Read RAWNAW HLAW 1

RAWNAW HLAW1

Ccungccaw Adaepaw Khuapi

¹Vaekheih lyaze ccungccawphe abeihpaw khuapi tuha makhaete kharouh um vae rei!Minphuin hae lakuze alesaenung tuhnomaenung hawte phe thua vae rei!Ram hae kyaze ram uktununga la thuapaw aning tuhsee lang nynh a tang vae.

²Khuazi khe thawte rah zaha byaki kya a mitphi alua;amaw a sungsah hae pawbalyn laku kya lungtangnawa pyatu lu kheit san um khyh,a ruiban hae balyn tuha tungvaw lungzinaw hoi leite,a rhaw hae lang nynh a tang vae hae.

³Judah tuh ramccang langsue thua zah, vawsawnaw temyarya ccihpaw seetangnaw khaa teing;minphuin hae laku khe khuasah zah,haeungnaw hmin muihkuh khyh;a lungriathae lyakhea deehuitu hae balyn nynh a phya hae.

⁴Poi kalan a cceihpawlu kheit san a um khyh keiccuzeZion lang ccianaw laanpi tuha rah a khui; a koikua balyn tuhccungccaw phe adae,a ranpibawi hae tuh rawkhuite a um hae;a liaccaw hae tuh mih ngaethah,amaw mah myarya a thinlungccih.

⁵Aning te a rhawkuh hae paw tuhbawi lang tang hae zah,a rhaw hae tuh hoynaw a mue hae,pawccecize a cyiseimenaw alung keiccuzeBawipaw nynh aning kha de a tah;rhaw hae nynh a ccaaw hae khakyng hae zah ccaring a cciakhae hae.

⁶Ccanung Zion a lesaenaw balyn tuhazo vae.Jerusalem e bawi hae tuhrampaeenaw a muihkuh leipawsazuh hae hawte nynh athua vae hae;minmin a deehuitu hae malang khethawzung hoi leite a ccue hae.

⁷Jerusalem nynh a riathae ccyh lyatea khiavuiku lyakhelangmawlya a la hoipawaphutepaw uccaw balyn kha a liathui.A ccungccaw hae tuhrhaw hae kuih kya thua hae zahbawmtu lu kheit sanmahhe a um khyh tuh,a rhaw hae nynh do hae zaha ccawbungpaw kha a nuinse hae.

⁸Jerusalem tuh myarya a sei keiccuzenuinsepaw lang a tang vae;a tungvaw saw a la tua hae paw balyn nynha sasete a umpaw khaa muih hae keiccuzea dothatheih vae hae;amaw mah rawkhuite um zahccungccaw kha do ngan vae khyh.

⁹A boeipae kya athupaw abekuh;a malang ccyh kha tua khyh;a khuliakunaw tuh ri lan a um,lungtangnaw a pya lanpawlu kheit san um khyh.“Pou Bawipaw , ka riathaenaw hynhyn muihpya tua,pawccecize ka rhaw hae nynhyn tae vae hae!” a ci.

¹⁰Aphutepaw a uccaw kharhaw hae nynh mih kuih a dyngnua hae;na ccungccaw zapi hae kalantee lan na ua lei hae pawminphuin ccangpaw hae nynha beikinnthyaa lungkhu langa tee hae paw khaaning nynh a muih.

¹¹A ccungccaw balyn tuh hawkhaekutelooh a ccungkuh hae;mih thawzung a umthui nawlanmih sisua kha looh lang a zua hae.Pou Bawipaw , hohcihtemouccungkia leipaw langka tang vae cipaw hynhyn do lah yn muihtua.

¹²Laanpi kya a cceih hae pawnanning balyn, e hynh nanning hanlanaccakaepaw tou athua?Do oh lah yn muihpya tua oh,Bawipaw nynh myaryaa thinria nin kheka tungvaw thuasah zahyn teingsahpawriathaenaw te alokuhpawccangpaw riathaenaw a um zawtou?

¹³Ahangnaw kyate maee kha yn sah zah,ka ru lungkhu lang po a tee;ka ccu kha kaang yn syakhaw zah,nulang bua yn kisah;lungriathaete yn nung zahanin ninlang ka thawzung yn tingsah.

¹⁴Ka cyiseimenaw kha taphu kyakhea kuih te heede zah,ka nging kya yn khiide keiccuzeka thaw yn thangsah;Bawipaw nynh ka thadynnuakho lei hae pawccungccaw hae kuih kalankae kha yn ap.

¹⁵Ka lungkhu umpaw arawthungpawka rhawkaw hae balyn khaBawipaw nynh a vua vae hae;ka ccangvae hae kha ro khylanccyh yn khyanua vae;misu mianaw khu kyamiade hawte Bawipaw nynhccanung liaccady Judah khaa syde vae.

¹⁶E uccaw hae keiccuze kae tuhka rah; ka mit kyate mitphi tuh alua;ka thawzung bua yn umsahtu telungtangnaw yn pyatuka pepan um khyh;rhaw nynh a tae hae keiccuzeka ccaaw hae tuh a lanme vae hae.

¹⁷Zion nynh a kuih khadyngtua zahmahaning kha lungtangnawa pyatu um khyh;Jakob innpaw hae khaJakob rhaw lang tang khylanBawipaw nynh kaw a pya vae hae;Jerusalem tuh minmin laku kyaanungsikuhpaw lang a tang vae.

¹⁸Bawipaw tuh ading,a bya kha ka rawsesei vae;nanning minphuin hae balyn,ngaetua oh,ka teingnaw hynh yn muihpya tua oh;ka liaccaw hae te ka ccangvae hae khakyng hae zah a cciakhae vae hae.

¹⁹Yn sungsah hae paw khaka ko hae zahmahkae kha yn ling hae;ka ranpibawi hae te ka piccan hae tuhmih thawzung a umthui nawlanlooh a ccungku lya hae khe,khuapi lungkhu kya a chih hae.

²⁰Pou Bawipaw , pawcih baban mouka lungriathae, beih yn dotua;ka vuepi tuh thawte a thyhleihkuh,ka lungkhu kya ka bung phe buleihkuh,nang kha kae la rawse keiccu nynh thua.Laanpi kya thaloi nynhchizo ngaethyanaw a umsah;inn lungkhu kya chinaw tealokuhpaw a um.

²¹Lungtangnaw yn pyatu um leite,ka hawkhaekunaw khaminmin nynh a thae hae.Ka rhaw hae balyn nynhka vawsawnaw kha a thae hae;na cyipaw hynh mih lungtua.Na khya vae paw accyh khayn thuasah ccavae lah,kae hawte minmin mahtung hae sah.

²²Ahoy leipaw mih cyisahnaw balyn khana malang thua vae sah;ka cyiseimenaw balyn keiccuzeka tungvaw na cyi hawteminmin kha mah cyih hae;pawccecize ka hawkhaekunaw tuhmyarya lung zah,ka lungthawthang vae.Pachia nynh Raeringnaw Pyanaw Accing

¹Bawipaw nynh thinriateZion ccanung kha maethyaphe a law vae rei!Israel a lesaenaw khavaawlang te laephi kalana sawbung vae;a thinria nin kya a ccua khangnawpaw khaliathui vae khyh.

²Bawipaw nynh thawcci leiteJakob a umnaw hae balyn kha a ro vae;a thinria keiccuze ccanung Judah kya-erhawlungrua hae kha a ting vae;peenaw te uktu hae kha thethyasahtelaephi kalan a sawbung hae.

³Myaryamaw a thinria zahIsrael a thungnaw balyn khaphe a paepya; rhaw hae malang khea ranglang kuih kha minmin kyatea khin vae, a pepanumpaw balyn kha pong a upawmaeesoi hawte Jakob kha a u vae.

⁴Rhaw hawte a li kha koi zah,rhaw hawte a ranglang kuih khatephang a nungde;Zion ccanung bu kya umpaw kaening nynhkae lungrythuakhaekupaw balyn khaaning nynh a chia vae hae;a thinrianaw kha maee hawtea ruasah vae.

⁵Bawipaw tuh rhaw hawte nynh athua vae;aning nynh Israel kha a ro vae;a siapharan inn balyn tea rhawlungrua hae kha roh zah,ccanung Judah kyakherawkhuinaw tengaethyanaw kha a lungsah.

⁶A umnaw bu kha khokhu hawte phou zaha beikbu kha a ro vae;Bawipaw nynh Zion kyakhebeiknaw poi tesabbath nin kha zosah zah,myaryamaw a thinria keiccuzesiapharan te ranpibawi kha a vua hae.

⁷Bawipaw nynh a silawhang kha sarya zah,a beikinnthyaa kha a vua vae;a siapharan inn hae kya-e pang hae kharhaw hae kuih kalan a pya vae hae;poitua lya hawte Bawipaw inn kyakhemih roi accae.

⁸Bawipaw nynh Zion ccanung kya-ekhualungrua kha ro lan a tuaku;arui kha po a raw; ronaw kyatea kuih kha synkuh khyh;atolang asanpaw khualungrua tekhualungruapi khamih ngaethyasah hae zah,parouh mawte aroh hae.

⁹A koikua hae tuh lae kaw langaccahbung hae;koikua hae kha roh hae zahaccong hae kha a khya hae;a siapharan te a uktu bawi hae tuhminphuin ccangpaw haelaku kya nynh a um hae;phung ccangpyakunaw um vae khyh,a profeh hae nynh Bawipaw kyatevizin mue khyh hae.

¹⁰Ccanung Zion kya-e piccan hae tuhlaekhu kya daebabi lan a haung hae;mih lu kya vuiping phingkuh hae zahburiboei kha a zingku hae;Jerusalem liaccaw hae nynh mih lu khalaekhu lang a bakhung hae.

¹¹Ka rawnaw ze ka mit phe phing vae;ka vuepi tuh thawte a thyhleihkuh,ka ccungccaw hae tuharo hae keiccuze,ka nyngkhaw atui tuhlaekhu kya lae athua,pawccecize nosi hae teimua taraw hae tuhkhuapi kya-e laanpi hae kyamih thawthang.

¹²Khuapi kya-e laanpi hae kyakhevaemaw a muepaw hawtemih thawthang lya temih hiinnaw khamih nung hae by vaw kyaa nung lya hae khe,“Looh te misutui teimou a um?” citemih nung hae kha a rawnua hae.

¹³Pou ccanung Jerusalem,na hanlan pawmouka ho kho cih zah, nang khapawtemou kae khinkhia cih?Pou ccanung liaccady Zion,nang kha lungtangnaw pya khylan,pawtemou nang khakae khinkhia kho cih?Na kya-e ronaw tuh rili hawteale keiccuze nang khahum nynh mou ae raethui kho cih?

¹⁴Na profeh hae nynh akyh leipaw telingnawpaw vizin hae khana hanlan a muih vae hae;nang kha langmawlya hawtebua thuasah khylan,minmin nynh na hoyleinaw khalangsaku leite, akyh leipaw tecciaseinawpaw hawnaw bya khaa muih vae hae.

¹⁵Laanpi kya a cceihpaw balyn nynhnang kha mih kuih ae bianua hae;ccanung Jerusalem khasaryanawpaw roisawnua hae zah,mih lu a thuhpya hae;“Puithyanaw phe accingpaw,laephi pynpi lungtuanawpaw, citea ko hae paw khuapi tuh,e hynh tou athua?” a ci hae.

¹⁶Na rhaw hae balyn nynhnang kha mih khalang ae awnua hae;saryanaw roi ae sawnua hae zah,mih haw ae zynua hae,“Aning kha phe ah laang vae oh!E nin hynh aening nynhah ngaehoi oh paw nin thua zah,nyathyakou tuh ah muihvae oh!” cite a sia hae.

¹⁷Bawipaw nynha paccynkupaw kha a cyi vae,langmawlya a la ho thyhtea bya kha a ccingsah vae,thawcci leite a ro vae;na rhaw kha na tungvawa lungtuasah zah,na rhaw thawzung khaa hangthung.

¹⁸Pou Zion ccanung kya-ekhualungrua,Bawipaw kalan thawte siatua!Mitphi tuh vawkhutui hawtekhuazi khuadae lua sah!Haeungtaw nan,na mitphi tuh po lua sah!

¹⁹Khuazi khe thokuh lah, siatua!Bawipaw malang khena thinlung kha tui hawte moh laetua!Mih vuelaw keiccuzemih thawthang zahlaanpi atungkunaw takyh kyaum hae pawna ccaaw hae hiinnaw hanlanamaw kalan na kuih hangtua.

²⁰Pou Bawipaw , beih dotua lah,hoyte tuatua!E hynh hum tungvaw mou na cyi?Nungpi hae nynh a saahku hae pawmih ccaaw hae khaae lan accan zawtou?Ranpibawi hae te profeh hae khaBawipaw beikinnthyaa kyachia lan accan hae zawtou?

²¹Zawthaw hae te kum tang hae paw tuhlaanpi kya laekhu khe a huekuh hae;ka liaccaw hae te ka ccangvae hae tuhthaloi te a chih vae hae;na thinria nin khe thawcci leiteminmin kha na chia vae hae.

²²Poi lyaze ccungccaw ko hawte,ka pepan balyn kyateka rhaw hae kha nae konua hae;Bawipaw a thinria nin kya tuhlu kheit sanmah lue khyh zah hiin khyh;ka saahkuh hae zahka kuaku hae paw ka ccaaw hae khaka rhaw nynh a chia vae hae.Pachia Sungsahnaw Zungzae Atyn

¹Kae tuh Pachia thinrianawccungngue te riathaenawa tung vae paw nynh ka thua;²kae kha yn cciakhae zahawnaw papin a um leinawmohnaw lungkhu langkhe yn saw;³kae kyalya kha anin ninlanga kuih te atu te atu yn bia bungthung.

⁴Ka ngesaw te ka ving khaphe yn zoihsah zah,ka ru hae kha yn khya vae;⁵kae kha phang yn koihlu zah,teingnaw te vawsawnaw khatephang yn lungde;⁶a chinaw asaw vae paw michi hawtekae kha mohnaw kya yn haungsah.

⁷Ka pou kho khyh ccaw citepang kha yn thungkhaw zaharipaw sivawrui te yn khii;⁸bawmnaw mue khylanka ko zah ka sia zemahka sawsangnaw kha yn vuapya;⁹ka laanpi kha a-awkuhpawlungtungpi te yn pingpah zahka ccianaw kha yn kousahpya.

¹⁰Aning tuh kae yn buhkhawpaw vong,a rekuhpaw chindeih nynh thua;¹¹ka laanpi kyate yn cciasah sei zahzoihtatyh lan yn pae;kae kha yn vuasya;¹²a li kha koi zah, kae khaa the nynh a tung lanpawthemuing lang yn taw.

¹³A the bawng lungkhu e a the hae khateka kin kha yn kaw;¹⁴Kae tuh ka ccungccaw hae balyn kyazenuinsepaw lang ka tang vae zah,anin ninlang mih hlawkea sahnua hae paw lang ka tang vae.¹⁵Akhahpaw te phe yn bynsah zah,eccangkary khate phe yn ruisah vae.

¹⁶Lung vawlan khe ka haw khayn king zah, buhhaw te yn phing.¹⁷Ka hiinnaw tuh daenaw um khyh;lungtuanaw tuh pawmouathua cipaw phe ka ning vae;¹⁸tukeiccuze, “Ka phu-enaw azo vae,Bawipaw kyateka la ngaehoipaw balyn tuhphe azo vae,” cite ka ho.

¹⁹Ka lungriathaenaw teinn lei loo leite ka vaevuipaw hynhka tua vae ze, eccangkary tesanyngkhaw khya hawte nynh akhya!²⁰Tuh-e tuh apaekuh lei lan ka tua zah,ka lungkhu kya ka ngaethah.²¹Thuasalama e hynhka tuathui keiccuzengaehoinaw ka hoi.

²²Bawipaw sungsahnaw atynpaw tuhkharouh pae boi khyh,a thawccinaw tuhkharouh thang boi khyh;²³tuh-e a sungsahnaw tea thawccinaw tuhawkhua takyhte athaw hae;na lungzinaw tuh myarya ale.²⁴“Bawipaw tuh ka hanpaw nynh thua,tukeiccuze amaw kyaka ngaehoi cih,” citeka muisaw nynh a ho.

²⁵Bawipaw tuh amawa ngaehoikuh hae paw teamaw a ccung hae paw hanlan ahoy.²⁶Bawipaw khumnaw khadaebabi lan ngaw tuh ahoy.²⁷Ccungccaw nynh a zawthaw lyakhepuihnawpaw ccong khaa puih lanpaw nynh thua.²⁸Bawipaw nynh tuh-epuihnawpaw ccong khaa puihsah lyakhea makhaete daebabi lana haung ze ahoy,²⁹(ngaehoinaw a um kho cite tuate),a mung kha vuiping kyaphang a nae ze ahoy,³⁰a biatu kalan khea byaki kha tuakutesaryanaw a teing ze ahoy.

³¹Pawccecize Bawipaw nynhzungzaete vua lan khyh.³²A ngaethyasah zemah,zungzae tynpaw a sungsahnaw tuhmyarya ale thyhte ngaethya a umsah cih;³³ccungccaw hynh ruaruateriathaesah ry khyh zahngaethyasah ry khyh.

³⁴Ram lungkhu e thongccah hae khaccu te sydenaw,³⁵Ahang Huaccepaw Pachia malang kheccungccaw nynh mue lanaccanpaw kha muesah leite,³⁶lukhakheit byathan khahe a buleihpya hae ze,Bawipaw nynh muih khyh tou?

³⁷Bawipaw nynh kawpya khyh lanze,hum nynh mou kawpya kho zahkhah-e kha a cyisakuh kho?³⁸Ahoypaw te athahpaw hynhAhang Huaccepaw Pachiaa munglae kyate yn toikuh khyh tou?³⁹Ahiinpaw lukhakheit nynha seinaw keiccu detahnawa muepaw khapawccemou a bokhaeku?

⁴⁰Aening nynh ah laanpi khadothuite syntawtua oh sih lah,Bawipaw kalan ki oh sih.⁴¹Vaawlang umpawPachia kalan kheah kuih kyalya thua leiteah thinlung balyn khahangthung oh sih.⁴²Kaening tuh kae sei vae zahkae dou vae, kae seinaw khanae ngaethya vae khyh.

⁴³Thinrianaw te phang nalungdekuh zah nae deehui,ngaethyaumsah leitekaening kha nae chia;⁴⁴kae sawsangnaw nynhpo a zuake kho khyh ccaw cite,maeking khate phang na lungde.⁴⁵Minphuin hae laku khe kaening khaanungsikuhpaw teathupaw lang nae rae vae.

⁴⁶Kae rhaw hae balyn nynhmih khalang kha oun awnua vae hae;⁴⁷rinaw, hunghua akhupaw,maemihnaw te ronaw nynhkae tungvaw oun thuanua vae.⁴⁸Ka ccungccaw hae tuhronaw a tung hae keiccuzeka mitphi tuh vawpi hawte alua.

⁴⁹Vaawlang umpaw Bawipaw nynhyn dobung zah yn muih mawlaezung,ka mitphi tuh apaekuh lei landae leite po alua cih.⁵¹Ka khua kya-eliaccaw hae tungvawacyihkuhpaw khaka muih zah ka ngaethah.

⁵²Akonglang um leitekae yn rhawtu hae nynhpavaw bi hawte bi hae;⁵³Ka hiin pite hunghualungkhu lang yn vua hae zah,lung te yn nethin hae;⁵⁴ka lu kha tui nynh yn vu zah,“Ka chih vae,” ka ci.

⁵⁵Pou Bawipaw ,akhunaw lungkhu tena min kha kae ko;⁵⁶“Bawmnaw mue khylanka siaruanaw hynhna nakaring hutawku leitebawmnaw beih yn pyatua!” citekae ngiakunaw kha nae thaepya.⁵⁷Nang kha kae koku vae ze,nae naenuakuh zah,“Rih nan!” nae cipya.

⁵⁸Pou Bawipaw, ka byathan khaccaring nae lawpah zah,ka hiinnaw kha nae luesah vae.⁵⁹Pou Bawipaw , ahme leiteka tungvaw yn cyi hae paw khanae muihpya vae;ka byathan hynh bya beih yn piapya tua.⁶⁰Kae yn rhawnaw hae balyn tearuh lante yn paccynnuakuhae paw balyn kha phe na muih vae.

⁶¹Pou Bawipaw ,yn saryanaw hae tearuh lante yn paccynnuakuhae paw balyn khaphe na thae vae.⁶²Ka rhaw hae nynhanin ninlang ka thanhotekae kha yn rawse hae.⁶³A haung hae ze thuasah,a thadyn hae ze thuasah beih dotua hae,kae tuh saryanawpawhlaw lang nynh yn sah hae.

⁶⁴Pou Bawipaw ,mih kuih nynh rya a law thyhtemih cyisahnaw kha liaru hae!⁶⁵Lungriathaenaw pya hae lah,minmin kha thyalawtua hae!⁶⁶Thinriate minmin kha deehui hae lah,Bawipaw vaawlui zakaw kyate rotua hae.Zion kha Detahnaw

¹Sui tuh azong aleih vae,sui ccipaw tuh arulaekuh vae!Athyaapaw lung hae tuhlaanpi atungkunaw takyh kyaphiariphiarae a um hae.

²Sui hoypaw hawteakhinccite amee um zahaphutepaw Zion ccaaw hae tuhang raetu nynh a raepawlaephi ang lang nynhria athua vae hae!

³Suizaw hae nynh heizemih taw hae khamatei tuapakuh hae zah a zusah hae,thuasalama ka ccungccaw hae tuhramkaw e kalauh pavaw hawtemih rysawthah vae.

⁴Nosi hae tuh mateitui kanmaw hae zah,mih lae tuh mih dankhaling kya abekuh vae;ccaaw hae nynh looh a ngiaku hae zemahhumhung nynh mahccapyh san pya khyh hae.

⁵Looh athuathuapawa la ae he hae paw tuhlaanpi kya aroh vae hae;boeining hoypaw a lalawkuh he hae paw tuhbuhhaw apumkuhpaw kya nynha pum vae hae.

⁶Kuih hangnua leite,vaekheihmawte Sodom khua kyaaccahpaw detahnaw laezeka ccungccaw hae tungvaw edetahnaw tuh alehua.

⁷A bawi hae tuh vuiraw laezethyaahua hae zahmateitui laeze arawhua hae;mih ngesaw tuhlung sepaw laeze asehua,mih sang tuh nilar lung te nynh aloku.

⁸Atu vae tuh, mih mae tuhangmae laeze manhua zah,laanpi kya syntaw lanum vae khyh hae.mih ving tuh mih ru vawlandawkadae lan cih zah,thing hawte nynh arou vae.

⁹Thaloi te a chih hae paw tuhkanmaw te a chih hae paw laezelungtuapaw nynh athua hae.Loo kyate apoupaw looh hoi leite,mih hiinnaw tuh azo.

¹⁰Thawccih thyapawnungpi hae kuih nynhmih ccaaw hae toulou khasaw lang a thungku vae hae;ka ccungccaw hae aro ccyh lya hae khemih ccaaw hae tuhmih looh lang a tang hae.

¹¹Bawipaw nynh a thinrianaw khakhaleih a pousah;maee lang ruapawa thinrianaw kha buu zah,Zion khua kha maee te a soi,te khua a thonaw aleihpaw ciaphe ccung lan a u.

¹²Rawsetu nynh thuasah,rhaw nynh thuasahJerusalem koikua lungkhu langa tee kho hae cipaw khalaephi siapharan hae telaephi ccungccawlu kheit nynh sanmah zyn khyh hae.

¹³Tuh-e tuh Jerusalem eprofeh hae te ranpibawi haehoyleinaw keiccu nynh thua,minmin nynh Jerusalem ngaelung khemiding hae chii kha a luasah hae.

¹⁴Minmin tuh mingaee hae hawtelaanpi kya a khiavuikuh hae,mih boeining tuh chiise te nungsikuh zah,hum nynh sanmah ty ngan khyh hae.

¹⁵Ccungccaw hae nynhminmin kha, “Cceih oh!A thyaa lei hae paw!Ccaring cceih oh! Yn tynan oh!” cite a sianua hae.Tuhcite minmin tuh a ccue hae paw tea khiavuikuh hae paw lang a tang hae;minphuin ccangpaw hae nynh,“Minmin tuh e kya khaw ciaum vae lan khyh hae,” citea hoku hae.

¹⁶Bawipaw ccaccei maw nynhminmin kha phiariphiaraea nung vae hae,minmin kha pawlangriavae lan khyh hae;ccungccaw hae nynhranpibawi hae khasawtua vae khyh hae,cciakhaetu hae khamaedo vae khyh hae.

¹⁷Bawmnaw mue khylanalakaw lan kae dohannaw zekae mit phe ccih vae;kaening oun khum kho leipawminphuin kha thawmuintephang kae ngaw.

¹⁸Kae laanpi kyakae ccia kho khyh nawlan,minmin nynh kae ccunoh khaoun zui hae; kae thangnaw ccyhanae vae; kae ccyh athang vae;kae thangnaw a thua vae.

¹⁹Kaening oun deehuitu hae tuhvaawlui e lantaw hae laezearanghua hae;mua vawlan khe kaening khaoun ccung hae,ramkaw khe mahoun buhkhaw hae.

²⁰Kae hiinnaw hy athuapaw,Bawipaw nynh chitui thuhpaw,ccangpaw minphuin hae laku kyaamaw mynlyh kaw khe ah um cih oh,cite amaw kong kae la hokupaw kharhaw hae nynh hunghualungkhu lang a saw vae hae.

²¹Pou ccanung Edom,lungtua lungpawte umtua,Uz ram kya um hae paw nanning,lungtua lungpawte um oh;thuasalama nang na kalan mahbanang yn thua cih;na rui cih zah na boeiningphaekute na sasete na um cih.

²²Pou Zion ccanung,na seinaw keiccudetahnaw tuh accing vae,kyngte ramccang langcciakhae na thua vae lan khyh.Pou ccanung Edom,na seinaw keiccu de ae tah cih zah,na seinaw kha a langsakuh cih.Thawccinaw Ngiakunaw

¹Pou Bawipaw , kae tungvawacyihkuhpaw hynh beih tuatua;kae thethyanaw hynhoun dotua lah, oun nytua!²Kae rho athuapaw ram tuhminphuin ccang hae kalanpya thua vae zah, kae inn hae tuhramccang hae kalanpya athua vae.³Kaening tuh paaw hoi leipawngawraw hae lang kae tang vae;kae nung hae tuhnomae hae hawte nynh athua vae hae.⁴Kae niapaw tui mee kha pya aho vae;thing mah reku aho vae.⁵Kae nging vawlan taphu khangtethawte rya oun reih hae;kae thawbang zemahoun haeungsah khyh hae.⁶Looh phe zaw lan mueku khylanIzip te Assiria hae rytenawccawnaw kae rae vae.⁷Kae minpaaw hae tuhla sei hae zah, atu tuh um vae khyh hae,te minmin hoyleinaw khakaening nynh kae teing.⁸See hae nynh kaening khaoun uk hae; mih kuih kyateoun luesah lanpawlu kheit san um khyh.⁹Ramkaw e thaloi rhaw keiccuzechi ze chi ci ciatelooh kae ccungkuh.¹⁰Maee lang ruapawccakanccinaw keiccuzekae ngesaw tuhlungthuh hawte aman.¹¹Zion khua kya nopi hae teJudah khua hae kyaliaccady hae khakyngdete a ikhae hae.¹²Bawi hae kha mih kuih tea saethung hae;cciakhaetu hae kha mahsawtua khyh hae.¹³Ccangvae hae kha nangsetelooh a miasah hae,pise taraw hae tuhmyarya ripaw thing puihtevyavya khuliakuh hae.¹⁴Paawpi hae nynhkhuapi koikua kha cciataw hae zah,ccangvae hae nynhmih tintang kha a cciataw vae hae.¹⁵Kae lungtuanaw tuhzya adae vae; kae lawnaw tuhrawkhuinaw lang nynh a tang vae.¹⁶Bawilukhung tuhkae lu kyate accah vae;kae sei vae keiccuzekaening hanlan ngaethya lan kou um!¹⁷E keiccuze kae lungroh vae,e uccaw hae keiccuzekae mit tuh hoytengawmuih vae khyh:¹⁸Zion Mua tuhccungccaw adae vae keiccuze,a vawlan khe suizaw hae tuha khiakuh bungthung hae.¹⁹Thuasalama, pou Bawipaw ,nang nynh zungzae na uk;na bawitungkhung tuhshe takyh kya po atyn.²⁰Pawccemou kaening hynhkharouh nae ning vae?Pawccemou kaening hynhkhaw cia nae vua?²¹Pou Bawipaw , kaening nynhnamaw kalan bua kae ki kho nawlan,namaw kalan beih oun kisah;langmawlya hawtekae ccyh hynh beih oun thawsahpah—²²tuhkhyhze kaening hynhkhaleih nae vua vae cih tou?Tou kho lei lan ciatekae tungvaw na thinria cih tou?

Bible Society of Myanmar

https://app.library.bible/content/1a340f5ae072b2f4