BYAPIATU1

Adonibezek Kyngnaw

1Joshua a chih koute Israel hae nynh Bawipaw kha, “Kanaan hae kha tuk khylan kaening hanlan hummou masaty a cceih cih?” cite a khia hae.2Bawipaw nynh, “Judah nynh a cceih cih. Ram kha a kuih kya ka pya vae,” a ci.3Judah nynh a upaw Simeon kha, “Kanaan hae kha tuk khylan ka ccoupaw ram lungkhu lang yn cciakhae; kae nynh mah na ccoupaw ram lungkhu lang kae cciakhae ru cih,” a cipya. Tukeiccuze Simeon nynh a cciakhae.4Te Judah nynh cceih zah Kanaan hae te Periz hae kha Bawipaw nynh mih kuih kya pya hae zah, Bezek khua kya ccungccaw thong haw kha a chia hae.5Bezek khua umpaw Adonibezek kha ccianua hae zah a tuk hae, Kanaan hae te Periz hae kha a tae hae.6Adonibezek tuh a ccue, thuasalama deehuite kyng hae zah a kuihpi te a ccupi kha thoh tya hae.7Adonibezek nynh, “Mih kuihpi te mih ccupi tya athua hae paw siapharan hae sung sari nynh ka ccaboi kaw e loohmoi hae kha leih a khuingku hae; ka la cyi hawte Pachia nynh yn liaru vae,” a ci. Jerusalem lang cciakhae hae zah tuin kya a chih.
8Te Judah hae nynh Jerusalem kha tuk hae zah a law hae, thaloi te bae hae zah maee te a soi hae.9Tukoute muaram hae, Negeb te laelung anenaw kya um hae paw Kanaan hae kha tuk khylan Judah hae nynh a ccianua hae.10Judah hae nynh Hebron khua kya um hae paw Kanaan hae kha ccianua hae zah, Sheshai, Ahiman te Talmai kha a tae hae (Hebron khua a min tuh langmawlya Kiriath-arba acikuh).
11Tuin kyate Judah hae nynh Debir khuaccaaw hae kha a ccianua hae (Debir khua a min tuh langmawlya Kiriath-sefer acikuh).12Te Kaleb nynh, “Kiriath-sefer khua kha tuk zah a lah khopaw tuh ka ccanung kha zu lang ka pya cih,” a ci.13Kaleb neitawpaw Kenaz ccapaw Othniel nynh tuh-e khua tuh lah zah, Kaleb nynh a ccanung Aksah kha zu lang a pya.14Aksah nynh a kya a thua te, Othaniel tuh Aksah nynh a paaw loo ccyng kheit kha ngia lan a naw. Aksah tuh a lann tungvaw te a sahkuh te, Kaleb nynh, “Pawmou na ry?” cite a khia.15Aksah nynh, “Lasung ccangkheit beih yn pya; kae hynh Negeb ram kya nae umsah keiccuze Tuisung kha mah beih yn pya,” a cipya. Tukeiccuze Kaleb nynh Palung Tuisung te Alia Tuisung kha a pya.
16Moses a pupaw Ken minphuin Hobab ciihan hae tuh Judah hae ryte ungcci ku khua kyate Arad khua pe e Negeb kya umpaw Judah ramkaw langkhe cceih hae zah Amalek hae ryte khua a sahkheih hae.17Judah tuh a upaw Simeon ryte cceih hae zah Zefath khua kya um hae paw Kanaan hae kha tae hae zah, khaleih a ro hae. Tukeiccuze tuh-e khua min tuh Hormah a ci hae.18Judah nynh Gaza khua te a pepan e ram, Ashkelon khua te a pepan e ram, Ekron khua te a pepan e ram hae kha a law hae.19Bawipaw nynh Judah kha umkhae zah, muaram kha a law kho, thuasalama bialae um hae paw tuh sivaw marangle a hoi hae keiccuze dee kho khyh hae.20Moses nynh a ho hawte, Hebron kha Kaleb a pya hae; aning nynh Anak ccapaw hae lu thum kha tuin kyate a dee hae.21Thuasalama Benjamin phin hae nynh Jerusalem kya um hae paw Jebus hae kha dee khyh hae; tukeiccuze Jebu hae tuh Benjamin phin hae ryte Jerusalem kya atunin cia a umkheih hae.
22Josef ciihan hae nynh mah Bethel kha tuk lan a ccianua hae; Bawipaw tuh minmin kya a um.23Josef ciihan hae nynh Bethel langkhe dophitu hae kha a saw hae (tuh-e khua min tuh langmawlya Luz acikuh).24Khua lungkhu te yn cceihpaw ccungccapaw lu kheit kha dophitu hae nynh muih hae zah, “Khua lungkhu lang a teepaw laanpi kha beih oun hopya tua, te na tungvaw thawccinaw kae hoi cih,” a cipya hae.25Tetuh aning nynh khua lungkhu lang a teepaw laanpi kha a hopya hae; te minmin nynh khuaccaaw hae kha thaloi te a bae hae, thuasalama tuh-e ccungccapaw te a innbyn hae balyn kha tuh a cciasah hae.26Tuh-e paw tuh Hit hae ram lang cceih zah khua khuakheit rae zah Luz cite min a phu; atunin cia tuh-e tuh a min nynh thua.
27Manasseh nynh Beth-shean khua te a khua taraw hae kya um hae paw, Taanak khua te a khua taraw hae kya um hae paw, Dor khua te a khua taraw hae kya um hae paw, Ibleam khua te a khua taraw hae kya um hae paw te Megiddo khua te a khua taraw hae kya um hae paw kha dee khyh hae; Kanaan hae tuh tuin ram kya po a um hae.28Israel hae nynh thawzung oun hoi hae tuh, Kanaan hae kha nangsete ryalawsah hae zah dee tuh dee khyh hae.
29Efraim nynh Gezer khua kya um hae paw Kanaan hae kha dee khyh hae; Kanaan hae tuh minmin ryte Gezer khua kya a umkheih hae.
30Zebulun nynh Kitron khuaccaaw hae, Nahalol khuaccaaw hae kha dee khyh hae; Kanaan hae tuh minmin kya umbua hae zah nangsete ryalawsah athua hae.
31Asher nynh Akko khuaccaaw hae, Sidon khuaccaaw hae, Ahlab khuaccaaw hae, Akzip khuaccaaw hae, Helbah khuaccaaw hae, Afik khuaccaaw hae te Rehob khuaccaaw hae kha dee khyh hae;32Asher phin hae nynh tuin ram kya um hae paw Kanaan hae kha a dee khyh hae keiccuze minmin ryte a umkheih hae.
33Naftali nynh Beth-shemesh khuaccaaw hae, Beth-anath khuaccaaw hae kha dee khyh hae, tuin ram kya um hae paw Kanaan hae ryte a umkheih hae; tuhzemah Beth-shemesh khuaccaaw hae te Beth-anath khuaccaaw hae tuh minmin hanlan nangsete ryalawpahtu lang a tang hae.
34Amor hae nynh Dan hae kha muaram langkhe dee hae zah, bialae lang rungbung lan kaw-ua khyh hae.35Amor hae tuh Har-heres mua, Aijalon te Shaalbim kya po a um hae, thuasalama Josef ciihan hae tuh thawzung a hoi hae keiccuze minmin tuh nangsete ryalawsahpaw lang a tang hae.36Amor hae ramri tuh Akrabbim kaethungnaw te Sela kyate palung lang po a kaethung. Israel Kawngae Leinaw
1Bawipaw vaawpaw tuh Gilgal kyate Bokhim lang cceihthung zah, “Izip ram kyate kae cciakhae thung oh zah, nae minpaaw hae kya bya ka kinpyaku hae paw ram lungkhu lang kae teekhae oh. ‘Nanning ryte ka raepaw byakinnaw kha papin ka roh lan khyh.2Nanning nynh hynh-e ram kya um hae paw ryte byakinnaw kha rae nan oh; mih silawhang hae kha roh oh,’ ka ci. Thuasalama ka kaw na ngae khyh oh. Na cyi oh paw hynh dotua oh!3Tukeiccuze kae hopya oh, e ccungccaw hae hynh nae malang kyate ka dee lan khyh hae; minmin tuh nae rhaw hae athua cih hae zah, mih pachia hae tuh nae hanlan kaang athua cih,” a ci.4Bawipaw vaawpaw nynh Israel hae balyn kya hynh-e bya he a ho tuh, ccungccaw hae tuh thawte a rah hae.5Tukeiccuze tuh-e hmin tuh Bokhim cite min a phu hae, tuin kyakhe Bawipaw kalan si a law hae. Joshua Chinaw
6Joshua nynh ccungccaw hae kha he a kisah hae te, Israel hae balyn tuh ram kha ccou khylan mih rho laephi raveih langkhe a cceih hae.7Joshua she lungkhu te Bawipaw nynh Israel hanlan ryalaw lepaw a lawpaw balyn kha a muih hae paw Joshua nukhu e piccan hae she lungkhu balyn tuh Israel hae nynh Bawipaw kha a beik hae.8Nun ccapaw Joshua, Bawipaw seepaw tuh za kheit kum haw acih te a chih.9Gaash Mua thahlang, Efraim mua vawlan, Timnath-heres kya umpaw a rho laephi kyakhe a uu hae.10Te tuin she e ccungccaw hae balyn tuh mih minpaaw hae kyakhe sueluabua athua hae; Bawipaw kha thuasah, Israel hanlan a cyipyapaw rya kha thuasah a nyh leipaw she thawpaw tuh minmin koute yn langkuh. Israel Lungzi Leinaw
11Te Israel hae nynh Bawipaw muihnaw kya ahoy leipaw kha cyih hae zah Baal kha a beik hae;12Mih minpaaw hae Pachia, Izip ram kyate a poukhae hae paw Bawipaw kha a vua hae; mih pepan e ccungccaw hae kya-e ccangpaw pachia hae kha zuite bakhungnua hae zah Bawipaw kha a thinriasah hae.13Bawipaw kha vua hae zah Baal te Astartes pachia hae kha a beik hae.14Tukeiccuze Israel tungvaw kya Bawipaw thinrianaw tuh maee lang rua zah, luadetu hae kuih kalan a pya hae, mih pepan umpaw mih rhaw hae kuih kalan a zua hae, tetuh mih rhaw hae kha thadynnua kho vae khyh hae.15Bawipaw nynh raeringnaw pya hae zah bya a kinpyaku hae hawte, a ccianaw takyh hae kya Bawipaw kuih nynh phang zokhaw hae zah myaryamaw mih vawsaw.
16Tetuh minmin a luadetu hae kuih kyate a luesahtu hae paw byapiatu hae kha Bawipaw nynh a langsaku hae.17Tuhzemah minmin nynh mih byapiatu hae bya kha ngaelae khyh hae; ccangpaw pachia hae kyakhe ohhuakuh hae zah a beik hae. Bawipaw kawbya a ngae hae paw mih minpaaw hae nynh a zui hae paw laanpi kyate aro mawze ccanglang a cceihsei hae.18Bawipaw nynh minmin hanlan byapiatu hae kha a langsaku takyh vae ze, Bawipaw tuh byapiatu kya um zah, tuh-e byapiatu she balyn kya mih rhaw hae kuih kyate a luesah hae; pawccecize minmin tuh tuaasahtu hae te vawsaw pyatu hae keiccuze a raw a khuinaw hae liate Bawipaw nynh minmin kha thawcci hae.19Thuasalama byapiatu he a chi vae ze, mimaw mamin lang bua tang hae zah mih minpaaw hae laeze athahhua lante a hiin hae, ccangpaw pachia hae kha beik hae zah a bakhungnua hae. Mih cyisahnaw te mih lungkhungnaw kha ccapyh san vua khyh hae.20Tukeiccuze Israel tungvaw Pachia thinrianaw tuh maee lang rua zah, “E ccungccaw hae nynh mih minpaaw hae kya kaw ka pya hae paw ka byakinnaw kha roh hae zah ka bya a ngae khyh hae keiccuze,21Joshua he a chih te, a laehy hae paw minphuin hae kya-e phuin kheit sanmah mih malang kyate ka dee lan khyh hae,” a ci.22Mih minpaaw hae nynh a zui hae hawte Bawipaw laanpi kha a zui hae tou zui khyh hae tou cipaw syntawtua nawlan,23Bawipaw nynh khah-e minphuin hae kha palou dee leite umsah hae zah Joshua kuih kalan pya khyh hae. Ram kya A laehypaw Minphuin hae
1Kanaan ram kya rhaw a tuk boi lei hae paw Israel hae balyn kha syntawtua khylan2(She takyh kya-e Israel hae nynh rhawtuknaw zia kha a ny nawlan hae kyalya te, langmaw lyaze rhawtuk boi lei hae paw kha rhawtuk ccangpya khylan) Bawipaw nynh a laehysah hae paw minphuin hae tuh hynh-e hae hynh nynh athua hae:3Filistin siapharan lu pangaw hae, Kanaan hae mih balyn, Sidon hae te Baal-hermon Mua kyate Lebo-hamath mua kyacia Lebanon Mua kya um hae paw Hiv hae nynh athua hae.4Bawipaw nynh Moses kyate mih minpaaw hae kya kaw a la pya hae paw a kawbya hae kha a zui hae tou zui khyh hae tou cipaw ny nawlan, tuh-e hae tuh Israel hae kha syntawtua nawlan nynh thua hae.5Tukeiccuze Israel hae tuh Kanaan hae, Hit hae, Amor hae, Periz hae, Hiv hae te Jebus hae laku kya um hae zah,6mih ccanung hae kha zu lang a dyku hae, mimaw mih ccanung hae kha mah tuh-e hae mih ccapaw hae zu lang a pya hae; mih pachia hae kha a beikbua hae. Othniel
7Israel hae nynh Bawipaw muihnaw kya hoyleinaw kha rae hae zah, Bawipaw mih Pachia kha ningte Baal hae te Asherah hae kha a beik hae.8Tukeiccuze Israel tungvaw Bawipaw thinrianaw tuh maee lang rua zah, Mesopotamia siapharan Kushan-rishathaim kalan a zua hae, Israel hae nynh Kushan-rishathaim kha kum tarya rya a lawpya hae.9Thuasalama Israel hae nynh Bawipaw kalan he a sia hae te, Bawipaw nynh Israel hae hanlan luesahtu lu kheit kha langsakuh zah, aning nynh a luesah hae, tuh-e paw tuh Kaleb neitaw Kenaz a ccapaw Othniel nynh thua.10Bawipaw muisaw tuh Othniel tungvaw yn thua zah, aning nynh Israel hae kha bya a pia hae; rhawtuk lan thokuh zah, Mesopotamia siapharan Kushan-rishathaim kha Bawipaw nynh a kuih kya a pya, te Kushan-rishathaim kha a tae.11Tukeiccuze ram tuh kum sung pali lungkhu daenaw a um. Te Kenaz ccapaw Othniel tuh a chih. Ehud
12Israel hae nynh Bawipaw muihnaw kya hoyleinaw kha bua a rae hae; Bawipaw nynh Israel kha rawsete Moab siapharan Eglon kha thawzung a hoisah, pawccecize Bawipaw muihnaw kya hoyleinaw kha a rae hae.13Eglon nynh Ammon hae te Amalek hae ryte nawccawkheihnaw raete Israel kha ccianua zah a tae; te ungcci ku khua kha a law.14Tukeiccuze Israel hae nynh Moab siapharan Eglon kha kum haw lae tarya rya a lawpya hae.
15Israel hae nynh Bawipaw kalan he a sia hae te, Bawipaw nynh minmin hanlan luesahtu lu kheit a sawpya hae, aning tuh Benjamin phin, Gera ccapaw, a voikepaw Ehud nynh thua. Israel hae nynh aning kha Moab siapharan Eglon kalan ngunto kha a thahsah hae.16Ehud nynh dong kheit sae zah kyn ning ahepaw thaloi kha raekuh zah, a ranglang phae kya a boeining kaw khe a heedeku.17Te ngunto tuh Moab siapharan Eglon kha a pya. Eglon tuh myarya a tho.18Ehud nynh ngunto he a pya koute, ngunto a phu hae paw kha a saw hae.19Thuasalama amaw tuh Gilgal khua pe umpaw lungbing kalan ki zah, “Pou siapharan, na hanlan byaphi ka hoi,” a cipya. Tetuh siapharan nynh, “Daebabi lan um oh!” cipah hae zah a ryalahtu hae balyn tuh a muihnaw kyate a pou hae.20Te kyaakakinpaw akhaan lungkhu a makhaete a um lyakhe, Ehud nynh naenuakuh zah, “Na hanlan Pachia kyate yn thuapaw bya ka hoi,” cipah zah, siapharan tuh a dahungnaw kyate yn thokuh.21Tetuh Ehud nynh a voilang kuih kha dyngte a ranglang phae kya-e thaloi kha thuaakuh zah, Eglon vue kha a thuing;22thaloi tuh alua ryte po ccong lan tee zah, atho nynh thaloi kha pong a bong, a vue kyate thaloi kha phoh khyh, a-ia phe toikuh.23Te Ehud tuh tee takawnaw akhaan kalan pou zah kyaakakinpaw khaan thuakaw hae kha khaw zah toh te a tousung.
24Ehud he a pou koute ryalahtu hae nynh oun thua hae zah, kyaakakinpaw khaan thuakaw phang toukuhpaw kha a muih hae tuh, “Siapharan hynh kyaakakinpaw akhaan kya a zuin ung hynhsa,” cite a tua hae.25Mih ngaemyng cia ngaw hae zah, kyaakakinpaw khaan thuakaw kha a hung khyh keiccuze tohccung lawkuh hae zah a hung hae. Mih bawipaw rhua tuh laekhu kya phang a la huekuh vae.
26Tuhcite a ngaw lya hae khe, Ehud tuh lungbing khunglang zya cceih zah Seirah khua lang po a ccue.27Aning nynh he a thua te, Efraim mua vaw khe mungkae a tu; Israel hae nynh a nulang te zui hae zah mua vaw te a rungbung hae.28Ehud nynh minmin kha, “Ka nulang yn zui oh; pawccecize Bawipaw nynh nae rhaw hae Moab hae kha nae kuih kya ae pya vae oh,” a cipya hae. Tetuh a nulang zuikute rungbung hae zah, Moab hae nynh Jordan vaw a zuanaw hae hmin kha lah hae zah, lu kheit sanmah vaw zuasah khyh hae.29Tuh ccyh lyakhe Moab hae athungpaw te arawhoypaw balyn kha lu kheit san zuasah leite thong haw loukaw a chia hae.30Tuhcite tuin nin khe Israel kuih kya Moab tuh a shung. Te ram tuh kum sung tarya lungkhu adae. Shamgar
31Ehud koute Anath ccapaw Shamgar tuh yn langkuh, aning nynh Filistin hae za taruh kha ccong ahepaw te a chia hae. Aning nynh mah Israel hae kha a luesah hae. Deborah te Barak
1Ehud a chih koute Israel hae nynh Bawipaw muihnaw kya hoyleinaw kha bua a rae hae.2Tukeiccuze Bawipaw nynh Hazor khua a ukpaw Kanaan siapharan Jabin kuih kya a zua hae; a rhawbawipaw tuh Harosheth-hagoiim kya umpaw Sisera nynh thua.3Tetuh Israel hae nynh Bawipaw kalan bawmnaw ngiakute a sia hae; pawccecize Jabin tuh sivaw marangle za takua hoi zah Israel hae kha kum kuin lungkhu thawte a tuaa a sah hae.
4Tuh ccyh lyakhe Lappidoth zu, profehnung Deborah tuh Israel hae kya byapiatu lang a tang.5Aning tuh Efraim muaram e Ramah khua te Bethel khua laku umpaw Deborah ungcci ku kaw khe leih haung zah, Israel hae tuh byapiaku lan a kalan leih a thua hae.6Naftali ram, Kedesh khua umpaw Abinoam ccapaw Barak tuh Deborah nynh kosah hae zah, “Bawipaw , Israel Pachia nynh nang kha, ‘La cceih lah, Naftali phin te Zebulun phin kya-e ccungccaw thong haw kha Tabor Mua lang ko hae.7Jabin a rhawbawi lepaw Sisera tuh a marangle hae te a rhawkaw hae ryte Kishon vaw kin khe nang te tungku khylan kae cciakhae cih zah, na kuih kya kae ap cih,’ cite kaw ae pya,” a cipya.8Barak nynh Deborah kha, “Nae cciakhae zetuh ka cceih cih; nae cciakhae khyh zetuh ka cceih lan khyh,” a cipya.9Te Deborah nynh, “Kae cciakhae ccaccing cih; thuasalama na laanccia nynh phu-enaw ae ccousah lan khyh, pawccecize Bawipaw nynh Sisera kha nopi kuih kya a zua cih,” a cipya. Te Deborah tuh thokuh zah Barak ryte Kedesh khua lang a cceih hae.10Barak nynh Zebulun te Naftali kha Kadesh lang a ko hae; rhawkaw thong haw nynh a zui hae; Deborah mah amaw kya a cceihbua.
11Ken minphuinpaw Heber tuh Moses a pupaw Hobah ciihan ccangpaw Ken minphuin hae kyate phiakuh zah Kedesh pe, Zaanannim kya umpaw phaesi ku kaw khe bu sakkute a um.
12Abinoam ccapaw Barak tuh Tabor Mua lang a kaethung cipaw kha Sisera kya he a hopah hae tuh,13Sisera nynh a marangle balyn, sivaw marangle za takua te amaw kya um hae paw rhawkaw hae kha Harosheth-hagoiim khua kyate Kishon Vaw kyacia a pum hae.14Te Deborah nynh Barak kha, “Thokuh! Atunin tuh Bawipaw nynh Sisera kha na kuih kya ae pya nin nynh thua. Bawipaw tuh na malang a cceih ccaccing,” a cipya. Tukeiccuze Barak tuh ccungccaw thong haw ryte Tabor Mua kyate a cceihbung hae.15Bawipaw nynh Sisera te a marangle hae balyn, a rhawkaw hae balyn kha Barak malang khe mih lung a muasah hae; Sisera tuh a marangle kyate rung zah a ccu te a ccue.16Barak nynh marangle hae te rhawkaw hae kha Harosheth-hagoiim kyacia a dee hae. Sisera a rhawkaw hae balyn tuh lu kheit san a laehy lei lan ciate thaloi te a chih hae.
17Sisera tuh Ken minphuinpaw Heber zu Jael a bu kyacia a ccu te a ccue; pawccecize Hazor siapharan Jabin te Ken minphuinpaw Heber phin tuh a ccawkuh hae.18Sisera te tungku khylan Jael nynh yn toinuakuh zah, “Rang, ka bawipaw, ka kalan yn cceih, rih nan,” a cipya. Tukeiccuze aning tuh Jael bu lungkhu lang tee zah, Jael nynh boei te a bong.19Te Sisera nynh Jael kha, “Ka tuihaw zah nia lanpaw tui beihtaraw yn pyabua,” a cipya. Tukeiccuze Jael nynh vaetua mateitui saving bawng kha hung zah a niasah koute boei te bua a bong.20Sisera nynh Jael kha, “Bu thuakaw kya thadyn lah, lukhakheit nynh, ‘E kya ccungccaw a um tou?’ cite ae khia ze, ‘Um khyh,’ na cipah cih,” a cipya.21Thuasalama Sisera tuh a thawbang zah a i lyakhe, Heber zu Jael nynh bu khiadenawpaw ccong te khynlyng kha ccyngkute yccae leite ccianua zah laekhu lang po zua lan a nakalia kha khiade zah phe a chih.22Sisera a deehuipaw Barak nynh he yn tee lyakhe, Jael nynh tungku khylan toinuakuh zah, “Rang, na ccungpaw ccungccapaw kha kae muihsah cih,” a cipya. Tukeiccuze Barak tuh Jael bu lungkhu lang a tee; a nakalia kya ccong phang bingkuhpaw, a huekuhpaw Sisera rhua tuh tuin kya a la um.
23Tuhcite tuin nin khe Pachia nynh Kanaan siapharan Jabin tuh Israel hae malang khe a biabung.24Kanaan siapharan Jabin kha a ro mawlaezung hae, Israel hae kuih tuh houhouh athung. Deborah Hlaw
1Tuin nin khe Deborah te Abinoam ccapaw Barak nynh hlaw a sah hae paw tuh:2“Israel hae nynh rhawtuk lanbyapaeku hae;Israel hae nynh lungthotemih pyn a pyaku hae keiccuzeBawipaw kha thehoysah oh!
3“Pou siapharan hae, thaetua oh;pou bawi hae, ngaetua oh;Bawipaw kha hlaw ka sahpah cih,Israel Pachia, Bawipaw kharoi hoypaw te the ka hoysah cih.
4“Pou Bawipaw , Seir mua kyatehe na cceih te,Edom ram kyate he na cceih te,laephi tuh hy zahvaawlang te khuaarah,maeking nynh khuaa a rawsah.5Bawipaw malang khemua hae tuh a hy hae,Israel Pachia, Bawipaw malang kheSinai mua tuh a hy.
6“Anath ccapaw Shamgar she lya,Jael she lya tuhlaanluepi hae tuhdaetedae hae zah,khuaccong hae paw nynhlaanpi abypaw kha a zui hae.7Nang, Deborah nynhIsrael ram kya nung hawtena thoku maw tuhIsrael ram tuh daetedae.8Israel nynh pachia thawpaw hae khahe a pokuh hae tuh,koikua hae kya rhawtuk aso.Israel ccungccaw thong sung pali kyakhawriaphua thuasah,ccoi thuasah ccangkheit sanmuih lan a um zawtou?9Ccungccaw hae laku kyalungthote mih pyn a pyakuh hae pawIsrael rhawbawi hae kyaka thinlung a um.Bawipaw kha thehoysah oh!
10“Arawpaw lann haea ccikuh hae paw,amee rupaw boei vawlana haung hae paw,laanpi kya a cceih hae paw nanning,e konglang hynh hotua oh.11Tui bunaw hmin hae kyahlawsah hae paw roi,tuin kyakhe minmin nynhBawipaw taenaw khabua a siakhae hae,Israel lungkhu e a khua taraw haetaenaw kha bua a siakhae hae.“Bawipaw ccungccaw hae tuhmimaw koikua kalan a cceih cih hae.
12“Thokuh, thokuh, Deborah!Thokuh, thokuh, hlawsahtua!Thoku tua, Barak,pou Abinoam ccapaw,na kyng hae paw khaccanglang cciakhae hae.13Te a laehypaw ccungccaw hae tuha cceihbung hae;Bawipaw ccungccaw hae tuha thung hae paw kha rawseteamaw hanlan a cceihbung hae.14Efraim kyate accya lang a cceih hae,Benjamin, nang tena puizia hae kha a zui hae;Makhir kyate rhawbawi hae,Zebulun kyate rhawbawi hoitanga ccyngkuh hae paw a cceih hae;15Issakhar bawi hae tuhDeborah ryte oun cceih hae,Issakhar tuh Barak tungvaw a lungzi;minmin tuh accya langkheBarak nulangte a deekuh hae.Reuben phin hae laku kyathawmawte tua lanpaw a um.16Tuuphu hae konawpawphyly roi kha thae khylan,pawccemou tuuphu kyaphang na um?Reuben phin hae laku kyathinlung phiakunaw a um.17Gilead tuh Jordan vawkhuraw lang a um.Pawccemou Dan tuhsanphalung hae kya a um?Asher tuh rili kin, a sanphalung haethadynnaw pe kyadaebabi lan a um.18Zebulun tuh a hiinnawpyaku ciate a rawthung;Naftali mah ramkaw ahangnaw kyachi ciate a rawthungpaw nynh thua.19“Siapharan hae tuhoun cceih hae zahrhaw a tuk hae;Megiddo tui pe,Taanak khua kheKanaan siapharan khaa tuk hae;thuasalama phua khaluadete mue khyh hae.20Vaawlang te awsi hae nynha tuk hae,mih laanpi kya ccia lalia teSisera kha a tuk hae.21Kishon vawpi nynhminmin kha a lou hae,a thawrupaw tuithaw,athawsaepaw Kishon.Pou ka muisaw,thawsaenaw te po cciatua!22“Tetuh marang hae tuhmih ccukoh te laephi kya suakuteroi phe ccae lante a ccue hae.
23“Meroz kha thyalaw oh, citeBawipaw vaawpaw nynh a ci,a kya um hae paw khaphe ccih lante thyalaw oh,pawccecize Bawipaw bawm khylanoun cceih khyh hae,a thungpaw kha rawseteBawipaw kha bawm khylanoun cceih khyh hae.24“Ken minphuinnungHeber zu Jael tuhnopi hae kyazehythua a ccou huacce nung thua zah,bu kya umpaw nopi hae kyazehythua a ccou huacce nung nynh thua.25Sisera nynh tui ngia zahmateitui kha a pya,bawi banang tesamateihaw kha a pya.26Bu khiadenawpawccong kha lawkuh zah,a ranglang kuih teryalawnawpaw khynlyng kha ccyngteSisera kha bua zah a lu kha a tude,a nakalia kha po zua lan a thuing.27Siseria tuh bakhung zah a khuliakuh,Jael ccu kya a huekuh;Jael ccu kya bakhung zaha khuliakuh;a bakhungnaw kyachih zah a huekuh.
28“Thanlan-aw kyate a do,Sisera a nung nynhzokhawboei kyate do zah:‘Pawccemou a marangle tuhkhaw cia yn thua khyh?Pawccemou a marangle ccu aroi tuhccyh aro?’ a ci.29A haw huapaw a nopi hae nynhbya a khung hae;amaw toulou nynh mahbyakhungkuh zah:30‘Luadepaw uccaw kha muih hae zaha neekuh cciamang hae ngawrei?Rhawkaw miakaw hanlanliaccaw lu kheit tou lu ning tou,Sisera hanlan asi ohkuhpawluadepaw boeining,haetapaw soikuh zahasi ohkuhpaw luadepaw boeining,ka nging kya oiku lanpawhaetapaw soikuh zahasi ohkuhpaw luadepaw boeiningzung ning khaa neekuh cciamang hae ngawrei?’ a ci.
31“Pou Bawipaw , tuhcitena rhaw hae balyn tuhmarya roh hae sah!Thuasalama na ruiban hae tuha thungnaw te yn thuapawkhuanin hawte thua hae sah,”cite hlaw a sah hae.Te ram tuh kum sung pali adae. Midian hae tungvaw Tuaasahnaw
1Israel hae nynh Bawipaw muihnaw kya hoyleinaw kha rae hae zah, Bawipaw nynh minmin kha Midian kuih kalan kum sari a pya hae.2Midian kuih nynh Israel kha a tae; Midian keiccuze Israel hae tuh mua kyakhe rekunaw hmin, lungkarung te rhawlungrua kha a raeku hae.3Pawccecize Israel hae nynh ccacii a tunaw takyh hae kyakhe Midian hae, Amalek hae te nithua lang e ccungccaw hae nynh ccianua hae zah a dou hae.4Tuh-e ccungccaw hae nynh ryahmin tahnuakuh hae zah Gaza khua pepan kyacia laephi kyate apoupaw ccathae kha roh hae zah, Israel ram kya pawpaw mah cciataw khyh hae, tuu, vaetua, lann kha mah cciataw khyh hae.5Pawccecize minmin tuh mih sahiin hae, mih bu hae kha cciakhae biate tungkhipaw phu zeih alung lante a cceih hae; minmin te mih kalauh hae tuh riatae um khyh hae; tuhcite a tee lalia lan hae te ram tuh a ro hae.6Te Israel tuh Midian keiccuze myarya a ryachi zah, Israel hae nynh bawmnaw mue khylan Bawipaw kalan a sia hae.
7Midian hae keiccuze Israel hae nynh Bawipaw kalan he a sia hae tuh,8Bawipaw nynh profeh lu kheit kha Israel hae kalan a saw; aning nynh minmin kyakhe, “Bawipaw , Israel Pachia nynh hynhte a ho: Izip ram kyate kae cciakhae thung oh zah seetangnaw inn kyate kae poukhae oh;9Izip hae kuih kyate thuasah, nanning ae tuaa ae sah oh paw ccungccaw hae balyn kuih kyate thuasah kae luesah oh, minmin kha nae malang kyate ka dee hae zah mih ram kha kae pya oh;10kae nynh nanning kha, ‘Kae tuh Bawipaw nae Pachia nynh ka thua; mih ram kya na umnaw oh Amor hae pachia hae kha sawtuanaw na pya lan khyh oh,’ kae cipya oh. Thuasalama ka bya na ngae khyh oh,” a ci. Gideon Konaw
11Te Bawipaw vaawpaw tuh yn thua zah, Ofrah khua kya Abiezer minphuinpaw Joash kya-e phaesi ku kaw khe a haung; tuh lyatuin Joash ccapaw Gideon tuh a chanvuih kha Midian hae nynh muih nan hae sah cite misu mianaw khu kya a bua cciamang.12Bawipaw vaawpaw tuh Gideon kya yn langkuh zah, “Athungpaw te arawhoypaw nang, Bawipaw tuh na kya a um,” a cipya.13Gideon nynh vaawpaw kha, “Bawihaepaw, Bawipaw tuh kae kya a um lanze, hynh-e hae balyn hynh kae tungvaw kya pawccemou acyiku? ‘Bawipaw nynh aening hynh Izip ram kyate oun cciakhae thung khaw?’ cite kae minpaaw hae nynh oun hopya pathy hae paw ngaeangthua lan umpaw a ryalaw hae balyn kha teimou a um vae? Atu tuh Bawipaw nynh kaening hynh oun vua zah Midian hae kuih kya oun ap vae,” a cipya.14Tetuh Bawipaw nynh a kalan hawi zah, “E na thungnaw hynhte cceih lah, Israel kha Midian kuih kyate luesah tua; kae nynh nang kha kae naw,” a cipya.15Gideon nynh, “Bawihaepaw, pawtemou Israel kha ka luesah kho cih? Ka phin tuh Manasseh phin hae kyaze a thawzya huapaw thua zah, kae tuh ka puizia hae kyaze a nyaa huapaw nynh ka thua,” a cipya.16Bawipaw nynh Gideon kha, “Na kya ka um cih zah Midian hae kha lu kheit cci mawte na theih cih hae,” a cipya.17Te Gideon nynh, “Na malang maehoynaw ka ccou lanze, bya yn hopahpaw hynh namaw nynh na thua cipaw kha ka ny nawlan syntawnaw ccangkhakheit yn langsapyaku tua.18Na kalan kae thua zah, ka lasung kha ccyngpyate na malang ka nung mawlaezung, e kyate la cceih nan hin,” cipah zah aning nynh, “Nae ki mawlaezung ka la um cih,” a cipya.
19Tukeiccuze Gideon tuh a inn lungkhu lang tee zah, miaa taraw sa kheit kha thuasah, vaekhui ephah ccangkheit te raekuhpaw ransi phing leipaw sanlou kha thuasah a paccyn; miaa saw kha shua lungkhu sang zah, miaa ehang kha ang lungkhu lang a sua koute vaawpaw a umnaw phaesi ku kaw langkhe cciakhae zah a pya.20Pachia vaawpaw nynh, “Miaa saw te ransi phing leipaw sanlou kha lah lah, e lung vawlan hin nungtua, te miaa ehang kha buthin tua,” a cipya. Te aning nynh tuhcite a cyi.21Tetuh Bawipaw vaawpaw nynh miaa saw te ransi phing leipaw sanlou kha a kuih te a kyngpaw hoitang dung khate a sua; te lung kyate maee yn rua zah miaa saw te ransi phing leipaw sanlou tuh marya a u; te Bawipaw vaawpaw tuh a muihnaw kyate phe a zo.22Bawipaw vaawpaw nynh thua cipaw kha Gideon nynh nyh zah, “Bawipaw PACHIA, yn bawmtua! Bawipaw vaawpaw kha hawiliakute ka muih vae,” a ci.23Thuasalama Bawipaw nynh, “Na kya daenaw um sah; rih nan, na chih lan khyh,” a cipya.24Tuin kyakhe Gideon nynh Bawipaw hanlan silawhang kha rae zah, Bawipaw tuh daenaw nynh thua, cite min a phu. Tuh-e tuh Abiezer minphuin hae kya-e Ofrah khua kya atunin cia a um.
25Tuh-e khuazi khe Bawipaw nynh Gideon kha, “Na paaw tangnuapaw, sa ningnaw tangnuapaw kum sari accing vae paw kha sue lah, na paaw kya-e Baal silawhang kha roh, te tuh-e silawhang pe umpaw Asherah thing kha ngetua;26e rhawlungrua adung khe Bawipaw na Pachia hanlan silawhang kha kou hoy lan raetua; te sa ningnaw tangnuapaw kha na ngepaw Asherah thing khate u lah, maee-ute silawnaw lante raetua,” a cipya.27Tukeiccuze Gideon nynh a ryalahtu hae lu haw kha ko hae zah Bawipaw nynh a hopya hawte a cyi; a innbyn te a khuaccaaw hae raw a ri keiccuze tuh-e tuh khuazi khe a cyi. Gideon nynh Baal Silawhang A Ro
28Awkhua takaw khuaccaaw hae he a tho hae tuh, Baal silawhang tuh phe la roh zah, a pe umpaw Asherah thing tuh phe la pu, te sa ningnaw tangnuapaw tuh a raekuhpaw silawhang kyakhe pya a la thua.29Tetuh “E hynh hummou a cyih?” cite lu kheit te lu kheit a khiaku hae. Akaw-aleih a khia kou hae te, “Joash ccapaw Gideon nynh a cyih,” cite a ho hae.30Tetuh khuaccaaw hae nynh Joash kha, “Na ccapaw tuh chi khylan yn pousah tua, pawccecize Baal silawhang kha roh zah a pe umpaw Asherah thing kha a nge,” a ci hae.31Joash nynh amaw a rawse hae paw balyn kyakhe, “Baal kha tou na pankhae cih oh? Baal kha na thungkhaw cih oh tou? Baal a pankhaepaw miakaw tuh awkhua ccyh kya chia athua cih. A silawhang tuh ropya athua vae keiccuze aning tuh pachia athua ze, amaw te amaw thungkhawkuh sah,” a cipya hae.32Tukeiccuze tuin nin khe Gideon tuh Jerubbaal cite minphu athua, asuilan tuh, Gideon nynh a silawhang kha a ropya keiccuze, “Baal nynh amaw kha dou sah,” cipaw nynh thua.
33Tetuh Midian hae, Amalek hae te nithua lang e ccungccaw hae balyn tuh pynkheihlan oun thua hae zah, Jordan vaw kha zuate Jezreel Accya kya ryahmin a tahku hae.34Thuasalama Bawipaw muisaw tuh Gideon tungvaw yn thua; te mungkae kha tu zah Abiezer phin hae kha a nulang zuiku khylan a ko hae.35Te locceihtu hae kha Manasseh phin hae ram kya po lekuh lan sawte, minmin kha mah a nulang zuiku khylan a ko hae. Asher, Zebulun te Naftali phin hae ram langkhe mah locceihtu hae kha saw hae zah, tuin ram e ccungccaw hae nynh mah minmin ryte tungku khylan oun cceih hae. Tuuming te Syntawnaw
36Gideon nynh Pachia kha, “Na ho vae hawte, Israel hynh ka kuih te na luesah lan athua ze,37huimin kyakhe tuuming ka nung cih; tuuming kya kyalya khe dangtui um zah, laephi balyn tuh arou lanze, na ho vae hawte, Israel kha ka kuih te na luesah cih cipaw ka nyh cih,” a cipya.38Te tuhcite acyihkuh. Awkhualan awkhua takaw te tho zah tuuming kha atui he a su tuh, dangtui tuh pakekhupaw kaw kheit acih.39Te Gideon nynh Pachia kha, “Ka tungvaw na thinrianaw tuh maee lang beih rua nan sah, vae kheit kyalya ka ho ung cih; tuuming te vae kheit kyalya syntawnaw raenaw kaw yn pya hin; tuuming kyalya hynh rou sah lah, laephi vawlan balyn tuh dangtui cia sah,” a cipya.40Tuh-e khuazi khe Pachia nynh tuhcite a cyi. Tuuming kyalya tuh rou zah, laephi vawlan balyn tuh dangtui te acia. Gideon nynh Midian hae A Tae hae
1Jerubbaal (tuh-e tuh Gideon) te amaw kya um hae paw rhawkaw hae balyn tuh awkhua takaw te thokuh hae zah Harod tuisung pe khe a rya hae; Midian ryahmin tuh minmin te thahlang, Moreh mua aleihpaw accya khe a um.
2Bawipaw nynh Gideon kha, “Kae nynh Midian hae kha Israel hae kuih kya pya khylan na kya umpaw rhawkaw hae tuh ka hanlan eih lung kaesy hae. Israel nynh, ‘Kamaw kuih nynh kae hynh yn khum,’ cite tuakute kae kha thehoysah leite a umsei cih.3Tukeiccuze ccungccaw hae kyakhe, ‘A rihpaw te a thinphangpaw miakaw tuh inn lang ki hae sah,’ cite thaesah hae,” a cipya. Tukeiccuze Gideon nynh minmin kha a syntawtua hae; thong kuin lae ning tuh ki hae zah thong haw alae hae.
4Te Bawipaw nynh Gideon kha, “Rhawkaw hae tuh eih alung ung hae; tui kalan cciakhae bung hae lah, tuin kyakhe na hanlan ka syntawtua cih hae. ‘E paw tuh na kya a cceihbua cih,’ ka ci ze, tuh-e paw tuh na kya a cceihbua cih; ‘E paw tuh na kya cceihbua lan khyh,’ ka ci ze, tuh-e paw tuh na kya cceihbua lan khyh,” a cipya.5Tukeiccuze Gideon nynh minmin kha tui kalan a cciakhae hae; Bawipaw nynh Gideon kha, “Ui nynh tui a lya hawte a lae te tui a lyapaw balyn tuh san kheit kya na nung cih hae; tui nia lan ccukharutung zah a kuih te a neihpaw balyn kha ccangpaw san kheit kya na nung cih hae,” a cipya.6Kuih kya-e tui kha lae te a lyapaw milu tuh za thum acih hae; thuasalama tuhlaepaw hae balyn tuh tui nia lan mih ccukharu a tung hae.7Te Bawipaw nynh Gideon kha, “Tui a lyapaw milu za thum khate nanning kha kae khum cih oh zah, Midian hae kha nae kuih kya kae pya cih oh. Tuhlaepaw hae balyn tuh mih inn lang ki hae sah,” a cipya.8Tukeiccuze mih banang hae te mih mungkae hae kha a law; te tuhlaepaw Israel hae balyn kha mih umnaw bu kalan Gideon nynh a kisah hae, thuasalama tuh-e za thum kha tuh a umsah hae. Midian ryahmin tuh Gideon a umnaw zakaw accya khe a um.
9Tuh-e khuazi khe Bawipaw nynh Gideon kha, “Thoku tua, mih ryahmin kha tuk ccavae; pawccecize na kuih kya kae pya vae.10Thuasalama tuk lan na ri ze na ryalahtu Purah ryte mih ryahmin langkhe cceihbung oh;11minmin nynh bya a ho hae paw kha na thae cih oh; tukoute mih ryahmin kha tuk khylan na kuih tuh thawsaesah athua cih,” a cipya. Te Gideon tuh a ryalahtu Purah ryte rhaw hae ryahmin atolang umpaw rhawviabu kalan a cceihbung hae.12Midian hae, Amalek hae te nithua lang e ccungccaw hae balyn tuh tungkhipaw aphu zeih alung lante accya kya a um hae; mih kalauh hae tuh rili kin e laesia hawte riatae um khyh hae.13Gideon he yn thua tuh, ccungccapaw lu kheit nynh a maan kha a banpaw kya hopah zah, “Maan ccangkheit ka sah, barli sanlou phe kheit tuh Midian hae ryahmin kalan toubung zah, bu kya thua zah bu kha phe pu lan a deih; bu tuh dawleihkuh zah aroh,” a cipya.14Te a banpaw nynh, “Tuh-e tuh ccangpaw thua leite Israel paw, Joash ccapaw Gideon thaloi nynh thua; Midian te a rhawkaw hae balyn kha Pachia nynh a kuih kya a pya vae,” a cipya.
15Tuh-e maan te asuilan kong a hoku hae paw kha Gideon nynh he a thae tuh, Bawipaw kha a beik; te Israel ryahmin lang ki zah, “Thokuh oh, Bawipaw nynh Midian rhawkaw hae kha nae kuih kya ae pya vae oh,” a ci.16Gideon nynh ccungccaw za thum kha phu thum lang a phia koute, mungkae hae te a lungkhu kya maeekhua umpaw accawnghanpaw banang lepaw hae kha mih kuih raveih kya a pya hae,17te minmin kha, “Kae hynh yn dokuh oh lah, ka cyi hawte cyihbua oh; Midian ryahmin kin ka thua te, ka cyi hawte cyihbua oh.18Kae te ka kya umbua hae paw balyn nynh mungkae he kae tu te, ryahmin po voilu lan um hae paw balyn nynh mah na tubua cih oh zah, ‘Bawipaw hanlan te Gideon hanlan!’ cite na sia cih oh,” a cipya hae.
19Tukeiccuze Gideon te a kya um hae paw za kheit nynh ziraccyng he a thua takaw, rhawviatu rulaeku ccyh khe ryahmin kin kya a thua hae; te mungkae tu hae zah mih kuih kya a ccyng hae paw banang lepaw hae kha a koi hae.20Tuhcite phu thum hae nynh mungkae tu hae zah banang lepaw hae kha a koi hae, mih voilang kuih te maeekhua kha kyng hae zah mih ranglang kuih te tu lanpaw mungkae kha a kyng hae; te, “Bawipaw hanlan te Gideon hanlan thaloi!” cite a sia hae.21Ccungccaw miakaw nynh ryahmin po voilu lan mimaw hmin kyakhe thadyn hae zah ryahmin kya-e ccungccaw hae balyn tuh a ccue hae; sia hae zah a ccue vae hae.22Minmin nynh mungkae za thum kha he a tu hae tuh, Bawipaw nynh rhawkaw miakaw tuh mimaw mih ban hae kha thaloi te baesah hae zah, rhawkaw hae tuh Zererah langsang Beth-shittah kyacia, Tabbath khua pe Abelmeholah ramri kyacia a ccue hae.23Te Naftali phin, Asher phin te Manasseh phin mih balyn kya-e Israel ccungccaw hae kha ko hae zah Midian hae tuh a deehui hae.
24Te Gideon nynh locceihtu hae kha Efraim muaram hae balyn kya po lekuh lan saw hae zah, “Midian hae kha dou khylan oun cceihbung oh, Beth-barah khua kyacia vaw taraw hae kyakhe thuasah, Jordan vaw kyakhe thuasah la cciakhaw oh,” a cipya hae. Tukeiccuze Efraim pise balyn kha ko hae zah, minmin nynh Beth-barah khua kyacia vaw taraw hae kyakhe thuasah, Jordan vaw kyakhe thuasah a cciakhaw hae.25Midian rhawbawi lu ning Oreb te Zeeb kha a kyng hae; Midian hae kha a dee lalia lan hae te Oreb kha Oreb lungpi kya theih hae zah Zeeb kha Zeeb misu mianaw khu kya a chia hae. Oreb lu te Zeeb lu kha Gideon kalan Jordan vaw khuraw lang a phu hae. Gideon A Taenaw te Phulawnaw
1Efraim phin hae nynh Gideon kha, “Midian hae dou khylan na ccia lyaze pawccemou kaening nae kobua khyh? Kae tungvaw na rynaw hynh pawmou athua?” cite ci hae zah thawte a seisah hae.2Te Gideon nynh minmin kha, “Na cyi oh paw te touseku lanze ka cyipaw hynh paw san athua zawtou? Efraim misu ccamua tuh Abiezer misu thae lopaw laeze hoyhua khyh tou?3Pachia nynh Midian rhawbawi hae Oreb te Zeeb kha nae kuih kya ae pya vae oh; na cyi oh paw te touse lanze kae tuh pawmou ka cyi kho?” a cipya hae. E bya he a ho te, mih thinrianaw tuh adae.
4Te Gideon te a kya um hae paw za thum tuh Jordan vaw thua hae zah a zua hae, thawbangte rhaw hae kha a deehui hae.5Tukeiccuze Gideon nynh Sukkoth khuaccaaw hae kha, “Thawccinawte kae yn zui hae paw hynh sanlou beih pya oh, pawccecize mih thawbang vae, kae tuh Midian siapharan hae Zebah te Zalmunna kha ka deehui cciamang hae,” a cipya hae.6Thuasalama Sukkoth khua e bawi hae nynh, “Kaening nynh na rhawkaw hae kha sanlou kae pya lan hae paw tuh, Zebah te Zalmunna tuh na kuih kya a thua vae hae zawtou?” a cipya hae.7Gideon nynh khung hae zah, “Ahoy, Zebah te Zalmunna kha Bawipaw nynh ka kuih kya he yn pya te, nae ngesaw kha ramkaw e hinpaw te thabu kya kae syde cih oh,” a cipya hae.8Tuin kyate Penuel khua lang cceihthung zah minmin kha tuhmaminte a ngia hae; Penuel khuaccaaw hae nynh Sukkoth khuaccaaw hae hawte bya a khung hae.9Te Gideon nynh Penuel khuaccaaw hae kha, “Taenaw te he kae ki te, e innhangpaw hynh ka tingsah cih,” a cipya hae.
10Zebah te Zalmunna tuh mih rhawkaw hae ryte Karkor khua kya a um hae, thong haw lae pangaw loukaw a um hae, tuh-e hae balyn tuh nithua lang e ccungccaw hae mih rhawkaw hae balyn kya-e a laehy hae paw nynh thua hae; zunghe kyngpaw ccungccaw cciing kheit thong kuin a chih hae.11Gideon tuh Nobah te Jogbehah nithua lang, khuaccongnaw laanpi khate cceihthung zah, rhaw hae kha a tuk hae; pawccecize rhaw hae tuh rhawviaku leite a la um hae.12Zebah te Zalmunna tuh a ccue hae; Gideon nynh deehui hae zah Midian siapharan lu ning Zebah te Zalmunna kha a kyng hae, mih rhawkaw hae balyn kha a siisaku hae.
13Joash ccapaw Gideon tuh rhawtuknaw kyate Heres mua kaethungnaw kyakhate a ki lyakhe,14Sukkoth khuapaw ccangvaepaw lu kheit kha kyng zah bya a khia; tuh-e paw nynh Sukkoth khua e bawi hae te piccan hae sung sari lu sari min kha a zeipya.15Te Gideon tuh Sukkoth khuaccaaw hae kalan yn cceih zah, “ ‘Kaening nynh na rhawkaw hae kha sanlou kae pya lan hae paw tuh, Zebah te Zalmunna tuh na kuih kya a thua vae hae zawtou?’ cite nanning nynh mih konglang nae hopya oh paw Zebah te Zalmunna tuh hein kya a um hae,” a cipya hae.16Tetuh khua kya-e piccan hae kha ko hae zah ramkaw e hinpaw te thabu khate Sukkoth khuaccaaw hae kha a syde hae.17Penuel khua e innhangpaw kha mah tingsah zah khuaccaaw hae kha a chia hae.
18Te Gideon nynh Zebah te Zalmunna kha, “Tabor khua kya na chia hae paw kha teimou a um hae?” cite khia hae zah, minmin nynh, “Mih balyn mawte namaw hawte nynh athua hae; siapharan ccapaw hae nynh a lo hae,” cite a khung hae.19Te Gideon nynh, “Minmin tuh ka uno hae thua hae zah ka nung ccapaw hae nynh athua hae; Bawipaw tuh a hiin thyhte, mih hiinnaw kha na la haang oh zetuh, nanning kha kae theih lan khyh oh,” a cipya hae.20Tetuh a ccatawccaw Jether kha, “Thokuh lah theih hae!” a cipya. Thuasalama aning tuh ccangvae taraw athua ung keiccuze rih zah a thaloi kha thuaakuh khyh.21Te Zebah te Zalmunna nynh, “Namaw ccaccei nynh yn cceih lah oun theih; pawccecize ccungccaw tuh piccan athua thyhawte a thawzung mah athuabua,” a ci hae. Tukeiccuze Gideon nynh Zebah te Zalmunna kha theih hae zah, mih kalauh hae nging kya a ccaannaw hae paw uccaw hae kha a law. Gideon kya-e Zohtuh Beiknaw
22Tetuh Israel hae nynh Gideon kha, “Nang nynh kaening hynh oun uk, namaw, na ccapaw te na mintaw nynh mah oun uk hae sah; pawccecize Midian kuih kyate kaening kha nae luesah vae,” a cipya hae.23Gideon nynh minmin kha, “Kae nynh kae uk lan khyh oh, ka ccapaw nynh mah ae uk lan khyh oh; Bawipaw nynh ae uk cih oh,” a cipya hae.24Te Gideon nynh minmin kha, “Uccaw ccangkheit ngia kae ry oh; luadete na lawku oh paw nakuahuing kha bebe yn pya oh,” a cipya hae. (Pawccecize rhaw hae tuh Ishmael phin thua hae zah sui nakuahuing a hoi hae.)25Minmin nynh, “Lungthote kae pya cih,” a ci hae. Te boei kha phae hae zah, a luade hae paw nakuahuing hae kha mih balynte boei vawlan a nung hae.26Gideon nynh a ngia hae paw sui nakuahuing tuh sui shekel thong kheit za sari ari (ccaankunawpaw uccaw, si alungmung, Midian siapharan hae nynh a lawku hae paw sephaphuhpaw boeining hae te mih kalauh hae nging kya a ccaannaw hae paw uccaw hae hobia leite).27Tuh-e hae tuhte Gideon nynh ranpibawi angki zung kheit rae zah amaw khua, Ofrah khua kya a nung; Israel hae balyn nynh tuin kyakhe ohhuakuh hae zah, tuh-e tuh Gideon te a innbyn hanlan kaang lang a tang.28Tuhcite Midian tuh Israel hae nynh tae hae zah, mih lu hang vae khyh hae. Tuhcite ram tuh Gideon she kya kum sung pali lungkhu adae. Gideon Chinaw
29Joash ccapaw Jerubbaal tuh amaw inn lang cceih zah a um.30Gideon tuh zu patae hoi zah a ciihan, ccapaw sung sari a saah.31Shekhem khua kya umpaw a lovaenung nynh mah ccapaw lu kheit saahpah zah, Abimelek cite min a phu.32Te Joash ccapaw Gideon tuh myarya a taw te a chih, Abiezer hae khua Ofrah khua umpaw a paaw Joash shawku kya a uu hae.
33Gideon he a chih takaw te, Israel hae tuh mimaw mamin lang tang hae zah, Baal pachia khate ohhuakute Baal-berith kha mih pachia lang a raeku hae.34Mih pepan po voilu lan um hae paw mih rhaw hae balyn kuih kyate a luesah hae paw Bawipaw mih Pachia kha tuathui vae khyh hae;35te Gideon nynh Israel hanlan a la cyipaw hoynaw balyn hanlan liarute, Jerubbaal (tuh-e tuh Gideon nynh thua) innbyn tungvaw kya lungzinaw langsakuh vae khyh hae. Abimelek
1Jerubbaal ccapaw Abimelek tuh Shekhem khua e a nung puizia hae kalan cceih zah, minmin te a nung puizia hae balyn kyakhe,2“Shekhem khua e uktu hae balyn nynh a thaenaw hae kyakhe, ‘Nae hanlan pawmou ahoyhua, Jerubbaal ccapaw hae sung sari nynh mih balynte ae uk oh paw tou, tuhkhyhze lu kheit nynh ae uk oh paw tou?’ cite la khiatua oh. Kae tuh nae ru te nae saw ka thuapaw hynh mah la ning nan oh,” a cipya hae.3Tukeiccuze tuh-e bya balyn tuh a nung puizia hae nynh Shekhem khua e uktu hae a thaenaw hae khe Abimelek ccelang a hopya hae; minmin tuh Abimelek nulang zuiku rynaw thinlung a hoi hae, pawccecize minmin nynh, “Abimelek tuh aening uno nynh thua,” a ci hae.4Minmin nynh Baal-berith inn lungkhu e ngunphua sung sari kha a pya hae, tuh-e ngunphua tuhte Abimelek nynh a nulang a zuikuh lanpaw ccungccaw, ccungkia leipaw te a hynhu hae paw kha a hoh hae.5Ofrah khua umpaw a paaw inn lang cceih zah, Jerubbaal ccapaw hae, a uno hae sung sari kha lungpi ccangkheit vawlan khe a chia hae; thuasalama Jerubbaal a ccasoipaw Jotham tuh zya rekuh zah a hiinhy.6Te Shekhem khua e uktu hae balyn te Beth-millo khuaccaaw hae balyn tuh sueluakuh hae zah, Shekhem khua e liathuinawpaw phaesi ku pe khe Abimelek kha siapharan lang a khang hae. Thingku hae Tousenaw
7Tuh-e konglang tuh Jotham kha he a hopah hae tuh, Gerizim Mua dung lang kae zah a thadyn, te thawte sia zah minmin kha, “Shekhem uktu hae, Pachia nynh nae bya ae ngaepya nawlan oh, ka bya hynh ngaetua oh.8Vae kheit tuh thingku hae nynhmih siapharan langchitui thuh khylan cceih hae zah,oliv ku kha, ‘Kaening hynh oun uk,’a cipya hae.9Oliv ku nynh minmin kha,‘Ccungccaw hae te pachia hae khasawtuanaw pyanawpawka tho hoypaw hynh cciatawte,thingku hae kha uk khylanka cceih cih aa tou?’ a ci.10Te thingku hae nynh thaeku ku kha,‘Nang nynh yn cceih lah,kaening hynh oun uk,’ a cipya hae.11Thuasalama thaeku ku nynh,‘Ka enaw te athuapawka thae kha nungsyate,thingku hae kha uk khylanka cceih cih aa tou?’a cipya hae.12Te thingku hae nynh misu ku kha,‘Nang nynh yn cceih lah,kaening hynh oun uk,’ a cipya hae.
13Thuasalama misu ku nynh,‘Ccungccaw hae te pachia hae khamih lungtuasahpawka misutui kha cciatawtethingku hae kha uk khylanka cceih cih aa tou?’ a ci.14Tukeiccuze thingku haebalyn nynh hinpawbu kha,‘Nang nynh yn cceih lah,kaening hynh oun uk,’ a cipya hae.15Hinpawbu nynh thingku hae kha,‘Nanning nynh siapharan langkhang khylan thanccingtechitui nae thuh oh zetuh,oun cceih oh lah,ka mynlyh kaw kya um oh;thuasalama tuhciteathua khyh zetuh, hinpawbu kyatemaee yn pou sah lah,Lebanon kya-e sidar thing hae khau hae sah,’ a cipya hae.
16“Tukeiccuze Abimelek kha siapharan lang khangkute nanning nynh lungzi sawtuate na um oh ze thuasah, Jerubbaal te a puizia hae kha hoyte na ccuepe oh zah, a ryalaw mee thyhte na liaru oh ze thuasah,17ka paaw nynh nae hanlan rhaw ae tukpah oh zah, a hiinnaw pyakute Midian hae kuih kyate ae luesah oh;18thuasalama atunin nanning nynh ka paaw puizia hae kha na dou oh zah, a ccapaw hae sung sari kha lungpi ccangkheit vawlan na chia oh; te a seenung ccapaw Abimelek tuh nae puizia athua keiccuze Shekhem khuaccaaw hae kya siapharan lang na nung oh.19Atunin nanning nynh Jerubbaal te a puizia hae kya lungzi sawtuate na um oh ze, Abimelek tungvaw nae lungtua sah lah, aning nynh mah nae tungvaw a lungtua sah;20thuasalama tuhte athua khyh zetuh, Abimelek kyate maee pou sah lah, Shekhem te Beth-millo khuaccaaw hae kha u hae sah; te Shekhem te Beth-millo khuaccaaw hae kyate mah maee pou sah lah, Abimelek kha u sah,” a ci.21Te Jotham tuh a uno Abimelek raw a ri keiccuze ccue zah, Beer khua lang cceih zah tuin kya a um. Abimelek Chinaw
22Abimelek nynh Israel kha kum thum a uk.23Pachia nynh Abimelek te Shekhem khuaccaaw hae laku kya muisaw hoyleipaw kha sawnua hae zah, Shekhem khuaccaaw hae nynh Abimelek tungvaw mih lungzi vae khyh.24Tuhte acyikupaw tuh, Jerubbaal ccapaw hae sung sari kha puathote theih hae zah, tuh-e hae chiise tuh a theihtupaw mih uno Abimelek tungvaw thuasah, a uno hae chia khylan thawzung a pya hae paw Shekhem khuaccaaw hae tungvaw thuasah accaw keiccu nynh thua.25Abimelek kha buh khylan Shekhem khuaccaaw hae nynh mua dung hae kyakhe ccungccaw nung hae zah, tuh-e hae nynh tuh-e laanpi kya a cceihpaw balyn kha uccaw a luade hae; tuh-e konglang tuh Abimelek kha a hopya hae.
26Ebed ccapaw Gaal nynh a puizia hae ryte Shekhem khua lang nuekuh zah, Shekhem khuaccaaw hae nynh amaw kha a doliaku hae.27Loo lang cceih hae zah mih misu khokhu kya-e misu thae kha pumte su hae zah, poi a tua hae. Mih pachia inn lungkhu lang teete ae hae neih hae zah, Abimelek kha a sarya hae.28Ebed ccapaw Gaal nynh, “Kaening Shekhem khuaccaaw hae tuh ahum kae thua zah, Abimelek tuh ahum athua keiccu mou rya kae lawpya lanpaw tuh? Jerubbaal ccapaw te a kuihkaw e bawi Zebul nynh Shekhem paaw Hamor a ccungccaw hae kha ryalawpah khyh hae tou? Pawccemou kaening nynh Abimelek kha rya kae lawpya lanpaw tuh?29E ccungccaw hae hynh ka kuihkaw um hae ravo nyn! Tuhte a la thua ze, Abimelek kha ccaring ka dee cih zah, ‘Na rhawkaw hae kha lungsah chih hae lah, yn pou,’ ka ci cih paw,” a ci.
30Ebed ccapaw Gaal bya kha Shekhem khua uktu Zebul nynh a thae te, a thinrianaw tuh maee lang arua.31Aning nynh Abimelek kalan, Arumah langkhe ccungccaw saw zah, “Dotua, Ebed ccapaw Gaal te a puizia hae nynh Shekhem lang oun cceih hae zah, nang kha dou khylan khuaccaaw hae kha a tuhou hae.32Tukeiccuze nang te na umkheih oh paw rhawkaw hae nynh khuazi khe cceih oh lah, loo kyakhe buh oh.33Awkhua takaw, khuanin thua takaw te, thokuh oh lah, khua kha thiing oh; aning te a umkheih hae paw rhawkaw hae nynh nanning dou khylan he oun pou hae te, na cyi kho thyh oh te na cyih cih oh,” a cipya.
34Tukeiccuze Abimelek te a rhawkaw hae balyn tuh khuazi khe thokuh hae zah, phu pali lang phiakute Shekhem khua kha a buh hae.35Ebed ccapaw Gaal tuh toikuh zah khua koikua teenaw kya he a thadyn te, Abimelek te a umkheih hae paw rhawkaw hae nynh a buhnaw hae kyate a thonuaku hae.36Gaal nynh minmin kha he a muih hae te, Zebul kha, “Dotua, mua dung hae kyate ccungccaw hae oun rungbung hae!” a cipya. Te Zebul nynh, “Mua a mynlyh kha nynh ccungccaw hae lang na ria,” a cipya.37Gaal nynh bua hopah zah, “Dotua, ram angaelung kyate ccungccaw hae oun rungbung hae, phu kheit tuh Beidinhothya hae paw kya-e Phaesi ku kalan te oun cceih hae,” a cipya.38Te Zebul nynh amaw kha, “ ‘Kaening nynh rya kae lawpya lanpaw Abimelek tuh hummou athua?’ cite na hopaw na bya kha atu teimou a um vae. E ccungccaw hae hynh pawlang na ria lei hae paw kha thua khyh hae tou? Atu toikuh lah, tuktua hae,” a cipya.39Tukeiccuze Gaal tuh Shekhem khuaccaaw hae malang khe toikuh zah Abimelek te rhaw a tukkuh hae.40Abimelek nynh dee zah a malang khe Gaal tuh a ccue; koikua teenaw kyacia ccungccaw patae vaemaw muete a khuliakuh hae.41Te Abimelek tuh Arumah kya a um; Zebul nynh Gaal te a puizia hae kha Shekhem khua kya a um khyh nawlan hae ccaring a dee hae.
42Awkhualan khe ccungccaw hae tuh loo lang a cceih hae. Tuh-e konglang tuh Abimelek he a hopah hae tuh,43a rhawkaw hae kha ko hae zah, phu thum lang phiate loo kya a buh hae. Khua kyate oun toikuh hae paw kha do zah he a muih hae tuh, thonuakuh hae zah a chia hae.44Abimelek te a umkheih hae paw aphu nynh malang naang hae zah khua koikua teenaw kyakhe a thadyn hae, tuh ccyh lyakhe phu ning hae nynh loo kya umpaw balyn kha naang hae zah a chia hae.45Abimelek nynh khuapi kha anin ninlang tuk zah a lah koute khua kya umpaw balyn kha a chia hae, khua kha khaleih roh zah loi a phing.
46Shekhem Innhangpaw kya um hae paw balyn nynh tuh-e konglang tuh he a thae hae te, El-berith beikinn rhawlungrua lungkhu lang a tee hae.47Shekhem Innhangpaw kya um hae paw balyn tuh a sueluakuh hae cite Abimelek kha a hopya hae.48Tukeiccuze Abimelek tuh a umkheih hae paw rhawkaw hae balyn ryte Zalmon Mua lang a kae hae. Abimelek nynh hae zung kheit ccyngkute thingran ran kheit kha bae zah, a raw kya a khangku. Te aning nynh rhawkaw hae kha, “Ka cyipaw na muih oh thyhte arangte cyih oh,” a cipya hae.49Tukeiccuze rhawkaw miakaw nynh thingran kha ccarou baekuh hae zah Abimelek nulang zuikute khualungrua kha a pumnua hae, te khualungrua kha maee te soi hae zah, Shekhem Innhangpaw kya-e ccungccaw balyn, nopi pise thong kheit loukaw a chih hae.
50Te Abimelek tuh Thebez khua lang cceih zah, Thebez kha ryahmin tahnuakute a law.51Thuasalama khuapi lungkhu kya sihkakinpaw innhangpaw ccangkheit a um, khua kya um hae paw nopi pise balyn tuh tuh-e innhangpaw kalan ccue hae zah a khawsungkuh hae; innhangpaw innccuvaw lang a kae hae.52Abimelek nynh tuh-e innhangpaw kha ccianuate tuk zah, maee te u khylan tuh-e innhangpaw teenaw kalan khe a naekuh.53Nopinung lu kheit nynh sungmia-lung te Abimelek lu kha sawphu zah, a luru akoi.54Tetuh a rhawtuk-uccaw a ccyngpahpaw ccangvaepaw kha ko kangmaw zah, “Na thaloi kha thuaakuh lah, yn theih; tuhteze nynh ccungccaw hae nynh, ‘Nopinung nynh aning kha a theih,’ cite yn ho lan khyh hae,” a cipya. Tukeiccuze ccangvaepaw nynh po zua lan thuing zah Abimelek tuh a chih.55Israel hae nynh Abimelek a chipaw kha a thae hae tuh, mimaw inn raveih lang a ki hae.56Tuhcite a uno sung sari kha theih zah a paaw tungvaw seinaw a rae keiccuze Pachia nynh Abimelek kha a liaru;57te Shekhem khuaccaaw hae hoyleinaw balyn kha mimaw lu vawlan Pachia nynh ccawsah zah, Jerubbaal ccapaw Jotham thyalawnaw tuh mih tungvaw accah. Tola te Jair
1Abimelek koute Issakhar phin, Dodo ccapaw Puah a ccapaw Tola tuh Israel hae luesah khylan yn langkuh, aning tuh Efraim muaram, Shamir khua kya a um.2Aning tuh Israel hae kya kum kuin lae thum cia byapiatu lang a tang. Te aning tuh chih zah Shamir khua kya a uu hae.
3Tola koute Gilead phin Jair tuh yn langkuh zah, Israel hae kya kum kuin lae ning cia byapiatu lang a tang.4Aning tuh lann sung thum a ccikuh hae paw ccapaw sung thum a hoi; minmin tuh Gilead ram kya khua sung thum hoi hae zah, atunin cia Havvoth-jair cite ko athua hae.5Jair tuh chih zah Kamon khua kya a uu hae. Ammon hae nynh Tuaasahnaw
6Israel hae tuh Bawipaw malang khe hoyleinaw kha bua rae hae zah, Baal te Astartes pachia hae, Aram pachia hae, Sidon pachia hae, Moab pachia hae, Ammon hae pachia hae, Filistin hae pachia hae kha a beik hae. Tuhcite Bawipaw kha vua hae zah amaw kha beik khyh hae.7Tukeiccuze Bawipaw tuh Israel tungvaw myarya a thinria zah, Filistin hae kuih te Ammon hae kuih kalan a zua hae,8minmin nynh Israel hae kha tuh-e kum kya reih hae zah a tuaa a sah hae. Jordan khuraw lang Gilead ram kya umpaw Amor ram e Israel hae balyn kha kum haw lae tarya lungkhu a tuaa a sah hae.9Ammon hae nynh mah Judah, Benjamin te Efraim ciihan hae kha dou khylan Jordan vaw a zua hae; tukeiccuze Israel tuh myarya vawsawte a um.
10Tetuh Israel hae nynh Bawipaw kalan sia hae zah, “Kaening nynh na tungvaw kae sei vae, pawccecize kae Pachia kha kae vua zah Baal pachia hae kha kae beik vae,” a ci hae.11Te Bawipaw nynh Israel hae kha, “Izip hae, Amor hae te Filistin hae kyate nanning kha kae luesah khyh oh tou?12Sidon hae, Amalek hae te Maon hae nynh nanning kha ae tuaa ae sah oh; te ka kalan nae sia oh zah mih kuih kyate kae luesah oh.13Tuhzemah kae kha nae vua oh zah ccangpaw pachia hae kha na beik oh; tukeiccuze kae luesah vae lan khyh oh.14Cceih oh lah, na poku oh paw pachia hae kalan khe sia oh; nae vawsaw lyakhe tuh-e hae nynh ae luesah oh sah,” a cipya hae.15Te Israel hae nynh Bawipaw kha, “Kae sei vae; ahoy na ci hawte kae tungvaw oun cyih; thuasalama atunin beih oun luesah!” a ci hae.16Tetuh ramccang pachia hae kha mih kyate vua hae zah Bawipaw kha a beik hae; te Israel hae teingnaw a muih tuh a lunghoy khyh.
17Te Ammon hae tuh zunghe ccyngku lan suelua thua hae zah, Gilead ram kya a rya hae; Israel hae tuh sueluakuh hae zah Mizpah khua kya a rya hae.18Gilead ccungccaw hae rhawbawi hae nynh, “Ammon hae khuh hum nynh mou a tuk ty cih hae? Tuh-e paw tuh Gilead ram um hae paw balyn kyaze lupi athua cih,” a ciku hae. Jefthah
1Gilead minphuin Jefthah cikuhpaw ohhuanung ccapaw tuh a rawthungpaw rhawkaw nynh thua. Gilead tuh Jefthah a paaw nynh thua.2Gilead zu nynh mah ccapaw hae kha a saahpya; a zu ccapaw hae he oun le hae tuh, Jefthah kha ccaring dee hae zah, “Kae paaw inn kya-e rho ccapyh san na ccoubua lan khyh; pawccecize nang tuh nung ccangpaw ccaaw nynh na thua,” a cipya hae.3Tetuh Jefthah tuh a neitaw hae kyate ccue zah Tob ram kya a um. Ccungkia lei hae paw tuh Jefthah kya sueluakuh hae zah a nulang a zuikuh hae.
4Ccyh sosoh koute Ammon hae nynh Israel hae kha rhawtuk hae.5Ammon hae nynh Israel hae kha rhaw he a tuk hae tuh, Gilead piccan hae tuh Jefthah kha Tob ram kyate ko khylan a cceih hae.6Minmin nynh Jefthah kha, “Ammon hae kha tuk khylan yn cceih lah, kae rhawbawi lang oun tangpah,” a cipya hae.7Thuasalama Jefthah nynh Gilead piccan hae kha, “Nanning tuh kae nae vua oh paw te ka paaw inn kyate nae dee oh paw na thua khyh oh tou? Atu vawsaw na tung oh te, pawccemou ka kalan nae ccia oh?” a cipya hae.8Gilead piccan hae nynh Jefthah kha, “Tukeiccu latu, atu na kalan kae maeleihku, kae kya cceihbua lah, Ammon hae kha dou lan hae, te Gilead ram kae umpaw balyn kya lu lang na tang cih,” a cipya hae.9Jefthah nynh Gilead piccan hae kha, “Ammon hae tuk khylan inn lang nae kikhae oh zah, Bawipaw nynh minmin kha ka kuih kya yn pya ze, kae tuh nae lu lang ka tang cih,” a cipya hae.10Te Gilead piccan hae nynh Jefthah kha, “Bawipaw tuh aening laku kya ccaekia athua cih; na ho hawte solei kae cyih cih,” a cipya hae.11Tukeiccuze Jefthah tuh Gilead piccan hae ryte cceih hae zah, ccungccaw hae nynh lupi lang te cciakhaetu lang a nungku hae; te Jefthah nynh tuh-e a bya balyn tuh Mizpah khua kya Bawipaw malang khe a hopya.
12Te Jefthah nynh Ammon hae siapharan kalan khe locceihtu hae saw hae zah, “Ka ram kha dou khylan ka kalan ccianua ciate nang te kae laku paw bya mou a um?” a ci.13Ammon hae siapharan nynh Jefthah a locceihtu hae kha, “Israel hae nynh Izip ram kyate oun ccia lya hae khe ka ram kha Arnon vaw kyate Jabbok vaw kyacia, Jordan vaw phe thua lan a law hae keiccu nynh thua; tukeiccuze atu daebabi lante yn pyathui,” a cipya.14Jefthah nynh Ammon hae siapharan kalan khe locceihtu hae kha bua saw hae zah,15“Jefthah nynh hynhte aho: Israel hae nynh Moab ram thuasah, Ammon hae ram thuasah lah khyh hae,16thuasalama Izip ram kyate oun kaethung lya hae ze, Israel hae nynh ramkaw kyakhate Rili Se kalan po cceih hae zah, Kadesh khua a thua hae.17Te Israel hae nynh Edom siapharan kalan locceihtu hae saw hae zah, ‘Na ram lungkhu kya beih oun cciasah,’ a cipya hae; thuasalama Edom siapharan nynh ua khyh hae, Moab siapharan kalan saw hae zahmah a nawccah khyh. Tukeiccuze Israel hae tuh Kadesh khua kya a um hae.18Te ramkaw kyakhate cceih hae zah Edom ram te Moab ram kha po voi hae zah Moab ram nithua langkhe a thua hae, te Arnon khuraw langkhe a rya hae. Moab ram lungkhu lang tee khyh hae, pawccecize Arnon vaw tuh Moab ramri nynh thua.19Te Israel hae nynh Amor hae siapharan Sihon, Heshbon siapharan kalan khe locceihtu hae kha a saw hae; te Israel hae nynh amaw kha, ‘Na ram lungkhu te kae ram lang po beih oun ccia sah,’ cite a hopya hae.20Thuasalama Sihon nynh Israel kha a ram lungkhu po ccia lan zyn khyh; tukeiccuze Sihon nynh a ccungccaw hae balyn kha pum hae zah, Jahaz kya ryahmin tahkute Israel kha a tuk.21Bawipaw , Israel Pachia nynh Sihon te a ccungccaw hae balyn kha Israel kuih kalan pya hae zah a tae hae; tukeiccuze tuin ram kya umpaw Amor hae ram balyn kha Israel hae nynh a law hae.22Minmin nynh Amor hae ram balyn kha Arnon kyate Jabbok kyacia, ramkaw kyate Jordan vaw kyacia a law hae.23Tuhcite Bawipaw , Israel Pachia nynh a ccungccaw Israel hae hanlan Amor hae kha a taepya hae. Nang nynh mih umnaw hmin kha law lan na tuaku tou?24Na pachia Khemosh nynh ccou lan ae pyapaw kha na ccou lan ccan khyh tou? Bawipaw kae Pachia nynh kae hanlan oun taepyapaw miakaw kha kaening nynh kae ccou lan khyh tou?25Moab ram e Zippor ccapaw Siapharan Balak laeze nang tuh na hoyhua zawtou? Aning nynh Israel hae kha a dou boi hae zawtou? Minmin kha tuk khylan a ccianua boi hae zawtou?26Heshbon te a khua taraw hae kya te Aroer vahue umpaw khua hae balyn kya Israel hae nynh kum za thum a um lya hae khe, pawccemou nanning nynh na lawthui khyh oh?27Kae tuh na tungvaw ka sei khyh, kae kha nae tuk keiccuze nang tuh ka tungvaw na sei. Byapiatu athuapaw Bawipaw nynh atunin kya Israel hae te Ammon hae laku byapae vae sah,” a cipya.28Thuasalama Jefthah nynh bya a tawpaw kha Ammon hae siapharan nynh pawlangria khyh. Jefthah Byakinkunaw
29Te Bawipaw muisaw tuh Jefthah tungvaw yn thua zah, Gilead ram te Manasseh ram kya po a cceih. Gilead ram Mizpah khua lang po cceih zah, Gilead ram Mizpah khua kyate Ammon hae kalan po a cceih.30Jefthah nynh Bawipaw kya byakinkuh zah, “Ammon hae hynh ka kuih kya nae pya zetuh,31Ammon hae kyate taenaw te he ka ki te, kae kha cciadue khylan ka inn thuakaw kyate yn poupaw ahumhung zemah Bawipaw kya-e athua cih zah, maee-ute silawnaw lante kae pya cih,” a ci.32Tetuh Jefthah tuh Ammon hae kha tuk khylan cceih zah Bawipaw nynh minmin kha a kuih kya a pya.33Aroer kyate Minnith khua pe cia, Abel-keramim khua kyacia khua khuakuin kha patae a tae hae. Tuhcite Israel hae malang khe Ammon hae tuh a shung hae. Jefthah Ccanung
34Jefthah tuh Mizpah kya umpaw a inn lang yn cceih zah, a ccanung nynh amaw kha cciadue khylan vaedaw khuakute law biate yn cceih. Aning tuh lu kheit kyalyapaw ccanung nynh thua, tuhlaepaw ccanung ccapaw hoi vae khyh.35Jefthah nynh a ccanung kha he a muih tuh, a boeining kha seii zah, “Ezou, ka ccanung! Ka thinlung phe nae koisah vae; nang tuh myarya lepaw vawsawnaw yn pyatu lang nynh phe na tang vae. Pawccecize Bawipaw kalan bya phe ka ho vae, bya ka kinkupaw kha ka lahthui kho vae lan khyh,” a cipya.36Aning nynh a paaw kha, “Apang, Bawipaw kalan bya phe na ho vae zetuh, na mung te na ho vae thyhte ka tungvaw yn cyih, Bawipaw nynh na rhaw Ammom hae tungvaw phu ae lawsah vae hae,” a cipya.37Te aning nynh a paaw kha, “E uccaw hynh beih yn cyipya tua: Sawpaw sah ning lungkhu beih yn cciasah tua, tuhteze nynh ka cceih cih zah mua vawlan khiakute liaccady ka thuanaw hynh ka ban hae ryte kae rawkhae cih,” a cipya.38A paaw nynh, “La cceih,” cipah zah sawpaw sah ning lungkhu a saw. Tukeiccuze a ban hae ryte cceih hae zah, mua vawlan khe liaccady athuanaw kha a rawkhae hae.39Sawpaw sah ning aro te, a paaw kalan yn ki zah, a paaw nynh bya a kinku thyhte a tungvaw a cyi. Tuh-e nopinung tuh pise te ihkheih boi khyh hae. Tukeiccuze tuh-e tuh Israel hae kya phungtho lang yn tang zah,40Israel minphuin nopi hae nynh Gilead phin Jefthah ccanung hanlan raw khylan kum kheit ze nin pali atolang a pou hae. Lungloku leinaw
1Efraim phin hae tuh zunghe lawkute Zafon lang cceih hae zah Jefthah kha, “Ammon hae tuk khylan kaening kha kobua leite pawccemou vaw na zua? Na inn ryte maee kae soihbia cih oh!” a cipya hae.2Jefthah nynh minmin kha, “Kae te ka ccungccaw hae tuh Ammon hae ryte thawte kae rhawkuh. Nanning kha kae ko oh zah mih kuih kyate nae luesah khyh oh.3Nae luesah khyh oh paw kha he ka muih tuh, ka chi ze ka chih cite Ammon hae kha tuk khylan vaw kha ka zua, te Bawipaw nynh minmin kha ka kuih kya yn pya hae. Kae kha tuk khylan pawccemou atunin nae ccianua oh?” a cipya hae.4Te Jefthah nynh Gilead hae kha pum hae zah Efraim kha a tuk hae; “Efraim te Manasseh hae thinlung kya tuh nanning Gilead hae hynh Efraim phin kyate a ccue hae paw nynh na thua oh,” cite Efraim hae nynh a ci hae keiccuze Gilead hae nynh minmin kha a chia hae.5Gilead hae nynh Jordan vaw zuanaw balyn kha Efraim hae kha a khee hae. A ccuepaw Efraim hae lukhakheit nynh, “Vaw hynh beih yn zua sah,” a ci ze, Gilead hae nynh, “Efraim phin na thua tou?” cite khia hae zah, “Ka thua khyh,” a ci ze,6minmin nynh, “Tuhteze Shibboleth cite hotua,” cipah hae zah, aroi akyh lante hothya khyh zah, “Sibboleth” a ci. Tetuh minmin nynh amaw kha kyng hae zah Jordan vaw zuanaw kyakhe a chia hae. Tuh-e ccyh lya Efraim hae sung pali thong ning a chih hae.7Jefthah nynh Israel kha kum taruh a uk. Gilead minphuinpaw Jefthah tuh chih zah Gilead ram e amaw khua kyakhe a uu hae. Ibzan, Elon te Abdon
8Jefthah koute Bethlehem khuapaw Ibzan nynh Israel kha a uk.9Aning nynh ccapaw sung thum a hoi. A ccanung hae sung thum kha amaw phin athua lei hae paw kya tungtuhsah hae zah, a ccapaw hae hanlan ccanglang e liaccaw hae sung thum kha a thuakhae hae. Aning nynh Israel kha kum sari a uk.10Te Ibzan tuh chih zah Bethlehem kya a uu hae.11Aning koute Zebulun phinpaw Elon nynh Israel kha kum haw a uk.12Zebulun phinpaw Elon tuh chih zah, Zebulun ram e Aijalon khua kya a uu hae.
13Aning koute Pirathon khua kya umpaw Hillel ccapaw Abdon nynh Israel kha a uk.14Aning nynh lann sung sari a ccikuh hae paw ccapaw sung pali te mintaw pise sung thum a hoi; aning nynh Israel kha kum tarya a uk.15Pirathon khua kya umpaw Hillel ccapaw Abdon tuh chih zah, Amalek hae kya-e muaram, Efraim ram lungkhu e Pirathon khua khe a uu hae. Samson Puinaw
1Israel hae nynh Bawipaw muihnaw kya hoyleinaw kha bua rae hae zah, Bawipaw nynh minmin kha Filistin hae kuih kya kum sung pali lungkhu a pya hae.
2Zorah khuapaw, Dan phin athuapaw, a min Manoah cikuhpaw lu kheit a um, a zu tuh tiin zah ccaawsaah khyh.3Bawipaw vaawpaw tuh tuh-e nopinung kya yn langkuh zah, “Nang tuh na tiin zah ccaaw na saah khyh zemah, ccaaw na poi cih zah ccapaw na saah cih.4Misutui thuasah, ruithyapaw thuasah na nia khyh nawlan te athyaa leipaw pawpaw mah na ae khyh nawlan raeringkuh,5pawccecize ccaaw na poi cih zah ccapaw na saah cih. A sang na ngo lan khyh, pawccecize imuapaw tuh a pui takaw te Pachia hanlan nazir ccungccaw athua cih. Aning tuh Filistin hae kuih kyate Israel hae kha luesah khylan rya a thotu athua cih,” a cipya.6Tetuh nopinung nynh a vawpaw kalan cceih zah, “Pachia ccungccapaw lu kheit ka kya yn thua, a muinsan tuh Pachia vaawpaw muinsan te lokuh zah ri lan myarya um; tei kyate mou nae thua cite ka khia khyh, a min mah yn hopakuh khyh;7thuasalama aning nynh kae kha, ‘Ccaaw na poi cih zah ccapaw na saah cih. Tukeiccuze misutui thuasah, ruithyapaw thuasah na neih lan khyh zah athyaa leipaw pawpaw mah na ae lan khyh, pawccecize imuapaw tuh a pui takaw te a chih cia Pachia hanlan nazir ccungccaw athua cih,’ a ci,” cite a hopya.8Tetuh Manoah nynh Bawipaw kha ngia zah, “Pou Bawipaw , Pachia ccungccapaw nae sawpaw kha kae kalan bua yn thua sah lah, yn pui cih paw imuapaw kha pawtemou kae cyih cih cipaw yn ccangpah sah cite kae ngia,” a ci.
9Pachia nynh Manoah bya kha ngae zah, Pachia vaawpaw tuh loo kya a haungpaw nopinung kalan khe bua yn thua; thuasalama a vawpaw Manoah tuh tuh-e nopinung kya umbua khyh.10Tukeiccuze nopinung tuh a vawpaw kalan arangte ccue zah, “Zekhanin lya ka kya yn langkuhpaw ccungccapaw kha atu bua yn langkuh vae,” a cipya.11Manoah nynh thokuh zah a zu kha a zui, te ccungccapaw kya thua zah, “Nang hynh hynh-e nopinung bya a hopahpaw kha na thua tou?” cite khia zah, “Ka thua,” a cipya.12Te Manoah nynh, “Na bya he yn ccing te, imuapaw tuh a umtuzia pawtemou athua cih zah pawmou a cyih cih?” a cipya.13Bawipaw vaawpaw nynh Manoah kha, “Ka hopyapaw balyn kha nopinung nynh raeringkuh sah.14Misu ku kyate a poupaw miakaw kha nopinung nynh ae lan khyh; misutui thuasah, ruithyapaw thuasah neih lan khyh zah, athyaa leipaw pawpaw mah ae lan khyh; kaw ka pyapaw miakaw kha aning nynh a sungkuh cih,” a ci.
15Manoah nynh Bawipaw vaawpaw kha, “Nang hynh beih kae kang hin sah lah, miaa taraw kha kae paccynpah hin sah,” a cipya.16Bawipaw vaawpaw nynh Manoah kha, “Kae hynh nae kang zemah na looh kha ka ae lan khyh; thuasalama maee-ute silawnaw kha na paccyn ry zetuh Bawipaw kalan raetua,” a cipya. (Pawccecize Manoah nynh Bawipaw vaawpaw nynh thua cipaw nyh khyh.)17Te Manoah nynh Bawipaw vaawpaw kha, “Na bya he yn ccing te, saw kae tuathya nawlan na min tuh hum cikuh mou?” a ci.18Bawipaw vaawpaw nynh amaw kha, “Pawccemou ka min nae khia? Ka min tuh myaryasankae ngaeangthua lan umpaw nynh thua,” a cipya.
19Tukeiccuze Manoah nynh miaa taraw te ccathae silawnawpaw kha lah zah, lungpi vawlan khe ngaeangthua lan umpaw rya a lahpaw Bawipaw kha a pya.20Silawhang kyate maeesoi tuh vaawlang kaethung zah, Manoah te a zu nynh a do lya hae khe Bawipaw vaawpaw tuh silawhang kya-e maeesoi kya a kaethung; te mih mae kha laekhu lang a bakhung hae.21Bawipaw vaawpaw tuh Manoah te a zu kalan bua langkuh vae khyh. Tetuh Manoah nynh Bawipaw vaawpaw nynh thua cipaw a ny.22Manoah nynh a zu kyakhe, “Pachia kha ah muih keiccuze solei chi lan vae,” a cipya.23Thuasalama a zu nynh, “Bawipaw nynh aening hynh chia yn ry ze, maee-ute silawnaw te ccathae silawnaw kha oun ccoupah lan khyh, e uccaw hae balyn hynh oun muihsah lan khyh zah, atu lyahin hynh-e uccaw hae hynh mah oun hopah lan khyh,” a cipya.
24Tuh-e nopinung nynh ccapaw saah zah Samson cite min a phu. Imuapaw tuh yn lethung zah Bawipaw nynh hythua a pya.25Zorah te Eshtaol laku umpaw Mahaneh-dan kyakhe Bawipaw muisaw nynh aning kha thawzung a pya takaw vae. Samson Zudynaw
1Vaekheit lyaze Samson tuh Timnah khua lang la cceih zah, tuin khua kyakhe Filistin nopinung lu kheit kha a muih.2Te yn ki zah a nung te a paaw kha, “Timnah khua kya Filistin nopinung lu kheit kha ka muih; aning kha ka zu lang yn dypah oh,” a cipya hae.3Thuasalama a nung te a paaw nynh, “Na puizia hae kya thuasah, ah minphuin hae kya thuasah nopi a um khyh keiccu tou vingdungawkuh leipaw Filistin hae laku e zu kha dyku lan na cceih cih?” a cipya hae. Thuasalama Samson nynh a paaw kha, “Aning tuh ka lungry yn tung keiccuze zu lang yn dypah oh,” a cipya.4Tuh-e tuh Bawipaw kyate nynh thua cipaw kha a nung te a paaw nynh nyh khyh hae; pawccecize Bawipaw nynh Filistin hae kha dou khylan ccyhhoy kha a ccung. Tuh ccyh lya tuh Filistin hae nynh Israel hae kha a uk hae.
5Tetuh Samson tuh a nung te a paaw ryte Timnah khua lang cceih hae zah, Timnah misu khokhu hae kya he a thua hae tuh, chindeih nopaw sa kheit nynh amaw kha vaekheihmawte a sianua.6Bawipaw muisaw tuh a tungvaw yn thua zah, miaa taraw kha thoh pae hawte a kuih kyalya te tuh-e chindeih tuh thoh a pae. Thuasalama a cyipaw kha a nung te a paaw hopah khyh hae.7Te cceih zah tuh-e nopinung te byabeihkuh hae zah, nopinung nynh Samson kha a lungry a ccingsah.8Sosoh koute tuh-e nopinung kha zu lang dy khylan a kinua, chindeih rhua kha do khylan laanpi kyate ccanglang cceih zah, chindeih pyn lungkhu kya khoibu te khoitui a um.9A kuih te lawkuh zah a ccia lyakhe a aebia. A nung te a paaw kya he a thua te, beihtaraw pyabua hae zah a ae hae. Thuasalama khoitui tuh chindeih rhua kya-e a lawpaw kha hopah khyh hae.
10A paaw tuh nopinung kalan cceih zah, ccangvae hae nynh poi leih a tua hae hawte, tuin kyakhe Samson nynh poi a tua.11Ccungccaw hae nynh Samson kha he a muih hae tuh, a kya umbua khylan ruiban sung thum a thuakhae hae.12Samson nynh minmin kha, “Phohpawbya kae hopah cih oh. Poi nin ninsari lungkhu asuilan nae ccaesahpah oh zah na ny kho oh zetuh, nebaleihpaw boei zung sung thum te liakunawpaw boeining zung sung thum kha kae pya cih oh.13Thuasalama asuilan nae ccaesahpya kho khyh oh zetuh, nebaleihpaw boei zung sung thum te liakunawpaw boeining zung sung thum kha nae pya cih oh,” a cipya hae. Te minmin nynh, “Na phohpawbya tuh yn hotua, kae la ngaetua,” a cipya hae.14Samson nynh minmin kha,“A aetu lungkhu teaepaw a pou,a thawsaepaw lungkhu tea-epaw a pou,” a cipya hae.Tuh-e phohpawbya tuh minmin nynh nin thum lungkhu ccaesah kho khyh hae.
15Nin palinaw nin khe minmin nynh Samson zu kha, “Na vawpaw nynh phohpawbya kha oun ccaesahpya nawlan soihbiatua, tuhkhyhze tuh nang te na paaw innbyn hae kha maee te kae soi cih oh. Kaening hynh ryachisah khylan tou hynhlang hin nae ko oh?” a cipya hae.16Tukeiccuze Samson zu nynh a malang khe rah zah, “Kae hynh nae hua; nae sungsah ccaccing khyh. Ka minphuin hae kha phohpawbya na khia hae, thuasalama asuilan kha kae hynh nae ccaesahpah khyh,” a cipya. Samson nynh a zu kha, “Dotua, ka nung ka paaw hae mah ka hopah khyh hae. Pawccemou nang kha kae hopah cih?” a cipya.17Mih poi phe thang lan, nin sari lungkhu Samson malang khe a rah; palei a ngia keiccuze nin sarinaw nin khe a hopya. Tetuh a zu nynh phohpawbya kha a minphuin hae kya a ccaesahpya hae.18Nin sarinaw nin khuanin ccaw mawkhe, khuaccaaw hae nynh amaw kha,“Khoitui laeze pawmou a ehua?Chindeih laeze pawmoua thawsaehua?”cite a hopya hae. Aning nynh minmin kha,“Ka vaetua tohlaw tena thue khyh oh zetuh,ka phohpawbya hynh na nyhkho lan khyh oh,”a cipya hae.19Te Bawipaw muisaw tuh a tungvaw yn thua, te Ashkelon khua lang cceih zah khuaccaaw hae sung thum kha theih hae zah mih boeining kha lah zah phohpawbya a ccaesah hae paw kalan khe liakunawpaw boei hae kha a pya hae. Myarya thinriate a paaw inn lang a ki.20Te a zu kha Samson a ruibanpaw, a ban hoy huapaw kalan khe a pya hae. Samson nynh Filistin hae A Tae hae
1Ccyh sosoh aro koute, chanvuih rue lyakhe, Samson tuh miaa taraw ccyngte a zu kalan paebua lan cceih zah, “Ka zu khaan lungkhu lang ka tee cih,” a ci. Thuasalama a zu paaw nynh tee lan kaw-ua khyh.2A zu paaw nynh, “Ka ccanung kha na vua vae cipaw phe ria lan ka ny; tukeiccuze aning kha na banpaw kalan ka pya vae. A neitawnung tuh amaw laeze a puithyahua khaw? A unung hanpaw a neitawnung hynh lawkuh,” a cipya.3Samson nynh minmin kha, “Atu lya tuh, Filistin hae tungvaw hoyleinaw ka rae zemah, yn seisah lan khyh hae,” a cipya hae.4Tukeiccuze Samson nynh cceih zah suizaw za thum kha kyng zah, maeccatung kha lah zah mih leihmae hae kha ccangkheit te ccangkheit piade hae zah, tuh-e leihmae ccangning hae laku khe maeccatung kha ccarou a heede.5Maeccatung hae kha maee a tyh koute, Filistin hae loohku a thadyn hae paw kalan khe suizaw hae kha saw hae zah, loohku hae, loohcce hae ryte misu khokhu hae te oliv khokhu hae kha maee nynh a u hae.6Tetuh Filistin hae nynh, “E hynh hummou a cyih?” a ci hae. Minmin nynh, “Timnah khua e lukheitpaw paeepaw Samson nynh a cyih, pawccecize Samson zu kha ko zah a banpaw kha a pya,” a ci hae. Tukeiccuze Filistin hae tuh oun cceih hae zah tuh-e nopinung te a paaw kha maee te a soi hae.7Samson nynh minmin kha, “Hynhte na cyi oh keiccuze phu kae law mawlaezung oh umtaw lei lante thyalawkute bya ka kinku,” a cipya hae.8Aning nynh minmin kha patae a chia hae; te cceihbung zah Etam lungpi karung kya a um.
9Tetuh Filistin hae tuh oun cceih hae zah Judah ram kya ryahmin tahkute Lehi khua kha a thiing hae.10Judah hae nynh, “Pawccemou nae ccianua oh?” a cipya hae. Minmin nynh, “Samson nynh kae tungvaw a cyi hawte a tungvaw cyirute khiide khylan nynh kae ccia,” a ci hae.11Tetuh Judah hae thong thum nynh Etam lungpi karung lang cceih hae zah Samson kha, “Filistin hae tuh aening oun uktu hae cipaw na nyh khyh tou? Pawccemou kae tungvaw hynhte na cyi?” a cipya hae. Aning nynh, “Minmin nynh oun cyi hae hawte minmin kha ka cyi hae,” cite a khung hae.12Judah hae nynh, “Nang kha Filistin hae kuih kya pya lan cite nang kha khiide khylan kae thua vae,” a cipya hae. Samson nynh minmin kha, “Naemaw ccaccei nynh kae hynh nae chia khyh nawlan oh thyalawkute bya yn kinpakuh oh,” a cipya hae.13Minmin nynh Samson kha, “Kaening nynh nang kha khiide kyalya kae khiide cih zah mih kuih kya kae ap cih; kaening nynh nang kha kae theih lan khyh,” a cipya hae. Tetuh minmin nynh liarui thawpaw ccangning te aning kha khiide hae zah, lungpi kyate a cciakhae hae.
14Samson tuh Lehi khua he a thua te, Filistin hae nynh sia biate a thuanua hae; te Bawipaw muisaw tuh vaekheihmawte a tungvaw yn thua zah, a kuih kya umpaw liarui hae tuh maee te a tungkuh hae paw laphan hawte thua hae zah, a khiidenaw hae paw liarui tuh a kuih kya palae tui vae.15Te aning nynh lann a khawru thawpapingpaw kha muih zah, dyngnuakute a law, tuh-e tuhte ccungccaw thong kheit kha a chia.16Te Samson nynh,“Lann a khawru tepatah khanthykuh lan ka pum vae,lann a khawru teccungccaw thong kheitka chia vae,” a ci.
17Bya a ho koute, lann khawru kha ccaring a vua; te tuh-e hmin tuh Ramath-lehi a ci hae.
18Samson tuh myarya tuihaw zah, Bawipaw kha ko zah, “E myarya lepaw taenaw hynh na seepaw kuih kya nae pya vae. Atu tui kanmawte ka chih cih zah, vingdungawkuh lei hae paw kuih kya tou ka thua vae cih?” a ci.19Tetuh Pachia nynh Lehi khua kya akarungpaw hmin kha poh uasah zah, tuin kyate tui apou. Aning nynh tui kha neih zah a hy yn sue zah a thaw yn um. Tukeiccuze tuh-e hmin tuh En-hakkore cite a minphu hae zah atunin cia Lehi khua kya a um.20Samson nynh Filistin hae she lya Israel hae kha kum kuin a uk hae. Samson te Delilah
1Vaekheih tuh Samson nynh Gaza khua lang cceih zah, tuin kyakhe ohhuanung lu kheit kha muih zah a ikhae.2Gaza hae kha, “Samson hein kya yn thua,” cite a hopya hae. Tukeiccuze minmin nynh koihlu hae zah aning kha khua koikua kyakhe zidae a buh hae. “Awkhualan khuadae cia ngaw oh sih; te aning kha chia lan,” cite hokuh hae zah azi zidae daebabi lan a um hae.3Thuasalama Samson tuh ziraccyng cia kyalya ih zah ziraccyng khe thokuh zah khua koikua thuakaw hae kha a tung ccangning te thuakaccong ryte abalyn mawte a raw kya puih zah, Hebron malang umpaw sangpyng dung langkhe a cciakhae.
4Tuh-e koute Sorek accya kya umpaw nopinung, a min Delilah cikuhpaw kha a sungsah.5Filistin bawi hae nynh tuh-e nopinung kalan cceih hae zah, “Paw nynh mou Samson hynh hynhte myarya a thaw a saesah cipaw te aning kha khiite kae tae kho nawlan pawtemou kae cyih cih cipaw kha ny nawlan soihbia lah, a laanpi yn ccungtua; kaening nynh nang kha ngunphua thong kheit za kheit cci kae pya cih,” a cipya hae.6Tukeiccuze Delilah nynh Samson kha, “Paw nynh mou hynhte myarya na thaw ae saesah cipaw te nang hynh tae kho nawlan pawtemou khii kho na ung cih cipaw kha beih yn hopya tua,” a cipya.7Samson nynh amaw kha, “Arou loh leipaw lirui thawpaw ccangsari te yn khii hae zetuh, ka thawzya cih zah mingccangpaw hawte ka thua vae cih,” a cipya.8Tetuh Filistin bawi hae nynh tuh-e nopinung tuh arou loh leipaw lirui thawpaw ccangsari kha ccyngpah hae zah, aning nynh tuh-e lirui tuhte Samson kha a khii.9Ccungccaw hae nynh alungkhu lang e innkhaan kya a buh lya hae khe, nopinung nynh, “Samson, Filistin hae nynh ae thuanua vae hae!” a cipya. Thuasalama maee te a tungkuh hae paw law hawte aning nynh lirui hae kha pong a pae. Tukeiccuze a thawzung a umnaw kha nyh khyh hae.
10Tetuh Delilah nynh Samson kha, “Nae theihrya zah nae ling; pawtemou khiide kho na thua cih cipaw kha beih yn hopya tua,” a cipya.11Samson nynh, “Mang boi leipaw liarui thawpaw hae te yn khii hae zetuh ka thawzya cih zah, mingccangpaw hawte ka thua vae cih,” a cipya.12Tukeiccuze Delilah nynh liarui thawpaw hae kha lah zah, tuh-e tuhte khii zah, “Samson, Filistin hae nynh ae thuanua vae hae!” a cipya. (A buhtu hae paw ccungccaw hae tuh alungkhu lang e innkhaan kya a um hae.) Thuasalama aning nynh a kuih kya-e liarui hae kha laawrui hawte pong a pae.
13Tetuh Delilah nynh Samson kha, “Atu cia nae theihrya zah nae ling; pawtemou khiide kho na thua cih cipaw kha beih yn hopya tua,” a cipya. Samson nynh, “Ka lu kya-e sangkhe ccangsari hynh boeikua kya na kuabia zah, phaeccya te na reihde zetuh, ka thawzya cih zah mingccangpaw hawte ka thua vae cih,” a cipya.14Tukeiccuze a i lyakhe, Delilah nynh a lu kya-e a sangkhe ccangsari kha lah zah, boeikua kya kuabia zah phaeccya te a reihde. Te aning nynh, “Samson, Filistin hae nynh ae thuanua vae hae!” a cipya. Thuasalama a inaw kyate yn thokuh zah phaeccya, boeikua te boeikuanawpaw kha pong a phoh.
15Te Delilah nynh Samson kha, “Na thinlung te nae ry lei pite pawtemou, ‘Kae sungsah,’ cite na ho kho? Atu vae thum cia nae theihrya zah, na thaw myarya ae saesahpaw kha nae hopah khyh,” a cipya.16Nyathyakou tuh, Delilah nynh a bya te nin takyh soihbiate a ngia keiccuze Samson tuh phe chi lan ciate a lungriathae.17Tukeiccuze Samson nynh a thinlung kya umpaw balyn kha hopah zah, “Ka sang hynh ngo boi leipaw nynh thua; pawccecize kae tuh ka nung vue lungkhu te Pachia hanlan Nazir ccungccaw nynh ka thua. Ka sang hynh ngo zetuh ka thawzung nynh yn cciataw cih; te ka thawzya cih zah mingccangpaw hawte ka thua vae cih,” a cipya.
18A thinlung kya umpaw balyn kha yn hopah vae cipaw Delilah nynh he a nyh tuh, Filistin bawi hae kha kosah hae zah, “Atu vae kheit kyalya oun cciatua hin oh, pawccecize aning nynh a thinlung kya umpaw balyn kha pong yn hopya vae,” a cipya hae. Tetuh Filistin bawi hae tuh a kalan oun cceih hae zah, mih kuih kya phua kha a ccyngpya bia hae.19Delilah nynh a phae vawlan marya a isah; te pise lu kheit kha ko zah a lu kya-e sangkhe ccangsari kha a ngosah. Tuh-e paw nynh a thawzyasah zah, a thawzung nynh a cciataw vae.20Tetuh Delilah nynh, “Samson, Filistin hae nynh ae thuanua vae hae!” a cipya. A inaw kyate yn thokuh zah, “Ninhyn hawte ka pou cih zah, kamaw te kamaw ka luesakuh cih,” cite a tuaku. Thuasalama Bawipaw nynh yn cciataw vae cipaw nyhkuh khyh.21Tetuh Filistin hae nynh kyng hae zah a mitlung a khoi hae. Gaza khua lang cciakhae hae zah sohin bawtary te a khiide hae; te thong lungkhu khe sungmia te looh kha a miasah hae.22Thuasalama a lu kya-e sang tuh a ngo kou hae te, bua yn sae takaw vae. Samson Chinaw
23Filistin bawi hae tuh mih pachia Dagon kalan myarya lepaw silawnaw rae khylan te lungpawnaw rae khylan a sueluakuh hae; pawccecize minmin nynh, “Ah pachia nynh ah rhawpaw Samson kha ah kuih kya oun pya vae,” a ciku hae.24Ccungccaw hae nynh Samson kha he a muih hae tuh, mih pachia kha thehoysah hae zah, “Ah pachia nynh ah ram rohtupaw, aening patae oun theihtupaw, ah rhawpaw kha ah kuih kya oun pya vae,” a ci hae.25Myaryamaw mih lung he apaw tuh, “Samson kha yn ko oh, ah lung oun pawsah tua sah,” a ci hae. Tukeiccuze Samson kha thong lungkhu te atolang poukhae hae zah, aning nynh lungpawnaw a raepya hae. Tung hae laku khe a thadynsah hae.26A kuih te a kyngtupaw imuapaw kha Samson nynh, “Inn a tuhdoupaw tung hae kya ka ngeiku ccaw, tung hae kha ka kuih te beih yn hae sah,” a cipya.27Inn kya nopi pise phe abeih hae; Filistin bawi hae balyn tuh tuin kya a um hae, innccuvaw kya mah Samson nynh lungpawnaw a raepya hae paw a dotu hae nopi pise thong thum loukaw a um hae.
28Tetuh Samson nynh Bawipaw kha ko zah, “Bawipaw PACHIA, atu vae kheit kyalya kae hynh yn liathui lah, thawzung beih yn pya. Pou Pachia, tuhteze nynh ka mitlung ccangning hanlan phulawnaw vae kheit kyalya raete Filistin hae hynh ka liaru kho cih hae,” a cipya.29Te Samson nynh inn a tuhdoupaw angaelung e tung ccangning hae kha a ranglang kuih te ccangkheit, a voilang kuih te ccangkheit kyng zah a koinua hae.30Te Samson nynh, “Filistin hae ryte kae chihkheih sah,” a ci; a thawzung balyn thuate a koinua hae; te inn nynh a lungkhu um hae paw bawi hae te ccungccaw hae balyn kha a deih hae. Tukeiccuze a hiin lya a chia hae paw ccungccaw hae laeze a chi lya a chia hae paw ccungccaw hae tuh alunghua hae.31Te a uno hae te a innbyn hae balyn tuh oun thua hae zah a rhua kha lah hae zah cciakhae hae zah, Zorah khua te Eshtaol khua laku umpaw a paaw Manoah shawku kyakhe a uu hae. Aning nynh Israel hae kha kum kuin lungkhu a uk hae. Mikah te Levi Phinpaw
1Efraim muaram kya a min Mikah cikuhpaw ccungccapaw lu kheit a um.2Aning nynh a nung kha, “Na kya-e ngunphua thong kheit za kheit ae lawpah hae zah, tuh-e kong thyalawnaw bya kha ka thaenaw kya na ho; khah-e ngunphua kha ka kya nynh a um, kae nynh ka lah; thuasalama atu kae kii cih,” a cipya. Te a nung nynh, “Ka ccapaw hynh Bawipaw nynh hythuapya vae sah!” a ci.3Tetuh aning nynh ngunphua thong kheit za kheit kha a nung kalan a kii; a nung nynh, “E ngunphua hynh ka ccapaw hanlan laeepaw zohtuh lang raepya nawlan Bawipaw kalan ka pya,” a ci.4Aning nynh ngunphua kha a nung kalan he a kii te, a nung nynh ngunphua za ning kha lah zah, phualaeetupaw kha a pya, te aning nynh laeepaw zohtuh lang rae zah, tuh-e tuh Mikah inn kya a um.5E ccungccapaw Mikah nynh hminthyaa hoi zah, ranpibawi angki te tera zohtuh kha a rae, te a ccapaw lu kheit kha a ranpibawi lang a nung.6Tuh ccyh lya tuh Israel hae kya siapharan um khyh; ccungccaw hae balyn nynh mih muihnaw kya akyh a ci hae paw kha a rae hae.
7Judah ram kya Judah phin athuapaw, Bethlehem khuapaw ccangvaepaw lu kheit a um. Aning tuh tuin khua kya umpaw Levi phin nynh thua.8Tuh-e ccungccapaw nynh a muih khopaw hmin miakaw kya khuasah khylan Judah ram Bethlehem khua kyate a pou. A ccia lyakhe Efraim muaram umpaw Mikah inn kya a thua.9Mikah nynh amaw kha, “Paw kyate mou nae thua?” a cipya. Aning nynh, “Kae tuh Judah ram e Bethlehem khuapaw Levi phin nynh ka thua, ka muih khopaw hmin miakaw kya khuasah khylan kae cceihpaw nynh thua,” cite a khung.10Mikah nynh amaw kha, “Ka kya umbua, ka hanlan paaw lang te ranpibawi lang nae umpah cih, kum kheit ze ngunphua kia haw, boeining bua kheit kae pya cih zah aenia kae rin cih,” a cipya.11Levi phinpaw tuh tuh-e paw te umkheih lan a nawccah; te ccangvaepaw tuh a ccapaw hae kyaze lu kheit lang a tang.12Te Mikah nynh Levi phin ccangvaepaw tuh a ranpibawi lang nungkuh zah, tuh-e ccangvaepaw tuh ranpibawi lang a tang, te Mikah inn kya a um.13Mikah nynh, “Atu tuh Levi phinpaw tuh ka ranpibawi lang a tang vae keiccuze, Bawipaw nynh laansui-uanaw yn pya vae cih cipaw ka ny,” a ci. Mikah te Dan Phin hae
1Tuh ccyh lya tuh Israel hae kya siapharan um khyh. Te tuh ccyh lyatuin Dan phin hae nynh khuasahnaw lanpaw ram a ccungku hae; pawccecize tuh-e ccyh kyacia Israel phin hae kya minmin nynh ram kha ccoubua loh khyh hae.2Tukeiccuze Dan phin hae nynh ram kha dophi khylan te dotua khylan mih phin pynpi kya-e arawthungpaw pise lu pangaw kha a umnaw hae Zorah khua te Eshtaol khua kyate a saw hae; te minmin nynh, “La cceih oh lah, ram kha la dophi oh lah, la dotua oh,” a cipya hae. Minmin nynh Efraim muaram, Mikah inn kya thua hae zah, tuin kya a rya hae.3Mikah inn kya a um lya hae khe Levi phin ccangvaepaw roi kha a syntaw hae; tukeiccuze ccianua hae zah amaw kha, “Hum nynh mou hynhlang ae cciakhae? E hmin kya pawmou na cyi? Hein kya paw rya mou na law?” cite a khia hae.4Aning nynh minmin kyakhe, “Mikah nynh tuhte khahte yn cyipya, kae hynh yn hoh zah, a ranpibawi lang ka tang,” a cipya hae.5Tetuh minmin nynh amaw kha, “Kaening nynh kae ccianuathepaw kya kae laan kae sui a ua cih tou, ua lan khyh tou cipaw kae ny ccaw, Pachia kalan khiatua,” a cipya hae.6Tuh-e ranpibawipaw nynh, “Ngaengante la cceih oh. Nae ccianuathe oh paw kya Bawipaw nynh ae do-oih cih oh,” a cipya hae.
7Tuh-e lu pangaw hae tuh po cceih hae zah Laish khua he a thua hae te, khuaccaaw hae tuh khyndadyh lan um hae zah Sidon hae umtu hawte lunghiinnaw hoi leite daebabi lan a um hae, lae vawlan hobounaw um lei lante um hae zah, sisua mah a hoi hae. Tukoute Sidon hae te sawkuh hae zah, Siria hae te mah ccuepekuh khyh hae.8Minmin nynh Zorah khua te Eshtaol khua kya um hae paw mih puizia hae kya he a thua hae te, mih puizia hae nynh, “Pawtemou athua?” cite a khia hae.9Minmin nynh, “Rang oh, ccianua oh sih; pawccecize ram tuh kae muih zah myarya ahoy. Pawpaw mah cyi leite tou na um cih oh? Ccia lan nae thysung nan sah, tee oh sih lah ram kha ccou oh sih.10Na ccia oh ze, lunghiin leite a um hae paw ccungccaw hae kha na muih cih oh. Ram tuh myarya ako; lae vawlan hobounaw ccangkheit san a um leinaw hmin kha Pachia nynh nae kuih kya ae pya ccaccing vae oh,” a cipya hae.
11Dan phin kya-e ccungccaw za taruh tuh rhawtuk-zunghe ccyngkute Zorah khua te Eshtaol khua kyate a cceih hae,12te cceihthung hae zah Judah ram kya umpaw Kiriath-jearim kya a rya hae. Tukeiccuze tuh-e hmin tuh atunin cia Mahaneh-dan a ci hae; tuh-e tuh Kiriath-jearim niccaw langkhe nynh a um.13Tuin kyate Efraim muaram langkhe cceih hae zah, Mikah inn kya a thua hae.
14Tetuh ram (tuh-e tuh Laish) kha dophi khylan a cceih hae paw lu pangaw hae nynh mih vaeccaw hae kyakhe, “E inn hae kyahin ranpibawi angki, tera zohtuh te laeepaw zohtuh a um hae cipaw na nyh oh tou? Tukeiccuze na cyi lan oh paw kha tuakuh oh,” a cipya hae.15Tukeiccuze minmin nynh tuh-e hmin langkhe maekuh hae zah Mikah inn kya, Levi phin ccangvaepaw a umnaw inn kya thua hae zah amaw kha bya a beih hae.16Dan phin ccungccaw za taruh tuh rhawtuk-zunghe ccyngkute sakoih teenaw kya a thadyn lya hae khe,17ram dophi khylan a cceih hae paw lu pangaw hae nynh tee hae zah laeepaw zohtuh, ranpibawi angki te tera zohtuh kha a law hae. Ranpibawipaw tuh rhawtuk-zunghe ccyngkuh hae paw za taruh ryte teenaw sakoih pe khe a thadynbua.18Lu pangaw hae nynh Mikah inn lungkhu lang tee hae zah laeepaw zohtuh, ranpibawi angki te tera zohtuh kha he a lah hae tuh, ranpibawipaw nynh, “Pawmou na cyi oh?” cite a khia hae.19Minmin nynh, “Yccae nan! Na mung kha na kuih te phang huhkuh lah, kae kya cceihbua, paaw lang te ranpibawi lang nae tangpah cih. Lu kheit innbyn elang ranpibawi lang tang tou namaw hanlan ahoyhua, tuhkhyhze Israel minphuin kya-e phin kheit kya ranpibawi lang tang tou ahoyhua?” a cipya hae.20Tetuh ranpibawipaw nynh a nawccah zah, ranpibawi angki, tera zohtuh te laeepaw zohtuh kha lah zah, tuh-e hae kya a cceihbua vae.
21Te imua hae, sahiin hae te uccaw hae kha mih malang cciasah hae zah a ki vae hae.22Mikah inn te hary asawnaw kya he a thua hae tuh, Mikah inn pe e inn hae kya a um hae paw kha ko hae zah, Dan phin hae kha deehuite a phya hae.23Dan phin hae kha he a sianua hae tuh, Dan phin hae nynh maeleihnuakuh hae zah Mikah kha, “Hynhzeih ccungccaw hae ryte ccianua lan ciate paw bya mou a um?” a cipya hae.24Mikah nynh, “Ka raekupaw ka pachia hae te ranpibawi kha na lah oh zah na cciakhae oh, tuhlaepaw ka hoipaw pawmou a um ung? Nanning nynh, ‘Paw bya mou a um?’ cite pawtemou pharung nae khia ngan oh,” a cipya hae.25Te Dan phin hae nynh amaw kha, “Kaening nynh na bya kae thae khyh ze ahoyhua cih, tuhkhyhze tuh mih thinria hae paw nynh nang kha ae zia cih hae zah, na hiinnaw te na innbyn hae innbyn kha nae shungsei cih,” a cipya hae.26Te Dan hae tuh a cceih hae. Mikah nynh amaw hanlan minmin tuh myaryasankae a thung hae cipaw he a muih tuh, maeleihkuh zah a inn lang a ki vae. Dan Phin hae Laish kya Khuasah hae
27Mikah nynh a raekupaw uccaw hae te a ranpibawipaw kha cciakhae hae zah, lunghiinnaw hoi leite daebabi lan um hae paw Laish khuaccaaw hae kya a thua hae, thaloi te bae hae zah, khuapi kha maee te a soi hae.28Tuh-e khua tuh Sidon khua te sawkuh zah, humhung te mah a ccuepeku khyh hae keiccuze a pankhaetu um khyh. Tuh-e khua tuh Beth-rehob khua nynh a hoipaw accya kya nynh a um. Dan phin hae nynh tuh-e khua tuh sakthui hae zah a umnaw hae.29Israel ccapaw mih minpaaw Dan min kha lee hae zah, tuh-e khua tuh Dan cite min a phu hae; tuh-e khua a min rynpaw tuh Laish acikuh.30Te Dan phin hae nynh tuh-e zohtuh tuh mimaw elang a thadynsaku hae. Moses ccapaw Gershom a ccapaw Jonathan te a ccapaw hae tuh, ramccang hae nynh ram kha a law makhia hae, Dan phin hanlan ranpibawi lang a tang hae.31Shiloh khua kya Pachia inn a um lungkhu balyn tuh, Mikah nynh a raekupaw zohtuh kha mimaw zohtuh lang a nungku hae. Levi Phinpaw te A Lovaenung
1Tuh-e she lya, Israel hae kya siapharan a um khyh lyakhe, Efraim muaram asawnaw kya umpaw Levi phinpaw lu kheit nynh Judah ram Bethlehem khua e kha lovae lang a hoiku.2A tungvaw kya a lovaenung nynh a thinria zah, a kyate Judah ram Bethlehem khua umpaw a paaw inn lang ccue zah, tuin kya sawpaw sah pali loukaw a um.3Te a vawpaw nynh byanepaw te hopya lan zah kikhae lan cite a ccianua. Aning nynh a ryalahtupaw te lann bua kheit kha a cciakhae hae. A lovaenung a paaw inn kya he a thua te, nopinung a paaw nynh muih zah tungku lan lungpawte a cciadue.4A pupaw, nopinung a paaw nynh kang zah nin thum a um; tukeiccuze ae hae neih hae zah, tuin kya a um hae.5Nin palinaw nin tuh awkhua takaw te tho hae zah, ccia lan a paccynkuh vae; thuasalama nopinung a paaw nynh a paeepaw kha , “Looh beihtaraw ae hin lah, na thawsaesakuh hin, tukoute na cceih cih oh,” a cipya.6Tukeiccuze lu ning te dahung hae zah a ae a neihkheih hae; te nopinung a paaw nynh a paeepaw kha, “Atu khuazi tuh rya hin lah, lungpawte um hin,” a cipya.7A paeepaw nynh ccia lan vae cite he a thokuh tuh, a pupaw nynh a paeepaw kha tuin kya khuazi bua a rya mawlaezung kang zah bua a rya.8Nin pangawnaw nin khe a paeepaw tuh ccia lan vae cite awkhua takaw te a thokuh; te nopinung a paaw nynh, “Na thawsaesakuh hin,” a cipya. Tukeiccuze khuanin phe laeleih lan lu ning mawte a ae a neih hae.9A paeepaw tuh a lovaenung te a ryalahtupaw ryte ccia lan vae cite he a thokuh hae tuh, a pupaw, nopinung a paaw nynh, “Dotua, zetesang thua vae. Atu khuazi mah rya hin. Dotua, khua vyavya zi vae. Hein kya khuazi rya hin lah, lungpawte umtua. Awkhualan awkhua takaw te tho lah, na inn lang na cceih cih,” a cipya.
10Thuasalama tuh-e paw tuh khuazi rya vae khyh; thokuh zah cceih zah Jebus (tuh-e tuh Jerusalem) rawlang khe a thua. Lannde dekuhpaw lann bua kheit te a lovaenung tuh amaw kya a umbua hae.11Jebus khua lang he a naekuh hae tuh, khuanin vyavya ccah vae zah a ryalahtupaw nynh a bawipaw kha, “Yn cceih, e Jebus hae khua lang tee oh sih lah, e khua kya rya oh sih,” a cipya.12A bawipaw nynh, “Israel ccungccaw a um leinaw ramccang hae khua lang tee lei lan; Gibeah khua lang po ccia lan,” a cipya.13Te a ryalahtupaw kha, “Rang, e hmin hae sankhakheit kya thua kho nawlan zuakuh oh sih, Gibeah khua khyhze Ramah khua kya rya lan,” a cipya.14Tukeiccuze po sulue hae zah a cceih hae; Benjamin phin kya-e Gibeah khua pe a thua hae tuh, khuanin nynh a ccawtaw hae.15Gibeah khua kya khuazi rya khylan tuhlang tuin a tee hae. Khualae lang tee zah khua ngaelung kya a haung, lu kheit nynh sanmah khuazi rya nawlan innccong thuasah khyh hae.
16Te zete vae tuh paawpipaw lu kheit tuh loo kya rya a lawnaw kyate yn ki. Tuh-e paw tuh Efraim muaram e ccungccapaw thua zah Gibeah khua kya a um buapaw nynh thua. (Tuin hmin kya-e ccungccaw hae tuh Benjamin phin hae nynh thua hae).17Tuh-e paawpipaw nynh do zah khua ngaelung kya khyccepaw kha he a muih tuh, “Teilangmou na cceih cih oh? Tei kyate mou nae thua oh?” a cipya hae.18Aning nynh paawpipaw kha, “Judah ram Bethlehem khua kyate kae cceih zah, ka umnaw Efraim muaram asawnaw lang kae cceih cih. Judah ram Bethlehem khua lang ka la cceih zah, atu tuh ka inn lang kae ki vae paw nynh thua. Humhung nynh mah innccong oun thuasah khyh.19Na ryalahtu hae kaening tuh kae lann hae hanlan ccatanphue te a looh mah kae hoi, kamaw te nopinung te kae kya um buapaw ccangvaepaw hanlan sanlou te misutui mah kae hoi. Kaening hanlan ahopaw um vae khyh,” a cipya.20Paawpipaw nynh, “Na kya daenaw um vae sah. Na hobounaw balyn kha kae do-oihpah cih; khua ngaelung laanpi kya tuh rya nan oh,” a cipya hae.21Tukeiccuze a inn lang teekhae zah, lann hae kha looh a dang hae; mih ccu singkuh hae zah a ae a neih hae. Gibeah Khua A Seinaw
22Mih lungpaw cciamang lyakhe, accouseikuh hae paw khuaccaaw hae abang nynh inn kha koihlute thuakaw kha bua hae zah, innzuaapaw paawpipaw kha, “Na inn thuapaw pisepaw kha kaening nynh kae ikhae ccaw, yn toisakuh,” a cipya hae.23Innzuaapaw, ccungccapaw nynh pounua hae zah, “Uteno hae, myaryamaw ahoy leipaw kha rae nan oh. E paw tuh ka mikhiapaw athua keiccuze, e anungsikuhpaw uccaw hynh rae nan oh.24Hein kya ka ccanung liaccady te mikhiapaw a lovaenung a um hae; minmin hynh kae poukhae hae sah. Minmin kha ikhaede oh lah, nae rythyte seikhae oh; thuasalama hynh-e pisepaw tungvaw kya hynhcihaw anungsikuhpaw uccaw hynh tuh rae nan oh,” a cipya hae.25Thuasalama tuh-e hae nynh ngaepah khyh hae. Tukeiccuze mikhiapaw nynh a lovaenung kha kyng zah mih kalan a pousah. Minmin nynh nopinung kha azi zidae awkhua cia, ikhaede hae zah a vawsawsah hae. Awkhua a aw takaw khe a cciasah hae.26Khuadaetakaw khe, nopinung tuh yn cceih zah a bawipaw a umnaw thuakaw kyakhe raerae aw lan cia a um.
27A bawipaw tuh awkhua khe tho zah, thuakaw kha hung zah ccia lan vae cite he a pou tuh, a lovaenung tuh thuakawccaw vawlan a kuih khangte thuakaw kya phang a huekuh vae.28Aning nynh a lovaenung kha, “Thokuh, ccia lan vae,” a cipya. Thuasalama byakhung vae khyh. Te pisepaw nynh lann tungvaw khang zah, a inn lang a cceih vae.29A inn lungkhu lang a tee koute, tangpaw lawkuh zah a lovaenung kha kyng zah a kuih a ccu ryte ccanghaw lae ning lang a tya, te Israel ram pynpi phe lekuh lan a pyasah hae.30Aning nynh a pyasah hae paw ccungccaw hae kha kawpyate byataw hae zah, “Nanning nynh Israel hae balyn kha hynhte na hopah cih oh, ‘Israel hae nynh Izip ram kyate a pou nin hae kyate atunin cia, hynhcihawpaw uccaw hynh acyihkuh boi tou? E uccaw hynh tuatua kalang oh, hotua kalang oh lah, ho oh,’ cite na cipah cih oh,” a cipya hae. Benjamin Phin kha Rhawtuknaw
1Tetuh Israel hae balyn tuh Dan khua kyate Beersheba khua kyacia, Gilead ram e hae ryte oun pou hae zah, ccungccaw zapi hae tuh ccungccaw lu kheitpaw hawte Mizpah khua kya Bawipaw malang khe a pumkuh hae.2Ccungccaw hae balyn kya-e lupi hae, Israel phin hae balyn kya-e lupi hae tuh Pachia ccungccaw hae a pumkunaw hae kyakhe oun pou hae; zunghe kyngpaw ccu rhawkaw hae cciing pali acih hae.3(Israel ccungccaw hae tuh Mizpah khua lang a cceih hae cipaw kha Benjamin phin hae nynh a thae hae.) Te Israel hae nynh, “E hoyleinaw hynh pawtemou yn langku? Oun hopya tua oh,” a ci hae.4A chia hae paw nopinung a vawpaw Levi phinpaw nynh, “Kae te ka lovaenung tuh Benjamin phin hae kya-e Gibeah khua kya kae thua zah kae rya.5Gibeah khuaccaaw hae nynh oun ccianua hae zah, khuazi khe inn kha a koihlu hae. Kae hynh chia lan yn paccynnuaku hae, te ka lovaenung kha phe chih lan cia a ikhaede hae.6Tetuh ka lovaenung kha ka lah zah pong ka tya koute Israel ram pynpi phe lekuh lan ka pyasah hae; pawccecize minmin nynh Israel ram kya anungsikuhpaw thinlungccinaw kha a rae hae.7Tukeiccuze atu nanning Israel hae nynh nae balynte, e kyahin nae tuanaw te nae roihnaw kha oun hotua kalang oh,” a cipya hae.
8Ccungccaw hae balyn nynh ccungccaw lu kheitpaw hawte thokuh hae zah, “Aening lu kheit sanmah ah bu kalan ccia lei lan, lu kheit sanmah ah inn lang ki lei lan.9Gibeah khua kha hynhte cyi lan: ccungthydungte ccianua lan.10Israel phin hae balyn kya-e ccungccaw za kheit kyaze lu haw, thong kheit kyaze za kheit, thong haw kyaze thong kheit kha ko lan hae zah, minmin tuh rhawkaw hae hanlan vaelooh phutu athua cih hae; tuh-e rhawkaw hae tuh Israel ram kya Benjamin phin kya-e Gibeah khua nynh a raepaw thethyanaw balyn hanlan phulaw khylan a cceih cih hae paw nynh thua,” a ci hae.11Tukeiccuze Israel hae balyn tuh pynkheit lante hobungkute tuh-e khua kha a pumnuaku hae.
12Israel phin hae nynh Benjamin phin balyn kya phe lekuh lan ccungccaw saw hae zah, “Nanning laku kya acyihkuhpaw hynh-e hoyleinaw hynh pawtemou athua?13Atu Gibeah khua kya-e a ccouseikuh hae paw kha chiate Israel kyate hoyleinaw kha kae zosah nawlan, kae kalan oun pya oh,” a cipya hae. Thuasalama Benjamin phin hae nynh mih uno Israel hae bya kha ngae khyh hae.14Israel hae ryte rhawtukkunaw kalan ccia khylan Benjamin phin hae tuh khua hae kyate Gibeah khua lang a sueluakuh hae.15Tuin nin khe, Gibeah khuaccaaw hae nynh a po hae paw milu za sari riabia leite, Benjamin phin hae nynh mih khua hae kyate zunghe kyngpaw ccungccaw thong kuin lae taruh kha a suelua hae.16E rhawkaw hae balyn kyahin, voilang kuih a mangthya hae paw, popaw za sari a um hae; mih balyn mawte sangrua ccangkheit kha lung te asoo lei lan, phe tung lan a deihthya hae.17Benjamin phin hobia leite, Israel hae nynh zunghe kyngpaw cciing pali kha a pum hae, mih balyn mawte rhawtuk a thya hae.
18Israel hae tuh Bethel lang thokute cceihthung hae zah Pachia kha, “Kaening kya hynh Benjamin phin tuk khylan hummou a cceih ty cih?” cite a khia hae. Bawipaw nynh, “Judah nynh a cceih ty cih,” a ci.
19Tetuh Israel hae tuh awkhua takaw khe thokuh hae zah Gibeah khua pe khe a ryanua hae.20Israel hae tuh Benjamin phin kha dou khylan a pou hae; Israel hae nynh rhawkaw hae kha Gibeah khua malang khe a nung hae.21Benjamin phin hae tuh Gibeah khua kyate oun pou hae zah, tuin nin kya Israel hae thong kuin lae ning kha a chia hae.22Israel hae tuh cceih hae zah Bawipaw malang khe zete cia a rah hae; te minmin nynh Bawipaw kha, “Kae uno Benjamin phin hae kha dou khylan bua kae naenuakuh ung cih hae tou?” cite a khia hae. Te Bawipaw nynh, “Ou, ccianua oh,” a cipya hae.23Israel hae nynh mih rawthungsakuh hae zah, rhawkaw hae kha masaty nin lya a nungnaw hae hmin kyakhe bua a nung hae.
24Nin ningnaw nin khe Israel hae nynh Benjamin phin hae kha a ccianua hae.25Nin ningnaw nin khe Benjamin phin hae nynh minmin kha Gibeah khua kyate pounua hae zah, zunghe kyngpaw Israel hae thong haw lae tarya kha a chia hae.26Israel hae balyn, rhawkaw hae mih balynte Bethel lang ki hae zah Bawipaw malang haungte a rah hae; tuin nin tuh zete cia looh-ae a sung hae. Te minmin nynh maee-ute silawnaw te ccawkunaw silawnaw kha Bawipaw malang a rae hae.27Israel hae nynh Bawipaw kha khia hae zah (tuh ccyh lya tuh Pachia byakin thingkua tuh tuin kya um zah,28Aaron ccapaw Eleazar a ccapaw Fineshas nynh tuh-e ccyh lya tuh a malang khe rya a law), “Kae uno Benjamin phin hae kha dou khylan vae kheit bua kae pou ung cih tou, tuhkhyhze kae umtaw vae cih tou?” a cipya hae. Bawipaw nynh, “Cceih oh, awkhualan minmin kha nae kuih kya kae pya cih oh,” a cipya hae.
29Tukeiccuze Israel hae nynh Gibeah khua po voilu lan buhkhawtu hae kha aruh lante a nung hae.30Tetuh nin thumnaw nin khe Israel hae nynh Benjamin phin hae kha a ccianua hae, ninhyn hawte Gibeah khua pe khe rhawkaw hae kha a nungnua hae.31Benjamin phin hae nynh tuh-e rhawkaw hae kha pounua hae zah, khua kyate asawnaw lang cia a cceih hae. Ninhyn hawte rhawkaw hae kha a chia takaw hae; Bethel khua lang cceihpaw te Gibeah khua lang cceihpaw laanluepi hae kya thuasah, ramkaw kya thuasah Israel hae sung thum loukaw kha a chia hae.32Benjamin phin hae nynh, “Ninhyn hawte kae malang khe a shung hae,” cite a tua hae. Thuasalama Israel hae nynh, “Nulang sihkuh oh sih lah, minmin hynh khua te asawkunaw laanpi lang soih oh sih,” a ci hae.33Israel hae alunghua tuh nulang sihkuh hae zah Baal-tamar khua kyakhe a um hae, tuh ccyh lyakhe buhkhawtu Israel hae nynh Geba niccaw lang e mih umnaw kyakhate a pounua kangmaw hae.34Israel hae balyn kya-e popaw rhawkaw thong haw nynh Gebeah khua kha ccianua hae zah, thawte a tukkuh hae. Thuasalama Benjamin phin hae tuh ronaw nynh a naenuaku hae paw kha nykuh khyh hae.
35Bawipaw nynh Benjamin kha Israel malang khe a tae; tuin nin khe Israel hae nynh zunghe kyngpaw Benjamin phin hae thong kuin lae pangaw za kheit kha a chia hae.
36Tetuh Benjamin phin hae nynh kae shung vae cipaw a ny hae.
Israel hae tuh Benjamin phin hae malang te nulang a sihkuh hae, pawccecize Gibeah khua pe a nungnua hae paw buhkhawtu rhawkaw hae kha a doliaku hae.37Buhkhawtu rhawkaw hae nynh Gibeah khua kha vaekheihmawte thiing hae zah, khuapi kha thaloi te khaleih a chia hae.38Israel hae te buhkhawtu rhawkaw hae nynh syntawnaw hoi hae zah, khualae kya maeekhuh pipi he yn pou te,39Israel hae tuh rhawtuknaw kalan bua ki lan, cite a hoku hae. Benjamin phin hae nynh Israel hae sung thum loukaw kha a chia takaw vae hae; minmin nynh, “Masaty rhawtuknaw kya hawte, minmin tuh kae malang a shung ccaccing cih hae,” cite a tua hae.40Maeekhuh pipi tuh khua kyate he yn khuhthung te, Benjamin phin hae nynh mih nulang he a do hae tuh, khua tuh abalynte maeekhuh lang vaawlang akhuhthung vae!41Te Israel hae tuh nulang a ki hae, Benjamin phin hae tuh mih bungzou vae, pawccecize ronaw nynh oun naenuaku vae cipaw a ny hae.42Tukeiccuze Israel hae kyate maeleihkuh hae zah ramkaw langkhe a ccue hae; thuasalama rhawtuknaw nynh phah hae zah, khua kyate oun pou hae paw kha mih laku khe a chia mamin hae.43Benjamin phin hae kha koihlu biate Nohah khua kyate Gibeah khua nithua lang e hmin kyacia deehui hae zah a chia hae.44Benjamin phin hae athungpaw rhawkaw hae thong haw lae tarya a chih hae.45Maeleihkuh hae zah ramkaw lang Rimmon lungpi kalan a ccue lya hae khe, laanluepi hae kya milu thong pangaw a chia hae, te Gidom khua cia deehui hae zah milu thong ning kha mah a chia hae.46Tukeiccuze tuin nin kya zunghe kyngpaw Benjamin phin athungpaw rhawkaw hae a chih hae paw tuh thong kuin lae pangaw acih hae.47Thuasalama milu za taruh tuh maekuh hae zah ramkaw lang Rimmon lungpi kalan a ccue hae, Rimmon lungpi kya sawpaw sah pali a um hae.48Israel hae nynh Benjamin phin hae kha kinua hae zah, khua lungkhu e ccungccaw hae, sahiin hae te a muih hae paw miakaw kha thaloi te a bae hae. A thuanua hae paw khua hae kha maee te a soi hae. Benjamin Phin Ciihan Zosah Leinaw
1Israel hae nynh Mizpah kyakhe, “Humhung nynh mah ah ccanung hae hynh Benjamin phin hae kalan tungtuhsah lei lan hae,” cite thyalawkute bya a kinku hae.2Te ccungccaw hae tuh Bethel lang oun cceih hae zah Pachia malang khe zete cia haungte mih roisaw hae zah thawte a rah hae.3Minmin nynh, “Pou Bawipaw , Israel Pachia, pawccemou atunin hynh-e uccaw hynh yn um zah, Israel minphuin kya phin kheit tuh azo cih?” a ci hae.4Awkhualan khe ccungccaw hae tuh awkhua te tho hae zah, tuin kyakhe silawhang ccangkheit rae hae zah maee-ute silawnaw te ccawkunaw silawnaw kha a rae hae.5Te Israel hae nynh, “Israel minphuin hae balyn kya-e ahummou Bawipaw malang pumkunaw kya thuabua khyh?” a ci hae. Pawccecize Mizpah khua lang, Bawipaw kalan athuabua leipaw ccungccaw te asekuh lante atynpaw byakinkunaw kha rae hae zah, “Tuh-e ccungccaw tuh chia athua cih,” a ci hae.6Thuasalama Israel hae nynh mih uno Benjamin phin kha ngaethyaumsah hae zah, “Israel hae kyate phin kheit tuh atunin vua athua vae.7Aening nynh ah ccanung hae kha minmin kalan zu lang pya lei lan hae cite Bawipaw min phyate thyalawkute bya ah kinku vae oh keiccuze, a hiinhy hae paw minmin hanlan zu hynh pawtemou cyipya lan hae?” a ci hae.
8Minmin nynh, “Israel phin hae kya Mizpah khua lang Bawipaw kalan a cceih leipaw hummou a um?” a ci hae. Jabesh-gilead khua kya-e lu kheit sanmah pumkunaw kalan ryahmin lang thuabua khyh hae.9Pawccecize ccungccaw hae kha he a ria hae tuh, tuin kya Jabesh-gilead khuaccaaw hae lu kheit sanmah umbua khyh.10Tukeiccuze apumkuhpaw zapi hae nynh rhawkaw thong haw lae ning kha tuh-e khua lang saw hae zah, “La cceih oh lah, Jabesh-gilead khuaccaaw hae kha nopi hae te imua hae ryte thaloi te la bae oh.11E hynh na cyi lan oh paw athua cih; pise miakaw te pise ryte a ihkheih vae hae paw nopi miakaw kha khaleih na theih cih oh,” cite kaw a pya hae.12Jabesh-gilead khuaccaaw hae kyakhe pise te a ihkheih boi lei hae paw liaccady za pali kha muih hae zah, Kanaan ram, Shiloh khua e ryahmin kalan khe a cciakhae hae.
13Te apumkuhpaw zapi hae nynh Rimmon lungpi kya um hae paw Benjamin phin hae kalan khe ccawkunaw bya kha a hosah pya hae.14Tuin ccyh khe Benjamin phin hae tuh oun ki hae zah, Israel hae nynh Jabesh-gilead khua e ahiinte a nung hae paw nopi hae kha zu lang a pya hae; thuasalama minmin hanlan zaw khyh.
15Bawipaw nynh Israel phin hae mih lungngingnaw kha a ro keiccuze Israel hae nynh Benjamin phin kha ngaethya a umsah hae.16Tukeiccuze apumkuhpaw zapi hae kya-e piccan hae nynh, “Benjamin phin hae kya nopi hae a um vae khyh keiccuze a hiinhy hae paw hanlan zu tuh pawtemou cyipya lan hae?” a ci hae.17Te minmin nynh, “Israel phin hae kyate phin kheit kha azo khyh nawlan, Benjamin phin kya-e a hiinhy hae paw hanlan rho tuh a um aho.18Tuhzemah ah ccanung hae kha zu lang minmin kha ah pya kho khyh oh,” a ci hae. Pawccecize Israel hae nynh thyalawkute byakinkuh hae zah, “Benjamin phin kha zu a pyapaw miakaw tuh thyalaw thua sah,” a ci hae.19Tukeiccuze minmin nynh, “Dotua, Bethel thahlang, Bethel kyate Shekhem khua lang cceihpaw laanpi nithua lang, Lebonah khua alia lang umpaw Shiloh khua kyakhe Bawipaw hanlan kum takyh tuapaw poi tuh leih a um,” a ci hae.20Benjamin phin hae kha kawpya hae zah, “Cceih oh lah, misu khokhu hae kyakhe la buh oh lah, la dophi oh;21Shiloh khua e liaccaw hae nynh lawnaw kya law khylan he oun pou hae te, misu khokhu kyate pounua oh lah, Shiloh khua e liaccaw hae kha mawmaw zu raveih lang kyngkuh oh, te Benjamin ram lang cceih oh.22Mih paaw hae te mih raee hae nynh kae kya bya a lung hae ze, kaening nynh minmin kyakhe, ‘Thawccinawte beih hysah oh lah, beih oun pya oh; pawccecize rhawtuknaw kya minmin lu kheit cci hanlan zu kha kae kyngpah khyh hae. Nae ccanung hae kha minmin kalan na pya oh paw tuh seinaw na rae oh paw thua khyh,’ cite kae hopah cih hae,” a cipya hae.23Te Benjamin hae nynh tuhcite a cyi hae; poi kya a law hae paw kya-e a kyng hae paw kha mih zu lang ccarou a lawku hae. Te cceih hae zah mih ram lang a ki hae, khua hae kha sakthui hae zah, tuin kya a um hae.24Tetuh Israel hae tuh tuin nin khe mih phin te mih innbyn raveihte tuin kyate pou hae zah, mimaw ram lang a ki hae.
25Tuh ccyh lya tuh Israel hae kya siapharan um khyh; ccungccaw hae balyn nynh mih muihnaw kya akyh a ci hae paw kha a rae hae.

Bible Society of Myanmar

https://app.library.bible/content/1a340f5ae072b2f4

expand_more
chevron_leftPrevious Chapter
chevron_rightNext Chapter