LUKA1

Baptisma Pyatu Johan Puinaw

1Ccungccaw patae nynh aening kya acyihkuhpaw konglang kha ccaw te zei lan a zuaku hae.2Tuhawte atakaw lyaze mit te a muih hae paw ccaekia hae te thehoypaw a phytu hae nynh a ho hae thyhte a zei hae.3Tukeiccuze sawtua lan kou umpaw Theofilas, kae mah atakaw te pawpaw balyn kha akaw-aleih ka thaethya koute, po akyngkuh lante na kalan zei lanze ahoy cih cite ka tua,4tuhteze nynh ae ccangpya vae hae paw uccaw hae konglang ahmepaw kha na nyh cih.
5Judea ram kya Herod Siapharan ccyh lyakhe Abijah ranpibawi aphu kya a um buapaw Zekhariah a ci hae paw ranpibawi lu kheit a um; a zu tuh Aaron ciihan thua zah a min tuh Elizabeth acikuh.6Minmin lu ning tuh Bawipaw kawbya hae te phung hae balyn kha ccaenaw um lei lan a zui hae paw thua zah Pachia malang parouh mawte a ding hae paw nynh thua.7Elizabeth tuh a tiin keiccuze ccaawsaah khyh hae, parouh mawte myarya taw vae hae.
8Vaekheih tuh Zekhariah nynh amaw a phu hae ryte atue nynh a phya thyhte Pachia malang ranpibawi rya a law lyakhe,9ranpibawi ryalaw phung thyhte, ccungthydung hae zah aning tuh Bawipaw beikinnthyaa lungkhu lang tee lan zah mynkhuhpaw u lan accan.10Mynkhuhpaw a u lyakhe ccungccaw hae balyn tuh atolang khe saw a sang hae.11Bawipaw vaawpaw tuh a kya yn langkuh zah mynkhuhpaw unawpaw silawhang ranglang khe a thadyn.12Zekhariah nynh he a muih tuh siikuh zah a rih.13Thuasalama vaawpaw nynh, “Zekhariah, rih nan, pawccecize na sawsangnaw tuh thaepya athua, na zu Elizabeth nynh ccapaw ae saahpah cih zah a min tuh Johan cite na phu cih.14Na lungtua cih zah na lungpaw cih; tuh-e ccapaw a pui keiccuze ccungccaw patae mah mih lungtua cih.15Pawccecize aning tuh Bawipaw muihnaw kya a lesae cih. Misutui te ruithyapaw kha kharouh neih lan khyh; aning tuh a pui mawze Thyaa Muisaw te abeih cih.16Israel ccungccaw patae kha Bawipaw mih Pachia kalan a kikhae cih hae.17Bawipaw malang zeccuetu athua cih zah profeh Elijah hawte a thungpaw te huhan hoipaw athua cih. Paaw hae te ccaaw hae kha oun ccawsakuh thui cih hae zah kawngae lei hae paw kha miding hae hawnaw kalan oun kikhae cih hae. Bawipaw hanlan ccungccaw hae kha a paccyn ty cih,” a cipya.18Zekhariah nynh vaawpaw kha, “Tuhte yn cyiku lanpaw tuh pawtemou ka nyh cih? Pawccecize kae tuh a taw vae paw ka thua zah, ka zu mah a kum phe tang vae,” a cipya.19Vaawpaw nynh, “Kae tuh Gabriel nynh ka thua. Pachia malang a thadynpaw ka thua zah, aning nynh hynh-e thehoypaw hynh na kalan hopya lan te phypya lan yn saw.20Nang nynh accyh yn zaw te accing cih paw ka bya hynh na zyn khyh keiccuze hynh-e uccaw hae accing makhia byaho kho leite na um cih zah bya na ho lan khyh,” a cipya.
21Ccungccaw hae nynh Zekhariah kha phang ngaw hae zah beikinnthyaa lungkhu khaw aro keiccu mih ngaeangthua.22Aning nynh he yn pou tuh byaho kho vae khyh zah, beikinn lungkhu kya vizin nynh a muih cih cite a tua hae; aning nynh a kuih te a tangpya hae, bya tuh ho kho vae khyh.23Zekhariah tuh a ryalaw ccyh athang te a inn lang a ki.
24Aro mawze a zu Elizabeth tuh ccaawpoi zah sawpaw sah pangaw lungkhu inn kya a khungkuh.25Elizabeth nynh, “Ccungccaw hae laku kya ka teingpaw maethyanaw kha lawpya khylan Bawipaw nynh yn bawm zah, e hynh yn cyipya,” a ci. Jesu Pui lanpaw Hotynaw
26Sawpaw sah taruhnaw lyakhe Pachia nynh vaawpaw Gabriel kha Galilee ram, Nazareth a ci hae paw khua kya umpaw liaccady kalan a saw,27tuh-e liaccady tuh David ciihan athuapaw a min Josef a ci hae paw ccungccapaw elang a dypya vae hae paw thua zah a min tuh Mary acikuh.28Vaawpaw nynh tuh-e nung kalan yn thua zah, “Maehoynaw a ccounung, na tungvaw hythuanaw um sah! Bawipaw tuh na kya a um,” a cipya.29Mary nynh tuh-e bya a thae te, a lungriathae zah, e byabeihnaw hynh pawcihawpaw mou athua cite a tua.30Vaawpaw nynh, “Mary, rih nan, pawccecize Pachia nynh nang kha maehoynaw ae pya.31Ccaaw na poi cih zah Ccapaw na saah cih, a min tuh Jesu cite na phu cih.32Aning tuh a lesaepaw athua cih zah Ahang Huaccepaw Pachia Ccapaw cite ko athua cih, Bawipaw Pachia nynh amaw tuh a minpaaw David kya-e bawitungkhung kha a pya cih.33Aning nynh Jakob ciihan kha zungzae a uk cih zah a peenaw tuh thang boi lan khyh,” a cipya.34Mary nynh vaawpaw kha, “Kae tuh liaccady nynh ka thua, pawtemou tuh-e tuh athua kho cih?” a cipya.35Vaawpaw nynh, “Thyaa Muisaw tuh na tungvaw yn thua cih zah Ahang Huaccepaw thungnaw tuh na tungvaw yn um cih; Tukeiccuze na saah lanpaw Ccapaw tuh athyaapaw athua cih zah Pachia Ccapaw cite ko athua cih.36Dotua, na pui oh paw Elizabeth, a tiinnung a ci hae paw mah a taw vae mawte ccaawpoi zah atu hynh sawpaw sah taruh acih vae.37Pawccecize Pachia nynh a cyi kho leipaw pawpaw mah um khyh,” a cipya.38Mary nynh, “Kae tuh Bawipaw seenung nynh ka thua, na bya hawte ka tungvaw thua vae sah,” a ci. Te vaawpaw tuh Mary kyate phe a cceih. Mary nynh Elizabeth A Paebua
39Tuin nin hae kyakhe Mary tuh thokuh zah Judea muaram kya a umpaw khua langkhe arangte a cceih,40Zekhariah inn lang tee zah Elizabeth kha a beih.41Mary nynh bya a beihpaw kha Elizabeth nynh he a thae tuh, a vue lungkhu e imua tuh a thohkuh. Elizabeth tuh Thyaa Muisaw te phe beih zah,42aning nynh roi accae lante a hopaw tuh: “Nopi hae lakuze nang tuh hythua a ccounung nynh na thua, na vue kya-e imua mah hythua a ccoupaw nynh thua.43Ka Bawipaw a nung nynh ka kalan paebua lan ciate pawccemou hynh-e maehoynaw hynh kae nynh ka mue?44Pawccecize bya nae beihpaw roi ccahe ka thae te, ka vue lungkhu e imua tuh a lungtua zah a thohkuh.45Bawipaw nynh a hopyapaw bya kha accing cih cite a zynpaw nopinung tuh hythua a ccounung nynh thua,” a ci. Mary Hlaw
46Mary nynh,“Ka thinlung nynh Bawipaw khathe a hoysah,47ka hiinnaw tuh yn KhumtuPachia kya a lungtua.48Pawccecize a seenunga nyaanaw kha ningpah khyh.Atu te she takyh kyahythua ccounung citeyn ko vae cih hae.49Pawccecize Athungpaw Pachia nynhmyarya lepaw uccaw hae khaka hanlan yn cyipya vae;a min tuh athyaa.50A thawccinaw tuh amaw rawa rih hae paw tungvaw kyashe takyh atyn.51A thungnaw khatea thawzung kha a langsah;mih thinlung kyaa lysakuh hae paw khapong a phiasaku hae.
52Athungpaw ccungccaw hae khamih bawitungkhung kyatesahbung hae zah,a nyaa hae paw kha a hangthung hae.53Mih vuelaw hae paw khauccaw hoypaw te a kua hae,mihoi hae kha mih kuih ccakaetea cciasah hae.54Ah minpaawhae kya,Abraham kya tea ciihan hae kya a hosya vae hawte,a ngaethya-umsahnaw kha liathui zaha seepaw Israel khaphe a bawm vae,” a ci.
56Mary tuh Elizabeth ryte sawpaw sah thum loukaw a umkheih kou hae te, a inn lang a ki. Baptisma Pyatu Johan Puinaw
57Elizabeth tuh aninsaw yn kyh zah ccapaw yn saah.58Bawipaw nynh Elizabeth tungvaw kya myarya lepaw a thawccinaw a langsahpyaku cipaw kha a innpaw hae te a vaeccaw hae nynh he a thae hae tuh, amaw ryte mih lung atua.
59Nin taryanaw nin kya imua tuh vingdungaw lan a cciakhae hae, a paaw min kha kisah te Zekhariah cite a minphu lan a ci hae.60Thuasalama a nung nynh, “Thua khyh, Johan cite a minphu lan,” a ci.61Minmin nynh, “Na pui oh paw kya tuh-e min a phukuhpaw lu kheit san um boi khyh,” a ci hae.62Tuinte minmin nynh a paaw kha pawtemou min na phu ry cite tangpyate a khia hae.63A paaw nynh zei nawlan ccalung kha ngiakuh hae zah, “A min tuh Johan nynh thua,” cite a zei. Mih balynte mih ngaeang pong thua.64Zekhariah tuh vaekheihmawte a munglae yn hoythui zah bya yn hothya, te Pachia kha the a hoysah.65Mih innpaw hae balyn tuh a rih hae, tuh-e thongpang tuh Judea muaram balyn kya azeihkuh.66A thae hae paw balyn nynh tuh-e tuh mih thinlung kya ccykekuh hae zah, “E imua hynh pawlang vema yn tang?” a ci hae. Pawccecize Bawipaw kuih nynh imuapaw kha a umkhae. Zekhariah nynh Profehbya Honaw
67A paaw Zekhariah tuh Thyaa Muisaw te phe beih zah profehbya a ho:68“Israel Pachia Bawipaw tuhthehoysah oh sih,pawccecize a ccungccaw hae khabawm hae zah a shawkhaw hae.69A seepaw David ciihan kyateaening hanlan athungpawkhumtu kha a langsaku vae.70Langmawlya mawteathyaapaw a profeh haemunglae kyate a ho hawte,71ah rhaw hae te oun huatu haekuih kyate khum ah thua cih oh.72Ah minpaaw hae kyabya a kinkupaw a thawccinaw khalangsah zah athyaapawa byakinnaw kha a liathui vae,73Ah minpaaw Abraham kyaze,‘Nae rhaw hae kyatekae luesah cih oh;rinaw hoi leite ka rya na lah cih oh,75nae hiin lungkhu balynka malang khe adingpaw teathyaapaw lang na tang cih oh,’cite thyalawkute bya a kinku.76Imuapaw, nang tuhAhang Huaccepaw Pachia profehcite ko na thua cih,pawccecize nang tuhBawipaw laanpi kha paccynpya khylanamaw malang na cceih ty cih,77a ccungccaw hae kha,mih seinaw ngaethyanaw liatekhumnaw kong nynawpya khylan hae na cceih ty cih.78Ah Pachia kya-e nevyalyapawngaethyaumsahnaw liatevaawlang e khuaninpaw nynhaening tungvaw yn thua cih,79mohnaw te chinaw mynlyh kyaa haung hae paw khaawnaw pya khylan,daenaw laanpi langkheaening ccu kha cciakhae khylannynh thua,” cite a ho.
80Imuapaw tuh lethung zah muisaw kya a thawsae, te Israel hae kalan a langku maw tuh ramkaw kya nynh a um. Jesu Khri Puinaw (Mat 1.18-25)
1Tuh ccyh lyakhe Siapharan Awkastas nynh ram pynpi balyn kya milu riaku athua cih cite kaw a tho.2E milu rianaw hynh masaty milu rianaw thua zah Kuirinias nynh Siria ram a uk lya nynh thua.3Ccungccaw hae balyn tuh milu riaku khylan mih khua raveih lang a cceih hae.4Josef mah David ciihan athua keiccuze, Galilee ram Nazareth khua kyate Judea ram Bethlehem a ci hae paw David khua lang a cceih.5A zu lang a dykupaw Mary ryte milu riaku lan a cceih hae; Mary tuh ccaawpoi zah,6tuin kya a um lya hae khe, neitaw pui lan aninsaw akyh.7Mary a ccatawccaw tuh yn pui zah nolung te a lung koute, vaetua looh-aenaw kua kya a isah; pawccecize minmin hanlan mikhia thuanaw inn kya akhaan um vae khyh. Tuurin hae te Vaaw hae
8Tuin ram kya khuazi khe mih tuuphu kha rin hae zah ramkaw kya a um hae paw tuurin hae a um hae.9Bawipaw vaawpaw nynh mih kalan yn thua zah Bawipaw phu-enaw tuh mih pepan phaephae a aw; te minmin tuh myarya a rih hae.10Thuasalama vaawpaw nynh minmin kha, “Rih nan oh, pawccecize ccungccaw balyn hanlan myarya lungtua lan umpaw thongpang hoypaw kha kae thuakhaepya oh:11Pawccecize atunin David khua kya nanning hanlan Khumtu Bawi Khri a pui vae.12E hynh nanning hanlan syntawnaw athua cih: imua kha nolung te lung hae zah vaetua looh-aenaw kua kya a isah hae paw kha na la muih cih oh,” a cipya hae.13Vaekheihmawte vaawpaw ryte vaaw rhawkawbuupi tuh oun langkuh hae zah Pachia kha a thehoysah hae zah,14“Ahang huapaw vaawlang kyaPachia tuh phu-esah thua sah,a sungsah hae paw a umnaw haelae vawlan hin daenaw um sah!” a ci hae.
15Vaaw hae tuh mih kyate vaawlang he a cceih hae te, tuurin hae nynh, “Atu Bethlehem lang cceih oh sih lah Bawipaw nynh oun nysahpaw hynh-e uccaw acyihkuhpaw hynh dotua oh sih,” cite lu kheit te lu kheit a hoku hae.16Minmin tuh arangte cceih hae zah Mary, Josef te vaetua looh-aenaw kua kya a ihpaw imua kha a muih hae.17Tuurin hae nynh imua kha he a muih hae tuh, vaaw hae nynh imua konglang a hopya hae paw kha ccungccaw hae kya a ho pathy hae.18Tuurin hae nynh a ho hae paw bya a thae hae paw balyn tuh mih ngaeangthua.19Mary nynh tuh-e balyn tuh a thinlung kya ccykekuh zah thawte a tua.20Tuurin hae tuh vaawpaw nynh a hopya hae thyhte, a thae hae paw te a muih hae paw balyn hanlan Pachia kha phu-esah hae zah thehoysah biate a ki hae. Beikinn kya Jesu Thuakhaenaw
21Nin tarya ccing vae zah imua kha vingdungaw ccyh yn zaw tuh, Jesu cite min a phu hae, tuh-e min tuh a nung nynh a poi mawze vaawpaw nynh a phu ty vae paw min nynh thua.
22Moses kawbya thyhte, Mary te Josef elang thyaasahkunaw ccyh yn zaw tuh, minmin nynh imuapaw kha Bawipaw kalan thuakhae khylan Jerusalem lang a cciakhae hae,23(Bawipaw Kawbya kyaze, “Ccatawccaw pise miakaw tuh Bawipaw kalan pya athua cih,” cite azeikuh);24“vahu bua kheit, tuhkhyhze valaele anopaw sa ning te silawnaw na rae cih oh,” cite Bawipaw kawbya kya a um thyhte, minmin nynh silawnaw a rae hae. Simeon Anna nynh Thehoysah hae
25A min Simeon a ci hae paw ccungccaw lu kheit tuh Jerusalem kya a um. Aning tuh adingpaw te beiknaw lang a zuakuhpaw nynh thua, Israel hae ngaengannaw kha a ngaehoipaw thua zah Thyaa Muisaw tuh amaw kya a um.26Thyaa Muisaw nynh amaw kha, Bawipaw kya-e Messiah kha na muih makhia na chih lan khyh, cite a hopya.27Muisaw nynh cciakhae zah Simeon tuh beikinn voidu kya a thua; imuapaw Jesu kha kawbya phung thyhte cyipya lan cite a nung te a paaw nynh he a teekhae hae tuh,28Simeon nynh imua kha a kuih kya duate Pachia kha thehoysah zah,29“Bawipaw, na bya thyhteatu na seepaw hynhdaebabi lan yn cciasah ccavae;30pawccecize na khumnaw khaka mit te phe ka muih vae,31tuh-e tuh ccungccaw balynmuihnaw kya na paccyn vae;32tuh-e tuh Zenta haea awsah cih paw awnaw tena ccungccaw Israel hae hanlanphu-enaw nynh thua,” cite a ho.
33Simeon nynh imuapaw konglang a hopaw kha a thae hae tuh, Josef te a nung tuh mih ngaeangthua.34Simeon nynh minmin kha hythuapya hae zah a nung Mary kha, “E imua tuh Israel hae patae khulia nawlan te tho nawlan Pachia nynh a popaw nynh thua. Amaw tuh ccungccaw hae nynh a thethyasah hae paw te Pachia kyate yn thuapaw syntawnaw athua cih zah,35mih thinlung kya-e tuanaw balyn kha a langsahtu lang a tang cih. Thaloi nynh namaw na thinlung kha mah ae thuing cih,” a cipya.
36Asher phin, Fanuel ccanung Anna a ci hae paw profehnung lu kheit a um. Aning tuh myarya taw vae, vawpaw a hoi koute kum sari cia a vawpaw ryte a umkheih hae.37Sung tarya kum pali cia nomaenung lang a tang, khuazi khuadae sawsangte looh-ae sungte Pachia beik zah beikinn kyate papin pou khyh.38Aning mah tuh ccyh lyakhe yn tee zah Pachia kha the a hoysah, te Jerusalem tuh shawkhaw athua cih cite a ngaehoi hae paw balyn kyakhe tuh-e imua kong kha a hopya hae. Nazareth lang A Ki hae
39A nung te a paaw nynh Bawipaw kawbya thyhawte pawpaw balyn kha phe a cyih kou hae te, Galilee ram umpaw mih khua Nazareth langkhe a ki hae.40Imua tuh yn lethung zah myarya a thung, hawnaw te beih zah Pachia thawccinaw tuh a tungvaw a um. Beikinn kya Imuapaw Jesu
41A nung te a paaw tuh Kawtaw Poi ccyh kya kum takyhte Jerusalem lang leih a cceih hae.42Jesu tuh kum haw lae ning he acih te, Kawtaw Poi phung thyhawte Jerusalem lang a cceihthung hae.43Poi nin he athang te a nung te a paaw tuh a ki hae, imuapaw Jesu tuh Jerusalem kya a umhy ung, Josef te a nung nynh tuh-e tuh nyh khyh hae.44A kikheih hae paw kya nynh a umbua cih cite minmin nynh tua hae zah nin kheit laanccia cia a cceih vae hae; te mih vaeccaw hae te mih ban hae kya a ccung hae.45Minmin nynh amaw kha a muih khyh hae keiccuze Jerusalem lang bua ki hae zah a ccung hae.46Nin thum koute, minmin nynh amaw kha beikinn kya ccangpahtu hae laku haung zah mih bya kha ngae zah minmin bya a khia hae paw kha a muih hae.47A bya a thae hae paw balyn nynh a hawzia te bya a khungzia kha mih ngaeangthua.48A nung te a paaw nynh he a muih hae tuh, mih ngaeangthua zah, a nung nynh, “Ka ccapaw, pawccemou kaening hynh hynhte nae cyi? Dotua, na paaw te kae tuh thinphangte nang kha kae ccung,” a cipya.49Jesu nynh minmin kha, “Pawccemou nae ccung oh? Ka Paaw inn kya ka um lanpaw nynh ka thua cipaw na nyh khyh oh tou?” a cipya hae.50A hopya hae paw bya kha minmin nynh thaethya khyh hae.51Te Jesu tuh a nung a paaw hae ryte cceihbung hae zah Nazareth khua a thua hae, aning nynh minmin kaw kha a ngae. A nung nynh e konglang balyn hynh a thinlung kya a ccykeku.
52Jesu tuh pyn lante thuasah, hawnaw lante thuasah yn lethung zah, Pachia malang te ccungccaw malang maehoynaw a mue. Baptisma Pyatu Johan Phungho (Mat 3.1-12; Mar 1.1-8; Joh 1.19-28)
1Siapharan Tiberias nynh a uknaw kum haw lae pangaw lyakhe Pontias Pilat tuh Judea pee uktu thua zah Herod tuh Galilee pee uktu nynh thua; a neitaw Filip tuh Iturea pee te Trakhonitis pee kya uktu thua zah Lisanias tuh Abilene pee kya uktu nynh thua.2Annas te Kaiafas tuh ranpibawi lupi thua hae zah, tuh ccyh lyakhe Pachia bya tuh ramkaw kyakhe Zekhariah ccapaw Johan kalan yn thua.3Johan tuh Jordan vaw pepan umpaw ram balyn kalan khe cceih zah seinaw ngaethyanaw hanlan ngaesikunaw te asekuhpaw baptisma kong kha a ho.4Profeh Isaiah bya kha ccauh kya azeiku thyhawte:“Ramkaw kya a siapawlukheitpaw roi nynh,‘Bawipaw laanpi khapaccynpah oh, a laanpi khalawbabin lan raepah oh.5Akhunaw miakaw khabia athua cih zah mua tesangpyng miakaw khatuphae athua cih;akoupaw laanpi khalawbabin lan rae athua cih zah,karynkare a umpaw laanpi khanginsah athua cih.6Ccungccaw balyn nynhPachia kya-e khumnaw khaa muih cih hae,’ a ci,” cite a ho.
7Johan nynh amaw kya baptisma in lan oun cceih hae paw ccungccaw zapi kha, “Pou huparepaw ciihan hae, yn thua cih paw thinrianaw kyate ccue lan hum nynh mou raeringnaw ae pya oh?8Ngaesikunaw te angaekuhpaw athae hae kha langsakuh oh; ‘Abraham tuh kae paaw nynh thua,’ cite tuakuh nan oh. Pawccecize Pachia tuh hynh-e lung hae kyate Abraham ccaaw hae kha a rae kho cipaw kae hopya oh.9Atu mah thingku leihpaw kya hae tuh nungde athua vae, tukeiccuze ahoypaw athae thae leipaw thingku miakaw tuh nge thua zah maee lungkhu lang phung athua,” a ci.
10Ccungccaw zapi nynh Johan kha, “Tuhteze pawmou kae cyih cih?” cite a khia hae.11Aning nynh minmin kha, “Angki zung ning a hoipaw nynh a hoi leipaw kha pyabua sah, looh a hoipaw nynh tuh-e hawte cyih sah,” a cipya hae.12Ngunto khoi hae paw mah baptisma in lan oun thua hae zah, “Sazae, pawmou kae cyih cih,” cite a khia hae.13Aning nynh, “Khoi lan a khya hae paw laeze alung lante la khoi nan oh,” a cipya hae.14Tuhawte rhawkaw hae nynh mah, “Kaening nynh pawmou kae cyih cih,” cite khia hae zah, aning nynh, “Hum ccungccaw kya-e sanmah hurawte la luade nan oh, hum sanmah ahme lei lante seibe nan oh, na mue oh paw amee khate nae lungryachih sah,” a cipya hae.
15Ccungccaw hae nynh Johan kha ngaehoi hae zah, mih thinlung kyakhe Messiah thua vema, thua khyh vema cite mih balynte a tua lya hae khe,16Johan nynh minmin balyn kyakhe, “Kae nynh nanning kha tui te baptisma kae pya oh; thuasalama kae laeze athung huapaw lu kheit yn thua cih, tuh-e paw a phanah rui phoupya lan sanmah kae tuh ka ngaekuh khyh; aning nynh nanning kha Thyaa Muisaw te thuasah, maee te thuasah baptisma ae pya cih oh.17A zawnawpaw paraw tuh a kuih kya um zah a huihmin kha thyaapaping lan a cciccae cih, te chanvuih kha a byng lungkhu lang a ruin cih, thuasalama asipaw tuh a chih kho leipaw maee te a soi cih,” a cipya hae.
18Ccangpaw bya patae te thuihei hae zah thehoypaw kha ccungccaw hae kalan a hopya hae.19Thuasalama ram uktu Herod kha a neitaw Filip zu Herodias konglang te Herod nynh a cyipaw hoyleinaw balyn keiccuze Johan nynh a pe,20Herod nynh a seinaw balyn vawlan khe houh biachih zah Johan kha thong kya a saw. Jesu Baptisma Innaw (Mat 3.13-17; Mar 1.9-11)
21Ccungccaw hae balyn tuh baptisma a in hae, Jesu mah baptisma inbua zah saw a sang lyakhe vaawlang yn hungkuh zah,22Thyaa Muisaw tuh vahu hawte pyn lante yn langkuh zah Jesu tungvaw yn ccuh; vaawlang te roi yn ccae zah, “Nang tuh ka sungsahpaw ka Ccapaw nynh na thua; na tungvaw kya ka lungry accing,” a ci. Jesu Thokeinaw (Mat 1.1-17)
23Jesu nynh a ryalaw a thotakaw lya tuh kum sung thum loukaw acih vae. Ccungccaw hae nynh Josef ccapaw cite a tua hae; Josef tuh Heli ccapaw,24Heli tuh Matthat ccapaw, Matthat tuh Levi ccapaw, Levi tuh Melkhi ccapaw, Melkhi tuh Jannai ccapaw, Jannai tuh Josef ccapaw,25Josef tuh Mattathias ccapaw, Mattathias tuh Amos ccapaw, Amos tuh Nahum ccapaw, Nahum tuh Eshli ccapaw, Eshli tuh Naggai ccapaw,26Naggai tuh Maath ccapaw, Maath tuh Mattathias ccapaw, Mattathias tuh Semein ccapaw, Semein tuh Josek ccapaw, Josek tuh Judah ccapaw,27Judah tuh Joanan ccapaw, Joanan tuh Rhesa ccapaw, Rhesa tuh Zerubbabel ccapaw, Zerubbabel tuh Shealtiel ccapaw, Shealtiel tuh Neri ccapaw;28Neri tuh Melkhi ccapaw, Melkhi tuh Addi ccapaw, Addi tuh Kosam ccapaw, Kosam tuh Elmadam ccapaw, Elmadam tuh Er ccapaw,29Er tuh Joshua ccapaw, Joshua tuh Eliazar ccapaw, Eliazar tuh Jorim ccapaw, Jorim tuh Matthat ccapaw, Matthat tuh Levi ccapaw,30Levi tuh Simeon ccapaw, Simeon tuh Judah ccapaw, Judah tuh Josef ccapaw, Josef tuh Jonam ccapaw, Jonam tuh Eliakim ccapaw,31Eliakim tuh Melea ccapaw, Melea tuh Menan ccapaw, Menan tuh Mattatha ccapaw, Mattatha tuh Nathan ccapaw, Nathan tuh David ccapaw,32David tuh Jessi ccapaw, Jessi tuh Obed ccapaw, Obed tuh Boaz ccapaw, Boaz tuh Salmon ccapaw, Salmon tuh Nahshon ccapaw;33Nahshon tuh Amminadab ccapaw, Amminadab tuh Admin ccapaw, Admin tuh Arni ccapaw, Arni tuh Hezron ccapaw, Hezron tuh Perez ccapaw, Parez tuh Judah ccapaw,34Judah tuh Jakob ccapaw, Jakob tuh Isak ccapaw, Isak tuh Abraham ccapaw, Abraham tuh Terah ccapaw, Terah tuh Nahor ccapaw,35Nahor tuh Serug ccapaw, Serug tuh Reu ccapaw, Reu tuh Peleg ccapaw, Peleg tuh Eber ccapaw, Eber tuh Shelah ccapaw,36Shelah tuh Kainan ccapaw, Kainan tuh Arphasad ccapaw, Arphasad tuh Shem ccapaw, Shem tuh Noah ccapaw, Noah tuh Lamek ccapaw,37Lamek tuh Methuselah ccapaw, Methuselah tuh Enok ccapaw, Enok tuh Jared ccapaw, Jared tuh Mahalaleel ccapaw, Mahalaleel tuh Kainan ccapaw,38Kainan tuh Enos ccapaw, Enos tuh Seth ccapaw, Seth tuh Adam ccapaw, Adam tuh Pachia ccapaw nynh thua. Jesu Tuhounaw (Mat 4.1-11; Mar 1.12-13)
1Jesu tuh Thyaa Muisaw te beih zah Jordan vaw kyate a ki, te Muisaw nynh ramkaw langkhe a cciakhae.2Nin sung pali cia Satan nynh a tuhou. Tuh ccyh lya balyn tuh pawpaw mah ae khyh, tuh-e ccyh he athang tuh a vue myarya law.3Satan nynh Jesu kha, “Pachia Ccapaw na thua lanze e lung hynh sanlou lang a tang nawlan kawpya tua,” a cipya.4Jesu nynh, “ ‘Ccungccaw tuh looh kyalya te hiin khyh,’ cite Ccathyaa kya azeikuh,” a cipya.
5Satan nynh Jesu kha ahangnaw lang cciakhae zah sosoh kya laephi peenaw hae balyn kha a muihsah.6Satan nynh Jesu kha, “E kawhoinaw balyn te mih phu-enaw hynh kae pya cih; e hynh kamaw kalan pya athua vae keiccuze ka pya rypaw ccungccaw kha ka pya.7Kae hynh nae beik lanze hynh-e hae balyn tuh na kya-e athua cih,” a cipya.8Jesu nynh,“ ‘Bawipaw na Pachia khana beik cih zah, amaw kyalya kharya na lawpah cih,’ citeCcathyaa kya azeikuh,” a cipya.
9Te Satan nynh Jesu kha Jerusalem lang cciakhae zah beikinn adungparyh kya nung zah, “Pachia Ccapaw na thua lanze hein kyate toiku tua.10Pawccecize Ccathyaa kyaze,‘Nang kha thungkhaw khylanPachia nynh a vaaw hae khaa naw cih hae,11na ccu kha lung kyana thuhku khyh nawlanminmin nynh mih kuih teae dua cih hae,’ citeazeikuh,” a cipya.
12Jesu nynh, “ ‘Bawipaw na Pachia kha la syntawtua nan,’ cite Ccathyaa nynh a ho,” a cipya.13Satan nynh tuhounaw miakaw kha he a thangsah te, ccyhhoy a mue makhia Jesu kha sosoh a cciataw. Galilee kya Jesu Ryalaw Thonaw (Mat 4.12-17; Mar 1.14-15)
14Jesu tuh Muisaw thungnaw te beih zah Galilee lang a ki, tuin ram pepan balyn amaw the tuh po azeihkuh.15Jesu nynh sinakok hae kyakhe ccangpah hae zah ccungccaw miakaw nynh a thehoysah hae. Nazareth kya Jesu A Vua hae
16Jesu tuh a lethungnaw Nazareth khua thua zah, a cyimae hawte sabbath nin kya sinakok lang a cceih. Ccathyaa ria lan thadyn zah,17profeh Isaiah ccakue kha amaw kalan a pya hae. Jesu nynh ccakue kha daw zah a muihpaw Ccathyaa tuh:18“Bawipaw Muisaw tuhka tungvaw a um,pawccecize ryachi hae kalanthehoypaw ho khylan kae khachitui yn thuh vae;ccungccaw hae nynha kyng hae paw kalanluenaw kong hopya khylan temitmoh hae khangawmuihnaw kong hopya khylan,tuaasahnaw a teing hae paw khaluesah khylan,19Bawipaw thawccinaw ccyh khahopya khylan kae hynhyn saw vae,” acikuh.
20Jesu nynh ccakue kha kue zah a ccytupaw kha a pya koute a haung. Sinakok kya um hae paw balyn nynh Jesu kha mih mitvoh leite a do hae.21Jesu nynh minmin kha, “E Ccathyaa tuh na thae oh hawte atunin accing vae,” a cipya hae.22Ccungccaw balyn nynh a thehoy ho hae zah a munglae kyate a poupaw thawccinaw bya kha mih ngaeangthua. Minmin nynh, “E paw hynh Josef ccapaw thua khyh tou?” a ci hae.23Jesu nynh minmin kha, “Nanning nynh, ‘Sibawipaw, namaw te namaw kha dansaku tua! Kapernaum khua kya na cyipaw kae thae hawkhate hynh-e namaw khua kya mah cyitua,’ cite e phungtangbya hynh ka kalan nae ho ccaccing cih oh,” a cipya hae.24Jesu nynh, “Byaccaccing kae hopya oh, profeh hum sanmah amaw khua kya tuh maehoynaw mue boi khyh.25Thuasalama thanccingte kae hopya oh, Elijah ccyh lya kum thum te sah taruh cia vaawlang thuakaw khaw thua zah loram balyn kya myarya ccakancci lya, Israel ram kya nomae hae patae a um hae.26Thuasalama tuh-e hae lu kheit kalan san Elijah kha saw thua khyh, thuasalama Sidon ram e Zarefath khua kya umpaw nomaenung kalan rou nynh saw athua.27Profeh Elisha ccyh lya Israel ram kya vaethyakaepaw patae a um hae, thuasalama Siria paw Naaman laelan hum sanmah thyaasah thua khyh,” a ci.
28Sinakok kya a um hae paw balyn nynh hynh-e bya hae kha he a thae hae tuh myarya mih thinria.29Thokuh hae zah Jesu kha khua atolang dee hae zah tuh-e mih khua a umnaw mua adung, chia kalan khe dae tu lan cite a cciakhae hae.30Thuasalama Jesu tuh mih laku kyate zya pou zah po a cceih. Ccungccaw Patae A Dansah (Mar 1.21-28)
31Galilee ram e Kapernaum khua lang cceihbung zah sabbath nin kya a ccangpya hae.32Kawhoinaw te bya a ho keiccuze ccungccaw hae tuh a ccangpyanaw kha mih ngaeangthua.33Sinakok kyakhe athyaa leipaw raerangsaro muisaw a bahkuhpaw lu kheit a um. Aning nynh,34“Kae makhaete kae um sah! Nazareth paw Jesu, nang te kaening pawmou ah sekuh oh? Nang tuh kaening ro khylan tou nae thua? Nang tuh hum nynh na thua cipaw ka ny, Pachia kya-e Athyaapaw nynh na thua!” cite thawte a sia.35Jesu nynh pe zah, “Yccae nan, khah-e paw lungkhu kyate pou!” a cipya. Raerangsaro nynh tuh-e paw tuh ccungccaw hae malang khe khuliasakuh zah maw muihsah leite a poutaw.36Ccungccaw hae balyn tuh mih ngaeangthua zah, “E bya hynh pawtecihpaw bya mou! Pawccecize kawhoinaw te thungnaw khate athyaa leipaw muisaw hae kha kawpya zah minmin tuh a pou hae!” cite a hoku hae.37Jesu kong tuh tuin ram pepan e khua takyh kya pong azeihkuh. Ccungccaw Patae A Dan hae (Mat 8.14-17; Mar 1.29-34)
38Jesu tuh sinakok kyate a pou koute Simon inn lang a tee. Simon a zu nung tuh myarya a nge so zah a cci keiccuze minmin nynh a hanlan Jesu kha a ngiapya hae.39Jesu nynh tuh-e nung pe khe thadyn zah tuh-e ccinaw tuh a dan nawlan kaw he a pya tuh phe a dan. Tuh-e nung nynh vaekheihmawte thokuh zah minmin kha rya a lawpya hae.
40Khuanin he ccah tuh ccinaw aphuinphuin te a ccih hae paw ngeccih hae balyn kha Jesu kalan oun cciakhae hae, Jesu nynh ngeccih miakaw tungvaw khe a kuih khang zah a dansah hae.41Raerangsaro hae nynh mah, “Nang tuh Pachia Ccapaw nynh na thua!” cite sia hae zah ccungccaw patae kyate a pou hae. Jesu nynh minmin kha pe hae zah byahonaw kaw-ua khyh hae, pawccecize minmin nynh aning tuh Messiah nynh thua cipaw a ny hae. Sinakok kya Phung A Ho (Mar 1.35-39)
42Khua he yn dae tuh, Jesu tuh pou zah ramkaw langkhe a cceih. Ccungccaw hae nynh amaw kha ccung hae zah a kya he a thua hae te, minmin kyate a ccia khyh nawlan a kang hae.43Jesu nynh minmin kha, “Pachia peenaw thehoypaw kha ccangpaw khua hae kalan mah ka ho hahe cih, pawccecize hynh-e khylan nynh kae hynh Pachia nynh yn saw,” a cipya hae.44Tukeiccuze Judea ram e sinakok hae kyakhe phung a ho. Masaty Jesu Zuitu hae Konaw (Mat 4.18-22; Mar 1.16-20)
1Nin kheit tuh Genesaret tuili kin kya Jesu a thadyn lyakhe ccungccaw hae nynh Pachia bya ngae khylan amaw kha a lungnuaku hae.2Tuili kin varang langkhe kohlung ccangning kha a muih; ngasaw kyngtu hae tuh kohlung kyate pou hae zah mih mia hae kha a singkuh hae.3Jesu tuh kohlung ccangning lakuze Simon kya-e kohlung kalan khe tee zah varang langte takyh nuesaku lan Simon kha a ngia. Te tuh-e kohlung kya haung zah ccungccaw hae kha a ccangpya hae.4Bya a ho koute, Simon kha, “Tui akhunaw lang nue lah, ngasaw kyng khylan nae mia hae kha vuatua oh,” a cipya.5Simon nynh, “Bawipaw, khuazi zidae kae vua zah ccangkheit san kae kyng khyh; thuasalama na bya thyhte mia ka vua cih,” a cipya.6Minmin nynh tuhte mia kha he a vua hae tuh myarya alungpaw ngasaw hae kha bong hae zah mih mia tuh vyavya a pae vae.7Minmin nynh ccangpaw kohlung kya um hae paw mia a vuakheih hae paw kha oun ccianua hae sah lah oun bawm hae sah cite mih kuih te a ko hae. Tuh-e hae tuh oun thua hae zah kohlung ccangning te tui kaw lang vyavya ccah lan ngasaw kha phe a bia hae.8Simon Peter nynh tuh-e tuh he a muih te, Jesu ccukharu kyakhe bakhung zah, “Bawipaw, kae tuh misei nynh ka thua, beih yn cciataw!” a cipya.9Pawccecize Simon te a umkheih hae paw balyn tuh a kyng hae paw ngasaw hae keiccuze mih ngaeangthua.10Simon ryte a mungkuh hae paw Zebedi ccapaw hae James te Johan mah mih ngaeangthua. Jesu nynh Simon kha, “Rih nan, atu tetuh ccungccaw a kyngpaw lang na tang vae cih,” a cipya.11Mih kohlung hae kha varang lang nung hae zah, pawpaw balyn kha cciatawte Jesu kha a zui hae. Vaethyakaepaw A Dansah (Mat 8.1-4; Mar 1.40-45)
12Vaekheihlya Jesu tuh khua khuakheit kya a um lyakhe vaethya ccinaw te phe a beihpaw lu kheit nynh Jesu kha he a muih tuh laekhu kya bakhung zah, “Bawipaw, na ry lan thua ze, kae hynh nae thyaasah kho,” cite a ngiaku.13Jesu nynh a kuih dyng zah tuh-e paw tuh hae zah, “Ka ry, thyaa ccavae,” a cipya. Vaekheihmawte a vaethya ccinaw tuh athyaa vae.14Jesu nynh, “E kong hynh hum ccungccaw san la hopah nan, thuasalama la cceih lah ranpibawi kha la muihsakuh; na thyaa vae keiccuze mih malang khe ccaekia lang Moses kawbya thyhawte silawkunaw kha la rae,” cite bya a tawsya.15Jesu the tuh houhouh thaan zah ccungccaw zapi nynh a bya thae khylan te mih ccinaw kyate dan khylan oun sueluakuh hae.16Jesu tuh ramkaw langkhe cceih zah saw leih a sang. Kuihccu Chihpaw A Dansah (Mat 9.1-8; Mar 2.1-12)
17Nin kheit tuh Jesu nynh a ccangpya lya hae khe Jerusalem te Judea pee te Galilee pee e khua hae balyn kyate oun thua hae paw Farasi hae te kawbya sazae hae tuh a haungbua hae; ngeccih dansah nawlan Bawipaw huhan tuh Jesu kya a um.18Abang ccungccaw hae nynh a kuihccu chihpaw kha inawpaw te oun puih hae zah Jesu malang nung khylan teekhae lan a zuaku hae.19Ccungccaw zapi keiccuze teekhaenaw laanpi muih khyh hae, tukeiccuze innccukaly lang kaekhae hae zah innccukaly kha kia hae zah ngeccih kha inawpaw ryte ccungccaw hae laku lang Jesu malang khe a sawbung hae.20Jesu nynh mih zynnaw kha he a muih tuh, ngeccihpaw kha, “Ka ban, na seinaw tuh ngaethya athua vae,” a cipya.21Kawbya sazae hae te Farasi hae nynh, “Pachia saryapaw bya a hopaw e paw tuh hummou? Pachia lu kheit laelan hummou seinaw a ngaethya kho?” cite a hoku hae.22Jesu nynh mih tuanaw kha nyh zah minmin kyakhe, “Nae thinlung kya pawccemou tuhte na tua oh?23‘Na seinaw tuh ngaethya athua vae,’ cipya tou azoihua, tuhkhyhze, ‘Thokuh lah cceih,’ cipya tou azoihua?24Thuasalama Ccungccaw Ccapaw tuh laephi vawlan seinaw ngaethya lan kaw a hoi cipaw na ny nawlan oh,” cipah hae zah, kuihccu chihpaw kha, “Nang kae hopya, thokuh lah na iphae kha lawkuh lah na inn lang cceih ccavae,” a cipya.25Tuh-e paw tuh mih malang khe vaekheihmawte thokuh zah a inawpaw kha lawkuh zah Pachia kha phu-esah te a inn lang a cceih.26Ccungccaw hae balyn tuh mih ngaeangthua zah rinaw te phe beih hae zah, “Atunin ngaeang lan umpaw uccaw kha ah muih vae oh,” ci hae zah Pachia kha a phu-esah hae. Jesu nynh Levi A Ko (Mat 9.9-13; Mar 2.13-17)
27Tukoute Jesu tuh cceih zah ngunto khoinaw kya a haungpaw, ngunto khoitupaw Levi a ci hae paw kha a muih; Jesu nynh, “Kamaw yn zui,” a cipya.28Aning nynh thokuh zah pawpaw balyn kha cciatawte Jesu kha a zui.
29Levi nynh a inn kya Jesu elang poi pi a tuapya; tuin kya ngunto khoitu hae patae te mingccang hae um hae zah, Jesu te zuitu hae ryte aepaw a koihkheih hae.30Kawbya sazae hae te Farasi hae nynh a zuitu hae kha, “Pawccemou ngunto khoitu hae te misei hae ryte na aekheih oh zah na niakheih oh?” cite a seisah hae.31Jesu nynh, “A dan hae paw nynh sibawi peki khyh hae; a ccih hae paw nynh a peki hae.32Kae tuh miding hae ko khylan kae thua khyh, misei hae nynh a ngaesiku ccaw hae cite nynh kae thua,” a cipya hae. Loohsungnaw Kong Byakhianaw (Mat 9.14-17; Mar 2.18-22)
33Minmin nynh Jesu kha, “Johan zuitu hae te Farasi hae zuitu hae tuh atu te atu looh-ae sung hae zah saw leih a sang hae, thuasalama nang na zuitu hae tuh pawccemou a ae a nia hae?” cite a khia hae.34Jesu nynh, “Zudy ccangvaepaw tuh zudy poi oun too hae paw kya a umbua lungkhu tuh tuh-e hae tuh looh-ae a sung cih hae zawtou?35Thuasalama zudy ccangvaepaw kha minmin kyate lawpya ccyh yn thua cih, tuin ccyh vae tuh looh-ae oun sung vae cih hae,” a cipya hae.36Minmin kha tousenaw phungpaw ccangkheit a hopya hae: “Hum nynh sanmah uccaw athawpaw kha awnua zah uccaw arynpaw kha bianah boi khyh, tuhte a bia lanze uccaw athawpaw tuh aseiikuh cih, bianawpaw athawpaw tuh uccaw arynpaw te ccawkuhthya khyh.37Hum nynh sanmah misutui athawpaw kha arynpaw misutui-saphuabawng kya ruin boi khyh, tuhte a ruin lanze misutui athawpaw nynh misutui-saphuabawng kha phae pawsah cih zah misutui pong azu cih, te misutui-saphuabawng mah aroh cih.38Misutui athawpaw tuh athawpaw misutui-saphuabawng kalan ruin lanpaw nynh thua, te nynh parouhte akhyn hae.39Hum nynh sanmah arynpaw misutui kha a neih koute athawpaw misutui kha neih ry vae khyh, pawccecize, ‘Arynpaw misutui tuh athuahua,’ a ci,” cite a hopya hae. Sabbath Kong Byakhianaw (Mat 12.1-8; Mar 2.23-28)
1Sabbath nin kya Jesu tuh loo kya po cceih zah, a zuitu hae nynh looh avui kha zukuh hae zah mih kuih te noi hae zah a ae hae.2Farasi hae abang nynh minmin kha, “Sabbath nin kya kawbya nynh cyi lan a ua leipaw kha pawccemou na cyi oh?” a cipya hae.3Jesu nynh, “David nynh a vuelaw lya amaw te a umkheih hae paw ryte a cyi hae paw kha na ria boi khyh oh tou?4Pachia inn lungkhu lang tee zah kawbya nynh ranpibawi laelan humhung mah ae lan a ua leipaw Nungpyapaw sanlou kha ae zah amaw ryte a umkheih hae paw kha mah a pyabua hae,” cite a khung hae.5Jesu nynh minmin kha, “Ccungccaw Ccapaw tuh sabbath Bawipaw nynh thua,” a cipya hae. Sabbath Nin kya A Dansah hae (Mat 12.9-14; Mar 3.1-6)
6Ccangpaw sabbath nin kya Jesu tuh sinakok lungkhu lang tee zah a ccangpya hae, tuin kya a ranglang kuih achihpaw lu kheit a um.7Kawbya sazae hae te Farasi hae nynh Jesu tungvaw seibenaw ccungpya khylan sabbath nin kya ccinaw yn dansah ta, cite a dokhaw hae.8Thuasalama Jesu nynh mih tuanaw kha nyh zah a kuih achihpaw ccungccapaw kha, “Yn cceih lah hein kya thadyn,” a cipya. Aning tuh thokuh zah tuin kya a thadyn.9Jesu nynh minmin kha, “Bya kae khiatua oh sah: Sabbath nin kya ahoypaw cyi lan kawbya nynh a ua tou? Tuhkhyhze ahoy leipaw cyi lan tou a ua? Hiinnaw kha so khum lan a ua tou? Tuhkhyhze chia lan tou a ua?” cite a khia hae.10Minmin balyn kha pong do hae zah, Jesu nynh tuh-e paw tuh, “Na kuih kha dyngtua,” a cipya. Aning nynh a kuih kha dyng zah voikheit lang hawte phe ahoy vae.11Minmin tuh myarya mih thinria zah Jesu kha pawtemou cyi lan cipaw a hoku hae. Lu Haw lae Ning A Po hae (Mat 10.1-4; Mar 3.13-19)
12Tuh ccyh lyakhe Jesu tuh sawsang lan mua lang cceih zah Pachia kalan zidae saw a sang.13Khua adae te a zuitu hae kha ko hae zah, lu haw lae ning kha a po hae, minmin kha locceihtu hae cite min a phu hae.14Tuh-e hae tuh: Peter cite min a phupaw Simon te a neitaw Andru, James te Johan, Filip te Bartholomew,15Matthai te Thomas, Alfeas ccapaw James te Zealot a ci hae paw Simon,16James ccapaw Judas te Bawipaw a pheetupaw Judas Iskariot nynh thua hae. Jesu nynh A Ccangpya hae (Mat 4.23-25)
17Jesu tuh minmin ryte mua kyate rungbung hae zah bialae khe a thadyn; amaw te a zui hae paw patae, Judea pee balyn kyate, Jerusalem kyate, rili kin umpaw Tair khua te Sidon khua kyate ccungccaw patae tuh tuin kya oun thua hae.18Minmin tuh Jesu bya ngae khylan te mih ccinaw dan khylan oun cceih hae; athyaa leipaw muisaw hae nynh vawsaw a pya hae paw kha a dansah hae.19Ccungccaw zapi balyn nynh Jesu kha hae lan a zuaku hae, pawccecize amaw kyate huhan pou zah ccungccaw balyn tuh a dan hae. Lungtua hae paw (Mat 5.1-12)
20Jesu nynh a zuitu hae kha do hae zah:“Ryachi hae paw nanning tuhlungtuapaw nynh na thua oh,pawccecize Pachia peenaw tuhnae kya-e nynh thua.21Atu lya vuelaw hae paw nanning tuhlungtuapaw nynh na thua oh,pawccecize nae vue aso cih.Atu a rah hae paw nanning tuhlungtuapaw nynh na thua oh,pawccecize nae nuin cih oh.
22“Ccungccaw Ccapaw keiccuze ccungccaw hae nynh ae hua oh ze thuasah, mih kyate ae phia oh ze thuasah, sarisarya ae nung oh ze thuasah, nae the ae thyasah vae oh ze thuasah nanning tuh lungtuapaw nynh na thua oh.23Tuin nin kya nae lungtua sah lah lungpawte thohkuh oh! Pawccecize vaawlang khua kya nae ryalaw mee tuh ale ccaccing; pawccecize mih minpaaw hae nynh mah profeh hae kha tuh-e hawte nynh a la cyi hae.24“Thuasalama mihoi hae,nanning hanlan ngaethya lan kou um!Pawccecize nanning tuhnaemaw kya-e hiin hoynaw khaphe na mue vae oh.
25Atu lya vueso hae paw nanning,nae hanlan ngaethya lan kou um!Pawccecize nae vuelaw cih.Atu lya a nuin hae paw nanning,nae hanlan ngaethya lan kou um!Pawccecize nae rah nae khui cih oh.
26“Ccungccaw hae balyn nynh thehoy ae ho vae oh ze, nae hanlan ngaethya lan kou um! Pawccecize mih minpaaw hae nynh lingthya profeh hae kha tuhcite nynh a la cyi hae. Rhaw hae Sungsahnaw te Liarunaw (Mat 5.38-48, 7.12a)
27“Thuasalama ka bya a thae hae paw kae hopya oh, nae rhaw hae kha sungsah oh, nanning ae hua oh paw tungvaw kya hoynaw la rae oh.28Nanning thya ae law oh paw kha hythuanaw la pya oh, nanning ae sarya oh paw kha saw la sangpah oh.29Lukhakheit nynh na byaki ae bia ze, voihawlang kha mah la tuapakuh; lukhakheit nynh na angkile ae lawpyaku ze na angki kha mah la kang nan.30Nang ae ngiakuhpaw ccungccaw miakaw kha la pya; lukhakheit nynh na uccaw ae lawpyaku ze, la ngiathui nan vae.31Nae tungvaw kya cyih hae sah cite na ry oh hawte ming hae tungvaw kya la cyih oh.
32“Ae sungsah oh paw kyalya kha na sungsahru oh ze, pawtemou thanenaw tuh na mue cih oh? Misei hae nynh heize mimaw a sungsah hae paw kha a sungsahru hae khaw.33Nae tungvaw hoynaw a rae hae paw tungvaw kyalya hoynaw na raeru oh ze, pawtemou thanenaw tuh na mue cih oh? Misei hae nynh heize tuh-e hawte a cyi hae khaw.34Bua yn pyaru cih cite na ngaehoi oh paw ccungccaw hae kyalya kha na koiisaku oh ze, pawtemou thanenaw tuh na mue cih oh? Misei hae nynh heize patae bua mueru lan cite misei hae kha a koiisaku hae khaw.35Nae rhaw hae kha sungsah oh lah, hoynaw raepah oh, pawpaw sanmah ngaehoi leite koiisakuh oh; te nae ryalaw mee tuh myarya ale cih zah Ahang Huaccepaw Pachia ccaaw hae na thua cih oh. Pawccecize Pachia tuh lungtuabya ho lan a nyhthya leipaw te ccungccaw hoylei hae tungvaw kya thawccinaw a hoipaw nynh thua.36Tukeiccuze nae Paaw nynh ngaethyaumsahnaw a hoi hawte nanning mah ngaethyaumsahnaw hoi oh. Ming hae Byapianaw (Mat 7.1-5)
37“Ming hae kha byapia nan oh lah, naemaw kha byapia na thua lan khyh oh; ming hae kha seibe nan oh lah, naemaw kha seibe na thua lan khyh oh; ming hae seinaw kha ngaethya oh lah nae seinaw kha ngaethya athuaru cih.38Ming hae kha pyabua oh lah, naemaw kha pyaru na thua cih oh; dydepyate, ryhpya biate, paepae leikuh lan nae by phe thua lan ae pyaru cih oh. Pawccecize na tounaw oh paw tounawpaw te naemaw kha toupya ru na thua cih oh,” a cipya hae.
39Jesu nynh tousenaw phungpaw kha mah a hopya hae: “Mitmohpaw nynh mitmohpaw kha a cciakhae kho cih tou? Parouh mawte hunghua lungkhu lang ccah lan khyh hae tou?40Siaimua tuh a sazae laeze thyahua khyh, thuasalama phe ccing lan ccangpya athuapaw siaimua miakaw tuh a sazae hawte athua cih.41Namaw mit lungkhu umpaw thingthyh kha tuaku leite pawccemou na uno mit lungkhu umpaw athupaw taraw kha na dopya?42Na mit kya umpaw thingthyh kha muihku leite, pawccemou na unopaw kha, ‘Ka ban, na mit lungkhu e athupaw taraw kha kae la khoipah,’ cite na hopya ngan? Pou thyaruhpaw, namaw mit lungkhu e thingthyh kha khoikuh ty lah te na unopaw mit lungkhu e athupaw taraw kha khoipya khylan ccaerarih lan na muihthya cih. Thingku te Athae (Mat 7.16-20, 12.33-35)
43“Thingku hoypaw nynh thingthae hoyleipaw kha thae boi khyh, thingku hoyleipaw nynh mah thingthae hoypaw kha thae boi khyh.44Thingku miakaw tuh athae te ny kho athua. Hinpaw ku kyate thaeku thae kha lo boi khyh hae, taty ku kyate mah misu thae kha lo boi khyh hae.45Ccungccaw hoypaw nynh a thinlung kya umpaw sisua bawng kya-e ahoypaw kha a pousah, ccungccaw hoyleipaw nynh a thinlung kya umpaw ahoy leipaw sisua bawng kya-e ahoy leipaw kha a pousah; pawccecize thinlung kya phe abeihpaw kha mung nynh a ho. Inn Saktu A Hawpaw te A Ngaeepaw (Mat 7.24-27)
46“Ka hopaw kha na cyih lei oh pite, pawccemou ‘Bawipaw, Bawipaw,’ cite nae ko oh?47Humhung zemah ka kalan yn cceih zah ka bya kha thae zah a cyihpaw tuh hum te mou aloku cipaw kae muihsah cih oh:48Aning tuh phe khutheih lan tungkhu ccou zah lung vawlan tung bing zah inn a sakpaw te nynh aloku; tuileih tho zah tui nynh tuh-e inn tuh thawte asoh zemah hy khyh, pawccecize lung vawlan abingku keiccu nynh thua.49Thuasalama ka bya kha thae zah a zui leipaw tuh tung bing leite laephi vawlan inn sakpaw hawte nynh aloku; tuh-e tuh tui nynh thawte he asoh tuh vaekheihmawte phe apu, te tuh-e inn tuh khaleih aroh,” a ci. Rhawbawipaw Zynnaw (Mat 8.5-13)
1Jesu nynh ccungccaw hae thaenaw kya bya a hopaw balyn kha he a thangsah koute Kapernaum khua lungkhu lang a tee.2Tuin khua kya-e rhawbawipaw a seepaw tuh ccih zah vyavya a chih, aning tuh a bawipaw nynh kou a sungsahpaw nynh thua.3Rhawbawipaw nynh Jesu kong kha he a thae te, a seepaw kha ccianuate a dansah nawlan ngia khylan Judah piccan hae kha amaw kalan a saw hae.4Minmin nynh Jesu kalan he thua hae te, “Aning tuh bawm lan accanpaw nynh thua.5Pawccecize aning tuh kae minphuin hynh sungsah zah kaening elang sinakok oun sakpahpaw nynh thua,” cite Jesu kha thawte a ngia hae.6Jesu tuh minmin ryte a cceihbua. Inn kyate asaw leinaw kya he a thua tuh rhawbawipaw nynh a ban hae kha Jesu kalan saw hae zah, “Bawipaw, vawsaw pyakuh nan; pawccecize nang nynh ka inn lang tee lante kae tuh ka ngaekuh khyh;7tuhawte kamaw mah na kalan ccia lan ka ngaekuh cite ka tuakuh khyh, bya te kyalya kawpya lah ka ryalahtupaw tuh a dan cih.8Pawccecize kae mah kawhoinaw zakaw a umpaw nynh ka thua, ka kuihkaw rhawkaw hae ka hoi zah lu kheit kha, ‘Cceih,’ ka ci ze a cceih; ccangpaw lu kheit kha, ‘Rang,’ ka ci ze yn thua; ka see kha, ‘E hynh cyih,’ ka ci ze a cyih,” cite a hosahpya hae.9Tuh-e bya tuh Jesu nynh he a thae te, a ngaeangthua zah nulang maeleihkuh zah amaw a zui hae paw ccungccaw hae kha, “Nanning kae hopya oh, hynhcihawpaw zynnaw hynh Israel hae kya heize ka muih boi khyh,” a cipya hae.10Rhawbawipaw nynh yn saw hae paw tuh inn lang ki hae zah a seepaw tuh a dan vae paw kha a muih hae. Nomaenung Ccapaw A Thoosah
11Tukoute aro mawze Jesu tuh Nain a ci hae paw khua lang cceih zah a zuitu hae te ccungccaw patae nynh a zui hae.12Jesu tuh khua koikua pe he a thua tuh, achihpaw lu kheit kha oun puih hae. Tuh-e michi tuh nomaenung ccapaw, lu kheit kyalyapaw nynh thua; khuaccaaw hae patae tuh nomaenung ryte oun cceih hae.13Bawipaw nynh tuh-e nomaenung kha he a muih tuh ngaethyaumsah zah, “Rah nan,” a cipya.14Jesu nynh ccianua zah taang kha hae zah a puih hae paw tuh a thadyn hae. Jesu nynh, “Ccangvaepaw, kae hopya, thokuh!” a ci.15Achihpaw ccungccapaw tuh haung zah bya yn ho vae. Jesu nynh tuh-e paw tuh a nung kalan a pya.16Mih balynte mih rikawthua zah Pachia kha the a hoysah hae. Abang nynh, “Aening laku alesaepaw profeh nynh yn langkuh vae! Pachia nynh a ccungccaw hae kha a bawm vae hae!” a ci hae.17Jesu the tuh Judea ram te a pepan e ram hae balyn kya po azeihkuh. Johan nynh Jesu A Khiasah hae (Mat 11.2-19)
18Tuh-e konglang balyn tuh Johan zuitu hae nynh Johan kha a hopya hae. Tukeiccuze Johan nynh a zuitu hae lu ning kha ko hae zah19Jesu kalan saw hae zah, “Nang hynh yn thua cih paw tuh na thua tou? Tuhkhyhze mingccangpaw tou kae ngaw ung cih?” cite a khiasah hae.20Tuh-e ccungccaw hae nynh Jesu kalan he a thua hae te, “Baptisma pyatu Johan nynh kaening hynh na kalan oun saw zah, ‘Nang hynh yn thua cih paw tuh na thua tou? Tuhkhyhze mingccangpaw tou kae la ngaw ung cih,’ cite bya oun khiasah,” a cipya hae.21Tuh ccyh lyakhe Jesu nynh ccungccaw patae kha mih ccinaw aphuinphuin kyate thuasah, ahoy leipaw muisaw hae kyate thuasah dansah hae zah, mitmoh hae patae kha ngaw a muihsah hae.22Jesu nynh minmin kha, “La cceih oh lah na muih oh paw te na thae oh paw kha Johan la hopah oh: Mitmoh hae nynh ngawmuih hae zah ccukhou hae nynh a cceih kho vae hae, vaethyakae hae paw a dan hae, nawpan hae nynh nawthae hae zah michi hae tuh thoosah athua hae, ryachi hae kalan thehoypaw tuh hopya athua.23Kae ka keiccuze a lungroh leipaw ccungccaw tuh lungtuapaw nynh thua,” a cipya hae.
24Johan nynh a saw hae paw he a cceih hae te, Jesu nynh Johan konglang kha ccungccaw zapi kya hynhte a ho: “Nanning nynh paw do khylan mou ramkaw langkhe na ccia oh? Khisan nynh a hepaw phaeku do khylan tou?25Tuhkhyhze paw do khylan mou na ccia oh? Nebaleihpaw boeining a lawkuhpaw ccungccapaw do khylan tou? Dotua oh, lyccaccu lan uccaw lawkuh hae zah hiinhoyte um hae paw tuh siapharan inn kya nynh a um hae.26Paw do khylan mou na ccia oh? Profeh lu kheit do khylan tou? Athua, kae hopya oh, profeh lu kheit lae heize alesae huapaw nynh thua.27Ccathyaa kya,‘Dotua, na laanpi a paccyn cih pawka zeccuetu kha na malangka saw cih,’ cite azeikuhpaw khatuh-e paw tuh nynha honuathepaw athua.
28Pawccecize kae hopya oh, nopi hae nynh a saah hae paw ccungccaw hae kyaze Baptisma pyatu Johan laeze alesae huapaw lu kheit san um khyh; thuasalama Pachia peenaw kya adih huapaw ccungccaw tuh aning laeze a lesaehua,” a ci.29(Tuh-e bya tuh ccungccaw hae balyn nynh a thae hae, minmin te ngunto khoitu hae tuh Pachia dingnaw a pom hae paw te Johan kya-e baptisma a in hae paw nynh athua hae.30Thuasalama Farasi hae te kawbya thya hae paw tuh Pachia paccynnaw kha vua hae zah Johan kya-e baptisma kha in khyh hae.)
31Jesu nynh, “Atu she e ccungccaw hae hynh pawtemou ka touse cih hae? Minmin hynh pawtemou aloku hae?32Minmin tuh kungkunaw kya haung hae zah,‘Phyly kae tupah oh zahna law khyh oh,michi hlaw kae sahpah oh zahmahna rah khyh oh rei,’cite mimaw te mimaw a hokuh hae paw imua hae te nynh aloku hae.33Pawccecize Baptisma pyatu Johan tuh sanlou mah ae leite misutui mah nia leite yn thua zah nanning nynh, ‘Aning tuh raerangsaro bahkuhpaw nynh thua,’ na ci oh.34Ccungccaw Ccapaw tuh aete niate yn thua zah nanning nynh, ‘Dotua oh, aemohpaw te misuripaw khuh! Misei hae te ngunto khoitu hae banpaw khuh!’ na ci oh.35Thuasalama hawnaw tuh amaw a ccaaw hae balyn nynh a langsaku hae,” a ci. Miseinung nynh Chitui A Thuh
36Farasipaw lu kheit nynh zerya mangkheih lan Jesu kha a ko. Jesu tuh Farasipaw inn lang cceih zah ae lan a haung.37Tuin khua kya umpaw miseinung nynh Farasipaw inn kya ae lan Jesu a haung cipaw kha he a nyh tuh alabasta lung rawpaw te zimuin bawng kheit kha ccyng zah,38Jesu nulang a cculeihpaw khe thadyn zah a rah, te a ccu kha a mitphi te ciasah zah a lu kya-e a sang te a hupya, a ccu kha myng zah chitui a thuh.39Looh a kopahpaw Farasipaw nynh tuh-e tuh he a muih tuh, “E Ccungccapaw hynh profeh athua lanze amaw a haenung nopinung hynh hum nynh thua cipaw te pawcihawpaw nopi cipaw kha a nyh cih; pawccecize e nung tuh miseinung nynh thua,” cite a lungkaw te a tua.40Jesu nynh, “Simon, kae hopya rypaw ccangkheit a um,” a cipya. Simon nynh, “Sazae, ho ccaleih,” a cipya.41Jesu nynh, “Phuasawtupaw lu kheit la um zah a laebah umtu hae lu ning a um hae; lukheitpaw nynh denari phua za pangaw laebah um zah mingccangpaw tuh sung pangaw laebah a um.42Minmin nynh a sang kho khyh hae keiccuze parouh mawte a ngaethya hae. Tukeiccuze yn hopya tua, tuh-e lu ning hae kyaze hum nynh mou phuasawtupaw kha a sungsahua cih?” cite a khia.43Simon nynh, “Laebah alunghua a ngaethyapaw kha nynh athua cih cite ka tua,” a ci. Jesu nynh, “Phe na kyh,” a cipya.44Jesu nynh nopinung kalan maeleihkuh zah Simon kha, “E nopinung hynh na muih tou? Kae tuh na inn lungkhu lang ka tee zah ka ccu singkunaw lanpaw tui nae pya khyh, thuasalama e nung nynh ka ccu hynh a mitphi te yn singpah zah a sang te yn hupya vae.45Nang tuh kae hynh nae myng khyh, thuasalama e nung tuh inn lungkhu lang ka tee takaw te ka ccu hynh apaekuh lei lan po a myng.46Nang tuh ka lu hynh chitui nae thuh khyh, thuasalama e nung nynh ka ccu hynh zimuin te phe yn thuhpya.47Tukeiccuze kae hopya, e nung a seinaw patae kha ngaethya athua vae keiccuze aning nynh sungsahnaw patae kha a langsaku; thuasalama seinaw beihtaraw ngaethya athuapaw nynh tuh sungsahnaw ditaraw rou nynh a langsaku,” a cipya.48Jesu nynh tuh-e nung kha, “Na seinaw hae tuh ngaethya athua vae,” a cipya.49Amaw ryte looh a koihkheih hae paw nynh, “Seinaw a ngaethyatupaw hynh hum vema?” cite a hoku hae.50Jesu nynh nopinung kha, “Na zynnaw nynh phe ae khum vae, ngaengante la cceih ccavae,” a cipya. Jesu Ryalaw Nopi hae Bawmnaw
1Tukoute Jesu tuh Pachia peenaw kong thehoypaw kha hote khuapi te khua taraw hae kalan khua a ccong. Zuitu hae lu haw lae ning tuh amaw kya a mungkuh bua hae.2Ahoy leipaw muisaw bahkunaw te ccihawnaw kyate a dan hae paw nopi hae abang mah a cceihbua hae: raerangsaro hae lu sari a depyapaw Magdalin a ci hae paw Mary,3Herod kya-e synriatu Khuza a zu Joanna, Susanna te mih sisua hae khate Jesu te a zuitu hae a bawmtu ccangpaw nopi hae patae a umbua hae. Ccacii Vuatu Tousenaw (Mat 13.1-9; Mar 4.1-9)
4Ccungccaw patae tuh khua takyh kyate Jesu kalan oun thua hae zah he sueluakuh hae tuh Jesu nynh tousenaw phungpaw ccangkheit a hopya hae. A hopaw tuh:5“Ccacii vuatu lu kheit tuh a ccacii vua lan a cceih; ccacii kha vua zah abang tuh laanpi kin ccah zah ccu te syde thua zah vaawlang e pavaw hae nynh pong a tuh hae.6Abang tuh lung vawlan ccah zah ccahe a po takaw mawte laedahpaw a um khyh keiccu karae arou.7Abang tuh hinpaw hae laku ccah zah hinpaw hae ryte a pokheih hae, te hinpaw hae nynh lethin hae zah phang a lungde hae.8Abang tuh lae hoy kya ccah zah a po, te leit za kheit athae a thae,” a ci. E kong he a ho koute, “Thaenaw nakaring a hoipaw miakaw tuh thae sah!” cite a sia. Tousenaw Asuilan (Mat 13.10-17; Mar 4.10-12)
9A zuitu hae nynh, “E tousenaw phungpaw asuilan tuh pawmou?” cite Jesu kha a khia hae.10Jesu nynh, “Pachia peenaw kya-e byakhupaw kha ny lan pya na thua oh; thuasalama mingccang hae tuh,‘mang muih hae zah nyh khyh hae,mang thae hae zah thaethya khyh hae,’tukeiccuze tousenaw phungpaw te hopya athua. Ccacii Vuatu Tousenaw Asuilan (Mat 13.18-23; Mar 4.13-20)
11“Tousenaw phungpaw tuh hynhte nynh thua: Ccacii tuh Pachia bya nynh thua.12Laanpi kin a ccah hae paw tuh, Pachia bya a thaetu hae nynh thua; minmin nynh a zyn khyh nawlan hae te khumnaw a mue khyh nawlan hae cite Satan nynh yn cceih zah mih thinlung kya-e Pachia bya kha phe a lawpya hae.13Lung vawlan a ccah hae paw tuh, Pachia bya kha he a thae hae te lungtuate a lawkuh hae paw nynh thua, thuasalama tharui hoi khyh hae, sosoh kyalya zyn hae zah tuhounaw nynh yn thuanua hae tuh phe a khuliakuh hae.14Hinpaw laku a ccah hae paw tuh, Pachia bya kha a thae kou hae te cceih hae zah lungvawsawnaw, hoirumnaw te pynsaw hoysahnaw hae nynh varyng ve hae zah mih thae thae kho vae khyh hae.15Thuasalama lae hoy kya a ccah hae paw tuh, Pachia bya kha he a thae hae te, athyaapaw te ahoypaw thinlung khate tynkaring lan ccykekuh hae zah lungsaenaw te athae thae hae paw kha nynh thua. Maeekhua Tousenaw (Mar 4.21-25)
16“Humhung nynh mah maeekhua kha aw zah kee te khong boi khyh, ikhung kaw lang mah nung khyh, oun tee hae paw nynh awnaw kha a muih ccaw hae cite maee awnawpaw vawlan nynh a khang.17Pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.18Tukeiccuze pawtemou na thae oh cipaw raeringkuh oh, pawccecize a hoipaw ccungccaw tuh pyachih athua cih zah, a hoi leipaw ccungccaw nynh beihtaraw ka hoi cite a tuakupaw kha heize lawpya athua cih,” bua a ci. Jesu Vaeccaw hae Ccaccing (Mat 12.46-50; Mar 3.31-35)
19A nung te a neitaw hae nynh Jesu kalan oun cceih hae zah ccungccaw eih alung keiccuze a kalan naekuh kho khyh hae.20“Na nung te na neitawpaw hae nynh nang kha ae tungkuh ry hae zah atolang nynh a thadyn hae,” cite a hopya hae.21Jesu nynh minmin kha, “Pachia bya kha thae hae zah a zui hae paw tuh ka nung te ka neitaw hae nynh thua hae,” a cipya hae. Jesu nynh Khise Daesah (Mat 8.23-27; Mar 4.35-41)
22Nin kheit tuh Jesu nynh a zuitu hae ryte kohlung lungkhu lang tee hae zah minmin kha, “Tuili khuraw lang khuin zua oh sih,” cipah hae zah kohlung te a cceih hae.23A ccia lya hae khe Jesu tuh a ih. Tuili kyakhe khise yn tho zah kohlung tuh tui phe a bia keiccuze minmin tuh vawsaw a tung hae.24Zuitu hae nynh amaw kha ccianuate tho hae zah, “Bawipaw, Bawipaw, aening ah chih vae cih oh!” cite a hopya hae. Jesu nynh thokuh zah khise te tuileih athopaw tuh kaw a pya; tuileih te khise tuh daebabi lan zya adae vae.25Jesu nynh minmin kha, “Nae zynnaw tuh pawkyamou?” a cipya hae. Minmin tuh rih hae zah mih ngaeangthua; “E paw hynh pawtecihpaw ccungccaw mou! Khise te tuileih kha heize kawpya zah minmin nynh a kaw a ngae hae!” cite lu kheit te lu kheit a hoku hae. Raerangsaro Bahkuhpaw A Dansah (Mat 8.28-34; Mar 5.1-20)
26Minmin tuh Galilee ram te arawsekuhpaw Garasene ram lang a thua hae.27Jesu tuh varang lang a zua koute tuin khua e ccungccapaw, raerangsaro a bahkuhpaw nynh yn tungku. Aning tuh ccyh hynhsepi cia angki kiku leite, innvaw mah um leite, shawku kya leih umpaw nynh thua.28Jesu kha he a muih tuh, a malang khe bakhung zah, “Ahang Huaccepaw Pachia Ccapaw Jesu, nang te kae tuh pawmou ah sekuh? Kae hynh vawsaw nae pya khyh nawlan kae ngiaku,” cite thawte a sia.29Pawccecize Jesu nynh athyaa leipaw muisaw kha tuh-e paw kyate pou lan kaw phe a pya vae. Pawccecize tuh-e muisaw nynh amaw kha avae patae a la kyng; sivawrui te ccukhiinawpaw te khii hae zah khia kya a nung hae; thuasalama aning nynh a khiinaw hae paw kha thoh pae zah raerangsaro nynh ramkaw langkhe leih a dee.30Jesu nynh, “Na min hummou?” cite a khia. Aning nynh, “Legion,” a ci; pawccecize raerangsaro hae patae tuh amaw lungkhu lang a tee hae keiccu nynh thua.31Raerangsaro hae nynh Jesu kha, “Akhupaw laekarung kalan beih oun sah nan,” cite a ngiaku hae.
32Tuin pe mua vawlan khe rampaeekuh hae paw voh hae tuh aphupi te a um hae, te minmin nynh tuh-e hae lungkhu lang tee lan kaw a ua nawlan hae ngiakuh hae zah Jesu nynh kaw a ua hae.33Raerangsaro hae tuh ccungccapaw kyate pou hae zah voh hae lungkhu lang a tee hae; te voh phu tuh apannaw kyate tuili lungkhu lang thawmawte ccuebung hae zah pong a phungkuh hae.
34Voh a rintu hae nynh tuh-e acyihkuhpaw tuh he a muih hae te, ccue hae zah tuh-e kong tuh khuapi te khua taraw hae kya a ho hae.35Ccungccaw hae nynh acyihkuhpaw kha do khylan oun cceih hae zah Jesu kalan oun thua hae, te a kyate raerangsaro hae a poupaw ccungccapaw tuh Jesu cculeihpaw khe haung zah boeining lawkute a lung akyhpaw kha a muih hae tuh a rih hae.36Raerangsaro bahkuhpaw ccungccapaw tuh pawcihte nynh a dan cipaw a muihpaw ccungccaw hae nynh oun thua hae paw kha a hopya bua hae.37Garasene ram kya um hae paw ccungccaw zapi balyn nynh eih rih kaesy hae zah mih kyate a pou nawlan Jesu kha a ngia hae; tukeiccuze Jesu tuh kohlung lungkhu lang tee zah phe a ki.38Raerangsaro nynh a poutawpaw ccungccapaw nynh Jesu kya umbua lan a ngiaku. Thuasalama Jesu nynh,39“Na inn lang la ki lah Pachia nynh na hanlan ae cyipyapaw kong kha la ho,” cipah zah a kisah. Aning nynh cceih zah Jesu nynh a hanlan a cyipyapaw kong kha khuapi po lekuh lan a hopya hae. Jairas Ccanung te Jesu Boei Dung A Haenung (Mat 9.18-26; Mar 5.21-43)
40Jesu tuh he a ki te, ccungccaw zapi nynh a cciadue hae, pawccecize minmin nynh amaw kha a ngaw hae keiccu nynh thua.41Sinakok uktu Jairas a ci hae paw nynh yn thua zah Jesu cculeihpaw khe bakhung zah a inn lang ccia lan a ngia.
42Pawccecize aning nynh kum haw lae ning loukaw acih vae paw, ccanung lu kheit kyalya hoi zah tuh-e nung tuh vyavya a chih. Jesu a ccia lyakhe ccungccaw hae nynh phang a lungnuaku hae.43Kum haw lae ning cia chiilua ccinaw a hoinung lu kheit a um, aning nynh a hoipaw balyn kha sibawi hae kya marya thangkuh salamah humhung nynh mah dansah kho khyh.44Jesu nulang te yn naekuh zah a boei dung kha zya a hae; tetuh vaekheihmawte a chii luapaw tuh phe akan.45Jesu nynh, “Hummou yn hae?” cite a khia hae. Ccungccaw hae balyn nynh kae nyh khyh he a ci hae tuh Peter nynh, “Bawipaw, ccungccaw zapi nynh ae koihlu hae zah ae eihsei hae paw ngawrei,” cite a hopya.46Jesu nynh, “Lukhakheit nynh yn hae, pawccecize ka kyate huhan a poupaw kha ka ny,” a ci.47Nopinung nynh ka pheikuh kho vae lan khyh cipaw he a nyh tuh thyngkute cceih zah Jesu malang khe bakhung zah paw keiccu nynh ka hae cipaw te vaekheihmawte phe a dannawpaw kong kha ccungccaw balyn malang khe a hopya.48Jesu nynh, “Ka ccanung, na zynnaw nynh ae dansah vae, ngaengante la cceih ccavae,” a cipya.
49Tuhte a ho cciamang lyakhe sinakok uktupaw inn kyate ccungccaw lu kheit yn thua zah Jairas kha, “Na ccanung phe chih vae, sazaepaw kha vawsaw pya nan vae,” a cipya.50Jesu nynh tuh-e tuh he a thae te Jairas kha, “Rih nan, zyn kyalya zyn lah na ccanung tuh a dan cih,” cite a hopya.51Inn kya he a thua te Peter, James te Johan, te imuanung a nung te a paaw laelan hum sanmah inn lungkhu lang tee lan Jesu nynh ua khyh hae.52Ccungccaw hae balyn tuh a rah a khui hae; thuasalama Jesu nynh, “Rah nan oh, imuanung tuh chih khyh, a ihpaw nynh thua,” a cipya hae.53A chih cipaw phe ny hae paw thua zah minmin nynh Jesu kha a nuinse hae.54Jesu nynh imuanung kha a kuih te kyng zah, “Imuanung, thokuh!” a cipya.55A hiinnaw tuh yn kithui zah, vaekheihmawte po yn thokuh. Te Jesu nynh aepaw pya oh cite kaw a pya hae.56A paaw te a nung tuh mih ngaeangthua, Jesu nynh tuh-e acyihkuhpaw kong tuh humhung kya mah la ho nan oh cite kaw a pya hae. Locceihtu Lu Haw Lae Ning A Saw (Mat 10.5-15; Mar 6.7-13)
1Jesu nynh a zuitu hae lu haw lae ning kha pynkheihlan ko hae zah raerangsaro hae balyn dee khonaw, ccinaw dansah khonaw huhan te kawhoinaw kha a pya hae.2Aning nynh Pachia peenaw kong ho lan te ngeccih hae dansah khylan minmin kha saw hae zah,3“Khua na ccongnaw oh kya pawpaw mah phukuh nan oh, hoitang, zaw, aepaw te phua kha phukuh nan oh, angki heize phukhykuh nan oh.4Pawtecihpaw inn kya na tee oh zemah tuin kyakhe la um oh lah tuh-e kyate la pou oh.5Innccong ae doih oh ze, tuh-e khua kyate he na pou oh te minmin rawsenawpaw ccaekia lang nae ccu kya-e vuiping kha la khuanua sya oh,” cite a hopya hae.6Minmin tuh pou hae zah thehoypaw kha hote ahmin takyh kya ngeccih dansah biate khua takyh lang khua a ccong hae. Baptisma Pyatu Johan A Lu Pae hae (Mat 14.1-12; Mar 6.14-29)
7Jesu nynh a cyipaw balyn kha uktupaw Herod nynh a thae tuh a ngaeangthua, pawccecize ccungccaw abang nynh Johan tuh chinaw kyate a thoothui vae cite a ho hae.8Abang nynh Elijah nynh yn langkuh vae a ci hae, mingccang hae nynh langmawlya e profeh hae lukhakheit nynh bua yn thoothui a ci hae.9Herod nynh, “Johan tuh a lu phe ka paesah vae hae, thuasalama hynhcite a konglang ka thaepaw hynh hummou athua?” a ci. Tukeiccuze Jesu kha muih lan a zuaku. Thong Pangaw Loohdangnaw (Mat 14.13-21; Mar 6.30-44; Joh 6.1-14)
10Locceihtu hae nynh he oun ki hae te, a cyi hae paw balyn kha Jesu a hopya hae. Jesu nynh minmin kha ko hae zah Bethsaida a ci hae paw khua langkhe mimaw lalouhte a cceih hae.11Ccungccaw zapi nynh tuh-e tuh he a nyh hae tuh Jesu kha a zui hae, Jesu nynh minmin kha lehkhan hae zah Pachia peenaw kong kha a hopya hae, dansah ahopaw ccungccaw hae kha a dansah hae.
12Khuanin yn nae tuh, zuitu lu haw lae ning nynh a kalan oun cceih hae zah, “Ccungccaw hae hynh hein pepan e khua hae te khua taraw hae kalan cciate ryanaw te aepaw a zahku ccaw hae cciasah hae; pawccecize ramkaw kya nynh ah um oh,” cite a hopya hae.13Thuasalama Jesu nynh, “Naemaw nynh a ae lan hae paw tuh pya oh,” a cipya hae. Minmin nynh, “Kae cceih cih zah e ccungccaw hae balyn hanlan aepaw kae re khyh lanze, sanlou phe pangaw te ngasaw zaw ning laelan pawpaw mah kae hoi khyh,” a ci hae.14Pawccecize tuin kya pise piccan hae thong pangaw loukaw a um hae. A zuitu hae kha, “Phu kheit ze sung pangaw ccite minmin kha haungsah oh,” a cipya hae.15Zuitu hae nynh tuhcite cyih hae zah mih balynte a haungsah hae.16Jesu nynh sanlou phe pangaw te ngasaw zaw ning kha lah zah vaawlang dothung zah lungtuabya a ho koute eih zah ccungccaw zapi malang nyapya lan a zuitu hae kha a pya hae.17Mih balynte ae hae zah mih vue aso koute alaepaw a eihpaw kha kee haw lae ning a khuin hae. Peter nynh Jesu Kong A Ho (Mat 16.13-19; Mar 8.27-30)
18Vaekheih tuh Jesu nynh a makhaete saw a sang lyakhe a zuitu hae mah amaw pe a umbua hae; Jesu nynh minmin kyakhe, “Ccungccaw hae nynh kae hynh hum yn ci hae mou?” cite a khia hae.19Minmin nynh, “Baptisma pyatu Johan ae ci hae, abang nynh Elijah ae ci hae, mingccang hae nynh langmawlya e profeh lukhakheit nynh yn thoothui ae ci hae,” cite a khung hae.20Jesu nynh minmin kha, “Nanning so hum nae ci oh mou?” cite a khia hae. Peter nynh, “Nang tuh Pachia kya-e Messiah nynh na thua,” a ci.
21Jesu nynh tuh-e kong tuh hum kya sanmah a hopya khyh nawlan hae kawpya hae zah tynkaring lan bya a kin hae. A Chi lanpaw A Hoty (Mat 16.21-28; Mar 8.31—9.1)
22“Ccungccaw Ccapaw tuh myarya yn teing cih, piccan hae, ranpibawi lepaw hae te kawbya sazae hae nynh oun vua cih hae, oun theih cih hae, te nin thumnaw kya yn thoothui cih,” cite a hopya hae.
23Mih balyn kyakhe, “Humhung zemah kae hynh yn zui ry ze, amaw te amaw kha vuakuh sah lah nin takyh a vaelantung kha puihkute yn zui sah.24Pawccecize humhung zemah a hiinnaw kha a khumkuh rypaw tuh a hiinnaw kha a shung cih, thuasalama humhung zemah kae ka keiccuze a hiinnaw kha a shungpaw tuh a hiinnaw kha a khumkuh cih.25Pawccecize ccungccaw lu kheit nynh laephi pynpi hynh pong a ccou zeso a hiinnaw kha a shung ze, tuhkhyhze ro athua ze, a hanlan pawmou athane?26Humhung zemah kae te ka bya kha a mae yn thyakhaepaw tuh Ccungccaw Ccapaw nynh zemah a phu-enaw, Paaw phu-enaw te vaaw mithyaa hae phu-enaw ryte he yn thua te a maethyakhae ru cih.27Thuasalama byaccaccing kae hopya oh, Pachia peenaw kha a muih hae cia a chih cih lei hae paw ccungccaw abang tuh hein kya a thadyn hae,” cite a hopya hae. Jesu Muinsan Rulaekunaw (Mat 17.1-13; Mar 9.2-13)
28E bya a ho koute nin tarya loukaw he acih tuh Jesu nynh Peter, Johan te James kha hoeibua hae zah sawsang lan mua lang a kae hae.29Saw a sang cciamang lyakhe a maesue tuh rulaekuh zah a boeining tuh phaephae ak lan araw.30Vaekheihmawte ccungccaw lu ning tuh Jesu ryte bya a hokuh hae; tuh-e hae tuh Moses te Elijah nynh thua hae.31Minmin tuh phu-enaw te oun langkuh hae zah Jerusalem kya Jesu nynh a ccingsah cih paw a chi lanpaw kong kha a hoku hae.32Peter te a ban hae tuh a ngawphukuh hae; he a thaekuh hae tuh, Jesu phu-enaw te amaw ryte a thadynkheih hae paw ccungccaw lu ning kha a muih hae.33Tuh-e lu ning hae nynh he a cciataw hae te Peter nynh Jesu kha, “Bawipaw, hein kya ah um oh paw hynh myarya ahoy; kaening nynh bu buthum kae sak sah lah, nang na hanlan bu kheit, Moses hanlan bu kheit, te Elijah hanlan bu kheit,” cite paw nynh ka ho cipaw ny leite a hopya.34Tuhte a ho cciamang lyakhe maeking yn zi zah minmin kha pong a khong hae, Moses te Elijah nynh maeking lungkhu lang he a tee hae tuh minmin tuh a rih hae.35Maeking kyate roi yn ccae zah, “E paw tuh ka sungsahpaw ka Ccapaw nynh thua, a bya kha la ngae oh,” a ci.36Roi he adae tuh Jesu makhae nynh a muih vae hae. Zuitu hae nynh tuh lyaze a muih hae paw konglang kha hum kya sanmah ho leite daebabi lan a um hae. Imuapaw A Dansah (Mat 17.14-18; Mar 9.14-27)
37Awkhualan khe minmin tuh mua kyate oun rungbung hae zah ccungccaw patae nynh Jesu kha oun tungku hae.38Ccungccaw zapi laku te lukheitpaw nynh yn sia zah, “Sazae, ka ccapaw nae dopya nawlan kae ngiaku; amaw kyalya nynh ccaaw ka saah.39Muisaw nynh bahkuh zah vaekheihmawte raerae leih a sia; a mung kyate taraphue phe thua lan karae leih a hosah, myarya ccih lan tuaa zah a kyate poutaw ry khyh.40Tuh-e tuh deepya lan na zuitu hae ka ngia hae zah dee kho khyh hae,” a cipya.41Jesu nynh, “Pou zynnaw hoi lei hae paw te a ccouseikuh hae paw ciihan hae, hohseciamou nae kya ka um ung cih zah kae ngaesangpah ung cih oh? Na ccapaw tuh hynhlang yn cciakhae,” a cipya.42Imuapaw nynh a ccia lyakhe raerangsaro nynh laekhu kya khulia zah karae a hosah. Jesu nynh athyaa leipaw muisaw kha pe zah imuapaw kha a dansah, te a paaw kalan bua a pya. A Chi lanpaw Bua A Ho (Mat 17.22-23; Mar 9.30-32)
43Ccungccaw hae balyn tuh Pachia lesaenaw kha muih hae zah mih ngaeangthua. Jesu nynh a cyipaw miakaw kya ccungccaw miakaw mih ngaeangthua lyakhe, Jesu nynh a zuitu hae kha,44“E bya hae hynh nae nakaring lungkhu lang tee sah, pawccecize Ccungccaw Ccapaw tuh ccungccaw hae kuih kya pya yn thua cih,” a cipya hae.45Thuasalama minmin nynh tuh-e bya tuh thaethya khyh hae, bya asuilan kha thuruh thua zah nyhthya khyh hae; tuh-e bya konglang tuh amaw kha khia lan mah phe a rih hae. Hummou A Lesaehua (Mat 18.1-5; Mar 9.33-37)
46Zuitu hae laku kya hummou alehua cipaw eikunaw a um.47Jesu nynh mih tuanaw kha a ny keiccuze imua lu kheit kha lah zah a pe khe a nung,48te minmin kyakhe, “Humhung zemah e imua taraw hynh ka min te leh a khanpaw tuh kae kha leh yn khanpaw nynh thua, te humhung zemah kae kha leh yn khanpaw tuh kae yn sawtupaw kha leh a khanpaw nynh thua. Pawccecize nanning balyn lakuze adih huapaw tuh alesae huapaw athua cih,” cite a hopya hae. Jesu Min te Raerangsaro Deenaw (Mar 9.38-40)
49Johan nynh, “Bawipaw, lukheitpaw nynh na min te raerangsaro a deepaw kha kae muih zah kae khee, pawccecize aning tuh aening kya a zuikuh buapaw thua khyh,” a cipya.50Jesu nynh, “Tuh-e paw tuh khee nan oh, pawccecize aening oun rawse leipaw tuh oun pankhaepaw nynh thua,” a cipya.
51Jesu tuh vaawlang te lawthungnaw ccyh anae vae keiccuze Jerusalem lang ccia lan a noukuh.52Zeccuetu hae kha a malang a saw hae; minmin nynh cceih hae zah amaw hanlan paccyn khylan Samaria hae khua khuakheit kya a tee hae.53Jerusalem lang po sulue lan a nouku keiccuze tuh-e khuaccaaw hae nynh amaw kha thuasah khyh hae.54A zuitu hae James te Johan nynh tuh-e tuh muih hae zah, “Bawipaw, hynh-e hae hynh marya maemih khylan vaawlang te maee ccawsah lan kaw nae pya ry tou?” cite a khia hae.55Jesu nynh maenuakuh hae zah a pe hae. 56Tuinte minmin tuh ccangpaw khua lang a cceih hae. Jesu Zuitu Thuanaw Aruzia (Mat 8.19-22)
57Tuhcite minmin tuh laanpi kya a ccia lya hae khe ccungccaw lu kheit nynh, “Bawipaw, na ccianaw miakaw lang kae zui cih,” a cipya.58Jesu nynh, “Suizaw hae nynh karung hoi hae zah vaawlang e pavaw hae nynh bu a hoi hae, thuasalama Ccungccaw Ccapaw tuh a lu nungnaw hmin sanmah hoi khyh,” a cipya.59Jesu nynh mingccangpaw kha, “Yn zui,” a cipya. Thuasalama aning nynh, “Bawipaw, masaty ka la cceih sah lah ka paaw kha ka la uh hin sah,” a cipya.60Jesu nynh, “Michi hae nynh mih michi hae kha la uh hae sah, nang tuh la cceih lah Pachia peenaw kong kha la ho,” a cipya.61Mingccangpaw nynh mah, “Bawipaw, kae zui cih, thuasalama ka innbyn hae kha masaty ka la beihsya hin hae,” a cipya.62Jesu nynh, “Hum zemah thuetung kha kyng zah nulang a hawipaw tuh Pachia peenaw hanlan ngaekuh khyh,” a cipya. Jesu nynh Sung Sari A Saw hae
1Tukoute Bawipaw nynh ccangpaw sung sari kha mah khang hae zah amaw a cceih cihnaw khua te hmin takyh langkhe lu ning ccite a saw lalo hae.2Minmin kha, “Loohrue lanpaw tuh myarya alung, thuasalama ryalahtu hae tuh azya. Tukeiccuze loohrue lanpaw a hoitu Bawipaw nynh a loohruenaw kalan ryalahtu hae a saw nawlan sawsang oh,” a cipya hae.3Nanning la cceih oh; suizaw hae laku lang tuutaw hae saw hawte kae saw oh.4Phuabu thuasah, sohrae thuasah, phanah thuasah phukuh nan oh; laanryng kya humhung mah bya la beih nan oh.5Pawpaw inn kya na tee oh zemah, ‘E inn kya daenaw um sah!’ cite masaty la ho oh.6Tuin kya daenaw a rypaw a um ze, na ho oh paw daenaw tuh a tungvaw a um cih, a um khyh ze nae kalan bua yn ki cih.7Tuh-e inn kyakhe um oh lah ae pya oh paw kha la ae oh lah la neih oh, pawccecize ryalahtu nynh a ninro tuh a mue lanpaw nynh thua. Inn kheit kyate inn kheit kalan la nuekuh nan oh.8Khua khuakheit kya na tee oh zah ae thuasah oh ze, nae malang ae nyapya oh paw kha la ae oh,9tuin khua e ngeccih hae kha la dansah oh lah, ‘Pachia peenaw tuh nae kalan yn naekuh vae,’ cite la hopah oh.10Thuasalama khua khuakheit kya na tee oh zah ae thuasah khyh oh ze, khualae e laanpi hae kalan po la cceih oh lah,11‘Kae ccu kya abekuhpaw nae khua e vuiping hynh nanning rawsete kae khuanua oh, tuhzemah Pachia peenaw tuh nae kalan yn naekuh vae cipaw hynh la nyh oh,’ cite minmin kha la hopah oh.12Kae hopya oh, byapia nin vae tuh tuh-e khua hanlan laeze Sodom khua hanlan ngaesang kho a umhua cih. A Zyn leipaw Khua hae (Mat 11.20-24)
13Khorazin khua, nang na hanlan ngaethya lan kou um! Bethsaida khua, nang na hanlan ngaethya lan kou um! Pawccecize nanning kya ka raepaw ngaeangnaw hae hynh Tair khua te Sidon khua kya ka la rae ze, minmin tuh buri boeining lawkute buhhaw kya haungte khawlya mawte a ngaesikuh vae cih hae.14Byapianaw kya nanning hanlan laeze Tair khua te Sidon khua hanlan ngaesang kho a umhua cih.15Kapernaum khua, nang tuhvaawlang cia hangthungku na ry ii?Hell lungkhu lang sawbung na thua cih.
16“Nae bya a ngaepaw tuh ka bya a ngaepaw nynh thua; nanning ae vua oh paw tuh kae kha yn vuapaw nynh thua, kae yn vuapaw tuh kae yn sawtupaw kha a vuapaw nynh thua,” cite a hopya hae. Sung Sari hae Kinaw
17Sung sari hae tuh lungtuate bua oun ki hae zah, “Bawipaw, na min te raerangsaro hae nynh heize kae kaw a ngae hae!” cite a hopya hae.18Jesu nynh, “Khozawlaekuhpaw hawte Satan tuh vaawlang te a ccawbungpaw kha ka muih.19Dotua oh, nanning tuh hupaw hae te zekang hae syde kho nawlan te nae rhaw hae balyn kha tae kho nawlan kawhoinaw kae pya vae oh; pawpaw nynh mah nanning kha vaemaw ae muesah lan khyh oh.20Tuhzemah muisaw hoylei hae paw nynh nae kaw ae ngae oh pawte nae lungtua nan sah; nae min tuh vaawlang kya zei athua keiccuze nae lungtuahua sah,” a cipya hae.
21Tuh ccyh lyakhe Jesu tuh Thyaa Muisaw kya a lungtua zah, “Vaaw te laephi Bawipaw, pou Apang, nang nynh ahawpaw te athyapaw ccungccaw kyate e uccaw hae hynh na thuruh zah imua hae kya na phy vae keiccuze na kalan lungtuabya kae ho; Athua, Apang, hynhte acyikupaw hynh ahoypaw na rynaw nynh thua.22Pawpaw balyn tuh Apang nynh kae kalan marya yn pya vae; Paaw laelan hum ccungccaw nynh sanmah Ccapaw hynh nyh khyh; Paaw hynh hum nynh thua cipaw kha Ccapaw te Ccapaw nynh a phypyapaw ccungccaw laelan hum nynh sanmah nyh khyh,” a ci.
23Jesu nynh a zuitu hae kalan maekuh zah, “Na muih oh paw uccaw hae kha a muihpaw mit hae tuh lungtua hae paw nynh thua.24Pawccecize kae hopya oh, profeh hae patae te siapharan hae patae nynh na muih oh paw hynh a muih ry hae zemah muih khyh hae, na thae oh paw hynh a thae ry hae zemah thae khyh hae,” cite mih makhaete a hopya hae. Samaria Mihoypaw
25Kawbya thyapaw lu kheit nynh thadyn zah, “Sazae, zungzae hiinnaw rho ccou khylan pawmou ka cyi cih?” cite Jesu kha a syntawtua.26Jesu nynh, “Kawbya kya pawmou azeikuh? Pawtemou na ria?” a cipya.27Tuh-e paw nynh, “ ‘Bawipaw na Pachia kha na thinlung balyn te, na hiinnaw balyn te, na thawzung balyn te, na tuanaw balyn te na sungsah cih; te na innpaw kha namaw toulou hawte na sungsah cih,’ acikuh,” a cipya.28Jesu nynh, “Na hopaw tuh athua, tuhte la cyih lah na hiin cih,” a cipya.
29Thuasalama, aning nynh amaw te amaw kha thyaaccousaku ry zah Jesu kha, “Ka innpaw tuh hummou?” cite a khia.30Jesu nynh, “Ccungccapaw lu kheit tuh Jerusalem kyate Jeriko khua lang cceihbung zah damiah hae kuih kya phe a phungkuh; damiah hae nynh a boeining kha phae hae zah vya chih lan a bua kou hae te a cciataw hae.31Tuh-e laanpi kyakhe ranpibawi lu kheit cceihbung zah tuh-e paw tuh he a muih tuh ccanglang te phe a sibia.32Tuhawte Levi phinpaw lu kheit nynh tuin kya he a thua te, tuh-e paw tuh muih zah ccanglang te sibia zah phe a cciataw.33Thuasalama Samariapaw lu kheit tuh khuaccong zah tuh-e paw umnaw kya a thua te he a muih tuh ngaethya a umsah.34Te ccianua zah a vaemaw kha chitui te misutui thuhpah zah a heepya, te amaw a sahiin tungvaw khe ccisakuh zah mikhia-inn langkhe cciakhae zah a do-oih.35Awkhualan tuh denari kia ning kha thuaakuh zah mikhia-inn ngawtupaw kha pya zah, ‘E paw hynh la do-oih lah tuhlae na thangpaw kha bua kae thua te kae pyaru cih,’ a cipya.36Tuh-e lu thum hae lakuze damiah hae kuih kya a phungkuhpaw tuh-e ccungccapaw a innpaw tuh hummou athua cih cite na tua?” a cipya.37Kawbya thyapaw nynh, “Tuh-e paw tungvaw ngaethyaumsahnaw a hoipaw nynh athua,” a ci. Jesu nynh, “La cceih lah nang mah tuh-e hawte la cyihbua,” a cipya. Martha te Mary
38Tuhcite Jesu te a zuitu hae tuh khua a ccong lya hae khe, Jesu tuh khua khuakheit kya tee zah Martha a ci hae paw nopinung lu kheit nynh Jesu kha a inn lang a thuasah.39Martha nynh Mary a ci hae paw a neitawnung lu kheit a hoi. Mary tuh Bawipaw cculeihpaw khe haung zah a bya kha a ngae.40Martha tuh thohae ryasuh pawte a thinlung sokhaekuh zah Jesu kalan cceih zah, “Bawipaw, ka neitawnung nynh ka makhaete thohae rya miakaw pong yn ngaeccepaw hynh pawlang na ria khyh tou? Kae hynh yn bawm nawlan hopah,” a cipya.41Bawipaw nynh, “Martha, Martha, nang tuh uccaw patae konglang na lungvawsaw zah na thinphang.42Thuasalama ahoboupaw uccaw ccangkheit rou nynh a um; Mary nynh tuh-e ahoypaw uccaw tuh phe a poku vae, tuh-e tuh amaw kyate lawpya thua vae lan khyh,” a ci. Bawipaw Sawsangnaw (Mat 6.9-13, 7.7-11)
1Jesu tuh hmin san kheit kya sawsang zah he a thangsah te, a zuitu hae lakuze lu kheit nynh, “Bawipaw, Johan nynh a zuitu hae a ccangpya hae hawte, kaening hynh sawsangnaw oun ccangpah bua,” a cipya.2Jesu nynh minmin kha, “Saw na sang vae oh ze:‘Apang, na min sawtuanaw um sah.Na peenaw thua ccavae sah.3Nin takyh kae aepaw looh khanin takyhte oun pya.4Kae tungvawa sei hae paw miakaw khakae ngaethya hae keiccukae seinaw khaoun la ngaethyabua.Tuhounaw lungkhu langoun cciakhae nan,’  citela ho oh,” a cipya hae.Ziraccyng Sanlou Ngiatu
5Jesu nynh minmin kha, “Nanning lakuze lukhakheit nynh ruiban hoi zah ziraccyng khe a banpaw kalan cceih zah, ‘Ka ban, sanlou phe thum kae la koiibua hin.6Pawccecize ka banpaw lu kheit tuh khua a ccongnaw kyate yn thua zah looh dang lanpaw ka hoi khyh,’ a cipya.7Innthung te a banpaw nynh, ‘Mithyhmitpaw yn nung nan vae; thuakaw ka tou vae zah ka ccaaw hae ryte phe kae ih vae, ka tho ry vae khyh zah kae pya kho vae khyh,’ cite a khung cih.8Nanning kae hopya oh, tuh-e paw nynh tho leite um zah a pya khyh zemah, a banpaw athua keiccu lungthang leite a ngiaku keiccu tuh a tho cih zah ahobou zeihte a pya cih. Ngia, Ccung, Khua (Mat 7.7-11)
9“Tukeiccuze kae hopya oh, ngia oh lah ae pya cih oh; ccung oh lah na muih cih oh; khua oh lah thuakaw kha hungpya na thua cih oh.10Pawccecize a ngiapaw miakaw tuh a mue, a ccungpaw tuh a muih, thuakaw a khuapaw tuh hungpya athua cih.11Nanning lakuze nae ccaaw nynh ngasaw ae ngiaku oh ze ngasaw hanpaw huparepaw a pyapaw a um cih tou?12Tuhkhyhze awtui kha a ngiaku ze zekang kha a pya cih tou?13Ccungccaw hoy leipaw mang na thua oh pite nae ccaaw hae kha lasung hoypaw pya lan na ny oh ze, vaawlang umpaw nae Paaw nynh amaw kalan a ngiakuh hae paw kha Thyaa Muisaw tuh houh a pya cih hae!” cite a hopya hae. Jesu te Beelzebul (Mat 12.22-30; Mar 3.20-27)
14Bya a hosah kho leipaw raerangsaro kha Jesu nynh a dee. Raerangsaro he a pou te byaho kho leipaw tuh bya a ho vae, te ccungccaw zapi tuh mih ngaeangthua.15Thuasalama ccungccaw abang nynh, “Aning nynh raerangsaro hae uktupaw Beelzebul liate nynh raerangsaro hae kha a dee,” a ci hae.16Abang nynh Jesu kha syntawtua khylan vaawlang e muihsahnaw kha a ngia hae.17Thuasalama Jesu nynh mih tuanaw kha phe nyh zah minmin kha, “Amaw te amaw aphiakuhpaw peenaw miakaw tuh aroh cih, te amaw te amaw aphiakuhpaw innbyn tuh a khuliakuh cih.18Satan mah amaw te amaw a phiaku ze pawtemou a peenaw tuh atyn kho cih? Pawccecize nanning nynh kae kha Beelzebul liate nynh raerangsaro hae a dee nae ci oh.19Kae nynh Beelzebul liate raerangsaro hae kha ka dee lanze, hum liate mou nae ccungccaw hae nynh minmin kha a dee hae? Tukeiccuze minmin tuh nanning bya ae piatu oh athua cih hae.20Thuasalama kae nynh Pachia kuihdung liate raerangsaro hae kha ka dee lanze, Pachia peenaw tuh nae kya a thua ccaccing vae.21A thawsaepaw ccungccaw nynh zunghe phe ccing lante a inn kha a ngaw lya tuh a uccaw hae akhyn.22Thuasalama amaw laeze a thawsae huapaw nynh amaw kha a dou zetuh a tae cih, te a doliakupaw a zunghe balyn kha a lawpah cih zah a luapaw uccaw hae kha pong a nee cih.23Kae yn pankhae leipaw tuh kae yn rawsepaw nynh thua, te ka kya a sueluakuh bua leipaw ccungccaw tuh a phiakuhpaw nynh thua. Athyaa leipaw Muisaw Kithuinaw (Mat 12.43-45)
24“Athyaa leipaw muisaw nynh ccungccapaw kyate he a pou te, umnaw hmin zahku lan ramrou kalan a khiakuh, thuasalama muihkuh khyh. Tetuh aning nynh, ‘Ka poutawnaw ka inn lang ka ki cih,’ a ci.25He a kithui tuh tuh-e inn tuh phe la phikuh zah ccynmamyh lan a ccawnghanpaw kha a muih.26Tetuh aning nynh cceih zah amaw laeze houh athahhua hae paw ccangpaw muisaw lu sari kha a hoeibua hae, te minmin nynh tee hae zah tuh-e paw kya a um hae; te tuh-e ccungccapaw tuh nyalang e a cyisahnaw tuh langmaw a cyisahnaw laeze houh athahhua vae,” cite a hopya hae. Lungtuanaw Ccaccing
27Jesu nynh tuh-e bya a ho cciamang lyakhe ccungccaw zapi laku te nopinung lu kheit nynh sia zah Jesu kha, “Nang ae poipaw vue te nang ae kuapaw matei tuh lungtuapaw nynh thua!” a cipya.28Thuasalama Jesu nynh, “Pachia bya kha thae zah a zui hae paw hynh nynh lungtuapaw athuahua hae!” a ci. Jonah Muihsahnaw (Mat 12.38-42)
29Ccungccaw hae houhouh oun lungthung hae te, Jesu nynh, “E ccungccaw hae tuh ahoy leipaw ciihan nynh thua hae; minmin nynh muihsahnaw kha a ngia hae; thuasalama Jonah kya-e muihsahnaw laelan ccangpaw muihsahnaw kha pya thua vae lan khyh hae.30Pawccecize Jonah tuh Nineveh hae hanlan muihsahnaw athua hawte, Ccungccaw Ccapaw mah e ccungccaw hae hanlan muihsahnaw athua cih.31Byapianaw kya Alia lang e siapharannung tuh e she kya-e ccungccaw hae ryte yn thadyn cih zah minmin kha yn seisah cih hae, pawccecize aning tuh laephi athangnaw langte Solomon hawnaw bya kha ngae khylan yn thua; te dotua, Solomon laeze alesae huapaw tuh hein kya mang um!32Nineveh khuaccaaw hae tuh e she kya-e ccungccaw hae ryte byapianaw kya oun thadyn cih hae zah, e she kya-e ccungccaw hae kha oun seisah cih hae, pawccecize minmin tuh Jonah phunghonaw kya a ngaesikuh hae, te dotua, Jonah laeze alesae huapaw tuh hein kya mang um! Pyn kya-e Maeekhua (Mat 5.15, 6.22-23)
33“Humhung nynh mah maeekhua kha aw zah kee te khong boi khyh, oun tee hae paw nynh awnaw kha a muih ccaw hae cite maee awnawpaw vawlan nynh a nung.34Pyn kya-e awnaw tuh mit nynh thua, tukeiccuze na mit ahoy ze na pyn balyn mah awnaw te abeih cih, thuasalama na mit ahoy khyh ze, na pyn balyn mah mohnaw te abeih cih.35Tukeiccuze na kya umpaw awnaw tuh mohnaw athua khyh nawlan la raeringkuh.36Na pyn balyn tuh mohnaw um leite awnaw te phe abia lanze, maeekhua a awpaw nynh awnaw ae pya hawte, na pyn balyn tuh awnaw te phe abeih cih,” a ci. Jesu nynh Farasi hae A Pe hae (Mat 23.1-36; Mar 12.38-40)
37Tuhcite bya a ho lyakhe, Farasipaw lu kheit nynh Jesu kha aepaw a kopya; Jesu tuh cceih zah ae lan a haung.38Zerya a ae mawze a kuih a singku ty khyhpaw kha Farasipaw nynh he a muih tuh a ngaeangthua.39Bawipaw nynh, “Nanning Farasi hae tuh banang te pake kha avawlan kyalya nynh na sing oh, thuasalama nae lungkhu tuh karankunaw te hoyleinaw te nynh phe abia.40Nanning mingaee hae! Avawlan a raetu nynh alungkhu kha mah raebia khyh tou?41Tukeiccuze alungkhu umpaw uccaw hae kha ryachi hae pyabua oh lah, pawpaw balyn tuh nae hanlan athyaa cih.
42“Thuasalama Farasi hae, nae hanlan ngaethya lan kou um! Pawccecize nanning nynh hangmae te pucinan te enaw phuin hae balyn kha pumhaw pumkheit na pya oh zah, Pachia byading te a sungsahnaw kha na sawphah oh; ccangpaw kha sawphah leite, hynh-e hae hynh mah na cyi lan oh paw nynh thua.43Farasi hae, nae hanlan ngaethya lan kou um! Pawccecize nanning tuh sinakok kya ahoy huapaw haungnaw kha na ry oh zah kungkunaw kya sawtuate byabeihku na ry oh.44Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning tuh alang leipaw shawku hae te nynh na loku oh. Ccungccaw hae nynh tuh-e shawku hae kha nyh khyh hae zah avawlan khe a ccia hae,” a cipya.
45Kawbya thya hae paw kyaze lukheitpaw nynh, “Sazae, tuhte he na ho tuh kaening hynh mah nae saryabua vae,” a cipya.46Jesu nynh, “Nanning kawbya thya hae paw mah, nae hanlan ngaethya lan kou um! Pawccecize nanning nynh myarya ripaw phupaw kha ccungccaw hae tungvaw na khang oh zah naemaw tuh nae kuihdung te san na hae ry khyh oh.47Nanning hanlan ngaethya lan kou um! Pawccecize nae minpaaw hae nynh a chia hae paw profeh hae elang shawku kha na raepya oh.48Nae minpaaw hae nynh a cyi hae paw kha nae nawccah zah ccaekia na khan oh; pawccecize minmin nynh profeh hae kha theih hae zah nanning nynh mih shawku hae kha na raepya oh.49Tukeiccuze Pachia Hawnaw nynh, ‘Minmin kalan profeh hae te locceihtu hae kha ka saw cih hae; minmin nynh abang kha a theih cih hae zah abang kha a tuaa a sah cih hae,’ a ci.50Tukeiccuze laephi athonaw aleihpaw kyate aluapaw profeh hae chiise balyn mee kha hynh-e ciihan hae kya ngia athua cih.51Abel chiise kyate tho zah silawhang te beikinnthyaa laku kya a chia hae paw Zekhariah chiise kyacia ngia athua cih hae. Byaccaccing kae hopya oh, tuh-e tuh e ccungccaw hae kya ngia athua cih.52Kawbya thya hae paw, nae hanlan ngaethya lan kou um! Pawccecize nanning nynh hawnaw tohccung kha na kyng oh zah, naemaw mah na tee khyh oh, a tee ry hae paw kha mah na khee oh,” a ci.
53Tuin kyate Jesu tuh he a pou te, kawbya sazae hae te Farasi hae nynh bya patae yn hosei ccaw cite Jesu kha thinriasah khylan bya patae a khia hae.54A munglae kyate yn toikuhpaw kha kyngpya lan zah seibe lan cite amaw kha phang a dokhaw hae. Thyaruh hae Raeringnaw Pyanaw
1Ccungccaw patae nynh lu kheit te lu kheit sydeku ciate athong athongte oun pumku lya hae khe, Jesu nynh a zuitu hae kha, “Farasi hae nynh a thyaruhnaw hae paw mih ransi kha la raeringkuh oh.2Pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.3Tukeiccuze amohnaw kya na ho oh paw byaru miakaw kha a awnaw kya thae athua cih; inn lungkhu thuakaw khawsungkute na hoku oh paw byaru miakaw kha innccukaly kyate siakhae athua cih. Hummou Ri lan (Mat 10.28-33)
4“Ka ban oh, kae hopya oh, pyn kha theih hae zah tukoute pawsang a cyih kho lei vae hae paw raw kha rih nan oh.5Thuasalama hummou ri lan accan cipaw kae hopah cih oh; pyn a theih koute hell lungkhu lang vuanaw kaw a hoitupaw raw kha rih oh. Athua, amaw raw kha rih oh cite kae hopya oh!6Rithya sa pangaw kha phuapia pia ning lang a zua hae khaw? Tuh-e rithya sa kheit sanmah Pachia nynh ning khyh.7Nae lu kya-e nae sangrua heize marya ria athua. Tukeiccuze rih nan oh; nanning tuh rithya hae patae laeze na sunghua oh. Khri Kong Nawccawnaw te Einaw (Mat 10.32-33, 12.32, 10.19-20)
8“Nanning kae hopya oh, humhung zemah ccungccaw hae malang kae kha ccaekia yn khanpaw tuh, Ccungccaw Ccapaw nynh Pachia vaaw hae malang khe tuh-e paw tuh ccaekia a khanru cih.9Thuasalama ccungccaw hae malang kae kha yn vuapaw tuh Pachia vaaw hae malang khe vuaru athua cih.10Humhung zemah Ccungccaw Ccapaw rawsete bya kaw kheit a hopaw tuh ngaethya athua cih; thuasalama Thyaa Muisaw kha rawsete a saryapaw ccungccaw tuh ngaethya thua lan khyh.11Nanning kha sinakok hae, uktu hae te kawhoitu hae kalan ae thuakhae oh ze pawtemou ka khung cih, pawmou ka ho cih cipaw nae lungvawsaw nan sah.12Pawccecize Thyaa Muisaw nynh tuh-e ccyh ccaccei kyakhe na ho lan oh paw kha ae ccangpah cih oh,” cite a hopya hae. Mihoipaw Tousenaw
13Ccungccaw zapi kyate lukheitpaw nynh Jesu kha, “Sazae, rho yn neebua nawlan ka upaw hynh hopah,” a cipya.14Jesu nynh, “Ccungccapaw, hum nynh mou kae hynh nanning laku kya byapiatu lang, tuhkhyhze rho neetu lang yn nung?” a cipya.15Jesu nynh, “Karankunaw aphuinphuin kha raeringkuh oh lah sibia oh; pawccecize ccungccaw lu kheit hiinnaw tuh a hoipaw uccaw patae kyakhe um khyh,” a cipya hae.16Jesu nynh minmin kha tousenaw phungpaw ccangkheit a hopya hae: “Mihoipaw lu kheit um zah a laephi kya looh myarya avoi.17A thinlung kya tuakuh zah, ‘Pawmou ka cyih cih, ka looh nungnaw um vae khyh,’ a ciku.18‘Hynhte ka cyih cih: ka ccung-inn hae kha ka phou cih zah alehua lante ka sak cih; tuin kya ka looh hae te ka uccaw hae balyn kha ka nung cih.19Tuinte kamaw te kamaw kha, “Mihoipaw, nang tuh kum patae hanlan uccaw patae kha ccakhungpya na thua vae; hung um ccavae, ae lah neih, lungtua lungpawte um,” ka cikuh cih,’ a ci.20Thuasalama Pachia nynh tuh-e paw tuh, ‘Mingaeepaw! Atu khuazi ccaccei maw na hiinnaw kha law athua cih; na ccakhungpaw uccaw hae kha hum elang mou a tang cih?’ a cipya.21Tukeiccuze mimaw hanlan sisua ccakhungkuh hae salamah Pachia muihnaw kya a ryachi hae paw tuh tuh-e paw hawte nynh athua hae,” a ci. Lungvawsawnaw (Mat 6.25-34)
22Jesu nynh a zuitu hae kha, “Tukeiccuze kae hopya oh, pawmou ka ae cih cite thuasah, nae pyn hanlan paw boeining mou ka lawkuh cih cite thuasah nae hiinnaw hanlan nae lungvawsaw nan sah.23Pawccecize hiinnaw tuh aepaw laeze sunghua zah pyn tuh boeining laeze asunghua.24Va-aw hae kha tuatua oh: minmin tuh ccacii vuakuh khyh hae zah looh mah rue khyh hae, sisuainn thuasah, byng thuasah hoi khyh hae, thuasalama Pachia nynh minmin kha looh a dang hae, nanning tuh pavaw hae laeze patae na sunghua oh khaw!25Nanning lakuze hummou a lungvawsawnaw liate a hiinnaw ccyh kha ccapyh san a saesakuh khopaw a um?26Tuhcite adih huapaw uccaw san na cyihkuh kho khyh oh lanze, pawccemou ccangpaw uccaw hanlan nae lungvawsaw?27Lili paw hae hynh pawcihte nynh a lethung hae cipaw kha tuatua oh; minmin tuh loopho khyh hae, laaw mah sukuh khyh hae; tuhzemah kae hopya oh, myarya a hoirumpaw Solomon nynh heize lili paw pawkheit tuhte apuithya lan ccaankuh kho khyh.28Tukeiccuze, pou zyn zya hae, atunin hiin zah awkhualan takuamaee lungkhu lang phung athuapaw ramkaw e lonua kha heize Pachia nynh tuhte a ccaan lanze, nanning kha tuh-e laeze houh ae ccaan lan khyh oh tou!29Pawmou kae ae cih, pawmou kae neih cih cite ccung nan oh; lungriathaete mah um nan oh.30Pawccecize laephi vaw e minphuin hae nynh e uccaw hae balyn hynh leih a ccung hae, nae Paaw nynh e uccaw hae hynh nae hanlan aho cipaw phe a ny.31Pachia peenaw kha ccung oh lah, e uccaw hae tuh pyachih na thua cih oh.
32“Tuuphu taraw hae, rih nan oh; pawccecize peenaw kha nanning pya lanpaw tuh nae Paaw a lungrypaw nynh thua.33Na hoi oh paw kha zua oh lah, ryachi hae kha pyabua oh, apue kho leipaw phuabu kha raekuh oh, miruh nynh a thuanua kho leinaw te laehaw nynh a ro kho leinaw vaawlang khua khe athang kho leipaw sisua kha ccykuh oh.34Pawccecize nae sisua umnaw kya nae thinlung mah a umbua cih. A Raeringkuhpaw See hae
35“Nae taeccia kha cciakuh oh lah, nae maeekhua kha awkuh oh.36Zudy poi kyate mih bawipaw yn ki zah thuakaw he yn khua te, palou hungpya khylan a ngaw hae paw see hae hawte la um oh.37Mih bawipaw tuh yn ki zah phang a ngaw hae paw see hae kha a muih ze, tuh-e see hae tuh lungtua hae paw nynh thua; byaccaccing kae hopya oh, mih bawipaw nynh taeccia a cciakuh cih zah minmin kha ccaboi kya a koihsah cih hae, te amaw ccaccei nynh looh a dang cih hae.38Mih bawipaw tuh ziraccyng khyhze tuhlae nyathya lante zemah yn ki zah minmin kha tuhcite a muih hae ze, tuh-e see hae tuh lungtua hae paw nynh thua.
39“Thuasalama e hynh nyh oh: inn hoitupaw nynh miruh yn thua lanpaw ccyh kha a nyty lanze a inn kha kiasah bia lan khyh.40Nanning mah raeringkute um oh; pawccecize na tua khyh oh ccyh lyakhe Ccungccaw Ccapaw tuh yn thua cih,” a cipya hae. See Phuin Ning (Mat 24.45-51)
41Peter nynh, “Bawipaw, e tousenaw phungpaw hynh kaening hanlan tou na ho, tuhkhyhze ccungccaw miakaw hanlan tou?” cite a khia.42Bawipaw nynh, “Accyh zaw vae ze mih hanpaw looh neesah lan te a see hae a uktu lang cite a bawipaw nynh a khang lanpaw a lungzipaw te a hawpaw synriatu tuh hummou athua?43Tuhte rya a lawpaw kha a bawipaw nynh yn thua zah a muihpyapaw see tuh lungtuapaw nynh thua.44Byaccaccing kae hopya oh, a bawipaw nynh tuh-e see tuh a uccaw balyn a do-oihtu lang a nung cih.45Thuasalama tuh-e see nynh, ‘Ka bawipaw yn thuanaw ccyh tuh aro ung cih,’ cite a lungkaw te tua zah, ccangpaw see pise hae te nopi hae kha bua hae zah, aete niate a rui;46tuh-e see nynh a tua khyh lya te a ny khyh lyakhe a bawipaw tuh yn thua lanze, tuh-e paw tuh thoh a pae cih zah mih lungzi lei hae paw ryte a nungkheih cih hae.47A bawipaw rynaw kha mang a nyh pite a paccynkuh leipaw te a bawipaw rynaw a cyipah leipaw see tuh ccungbua patae a mue cih.48Thuasalama a bawipaw rynaw kha ny leite, ccungbua mue lan accanpaw rya a lahseipaw see tuh ccungbua ccapyh nynh a mue cih. Pawccecize patae pya athuapaw ccungccaw tuh patae a sangru cih; patae a ccysah hae paw ccungccaw tuh patae a ngiaru cih hae. Daenaw, Phiakunaw (Mat 10.34-36)
49“Kae tuh laephi vawlan maee ruasah khylan nynh kae thua; atumaw maee rua ccavae sah ci nynh ka ry!50Baptisma in lanpaw ka hoi ung, tuh-e accing mawlaezung tuh myarya ka lungriathae!51Laephi vawlan daenaw thuakhae khylan nynh yn thua cite tou na tua oh? Nanning kae hopya oh, tuhte thua khyh; phiakunaw thuakhae khylan nynh kae thua!52Atu ccyh kyate lu pangaw a um hae paw innbyn kya phiakunaw a um cih zah lu thum nynh lu ning kha a rawse cih zah, lu ning nynh lu thum kha a rawse cih.53Paaw nynh ccapaw khaa rawse cih zah ccapaw nynhpaaw kha a rawse cih;nung nynh ccanung khaa rawse cih zah ccanung nynhnung kha a rawse cih;ninnung nynh monung khaa rawse cih zah monung nynhninnung kha a rawse cih,” a ci.Ccyh Muihsahnaw (Mat 16.1-4)
54Jesu nynh ccungccaw zapi kha mah, “Niccaw langte maeking yn pouthungpaw kha na muih vae oh ze, ‘Khuaa yn rah cih,’ na ci oh zah khuaa arah sasaw.55Alia langte khisan yn zawpaw kha na muih vae oh ze, ‘Khuanin yn so cih,’ na ci oh zah khuanin aso sasaw.56Cyihruh hae! Vaawlui te laephi kha na do oh zah asuilan na thaethya oh; thuasalama pawccemou atu e ccyh umtuzia hynh na thaethya khyh oh? Nae Rhawpaw te Ccawkuh Oh (Mat 5.25-26)
57“Pawccemou naemaw ccaccei nynh ahmepaw kha cyi lan bya na paeku khyh oh?58Nang ae rawsetupaw ryte byapiatu kalan na cciakheih lya oh laanpi kyakhe, ccawku kho nawlan thawte la zuakuh; tuhkhyhze tuh byapiatu kalan ae cciakhae cih zah byapiatu nynh thong uktu kalan ae ap cih, te thong uktu nynh thong ae saw cih.59Nang kae hopya, na rung lanpaw phuapia kha phe ccing lan na pya mawlaezung thonginn kyate na pou lan khyh,” cite a hopya hae. Ngaesikunaw
1Tuh ccyh lyakhe abang ccungccaw hae nynh Jesu kyakhe Pilat nynh Galilee hae chiise kha si a lawnaw hae paw ryte pong a pydepaw kong kha a hopya hae.2Jesu nynh, “Tuh-e Galilee hae tuh tuhte a teing hae keiccuze ccangpaw Galilee hae balyn laeze a seihua hae paw cite tou na tua oh?3Seihua khyh hae, nanning kae hopya oh; na ngaesiku khyh oh ze, tuh-e hawte marya na chih cih oh.4Tuhkhyhze, Siloam kya innhangpaw nynh tingthin hae zah a chih hae paw lu haw lae tarya hae kha ccangpaw Jerusalem khuaccaaw hae balyn laeze a seihua hae paw cite tou na tua oh?5Seihua khyh hae, nanning kae hopya oh; na ngaesiku khyh oh ze, tuh-e hawte marya na chih cih oh,” a cipya hae. Athae leipaw Thaeku Tousenaw
6Jesu nynh e tousenaw phungpaw hynh mah a ho: “Ccungccapaw lu kheit nynh a misu khokhu kyakhe thaeku ku kheit a lin; yn cceih zah tuh-e ku kya athae kha ccung zah muih khyh.7Misu khokhu ngawtupaw kha, ‘Dotua, kum thum cia hynh-e thaeku ku kalan kae cceih zah athae ka ccung zah ka muih khyh; nge ccavae; pawlangmou laephi hynh a thangsah han?’ cite a hopya.8Khokhu ngawtupaw nynh, ‘Sazae, kum kheit sankaw tuh hynhmawte um hin sah, a pepan kya laephi ka thualeihpah cih zah lae hoy ka pumnua ung cih.9Khuavae kya athae yn thae ze ahoy; yn thae vae khyh ze na nge vae cih,’ a cipya,” a cipya. Sabbath Nin Nopinung A Dansah
10Jesu nynh sabbath nin kya sinakok ccangkheit kyakhe a ccangpya hae.11Tuin kyakhe muisaw hoyleipaw nynh kum haw lae tarya cia a ngoisahpaw nopinung lu kheit a um; tuh-e nung tuh a ke ky zah lawbabin lan umthya khyh.12Jesu nynh tuh-e nung tuh he a muih te ko zah, “Nopinung, na ccinaw kyate na lue vae,” a cipya.13Tuh-e nung tungvaw a kuih he a khang te, a ke tuh vaekheihmawte yn law zah Pachia kha the a hoysah.14Tuhte Jesu nynh sabbath nin kya a dansah keiccuze sinakok uktupaw nynh a thinria zah ccungccaw hae kyakhe, “Ryalaw lawku nin nintaruh a um, tuh-e nin hae kyakhe oun cceih oh lah dannaw mue oh, sabbath nin kya tuh mue nan oh,” a cipya hae.15Bawipaw nynh khung zah, “Thyaruh hae! Nanning lu kheit cci nynh sabbath nin kya nae tangnuapaw khyhze nae lann kha a inn kyate na supah oh zah tui nia lan na cciakhae khyh oh tou?16Kum haw lae tarya cia Satan nynh phang a heepaw, Abraham ccanung athuapaw, e nopinung hynh hynh-e heenaw kyate sabbath nin kya luesah lan ccan khyh tou?” a cipya.17Hynhte he a ho tuh, amaw a rawsetu hae balyn tuh maethya pong bongkuh hae; ccungccaw hae balyn tuh Jesu nynh a raepaw ngaeangnaw keiccuze mih lungtua. Mungngia Cii Tousenaw (Mat 13.31-32; Mar 4.30-32)
18Jesu nynh, “Pachia peenaw tuh pawtemou aloku? Pawtemou ka touse cih?19Ccungccapaw lu kheit nynh lawkuh zah a khokhu lungkhu lang a vuapaw mungngia cii te nynh aloku; tuh-e acii tuh lethung zah akupi lang yn tang, te vaawlang e pavaw hae nynh aran hae kyakhe bu a luaku hae,” a ci. Ransi Tousenaw (Mat 13.33)
20Jesu nynh bua ho zah, “Pachia peenaw tuh pawtemou ka touse cih?21Hynh-e te nynh aloku. Nopinung lu kheit nynh ransi kha lah zah vaepoi ke kethum kya a phing, tuh-e vaepoi a thosahpaw ransi te nynh aloku,” a ci. Abypaw Koikua (Mat 7.13-14, 21-23)
22Jesu nynh Jerusalem lang khua a ccong lyakhe khuapi hae te khua taraw hae kalan po cceihpaw zah a ccangpya hae.23Ccungccaw lu kheit nynh, “Bawipaw, beihtaraw kyalya tou khumnaw a mue cih hae?” cite a khia. Jesu nynh minmin kha,24“Abypaw koikua kyate tee lan zuakuh oh; pawccecize, kae hopya oh, ccungccaw patae nynh tuh-e kya tee lan oun zuakuh cih hae zah tee kho lan khyh hae.25Inn hoitupaw nynh vaekheit thokuh zah thuakaw kha phe a khaw koute, nanning nynh atolang khe thadynte thuakaw kha na khua oh zah, ‘Bawipaw, thuakaw oun hungpah,’ na ci oh; aning nynh nanning kha, ‘Paw kyate nae thua oh paw cipaw kae nynh khyh oh,’ ae cipah cih oh.26Nanning nynh, ‘Namaw ryte ah ae ah neihkheih oh paw khaw! Kae khua laanpi kya balyn nae ccangpah khaw!’ nae ci cih oh.27Thuasalama aning nynh, ‘Paw kyate nae thua oh paw cipaw kae nyh khyh oh; nanning hoyleinaw a raetu hae, ka kyate cceih oh,’ ae cipah cih oh.28Nanning nynh Abraham, Isak te Jakob te profeh hae balyn kha Pachia peenaw kya na muih oh zah naemaw tuh atolang dae vua na thua oh paw kha he nae muih oh te, rawkhuinaw te hawzynaw oun um cih.29Ccungccaw hae tuh nithua, niccaw, thahlang, deilang te oun thua cih hae zah Pachia peenaw kya oun haung cih hae.30Nyathya hae paw kha masaty hae paw oun thua cih hae zah, masaty hae kha nyathya hae paw oun thua cih hae,” a ci. Jerusalem hanlan A Ngaethah
31Tuh ccyh lyakhe Farasi hae abang oun thua hae zah Jesu kha, “Hein kyate toikuh lah pou, pawccecize Herod nynh chia lan ae ry,” a cipya hae.32Jesu nynh minmin kha, “Nanning la cceih oh lah tuh-e suizaw tuh, ‘Atunin te awkhualan tuh raerangsaro hae kha ka de cih hae zah ngeccih hae kha ka dansah cih hae. Tuinte nin thumnaw kya ka ryalaw ka thangsah cih,’ a ci cite la hopah oh.33Tuhzemah atunin, awkhualan te sarukheih tuh solei ka cceih ung cih; pawccecize profeh lu kheit nynh Jerusalem atolang kya a chi lanpaw tuh thua kho khyh.34Pou Jerusalem, Jerusalem, profeh hae kha na theih hae zah na kalan oun saw hae paw ccungccaw hae kha lung te na deih hae; awpinung nynh a taw hae kha a sake kaw a suelua hae hawte na ccaaw hae kha pynkheihlan suelua lan palei ka ry zah nang nynh na ry khyh!35Dotua oh, na inn tuh a muahanpaw lang a tang cih; nang kae hopya, ‘Bawipaw min te yn thuapaw tuh lungtuapaw nynh thua!’ cite na ho mawlaezung nae muih vae lan khyh,” a cipya. Tui A Poipaw A Dansah
1Sabbath nin kya Jesu nynh aepaw ae lan Farasi lupipaw lu kheit inn lungkhu lang he a tee tuh minmin nynh a dophi hae.2Tui poipaw ccinaw a hoipaw lu kheit tuh Jesu malang khe a um.3Jesu nynh tho zah kawbya thya hae paw te Farasi hae kha, “Sabbath nin kya dansah lan accan tou?” cite a khia hae.4Minmin tuh yccae khyh hae. Jesu nynh tuh-e paw tuh ko zah a dansah koute a cciasah.5Jesu nynh minmin kha, “Nanning lakuze a ccaaw tuhkhyhze a vaetua kha sabbath nin kya tuisung lungkhu lang a ccaw ze palou a thy leipaw a um cih tou?” cite a khia hae.6Minmin nynh e bya hynh mah khung kho khyh hae. Zakawsangsakunaw
7Kopaw ccungccaw hae nynh ahoy huapaw haungnaw a poku hae paw kha Jesu nynh he a muih tuh, tousenaw phungpaw a hopya hae:8“Lukhakheit nynh zudy poi kalan ae ko ze ahoy huapaw haungnaw kya la haung nan, nang laeze sawtuahua lan umpaw kha a la kobua ze,9nanning parouhte ae kotu oh paw nynh na kalan yn cceih cih zah, ‘E paw hynh na haungnaw kha pya,’ ae cipya ze, nang tuh maethyate ane huanaw hmin kya um lan yn ccan vae cih.10Thuasalama nang kha ae kobua hae ze, cceih lah ane huanaw kyakhe la haung; tuhteze nynh nang ae kotupaw he yn thua te, ‘Ka ban, ahang huanaw langkhe haung,’ ae cipah cih; tetuh na haungkheih oh paw malang khe sawtuanaw na mue vae cih.11Pawccecize humhung zemah amaw te amaw a hangsakuhpaw tuh sawbung athua cih zah, amaw te amaw zakaw a sangsakuhpaw tuh hangthung athua cih,” a ci.
12Jesu nynh amaw a kotupaw kha mah, “Nang nynh awkhua loohdangkunaw tuhkhyhze zete loohdangkunaw na rae vae ze, na ban hae, na uno hae, na vaeccaw hae, a hoirumpaw innpaw hae kha la ko nan hae; tuhte na ko hae ze minmin nynh mah bua ae koru cih hae zah amee ae sangru cih hae.13Thuasalama nang nynh poi na tua vae ze, ryachi hae, pyn kya-e accing lei hae paw, ccukhou hae te mitmoh hae kha la ko hae.14Minmin nynh ae sangru kho lan khyh hae, tukeiccuze hythua ccoupaw na thua cih. Miding hae thoothuinaw kya amee sangru na thua cih,” a cipya. Loohdangkunaw Tousenaw (Mat 22.1-10)
15Jesu ryte aenaw kya a haungkheih hae paw lu kheit nynh tuh-e bya tuh thae zah Jesu kha, “Pachia peenaw kya sanlou a ae cih paw ccungccaw tuh hythua ccoupaw nynh thua!” a cipya.16Jesu nynh tuh-e paw tuh, “Ccungccapaw lu kheit nynh loohdangnaw poi pi tua zah ccungccaw patae a ko.17Looh ae ccyh yn zaw te, a ko hae paw kalan a seepaw kha saw zah, ‘Rang ccavae oh, pawpaw balyn atu paccyn athua vae,’ cite a hosahpya hae.18Thuasalama mih balyn te pong a seisah hae. Masaty e paw nynh, ‘Laekua kua kheit ka re zah do lan ka ccia aho ung, beih yn ngaethya hin,’ a cipya.19Mingccangpaw nynh, ‘Tangnua toi pangaw ka re zah syntawtua lan ka la cceih ung cih, beih yn ngaethya hin,’ cite a ngiaku.20Mingccangpaw nynh, ‘Atumaw khe zu ka hoi zah kae thuathya lan khyh,’ a ci.21Tukeiccuze tuh-e seepaw nynh ki zah tuh-e tuh a bawipaw kya a hopya. Inn hoitupaw tuh a thinria zah a seepaw kha, ‘Khualae e laanluepi hae te laanpi dihpaw hae kalan khe la cceih kangmaw lah ryachi hae, pyn kya-e accing lei hae paw, ccukhou hae te mitmoh hae kha hynhlang oun cciakhae hae,’ a cipya.22A seepaw nynh, ‘Bawipaw, kaw nae pya thyhte phe ka cyi vae, tuhzemah akhaan mang accawng ung,’ a cipya.23A bawipaw nynh a seepaw kha, ‘Laanluepi te laanpi dihpaw hae kalan la cceih lah, ka inn kya phe abia ccaw, ccungccaw hae kha nangsete oun ko hae.24Pawccecize nang kae hopya, kopaw ccungccaw hae lu kheit nynh sanmah ka zerya hynh taangtua lan khyh,’ a cipya,” cite a hopya. Zuitu Thuanaw Mee
25Ccungccaw zapi patae tuh Jesu ryte a cceih hae. Jesu nynh maekuh zah minmin kyakhe,26“Humhung zemah ka kalan yn cceih zah a paaw te a nung, a zu te a ccaaw hae, a uno hae te a ccia hae, te amaw a hiinnaw kha heize a hua khyh lanze ka zuitu lang tang kho lan khyh.27Humhung zemah amaw a vaelantung kha puihku leite kae yn zuipaw tuh ka zuitu lang tang kho lan khyh.28Pawccecize nanning lakuze lukhakheit nynh innhangpaw sak lan a paccynku ze, inn lynnaw lanpaw phua azaw lan a hoi tou, hoi khyh tou cipaw ny khylan masaty haungte amee tuatua lan khyh tou?29Tuhte tuaty leite, innhangpaw tuh tungpi a bing koute a lyn kho khyh ze, a muih hae paw balyn nynh a sarya cih hae zah,30‘E ccungccapaw nynh sak lan mang tho zah lyn kho vae khyh,’ cite a ho cih hae.31Tuhkhyhze, siapharan lu kheit nynh ccangpaw siapharanpaw kha rhawtuk lan a nouku ze, ccungccaw thong kuin te yn thokuhpaw siapharanpaw kha ccungccaw thong haw te ka dou kho cih tou cipaw masaty haungte tuaku ty leite a um cih zawtou?32A dou kho lan khyh ze, tuh-e siapharan tuh laan sawpi a um lyakhe, zeccuetu a saw cih zah ccawkunaw a ngiakuh cih.33Tuhawte nanning laku e humhung zemah a hoipaw balyn kha marya a cciataw leipaw tuh ka zuitu lang tang kho lan khyh. A E leipaw Loi (Mar 9.49-50)
34“Loi tuh ahoy; thuasalama loi nynh a enaw kha azo lanze pawtemou esah kho athua ung cih?35Tuh-e loi tuh laephi hanlan thuasah, athupaw pumnaw hanlan thuasah hoy vae khyh; ccungccaw hae nynh ccaring a vua vae hae. Thaenaw nakaring a hoipaw nynh thae sah,” a ci. Azopaw Tuu (Mat 18.11-14)
1Ngunto khoitu hae te misei hae balyn nynh Jesu bya kha ngae khylan a kalan oun cceih hae.2Farasi hae te kawbya sazae hae nynh ccohkuh hae zah, “E ccungccapaw hynh misei hae kha lehkhan hae zah minmin ryte a aekheih hae,” a ci hae.
3Tukeiccuze Jesu nynh e tousenaw phungpaw hynh a hopya hae:4“Nanning kya tuu za kheit a hoipaw ccungccaw nynh sa kheit kha a zosah lanze, sung takua sa takua kha ramkaw khe cciataw zah azopaw kha a muih makhia ccung khyh tou?5Tuh-e tuu tuh he a muih te, lungtuate a raw vawlan a khangku.6Innvaw he a thua tuh a ban hae te innpaw hae kha ko hae zah, ‘Lung oun tuakhae oh, pawccecize azopaw ka tuu kha phe ka muih vae,’ a cipya hae.7Nanning kae hopya oh, tuhawte ngaesiku aho leipaw miding hae sung takua lu takua hanlan laeze a ngaesikuhpaw misei lu kheit hanlan vaawlang khua kya lungtuanaw a umhua. Phuapia Azopaw Tousenaw
8“Tuhkhyhze, nopinung lu kheit nynh ngunphua pia haw hoi zah, pia kheit kha a zosah lanze maeekhua awkute inn kha phibia zah a muih mawlaezung pekite ccung khyh tou?9He a muih te, a ban hae te innpaw hae kha ko hae zah, ‘Lung oun tuakhae oh, pawccecize ka zosahpaw phuapia kha phe ka muih vae,’ cite a hopya hae.10Tuhawte, kae hopya oh, a ngaesikuhpaw misei lu kheit hanlan Pachia kya-e vaaw hae tuh mih lungtua,” a cipya hae. Ccapaw Zopaw Tousenaw
11Jesu nynh, “Ccungccapaw lu kheit nynh ccapaw lu ning a hoi.12Asoipaw nynh a paaw kha tho zah, ‘Apang, ka ccou lanpaw rho kha yn pya ccavae,’ a cipya. Tukeiccuze mih paaw nynh a hoipaw uccaw tuh minmin kha a nee hae.13Aro mawze asoipaw nynh a uccaw balyn kha lawkuh zah asawnaw ram lang a cceih, tuin ram kyakhe a rythyte um zah a uccaw tuh pasupalah pong a mang.14A hoipaw balyn marya a mang kou tuh, tuin ram kya myarya ccakanccih zah aning tuh myarya a ryachi vae.15Tukeiccuze tuin ram e ccungccapaw lu kheit kalan a ryalawpya lan cceih zah, tuh-e paw nynh a voh rin lan a loo lang a cciasah.16Aning tuh voh hae nynh a ae hae paw bia kaleih kha heize phe byn lan a ae ry vae, thuasalama hum nynh san looh pya vae khyh.17Amaw te amaw yn nyhkuh zah, ‘Ka paaw kya vaeluakuh hae paw patae tuh sanlou aetae lei a hoi hae, thuasalama kae tuh hein kya vuelawte ka chih vae cih!18Ka thokuh cih zah ka paaw kalan ka cceih cih zah, “Apang, Pachia malang te na malang phe ka sei vae.19Kae tuh na ccapaw ci lan ka ngaekuh vae khyh, na kya vaeluakuhpaw lu kheit hawte yn nungbua,” ka cipah cih,’ cite a tuaku.20Tukeiccuze thokuh zah a paaw kalan a cceih. Thuasalama laan sawpi yn thua lyakhe a paaw nynh muih zah ngaethya myarya a umsah; te ccuenua zah pom zah a myng.21A ccapaw nynh, ‘Apang, Pachia malang te na malang phe ka sei vae, na ccapaw ci lan ka ngaekuh vae khyh,’ a cipya.22Thuasalama a paaw nynh a see hae kha, ‘Ahoy huaccepaw boeining kha arangte oun lah oh lah lawsakuh oh, a kuih kya kuihpu pusah oh lah, a ccu kya phanah nawsah oh.23Vaetua taraw athopaw kha hynhlang oun cciakhae oh lah theih oh; lungtuanaw poi tua oh sih lah, ae oh sih.24Pawccecize e ka ccapaw tuh chih zah atu bua a hiinthui vae; aning tuh zo zah atu muihthui athua vae,’ a cipya hae. Te lungtuanaw poi tuh a tua hae.
25“A ccapaw atawccapaw tuh loo kya a la um; yn cceih zah inn pe he a thua tuh tyngdaw te lawpaw roi kha a thae.26See lu kheit kha ko zah tuh-e tuh pawmou cite a khia.27Aning nynh, ‘Na neitawpaw kha phe yn thua vae, ngedante bua a muihthui keiccuze na paaw nynh athopaw vaetua taraw a chiapya,’ cite a hopya.28Atawccapaw tuh a thinria zah inn lungkhu lang tee vae khyh, tukeiccuze a paaw nynh yn toinuakuh zah a soihbia.29Aning nynh a paaw kha, ‘Ngaetua, kum hynhsepi cia see hawte rya kae lawpah zah, na kaw kae ei boi khyh, tuhzemah ka ban hae ryte lungtuanaw poi kae tuaku nawlan miaa taraw sa kheit san nae pya boi khyh.30Thuasalama ohhuanung hae ryte na hoipaw uccaw marya a mangpaw e na ccapaw tuh he yn thua mawte, athopaw vaetua taraw kha na chiapya,’ cite a hopya.31A paaw nynh, ‘Ka ccapaw, nang tuh ka kya tyty na um zah, ka hoipaw balyn tuh na kya-e nynh thua.32Na neitawpaw tuh chih zah atu a hiinthui vae, zo zah atu ah muihthui vae oh; tukeiccuze aening tuh ah lungtua zah lungtuanaw poi tua lanpaw nynh thua,’ a cipya,” cite a ho. Ahynhupaw Synriatu Tousenaw
1Jesu nynh a zuitu hae kyakhe, “Mihoipaw lu kheit nynh synriatu lu kheit a hoi, tuh-e paw nynh a bawipaw uccaw hae kha phya a mang kou cite a bawipaw kha a hopya hae.2A bawipaw nynh tuh-e paw tuh ko zah, ‘Na konglang ka thaepaw tuh pawtemou athua? Synriatu rya na lawnawpaw ccazing kha yn pya, pawccecize synriatu na thua kho vae lan khyh,’ a cipya.3Synriatu nynh a lungkaw te, ‘Pawmou ka cyih vae cih? Ka bawipaw nynh ka ryalaw kyate phe yn phua vae, laephi thae lanze ka thae kho khyh, ngiaku lanze ka maethah.4Ka ryalaw athang vae ze, ming hae nynh mih inn lang oun thuasah nawlan hae, pawte cyi lan cipaw ka nyku vae,’ a ciku.5A bawipaw laebah um hae paw miakaw kha ko hae zah, masaty lukheitpaw kha, ‘Ka bawipaw kya hohzeihmou laebah na um?’ cite a khia.6Aning nynh, ‘Chitui bath za kheit,’ a cipya. Aning nynh, ‘Na ccazing kha lawkuh lah arangte haung lah sung pangaw cite zeikuh,’ a cipya.7Mingccangpaw kha, ‘Nang so hohzeihmou laebah na um?’ cite a khia. Tuh-e paw nynh, ‘Chanvuih kor za kheit,’ a cipya. Synriatu nynh, ‘Na ccazing kha lawkuh lah sung tarya cite zeikuh,’ a cipya.8A hynhupaw synriatu nynh hawrarih lante a cyi keiccuze a bawipaw nynh the a hoysah. Pawccecize e laephi ccungccaw hae tuh mimaw she e ccungccaw hae te ccuepekunaw kya awnaw ccungccaw hae laeze a hawhua hae.9Nanning kae hopya oh, atyn leipaw laephi sisua khate ruiban hae kha raekuh oh; tuhteze nynh tuh-e sisua he athang te, tuh-e ruiban hae nynh nanning kha zungzae tynpaw inn kya ae cciadue cih oh.
10“Adihpaw uccaw kya a lungzipaw tuh alepaw uccaw kya mah a lungzi; adihpaw uccaw kya a hynpaw tuh alepaw kya mah a hynpaw nynh thua.11Tukeiccuze atyn leipaw sisua kya nae lungzi khyh ze, ahmepaw hoirumnaw kha hum nynh mou ae pya cih oh?12Ming hae uccaw kya nae lungzi khyh ze, naemaw na ccou lan oh paw uccaw thy tuh hum nynh mou ae pya ry cih oh?13See lu kheit nynh bawi lu ning ryalawpah kho khyh; pawccecize bawi lu kheit kha a hua cih zah lu kheit kha a sungsah cih, tuhkhyhze lu kheit kalan a pan cih zah lu kheit kha pawlangria lan khyh. Nanning nynh Pachia te phuasui kha parouh na ryaa kho khyh oh,” a cipya hae.
14Phua a ry hae paw Farasi hae nynh tuh-e bya balyn tuh thae hae zah Jesu kha a nuinse hae.15Jesu nynh minmin kha, “Nanning tuh ccungccaw hae malang naemaw te naemaw na dingsakuh oh paw nynh na thua oh; thuasalama Pachia nynh nae thinlung kha a ny; pawccecize ccungccaw nynh myarya aphute lante tuapaw uccaw tuh Pachia muihnaw kya anungsikuhpaw nynh thua.
16“Kawbya te profeh hae ccauh tuh baptisma pyatu Johan kyacia hanlan nynh thua. Johan ccyh kyate vae tuh Pachia peenaw thehoypaw kha ho thua vae zah ccungccaw miakaw nynh tuh-e peenaw lungkhu lang thawte a tee vae hae.17Kawbya kya-e ccapyh loihpaw ccaw ccangkheit azo laeze vaaw te lae zo nynh azoihua.
18“Humhung zemah a zu kha mah zah ccangpaw nopi kha zu lang a hoipaw tuh milae zu a seikhaepaw nynh thua; a vawpaw nynh a myapaw nopi kha zu lang a hoipaw tuh milae zu a seikhaepaw nynh thua. Lazaruh te Mihoipaw
19“Sephaphuhpaw boeining te nebaleihpaw boeining kha lawkuh zah myarya hoysahte nin takyh leih umpaw mihoipaw lu kheit a um.20Lazaruh a ci hae paw ryachipaw lu kheit a um, aning tuh a pyn balyn vaemaw te phe beih zah mihoipaw thuakaw zung khe phang a huekuh.21Mihoipaw ccaboi kyate accahpaw loohmoi kha ae lan a ry; ui hae nynh oun cceih hae zah a vaemaw hae kha leih a lyapya hae.22Tuh-e ryachipaw tuh chih zah vaaw hae nynh Abraham byvaw kalan a cciakhae hae. Mihoipaw mah chih zah a uu hae.23Mihoipaw tuh Hell lungkhu kya myarya ccih lan teing zah, a dothung tuh asawnaw e Abraham te a pe umpaw Lazaruh kha a muih hae.24Tetuh aning nynh sia zah, ‘Apang Abraham, thaw beih yn ccih lah Lazaruh kha beih yn sawpah, a kuihdung kha tui kya yn dungsah lah ka lae hynh yn kyaasah sah, pawccecize kae tuh hynh-e maeephu kya myarya ccih lan ka teing,’ a cipya.25Thuasalama Abraham nynh, ‘Ka ccapaw, na hiin lyaze uccaw hoypaw hae kha na mue zah, Lazaruh tuh uccaw thahpaw hae kha a mue cipaw liathuitua; thuasalama atu aning tuh hein kya ngaengansah athua vae, nang tuh myarya ccih lan na teing vae.26Tuhpiaze kaening te nanning laku kya myarya khupaw hunghuapi kha rae athua vae. Tukeiccuze hein kyate nae kalan a cceih ry hae paw nynh cceih kho khyh hae, khahlang te kaening kalan a cceih ry hae paw mah cceih kho khyh hae,’ a cipya.27Mihoipaw nynh, ‘Tuhteze, apang, Lazaruh kha ka paaw inn lang nae la sawpya nawlan kae ngia.28Pawccecize kae tuh uno lu pangaw ka hoi, minmin nynh hynh-e teingnaw hmin kalan oun thuabua khyh nawlan hae, aning nynh minmin kha raeringnaw la pya hae sah,’ a cipya.29Abraham nynh, ‘Minmin tuh Moses te profeh hae mang a hoi hae, minmin bya kha la ngae hae sah,’ a cipya.30Thuasalama aning nynh, ‘Apang Abraham, tuhte thua khyh; chinaw kyate lu kheit nynh thoothui zah mih kalan a ccia ze, minmin tuh a ngaesikuh cih hae,’ a cipya.31Abraham nynh, ‘Minmin nynh Moses te profeh hae bya kha a ngae khyh hae ze lukhakheit nynh a chih hae paw kyate a tho zemah zyn lae vae lan khyh hae,’ a cipya,” cite a hopya hae. Seinaw (Mat 18.6-7, 21-22; Mar 9.42)
1Jesu nynh zuitu hae kha, “Seinaw lungkhu lang a ccawsahpaw uccaw hae tuh palei a um cih, thuasalama tuh-e uccaw hae a umsahtupaw hanlan ngaethya lan kou um!2E imua taraw hae lukhakheit kha seinaw a raesah lae tuh a nging kyakhe mianawpaw lung kha sae lan zah rili lungkhu lang ccaring vua lanze amaw hanlan ahoyhua.3La raeringkuh oh! Na uno nynh a sei ze la thuihei, a ngaesiku ze la ngaethya.4Nin kheit lungkhu na tungvaw vae sari sei zah nin kheit lungkhu vae sari na kalan yn ki zah, ‘Ka ngaesikuh,’ ae cipya ze, na la ngaethya cih,” a cipya hae. Zynnaw
5Locceihtu hae nynh Bawipaw kha, “Kae zynnaw hynh oun lesahthungpya tua,” a ci hae.6Bawipaw nynh, “Nanning nynh mungngia cii cia zynnaw na hoi oh ze hynh-e thaeku ku hynh, ‘Na tharui kyate phohkuh lah rili lungkhu lang la bingkuh,’ na cipya oh ze, tuh-e nynh nae kaw phe ae ngae cih oh. See Ryalaw
7“Nanning lakuze lukhakheit nynh see lu kheit hoi zah tuh-e see nynh lei a thue ze thuasah, tuhkhyhze tuu a rin ze thuasah, inn lang yn thua te, ‘Rang kangmaw lah, ae lan haung,’ cite hum nynh mou na ci cih oh?8Tuh-e see kha, ‘Ka hanlan zerya yn hyngpah, anghyngnawpaw boeining kha lawkuh lah, ka ae ka nia lya yn ngawbia; tukoute nang tuh na ae na neih cih,’ cite na cipah lan khyh oh tou?9Kaw na pya thyhte tuh-e see nynh a cyi keiccuze lungtuabya na hopah cih zawtou?10Tuhawte nanning mah ryalaw ae naw oh paw balyn kha he na cyi vae oh ze, ‘Aening tuh angae-aduakuh leipaw see hae nynh ah thua oh, ah cyi lan oh paw rya kyalya nynh ah cyi oh!’ na ci cih oh,” cite a hopya hae. Lu Haw Dansahnaw
11Jesu tuh Jerusalem lang a ccia lyakhe Samaria te Galilee laku kyate po a cceih.12Khua khuakheit lungkhu lang a tee tuh, vaethya ccinaw a kae hae paw lu haw nynh amaw kha a cciadue hae. Asawnaw khe thadyn hae zah,13“Bawipaw Jesu, kaening hynh ngaethya oun umsah!” cite a sia hae.14Jesu nynh he a muih hae tuh minmin kha, “La cceih oh lah ranpibawi hae kha la dosakuh oh,” a cipya hae. Minmin nynh a ccia lya hae khe mih ccinaw tuh phe athyaa.15Minmin lakuze lukheitpaw nynh a dannaw kha he a muihkuh tuh, ki zah roi accae lante Pachia kha the a hoysah.16Jesu cculeihpaw khe bakhung zah lungtuabya a ho; tuh-e paw tuh Samariapaw nynh thua.17Jesu nynh, “Vaethya ccinaw a thyaa hae paw kha lu haw thua khyh tou? Lu takua hae so teimou a um hae?18E minphuin ccangpaw holeite Pachia thehoysah lan yn kipaw lu kheit san um khyh tou?” a ci.19Jesu nynh tuh-e paw tuh, “Thokuh, la cceih ccavae, na zynnaw nynh ae dansah vae,” a cipya. Hohtuhmou Peenaw Yn Thua Cih?
20Farasi hae nynh Pachia peenaw tuh hohtuhmou yn thua cih cite Jesu kha a khia hae. Jesu nynh, “Pachia peenaw tuh muihpaw uccaw te yn thua khyh.21‘Dotua, hein kya nynh a um!’ Tuhkhyhze, ‘Khuin kya nynh a um!’ cite mah oun ci lan khyh hae; pawccecize Pachia peenaw tuh nae lungkhu nynh a um,” a ci.
22Jesu nynh zuitu hae kha, “Ccungccaw Ccapaw nin ninkheit kha muih na ry oh ccyh yn thua cih zah, na muih lan khyh oh.23‘Hein kya nynh a um!’ Tuhkhyhze, ‘Khuin kya nynh a um!’ ae cipah cih oh; thuasalama la cceih nan oh, mih nulang la zuikuh nan oh.24Pawccecize vaawlui san kheit kyate khozaw laekuh zah ccangpaw san kheit kalan a aw hawte Ccungccaw Ccapaw mah amaw nin kya tuhawte yn thua cih.25Thuasalama aning tuh patae yn teing ty cih zah, e ciihan hae nynh oun vua cih hae.26Noah ccyh lya a la cyiku hawte Ccungccaw Ccapaw ccyh kya mah yn cyihkuh cih.27Noah nynh sanphalung lungkhu lang a tee nin cia, ccungccaw hae tuh aete, niate, zudykute, zudypyakute a um hae, te tuipayn yn ynkuh zah mih balynte marya a ro hae.28Tuhawte nynh Lot she lya mah a la cyiku; ccungccaw hae tuh aete, niate, uccaw reku zuakute, thingku ccoukute, inn sakkute a um hae.29Thuasalama Lot nynh Sodom khua kyate a pou nin khe vaawlang te maee te kemaee khuaa yn rah zah mih balynte marya a ro hae.30Ccungccaw Ccapaw yn langku nin mah tuhawte yn cyihkuh cih.31Tuh-e nin kya, inn tungvaw umpaw ccungccaw nynh inn lungkhu umpaw a uccaw hae lawku khylan rungbung nan vae sah; tuhawte loo kya umpaw nynh mah inn lang ki nan vae sah.32Lot a zu kha liathui oh.33Humhung zemah a hiinnaw khumku lan a zuakuhpaw tuh a hiinnaw a shung cih, a hiinnaw a shungpaw tuh a hiinnaw a khyn cih.34Nanning kae hopya oh, tuh-e khuazi kya ikhung ccangkheit kya ccungccaw lu ning um hae paw kha lu kheit tuh law athua cih zah lu kheit kha cciataw athua cih.35Sungsuhkheih hae paw nopi hae lu ning kha lu kheit tuh law athua cih zah lu kheit tuh cciataw athua cih.36Loo kya a um hae paw lu ning kha lu kheit tuh law thua cih zah lu kheit tuh cciataw athua cih,” cite a hopya hae.37Zuitu hae nynh, “Teilangmou law athua cih hae, Bawipaw?” cite a khia hae. Jesu nynh, “Achihpaw rhua a umnaw kya lantaw hae mah a pumkuh bua cih hae,” a cipya hae. Nomaenung te Byapiatu Tousenaw
1Jesu nynh lungthang leite zungzae sawsang lan accan cipaw kong kha tousenaw phungpaw te minmin kha hynhte a hopya hae.2“Khua khuakheit kya Pachia raw a rih leipaw te ccungccaw mae a do leipaw byapiatu lu kheit a um.3Tuin khua kya nomaenung lu kheit a um, aning nynh byapiatupaw kalan atu te atu cceih zah, ‘Kae yn rhawtupaw te kae hoipaw byathan kha hmerarih lan yn piapah,’ a cipya.4Aning nynh khaw cia cyipya leite a um; thuasalama nyalang tuh byapiatu nynh, ‘Pachia raw mah ka rih khyh zah ccungccaw mae mah a do leipaw ka thua zemah,5e nomaenung nynh kaccohkale yn nung keiccuze a hanlan ahmete ka cyipah cih, tuhkhyhze tuh palei yn thua cih zah yn bangsah cih,’ cite a lungkaw te a tuaku,” a ci.6Bawipaw nynh, “Ahme leipaw byapiatu nynh a hopaw kha thaetua oh.7Pachia nynh amaw kalan khuazi khuadae a sia hae paw, amaw nynh a po hae paw kha ahmete cyipya leite a um cih hae zawtou? Minmin bawm lanpaw kha a thysung cih zawtou?8Nanning kae hopya oh, minmin kha arangte hmerarih lan a cyipah cih hae. Thuasalama Ccungccaw Ccapaw he yn thua te, laephi vawlan zynnaw kha a muih vema?” a ci. Farasipaw te Ngunto Khoipaw Tousenaw
9Mimaw kha miding lang riakuh hae zah mingccang hae a dothatheih hae paw kyakhe Jesu nynh e tousenaw phungpaw hynh a ho:10“Ccungccaw lu ning tuh sawsang lan beikinn lang a cceihthung hae; lu kheit tuh Farasipaw thua zah lu kheit tuh ngunto khoitu nynh thua.11Farasipaw nynh thadyn zah a makhaete hynhte saw a sang: ‘Pou Pachia, kae tuh milae hawte ming hae uccaw a ruhpaw, atazae leipaw, milae zu a seikhaepaw ka thua khyh zah, e ngunto khoipaw hawte mah ka thua khyh keiccuze kae luung.12Lonaw naw kheit ze vae ning looh-ae ka sung, ka muepaw abalyn kya-e pumhaw pumkheit kha ka pya,’ a ci.13Ngunto khoitupaw tuh asawnaw langkhe thadyn zah vaawlang dothung ngan leite a by kha tukuh zah, ‘Pou Pachia, miseipaw kae hynh ngaethya yn umsah!’ a ci.14Nanning kae hopya oh, tuh-e paw tuh Farasipaw laeze thyaaccoute a inn lang a ki; pawccecize amaw te amaw a hangthungkuhpaw balyn tuh sawbung athua cih; thuasalama amaw te amaw zakaw a sangsakuhpaw tuh hangthung athua cih,” a ci. Jesu te Imua hae (Mat 19.13-15; Mar 10.13-16)
15Ccungccaw hae nynh nosi hae kha Jesu kalan haesah khylan oun cciakhae hae; tuh-e tuh zuitu hae nynh he a muih hae tuh minmin kha a pe hae.16Thuasalama Jesu nynh minmin kha ko hae zah, “Imua taraw hae kha ka kalan oun cceih hae sah, kang nan oh; pawccecize Pachia peenaw tuh khahcihawpaw ccungccaw hae kya-e nynh thua.17Byaccaccing kae hopya oh, humhung zemah Pachia peenaw kha imua taraw hawte a lawkuh leipaw tuh tuh-e peenaw lungkhu lang tee lan khyh,” a ci. Mihoipaw Lu Kheit (Mat 19.16-30; Mar 10.17-31)
18Uktupaw lu kheit nynh Jesu kha, “Sazae hoypaw, zungzae hiinnaw ka ccou nawlan pawmou ka cyih cih?” cite a khia.19Jesu nynh, “Pawccemou kae hynh ahoypaw cite nae ko? Pachia lu kheit laelan ahoypaw hum sanmah um khyh.20‘Milae zu milae vawpaw kya na sei lan khyh; ccungccaw na theih lan khyh; na ruh lan khyh; ahme leipaw ccaekia lang na tang lan khyh; na nung te na paaw kha sawtua hae,’ acikuhpaw kawbya hae kha na nyh khaw!” a cipya.21Aning nynh, “Tuh-e hae balyn tuh ka di lya mawte pong ka zui vae,” a ci.22Jesu nynh tuh-e bya he a thae te, tuh-e paw tuh, “Ccangkheit na bou ung, na hoipaw balyn kha zua lah ryachi hae kha la nee hae, tetuh vaawlang khua kya sisua na hoi cih; tukoute yn cceih lah yn zui,” a cipya.23Aning nynh tuh-e bya he a thae tuh myarya a ngaethah, pawccecize aning tuh myarya a hoipaw nynh thua.24A ngaethyapaw kha Jesu nynh he a muih tuh, “Mihoi hae nynh Pachia peenaw lungkhu lang tee lanpaw tuh pawcihmou aru!25Mihoipaw nynh Pachia peenaw kalan tee lae tuh kalauh nynh phynbang khu kya tee nynh azoihua,” a ci.
26Tuh-e bya a thaepaw ccungccaw hae nynh, “Tuhteze hummou khumnaw a mue kho cih?” a ci hae.27Jesu nynh, “Ccungccaw hanlan athua kho leipaw kha Pachia hanlan tuh athua kho,” a ci.
28Peter nynh, “Dotua, kaening tuh pawpaw balyn marya kae cciataw zah namaw kha kae zui vae,” a ci.29Jesu nynh, “Byaccaccing kae hopya oh, Pachia peenaw keiccuze inn thuasah, zu thuasah, uno thuasah, nungpaaw thuasah, ccaaw hae thuasah a cciatawpaw tuh,30atu she kya aleit patae mue leite um lan khyh, yn thua cih paw she kya zungzae hiinnaw mue leite um lan khyh,” a cipya hae. A Chi lanpaw Bua A Ho (Mat 20.17-19; Mar 10.32-34)
31Jesu nynh zuitu hae lu haw lae ning kha ccanglang cciakhae hae zah, “Dotua oh, aening tuh Jerusalem lang nynh ah cciathung oh, Ccungccaw Ccapaw konglang profeh hae nynh a zei hae paw balyn tuh marya yn ccing cih.32Aning tuh Zenta hae kuih kalan pya yn thua cih zah saryanaw, dothatheihnaw te tuing te thoinaw kha a teing cih.33A bua cih hae zah a theih cih hae, te nin thumnaw kya bua yn thoothui cih,” a cipya hae.34Minmin nynh tuh-e bya tuh thaethya khyh hae, a hopaw kha minmin kyate thuruh thua zah, asuilan nyh khyh hae. Mitmohpaw A Dansah (Mat 20.29-34; Mar 10.46-52)
35Jesu tuh Jeriko khua te anaekunaw lang a thua lyakhe, mitmohpaw lu kheit tuh laanpi pe haung zah a ngiakuh hae.36Ccungccaw zapi nynh a ccia hae paw siho kha thae zah, “Tuh-e tuh pawmou?” cite a khia hae.37Minmin nynh, “Nazareth paw Jesu nynh yn cceih,” cite a hopya hae.38Tetuh aning nynh, “David Ccapaw Jesu, kae hynh ngaethya yn umsah!” cite a sia.39Malang a cceih hae paw nynh zya a dae ccaw cite tuh-e paw tuh a sianua hae, thuasalama aning nynh, “David Ccapaw, kae hynh ngaethya yn umsah!” cite houh a sia.40Jesu nynh thadyn zah tuh-e paw tuh amaw kalan cciakhae lan kaw a pya hae, tuh-e paw tuh a pe lang he a thua te Jesu nynh,41“Na hanlan pawmou nae cyisah ry?” cite a khia. Aning nynh, “Bawipaw, ngaw bua yn muih sah,” a cipya.42Jesu nynh, “Ngawmuih ccavae, na zynnaw nynh ae dansah vae,” a cipya.43Vaekheihmawte ngawmuihthui zah Pachia kha thehoysah biate Jesu kha a zui; ccungccaw hae balyn nynh tuh-e tuh muih hae zah Pachia kha the a hoysah hae. Jesu te Zakia
1Jesu tuh Jeriko khua lang tee zah khua lungkhu te po a cceih.2Tuin kya Zakia a ci hae paw ccungccapaw lu kheit a um; aning tuh ngunto khoitu hae kyaze lupi thua zah myarya a hoi.3Zakia nynh Jesu tuh hummou thua cite muih a ry; thuasalama ccungccaw lung zah aning tuh a ne keiccuze muih kho khyh.4Tukeiccuze malang ccue khaw zah tuhlang yn cceih cih paw Jesu kha muih khylan thaeku ku kya a kae.5Jesu nynh tuin kya he a thua te, dothung zah, “Zakia, arangte yn rung, atunin na inn ka thua cih,” a cipya.6Zakia tuh arangte yn rungbung zah Jesu kha lungtuate a thuasah.7Tuh-e a muih hae paw ccungccaw hae balyn nynh ccohkuh hae zah, “Miseipaw inn lang thua lan nynh a ccia,” a ci hae.8Zakia nynh thadyn zah Bawipaw kha, “Bawipaw, dotua, ka uccaw hae angankuh kha ryachi hae ka pya hae; te lukhakheit kha ka ling zah hankhakheit ka lawkupaw a um ze, leit pali ka pyaru cih,” a cipya.9Tetuh Jesu nynh, “E paw mah Abraham ccapaw athua keiccuze atunin hynh-e inn kya khumnaw a thua vae.10Pawccecize Ccungccaw Ccapaw tuh azopaw ccung khylan te khum khylan nynh yn thua,” a ci. Mina Phua Kia Haw Tousenaw (Mat 25.14-30)
11Ccungccaw hae nynh tuh-e bya a ngae lya hae khe, Jesu nynh tousenaw phungpaw ccangkheit a hopya chih hae. Pawccecize Jesu tuh Jerusalem lang vyavya a thua vae keiccuze Pachia peenaw tuh palou yn thua vae cih cite a tua hae.12Tukeiccuze a hopaw tuh: “Bawi lu kheit tuh asawnaw ram lang ccia lan zah, tuin ram kya siapharan lang tang koute bua ki lan cite a paccynku.13A ccia mawkhe, a see hae lu haw kha ko hae zah mina phua kia haw pya hae zah, ‘E hynhte bua kae thua cia kung la kunah oh,’ a cipya hae.14Thuasalama a ram kya-e ccungccaw hae nynh amaw kha a hua hae keiccuze a nulang te ccungccaw saw hae zah, ‘E paw nynh ukku lan kae ry khyh,’ cite a hosahpya hae.15Tuh-e bawi tuh siapharan lang a tang koute he yn ki tuh, phua a pyasya hae paw see hae nynh kungkunaw kyate hohzeihmou a mue hae cipaw ny khylan a kalan a kosah hae.16Masatypaw nynh yn thua zah, ‘Bawipaw, nae pyapaw mina phua kia kheit te mina phua kia haw amia ka mue,’ a cipya.17A bawipaw nynh, ‘Ahoy, see hoypaw! Nang tuh myarya dihpaw uccaw kya na lungzi keiccuze khuapi khua haw kha na uk cih,’ a cipya.18Lu ningnawpaw nynh yn thua zah, ‘Bawipaw, nae pyapaw mina phua kia kheit te mina phua kia pangaw amia ka mue,’ a cipya.19A bawipaw nynh, ‘Nang tuh khuapi khua pangaw na uk cih,’ a cipya.20Ccangpaw lukheitpaw yn thua zah, ‘Bawipaw, hein kya na mina phua tuh a um. Pavua te ka tung zah ka ccy.21Pawccecize nang tuh myarya a reipaw na thua zah kae rih; na ccyku leipaw kha na lawkuh zah na ccouku leipaw kha na ruekuhpaw nynh na thua,’ a cipya.22A bawipaw nynh, ‘See thyapaw, namaw bya thyhte bya kae pia cih! Kae tuh ka ccyku leipaw kha ka lawkuh zah ka ccouku leipaw kha ka ruekuhpaw myarya ka reipaw cipaw mang na nyh pite,23pawccemou ka phua tuh ban kya na nung khyh? He kae ki te, ka phua tuh ato ryte ka mue cih paw!’ a cipya.24A pe a thadyn hae paw kyakhe, ‘A mina phua kha lah oh lah kia haw a hoitupaw kha pya oh,’ a cipya hae.25Minmin nynh, ‘Bawipaw, aning tuh mina phua kia haw a hoi khaw tou!’ a ci hae.26Mih bawipaw nynh, ‘Kae hopya oh, a hoipaw ccungccaw miakaw kha pyachih athua cih zah a hoi leipaw kya-e a hoi thypaw kha heize lawpya athua cih.27Mih siapharan lang yn ry lei hae paw ka rhaw hae kha hynhlang oun cciakhae oh lah, ka malang maw hin theih oh,’ a cipya hae,” a ci. Jerusalem lang Jesu A Tee (Mat 21.1-11; Mar 11.1-11; Joh 12.12-19)
28Jesu nynh tuh-e bya a ho koute Jerusalem lang ccia lan mih malang te a cceih.
29Oliv Mua a ci hae paw mua pe umpaw Bethfake te Bethani khua pe a thua tuh, a zuitu hae lu ning kha saw hae zah,30“Nae malang umpaw khua kalan la cceih oh lah tuh-e khua lungkhu lang he na tee oh te, hum nynh sanmah a cciku boi leipaw lann taraw a khii hae paw kha na la muih cih oh, tuh-e tuh oun supah oh lah hynhlang oun sue oh.31Lukhakheit nynh, ‘Pawccemou na supya oh?’ cite ae khia oh ze, ‘Bawipaw nynh a peki,’ cite nae hopah cih oh,” a cipya hae.32A saw hae paw ccungccaw hae tuh cceih hae zah Jesu nynh a hopya hae hawte a muih hae.33Lann taraw kha he a supah hae tuh, a hoitu hae nynh, “Pawccemou lann taraw kha na supya oh?” a ci hae.34Minmin nynh, “Bawipaw nynh a peki,” a cipya hae.35Minmin nynh lann taraw kha Jesu kalan a sue hae, lann taraw tungvaw kya mih boei hae kha depah hae zah Jesu kha a ccisaku hae.36Lann tungvaw ccikuh zah he a cceih tuh ccungccaw zapi nynh mih boei hae kha laanpi kya a phaepya hae.37Oliv Mua kyate rungbungnaw kya he a thua tuh, a zui hae paw zapi balyn nynh a muih hae paw ngaeangnaw hae balyn hanlan lungtuate Pachia kha roi accae lante thehoysah hae zah,38“Bawipaw min te yn thuapawSiapharan tuh hythuaccou sah!Vaawlang khua kyadaenaw um sah lahahang huanaw vaawlang khua kyaphu-enaw um sah!” cite a sia hae.
39Ccungccaw zapi laku e Farasi hae abang nynh Jesu kha, “Sazae, na zuitu hae hynh zya daesah hae,” cite a hopya hae.40Jesu nynh tho zah, “Nanning kae hopya oh, e hae nynh zya a dae hae zemah lung hae nynh a sia cih hae,” cite a khung hae. Jerusalem elang Jesu A Rah
41Jesu tuh Jerusalem pe thua zah khuapi kha a muih tuh, khuapi hanlan a rah:42“Atunin kya daenaw elang pawmou abou cipaw na ny ze ahoy cih paw! Thuasalama atu tuh-e hae tuh na muih khyh nawlan thuruh athua.43Na rhaw hae nynh na pepan kya rhawhohung ae sak khaw cih hae zah teitei langte balyn varyng ae koih hae ccyh yn thua cih.44Namaw te na lungkhu e na ccaaw hae kha laephi kya ae noinae cih oh. Na kalan Pachia yn thua lanpaw ccyh kha na ny khyh keiccuze na kya lung ccangkheit vawlan ccangkheit akhangthykuh lei lan ciate ae cciataw cih hae,” a ci. Jesu nynh Beikinn A Ccikan (Mat 21.12-17; Mar 11.15-19; Joh 2.13-22)
45Beikinn lungkhu lang tee zah tuin kya uccaw a zuatu hae te a retu hae kha a dee hae;46aning nynh, “Ccathyaa kyaze,‘Ka inn tuh sawsangnawinn nynh thua,’ cite azeikuh;thuasalama nanning nynhmiruh hae karung langna rae vae oh,” a cipya hae.
47Jesu nynh nin takyhte beikinn kya a ccangpya hae. Thuasalama ranpibawi lepaw hae te kawbya sazae hae te ccungccaw hae cciakhaetu hae nynh amaw chiathyanaw laanpi kha a ccung hae.48Tuhzemah ccungccaw hae balyn nynh a bya kha myarya a ngae ry hae keiccuze chia khonaw ccyh muihkuh khyh hae. Jesu Kawhoinaw A Khia hae (Mat 21.23-27; Mar 11.27-33)
1Nin kheit tuh Jesu nynh beikinn kya ccungccaw hae kha ccangpah hae zah thehoypaw a ho lyakhe, ranpibawi lepaw hae te kawbya sazae hae tuh piccan hae ryte oun thua hae zah,2“Paw kawhoinaw te mou e uccaw hae hynh na cyi? Tuhkhyhze hum nynh mou hynh-e kawhoinaw hynh ae pya? Kaening oun hopya tua,” a ci hae.3Jesu nynh, “Kae mah bya kaw kheit kae khia cih oh zah nae hopah cih oh.4Johan kya-e baptisma kha vaawlang tetou yn thua? Tuhkhyhze ccungccaw hae kyate tou yn thua?” cite a khia hae.5Minmin nynh mimaw te mimaw hokuh hae zah, “Aening nynh, ‘Vaawlang kyate’ ah ci oh ze, aning nynh, ‘Tuhteze pawccemou Johan kha na zyn khyh oh?’ oun ci cih.6Thuasalama, ‘Ccungccaw hae kyate,’ ah ci oh ze, ccungccaw hae balyn nynh lung te oun deih cih hae, pawccecize minmin nynh Johan tuh profeh nynh thua cite a zyn hae,” a ciku hae.7Tukeiccuze minmin nynh, “Paw kyate cipaw kae nyh khyh,” cite a khung hae.8Jesu nynh, “Kae mah paw kawhoinaw te nynh e uccaw hae hynh ka cyi cipaw kae hopah lan khyh oh,” a cipya hae. Misu Khokhu Ryalahtu hae (Mat 21.33-46; Mar 12.1-12)
9Jesu nynh ccungccaw hae kha hynh-e tousenaw phungpaw hynh a hopya hae: “Ccungccaw lu kheit nynh misu khokhu kha rae zah a hohtu kalan hohsakuh hae zah asawnaw ram lang khaw cia rote khua a ccong.10Misu thae lo ccyh yn zaw tuh, a hohtu hae nynh amaw hanpaw khokhu kya-e misu thae kha yn pya ccaw hae cite a see lu kheit kha mih kalan a saw. Thuasalama minmin nynh tuh-e see tuh kyng hae zah a bua kou hae te, a kuih ccakaete a kisah hae.11Ccangpaw see kha bua a saw, te minmin nynh tuh-e paw tuh mah bua hae zah maethyate a kuih ccakaete bua a kisah hae.12Lu thumnaw kha bua a saw; minmin nynh tuh-e paw tuh mah vaemaw a muesah kou hae te dae a vua hae.13Khokhu hoitupaw nynh, ‘Pawtepei ka cyih cih? Ka sungsahpaw ka ccapaw hynhsa ka saw vae; minmin nynh amaw hynh tuh saw a tua mamin cih hae,’ a ci.14Thuasalama khokhu hohtu hae nynh amaw kha he a muih hae tuh, ‘E paw tuh rhoccoutu nynh thua; amaw kha theih oh sih lah a rho tuh ah uccaw lang a tang vae cih,’ cite mimaw te mimaw a hoku hae.15Tukeiccuze minmin nynh amaw kha khokhu atolang khe vua hae zah a chia hae. Tukeiccuze khokhu hoitupaw nynh minmin kha pawtemou a cyih cih hae?16Aning tuh yn cceih cih zah tuh-e khokhu hohtu hae kha a theih cih hae zah khokhu kha mingccang hae kalan a pya cih hae,” a ci. Ccungccaw hae nynh tuh-e bya tuh he a thae hae te, “Tuhte tuh thua nan sah!” a ci hae.17Jesu nynh minmin kha do hae zah,“‘Inn sak hae paw nynha nuee hae paw lung tuhinn saknaw kya abyapi huapawapaki lang e lung langyn tang,’cite azeikuhpaw Ccathyaa kha pawmou a ho ry?
18Humhung zemah tuh-e lung vawlan a ccahpaw tuh phe akingkuh cih; humhung zemah tuh-e lung nynh a ccawphupaw tuh palae tui cih,” a ci.19Kawbya sazae hae te ranpibawi lepaw hae nynh tuh-e tousenaw phungpaw kha kaening nynh oun honua cipaw a nyku hae keiccuze tuin ccyh kya mawkhe amaw kha kyng lan a ry hae; tuhzemah minmin nynh ccungccaw hae raw a rih hae. Ngunto Khoinaw Kong Byakhianaw (Mat 22.15-22; Mar 12.13-17)
20Tukeiccuze minmin nynh Jesu kha dokhaw hae zah a bya kha kyngpya khylan te ram uktu te kawhoitu kalan ap khylan, adingpaw hawte a umsakuh hae paw dophitu hae kha amaw kalan a sawnua hae.21Dophitu hae nynh Jesu kha, “Sazae, nang tuh hmerarih lan na ho zah na ccangpya hae cipaw kae ny, ccungccaw laesahnaw na hoi khyh, Pachia laanpi kha hmerarih lan na ccangpya hae cipaw kae ny.22Kaening nynh Sizar kalan ngunto pya lan accan tou? Ccan khyh tou?” cite a khia hae.23Jesu nynh mih thyaruhnaw kha phe nyh zah, minmin kyakhe,24“Denari kia kheit kha yn muihsah tua oh. Tuh-e kya hum muinsan te hum min mou a um?” a ci. Minmin nynh, “Sizar muinsan te min,” cite a khung hae.25Jesu nynh, “Sizar uccaw kha Sizar pya oh lah Pachia uccaw kha Pachia pya oh,” a cipya hae.26Minmin nynh a bya kha ccungccaw hae malang kyngpah kho khyh hae; a khungnaw hae paw bya kha mih ngaeangthua zah daebabi lan zya a um hae. Thoothuinaw Kong Byakhianaw (Mat 22.23-33; Mar 12.18-27)
27Thoothuinaw um khyh cite a ho hae paw Sadusi hae abang nynh Jesu kalan oun cceih hae zah,28“Sazae, ‘Ccungccapaw lu kheit nynh ccaawsaah leite a zu kha a chitaw ze, tuh-e paw a neitawpaw nynh tuh-e zu tuh a umkhae cih zah a upaw elang ccaaw a saahpah cih,’ cite Moses nynh kaening kha oun zeipya.29Vaekheit tuh uno lu sari a um hae. Atawccapaw nynh zu hoi zah ccaawsaah leite phe a chih.30Lu ningnaw nynh tuh-e nung tuh a zu lang umkhae zah ccaaw leite phe bua a chih.31Lu thumnaw nynh tuh-e nung kha bua a umkhae, tuhawte lu sari mawte tuh-e nung tuh zu lang umkhae hae zah, ccaawsaah leite marya a chih hae.32Nyathyakou tuh tuh-e nopinung mah a chihbua.33Tukeiccuze thoothuinaw kya tuh-e nung tuh hum zu lang mou a tang cih? Pawccecize lu sari mawte tuh-e nung tuh zu lang a umkhae hae,” cite a khia hae.
34Jesu nynh minmin kha, “Atu she e ccaaw hae tuh zuvaw tang hae zah zudypyakunaw a rae hae.35Thuasalama nyalang e she kha thuasah, chinaw kyate thoothuinaw kha thuasah ccou lan angaekuh cite tua athua hae paw nynh tuh zuvaw tang ci um vae khyh, zu dypyaku ci mah um vae khyh.36Minmin tuh vaaw hae te lokuh hae zah chih kho vae khyh hae, thoothuinaw ccaaw hae athua vae hae keiccuze Pachia ccaaw hae nynh athua vae hae.37A chih hae paw kha thoothuisah athua hae cipaw tuh Moses nynh Bawipaw kha, ‘Abraham Pachia, Isak Pachia te Jakob Pachia’ cite thabu kya a ko lyakhe phe a langsaku vae.38Pachia tuh a chih hae paw Pachia thua khyh, a hiin hae paw Pachia nynh thua, pawccecize ccungccaw balyn tuh amaw kya nynh a hiin hae,” a ci.39Kawbya sazae hae abang nynh, “Sazae, na hopaw kou ahoy,” a ci hae.40Tukoute tuh Jesu kha byakhia ngan vae khyh hae. David Ccapaw Kong Byakhianaw (Mat 22.41-46; Mar 12.35-37)
41Jesu nynh minmin kha, “Pawtemou kawbya sazae hae nynh, ‘Khri tuh David Ccapaw nynh thua,’ a ci kho hae?42Sa Ccauh kyaze David amaw ccaccei nynh,‘Bawipaw nynh ka Bawipaw kha,
43“Na rhaw hae kha na ccusy langkae raepya makhia tuh,ka ranglang khe haung,” a cipya,’ a ci.
44Tukeiccuze David nynh Messiah kha, ‘Bawipaw’ cite a ko lanze, pawtemou aning tuh a ccapaw athua kho cih?” cite a khia hae. Kawbya Sazae hae Seisahnaw (Mat 23.1-36; Mar 12.38-40)
45Ccungccaw hae balyn nynh a thaenaw hae khe, Jesu nynh a zuitu hae kha,46“Kawbya sazae hae kha la raeringkuh oh. Minmin tuh boeining ccuabalaepaw lawkute innlaepae ry hae zah kungkunaw kya sawtuate byabeihku a ry hae; sinakok kya tungkhung ahoy huaccepaw ry hae zah poi kya ahoy huanaw khe a um ry hae.47Minmin tuh nomae hae inn kha luade hae zah ccungccaw hae nynh oun muih hae sah cite hynhsepi saw a sang hae; minmin tuh accih huapaw detahnaw kha a mue cih hae,” cite a hopya hae. Nomaenung Lungsing (Mar 12.41-44)
1Jesu nynh ngawdo zah mihoi hae nynh sisua bawng lungkhu lang mih lungsing a sang hae paw kha a muih.2A ryachipaw nomaenung lu kheit nynh daw phuapia pia ning a sangpaw kha a muih.3Jesu nynh, “Byaccaccing kae hopya oh, minmin balyn laeze hynh-e a ryachipaw nomaenung nynh alunghua a sang.4Pawccecize minmin balyn tuh mih hoirumnaw patae kya-e kha a sang hae; thuasalama e nung tuh a ryachi pite a hiinnaw hanlan a hoipaw balyn kha marya a sang,” a ci. Beikinn A Ro lanpaw Hodaenaw (Mat 24.1-2; Mar 13.1-2)
5Ccungccaw abang nynh beikinn tuh apuithyapaw lung hae te thuasah, a hlu hae paw uccaw hae te thuasah ccaan athuapaw kong kha a ho hae; Jesu nynh,6“Atu na muih oh paw hynh-e uccaw hae hynh lung ccangkheit vawlan ccangkheit san a khangthykuhpaw um vae leite, marya tingsah bung ccyh yn thua cih,” a ci. Muihsahnaw te Vawsaw Pyanaw (Mat 24.3-14; Mar 13.3-13)
7Minmin nynh amaw kha, “Sazae, tuh-e tuh hohtuhmou yn cyihkuh cih? Tuh-e yn cyiku dyn kya paw muihsahnaw mou yn langkuh cih?” cite a khia hae.8Jesu nynh, “Nanning kha ae ling khyh nawlan oh la raeringkuh oh, pawccecize ccungccaw patae nynh ka min te oun thua cih hae zah, ‘Kae tuh amaw nynh ka thua! Accyh a anae vae!’ oun ci cih hae; minmin nulang la zuikuh nan oh.
9“Nanning nynh rhawtukkunaw kong te rhawtho lanpaw kong kha na thae vae oh ze la rih nan oh, pawccecize hynh-e uccaw hae tuh masaty yn thuaty cih, thuasalama athangnaw tuh palou thua loh lan khyh,” a ci.10Jesu nynh minmin kha, “Minphuin phuin kheit te phuin kheit, ram kheit te ram kheit oun rhawkuh cih hae;11myarya rupaw innry yn suekuh cih; ram takyh kya ccakan yn ccih cih zah shethya yn thua cih; vaawlang te ri lan umpaw syntawnaw te alepaw muihsahnaw yn langkuh cih.
12“Thuasalama tuh-e hae balyn acyiku maw, kae ka min keiccuze ccungccaw hae nynh ae kyng cih oh zah ae tuaa ae sah cih oh, sinakok hae te thonginn hae kalan ae ap cih oh, siapharan hae te uktu hae malang ae thuakhae cih oh.13Tuh-e tuh nae hanlan ccaekiakhan nawlan ccyhhoy athua cih.14Tukeiccuze pawtemou kae khung cih hae cipaw na tuaku ty khyh nawlan oh la raeringkuh oh;15pawccecize nanning ae rawse oh paw balyn nynh a ei kho lei hae paw te a khee kho lei hae paw hawnaw te hothyanaw kha kae pya cih oh.16Nanning kha nungpaaw hae te uno hae, vaeccaw hae te ruiban hae nynh ae phee cih oh, minmin nynh nanning abang kha ae theih cih oh.17Ka min keiccuze ccungccaw balyn nynh ae hua cih oh.18Thuasalama nae lu kya-e nae sangrua ccangkheit sanmah zo lan khyh.19Na ngaesangnaw oh liate nae hiinnaw kha na mue oh.
20“Rhawkaw hae nynh Jerusalem khuapi a koih hae paw kha he na muih oh te, tuh-e ronaw tuh anae vae cipaw la nyh ccavae oh.21Tetuh Judea ram kya a um hae paw nynh mua lang ccue hae sah, khuapi lungkhu a um hae paw nynh khuapi kha poutaw hae sah; ramkaw a um hae paw nynh khuapi lungkhu lang tee nan hae sah.22Pawccecize Ccathyaa kya azeikuhpaw balyn accing nawlan tuh-e nin tuh detahnaw nin nynh thua.23Tuin ccyh kya tuh ccaaw a poipaw nopi hae te matei zupaw nosi a hoipaw nopi hae hanlan ngaethya lan kou um! Pawccecize laephi vaw kya myarya ccihpaw riathaenaw yn um cih zah, e ccungccaw hae tungvaw Pachia bungpawnaw yn ccah cih.24Minmin tuh ahepaw thaloi te chia athua cih hae zah minphuin balyn kalan see lang cciakhae athua cih hae; Jerusalem tuh Zenta hae ccyh athang mawlaezung Zenta hae nynh a syde cih hae. Ccungccaw Ccapaw Rungthuinaw (Mat 24.29-31; Mar 13.24-27)
25“Khuanin kya, sawpaw kya te awsi hae kya muihsahnaw yn langkuh cih, laephi vawlan minphuin hae tuh rili tuileih tho zah a siarua keiccuze lungthang ngaemyng te oun um cih hae.26Laephi vawlan oun cyihkuh lanpaw kong kha tuate ccungccaw hae tuh mih bungzou cih zah oun khuliakuh cih hae; pawccecize vaawlang e thungnaw huhan hae tuh yn hy cih.27Minmin nynh Ccungccaw Ccapaw tuh alesaepaw phu-enaw te huhan ryte maeking kya yn rungpaw kha oun muih cih hae.28E uccaw hae he yn cyiku takaw vae ze thadyn oh lah dothung oh, pawccecize nanning shawkhawnaw tuh anae vae,” a cipya hae. Thaeku Ku Tousenaw (Mat 24.32-35; Mar 13.28-31)
29Jesu nynh minmin kha tousenaw phungpaw ccangkheit a hopya hae: “Thaeku ku te thingku hae balyn kha dotua oh.30Anaw yn toihpaw kha na muih vae oh ze hawnin ccyh anae vae cipaw na ny oh.31Tuhawte hynh-e uccaw hae yn cyikupaw kha nae muih vae oh ze, Pachia peenaw tuh anae vae cipaw kha la nyh ccavae oh.32Byaccaccing kae hopya oh, hynh-e uccaw hae balyn acyiku kou makhia atu she e ccungccaw hae tuh zo lan khyh hae.33Vaaw te lae tuh zo salamah ka bya tuh zo lan khyh. Raeringkute Ngaw Oh
34“La raeringkuh oh, tuhkhyhze tuh hoysahnaw, zu-aenaw te hynh-e hiinnaw elang thinphangnaw khate nae thinlung tuh a vawsaw cih, te tualeipite tuh-e nin nynh ae thuanua cih oh.35Pawccecize tuh-e nin tuh laephi pynpi kya ccungccaw balyn tungvaw khe kaang hawte yn thua cih.36Yn thua cih paw uccaw balyn kyate na lue kho nawlan oh te Ccungccaw Ccapaw malang na thadyn kho nawlan oh raeringkute tyty um oh lah sawsang oh,” a ci.
37Jesu nynh beikinn kya nin takyh a ccangpya hae, khuazi ccyh kya pou zah Oliv a ci hae paw mua kya a rya.38Awkhua takaw te ccungccaw hae balyn nynh a bya kha ngae khylan beikinn lang oun cceih hae. Jesu Chia lan Pheenaw (Mat 26.1-5, 14-16; Mar 14.1-2, 10-11; Joh 11.45-53)
1Kawtaw Poi a ci hae paw, Ransi phing leipaw Sanlou Poi tuh anae vae.2Ranpibawi lepaw hae te kawbya sazae hae nynh ccungccaw hae raw a ri hae keiccuze Jesu chiathyanaw laanpi kha a ccung hae.
3Satan nynh locceihtu lu haw lae ning kyaze lu kheit athua buapaw Judas Iskariot lungkhu langkhe a tee.4Tuh-e paw nynh ranpibawi lepaw hae te beikinn ngawtu hae kalan cceih zah mih kuih kalan Jesu pya lanpaw kong kha a hokhae hae.5Minmin tuh myarya mih lungtua zah phua pya lante mih nawccah.6Judas nynh mah a nawccah zah ccungccaw zapi a um khyh lya hae khe Jesu kha mih kalan ap khylan ccyhhoypaw kha a ccungku vae. Kawtaw Poi Zerya Paccynnaw (Mat 26.17-25; Mar 14.12-21; Joh 13.21-30)
7Ransi phing leipaw Sanlou Poi tua nin thua zah Kawtaw Poi elang tuutaw chia nin yn thua vae.8Jesu nynh Peter te Johan kha, “La cceih oh lah, aening ah ae lan oh paw Kawtaw Poi zerya kha la paccyn oh,” cite hopah hae zah a saw hae.9Minmin nynh amaw kha, “Pawkyamou la paccyn hae sah ci nae ry?” cite a khia hae.10Jesu nynh, “Ngaetua oh, khua lungkhu lang he na tee oh te, dawre te tui yn phupaw ccungccapaw lu kheit nynh ae la tungkuh cih oh, aning nynh a teenaw inn lungkhu lang la zuikuh bua oh lah,11inn hoitu kha, ‘Sazaepaw nynh nang kha, “Ka zuitu hae ryte Kawtaw Poi zerya kae mangnaw lanpaw mikhia khaan tuh teisangmou a um?” ae ci,’ cite la hopah oh.12Aning nynh a paccyn ty vae paw akopaw palung khaan kha ae la muihsah cih oh, tuin kyakhe aening hanlan la paccyn oh,” a cipya hae.13Tukeiccuze minmin nynh cceih hae zah Jesu nynh a hopya hae hawte a muih hae, te minmin nynh Kawtaw Poi zerya kha a paccyn hae. Bawipaw Zerya (Mat 26.26-30; Mar 14.22-26; 1Ko 11.23-25)
14Accyh azawte Jesu tuh locceihtu hae ryte ccaboi kya a haung hae.15Jesu nynh minmin kha, “Ka teing maw hin nanning ryte hynh-e Kawtaw Poi zerya hynh mangkheih lan myarya ka peki.16Pawccecize kae hopya oh, Pachia peenaw kya Kawtaw Poi eenaw accing makhia, e poi hynh ka ae boi vae lan khyh,” a cipya hae.17Banang kha lah zah lungtuabya a ho koute, “E banang hynh lawkuh oh lah neekuh oh.18Pawccecize kae hopya oh, Pachia peenaw yn thua mawlaezung misutui hynh ka neih boi vae lan khyh,” a ci.19Tukoute sanlou kha lah zah lungtuabya a ho koute eih zah minmin kha a pya hae; te, “E tuh nanning kae pya oh paw ka pyn nynh thua, kamaw liathui nawlan mang oh,” a ci.20Tuhawte zerya a ae kou hae te, banang kha mah lah zah, “E banang tuh nanning hanlan ka laepaw ka chiise kya ka tynsahpaw byakin thawpaw nynh thua.21Thuasalama dotua oh, kae yn pheetupaw kuih tuh ccaboi kya kamaw te kae umkheih.22Laerui-awde athua vae thyhawte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um!” a ci.23Zuitu hae nynh tuh-e uccaw tuh hum nynh mou yn cyih cih cipaw kha mimaw te mimaw laku a khiaku hae. Hummou Alehua?
24Zuitu hae laku kya hummou ale huapaw lang nung lan cipaw eikunaw a um.25Jesu nynh minmin kha, “Zenta siapharan hae nynh uknaw kaw te a uk hae, minmin a uktu hae paw kha hoynaw oun raepahtu cite a ko hae.26Thuasalama nanning tuh tuhte na cyih lan khyh oh; nanning laku ale huapaw tuh adih huapaw hawte athua cih; cciakhaetu athuapaw nynh ryalawpatu hawte athua cih.27Pawccecize aepaw a koihtupaw tou alehua? Tuhkhyhze a thohaepaw tou alehua? Aepaw a koihtupaw kha lehua khyh tou? Thuasalama kae tuh nanning laku kya a thohaepaw hawte nynh ka thua.
28“Nanning tuh tuhounaw ka tung lyaze ka kya po na umbua oh paw nynh na thua oh.29Ka Paaw nynh peenaw kha yn pya hawte, kae nynh mah nanning kha peenaw kae pya oh.30Ka peenaw lungkhu ka ccaboi kya na ae na neih cih oh zah, Israel phin haw lae ning kha byapiate bawitungkhung kya na haung cih oh,” a cipya hae. Peter nynh A Vua lanpaw A Hoty (Mat 26.31-35; Mar 14.27-31; Joh 13.36-38)
31Bawipaw nynh, “Simon, Simon, ngaetua! Chanvuih kha pasaryh te ryh hawte nanning kha Satan nynh ryh lan ae peki oh.32Thuasalama na zynnaw azo khyh nawlan saw kae sangpya; te ka kalan nae paleihku vae ze na uno hae kha thawzung na pya cih hae,” a cipya.33Peter nynh, “Bawipaw, nang ryte tuh thonginn lang thuasah, chinaw kalan thuasah ccia lan paccynkute ka um!” a cipya.34Bawipaw nynh, “Peter, nang kae hopya, nang nynh kae hynh ka nyh khyh cite vae thum nae vua maw, atunin aw khua lan khyh,” a cipya. Phuabu, Sohrae te Thaloi
35Jesu nynh zuitu hae kha, “Phuabu, sohrae, phanah phuku leite kae saw lya oh kha, hankhakheit na ho na bou oh paw um tou?” cite a khia hae. Minmin nynh, “Um khyh, ccangkheit san um khyh,” a ci hae.36Jesu nynh minmin kha, “Thuasalama atu tuh phuabu a hoipaw nynh phukuh sah lah sohrae a hoipaw mah vawkuh sah, te thaloi a hoi leipaw nynh a angkile kha zua sah lah thaloi kha rekuh sah.37Pawccecize, kae hopya oh, ‘Aning tuh misei hae ryte riakheih athua,’ cite azeikuhpaw tuh ka tungvaw yn ccing cih, pawccecize ka konglang a zei hae paw kha accing lalia vae,” a cipya hae.38Minmin nynh, “Bawipaw, dotua, hein kya thaloi zung ning a um,” a cipya hae. Jesu nynh minmin kha, “Azaw vae,” a cipya hae. Oliv Mua vawlan Jesu Sawsang (Mat 26.36-46; Mar 14.32-42)
39Jesu tuh yn pou zah leih a cyimae hawte, Oliv Mua lang cceih zah a zuitu hae nynh a zui hae.40Tuin kya he a thua te minmin kha, “Tuhounaw lungkhu lang na ccaw khyh nawlan oh sawsang oh,” a cipya hae.41Minmin kyate lung deih khin loukaw asawnaw langkhe cceih zah ccukharutungte saw a sangpaw tuh:42“Apang, na rynaw athua ze, hynh-e banang hynh ka kyate yn lawpah; thuasalama kae ka rynaw hawte thua leite, na rynaw hawte thua sah,” a ci.43Vaawlang te vaawpaw nynh a kalan yn langkuh zah thawzung a pya.44Myarya a lungriathae pawte thawmawte saw houh a sang; a vaesaw tuh laekhu lang accawpaw chiise hawte nynh athua.45Saw a sangnaw kyate thokuh zah a zuitu hae kalan he a thua tuh ngaethyate a ih hae paw kha a muih.46Minmin kha, “Pawccemou na i oh? Tuhounaw lungkhu lang na ccaw khyh nawlan oh, tho oh lah sawsang oh,” a cipya hae. Jesu Kyngnaw (Mat 26.47-56; Mar 14.43-50; Joh 18.3-11)
47Tuhte a ho cciamang lyakhe zuitu lu haw lae ning kyaze lu kheit athuapaw Judas nynh oun cciakhae hae paw ccungccaw zapi tuh oun thua vae hae, Judas nynh Jesu kha myng lan a naenuaku.48Thuasalama Jesu nynh, “Judas, Ccungccaw Ccapaw hynh nang nynh myngte tou na phee?” a cipya.49Jesu ryte a umkheih hae paw nynh yn cyihkuh lanpaw kha he a muih hae tuh, Jesu kha, “Bawipaw, thaloi te kae bae cih hae tou?” cite a khia hae.50Lukheitpaw nynh ranpibawi a seepaw kha a ranglang nakua thoh pae lan a bae.51Jesu nynh, “Azaw vae!” a ci. Jesu nynh tuh-e paw nakua kha hae zah a dansah.52Jesu nynh amaw oun ccianua hae paw ranpibawi lepaw hae, beikinn ngawtu hae te piccan hae kha, “Kae hynh miruh hawte thaloi te tungbang te nae ccianua oh tou?53Beikinn kya nanning ryte nin takyh ka um lyaze nae kuih nae hangnua khyh oh; thuasalama atu tuh nae ccyh te mohnaw huhan athung ccyh nynh thua,” a cipya hae. Peter nynh Jesu A Vua (Mat 26.57-58, 69-75; Mar 14.53-54, 66-72; Joh 18.12-18, 25-27)
54Minmin nynh Jesu kha kyng hae zah ranpibawi lupi inn lang a cciakhae hae. Peter nynh asawnaw te a zui.55Maepaw angaelung kya maeetua hae zah a haung lya hae khe Peter mah a haungbua.56Peter nynh maee pe a haungpaw kha ryalawpatu liaccanung nynh he a muih tuh riri do zah, “E paw mah Jesu ryte a mungkuh hae paw nynh thua,” a ci.57Peter nynh, “Nopinung, tuh-e paw tuh ka nyh khyh,” cite Jesu kha a vua.58Khuekheih aro koute mingccangpaw nynh Peter kha muih zah, “Nang mah minmin kya a um buapaw nynh na thua,” a cipya. Peter nynh, “Ccungccapaw, ka thua khyh!” a ci.59Suimilan ccangkheit loukaw aro koute mingccangpaw lu kheit nynh, “Thanccingte e paw mah Jesu ryte a mungkuh hae paw nynh thua, pawccecize aning tuh Galilee paw nynh thua,” cite tynkaring lan a ho.60Peter nynh, “Ccungccapaw, paw nynh na ho cipaw ka nyh khyh!” a ci. Tuhte a ho cciamang lyakhe aw ccahe yn khua.61Bawipaw nynh maeleihkuh zah Peter kha a do. Tetuh, ‘Atunin aw a khua mawze, vae thum nae vua cih,’ cite Bawipaw nynh a hopyapaw bya kha Peter nynh a liathui vae.62Peter tuh atolang pou zah thawmawte a rah. Ranpibawi Lupi malang Jesu (Mat 26.67-68; Mar 14.65)
63Jesu kha a kyngtu hae nynh sarya hae zah a bua hae.64Minmin nynh a mae kha phang bong hae zah a mae kha a bia hae, te “Hummou ae bua? Hotua!” cite a khia hae.65Minmin nynh saryanaw bya patae a honua hae. Kungsi malang Jesu (Mat 26.59-66; Mar 14.55-64; Joh 18.19-24)
66Khua he adae tuh, piccan hae, ranpibawi lepaw hae te kawbya sazae hae nynh tungkuh hae zah Jesu kha kungsi malang poukhae hae zah,67“Khri na thua ze kaening hynh oun hopya tua,” a ci hae. Jesu nynh, “Kae hopya oh zemah na zyn lan khyh oh;68nanning kha bya kae khia oh zemah bya nae khunglae lan khyh oh.69Thuasalama atu tetuh Ccungccaw Ccapaw tuh Pachia thungnaw ranglang khe a haung vae cih,” a cipya hae.70Minmin balyn nynh, “Tuhteze, nang tuh Pachia Ccapaw tou?” a ci hae. Jesu nynh, “Na ho oh hawte ka thua,” a ci.71Minmin nynh, “Ccangpaw ccaekia aho vae zawtou? Pawccecize a munglae kya-e bya kha ahmaw ccaccei nynh phe ah thae vae oh,” a ci hae. Pilat malang Jesu (Mat 27.1-2, 11-14; Mar 15.1-5; Joh 18.28-38)
1Ccungccaw zapi balyn nynh thokuh hae zah Jesu kha Pilat kalan a cciakhae hae.2Minmin nynh Jesu kha seibe hae zah, “E paw nynh ah minphuin a cciakhae seipaw kha kae muih, te Sizar siapharan kalan ngunto pya lan a khee, amaw te amaw kha Khri a ci hae paw siapharan nynh ka thua a ciku,” cite a ho hae.3Pilat nynh Jesu kha, “Nang hynh Judah hae Siapharan na thua tou?” cite a khia. Jesu nynh, “Na ho hawte nynh thua,” cite a khung.4Pilat nynh ranpibawi lepaw hae te ccungccaw hae kha, “E ccungccapaw hynh a seinaw ka muih khyh,” a cipya hae.5Minmin nynh houh sia hae zah, “Aning nynh Galilee kyate tho zah hynh-e hmin kyacia, Judea ram balyn po ccangpah hae zah ccungccaw hae kha mih lung a thosah,” a ci hae. Herod kalan Jesu Sawnaw
6Pilat nynh tuh-e bya he a thae tuh, “Tuh-e paw tuh Galilee paw athua tou?” cite a khia.7Herod nynh a ukpaw ram kya a umpaw nynh thua cipaw a nyh tuh, Jesu kha Herod kalan a saw; tuh ccyh lyatuin Herod tuh Jerusalem kya nynh a um.8Herod nynh Jesu kha he a muih tuh myaryamaw a lungtua, pawccecize Jesu konglang kha palei thae zah muih a rynaw khaw asaw vae; Jesu nynh ngaeangnaw ccangkhakheit a raepaw kha muih lan a ngaehoi.9Herod nynh Jesu kha bya patae a khia; thuasalama Jesu nynh kaw kheit san khung khyh.10Ranpibawi lepaw hae te kawbya sazae hae nynh thadyn hae zah Jesu kha thawmawte sei a be hae.11Herod te a rhawkaw hae nynh Jesu kha pawlangria leite a sarya hae; Herob nynh kou hoypaw boeining kha lawsakuh zah Pilat kalan bua a saw.12Tuin nin ccaccei khe Pilat te Herod tuh ruiban lang a tang hae; tuh maw lya tuh a la rhawkuh hae paw nynh thua. Jesu Chia lan Byapia hae (Mat 27.15-26; Mar 15.6-15; Joh 18.39—19.16)
13Pilat nynh ranpibawi lepaw hae, uktu hae te ccungccaw hae kha pynkheihlan ko hae zah,14“Nanning nynh e ccungccapaw hynh ccungccaw hae a cciakhae seipaw hawte ka kalan nae cciakhae oh; na muihnaw oh kya akaw-aleih bya ka khia zah, sei na benaw oh paw kya a seinaw ccangkheit san ka muih khyh.15Herod nynh mah a seinaw a muih khyh keiccuze kaening kalan bua yn saw; thanccingte, e paw nynh chi lan accan lan ciate seinaw ccangkheit san rae khyh.16Tukeiccuze ka bua cih zah ka luesah cih,” a cipya hae.17Pawccecize Kawtaw Poi kya thongccahpaw lukhakheit kha minmin hanlan leih a sawpya hae.
18Minmin balyn nynh, “E ccungccapaw hynh theih lah, Barabbas kha oun sawpah!” cite ngingrarih lan a sia hae.19Tuh-e Barabbas tuh khualae lungkhu rhawkunaw a raetu te ccungccaw a theihtu athua keiccuze thongccahpaw nynh thua.20Pilat nynh Jesu kha a luesah ry keiccuze minmin kha bua a hopya hae.21Thuasalama minmin nynh, “Vaelantung kya khiade, amaw kha khiade!” cite a sia hae.22Pilat nynh vae thumnaw kya minmin kha, “Pawccemou? Paw hoyleinaw mou a rae? Chi lan accan lan ciate a tungvaw seinaw ka muih khyh, tukeiccuze ka bua cih zah ka saw cih,” a cipya hae.23Thuasalama minmin nynh Jesu tuh vaelantung kya khiade lanpaw nynh thua cite roi accae lante thawmawte a ngia hae keiccuze minmin roi nynh phe a tae.24Minmin nynh a ngia hae hawte thua sah cite Pilat nynh bya a pae.25Khualae lungkhu rhawkunaw a pousah keiccu te ccungccaw a chia keiccuze thong a ccahpaw kha minmin nynh a ngia hae thyhte Pilat nynh a sawpya hae; thuasalama Jesu kha mih rynaw hawte cyi lan a pya hae. Vaelantung kya Khiadenaw (Mat 27.32-44; Mar 15.21-32; Joh 19.17-27)
26Minmin nynh Jesu kha a cciakhae lya hae khe, Sairin khuapaw Simon, khua taraw langte yn cceihpaw kha kyng hae zah vaelantung kha puihsah hae zah Jesu nulang a zuisah hae.27Ccungccaw aphupi nynh Jesu kha zui hae zah, tuh-e hae kyakhe amaw elang thinlungccite a rah a khui hae paw nopi hae mah a umbua hae.28Thuasalama Jesu nynh mih kalan hawi zah, “Jerusalem ccanung hae, kae ka hanlan rah nan oh, naemaw te nae ccaaw hae hanlan palia rah oh.29Pawccecize, ‘A tiin hae paw te ccaawsaah boi leipaw vue hae te imua nynh a zu boi leipaw matei hae tuh lungtua hae paw nynh thua,’ cite oun honaw hae ccyh tuh yn thua ccaccing cih.30Minmin nynh mua hae kha, ‘Kaening hynh oun tingthin oh,’ oun cipah cih hae zah sangpyng hae kha, ‘Kaening hynh oun nethin oh,’ oun cipah cih hae.31Pawccecize minmin nynh ahinpaw thingku kya hynhte a cyi hae ze aroupaw thingku kya pawmou acyikuh cih?” a ci.
32Jesu ryte misei hae lu ning kha mah chia lan a cciakhae bua hae.33Kalvari a ci hae paw hmin kya a thua hae tuh, tuin kyakhe Jesu tuh vaelantung kya khiade hae zah, misei hae lu ning kha a ranglang lu kheit, a voilang lu kheit a khiade bua hae.34Jesu nynh, “Apang, minmin hynh ngaethya hae; pawccecize paw nynh kae cyi cipaw nyh khyh hae,” a ci. Minmin nynh ccungthydung hae zah a boeining kha a neeku hae.35Ccungccaw hae nynh thadyn hae zah phang a do hae; uktu hae nynh sarya hae zah, “Aning nynh ming hae kha a khum hae; aning tuh Pachia nynh a popaw Messiah athua lanze amaw te amaw kha khumkuh sah!” a ci hae.36Rhawkaw hae nynh mah a saryabua hae, amaw kha oun ccianua hae zah misutui ariapaw kha pya hae zah,37“Judah hae Siapharan na thua ze, namaw te namaw kha khumku tua!” a ci hae.38A luki khe, “E paw tuh Judah hae Siapharan nynh thua,” cite a zei hae paw ccawkhia kha a taw hae.
39Vaelantung kya a sae hae paw misei hae lu ning kyaze lu kheitpaw nynh sarya zah, “Messiah na thua ze namaw te namaw kha khumkuh lah, kaening hynh mah yn khumbua!” a cipya.40Thuasalama lukheitpaw nynh tuh-e paw tuh pe zah, “E paw te alokuhpaw detahnaw kha mang na ing pite Pachia raw na rih khyh tou?41Aening tuh ah cyisahnaw thyhte angaekuh lante hmerarih lan ah teingpaw nynh thua; thuasalama e paw tuh a cyiseipaw pawpaw mah um khyh,” a cipya.42Te aning nynh, “Jesu, na peenaw lungkhu lang he na thua te, kae hynh yn ning nan vae ii,” a cipya.43Jesu nynh, “Byaccaccing kae hopya, atunin nang tuh kamaw ryte Paradis kya na umbua vae cih,” a cipya. Jesu A Chih (Mat 27.45-56; Mar 15.33-41; Joh 19.28-30)
44Tuh ccyh lya tuh ninthu suimilan haw lae ning loukaw thua zah zete suimilan ccangthum cia ram pynpi tuh pong amoh.45Khuanin tuh phe amoh; beikinn lungkhu a zo hae paw boei tuh zung ning lang aseiikuh.46Jesu nynh thawte a sia koute, “Apang, ka muisaw hynh na kuih kya kae pya vae,” a ci. Tuhte a ho koute a hy athang.47Acyihkuhpaw kha rhawbawipaw nynh he a muih tuh Pachia kha thehoysah zah, “Thanccingte, e paw tuh adingpaw ccungccaw nynh thua!” a ci.48Tuh-e acyihkuhpaw tuh do khylan oun thua hae paw ccungccaw hae balyn nynh tuh-e tuh muih hae zah mih by tukute a ki hae.49Amaw ryte a nyhkuh hae paw balyn te Galilee kyate amaw a zui hae paw nopi hae tuh asawnaw khe thadyn hae zah acyihkuhpaw kha a do hae. Jesu Rhua Ccynaw (Mat 27.57-61; Mar 15.42-47; Joh 19.38-42)
50Judea ram kya Arimathea khuapaw Josef ci hae paw lu kheit a um. Aning tuh mihoypaw te midingpaw thua zah Pachia peenaw kha ngaehoite a ngawpaw nynh thua, aning tuh kungsi memba lu kheit athua zemah, kungsi memba hae mih khuakhannaw te mih cyisahnaw kha a nawccah leipaw nynh thua.52E paw nynh Pilat kalan cceih zah Jesu rhua kha a ngiaku.53Jesu rhua kha sahbung zah nebaleihpaw boei rawpaw te a lung, te lung a karyn hae paw, hum ccungccaw sanmah a uunaw boi lei hae paw shaw kyakhe a ccy.54Tuin nin tuh Paccynku nin thua zah sabbath nin thuanaw anae vae.55Galilee kyate amaw ryte oun cceihkheih hae paw nopi hae mah zuikuh bua hae zah a shawku kha thuasah, pawcihte nynh Jesu rhua a ccy hae cipaw kha thuasah a muihbua hae.56Minmin tuh ki hae zah amynkhuhpaw te zimuin kha a paccyn hae. Sabbath nin kya tuh kawbya thyhte a haeung hae. Jesu Thoothuinaw (Mat 28.1-10; Mar 16.1-8; Joh 20.1-9)
1Lonaw naw kheit kyaze masaty nin awkhua takaw khe nopi hae tuh a paccyn hae paw amynkhuhpaw kha ccyng hae zah shaw kalan a cceih hae.2Minmin nynh shaw kyate lung a nuekuhpaw kha a muih hae.3Minmin nynh shaw lungkhu lang tee hae zah Jesu rhua kha muih vae khyh hae.4Minmin tuh tuh-e konglang myarya mih ngaeangthua lyakhe, phaephae akpaw boeining a lawkuh hae paw lu ning tuh mih pe khe oun thadyn hae.5Nopi hae tuh rih hae zah laekhu kya a bakhung lya hae khe, tuh-e hae nynh, “Pawccemou a chih hae paw laku kya a hiinpaw kha na ccung oh?6Aning tuh hein kya um vae khyh, phe a thoo vae! Galilee kya a um lyaze ae hopah oh zah,7‘Ccungccaw Ccapaw tuh misei hae kuih kalan pya athua cih zah vaelantung kya khiade athua cih, te nin thumnaw kya yn thoothui cih,’ a cipaw kha liathuitua oh,” cite a hopya hae.8Tetuh nopi hae nynh Jesu bya kha a liathui vae hae.9Shaw kyate ki hae zah tuh-e kong balyn tuh lu haw lae kheit kya te tuhlaepaw zuitu hae balyn kyakhe a hopya hae.10Locceihtu hae kya tuh-e kong a hopahtu hae tuh: Mary Magdalin, Joanna, James a nung Mary te minmin ryte a umkheih hae paw ccangpaw nopi hae nynh thua hae.11Mih bya kha phungpaw huataw o-ang lante tua hae zah locceihtu hae nynh zyn khyh hae.12Thuasalama Peter tuh thokuh zah shaw kalan khe a ccue; te bakhung zah he a do tuh boei rawpaw kyalya kha a muih, te acyihkuhpaw kha a ngaeangthua zah a inn lang a ki. Emmaus Laanpi kya Langkunaw
13Tuin nin khe zuitu hae lu ning tuh Jerusalem kyate me sari loukaw asawnaw Emmaus a ci hae paw khua lang a cceih hae.14Minmin nynh acyihkuhpaw konglang balyn kha a hoku hae.15Tuhte a hoku lya hae khe, Jesu amaw ccaccei tuh yn naekuh zah mih kya a cceihbua.16Thuasalama mih mit tuh phang khaw thua zah amaw kha nyh khyh hae.17Jesu nynh minmin kha, “Na cceih lalia lan oh te, paw kong mou na hoku oh?” cite a khia hae. Tetuh minmin tuh ngaethyate phang thadyn hae.18Minmin kyaze Kleopas a ci hae paw nynh khung zah, “Jerusalem khua umpaw mikhia mang na thua pite, atu loukaw tuin kya acyihkuhpaw konglang kha na nyh khyh tou?” a cipya.19Jesu nynh minmin kha, “Paw konglang mou?” cite a khia hae. Minmin nynh, “Nazareth khuapaw Jesu kong nynh thua, aning tuh Pachia malang te ccungccaw balyn malang cyisahnaw te bya kya athungpaw profeh nynh thua,20amaw kha ranpibawi lepaw hae te uktu bawi hae nynh a chi ccaw cite seibe khylan ap hae zah vaelantung kya a khiade hae.21Aning tuh Israel hae kha oun shawkhaw cih paw nynh thua cite kaening nynh kae la ngaehoi; tuh-e hae kyalya thua leite, tuhte acyikunaw te atunin hynh nin thumnaw nynh thua.22Tuhpiaze kaening kae phu kya-e nopi hae abang nynh kae ngaeang oun thuasah hae. Minmin tuh khuadaetakaw te shaw kalan cceih hae zah,23a rhua kha muih vae khyh hae; te oun ki hae zah Jesu tuh phe hiin vae cite a hopah hae paw vaaw hae kya-e vizin kha mah kae muih cite oun hopya hae.24Kae umkheih hae paw abang nynh shaw kalan cceih hae zah nopi hae nynh a ho hae hawkhate a muih hae; thuasalama Jesu tuh muih khyh hae,” cite a hopya hae.25Tuinte Jesu nynh minmin kha, “Pou mingaee hae, profeh hae nynh a hosya hae paw balyn kha zyn lan myarya na rusah oh ii!26Khri tuh hynh-e hae hynh a teing koute a phu-enaw lungkhu lang tee lan ccan khyh tou?” a cipya hae.27Moses kyate tho zah Profeh hae balyn nynh amaw konglang a zei hae paw Ccathyaa balyn kha minmin kya ccaerarih lan a hopya hae.
28A cceih cihnaw hae khua kya vyavya a thua hae tuh, Jesu tuh malang cceih zah po a sulue cih paw hawte a umsakuh.29Thuasalama minmin nynh, “Kae kya umbua hin, khuanin vyavya nae vae, khua yn zi vae cih,” cite thawmawte a kang hae. Tukeiccuze minmin ryte ryakheih lan a teebua.30Minmin ryte ccaboi kya he a koihkheih hae tuh, Jesu nynh sanlou kha lah zah hythua a pya koute eih zah a nee hae.31Mih mit tuh oun ccae zah amaw kha a ny vae hae; te aning tuh mih muihnaw kyate phe azo.32Minmin nynh, “Laanpi kya aning nynh bya oun hopya lya te Ccathyaa oun ccaesahpya lya kha ah thinlung kya maee nynh oun upaw hawte khaw athua?” cite a hoku hae.33Tuh ccyh lyamawkhe minmin tuh thokuh hae zah Jerusalem lang a ki hae; zuitu lu haw lae kheit te mih ban hae a sueluakuh hae paw kha a muih hae.34Tuh-e hae nynh, “Bawipaw tuh a thoothui ccaccing vae, Simon kya a langkuh vae!” a ci hae.35Minmin nynh mah laanpi kya acyihkuhpaw konglang te sanlou a ia lya Bawipaw nynh thua cipaw a ny hae paw kong kha a hopya hae. Zuitu hae kya Langkunaw
36Tuhte minmin nynh a ho lya hae khe Jesu tuh mih ngaelaku khe yn thadyn zah, “Nae kya daenaw um sah,” a cipya hae.37Minmin nynh khozi nynh kae muih cite tua hae zah ohsiikuh hae zah a rih hae.38Jesu nynh, “Pawccemou nae bungzou? Pawccemou nae thinlung kya lunghiinnaw a um?39Ka kuih te ka ccu hynh dotua oh! Kamaw maw nynh ka thua, yn haetua oh lah yn dotua oh; pawccecize kae nynh ka hoipaw na muih oh paw ngesaw te ru kha khozi nynh tuh hoi khyh,” a cipya hae.40Tuhte he a ho koute, a kuih te a ccu kha a dosah hae.41Minmin tuh mih ngaeangthua zah mih lungtua keiccuze a zyn kho khyh lya hae khe, Jesu nynh, “Hein kya ae lanpaw hankhakheit na hoi oh tou?” cite a khia hae.42Minmin nynh aruakuhpaw ngasaw pae kheit kha a pya hae.43Jesu nynh lawkuh zah a muihnaw hae khe a ae.
44Tukoute Jesu nynh, “Moses kawbya ccauh kya thuasah, profeh hae ccauh kya thuasah, Sam ccauh kya thuasah kae ka kong a zei hae paw miakaw tuh marya accing cih cite nanning ryte ka um lyaze kae hopya oh paw bya tuh hynh-e hae hynh nynh thua,” a cipya hae.45Minmin nynh Ccathyaa kha a thaethya ccaw hae cite mih thinlung kha a uasah.46Minmin kha, “Ccathyaa kya hynhte azeikuh, Messiah tuh a teing cih zah nin thumnaw kya a chih hae paw kyate a thoothui cih.47Jerusalem kyate tho zah minphuin miakaw kalan ngaesikunaw te seingaethyanaw kong kha amaw min te ho athua cih.48Nanning tuh hynh-e uccaw hae konglang ccaekia hae nynh na thua oh.49Ka Paaw nynh bya a kinkupaw kha kamaw nynh nae tungvaw kya kae saw cih; thuasalama vaawlang te nae kya thungnaw yn thua mawlaezung Jerusalem khua kya la um hin oh,” a cipya hae. Jesu Vaawlang Kaenaw (Mar 16.19-20; Loc 1.9-11)
50Jesu nynh zuitu hae kha Bethani khua cia a cciakhae hae, te a kuih kha hangthung zah hythua a pya hae.51Tuhte hythua a pya lya hae khe mih kyate phiakuh zah vaawlang lawthung athua vae.52Minmin nynh amaw kha beiksya hae zah lungtuanaw alepi te Jerusalem lang a ki hae.53Beikinn kyakhe Pachia kha tyty a thehoysah hae.

Bible Society of Myanmar

https://app.library.bible/content/1a340f5ae072b2f4

expand_more
chevron_left上一章
chevron_right下一章