Read 1 PETER 1

1 PETER1

Beihlangnaw

¹Jesu Khri kya-e locceihtu athuapaw Peter nynh Pontas, Galatia, Kappadosia, Asia, te Bithynia ram kya phiariphiarae um hae paw khuaccong hae paw kalan ccaw kae ky oh.

²Jesu Khri kaw na ngae nawlan oh te a chiise te theipaw na thua nawlan oh, Muisaw liate thyaasah thua hae zah Paaw Pachia paccynnaw thyhte po hae paw: Thawccinaw te daenaw tuh nae kya la lungthung sah. Ahiinpaw Ngaehoinaw

³Pachia te ah Bawipaw Jesu Khri a Paaw tuh thehoyte um sah! Myarya lepaw a ngaethyaumsahnaw thyhte, Jesu Khri tuh chinaw kyate a thoothuinaw liate ahiinpaw ngaehoinaw kalan aening kha bua oun puisah vae.⁴Tuh-e tuh nanning hanlan vaawlang kya ccypya athuapaw arohthya leipaw, anungsikuh leipaw te anaanthya leipaw rho kha ccou khylan nynh thua.⁵Nanning tuh nyathyakou ccyh kya langsaku lan paccynpaw khumnaw hanlan Pachia kya-e thungnaw kyakhe zynnaw liate ccy na thua oh.⁶Nanning tuh atu lya syntawnaw aphuinphuin keiccu aho lanze sosoh nae ngaethya zemah, hynh-e kong kyahin nae lungpaw sah.⁷Tuhteze nynh maee te syntawtua athua zemah arohthyapaw sui laeze aphute huapaw ahmepaw nae zynnaw tuh Jesu Khri yn langku ccyh kya, thehoynaw, sawtuanaw te phu-enaw kha a ccou cih.⁸Amaw kha na muih lei oh pite na sungsah oh; atu amaw kha na muih khyh oh zemah na zyn oh; ho kho um leipaw te aphu-epaw lungtuapaw khate nae lungpaw.⁹Pawccecize Jesu Khri kya nae zynnaw nynh a paccynkupaw nae muisaw khumnaw kha na ccou oh.

¹⁰Nanning nynh na ccou lan oh paw thawccinaw konglang a ho hae paw profeh hae nynh hynh-e khumnaw kong hynh la khia hae zah thawte la ccung hae.¹¹Khri a teingnaw te tuh-e yn zui lanpaw phu-enaw kong kha minmin kya umpaw Khri Muisaw nynh ccaekia he a khanpah ty hae tuh, hummou a hothe ry, tuhkhyhze paw ccyh mou a hothe ry cipaw kha thawte a ccung hae.¹²Profeh hae nynh rya a law hae paw tuh mimaw hanlan thua leite, nanning hanlan nynh thua cipaw kha mih kalan phypya athua; vaawlang te saw athuapaw Thyaa Muisaw liate nae kalan thehoy bya a ho hae paw kha mangte, tuh-e uccaw hae tuh atu nanning kya hopya athua vae. Vaaw hae nynh tuh-e uccaw hae tuh riri do lan a ry hae. Athyaapaw Hiinnaw

¹³Tukeiccuze nae thinlung kha paccynkute um oh lah, hawrarih lan um oh; Jesu Khri he yn langkuh te nae kalan thuakhae athua cih paw thawccinaw kha athangnaw cia ngaehoi oh.¹⁴Na la ny khyh lya oh, langmawlya e pynsaw rynaw muinsan kha la ke nan vae oh, kawngaepaw ccaaw hae hawkhate um ccavae oh.¹⁵Nanning ae ko oh paw tuh athyaa hawte, nanning mah nae umtu ziazae balyn kya thyaa oh.¹⁶Pawccecize Ccathyaa kya, “Kae tuh ka thyaa keiccu, nanning mah thyaa oh,” cite azeikuh.

¹⁷Ccungccaw miakaw kha a ryalaw thyhte, laesahnaw um lei lante bya a piapaw Paaw kha na ko na ngia oh ze, e laephi vaw na um lungkhu oh balyn amaw rawrinaw te um oh.¹⁸Nae minpaaw hae kyate na mue oh paw accakaepaw nae hiinzia kyate, phua te sui tahawpaw arohthyapaw uccaw hae khate nanning kha shawkhaw na thua khyh oh,¹⁹ccaenaw um leipaw, athunaw um leipaw, tuutaw hawte athuapaw Khri kya-e aphutepaw chiise te nynh shawkhaw na thua oh cipaw kha na ny oh.²⁰Tuh-e Khri tuh laephi atho mawze laerui-awde ty vae paw la thua salamah hynh-e nyathyakou ccyh kyahin nanning hanlan yn langkuh.²¹Khri kha chinaw kyate thoosah zah phu-enaw a pyatupaw Pachia kha Khri liate na zyn oh. Tuhteze nynh nae zynnaw te nae ngaehoinaw tuh Pachia kya a um.

²²Nanning nynh byaccing kaw kha na ngae oh liate nae hiinnaw kha na thyaasakuh vae oh zah, uno tungvaw ahmepaw sungsahnaw kya athyaapaw thinlung khate lu kheit te lu kheit thawmawte sungsakuh oh.²³Pawccecize arohthyapaw ccacii te thua leite, arohthya leipaw, ahiinpaw te zungzae atynpaw Pachia bya liate nynh na puithui oh.²⁴Pawccecize Ccathyaa nynh,“Ccungccaw balyn tuhlonua hawte thua hae zah,ccungccaw phu-enaw balyn tuhlonua apaw hawte nynh thua.Lonua tuh naan zah,lonua apaw tuh akhuakuh.²⁵Thuasalama Bawipaw bya tuhzungzae atyn,” a ci.Tuh-e bya tuh nae kalan hopya athuapaw thehoypaw bya nynh thua. Ahiinpaw Lung te Athyaapaw Minphuin

¹Tukeiccuze ahoy leipaw balyn, hynpyakunaw balyn, thyaruhnaw, eiungnaw te thanhokunaw balyn kha ccaring vua oh;²ccirarihpaw muisaw samatei liate khumnaw kya na lethung nawlan oh, apuithawpaw imua hae hawte tuh-e samatei tuh peki oh,³pawccecize Bawipaw tuh thawccithyapaw nynh athua cipaw kha phe na taangtua vae oh.

⁴Ccungccaw hae nynh nawe hae salamah Pachia nynh a popaw, aphutepaw, ahiinpaw lung athuapaw Bawipaw kalan oun cceih oh.⁵Nanning mah ahiinpaw lung hae hawte muisaw lante sakpaw inn nynh na thua oh, Jesu Khri liate Pachia kalan douccahpaw, muisaw lante silawkunaw rae khylan athyaapaw ranpibawi nynh na thua oh.⁶Tukeiccuze Ccathyaa kya,“Dotua oh, popaw lung, aphutepaw,abyapi huapaw apaki lang elung kha Zion kya ka nung,amaw a zynpaw ccungccaw tuhmaethya ccou vae lan khyh,” cite a um.

⁷Tukeiccuze aning tuh a zynpaw nanning hanlan aphutepaw nynh thua, thuasalama a zyn lei hae paw hanlan,“Inn saktu hae nynha nawe hae paw lung tuhapaki lang e abyapi huapawlung lang yn tang,”

⁸te“Thykupawkunaw lung,khuliakunaw lungpi,”lang yn tang; bya kha a ngae khyh hae keiccuze athy-apawkuh hae; minmin tuh tuh-e hanlan paccynpaw nynh thua hae.

⁹Thuasalama nanning tuh mohnaw kyate ngaeang lan umpaw amaw kya-e awnaw lungkhu lang ae kotu oh paw a hoynaw kha siakhae khylan popaw ccungccaw, bawi phin ranpibawi ciihan, athyaapaw minphuin, Pachia ccungccaw nynh na thua oh.¹⁰Langmawlya tuhPachia ccungccaw na la thua khyh oh,thuasalama atu tuhPachia ccungccaw nynhna thua vae oh.Langmawlya ngaethyaumsahnawna la ccou khyh oh,thuasalama atu tuhngaethyaumsahnawna ccou vae oh.Khriccaaw Hiinzia

¹¹Sungsah hae paw, ramccang hae te mikhia hae na thua oh keiccuze muisaw te rhawdoukuh hae paw chiisaw rynaw kha na sungku nawlan oh kae hyy oh.¹²Zenta hae nynh nanning kha ahoy leipaw ryalahtu hae hawte thethya he ae ho oh ze, minmin nynh a muih hae paw ahoypaw nae ryalaw hae liate Pachia yn thua nin kya Pachia kha a phu-esah nawlan hae, Zenta hae laku ahoypaw ozia khate la hiin oh.

¹³Bawipaw maedote, ccungccaw hae nynh kawhoitu lang a khang hae paw miakaw kaw kha la ngae oh; ahang huapaw siapharan kaw kha ngae oh lah,¹⁴ahoy leipaw ryalahtu hae kha detah khylan te ahoypaw ryalahtu hae kha thehoysah khylan siapharan nynh a sawpaw uktu hae kaw kha mah la ngae oh.¹⁵Pawccecize ahoyte cyinaw liate angaeepaw ccungccaw hae ngaeenaw kha nanning nynh zya na daesah lan oh paw tuh Pachia rynaw nynh thua.¹⁶A luepaw hawte hiin oh, tuhzemah na luenaw oh paw kha ahoy leipaw khawsung nawlan mang leite, Pachia see hae hawte hiin oh.¹⁷Ccungccaw balyn kha sawtua oh. Nae uno hae kha sungsah oh. Pachia raw kha rih oh. Siapharan kha sawtua oh. Khri Teingnaw Dosuinkunaw

¹⁸See hae, nae bawi nae zua hae kha myarya sawtuate kawngae oh. A thinlung hoypaw te nebaleihpaw bawizuaa kyalya thua leite, are-aropaw bawizuaa kha mah a kawngae oh.¹⁹Pawccecize ccungccaw lu kheit tuh atazae lei lante a teing lyakhe Pachia a ny keiccuze thinlungccinaw kha a ngaesang lanze, thehoysah lan accanpaw nynh thua.²⁰Pawccecize na cyiseinaw oh keiccu ae zia ae bua oh paw kha lungsaete na ngaesang oh zeso thehoysah lanpaw pawmou a um? Thuasalama ahoypaw rya na lah oh zah tuh-e hanlan lungsaete na ngaesang oh ze, tuh-e tuh Pachia malang thehoysah lan accanpaw nynh thua.²¹Pawccecize tuh-e khylan nynh nanning tuh ko na thua oh. Khri nynh mah nanning hanlan teing zah, a ccunoh kha na zui ccaw oh cite dosuinku lanpaw ae cciatawpya sya oh.²²“Aning tuh seinaw rae khyh;a mung te hynbya ho boi khyh.”

²³Amaw kha a sarya hae ze, aning nynh saryaru khyh hae; he a teing vae ze, aning nynh huraw khyh hae; hmerarih lan bya a piatupaw Pachia kha a doliaku.²⁴Aening tuh seinaw kya ah chih oh zah dingnaw kya ah hiin nawlan oh, Khri nynh aening seinaw balyn kha thing vawlan khe amaw a pyn kya oun phupya. A vaemaw hae liate na dan vae oh.²⁵Pawccecize nanning tuh laanpi a meseipaw tuu hae hawte nynh na la thua oh; thuasalama atu tuh Tuurintu te nae muisaw a Do-oihtu kalan phe na ki vae oh. Zu hae te Vawpaw hae

¹Tuhawte, zu hae nanning, nae vawpaw hae kalan pyakuh oh. Ou tuhte vawpaw lukhakheit nynh Pachia bya kha a ngae khyh zemah, bya hopya liate thua leite zu hae ozia liate thuasah,²nae kya-e sawtuanaw te athyaapaw nae ozia kha a muihnaw hae liate thuasah minmin kha bua mue nawlan nynh thua.³Na ccaankunaw oh paw tuh atolang e ccaankunaw, sangkhekunaw, sui lawkunaw te boeining hoypaw lawkunaw kyalya thua leite,⁴nevyalyapaw te daebabipaw muisaw kya-e arohthya leipaw puithyanaw khate nae thinlung alungkhu e ccungccapaw kha la ccaan oh, tuh-e tuh Pachia malang myarya aphutepaw nynh thua.⁵Pawccecize langmawlya e Pachia a doliakuh hae paw, athyaapaw nopi hae nynh mah tuhcite ccaankuh hae zah mih vawpaw hae kaw kha a ngae hae.⁶Sarah nynh Abraham kaw kha ngae zah bawipaw cite a ko hawte, minmin mah kaw a ngae hae; nanning nynh hurawnaw kha ri leite ahoypaw kha na cyi oh ze, Sarah ccanung hae nynh na thua oh.

⁷Tuhawte vawpaw hae nanning, zu hae tuh a thawzya huapaw nopi nynh athua hae cipaw kha nyh oh; hiinnaw te asekuhpaw thawccinaw rho a ccoubua hae paw athua hae hawte sawtuanaw pya oh lah, thaekuthyanaw te umkheih oh; tuh-e tuh nae sawsangnaw akhawpaw a um khyh nawlan nynh thua. Ahmepaw hanlan Teingnaw

⁸Nyathyakou ka ho rypaw tuh: nanning balyn nynh alokuhpaw tuanaw hoi oh, thawccikunaw, uteno hawte sungsakunaw, ngaethyaumsakunaw te lungnenaw hoi oh.⁹Hoyleinaw kha hoyleinaw te liaru nan oh, saryanaw kha saryanaw te liaru nan oh lah, hythuanaw khate liaru oh. Pawccecize nanning tuh hythuanaw rho kha ccou khylan kopaw nynh na thua oh.¹⁰Pawccecize“Hiinnaw kha ry zah ccyh ahoypawa rypaw ccungccaw nynha munglae kha hoyleinaw kyatesungkuh sah lah, a mung kyatehynbya ho nan sah;¹¹hoyleinaw kha sibia sah lahahoypaw kha cyih sah;daenaw kha ccung sah lah,daenaw mue lan zuakuh sah.¹²Pawccecize Bawipaw mit nynhmiding hae kha do zah,a nakaring nynhmih sawsangnaw kha a thae.Thuasalama Bawipaw mitmae nynhhoyleinaw a raetu hae kha a dou.”

¹³Nanning tuh hoynaw a rae rypaw na thua oh ze, hum nynh mou vawsaw ae pya cih oh?¹⁴Thuasalama dingnaw keiccu na teing oh ze, hythua ccoupaw nynh na thua oh. Minmin hurawnaw kha rih nan oh, nae lungvaw mah saw nan sah.¹⁵Thuasalama nae thinlung kya Khri kha Bawipaw lante sawtua oh. Nae kya umpaw ngaehoinaw konglang ae khia oh paw ccungccaw miakaw kha nebaleih lante, sawtuate hopya lan zungzae paccynkuh oh;¹⁶ahoypaw mawtemaw nykunaw thinlung kha hoi oh; tuhteze nynh Khri kya ahoypaw nae ozia kha ae ccae oh zah thethya ae ho oh paw ccungccaw hae tuh mih maethah cih.¹⁷Pawccecize Pachia rynaw athua ze, hoyleinaw raenaw hanlan teing laeze hoynaw raenaw hanlan teing tuh ahoyhua.

¹⁸Pawccecize Khri mah seinaw keiccu vaekheit te phe azaw lan a teing, aening kha Pachia kalan thuakhae khylan adingpaw tuh ading lei hae paw hanlan pynsaw kya chia athua zemah muisaw liate hiinsah athua.¹⁹Tuh-e muisaw liate Khri nynh mah cceih zah thonginn kya umpaw muisaw hae kha phung a hopya hae.²⁰Tuh-e muisaw hae tuh langmawlya Noah she lya sanphalung sak athua lyaze Pachia nynh lungsaete a ngaw lya hae kawngae lei hae paw nynh athua hae, tuh-e sanphalung kya zyataripaw ccungccaw lu tarya kha tui kyate khum athua hae.²¹Tuh-e tuh atu aening yn khumpaw baptisma muihsahnaw nynh thua. Tuh-e baptisma tuh pynsaw kyate athupaw singpaw kha thua khyh, Jesu Khri thoothuinaw liate ahoypaw mawtemaw nykunaw thinlung kyate Pachia kalan byakinkupaw kha nynh thua.²²Tuh-e Khri tuh vaawlang kae zah, vaaw hae, kawhoinaw hae te thungnaw hae kha a kuihkaw kya nung zah Pachia ranglang khe a um vae. Hiinnaw Rulaekunaw

¹Khri tuh pynsaw kya tuhcite a teing hawte, nanning mah tuhcihawpaw tuanaw khate ccaankuh oh; pawccecize pynsaw kya a teingpaw ccungccaw tuh seinaw kyate a lue vae.²Tuhcite a pynsaw kya a hoi ungpaw ccyh kha ccungccaw rynaw hanlan hiin vae leite Pachia rynaw hanlan a hiin nawlan nynh thua.³Pawccecize Zenta hae nynh a rae ry hae paw myarya ohhuaku rynaw, chiisaw rynaw, ruinaw, eih hoysah kaesynaw, zu-aete hoysahnaw, luathua-ae-ui lan umpaw zohtuh beiknaw kya ciakute alia vae paw ah ccyh tuh azaw vae.⁴Atu tuh nanning nynh tuhcihawpaw alawepaw hoysahnaw kya minmin ryte na mungku vae khyh oh paw kha mih ngaeangthua zah thethya ae ho oh.⁵Minmin tuh mihiin te michi byapia lan a paccynkuhpaw Pachia malang khe mimaw konglang kha oun phykuh cih hae.⁶Tuh-e keiccuze michi hae kalan heize thehoypaw tuh ho a la thua; tuhteze nynh minmin tuh pynsaw kya ccungccaw lante byapia athua hae zemah, muisaw kya Pachia hawte a hiin cih hae. Pachia Phu-enaw elang Ryalah

⁷Pawpaw balyn athangnaw tuh anae vae; tukeiccuze sawsangnaw elang hawrarih lante raeringkute um oh.⁸Pawpaw balyn laeze lu kheit te lu kheit sungsakunaw kha tynkaring lan kyngkuh oh; pawccecize sungsakunaw nynh seinaw pataepi kha a bongpya.⁹Ccohku leite lu kheit te lu kheit mikhia thuasakuh oh.¹⁰Ccungccaw miakaw nynh lasung kha na mue oh hawte, Pachia thawccinaw aphuinphuin a ccytu ahoypaw synriatu hae hawte, lu kheit te lu kheit ryalawpakuh oh.¹¹Jesu Khri liate pawpaw balyn kya Pachia tuh phu-esah athua nawlan, lukhakheit nynh phung a ho ze, Pachia bya thyhte ho sah, lukhakheit nynh rya a lawpya ze, Pachia nynh a pyapaw thawzung thyhte lawpah sah. Phu-enaw te uknaw kaw tuh zungzae te zungzae cia Pachia kya a um. Amen.
Khriccaaw hawte Teingnaw

¹²Sungsah hae, nanning syntawtua khylan nae tungvaw acyihkuhpaw maee lang ruapaw syntawnaw kha nae tungvaw kya acyihkuh boi leipaw uccaw hawte nae ngaeangthua nan sah.¹³Nanning tuh Khri teingnaw a neethungkuh bua hae paw na thua oh keiccuze nae lungtua sah, pawccecize a phu-enaw yn langkuh te, myarya nae lungpaw cih.¹⁴Khri min keiccuze sarya na thua oh ze, lungtuapaw nynh na thua oh; pawccecize phu-enaw muisaw athuapaw Pachia Muisaw tuh nae tungvaw a um. Aning tuh minmin kalan te thethya ho thua zah, nanning kalan te phu-esah athua.¹⁵Nanning kyaze hum sanmah ccungccaw theihpaw hawte, miruhpaw hawte, ahoy leipaw ryalahtu hawte, mingccang hae kong a ccukuh buapaw hawte la teing nan oh.¹⁶Tuhzemah lukhakheit nynh Khriccaaw athua keiccu a teing ze, a maethah nan sah; hynh-e hanlan Pachia kha a phu-esah sah.¹⁷Pawccecize Pachia innbyn kyate byapianaw kha masaty tho lan accyh azaw vae; tuh-e tuh aening kyate masaty atho lanze, Pachia kya-e thehoypaw a ngae lei hae paw kya-e athangnaw tuh pawcihte athua cih?¹⁸Te“Midingpaw khakhum lan kou aru lanze,Pachia pawlangria leipaw temiseipaw tuh pawkyamoualangkuh cih hae?”

¹⁹Tukeiccuze Pachia rynaw thyhte a teing hae paw nynh tuh ahoypaw rya kha lawte mih hiinnaw kha a lungzipaw Raetu kalan khe pyakuh hae sah. Pachia Tuuphu Do-oihnaw

¹Pastor athua buapaw, Khri teingnaw hae kong ccaekia athuapaw te yn langkuh cih paw phu-enaw a neethungkuh buapaw mah athuapaw, kae nynh nanning laku e pastor hae kha thawte kae hyy oh:²Nae kya a umpaw Pachia tuuphu hae kha la do-oih oh. Nangsekunaw keiccu thua leite Pachia rynaw thyhte lungthote do-oih oh lah, anungsikuhpaw muenaw hanlan thua leite thawmuinte la do-oih oh.³Do-oih lan cite nanning ae pya oh paw tuuphu hae kha uk te uk leite, minmin hanlan dosuinkupaw lang la tang oh.⁴Tuurintu Lupi he yn langkuh te, anaan kho leipaw phu-enaw bawilukhung kha na mue cih oh.⁵Tuhawte anohua hae paw nanning, atanghua hae paw kaw kha ngae oh. Nae balynte lu kheit te lu kheit zakawsangsakunaw khate ccaankuh oh; pawccecize,“Pachia nynh a lysakuhpaw kharawse zah,zakaw a sangsakuhpaw khathaw a cci.”

⁶Tukeiccuze accyh he yn zaw te, nanning kha Pachia nynh ae hangthung nawlan oh, Pachia kya-e a thawsaepaw kuihkaw khe zakawsangsakuh oh.⁷Aning tuh nanning ae do-oih oh paw athua keiccuze nae thinphangnaw balyn kha amaw tungvaw khaleih nung oh.⁸Hawrarih lan um oh; raeringkute um oh; pawccecize nae rhawpaw Satan tuh a sia a ruapaw chindeih hawte hum vema ka laang cih cite ccungkute a khiakuh.⁹Laephi vaw e nae uno hae tuh tuhcihawpaw riathaenaw a teing hae cipaw kha nyh oh lah, nae zynnaw kya varyng tynte Satan kha la dou oh.¹⁰Khri Jesu liate zungzae tynpaw a phu-enaw kalan ae kotu oh paw, thawccinaw balyn a hoitupaw Pachia nynh sosoh na teing kou oh te, nanning kha ae ccingsah cih oh, ae thadynsah cih oh, thaw ae saesah cih oh zah ae tynsah cih oh.¹¹Amaw kya thungnaw huhan tuh zungzae te zungzae cia um sah. Amen. Nyathya Beihlangkunaw

¹²Nanning kha hyy biate, hynh-e tuh Pachia kya-e ahmepaw thawccinaw nynh thua cipaw kha ccaekiakhante, Silas bawmnaw liate nae kalan ccaw dyntari kae zei. Silas tuh nae hanlan a lungzipaw uno cite ka tuapaw nynh thua; tuh-e thawccinaw kyakhe tynkaring lan thadyn oh.¹³Babilon khuapi kya umpaw, nanning ryte po na thuakheih oh paw khriccaawbuu nynh nanning kha ae beihlang oh; te ka ccapaw Marka nynh mah ae beihlang oh.

¹⁴Sungsakunaw kya-e myngkunaw khate lu kheit te lu kheit beihlangkuh oh.
Khri Jesu kya na um oh paw nae balyn tungvaw kya daenaw la um sah. Amen.

Bible Society of Myanmar

https://app.library.bible/content/1a340f5ae072b2f4