua hae.

⁷A huhan ryalawnaw liate kae yn pyapaw Pachia thawccinaw lasung thyhte, kae tuh tuh-e thehoypaw te asekuhpaw ryalahtu lang ka tang.⁸Kae tuh mithyaa hae balyn kyaze anyaa huaccepaw ka thua salamah, Khri kya-e tou kho um leipaw thehoypaw hoirumnaw kha Zenta hae kalan ho khylan hynh-e thawccinaw hynh kamaw yn pya,⁹pawpaw balyn a raetupaw Pachia kya langmaw she te thuruh athuapaw byakhupaw te asekuhpaw paccynnaw tuh pawmou athua cipaw kha ccungccaw miakaw muihsah khylan hynh-e thawccinaw hynh kamaw yn pya;¹⁰tuhte muihsah a rynawpaw tuh Pachia hawnaw aphuinphuin kha vaawlang e uktu hae kalan te kawhoitu hae kalan khriccaawbuu liate atu nysah bua athua nawlan nynh thua.¹¹Tuh-e tuh Pachia nynh zungzae atynpaw a eenaw thyhte ah Bawipaw Khri Jesu kya a ccingsahpaw nynh thua.¹²Khri zynnaw liate aening tuh zynkunaw te rawhoynaw khate Pachia kalan naeku khonaw kha amaw kya ah hoi oh.¹³Tukeiccuze nae hanlan ka teingpaw vawsawnaw hae keiccuze nae lungthang khyh nawlan kae ngia oh; tuh-e hae tuh nanning phu-enaw nynh thua. Ccawriatu hae hanlan Sawsangnaw

¹⁴Hynh-e keiccu nynh kae tuh Paaw malang ccukharu ka tung.¹⁵Vaaw te lae kya umpaw innbyn miakaw tuh amaw kyate nynh minphu athua hae.¹⁶Saw ka sangpaw tuh: a phu-enaw kya-e hoirumnaw thyhte a Muisaw thungnaw liate nae lungkhu lang e ccungccaw thuanaw kha thawzung ae hoisah nawlan oh,¹⁷te nanning tuh sungsakunaw kya tharui sawte bing na thua oh zah, zynnaw liate Khri tuh nae thinlung kya a um nawlan saw ka sang.¹⁸Mithyaa hae balyn ryte Khri kya-e sungsahnaw akopaw, asaepaw, akhupaw te ahangpaw kha na nythya nawlan oh,¹⁹nynaw po alawepaw Khri sungsahnaw kha na ny nawlan oh te Pachia kya-e ccingnaw balyn khate phe na bia nawlan oh saw ka sang.

²⁰Atu aening lungkhu kya ryalahpaw thungnaw liate aening nynh ah ngia oh paw balyn, tuhkhyhze ah tua oh paw balyn laeze myaryamaw alunghua lante a cyih khopaw Pachia tuh,²¹Khri Jesu liate khriccaawbuu kya zungzae te zungzae cia she takyh a phu-e sah. Amen. Khri Pyn kya Lungngingnaw

¹Tukeiccuze Bawipaw keiccuze thongccahpaw kae, Paul nynh ko na thua oh paw nanning kha, tuh-e konaw te angaekuh lante na hiin nawlan oh kae ngia oh.²Pawpaw balyn kya zakawsangsakunaw, lungnenaw, lungsaenaw te um oh, sungsakunaw kya lu kheit te lu kheit ngaesangnaw hoi oh,³nanning ae suelua oh paw daenaw liate Muisaw kya-e lungngingnaw kha tynsah khylan thawte zuakuh oh.⁴Nanning ae konuathe oh paw ngaehoinaw tuh ccangkheit kyalya athua hawte, pyn pynkheit, Muisaw ccangkheit kyalya nynh a um,⁵Bawipaw ccangkheit, zynnaw ccangkheit, baptisma ccangkheit,⁶pawpaw balyn Paaw athuapaw Pachia ccangkheit nynh a um; tuh-e Pachia tuh pawpaw balyn luki a umpaw, teitei balyn kya a umpaw te pawpaw balyn kya a umpaw nynh thua.

⁷Thuasalama Khri nynh oun pyapaw lasung tounawpaw thyhte aening lu raveih nynh thawccinaw kha ah mue oh.⁸Tukeiccuze,“Aning nynh ahangnaw langhe a kaethung te,kyngpaw ccungccaw hae khaa cciakhae hae;a ccungccaw hae khalasung a pya hae,”cite a ho.⁹(“Aning tuh a kaethung” a cipaw hynh, aning tuh laephi ane huanaw kalan mah a rungbung cinawpaw nynh thua.¹⁰Yn rungbungpaw aning tuh pawpaw balyn kha phe biasah khylan, vaawlang abalyn hae luki lang a kaethungpaw kha nynh thua.)¹¹Aning nynh a pya hae paw lasung tuh, ccungccaw abang kha locceihtu lang, abang kha profeh lang, abang kha thehoypaw phytu lang, abang kha pastor lang te ccangpahtu lang a nung hae,¹²tuhte a pya hae paw tuh Khri pyn kha thawzung tynsah khylan, ryalawnaw hanlan mithyaa hae kha paccyn khylan nynh thua;¹³tuh-e paccynnaw tuh aening balyn nynh zynnaw kya thuasah, Pachia Ccapaw nynaw kya thuasah lunglokunaw ah hoi oh zah, Khri kya-e accingpaw ccungccaw tounawpaw thyhte piccan athuakuh cia paccynnaw nynh thua;¹⁴ou tuhte ccungccaw hae nynh hynpyanaw liate, a cyisakuh thyapaw thyaruhnaw te a pheethyapaw pheenaw kya ccangpyanaw khisan miakaw nynh po cciakhae hae zah nulang malang a hekuh hae paw imua hae thua vae leite,¹⁵sungsakunaw kya byaccing kha hote, aening tuh lu athuapaw Khri kyakhe pawpaw kya balyn ah lethung nawlan oh,¹⁶tuh-e lu kyate atungkunaw miakaw nynh thawpya zah pyn balyn tuh rekuhmamia lan tungkuh hae zah akyngkuh hae, pyn kya-e raveih nynh ccungkia lan rya a law hae thyhte, sungsakunaw kya tuh-e pyn tuh tynsathung nawlan pyn kha a lethungsah. Hiinnaw Arynpaw te Athawpaw

¹⁷Tukeiccuze tuhlaepaw Zenta hae nynh accakaepaw mih tuanaw kya a hiin hae hawte nanning nynh na hiinbua khyh nawlan oh e hynh ka ho zah Bawipaw kya ccaekia ka khan.¹⁸Minmin kya nythyanaw kharouh a um khyh keiccu, mih thinlung mitmoh keiccu, mih thaethyanaw tuh karae amoh, Pachia kya-e hiinnaw kyate phe a phiakuh vae hae.¹⁹Minmin tuh maethya ny leite, eih duaanaw te nungsikunaw tynre kha cyi khylan mimaw te mimaw kha ohhuaku rynaw kalan a apku hae.²⁰Thuasalama nanning tuh Khri kong kha tuhte na ccangkuh khyh oh;²¹byaccing tuh Jesu kya a um hawte, amaw kong kha nanning nynh phe na thae vae oh zah amaw nynh phe ae ccangpya vae oh lanze,²²langmaw nae ozia te asekuh lante ahynthyapaw ryduaanaw thyhte phe aroh vae paw arynpaw ccungccaw kha na vua nawlan oh,²³te nae thinlung te nae tuanaw kha thawsah te na um nawlan oh,²⁴te ahmepaw dingnaw kya te thyaanaw kya Pachia hawmawte rae athuapaw, athawpaw ccungccaw kha nanning nynh na lawku nawlan oh nynh thua. Hiinnaw Thawpaw elang Phung hae

²⁵Tukeiccuze hynbya kha nung biate, nanning lu raveih nynh nae innpaw hae ryte byaccing kha ho oh, pawccecize aening tuh lu kheit te lu kheit pyn kya-e hae nynh ah thua oh.²⁶Nae thinria salamah sei nan oh, nae thinrianaw khate khuanin ccawsah nan oh.²⁷Satan kha umnaw ua nan oh.²⁸Aruhpaw ccungccaw nynh kharouh ruh nan vae sah, thuasalama ahoboupaw ccungccaw kha pyabua lanpaw a hoi nawlan, amaw a kuih te ahoypaw ryalaw kha zuakute lah sah.²⁹Anungsikuhpaw bya kaw kheit san nae khalang kyate pou nan sah. Thuasalama a thaetu hae kha Pachia thawccinaw a neethungbua nawlan, thawzung tynsathungnaw hanlan athanepaw ahoypaw bya palia kha pousah oh.³⁰Sawkhawnaw nin hanlan nanning tazeih ae khianaw oh paw, Pachia Thyaa Muisaw kha thinlungccisah nan oh.³¹Thinlung kya phang poipaw balyn, bungpawnaw, thinrianaw, sianuakupaw, te thethya hokupaw, milae rosah rynawpaw balyn kha nae kyate vua oh.³²lu kheit te lu kheit thawccihkuh thya oh lah ngaethyaumsakuh oh, Khri kya Pachia nynh ae ngaethya vae oh hawte lu kheit te lu kheit ngaethyakuh oh.

¹Tukeiccuze Pachia nynh kou a sungsahpaw ccaaw hae na thua oh hawte, Pachia a dosuinkuh hae paw thua oh.²Khri nynh aening kha yn sungsah pawte, Pachia malang mynkhuhpaw pyapaw te silawkunaw lang amaw te amaw kha aening hanlan a pyaku hawte, sungsakunaw kya hiin oh. Lawki Hiinzia Vuanaw

³Ohhuakunaw, athyaa leipaw aphuinphuin, tuhkhyhze karankunaw kha nanning laku bya te sanmah ho nan oh, tuh-e hae tuh mithyaa hae te ngaekuh khyh;⁴byathupaw, ngaeenaw bya te angaekuh leipaw bya kha ho leite, lungtuabya palia kha ho oh.⁵Pawccecize, a ohhuakuhpaw, athyaa leipaw, zohtuh beik zah a karankuhpaw ccungccaw tuh Khri te Pachia peenaw kya rho uccaw kharouh hoibua khyh cipaw ccaerarih lan na ny oh.

⁶Accakaepaw bya hae khate hum nynh san ae la ling nan oh sah; pawccecize khahcihawpaw uccaw hae keiccuze Pachia thinrianaw tuh kawngae lei hae paw tungvaw a ccah.⁷Tukeiccuze minmin ryte la mungkuh nan oh.⁸Pawccecize langmawlya nanning tuh mohnaw nynh na la thua oh, thuasalama atu tuh Bawipaw kya awnaw nynh na thua vae oh; tukeiccuze awnaw ccaaw hae hawte hiin oh.⁹Pawccecize awnaw athae tuh hoynaw aphuinphuin, dingnaw aphuinphuin te byaccing aphuinphuin kya muih athua.¹⁰Bawipaw lungrythuapaw uccaw kha ccangku lan zuakuh oh.¹¹Athane leipaw mohnaw ryalaw hae kya panbua nan oh, tuh-e ryalaw hae kha langsakuh paleih oh.¹²Pawccecize minmin nynh aphiruh lante a cyi hae paw tuh-e uccaw hae kong kha ho lan heize maethya lan umpaw nynh thua.¹³Thuasalama pawpaw balyn tuh awnaw liate langsah he athua te ccaerarih lan muih kho athua, pawccecize pawpaw balyn a langsah thyapaw tuh awnaw nynh thua.¹⁴Tukeiccuze Pachia nynh,“A ihpaw nang, tho ccavae!Chinaw kyate thoo lahKhri nynh nang khaawnaw ae pya cih,” a ci.

¹⁵Tukeiccuze angaeepaw hawte thua leite, ahawpaw hawte raeringkute hiin oh.¹⁶Ninsaw hae tuh ahoy vae khyh keiccuze accyh kha mangkuh thya oh.¹⁷Tukeiccuze ngaee nan vae oh, Bawipaw rynaw tuh paw nynh thua cipaw kha thaethya ccavae oh.¹⁸Misutui rui nan oh, pawccecize tuh-e tuh hoysahnaw alawepaw nynh thua, tuhlaeze Muisaw khate phe beih oh.¹⁹Sam hlaw hae, thehoysahnaw hlaw hae te muisaw hlaw hae khate lu kheit te lu kheit byahokuh oh lah, nae thinlung kya ahoypaw roisaw biate Bawipaw kalan hlawsah oh.²⁰Ah Bawipaw Jesu Khri min te Paaw Pachia kalan pawpaw balyn hanlan lungtuabya zungzae ho oh. Khriccaaw Innbyn

²¹Pachia rawri sawtuanaw liate lu kheit te lu kheit nae rynaw zuipakuh oh.

²²Zu hae, Bawipaw rynaw na zui oh hawte, nae vawpaw hae rynaw kha zui oh.²³Pawccecize Khri tuh khriccaawbuu lu athua hawte, vawpaw tuh zu lu nynh thua; Khri tuh amaw pyn athuapaw khriccaawbuu Khumtu nynh athua.²⁴Tukeiccuze khriccaawbuu nynh Khri rynaw a zui hawte zu hae nynh mah pawpaw balyn kya mih vawpaw hae rynaw kha zui hae sah.

²⁵Vawpaw hae, Khri nynh khriccaawbuu kha sungsah zah khriccaawbuu hanlan a pyaku hawte, nae zu hae kha sungsah oh.²⁶Khri nynh tuhte a cyipaw tuh, khriccaawbuu kha Pachia bya athuapaw tui te singpyanaw liate a thyaa ccaw cite ccikan khylan,²⁷te akalouhkuhpaw khyhze akhinkuhpaw, tuhkhyhze khahcihawpaw ccangkhakheit sanmah um leite, khriccaawbuu kha amaw kalan phu-enaw te thuakhae khylan, te khriccaawbuu tuh athyaa nawlan te ccaenaw um khyh nawlan nynh thua.²⁸Tukeiccuze vawpaw hae nynh mimaw mih pyn a sungsah hae hawte mih zu hae kha a sungsah hae aho. A zu a sungsahpaw tuh amaw a sungsakuhpaw nynh thua.²⁹Pawccecize amaw a pyn a huapaw hum sanmah um khyh, Khri nynh khriccaawbuu kha do-oih zah a kua hawte, amaw pyn kha do-oih zah a kua,³⁰pawccecize aening tuh amaw a pyn kya-e hae nynh ah thua oh.³¹“Hynh-e keiccuze pise nynh a nung te a paaw kha a cciataw cih zah a zu te a umkheih cih hae, minmin lu ning tuh pyn pynkheit lang a tang cih hae.”³²E tuh myarya byakhupaw thua zah, Khri te khriccaawbuu kong kha nynh ka ho.³³Tuhzemah nanning lu raveih nynh naemaw na sungsaku oh hawte nae zu hae kha sungsah oh, te zu nynh a vawpaw kha saw a tua cih. Ccaaw hae te Nungpaaw hae

¹Imua hae, Bawipaw kya nae nung nae paaw hae bya kha ngae oh, pawccecize tuh-e tuh ahmepaw nynh thua.²“Na nung te na paaw kha sawtua”—hynh-e hynh byakinpyakupaw te asekuhpaw masaty kawbya nynh thua,³tuh-e byakinpyakunaw tuh, “tuhteze nynh hiinhoy te na um cih zah laephi vawlan na hiinshe sae cih,” acikuh.

⁴Paaw hae, nae ccaaw hae kha thinriasah nan oh, thuasalama Bawipaw kya-e ccangpyanaw te thuiheinaw khate minmin kha cciakhae thung oh. See hae te Bawizuaa hae

⁵See hae, Khri kaw na ngae oh hawte, rawri thyngkute, thinlung thanccingte pynsaw lante nae bawi hae kaw kha ngae oh.⁶Ccungccaw lungrythuasah khylan, muihnaw kya kyalya kawngaepaw thua leite, Khri see hae hawte Pachia rynaw kha thinlung ccaccing te cyih oh,⁷ccungccaw hae hanlan thua leite, Bawipaw hanlan ryalawpyapaw hawte, ahoypaw thinlung khate ryalah oh.⁸See athua zemah, a luepaw athua zemah, lukhakheit nynh ahoypaw kha a cyi ze, Bawipaw kyate atekuhpaw lasung kha a mue cih cipaw nyh oh.

⁹Bawi hae, nae see hae tungvaw kya tuhawte cyihbua oh. Minmin kha huraw nan oh, pawccecize nanning te minmin nynh vaawlang khua kya alokuhpaw Bawi na hoi oh zah, aning tuh hum sanmah maedo khyh cipaw nyh oh. Pachia kya-e Rhawtuk-uccaw

¹⁰Nyathyakou ka uno hae, Bawipaw kya te a thungnaw thawzung kyakhe nae thawsae sah.¹¹Satan lingnaw kha na dou kho nawlan oh Pachia kya-e rhawtuk-uccaw kha abalyn mawte lawkuh oh.¹²Pawccecize aening tuh chii te saw a hoipaw rhaw te ah doukuh khyh oh, thuasalama uktu hae, kawhoitu hae, hynh-e she mohnaw kya-e laephi uktu hae, vaawlang umpaw ahoy leipaw muisaw hae ryte nynh ah douku oh.¹³Tukeiccuze Pachia kya-e rhawtuk-uccaw kha abalyn mawte lawkuh oh, tuhteze nynh nin hoy leipaw kya na dou kho cih oh zah pawpaw balyn thangsah te tynkaring lan na thadyn kho cih oh.¹⁴Tukeiccuze byaccing athuapaw taeccia khate nae tae kha cciaku te, dingnaw athuapaw bykhaw kha khawkuh oh,¹⁵daenaw athuapaw thehoypaw kha phy khylan paccynkunaw kha ccukoh lang kohkuh oh,¹⁶tuh-e hae balyn laelan, zynnaw athuapaw khawriaphua kha ccyngkuh oh lah, tuh-e tuhte raerangsaro kya-e maee lang ruapaw thee hae balyn kha na the kho cih oh.¹⁷Khumnaw athuapaw sivawlukhung te Pachia bya athuapaw Muisaw thaloi kha ccyngkuh oh.

¹⁸Sawsangnaw te ngianaw phuin balyn khate Muisaw kya sawsang zungzae oh. Mithyaa hae balyn hanlan ngia oh lah, lungthang leite zuaku biate raeringkute um oh.¹⁹Thehoypaw kya-e byakhupaw kha rawhoyte ka nysah nawlan hae, bya ka ho vae ze ka ho lanpaw thehoypaw kha yn pya nawlan kae ka hanlan mah sawsang oh.²⁰Kae tuh tuh-e thehoypaw hanlan sivawrui te a khii hae paw locceihtu nynh ka thua; tukeiccuze ho lan ka ccan thyhte rawhoyte ka ho kho nawlan saw yn sangpah oh. Nyathya Beihlangnaw

²¹Ka tungvaw acyihkuhpaw te ka cyipaw kha na ny nawlan oh, Taikhikas nynh pawpaw balyn kha marya ae la hopah cih oh; aning tuh sungsahpaw uno thua zah Bawipaw kya a lungzipaw ryalahtu nynh thua.²²Kae tungvaw acyihkuhpaw te nae thinlung kha ngaengansah khylan eenaw te kae nynh amaw kha nae kalan kae saw.

²³Paaw Pachia te Bawipaw Jesu Khri kyate daenaw, zynnaw te sungsakunaw tuh uno hae kyakhe la um sah.²⁴Ah Bawipaw Jesu Khri kha tynkaring lan a sungsah hae paw balyn kya thawccinaw tuh la um sah. Amen.

Bible Society of Myanmar

https://app.library.bible/content/1a340f5ae072b2f4