Read JOSHUA 1

JOSHUA1

Pachia nynh Joshua Rya A Pya

¹Bawipaw ryalahtu Moses a chih koute, Moses a bawmtu, Nun ccapaw Joshua kha Bawipaw nynh,²“Ka ryalahtu Moses tuh a chih vae; nang te hynh-e ccungccaw hae balyn nynh Jordan vaw kha zua oh; minmin, Israel hae ka pya cih hae paw ram lungkhu lang tee oh.³Moses kya bya ka kinpyaku vae hawte, nae ccuphe nynh a sy cihnaw hmin miakaw tuh nanning kae pya vae oh.⁴Ramkaw te hynh-e Lebanon kyate vaw lepaw Zufrates vawpi kyacia, Hit hae ram balyn, niccaw lang Rili Lepaw kyacia nae ram lang a tang cih.⁵Na she lungkhu balyn humhung nynh mah na malang te ae thadynnua ngan lan khyh; Moses kya ka um hawte na kya mah ka um cih; kae vua lan khyh, kae cciataw lan khyh.⁶Na thawsaesakuh lah, na rawthungsakuh; pawccecize mih minpaaw hae kya pya lan bya ka kinpyaku hae paw ram tuh e ccungccaw hae hynh na ccousah cih hae.⁷Ka ryalahtu Moses nynh kaw ae pyapaw phungbya thyhte raeringkute cyi lan na thawsaesakuh lah, myarya na rawthungsakuh; na ccianaw miakaw kya na laan na sui a ua nawlan, na voi na rang lang maekuh nan.⁸E kawbya ccauh hynh na khalang kyate phiakuh nan sah; a lungkhu zeikuhpaw balyn thyhte cyi lan na raeringku thya nawlan khuazi khuadae tuh-e tuh na tua cih; tetuh na tuakunaw hawte accing cih zah na laan na sui a ua cih.⁹Kae nynh kaw phe kae pya vae khaw: Na thawsaesakuh lah, na rawthungsakuh; rih nan, na bungzou nan sah; pawccecize Bawipaw na Pachia tuh na ccianaw miakaw kya na kya a um,” a cipya.

¹⁰Te Joshua nynh ccungccaw hae laku e bawi hae kha,¹¹“Ryahmin kya po lekuh lan cceih oh lah, ccungccaw hae kyakhe: ‘Nae vaelooh kha paccynkuh oh; pawccecize Bawipaw nae Pachia nynh ccou lan ae pya oh paw ram lungkhu lang teete ccou khylan nin thum lungkhu, e Jordan hynh na zua cih oh,’ cite hopah oh,” cite kaw a pya hae.

¹²Reuben phin hae, Gad phin hae te Manasseh phin angankuh kyakhe Joshua nynh,¹³“Bawipaw ryalahtu Moses nynh, ‘Bawipaw nae Pachia nynh haeungnaw hmin kha ae pya cih oh zah, e ram hynh ae pya cih oh,’ cite kaw ae pya oh paw bya kha liathui oh.¹⁴Nae zu nae ccaaw hae te nae sahiin-awvaw hae tuh Jordan vaw khuraw lang, Moses nynh ae pya oh paw ram kya na cciatawsya cih oh. Thuasalama nanning lakuze a rawhoypaw balyn nynh rhawtuknawpaw zunghe ccyngkute nae uno hae malang khe na cceih cih oh zah na bawm cih oh.¹⁵Nae uno hae nynh mah Bawipaw nae Pachia nynh a pya hae paw ram kha ccou hae zah, naemaw hawte Bawipaw nynh haeungnaw a pya mawlaezung hae na bawm cih oh. Tukoute Bawipaw ryalahtu Moses nynh ae pya oh paw Jordan khuraw, nithua lang umpaw naemaw ram lang na kithui cih oh zah na ccou cih oh,” a cipya hae.

¹⁶Minmin nynh Joshua kha khungru hae zah: “Kaw nae pyapaw balyn kha kae cyih cih zah nae sawnaw miakaw lang kae cceih cih.¹⁷Atyn-are kya Moses bya kae ngae hawte, na bya mah kae ngae cih; Bawipaw na Pachia tuh Moses kya a la um hawte nang na kya mah um vae sah!¹⁸Humhung zemah na bya kha ei zah, kaw nae pyapaw miakaw kha a zui leipaw tuh chia athua cih. Na thawsaesakuh lah, na rawthungsakuh,” a cipya hae. Jeriko lang Dophitu hae Sawnaw

¹Te Nun ccapaw Joshua nynh pise hae lu ning kha Shittim khua kyate dophitu lang aruh lante saw hae zah, “La cceih oh lah, ram kha la dotua oh, abyapi lante Jeriko khua kha la do oh,” a cipya hae. Tukeiccuze cceih hae zah a min Rahab cikuhpaw ohhuanung inn kya tee hae zah a rya hae.²Te Jeriko siapharan kyakhe, “Ram kha dophi khylan Israel hae abang tuh atu zete oun thua hae,” cite a hopya hae.³Te Jeriko siapharan nynh Rahab kalan ccungccaw saw hae zah, “Na kalan oun thua hae zah na inn kya oun tee hae paw ccungccaw hae kha oun poukhae hae; pawccecize ram pynpi hynh dophi khylan nynh oun thua hae,” cite a hosahpya hae.⁴Thuasalama Rahab nynh tuh-e pise hae lu ning kha ko hae zah a thuruh kou hae te, “Ka kalan pise lu ning oun thua ccaccing hae, thuasalama tei langte nynh oun thua hae cipaw ka nyh khyh.⁵Amoh takaw koikua khaw ccyh khe nynh minmin tuh a pou hae. Teilang nynh a ccia hae cipaw ka nyh khyh. Arangte la deehui oh, phe na phah kho oh,” a cipya hae.⁶Thuasalama Rahab nynh minmin kha innccuvaw lang kaekhae hae zah, innccuvaw kya a phaepaw buri ku hae kyakhe a thuruh hae.⁷Tukeiccuze ccungccaw hae nynh Jordan vaw lang cceihpaw laanpi kya vaw zuanaw kyacia a deehui hae. A deehuitu hae he a cceih kou hae te, koikua kha a khaw hae.

⁸Minmin a i maw hae khe, Rahab nynh innccuvaw lang kae zah,⁹minmin kyakhe, “Bawipaw nynh e ram hynh ae pya vae oh cipaw kha thuasah, nanning raw kha eih kae ri keiccuze ram lungkhu um hae paw balyn tuh nae malang a thyngkuh hae cipaw kha thuasah ka ny.¹⁰Izip ram kyate he na pou oh te, Bawipaw nynh nae malang khe Rili Se a rousah cipaw kha thuasah, Jordan khuraw lang umpaw Amor hae siapharan lu ning Sihon te Og kha marya na ro oh cipaw kha thuasah kae thae vae.¹¹Te tuh-e tuh he kae thae takaw te, kae bung tuh thyngkuh zah, nanning keiccuze kaening lu kheit kya sanmah rawthungnaw um vae khyh, Bawipaw nae Pachia tuh ahangnaw vaaw te anenaw laephi kya Pachia ccaccing nynh thua.¹²Tukeiccuze nae tungvaw thawccinaw ka hoi hawte, nanning nynh mah ka innbyn tungvaw kya thawccinaw na hoiru nawlan oh, Bawipaw min te bya yn kinpakuh oh.¹³Ka nung te ka paaw, ka raee hae te ka uno hae, minmin te asekuh hae paw balyn kha na haang oh zah, chinaw kyate kae hiinnaw nae luesah nawlan oh, ahmepaw muihsahnaw kha yn pya oh,” a cipya hae.¹⁴Te minmin nynh Rahab kha, “Kae hiinnaw tuh nang na hanlan thua vae sah! E kae ryalaw hynh na ho khyh zetuh, Bawipaw nynh e ram hynh he oun pya te, na tungvaw thawccinaw te lungzinaw kae hoi cih,” a cipya hae.

¹⁵Te Rahab nynh minmin kha thanlan-aw kyate liarui te laekhu lang a sawbung hae, pawccecize a inn tuh khuapi koihnawpaw khualungrua pe khe um zah, amaw tuh khualungrua lungkhu lang te nynh a um.¹⁶Aning nynh minmin kha, “Ae deehui oh paw nynh ae phya khyh nawlan oh, mua lang la ccue oh. Ae deehui oh paw a ki mawlaezung hae, nin thum cia tuin kya rekuh oh, tukoute tuh po na cceih kho vae oh,” a cipya hae.¹⁷Minmin nynh amaw kha, “Na kya thyalawkute bya nae kinsakupaw e byakinnaw kyate kae lue nawlan,¹⁸e ram lungkhu lang he kae tee te, kaening nae sawbungnaw thanlan-aw kyakhe e liarui asepaw hynh na la khiide cih zah, na inn kyakhe na nung te na paaw, na raee hae te na innbyn hae balyn kha na la pum cih hae.¹⁹Nanning laku e lukhakheit nynh na inn thuakaw kyate laanpi lang pou zah a chi lanze, amaw tungvaw accah cih zah, kaening tuh seinaw hoi leipaw kae thua cih; thuasalama na inn lungkhu kya na umkheih oh paw lukhakheit tungvaw kya kuihsaw thua zah a chi lanze, kaening tungvaw accah cih.²⁰Thuasalama e kae ryalaw hynh nae ho lanze, na kya thyalawkute bya nae kinsakupaw e byakinnaw kyate kae lue cih,” a cipya hae.²¹Te Rahab nynh, “Nae bya thyhte thua vae sah,” a cipya hae. Aning nynh minmin kha cciasah hae zah a cceih vae hae; te aning nynh liarui asepaw kha thanlan-aw kya a khii.

²²Te minmin tuh mua langkhe cceih hae zah, a deehuitu hae a ki mawlaezung hae tuin kya nin thum a um hae; a deehuitu hae nynh laanpi takyh kya ccung hae zah paw sanmah muih khyh hae.²³Tetuh pise hae lu ning tuh mua langte bua oun rungbung hae. Vaw kha po zua hae zah Nun ccapaw Joshua kya a thua hae te, mih kya acyihkuhpaw balyn kha a hopya hae.²⁴Minmin nynh Joshua kyakhe, “Bawipaw nynh ram pynpi tuh aening kuih kya oun pya ccaccing vae; tuhpiaze ram lungkhu um hae paw balyn tuh aening keiccuze a rih vae hae,” a cipya hae. Israel hae Jordan Zuanaw

¹Joshua tuh awkhua takaw te tho zah Israel hae balyn ryte Shittim kyate cceih hae zah Jordan vaw a thua hae. Khuraw lang a zua maw hae, tuin kya ryahmin a tahku hae.²Nin thum koute bawi hae tuh ryahmin kya khiakuh hae zah,³ccungccaw hae kha, “Levi phin ranpibawi hae nynh a puih hae paw Bawipaw nae Pachia kya-e byakin thingkua kha he na muih oh te, nae umnaw kyate na thokuh cih oh zah na zui cih oh,⁴tuhteze nynh na zui lan oh paw laanpi kha na nyh cih oh, pawccecize e laanpi hynh langmawlya tuh na zui boi khyh oh. Tuhzemah nanning te byakin thingkua tuh dong thong ning loukaw asawkuh cih; a pe lang na naekuh lan khyh oh,” cite kaw a pya hae.⁵Joshua nynh ccungccaw hae kha, “Thyaasahku tua oh; pawccecize Bawipaw nynh awkhualan nae kyakhe ngaeangnaw a rae cih,” a cipya hae.⁶Joshua nynh ranpibawi hae kha, “Byakin thingkua kha puih oh lah, ccungccaw hae malang khe cceih oh,” a cipya hae. Tukeiccuze byakin thingkua kha puih hae zah ccungccaw hae malang a cceih hae.

⁷Te Bawipaw nynh Joshua kyakhe, “Israel hae balyn muihnaw kya nang kha atunin te kae hangthung vae cih, tuhteze nynh Moses kya ka la um hawte na kya ka um cipaw kha minmin nynh a nyh cih hae.⁸Te byakin thingkua a puihtu ranpibawi hae kha, ‘Jordan vaw tui kin he na thua oh te, Jordan vawkhu kya na thadyn cih oh,’ cite kaw na pya cih hae,” a cipya.⁹Te Joshua nynh Israel hae kha, “Hynhlang oun naekuh oh lah, Bawipaw nae Pachia bya kha thaetua oh,” a cipya hae.¹⁰Te Joshua nynh, “Ahiinpaw Pachia tuh nae kya um zah, Kanaan hae, Hit hae, Hiv hae, Periz hae, Girgash hae, Amor hae te Jebus hae kha nae malang kyate solei a dee cih hae cipaw tuh hynh-e liate na nyh cih oh:¹¹laephi pynpi Bawipaw kya-e byakin thingkua tuh nae malang Jordan vaw kha a zua cih.¹²Tukeiccuze Israel minphuin hae kyate phuin kheit kya-e lu kheit ccite lu haw lae ning kha po oh.¹³Te laephi pynpi Bawipaw athuapaw Bawipaw kya-e byakin thingkua a puihtu ranpibawi hae ccuphe nynh Jordan tui kha he a sy te, palung langte yn luapaw Jordan tui tuh thoh pae cih zah, san kheit kya tingkute a thadyn cih,” a ci.

¹⁴Ccungccaw hae tuh Jordan vaw zua khylan mih bu kyate he a pou hae te, byakin thingkua a puihtu ranpibawi hae tuh ccungccaw hae malang a cceih hae.¹⁵Loohrue ccyh balyn kya Jordan vaw tuh varang lang cia pong aleikuh. Tukeiccuze byakin thingkua a puihtu hae tuh Jordan vaw thua hae zah, tuh-e a puihtu ranpibawi hae ccuphe nynh tui kha he a sy te,¹⁶palung langte aluapaw tui tuh phang thadyn zah, asawnaw umpaw Zerethan khua pe e Adam khua kyacia tui tuh san kheit kya atingkuh thung; Arabah rili cikuhpaw Rili Chih kalan alua hae paw tuh marya a kan hae; te ccungccaw hae tuh Jeriko khua langkhe hawite a zua hae.¹⁷Israel hae balyn tuh laerou kyate vaw khuraw a zua cciamang lya hae te minphuin pynpi nynh laerou kyate khuraw a zua kou hae makhia, Bawipaw byakin thingkua a puihtu ranpibawi hae tuh Jordan vaw angaelung laerou kyakhe phang a thadyn hae. Gilgal kya Lungbing Haw Lae Ning

¹Minphuin pynpi te Jordan vaw kha a zua kou hae te, Bawipaw nynh Joshua kha:²“Ccungccaw hae kya-e pise lu haw lae ning, phin kheit ze lu kheit cci po hae lah,³‘E kyahin, Jordan vaw angaelung, ranpibawi hae a thadynnaw hae hmin kya-e lung ccanghaw lae ning kha lah oh lah, puih oh, atu khuazi na ryanaw oh hmin kyakhe nung oh,’ cite kawpya hae,” a cipya.⁴Te Joshua nynh Israel hae kya-e pise lu haw lae ning, phin kheit ze lu kheit cci a po hae paw tuh ko hae zah,⁵“Bawipaw nae Pachia kya-e byakin thingkua malang, Jordan vaw angaelung langkhe cceih oh lah, Israel phin hae phin kheit cci hanlan, lu kheit nynh lung ccangkheit cci kha nae raw te puih oh,⁶tuhteze nynh hynh-e hynh nanning hanlan syntawnaw athua cih. Nyalang ze nae ccaaw hae nynh, ‘E lung hae hynh nae hanlan paw suilan mou athua?’ cite ae khia oh ze,⁷nanning nynh, Bawipaw byakin thingkua malang Jordan tui tuh thoh paekuh, cite na hopah cih oh. Jordan vaw kha he a zua hae tuh Jordan tui tuh thoh pae. Tukeiccuze e lung hae tuh Israel hae hanlan zungzae liathuinaw lang a tang cih,” a cipya hae.

⁸Te Joshua nynh kaw a pya hae hawte Israel hae nynh a cyi hae. Bawipaw nynh Joshua a hopya thyhte Israel phin hae zeih khate, Jordan vaw lungkhu e lung ccanghaw lae ning tuh lah hae zah, a ryanaw hae hmin lang puih hae zah a nung hae.⁹(Byakin thingkua a puihtu ranpibawi hae thadynnaw, Jordan vaw angaelung khe Joshua nynh lung ccanghaw lae ning kha bing zah tuh-e lung hae tuh atunin cia a um hae.)

¹⁰Moses nynh Joshua kaw a pya thyhte, ccungccaw hae kha hopya lan Bawipaw nynh Joshua kaw a pyapaw atyn-are athang mawlaezung, byakin thingkua a puihtu ranpibawi hae tuh Jordan vaw angaelung kya a thadyn hae. Ccungccaw hae tuh rangsakute vaw a zua hae.¹¹Ccungccaw hae balyn a zua kou hae te, Bawipaw byakin thingkua te ranpibawi hae tuh ccungccaw hae malang khe a cceih hae.¹²Reuben phin hae, Gad phin hae te Manasseh phin hae angankuh kha Moses nynh a hopya hae hawte Israel hae malang khe zunghe ccyngkute a cceih hae.¹³Ccungccaw thong sung pali loukaw tuh rhawtuk nawlan zunghe ccyngkute Jeriko bialae langkhe rhawtuk lan Bawipaw malang a cceih hae.

¹⁴Tuin nin khe Bawipaw nynh Joshua kha Israel hae balyn malang khe a hangthung; minmin nynh Moses kha saw a tua hae hawte, Joshua kha a she lungkhu balyn saw a tua hae.

¹⁵Te Bawipaw nynh Joshua kha,¹⁶“Byakin thingkua a puihtu ranpibawi hae kha Jordan vaw kyate pou lan kawpya hae,” a cipya.¹⁷Tukeiccuze Joshua nynh ranpibawi hae kha, “Jordan vaw kyate oun pou oh,” cite kaw a pya hae.¹⁸Bawipaw byakin thingkua a puihtu ranpibawi hae tuh Jordan vaw angaelung kyate pou hae zah, ranpibawi hae ccuphe nynh laerou kha he a sy te, Jordan vaw tuh a luamae hawte luathui zah, Jordan vaw tuh atakaw lya hawte varang lang balyn aleikuh vae.

¹⁹Ccungccaw hae tuh masaty sawpaw, nin haw nin khe Jordan vaw kyate pou hae zah, Jeriko nithua lang ramri, Gilgal kya a rya hae.²⁰Jordan vawkhu e a law hae paw lung ccanghaw lae ning kha Joshua nynh Gilgal kya bing zah,²¹Israel hae kha, “Nyalang ccyh kya nae ccaaw hae nynh mih paaw hae kha, ‘E lung hae hynh paw suilan mou athua?’ cite a khia hae ze,²²nae ccaaw hae kha, ‘Israel hae nynh Jordan vaw hynh laerou kyate a la zua hae,’ cite na nysah cih oh.²³Bawipaw nae Pachia nynh khuraw lang ah zua kou makhia oh, Rili Se kha oun rousahpya hawte Bawipaw nae Pachia nynh Jordan vaw kha na zua kou makhia oh, nae hanlan a rousah,²⁴laephi vaw e ccungccaw hae balyn nynh Bawipaw kuih tuh athung cipaw a ny nawlan hae te Bawipaw nae Pachia kha zungzae na ri nawlan oh nynh thua,” a cipya hae. Gilgal kya Vingdungawnaw

¹Israel hae nynh Jordan vaw a zua kou makhia hae, Bawipaw nynh Jordan vaw e tui tuh a rousahpya hae cipaw kha Jordan khuraw niccaw lang umpaw Amor hae siapharan hae balyn te rili pe umpaw Kanaan hae siapharan hae balyn nynh he a thae hae tuh, Israel hae keiccu rih hae zah mih rawthungnaw phe zo vae.

²Tuh ccyh lyakhe Bawipaw nynh Joshua kha, “Rihlung ccezung hae kha rae lah, Israel hae tuh vae ningnaw vingdungaw hae,” a cipya.³Tukeiccuze Joshua nynh rihlung ccezung hae tuh rae zah, Gibeath-haaraloth kyakhe Israel hae kha vingdung a aw hae.⁴Pawkeiccumou Joshua nynh Israel hae tuh vingdung a aw hae ci ze: Izip ram te a pou hae paw pise hae balyn, rhawkaw hae balyn tuh Izip kyate a pou kou hae te, ramkaw laanryng kya phe chih vae hae.⁵Izip ram kyate oun pou hae paw balyn tuh vingdungaw vae paw a la thua hae zemah, Izip ram kyate a pou kou hae te, ramkaw laanryng kya a pui hae paw balyn tuh vingdungaw thua loh khyh hae.⁶Pawccecize Izip ram kyate a pou hae paw minphuin pynpi, rhawkaw hae tuh Bawipaw bya kha ngae khyh hae zah a chi mawlaezung hae, Israel hae tuh ramkaw kya kum sung pali a cceih hae. Bawipaw nynh minpaaw hae kyaze kae pya cih oh cite bya a kinpyaku hae paw ram, mateitui te khoilutui aluanaw ram kha minmin nynh muih lei lante Bawipaw nynh thya a law hae.⁷Tukeiccuze tuh-e ccungccaw hae ccelang a puisah hae paw mih ccaaw hae kha Joshua nynh vingdung a aw hae; pawccecize minmin tuh laanryng kya vingdungaw thua loh khyh hae.

⁸Mih minphuin pynpi te vingdung a awkuh kou hae te, phe a dan hae cia ryahmin lungkhu mih umnaw kya a um hae.⁹Bawipaw nynh Joshua kyakhe, “Izip ram e saryanaw kha nae kyate atunin ka vua vae,” a ci. Tukeiccuze tuh-e hmin tuh Gilgal cite atunin cia ko athua. Gilgal kya Kawtaw Poi

¹⁰Israel hae nynh Gilgal kya a rya lya hae, tuh-e sawpaw nin haw lae pali nin zete khe Jeriko bialae kya kawtaw poi a tua hae.¹¹Kawtaw poi koute awkhualan, tuin nin ccaccei khe ram kyate apoupaw, ransi phing leipaw sanlou te thoupaw ccathae kha a ae hae.¹²Ram kyate apoupaw looh a ae nin hae khe manna tuh phe thang zah Israel hae nynh manna kha hoi vae khyh hae; tuin kum kyakhe Kanaan ram kyate apoupaw looh kha a ae hae. Joshua Vizin

¹³Joshua tuh Jeriko khua pe a um lyakhe, ngawdo zah ccungccapaw lu kheit thaloi thuaakute a malang phang a thadynpaw kha a muih. Joshua nynh a kalan ccianua zah, “Nang hynh kaening kalan na panpaw tou? Tuhkhyhze kae rhaw hae kalan na panpaw tou?” cite a khia.¹⁴Tuh-e paw nynh, “Thua khyh, Bawipaw rhawkaw hae kya-e rhawbawi lante atu kae thua vae,” a cipya. Te Joshua nynh laekhu kya bakhungte beik zah, “Ka Bawipaw, na ryalahtu kae hynh pawmou nae naw ry?” a ci.¹⁵Bawipaw rhawkaw hae kya-e rhawbawipaw nynh Joshua kha, “Na phanah kha khahkuh; pawccecize na thadynnaw hmin tuh athyaapaw nynh thua,” a cipya. Te Joshua nynh a hopya thyhte a cyi. Jeriko Lawnaw te Ronaw

¹Israel hae keiccuze Jeriko khua tuh alungkhu lang te thuasah, atolang te thuasah phang a khaw hae; tukeiccuze a poupaw te a teepaw humhung mah um khyh.²Bawipaw nynh Joshua kha, “Dotua, Jeriko khua tuh a siapharan te a rhawkaw hae ryte na kuih kya kae pya vae.³Khua kha na voilu cih oh, rhawkaw balyn nynh se kheit a voilu cih hae, tuhcite nin taruh lungkhu na cyih cih oh,⁴ranpibawi lu sari nynh byakin thingkua malang khe tuutepaw ki mungkae ccangsari kha a ccyngkuh cih hae. Nin sarinaw nin vae tuh khua kha vae sari na voilu cih oh, ranpibawi hae nynh mungkae kha a tu cih hae.⁵Minmin nynh tuutepaw ki kha tu hae zah, mungkae roi kha he na thae oh te, ccungccaw balyn nynh thawmawte a sia cih hae; te khua koihnawpaw khualungrua tuh marya a ting cih zah, ccungccaw hae balyn tuh lawbabin lan malang a cceih cih hae,” a cipya.⁶Tukeiccuze Nun ccapaw Joshua nynh ranpibawi hae kha ko hae zah, “Byakin thingkua kha lah oh lah, Bawipaw byakin thingkua malang khe ranpibawi lu sari nynh tuutepaw ki ccangsari kha ccyng oh,” a cipya hae.⁷Ccungccaw hae balyn kha mah, “Malang cceih oh lah, khuapi kha voilu oh, zunghe a ccyngkuh hae paw kha Bawipaw byakin thingkua malang cceih oh,” a cipya hae.

⁸Joshua nynh ccungccaw hae tuh kaw a pya hae thyhte, Bawipaw malang kya tuutepaw ki mungkae ccangsari a ccyngtu hae ranpibawi lu sari tuh mungkae tu biate malang cceih hae zah, Bawipaw byakin thingkua nynh minmin kha a zui hae.⁹Te zunghe ccyngkuh hae paw tuh mungkae tu hae paw ranpibawi hae malang a cceih hae; mungkae a tu cciamang lya hae khe, nulang rhawviatu hae nynh byakin thingkua kha a zuibia hae.¹⁰Joshua nynh ccungccaw hae kha, “Sia oh kae cipya makhia oh, na sia lan khyh oh, nae roi mah na ccaesah lan khyh oh, bya kaw kheit san na ho lan khyh oh. Tukoute na sia cih oh,” cite kaw a pya hae.¹¹Tukeiccuze Bawipaw byakin thingkua nynh khua kha se kheit a voilu; te ryahmin langkhe cceih hae zah tuh-e khuazi tuh ryahmin kya a rya hae.

¹²Te Joshua tuh awkhua takaw te tho zah, ranpibawi hae nynh Bawipaw byakin thingkua kha a puih hae.¹³Te Bawipaw byakin thingkua malang khe ranpibawi lu sari tuh tuutepaw ki mungkae ccangsari kha ccyng hae zah tu biate a cceih hae. Zunghe ccyngkuh hae paw tuh minmin malang cceih hae zah, nulang rhawviatu hae tuh Bawipaw byakin thingkua nulang te a cceih hae, ranpibawi hae nynh mungkae kha a tubia lalia hae.¹⁴Nin ningnaw nin khe khua kha se kheit a voilu kou hae te, ryahmin lang a ki hae. Tuhcite nin taruh lungkhu a cyi hae.

¹⁵Nin sarinaw nin khuadaetakaw vyvy aw te tho hae zah, a cyimae hae hawte khua tuh se sari a voilu hae; tuh-e nin rou nynh khua tuh se sari a voilu hae.¹⁶Te se sarinaw vae tuh, ranpibawi nynh mungkae he a tu te, Joshua nynh ccungccaw hae kha, “Sia oh! Pawccecize Bawipaw nynh khua tuh ae pya vae oh.¹⁷Khua te a lungkhu umpaw balyn tuh ro khylan Bawipaw kalan pya athua cih. Aening nynh ah saw oh paw locceihtu hae kha a thuruh keiccu hae ze, ohhuanung Rahab te a inn kya um hae paw balyn tuh a hiin cih hae.¹⁸Ro lan cite pya vae paw uccaw hae kha nanning nynh lah nan oh, ro lan pya vae paw uccaw ccangkhakheit kha na lawsei oh zetuh, Israel tungvaw vawsawnaw thuakhaete Israel ryahmin kha ro lanpaw uccaw lang na raesei cih oh.¹⁹Thuasalama sui te ngun, sohin te sivaw uccaw hae balyn tuh Bawipaw hanlan thyaasah athua cih hae zah, Bawipaw sisuainn lungkhu lang a tee cih hae,” a cipya hae.²⁰Tukeiccuze ccungccaw hae tuh sia hae zah mungkae kha a tu hae. Ccungccaw hae nynh mungkae roi kha he a thae takaw hae te, thawte sia hae zah khualungrua tuh marya a ting; tukeiccuze ccungccaw hae tuh khua lungkhu lang lawbabin lan tee hae zah khua kha a law hae.²¹Te khua kya umpaw balyn, nopi pise, adih ale, vaetua, tuu te lann hae kha thaloi te marya a ro hae.

²²Te Joshua nynh ram dophitu lu ning hae kyakhe, “Ohhuanung inn lang la tee oh lah, bya na kinpyaku oh hawte, tuh-e nopinung te a ccungccaw hae balyn kha oun poukhae oh,” a cipya hae.²³Tukeiccuze dophitu athua hae paw ccangvae hae nynh tee hae zah Rahab kha a nung, a paaw, a raee hae te a ccungccaw hae balyn—a puizia hae balyn ryte poukhae hae zah, Israel ryahmin atolang khe a nung hae.²⁴Khua te a lungkhu umpaw atyn-are kha maee te a soi hae, sui te ngun, sohin te sivaw uccaw hae rou kha Bawipaw inn kya umpaw sisuainn lungkhu lang a nung hae.²⁵Thuasalama ohhuanung Rahab tuh a innbyn hae te a ccungccaw hae balyn ryte Joshua nynh chia leite a haang hae. A ciihan hae tuh Israel hae kya atunin cia a um hae. Pawccecize Joshua nynh Jeriko khua dophi khylan a saw hae paw locceihtu hae kha Rahab nynh a thuruh hae.

²⁶Tetuh Joshua nynh thyalawkute,“E Jeriko khua hynh raethui lana zuakuhpaw miakaw tuhBawipaw malang thyalaw thua sah!A ccatawccaw lu khatekhua athonaw aleihpaw khaa thadynsah cih zah,a ccasoi lu khate khua koikua khaa rae cih!” a ci.

²⁷Tukeiccuze Bawipaw tuh Joshua kya um zah, ram pynpi kya a min tuh athaan. Akhan Seinaw

¹Thuasalama pya vae paw uccaw kyakhe Israel hae tuh lungzinaw hoi khyh hae: Judah phin hae kya-e Zerah ccapaw Zabdi ccapaw Karmi ccapaw Akhan nynh pya vae paw uccaw abang kha a law; te Israel hae tungvaw kya Bawipaw thinrianaw tuh maee lang arua.

²Joshua nynh Jeriko kyate Bethel nithua lang, Beth-aven pe umpaw Ai khua langkhe ccungccaw hae kha saw hae zah, “La cceihthung oh lah, ram kha la dophitua oh,” a cipya hae. Te ccungccaw hae nynh cceihthung hae zah, Ai khua kha a dophi hae.³Te Joshua kalan ki hae zah, “Ccungccaw balynte cciathung ho lan khyh; milu thong ning thong thum loukaw maw te cceih hae sah lah, Ai kha la tuk hae sah. Minmin tuh eih azya hae keiccuze ccungccaw balynte mih thawbangsah nan hae,” cite a hopya hae.⁴Tukeiccuze ccungccaw thong thum han tuh cceihthung hae zah, Ai khua e ccungccaw hae malang khe a ccue vae hae.⁵Ai khua e ccungccaw hae nynh sung thum lu taruh a chia hae, khua koikua atolang te Shebarim kyacia dee hae zah hary apannaw kyakhe a chia hae. Te ccungccaw hae balyn tuh myarya rih hae zah mih rawthungnaw phe zo.

⁶Tetuh Joshua nynh a boeining kha seii zah Bawipaw byakin thingkua malang khe Israel piccan hae ryte zete cia laekhu kya a bakhung hae; mih lu kya vuiping a phingku hae.⁷Te Joshua nynh, “Ezou, Bawipaw Pachia! Kaening hynh Amor hae kuih kya pyate ro khylan, pawccemou e ccungccaw hae hynh Jordan khuraw lang na zuakhae hae? Jordan khuraw kya khuasah lan kha kae lung la ccingkhaekuh sah lah ze!⁸Pou Bawipaw, Israel hae nynh mih rhaw hae malang te nulang ki vae hae zah, pawmou ka ho kho vae cih!⁹Kanaan hae te e ram kya um hae paw balyn nynh a thae cih hae zah kaening hynh oun koihlu cih hae, kae min hynh laephi kyate a zosah vae cih hae. Tetuh alesaepaw na min hanlan pawtemou na cyih vae cih?” a ci.

¹⁰Bawipaw nynh Joshua kha, “Thoku tua! Pawccemou na bakhung?¹¹Israel nynh phe sei vae; kaw ka pya hae paw ka byakin kha phe ro vae hae. Pya vae paw uccaw abang kha phe law hae; ruh hae zah hynbya hote mih uccaw hae kya a nungbia hae.¹²Tukeiccuze Israel hae tuh mih rhaw hae malang thadyn kho khyh hae; mimaw toulou kha ro lanpaw uccaw lang a tansaku hae keiccuze mih rhaw hae malang khe nulang a maeleihkuh hae. Pya vae paw uccaw hae kha nae kyate na ro khyh oh zetuh, nae kya ka um vae lan khyh.¹³Thoku tua, ccungccaw hae kha thyaasah hae lah, ‘Awkhualan hanlan thyaasakuh oh, pawccecize Israel Pachia Bawipaw nynh, “Pou Israel, pya vae paw uccaw hae tuh nae kya a um; tuh-e pya vae paw uccaw hae kha nae kyate ccaring na vua mawlaezung oh, nae rhaw hae malang na thadyn kho lan khyh oh,” a ci.¹⁴Tukeiccuze awkhualan awkhua tuh phin kheit koute phin kheit malang na cceih cih oh. Bawipaw nynh a popaw phin tuh puizia hae thyhte na naekuh cih oh, Bawipaw nynh a popaw puizia tuh innbyn thyhte na naekuh cih oh, Bawipaw nynh a popaw innbyn tuh lu kheit ccite na naekuh cih oh.¹⁵Te pya vae paw uccaw hae a lahtupaw tuh a hoipaw uccaw hae balyn ryte maee te soi athua cih, pawccecize aning nynh Bawipaw byakinnaw kha ei zah Israel hae kya maethya lan umpaw kha a cyi vae,’ cite hopah hae,” a cipya.

¹⁶Joshua tuh awkhua takaw te tho zah Israel hae kha phin kheit koute phin kheit cciakhae hae zah, Judah phin tuh law athua.¹⁷Judah phin kha cciakhae hae zah, Zerah puizia hae tuh law athua; te Zerah puizia hae tuh innbyn byn kheit koute byn kheit cciakhae hae zah Zabdi innbyn tuh law athua.¹⁸Te Zabdi innbyn kha lu raveihte cciakhae hae zah Judah phin kya-e Zerah ccapaw Zabdi, Zabdi ccapaw Karmi, Karmi ccapaw Akhan tuh law athua.¹⁹Tetuh Joshua nynh Akhan kha, “Ka ccapaw, Israel Pachia Bawipaw kha phu-esah lah, amaw malang na seinaw kha phyku tua. Na cyipaw kha atu yn hopya tua; yn phei nan,” a cipya.²⁰Te Akhan nynh Joshua kha, “Athua, Israel Pachia Bawipaw tungvaw a seipaw tuh kamaw hynh nynh ka thua. Ka cyipaw tuh hynhte nynh thua:²¹luadepaw uccaw hae kyakhe apuithyapaw Babilon angkiccua, ngun shekel za ning te shekel sung pangaw aripaw suitung tung kheit kha he ka muih tuh, eih ka duaa zah ka lawku. Tuh-e hae tuh ka bu lungkhu lae kaw kya nynh ka thuruh, ngun tuh akawkou nynh a um,” a cipya.

²²Tukeiccuze Joshua nynh locceihtu hae kha saw hae zah, tuh-e hae tuh bu kalan a ccue hae; a bu kyatuin a thuruhpaw tuh-e uccaw hae tuh la um zah ngun tuh akawkou a la um.²³Bu kya-e kha lah hae zah Joshua te Israel hae kalan a cciakhae hae; te Bawipaw malang khe a nung hae.²⁴Te Joshua te Israel hae balyn nynh Zerah ccapaw Akhan kha ngun, angkiccua, suitung, a ccapaw hae te a ccanung hae, a tangnua hae, lann hae, tuu hae, a bu te a hoipaw uccaw hae balyn ryte cciakhae hae zah Akhor Accya langkhe a thuakhae hae.²⁵Joshua nynh, “Pawccemou kae tungvaw vawsawnaw na thuasah? Atunin Bawipaw nynh na tungvaw vawsawnaw a thuasah cih,” a ci. Te Israel hae balyn nynh Akhan tuh lung te phe chih lan a deih hae; minmin kha lung te deih hae zah maee te a u hae.²⁶Aning kha lung patae pumthin hae zah tuh-e tuh atunin cia a um ung. Te Bawipaw nynh maee lang ruapaw a thinrianaw kha a daesah vae. Tukeiccuze tuh-e hmin tuh atunin cia Akhor Accya a ci hae. Ai Khua Taenaw te Ronaw

¹Te Bawipaw nynh Joshua kha, “Rih nan, na lungroh nan sah; rhawkaw balyn kha ko hae lah, namaw ryte Ai khua lang cceihthung oh. Ai siapharan kha a khua, a ccungccaw hae te a ram ryte na kuih kya kae pya vae.²Jeriko khua te a siapharan tungvaw na cyi hawte, Ai khua te a siapharan tungvaw na cyih cih; luadepaw uccaw te a sahiin-awvaw kyalya kha naemaw hanlan na lawkuh cih oh; khua kha anulang te buhkhaw oh,” a cipya.

³Tukeiccuze Joshua te rhawkaw balyn tuh Ai lang ccia lan a thokuh hae. Joshua nynh arawthungpaw rhawkaw thong sung thum kha pote, khuazi khe kawpyate cciasah hae zah,⁴“Khua kha anulang te na buh cih oh; khua kyate myarya sawnaw lang cceih nan oh, nae balynte raeringkute na um cih oh.⁵Kae te kae umkheihpaw ccungccaw hae balyn nynh khua kha kae naenuakuh cih. Minmin nynh kaening kha he oun pounua hae te, atakaw lya hawte, kae ccuetaw cih hae.⁶Khua kyate asawnaw lang kae thua mawlaezung oun deehui cih hae; pawccecize minmin nynh, ‘Atakaw lya hawte oun ccuetaw vae hae,’ cite a ci cih hae. Minmin kyate kae ccue lyakhe,⁷na buhnaw oh kyate na thokuh cih oh zah khua kha na lah cih oh; pawccecize Bawipaw nae Pachia nynh khua kha nae kuih kya ae pya cih oh.⁸Te khua kha he na lah kou oh te, Bawipaw bya thyhte khua tuh maee te na soi cih oh; tuhcite kaw kae pya vae oh,” a cipya hae.⁹Tuhcite Joshua nynh saw hae zah buhnaw hmin lang a cceih hae, Ai te Bethel laku, Ai te niccaw langkhe a um hae; tuh-e khuazi tuh Joshua tuh ryahmin kya nynh a rya.

¹⁰Te Joshua tuh awkhua takaw te tho zah ccungccaw hae kha a pum kou hae te, ccungccaw hae malang khe Israel piccan hae ryte Ai khua lang a cceih hae.¹¹Te amaw kya um hae paw rhawkaw hae balyn tuh cceihthung hae zah, khua kalan a naekuh hae, Ai te thahlang khe a rya hae, Ai te minmin laku kya vuakarung ccangkheit a um.¹²Te pise thong pangaw kha ko hae zah, Bethel te Ai laku, khua te niccaw langkhe a buhsah hae.¹³Tuhcite rhawkaw hae kha nung hae zah, ryahminpi tuh khua te thahlang, nulang rhawvia hae tuh khua te niccaw langkhe a nung. Tuh-e khuazi Joshua tuh accya kya a rya.¹⁴Ai siapharan nynh tuh-e tuh he a muih te, amaw te a ccungccaw hae balyn te khuaccaaw hae tuh Israel hae kha tuk khylan Arabah accya lang ahawipaw tungkunaw hmin langkhe awkhua takaw te rangsakute a cceih hae; thuasalama khua nulang te oun buhkhaw hae cipaw kha nyh khyh.¹⁵Te Joshua te Israel hae balyn tuh mih malang khe rhaw phe shung hae paw hawte umsakuh nyn hae zah, ramkaw langkhe a ccue hae.¹⁶Tukeiccuze khua kya um hae paw balyn kha mimaw ryte pynkheihlan deehui khylan kokuh hae zah, Joshua kha khua te asawnaw lang cia a deehui hae.¹⁷Ai khua te Bethel khua kya Israel hae deehui lan a cceih leipaw pise lu kheit san um khyh; khua koikua kha khawsya leite Israel hae kha a deehui hae.

¹⁸Oute Bawipaw nynh Joshua kha, “Na kuih kya umpaw thaloi khate Ai langkhe eetua; pawccecize Ai tuh na kuih kya kae pya cih,” a cipya. Te Joshua nynh a kuih kya umpaw thaloi khate Ai langkhe a ee.¹⁹A kuih he a dyng takaw te, a buhtu rhawkaw hae nynh mih umnaw kyate arangte thokuh hae zah, malang khe a naangbia hae, khua lungkhu lang teete khua kha lah hae zah, maee te palou a soi vae hae.²⁰Tetuh Ai khuaccaaw hae nynh nulang he a do hae tuh, dotua, khua kya-e maeekhuh tuh vaawlui lang a kaethung vae. Minmin tuh teitei lang mah ccue khonaw thawzung hoi vae khyh hae, pawccecize ramkaw lang ccue hae paw nynh a deehuitu hae kha kinua hae zah a tuk vae hae.²¹A buhtu hae nynh khua a law vae hae cipaw te khua kya-e maeekhuh kha Joshua te Israel hae balyn nynh he a muih hae tuh, kinua hae zah Ai khuaccaaw hae kha a chia hae.²²Te mingccang hae nynh khua kyate pounua hae zah minmin kha a dou hae; tukeiccuze Israel hae nynh Ai hae kha voilang ranglang te varyng a koihlu hae keiccuze a hiinhypaw te a ccuepaw lu kheit san a um lei lan a chia hae.²³Thuasalama Ai siapharan tuh a hiin pite Joshua kalan a cciakhae hae.

²⁴Israel hae nynh Ai khuaccaaw hae kha a deehuinaw hae ramkaw khe marya theih hae zah, mih balyn mawte thaloi te a chih kou hae te, Israel hae balyn nynh Ai khua lang kinua hae zah, khua kya um hae paw kha thaloi te marya a bae hae.²⁵Tuin nin kya a chihpaw nopi pise, Ai khuaccaaw hae mih balynte thong haw lae ning acih hae.²⁶Pawccecize Joshua nynh Ai khuaccaaw hae balyn kha khaleih a ro mawlaezung hae, thaloi a eenawpaw a kuih kha khin khyh.²⁷Bawipaw nynh Joshua kha kaw a pya thyhte, tuin khua kya-e sahiin-awvaw hae te luadepaw uccaw hae kyalya kha Israel hae nynh mimaw uccaw lang a lawku hae.²⁸Te Joshua nynh Ai khua kha maee te soi zah, atunin cia zungzae arohpaw apumkuhpaw lang a rae.²⁹Te Ai siapharan kha zete cia thingku kya a sae; khuanin ccah te, Joshua nynh kawpya hae zah a rhua kha thingku vaw kyate sahbung hae zah, khua koikua teenaw kin khe a vua hae, lungpum pi lang pumthin hae zah tuh-e tuh atunin cia a um. Joshua nynh Byakin A Thawsah

³⁰Tetuh Joshua nynh Ebal Mua vawlan khe Bawipaw , Israel Pachia, elang silawhang ccangkheit a rae,³¹Bawipaw ryalahtu Moses nynh Israel hae kha kawpya hae zah, Moses kawbya ccauh kyaze, “a awkuh leipaw, sivawhaelua mah mangnua leipaw lung te raepaw silawhang,” cite azeiku thyhte a rae hae; tuh-e vawlan khe maee-ute silawnaw kha Bawipaw kalan rae hae zah, ccawkunaw silawnaw kha a rae hae.³²Te tuin kya, Israel hae malang khe Moses nynh a zeipaw kawbya kha Joshua nynh tuh-e lung hae vawlan khe a khawpi.³³Ranpibawi hae nynh Israel hae kha hythua a pya cih hae, cite Bawipaw ryalahtu Moses nynh masaty lyaze kaw a pya hae thyhte, Israel hae balyn, ramccungccaw te ramccang ccungccaw hae tuh mih piccan hae, mih bawi hae te mih byapiatu hae ryte Bawipaw byakin thingkua puihtu Levi phin ranpibawi hae malang khe byakin thingkua te ahawiliakuh lante, ccungccaw angankuh tuh Gerizim Mua malang, tuhlaepaw angankuh tuh Ebal Mua malang khe a thadyn hae.³⁴Tukoute kawbya ccauh kya azeiku thyhte, hythuanaw bya te thyalawnaw bya athuapaw kawbya kya-e bya hae balyn kha Joshua nynh a ria.³⁵Nopi hae, imua hae te mih kya umbua hae paw ramccang hae te Israel zapi hae balyn malang khe Moses nynh kaw a pyapaw bya balyn kya-e byaccan ccangkheit sanmah Joshua nynh a ria leipaw um khyh. Gibeon hae nynh Joshua A Ling hae

¹Jordan khuraw lang mua vaw e ram te laephi anenaw ram, Lebanon ram cia Rili Pi vahue kya po um hae paw Hit hae, Amor hae, Kanaan hae, Periz hae, Hiv hae te Jebus hae mih siapharan hae balyn nynh e kong a thae hae tuh,²Joshua te Israel kha dou khylan lunglokute pynkheihlan a pumkuh hae.

³Thuasalama Joshua nynh Jeriko khua te Ai khua kya a cyipaw kha Gibeon khuaccaaw hae nynh he a thae hae tuh,⁴thyaruhhahi lante rya a law hae: cceih hae zah vaelooh kha a paccynku hae, mih lann hae hanlan aseiikuhpaw sungkua kha mang hae zah, apuepaw, aseiikuhpaw te abiakuhpaw misutui-saphuabawng kha a phusah hae,⁵pae zah bia vae paw phanah kha nahkuh hae zah boeining puesalaepaw kha a lawku hae; te mih vaelooh balyn tuh rou zah amua vae.⁶Te Gilgal khua ryahmin kya um hae paw Joshua te Israel hae kalan cceih hae zah, “Laansawpi umpaw ram kyate nynh kae thua; tukeiccuze kaening ryte byakinnaw rae oh,” a cipya hae.⁷Thuasalama Israel hae nynh Hiv hae kha, “Nanning hynh kaening laku kya um hae paw mah poh na thua kho oh, pawtemou nanning te byakinnaw ah rae kho cih oh?” a cipya hae.⁸Minmin nynh Joshua kha, “Kaening tuh na ryalahtu hae nynh kae thua,” a cipya hae. Te Joshua nynh minmin kha, “Hum hae mou na thua oh? Paw kyate mou nae thua oh?” a cipya hae.⁹Te minmin nynh, “Bawipaw na Pachia min keiccuze laansawpi e ram kyate nynh kae thua; pawccecize Pachia kong kha thuasah, Izip ram kya a cyipaw balyn kha thuasah,¹⁰Jordan khuraw lang um hae paw Amor hae siapharan lu ning, Heshbon siapharan Sihon te Ashroth kya umpaw Bashan siapharan Og tungvaw a cyipaw balyn kha thuasah kae thae vae.¹¹Tukeiccuze kae piccan hae te kae ram e ccungccaw hae balyn nynh kaening kha, ‘Laanryng kya ae lanpaw vaelooh phukute la cceih oh, minmin kha la tungkuh oh lah, “Kaening tuh nae ryalahtu hae nynh kae thua; atu kaening te byakinnaw rae oh,” cite la hopah oh,’ oun cipya hae.¹²Vaelooh lang kae phukupaw sanlou tuh hein kya a um; laanryng hanlan kae phukupaw kae sanlou hae hynh kae inn kyate nae kalan ccia lan kae thoku nin tuh sokaleihpaw nynh thua, thuasalama atu tuh dotua oh, rou zah phe mua vae.¹³E misutui-saphuabawng hae hynh mah kae ruin takaw lya tuh athawpaw athua zemah, dotua oh, phe paw vae; te e kae boeining hae te kae phanah hae hynh mah kae laanccia eih saw keiccu pue zah apae vae,” a cipya hae.¹⁴Tukeiccuze cciakhaetu piccan hae nynh mih vaelooh kha ae hae zah, Bawipaw tuanaw kha ngiakuh khyh hae.¹⁵Te Joshua nynh minmin ryte ccawkunaw rae zah, mih hiinnaw haang lante aamah a khanpyaku hae; te ccungccaw zapi cciakhaetu hae nynh minmin kha thyalawkute bya a kinpyaku hae.

¹⁶Minmin ryte byakinnaw a rae kou hae te nin thum he aro te, Gibeon hae tuh mih innpaw hae thua hae zah mimaw kya a um hae paw nynh thua cipaw kha a ny hae.¹⁷Te Israel hae nynh cceih hae zah nin thum te mih khua a thua hae. Mih khua hae tuh Gibeon, Khefirah, Beeroth te Kiriath-jearim nynh thua hae.¹⁸Thuasalama Bawipaw , Israel Pachia liate ccungccaw zapi cciakhaetu hae nynh bya a kinpyaku vae hae keiccuze Israel hae nynh minmin kha tuk khyh hae. Te ccungccaw zapi balyn nynh cciakhaetu hae kha a seisah hae.¹⁹Thuasalama cciakhaetu hae nynh ccungccaw zapi hae balyn kyakhe, “Bawipaw , Israel Pachia min te kaening nynh minmin kha bya kae kinpyaku vae hae keiccuze minmin kha ty lei lan vae hae.²⁰Mih tungvaw kya aening nynh hynhte cyi lan: Aening nynh minmin kha thyalawkute bya ah kinpyaku vae oh keiccuze ah tungvaw kya thin-unaw accaw khyh nawlan, mih hiinnaw kha haang lan hae,” cite a hopya hae.²¹Cciakhaetu hae nynh, “Minmin tuh hiin ccaleih hae sah,” a ci hae. Tuhcite cciakhaetu hae nynh minmin konglang bya a pae vae hae hawte, minmin tuh zapi hae hanlan maeething tyatu lang te tui thetu lang a tang hae.

²²Joshua nynh minmin kha ko hae zah, “Kae kya mang na um oh pite, ‘Nae kyate laansawpi kya a um hae paw nynh kae thua,’ cite pawccemou nae ling oh?²³Tukeiccuze nanning tuh thyalaw na thua vae oh zah, abang tuh see lang zungzae na tang cih oh, ka Pachia inn hanlan tui thetu te maeething tyatu na thua cih oh,” a cipya hae.²⁴Minmin nynh Joshua kha, “Ram hae balyn hynh nanning pya lan zah, ram kya um hae paw balyn hynh nae malang ro lanpaw kha Bawipaw na Pachia nynh a ryalahtu Moses kya kaw a pya vae cipaw kha na ryalahtu hae kaening kya phe ria lan oun hopah hae zah, nanning keiccuze kae hiinnaw hanlan myarya kae ri pawte, hynh-e uccaw hynh kae cyi.²⁵Atu kaening hynh na kuih kya nynh kae um: kae tungvaw kya cyi lan ahoy ahme cite na tua thyhte cyih ccaleih,” a cipya hae.²⁶Tukeiccuze Joshua nynh minmin hanlan kha hynhte a cyi: minmin kha Israel hae kyate khum hae zah theih khyh hae.²⁷Thuasalama tuin nin khe Joshua nynh minmin kha ccungccaw zapi elang thuasah, Bawipaw nynh a po cih paw hmin kya rae lanpaw silawhang elang thuasah atunin cia maeething tyatu lang te tui thetu lang a nung hae. Khuanin A Thadyn

¹Joshua nynh Jeriko khua te a siapharan tungvaw a cyi hawte, pawtemou Ai khua kha lah zah, Ai khua te a siapharan kha marya a ro cipaw kha thuasah, pawtemou Gibeon khuaccaaw hae nynh Israel hae ryte ccawkunaw rae hae zah minmin kya a umbua hae cipaw kha thuasah, Jerusalem siapharan Adonizedek nynh he a thae tuh,²myarya a rih, pawccecize Gibeon tuh siapharan khua khuakheit hawte khua lepaw thua zah Ai khua laeze mah alehua, khua kya-e pise hae balyn tuh arawthungpaw ccungccaw hae nynh thua hae.³Tukeiccuze Jerusalem siapharan Adonizedek nynh Hebron siapharan Hoham, Jarmuth siapharan Piram, Lakhish siapharan Jafia te Eglon siapharan Debir kha byataw hae zah,⁴“Ka kalan oun cceih oh lah, yn bawm oh, Gibeon kha tuk oh sih; pawccecize aning nynh Joshua te Israel hae ryte ccawkunaw a rae vae hae,” a cipya hae.⁵Tetuh Amor hae siapharan lu pangaw—Jerusalem siapharan, Hebron siapharan, Jarmuth siapharan, Lakhish siapharan te Eglon siapharan hae nynh—mih rhawkaw hae kha pum hae zah mih rhawkaw hae balyn ryte Gibeon khua kha ryahmin tahnuakute a tuk hae.

⁶Te Gibeon hae nynh Gilgal ryahmin kya umpaw Joshua kalan ccungccaw saw hae zah, “Na ryalahtu kaening hynh oun vua nan; arangte beih yn cceihthung, oun bawmtua lah oun khumtua; pawccecize mua vaw kya khuasah hae paw Amor hae siapharan balyn nynh oun pumnuaku vae hae,” a cipya hae.⁷Tukeiccuze Joshua tuh rhawkaw hae balyn, athungpaw mih rawhoy hae paw balyn ryte Gilgal kyate a cceihthung hae.⁸Bawipaw nynh Joshua kyakhe, “Minmin kha rih nan hae, pawccecize minmin kha na kuih kya kae pya vae; na malang lu kheit san thadyn kho lan khyh hae,” a cipya.⁹Tukeiccuze Joshua tuh Gilgal kyate zidae cceihthung zah, vaekheitmawte a tuk hae.¹⁰Te Bawipaw nynh minmin kha Israel hae malang siisakute ccuesah hae zah, Gibeon kyakhe patae a chia hae, Beth-horon khua te cciathungnaw laanpi kalan khe dee hae zah Azekah te Makkedah khua kyacia po a chia hae.¹¹Te Israel hae malang ccue hae zah, Beth-horon khua hary apannaw kya a cciabung lya hae khe, Bawipaw nynh Azekah khua cia vaawlang te lungtungpi sawphu hae zah a chih hae; Israel hae nynh thaloi te a chia hae paw laeze hya keiccuze a chih hae paw tuh alunghua.

¹²Bawipaw nynh Amor hae kha Israel hae kya a pya nin hae khe, Joshua nynh Israel hae muihnaw kyakhe Bawipaw kha hynhte a hopya,“Khuanin, Gibeon khua kyaphang thadyntua,Sawpaw, Aijalon accya kyaphang thadyntua,” a ci.¹³Israel hae nynh mih rhaw hae khaphu a lawru makhia hae,khuanin tuh tyty um zah,sawpaw tuh a thadyn.E hynh Jashar ccauh kya azeikuh khaw? Khuanin tuh vaawlui ngaelung kya thadyn zah, nin kheit loukaw ccaw leite a um.¹⁴Tuin nin hawte Bawipaw nynh ccungccaw bya a ngaepya nin tuh um boi khyh zah malang ccyh kya mah um vae khyh; pawccecize Bawipaw nynh Israel hae elang rhaw a tukpya hae.

¹⁵Tukoute Joshua te Israel hae tuh Gilgal umpaw mih ryahmin lang a ki hae. Siapharan Lu Pangaw Taenaw

¹⁶E siapharan lu pangaw hae tuh ccue hae zah Makkedah lungkarung kya a rekuh hae.¹⁷“Makkedah lungkarung kya a rekuh hae paw siapharan lu pangaw hae kha muih athua vae hae,” cite Joshua kha a hopya hae.¹⁸Joshua nynh, “Lungkarung akhu rae kalan khe lungtungpi hae kha tounua oh lah, a pepan kya minmin a ngawtu hae kha nung oh;¹⁹thuasalama naemaw tuh tuin kya um nan oh; nae rhaw hae kha deehui oh lah, mih nulang te tuk oh. Mih khua lang teesah nan oh, pawccecize Bawipaw nae Pachia nynh minmin kha nae kuih kya ae pya vae oh,” a cipya hae.²⁰Joshua te Israel hae nynh minmin kha a thang makhia hae cia, patae a theih kou hae te, te a hiinhy hae paw tuh akoihkuhpaw khua lungkhu lang he a tee hae te,²¹ccungccaw hae balyn tuh Makkedah ryahmin kya umpaw Joshua kalan khe khyndadyh lan a ki hae; humhung nynh mah Israel ccungccaw lukhakheit kha rawsete byakhung ngan khyh hae.

²²Te Joshua nynh, “Lungkarung akhu kha hung oh lah, siapharan lu pangaw hae kha lungkarung kyate ka kalan oun poukhae oh,” a cipya hae.²³Tuhcite cyih hae zah, Jerusalem siapharan, Hebron siapharan, Jarmuth siapharan, Lakhish siapharan te Eglon siapharan, tuh-e siapharan lu pangaw hae tuh lungkarung kyate amaw kalan a poukhae hae.²⁴Te tuh-e siapharan hae kha Joshua kya a thuakhae hae tuh, Joshua nynh Israel hae balyn kha ko hae zah, amaw ryte a cceihkheih hae paw rhawbawi hae kyakhe, “Oun naekuh oh lah, e siapharan hae nging kyahin nae ccu kha khang oh,” a cipya hae. Tetuh minmin nynh naekuh hae zah mih ccu kha siapharan hae nging kya a khang hae.²⁵Te Joshua nynh minmin kha, “Rih nan oh, nae bungzou nan sah; nae thawsaesakuh oh lah, nae rawthungsakuh oh; pawccecize na tuk oh paw rhaw hae balyn tungvaw kya Bawipaw nynh hynhcite a cyih cih,” a cipya hae.²⁶Tukoute Joshua nynh bua hae zah a chia hae, te thingku ku pangaw kya a sae hae. Zete cia thingku kya a sae hae.²⁷Khuanin yn ccah te, Joshua nynh kawpya hae zah, thingku kyate sahbung hae zah a rekunaw hae lungkarung kalan a vua hae, lungkarung khurae kyakhe lungtungpi hae kha a nungkhaw hae, tuh-e tuh atunin cia a um.

²⁸Tuin nin khe Joshua nynh Makkedah khua kha lah zah, tuh-e khua te a siapharan kha thaloi te a bae hae; khua lungkhu umpaw ccungccaw balyn kha lu kheit san a laehy lei lan ciate khaleih a ro hae. Jeriko siapharan tungvaw a cyi hawte Makkedah siapharan tungvaw kya mah a cyi.

²⁹Te Joshua tuh Israel hae balyn ryte Makkedah kyate Libnah lang po sulue hae zah Libnah khua kha a tuk hae.³⁰Bawipaw nynh Libnah khua te mih siapharan kha mah Israel hae kuih kya a pya hae; tuh-e khua kha thaloi te bae zah, khua lungkhu umpaw ccungccaw balyn kha lu kheit san a laehy lei lan a bae hae; Jeriko siapharan tungvaw a cyi hawte Libnah siapharan tungvaw kya mah a cyi.

³¹Joshua tuh Israel ccungccaw hae ryte Libnah kyate Lakhish khua lang cceih hae zah, khua kha koihlute a tuk hae.³²Bawipaw nynh Lakhish khua tuh Israel hae kuih kya a pya hae, nin ningnaw nin khe khua kha lah zah, Libnah khua kya a cyi hawte, khua lungkhu umpaw ccungccaw balyn kha thaloi te a bae hae.

³³Te Gezer siapharan Horam tuh Lakhish khua kha bawm lan yn cceih; Joshua nynh Horam te a ccungccaw hae kha ahiinpaw lu kheit san um lei lan a chia hae.

³⁴Joshua tuh Israel hae balyn ryte Lakhish kyate Eglon lang sulue hae zah, khua kha koihlute a tuk hae;³⁵tuin nin khe khua tuh lah hae zah thaloi te a bae hae, Lakhish tungvaw kya a cyi hawte, tuin nin khe khua lungkhu umpaw ccungccaw balyn kha khaleih a ro hae.

³⁶Tukoute Joshua tuh Israel hae balyn ryte Eglon kyate Hebron khua langkhe cceihthung hae zah a tuk hae;³⁷Hebron kha lah hae zah mih siapharan te khua pepan e khua hae te tuin khua kya umpaw ccungccaw balyn kha thaloi te a bae hae; Eglon tungvaw a cyi hawte, lu kheit san haang leite bae hae zah, khua lungkhu umpaw ccungccaw balyn kha khaleih a ro hae.

³⁸Te Joshua tuh Israel hae balyn ryte Debir langkhe ki hae zah a tuk hae,³⁹Debir siapharan te a pepan e khua hae balyn kha a law hae; minmin kha thaloi te bae hae zah, khua lungkhu umpaw ccungccaw balyn kha lu kheit san a laehy lei lan khaleih a ro hae; Hebron tungvaw a cyi hawte thuasah, Libnah te mih siapharan tungvaw a cyi hawte thuasah Debir te mih siapharan tungvaw kya mah a cyi hae.

⁴⁰Tuhcite Joshua nynh ram pynpi kha thuasah, muaram te Negeb ram kha thuasah, laephi anenaw ram te laephi hary apannaw ram hae te mih siapharan hae balyn kha thuasah a tae hae; Bawipaw , Israel Pachia nynh kaw a pya thyhte, lu kheit san a laehy lei lan, ahysuepaw balyn kha khaleih a ro hae.⁴¹Joshua nynh minmin kha Kadesh-barnea kyate Gaza kyacia, Goshen ram abalynte Gibeon khua kyacia a tae hae.⁴²Bawipaw , Israel Pachia nynh Israel hae hanlan rhaw a tuk keiccuze, Joshua nynh hynh-e siapharan hae balyn te mih ram kha vae kheit te marya a law hae.⁴³Te Joshua tuh Israel hae balyn ryte Gilgal umpaw ryahmin langkhe a ki hae. Thahlang e Kanaan Siapharan hae kha Taenaw

¹E konglang hynh Hazor siapharan Jabin nynh he a thae tuh, Madon siapharan Jobab, Shimron siapharan, Akhshaf siapharan,²thahlang muaram kya um hae paw siapharan hae, Khinneroth alia lang e Arabah kya um hae paw siapharan hae, laelung anenaw um hae paw siapharan hae, niccaw lang e Nafoth-dor kya um hae paw siapharan hae,³nithua lang te niccaw lang um hae paw Kanaan hae, muaram kya um hae paw Amor hae, Hit hae, Periz hae, Jebus hae, Mizpah ram Hermon mua kaw kya um hae paw Hiv hae kha bya a taw hae.⁴Tuh-e siapharan hae tuh, milu lante rili kin e laesia zeih cih hae paw mih rhawkaw hae balyn te myarya lungpaw marang hae te marangle hae ryte oun pou hae.⁵E siapharan hae balyn nynh mih rhawkaw hae kha sueluate oun cceih hae zah, Israel hae kha dou khylan Merom tuili pe khe pynkheihlan a rya hae.

⁶Te Bawipaw nynh Joshua kyakhe, “Minmin kha rih nan hae, pawccecize awkhualan atu ccyh kya mih balynte phe chiate Israel hae kya ka pya cih hae; mih marang hae kha mih ccukantho na bae cih oh zah, mih marangle hae kha maee te na soi cih oh,” a cipya.⁷Tukeiccuze Joshua nynh a rhawkaw hae balyn ryte Merom tuili pe khe vaekheihmawte thuanua hae zah a tuk hae.⁸Te Bawipaw nynh minmin kha Israel hae kuih kya a pya hae, minmin kha tuk hae zah Sidon Lepaw te Misrefoth-maim kyacia, te nithua lang Mizpah accya kyacia a deehui hae. Lu kheit san hiin leite a chia hae.⁹Bawipaw nynh kaw a pya thyhte Joshua nynh mih tungvaw a cyi; mih marang hae ccukantho kha bae zah, mih marangle hae kha maee te a soi.

¹⁰Tuh ccyh lyakhe Joshua nynh nulang ki zah Hazor khua kha a law, te mih siapharan kha thaloi te a chia. Tuh-e ccyh maw lyaze Hazor tuh tuh-e peenaw hae balyn kya lu nynh thua.¹¹Hazor khua kya um hae paw balyn kha thaloi te bae hae zah khaleih a chia hae; ahiinpaw lu kheit san um khyh, Hazor khua kha maee te phe a soi.¹²Te Bawipaw ryalahtu Moses nynh kaw a pya thyhte, tuh-e siapharan hae kya-e khua hae balyn te mih siapharan hae kha Joshua nynh a law hae, thaloi te theih hae zah khaleih a ro hae.¹³Thuasalama Joshua nynh maee te a soipaw Hazor khua laelan, mua vawlan umpaw khua hae kha tuh Israel hae nynh maee te soi khyh hae.¹⁴E khua hae kya-e luadepaw uccaw hae balyn te sahiin-awvaw hae kha Israel hae nynh mimaw elang a lawku hae; thuasalama ccungccaw hae balyn kha tuh a chi kou makhia hae, thaloi te theih hae zah ahiinpaw lu kheit san um lei lan marya a chia hae.¹⁵Bawipaw nynh a ryalahtu Moses kha kaw a pya thyhte, Moses nynh Joshua kha kawpya pathy zah, Joshua nynh tuhcite a cyi; Bawipaw nynh Moses kya kaw a pyapaw balyn kha a cyi leipaw um khyh. Joshua nynh Ram Marya A Tae

¹⁶Tuhcite Joshua nynh tuh-e ram hae balyn kha a law: muaram, Negeb hae balyn, Goshen ram hae balyn, laelung anenaw, Arabah, Israel kya-e muaram te laelung anenaw ram,¹⁷Seir lang a kaethungpaw Halah Mua kyate Hermon Mua kaw e Lebanon accya kya umpaw Baal-gad kyacia a law hae. Te Joshua nynh mih siapharan hae balyn kha a kyng hae, te tuk hae zah a chia hae.¹⁸Joshua tuh tuh-e siapharan hae ryte khaw cia rhaw a tukkuh hae.¹⁹Gibeon khua kya um hae paw Hiv hae holeite, Israel hae ryte daenaw a rae hae paw khua khuakheit san um khyh; khua abalyn mawte tuk hae zah a law hae.²⁰Pawccecize Bawipaw nynh Moses kha kaw a la pya thyhte, tuh-e minphuin hae kha thawcci leite khaleih ro athua nawlan hae, Israel hae kha tuk khylan ccianua lan ciate mih lungkhungpaw tuh Bawipaw maw nynh a cyipaw nynh thua.

²¹Tuh ccyh lyakhe Joshua nynh yn cceih zah Anak hae kha muaram, Hebron khua, Debir khua, Anab khua, te Judah kya-e muaram hae balyn, Israel muaram hae balyn kyakhe khaleih a maemih hae; Joshua nynh minmin kha mih khua mawte khaleih a robia hae.²²Israel hae ram kya Anak hae lu kheit san um vae khyh hae; Gaza khua, Gath khua te Ashdod khua kya tuh abang a um ung hae.²³Tuhcite Bawipaw nynh Moses a la hopyapaw balyn thyhte, Joshua nynh ram pynpi tuh a law; Joshua nynh Israel hae kha mih phin raveihte rho lang nee hae zah a pya hae. Te ram tuh rhawtuk adae vae. Moses nynh A Taepaw Siapharan hae

¹Jordan vaw te nithua lang, Arnon Vaw kyate Hermon Mua kyacia, Arabab nithua lang umpaw ram abalyn kha Israel hae nynh tae hae zah a law hae; e ram kya-e siapharan hae tuh hynh-e hae hynh nynh athua hae:²Heshbon khua umpaw Amor hae siapharan Sihon thua zah, aning nynh Arnon Vaw kin vahue kya Aroer khua kyate, te tuh-e vahue angaelung kyate Ammon hae ramri Jabbok vaw kyacia uk zah, Gilead ram angankuh cia a uk bia,³te Arabah accya kha mah Khinneroth Rili nithua lang cia, te Beth-jeshimoth khua lang ccianaw laanpi, Arabah rili cikuhpaw Rili Chih kyacia, alia lang Pisgah Mua athonaw kyacia phe a thua.⁴Ashtaroth te Edrei khua kya um hae paw Refaim hae kyaze nyathya a laehypaw lu kheit tuh Bashan siapharan Og nynh thua,⁵aning nynh Hermon Mua te Selakah ram te Geshur hae te Maakath hae ramri kyacia Bashan ram abalyn, te Heshbon siapharan Sihon a ramri kyacia Gilead ram angankuh kha a uk.⁶Bawipaw ryalahtu Moses te Israel hae nynh minmin kha a tae hae; Bawipaw ryalahtu Moses nynh mih ram hae tuh Reuben phin hae, Gad phin hae te Manasseh phin angankuh hae kha ccou lan a pya hae. Joshua nynh A Taepaw Siapharan hae

⁷Jordan vaw niccaw lang, Lebanon accya kya umpaw Baal-gad khua kyate Seir ram lang akaethungpaw Halak Mua kyacia, Joshua te Israel hae nynh a tae hae paw, e ram kya-e siapharan hae tuh akaw lang thyhte nynh athua, (Joshua nynh mih ram tuh Israel minphuin hae kha mih hanpaw thyhte ccou lan a pya hae,⁸e ram hae tuh muaram, laelung anenaw ram, Arabah accya, apannaw ram, ramkaw te Negeb ram thua hae zah, Hit hae, Amor hae, Kanaan hae, Periz hae, Hiv hae te Jebus hae ram nynh thua):⁹Jeriko siapharan lu kheit Ai siapharan, Bethel pe a umpaw lu kheit¹⁰Jerusalem siapharan lu kheit Hebron siapharan lu kheit¹¹Jarmuth siapharan lu kheit Lakhish siapharan lu kheit¹²Eglon siapharan lu kheit Gezer siapharan lu kheit¹³Debir siapharan lu kheit Geder siapharan lu kheit¹⁴Hormah siapharan lu kheit Arad siapharan lu kheit¹⁵Libnah siapharan lu kheit Adullam siapharan lu kheit¹⁶Makkedah siapharan lu kheit Bethel siapharan lu kheit¹⁷Tappuah siapharan lu kheit Hefer siapharan lu kheit¹⁸Afek siapharan lu kheit Lasharon siapharan lu kheit¹⁹Madon siapharan lu kheit Hazor siapharan lu kheit²⁰Shimron-meron siapharan lu kheit Akhshaf siapharan lu kheit²¹Taanak siapharan lu kheit Megiddo siapharan lu kheit²²Kedesh siapharan lu kheit Karmel kya umpaw Jokneam siapharan lu kheit²³Nafath-dor kya umpaw Dor siapharan lu kheit Galilee kya umpaw Goiim siapharan lu kheit²⁴Tirzah siapharan lu kheit
siapharan hae tuh mih balynte sung thum lu kheit acih hae. Tae lan ungpaw Ram hae

¹Joshua tuh taw vae zah a kum myarya tang vae; Bawipaw nynh, “Nang tuh na taw vae zah na kum myarya tang vae, thuasalama law lan zah ccou lanpaw ram patae um ung.²E hae hynh lawte ccou lanpaw ram hae nynh thua hae: Filistin hae ram abalynte Geshur hae ram abalyn³(Izip nithua lang umpaw Shihor vawkhu kyate thahlang umpaw Ekron ramri kyacia, Ekron tuh Kanaan hae lante riabia athua; te Filistin uktu hae lu pangaw tuh Gaza, Ashdod, Ashkelon, Gath te Ekron nynh thua hae),⁴alia lang tuh Kanaan hae ram abalyn, Sidon hae ram athuapaw Mearah, Amor hae ramri Afek kyacia,⁵Gebal hae ram te nithua lang e Lebanon ram abalyn, Hermon mua kaw umpaw Baal-gad kyate Lebo-hamath khua kyacia,⁶muaram kya um hae paw abalyn, Lebanon mua kyate Misrefoth-maim kyacia, Sidon hae abalyn. Kamaw ccaccei nynh Israel hae malang kyate ka dee cih hae; kaw kae pya vae hawte ram tuh Israel hae kha nee hae.⁷Tukeiccuze atu tuh hynh-e ram hynh Israel hae phin takua te Manasseh phin angankuh hae kha rho lang nee hae,” a cipya. Jordan Nithua lang Ram

⁸Reuben phin, Gad phin te ccangpaw Manasseh phin angankuh hae nynh Moses nynh a pya hae paw mih rho, Jordan khuraw nithua lang kha a ccou hae, Bawipaw ryalahtu Moses nynh a pya hae thyhte:⁹Arnon Vaw kin kya umpaw Aroer khua kyate tuh-e vahue ngaelung umpaw khua, Medeba bialae abalynte Dibon kyacia;¹⁰te Heshbon khua a uktupaw Amor hae siapharan Sihon kya-e khua hae abalyn, Ammon hae ramri kyacia;¹¹Gilead ram, Geshur hae te Maakath hae ram, Hermon Mua abalyn, Bashan ram abalynte Salekah kyacia;¹²Ashtaroth khua te Edrei khua a uktupaw Bashan siapharan Og nynh a peenaw abalyn (Refaim minphuin hae kyaze amaw rou hynh nynh a hiinhy vae); e hae hynh Moses nynh tae hae zah a dee hae.¹³Tuhzemah Israel hae nynh Geshur hae te Maakath hae kha dee khyh hae; Geshur te Maakath tuh Israel hae kya atunin cia a um hae.

¹⁴Moses nynh Levi phin kyalya kha nynh rho pyabua khyh; Bawipaw , Israel Pachia kalan maee-ute silawnawpaw hae tuh Bawipaw nynh a hopya hae thyhte mih rho nynh thua. Reuben Ram

¹⁵Te Moses nynh Reuben phin hae kha mih puizia hae thyhte rho a pya hae.¹⁶Mih ram tuh Arnon Vaw kin umpaw Aroer khua, tuh-e vahue ngaelung umpaw khua te Medeba pe umpaw bialae abalyn;¹⁷Heshbon te bialae um hae paw a khua hae abalyn, Dibon khua, Bamoth-baal khua, Beth-baal-meon khua,¹⁸Jahaz khua, Kedemoth khua, Mefaath khua,¹⁹Kiriathaim khua, Sibmah khua, mua vaw bialae kya umpaw Zereth-shahar khua,²⁰Beth-peor khua, Pisgah apandaw hae, Beth-jeshimoth khua,²¹tuh-e hae tuh abialaenaw umpaw khua hae abalynte Heshbon khua a uktupaw, Amor siapharan Sihon a peenaw abalyn nynh thua. Moses nynh Sihon te a ram kya um hae paw Midia hae a cciakhaetu hae Evi, Rekem, Zur, Hur te Reba kha a tae hae, hynh-e cciakhaetu hae tuh tuin ram e Sihon kuihkaw um hae paw bawi hae nynh thua.²²Israel hae nynh a chia hae paw kyaze Beor ccapaw Balaam, naawthyapaw kha mah thaloi te a chiabua hae.²³Reuben phin hae ramri tuh Jordan vaw te a vahue kha nynh thua. E hynh Reuben phin hae nynh mih puizia hae thyhte a ccou hae paw khuapi hae te khua taraw hae nynh thua. Gad Ram

²⁴Te Moses nynh Gad phin hae kha mah mih puizia hae thyhte rho a pya hae.²⁵Mih ram tuh Jazer khua te Gilead ram e khua hae abalynte, Ammon hae ram angankuh, Rabbah nithua lang umpaw Aroer khua kyacia,²⁶Te Heshbon khua kyate Ramath-mizpeh khua te Betonim khua kyacia, te Mahanaim khua kyate Debir ram kyacia,²⁷te Jodan vahue kya umpaw Beth-haram khua, Beth-nimrah khua, Sukkoth khua te Zafon khua, Heshbon siapharan Sihon a peenaw kya-e alaepaw ram; Jordan vaw te a vahue, Khinnereth Rili alia lang athangnaw kyacia, Jordan vaw khuraw nithua lang nynh thua.²⁸E tuh Gad phin hae nynh mih puizia thyhte a ccou hae paw khuapi hae te khua taraw hae nynh thua. Manasseh Phin Angankuh kya-e Ram

²⁹Te Moses nynh Manasseh phin angankuh kha rho a pya hae; Manasseh phin angankuh tuh mih puizia thyhte rho nee athua hae.³⁰Mih ram tuh Mahanaim kyate Bashan ram abalyn, Bashan siapharan Og a peenaw abalyn, Bashan ram kya umpaw Jair khua hae abalyn khua sung taruh,³¹Gilead ram angankuh, Bashan ram kyaze Og a peenaw kya umpaw Ashtaroth khua te Edrei khua; e ram hae hynh Manasseh ccapaw Makhir ciihan hae—Makhir hae angankuh kha—mih puizia hae thyhte nee athua hae.

³²E rho hae tuh Moses nynh Jordan khuraw Jeriko khua nithua lang, Moab bialae kya a nee hae paw rho hae nynh thua.³³Thuasalama Moses nynh Levi phin hae kha rho pya khyh hae; minmin kha Bawipaw nynh a hopya hae thyhte Bawipaw , Israel Pachia tuh mih rho nynh thua. Jordan Niccaw lang Ram Neenaw

¹E rho hae tuh ranpibawi Eleazar, Nun ccapaw Joshua te Israel phin hae kyaze puizia hae kya-e cciakhaetu hae nynh Israel hae a nee hae paw rho hae nynh thua.²Bawipaw nynh Moses kya kaw a pya thyhte, phin takua te angankuh hae nynh ccungthydung te rho kha a ccou hae.³Pawccecize Moses nynh phin ning te angankuh hae tuh Jordan khuraw kha rho lang a pya vae hae; thuasalama minmin laku e Levi phin hae kha tuh rho pya khyh hae.⁴Josef ciihan kyakhe Manasseh phin te Efraim phin cite phin ning a um hae; Levi hae tuh mih hanpaw ram kha pyabua thua khyh hae, thuasalama umnawpaw khua hae te mih sahiin hae hanlan rampaeekunaw kyalya kha pya athua hae.⁵Bawipaw nynh Moses kya kaw a pya thyhte, Israel hae nynh a cyi hae, te ram tuh a neeku hae. Hebron kha Kaleb A Pya hae

⁶Te Judah hae tuh Gilgal khua umpaw Joshua kalan oun cceih hae zah Keniz phin kya-e Jefunneh ccapaw Kaleb nynh Joshua kha, “Bawipaw nynh Pachia ccungccapaw Moses kha Kadesh-barnea kyakhe nang te kae ka konglang a hopyapaw kha phe na ny vae.⁷E ram hynh dophi khylan Bawipaw ryalahtu Moses nynh Kadesh-barnea kyate kae yn saw lya tuh kum sung pali nynh ka cih ung; ka thinlung kya a um thathyhte amaw kalan bya kha ka phupya.⁸Thuasalama kae cceihkheih hae paw ka uno hae nynh ccungccaw hae kha mih lung a rosah hae; tuhzemah kae nynh tuh Bawipaw ka Pachia kha ka thinlung balynte ka zui.⁹Te tuin nin khe Moses nynh byakinkuh zah, ‘Nang nynh Bawipaw ka Pachia kha na thinlung balynte na zui keiccuze, na ccu nynh a sypaw ram tuh nang te na ciihan hae hanlan rho lang zungzae a tang ccaccing cih,’ a ci.¹⁰Te atu, na ny vae hawte, Israel hae nynh ramkaw kya a khiaku lya hae ze, Bawipaw nynh Moses kha hynh-e bya a hopya lya ccyh kyate kum sung pali kum pangaw lungkhu, Bawipaw nynh a la ho thyhte yn hiinsah; te atunin tuh kum sung tarya kum pangaw ka cih vae.¹¹Moses nynh yn saw nin lya ka thawsae hawte atunin mah ka thawsae ung; rhawtuknaw elang te ccia bungthungnaw elang atu ka thawzung tuh khah lya-e ka thawzung hawmawte nynh athua ung.¹²Tukeiccuze khah nin lyaze Bawipaw nynh a hopaw muaram tuh atu yn pyatua; tuin kya Anak hae a um hae cipaw te akoihkuhpaw khua lepaw hae a um cipaw tuh khah lyaze phe na thae vae; Bawipaw nynh a ho hawte, Bawipaw nynh yn umkhae zetuh minmin kha ka dee kho hae,” a cipya.

¹³Tetuh Joshua nynh hythuapya zah Jefunneh ccapaw Kaleb kha Hebron khua tuh rho lang a pya.¹⁴Tukeiccuze Kaleb nynh Bawipaw , Israel Pachia kha a thinlung balynte a zui keiccuze Hebron khua tuh Keniz phin Jefunneh ccapaw Kaleb rho lang atunin cia a tang.¹⁵Langmaw lyaze Hebron khua a min tuh Kiriath-arba nynh thua; e Arba tuh Anak hae kyaze alesae huapaw ccungccaw nynh a la thua. Te ram tuh rhawtuknaw adae vae. Judah Ram

¹Judah phin hae nynh ccungthydungte mih puizia thyhte a ccou hae paw ram tuh alia lang Edom ramri, alia lang adianaw Zin ramkaw cia a thua.²Alia lang ramri tuh Rili Chih adianaw, alia lang a hawipaw rili akouleihnaw kyate³Akrabbim cciathungnaw alia lang khate po cceih zah Zin khua cia a thua, te Kadesh-barnea alia langkhe a cceihthung, Hezron khua pe kya Addar khua cia a cceihthung, te Karka khua langkhe a maekuh,⁴Azmon khua lang po cceih koute Izip Vaw kalan po pou zah rili kyakhe athang. E hynh alia lang e nae ramri nynh thua.⁵Te nithua lang e ramri tuh Rili Chih thua zah Jordan vaw accungkunaw cia a thua. Te thahlang e ramri tuh Jordan vaw accungkunaw, rili akouleihnaw kyate atho;⁶te ramri tuh Beth-hoglah langkhe cceihthung zah Beth-arabah thahlang kya po a cceih; te ramri tuh Reuben ccapaw Bohan Lung kyacia a cceihthung.⁷Te ramri tuh Akhor Accya kyate Debir khua cia a cceihthung; tukoute thahlang cceih zah accya alia langsang umpaw Adummim kaethungnaw te ahawiliakuhpaw Gilgal khua langkhe a maekuh; te ramri tuh En-shemesh tuili kya po cceih zah, Enrogel tuidy kya athang;⁸te ramri tuh Jebus hae umnaw apandaw alia lang (tuh-e tuh Jerusalem nynh thua) kya Hinnom ccapaw kya-e accya langkhe a cceihthung; te ramri tuh niccaw lang, Refaim accya thahlang athangnaw kya umpaw Hinnom accya te ahawiliakunaw umpaw mua dung cia a cceihthung;⁹te ramri tuh mua dung kyate Neftoah Tuidy aphyhnaw cia cceih zah, tuin kyate Efron Mua e khua hae kyacia a cceih, te ramri tuh Baalah (tuh-e tuh Kiriath-jearim nynh thua) langkhe a kouleih,¹⁰te ramri tuh Baalah khua niccaw langkhe kouleih zah Seir Mua langkhe a cceih, Jearim Mua (tuh-e tuh Khesalon nynh thua) apannaw thahlang khe po cceih zah Beth-shemesh khua lang a cceihbung, te Timmah pe kya po a cceih;¹¹te ramri tuh Ekron khua thahlang e sangpyng apannaw langkhe a cceihthung, tukoute Shikkeron langkhe kouleih zah Baalah Mua lang po cceih koute Jabneel khua kya a thua; te ramri tuh rili kya athang.¹²Te niccaw lang e ramri tuh Mediterranean rili te a vahue nynh thua. E hynh Judah phin hae mih puizia thyhte, po avoilupaw ramri nynh thua. Kaleb nynh A Hanpaw A Law (Bpt 1.11-15)

¹³Bawipaw nynh Joshua kya kaw a pya thyhte, Joshua nynh Judah hae laku e Jefunneh ccapaw Kaleb a hanpaw Hebron khua cikuhpaw Kiriath-arba kha a pya, (Arba tuh Anak a paaw nynh thua)¹⁴Te Kaleb nynh tuin kyate Anak ccapaw hae lu thum: Sheshai, Ahiman te Talmai, Anak ciihan hae kha a dee hae.¹⁵Tuin kyate Debir khua kya um hae paw kha dou lan a ccianua thung hae; langmaw lyaze Debir a min tuh Kiriath-sefer acikuh.¹⁶Kaleb nynh, “Kiriath-sefer khua kha tuk zah a taepaw tuh ka ccanung Aksah hynh zu lang ka pya cih,” a ci.¹⁷Te Kaleb neitaw Kenaz ccapaw Othniel nynh tae zah, Kaleb nynh a ccanung Aksah kha zu lang a pya.¹⁸Aksah nynh Othniel kya he a thua te, a paaw kha loo lookheit na ngia cih cite Othniel kha a hopya. Aksah tuh lann tungvaw te he a rung te, Kaleb nynh, “Pawmou na ry?” cite a khia.¹⁹Aning nynh, “Lasung ccangkheit beih yn pya; Negeb ram kya nae nung keiccuze tuisung hae kha mah yn pyabia,” a cipya. Tukeiccuze Kaleb nynh thahlang tuisung hae te alia tuisung hae kha a pya. Judah Khua hae

²⁰Judah phin hae nynh mih puizia hae thyhte a ccou hae paw rho tuh e hae hynh nynh thua.²¹Edom ramri lang, Alia lang kou kya Judah phin hae nynh a hoi hae paw khua hae tuh Kabzeel, Eder, Jagur,²²Kinah, Dimonah, Adadah,²³Kedesh, Hazor, Ithnan,²⁴Zif, Telem, Bealoth,²⁵Hazor-hadattah, Kerioth-hezron (tuh-e tuh Hazor nynh thua),²⁶Amam, Shema, Moladah,²⁷Hazar-gaddah, Heshmon, Bethpelet,²⁸Hazar-shual, Beersheba, Biziothiah,²⁹Baalah, Iim, Ezem,³⁰Eltolad, Khesil, Hormah,³¹Ziklag, Madmannah, Sansannah,³²Lebaoth, Shilhim, Ain te Rimmon; mih khua taraw hae ryte abalynte khua kuin lae takua acih.

³³Te laelung anenaw kyaze Eshtaol, Zorah, Ashnah,³⁴Zanoah, En-gannim, Tappuah, Enam,³⁵Jarmuth, Adullam, Sokoh, Azekah,³⁶Shaaraim, Adithaim, Gederah, Gederothaim; mih khua taraw hae ryte khua haw lae pali acih.

³⁷Zenan, Hadashah, Migdal-gad,³⁸Dilan, Mizpah, Jokthe-el,³⁹Lakhish, Bozkath, Eglon,⁴⁰Kabbon, Lahmam, Khitlish,⁴¹Gederoth, Beth-dagon, Naamah te Makkedah; mih khua taraw hae ryte khua haw lae taruh acih.

⁴²Libnah, Ether, Ashan,⁴³Iftah, Ashnah, Nezib,⁴⁴Keilah, Akhzib, te Mareshah; mih khua taraw hae ryte khua takua acih.

⁴⁵Ekron khua te a pepan e khua hae te khua taraw hae ryte,⁴⁶Ekron kyate rili kyacia, Ashdod khua te anaekuh hae paw abalyn, mih khua taraw hae ryte.

⁴⁷Ashdod khua te a pepan e khua hae te khua taraw hae; Gaza khuapi te a pepan e khua hae te khua taraw hae; Izip Vaw, Rili Lepaw te a vahue hae kyacia.

⁴⁸Te muaram kyaze Shamir, Jattir, Sokoh,⁴⁹Dannah, Kiriath-sannah (tuh-e tuh Debir nynh thua),⁵⁰Anab, Eshtemoth, Anim,⁵¹Goshen, Holon te Giloh; mih khua taraw hae ryte khua haw lae kheit acih.⁵²Arab, Dumah, Eshan,⁵³Janim, Beth-tappuah, Afekah,⁵⁴Humtah, Kiriath-arba (tuh-e tuh Hebron nynh thua) te Zior; mih khua taraw hae ryte khua takua acih.

⁵⁵Maon, Karmel, Zif, Juttah,⁵⁶Jezreel, Jokdeam, Zanoah,⁵⁷Kain, Gibeah te Timnah; mih khua taraw hae ryte khua haw acih.

⁵⁸Halhul, Beth-zur, Gedor,⁵⁹Maarath, Beth-anoth te Eltekon; mih khua taraw hae ryte khua taruh acih.

⁶⁰Kiriath-baal (tuh-e tuh Kiriath-jearim nynh thua) te Rabbah; mih khua taraw hae ryte khua ning acih.⁶¹Ramkaw kya, Beth-arabah, Middin, Sekakah,⁶²Nibshan, Loi Khua te En-gedi; mih khua taraw hae ryte khua taruh acih.

⁶³Thuasalama Judah hae nynh Jerusalem khua kya um hae paw Jebus hae kha dee kho khyh hae; tukeiccuze Jebus hae tuh Judah hae ryte Jerusalem kya atunin cia a umkheih hae. Efraim Ram

¹Josef ciihan hae nynh ccungthydungte a ccou hae paw ram tuh Jeriko khua pe Jordan vawkhu kin umpaw Jeriko tuili nithua lang kyate ramkaw langkhe a tee, te Jeriko kyate muaram lang Bethel khua cia a cceihthung;²tukoute Bethel kyate Luz lang cceih zah Arki hae ram e Ataroth khua lang po a thua;³te niccaw lang cceihbung zah Jaflet hae ram lang Alia Beth-horon khua cia a thua; te Gezer lang po cceih zah rili kya athang.

⁴Josef ciihan hae Manasseh te Efraim nynh mih rho kha a ccou hae.

⁵Efraim phin hae nynh mih puizia thyhte a ccou hae paw ram tuh akaw lang thyhte nynh thua: nithua lang te mih rho ramri tuh Ataroth-addar kyate Palung Beth-horon kyacia a thua;⁶te ramri tuh tuin kyate rili langkhe a cceihbung; thahlang ramri tuh Mikmethath khua nynh thua; nithua lang ramri tuh Taanath-shiloh khua langkhe bua kouleih zah, tuh-e khua he a khung te nithua lang Janoah lang a cceih,⁷te Janoah kyate Ataroth te Naarah kyacia cceihbung zah Jeriko khua a thua koute Jordan vaw khe athang.⁸Tappuah khua kyate ramri tuh niccaw langkhe Kanah Vaw lang po cceih zah rili kya athang. Tuhcite Efraim phin hae nynh mih puizia thyhte ram kha a ccou hae.⁹Manasseh ram lungkhu khe Efraim hae hanlan a nung hae paw khua hae balyn tuh mih khua taraw hae ryte Efraim hae nynh a ccou hae.¹⁰Thuasalama Gezer kya um hae paw Kanaan hae kha minmin nynh dee khyh hae; tukeiccuze Kanaan hae tuh Efraim hae kyakhe atunin cia a umbua hae, thuasalama riasepaw rya kha a lawsah hae. Ccangpaw Manasseh Phin Angankuh

¹Te Manasseh tuh Josef a ccatawccaw athua keiccuze ccungthydungte Manasseh phin kha ram a pya hae. Manasseh a ccatawccaw Makhir, Gilead a paaw tuh rhawkaw athua keiccuze Gilead ram te Bashan ram kha a pya hae.²Te tuhlaepaw Manasseh phin hae tuh mih puizia thyhte, Abiezer, Helek, Asriel, Shekhem, Hefer te Shemida kha ccungthydungte a nee hae; e hae tuh mih puizia thyhte Josef ccapaw Manasseh ciihan pise hae nynh thua hae.

³Manasseh ccapaw Makhir, Makhir ccapaw Gilead, Gilead ccapaw Hefer, Hefer ccapaw Zelofehad tuh ccapaw saah khyh, ccanung hae kyalya nynh a saah; a ccanung hae min tuh: Mahlah, Noah, Hoglah, Milkah te Tirzah nynh thua hae.⁴Minmin nynh ranpibawi Eleazar, Nun ccapaw Joshua te cciakhaetu hae kalan oun cceih hae zah, “Kaening hynh kae puizia pise hae ryte rho pyabua lan Bawipaw nynh Moses kha kaw a pya,” a cipya hae. Tukeiccuze Bawipaw kawbya thyhte mih paaw uno hae ryte rho kha a pyabua hae.⁵Tuhcite Jordan khuraw lang umpaw Gilead ram te Bashan ram kha hobia leite, Manasseh nynh pum haw kha a ccou;⁶pawccecize Manasseh a ccanung hae nynh a ccapaw hae ryte rho kha a ccoubua vae hae. Gilead ram tuh ccangpaw Manasseh phin hae nynh a ccou hae.

⁷Manasseh ram tuh Asher kyate Shekhem nithua lang umpaw Mikmethath kyacia a thua, te ramri tuh alia lang En-Tappuah hae umnaw cia a thua.⁸Tappuah ram tuh Manasseh kya-e nynh thua, thuasalama Manasseh ramri kya umpaw Tappuah khua tuh Efraim ciihan hae kya-e nynh thua.⁹Te ramri tuh Kanah Vaw langkhe a cceihbung. E vaw kyate alia lang e Manasseh khua hae kya umpaw khua hae tuh Efraim kya-e nynh thua. Te Manasseh ramri tuh tuh-e vaw thahlang khe po cceih zah rili kyakhe athang.¹⁰Alia lang e ram tuh Efraim ram thua zah thahlang e ram tuh Manasseh ram nynh thua, ramri tuh rili nynh thua, thahlang tuh Asher ram cia thua zah, nithua lang tuh Issakhar ram kyacia a thua.¹¹Te Issakhar ram te Asher ram lungkhu hin, Beth-shean khua te a khua taraw hae, Ibleam khua te a khua taraw hae, Dor khua te a khua taraw hae kya um hae paw, Endor khua te a khua taraw hae kya um hae paw, Taanak khua te a khua taraw hae kya um hae paw, Megiddo khua te a khua taraw hae kya um hae paw tuh Manasseh kya-e nynh thua hae; (ccangthumnaw tuh Nafath nynh thua).¹²Tuhzemah Manasseh ciihan hae nynh tuh-e khua hae tuh ccou kho khyh hae; Kanaan hae tuh tuh-e ram kya po um hae.¹³Thuasalama Israel hae nynh mih thawzung he yn um tuh, Kanaan hae kha riasepaw rya a lawsah hae, thuasalama marya te tuh dee kou khyh hae. Josef Phin nynh Byalungnaw

¹⁴Te Josef phin hae nynh Joshua kha, “Kaening tuh Bawipaw nynh hythua oun pya zah milu myarya kae lung vae, pawccemou pum kheit, ram kheit kyalya hynh rho lang nae pya?” a cipya hae.¹⁵Te Joshua nynh minmin kha, “Nanning tuh milu myarya na lung oh zah, Efraim kya-e muaram tuh nae hanlan eih aby lanze, Periz hae te Refaim hae ram umpaw tuhpi kalan khuin la cceihthung oh lah, la vawkuh oh,” a cipya hae.¹⁶Josef phin hae nynh, “Muaram tuh kae hanlan zaw khyh; Beth-shean khua te a khua taraw hae kya um hae paw te Jezreel Accya te a khua taraw hae kya um hae paw Kanaan hae balyn tuh sivaw marangle a hoi hae,” a cipya hae.¹⁷Te Joshua nynh Josef ciihan athua hae paw Efraim phin te Manasseh phin hae kyakhe, “Nanning tuh milu na lung ccaccing oh zah thawzung myarya na hoi oh; nae hanpaw ccangkheit kyalya tetuh na ccou lan khyh oh,¹⁸muaram tuh nae kya-e athua cih, tuhpi athua zemah na vawkuh cih oh zah ramri adianaw kyacia na ccou cih oh; Kanaan hae tuh sivaw marangle hoi hae zah athung hae zemah na dee cih oh,” a cipya hae. Tuhlaepaw Phin hae Ram

¹Te Israel zapi hae balyn tuh Shiloh khua kya pumkuh hae zah, tungkunaw bu kha a sak hae; ram tuh a tae vae hae.

²Israel hae kyakhe rho a neebua loh lei hae paw phin sari a um ung hae.³Tukeiccuze Joshua nynh Israel hae kha, “Bawipaw , nae minpaaw hae Pachia nynh ae pya oh paw ram lang tee lan zah ccou lanpaw kha hohseciamou na sawphahkuh ung cih oh?⁴Phin kheit kyate lu thum cci oun popah oh lah, ka saw cih hae, minmin nynh ram phe lekuh lan a cceih cih hae zah, mih hanpaw rho kha a muih hae thyhte a zei cih hae zah, ka kalan oun thuakhae cih hae.⁵Minmin nynh ram kha ccangsari lang a ia cih hae, Judah hae tuh alia lang e mimaw ram kya a um cih hae zah, Josef ciihan hae tuh thahlang e mimaw ram kya a um cih hae.⁶Ram kha ccangsari lang iate na zei cih oh zah, tuh-e na zei oh paw tuh ka kalan nae thuakhae cih oh; te Bawipaw ah Pachia malang kya nae hanlan ccungthy kae dungsah cih oh.⁷Levi phin hae tuh nanning kya mih hanpaw hoibua khyh hae, pawccecize Bawipaw kya-e ranpibawi thuanaw tuh mih rho nynh thua; te Gad, Reuben te Manasseh phin angankuh hae tuh Bawipaw ryalahtu Moses nynh a pya hae paw, Jordan nithua lang e mih rho kha a ccou vae hae,” a cipya hae.

⁸Te tuh-e ccungccaw hae tuh a thokuh hae; ram konglang zei lan a cceih hae paw kha Joshua nynh, “Ram lungkhu phe lekuh lan la cceih oh lah, ram konglang nae zei cih oh zah, ka kalan nae ki cih oh; te Shiloh kya Bawipaw malang khe nae hanlan ccungthy kae dungsah cih oh,” a cipya hae.⁹Tukeiccuze tuh-e ccungccaw hae nynh ram lungkhu phe lekuh lan cceih hae zah, akhua khua te ccangsari lang a ia hae paw ram konglang tuh ccauh kya a zei hae; te Shiloh khua ryahmin kya umpaw Joshua kalan a ki hae,¹⁰Shiloh khua kya Bawipaw malang khe Joshua nynh ccungthy a dungsah hae; Joshua nynh Israel hae kha ram tuh mih hanpaw raveihte a nee hae. Benjamin Ram

¹¹Benjamin phin hae nynh ccungthydung hae zah mih puizia thyhte a ccou hae paw ram tuh Judah phin te Josef phin laku khe nynh a um.¹²Thahlang e mih ramri tuh Jordan kyate tho zah thahlang umpaw Jeriko apannaw kalan a cceihthung, te niccaw langkhe muaram kya po cceih zah, Beth-aven ramkaw kya athang.¹³Tuin kyate ramri tuh Luz langkhe alia lang po cceih zah Luz (tuh-e tuh Bethel nynh thua) apannaw kya a thua, tukoute ramri tuh Alia Beth-horon khua alia lang umpaw mua vawlan e Ataroth-addar khua cia a cceihbung.¹⁴Te ramri tuh ccanglang maekuh zah niccaw ramri lang a tang. Beth-horon alia lang umpaw mua kyate alia lang cceih zah Kiriath-baal khua kya athang (tuh-e tuh Kiriath-jearim khua nynh thua), tuh-e khua tuh Judah phin hae kya-e nynh thua. E hynh niccaw lang e ramri nynh thua.¹⁵Te alia lang ramri tuh Kiriath-jearim athangnaw kyate tho zah, tuin kyate Efron langkhe Neftoah Tuidy aphyhnaw cia a thua,¹⁶te ramri tuh Refaim accya thahlang athangnaw kya umpaw Hinnom ccapaw kya-e accya te ahawiliakuhpaw mua leihpaw langkhe a cceihbung; te Jebus hae umnaw apannaw alia lang umpaw Hinnom accya khe cceihbung zah, Enrogel cia a cceihbung;¹⁷te thahlang khe maekuh thung zah En-shemesh kyacia a thua, tuin kyate Adummim kaethungnaw te ahawiliakuhpaw Geliloth khua langkhe a cceih; te Reuben ccapaw Bohan Lung langkhe a cceihbung;¹⁸te Beth-arabah apannaw thahlang khe po cceih zah, Arabah khua lang a cceihbung;¹⁹te ramri tuh Beth-hoglah apannaw thahlang khe po cceih zah, Rili Chih te thahlang rili akouleihnaw, Jordan vaw alia lang athangnaw kyakhe athang. E hynh alia lang e ramri nynh thua.²⁰Jordan tuh nithua lang e ramri nynh thua. E hynh Benjamin phin hae nynh mih puizia thyhte, ramri nynh po a voilu lante a ccou hae paw ram nynh thua.

²¹Benjamin phin hae nynh mih puizia thyhte a ccou hae paw khua hae tuh Jeriko, Beth-hoglah, Emek-keziz,²²Beth-arabah, Zemaraim, Bethel,²³Avvim, Parah, Ofrah,²⁴Khefar-ammoni, Ofni te Geba—mih khua taraw hae ryte khua haw lae ning acih;²⁵Gibeon, Ramah, Beeroth,²⁶Mizpeh, Khefirah, Mozah,²⁷Rekem, Irpeel, Taralah,²⁸Zela, Haelef, Jebus (tuh-e tuh Jerusalem nynh thua), Gibeah te Kiriath-jearim—mih khua taraw hae ryte khua haw lae pali acih. E hynh Benjamin phin hae nynh mih puizia thyhte a ccou hae paw ram nynh thua. Simeon Ram

¹Ccangningnaw ccungthydungnaw tuh Simeon hanlan te Simeon phin hanlan mih puizia thyhte yn pou; mih hanpaw ram tuh Judah phin kya-e ram lungkhu khe nynh a um.²Mih hanpaw ram kya umpaw khua hae tuh Beersheba, Sheba, Moladah,³Hazar-shual, Balah, Ezem,⁴Eltolad, Bethul, Hormah,⁵Ziklag, Beth-markaboth, Hazar-susah,⁶Beth-lebaoth, te Sharuhen—mih khua taraw hae ryte khua haw lae thum acih;⁷Ain, Rimmon, Ether te Ashan—mih khua taraw hae ryte khua pali acih;⁸e khua hae po voilu lan um hae paw mih khua taraw hae balyn tuh Baalath-beer, Negeb ram e Ramah kyacia. E hynh Simeon phin hae nynh mih puizia thyhte a ccou hae paw ram nynh thua.⁹Simeon phin nynh a ccoupaw ram tuh Judah ram kya a umbua; Judah phin nynh a ccoupaw ram tuh mih hanlan eih ale keiccuze mih ram lungkhu khe Simeon phin nynh ram kha a ccoubua hae. Zebulun Ram

¹⁰Ccangthumnaw ccungthydungnaw tuh Zebulun phin hanlan mih puizia thyhte yn pou. Mih ramri tuh Sarid kyacia a thua;¹¹te mih ramri tuh niccaw langkhe cceihthung zah Maralah lang po a cceih, Dabbesheth kha tung zah Jokneam nithua lang umpaw vaw kalan a cceih;¹²te ramri tuh Sarid kyate nithua lang cceih zah Khisloth-tabor ramri cia a thua; tuin kyate Deberath lang cceih zah Jafia cia a cceihthung;¹³tuin kyate nithua langkhe po cceih zah Gath-hefer, Eth-kazin kyacia a thua, te Rimmon lang cceih zah Neah langkhe a kouleih;¹⁴te thahlang ramri tuh Hannathon langkhe maekuh zah Iftah-el accya kya athang;¹⁵te Kattath, Hahalal, Shimron, Idalah, te Bethlehem—mih khua taraw hae ryte khua haw lae ning acih.¹⁶E khua hae te mih khua taraw hae tuh Zebulun phin nynh mih puizia thyhte a ccou hae paw ram nynh thua. Issakhar Ram

¹⁷Ccangpalinaw ccungthydungnaw tuh Issakhar hanlan mih puizia thyhte yn pou.¹⁸Mih ram kyakhe Jezreel, Khesulloth, Shunem,¹⁹Hafaraim, Shion, Anaharath,²⁰Rabbith, Kishion, Ebez,²¹Remeth, En-gannim, En-haddah te Beth-pazzez khua hae a um hae,²²ramri tuh Tabor, Shahazumah, te Beth-shemesh kya thua zah, Jordan kya athang—mih khua taraw hae ryte khua haw lae taruh acih.²³E khua hae te mih khua taraw hae tuh Issakhar phin hae nynh mih puizia thyhte a ccou hae paw ram nynh thua. Asher Ram

²⁴Ccangpangawnaw ccungthydungnaw tuh Asher phin hanlan mih puizia thyhte yn pou.²⁵Mih ram lungkhu kya Helkath, Hali, Beten, Akhshaf,²⁶Allammelek, Amad te Mishal khua hae a um hae; ramri tuh niccaw langkhe Karmel te Shihor-libnath khua cia phe a thua,²⁷nithua lang maekuh zah Beth-dagon langkhe cceih zah Zebulun te Iftah-el accya kya a thua, thahlang khe Beth-emek te Neiel lang a cceih; te thahlang po cceih zah Kabul,²⁸Ebron, Rehob, Hammon, Kanah te Sidon Lepaw kyacia a thua;²⁹te ramri tuh Ramah langkhe maekuh zah akoihkuhpaw Tair khuapi kya a thua; te ramri tuh Hosah lang maekuh zah rili kya athang; Mahalab, Akhzib,³⁰Ummah, Afek te Rehob—mih khua taraw hae ryte khua kuin lae ning acih.³¹E khua hae te mih khua taraw hae tuh Asher phin hae nynh mih puizia thyhte a ccou hae paw ram nynh thua. Naftali Ram

³²Ccangtaruhnaw ccungthydungnaw tuh Neftali phin hanlan mih puizia thyhte yn pou.³³Mih ramri tuh Helef te Zaanannim kya umpaw phaesi ku, Adami-nekeb te Jabneel kyate tho zah Lakkum cia a thua, te Jordan kya athang;³⁴te ramri tuh niccaw langkhe Aznoth-tabor kyacia a maekuh, tuin kyate Hukkok lang cceih zah alia lang umpaw Zebulun a thua, niccaw langkhe Asher, nithua langkhe Judah ram Jordan vawkhu cia a thua.³⁵Akoihkuhpaw khua hae tuh Ziddim, Zer, Hammath, Rakkath, Khinnereth,³⁶Adamah, Ramah, Hazor,³⁷Kedesh, Edrei, En-hazor,³⁸Ziron, Migdal-el, Horem, Beth-anath te Beth-shemesh—mih khua taraw hae ryte khua haw lae takua acih.³⁹E khua hae te mih khua taraw hae tuh Naftali phin nynh mih puizia thyhte a ccou hae paw ram nynh thua. Dan Ram

⁴⁰Ccangsarinaw ccungthydungnaw tuh Dan phin hanlan mih puizia thyhte yn pou.⁴¹Mih ram lungkhu kya Zorah, Eshtaol, Ir-shemesh,⁴²Shaalabbin, Aijalon, Ithlah,⁴³Elon, Timnah, Ekron,⁴⁴Eltekeh, Gibbethon, Baalath,⁴⁵Jehud, Bene-berak, Gath-rimmon,⁴⁶Mejarkon, Rakkon te Joppa te arawsekunaw ram tuh a um hae.⁴⁷Dan phin hae nynh mih ram kha he a shung hae tuh, Leshem khua kha ccianua thung hae zah a tuk hae, tuh-e khua tuh lah hae zah thaloi te a theih kou hae te, tuin kya khua a sah hae; mih minpaaw Dan min kha lah hae zah Leshem khua tuh Dan khua a ci hae.⁴⁸E khua hae te mih khua taraw hae tuh Dan phin hae nynh mih puizia thyhte a ccou hae paw ram nynh thua. Joshua Rho

⁴⁹Israel hae nynh ram patae kha rho lang he a neekuh kou hae te, Nun ccapaw Joshua kha rho a pyabua hae.⁵⁰Joshua nynh a ngiapaw khua, Efraim muaram kya umpaw Timnath-serah khua kha Bawipaw kawpyanaw thyhte a pya hae; aning nynh tuh-e khua tuh raethui zah a umnaw.

⁵¹E hynh ranpibawi Eleazar, Nun ccapaw Joshua te Israel phin hae kyaze puizia hae kya-e cciakhaetu hae nynh Shiloh khua kya Bawipaw malang, tungkunaw bu thuakaw kya ccungthydungte a nee hae paw rho hae nynh thua. Tuhcite ram neekunaw tuh a thangsah hae. Khynnaw Khuapi hae (Nam 35.9-34)

¹Bawipaw nynh Joshua kyakhe,²“Israel ccungccaw hae kha, ‘Moses kyate nanning kae hopya oh paw khynnaw khua hae kha rae oh,³tuhteze nynh tuaku ty leite ccungccaw a theihseipaw nynh tuh-e khua langkhe a ccue cih; tuh-e khua hae tuh nae hanlan chiise phulahtu kuih kyate khynnawpaw khua lang a tang cih.⁴Ccungccaw theihtu tuh tuh-e khua khuakhakheit langkhe la ccue cih zah, khua koikua teenaw kya a thadyn cih, te tuin khua kya-e piccan hae kyakhe acyikunaw kong kha a hopah cih hae; te minmin nynh khua lungkhu lang a cciakhae cih hae zah, umnaw hmin kha a pya cih hae, te minmin kyatuin a um cih.⁵Te chiise phulahtupaw nynh a deehui lanze, ccungccaw theihtupaw kha ap lan khyh hae, pawccecize a chiapaw a innpaw paw tuh langmaw ze rhawkunaw um leite a chiaseipaw nynh thua.⁶Te ccungccaw theihtupaw tuh zapi malang byapia athua mawlaezung te tuh-e ccyh lya-e ranpibawi lupi a chi mawlaezung tuh tuin khua kya a um cih, tukoute ccungccaw theihtu tuh a ccuetawpaw a khua te a inn langkhe a kithui cih,’ cite hopah hae,” a cipya.

⁷Tukeiccuze Galilee ram, Naftali muaram e Kedesh khua, Efraim muaram e Shekhem khua te Judah muaram e Kiriath-arba (tuh-e tuh Hebron nynh thua) khua kha a po hae.⁸Te Jeriko nithua lang Jordan khuraw langkhe Reuben phin kya-e abialaenaw ram ramkaw kya umpaw Bezer khua, Gad phin kya-e Gilead ram umpaw Ramoth khua te Manasseh phin kya-e Bashan ram kya umpaw Golan khua kha a po hae.⁹E khua hae tuh Israel hae balyn te minmin kya a umbua hae paw ramccang hae hanlan, tuaku ty leite ccungccaw theihseipaw tuh ccungccaw zapi malang byapia athua mawlaezung, chiise phulahtu kuih keiccu a chi khyh nawlan a ccue nawlan cite a po hae paw khua hae nynh thua. Levi Phin kya-e Khuapi hae

¹Te Levi phin kyaze puizia hae kya-e cciakhaetu hae nynh ranpibawi Eleazar, Nun ccapaw Joshua te Israel phin hae kyaze puizia hae kya-e cciakhaetu hae kalan oun cceih hae zah,²Kanaan ram kya umpaw Shiloh khua khe minmin kha, “Kae umnaw lanpaw khua hae te kae sahiin hae hanlan rampaeekunaw tuh kaening elang pya khylan Bawipaw nynh Moses kyate kaw phe pya vae,” a cipya hae.³Tukeiccuze Bawipaw kawpyanaw thyhte Israel hae nynh mih ram lungkhu umpaw akawlan e khua hae te sahiin rampaeenaw kha Levi phin hae a pya hae.

⁴Kohath puizia hae hanlan ccungthydungnaw tuh yn pou. Tukeiccuze ranpibawi Aaron ciihan athua hae paw Levi phin hae nynh ccungthydung hae zah Judah phin, Simeon phin te Benjamin phin hae kyate khua haw lae thum kha a mue hae.

⁵Te a laehy hae paw Kohath ciihan hae nynh Efraim phin, Dan phin te Manasseh phin angankuh kya-e puizia hae kyate ccungthydungte khua haw a mue hae.

⁶Gershon ciihan hae nynh Issakhar phin, Asher phin, Naftali phin te Bashan ram kya umpaw Manasseh phin angankuh hae kya-e puizia hae kyate ccungthydungte khua haw lae thum a mue hae.

⁷Merari ciihan hae nynh mih puizia thyhte Reuben phin, Gad phin te Zebulun phin hae kyate khua haw lae ning kha a mue hae.

⁸Bawipaw nynh Moses kyate kaw a pya hae thyhte e khua hae te sahiin rampaeenaw hae hynh ccungthydungte Israel hae nynh Levi phin hae kha a pya hae.

⁹Levi phin kya umpaw Kohath puizia hae kya-e Aaron ciihan hae nynh Judah phin te Simeon phin hae ram kya-e¹⁰akawlan e khua hae kha a ccou hae, pawccecize ccungthydung hae zah minmin tuh masaty a ccan hae.¹¹Judah muaram kya umpaw Hebron khua a ci hae paw Kiriath-arba khua (Arba tuh Anak paaw nynh thua) te a pepan e sahiin rampaeenaw hae tuh a pya hae.¹²Thuasalama khua pepan e loo hae te khua taraw hae tuh Jefunneh ccapaw Kaleb kha a uccaw lang a pya hae.

¹³Te ranpibawi Aaron ciihan hae tuh ccungccaw theihtu hanlan khynnaw khua athuapaw Hebron khua te a sahiin hae rampaeenaw hae, Libnah khua te a sahiin hae rampaeenaw hae,¹⁴Jattir khua te a sahiin hae rampaeenaw hae, Eshtemoa khua te a sahiin hae rampaeenaw hae,¹⁵Holon khua te a sahiin hae rampaeenaw hae, Debir khua te a sahiin hae rampaeenaw hae,¹⁶Ain khua te a sahiin hae rampaeenaw hae, Juttah khua te a sahiin hae rampaeenaw hae, Beth-shemesh khua te a sahiin hae rampaeenaw hae—e phin ning hae ram lungkhu te khua khuatakua kha pya athua hae.¹⁷Benjamin phin hae ram lungkhu te Gibeon khua te a sahiin hae rampaeenaw hae, Geba khua te a sahiin hae rampaeenaw hae,¹⁸Anathoth khua te a sahiin hae rampaeenaw hae, Almon khua te a sahiin hae rampaeenaw hae—khua khuapali kha pya athua hae.¹⁹Aaron ciihan ranpibawi hae nynh a ccou hae paw khua hae tuh mih sahiin rampaeenaw hae ryte khua abalyn khua haw lae thum acih.

²⁰Levi phin kyaze Kohath puizia hae kya-e a laehypaw Kohath ciihan hae nynh ccungthydungte a ccou hae paw khua hae tuh Efraim phin hae ram lungkhu e nynh thua.²¹Minmin a pya hae paw tuh Efraim muaram kya um zah ccungccaw theihtu hanlan khynnaw khua athuapaw Shekhem khua te a sahiin hae rampaeenaw hae, Gezer khua te a sahiin hae rampaeenaw hae,²²Kibzaim khua te a sahiin hae rampaeenaw hae, Beth-horon khua te a sahiin hae rampaeenaw hae—khua khuapali kha pya athua hae.²³Dan phin hae ram lungkhu te Elteke khua te a sahiin hae rampaeenaw hae, Gibbethon khua te a sahiin hae rampaeenaw hae,²⁴Aijalon khua te a sahiin hae rampaeenaw hae, Gath-rimmon khua te a sahiin hae rampaeenaw hae—khua khuapali kha pya athua hae.²⁵Manasseh phin angankuh hae ram lungkhu te Taanak khua te a sahiin hae rampaeenaw hae, Gath-rimmon khua te a sahiin hae rampaeenaw hae—khua khuaning kha pya athua hae.²⁶Kohath ciihan hae kya-e a laehypaw puizia hae nynh a ccou hae paw khua hae tuh mih sahiin rampaeenaw hae ryte khua abalyn khua haw acih.

²⁷Te Levi puizia hae kya-e Gershon ciihan hae tuh Manasseh phin angankuh hae ram lungkhu te ccungccaw theihtu hae hanlan khynnaw khua thua zah, Bashan ram kya umpaw Golan khua te a sahiin hae rampaeenaw hae, Beeshterah khua te a sahiin hae rampaeenaw hae—khua khuaning kha pya athua hae.²⁸Issakhar phin hae ram lungkhu te Kishion khua te a sahiin hae rampaeenaw hae, Daberath khua te a sahiin hae rampaeenaw hae,²⁹Jarmuth khua te a sahiin hae rampaeenaw hae, En-gannim khua te a sahiin hae rampaeenaw hae—khua khuapali kha pya athua hae;³⁰Asher phin hae ram lungkhu te Mishal khua te a sahiin hae rampaeenaw hae, Abdon khua te a sahiin hae rampaeenaw hae,³¹Helkath khua te a sahiin hae rampaeenaw hae te Rehoh khua te a sahiin hae rampaeenaw hae—khua khuapali kha pya athua hae.³²Naftali phin hae ram lungkhu te ccungccaw theihtu hae hanlan khynnaw khua thua zah Galilee ram kya umpaw Kedesh khua te a sahiin hae rampaeenaw hae, Hammoth-dor khua te a sahiin hae rampaeenaw hae, Kartan khua te a sahiin hae rampaeenaw hae—khua khuathum kha pya athua hae.³³Gershon ciihan hae kya-e puizia hae patae nynh a ccou hae paw khua hae tuh mih sahiin hae rampaeenaw ram ryte khua abalyn khua haw lae thum acih.

³⁴A laehypaw Levi phin hae kya-e Merari puizia hae hanlan pyapaw khua hae tuh Zebulun phin hae ram lungkhu te Jokneam khua te a sahiin hae rampaeenaw hae, Kartah khua te a sahiin hae rampaeenaw hae,³⁵Dimnah khua te a sahiin hae rampaeenaw hae, Nahalal khua te a sahiin hae rampaeenaw hae—khua khuapali kha pya athua hae.³⁶Reuben phin hae ram lungkhu te Bezer khua te a sahiin hae rampaeenaw hae, Jahzah khua te a sahiin hae rampaeenaw hae,³⁷Kedemoth khua te a sahiin hae rampaeenaw hae te Mefaath khua te a sahiin hae rampaeenaw hae—khua khuapali kha pya athua hae.³⁸Gad phin hae ram lungkhu te ccungccaw theihtu hanlan khynnaw khua thua zah Gilead ram kya umpaw Ramoth khua te a sahiin hae rampaeenaw hae,³⁹Heshbon khua te a sahiin hae rampaeenaw hae—abalynte khua khuapali kha pya athua hae.⁴⁰A laehypaw Levi phin hae kya-e Merari puizia patae nynh ccungthydungte a ccou hae paw khua hae tuh abalynte khua khuahaw lae ning acih.

⁴¹Israel hae nynh a ccou hae paw ram hae lungkhu kya Levi hae khua tuh mih sahiin hae rampaeenaw hae ryte khua abalyn sung pali khua tarya acih.⁴²E khua hae raveih nynh mih pepan kya sahiin rampaeenaw hae kha ccarou a hoi hae; tuhcite e khua hae balyn tuh a um hae.

⁴³Tuhcite Bawipaw nynh Israel hae tuh, kae pya cih oh cite mih minpaaw hae kya bya a la kinpyaku hae paw ram hae balyn kha a pya hae; ram kha lah hae zah tuin kya khua a sah hae.⁴⁴Te Bawipaw nynh mih minpaaw hae kya bya a la kinpyaku hae thyhte, mih pepan balyn kya daenaw a pya hae; mih rhaw hae lu kheit nynh sanmah mih malang thadyn kho khyh hae, pawccecize Bawipaw nynh mih rhaw hae balyn kha mih kuih kya a pya vae hae.⁴⁵Bawipaw nynh Israel hae kya ahoypaw bya a kinpyaku hae paw balyn tuh ccangkheit sanmah zo khyh; abalynte marya accing. Nithua lang e hae A Ki hae

¹Te Joshua nynh Reuben phin hae, Gad phin hae te Manasseh phin angankuh kha ko hae zah,²minmin kha, “Bawipaw ryalahtu Moses nynh ae hopya oh paw balyn kha na rae oh zah, kaw kae pya oh paw ka bya kha na ngae oh;³atunin cia hynhsepi aro vae paw nae uno hae kha na vua khyh oh zah, Bawipaw nae Pachia nynh ae naw oh paw kha tynkaring lan na law oh.⁴Atu tuh Bawipaw nae Pachia nynh nae uno hae kha bya a kinpyaku hae hawte haeungnaw a pya vae hae; tukeiccuze ki oh lah, Bawipaw ryalahtu Moses nynh Jordan vaw khuraw lang e ae pya oh paw nae hanpaw umnaw ram kya nae inn lang cciatua oh.⁵Bawipaw ryalahtu Moses nynh kaw ae pya oh paw kawbya te phungbya hae athuapaw: Bawipaw nae Pachia sungsah lanpaw, a laanpi zui lanpaw, a kawbya hae rae lanpaw, amaw kya tynkaring lan kyngku lanpaw, te nae thinlung balynte nae hiinnaw balynte amaw ryalawpya lanpaw kha hoyte raeringku tua oh,” a cipya hae.⁶Te Joshua nynh hythuapya hae zah a kisah vae hae, te minmin tuh mih inn lang a ki hae.

⁷Te Moses nynh Manasseh phin angankuh kha Bashan kya umpaw mih hanpaw kha a pya hae; thuasalama Joshua nynh ccangpaw angankuh kha tuh Jordan te niccaw lang ram kya mih uno hae pe khe mih hanpaw kha a pya hae. Te Joshua nynh minmin kha hythuanaw pya hae zah mih inn lang he a kisah hae te,⁸minmin kha, “Uccaw patae te sahiin patae te ngun, sui, daw, sivaw te boeining patae kha phukute nae inn lang la cceih oh; nae rhaw hae kya-e na law oh paw rhaw uccaw kha nae uno hae ryte la neekuh oh,” a cipya hae.⁹Tukeiccuze Reuben phin hae, Gad phin hae te Manasseh phin angankuh tuh Kanaan ram lungkhu umpaw Shiloh khua e Israel hae kyate phiakuh hae zah, mih inn lang a ki hae. Bawipaw nynh Moses kya kaw a pya liate a ccou hae paw ram, Gilead ram langkhe ccia lan cite a thokuh hae. Liathuinawpaw Silawhang

¹⁰Kanaan ram Jordan vaw pe he a thua hae tuh, Reuben phin hae, Gad phin hae te Manasseh phin angankuh nynh tuh-e Jordan vawkhu pe khe myarya lepaw silawhang ccangkheit a rae hae.¹¹Reuben phin hae, Gad phin hae te Manasseh phin angankuh nynh Kanaan ramri kya Jordan vaw pe, Israel hae ram lungkhu khe silawhang a rae hae cipaw kha Israel hae nynh a thae hae.¹²Israel hae nynh tuh-e kong he a thae hae tuh, Israel hae mih balynte minmin kha tuk khylan Shiloh kya a pumkuh hae.

¹³Te Israel hae nynh Gilead ram kya-e Reuben phin hae, Gad phin hae te Manasseh phin angankuh hae kalan khe ranpibawi Eleazar ccapaw Finehas kha a saw hae.¹⁴Te amaw ryte bawi lu haw, Israel phin raveih kyate lu kheit cci, mih phin kyate lu athua hae paw kha a cciasah bua hae.¹⁵Te Gilead ram kya um hae paw Reuben phin hae, Gad phin hae te Manasseh phin angankuh hae kalan khe cceih hae zah, minmin kha,¹⁶“Bawipaw ccungccaw hae nynh mih balynte, ‘Israel Pachia tungvaw kya na rae oh paw rawsenaw hynh pawmou athua? Atunin Bawipaw kha dou khylan Bawipaw laanpi kyate na cceihsei oh zah, silawhang ccangkheit na raeku oh paw hynh paw suilan mou athua?¹⁷Peor kya-e seinaw kha ah zawsakuh loh khyh oh tou! Khah-e seinaw keiccuze Bawipaw ccungccaw zapi hae kya shethya thua zah, atunin cia khah-e seinaw kyate ah thyaa loh khyh oh,¹⁸nanning nynh Bawipaw nulang zuiku leite atunin ccanglang na maekuh cih oh tou! Nanning nynh Bawipaw kha atunin na dou oh ze, Israel ccungccaw zapi tungvaw awkhualan a thinria cih.¹⁹Thuasalama atu nae ram tuh athyaa khyh lanze, Bawipaw beikbu a thadynnaw Bawipaw ram lungkhu lang oun cceihbua oh lah, kaening kae ccoupaw ram hynh lawkuh bua oh; thuasalama Bawipaw palia than nynh dou nan oh, Bawipaw ah Pachia kya-e silawhang laelan ccangpaw silawhang kha raekute kaening hynh mah oun dou nan oh.²⁰Pya vae paw uccaw konglang te Zerah ccapaw Akhan nynh a lungzi khyh keiccuze Israel ccungccaw zapi balyn tungvaw kya thinrianaw yn ccah khaw? Te aning a hoyleinaw keiccuze amaw kyalya chih khyh!’ a ci hae,” cite a hopya hae.

²¹Te Reuben phin hae, Gad phin hae te Manasseh phin angankuh hae nynh Israel puizia hae kya-e lupi hae kha khung hae zah,²²“Bawipaw , pachia hae Pachia! Bawipaw , pachia hae Pachia! Aning nynh phe a ny; Israel maw nynh mah nyh sah! Bawipaw tungvaw dounaw te lungzi leinaw um zah,²³Bawipaw nulang zuiku leite ccanglang maeku khylan silawhang kha kae la rae lanze, atunin kae hiinnaw hynh oun haang nan oh; te tuh-e silawhang vawlan khe maee-ute silawnaw, ccathae silawnaw te ccawkunaw silawnaw kha kae rae lan athua ze, Bawipaw amaw ccaccei nynh oun liaru vae sah.²⁴Tukeiccuze kae rae khyh, thuasalama malang ze nae ccaaw hae nynh kae ccaaw hae kha, ‘Bawipaw , Israel Pachia te kyngkunaw pawmou na hoi oh?²⁵Pawccecize nanning Reuben phin hae te Gad phin hae, nanning te kaening laku kya Bawipaw nynh Jordan tuh ramri lang a rae; Bawipaw kya nanning tuh ccou lanpaw nae hanpaw na hoibua khyh oh,’ a cisei cih hae cipaw kae tua keiccuze kae raepaw nynh thua. Tuhawte nae ccaaw hae nynh kae ccaaw hae kha Bawipaw beik lanpaw kha a umtawsahsei cih hae.²⁶Tukeiccuze kaening nynh, ‘Maee-ute silawkunaw elang thua leite,²⁷kaening te nanning laku kya ccaekia thua zah, Bawipaw rya tuh kaening nynh amaw malang maee-ute silawnaw te silawnaw hae te ccawkunaw silawnaw rya kae la lahbua ci nawlan, silawhang ccangkheit rae oh sih; malang ze nae ciihan hae nynh kae ciihan hae kha, “Bawipaw kya ccoupaw pawsang na hoibua khyh oh,” cite a cisei khyh nawlan hae,’ cite kae ci.²⁸Te e hynh kaening kya thuasah, kae ciihan hae kya thuasah, hosei athua lanze, ‘Bawipaw silawhang hynh dotua oh, kae minpaaw hae nynh silaw nawlan thua leite nanning te kaening lakuze ccaekia lang la rae hae paw hynhsa athua,’ cite kae ho cih cite kae tua.²⁹Amaw beikbu malang a thadynpaw Bawipaw ah Pachia kya-e silawhang laelan, maee-ute silawnaw te ccathae silawnaw athua khyhze silawnaw rae nawlan ccangpaw silawhang raete Bawipaw laanpi kyate atunin cciaseite Bawipaw doupaw tuh kaening kyate sawkuh sah!” a ci hae.

³⁰Ranpibawi Finehas te amaw kya um hae paw ccungccaw zapi kya-e piccan hae te Israel phin hae kya-e cciakhaetu hae nynh Reuben phin hae, Gad phin hae te Manasseh phin hae nynh a ho hae paw kha a thae hae tuh, mih lung myarya ccing.³¹Te ranpibawi Eleazar ccapaw Finehas nynh Reuben phin hae te Gad phin hae te Manasseh phin hae tuh, “Bawipaw kha na rawse khyh oh keiccuze atunin Bawipaw tuh ah kya nynh um cipaw na ny oh; Israel ccungccaw hae tuh Bawipaw kuih kyate atu na khum vae oh,” a ci hae.

³²Ranpibawi Eleazar ccapaw Finehas te bawi hae tuh Gilead ram te Reuben phin hae te Gad phin hae kyate Kanaan ram lang Israel hae kalan ki hae zah, bya kha oun thuakhae hae.³³E konglang te Israel hae nynh myarya mih lungrythua. Israel hae nynh Pachia kha thehoysah hae zah Reuben phin hae te Gad phin hae umnaw ram ro lan te minmin dou lanpaw konglang kha ho vae khyh hae.³⁴Reuben phin hae te Gad phin hae nynh silawhang tuh Ed cite min a phu hae; “Pawccecize Bawipaw tuh Pachia nynh thua cipaw hynh-e silawhang tuh aening laku kya ccaekia nynh thua,” a ci hae. Joshua nynh Lungthosahnaw

¹Ccyh khaw cia aro koute Israel hae kha mih pepan e rhaw hae kyate Bawipaw nynh haeungnaw a pya hae, Joshua tuh a kum yn tang zah myarya a taw te,²Israel hae mih balynte, mih piccan hae, lu lang um hae paw, mih byapiatu hae te mih bawi hae kha Joshua nynh ko hae zah minmin kyakhe, “Atu tuh ka kum tang vae zah myarya ka taw vae;³te Bawipaw nae Pachia nynh e minphuin hae kyaze nae hanlan a raepaw kha na muih vae oh; pawccecize nanning hanlan rhaw ae tukpah oh paw tuh Bawipaw nae Pachia nynh thua.⁴A laehy hae paw minphuin hae kha nae phin raveih hanlan rho lang kae pya oh, ka tae ty vae paw minphuin hae balyn hynh Jordan vaw kyate atho cih zah niccaw lang Rili Pi kyacia,⁵Bawipaw nae Pachia nynh nae malang kyate a dee cih hae zah, nae mit nynh a muih kho leinaw kyacia a dee cih hae; te Bawipaw nae Pachia nynh bya ae kinpyaku oh hawte mih ram kha na ccou cih oh.⁶Tukeiccuze Moses kawbya ccauh kya azeikuhpaw balyn kha zui lan te rae lan kha tynkaring lan um oh, voilang ranglang maekuh nan oh.⁷Nanning nynh nae laku kya a laehy ung hae paw minphuin hae ryte pyku leite, mih pachia hae min kha ho leite, tuh-e pachia hae min phyate byakinku leite, mih ryalawpya leite, mih malang bakhung leite,⁸atunin cia na cyi oh hawte Bawipaw nae Pachia kha tynkaring lan kyngkuh oh.⁹Pawccecize le hae zah athungpaw minphuin hae kha Bawipaw nynh nae malang te a dee hae keiccuze atunin cia hum nynh san nae malang thadyn ngan khyh.¹⁰Bawipaw nae Pachia nynh bya ae kinpyaku oh hawte, amaw tuh rhaw ae doupahtu oh paw athua keiccuze nanning kya-e lu kheit nynh rhaw thong kheit kha a dee kho.¹¹Tukeiccuze Bawipaw nae Pachia sungsah lanpaw kha hoyte raeringku tua oh.¹²Na maetawkuh oh zah nanning laku kya-e a laehy ung hae paw ryte pykute nopi hae kha zu lang na dykuh oh zah minmin nynh mah ae dyru oh zetuh,¹³Bawipaw nae Pachia nynh hynh-e minphuin hae hynh nae muihnaw kyate dee vae lan khyh hae cipaw kha ccaerarih lan nyh oh; thuasalama Bawipaw nae Pachia nynh ae pya oh paw hynh-e ram hoy kyate na ro mawlaezung oh, nae hanlan kaang te saehung, nae ke hanlan ccungbua te nae mit lungkhu kya hinpaw lang a tang cih hae.

¹⁴“Te atu tuh laephi vawlan ccungccaw hae phung hawte ka cceihbua vae cih, nae balynte Bawipaw nae Pachia nynh nanning konglang te byakinnaw a raepaw uccaw hoypaw balyn ccangkheit san accakaepaw thua khyh cipaw kha nae thinlung te na tuanaw oh te na ny oh; nae hanlan marya accing, ccangkheit sanmah ahobounaw um khyh.¹⁵Thuasalama Bawipaw nae Pachia nynh nanning kya bya ae kinpyaku oh paw uccaw hoypaw balyn tuh nae kya accing hawte, Bawipaw nae Pachia nynh hynh-e ram hoypaw ae pya oh paw kyate ae ro mawlaezung oh, Bawipaw nynh uccaw hoy leipaw balyn kha nae tungvaw kya a thuasah cih.¹⁶Bawipaw nae Pachia nynh ae pya oh paw byakinnaw kha na ei oh zah, ccangpaw pachia hae kha ccianuate a rya kha na lawpah oh zah, a malang na bakhung oh zetuh, Bawipaw thinrianaw tuh nanning kya maee hawte arua cih zah ae pya oh paw ram hoypaw kyate arangte na roh cih oh,” a cipya hae. Joshua Hopaw Nyathya Bya

¹Te Joshua nynh Israel minphuin hae balyn kha Shekhem kya pum hae zah, Israel piccan hae, lupi hae, byapiatu hae te bawi hae kha a ko hae, te Pachia malang khe oun thua hae.²Te Joshua nynh ccungccaw hae balyn kha, “Israel Pachia nynh hynhte a ci: Langmawlya nae minpaaw hae tuh Zufrates vaw khuraw langkhe nynh a la um hae, Abraham te Nahor mih paaw Terah nynh ccangpaw pachia hae kha a la beik hae.³Te nae paaw Abraham tuh Vaw khuraw lang ka ko zah, Kanaan ram lungkhu khe phe lekuh lan ka cciakhae, a ciihan kha patae ka pungzaesah. Isak kha ka pya zah,⁴Isak tuh Esau te Jakob kha ka pya. Te Seir muaram kha Esau ka pya, thuasalama Jakob te a ciihan hae kha tuh Izip lang a cceihbung hae.⁵Te Moses te Aaron kha ka saw hae zah Izip tuh a lungkhu kya ka raepaw vawsawnaw khate de ka tah; te nyalangte nanning kha kae poukhae oh.⁶Te nae paaw hae kha Izip kyate ka poukhae hae zah Rili Se kya a thua hae, te Izip ccungccaw hae nynh nae paaw hae kha marangle te marang rhawkaw ryte Rili Se kyacia a deehui hae.⁷Te Bawipaw kha he a ko hae te, Izip ccungccaw hae te nae laku kya mohnaw a nung, te rili kha mih tungvaw lang ka luasah thin hae zah, tui pong ka vusah hae; nae mit nynh Izip tungvaw ka cyipaw kha a muih; te ramkaw kya khaw cia na la um oh.⁸Te Jordan khuraw lang kya um hae paw Amor hae ram lang kae cciakhae oh; nanning kha ae dou oh zah, minmin tuh nae kuih kalan kae pya oh, mih ram tuh na lah oh zah minmin kha nae malang khe ka ro hae.⁹Zippor ccapaw Balak, Moab siapharan tuh thokuh zah Israel kha a dou. Te nanning kha thyalaw khylan ccungccaw saw hae zah Beor ccapaw Balaam kha a hyy.¹⁰Thuasalama Balaam bya kha ka ngaepah khyh, tukeiccu aning nynh hythuanaw ae pya oh; hynhcite nynh nanning kha a kuih kyate kae thuaa oh.¹¹Te Jordan vaw kha na zua oh zah, Jeriko kya na thua oh, Jeriko khua e ccungccaw hae te Amor ccungccaw hae, Periz ccungccaw hae, Hit ccungccaw hae, Girgash ccungccaw hae, Hiv hae te Jebus hae nynh zemah nanning kha ae dou oh; minmin tuh nae kuih kya kae pya oh.¹²Te Amor hae siapharan lu ning kha nae malang kyate a deetu lang khoingae kha nae malang ka saw; nae thaloi te thua khyh, nae li nae the te thua khyh.¹³Loo lang na pho boi leinaw oh ram te khua na la sah boi leinaw oh khua hae kha kae pya oh zah, tuin kya na um oh, na lin lei oh paw misu khokhu te oliv khokhu kya-e athae hae kha na ae oh.

¹⁴“Tukeiccuze atu tuh Bawipaw kha rih oh lah, amaw rya kha lungthyaanaw te lungzinaw khate lawtua oh; Vaw khuraw lang te Izip ram kya nae minpaaw hae nynh a la beik hae paw pachia hae kha vua oh lah, Bawipaw kha beik oh.¹⁵Te Bawipaw kha na beik ry khyh oh ze, atunin kya na beik lan oh paw kha pokuh oh; Vaw khuraw lang e ram kya nae minpaaw hae nynh a la beik hae paw pachia hae tou, tuhkhyhze na umnaw oh Amor hae pachia hae kha tou na pokuh cih oh; thuasalama kae te ka innbyn hae tuh Bawipaw kha kae beik cih,” a ci.

¹⁶Ccungccaw balyn nynh, “Bawipaw kha pachia ccangpaw beik taw lan zah, vua lan kae ci boi lan khyh!¹⁷Pawccecize Bawipaw kae Pachia tuh kaening te kae minpaaw hae kha seetangnaw inn, Izip ram kyate oun poukhaetu te kae mit nynh a muihnaw kya syntawnaw alepi a raetu te kae ccianaw takyhte kae thuanaw minphuin hae balyn kyate oun hiinsahtu nynh thua.¹⁸Te Bawipaw nynh kae malang e ccungccaw hae balyn, ram lungkhu um hae paw Amor ccungccaw hae kha a dee hae; tukeiccuze kaening mah kae Pachia athua keiccuze kae beik cih,” a cipya hae.

¹⁹Thuasalama Joshua nynh ccungccaw hae balyn kha, “Bawipaw rya tuh na lawpah kho khyh oh, pawccecize amaw tuh athyaapaw Pachia nynh thua; eiung mangpaw Pachia nynh thua; nae cyiseinaw thuasah, nae seinaw thuasah ae ngaethya lan khyh oh.²⁰Nanning nynh Bawipaw kha na vua oh zah, ramccang pachia hae kha na beik oh ze, nae kya hoynaw a rae kou khate nynh yn paleihkuh cih zah, vawsawnaw ae pya cih oh, te marya ae roh cih oh,” a ci.²¹Te ccungccaw hae balyn nynh Joshua kha, “Tuhte thua khyh, thuasalama Bawipaw kha nynh kae beik cih,” a ci hae.²²Te Joshua nynh ccungccaw hae kha, “Bawipaw kha beik lan na poku vae oh cipaw ccaekia tuh naemaw hynh nynh na thua oh,” a cipya hae. Te minmin nynh, “Ccaekia tuh kaemaw hynh nynh kae thua,” a ci hae.²³Aning nynh, “Hynhte athua lanze nae kya umpaw ramccang pachia hae kha vua oh lah, nae thinlung te Bawipaw , Israel Pachia kya beeku tua oh,” a cipya hae.²⁴Te ccungccaw hae balyn nynh Joshua kha, “Bawipaw kae Pachia tuh kae beik cih zah, amaw bya kha kae ngae cih,” a ci hae.²⁵Tukeiccuze Joshua nynh tuin nin khe ccungccaw hae balyn ryte byakinnaw kha rae hae zah, minmin elang Shekhem kya phungbya te phungzae kha a raepya hae.²⁶Te alepaw lung ccangkheit kha lah zah, Bawipaw beikinnthyaa kya umpaw phaesi ku kaw khe a bing.²⁷Te Joshua nynh ccungccaw hae kha, “Dotua oh, e lung hynh aening kya ccaekia athua cih, pawccecize Bawipaw nynh aening kya a hopaw balyn kha hynh-e lung nynh a thae; tukeiccuze Pachia kha na hynpya oh ze, e lung tuh nanning kha rawsete ccaekia lang a tang cih,” a cipya hae.²⁸Te Joshua nynh ccungccaw hae kha a ccou hae paw mih ram langkhe a cciasah hae. Joshua te Eleazar Chinaw

²⁹Hynh-e koute Bawipaw seepaw Nun ccapaw Joshua tuh za kheit kum haw acih te a chih,³⁰te minmin nynh Gaash Mua palung lang, Efraim muaram kya umpaw, amaw nynh rho a ccoupaw Timnath-serah kyakhe a uu hae.

³¹Joshua a hiin lungkhu balyn thuasah, Bawipaw nynh Israel hae elang rya a lawpaw balyn a nyhtu hae Joshua nukhu e piccan hae she lungkhu balyn thuasah Israel hae nynh Bawipaw kha a beik hae.

³²Israel hae nynh Izip ram kyate oun cciakhae hae paw Josef ru kha Jakob nynh Shekhem a paaw Amor a ccapaw kya-e phua za kheit te a repaw Shekhem khua e laephi kyakhe a uu hae; tuh-e hmin tuh Josef ciihan hae rho lang a tang.³³Te Aaron ccapaw Eleazar kha mah chih zah, amaw ccapaw Finehas nynh Efraim muaram kya a ccoupaw Gibeah khua khe a uu hae.

Bible Society of Myanmar

https://app.library.bible/content/1a340f5ae072b2f4