Read JAMES 1

JAMES1

Beihlangnaw

¹Pachia te Bawipaw Jesu Khri ryalahtu kae James nynh pong pazaekuh lan a phiakuh hae paw Israel phin haw lae ning kha kae beihlang oh. Zynnaw te Hawnaw

²Ka u te ka neitaw hae, syntawnaw aphuinphuin na tung vae oh ze, tuh-e tuh lungtua nawlan la ria oh;³pawccecize nae zynnaw kha syntawnaw nynh ngaesangnaw kha a poukhae cipaw na ny oh.⁴Nanning nynh pawsang hobounaw um lei lante khaleih a ccingpaw na thua nawlan oh, athangnaw cia la ngaesang oh.

⁵Nanning lukhakheit nynh hawnaw abou ze, Pachia kha ngiakuh sah, pawccecize seibe leite ccungccaw balyn kha hysahte a pyatu Pachia nynh tuh-e paw tuh hawnaw a pya cih.⁶Thuasalama lunghiinnaw hoi leite, zynnaw te ngiakuh sah, pawccecize lunghiinnaw a hoipaw tuh khisan nynh mung zah athekuhpaw rili tuileih te nynh aloku.⁷Pawccecize tuhcihawpaw ccungccaw nynh tuh Bawipaw kyate ccangkhakheit ka mue cih cite tuakuh nan sah.⁸Tuhcite thinlung apheipaw ccungccaw tuh a cyipaw miakaw kya atyn leipaw nynh thua. Ryachinaw te Hoirumnaw

⁹Zakawsangpaw uno nynh tuh amaw kha hangthung athuanaw kyakhe a lungtua sah.¹⁰Mihoipaw nynh tuh amaw kha sawbung athuanaw kyakhe a lungtua sah. Pawccecize aning tuh ramkaw e haetapaw hawte azo cih.¹¹Pawccecize khuanin nynh asopaw ryte he yn thuathung tuh lonua kha naansah zah tuh-e haetapaw tuh khuakuh zah a puithyanaw tuh azo; tuhawte mihoipaw mah a ryasuh cciamang lyakhe azo cih. Tuhounaw

¹²Tuhounaw kha a ngaesangpaw ccungccaw tuh hythua ccoupaw nynh thua; pawccecize aning tuh syntaw he athua koute Bawipaw nynh amaw a sungsah hae paw elang bya a kinpyaku hae paw hiinnaw bawilukhung kha a mue cih.¹³Tuhounaw kha a tung vae ze, “Pachia nynh kae tuh yn tuhou,” cite hum nynh sanmah ho nan sah; pawccecize hoyleinaw nynh Pachia kha tuhou kho khyh, amaw nynh mah hum sanmah tuhou boi khyh.¹⁴Thuasalama ccungccaw tuh amaw a pynsaw rynaw nynh soih zah he a sue vae ze, aning tuh ling athua vae.¹⁵Pynsaw rynaw nynh ccaawpoi zah seinaw kha a saah, seinaw nynh he ale tuh chinaw kha a thuakhae.¹⁶Ka sungsahpaw uteno hae, la lingsakuh nan oh.

¹⁷Ahoypaw lasung miakaw te accingpaw lasung miakaw tuh aluki langte, awnaw hae mih Paaw kyate nynh oun thua hae. Amaw kya tuh rulaekunaw um khyh zah apaleihkuhpaw mynlyh cipaw um boi khyh.¹⁸Aening tuh amaw nynh a rae hae paw balyn kyaze masaty athae ah thua nawlan oh, amaw a rynaw thyhte byaccing kya-e bya khate aening kha oun rae. Bya Thaenaw te Zuinaw

¹⁹Ka sungsahpaw uteno hae, ccungccaw miakaw tuh nawthae lan a thyrang sah, byaho lan te thinria lan a thysung sah.²⁰Pawccecize ccungccaw thinrianaw nynh Pachia kya-e dingnaw kha poukhae khyh.²¹Tukeiccuze nungsikunaw balyn te paepae luipaw hoyleinaw kha vua oh lah, nae muisaw a khum khopaw, nae lungkhu kya sang athuapaw Pachia bya kha lungnenaw te lawkuh oh.

²²Naemaw te naemaw kha lingkute bya a thaetu hae kyalya thua nan oh. A bya a cyihtu hae la thua oh.²³Pawccecize lukhakheit nynh bya kha thae zah a cyi khyh ze, aning tuh a puikhaepaw a mae kha muinsado kya a dokuhpaw ccungccaw te nynh aloku.²⁴Pawccecize aning nynh amaw te amaw a dokuh koute po cceih zah a muinsan kha phe a ningku kangmaw.²⁵Thuasalama luenaw te asekuhpaw accingpaw kawbya kha do zah tuh-e kya po atynpaw ccungccaw tuh thae zah a ningthyapaw ccungccaw thua leite, rya a lahtu nynh thua; aning tuh a ryalaw kya hythua ccoupaw athua cih.

²⁶Nanning lukhakheit nynh beiknaw lante a zuakuhpaw nynh ka thua cite tuakuh zah a munglae a sungku khyh ze, aning tuh amaw a thinlung a lingkuhpaw nynh thua; tuh-e paw a beiknaw tuh accakaepaw nynh thua.²⁷Paaw Pachia malang athyaapaw te anungsikuh leipaw beiknaw tuh e hynh nynh thua: Ngawraw hae te nomae hae kha mih vawsawnaw kya do-oihpaw te ahmaw mah laephi vaw e anungsikuhpaw kya kalouhku leite umpaw kha nynh thua. Laesakunaw Hoi Nan Oh

¹Ka u te ka neitaw hae, phu-enaw Bawipaw athuapaw, ah Bawipaw Jesu Khri zynnaw kya ccungccaw laesahnaw la hoi nan oh.²Nanning na pumkunaw oh kalan ccungccaw lu kheit nynh sui kuihpu te apuithyapaw uccaw lawkute yn teebua zah, a ryachipaw mah anyaapaw uccaw lawkute yn teebua ze,³apuithyapaw uccaw te yn ccaankuhpaw kha saw na tua oh zah, “E ahoypaw hmin kyahin haung,” na cipah oh zah, a ryachipaw kha, “Khuhlang khuin la thadyn, tuhkhyhze e ka ccu nungnaw kyahin yn haung,” na cipya oh lanze,⁴naemaw te naemaw laku laesakunaw na hoi oh zah athahpaw tuanaw te bya a piatu hae khaw na thua oh?⁵Ka sungsahpaw uteno hae, la ngaetua oh. Hynh-e laephi kya-e ryachi hae hynh zynnaw kya hoirum khylan thuasah, amaw a sungsah hae paw hanlan bya a kinpyaku vae hae paw, peenaw rho kha ccou khylan thuasah Pachia nynh po khyh hae tou?⁶Thuasalama nanning nynh ryachi hae kha pawlang na ria khyh oh. A hoirum hae paw nynh nanning kha ae tuaa ae sah khyh oh tou? Byapianaw zung lang ae sue khyh oh tou?⁷Nanning ae konaw oh paw, aphutepaw min kha minmin nynh thethya ho khyh hae tou?

⁸“Na innpaw kha namaw hawkhate na sungsah cih,” acikuhpaw Ccathyaa thyhte alesaepaw kawbya kha na ccingsah ccaccing oh ze, kou hoy lan na cyi vae oh.⁹Thuasalama mirymihua na po oh ze, a sei hae paw nynh na thua oh. Kawbya a lawe hae paw hawte kawbya nynh a sei cite a nysaku hae paw nynh na thua oh.¹⁰Pawccecize humhung zemah Kawbya balyn kha marya zui salamah ccangkheit kya a mesei lanze, aning tuh kawbya marya a meseipaw nynh thua.¹¹Pawccecize, “Milae zu milae vawpaw kya sei nan,” cite a hotupaw nynh, “Ccungccaw theih nan,” cite mah a hobia. Nang tuh milae zu milae vawpaw kya na sei khyh zemah ccungccaw na chia ze, kawbya zui leipaw nynh na thua.¹²Luenaw te asekuhpaw kawbya khate byapia athua cih hae paw hawte, nanning mah byaho oh lah tuhte cyih oh.¹³Pawccecize ngaethyaumsahnaw a langsakuh leipaw ccungccaw tuh ngaethyaumsahnaw leite byapianaw kha a mue cih. Ngaethyaumsahnaw nynh byapianaw kha phe a tae. Cyisahnaw Um leipaw Zynnaw

¹⁴Ka u te ka neitaw hae, ccungccaw lu kheit nynh zynnaw ka hoi a ci zemah cyisahnaw a hoi khyh ze pawmou athane? Tuh-e zynnaw nynh amaw kha a khum kho cih tou?¹⁵Uno lu kheit tuhkhyhze ccianung lu kheit tuh boeining leite um zah nin takyh ae lanpaw looh hoi leite a um lanze,¹⁶nanning lukhakheit nynh minmin kha, “Daebabi lan la cceih oh, nae khua la lung sah lah, nae vue la so sah,” cite hopah hae zah, pyn hanlan ahopaw uccaw hae kha a pya khyh hae ze, pawmou athane?¹⁷Tuhawte zynnaw mah cyisahnaw um leite, a makhaete tuh achihpaw nynh thua.

¹⁸Thuasalama ccungccaw lukhakheit nynh, “Nang tuh zynnaw na hoi zah, kae tuh cyisahnaw ka hoi, na cyisahnaw um leite na zynnaw tuh yn langsahpya tua; kae tuh ka zynnaw kha ka cyisahnaw hae liate kae langsahpah cih,” a ci ze a ci cih.¹⁹Nang nynh Pachia ccangkheit nynh a um cite na zyn, kou ahoy. Raerangsaro hae nynh heize zyn hae zah a thyngkuh hae.²⁰Pou mingaeepaw! Cyisahnaw um leite zynnaw tuh a chih cipaw hynh na nyh ry tou?²¹Ah minpaaw Abraham nynh silawhang vawlan a ccapaw Isak kha silawnaw lang he a pya tuh, cyisahnaw liate thyaaccou khyh tou?²²A zynnaw tuh a cyisahnaw ryte ryalahkheih hae zah, cyisahnaw liate nynh zynnaw tuh accing cipaw kha na muih.²³“Abraham nynh Pachia kha zyn zah tuh-e a zynnaw tuh dingnaw lang a riapya,” acikuhpaw Ccathyaa tuh phe accing; aning tuh Pachia banpaw cite ko athua.²⁴Ccungccaw tuh zynnaw kyalya te thua leite, cyisahnaw liate nynh thyaaccou athua cipaw kha na muih oh.²⁵Tuhawte ohhuanung Rahab kha mah, zeccuetu hae kha innccong ua hae zah ccangpaw laanpi kalan he a saw hae tuh, cyisahnaw liate aning tuh thyaaccou khyh tou?²⁶Pawccecize muisaw um leipaw pyn tuh a chih, tuhawte cyisahnaw um leipaw zynnaw mah achihpaw nynh thua. Munglae Sungkunaw

¹Ka u te ka neitaw hae, sazae kae thuapaw kaening tuh aru huapaw byapianaw kha kae mue cih cipaw nyte, ccangpahtu lang patae la tang nan oh.²Pawccecize aening balyn tuh patae ah mesei oh. Bya a honaw kya a mesei leipaw ccungccaw tuh a pyn balyn kha a taekuh khopaw thua zah accingpaw nynh thua.³Marang hae nynh aening kaw a ngae ccaw hae cite mih mung kya rangtei ah teisah oh zah, mih pyn balyn kha ah mae kho oh.⁴Sanphalung hae kha mah dotua oh, myarya le hae zah khisan arupaw nynh a mung kho zemah a mawngtupaw nynh ditaripaw maenawpaw khate a rynaw langkhe a mae.

⁵Tuhawte lae tuh pyn kya-e ditaripaw athua zemah myarya a pookuh thya. Maee-ia taraw nynh myarya akopaw loram kha a u kho cipaw tuatua oh!⁶Lae tuh maee nynh thua. Lae tuh pyn kya-e hae kyaze hoyleinaw asueluakunaw thua zah, pyn balyn kha a thusah; ccungccaw hiinnaw balyn kha phe ccung lan u zah, amaw kha mah hell maee nynh a u.⁷Pawccecize ramsaw phuin miakaw, pavaw phuin, vue te a vawpaw phuin, rili kya umpaw ngasaw phuin kha ngaesah kho thua zah ccungccaw hae nynh phe a la ngaesah hae.⁸Thuasalama lae tuh hum nynh sanmah ngaesah kho khyh, uk kho leipaw athahpaw uccaw thua zah, a chisah khopaw asy te nynh phe abia.⁹Tuh-e lae te ah Paaw Pachia kha the ah hoysah oh; Pachia muinsan alo lante raepaw ccungccaw hae kha tuh-e lae te thya ah law oh.¹⁰Khalang ccangkheit kyate hythuanaw te thyalawnaw kha yn pou. Ka u te ka neitaw hae, tuhte cyiku lan ccan khyh.¹¹Tuidy ccangkheit kyate tui epaw te tui khahpaw a pou boi tou?¹²Ka u te ka neitaw hae, thaeku ku nynh oliv thae kha athae kho tou? Misu ku nynh thaeku thae kha athae kho tou? Tuhawte loituipaw nynh tuithuapaw kha pousah boi khyh. Hawnaw Phuin Ning

¹³Nanning laku a hawpaw te a thaethyapaw hummou a um? Aning nynh hawnaw kya-e lungnenaw te ahoypaw a hiinnaw khate a ryalaw kha langsakuh sah.¹⁴Thuasalama nae thinlung kya akhahpaw eiungnaw te karankunaw na hoi oh ze, pookuh nan oh lah byaccing kha rawsete hyn nan oh.¹⁵Tuh-e hawnaw tuh luki langte yn thuapaw thua khyh, laephi hawnaw, pynsaw hawnaw te Satan hawnaw nynh thua.¹⁶Pawccecize eiungnaw te karankunaw a umnaw tuh keisukeilae umnaw te hoyleinaw aphuinphuin a um.¹⁷Thuasalama luki langte yn thuapaw hawnaw tuh masaty lan thyaararih, tukoute ccawkunaw te lungnenaw um zah soih lan azoi, ngaethyaumsahnaw te ahoypaw athae khate phe abeih, laesahkunaw te cyiruhnaw um khyh.¹⁸Ccawkunaw a raetu hae nynh dingnaw ccacii kha daenaw te a vua hae. Laephi te Vaeccawkunaw

¹Nanning laku rhawtukkunaw te pekunaw tuh paw kyate mou oun thua hae? Nae pyn kya-e hae kya rhaw a tukkuh hae paw nae pynsaw hoysahnaw kyate oun thua khyh hae tou?²Na ry oh zah na hoi khyh oh keiccu ccungccaw na chia oh. Na duaa oh zah na mue khyh oh; tukeiccuze na buakuh oh zah rhaw na tukkuh oh. Na ngia khyh oh keiccu na mue khyh oh.³Na ngia oh zemah na mue khyh oh; pawccecize naemaw hoysahnaw kya mang khylan na ngiasei oh.⁴Zyn lan um leipaw ccungccaw hae! Laephi te vaeccawkunaw tuh Pachia ryte rhawkunaw nynh thua cipaw kha na nyh khyh oh tou? Tukeiccuze laephi te ruiban lang a tang rypaw tuh Pachia rhawpaw lang a raekuhpaw nynh thua.⁵“Pachia nynh aening lungkhu a nungpaw muisaw tuh a eiungpaw rynaw te phe abeih,” cite Ccathyaa nynh a hopaw hynh accakaepaw nynh thua cite tou na tua oh?⁶Thuasalama Pachia nynh houh ale huapaw thawccinaw kha oun pya. Tukeiccuze,“Pachia tuh a lysakuh hae paw kharawse hae zah,zakawsangsakuh hae paw khathaw a cci hae,” a ci.

⁷Tukeiccuze Pachia rynaw kha zui oh. Satan kha dou oh lah, nanning kha ae ccuetaw cih oh.⁸Pachia kalan naekuh oh lah, aning mah nae kalan a naekuh cih. Misei hae, nae kuih kha ccikankuh oh, thinlung aphei hae paw, nae thinlung kha thyaasakuh oh.⁹Ngaethyate um oh, rawkhuite um oh lah rah oh. Nae nuinthuanaw kha rawkhuinaw lang tang sah oh lah, nae lungtuanaw kha ngaethyanaw lang tang sah oh.¹⁰Bawipaw malang zakawsangsakuh oh lah, aning nynh ae hangthung cih oh. Na Uno kha Byapia Nan

¹¹Uteno hae, lu kheit te lu kheit thethya hokuh nan oh. A uno kha thethya ho zah bya a piapaw ccungccaw tuh kawbya kha thethya ho zah bya a piatu nynh thua. Nang nynh kawbya kha bya na pia ze, nang tuh kawbya a zuipaw thua leite bya a piatupaw nynh na thua.¹²Kawbya pyatu te byapiatu lu kheit kyalya um zah, aning tuh a khum khopaw te a roh khopaw nynh thua. Mingccangpaw kha bya a piatupaw nang tuh hummou na thua? Awkhualan hanlan Pookunaw

¹³“Atunin athua khyhze awkhualan kya tuhcihawpaw khahcihawpaw khua lang ccia lan zah tuin kya kum kheit um lan, kungku lan zah amia mue lan,” cite a ho hae paw nanning, atu ngaetua oh!¹⁴Awkhualan pawmou yn cyihkuh cih cipaw na nyh khyh oh. Nae hiinnaw tuh pawmou athua? Nanning tuh sosoh a langkuh koute phe avaepaw tuihu nynh na thua oh.¹⁵“Bawipaw nynh a ry lanze, aening ah hiin cih oh zah, hynh-e khyhze tuh-e tuh ah cyih cih oh,” cite nynh na ho lan oh accan.¹⁶Thuasalama atu nanning tuh na lysakuh oh zah na pookuh oh; khahcihawpaw pookunaw balyn tuh ahoy leipaw nynh thua.¹⁷Tukeiccuze ahoypaw cyi lanpaw kha nyh zah a cyih leipaw tuh misei nynh thua. Mihoi hae Raeringnaw Pyanaw

¹Mihoi hae, atu ngaetua oh! Nae tungvaw yn thua lanpaw vawsaw riathaenaw hanlan rawkhuite siatua oh.²Nae hoirumnaw tuh baluh mawe vae, nae boeining tuh ripaw nynh a ae vae.³Nae sui te nae ngun tuh chihhangkae zah, tuh-e chihhangkaepaw nynh nanning kha rawsete ccaekia lang a tang cih zah maee hawte nae ngesaw kha a ae cih. Nyathyakou e nin hae hanlan nynh sisua kha na ccakhungku oh.⁴Ngaetua oh, nae leikua hae kya ccatan aw hae paw ryalahtu hae kha ryalaw mee pya leite na hynpah oh zah, mih ryalaw mee nynh a sia hae. Loohruetu hae siaruanaw tuh Vaaw Bawipaw nakaring kya phe a thua vae.⁵Laephi vawlan hoysahnaw kya na hiin oh zah na hoysah oh. Chia nin hanlan nae thinlung kha thobaleih lan na thosahku vae oh.⁶Midingpaw kha sei na be oh zah na chia oh; aning nynh nanning kha ae rawse ru khyh oh. Teingnaw kya Lungsaenaw

⁷Tukeiccuze uteno hae, Bawipaw yn thua cia lungsaete la ngaw oh. Dotua oh, loophopaw nynh khuaatui te hawkhuaa kha a mue cia, laephi kya-e aphutepaw athae-apaw kha lungsaete phang a ngawdae.⁸Nanning mah nae lungsae sah, nae thinlung kha tynsah oh; pawccecize Bawipaw yn thuanaw lanpaw tuh anae vae.⁹Uteno hae, byapia na thua khyh nawlan oh, lu kheit te lu kheit ccohnuakuh nan oh; dotua oh, byapiatu tuh thuakaw malang phang a thadyn.¹⁰Ka u te ka neitaw hae, Bawipaw min te bya a ho hae paw profeh hae kha vawsaw teingnaw te lungsaenaw hanlan dosuinkupaw lang la lawkuh oh.¹¹Dotua oh, a ngaesang kho hae paw tuh hythuaccou hae paw ah ci oh. Job nynh a ngaesangnaw kong te nyathyakou kya Bawipaw nynh a pyapaw kong kha na thae vae oh. Bawipaw tuh myarya thawccih thyapaw te ngaethyaumsah thyapaw nynh thua cipaw na ny vae oh.

¹²Thuasalama ka u te ka neitaw hae, pawpaw balyn kya thyalawkuh nan oh; vaawlang te thuasah, laephi te thuasah, byakinkunaw ccangkhakheit te mah thuasah thyalawkuh nan oh. Thuasalama byapianaw lungkhu lang na phungku sei khyh nawlan oh, athuapaw kha “athua” ci oh lah, athua leipaw kha “thua khyh” ci oh. Zynnaw Sawsangnaw

¹³Nanning laku vawsaw a teingpaw a um tou? A um ze sawsang sah. A lungtuapaw a um tou? A um ze thehoysahnaw hlaw kha sah sah.¹⁴Nanning laku ngeccih a um tou? A um ze khriccaawbuu kya-e pastor hae kha ko hae sah lah, minmin nynh Bawipaw min te chitui thuhpah hae sah lah, sawsangpah hae sah.¹⁵Zynnaw kya-e sawsangnaw nynh ngeccih kha a khum cih zah, Bawipaw nynh tuh-e ngeccih tuh a thosah cih. Seinaw a la rae ze, aning tuh ngaethya athua cih.¹⁶Tukeiccuze na cyisei oh paw kha lu kheit te lu kheit hopakuh oh lah, dansah na thua nawlan oh lu kheit te lu kheit sawsangpakuh oh. Midingpaw sawsangnaw tuh myarya a thawsae zah athane.¹⁷Elijah tuh aening tahawpaw ccungccaw nynh thua; aning nynh khuaa araw khyh nawlan thawte saw a sang; te laephi vawlan kum thum te sawpaw sah taruh cia khuaarah khyh.¹⁸Aning nynh saw bua sang zah vaawlang nynh khuaa a rawsah, te laephi nynh a thae a pousah.

¹⁹Uteno hae, nanning lakuze lukhakheit tuh byaccing kyate cceihsei zah, lukhakheit nynh amaw kha a paleihsaku lanze,²⁰miseipaw kha a cciaseinaw kyate a paleihsakuhpaw ccungccaw nynh tuh-e paw muisaw kha chinaw kyate a khum cih zah, seinaw patae kha a bongpah cih cipaw kha la nyh sah.

Bible Society of Myanmar

https://app.library.bible/content/1a340f5ae072b2f4