Read JOHAN 1

JOHAN1

Bya Pynsaw lang Tangnaw

¹Athotakawnaw kya Bya a um, Bya tuh Pachia ryte a umkheih hae, Bya tuh Pachia nynh thua.²Tuh-e Bya tuh athotakawnaw kyamawte Pachia ryte a umkheih hae.³Tynre balyn tuh amaw liate nynh rae athua, amaw leite raepaw ccangkheit san um khyh.⁴Amaw kya tuh hiinnaw um zah, hiinnaw tuh ccungccaw hae awnaw nynh thua.⁵Awnaw tuh mohnaw kya a aw, thuasalama mohnaw nynh tuh-e awnaw tuh the kho khyh.

⁶Johan a ci hae paw ccungccapaw lu kheit kha Pachia nynh a saw.⁷Tuh-e paw liate ccungccaw hae balyn nynh a zyn nawlan hae, awnaw kong ccaekiakhan khylan ccaekia lang yn thua.⁸Aning tuh awnaw thua khyh, awnaw kong ccaekiakhan khylan yn thuapaw nynh thua.⁹Tuh-e ahmepaw awnaw tuh laephi vawlan yn thua zah ccungccaw miakaw kha a awsah.

¹⁰Aning tuh laephi vawlan um zah laephi hynh amaw liate rae athua, tuhzemah laephi nynh amaw kha nyh khyh.¹¹Aning tuh amaw ram lang yn thua, thuasalama a ccungccaw hae nynh amaw kha lehkhan khyh hae.¹²Thuasalama amaw kha lehkhan hae zah amaw min a zynpaw balyn kha Pachia ccaaw thuanaw kaw a pya hae.¹³Minmin tuh chiisaw te saahpaw ccaaw, pynsaw rynaw te saahpaw ccaaw, ccungccaw rynaw te saahpaw ccaaw thua khyh hae; thuasalama Pachia rynaw te saahpaw ccaaw nynh athua hae.

¹⁴Bya tuh ccungccaw lang yn tang zah aening kya a um, aning tuh thawccinaw te byaccing te phe beih zah, Paaw kya-e lu kheit kyalyapaw Ccapaw phu-enaw lante a phu-enaw kha ah muih vae oh.¹⁵Johan nynh amaw kong kha ccaekiakhan zah, “ ‘Kamaw koute yn thua cih paw ccungccapaw tuh kamaw laeze a lesaehua, pawccecize aning tuh kamaw laeze a umty,’ cite a kong ka hopaw kha hynh-e paw nynh thua,” cite thawte a sia.¹⁶Amaw a ccingnaw kyate thawccinaw tungvaw thawccinaw kha aening balyn nynh ah mue oh.¹⁷Pawccecize kawbya tuh Moses liate pya athua, thawccinaw te byaccing tuh Jesu Khri liate nynh yn thua.¹⁸Hum nynh sanmah Pachia tuh muih boi khyh, Paaw by vaw kya a umpaw, lu kheit kyalyapaw Ccapaw nynh Pachia kha a langsah vae. Baptisma Pyatu Johan Ccaekiakhannaw

¹⁹Judah hae nynh, “Nang hynh hummou?” cite Johan kha khia khylan Jerusalem kyate ranpibawi hae te Levi hae kha a saw lya hae ze Johan nynh hynhte ccaekia a khan.²⁰Johan nynh mih bya tuh ei leite, “Kae tuh Messiah ka thua khyh,” cite ccaerarih lan a khung hae.²¹Minmin nynh, “Tuhteze nang tuh hummou? Elijah na thua tou?” cite a khia hae. Johan nynh, “Ka thua khyh,” a ci. Minmin nynh, “Profeh na thua tou?” cite bua a khia hae. Aning nynh, “Ka thua khyh,” a ci.²²Tetuh minmin nynh, “Hummou na thua? Kaening oun saw hae paw kalan kae la hopya ccaw hae namaw te namaw kha hum na ciku mou?” cite a khia hae.²³Johan nynh,“‘Bawipaw a ccianaw laanpi khalawbabin lan raepah oh,’ citeprofeh Isaiah nynh a ho vae hawte,kae tuh ramkaw kyaa siapaw lukheitpaw roi nynhka thua,” a ci.

²⁴Minmin a sawtu hae tuh Farasi hae nynh athua hae.²⁵Minmin nynh Johan kha, “Nang tuh Messiah na thua khyh, Elijah mah na thua khyh, profeh mah na thua khyh lanze, pawccemou baptisma na pya hae?” cite a khia hae.²⁶Johan nynh minmin kha, “Kae nynh tui kya baptisma ka pya hae, thuasalama nae laku kya na ny lei oh paw lu kheit a um.²⁷Aning tuh ka nulang te yn thua salamah kae tuh a phanah rui phoupya lan san ka ngaekuh khyh,” a cipya hae.²⁸E hynh Johan nynh baptisma a pyanaw hae Jordan vaw khuraw lang umpaw Bethabara khua kya nynh acyiku. Pachia Tuutaw

²⁹Awkhualan khe Johan nynh a kalan yn cceihpaw Jesu kha muih zah, “Laephi seinaw a cciakhaepaw Pachia Tuutaw khuh dotua oh!³⁰‘Ka nulang te yn thua cih paw ccungccapaw tuh kae laeze a lesae huapaw nynh thua, pawccecize aning tuh kae laeze a umty vae,’ cite a konglang ka hopaw kha amaw lahyn athua.³¹Amaw kha ka la nyh khyh, thuasalama Israel hae nynh amaw kha a ny nawlan hae kae nynh tui te baptisma ka pya hae,” a ci.³²Johan nynh ccaekiakhan zah, “Muisaw nynh vaawlang te vahu hawte yn rungbung zah a tungvaw kya a ccupaw kha ka muih.³³Amaw kha ka la nyh khyh, thuasalama tui te baptisma pya lan yn sawtupaw nynh kae kha, ‘Muisaw nynh yn rungbung zah a tungvaw a ccupaw kha na muih cih; tuh-e paw tuh Thyaa Muisaw te baptisma a pyatu nynh thua,’ cite yn hopya.³⁴Kae nynh ka muih vae zah, e paw tuh Pachia Ccapaw nynh thua cite ccaekia ka khan vae,” a ci. Masaty Jesu Zuitu hae Konaw

³⁵Awkhualan khe Johan te a zuitu hae lu ning nynh a thadyn lya hae khe,³⁶Johan nynh Jesu a cciapaw kha do zah, “Pachia Tuutaw khuh dotua oh!” a ci.³⁷Zuitu hae lu ning nynh Johan bya kha thae hae zah Jesu kha a zui hae.³⁸Jesu nynh maeleihkuh zah minmin nynh a zui hae paw kha he a muih tuh, “Pawmou na ccung oh?” cite a khia hae. Minmin nynh, “Rabbi, pawkyamou na um?” a ci hae. (Rabbi cipaw tuh Sazae cipaw nynh thua).³⁹Jesu nynh minmin kha, “Rang oh lah oun dotua oh,” a cipya hae. Minmin nynh cceih hae zah a umnaw kha a muih hae; tuin nin tuh amaw ryte a umkheih hae, pawccecize tuh lya tuh zete suimilan ccangpali loukaw acih vae.⁴⁰Johan bya kha thae hae zah Jesu a zui hae paw lu ning lakuze lu kheit tuh Simon Peter neitaw Andru nynh thua.⁴¹Aning nynh a upaw Simon kha masaty muih zah, “Messiah kha kae muih vae,” a cipya. (Messiah cipaw tuh Khri cipaw nynh thua).⁴²Simon kha Jesu kalan a cciakhae. Jesu nynh amaw kha do zah, “Nang tuh Johan ccapaw Simon nynh na thua. Nang tuh Sefas cite ko na thua cih,” a cipya. (Sefas cipaw tuh Peter cipaw te lokuh zah asuilan tuh “lungpi” cipaw nynh thua). Filip te Nethanal Konaw

⁴³Awkhualan Jesu tuh Galilee pee lang ccia lan a paccynkuh. Filip kha muih zah, “Yn zui,” a cipya.⁴⁴Filip tuh Andru te Peter hae khua athuapaw Bethsaida khuapaw nynh thua.⁴⁵Filip nynh Nethanal kha muih zah, “Moses nynh Kawbya ccauh kya a konglang a zeipaw te profeh hae nynh mah a konglang a zei hae paw kha kaening nynh kae muih vae; aning tuh Josef ccapaw Jesu, Nazareth khuapaw nynh thua,” a cipya.⁴⁶Nethanal nynh, “Nazareth khua kyate uccaw hoypaw ccangkhakheit a pou kho cih tou?” cite a khung. Filip nynh, “Rang lah yn dotua,” a cipya.⁴⁷Jesu nynh a kalan yn cceihpaw Nethanal kha muih zah, “Thyaruhnaw thinlung a hoi leipaw Israel paw ccaccing khuh dotua oh!” cite a konglang a ho.⁴⁸Nethanal nynh, “Pawtemou kae hynh nae ny?” cite a khia. Jesu nynh, “Filip nynh ae ko maw, thaeku ku kaw na um lya kha phe kae muih vae,” a cipya.⁴⁹Nethanal nynh, “Sazae, nang tuh Pachia Ccapaw nynh na thua! Nang tuh Israel Siapharan nynh na thua!” cite a khung.⁵⁰Jesu nynh, “ ‘Thaeku ku kaw kya kae muih,’ cite kae hopya keiccu tou nae zyn? E laeze ale huapaw uccaw hae nae muih ung cih,” a cipya.⁵¹Jesu nynh, “Byaccaccing kae hopya oh, vaaw tuh yn hungkuh zah Pachia vaaw hae nynh Ccungccaw Ccapaw tungvaw a rungbung hae paw te a kaethung hae paw kha nae muih cih oh,” cite amaw kha a hopya. Kana Khua kya Zudy Poi

¹Nin thumnaw kya Galilee pee Kana khua kya zudy poi a um; Jesu a nung tuh tuin kya a umbua.²Jesu te a zuitu hae mah zudy poi kalan a kobua hae.³Misutui he athang tuh, Jesu a nung nynh, “Misutui hoi vae khyh hae,” cite Jesu kha a hopya.⁴Jesu nynh, “Nopinung, nang tuh kae te hein kya pawmou ah sekuh? Ka ccyh thua loh khyh,” a cipya.⁵A nung nynh thohae hae kha, “Aning nynh ae hopya oh paw miakaw kha cyih vae oh lou,” cite a hopya hae.⁶Judah hae ccikankunawpaw phung thyhte, galan kaw kuin, sung thum accawngpaw, tui nungnawpaw lungre re taruh kha tuin kya a nung hae.⁷Jesu nynh thohae hae kha, “Lungre hae kha tui bia oh,” a cipya hae. Minmin nynh tuh-e re hae tuh arae phe thua lan tui a bia hae.⁸Jesu nynh minmin kha, “Atu tui kha sua oh lah thohae piccanpaw kalan cciakhae oh,” cipah hae zah, minmin nynh a cciakhae hae.⁹Thohae piccanpaw nynh misutui lang a tangpaw tui kha he a taangtua tuh, tuh-e tuh paw kyate yn thua cipaw nyh khyh, (thuasalama tui sua hae paw thohae hae nynh tuh phe ny hae), tukeiccuze thohae piccanpaw nynh zudy ccangvaepaw kha ko zah,¹⁰“Ccungccaw miakaw nynh athuapaw misutui kha masaty a nee hae, ccungccaw hae phe a byn kou hae te, anyaapaw misutui kha leih a nee hae, thuasalama nang tuh athuapaw misutui kha atu cia phang na nung,” a cipya.¹¹Jesu nynh a raepaw ngaeangnaw hae kyaze masaty a raepaw hynh-e ngaeangnaw hynh Galilee pee Kana khua kya rae zah a phu-enaw kha a langsahpya hae, te a zuitu hae nynh amaw kha a zyn hae. Jesu nynh Beikinn A Ccikan (Mat 21.12-13; Mar 11.15-17; Luk 19.45-46)

¹²Tukoute Jesu tuh a nung, a neitawpaw hae te a zuitu hae ryte Kapernaum khua lang cceihbung hae zah, tuin kya nin beihtaraw a um hae.

¹³Judah hae Kawtaw Poi tuh nae vae zah Jesu tuh Jerusalem lang a cceihthung.¹⁴Beikinn voidu kya vaetua hae, tuu hae te valaele hae a zua hae paw te mih ccaboi kya a haung hae paw phuaru hae paw kha a muih.¹⁵Liarue hae kha buanawpaw lang raekuh zah tuu hae te vaetua hae te minmin balyn kha beikinn voidu kyate pong a dee hae, phuarutu hae kya-e phua kha phya phaepah hae zah ccaboi hae kha phe a dawleihpya hae.¹⁶Valaele a zuatu hae kha, “E uccaw hae hynh hein kyate poukhae oh! Ka Paaw inn hynh kungkunaw inn lang mang nan oh!” a cipya hae.¹⁷A zuitu hae nynh, “Na inn kya-e duaanaw rynaw thinlung nynh kamaw kha phe yn ae,” cite azeikuhpaw kha a liathui hae.¹⁸Tetuh Judah hae nynh Jesu kha, “Nang nynh hynhte cyinaw kaw na hoinawpaw hynh paw muihsahnaw mou nae langsapakuh cih?” cite a khia hae.¹⁹Jesu nynh minmin kha, “E beikinn hynh roh oh lah, nin thum lungkhu ka sakthui cih,” cite a khung hae.²⁰Judah hae nynh, “Hynh-e beikinn saknaw hynh sung pali kum taruh aro, nang nynh e hynh nin thum lungkhu nae sakthui kho cih tou?” a ci hae.²¹Thuasalama Jesu nynh tuh amaw pyn athuapaw beikinn kha nynh a ho.²²Tukeiccuze chinaw kyate Jesu he a thoothui te, Jesu nynh a hopaw e bya hynh a zuitu hae nynh liathui hae zah, Ccathyaa te Jesu nynh a hosyapaw bya kha a zyn hae. Kawtaw Poi kya Jesu

²³Jesu nynh Kawtaw Poi lungkhu Jerusalem khua kya a um lyakhe ngaeangnaw a raepaw kha ccungccaw patae nynh a muih hae keiccuze a min kha a zyn hae.²⁴Thuasalama Jesu nynh ccungccaw balyn kha marya a ny keiccuze minmin kha zyn khyh hae,²⁵ccungccaw lungkhu a umpaw miakaw kha a ny keiccuze, ccungccaw konglang hynh hum nynh sanmah ccaekiakhanpya ho khyh. Jesu te Nikodemu

¹Judah hae uktu, Nikodemu ci hae paw Farasipaw lu kheit a um.²Tuh-e paw nynh khuazi khe Jesu kalan yn thua zah, “Sazae, nang tuh Pachia kyate yn thuapaw sazae nynh na thua cipaw kae ny, pawccecize Pachia nynh ae umkhae khyh lanze hynh-e na raepaw muihsahnaw hae hynh hum nynh sanmah rae kho lan khyh,” cite a hopya.³Jesu nynh, “Byaccaccing kae hopya, humhung zemah a puithui khyh lanze Pachia peenaw kha muih kho lan khyh,” cite a khung.⁴Nikodemu nynh, “A piccan vae paw ccungccaw nynh pawtemou bua a pui kho ung cih? A nung vue lungkhu lang vaeningnaw bua teete a pui kho ung cih zawtou?” cite a khung.⁵Jesu nynh, “Byaccaccing kae hopya, humhung zemah tui te Muisaw te a pui khyh lanze Pachia peenaw lungkhu lang tee kho lan khyh.⁶Pynsaw kyate a puipaw tuh pynsaw thua zah Muisaw kyate a puipaw tuh muisaw nynh thua.⁷‘Nanning na puithui hahe cih oh,’ cite kae hopyapaw hynh na ngaeangthua nan sah.⁸Khisan nynh a rynaw lang azaw, nang nynh khisan hu kha na thae, thuasalama paw kyate yn zaw zah paw kalan nynh po azaw cipaw na nyh khyh, Muisaw kyate a puipaw miakaw tuh tuhawte nynh athua hae,” a cipya.⁹Nikodemu nynh, “Pawtemou tuh-e tuh athua kho cih?” cite a khung.¹⁰Jesu nynh, “Nang tuh Israel hae ccangpahtu lu kheit mang na thua pite hynh-e hynh na thaethya khyh tou?

¹¹“Byaccaccing kae hopya, kaening tuh kae nypaw kha kae ho zah kae muihpaw kha ccaekia kae khan, thuasalama kae ccaekia kha leh na khan khyh oh.¹²Laephi uccaw hae kong hynh kae hopah oh zah na zyn khyh oh ze, vaawlang e uccaw hae kong kha kae hopya oh zeso pawtemou na zyn kho cih oh?¹³Vaawlang te yn rungbungpaw Ccungccaw Ccapaw holeite hum sanmah vaawlang a kaepaw um boi khyh.¹⁴Moses nynh hupaw kha ramkaw kya a sae hawte Ccungccaw Ccapaw mah sae athua cih,¹⁵tukeiccuze amaw a zynpaw miakaw tuh zungzae hiinnaw a hoi cih.

¹⁶“Pawccecize Pachia nynh laephi hynh eih a sungsah keiccuze a Ccapaw lu kheit kyalyapaw kha oun pya; tukeiccuze amaw a zynpaw miakaw tuh chih vae lan khyh zah zungzae hiinnaw a hoi cih.

¹⁷“Pawccecize Pachia nynh laephi hynh byapia khylan a Ccapaw kha laephi vawlan yn saw khyh, amaw liate laephi ccungccaw hae hynh khum athua hae ccaw cite nynh yn saw.¹⁸“Amaw a zynpaw ccungccaw tuh byapia thua vae khyh, thuasalama a zyn leipaw tuh byapia phe athua vae, pawccecize Pachia nynh a hoi thypaw Ccapaw min kha zyn khyh.¹⁹Byapianaw tuh hynhte nynh thua; awnaw tuh laephi vawlan hin yn thua, thuasalama ccungccaw hae tuh mih cyisahnaw ahoy khyh keiccuze awnaw laeze mohnaw kha a ryhua hae.²⁰Pawccecize ahoy leipaw a cyihpaw miakaw nynh awnaw kha a hua, a cyisahnaw alangku khyh nawlan awnaw kalan yn cceih khyh.²¹Thuasalama ahmepaw a cyihpaw nynh tuh a cyisahnaw kha Pachia rynaw hawte nynh thua cipaw ccaerarih lan muih athua nawlan awnaw kalan yn thua,” a cipya. Jesu te Baptisma Pyatu Johan

²²Tukoute Jesu te a zuitu hae tuh Judea ram lang cceih hae zah, tuin kyakhe minmin ryte sosoh um hae zah ccungccaw hae kha baptisma a pya hae.²³Johan mah Salim khua te anaekunaw Aenon kyakhe baptisma a pya hae. Pawccecize tuin kya tuh tui alung; ccungccaw hae tuh oun thua hae zah aning nynh baptisma a pya hae.²⁴Pawccecize Johan tuh thonginn kya saw thua loh khyh.

²⁵Johan a zuitu hae te Judah paw tuh ccikankunaw konglang bya a eikuh hae.²⁶Johan zuitu hae nynh Johan kalan cceih hae zah, “Sazae, Jordan vaw khuraw lang nang te na umkheih oh zah amaw kong ccaekia na khanpaw ccungccapaw nynh baptisma pya hae zah ccungccaw hae balyn tuh amaw kalan a cceih hae,” cite a hopya hae.²⁷Johan nynh, “Vaawlang te pya athua khyh lanze, ccungccaw nynh pawpaw mah mue kho lan khyh.²⁸‘Kae tuh Messiah ka thua khyh, amaw malang sawtypaw nynh ka thua,’ cite ka hopaw a thaetu ka ccaekia hae tuh naemaw maw nynh na thua oh.²⁹Akaenung liaccanung a hoitu tuh zudy ccangvaepaw nynh thua; zudy ccangvaepaw pe thadyn zah zudy ccangvaepaw roi a thaepaw a banpaw tuh a roi a thae keiccuze myarya a lungtua; tuhawte e ka lungtuanaw tuh accing.³⁰Aning tuh a kaethung cih zah kae tuh ka nyaabung cih,” a ci. Vaawlang te Yn Thuapaw

³¹Vaawlang te yn thuapaw tuh pawpaw balyn laeze a lehua; laephi kya-e ccungccaw tuh laephi ccungccaw thua zah laephi uccaw kong nynh a hothya. Vaawlang te yn thuapaw tuh pawpaw balyn laeze a lehua.³²Aning nynh a muihpaw te a thaepaw kha ccaekia a khan zemah hum nynh sanmah tuh-e ccaekia a khanpaw tuh lehkhan khyh hae.³³A ccaekia kha lehkhan vae paw ccungccaw nynh tuh Pachia tuh ahme cite a tynsah.³⁴Pachia nynh yn sawpaw ccungccaw nynh tuh Pachia bya kha a ho; pawccecize Pachia nynh tuh-e paw tuh Muisaw kha phe beih lan a pya.³⁵Paaw nynh Ccapaw kha sungsah zah pawpaw balyn kha a kuih kya marya a pya vae.³⁶Ccapaw a zynpaw miakaw tuh zungzae hiinnaw a hoi; Ccapaw kaw a eipaw tuh hiinnaw kha muih lan khyh zah, Pachia thinrianaw kha a tungvaw atyn cih. Jesu te Samarianung

¹Jesu nynh Johan laeze ccungccaw alunghua kha zuitu lang tangsah hae zah baptisma a pya hae cipaw kha Farasi hae nynh a thae vae hae cite Jesu nynh he a nyh tuh,²(Jesu amaw ccaccei nynh baptisma pya khyh hae, a zuitu hae nynh baptisma a pya hae),³Judea pee kha cciataw zah Galilee ram lang a ki.⁴Jesu nynh Samaria ram kha po a cciapaw bia.⁵Jakob nynh a ccapaw Josef a pyapaw laekua pe, Samaria ram kya-e Saikhar a ci hae paw khua kya a thua.⁶Tuin kya Jakob tuisung a um. Jesu tuh khua a ccongnaw kyate a bang keiccuze tuisung pe kya a haung. Accyh tuh ninthu loukaw nynh thua.

⁷Samarianung tuh tui the lan yn cceih zah Jesu nynh, “Nia lanpaw tui yn pyabua,” a cipya.⁸(Pawccecize a zuitu hae tuh aepaw re lan khualae lang a cceih hae.)⁹Samarianung nynh, “Nang tuh Judah paw na thua zah kae tuh Samarianung nynh ka thua, pawccemou tui nia lanpaw nae ngiaku?” a cipya. (Pawccecize Judah hae tuh Samaria hae te ccuepekuh khyh hae.)¹⁰Jesu nynh, “Pachia lasung hynh na la ny lanze thuasah, te, ‘Nia lanpaw tui yn pyabua,’ cite nang ae citupaw hynh hum nynh thua cipaw na ny lanze thuasah amaw hynh na ngiakuh paleih cih zah aning nynh hiinnaw tui kha ae pya cih paw lahyn,” a cipya.¹¹Nopinung nynh, “Bawipaw, tui thenaw lanpaw bangting na hoi khyh, tuisung tuh akhu; paw kyate mou tuh-e hiinnaw tui tuh na lah cih?¹²Kae minpaaw Jakob nynh e tuisung hynh kaening oun pya; amaw te a ccaaw hae te a sahiin hae nynh e tuisung kya-e tui hynh a nia hae; nang tuh Jakob laeze na lesaehua tou?” a cipya.¹³Jesu nynh, “Humhung zemah hynh-e tui a neihpaw tuh tui bua a haw cih,¹⁴thuasalama kae nynh ka pya lanpaw tui a neihpaw ccungccaw tuh a tuihaw boi vae lan khyh. Kae nynh ka pya lanpaw tui tuh tuh-e paw kya zungzae hiinnaw hanlan aphyhthungpaw tuidy athua cih,” a cipya.¹⁵Nopinung nynh, “Bawipaw, ka tuihaw vae khyh ccaw, tui the lan hynhlang mah ka ccia vae khyh ccaw tuh-e tui tuh yn pyabua,” a cipya.

¹⁶Jesu nynh, “La cceih, na vawpaw kha yn ko lah hynhlang yn thuakhae,” a cipya.¹⁷Nopinung nynh, “Vawpaw ka hoi khyh,” a ci. Jesu nynh, “ ‘Vawpaw ka hoi khyh,’ na cipaw tuh ahmepaw nynh na ho.¹⁸Pawccecize nang tuh vawpaw lu pangaw na hoi vae, atu na hoipaw hynh na vawpaw thua khyh. Na hopaw bya tuh ahmepaw nynh thua!” a cipya.¹⁹Nopinung nynh, “Bawipaw, nang tuh profeh lu kheit nynh na thua cipaw ka ny.²⁰Kaening kae minpaaw hae nynh hynh-e mua vawlan hin a la beik hae; thuasalama nanning Judah hae nynh Pachia tuh Jerusalem khua kya beik lanpaw nynh thua na ci oh,” a ci.²¹Jesu nynh, “Nopinung, kae hynh yn zyn, nanning nynh hynh-e mua vawlan thua leite, Jerusalem kya mah thua leite Paaw kha nae beik ccyh oh yn thua cih.²²Nanning nynh na ny lei oh paw kha na beik oh, kaening tuh kae nypaw kha kae beik, pawccecize khumnaw tuh Judah hae kyate nynh yn thua.²³Thuasalama Pachia a beik ccaccing hae paw nynh Paaw kha muisaw te thuasah, byaccing te thuasah oun beik hae ccyh yn thua cih, tuh-e ccyh tuh atumaw yn thua vae. Pawccecize Paaw nynh khahcihawpaw ccungccaw hae kha amaw a beiktu lang a ccung hae.²⁴Pachia tuh Muisaw thua zah a beik hae paw nynh muisaw te byaccing te a beik cih hae,” a ci.²⁵Nopinung nynh, “Khri a ci hae paw Messiah tuh yn thua vae cih cipaw ka ny; he yn thua te kaening kha pawpaw balyn pong yn hopah cih,” a cipya.²⁶Jesu nynh, “Na kya bya a hopaw kae hynh Messiah nynh ka thua,” a cipya.

²⁷Tuh ccyh lyakhe a zuitu hae oun thua hae zah nopinung ryte bya a hoku hae paw kha mih ngaeangthua. Tuhzemah hum nynh sanmah, “Pawmou na peki? Pawccemou hynh-e nung te bya na hoku oh?” cite khia khyh hae.²⁸Nopinung nynh a dawre kha cciataw zah khualae lang ki zah ccungccaw hae kyakhe,²⁹“Ka cyi boi paw balyn marya yn hopahpaw ccungccapaw hynh, rang oh lah oun dotua oh! Aning hynh Messiah thua vema?” a cipya hae.³⁰Ccungccaw hae tuh khua lungkhu te pou hae zah Jesu kalan a cceih hae.

³¹Tuh ccyh lyatuin zuitu hae nynh Jesu kha, “Sazae, ae hin,” cite a hopya hae.³²Thuasalama Jesu nynh minmin kha, “Nanning nynh na ny lei oh paw ae lanpaw looh ka hoi,” a cipya hae.³³Tukeiccuze zuitu hae nynh, “Lukhakheit nynh aepaw a ccyngpya vae vosi?” cite a hoku hae.³⁴Jesu nynh minmin kha, “Ka looh tuh kae yn sawtupaw rynaw cyi lanpaw te a ryalaw thangsah lanpaw hynh nynh thua.³⁵‘Sawpaw sah pali a um ung, tukoute loohrue ccyh yn thua vae cih,’ na ci oh. Thuasalama nanning kae hopya oh, loo hae hynh hoyte dotua oh, looh tuh phe voi vae zah rue ccyh azaw vae!³⁶Looh a ruepaw tuh ryalaw mee kha mue zah zungzae hiinnaw hanlan athae kha a ccakhungku; tuhteze nynh ccacii a vuapaw te looh a ruepaw tuh parouhte mih lungtua kalang cih.³⁷Ou tuhte, ‘Lukheitpaw nynh ccacii vua zah mingccangpaw nynh looh a rue,’ cite a ho hae paw bya tuh hein kyahin akyh.³⁸Naemaw nynh rya na law leinaw oh kya looh na rue ccaw oh cite nanning kha kae saw oh; mingccang hae nynh ryalah hae zah nanning nynh mih ryalaw lungkhu lang na tee vae oh,” a cipya hae.³⁹Nopinung nynh, “Kae nynh ka cyi boi paw balyn kha pong yn hopya,” cite ccaekia a khan keiccuze tuh-e khua kya um hae paw Samaria hae patae nynh Jesu kha a zyn hae.⁴⁰Tukeiccuze Samaria hae nynh a kalan oun cceih hae zah, kae kya um hin, cite a ngia hae; Jesu tuh tuin kya nin ning a um.⁴¹A bya liate ccungccaw hae houhouh lung lan a zyn hae.⁴²Minmin nynh nopinung kha, “Nang nynh na hopaw keiccu atu kae zynpaw thua vae khyh; pawccecize kaemaw ccaccei nynh a bya kha kae thae zah, e paw tuh laephi Khumtu ccaccing nynh thua cipaw kae ny,” a cipya hae.

⁴³Tuin kya nin ning a um koute Jesu tuh pou zah Galilee pee lang a cceih.⁴⁴Pawccecize, “Profeh tuh amaw ram kya sawtuanaw mue khyh,” cite Jesu amaw ccaccei nynh ccaekia a khan vae.⁴⁵Jesu tuh Galilee lang he a thua tuh Galilee ccungccaw hae nynh amaw kha lehkhan hae, pawccecize minmin mah poi kalan cceihbua hae zah Jerusalem khua poi kya Jesu nynh a cyipaw balyn kha a muihbua hae. Bawi Lu Kheit Ccapaw A Dansah

⁴⁶Te Jesu tuh tui kha misutui lang a raenaw Galilee pee Kana khua lang bua a thua. Kapernaum khua kya a ccapaw accihpaw bawi lu kheit a um.⁴⁷Tuh-e paw nynh Judea pee kyate Galilee pee lungkhu lang Jesu yn thua cipaw he a thae tuh, a kalan cceih zah vyavya chihpaw a ccapaw kha ccianuate a dansah nawlan thawte a ngia.⁴⁸Jesu nynh, “Nanning nynh muihsahnaw hae te ngaeangnaw hae hynh na muih khyh oh ze na zyn lan khyh oh,” cite tuh-e bawi tuh a hopya.⁴⁹Tuh-e bawi nynh, “Bawipaw, ka ccapaw a chi maw beih yn cceihbung,” a cipya.⁵⁰Jesu nynh, “La cceih ccavae, na ccapaw tuh a hiin cih,” a cipya. Jesu nynh a hopyapaw bya kha tuh-e paw nynh zyn zah a cceih.⁵¹Aning nynh a cciabung cciamang lyakhe a see hae nynh oun cciadue hae zah, “Na ccapaw phe dan vae,” cite a hopya hae.⁵²Aning nynh a ccapaw a danhua ccyh kha khia hae zah minmin nynh, “Inkhawnin ninthu suimilan ccangkheit kya a ngesaw akyaa vae,” a cipya hae.⁵³Tuh-e ccyh tuh Jesu nynh, “Na ccapaw tuh a hiin cih,” cite a cipya ccyh nynh thua cipaw kha a paaw nynh a ny. Tukeiccuze amaw te a innbyn hae balyn nynh a zyn hae.⁵⁴E tuh Jesu nynh Judea pee kyate Galilee pee lang a thua koute bua a raepaw vaeningnaw muihsahnaw nynh thua. Bethesda Kuaa kya Dansahnaw

¹Tukoute Judah hae poi ccangkheit um zah Jesu tuh Jerusalem lang a cceihthung.

²Jerusalem kya Tuu Koikua pe khe Hebru bya te Bethzatha a ci hae paw kuaa ccangkheit um zah, tuh-e kuaa kyatuin bu bupangaw a um.³Tuh-e bu hae kyatuin a mitmohpaw, a ccukhoupaw, kuihccuchih hae paw te ccinaw hoipaw ccungccaw patae nynh tui yn theku lanpaw kha ngawte a huekuh hae.⁴Pawccecize vaawpaw nynh ccyhkhakheit kya kuaa lungkhu lang rungbung zah tui kha a piasah; tuhte tui he a pia koute masaty a phungkuhpaw tuh a ccinaw kha phe a dan.⁵Sung thum kum tarya cia a ccihpaw lu kheit tuh tuin kya a la um.⁶Tuh-e paw phang a huekuhpaw kha Jesu nynh muih zah, tuin kya khaw cia a um vae cipaw he a nyh tuh, “Na dan ry tou?” cite a khia.⁷Ngeccihpaw nynh, “Bawipaw, tui he yn pia vae ze kuaa lungkhu lang yn phungbua lanpaw ccungccaw ka hoi khyh, he ka ccia lyakhe mingccangpaw nynh ka malang te phe leih a phungku,” cite a khung.⁸Jesu nynh, “Thokuh, na iphae kha lawkuh lah cceih ccavae,” a cipya.

⁹Vaekheihmawte ccungccapaw tuh a dan, a iphae kha lawkuh zah a cceih vae. Tuh-e nin tuh sabbath nin nynh thua.¹⁰Tukeiccuze Judah hae nynh dannaw a muetupaw kha, “Sabbath nin nynh thua, na iphae lawku lan ccan khyh,” a cipya hae.¹¹Thuasalama aning nynh, “Kae yn dansahtupaw nynh, ‘Na iphae kha lawkuh lah cceih ccavae,’ yn cipya,” cite a khung hae.¹²Minmin nynh, “ ‘Na iphae kha lawkuh lah cceih ccavae,’ ae cipahpaw tuh hummou?” cite a khia hae.¹³Dannaw a muetupaw nynh Jesu kha hum nynh thua cipaw nyh khyh; pawccecize tuin kya ccungccaw patae um hae zah Jesu tuh zya a pou vae.¹⁴Tukoute Jesu nynh tuh-e paw tuh beikinn kya muih zah, “Dotua, nang tuh phe na dan vae! Na tungvaw kya houh athah huapaw uccaw a thua khyh nawlan la sei nan vae,” a cipya.¹⁵Tuh-e paw nynh cceih zah amaw a dansahpaw tuh Jesu nynh thua cite Judah hae kha a hopya hae.¹⁶Tuh-e tuh sabbath nin kya a cyi keiccuze Judah hae nynh Jesu kha a tuaa a sah hae.¹⁷Thuasalama Jesu nynh minmin kha, “Ka Paaw tuh atu cia ryalah zah kae mah rya ka lah,” cite a khung hae.¹⁸E kong keiccuze Judah hae nynh amaw kha chia lan cite houh a nounuaku hae, pawccecize aning nynh sabbath nin a ro kyalya thua leite Pachia kha mah ka Paaw ci zah tuhte amaw te amaw kha Pachia te a ngingsaku, a ci hae. Ccapaw Kawhoinaw

¹⁹Jesu nynh minmin kha, “Byaccaccing kae hopya oh, Ccapaw nynh amaw kaw te pawsang mah cyih kho khyh, a Paaw nynh a cyipaw a muihpaw rou kha nynh a cyi kho; pawccecize Paaw nynh a cyipaw miakaw kha Ccapaw nynh mah a cyibua.²⁰Pawccecize Paaw nynh Ccapaw kha sungsah zah amaw nynh a cyipaw balyn kha Ccapaw marya a muihsah; nanning nae ngaeangthua nawlan hynh-e hae laeze ale huapaw ryalaw hae kha Ccapaw kha a muihsah ung cih.²¹Pawccecize Paaw nynh a chih hae paw kha thoosah zah a hiinsah hae hawte, Ccapaw nynh mah a rypaw ccungccaw hae kha a hiinsah hae.²²Pawccecize Paaw nynh hum ccungccaw sanmah byapia khyh, byapianaw miakaw kha Ccapaw kalan marya a pya.²³Tuhteze nynh ccungccaw balyn nynh Paaw kha saw a tua hae hawte Ccapaw kha mah saw a tua cih hae. Ccapaw kha saw a tua leipaw ccungccaw tuh Ccapaw a sawtupaw Paaw kha saw a tua leipaw nynh thua.²⁴Byaccaccing kae hopya oh, ka bya thae zah kae yn sawtupaw a zynpaw ccungccaw tuh zungzae hiinnaw a hoi; byapianaw ing vae lan khyh, chinaw kyate hiinnaw kalan phe a sulue vae.

²⁵“Byaccaccing kae hopya oh, a chih hae paw nynh Pachia Ccapaw roi oun thae cih hae zah roi a thae hae paw nynh oun hiinnaw hae ccyh tuh yn thua cih, tuh-e ccyh tuh atu mah a thua vae.²⁶Pawccecize Paaw nynh amaw kya hiinnaw a hoi hawte, Ccapaw nynh mah amaw kya hiinnaw a hoi nawlan kaw a pya.²⁷Ccapaw tuh Ccungccaw Ccapaw athua keiccuze byapianaw kaw kha mah a pya.²⁸E konglang hynh nae ngaeangthua nan sah; pawccecize shaw hae kya a um hae paw balyn nynh a roi oun thaenaw hae ccyh yn thua cih,²⁹hoynaw a rae hae paw tuh hiinnaw thoothuinaw kalan, hoyleinaw a rae hae paw tuh seibyapianaw thoothuinaw kalan oun pou cih hae. Jesu Ccaekia hae

³⁰“Kae tuh kamaw kaw te pawsang ka cyih kho khyh. Ka thae thyhte bya ka pia; ka byapianaw tuh ahme, pawccecize kamaw rynaw kha ka ccung khyh, kae yn sawtupaw a rynaw kha nynh ka ccung.

³¹“Kae nynh kamaw konglang kha ccaekia ka khan lanze ka ccaekia tuh kyh khyh.³²Kamaw konglang ccaekiakhantu mingccangpaw a um, aning nynh kae ka konglang ccaekia a khanpaw tuh akyh cipaw ka ny.³³Nanning nynh locceihtu hae kha Johan kalan na saw oh zah aning nynh byaccing hanlan ccaekia a khan.³⁴Kae tuh ccungccaw kyate ccaekia ka mue khyh, thuasalama nanning tuh khum na thua ccaw oh cite hynh-e bya hynh ka ho.³⁵Johan tuh aruapaw te a awpaw maeekhua nynh thua; nanning tuh amaw a awnaw kyakhe sosoh hoysah lan na ry oh.³⁶Thuasalama kae tuh Johan kya-e laeze ale huapaw ccaekia ka hoi; phe thang lan law lan cite Paaw nynh yn pyapaw ryalaw hae kha kae nynh ka law, tuh-e ryalaw hae nynh kae tuh Paaw nynh a sawpaw cipaw kha ccaekia a khan hae.³⁷Kae yn sawtupaw Paaw amaw ccaccei nynh mah kamaw konglang ccaekia a khan. Nanning nynh a roi kha na thae boi khyh oh, a muinsan mah na muih boi khyh oh zah³⁸a bya mah nae kya tyn khyh; pawccecize aning nynh a sawpaw kha na zyn khyh oh.

³⁹“Ccathyaa kya zungzae hiinnaw kae mue cih cite na tua oh zah Ccathyaa kha thawte na ccung oh; Ccathyaa tuh kamaw konglang ccaekia a khanpaw nynh thua.⁴⁰Thuasalama hiinnaw hoi khylan ka kalan nae cceih ry khyh oh.⁴¹Kae tuh ccungccaw hae kyate phu-enaw ka ccou khyh.⁴²Thuasalama nae kya Pachia sungsahnaw na hoi khyh oh cipaw ka ny.⁴³Kae tuh ka Paaw min te kae thua zah leh nae khan khyh oh; mingccangpaw nynh amaw min te yn thua lanze, tuh-e paw tuh leh na khan cih oh.⁴⁴Lu kheit te lu kheit pyakupaw thehoynaw kha na ccou ry oh zah amaw kyalya Pachia athuapaw kyate yn thuapaw thehoynaw kha na ccung lei oh paw nanning tuh pawtemou na zyn kho cih oh?⁴⁵Kae nynh Paaw malang kya nanning kha sei oun be cih cite tua nan oh; nanning nynh na ngaehoiku oh paw Moses nynh nanning kha sei ae be cih oh.⁴⁶Moses kha na zyn oh ze, kae hynh phe nae zyn cih oh paw, pawccecize aning nynh kamaw konglang nynh a zei.⁴⁷Thuasalama aning nynh a zeipaw kha na zyn khyh oh ze, pawtemou ka bya hynh na zyn kho cih oh?” a cipya hae. Thong Pangaw Looh Dangnaw (Mat 14.13-21; Mar 6.30-44; Luk 9.10-17)

¹Tukoute Jesu tuh Tiberias Rili a ci hae paw Galilee Rili khuraw lang a zua.²Jesu nynh ngeccih hae tungvaw a raepaw muihsahnaw kha a muih hae keiccuze ccungccaw zapi nynh a zui hae.³Jesu tuh mua vawlan kae zah a zuitu hae ryte a haung hae.⁴Judah hae poi athuapaw Kawtaw Poi tuh anae vae.⁵Jesu nynh ngawdo zah amaw kalan oun cceih hae paw ccungccaw zapi kha he a muih tuh Filip kha, “E ccungccaw hae nynh a ae lan hae paw sanlou kha teilangmou ah re cih oh?” a cipya.⁶E bya hynh Filip kha syntawtua khylan nynh a ho, pawccecize a cyi lanpaw kha amaw nynh phe a nypaw nynh thua.⁷Filip nynh, “Hynh-e hae milu raveih nynh sanlou beihtaraw ccite a mue nawlan hae denari phuapia za ning mee re lan zemah zaw lan khyh,” a cipya.⁸A zuitu lu kheit athuapaw Simon Peter a neitawpaw Andru nynh,⁹“Barli sanlou phe pangaw te ngasaw taraw zaw ning a hoipaw imuapaw hein kya mang um; thuasalama hynhzeih ccungccaw hanlan azaw cih zawtou?” a cipya.¹⁰Jesu nynh, “Ccungccaw hae kha haungsah oh,” a ci. Tuin kya lonua patae asae, tukeiccuze mih balynte thong pangaw loukaw acih hae paw ccungccaw hae tuh a haung hae.¹¹Jesu nynh sanlou kha lah zah lungtuabya a ho koute tuin kya a haung hae paw kha a nee hae. Tuhawte ngasaw kha mah ccungccaw hae nynh a ry hae zeih a nee hae.¹²Ccungccaw hae phe a byn hae te Jesu nynh a zuitu hae kha, “Alaepaw a eihpaw kha azo khyh nawlan ccakhung oh,” a cipya hae.¹³Tukeiccuze a aepaw ccungccaw hae kyate alaepaw kha ccakhung hae zah barli sanlou phe pangaw kya-e a eihpaw alaepaw tuh kee haw lae ning phe abeih.¹⁴Jesu nynh a raepaw muihsahnaw kha tuh-e ccungccaw hae nynh he a muih hae tuh, “E paw tuh lae vawlan yn thua cih a ci hae paw profeh ccaccing nynh thua,” a ci hae.

¹⁵Ccungccaw hae tuh oun thua cih hae zah amaw kha siapharan lang yn nangse vae cih hae cipaw kha Jesu nynh a ny keiccuze a makhaete mua lang zya bua a cceih. Jesu Tui vawlan A Cceih (Mat 14.22-33; Mar 6.45-52)

¹⁶Zete yn thua tuh a zuitu hae tuh rili kalan a cceihbung hae.¹⁷Kohlung lungkhu lang tee hae zah Kapernaum khua lang rili kha a zua hae. Phe moh vae zah Jesu tuh mih kalan thua loh khyh.¹⁸Khise yn tho keiccuze tuileih a tho.¹⁹Minmin nynh kohlung kha me thum me pali loukaw cia he a zaw hae te, Jesu tuh rili vawlan yn cceih zah kohlung kalan yn naekupaw kha a muih hae tuh a rih hae.²⁰Thuasalama Jesu nynh minmin kha, “Kamaw nynh ka thua, rih nan oh,” a cipya hae.²¹Te Jesu tuh kohlung lungkhu lang lungtuate teesah hae zah, kohlung tuh a ccia rynaw hae varang langkhe sosoh mawte phe a thua. Vaawlang e Sanlou

²²Awkhualan khe rili khuraw lang um hae paw ccungccaw hae nynh tuin kya kohlung ccangkheit kyalya nynh a um cipaw kha a ny hae; te Jesu tuh a zuitu hae ryte kohlung kalan teebua khyh cipaw te zuitu hae lalouh nynh a cceih hae cipaw kha mah a ny hae.²³Tuhzemah Tiberias khua langte oun cceihpaw ccangpaw kohlung hae tuh Bawipaw nynh lungtuabya a ho koute sanlou a la aenaw hae hmin pe oun thua hae.²⁴Ccungccaw hae nynh Jesu te a zuitu hae tuh tuin kya um khyh hae cipaw kha a muih hae keiccuze minmin mah kohlung lungkhu lang tee hae zah Jesu kha ccung khylan Kapernaum khua lang a cceih hae. Jesu tuh Hiinnaw Sanlou

²⁵Minmin nynh Jesu kha rili khuraw langkhe muih hae zah, “Sazae, hohtuhmou hein kya na thua?” cite a khia hae.²⁶Jesu nynh, “Byaccaccing kae hopya oh, nanning nynh muihsahnaw hae na muih oh keiccuze kae hynh nae ccung khyh oh, sanlou na ae oh zah nae vueso keiccu nynh nae ccung oh.²⁷Arohthyapaw looh hanlan ryalah nan oh, Ccungccaw Ccapaw nynh nanning ae pya cih oh paw zungzae hiinnaw hanlan atynpaw looh elang ryalah oh; pawccecize Paaw Pachia nynh amaw kha tazeih phe khia vae paw nynh thua,” a ci.²⁸Minmin nynh, “Pachia nynh a rypaw ryalaw kae law nawlan, pawmou kae cyih cih?” cite a khia hae.²⁹Jesu nynh, “Pachia nynh a rypaw ryalaw tuh, amaw nynh a sawpaw kha na zyn lan oh paw kha nynh athua,” cite a khung hae.³⁰Tukeiccuze minmin nynh, “Kaening nynh kae muih zah nang kha kae zyn nawlan, paw muihsahnaw mou nae raepah cih? Paw rya mou na lah cih?³¹‘A ae lan hae paw sanlou kha vaawlang te Pachia nynh a pya hae,’ cite azeiku hawte, kae minpaaw hae nynh manna kha ramkaw kya a ae hae,” a ci hae.³²Jesu nynh, “Byaccaccing kae hopya oh, Moses nynh vaawlang e sanlou kha ae pya khyh oh; ka Paaw nynh vaawlang e sanlou ccaccing kha ae pya oh.³³Pawccecize Pachia kya-e sanlou tuh vaawlang te yn rungbung zah laephi ccungccaw hae kalan hiinnaw a pyatupaw nynh thua,” a cipya hae.³⁴Minmin nynh, “Bawipaw, tuh-e sanlou tuh zungzae oun pya,” a ci hae.

³⁵Jesu nynh, “Kae tuh hiinnaw sanlou nynh ka thua. Ka kalan yn cceihpaw ccungccaw tuh a vuelaw boi vae lan khyh, kae yn zynpaw tuh a tuihaw boi vae lan khyh.³⁶Thuasalama nanning nynh phang nae muih oh zemah nae zyn khyh oh cite kae hopya vae oh.³⁷Paaw nynh yn pyapaw ccungccaw hae balyn nynh ka kalan oun cceih cih hae; ka kalan yn cceihpaw ccungccaw tuh kharouh ka dee boi lan khyh.³⁸Pawccecize kae tuh kamaw rynaw kha cyi khylan vaawlang te kae rungbung khyh, kae yn sawtupaw rynaw cyi khylan nynh kae rungbung.³⁹Kae yn sawtupaw nynh a rynaw tuh, kae yn pyapaw ccungccaw hae balyn kha lu kheit san zosah leite, nyathya nin kya thoosah lan hae paw nynh thua.⁴⁰Ka Paaw nynh a rypaw tuh, Ccapaw kha muih zah a zynpaw miakaw nynh zungzae hiinnaw a hoi nawlan hae nynh thua; nyathya nin kya minmin kha ka thoosah cih hae,” a ci.

⁴¹“Kae tuh vaawlang te yn rungbungpaw sanlou nynh ka thua,” cite a ho keiccuze Judah hae tuh a ccohkuh hae.⁴²Minmin nynh, “E paw tuh Josef ccapaw Jesu thua khyh tou? A paaw te a nung tuh ah ny oh paw khaw? Pawtemou, ‘Kae tuh vaawlang te kae rungbungpaw,’ a ciku?” a ci hae.⁴³Jesu nynh, “Naemaw te naemaw laku ccohkuh nan oh.⁴⁴Kae yn sawtupaw Paaw nynh a soih khyh lanze hum ccungccaw sanmah ka kalan thua kho lan khyh, ka kalan yn cceihpaw ccungccaw kha nyathya nin kya ka thoosah cih.⁴⁵‘Minmin balyn tuh Pachia nynh a ccangpya hae paw athua cih hae,’ cite profeh hae ccauh kya azeikuh. Paaw kya-e kha thae zah a ccangkuhpaw miakaw tuh ka kalan oun cceih hae.⁴⁶Pachia kyate yn thuapaw aning nynh Paaw kha a muih, aning laelan hum ccungccaw nynh san Paaw kha muih khyh.⁴⁷Byaccaccing kae hopya oh, a zynpaw ccungccaw tuh zungzae hiinnaw a hoi.⁴⁸Kae tuh hiinnaw sanlou nynh ka thua.⁴⁹Nae minpaaw hae nynh ramkaw kya manna kha a ae hae, thuasalama a chih hae.⁵⁰Vaawlang te yn rungbungpaw sanlou a aepaw miakaw tuh chih lan khyh hae.⁵¹Kae tuh vaawlang te yn rungbungpaw ahiinpaw sanlou nynh ka thua. Humhung zemah e sanlou a aepaw tuh zungzae a hiin cih; kae nynh laephi hiinnaw hanlan ka pya lanpaw sanlou tuh ka saw nynh thua,” cite a hopya hae.

⁵²Tukeiccuze Judah hae nynh, “Pawtemou e ccungccapaw nynh a saw kha aening ae lan oun pya kho cih?” cite mimaw te mimaw laku thawte a eikuh hae.⁵³Jesu nynh, “Byaccaccing kae hopya oh, Ccungccaw Ccapaw a saw kha na ae khyh oh zah a chii kha na nia khyh oh ze, nae kya hiinnaw na hoi khyh oh.⁵⁴Humhung zemah ka saw kha ae zah ka chii a neihpaw tuh zungzae hiinnaw a hoi, tuh-e paw tuh nyathya nin kya ka thoosah cih;⁵⁵pawccecize ka saw tuh looh ccaccing thua zah ka chii tuh niapaw ccaccing nynh thua.⁵⁶Ka saw kha ae zah ka chii a neihpaw tuh ka kya um zah kae mah a kya ka um.⁵⁷A hiinpaw Paaw nynh kae hynh yn saw zah Paaw liate kae ka hiin hawte, kae yn aepaw ccungccaw tuh kamaw liate a hiin cih.⁵⁸E tuh vaawlang te yn rungbungpaw sanlou nynh thua, nae minpaaw hae nynh manna sanlou kha mang a ae hae pite a chi hae hawte thua khyh; e sanlou a aepaw tuh zungzae a hiin cih,” a cipya hae.⁵⁹E hynh Jesu nynh Kapernaum khua sinakok kya a ccangpya lya hae nynh a ho. Zungzae Hiinnaw Bya

⁶⁰A zuitu hae patae nynh tuh-e bya he a thae hae tuh, “E ccangpyanaw tuh myarya aru, hum nynh mou a thaethya kho cih?” a ci hae.⁶¹A zuitu hae nynh tuh-e kong a ccohku hae paw kha Jesu nynh he a nyh tuh minmin kha, “E bya nynh nae lung ae thangsah oh tou?⁶²Ccungccaw Ccapaw nynh langmaw a umtynaw lang a kaethungpaw kha na muih oh ze pawte athua cih?⁶³Hiinnaw a pyatu tuh Muisaw nynh thua, pynsaw tuh ccungkia khyh; nae kya ka hopaw bya hynh muisaw thua zah hiinnaw mah athua.⁶⁴Thuasalama nanning laku a zyn leipaw abang a um,” a cipya hae. Pawccecize Jesu nynh atakaw lya mawte a zyn lei hae paw tuh hum hae nynh athua hae cipaw te hum nynh amaw kha a phee cih cipaw kha phe a ny vae.⁶⁵Jesu nynh, “Hynh-e keiccuze ka Paaw nynh a ua khyh lanze hum sanmah ka kalan thua kho lan khyh cite phe kae hopya vae oh,” a ci.

⁶⁶Tuin ccyh kyate a zuitu hae patae tuh nulang ki hae zah amaw ryte cceihkheih vae khyh hae.⁶⁷Tukeiccuze Jesu nynh zuitu hae lu haw lae ning kha, “Nanning so na cceihbua ry oh tou?” a cipya hae.⁶⁸Simon Peter nynh, “Bawipaw, hum kalan mou kae cceih cih? Nang nynh zungzae hiinnaw bya na hoi.⁶⁹Nang tuh Pachia kyate yn thuapaw Mi Thyaa nynh na thua cipaw kaening nynh kae zyn zah kae ny,” a cipya.⁷⁰Jesu nynh, “Nanning lu haw lae ning hynh kamaw nynh kae po khyh oh tou? Tuhzemah nanning lakuze lu kheit tuh satan nynh thua,” a ci.⁷¹A honuathepaw tuh Simon Iskariot ccapaw Judas nynh thua; pawccecize aning tuh lu haw lae ning kyaze lu kheit mang athua pite Jesu kha a phee cih paw nynh thua. Judah hae Bu Poi kya Jesu

¹Tukoute Jesu tuh Galilee pee kya khua a ccong; pawccecize Judah hae nynh chia lan a ccung hae keiccuze Judea pee kya khuaccong ry khyh.²Atu Judah hae Bu poi tuh anae vae.³Tukeiccuze a neitaw hae nynh Jesu kha, “Na zuitu hae nynh mah rya na lawpaw kha a muihbua ccaw hae, e kyate toikuh lah Judea pee lang cceih ccavae.⁴Pawccecize ccungccaw patae nynh oun nyh hae sah ci a rypaw nynh tuh pawsang mah aphirute cyih boi khyh. Nang nynh e uccaw hae hynh na cyi lan thua ze, laephi ccungccaw hae kalan langku tua,” a cipya hae.⁵(Pawccecize amaw a neitaw hae nynh heize amaw kha zyn khyh hae.)⁶Jesu nynh minmin kha, “Ka ccyh thua loh khyh, nanning hanlan tuh pawpaw ccyh mah nae ccyh nynh thua.⁷Laephi nynh nanning tuh ae hua kho khyh oh, thuasalama kae tuh yn hua hae, pawccecize nae umtuzia hoy khyh cite ccaekia ka khan keiccu nynh thua.⁸Tuh-e poi kalan nanning la cceih oh, kae tuh ka ccyh phe ccing lan thua loh khyh zah tuh-e poi kalan ka cceih loh lan khyh,” a cipya hae.⁹Tuhte a ho koute Jesu tuh Galilee pee kya a um ung.

¹⁰Thuasalama a neitaw hae tuh poi kalan a cceih kou hae te, Jesu mah a cceihthung bua, thuasalama alangkuh lei lante aruh lante nynh a ccia.¹¹Judah hae nynh poi kya amaw kha ccung hae zah, “Jesu tuh teimou a um?” a ci hae.¹²Amaw te asekuh lante ccungccaw zapi laku kya byalungnaw patae a um; pawccecize ccungccaw abang nynh, “Aning tuh ccungccaw hoypaw nynh thua,” a ci hae. Mingccang hae nynh, “Ccungccaw hoypaw thua khyh, aning nynh ccungccaw hae kha a ling hae,” a ci hae.¹³Tuhzemah Judah hae raw a ri hae keiccuze hum nynh sanmah amaw kong kha alangkuh lante ho ngan khyh hae.

¹⁴Tuh-e poi angankuh loukaw athang te, Jesu nynh beikinn lang cceih zah a ccangpya hae.¹⁵Judah hae tuh mih ngaeangthua zah, “E ccungccapaw hynh a ccangkuh lei pite pawtemou hynhzeih hynh a ny kho?” a ci hae.¹⁶Jesu nynh, “Ka ccangpyanaw hynh kamaw kya-e thua khyh, kae yn sawtupaw kya-e nynh thua.¹⁷Ccungccaw lu kheit nynh Pachia rynaw kha a cyi ry lanze, ka ccangpyanaw kong kha a nyh cih, tuh-e tuh Pachia kya-e tou, tuhkhyhze kamaw kya-e tou ka ho cipaw a nyh cih.¹⁸Amaw a rynaw te a hopaw ccungccaw tuh amaw phu-enaw nynh a ccungku; thuasalama a sawtupaw phu-enaw a ccungpaw tuh ahmepaw thua zah a lungkhu kya seinaw um khyh.

¹⁹“Moses nynh nanning kha kawbya ae pya khyh oh tou? Tuhzemah hum nynh san kawbya kha na zui khyh oh? Pawccemou kae hynh chia lan nae ccung oh?” a cipya hae.²⁰Ccungccaw hae nynh, “Nang tuh raerangsaro bahkuhpaw nynh na thua, hummou nang chia lan ae cih?” a ci hae.²¹Jesu nynh, “Kae nynh ryalaw ccangkheit ka lah zah nae balynte nae ngaeangthua.²²Moses nynh nanning kha vingdungawkunaw ae pya oh; (tuh-e tuh Moses kyate yn thopaw thua leite minpaaw hae kyate yn thopaw nynh thua;) nanning nynh sabbath nin kya ccungccapaw kha vingdung na aw oh.²³Moses Kawbya tuh ro athua khyh nawlan ccungccapaw lu kheit tuh sabbath nin kya vingdung a awku lanze, kae nynh sabbath nin kya ccungccaw lu kheit ka dansah keiccu tou ka tungvaw nae thinria?²⁴Atolang muihnaw te byapia nan oh, ahmepaw byapianaw te byapia oh,” a cipya hae. Jesu Kong Byakhianaw

²⁵Jerusalem khua e ccungccaw abang nynh, “E paw tuh minmin nynh chia lan cite a ccung hae paw kha thua khyh tou?²⁶Dotua oh, aning tuh rawhoyte bya a ho, thuasalama minmin tuh pawpaw bya mah ho khyh hae. E paw tuh Messiah nynh thua cipaw uktu hae nynh phe nyh ccaccing hae zahte vema?²⁷Tuhzemah kaening nynh e paw tuh paw kyate yn thuapaw cipaw kae ny; thuasalama Messiah tuh he yn thua te, paw kyate nynh yn thua cipaw hum ccungccaw nynh san nyh lan khyh,” a ci hae.²⁸Jesu nynh beikinn kya a ccangpya lya hae khe thawte sia zah, “Nanning nynh kae hynh nae ny oh, paw kyate nynh kae thua cipaw mah nae ny oh. Kae tuh kamaw kaw te kae thua khyh, kae yn sawtupaw tuh ahmepaw nynh thua, nanning nynh amaw kha na nyh khyh oh.²⁹Thuasalama kae tuh amaw kha ka ny; pawccecize kae tuh amaw kyate kae thuapaw thua zah, aning nynh kae hynh yn saw,” a ci.³⁰Minmin nynh Jesu kha kyng lan a ccung vae hae; thuasalama a ccyh azaw loh khyh keiccuze hum nynh sanmah kyng khyh hae.³¹Ccungccaw patae nynh amaw kha zyn hae zah, “Messiah tuh he yn thua te, e ccungccapaw nynh a raepaw muihsahnaw laeze alunghua yn rae cih vema?” a ci hae.

³²Ccungccaw hae nynh Jesu konglang tuhte palei a hoku hae paw kha Farasi hae nynh a thae hae; tetuh Farasi hae te ranpibawi lepaw hae nynh amaw kha kyng khylan beikinn ngawtu hae kha a saw hae.³³Jesu nynh, “Kae tuh nanning ryte sosoh nynh ka um cih, tukoute kae yn sawtupaw kalan ka cceih cih.³⁴Nanning nynh kae hynh nae ccung cih oh zah nae muih lan khyh oh, pawccecize ka umnaw lang na cceih kho lan khyh oh,” a cipya hae.³⁵Judah hae nynh, “Aening nynh ah muih leinaw lang oh aning tuh teilangmou a cceih cih? Grik hae laku um hae paw a phiakuh hae paw Judah hae kalan a cceih cih zah Grik hae kha a ccangpah cih hae tou?³⁶‘Nanning nynh nae ccung cih oh zah nae muih lan khyh oh; ka umnaw lang na cceih kho lan khyh oh,’ cite a hopaw hynh paw a horynaw mou athua?” cite lu kheit te lu kheit a hoku hae. Muisaw Kong Ccangpyanaw

³⁷Poi athang nin, abyapihua nin khe Jesu nynh thadyn zah, “Lukhakheit nynh tui a haw ze ka kalan yn cceih sah lah neih sah.³⁸Ccathyaa nynh, ‘Kae yn zynpaw tuh a thinlung kyate ahiinpaw tuidy alua cih,’ a ci hawte athua cih,” cite thawte a sia.³⁹Jesu nynh amaw a zyn hae paw nynh a mue lan hae paw Muisaw kong kha nynh hynh-e hynh a honuathe; tuh ccyh lya tuh Thyaa Muisaw kha pya thua loh khyh, pawccecize Jesu tuh phu-enaw te thoosah thua loh khyh. Jesu Kong Ccungccaw hae Tuanaw

⁴⁰Tukeiccuze ccungccaw patae nynh hynh-e bya a thae hae tuh, “E paw tuh profeh ccaccing nynh thua,” a ci hae.⁴¹Mingccang hae nynh, “E paw tuh Messiah nynh thua,” a ci hae. Thuasalama abang nynh, “Messiah tuh Galilee kyate yn thua cih zawtou?⁴²Messiah tuh David ciihan kyate, David a umnaw Bethlehem khua kyate nynh yn thua cih cite Ccathyaa nynh ho khyh tou?” a ci hae.⁴³Tetuh Jesu keiccuze ccungccaw hae laku kya phiakunaw a um.⁴⁴Ccungccaw abang nynh amaw kha kyng lan a ry hae; thuasalama hum nynh sanmah Jesu kha kyng khyh hae. A Zyn leipaw Kawhoitu hae

⁴⁵Beikinn ngawtu hae tuh ranpibawi lepaw hae te Farasi hae kalan oun thua hae; minmin nynh, “Pawccemou amaw kha nae cciakhae khyh oh?” cite beikinn ngawtu hae kha a khia hae.⁴⁶Beikinn ngawtu hae nynh, “E paw nynh a ho hawte hum nynh sanmah byaho boi khyh!” cite a khung hae.⁴⁷Farasi hae nynh, “Nanning so phe ae lingbua vae oh tou?⁴⁸Kawhoitu hae te Farasi hae laku kya amaw a zynpaw lu kheit san a um zawtou?⁴⁹Kawbya a nyh lei hae paw tuh-e zapi hae tuh thyalaw athua hae,” cite a khung hae.⁵⁰Farasi hae kyaze lu kheit athuapaw, langmawlya Jesu kalan a cceih boi paw Nikodemu nynh minmin kha,⁵¹“Ccungccaw lu kheit nynh a hopaw kha thaety leite, a cyipaw mah nyty leite, aening ah Kawbya nynh tuh-e paw tuh bya a pia tou?” cite a khia hae.⁵²Minmin nynh, “Nang so Galilee paw tou na thuabua? Galilee kyate profeh lu kheit san pou boi khyh cipaw kha ccungtua lah na nyh cih,” cite a khung hae.

⁵³Ccungccaw hae balyn tuh mih inn raveih lang a cceih hae. A Sei lya Kyng hae paw Nopinung

¹Jesu tuh Oliv mua lang a cceih.²Awkhua takaw te beikinn lang bua a cceih. Ccungccaw hae balyn tuh Jesu kalan oun cceih hae, te aning nynh haung zah minmin kha a ccangpya hae.³Kawbya sazae hae te Farasi hae nynh a vawpaw thua leipaw pise te a sei cciamangpaw nopinung kha oun cciakhae hae zah mih balyn malang khe a nung hae,⁴minmin nynh Jesu kha, “Sazae, hynh-e nopinung hynh a vawpaw thua leipaw pise te a sei cciamang lya a kyng hae paw nynh thua.⁵Kawbya kyaze Moses nynh tuhcihawpaw nopi hae kha lung te deih lan kaw oun pya. Nang nynh pawtemou na ho cih?” a cipya hae.⁶Minmin nynh hynh-e bya a ho hae paw tuh Jesu kha seibe khylan a syntawnaw hae paw nynh thua. Thuasalama Jesu nynh bakhung zah a kuihdung te laephi kya ccaw a zei.⁷Minmin nynh tuhcite palei a khia hae tuh, Jesu nynh lawbabin lan haung zah minmin kha, “Nanning lakuze seinaw a hoi leipaw nynh nopinung kha lung te deih ty sah,” a cipya hae.⁸Tukoute bua bakhung zah laephi kya ccaw bua a zei.⁹Tuh-e bya he a thae hae tuh, piccan huapaw kyate tho zah lu kheit koute lu kheit a cceih vae hae; Jesu kyalya kha cciataw hae zah a malang khe nopinung tuh a thadyn.¹⁰Jesu nynh lawbabin lan haung zah nopinung kha, “Nopinung, teimou a um hae? Hum nynh san sei ae be khyh tou?” a cipya.¹¹Nopinung nynh, “Hum nynh san sei yn be khyh, Bawipaw,” a cipya. Jesu nynh, “Kae nynh mah sei kae be khyh; la cceih lah la sei nan vae,” a cipya. Kae tuh Laephi Awnaw

¹²Jesu nynh, “Kae tuh laephi awnaw nynh ka thua. Kae yn zuipaw tuh mohnaw kya cceih lan khyh, hiinnaw awnaw kha a hoi cih,” cite bua a hopya hae.¹³Tukeiccuze Farasi hae nynh, “Nang tuh namaw konglang kha namaw nynh ccaekia na khan; na ccaekia tuh kyh khyh,” a cipya hae.¹⁴Jesu nynh, “Kae tuh kamaw konglang ccaekia ka khan zemah ka ccaekia tuh akyh; pawccecize kae tuh paw kyate nynh kae thua cipaw te teilang nynh ka cceih cih cipaw ka ny; thuasalama nanning nynh kae tuh paw kyate nynh kae thua cipaw te teilang nynh ka cceih cih cipaw kha na nyh khyh oh.¹⁵Nanning tuh ccungccaw phung thyhte bya na pia oh; kae tuh hum sanmah bya ka pia khyh.¹⁶Tuhzemah kae tuh bya ka pia ze, ka byapianaw tuh ahme, pawccecize ka makhaete bya ka pia khyh, kae yn sawtupaw Paaw ryte nynh kae um.¹⁷Nae kawbya kya mah ccungccaw lu ning ccaekia tuh akyh cite azeikuh.¹⁸Kae tuh kamaw kong kha ccaekia ka khan, te kae yn sawtupaw Paaw nynh mah kamaw kong kha ccaekia a khan,” a ci.¹⁹Minmin nynh, “Na Paaw tuh teimou a um?” cite a khia hae. Jesu nynh, “Nanning nynh kae thuasah, ka Paaw thuasah na nyh khyh oh; kae hynh nae la ny oh ze, ka Paaw mah na nyh cih oh,” cite a khung hae.²⁰Jesu nynh e bya hynh beikinn lungkhu sisuakhaan kya a ccangpya lya hae nynh a ho; amaw ccyh azaw loh khyh keiccuze hum nynh sanmah kyng khyh hae. A Chi lanpaw A Hoty

²¹Jesu nynh minmin kha, “Kae tuh ka cceih cih zah nanning nynh nae ccung cih oh, thuasalama nae seinaw kyakhe na chih cih oh, ka ccianaw lang na thua kho lan khyh oh,” bua a cipya hae.²²Tetuh Judah hae nynh, “ ‘Ka ccianaw lang na thua kho lan khyh oh,’ a cipaw tuh amaw te amaw tou a theihkuh cih?” a ci hae.²³Jesu nynh minmin kha, “Nanning tuh akaw lang e nynh na thua oh, kae tuh luki lang e nynh ka thua; nanning tuh hynh-e laephi kya-e nynh na thua oh; kae tuh hynh-e laephi kya-e ka thua khyh.²⁴Tukeiccuze nanning kha, ‘Nae seinaw kya na chih cih oh,’ cite kae hopya oh; pawccecize kae tuh aning nynh ka thua cipaw hynh na zyn khyh oh ze, nae seinaw kya na chih cih oh,” a cipya hae.²⁵Minmin nynh, “Nang tuh hummou?” a ci hae. Jesu nynh minmin kha, “Kae tuh hum nynh ka thua cipaw kha atakaw lya mawte phe kae hopya vae oh.²⁶Nanning konglang ka ho lanpaw te byapia lanpaw patae a um; thuasalama kae yn sawtupaw tuh ahme, amaw kyate ka thaepaw miakaw kha laephi kya ka phy,” a cipya hae.²⁷Jesu nynh minmin kya Paaw kong a hopaw kha thaethya khyh hae.²⁸Tukeiccuze Jesu nynh minmin kyakhe, “Ccungccaw Ccapaw kha he nae saethung oh te, kae tuh aning nynh ka thua cipaw kha thuasah, kamaw kaw te pawsang cyi leite, ka Paaw nynh yn ccangpya hawte ka hopaw kha thuasah nae nyh cih oh.²⁹Kae yn sawtupaw tuh ka kya um zah ka makhaete yn cciataw boi khyh, pawccecize a lungrypaw kyalya kha kae nynh ka cyi,” a cipya hae.³⁰E bya hynh Jesu nynh he a ho tuh ccungccaw patae nynh a zyn hae. Zuitu hae Ccaccing

³¹Jesu nynh amaw zyn hae paw Judah hae kha, “Nanning nynh ka bya kya na tyn oh ze, ka zuitu hae ccaccing na thua cih oh.³²Nanning nynh byaccing kha na nyh cih oh zah byaccing nynh nanning kha ae luesah cih oh,” a cipya hae.³³Minmin nynh amaw kha, “Kaening tuh Abraham ciihan kae thua zah humhung see lang mah kae tang boi khyh. ‘Nanning tuh luesah na thua cih oh,’ na cipaw tuh pawmou na ho ry?” cite a ci hae.

³⁴Jesu nynh, “Byaccaccing kae hopya oh, humhung zemah seinaw rya a lahpaw tuh seinaw see nynh thua.³⁵See tuh innbyn kya zungzae um boi khyh; ccapaw tuh zungzae a um.³⁶Tukeiccuze Ccapaw nynh ae luesah oh ze, na lue ccaccing cih oh.³⁷Abraham ciihan nynh na thua oh cipaw tuh ka ny; thuasalama ka bya tuh nae kya umnaw a hoi khyh keiccuze kae kha chia lan nae paccynnuaku oh.³⁸Kae tuh ka Paaw kya ka muihpaw kha ka ho; nanning tuh nae paaw nynh ae hopya oh paw kha na cyi oh,” a ci. Jesu te Abraham

³⁹Minmin nynh, “Abraham tuh kae paaw nynh thua,” a cipya hae. Jesu nynh, “Nanning tuh Abraham ccaaw hae na thua oh ze, Abraham nynh a cyipaw khaw na cyihbua cih oh.⁴⁰Atu tuh Pachia kya-e ka thaepaw byaccing kha nanning kae hopah oh paw kamaw hynh chia lan na zuaku oh; Abraham tuh hynhte cyih khyh.⁴¹Nanning tuh nae paaw nynh a cyipaw kha na cyi oh,” a cipya hae. Minmin nynh, “Kaening tuh ohhuakunaw kyate a puipaw kae thua khyh, kaening nynh Paaw lu kheit kyalya kae hoi zah tuh-e tuh Pachia nynh thua,” a cipya hae.⁴²Jesu nynh, “Pachia tuh nae Paaw a la thua ze, kae hynh nae sungsah cih oh; pawccecize kae tuh Pachia kyate kae thua zah atu hein kya ka um, kamaw kaw te kae thua khyh, Pachia nynh kae hynh yn saw.⁴³Pawccemou ka bya hynh na thaethya khyh oh? Ka bya hynh na thae kho khyh oh keiccu nynh thua.⁴⁴Nanning tuh nae paaw Satan kya-e na thua oh zah, nae paaw rynaw kha na cyi ry oh. Aning tuh atakaw lya mawte ccungccaw theihtupaw thua zah byaccing kya tyn khyh. Pawccecize amaw kya byaccing um khyh. Hynbya a ho vae ze amaw thuanaw kha nynh a ho; pawccecize aning tuh a hynpaw thua zah hynbya a paaw nynh thua.⁴⁵Byaccing kae hopya keiccu oh nae zyn khyh oh.⁴⁶Nanning lakuze hum nynh mou seinaw ka hoinaw kong a langsakuh kho cih? Kae nynh byaccing ka ho lanze pawccemou nae zyn khyh oh?⁴⁷Pachia kya-e ccungccaw nynh tuh Pachia bya kha a ngae, nanning tuh Pachia kya-e na thua khyh oh keiccuze a bya kha na ngae khyh oh,” a cipya hae. Abraham A Um Maw Ka Um

⁴⁸Judah hae nynh Jesu kha, “Nang tuh Samariapaw na thua zah raerangsaro bahkuhpaw nynh na thua cipaw hmerarih lan kae hopah khyh tou?” a cipya hae.⁴⁹Jesu nynh, “Kae tuh raerangsaro bahkuhpaw ka thua khyh, thuasalama ka Paaw kha saw ka tua, te nanning nynh kae hynh saw nae tua khyh oh.⁵⁰Kae tuh kamaw phu-enaw kha ka ccungkuh khyh; phu-enaw a ccungpaw lu kheit um zah aning tuh byapiatu nynh thua.⁵¹Byaccaccing kae hopya oh, humhung zemah ka bya a zuipaw tuh chinaw tung boi vae lan khyh,” a ci.⁵²Judah hae nynh Jesu kha, “Nang tuh raerangsaro bahkuhpaw cipaw atu kae ny. Abraham tuh a chih, profeh hae mah a chih hae; nang nynh, ‘Humhung zemah ka bya a zuipaw tuh chinaw tung boi vae lan khyh,’ na ci.⁵³Nang tuh a chih vae paw kae paaw Abraham laeze na lesaehua tou? Profeh hae mah a chih hae; nang tuh humlangmou na riakuh?” a ci hae.⁵⁴Jesu nynh, “Kamaw te kamaw phu-enaw ka pyaku ze, ka phu-enaw tuh accakaepaw nynh thua, phu-enaw yn pyapaw tuh ka Paaw nynh thua; nanning nynh amaw kha, ‘Aning tuh kae Pachia nynh thua,’ na ci oh.⁵⁵Tuhzemah amaw kha na nyh khyh oh, kae tuh amaw kha ka ny; amaw kha ka nyh khyh ka ci ze, naemaw hawte mihynpaw nynh ka thua cih, thuasalama amaw kha ka nyh zah a hopaw kha ka zui.⁵⁶Nae paaw Abraham tuh ka thua lanpaw ccyh kha myarya a ngaehoi; tuh-e tuh muih zah myarya a lungtua,” a cipya hae.⁵⁷Judah hae nynh, “Kum sung pangaw san na cih loh leite Abraham tuh na muih vae tou?” a ci hae.⁵⁸Jesu nynh, “Byaccaccing kae hopya oh, Abraham a um mawze kae tuh ka um vae,” a cipya hae.⁵⁹Tetuh Jesu deihnaw lanpaw lung kha a khuingku hae; thuasalama Jesu tuh zya rekuh zah beikinn kyate po a pou. Mitmohpaw A Dansah

¹Jesu nynh po a ccia lyakhe a pui takaw te a mitmohpaw lu kheit kha a muih.²A zuitu hae nynh, “Sazae, e paw nynh mitmohte a puipaw hynh, hum seinaw keiccu mou, amaw tou a sei, tuhkhyhze a nung te a paaw tou a sei hae?” cite a khia hae.³Jesu nynh, “E ccungccapaw mah sei khyh, a nung te a paaw mah sei khyh hae, a tungvaw kya Pachia ryalawnaw langku khylan mitmohte yn puipaw nynh thua.⁴Ninthu ccyh kya kae yn sawtupaw rya kha ah lah cih oh; hum ccungccaw nynh san rya a law kho khyh ccyh khuazi tuh yn thua cih.⁵Laephi kya ka um lungkhu balyn kae tuh laephi awnaw nynh ka thua,” a ci.⁶Tuhte a ho koute Jesu nynh laephi kya a tuing thoi zah tuiccua kha a rae koute mitmohpaw mit kha a noipya.⁷Tuh-e paw kha, “La cceih, Siloam kuaa kya la singkuh,” a cipya. (Siloam cipaw asuilan tuh ‘Saw’ cipaw nynh thua). Tukeiccuze aning nynh cceih zah a singku, te ngawmuihte a ki.⁸Tukeiccuze a innpaw hae te langmawlya looh ngiakute a um lyaze a la muih boi hae paw nynh, “E paw hynh haung zah leih a ngiakuhpaw kha thua khyh tou?” a ci hae.⁹Ccungccaw abang nynh, “Amaw maw nynh thua,” a ci hae; mingccang hae nynh, “Thua khyh, amaw te a lokuh hae paw nynh thua,” a ci hae; te aning nynh, “Kamaw maw hynh nynh ka thua,” a ci.¹⁰Tukeiccuze minmin nynh, “Pawtemou na mit a aw?” cite a khia hae.¹¹Aning nynh, “Jesu a ci hae paw ccungccapaw nynh tuiccua kha rae zah ka mit kya yn noipah koute, ‘Siloam kuaa kalan la cceih lah la singkuh,’ yn cipya, te ka cceih zah he ka singkuh tuh ngaw ka muih vae,” a ci.¹²Minmin nynh, “Aning tuh teimou a um?” cite a khia hae. Aning nynh, “Ka nyh khyh,” a ci. Farasi hae nynh Bya Khia Rarounaw

¹³Minmin nynh langmawlya a mitmohpaw kha Farasi hae kalan a cciakhae hae.¹⁴Jesu nynh tuiccua kha rae zah tuh-e paw mit a awsah lya tuh sabbath nin nynh thua.¹⁵Farasi hae nynh mah tuh-e paw tuh, “Pawcihtemou ngaw na muih?” cite bua a khia hae. Aning nynh minmin kha, “Aning nynh ka mit kya tuiccua yn noipah zah, he ka singbiakuh tuh ngaw ka muih vae,” a cipya hae.¹⁶Tukeiccuze Farasi hae abang nynh, “Tuh-e ccungccapaw tuh Pachia kyate yn thuapaw thua khyh, pawccecize sabbath nin kha sung khyh,” a ci hae. Mingccang hae nynh, “Pawcihtemou miseipaw lu kheit nynh hynhcihawpaw muihsahnaw tuh a rae kho cih?” a ci hae. Te minmin laku kya phiakunaw a um.¹⁷Minmin nynh mitmohpaw kha, “Na mit ae awsah keiccu tuh-e paw tuh pawtemou na tua?” cite bua a khia hae. Mitmohpaw nynh, “Aning tuh profeh lu kheit nynh thua,” a ci.

¹⁸Thuasalama ngaw bua a muihpaw a nung te a paaw kha a ko makhia hae tuh, aning tuh a mitmoh zah ngaw bua a muihpaw nynh thua cite Judah hae nynh zyn khyh hae.¹⁹Minmin nynh a nung te a paaw kha, “E paw hynh a pui takaw te a mitmoh na ci oh paw nae ccapaw thua tou? Tuhteze atu pawcihtemou ngaw a muih?” cite a khia hae.²⁰A nung te a paaw nynh, “E paw tuh kae ccapaw thua zah, a pui takaw te a mitmohpaw nynh thua cipaw ah ny oh.²¹Thuasalama pawtemou atu ngaw a muih cipaw te hum nynh mou a mit a awsah cipaw tuh kae nyh khyh; aning tuh piccan thua vae zah amaw kha khia oh, amaw maw nynh a hothya cih,” a ci hae.²²A nung te a paaw nynh Judah hae raw a ri hae keiccuze e bya hynh a ho hae; pawccecize Jesu tuh Messiah nynh thua cite a zynpaw miakaw tuh sinakok kyate dee lan cite Judah hae nynh nawccawnaw a hoi vae hae.²³Tukeiccuze a nung te a paaw nynh, “Aning tuh piccan thua vae, amaw kha khia oh,” a ci hae.

²⁴Tukeiccuze mitmohpaw kha vae ningnaw ko hae zah, “Nang nynh Pachia kha phu-esah tua! Tuh-e paw tuh miseipaw nynh thua cipaw kae ny,” a ci hae.²⁵Aning nynh, “Tuh-e paw tuh miseipaw athua te thua khyh ka nyh khyh. Ccangkheit ka nypaw tuh, kae tuh ka mit a la moh, atu ngaw ka muih vae,” a ci.²⁶Minmin nynh, “Pawtemou aning nynh ae cyi? Pawcihtemou na mit ae awsah?” cite bua a khia hae.²⁷Aning nynh, “Phe kae hopya vae oh, na ngae khyh oh, pawccemou bua na thae ry oh? A zuitu lang na tang ry oh tou?” cite a khung hae.²⁸Minmin nynh amaw kha sarya hae zah, “Nang hynh nynh a zuitu na thua, kaening tuh Moses zuitu hae nynh kae thua.²⁹Pachia nynh Moses kha bya a hopya cipaw kae ny, thuasalama e paw tuh paw kyate nynh yn thua cipaw kae nyh khyh,” a ci hae.³⁰Tuh-e ccungccapaw nynh, “Aning nynh ka mit mang yn awsah pite aning tuh paw kyate nynh yn thua cipaw na ny khyh oh paw tuh ngaeangthua lan kou um!³¹Pachia nynh misei hae bya tuh thaepah khyh hae cipaw kha ah ny oh; thuasalama Pachia kha beik zah a rynaw a raepaw bya tuh a ngaepya.³²Mitmohte a puipaw ccungccaw mit kha lukhakheit nynh phe a awsah cipaw tuh laephi thotakaw te thae boi lan um khyh.³³E ccungccapaw tuh Pachia kyate yn thuapaw a la thua khyh lanze, aning nynh pawsang mah cyih kho lan khyh,” a ci.

³⁴Minmin nynh, “Na pyn balyn seinaw mawcci te nae puipaw nang nynh tou kaening ccangpya lan nae zuakuh?” ci hae zah sinakok kyate a dee hae. Muisaw Mitmohnaw

³⁵Farasi hae nynh mitmohpaw kha phe a dee hae cipaw Jesu nynh thae zah, mitmohpaw kha he a muih tuh, “Pachia Ccapaw kha na zyn tou?” cite a khia.³⁶Aning nynh, “Bawipaw, aning tuh hummou athua? Kae nynh ka zynthya nawlan yn hopya tua,” cite a khung.³⁷Jesu nynh, “Amaw kha phe na muih vae, atu nang te bya na beihkuh oh paw hynh amaw nynh thua,” a cipya.³⁸Aning nynh, “Bawipaw, ka zyn,” ci zah amaw kha a beik.³⁹Jesu nynh, “Ngawmuih lei hae paw kha ngawmuihsah lan hae zah ngawmuih hae paw kha mih mitmohsah lan hae cite byapia khylan nynh hynh-e laephi vawlan kae thua,” a ci.⁴⁰Jesu pe a um hae paw Farasi hae abang nynh hynh-e bya hynh thae hae zah Jesu kha, “Kaening so kae mitmoh tou?” cite a khia hae.⁴¹Jesu nynh, “Mitmoh hae na la thua oh ze, seinaw na hoi cih lei oh paw; thuasalama atu nanning nynh, ‘Ngaw kae muih,’ na ci oh keiccuze nae seinaw tuh phang a um,” a cipya hae. Kae tuh Tuurin Hoypaw

¹Jesu nynh, “Byaccaccing kae hopya oh, tuukhia lungkhu lang sakoih kyate tee leite, ccangpaw kyate kae zah a teepaw tuh miruh te damiah nynh thua.²Sakoih kyate a teepaw tuh tuu hae a rintu nynh thua.³Tuh-e paw tuh sakoih a ngawpaw nynh sakoih hungpah zah tuu hae nynh a roi kha a syntaw hae. A tuu hae kha mih min te ko hae zah a poukhae hae.⁴A tuu hae balyn kha he a poukhae hae ze, mih malang khe cciapah hae zah tuu hae nynh a zui hae, pawccecize a roi kha a syntaw hae.⁵Miccangpaw kha zui lan khyh hae, a roi kha a ny khyh hae keiccuze a ccuetaw cih hae,” a ci.⁶E tousenaw hynh Jesu nynh a hopya hae, thuasalama a hopya hae paw kha minmin nynh thaethya khyh hae.

⁷Tukeiccuze Jesu nynh bua hopah hae zah, “Byaccaccing kae hopya oh, kae tuh tuu hae teenaw sakoih nynh ka thua.⁸Ka malang oun thuaty hae paw balyn tuh miruh hae te damiah hae nynh thua hae, tuu hae nynh mih roi kha ngaepah khyh hae.⁹Kae tuh sakoih nynh ka thua. Humhung zemah ka kyate a teepaw tuh khum athua cih; aning tuh a tee a pou cih zah rampaeenaw kha a muihkuh cih.¹⁰Miruh tuh ru khylan, chia khylan te syro khylan rou nynh yn thua. Kae tuh hiinnaw hoi hae zah, tuh-e hiinnaw tuh phe ccing lan a hoi nawlan hae nynh kae thua.

¹¹“Kae tuh tuurin hoypaw nynh ka thua. Tuurin hoypaw nynh tuh a hiinnaw kha tuu hae hanlan a pyaku.¹²Tuurintu athua leipaw, tuu mah a hoi leipaw, hohpaw ccungccaw nynh tuh suizaw yn thuapaw kha a muih ze, tuu hae kha cciataw zah phe a ccuetaw; suizaw nynh tuu hae kha kyng hae zah pong a phiasaku hae.¹³Hohpaw ccungccaw nynh tuh hohpaw athua keiccuze tuu hae kha peki leite a ccuetaw hae.¹⁴Kae tuh tuurin hoypaw nynh ka thua. Ka tuu hae kha ka nyh zah ka tuu hae nynh mah yn ny hae.¹⁵Ka Paaw nynh kae kha yn ny hawte, kae nynh mah ka Paaw kha ka ny. Ka hiinnaw kha tuu hae hanlan ka pyaku.¹⁶E tuukhia kya a umbua leipaw ccangpaw tuu hae kha ka hoi, minmin kha mah ka cciakhae cih hae zah ka roi kha a ngae cih hae; tuurin lu kheit zakaw kya tuuphu phu kheit lang oun tang cih hae.¹⁷Ka hiinnaw kha ka pyakuh zah ka hiinnaw kha bua ka lawkuh cih keiccuze ka Paaw nynh kae kha yn sungsah.¹⁸Hum nynh san tuh-e hiinnaw tuh ka kyate lah kho khyh, tuh-e tuh kamaw lungthote ka pyaku. Ka hiinnaw pyakunaw kaw ka hoi zah lawthuinaw kaw mah ka hoi. Tuh-e kaw tuh ka Paaw kyate nynh ka mue,” a ci.

¹⁹Hynh-e bya keiccuze Judah hae laku phiakunaw bua a um.²⁰Minmin lakuze ccungccaw patae nynh, “Aning tuh raerangsaro bahkuh zah a ngaee vae, pawccemou a bya kha na ngae oh?” a ci hae.²¹Abang nynh, “E bya tuh raerangsaro bahkuhpaw bya thua khyh, raerangsaro nynh mitmohpaw mit kha a awsah kho cih tou?” a ci hae. Judah hae nynh A Vua hae

²²Khuaccih ccyh lyakhe Jerusalem kya beikinn apnaw poi um zah,²³Jesu tuh beikinn voidu lungkhu Solomon saeleih dawkuhpaw kya a cceih.²⁴Judah hae nynh Jesu kha koihlu hae zah, “Hohseciamou kaening hynh lunghiinnaw nae hoisah ung cih? Messiah na thua ze ccaerarih lan oun hopah,” a ci hae.²⁵Jesu nynh, “Phe kae hopya vae oh, thuasalama na zyn khyh oh; ka Paaw min te ka lawpaw ryalaw hae nynh kamaw kong kha ccaekia a khan hae.²⁶Thuasalama nanning tuh ka tuu hae na thua khyh oh keiccuze na zyn khyh oh.²⁷Ka tuu hae nynh ka roi kha a thae hae. Minmin kha ka nyh hae zah minmin nynh kae kha yn zui hae.²⁸Minmin kha zungzae hiinnaw ka pya hae zah, minmin tuh papin chih vae lan khyh hae. Hum nynh sanmah minmin kha ka kuih kyate yn lua kho vae lan khyh.²⁹Minmin kha ka kalan yn pyatupaw ka Paaw tuh pawpaw balyn laeze a lesaehua; hum nynh sanmah minmin kha ka Paaw kuih kyate lua kho lan khyh.³⁰Kae te ka Paaw tuh ccangkheit nynh kae thua,” a ci.

³¹Judah hae nynh amaw kha deih lan cite lung kha bua a khuinnuaku hae.³²Jesu nynh, “Ka Paaw kya-e ahoypaw ryalaw patae kha phe kae langsahpya vae oh, tuh-e hae kyaze pawtecihpaw ryalaw keiccu mou lung te deih lan nae ry oh?” cite a khung hae.³³Judah hae nynh, “Ahoypaw ryalaw keiccu lung te kae deih lan khyh, nang tuh ccungccaw huataw mang na thua pite Pachia lang na riakuh zah Pachia thethya na ho keiccu nynh lung te kae deih cih,” a ci hae.³⁴Jesu nynh minmin kha, “Nae kawbya ccauh kyaze, ‘Nanning tuh pachia hae nynh na thua oh, ka ci,’ cite zeikuh khyh tou?³⁵Pachia bya nynh a thuanua hae paw kha ‘pachia hae’ cite ko athua hae ze thuasah, Ccathyaa kha vua kho athua khyh ze thuasah,³⁶Paaw nynh a thyaasah vae paw te laephi vawlan a saw vae paw kae nynh, ‘Pachia Ccapaw nynh ka thua,’ ka ci keiccuze nanning nynh kae kha, ‘Pachia saryanaw bya na ho,’ cite pawtemou na ho kho oh?³⁷Ka Paaw ryalaw kha ka law khyh ze, yn zyn nan oh.³⁸Thuasalama ka law lanze, kamaw hynh nae zyn khyh oh zemah ka ryalaw hae kha zyn oh; tuhteze nynh Paaw tuh ka kya um zah kae mah amaw kya ka um cipaw kha na nyh cih oh zah na thaethya cih oh,” a ci.³⁹Tukeiccuze Jesu kha kyng lan bua a zuaku hae, thuasalama mih kuih kyate phe a lue.

⁴⁰Jesu tuh Jordan vaw khuraw lang, Johan nynh baptisma a pyanaw langkhe bua cceih zah tuin kya a um.⁴¹Ccungccaw patae nynh amaw kalan oun cceih hae zah, “Johan nynh muihsahnaw a langsaku khyh zemah, hynh-e ccungccapaw konglang a hopaw balyn tuh marya ahme,” a ci hae.⁴²Tuin kyakhe ccungccaw patae nynh amaw kha a zyn hae. Lazaruh Chinaw

¹Mary te a unung Martha hae khua, Bethani khuapaw Lazaruh a ci hae paw lu kheit tuh a la ccih.²Mary tuh Bawipaw ccu kya zimuin thuhpah zah a sang te a hupahnung nynh thua, a ccihpaw Lazaruh tuh a raeepaw nynh thua.³Tukeiccuze a ccianung hae nynh Jesu kalan ccungccaw saw hae zah, “Bawipaw, na sungsahpaw na banpaw tuh a ccih,” cite a hosahpya hae.⁴Jesu nynh tuh-e bya he a thae tuh, “E ccinaw tuh chi khopaw ccinaw thua khyh; Pachia phu-enaw hanlan te Pachia Ccapaw nynh phu-enaw a ccou nawlan nynh thua,” a ci.⁵Jesu nynh Martha te a neitawnung te Lazaruh kha a sungsah hae.⁶Tukeiccuze Jesu nynh Lazaruh a ccih cipaw he a thae te, tuin a umnaw kya mawkhe nin ning bua a um ung.

⁷Tukoute Jesu nynh a zuitu hae kha, “Judea ram lang bua cceih oh sih,” a cipya hae.⁸Zuitu hae nynh, “Sazae, Judah hae nynh anulang lya lung te deih lan ae ry hae khaw, tuhlang tuh bua na cceih cih tou?” a cipya hae.⁹Jesu nynh, “Khuadae kya suimilan haw lae ning um khyh tou? Khuadae kya a cceihpaw ccungccaw tuh hynh-e laephi awnaw kha a muih keiccuze thykuh khyh.¹⁰Thuasalama khuazi kya a cceihpaw ccungccaw tuh amaw kya awnaw a um khyh keiccuze a thykuh,” cite a khung hae.¹¹Jesu nynh tuhte a ho koute, “Ah banpaw Lazaruh tuh a ih, thuasalama amaw kha tho khylan ka cceih cih,” a cipya hae.¹²A zuitu hae nynh, “Bawipaw, aning tuh a i lanze, phe yn dan cih,” a ci hae.¹³Jesu nynh tuh Lazaruh a chinaw kong kha nynh a ho, thuasalama minmin nynh tuh a ipaw maw kha nynh a ho cite a tua hae.¹⁴Tukeiccuze Jesu nynh ccaerarih lan hopah hae zah, “Lazaruh tuh a chih vae.¹⁵Tuin kya ka la um khyhpaw tuh nanning na zyn nawlan oh athua keiccuze nae hanlan ka lungtua, atu amaw kalan cceih oh sih,” a cipya hae.¹⁶Ccaawphei a ci hae paw Thomas nynh, “Bawipaw ryte chikheih khylan aening mah cceihbua oh sih,” cite zuitu a ruiban hae kha a hopya hae. Thoothuinaw te Hiinnaw

¹⁷Jesu yn thua tuh, Lazaruh kha shaw lungkhu a uunaw hae te nin pali acih vae cipaw a ny.¹⁸Bethani khua tuh Jerusalem te naekuh zah me ning loukaw nynh asaw.¹⁹Mih raeepaw nynh a chitaw hae paw Martha te Mary kha lungtangbya hopya khylan Judah hae patae tuh oun thua hae.²⁰Martha nynh Jesu yn thua cipaw he a thae tuh, cceih zah Jesu kha a cciadue; Mary tuh innvaw nynh a um.²¹Martha nynh Jesu kha, “Bawipaw, hein kya na la um ze, ka raeepaw hynh a chih cih leipaw.²²Thuasalama atumaw hynh Pachia kalan na ngiapaw miakaw kha Pachia nynh ae pya cih cipaw ka ny,” a cipya.²³Jesu nynh, “Na raeepaw tuh bua yn thoo cih,” a cipya.²⁴Martha nynh, “Nyathya nin thoothuinaw kya yn thoothui cih cipaw tuh ka nyh,” a cipya.²⁵Jesu nynh Mata kha, “Kae tuh thoothuinaw te hiinnaw nynh ka thua, kae yn zynpaw tuh a chi zemah a hiin cih,²⁶Humhung zemah hiin zah kae yn zynpaw tuh mazi chih vae lan khyh. Tuh-e tuh na zyn tou?” a cipya.²⁷Martha nynh, “Athua, Bawipaw, nang tuh laephi vawlan yn thuapaw, Pachia Ccapaw Messiah nynh na thua cipaw ka zyn,” cite a khung. Jesu A Rah

²⁸Tuhcite he a ho koute, Martha nynh cceih zah a neitawnung Mary kha aruh lante zya ko zah, “Sazaepaw yn thua zah, nang kha ae ko,” a cipya.²⁹Mary nynh tuh-e bya he a thae tuh, arangte thokuh zah Jesu kalan a cceih.³⁰Jesu tuh khualae kya thua loh khyh; Martha te a tungkunaw hae kya nynh a um ung.³¹Innvaw kya Mary lungtangbya a hopah hae paw Judah hae nynh Mary tuh arangte thokuh zah a cciapaw kha he a muih hae tuh, shawku lang raw khylan nynh a ccia cite tua hae zah a zui hae.³²Mary nynh Jesu a umnaw kya thua zah amaw kha he a muih tuh, a cculeihpaw khe bakhung zah, “Bawipaw, hein kya na la um ze, ka raeepaw tuh a chih cih leipaw,” cite a hopya.³³Mary nynh a rawpaw te oun thuakheih hae paw Judah hae nynh a raw hae paw kha Jesu nynh he a muih tuh, myarya a thinlungccih zah a lungvawsaw.³⁴Jesu nynh, “Pawkyamou Lazaruh tuh na uu oh?” a ci. Minmin nynh, “Bawipaw, rang lah yn dotua,” a ci hae.³⁵Jesu tuh a rah.³⁶Judah hae nynh, “Dotua oh, Lazaruh kha pawcih baban mou a sungsah!” a ci hae.³⁷Abang nynh, “Mitmohpaw a mit a awsahtupaw hynh-e ccungccapaw nynh Lazaruh kha chi leite umsah kho khyh tou?” a ci hae. Lazaruh Thoothuinaw

³⁸Tukoute Jesu tuh a thinlung bua ccih zah shaw kalan a cceih. Tuh-e shaw tuh lungkarung thua zah lung te phang a hu hae.³⁹Jesu nynh, “Lung kha nue oh,” a ci. Achihpaw a ccianung Martha nynh, “Bawipaw, atu tuh phe thuh vae cih, pawccecize a chinaw te nin pali acih vae,” a cipya.⁴⁰Jesu nynh Martha kha, “Na zyn ze Pachia phu-enaw na muih cih cite kae hopah khyh tou?” a cipya.⁴¹Minmin nynh athuhhu kha a nue hae. Jesu nynh dothung zah, “Apang, ka bya nae thaepya keiccuze na tungvaw ka lungtua.⁴²Ka bya hynh zungzae nae thaepya cipaw ka ny; thuasalama hein kya a thadynpaw ccungccaw hae nynh kae tuh nang nynh na sawpaw cipaw kha a zyn ccaw hae cite minmin khylan nynh hynhte ka ho,” a ci.⁴³Tuhcite Jesu nynh a ho koute, “Lazaruh, yn pou!” cite thawte a sia.⁴⁴Achihpaw Lazaruh tuh a kuih te a ccu kha boeining te phang khiidekuh zah, a mae mah boeining te phang alungkuh lante yn pou. Jesu nynh, “Phoupah oh lah cceih sah,” a ci.

⁴⁵Mary te oun cceihkheih hae paw Judah hae patae nynh Jesu nynh a cyipaw kha muih hae zah amaw kha a zyn hae.⁴⁶Thuasalama ccungccaw abang nynh Farasi hae kalan cceih hae zah Jesu nynh a cyipaw kong kha a hopya hae.⁴⁷Ranpibawi lepaw hae te Farasi hae nynh kungsi meeting ko hae zah, “Pawtemou ah cyih cih oh? E paw nynh muihsahnaw patae a langsaku vae.⁴⁸Amaw kha hynhcite ah sawphah oh ze, ccungccaw balyn nynh amaw kha oun zyn cih hae, te Rom hae nynh oun cceih cih hae zah hmin thyaapaw te ah minphuin hynh oun roh cih hae,” a ci hae.⁴⁹Minmin lakuze lu kheit, tuh-e kum kya ranpibawi lupi athuapaw Kaiafas nynh, “Pawpaw mah na nyh khyh oh!⁵⁰Minphuin pynpi aro khyh nawlan, ccungccaw patae hanlan ccungccaw lu kheit a chi lanpaw tuh nae hanlan ahoyhua cipaw na nyhthya khyh oh,” a cipya hae.⁵¹E bya hynh amaw kaw te ho khyh, aning tuh tuh-e kum kya ranpibawi lupi athua thyhawte, Jesu tuh tuh-e minphuin hanlan yn chih vae cih cipaw te⁵²tuh-e minphuin hanlan kyalya thua leite, a phiakuh hae paw Pachia ccaaw hae kha pynkheihlan suelua khylan yn chih cih cipaw kha profehbya a hopaw nynh thua.⁵³Tuin nin kyate vae tuh Jesu kha chia lan khua a khanku vae hae.

⁵⁴Tukeiccuze Jesu tuh Judah hae laku alangkuh lante cceih vae khyh, tuin kyate pou zah ramkaw te anaekunaw Efraim a ci hae paw khua lang a cceih; tuin kyakhe a zuitu hae ryte a um hae.

⁵⁵Judah hae Kawtaw Poi tuh nae vae zah ccungccaw patae tuh Kawtaw Poi azaw maw mimaw te mimaw ccikanku khylan khua taraw hae kyate Jerusalem lang oun cceihthung hae.⁵⁶Minmin nynh Jesu kha a ccung hae, beikinn pe khe thadyn hae zah, “Pawte na tua oh? Aning tuh poi kalan yn thuabua lan khyh tou?” cite a hoku hae.⁵⁷Ranpibawi lepaw hae te Farasi hae nynh Jesu kha kyng khylan humhung zemah Jesu a umnaw a nyhpaw tuh kae kalan nae hopah cih oh, cite kaw a pya hae. Mary nynh Zimuin A Thuh (Mat 26.6-13; Mar 14.3-9)

¹Kawtaw Poi azaw maw nin taruh ary lyakhe, chinaw kyate a thoosahpaw Lazaruh a umnaw Bethani khua kya Jesu yn thua.²Tuin kya amaw elang zerya paccynpah hae zah Martha tuh a thohae; Lazaruh tuh Jesu ryte ccaboi kya a haung hae paw kya a umbua.³Mary nynh myarya amee rupaw zimuin, nard ccite a rae hae paw pound kheit kha lawkuh zah Jesu ccu kha a thuh koute a sang te a hupya; inn tuh zimuin myn te phe abeih.⁴A zuitu hae kyaze lu kheit, Jesu a phee cih paw Judas Iskariot nynh,⁵“Pawccemou hynh-e zimuin hynh denari phua za thum lang a zua koute ryachi hae a pya khyh hae?” a ci.⁶Hynhte a hopaw hynh ryachi hae hanlan a tua keiccu thua leite miruhpaw athua keiccu nynh thua; aning tuh phuabu a kyngtu thua zah, tuin kya a nung hae paw kha leih a ru.⁷Jesu nynh, “Khah-e nung kha amaw um lan um sah; ka rhua ccy nin hanlan a cyipaw nynh thua.⁸Pawccecize ryachi hae tuh nae kya zungzae a um hae, thuasalama kae tuh nae kya zungzae ka um lan khyh,” a ci.

⁹Judah hae patae nynh Jesu tuh tuin kya a um cipaw he a nyh hae tuh, Jesu a um keiccu kyalya thua leite, chinaw kyate a thoosahpaw Lazaruh kha mah muih khylan oun cceih hae.¹⁰Tukeiccuze ranpibawi lepaw hae nynh Lazaruh kha mah chia lan cite a paccyn hae.¹¹Pawccecize Lazaruh keiccuze Judah hae patae nynh minmin kha cciataw hae zah Jesu kha a zyn hae. Jerusalem lang Jesu A Tee (Mat 21.1-11; Mar 11.1-11; Luk 19.28-40)

¹²Awkhualan kya poi kalan oun thua hae paw ccungccaw patae nynh Jerusalem lang Jesu yn thua cipaw he a thae hae tuh,¹³sarutah ku ange hae kha ccyngkute Jesu kha cciadue lan cceih hae zah,“Hosanna!Bawipaw min te yn thuapawIsrael Siapharan tuhhythuaccou sah!” cite a sia hae.¹⁴Jesu nynh lann taraw khamuih zah a cciku;Ccathyaa kyaze,¹⁵“Zion ccanung, rih nan.Dotua, na siapharan tuhlann taraw kha ccikuteyn thua cciamang,” cite azeikuh.

¹⁶A zuitu hae nynh atakaw lya tuh hynh-e kong hynh thaethya khyh hae; thuasalama Jesu a phu-enaw he yn langkuh vae tetuh, Ccathyaa nynh amaw konglang nynh hynhte a la zei cipaw te amaw hanlan nynh hynhte a cyipya hae cipaw kha a liathui hae.¹⁷Tukeiccuze Jesu nynh shaw lungkhu e Lazaruh kha ko zah chinaw kyate a thoosah lyaze amaw ryte a um hae paw nynh tuh-e kong tuh ccaekia a khan hae.¹⁸Tuh-e muihsahnaw tuh a langsaku cipaw a thae hae keiccuze ccungccaw hae nynh amaw kha a cciadue hae.¹⁹Tukeiccuze Farasi hae nynh, “Na tae vae lan khyh oh cipaw hynh nykuh oh. Dotua oh, laephi pynpi nynh amaw kha a zui vae hae!” cite lu kheit te lu kheit a hoku hae. Grik hae nynh Jesu A Ccung hae

²⁰Poi kya Pachia beik lan cite oun thua hae paw laku kya Grik hae abang a umbua hae.²¹Tuh-e hae nynh Galilee pee, Bethsaida khuapaw Filip kalan cceih hae zah, “Sazae, Jesu kha kae muih ry,” a cipya hae.²²Filip nynh cceih zah Andru kha a hopya; Andru te Filip nynh Jesu kha a hopya hae.²³Jesu nynh minmin kyakhe, “Ccungccaw Ccapaw nynh phu-enaw a mue ccyh athua vae.²⁴Byaccaccing kae hopya oh, chanvuih ccacii nynh laephi lungkhu lang ccah zah a chi khyh ze, amaw thathyhte nynh a um; thuasalama a chi ze, athae patae a pousah.²⁵A hiinnaw a sungsahpaw ccungccaw tuh a hiinnaw a shung cih; hynh-e laephi vawlan a hiinnaw a huapaw tuh zungzae hiinnaw hanlan a hiinnaw a ccykuh cih.²⁶Humhung zemah ka rya a lahpaw tuh kae kha yn zui cih; ka umnaw kyakhe rya yn lawpahpaw mah a umbua cih; humhung zemah ka rya a lahpaw tuh ka Paaw nynh sawtuanaw a pya cih. A Chi lanpaw Bua A Ho

²⁷“Kae tuh atu ka lungriathae, pawtemou ka ho cih? ‘Apang, hynh-e ccyh kyate yn khum,’ ka ci cih tou? Thuasalama hynh-e khylan nynh e ccyh kalan kae thua.²⁸Apang, na min hynh phu-esah tua,” a ci. Tetuh vaawlang te roi yn ccae zah, “A phu ka esah vae, a phu bua ka esah ung cih,” a ci.²⁹Tuin kya a thadyn hae paw ccungccaw zapi nynh tuh-e roi tuh thae hae zah, “Kholungthyh,” a ci hae; abang nynh, “Vaawpaw nynh amaw kalan bya a ho,” a ci hae.³⁰Jesu nynh, “E roi tuh kae ka hanlan yn thua khyh, nanning hanlan nynh yn thua.³¹Atu tuh hynh-e laephi hynh byapia ccyh nynh thua, atu hynh-e laephi a uktu tuh ccaring dee athua cih.³²Kae tuh laephi kyate saethung ka thua te, ccungccaw hae balyn kha ka kalan ka suebua cih hae,” a ci.³³E bya a hopaw tuh pawcihawpaw chinaw te nynh ka chih cih cipaw kha a langsahpya hae paw nynh thua.³⁴Ccungccaw hae nynh, “Messiah tuh zungzae a hiin cih cite Kawbya kyate kae thae; tuhte athua ze pawccemou nang nynh, ‘Ccungccaw Ccapaw tuh saethung athua cih,’ na ci? Tuh-e Ccungccaw Ccapaw tuh hummou?” a ci hae.³⁵Jesu nynh, “Awnaw tuh nae kya sosoh a um, mohnaw nynh ae phya khyh nawlan oh, awnaw na hoi lya oh hin cceih oh, pawccecize mohnaw kya a cceihpaw tuh teilang nynh ka ccia cipaw nyh khyh.³⁶Awnaw na hoi lya oh hin awnaw ccaaw lang na tang nawlan oh, awnaw kha zyn oh,” a cipya hae. Jesu nynh hynh-e bya a ho koute mih kyate pou zah zya a rekuh. Ccungccaw hae nynh Zyn khyh hae

³⁷Jesu nynh mih malang khe muihsahnaw patae a langsaku zemah amaw kha zyn khyh hae.³⁸Profeh Isaiah nynh,“Bawipaw, kae hopaw bya khahum nynh mou a zyn?Bawipaw kuih tuhhum kalan mou a langku?” citea hopaw bya accingnawlan nynh thua.

³⁹Tukeiccuze minmin nynh zyn kho khyh hae; pawccecize Isaiah nynh bua a hopaw tuh,⁴⁰“Mih mit te a muih khyh nawlan hae,mih thinlung tea thaethya khyh nawlan hae,Pachia nynh mih mit khamohsah hae zahmih thinlung khaa khungsah hae,tuhkhyhze tuh ka kalanoun kisei cih hae zahka dansah sei cih hae,” a ci.

⁴¹Isaiah nynh e bya a hopaw tuh, Jesu a phu-enaw kha a la muih keiccuze a konglang a la hopaw nynh thua.⁴²Tuhzemah uktu hae patae nynh heize amaw kha a zyn hae; thuasalama Farasi hae nynh sinakok kyate oun deesei cih hae cipaw a ri hae keiccuze minmin nynh kae zyn cite ho ngan khyh hae.⁴³Pawccecize minmin tuh Pachia kyate yn thuapaw phu-enaw laeze ccungccaw phu-enaw kha a ryhua hae. Jesu Ccangpyanaw Adynnawte

⁴⁴Jesu nynh thawte sia zah, “Humhung zemah kae yn zynpaw tuh kae kyalya yn zyn khyh, kae yn sawtupaw kha mah a zyn.⁴⁵Humhung zemah kae yn muihpaw tuh kae yn sawtupaw kha mah a muih.⁴⁶Kae yn zynpaw miakaw nynh mohnaw kya a um khyh nawlan hae, kae tuh awnaw lante laephi vawlan kae thua.⁴⁷Humhung zemah ka bya thae zah a zui leipaw tuh kae nynh bya ka pia khyh; pawccecize kae tuh laephi kha byapia khylan kae thua khyh, laephi kha khum khylan nynh kae thua.⁴⁸Kae kha yn vua zah ka bya a lawkuh leipaw tuh bya a pia cih paw a um; ka hopaw ka bya nynh amaw kha nyathya nin kya bya a pia cih.⁴⁹Pawccecize kamaw kaw te bya ka ho khyh, kae yn sawtupaw ka Paaw nynh ka ho lanpaw te ka ccae lanpaw kha kaw yn pya vae.⁵⁰A kawbya tuh zungzae hiinnaw nynh thua cipaw ka ny, tukeiccuze ka hopaw miakaw tuh ka Paaw nynh yn hopya thyhte nynh ka ho,” a ci. A Zuitu hae Ccu A Sing

¹Kawtaw Poi a thua mawkhe, Jesu nynh e laephi kyate Paaw kalan a ccianaw ccyh azaw vae cipaw a ny; laephi vawlan a um hae paw a ccungccaw hae kha sungsah hae zah athangnaw cia a sungsah hae.²Zete zerya a mang lya hae khe, Satan nynh Simon ccapaw Judas Iskariot thinlung kyakhe Jesu phee lanpaw kha phe a sang vae.³Paaw nynh pawpaw balyn kha a kuih lungkhu lang marya a pya vae cipaw kha thuasah, aning tuh Pachia kyate yn thua zah Pachia kalan bua a ccia lanpaw kha thuasah Jesu nynh a ny.⁴Tukeiccuze ccaboi kyate thokuh zah a angkile kha a khahku, te pavua kha lawkuh zah a cce kya a voiku.⁵Tukoute tui kha pakepi lungkhu lang ccae zah a zuitu hae ccu kha a singpya hae, te a cce kya a voikupaw pavua khate a hupya hae.⁶Simon Peter kya he a thua tuh, Peter nynh, “Bawipaw, ka ccu nae sing cih tou?” a ci.⁷Jesu nynh, “Ka cyipaw hynh atu na nyh khyh, thuasalama nyalang nae nyh cih,” a cipya.⁸Peter nynh, “Ka ccu tuh kharouh nae sing lan khyh,” a cipya. Jesu nynh, “Na ccu kae sing khyh ze, nang tuh kae te na sekuh bua lan khyh,” a cipya.⁹Simon Peter nynh, “Bawipaw, ka ccu kyalya thua leite ka kuih te ka lu mah yn singbia!” a cipya.¹⁰Jesu nynh, “Tui a singkuh vae paw tuh pong thyaa vae zah a ccu kyalya nynh sing aho vae; nanning tuh na thyaa vae oh, thuasalama nae balynte tuh na thyaa khyh oh,” a cipya.¹¹Pawccecize hum nynh yn phee cih cipaw phe a ny vae; tukeiccuze, “Nae balynte tuh na thyaa khyh oh,” a ci.

¹²Mih ccu kha a sing kou hae te, a angkile kha kikuh zah ccaboi kya bua a haung koute, “Nae tungvaw ka cyipaw hynh na nyh oh tou?¹³Nanning nynh kae hynh Sazae cite, Bawipaw cite nae ko oh; na ho oh paw tuh akyhpaw nynh thua, pawccecize kae tuh ka thua sasaw.¹⁴Nae Bawipaw te nae Sazaepaw mang ka thua pite, nae ccu kha kae singpya oh ze, nanning mah lu kheit te lu kheit nae ccu na singpyaku oh aho.¹⁵Pawccecize nae tungvaw ka cyi hawte nanning nynh mah na cyibua oh ccaw cite dosuinku lanpaw kha kae cyipya vae oh.¹⁶Byaccaccing kae hopya oh, see tuh a bawipaw laeze lehua khyh, sawpaw ccungccaw mah a sawtupaw laeze lehua khyh.¹⁷E uccaw hae hynh na nyh oh zah na cyi oh ze, nanning tuh lungtuapaw nynh na thua oh.¹⁸Nae balynte asekuh lante ka ho khyh, ka po hae paw kha ka ny hae, thuasalama Ccathyaa nynh, ‘Ka looh a aepaw nynh kae kha rawsete a ccu yn hangnua vae,’ a cipaw kha accing nawlan nynh thua.¹⁹Tuh-e tuh he yn cyihkuh te, kae tuh aning nynh ka thua cipaw nae zyn nawlan oh, tuh-e acyiku maw atu kae hopya oh.²⁰Byaccaccing kae hopya oh, humhung zemah ka sawpaw ccungccaw kha leh a khanpaw tuh kae kha leh yn khanpaw nynh thua; kae kha leh yn khanpaw ccungccaw tuh kae yn sawtupaw kha leh a khanpaw nynh thua,” a cipya hae. A Phee lan hae paw A Hoty (Mat 26.20-25; Mar 14.17-21; Luk 22.21-23)

²¹Jesu nynh tuhte a ho koute a lungvawsaw zah, “Byaccaccing kae hopya oh, nanning laku e lu kheit nynh kae hynh yn phee cih,” a ci.²²Hum nynh a honuathe cipaw kha zuitu hae nynh phe ria lan nyh khyh hae zah lu kheit te lu kheit a dokuh hae.²³Zuitu hae kyaze Jesu nynh a sungsahpaw lukheitpaw tuh Jesu by vaw kya a ngeikuh.²⁴Tukeiccuze hummou a honuathe cipaw kha a khia ccaw cite Simon Peter nynh tuh-e paw tuh a kuih te a tangpya.²⁵Jesu by vaw kya a ngeikuhpaw nynh, “Bawipaw, tuh-e paw tuh hummou athua?” cite Jesu kha a khia.²⁶Jesu nynh, “Aning tuh sanlou paekia kha pake lungkhu moh ka dung cih zah ka pyapaw kha nynh athua,” cite a khung. Te sanlou paekia kha moh a dung koute Simon ccapaw Judas Iskariot kha a pya.²⁷Judas nynh sanlou paekia kha a lawkuh koute Satan tuh a lungkhu lang a tee vae. Jesu nynh, “Na cyi lanpaw kha arangte cyih ccavae,” a cipya.²⁸Pawkeiccumou Judas kha tuhte a hopya cipaw tuh ccaboi kya a haung hae paw lu kheit nynh sanmah nyh khyh hae.²⁹Judas Iskariot tuh phuabu ccytu athua keiccuze Jesu nynh poi kya aening hanlan ahopaw re lan nynh a naw cih, tuhkhyhze ryachi hae kha uccaw hankhakheit pya lan nynh a naw cih, cite abang nynh a tua hae.³⁰Judas Iskariot tuh sanlou paekia kha he a lawkuh koute vaekheihmawte po a pou; tuh lya tuh khuazi nynh thua. Kawbya Thawpaw

³¹Tuhte Judas he a pou tuh Jesu nynh, “Atu Ccungccaw Ccapaw tuh phu-esah thua vae zah Pachia mah amaw liate phu-esah athua vae.³²Aning liate Pachia tuh phu-esah athua ze, Pachia nynh mah amaw liate Ccungccaw Ccapaw kha a phu-esah cih zah, aro mawze a phu-esah cih.³³Ka ccaaw hae, nae kya sosoh kyalya nynh ka um vae cih. Nanning nynh kae kha nae ccung cih oh; Judah hae kha, ‘Ka ccianaw lang na cceih kho lan khyh oh,’ cite ka hopya hae hawte, atu nanning mah kae hopya oh.³⁴Kawbya thawpaw kae pya oh: lu kheit te lu kheit sungsakuh oh. Kae nynh kae sungsah oh hawte nanning mah lu kheit te lu kheit sungsakuh oh.³⁵Lu kheit te lu kheit sungsakunaw na hoi oh ze, tuh-e sungsakunaw liate ccungccaw hae balyn nynh nanning tuh ka zuitu hae cipaw ae nyh cih oh,” a cipya hae. Peter nynh A Vua lanpaw A Hoty (Mat 26.31-35; Mar 14.27-31; Luk 22.31-34)

³⁶Simon Peter nynh, “Bawipaw, teilangmou na cceih cih?” cite a khia. Jesu nynh, “Ka ccianaw lang tuh atu nae zui kho lan khyh, thuasalama nyalang nae zui cih,” cite a khung.³⁷Peter nynh, “Bawipaw, pawccemou atu kae zui kho khyh? Na hanlan ka hiinnaw ka pyakuh cih,” a cipya.³⁸Jesu nynh, “Ka hanlan na hiinnaw na pyakuh cih tou? Byaccaccing kae hopya, aw a khua mawze vae thum nae vua cih,” a cipya. Jesu tuh Laanpi

¹Jesu nynh, “Lungvawsaw lungriathaete um nan oh, Pachia kha zyn oh lah kae kha mah yn zyn oh.²Ka Paaw inn kya umnaw khaan patae a um; a um khyh lanze um khyh cipaw phe kae hopah vae cih oh. Nanning hanlan umnaw paccyn khylan ka la cceih cih.³Kae nynh ka cceih zah nanning hanlan umnaw ka paccyn koute, bua kae thua cih zah, nanning mah ka umnaw kya umbua khylan ka kalan kae hoeibua cih oh.⁴Ka cceih cihnaw hmin a thuapaw laanpi kha na ny oh,” a ci.⁵Thomas nynh, “Bawipaw, teilang nynh na cceih cih cipaw kae nyh khyh. Pawtemou laanpi tuh kae nyh kho cih?” a cipya.⁶Jesu nynh, “Kae tuh laanpi, byaccing te hiinnaw nynh ka thua. Kae ka kyate holeite tuh hum sanmah Paaw kalan thua kho khyh.⁷Nanning nynh kae hynh nae ny oh ze, ka Paaw kha mah na nyh cih oh. Atu kyate Paaw kha na nyh oh zah na muih vae oh,” a cipya.

⁸Filip nynh, “Bawipaw, Paaw kha kaening oun muihsah lah, kaening hanlan azaw vae,” a cipya.⁹Jesu nynh, “Kae tuh nae kya khaw cia ka um vae, nae nyh loh khyh oh tou, Filip? Humhung zemah kae yn muih vae paw ccungccaw tuh Paaw kha mah a muih vae. Pawccemou, ‘Paaw kha kaening oun muihsah,’ na cipaw tuh?¹⁰Kae tuh Paaw kya ka um zah Paaw tuh ka kya a um cipaw hynh na zyn khyh tou? Nae kya ka hopaw bya hynh kamaw kaw te ka ho khyh, ka kya a umpaw Paaw nynh amaw rya kha a law.¹¹Kae tuh Paaw kya ka um zah Paaw tuh ka kya a um cipaw hynh yn zyn oh, tuhkhyhze mah rya ka lawpaw keiccu hynh yn zyn oh.¹²Byaccaccing kae hopya oh, kae yn zynpaw tuh ka cyipaw ryalaw kha a cyihbua cih; hynh-e hae lae alepaw ryalaw kha mah a lah cih; pawccecize kae tuh ka Paaw kalan ka cceih cih.¹³Paaw tuh Ccapaw liate a phu-e nawlan ka min te nae ngia oh paw miakaw kha kae cyipah cih oh.¹⁴Nanning nynh ka min te ccangkhakheit nae ngia oh ze, nae ngia oh paw kha kae cyipah cih oh. Thyaa Muisaw Byakinpyakunaw

¹⁵“Kae hynh nae sungsah oh ze ka kawbya hae kha na zui cih oh.¹⁶Kae nynh Paaw kha ka ngia cih zah nae kya zungzae a um cih paw ccangpaw Bawmtu kha ae pya cih oh.¹⁷Aning tuh byaccing nysahtupaw Muisaw nynh thua, tuh-e Muisaw tuh laephi nynh ccou kho khyh, pawccecize amaw kha muih khyh zah nyh khyh. thuasalama nanning nynh amaw kha na ny oh, pawccecize aning tuh nae kya tyn zah nae kya a um cih.

¹⁸“Ngawraw hae hawte kae cciataw lan khyh oh; nae kalan bua kae thua cih.¹⁹Sosoh acih koute laephi nynh yn muih vae lan khyh, thuasalama nanning nynh tuh nae muih cih oh, kae tuh ka hiin keiccuze nanning mah na hiinbua cih oh.²⁰Tuh-e nin kya kae tuh ka Paaw kya ka um zah nanning tuh kamaw kya na um oh paw te kae nynh nae kya ka umpaw kha nae nyh cih oh.²¹Ka kawbya hae kha ccou zah a zuipaw tuh kae yn sungsahpaw nynh thua, kae yn sungsahpaw kha ka Paaw nynh a sungsah cih, kae nynh mah ka sungsah cih zah a kya ka phykuh cih,” a ci.²²Iskariot athua leipaw, ccangpaw Judas nynh, “Bawipaw, nang tuh laephi ccungccaw hae kya phyku leite pawtemou kaening kya nae phykuh kho cih?” a cipya.²³Jesu nynh, “Kae yn sungsahpaw tuh ka bya kha a ngae cih; ka Paaw nynh amaw kha a sungsah cih, kaening nynh amaw kalan kae thua cih zah amaw ryte umnaw kae raekuh cih.²⁴Kae yn sungsah leipaw nynh tuh ka bya kha ngae khyh, na thae oh paw bya hynh kamaw bya thua khyh, kae yn sawtupaw ka Paaw bya nynh thua.

²⁵“Nae kya ka um lyaze hynh-e hynh kae hopya vae oh.²⁶Thuasalama ka min te Paaw nynh yn saw lanpaw Bawmtu, Thyaa Muisaw nynh pawpaw balyn ae ccangpah cih oh zah kae hopya vae oh paw balyn kha ae nysah thui cih oh.²⁷Nae kya daenaw kae cciatawpya oh, ka kya-e daenaw kha kae pya oh; laephi ccungccaw hae nynh a pya hae hawte kae pya khyh oh. Lungvawsaw lungriathaete um nan oh, ri mah rih nan oh.²⁸‘Ka la cceih cih zah nae kalan bua kae thua cih,’ cite kae hopya oh paw kha phe na thae vae oh. Nae sungsah oh ze, Paaw kalan ka ccia lanpaw hynh nae lungtua cih; pawccecize ka Paaw tuh kae laeze a lesaehua.²⁹Tuh-e he yn cyihkuh te na zyn nawlan oh, tuh-e acyiku maw atu kae hopya vae oh.³⁰Nae kya bya patae ka ho vae lan khyh, pawccecize hynh-e laephi uktupaw tuh yn thua vae cih, tuhzemah aning nynh ka tungvaw kya pawsang mah kaw hoi khyh.³¹Thuasalama kae nynh Paaw kha ka sungsah cipaw laephi nynh a ny nawlan Paaw nynh kaw yn pya thyhawte kae nynh ka cyi. Thokuh oh, hein kyate cceih ccavae oh sih. Misu Ku te Aran hae

¹“Kae tuh misu ku ccaccing nynh ka thua, ka Paaw tuh khokhu hoitu nynh thua.²Ka kya athae thae leipaw aran miakaw kha marya bae hae zah, athae thaepaw aran miakaw kha houh a thae nawlan a ccikanpya.³Nanning tuh kae hopya oh paw bya liate na thyaa vae oh.⁴Kamaw kya tyn oh lah kae mah nae kya ka tyn cih. Aran nynh misu ku kya a kyngku khyh lanze athae a thae kho khyh hawte, nanning mah ka kya na kyngku khyh oh ze na thae kho lan khyh oh.⁵Kae tuh misu ku, nanning tuh aran hae. Ka kya a tynpaw tuh kae mah a kya ka tyn zah, thae patae a thae; pawccecize kamaw leite nanning nynh pawsang na cyih kho khyh oh.⁶Humhung zemah ka kya atyn khyh lanze aning tuh aran hawte ccaring vua thua zah karae arou; tuhcihawpaw aran hae kha suelua hae zah maee lungkhu lang phung hae zah maee nynh pong a u.⁷Ka kya na tyn oh zah ka bya tuh nae kya atyn ze, na ry oh paw miakaw kha ngia oh lah, na mue cih oh.⁸Thae patae na thae oh zah ka zuitu lang na tang oh liate ka Paaw phu-enaw a langkuh.⁹Paaw nynh yn sungsah hawte nanning kha kae sungsah oh; ka sungsahnaw kyahin tyn oh.¹⁰Kae nynh ka Paaw kawbya hae kha ka zui zah a sungsahnaw kya ka tyn hawte nanning nynh ka kawbya hae hynh na zui oh ze ka sungsahnaw kya na tyn cih oh.¹¹Ka lungtuanaw tuh nae kya a um nawlan te nae lungtuanaw phe accing nawlan hynh-e bya hynh kae hopya oh.

¹²“Ka kawbya tuh e hynh nynh thua: Kae nynh kae sungsah oh hawte nanning mah lu kheit te lu kheit sungsakuh oh.¹³Ccungccaw lu kheit nynh a ban hae hanlan a hiinnaw pyakupaw sungsakunaw laeze ale huapaw sungsakunaw tuh hum nynh sanmah hoi khyh.¹⁴Kaw kae pya oh paw kha na cyi oh ze nanning tuh ka ban hae nynh na thua oh.¹⁵Atu te nanning hynh see hae kae ci vae lan khyh oh; pawccecize see nynh tuh a bawipaw nynh a cyipaw kha nyh khyh; thuasalama ka ban hae kae ci vae oh; pawccecize ka Paaw kyate ka thaepaw balyn kha marya kae nysah oh.¹⁶Nanning nynh kae hynh nae pokuh khyh oh; kae nynh nanning kha kae pokuh oh; nanning nynh na cceih oh zah zungzae atynpaw athae na thae nawlan oh te ka min te Paaw kalan na ngiaku oh paw miakaw kha ae pya nawlan oh nanning kha kae khang vae oh.¹⁷Nanning lu kheit te lu kheit na sungsaku nawlan oh kaw kae pya oh. Laephi nynh Huanaw

¹⁸“Laephi nynh nanning kha ae hua oh ze, nanning ae hua maw oh ze kae hynh yn hua hae cipaw la nyh oh.¹⁹Nanning tuh laephi kya-e na thua oh ze, laephi nynh ka kya-e cite ae sungsah cih oh; thuasalama laephi kya-e na thua khyh oh keiccu thuasah, kae nynh laephi kyate kae po vae oh keiccu thuasah laephi nynh nanning kha ae hua oh.²⁰‘See tuh a bawipaw laeze lehua khyh,’ cite kae hopya oh paw ka bya kha liathui oh. Minmin nynh kae hynh vawsaw yn pya hae ze nanning kha mah vawsaw ae pya cih oh; minmin nynh ka bya kha a ngae hae ze nae bya kha mah a ngae cih hae.²¹Thuasalama ka min keiccuze hynh-e hae balyn hynh nae tungvaw oun cyih cih hae, pawccecize kae yn sawtupaw kha nyh khyh hae.²²Kae nynh kae thua khyh zah mih kya ka la ho khyh zetuh seinaw hoi lan khyh hae paw, thuasalama atu tuh mih seinaw daangsahkunaw lanpaw hoi khyh hae.²³Kae yn huapaw tuh ka Paaw kha mah a hua.²⁴Hum nynh sanmah a law boi leipaw ryalaw hae kha mih kya ka la law khyh ze, minmin tuh seinaw hoi lan khyh hae, thuasalama atu tuh ka ryalaw kha mang a muih hae pite kae te ka Paaw kha parouhte oun hua hae.²⁵E tuh, ‘Akonglang um leite kae hynh yn hua hae,’ cite mih kawbya ccauh kya azeikuhpaw kha accing nawlan nynh thua.

²⁶“Paaw kyate nae kalan kae saw cih paw Bawmtu, Paaw kyate yn thua zah byaccing te phe abeihpaw Muisaw tuh he yn thua te, kamaw kong kha ccaekia yn khan cih.²⁷Atakaw te kamaw ryte na um oh keiccuze nanning mah ccaekia na la khan cih oh.

¹“Nae zynnaw kyate na khuliaku khyh nawlan oh hynh-e bya hynh kae hopya oh.²Minmin nynh nanning kha sinakok kyate ae dee cih oh; nanning ae theih oh paw ccungccaw nynh Pachia rya nynh ka law cite a tuaku ccyh tuh yn thua vae cih.³Ka Paaw te kae hynh oun ny khyh hae keiccuze tuhcite oun cyih cih hae.⁴Thuasalama accyh he yn thua te, hynh-e hae kong hynh phe kae hopya vae oh cipaw na liathui nawlan oh hynh-e hae hynh kae hopya vae oh. Thyaa Muisaw Ryalawnaw
“Nae kya ka um keiccuze hynh-e hynh atakaw te kae hopah khyh oh.⁵Thuasalama atu tuh kae yn sawtupaw kalan ka cceih vae cih; nanning lakuze hum nynh sanmah, ‘Teilangmou na cceih cih?’ cite nae khia khyh oh.⁶E konglang hynh kae hopya vae oh keiccuze nae thinlung kya ngaethyanaw phe abeih.⁷Tuhzemah byaccing kha kae hopya oh: nanning thanenaw hanlan ka la cceih cih; pawccecize kae nynh ka ccia khyh ze nae kalan Bawmtu yn thua lan khyh; thuasalama ka ccia ze amaw kha nae kalan kae saw cih.⁸Aning he yn thua te, seinaw kong, dingnaw kong te byapianaw kong kha laephi ccungccaw hae kya a nysah cih hae.⁹Kae kha yn zyn khyh hae keiccuze seinaw kong kha a nysah cih hae.¹⁰Ka Paaw kalan ka cceih cih zah kae hynh nae muih vae lan khyh oh keiccuze dingnaw kong kha a nysah cih hae.¹¹E laephi uktupaw tuh byapia athua vae keiccuze byapianaw kong kha a nysah cih.

¹²“Nae kya ho lanpaw patae ka hoi ung, thuasalama atu lya tuh na ccykekuh tae lan khyh oh.¹³Tuhzemah byaccing a phytu Muisaw yn thua te, nanning kha byaccing kalan ae cciakhae cih oh, pawccecize amaw kaw te ho lan khyh; thuasalama a thaepaw miakaw kha a ho cih zah yn thua cih paw kong kha ae hopah cih oh.¹⁴Aning nynh kae kha phu-enaw yn pya cih, pawccecize ka hopaw kha yn lah cih zah nae kya ae hopah cih oh.¹⁵Paaw nynh a hoipaw balyn tuh ka kya-e cci nynh thua; tukeiccuze, ‘Muisaw nynh ka pyapaw kha a lah cih zah nanning kha ae hopah cih oh,’ cite kae hopya oh. Ngaethyanaw te Lungtuanaw

¹⁶“Sosoh cihte kae hynh nae muih vae lan khyh oh; te sosoh cihte kae hynh bua nae muih cih oh,” a ci.¹⁷A zuitu hae abang nynh, “ ‘Sosoh cihte kae hynh nae muih vae lan khyh oh, te sosoh cihte kae hynh bua nae muih cih oh, pawccecize kae tuh ka Paaw kalan ka cceih cih,’ cite aening oun hopyapaw hynh pawmou a ho ry?” cite mimaw te mimaw a hoku hae.¹⁸Tukeiccuze minmin nynh, “Aning nynh, ‘Sosoh cihte,’ cipaw hynh pawmou a ho ry? A ho rypaw hynh ah nyh khyh oh rei,” a ci hae.¹⁹Minmin nynh amaw kha byakhia a ry hae cipaw Jesu nynh nyh zah minmin kha, “Sosoh cihte kae hynh nae muih vae lan khyh oh, te sosoh cihte kae hynh bua nae muih cih oh, cite ka hopaw tou naemaw te naemaw na khiaku oh?²⁰Byaccaccing kae hopya oh, nanning tuh nae rah nae khui cih oh, thuasalama laephi tuh a lungtua cih; nanning tuh nae ngaethah cih, thuasalama nae ngaethyanaw tuh lungtuanaw lang yn tang cih.²¹Nopinung tuh a ccyh zaw zah neitangia a cci keiccuze a ngaethah, thuasalama imua ccahe yn pui vae tetuh a vawsawnaw kha liathui vae khyh, pawccecize laephi vawlan ccungccaw lu kheit yn pui zah a lungtua keiccu nynh thua.²²Tuhawte nanning mah atu ngaethyanaw na hoi oh; thuasalama nanning kha bua kae muih cih oh zah nae lung oun tua cih, nae lungtuanaw kha hum nynh san ae lua vae lan khyh oh.²³Tuin nin kya tuh kae hynh pawsang nae khia vae lan khyh oh. Byaccaccing kae hopya oh, ka min te ka Paaw kalan na ngiaku oh paw miakaw kha aning nynh ae pya cih oh.²⁴Atu cia ka min te pawsang na ngia loh khyh oh, nae lungtuanaw accing nawlan ngia oh lah na mue cih oh. Laephi Ka Tae Vae

²⁵“E konglang hynh tousenaw bya te nynh kae hopya oh; thuasalama tousenaw bya mang leite, ka Paaw kong kha ccaerarih lan kae hopya oh ccyh yn thua cih.²⁶Tuin nin kya tuh ka min te nae ngia cih oh; ka Paaw kalan nanning ccelang kae ngiapah cih oh cite kae hopah khyh oh;²⁷pawccecize kae kha nae sungsah oh zah, Pachia kyate nynh kae thua cipaw kha na zyn oh keiccuze ka Paaw amaw ccaccei nynh nanning kha ae sungsah oh.²⁸Ka Paaw kyate kae thua zah laephi kalan kae thua vae; tukoute laephi hynh ka cciataw cih zah ka Paaw kalan ka cceih cih,” a cipya hae.

²⁹A zuitu hae nynh, “Atu tuh tousenaw bya mang leite ccaerarih lan nynh na ho vae!³⁰Nang tuh pawpaw balyn na nyh zah hum nynh sanmah byakhia ho vae khyh cipaw atu kae ny vae. Hynh-e liate nang tuh Pachia kyate nynh nae thua cipaw kaening nynh kae zyn,” a cipya hae.³¹Jesu nynh minmin kha, “Atu na zyn oh tou?³²Nae balynte nae umnaw raveih lang nae phiakuh cih oh zah, ka makhaete nae cciataw oh ccyh yn thua cih, atumaw yn thua vae; tuhzemah kae tuh ka makhae thua khyh, pawccecize ka Paaw nynh kae kha yn umkhae.³³Nanning nynh kamaw kya daenaw na hoi nawlan oh hynh-e bya hynh kae hopya oh. Nanning nynh laephi kya vawsawnaw na tung cih oh; thuasalama nae rawhoy sah; laephi tuh ka tae vae,” a ci. A Zuitu hae elang Saw A Sang

¹E bya hae hynh he a ho koute Jesu nynh vaawlang dothung zah, “Apang, accyh azaw vae; na Ccapaw nynh namaw kha phu ae esah nawlan na Ccapaw hynh phu-esah tua.²Ccungccaw balyn tungvaw kya kawhoinaw kha amaw na pya vae hawte, nang nynh Ccapaw kalan na pya hae paw ccungccaw miakaw kha Ccapaw nynh zungzae hiinnaw a pya nawlan Ccapaw hynh phu-esah tua.³Zungzae hiinnaw cipaw tuh, ahmepaw Pachia nang kyalya te na sawpaw Jesu Khri hynh minmin nynh a ny hae paw kha nynh thua.⁴Law lan nae pyapaw rya kha thangsahte, laephi vaw kya na phu-enaw kha ka langsah vae.⁵Pou Apang, laephi a um mawze namaw te pynkheihlan ka hoibua vae paw phu-enaw kha na malang hin atu yn pyatua.

⁶“Laephi kyate nae pyapaw ccungccaw hae kya na min kha ka langsah vae, minmin tuh na kya-e thua hae zah kamaw kha nae pya, te na bya kha a zui hae.⁷Nae pyapaw balyn tuh namaw kyate nynh yn thua cipaw kha minmin nynh atu a ny vae hae.⁸Pawccecize nae pyapaw bya kha mih kalan ka pya hae zah a lawku hae, te kae tuh namaw kyate yn thuapaw cipaw kha nyh ccaccing hae zah, kae tuh namaw nynh nae saw cipaw kha a zyn hae.

⁹“Minmin hanlan saw ka sang; laephi hanlan saw ka sang khyh; thuasalama nae pyapaw ccungccaw hae hanlan nynh saw ka sang, pawccecize minmin tuh na ccungccaw hae nynh thua hae.¹⁰Ka hoipaw balyn hynh namaw kya-e thua zah, na hoipaw balyn hynh mah ka kya-e nynh thua; minmin kyate ka phu-enaw tuh a langkuh.¹¹Atu te laephi kya ka um vae lan khyh, thuasalama minmin tuh laephi kya nynh a um hae, kae tuh namaw kalan kae cceih cih. Athyaapaw Apang, aening tuh ccangkheit ah thua hawte, nae pyapaw ccungccaw hae nynh ccangkheit athua nawlan hae minmin kha na min te khynsah hae.¹²Nae pyapaw ccungccaw hae ryte ka um lya tuh minmin kha na min te ka khynsah hae; azo lanpaw ccungccapaw holeite, nae pyapaw ccungccaw hae kha ka khynsah hae zah, lu kheit sanmah zo khyh hae, tuh-e tuh Ccathyaa accing nawlan nynh thua.¹³Atu na kalan kae cceih vae cih zah ka kya-e lungtuanaw hynh mih kya phe beih lan a hoi nawlan hae, hynh-e bya hynh laephi kya ka ho.¹⁴Na bya kha minmin ka pya vae hae; kae tuh laephi kya-e ka thua khyh hawte minmin mah laephi kya-e athua khyh hae keiccuze laephi nynh minmin kha a hua hae.¹⁵Minmin hynh laephi kyate na law ccaw hae cite kae ngia khyh, thuasalama ahoy leipaw kyate na khynsah ccaw hae cite nynh kae ngia.¹⁶Kae tuh laephi kya-e ka thua khyh hawte minmin mah laephi kya-e thua khyh hae.¹⁷Minmin hynh na byaccing te thyaasah hae; na bya tuh byaccing nynh thua.¹⁸Nang nynh kae hynh laephi kalan nae saw hawte kae nynh mah minmin hynh laephi kalan ka saw hae.¹⁹Minmin mah byaccing te thyaasah athua nawlan hae, minmin elang kamaw te kamaw kha ka thyaasaku.

²⁰“Minmin elang kyalya saw ka sang khyh; mih bya liate kae yn zyn cih hae paw hanlan mah saw ka sang.²¹Mih balynte ccangkheit athua nawlan hae saw ka sang. Apang, nang tuh ka kya na um zah kae mah na kya ka um hawte, minmin mah aening kya umbua hae sah. Nang nynh kae hynh nae saw cipaw laephi nynh a zyn nawlan minmin tuh ccangkheit lang beih tang hae sah.²²Aening tuh ccangkheit ah thua hawte minmin mah ccangkheit athua nawlan hae, nae pyapaw phu-enaw kha minmin ka pya hae,²³minmin tuh ccangkheit ccaccing lang a tang nawlan hae, kae tuh minmin kya ka um zah nang tuh ka kya na um, tuhteze nynh nang nynh kae hynh nae saw cipaw te kae hynh nae sungsah hawte minmin kha mah na sungsah hae cipaw kha laephi nynh a nyh cih.²⁴Apang, laephi a um mawze nae sungsah zah nae pyapaw ka phu-enaw hynh nae pyapaw ccungccaw hae nynh a muih ccaw hae, ka umnaw kya kamaw ryte um hae sah ci ka ry.

²⁵“Pou adingpaw Apang, laephi ccungccaw hae nynh namaw hynh ae nyh khyh hae, thuasalama kae nynh tuh kae ny; nang nynh kae hynh nae saw cipaw kha hynh-e hae nynh a ny hae.²⁶Nae sungsahnaw tuh minmin kya um zah kae mah minmin kya ka um nawlan, na min kha minmin ka nysah vae hae zah palei ka nysah ung cih hae,” a ci. Jesu Pheenaw te Kyngnaw (Mat 26.47-56; Mar 14.43-50; Luk 22.47-53)

¹Jesu nynh hynh-e bya a ho koute, a zuitu hae ryte Kedron vaw khuraw lang a zua hae, tuin kya khokhu ccangkheit um zah Jesu te a zuitu hae tuh tuh-e kalan a tee hae.²Amaw a pheetupaw Judas Iskariot nynh tuh-e hmin tuh a ny; pawccecize Jesu tuh a zuitu hae ryte tuin kyakhe leih a tungkuh hae.³Ranpibawi lepaw hae te Farasi hae nynh oun saw hae paw beikinn ngawtu hae te rhawkaw hae phu kheit kha Judas Iskariot nynh oun cciakhae hae zah maeekhua, maeccaw te zunghe hae kha ccyngkute oun thua hae.⁴Jesu nynh a tungvaw kya yn cyihkuh cih paw balyn kha marya a ny keiccuze cceih zah minmin kha, “Hummou na ccung oh?” cite a khia hae.⁵Minmin nynh, “Nazareth khuapaw Jesu,” cite a khung hae. Jesu nynh, “Kae hynh amaw nynh ka thua,” a cipya hae. Amaw a pheetupaw Judas Iskariot mah minmin ryte a thadynbua.⁶Minmin kha, “Kae hynh amaw nynh ka thua,” cite he a hopah hae tuh, minmin tuh nulang sihkuh hae zah laekhu kya a khuliakuh hae.⁷Jesu nynh, “Hummou na ccung oh?” cite bua a khia hae. Minmin nynh, “Nazareth khuapaw Jesu nynh kae ccung,” a ci hae.⁸Jesu nynh, “Kae hynh amaw nynh ka thua cite phe kae hopya vae oh; tukeiccuze kae hynh nae ccung oh ze, hynh-e ccungccaw hae tuh la cceih hae sah,” cite a khung hae.⁹“Nae pyapaw ccungccaw hae kha lu kheit sanmah ka zosah khyh hae,” cite a hopaw bya kha accing nawlan nynh hynhte a ho.¹⁰Simon Peter nynh a ccyngkupaw thaloi kha thuaakuh zah ranpibawi a seepaw kha bae zah a ranglang nakua thoh pae. Tuh-e seepaw a min tuh Malkhas acikuh.¹¹Jesu nynh Peter kha, “Na thaloi kha a bu lungkhu lang sang, ka Paaw nynh yn pyapaw banang tuh ka neih lan khyh tou?” a cipya. Annas malang Jesu (Mat 26.57-68; Mar 14.53-65; Luk 22.63-71)

¹²Rhawkaw hae, rhawbawi hae te Judah palih hae nynh Jesu kha kyng hae zah a khii hae.¹³Annas kalan masaty a cciakhae hae, pawccecize Annas tuh tuh-e kum kya ranpibawi lupi Kaiafas a zu paaw nynh thua.¹⁴Kaiafas tuh, ‘Ccungccaw hae hanlan lu kheit nynh a chipaw tuh ahoyhua,’ cite Judah hae kya tuanaw a pyatu nynh thua. Peter nynh Jesu A Vua (Mat 26.69-70; Mar 14.66-68; Luk 22.55-57)

¹⁵Simon Peter te ccangpaw zuitu lu kheit nynh Jesu kha a zui hae; tuh-e zuitu tuh ranpibawi lupi nynh a nypaw thua zah Jesu ryte ranpibawi lupi umnaw maepaw lang a tee hae.¹⁶Peter tuh sakoih pe atolang khe a thadyn. Tukeiccuze ranpibawi lupi nynh a nypaw tuh-e ccangpaw zuitu tuh pou zah sakoih a ngawtu nopinung kha hopah zah Peter kha a lungkhu lang a teekhae.¹⁷Sakoih a ngawtu nopinung nynh Peter kha, “Nang so hynh-e ccungccapaw a zuitu hae kyaze lu kheit na thuabua khyh tou?” cite a khia. Peter nynh, “Ka thua khyh,” a ci.¹⁸Tuh ccyh lya tuh akyaa keiccuze see hae te palih hae tuh maeehue te maeetuakuh hae zah thadyn lante maee a ekuh hae; Peter tuh mih kya thadynbua zah maee a ekuh bua. Annas nynh Jesu Bya A Khia

¹⁹Tetuh ranpibawi lupi nynh Jesu kha a zuitu hae kong te a ccangpyanaw kong bya a khia.²⁰Jesu nynh, “Laephi ccungccaw hae kya alangkuh lante phe ka ho vae; Judah hae nynh leih a tungkunaw hae sinakok hae kya te beikinn kya palei ka ccangpah hae. Aphiruh lante ka ho boi khyh.²¹Pawccemou kae hynh bya nae khia? Ka hopya hae paw bya a thaetu hae kha khiatua hae; minmin tuh ka hopaw kha a nyh hae,” cite a khung.²²Tuhte he a ho tuh a pe thadynpaw palihpaw nynh Jesu mae kha bia zah, “Ranpibawi lupi kha pawtemou tuhte na khung ngan?” a cipya.²³Jesu nynh, “Ahme leipaw ka ho ze, ahme leinaw kong ccaekia langsaku tua; ahmepaw ka ho ze pawccemou nae bia?” cite a khung.²⁴Annas nynh Jesu kha phang heekuh lante ranpibawi lupi Kaiafas kalan a ky. Peter nynh Bua A Vua (Mat 26.71-75; Mar 14.69-72; Luk 22.58-62)

²⁵Simon Peter tuh thadyn zah maee a ekuh. Minmin nynh, “Nang mah a zuitu hae kyaze lu kheit na thuabua khyh tou?” cite a khia hae. Peter nynh, “Ka thua khyh,” cite a pheiku.²⁶Peter nynh a nakua thoh pae lan a baepaw te vaeccawtang hae paw, ranpibawi lupi see hae kyaze lu kheit nynh, “Nang tuh Jesu ryte khokhu kya na um oh paw kha mang kae muih rei?” a ci.²⁷Peter nynh bua a pheiku, tuh ccyh lyakhe aw ccahe yn khua. Pilat malang Jesu (Mat 27.11-14; Mar 15.1-5; Luk 23.1-5)

²⁸Minmin nynh Jesu kha Kaiafas kyate Pilat inn lang a cciakhae hae; tuh lya tuh awkhua takaw nynh thua. Mimaw tuh Kawtaw Poi kya aebua kho nawlan, phe kae thusei cih cite Pilat inn lungkhu lang teebua khyh hae.²⁹Tukeiccuze Pilat nynh minmin kha toinuakuh hae zah, “E ccungccapaw hynh paw seinaw mou na be oh?” a ci.³⁰Minmin nynh, “E ccungccapaw hynh miseipaw athua khyh ze, na kalan kae ap lan khyh,” a cipya hae.³¹Pilat nynh minmin kha, “Amaw hynh cciakhae oh lah naemaw phung thyhte bya la pia oh,” a cipya hae. Judah hae nynh, “Kaening tuh hum sanmah chianaw kaw kae hoi khyh,” cite a khung hae.³²Tuhte a ho hae paw tuh, Jesu nynh pawcihawpaw chinaw te nynh ka chih cih cipaw a la hotypaw bya kha accing nawlan nynh thua.

³³Pilat tuh inn lungkhu lang bua tee zah Jesu kha ko zah, “Nang hynh Judah hae Siapharan na thua tou?” cite a khia.³⁴Jesu nynh, “E bya hynh namaw lung te na hopaw tou? Tuhkhyhze ming hae nynh tou kamaw kong hynh ae hopah hae?” cite a khung.³⁵Pilat nynh, “Kae tuh Judah paw ka thua zawtou? Na minphuin hae te ranpibawi lepaw hae nynh nang hynh ka kalan ae ap hae, nang nynh pawmou na cyi?” cite a khia.³⁶Jesu nynh, “Ka peenaw tuh hynh-e laephi kya-e thua khyh, ka peenaw tuh hynh-e laephi kya-e a la thua ze, kae tuh Judah hae kalan ap ka thua khyh nawlan ka ccungccaw hae nynh rhaw yn tukpah cih hae; thuasalama ka peenaw tuh hein kya-e thua khyh,” cite a khung.³⁷Pilat nynh, “Tuhteze nang tuh siapharan na thua tou?” a cipya. Jesu nynh, “Kae tuh na ho hawte siapharan nynh ka thua. Kae tuh byaccing kha ccaekiakhan khylan kae pui zah hynh-e khylan nynh laephi kalan kae thua. Byaccing te asekuhpaw ccungccaw miakaw nynh ka bya hynh a ngae,” cite a khung.³⁸Pilat nynh, “Byaccing tuh pawmou?” cite a khia. Jesu Chia lan Byapaenaw
E bya hynh a ho koute Pilat tuh Judah hae kalan bua cceih zah, “A seinaw pawpaw mah ka muih khyh.³⁹Thuasalama Kawtaw Poi kya ccungccaw lu kheit leih kae luesahpya oh paw phung kha na hoi oh; tukeiccuze Judah hae Siapharan hynh kae luesahpya oh ze na ry oh tou?” a cipya hae.⁴⁰Minmin nynh siabia hae zah, “Hynh-e paw tuh kae luesah ry khyh, Barabbas nynh kae luesah ry,” a ci hae. Tuh-e Barabbas tuh damiah nynh thua.

¹Pilat nynh Jesu kha cciakhae zah liarue te a buasah hae.²Rhawkaw hae nynh hinpaw lukhung kha khepah hae zah a lu vawlan a khungsah hae, te boei sepaw kha a zingsah hae.³Ccianua hae zah, “Judah hae Siapharan tuh a she sae vae sah!” ci hae zah a mae kha a bia hae.⁴Tukeiccuze Pilat nynh bua toikuh zah, “Dotua oh, a seinaw pawpaw mah ka muih khyh cipaw na ny nawlan oh amaw hynh nae kalan kae cciakhae,” a cipya hae.⁵Jesu tuh hinpaw lukhung khungkuh zah boei sepaw zingkute yn pou. Pilat nynh minmin kha, “E ccungccapaw hynh dotua oh!” a cipya hae.⁶Ranpibawi lepaw hae te palih hae nynh Jesu kha he muih hae tuh, “Vaelantung kya khiade oh! Khiade oh!” cite a sia hae. Pilat nynh minmin kha, “Nanning nynh amaw hynh cciakhae oh lah vaelantung kya khiade oh, kae tuh a seinaw pawpaw mah ka muih khyh,” a cipya hae.⁷Judah hae nynh, “Phung ccangkheit kae hoi zah tuh-e phung thyhte aning tuh chi lan accan, pawccecize Pachia Ccapaw nynh ka thua a ciku,” cite a khung hae.

⁸Pilat nynh tuh-e bya he a thae tuh, houh a rih vae.⁹A inn lungkhu lang bua tee zah Jesu kha, “Nang hynh paw kyate mou nae thua?” cite a khia. Thuasalama Jesu nynh kaw kheit san khung khyh.¹⁰Pilat nynh, “Bya nae khung lan khyh tou? Kae tuh nang hynh vaelantung kya khiadenaw kaw te luesahnaw kaw ka hoipaw kha na nyh khyh tou?” a cipya.¹¹Jesu nynh, “Vaawlang te nang hynh kawpya athua khyh ze nang nynh ka tungvaw kya paw kaw sanmah na hoi kho khyh; tukeiccuze nang na kalan kae yn appaw ccungccaw tuh ale huapaw seinaw a hoi,” cite a khung.¹²Tuin ccyh kyate tho zah Pilat nynh Jesu kha luesah lan a zuaku; thuasalama Judah hae nynh, “E ccungccapaw hynh na luesah lan athua ze, nang tuh Sizar banpaw na thua khyh; humhung zemah amaw te amaw siapharan lang a tansakuhpaw tuh siapharan a rawsepaw nynh thua,” cite a sia hae.

¹³Pilat nynh tuh-e bya he a thae tuh, Jesu kha atolang poukhae zah Hebru bya te Gabbatha ci hae zah ‘Lungphae’ a ci hae paw byapianaw tungkhung kya a haung.¹⁴Tuin nin tuh Kawtaw Poi hanlan Paccynku nin thua zah ninthu loukaw nynh thua. Pilat nynh Judah hae kha, “Nae Siapharan hynh dotua oh!” a cipya hae.¹⁵Thuasalama minmin nynh, “Amaw kha poukhae oh! Poukhae oh! Vaelantung kya khiade oh!” cite a sia hae. Pilat nynh, “Nae Siapharan tuh vaelantung kya ka khiade cih tou?” cite a khia hae. Ranpibawi lepaw hae nynh, “Sizar laelan siapharan kae hoi khyh,” cite a khung hae.¹⁶Tetuh Pilat nynh Jesu kha vaelantung kya khiade lan mih kalan a pya hae. Tukeiccuze minmin nynh Jesu kha a cciakhae hae. Vaelantung kya Khiadenaw (Mat 27.32-44; Mar 15.21-32; Luk 23.26-43)

¹⁷Jesu tuh a vaelantung puihkute ‘Luru hmin’ a ci hae paw hmin kalan a cceih, tuh-e hmin tuh Hebru bya te ‘Golgotha’ a ci hae.¹⁸Tuin kyakhe Jesu kha ccangpaw ccungccaw lu ning ryte vaelantung kya a khiade hae, a voilang lu kheit a ranglang lu kheit, Jesu tuh angaelaku nynh a um.¹⁹Pilat nynh ccawkhia kha zei zah vaelantung kya a taw. Ccawkhia kyakhe, “Judah hae Siapharan, Nazareth khuapaw Jesu,” cite a zei.²⁰E ccawkhia hynh Judah hae patae nynh a ria hae, pawccecize Jesu a khiadenaw hae hmin tuh khua kyate anaekuh; tuh-e ccawkhia tuh Hebru bya, Latin bya, Grik bya te a zei hae.²¹Judah hae kyaze ranpibawi lepaw hae nynh Pilat kha, “ ‘Judah hae Siapharan’ cite zei leite, ‘Kae tuh Judah hae Siapharan nynh ka thua a ciku,’ cite zei,” a cipya hae.²²Pilat nynh, “Ka zei vae paw tuh ka zei thyhte um sah,” cite a khung hae.²³Rhawkaw hae nynh Jesu kha vaelantung kya a khiade kou hae te, a boeining hae kha lawkuh hae zah zung pali lang seii hae zah lu kheit ze zung kheit ccite a neeku hae, akaw-angki kha mah a khah hae; tuh-e akaw-angki tuh ahuikunaw a um lei lante alu te alia cia a kua hae paw nynh thua.²⁴Tukeiccuze minmin nynh, “E tuh seii nan oh sih, hummou a ccou cih cipaw ny nawlan ccungthydung oh sih,” cite lu kheit te lu kheit a hoku hae. Tuh-e tuh Ccathyaa kyaze,“Minmin nynh ka boeining hae khaa neeku hae, ka angki hanlanccungthy a dung hae,”cite a hopaw kha accing nawlan nynh thua. Tuhcite rhawkaw hae nynh a cyi hae.

²⁵Tuh ccyh lyakhe Jesu a vaelantung pe khe Jesu a nung te a nung neitawnung athuapaw Klopas zu Mary te Mary Magdalin tuh a thadyn hae.²⁶Tukeiccuze Jesu nynh a nung te a sungsahpaw a zuitupaw a thadyn hae paw kha he a muih tuh, a nung kha, “Nopinung, khah-e kha na ccapaw,” a cipya.²⁷Tukoute a zuitupaw kha, “Khah-e kha na nung,” a cipya. Tuin ccyh kyate tuh-e zuitupaw nynh Jesu nung kha a inn lang a cciakhae.

²⁸Tukoute Jesu nynh atu tuh pawpaw balyn marya accing vae cipaw nyh zah, Ccathyaa kya a umpaw kha accing nawlan, “Tui ka haw,” a ci.²⁹Tuin kya misutui ariapaw phe beihpaw lungre zung kheit a um, minmin nynh boeipuepaw kha misutui ariapaw lungkhu lang dung hae zah hyssop ku aran kya heede hae zah Jesu mung kya a nungde hae.³⁰Jesu nynh misutui ariapaw kha a neih koute, “Athang vae,” a ci; tukoute a lu ting zah a hy athang. Jesu Naw A Thuing hae (Mat 27.45-46; Mar 15.33-41; Luk 23.44-49)

³¹Tuin nin tuh Paccynku nin thua zah awkhualan sabbath nin tuh alesaepaw nin athua keiccuze, Judah hae nynh michi rhua hae kha sabbath nin kya vaelantung kyakhe phang a um vae khyh ccaw cite, mih ccu hae kha khya khylan te mih rhua hae kha law khylan Pilat kha a ngia hae.³²Rhawkaw hae nynh oun thua hae zah Jesu ryte vaelantung kya a khiadekheih hae paw lukheitpaw ccu te ccangpaw lukheitpaw ccu kha a khya hae.³³Thuasalama minmin nynh Jesu kya a thua hae tuh, a chih vae cipaw nyh hae zah a ccu kha khya vae khyh hae.³⁴Thuasalama rhawkawpaw lu kheit nynh a naw kha ccoi te thuing zah chii te tui palou apou.³⁵(Tuh-e konglang tuh na zyn nawlan oh a muihtupaw nynh ccaekia a khan. A ccaekia tuh hme zah byaccing nynh ka ho cipaw a nyku).³⁶Hynhte acyikupaw hynh Ccathyaa nynh, “A ru ccangkheit sanmah khya thua lan khyh,” a cipaw kha accing nawlan nynh thua.³⁷Ccangpaw Ccathyaa nynh, “Mimaw nynh a thuing hae paw ccungccapaw kha minmin nynh a do cih hae,” bua a ci. Jesu Rhua Ccynaw (Mat 27.57-61; Mar 15.42-47; Luk 23.50-56)

³⁸Tukoute Judah hae raw a ri keiccuze aruh lante Jesu zuitu athuapaw, Arimathea khuapaw Josef nynh Jesu rhua kha lawku lan Pilat kalan ngiakuh zah Pilat nynh a ua. Tukeiccuze aning nynh cceih zah Jesu rhua kha a lawku.³⁹Khuazi kya Jesu kalan a cceih boi paw Nikodemu mah pound za kheit loukaw aripaw mura te aloe apydekuhpaw mynkhuhpaw kha yn ccyng zah tuhlang yn thuabua.⁴⁰Minmin nynh Jesu rhua kha lah hae zah Judah hae michi ccynaw phung thyhte, mynkhuhpaw ryte nebaleihpaw boei rawpaw te a rhua kha a lung hae.⁴¹Vaelantung kya a khiadenaw hae hmin kya khokhu ccangkheit um zah, tuin kyakhe ccungccaw lu kheit san a ccynaw boi lei hae paw shaw thawpaw a um.⁴²Judah hae Paccynku nin athua keiccuze anaenaw umpaw tuh-e shaw kyakhe Jesu rhua kha a ccy hae. Jesu Thoothuinaw (Mat 28.1-8; Mar 16.1-8; Luk 24.1-12)

¹Lonaw naw kheit kyaze masaty nin awkhua takaw, khua adae mawkhe Mary Magdalin tuh shaw kalan cceih zah shaw kyate athuhhu lung anuekupaw kha a muih.²Tukeiccuze Mary tuh Simon Peter te Jesu nynh a sungsahpaw ccangpaw zuitupaw kalan ccue zah minmin kyakhe, “Ccungccaw hae nynh Bawipaw rhua kha shaw kyate phe a law vae hae, paw kya nynh a nung hae cipaw kae nyh khyh,” a cipya hae.³Tetuh Peter te ccangpaw zuitupaw tuh thokuh hae zah shaw kalan a cceih hae.⁴Mih lu ning te ccue hae zah ccangpaw zuitupaw nynh Peter kha po thoih zah shaw kalan a thuaty.⁵Shaw lungkhu lang bakhung zah he a do tuh, nebaleihpaw boei rawpaw kha a muih, thuasalama a lungkhu lang tee khyh.⁶Simon Peter tuh yn dekuh bua zah yn thua, te shaw lungkhu lang po tee zah boei rawpaw phang a umpaw kha a muih.⁷Jesu lu a heenaw hae paw pavua tuh nebaleihpaw boei rawpaw ryte umkheih leite ccangte phang bikuhpaw kha a muih.⁸Shaw kalan a thua typaw ccangpaw zuitupaw mah teebua zah a muih keiccuze a zyn.⁹Pawccecize Ccathyaa nynh Jesu tuh chinaw kyate a thoothui hahe cih a cipaw kha minmin nynh la thaethya loh khyh hae.¹⁰Tukoute zuitu hae tuh mih inn lang a ki hae. Mary Magdalin kya Langkunaw (Mat 28.9-10; Mar 16.9-11)

¹¹Mary tuh shaw atolang khe rah zah a thadyn, a rah lalia lante bakhung zah shaw lungkhu lang a do.¹²Arawpaw boeining a lawkuh hae paw vaaw hae lu ning nynh Jesu rhua a ccynaw hae kyakhe a lu lang lu kheit, a ccu lang lu kheit a haung hae paw kha a muih.¹³Vaaw hae nynh Mary kha, “Nopinung, pawccemou na raw?” a cipya hae. Mary nynh, “Ccungccaw hae nynh ka Bawipaw kha phe a law vae hae, paw kya nynh a nung hae cipaw ka ny khyh,” cite a khung hae.¹⁴Tuhte a ho koute nulang maekuh zah Jesu a thadynpaw kha a muih, thuasalama Jesu nynh thua cipaw nyh khyh.¹⁵Jesu nynh, “Nopinung, pawccemou na raw? Hummou na ccung?” a cipya. Mary nynh khokhu ngawtupaw vosi cite tua zah, “Sazae, nang nynh a rhua kha na law lan athua ze na nungnaw kha beih yn hopah, ka cceih cih zah ka lawkuh cih,” a cipya.¹⁶Jesu nynh, “Mary!” cite a ko. Mary nynh nulang maekuh zah Hebru bya te, “Rabboni!” a ci (asuilan tuh Sazae cipaw nynh thua).¹⁷Jesu nynh, “Yn kyng nan, pawccecize ka Paaw kalan ka kaethung loh khyh; thuasalama ka uno hae kalan la cceih lah, kae tuh ka Paaw athuapaw nae Paaw, ka Pachia athuapaw nae Pachia kalan ka kaethung cih cipaw la hopah hae,” a cipya.¹⁸Mary Magdalin nynh cceih zah Bawipaw a muihnawpaw te a kya a hopyapaw bya balyn kha zuitu hae kya a hopya hae. Zuitu hae kya A Langkuh

¹⁹Lonaw kyaze masaty nin athuapaw tuh-e nin kya zete yn thua tuh, Judah hae raw a ri hae keiccuze zuitu hae tuh pynkheihlan a tungkunaw hae kyakhe thuakaw hae kha pong a khaw hae, tuh ccyh lyakhe Jesu tuh yn thua zah angaelaku khe thadyn zah, “Nae kya daenaw um sah,” a cipya hae.²⁰Tuhte a ho koute a kuih te a naw kha a dosah hae. Zuitu hae nynh Bawipaw kha a muih hae tuh mih lungtua.²¹Jesu nynh minmin kha, “Nae kya daenaw um sah; ka Paaw nynh yn saw hawte, nanning kha kae saw oh,” bua a cipya hae.²²Tuh-e bya a ho koute, Jesu nynh mih tungvaw kya a hy sawnua hae zah, “Thyaa Muisaw hynh mue oh.²³Nanning nynh lukhakheit seinaw kha na ngaethya oh ze, mih seinaw tuh ngaethya athua; nanning nynh lukhakheit seinaw kha na tynsah oh ze, a seinaw tuh phang atyn,” a cipya hae. Thomas Zyn leinaw

²⁴Zuitu lu haw lae ning kyaze lu kheit athuapaw Thomas (Ccaawphei ci hae paw) tuh Jesu a thua lya minmin kya umbua khyh.²⁵Tukeiccuze ccangpaw zuitu hae nynh, “Bawipaw kha kae muih vae,” cite a hopya hae. Thuasalama Thomas nynh, “A kuih kya thingkhia te a khianaw hae adaelaepaw kha ka muih leite, tuh-e adaelaepaw kha ka kuihdung te ka putua leite, a naw kya-e adaelaepaw kha ka kuih te ka haetua leite tuh ka zyn lan khyh,” a cipya hae.

²⁶Naw kheit koute zuitu hae tuh inn lungkhu kya bua um hae zah Thomas mah a umbua. Thuakaw hae kha marya mang a khaw hae pite, Jesu tuh yn thua zah angaelung khe thadyn zah, “Nae kya daenaw um sah,” a ci.²⁷Jesu nynh Thomas kha, “Na kuihdung kha hein kya yn putua lah, ka kuih hae hynh dotua. Na kuih kha yn dyng lah ka naw hynh yn haetua. Zyn leite um nan vae, zyn ccavae,” a cipya.²⁸Thomas nynh, “Ka Bawipaw te ka Pachia!” a ci.²⁹Jesu nynh, “Thomas, nang tuh nae muih keiccuze na zyn. Kae hynh yn muih leite yn zyn hae paw tuh lungtuapaw nynh thua hae,” a cipya. Hynh-e Ccauh Eenaw

³⁰E ccauh kya azeikuh leipaw ccangpaw muihsahnaw patae kha mah Jesu nynh a zuitu hae muihnaw kya a langsaku.³¹Thuasalama Jesu tuh Messiah, Pachia Ccapaw nynh thua cipaw na zyn nawlan oh te tuhte na zynnaw oh liate amaw min te hiinnaw na hoi nawlan oh nynh hynh-e hae hynh zei athua. Zuitu hae Lu Sari kya Langkunaw

¹Tukoute Jesu tuh a zuitu hae kya Tiberias Tuili pe bua a langkuh; a langkunaw tuh hynhte nynh thua:²Simon Peter te Ccaawphei a ci hae paw Thomas, Galilee pee Kana khuapaw Nethanal, Zebedi ccapaw hae te ccangpaw a zuitu hae lu ning tuh pynkheihlan la um hae.³Simon Peter nynh minmin kha, “Ngasaw kyng lan ka cceih cih,” a cipya hae. Minmin nynh, “Kaening mah kae cceihbua cih,” a ci hae. Minmin tuh cceih hae zah kohlung lungkhu lang a tee hae, tuh-e khuazi tuh ccangkheit san kyng khyh hae.

⁴Khua he yn dae tuh Jesu tuh varang langkhe a thadyn; thuasalama zuitu hae nynh Jesu nynh thua cipaw nyh khyh hae.⁵Jesu nynh minmin kha, “Ka ccaaw oh, ngasaw na kyng khyh oh tou?” cite a khia hae. Minmin nynh, “Kae kyng khyh,” cite a khung hae.⁶Jesu nynh minmin kha, “Kohlung ranglang khe mia kha vua oh lah, beihtaraw tuh na kyng cih oh,” a cipya hae. Tukeiccuze minmin nynh mia kha vua hae zah ngasaw eih alung keiccu mih mia kha sue kho vae khyh hae.⁷Tetuh Jesu nynh a sungsahpaw zuitupaw nynh Peter kha, “Bawipaw nynh thua!” a cipya. Simon Peter nynh Bawipaw nynh thua cipaw he a thae tuh a angki kha kikuh zah tuili lungkhu lang a phungkuh, (pawccecize aning tuh angki la kikuh khyh).⁸Ccangpaw zuitu hae tuh ngasaw phe beihpaw mia kha oun suebia hae zah kohlung taraw te oun thua hae, pawccecize minmin tuh varang langte eih sawkuh khyh hae, dung za ning loukaw nynh a sawkuh hae.

⁹Varang lang he oun thua hae tuh, maeehue maee vawlan ngasaw rankuhpaw te sanlou kha a muih hae.¹⁰Jesu nynh minmin kha, “Atu na kyng oh paw ngasaw abang kha oun cciakhae oh,” a cipya hae.¹¹Simon Peter nynh kohlung kalan kae zah ngasaw lepaw za kheit sung pangaw zaw thum te phe beihpaw mia kha varang lang a sue; ngasaw tuh myarya alung zemah mia tuh seiikuh khyh.¹²Jesu nynh minmin kha, “Rang oh lah awkhua looh hynh oun ae oh,” a cipya hae. Bawipaw nynh thua cipaw kha a ny hae keiccu zuitu hae kyaze hum nynh sanmah, “Hummou na thua?” cite khia ngan khyh hae.¹³Jesu nynh cceih zah sanlou kha lah zah minmin kha a pya hae, tuhawte ngasaw kha mah a pya hae.¹⁴E tuh Jesu chinaw kyate a thoothui koute a zuitu hae kya vae thumnaw a langkunaw nynh thua. Jesu te Peter

¹⁵Awkhua looh a ae kou hae te, Jesu nynh Simon Peter kha, “Johan ccapaw Simon, hynh-e hae nynh yn sungsah hae laeze kae hynh nae sungsahua tou?” cite a khia. Simon nynh, “Ou, Bawipaw, kae sungsah cipaw phe na ny,” a cipya. Jesu nynh, “Ka tuutaw hae kha looh la dang hae,” a cipya.¹⁶Jesu nynh, “Johan ccapaw Simon, kae hynh nae sungsah tou?” cite vae ningnaw bua a khia. Simon nynh, “Ou, Bawipaw, kae sungsah cipaw phe na ny,” a cipya. Jesu nynh, “Ka tuu hae kha la do-oih hae,” a cipya.¹⁷Jesu nynh, “Johan ccapaw Simon, kae hynh nae sungsah tou?” cite vae thumnaw bua a khia. Bawipaw nynh, “Kae hynh nae sungsah tou?” cite vae thum cia a khia keiccuze Peter tuh a thinlungccih zah, “Bawipaw, nang tuh pawpaw balyn marya na ny; kae sungsahpaw mah phe na ny,” a cipya. Jesu nynh, “Ka tuu hae kha looh la dang hae.¹⁸Byaccaccing kae hopya, na no lya tuh na taeccia kha na cciakuh zah na rynaw miakaw lang leih na cceih. Thuasalama he nae taw vae tetuh na kuih hae kha na zo cih zah ming hae nynh ae heede cih hae zah na ccia ry leinaw lang ae cciakhae cih hae,” a cipya.¹⁹(Jesu nynh hynhte a hopaw tuh, Peter nynh pawcihawpaw chinaw te nynh Pachia kha phu-enaw a pya cih cipaw a langsahpaw nynh thua.) Tuhte a ho koute Jesu nynh Peter kha, “Yn zui,” a cipya. Peter te Johan

²⁰Peter nynh nulang maekuh zah Jesu nynh a sungsahpaw zuitupaw tuh mih nulang te yn zuikupaw kha a muih. Tuh-e paw tuh zerya a ae lya hae ze Jesu by vaw kya ngeikuh zah, ‘Bawipaw, nang ae phee cih paw tuh hummou?’ cite a khiatupaw nynh thua.²¹Tuh-e paw kha Peter nynh he a muih tuh Jesu kha, “Bawipaw, hynh-e paw so pawtemou athua cih?” cite a khia.²²Jesu nynh, “Kae thua cia aning kha ka hiinsah ry ung ze, nang te pawmou asekuh? Kae hynh yn zui!” a cipya.²³Tukeiccuze tuh-e zuitupaw tuh chih lan khyh cite uno hae kya laanbya athan; thuasalama aning tuh chih lan khyh cite Jesu nynh ho khyh; thuasalama, ‘Kae thua cia aning kha ka hiinsah ry ung ze, nang te pawmou asekuh?’ cite nynh a ho.

²⁴Tuh-e zuitupaw tuh hynh-e konglang ccaekiakhantu thua zah hynh-e konglang a zeitu mah athua, te a ccaekia tuh ahme cipaw kaening nynh kae ny.²⁵Jesu nynh a cyipaw ccangpaw patae a um ung, tuh-e hae miakaw tuh zei athua ze, zeinawpaw ccauh hae kha laephi nynh ccawng lan khyh cite nynh ka tua.

Bible Society of Myanmar

https://app.library.bible/content/1a340f5ae072b2f4