RUTH1
Elimelek Innbyn Moab lang Cceih hae
1Byapiatu hae nynh a uk ccyh lya hae khe, ram lungkhu kya ccakanccih zah, Judah ram e Bethlehem khuapaw lu kheit tuh a zu te a ccapaw hae lu ning ryte Moab ram kya umbua khylan a cceih hae.2Tuh-e ccungccapaw min tuh Elimelek nynh thua, a zu min tuh Noami thua zah a ccapaw hae lu ning min tuh Mahlon te Khilion nynh thua hae; minmin tuh Judah ram, Bethlehem khua e Efrath phin nynh thua hae. Moab ram lang cceih hae zah tuin kya a um hae.3Naomi vawpaw Elimelek tuh chih zah, a zu te a ccapaw hae lu ning kha a chitaw hae.4A ccapaw hae nynh Moab hae kha zu lang a dyku hae; lu kheit min tuh Orpah thua zah ccangpaw lu kheit min tuh Ruth nynh thua. Tuin kya kum haw loukaw a um hae te,5Mahlon te Khilion tuh parouh mawte a chih hae, tukeiccuze Naomi tuh a ccapaw hae lu ning te a vawpaw nynh chitaw hae zah a makhaete a um. Naomi te A Monung hae6Bawipaw nynh a ccungccaw hae kha hythuapya hae zah looh a pya hae cipaw kha Naomi nynh Moab ram kyakhe a thae keiccuze Moab ram kyate ki lan cite a monung hae ryte a thokuh hae.7Tuhcite a umnaw hmin kyate a monung hae ryte pou hae zah Judah ram lang ki lan a cceih hae.8Thuasalama Naomi nynh a monung hae lu ning kha, “Nanning tuh nae nung hae inn raveih lang la ki ccavae oh. Michi hae te kae ka tungvaw kya nae ccuepe oh hawte, Bawipaw nynh nae tungvaw kya kou hoy lan ae la ccuepe vae oh sah.9Bua na hoi oh paw nae vawpaw hae inn raveih kyakhe ngaengante khua na sah nawlan oh Bawipaw nynh thaw ae la ccih vae oh sah,” cite hopah hae zah minmin kha a myngsya hae, te minmin tuh thawte a rah hae.10Minmin nynh amaw kha, “Tuhte thua khyh, na minphuin hae kalan namaw ryte kae kibua cih,” a cipya hae.11Thuasalama Noami nynh, “Ka ccanung oh, la ki oh, pawccemou ka kya na cciabua lan oh paw tuh? Nae vawpaw lang a tang cih hae paw ccapaw hae tuh ka vue lungkhu ka hoi ung zawtou?12La ki ccavae oh, ka ccanung hae, la cceih ccavae oh, kae tuh vawpaw hoi lan myarya ka taw vae. Ka hanlan ngaehoinaw a um ung cite ka la tua ze heize thuasah, atu khuazi maw hin vawpaw hoite ccapaw hae kha ka la saah ze heize thuasah,13minmin a zaw mawlaezung hae na ngaw cih oh zawtou? Vawpaw hoi leite tou na um cih oh? Ka ccanung oh, tuhte thua khyh, Bawipaw kuih nynh kae hynh rawsete yn maenuaku keiccuze nanning hanlan laeze kae ka hanlan accihhua,” a cipya hae.14Te thawte bua a rah hae. Orpah nynh a ninnung kha a myng, thuasalama Ruth nynh tuh phang a kyng.15Tetuh Naomi nynh, “Dotua, na vawpaw a upaw zu tuh a minphuin te a pachia hae kalan a ki vae; nang mah na vawpaw a upaw zu nulang zuikute la kibua ccavae,” a cipya.16Thuasalama Ruth nynh,“Nang kha kitaw lan tenang kha zui leite ki lanbeih yn nangse nan!Na ccianaw takyh langka cceihbua cih zah,na ryanaw kya ka ryabua cih;na minphuin tuh ka minphuinathua cih zah,na Pachia tuh ka Pachiaathua cih.17Na chinaw kyaka chihbua cih zah,tuin kyakhe yn uhbua cih hae.Chinaw nynh kae hynhna kyate yn la phia lanze heize,Bawipaw nynh ka tungvaw kyatuhcite cyih sah lah,tuhlaeze mah cyih vae sah,” a ci.18Ruth nynh amaw kya cciabua lan bya a paeku vae cipaw kha Noami nynh he a muih tuh, hopah lae vae khyh.19Mih lu ning te Bethlehem khua a thua mawlaezung hae a cceih hae. Bethlehem khua a thua hae te, minmin keiccuze a khuapi mawte a pookuh hae; te nopi hae nynh, “E hynh Naomi athua tou?” a ciku hae.20Naomi nynh minmin kha,“Naomi cite yn ko nan vae oh,Mara cite yn ko ccavae oh,pawccecize Athunghuapaw nynhmyarya khah lanteka tungvaw a cyi vae.21Phe beih lante ka pou salamahBawipaw nynh kuih ccakaeteyn kikhae vae;Bawipaw nynh vawsaw yn pya zah,Athunghuapaw nynh ka tungvawteingnaw yn thuakhaepya lyaze,pawccemou Naomi cite nae ko oh?” a cipya hae.22Tuhcite Moab ram kyate a kikheih hae paw Moab minphuinnung, a monung Ruth ryte Naomi tuh pynkheihlan a ki hae. Minmin tuh Barli rue takaw lyakhe Bethlehem khua a thua hae. Ruth nynh Boaz A Tungku1Naomi nynh a vawpaw kalansang te vaeccaw lu kheit a hoi, tuh-e paw tuh Elimelek puiziapaw thua zah hoirumnaw lante phe langkuhpaw, a min Boaz cikuhpaw nynh thua.2Moab minphuinnung Ruth nynh Noami kha, “Loo lang ka la cceih sah lah, thaw yn ccih hae paw nulang khe ccamua ka la ccungbua sah,” a cipya. Noami nynh, “Ka ccanung, la cceih,” a cipya.3Tukeiccuze Ruth nynh cceih zah, loolae khe loohruetu hae nulang khate ccamua kha a ccung. Te Elimelek puizia athuapaw Boaz a loo kya a thua.4Ccyh sosoh aro te Boaz tuh Bethlehem khua kyate yn thua zah loohruetu hae kha, “Bawipaw tuh nae kya um vae sah,” cipah hae zah, minmin nynh, “Bawipaw nynh hythua ae pya vae sah,” cite a khungru hae.5Tetuh Boaz nynh loohruetu hae piccanpaw, a ryalahtupaw kha, “E liaccanung hynh hum te mou aseku?” cite a khia.6Loohruetu hae piccanpaw ryalahtupaw nynh, “Moab ram kyate Naomi ryte oun thuakheih hae paw Moab minphuinnung nynh thua.7Aning nynh, ‘Thawccinawte loohruetu hae nulang e loohcce hae kya umpaw ccamua hynh ccungkute beih kae sueluakuh,’ a ci. Tukeiccuze yn cceih zah, awkhua te atu cia sosoh san haeung leite rya a lah,” a cipya.8Te Boaz nynh Ruth kha, “Ka ccanung, ngaetua, ccamua ccung khylan loo ccangpaw kalan cceih nan, e hmin hynh poutaw nan, ka liaccaw hae kyahin tyty umbua.9A rue cciamang hae paw loo kha do lah, mih nulangte zuikuh bua. Nang kha ae theihrya khyh nawlan hae, ccangvae hae kha kaw ka pya vae hae. Tui na haw ze, ang a umnaw langkhe cceih lah, ccangvae hae nynh a the hae paw tui kha na neih cih,” a cipya.10Ruth nynh laekhu kya bakhung zah, “Kae tuh minphuin ccangpaw mang ka thua pite, nang nynh kae hynh peki lan ciate, pawccemou na malang maehoynaw hynh ka mue?” a cipya.11Boaz nynh amaw kha, “Na vawpaw a chih koute na ninnung hanlan na cyipyapaw balyn kha thuasah, na nung na paaw te na puinaw ram kha cciatawte na ny boi leipaw minphuin hae kalan nae cciapaw kha thuasah pong yn hopya vae hae.12Bawipaw nynh na cyisahnaw hanlan lasung ae pya sah lah, a sake kaw kya reku khylan nae ccianuapaw Bawipaw , Israel Pachia nynh accingpaw lasung kha ae pya vae sah!” a cipya.13Te Ruth nynh, “Ka bawipaw, na malang maehoynaw po ka mue vae sah, pawccecize kae tuh na ryalahtu hae laku e lu kheit ka thua khyh zemah, lungtangnaw nae pya zah hoyte bya nae beih,” a cipya.14Looh ae ccyh lyakhe Boaz nynh Ruth kha, “Hynhlang yn cceih lah, e sanlou hae hynh yn aebua, misutui ariapaw kya na sanlou kha yn loihkuh bua,” a cipya. Tukeiccuze loohruetu hae pe khe a haungbua, te Boaz nynh thoupaw ccathae kha a pyalang, Ruth nynh phe byn lan a ae koute, beihtaraw alae ung.15Ccamua ccungku lan he a thokuh tuh, Boaz nynh a ccangvae hae kyakhe, “Loohcce hae kya-e kha heize khuinkuh sah, pe nan oh.16Loohcce hae kya-e abang kha aning hanlan nae kuih te zuupah oh lah, a ccungku ccaw cciatawpah oh, aning kha pe nan oh,” a cipya hae.17Tukeiccuze Ruth nynh zete cia loo lungkhu khe a ccungku. Te a ccungkupaw looh kha tin zah barli ephah ccangkheit loukaw acih.18Tuh-e looh tuh phu zah khua lungkhu lang a tee; aning nynh ccung zah a muepaw looh myarya lungpaw kha a ninnung nynh a muih. A byn koute alaepaw looh kha mah poh thuaa zah a ninnung kha a pya.19A ninnung nynh amaw kha, “Atunin teimou ccamua na ccung? Teimou rya na law? Nang ae nyhpaw ccungccapaw tuh hythuanaw ccou vae sah,” a cipya. Tukeiccuze a ninnung kha rya a lawnaw ccungccapaw kong kha hopah zah, “Atunin rya ka lawnaw ccungccapaw min tuh Boaz a cikuh,” a cipya.20Naomi nynh a monung kyakhe, “A hiinpaw tungvaw thuasah, a chihpaw tungvaw thuasah a thawccinaw apaekuh leipaw Bawipaw nynh aning kha hythuapya vae sah!” a cipya. Te Naomi nynh bua hopah zah, “Tuh-e ccungccapaw tuh aening puizia thua zah, ah naekuh hua oh paw vaeccaw nynh thua,” a cipya.21Moab minphuinnung Ruth nynh, “Tuh-e paw nynh kae kha, ‘Ka ryalahtu hae nynh ka looh a rue kou mawlaezung hae, mih pe khe umbua,’ cite heize yn hopya,” a ci.22Naomi nynh a monung Ruth kha, “Ka ccanung, tuh-e paw a liaccaw hae ryte na cciakheih oh paw tuh ahoyhua, tuhkhyhze tuh ccangpaw loo kya ae theihryasei cih hae,” a cipya.23Tukeiccuze Boaz a liaccaw hae kyakhe umbua zah, barli te chanvuih ruepaw athang mawlaezung ccamua kha a ccungkuh; te a ninnung kya a umbua. Huimin kya Ruth te Boaz1A ninnung Naomi nynh Ruth kha, “Ka ccanung, na hanlan ahoy nawlan khuasahkunaw kha kae ccungpya lan accan.2Rya na lahkheih oh paw liaccaw hae bawipaw Boaz tuh aening puizia nynh thua. Atu khuazi kya huimin kyakhe barli kha paraw te a zaw cih.3Nang nynh tui singkuh lah, chitui thuhkuh, te na boeining ahoy huapaw kha lawkuh lah, huimin kalan la cceih; a ae a nia kou mawlaezung pisepaw kha nysakuh nan.4He a ih te, a inaw hmin kha la syntaw; te la ccianua lah, a ccu a bongkupaw boei kha la kalyng lah, la ihbua; te aning nynh na cyi lanpaw kha ae hopah cih,” a cipya.5Ruth nynh, “Nae hopyapaw balyn kha ka cyih cih,” a cipya.6Tukeiccuze Ruth nynh huimin langkhe cceih zah, a ninnung nynh a hopya thyhte a cyi.7Boaz tuh ae zah a neih koute lungpawte ccathae apumkuhpaw pe i lan a cceih. Te Ruth tuh zyazyate cceih zah a ccu a bongkupaw boei kha kalyng zah a ihbua.8Ziraccyng khe pisepaw tuh phe siikuh zah, he a paleihkuh tuh a ccu lia lang nopinung lu kheit a ih cipaw a ny!9Boaz nynh, “Hummou na thua?” cite khia zah, “Na ryalahtu Ruth nynh ka thua; nang tuh ah naekuhpaw puizia na thua keiccuze na boei dung kha na ryalahtunung kae hynh yn thybua,” a cipya.10Aning nynh, “Ka ccanung, Bawipaw nynh hythua ae pya vae sah; nang tuh ccangvae a hoirumpaw thuasah, a ryachipaw thuasah zui leite, masaty lya na la raepaw laeze atu nyathya na raepaw hynh-e lungzinaw hynh ahoyhua.11Ka ccanung, rih nan, nae ngiapaw balyn kha kae cyipah cih, pawccecize nang tuh nopi hoypaw nynh na thua cipaw kha ka khuapi kya-e ccungccaw balyn nynh ae ny hae.12Kae tuh ah naekuhpaw puizia nynh ka thua ccaccing, thuasalama kae laeze anaekuh huapaw puizia lu kheit a um ung.13Atu khuazi tuh hein kya um hin, awkhualan khe anaekuhpaw puizia nynh cyipya lanpaw kha aning nynh ae cyipya ry ze ahoy; cyih ccaleih vae sah. Thuasalama anaekuhpaw puizia nynh cyipya lanpaw kha ae cyipya ry khyh zetuh, Bawipaw tuh a hiin thyhte, anaekuhpaw puizia nynh cyipya lanpaw kha kae nynh kae cyipah cih. Awkhualan awkhua cia ih hin,” a cipya.14Tukeiccuze awkhualan awkhua cia a ccu lia langkhe a ih, thuasalama lu kheit te lu kheit mitmae liaku kho ccyh athua mawkhe a thokuh vae; pawccecize tuh-e paw nynh, “Huimin kalan nopinung nynh yn thuapaw kha humhung nynh mah nyh nan sah,” a ci.15Te Boaz nynh, “Na zingkupaw na boei kha yn ccyng lah, dawtua,” a cipya. Tukeiccuze Ruth nynh daw zah barli kha aning nynh tounawpaw te kaw taruh a ccaepah koute duapah zah Ruth tuh khualae lang a cceih vae.16A ninnung kya a thua te, a ninnung nynh, “Ka ccanung, pawtemou acyiku?” cite a khia. Te pisepaw nynh a tungvaw a cyipyapaw balyn kha hopah zah,17“Aning nynh, ‘Na ninnung kalan na kuih ccakaete ki nan,’ yn cipah zah, e barli hynh tounawpaw te kaw taruh yn pya,” a cipya.18A ninnung nynh, “Ka ccanung, e uccaw hynh pawtemou athang cih cipaw na ny mawlaezung ngaw hin, pawccecize pisepaw nynh e uccaw hynh atunin a lyn mawlaezung haeungtaw lan khyh,” a cipya. Boaz te Ruth Zuvaw Tangnaw1Boaz tuh koikua kalan cceih zah a haung, te Boaz nynh a la ho boi paw, anaekuh huapaw puiziapaw tuh yn cceih. Tukeiccuze Boaz nynh, “Ka ban, yn cciatua; hein kya haungtua,” a cipya. Te aning nynh yn cceih zah a haung.2Te Boaz nynh khua lungkhu e piccan hae lu haw kha ko hae zah, “E kya haungtua oh,” cipah hae zah, a haung hae.3Tetuh Boaz nynh anaekuh huapaw puiziapaw kha, “Moab ram kyate yn kipaw Naomi nynh aening puiziapaw Elimelek loohmin kha a zua.4Tukeiccuze tuh-e kong tuh nang kha hopya lan cite ka tua zah kae hopya: Tuh-e loohmin tuh, hein kya a haung hae paw malang te ka minphuin hae kya-e piccan hae malang hin reku tua. Tuh-e loo tuh na shaw ry ze shawkuh; thuasalama na shaw ry khyh ze, ka ny nawlan yn hopya tua; pawccecize namaw laelan a shawkuh lanpaw humhung mah um vae khyh, nang koute tuh kamaw hynh nynh ka um vae,” a cipya. Tukeiccuze tuh-e paw nynh, “Ka shaw cih,” a ci.5Tetuh Boaz nynh, “Noami kuih kyate tuh-e loohmin he na re nin khe, michipaw min kha a rho kya tynsah nawlan, michipaw zu, Moab minphuinnung Ruth kha mah na rebia vae,” a cipya.6Tetuh anaekuh huapaw puiziapaw nynh, “Kamaw rho kha a rohsei cih keiccuze tuh-e loohmin tuh ka shaw kho vae lan khyh. Kae nynh ka shaw kho vae khyh keiccuze ka kya-e shawnaw kaw kha lawkuh ccavae,” a cipya.7Langmawlya Israel hae kyaze uccaw shawnaw te rulaekunaw konglang phungzae tuh hynhte nynh thua: nawccawnaw kha tynsah nawlan, lu kheit nynh a phanah kha khahkuh zah ccangpaw lu kheit kha a pya; e hynh Israel hae kya ccaekia tynsahnaw zia nynh thua.8Tukeiccuze anaekuh huapaw puiziapaw nynh Boaz kha, “Namaw elang rekuh,” cite hopah zah, a phanah kha a khahpyaku.9Tetuh Boaz nynh piccan hae te ccungccaw balyn kyakhe, “Elimelek uccaw balyn kha thuasah, Khilion te Mahlon uccaw balyn kha thuasah Naomi kuih kyate kae nynh ka re vae cipaw atunin a nyhtu ccaekia hae tuh nanning hynh nynh na thua oh.10Michipaw min tuh a puizia hae kyate thuasah, a puinaw khua koikua kyate thuasah zosah leite, michipaw min tuh a rho kya tynsah nawlan, Mahlon zu, Moab minphuinnung Ruth kha mah ka zu lang ka re vae; atunin nanning tuh ccaekia hae nynh na thua oh,” a ci.11Tetuh koikua kya um hae paw piccan hae te ccungccaw balyn nynh, “Kaening tuh ccaekia hae nynh kae thua. Israel ciihan a thadynsah hae paw nopi hae lu ning Rachel te Leah hawte, na inn lang yn cceih cih paw nopinung kha Bawipaw nynh rae vae sah. Efrathah kya na laan na sui ua sah lah, Bethlehem kya na minthaan vae sah;12Bawipaw nynh e liaccanung kyate ae pya lanpaw ccaawno hae liate, na ciihan tuh Tamar nynh Judah a saahpyapaw Perez ciihan hawte thua vae sah,” a ci hae. David Thokeinaw13Tuhcite Boaz nynh Ruth kha umkhae zah a zu lang a tang vae. Pynkheihlan a ihkheih hae te, Bawipaw nynh ccaawpoinaw kawpya zah ccapaw lu kheit a saah.14Te nopi hae nynh Naomi kha, “Atunin anaekuhpaw puizia leite ae nung khyh zah, ae cciataw leipaw Bawipaw tuh thehoyte um sah; a min tuh Israel hae kya thaan vae sah!15Aning tuh na hiinnaw ae thawsahthuitu te na taw vae te ae do-oihtu athua cih; nang kha ae sungsah zah ccapaw lu sari laeze na hanlan a hoyhuanung na monung nynh ccapaw a saah vae,” a cipya hae.16Naomi nynh imua kha lah zah a by kya a pom, te imua ngawtu lang a tang.17Innpaw hae nopi hae nynh imua kha a minphu hae zah, “Naomi hanlan ccapaw lu kheit a pui vae,” a ci hae. Minmin nynh imua kha Obed cite min a phu hae; aning tuh Jesse a paaw lang yn tang, Jesse tuh David paaw nynh thua.18E hae tuh Perez ciihan hae nynh thua hae: Perez tuh Hezron paaw,19Hezron tuh Ram paaw, Ram tuh Amminadab paaw,20Amminadab tuh Nahshon paaw, Nahshon tuh Salmon paaw,21Salmon tuh Boaz paaw, Boaz tuh Obed paaw,22Obed tuh Jesse paaw, Jesse tuh David paaw nynh thua.Bible Society of Myanmar