HEBRU1
Ccapaw kyate Oun Hopya
1Langmaw lyaze profeh hae kyate ah minpaaw hae kya aphuinphuin te avae patae bya a hopaw Pachia nynh,2hynh-e nyathyakou ccyh kya tuh a Ccapaw kyate nynh aening kha bya oun hopya vae. Tuh-e Ccapaw tuh pawpaw balyn rhoccoutu lang khang zah, amaw liate vaaw te lae hynh mah a rae.3Tuh-e Ccapaw tuh Pachia phu-enaw awnawpaw te Pachia thuanaw muinsan langsakunawpaw nynh thua. Athungpaw a bya liate pawpaw balyn kha po a tynsah. Aening seinaw hae kha amaw ccaccei nynh he oun thyaasahpah koute ahangnaw kya Lesaenaw ranglang khe a dahung vae. Vaaw hae laeze Ccapaw Lesaehua4Vaaw hae laeze houh ahoy huaccepaw min kha a ccou keiccuze Ccapaw tuh vaaw hae laeze patae alesaehua.5Pawccecize,“Nang tuh ka Ccapaw nynh na thua,atunin nang khakae saahku vae,”cite thuasah,“Kae tuh a Paaw ka thua cih zah,aning tuh ka Ccapaw athua cih,”cite thuasah vaaw hae kha Pachia nynh hummou a hopya boi?6Te ccatawccaw kha laephi kalan he yn thuakhae te,“Pachia vaaw hae balyn nynhamaw kha beik hae sah,” a ci.7Pachia nynh vaaw hae konglang kha,“Pachia nynh a vaaw hae khakhivae lang rae zaha ryalahtu hae khamaeesoi lang a rae,” a ci.8Thuasalama Ccapaw konglang tuh,“Pou Pachia, na bawitungkhung tuhzungzae te zungzae ciaatynpaw nynh thua.Adingpaw ukkunaw tuhna peenaw ukkunaw nynh thua.9Dingnaw kha na sungsah zahhoyleinaw kha na hua;Tukeiccuze pou Pachia,na Pachia nynh na ruiban hae laezeae hangthung zahlungtuanaw chitui ae thuh vae,” a ci.10Tukoute, “Pou Bawipaw,athotakaw kya laephi khana bing, te vaawlang hae tuhna kuih te na raepaw nynh thua.11Minmin tuh aroh cih hae,thuasalama nang tuhna tyn zungzae;boeining nynh apue hawtetuh-e hae tuh apue cih hae;12minmin kha boeiningzung kheit hawte na bi cih hae zahminmin tuh a rulaekuh cih hae.Thuasalama nang tuhna rulaekuh khyh zahna hiinnaw tuhthang boi lan khyh,” a ci.13Thuasalama, “Na rhaw hae kha na ccusy lang kae raepya makhia tuh, ka ranglang khe dahung,” cite vaaw hae kha hummou a hopya boi?14Minmin balyn tuh khumnaw rho a ccou vae cih hae paw kha ryalawpya khylan sawpaw ryalawpahtu muisaw hae thua khyh hae tou? Byathaetu hae Raeringnaw Pyanaw1Tukeiccuze aening nynh ah cciasei khyh nawlan oh, ah thae vae oh paw byaccing kha houh ah kyngku lan oh paw nynh thua.2Pawccecize vaaw hae kha mangte hopaw bya tuh tyn zah, cyiseimenaw miakaw te kawngae leinaw nynh atazaepaw detahnaw kha a mue hae lanze thuasah,3myarya alepaw khumnaw kha aening nynh pawlang ah ria khyh oh ze thuasah pawcihtemou ah lue kho cih oh? Bawipaw nynh masaty lya mawte a hopaw hynh-e khumnaw tuh ahme cite amaw bya a thae hae paw nynh aening kya ccaekia a khan hae.4Tuh-e ccaekiakhantu hae ryte Pachia nynh mah muihsahnaw hae, ngaeangnaw hae te khuaruarunaw aphuinphuin khate thuasah, amaw a rynaw thyhte Thyaa Muisaw nynh a pyapaw lasung hae khate thuasah ccaekia a khan. Vaaw hae laeze Anehua lante A Rae5Aening nynh ah ho oh paw, yn thua vae cih paw laephi kha Pachia nynh vaaw hae kuihkaw kya nung khyh.6Thuasalama Ccathyaa san kheit kyakhe lukheitpaw nynh,“Ccungccaw tuhpaw athua keiccu mounang nynh na tua na lia?Tuhkhyhze, ccungccaw ccapaw tuhpaw athua keiccu mou na do-oih?7Amaw kha vaaw hae laezeccapyh anehua lante na rae;phu-enaw te sawtuanaw khana khungsakuh zah,8pawpaw balyn khaa ccuphe kaw khe marya na nung,”cite ccaekiakhan zah a ho. Pawpaw balyn kha amaw zakaw marya a nung cipaw tuh amaw zakaw a nung leipaw pawsang um khyh cinawpaw nynh thua. Thuasalama pawpaw balyn amaw zakaw marya a nungpaw kha atu aening nynh ah muih loh khyh oh.9Thuasalama Pachia thawccinaw liate ccungccaw miakaw hanlan chinaw taangtua khylan, vaaw hae laeze ccapyh anehua lante rae athuapaw Jesu kha aening nynh ah muih oh. Chinaw a teing keiccuze aning tuh phu-enaw te sawtuanaw lukhung kha khungsah athua.10Pawpaw balyn tuh amaw liate um zah amaw hanlan athuapaw Pachia nynh ccaaw hae patae kha phu-enaw kalan a cciakhaenaw kya, minmin khumnaw a thokhaetupaw kha a teingsahnaw liate accingpaw lang a tangsahpaw tuh angaekuhpaw nynh thua.11Pawccecize a thyaasahtu te thyaasah athuapaw balyn tuh parouhte mih thonaw ccangkheit nynh thua. Tukeiccuze Jesu nynh minmin kha uno hae cite ko lan a maethyakhaekuh khyh.12Aning nynh,“Ka uno hae kya na min khaka siakhae cih,a pumkuh hae paw ngaelung kyanamaw thehoysahnaw hlaw khaka sah cih,” acikuh.13Te, “Amaw khaka doliakuh cih,”bua ci zah,“Pachia nynh yn pyapawimua hae te kae tuhhein kya kae um,”bua acikuh.14Tukeiccuze imua hae tuh chii te saw kha a neethungkuh bua hae paw athua keiccuze, Khri amaw mah tuhawte chii te saw kha a neethungkuh bua; tuhcite Khri a chinaw liate chinaw tungvaw kawhoitu Satan kha rote,15chi raw a ri hae keiccuze mih hiin lungkhu balyn seetangnaw kya um hae paw kha luesah khylan nynh thua.16Pawccecize Khri nynh vaaw hae kha bawm khyh hae, Abraham ciihan kha nynh a bawm cipaw phe aria.17Tukeiccuze ccungccaw hae seinaw hanlan seishawnaw raepya khylan, Pachia te asekuhpaw uccaw hae kya Khri tuh thawccithyapaw te a lungzipaw Ranpibawi Lupi athua nawlan, pawpaw balyn kya a uno hae te a loku lan hae paw nynh thua.18Amaw nynh tuhounaw kha a teing vae keiccuze tuhounaw a teing hae paw kha a bawm kho hae.Khri tuh Moses laeze Lesaehua1Tukeiccuze vaawlang te asekuhpaw konaw kya a pabua hae paw athyaapaw uteno hae, aening nynh ccaekia ah khan oh paw Locceihtu te Ranpibawi Lupi athuapaw Jesu kong kha tuatua oh.2Moses tuh Pachia inn balyn kya a lungzi hawte, Jesu mah amaw a khangtupaw kya a lungzipaw nynh thua.3Inn saktupaw tuh inn laeze sawtuanaw a ccouhua hawte, Jesu tuh Moses laeze phu-enaw mue lan angaekuh huapaw nynh thua.4Pawccecize inn miakaw tuh ccungccaw lukhakheit nynh a sakpaw nynh thua, thuasalama pawpaw balyn a saktupaw tuh Pachia nynh thua.5Moses tuh nyalang ho athua cih paw uccaw hae kha ccaekiakhan khylan Pachia inn balyn kya ryalahtu lu kheit hawte a lungzipaw nynh thua.6Thuasalama Khri tuh Pachia inn kya ccapaw hawte a lungzipaw nynh thua. Aening nynh zynkunaw thuasah, ngaehoinaw kya-e lungtuanaw thuasah athangnaw cia tynkaring lan ah kyngku oh ze, aening tuh amaw a inn nynh ah thua oh. Zyn leinaw Raeringnaw Pyanaw7Tukeiccuze Thyaa Muisaw nynh,“Atunin amaw roi kha na thae oh ze,8ramkaw kya syntaw nin kyaa dou lya hae hawtenae lungkhung nan oh.9Rya ka lawpaw balyn khanae minpaaw hae nynhkum sung pali cia mang a muih hae pitekae kha yn syntawtua hae.10Tukeiccuze kae tuhtuh-e ciihan kya ka thinria zah,‘Mih thinlung tuh palei cceihsei zahka laanpi kha nyh khyh hae,’ ka ci.11Tukeiccuze ka thinria zah,‘Minmin tuh ka haeungnawlungkhu lang tee lan khyh hae,’cite bya ka kinku,” a ci.12Uteno hae, nanning nynh zyn leinaw thinlung ahoy leipaw kha hoite, a hiinpaw Pachia kyate na pou khyh nawlan oh raeringkuh oh.13Thuasalama “atunin” cite hopaw accyh a um lungkhu balyn tuh lu kheit te lu kheit nin takyhte thawzung la pyakuh oh. Tukhyhze tuh seinaw kya-e lingkunaw keiccu nae lungkhungsei cih.14Pawccecize aening nynh atakaw e ah zynkunaw oh kha athangnaw cia tynkaring lan ah kyngku oh ze, aening tuh Khri a ruiban hae ah thua vae oh.15Ccathyaa kyaze,“Atunin Pachia roi khana thae oh ze,nae minpaaw hae nynhPachia a dou lya hae hawtenae lungkhung nan sah,” a ci.16Pawccecize mang a thae hae pite amaw a dou hae paw tuh hum hae mou? Moses nynh Izip ram kyate a cciakhae hae paw balyn kha thua khyh hae tou?17Thuasalama kum sung pali lungkhu Pachia tuh hum tungvaw mou a thinria? Ramkaw kya mih rhua a huekuh hae paw, a sei hae paw kya thua khyh tou?18A haeungnaw lungkhu lang minmin tuh tee lan khyh hae cite Pachia nynh hum hae mou bya a kinnuaku hae? Kawngae lei hae paw kha thua khyh tou?19Tukeiccuze zyn leinaw keiccuze minmin tuh tee kho khyh hae cipaw ah muih oh. Pachia Byakinpyakupaw Haeungnaw1Tukeiccuze Pachia haeungnaw lungkhu lang teenawpaw byakinpyakupaw mang a um pite, nanning kyaze lukhakheit nynh tee leite a um khyh nawlan raeringkuh oh sih.2Pawccecize thehoypaw tuh minmin kalan mah hopya athua hawte, aening kalan hopya athua vae; thuasalama a thaetu hae nynh zynnaw te a lawku khyh hae keiccuze ho athuapaw bya tuh minmin hanlan thane khyh.3Pawccecize a zyn hae paw aening tuh tuh-e haeungnaw lungkhu lang ah tee oh. Laephi athonaw aleihpaw kyate Pachia a ryalaw hae tuh phe athang vae zemah,“Ka thinria zah, ‘Minmin tuhka haeungnaw lungkhu langtee lan khyh hae,’ citebya ka kinku,”a ci hawte nynh thua.4Pawccecize Ccathyaa san kheit kya nin sarinaw nin kong kha hynhte a ho, “Pachia tuh nin sarinaw nin kya a ryalaw hae balyn kyate a haeung,” a ci.5Tuh-e Ccathyaa kya, “Minmin tuh ka haeungnaw lungkhu lang tee lan khyh hae,” bua a ci.6Tukeiccuze, ccungccaw abang hanlan tuh-e haeungnaw lungkhu lang tee khonaw phang a um, masaty thehoypaw hopya athua hae paw minmin tuh kawngae leinaw keiccuze tee khyh hae.7Pachia nynh anin nin kheit kha,“Atunin” cite khya zah,ccyh khaw aro koute,langmawlya a la ho vae hawte,“Atunin Pachia roi khana thae oh ze, nae lungkhung nan sah,”cite David kyate a ho.8Pawccecize Joshua nynh minmin kha haeungnaw a la pya hae ze, tuh-e koute nin ccangpaw kong kha Pachia nynh la ho vae lan khyh.9Tukeiccuze Pachia ccungccaw hae hanlan sabbath haeung nin tuh a um ung.10Pawccecize Pachia nynh a ryalaw hae kha thangsah zah a haeung hawte, Pachia kya-e haeungnaw lungkhu lang a teepaw ccungccaw tuh amaw a ryalaw hae kyate a haeung.11Tukeiccuze minmin nynh kawngae leinaw keiccu a khuliaku hae hawte hum sanmah a khuliaku khyh nawlan, tuh-e haeungnaw lungkhu lang tee lan thawte zuakuh oh sih.12Pawccecize Pachia Bya tuh ahiinpaw, athungpaw te kyn ning te ahepaw thaloi laeze ahe huapaw thua zah, hiinnaw te muisaw, kintui te ru atungkunaw hae phianaw cia heize a thuing khopaw nynh thua; thinlung kya-e tuanaw te paccynkunaw kha mah aphiathyapaw nynh thua.13Pachia malang thuruh khopaw raepaw uccaw pawsang um khyh, pawpaw balyn tuh amaw malang khe akhawpaw um lei lante pong alangkuh; aening nynh ahmaw konglang kha amaw kya ah phykuh cih oh.14Tukeiccuze vaawlang po a khung vae paw, alesaepaw Ranpibawi Lupi, Pachia Ccapaw Jesu ah hoi oh keiccuze ah ccaekiakhannaw kha tynkaring lan kyngkuh oh sih.15Pawccecize aening ah Ranpibawi Lupi tuh aening thawzyanaw kya thawccihthya leipaw thua khyh, aning tuh aening hawte tuhounaw aphuinphuin a ing, thuasalama seinaw rae khyh.16Tukeiccuze ahoboupaw ccyh kya bawmnaw mue nawlan, ngaethyaumsahnaw te thawccinaw kha ah mue nawlan oh, thawccinaw bawitungkhung kalan khe rawhoyte cceih oh sih. Ranpibawi Ryalaw1Ccungccaw hae laku kyate popaw ranpibawi lupi miakaw tuh seinaw hae hanlan silawnaw te lasung hae kha Pachia kalan pya khylan, Pachia lante asekuhpaw uccaw hae kya ccungccaw hae ccelang khangpaw nynh thua.2Amaw mah thawzyanaw aphuinphuin a hoipaw athua keiccuze aning tuh a nyhthya lei hae paw te a cceihsei hae paw tungvaw kya lungnenaw a hoi kho.3Hynh-e keiccuze ccungccaw hae seinaw hanlan te amaw seinaw hanlan aning nynh silawnaw a rae aho.4Hynh-e sawtuanaw hynh hum nynh sanmah amaw hanlan lawkuh kho khyh, Aaron a ko hawte Pachia nynh a kopaw ccungccaw rou nynh sawtuanaw kha a lawkuh.5Tuhawte Khri mah Ranpibawi Lupi thua khylan amaw te amaw kha phu-esakuh khyh, thuasalama,“Nang tuh ka Ccapaw,atunin nang kha kae saah vae,”cite a hotupaw nynh amaw kha a phu-esah.6Ccathyaa ccangpaw kyakhe,“Nang tuh Melkhizedek thuanaw thyhtezungzae ranpibawi nynh na thua,”cite mah a ho.7Jesu tuh pynsaw lante a um lyaze, amaw kha chinaw kyate a khum khopaw kalan thawte sia zah mitphi luate, sawsang te a ngia; aning tuh Pachia raw a ri keiccu thaepya athua.8Pachia Ccapaw mang athua zemah, a teingpaw uccaw hae liate aning nynh kawngaenaw kha a ccangku.9Accingpaw lang rae athua koute, amaw kaw a ngae hae paw balyn hanlan aning tuh zungzae khumnaw athotupaw lang yn tang.10Melkhizedek thuanaw thyhte Ranpibawi Lupi lante Pachia nynh a ko vae paw nynh thua. Hyynaw te Raeringnaw Pyanaw11Hynh-e konglang ho lanpaw patae kae hoi zemah na thaethya khyh oh keiccuze ccaesahpya lan aru.12Pawccecize nanning tuh atu lya ccangpahtu lang heize tang lan vae paw, thuasalama Pachia bya athotakawnaw kha bua ccangpya na ho ung oh. Looh tangpaw thua leite samatei aho ungpaw nynh na thua oh.13Samatei kyalya a neih ungpaw ccungccaw miakaw tuh imua athua ung keiccuze dingnaw bya kha nythyanaw hoi khyh.14Thuasalama looh tangpaw tuh piccan hae hanlan nynh thua; tuh-e hae tuh ahoypaw te athahpaw phiathya nawlan nynaw a hoi hae paw nynh thua. Piccan Thuanaw kalan Lethungnaw1Tukeiccuze Khri konglang atakaw ccangpyakunaw hae kha cciataw te, piccan thuanaw ccangpyakunaw kalan khe cceih oh sih. Achihpaw ryalaw kyate ngaesikunaw kong, Pachia zynnaw kong,2Baptisma kong ccangpyakunaw, kuih khangnaw kong, michi thoothuinaw kong te zungzae byapianaw kong ccangpyakunaw hynh aleihpaw te bua tho vae leite piccan thuanaw kalan cceih oh sih.3Pachia nynh oun ua ze, hynh-e hynh ah cyih cih oh.4Pawccecize vaekheit awsah athua vae hae paw, vaawlang e lasung a taangtua vae hae paw, te Thyaa Muisaw a ccoubua vae hae paw,5te Pachia bya ahoynaw te yn thua vae cih paw she kya-e thungnaw hae kha a taangtua vae hae paw,6tuh-e hae nynh a khuliaku hae ze, Pachia Ccapaw kha mimaw hanlan bua a khiade hae paw thua zah raerae alangkuh lan maethyasah hae paw athua keiccuze minmin kha ngaesikunaw kalan bua kikhae lanpaw tuh thua kho khyh.7Pawccecize laephi nynh amaw vawlan palei leih accahpaw khuaatui kha neih zah tuh-e vawlan ryalahtupaw hanlan thingthae-eccang kha a pousahpya, te tuh-e laelung tuh Pachia kyate hythuanaw kha a ccou.8Thuasalama hinpaw te thabu a pousahpaw laephi tuh thane vae khyh zah, thyalawnaw kalan a naekuh vae, tuh-e athangnaw tuh maee te soi lanpaw nynh thua vae.9Thuasalama sungsah hae paw, hynhcite nae kya kae ho zemah, nanning nynh khumnaw te azuikuhpaw uccaw, ahoy huapaw uccaw hae kha na cyih cih oh cite kae zynkuh.10Pawccecize Pachia nynh nae ryalaw kha thuasah, mithyaa hae hanlan rya na lawpya vae oh paw te rya na lawpya ung oh paw kya amaw min hanlan na langsaku oh paw sungsahnaw kha thuasah kharouh ning lan ciate Pachia tuh a ding leipaw thua khyh.11Nanning lu raveih nynh na ngaehoinaw oh kha phe accing nawlan, tuhcihawpaw zuakunaw kha athangnaw cia na langsaku nawlan oh kou kae ry.12Tuhteze nynh nanning tuh nae thawnaw leite, zynnaw te lungsaenaw liate byakinpyakunaw rho a ccou hae paw kha thydokuh hae paw na thua cih oh. Pachia Byakinpyakunaw Atynpaw13Pawccecize Pachia nynh Abraham kha bya he a kinpakuh tuh, amaw lae ale huapaw min kha phyate byakinku lanpaw a um khyh keiccuze amaw te amaw kha byakinkuh zah,14“Thanccingte nang kha hythua kae pya cih zah kae pungthungsah cih,” a ci.15Abraham nynh lungsaete a ngaesang keiccuze byakinpyakupaw kha a mue.16Ccungccaw hae nynh tuh mimaw laeze ale huapaw min kha phyate bya leih a kinku hae; byakinkunaw nynh hopaw bya kha tynsah zah bya-eikunaw balyn kha a thangsah.17Tuhte Pachia nynh bya a kinpyaku hae paw rho a ccoutu hae tungvaw kya arulaekuh kho leipaw a khuakhannaw kha ccaerarih lan langsaku a ry keiccuze a byakinnaw liate a tynsah.18Khynnaw ah mue vae oh paw aening nynh tuh ah malang oun nungpyapaw ngaehoinaw kha kyngku khylan, alepaw thawzung pyanaw ah hoi kho nawlan oh, hynbya a ho kho leipaw Pachia nynh arulaekuh kho leipaw uccaw ccangning kya hynhte a cyi.19Tuh-e ngaehoinaw tuh phe ariapaw te atynpaw thinlung kya-e sivawhinpi hawte ah hoi oh zah, hminthyaa kya zokhawpaw boei lungkhu lang po a tee.20Melkhizedek thuanaw thyhte zungzae Ranpibawi Lupi athuapaw Jesu, aening hanlan Zeccuetupaw tuh tuh-e kalan phe a tee vae. Ranpibawi Melkhizedek1Melkhizedek tuh Salem siapharan thua zah Ahang Huaccepaw Pachia kya-e ranpibawi nynh thua; aning nynh siapharan hae chianaw kyate yn kipaw Abraham kha cciadue zah hythua a pya.2Abraham nynh mah amaw kha luadepaw uccaw hae balyn kya-e pumhaw pumkheit kha a pya. Masaty a min asuilan tuh, “dingnaw siapharan” nynh thua, tukoute Salem Siapharan mah athua, tuh-e tuh “daenaw siapharan” cipaw nynh thua.3Aning tuh paaw hoi khyh, nung hoi khyh, thokeinaw hoi khyh, hiinnaw atho ccyh te athangnaw mah hoi khyh, Pachia Ccapaw hawte thua zah po atynpaw ranpibawi nynh thua.4E ccungccapaw tuh pawcih nynh alesae cipaw kha tuatua oh! Ciihan kyaze paaw athuapaw Abraham nynh heize amaw kha luadepaw uccaw hae kya-e pumhaw pumkheit a pya.5Ranpibawi thuanaw a hoi hae paw Levi ccaaw hae nynh mih uno hae athuapaw ccungccaw hae tuh Abraham ciihan athua hae zemah Kawbya thyhte minmin kyate pumhaw pumkheit kha lawkunaw kaw a hoi hae.6Thuasalama a thokeinaw kha Levi kyate suih athua leipaw Melkhizedek tuh Abraham kya-e pumhaw pumkheit kha ccou zah, byakinpyakunaw a muepaw Abraham kha hythua a pya.7Anyaa huapaw kha alesae huapaw nynh hythua a pya cipaw tuh eiku lanpaw um khyh.8E konglang kya, a chihthyapaw ccungccaw hae nynh pumhaw pumkheit kha a ccou hae; thuasalama khuhlang tuh a hiin cite ccaekiakhanpya athuapaw nynh pumhaw pumkheit kha a ccou.9Pumhaw pumkheit a ccoupaw Levi nynh mah Abraham kyate pumhaw pumkheit a pyabua cite ho kho athua.10Pawccecize Melkhizedek nynh Abraham te a tungku lya kha Levi tuh a paaw pyn lungkhu nynh a um ung.11Tukeiccuze ccungccaw hae tuh Levi kyate a thopaw ranpibawi thuanaw kyate kawbya kha a mue hae, minmin nynh Levi kyate a thopaw ranpibawi thuanaw liate accingpaw lang a tang kho hae ze, Aaron thuanaw thyhte thua leite, Melkhizedek thuanaw thyhte ccangpaw ranpibawi yn pou lanpaw tuh pawmou aho ung?12Pawccecize ranpibawi thuanaw tuh rulae athua keiccuze kawbya mah rulae aho vae.13Pawccecize e uccaw hae nynh a honuathepaw ccungccaw tuh ccangpaw phin nynh thua. Tuh-e phin kyate hum nynh sanmah silawhang kya ryalawpah boi khyh.14Pawccecize ah Bawipaw tuh Judah phin kyate nynh yn langku cipaw tuh phe aria. Tuh-e phin tuh ranpibawi thuanaw te asekuh cipaw Moses nynh kharouh ho khyh. Melkhizedek tahawpaw Ranpibawi15Melkhizedek tahawpaw ccangpaw ranpibawi alangku lanze, tuh-e tuh houh ariapaw nynh thua.16Tuh-e paw tuh pynsaw lante kawbya thyhte ranpibawi thua khyh, athang kho leipaw hiinnaw kya-e thungnaw thyhte nynh athua.17Pawccecize Pachia nynh,“Nang tuh Melkhizedek thuanaw thyhtezungzae ranpibawi nynh na thua,”cite ccaekia a khan.18Pawccecize voihaw lante, langmaw e kawbya tuh a thawzya zah ccungkia khyh keiccuze vua athua,19pawccecize kawbya nynh pawsang ccingsah khyh; voihaw lante, ahoy huapaw ngaehoinaw kha thuakhae athua, tuh-e ngaehoinaw liate aening tuh Pachia kalan ah naekuh oh.20Byakinkunaw um leite aning tuh ranpibawi lang tangsah thua khyh; pawccecize ming hae tuh byakinkunaw um leite ranpibawi lang oun tang hae paw nynh thua.21Thuasalama Jesu tuh,“Bawipaw nynh, ‘Nang hynhMelkhizedek tahawpawzungzae ranpibawi nynh na thua,’cite byakinkuh zaha hopya keiccuzea tuanaw paleihkuh vae lan khyh,”cite a hopahtupaw liate ranpibawi lang yn tangpaw nynh thua.22Tuh-e byakinkunaw liate Jesu tuh ahoy huapaw byakinnaw kya-e aamahkhan lang yn tang.23Ranpibawi hae tuh a chi hae keiccuze tuh-e ryalaw kya po tyn kho vae khyh hae zah milu lante patae a cih hae.24Thuasalama Jesu tuh zungzae atyn keiccuze arulaekuh kho leipaw ranpibawi thuanaw kha a hoi.25Amaw liate Pachia kalan oun cceih hae paw kha aning nynh zungzae a khum kho hae, pawccecize aning tuh minmin hanlan ngiapyanaw rae khylan zungzae a hiin keiccu nynh thua.26Pawccecize athyaapaw, seibe lan accan leipaw, anungsikuh leipaw, misei hae kyate a phiakuhpaw, te vaawlang hae laeze ahanghua lan hangthung athuapaw tuh-e Ranpibawi Lupi tuh aening hanlan angaekuhpaw nynh thua.27Tuh-e ranpibawi lupi hae hawte, masaty amaw seinaw hanlan, te ccungccaw hae seinaw hanlan nin takyh silawnaw rae ho vae khyh, pawccecize amaw a pyn a pyaku lyakhe zungzae hanlan vaekheit te phe a ccingsah vae.28Pawccecize kawbya nynh thawzyanaw a hoipaw ccungccaw hae kha ranpibawi lang a khang hae. Thuasalama kawbya koute yn thuapaw byakinnaw kya-e bya nynh zungzae accingpaw Ccapaw kha a khang. Hopiatu1Atu ah ho oh paw uccaw hae kong abyapi tuh: Vaawram kya Lesaenaw bawitungkhung ranglang a dahungpaw, khahcihawpaw Ranpibawi Lupi kha aening ah hoi oh.2Aning tuh ccungccaw nynh sak leipaw, Bawipaw nynh a sakpaw beikbu ccaccing athuapaw beikinnthyaa kya Pachia ryalahtu nynh thua.3Pawccecize ranpibawi lupi miakaw tuh lasung hae te silawnawpaw khate silawpya khylan khangpaw nynh thua. Tukeiccuze hynh-e paw mah silaw nawlan ccangkhakheit a hoi aho.4Pawccecize aning tuh laephi vawlan a la um lanze, ranpibawi la thua lan khyh, pawccecize kawbya thyhte lasung te silawpahpaw ranpibawi hae a um.5Minmin tuh vaawlang e beikinnthyaa pungsan te alokuhpaw mynlyh kyakhe nynh rya a law hae. Tuh-e keiccu Moses nynh beikbu kha sak lan vae cite he a noukuh tuh, “Mua vawlan nang na kya langsahpya athuapaw pungsan thyhawte pawpaw balyn kha na rae nawlan raeringkuh,” cite Pachia nynh Moses kha raeringnaw a pya.6Thuasalama Jesu tuh ahoy huapaw byakinpyakunaw kya thadynsah thua zah ahoy huapaw byakinnaw kya-e hopiatu mah athua keiccuze atu aning tuh ahoy huaccepaw ryalaw kha phe a mue vae.7Pawccecize masaty e byakinnaw tuh seimenaw a la um khyh lanze, vaeningnaw byakinnaw kha ccung la thua vae lan khyh.8Pawccecize ccungccaw hae kya Pachia nynh seimenaw muihpah hae zah a hopaw tuh:“Israel phin te Judah phin hae rytebyakinnaw thawpawkae rae ccyh tuh solei yn thua cih;9Izip ram kyate minmin khakuih te ka sue hae zahka cciakhae lya hae ze,mih minpaaw hae ryteka raepaw byakinnaw thyhtethua vae lan khyh;pawccecize ka byakinnaw kyaminmin nynh atyn khyh hae keiccuzekae mah minmin khaka do-oih khyh hae citeBawipaw nynh a ci.10Tuh-e nin hae kouteIsrael phin kya ka rae lanpawbyakinnaw tuh hynhte nynh athua:Ka kawbya hae khamih lungkhu kya ka nung cih zah,mih thinlung kya ka zei cih;te kae tuh mih Pachiaka thua cih zah, minmin tuhka ccungccaw hae athua cih hae.11‘Bawipaw kha nytua,’cite lu kheit te lu kheitccangpyakute hopakuhvae lan khyh hae,pawccecize adih huaccepaw kyateale huaccepaw kyaciamih balynte kae khayn nyh vae cih hae.12Pawccecize mih hoyleinaw khangaethya ka umsah cih hae zah,mih seinaw khaka liathui vae lan khyh,” a ci.13“Byakin Thawpaw” a cipaw kya masaty byakinnaw kha arynpaw lang a tangsah vae. Ryn zah apuepaw uccaw tuh aro mawze azo cih. Vaaw te Lae kya-e Beikinnthyaa1Masaty byakinnaw nynh heize Pachia beiknaw phung hae te laephi vaw e beikinnthyaa kha a hoi.2Pawccecize beikbu kha sak hae zah, masaty khaan kya maeekhuatung, ccaboi te Nungpyapaw sanlou a um hae; tuh-e khaan tuh Hmin Thyaa a ci hae.3Ccangningnaw zokhawpaw boei nulang khe Athyaa Huaccepaw Hmin a ci hae paw khaan a um.4Tuh-e khaan kya mynkhuhpaw unawpaw sui silawhang te sui te po lekuh lan alaeekuhpaw byakin thingkua a um, tuh-e lungkhu kyatuin manna nungnawpaw sui ang, anaw toihpaw Aaron hoitang te byakin lungphe hae a um.5Tuh-e byakin thingkua vawlan phu-enaw kya-e cherub hae nynh ngaethyaumsahnaw tungkhung kha phang a dawkhaw hae, tuh-e kong tuh atu phe ccing lan ah ho kho loh khyh oh.6Tuh-e uccaw hae tuh tuhcite paccyn he athua te, ranpibawi hae nynh mih rya kha law khylan, beikbu masaty akhaan lungkhu langkhe leih a tee hae.7Thuasalama ccangningnaw akhaan lungkhu lang tuh ranpibawi lupi rou nynh chii ryte kum kheit ze vaekheit kyalya a tee. Amaw hanlan te ccungccaw hae nynh nyku leite a rae hae paw seinaw hanlan tuh-e chii te aning nynh si a law.8Ccangkheitnaw beikbu phang a thadyn lya tuh beikinnthyaa lungkhu lang ccianaw tuh hungpya thua loh khyh cipaw kha hynhcite Thyaa Muisaw nynh a muihsah.9Tuh-e beikbu tuh atu ccyh hanlan muihsahnawpaw nynh thua; tuh-e beikbu kya Pachia pyapaw te silawkunaw hae paw kha pya hae zah, tuh-e nynh a beiktu hae mawtemaw nykunaw thinlung kha ccingsah kho khyh.10Tuh-e tuh aepaw, niapaw, singkupaw aphuinphuin te pynsaw te asekuhpaw phunglang hae kyalya thua zah raethuinaw ccyh kyacia rou nynh mang athua.11Thuasalama Khri tuh phe alangkuh vae paw ahoypaw uccaw hae kya-e ranpibawi lupi lante yn thua zah, kuih te rae leipaw, tuh-e ho rypaw tuh kuih te rae athua leipaw, hynh-e raenaw kya-e athua leipaw, lesaehua zah houh accingpaw beikbu liate,12miaa hae te vaetuataw hae chii liate thua vae leite, amaw a chii liate Hmin Thyaa lungkhu lang vaekheit kyalya teete, aening hanlan zungzae shawkhawnaw kha oun raepya.13Pawccecize tangnuapaw hae te miaa hae chii, te maee te upaw vaetua tohlaw buhhaw hae khate a thyaa lei hae paw kha theipaw nynh pynsaw ccikanku nawlan a thyaasah kho lanze,14zungzae tynpaw Muisaw liate Pachia kya ccaenaw um leipaw, amaw te amaw a pyakuhpaw, Khri chii nynh a chihpaw ryalaw kyate a hiinpaw Pachia ryalawpya khylan naemaw nykunaw thinlung kha pawcihmou houh a thyaasah kho cih!15Tukeiccuze Khri tuh byakinnaw thawpaw kya-e hopiatu nynh thua, tuhteze nynh Pachia nynh a ko hae paw tuh bya a kinpyaku hae paw zungzae tynpaw rho uccaw kha a ccou kho cih hae, pawccecize masaty byakinnaw zakaw kya cyiseimenaw kha shawkhaw khylan Khri tuh chinaw a ing vae.16Rhohuinaw kong hynh ho lanze rhohuitu a chih koute rou nynh zui lanpaw athua.17Pawccecize rhohuitupaw a chih koute nynh rhohuinaw tuh cyi khonaw a hoi, rhohuitu phang a hiin lya tuh rhohuinaw nynh kharouh kaw hoi kho khyh.18Tukeiccuze masaty byakinnaw kha heize chii leite tynsah thua khyh.19Pawccecize Moses nynh kawbya ccauh kya-e kawbya miakaw kha ccungccaw hae balyn kalan a hopah kou hae te, tui pykuhpaw vaetuataw chii te miaa chii kha lah zah sekakungpaw tuuming te hyssop khate ccauh te ccungccaw hae balyn kha thei hae zah,20“Hynh-e tuh Pachia nynh nanning ae pya oh paw byakinnaw kya-e chii nynh thua,” a ci.21Tuhawte beikbu te Pachia beiknaw kya mangpaw uccaw hae balyn kha mah chii te pong a thei.22Kawbya thyhte pawpaw balyn chii liate vya thang lan thyaasah athua, chii luanaw um leite seingaethyanaw um khyh. Khri Silawnaw nynh Sei Thyaasahnaw23Tukeiccuze vaawlang umpaw uccaw hae pungsan kha khahcihawpaw silawnaw hae te thyaasah lanpaw tuh ahoboupaw nynh thua; vaawlang te asekuhpaw uccaw hae tuh tuh-e hae laeze ahoy huapaw silawnaw te nynh thyaasah athua.24Pawccecize thanccingpaw pungsan athuapaw, kuih te raepaw beikinnthyaa lungkhu lang Khri tuh tee khyh; atu aening ccelang Pachia muihnaw kya langku khylan, vaawram lang nynh a tee.25Tuhzemah ranpibawi lupi nynh amaw chii athua leipaw ryte Hmin Thyaa lungkhu lang kum takyh a tee hawte, Khri nynh amaw te amaw kha palei pyaku lan tee vae khyh.26Tuhte a la thua lanze, laephi athotakaw te aning tuh palei a la teing vae cih; amaw te amaw silawkunaw liate seinaw kha ccaring vua khylan atu she athangnaw kya vaekheit rou nynh a langku.27Ccungccaw hae hanlan vaekheit chi lanpaw tuh laerui-awdepaw thua zah tuh-e koute byapianaw a um hawte,28Khri nynh ccungccaw patae seinaw kha phu khylan vaekheit kyalya a pyaku. Amaw kha ngaehoite a ngawpaw ccungccaw hae kha khum khylan aning tuh seinaw te asekuh lei lante vaeningnaw bua yn langkuh ung cih. Accingpaw Khri Silawnaw1Pawccecize kawbya tuh yn thua cih paw ahoypaw uccaw hae mynlyh thua zah uccaw hae muinsan ccaccing thua khyh, kum takyhte pyapaw alokuhpaw silawnaw liate amaw kalan a naekuh hae paw kha kharouh ccingsah kho khyh hae.2A ccingsah kho lanze, silawkunaw kha phe a la umtaw vae cih hae khaw? Pawccecize a beiktu hae tuh zungzae hanlan vaekheit te sei thyaasah athua hae ze, mih seinaw nykunaw thinlung hoi vae lan khyh hae.3Thuasalama tuh-e silawnaw kya tuh seinaw bua liathuinaw kum takyhte a um.4Pawccecize tangnuapaw hae te miaa hae chii nynh seinaw po lawpya lanpaw tuh thua kho khyh.5Tukeiccuze laephi kalan Khri yn thua lyaze aning nynh,“Silawnaw te pyapaw uccaw khana rypaw thua khyh,thuasalama kamaw hanlan pyn khaphe nae paccynpya vae.6Maee-ute silawnaw teseithyaanaw silawnaw kyakhena lungrythua khyh.7Tuinte kae nynh,‘Ccauh kuekuhpaw kyakamaw konglang azeiku thyhte,pou Pachia, na rynawrae khylan nynh kae tuhkae thua,’ ka ci,”cite a ho.8Luki langkhe, “Silawnawpaw hae te pyapaw uccaw hae, maee-ute silawnawpaw uccaw hae te seishawnaw silawnawpaw hae kha na ry khyh, tuh-e hae kya na lungrythua khyh,” (tuh-e hae tuh kawbya thyhte pyapaw nynh thua) cite a ho koute,9aning nynh, “Ngaetua, pou Pachia, kae tuh na rynaw rae khylan nynh kae thua,” a ci. Vaeningnaw e kha tynsah khylan vaekheitnaw e kha phe a vua.10Tuh-e rynaw liate, Jesu Khri pyn kha zungzae hanlan vaekheit kyalya pyanaw liate aening tuh thyaasah ah thua vae oh.11Ranpibawi miakaw tuh mih ryalaw kya nin takyh a thadyn hae, seinaw kharouh a thyaasah kho leipaw alokuhpaw silawnaw kha palei a rae hae.12Thuasalama Khri tuh seinaw elang silawnaw ccangkheit kha zungzae hanlan a pya koute, Pachia ranglang khe a dahung vae.13Tuh-e ccyh kyate a rhaw hae kha a ccusy lang rae athua makhia phang a ngaw vae.14Pawccecize pyapaw uccaw ccangkheit liate thyaasah athua hae paw kha zungzae accingpaw lang a rae hae.15Thyaa Muisaw mah aening kya ccaekia nynh thua; pawccecize,16“Tuh-e nin hae kouteminmin ryte ka rae lanpawbyakinnaw tuh hynhte nynh thua:Ka kawbya hae khamih thinlung kya ka nung cih zahtuh-e hae tuh mih lungkhu kyaka zei cih,”cite Bawipaw nynh a ho koute,17“Mih seinaw hae tekawbya pawlangria leipawmih cyisahnaw hae khaka liathui vae lan khyh,” a ci.18Atu hynh-e seingaethyanaw a umnaw kya, seinaw hanlan pyapaw uccaw ho vae khyh. Pachia kalan Naekuh Oh Sih19Tukeiccuze uteno hae, Jesu chii liate beikinnthyaa lungkhu lang tee lan zynkunaw ah hoi vae oh.20Tuh-e a chii liate aning nynh amaw pyn athuapaw zokhawpaw boei khate aening hanlan ahiinpaw laanpi thawpaw kha oun hungpya.21Pachia inn a uktupaw Ranpibawi Lupi ah hoi oh keiccuze,22ahoy leipaw mawtemaw nykunaw thinlung kha thyaasaku khylan tui theikute, ah pyn kha tui ccipaw te singkute, thinlung ccaccing te zynnaw atynpaw te Pachia kalan naekuh oh sih.23Ngaehoinaw kong ccaekia ah khan oh paw kyate voikheit voikheit lang pu leite varyng kyngkuh oh sih, pawccecize bya oun kinpakuhpaw tuh a lungzipaw nynh thua.24Sungsaku nawlan te ahoypaw rya kha law khylan lu kheit te lu kheit pawtemou lungthosaku lan cipaw kha tua kalang oh sih.25Ccungccaw abang nynh leih a cyimae hae hawte pynkheihlan pumkunaw kha umtaw leite, lu kheit te lu kheit thawzung pyakuh oh sih, Ninsaw tuh houhouh yn naekuh vae cipaw kha na muih oh hawte thawzung houhouh pyakuh oh sih.26Pawccecize byaccing nynaw kha aening nynh phe ah mue kou oh te lungraroute ah sei oh ze, seinaw hanlan silawkunaw umlae vae khyh.27Thuasalama ri lan umpaw byapianaw yn thua lanpaw te rawsetu hae kha phe ccung lan a u cih hae paw, bungpawnaw maee rou nynh a um vae.28Moses kawbya kha a zui leipaw ccungccaw tuh ccaekia lu ning khyhze lu thum nynh ccaekia a khan hae thyhte ngaethyaumsahnaw mue leite a chih.29Pachia Ccapaw kha a ccu kaw syde zah, amaw a thyaasahpaw byakinnaw chiise kha athyaa leipaw uccaw lang ria zah, thawccinaw Muisaw kha a saryapaw ccungccaw tuh pawcih alepaw detahnaw mou mue lan accan cite na tua oh?30Pawccecize, “Liarunaw tuh kamaw kya-e nynh thua, kae nynh amee ka sangru cih,” cite Bawipaw nynh a ci. Te, “Bawipaw nynh a ccungccaw hae kha bya a pia cih hae,” bua a ci, cite a hotupaw kha aening nynh ah ny oh.31Ahiinpaw Pachia kuih lungkhu lang ccaw lanpaw tuh ri lan umpaw nynh thua.32Thuasalama nanning kha awsah na thua kou oh te, alepaw vawsawnaw na teing oh zah na ngaesang oh paw, langmaw e nin hae kha bua liathuitua oh.33Vaekhakheit vae ze ccungccaw hae malang saryanaw te vawsawnaw kha na teing oh zah, vaekhakheit vae ze tuhcite a teing hae paw ryte mungkute na teingkheih oh.34Pawccecize thongccah hae paw kha thaw na cci oh, te ahoy huapaw te atynpaw uccaw na hoi oh paw kha na nyku oh keiccuze na hoi oh paw uccaw hae ae luade oh paw kha lungtuate na ngaesang oh.35Tukeiccuze myarya lepaw lasung a thuakhaepaw nae rawhoynaw kha vua nan oh.36Pawccecize Pachia rynaw kha na rae kou oh te, byakinpyakupaw na mue nawlan oh ngaesangnaw na hoi oh aho.37“Pawccecize yn thua cih pawaning tuh thysung leitesosohtari aro kouteyn thua vae cih.38Adingpaw ka ccungccaw tuhzynnaw liate a hiin cih;thuasalama lukhakheit nynhnulang a sihku lanzeka muisaw tuh tuh-e paw kyaa lungrythua lan khyh,” a ci.39Thuasalama aening tuh ronaw kalan nulang a sihkuh hae paw ah thua khyh oh, thuasalama zynnaw hoite khumnaw a ccou hae paw nynh ah thua oh. Zynnaw Asuilan1Zynnaw tuh ngaehoipaw uccaw hae kha ka mue ccaccing cih cite phe riasakunaw te, muih loh leipaw uccaw hae kha a um ccaccing cite nynaw nynh thua.2Pawccecize tuh-e zynnaw liate langmawlya e ccungccaw hae tuh Pachia lungry a tung hae.3Laephi tuh Pachia bya liate rae athua cipaw kha zynnaw liate ah thaethya oh; muihpaw uccaw hae hynh muih leipaw uccaw hae kyate raepaw nynh thua hae. Abel, Enok te Noah kha Dosuinkunaw4Abel nynh zynnaw liate Kain silawnaw laeze ahoy huapaw silawnaw kha Pachia kalan a pya. Tuh-e zynnaw liate aning tuh miding lante ccou athua, pawccecize a lasung kha Pachia nynh a ccoupya; aning tuh a chi vae zemah tuh-e zynnaw liate bya a ho ung.5Enok tuh chinaw a tung vae khyh ccaw cite zynnaw liate lawthung athua. Pachia nynh amaw kha a lawthung vae keiccuze aning tuh muih lan um vae khyh. Pawccecize lawthung athua maw, “Aning tuh Pachia lungry a tung,” cipaw ccaekia kha a hoi.6Zynnaw leite Pachia lungrytung lanpaw tuh thua kho khyh; pawccecize Pachia kalan yn naekuhpaw ccungccaw nynh tuh Pachia a um cipaw te amaw a ccung hae paw kha amee a pya hae cipaw kha a zyn hahe cih.7Noah tuh muih loh leipaw uccaw hae kong kha Pachia nynh raeringnaw a pya koute a innbyn khumnaw hanlan Pachia rawrinaw te zynnaw liate sanphalung kha a sak, tuh-e zynnaw liate laephi kha seibe zah zynnaw liate yn thuapaw dingnaw rho a ccoutu lang yn tang. Abraham Zynnaw8Abraham nynh rho lang a ccou cih paw ram langkhe ccia khylan ko he athua tuh, zynnaw liate kaw a ngae; teilang nynh ka ccia cipaw ny leite a cceih.9Byakinpyakupaw loram kyakhe ramccangpaw hawte zynnaw liate a um. Tuh-e byakinpyakunaw kha amaw ry, rhoccoutu athua hae paw Isak te Jakob ryte bu kya a um hae.10Pawccecize Pachia nynh a sakpaw te a raepaw, atynpaw athonaw a hoipaw khuapi kha aning nynh a ngaehoi.11Abraham tuh myarya taw vae zah Sarah mah a tiinnung athua zemah zynnaw liate ccaawpoi khonaw thawzung a mue; pawccecize bya a kinpakuhtupaw tuh a lungzipaw nynh thua cipaw a zyn.12Tukeiccuze achihpaw hawte athua vae paw Abraham kyate vaawlui e awsi hae zeih alungpaw te rili kin e riatae leipaw laesia zeih alungpaw ciihan patae a pui hae.13Hynh-e ccungccaw hae balyn tuh byakinpyakupaw kha ccou leite zynnaw hoite a chih hae. Thuasalama minmin nynh asawpi te tuh-e tuh muihlang hae zah a cciadue hae, te minmin tuh laephi vawlan mikhia hae te khuaccong hae paw nynh kae thua cipaw ccaerarih lan a nyku hae.14Pawccecize tuh-e uccaw kong a hotu hae nynh minmin tuh mimaw ram nynh a ccung hae cipaw ccaerarih lan a langsaku hae.15Minmin nynh a poutaw hae paw ram kha palei a la tuathui hae ze, tuh-e ram lang bua kithui lan ccyhhoypaw phe a hoi cih hae paw.16Thuasalama minmin nynh ahoy huapaw ram kha a ngae hae, tuh-e ram tuh vaawram nynh thua. Tukeiccuze mih Pachia cite koku lanpaw kha Pachia tuh a maethah khyh; pawccecize Pachia nynh minmin hanlan khuapi kha a paccynpya vae hae.17Abraham tuh syntawtua athua lyakhe zynnaw liate Isak kha silawku nawlan a pya; byakinpyakupaw a muetupaw nynh a hoi thypaw a ccapaw kha a pya.18Amaw kong lante asekuhte, “Isak kya nynh na ciihan tuh atyn cih,” cite hopya athua.19Pachia tuh achihpaw heize a thosathui kho cite varyng a zyn; aning nynh muihsahnaw lante a chih hae paw kyate Isak kha mah a mue.20Isak nynh yn thua cih paw uccaw hae kong lante Jakob te Esau kha zynnaw liate hythua a pya hae.21Jakob nynh a chi dyn khe Josef ccaaw hae kha zynnaw liate hythua ccarou a pya hae, te a hoitang dung kya phang ngeikute Pachia kha a beik.22Josef nynh a chi dyn khe, Israel ccaaw hae nynh a pou lan hae paw kong kha zynnaw liate hosya zah amaw a ru konglang te bya a tawsya hae. Moses Zynnaw23Moses he a pui tuh, apuithyapaw imua nynh thua cipaw kha a muih hae keiccuze zynnaw liate siapharan nynh kawthopaw kha ri leite a nung te a paaw nynh Moses kha sawpaw sah thum a thuruh hae.24Moses nynh piccan he thua tuh, Faro ccanung a ccapaw cite koku lanpaw kha zynnaw liate phe a ei.25Seinaw te asekuhpaw lungrythuanaw kya sosoh hoysah lanpaw laeze Pachia ccungccaw hae ryte vawsawnaw teing lanpaw kha a poku paleih.26Izip ram kya-e sisua hae laeze Khri keiccuze saryakunaw tuh asung huapaw hoirumnaw nynh thua cite a tuaku. Pawccecize nyalang mue lanpaw lasung kha nynh a tua.27Siapharan thinrianaw kha ri leite Izip ram kha zynnaw liate a cciataw; pawccecize muih kho leipaw Pachia kha a muihpaw hawte aning nynh phang a ngaesang.28Ccatawccaw hae a rohtupaw nynh Israel ccatawccaw hae kha a ty khyh nawlan, Moses nynh Kawtaw Poi te chii theinaw kha zynnaw liate a rae. Ccangpaw Israel Rawhoytu hae Zynnaw29Israel hae nynh laerou kya ccia hawte zynnaw liate Rili Se kha po a zua hae. Tuhcite Izip hae nynh he a zuabua hae tuh tui nynh pong a vu hae.30Jeriko khualungrua kha nin sari a voilu kou hae te, zynnaw liate khualungrua tuh pong atin.31Ohhuanung Rahab tuh dophitu hae kha ahoyte innccong a thuasah hae keiccuze zynnaw liate aning tuh kawngae lei hae paw kya chihbua khyh.32Tuhlaelan pawmou ka ho ung cih? Gideon, Barak, Samson, Jefthah, David, Samuel te profeh hae kong honaw ccyh ka zaw lan khyh.33Tuh-e hae nynh peenaw hae kha zynnaw liate a tae hae, dingnaw rya kha a law hae, byakinpyakunaw kha a mue hae, chindeih hae khalang kha a myhsah hae,34Maee aruapaw kha a the hae, thaloi haw kyate a lue hae, thawzyanaw kyate a thawsaepaw lang a tang hae, rhawdounaw kya a rawthungpaw lang a tang hae, ramccang rhawkaw hae kha a ccuesah hae.35Nopi hae nynh mih michi hae kha hiinnaw kalan thoosahthuinaw te bua a mue hae, te mingccang hae tuh ahoy huapaw thoothuinaw kha mue khylan luesahnaw kha lawku leite tuaasahnaw kha a teing hae.36Abang tuh saryanaw te ziakunaw kha a teing hae, sivawrui te khii hae zah thongsaw hae.37Lung te a deih hae, thing-aw te ccangning lang a aw hae, thaloi te a chia hae, tuu phua te miaa phua kha kikuh hae zah a khiakuh hae; boeining leite ae van ae leite vawsaw a teing hae, ming hae nynh a tuaa a sah hae.38Laephi tuh minmin te ngaekuh khyh. Minmin tuh ramkaw kya, mua hae kya a la khiakuh hae, lungkarung te laekarung hae kya a la um hae.39Minmin balyn tuh zynnaw liate thehoynaw a ccou hae zemah byakinpyakupaw kha mue khyh hae.40Minmin tuh aening leite accingpaw lang rae athua khyh nawlan hae Pachia nynh ahoy huapaw uccaw kha aening hanlan oun paccynpya vae. Dosuinku lanpaw Jesu1Tukeiccuze aening mah ccaekia athuapaw maeking pi nynh phang oun koihlu keiccuze zoikadeih lan kaang oun kaesahpaw seinaw te phupaw miakaw kha ccanglang dae nung oh sih lah, aening malang a umpaw ccuetaekunaw kyakhe lungsaenaw te ccue oh sih.2Aening zynnaw a thotu te a ccingsahtupaw Jesu kha riri dote ccue oh sih. Aning tuh maethyanaw kha pawlangria leite amaw malang nungpya athuapaw lungtuanaw hanlan vaelantung kya teingnaw kha ngaesang zah Pachia kya-e bawitungkhung ranglang khe a dahung vae.3Pawccecize nanning nae lungthawthang khyh nawlan te nae lungthawzya khyh nawlan misei hae kya-e khahcihawpaw rawsenaw a ngaesangtupaw amaw kha la tuatua oh.4Nanning nynh seinaw dounaw kya chii phe lua lan ciate na dou loh khyh oh.5Ccaaw hae kya hopya hawte nanning hopyapaw hyynaw bya kha na ning vae oh tou? Tuh-e bya tuh:“Ka ccapaw, Bawipaw thuiheinaw khapawlangria leite um nan,amaw nynh ae thuihei zena lungthang nan sah.6Pawccecize Bawipaw nynha sungsahpaw kha a thuihei,ccaaw lante a ccoupaw miakaw khade a tah,” acikuh.7Thuiheinaw kha na ngaesang oh ze, Pachia nynh ccaaw hae hawte ae ccuepe cih oh; pawccecize paaw nynh a thuihei leipaw ccaaw a um zawtou?8Thuasalama ccungccaw miakaw nynh a mue hae paw thuiheinaw kha na muebua khyh oh ze, ccaaw ccaccing na thua khyh oh, ccalah nynh na thua oh.9Tuhlaeze aening oun thuiheipaw pynsaw lante paaw hae ah hoi oh zah, minmin kha saw ah tua oh; tuhlaeze muisaw lante ah Paaw kaw kha houh ngaete ah hiin lan khyh oh tou?10Pawccecize tuh-e paaw hae nynh ahoy cite a tua hae thyhte sosoh nynh oun thuihei hae; thuasalama Pachia nynh tuh amaw kya-e thyaararihnaw kha ah neethungku bua nawlan oh, aening thanenaw hanlan nynh oun thuihei.11Thuiheinaw miakaw teing lya tuh lungpawnaw laeze ngaethyanaw cite tua lan a umhua; thuasalama thuiheinaw te kia athua hae paw hanlan, tuh-e nynh nyalang tuh daenaw te asekuhpaw dingnaw thae kha a thuakhaepya hae. Thuiheinaw te Raeringnaw Pyanaw12Tukeiccuze balae tingpaw kuih hae te a thawzyapaw ccukharu hae kha thawsaesah oh.13Ccukhoupaw ccu tuh poh khahku leite dansah athua nawlan, nae ccu hanlan laanpi kha lawsah oh.14Ccungccaw miakaw te daenaw te um lanpaw te thyaararih lante um lanpaw kha zuakuh oh; thyaanaw leite hum nynh sanmah Bawipaw kha muih lan khyh.15Pachia thawccinaw kha hum nynh san mue leite a um khyh nawlan, akhahpaw tharui kyate yn popaw nynh nanning kha vawsaw ae pya khyh nawlan oh raeringkuh oh; tuh-e nynh ccungccaw patae kha a nungsisaku hae.16A ohhuakuhpaw a um khyh nawlan, tuhkhyhze ccatawccaw thuanaw kha aepaw kaw kheit lang a zuakuhpaw Esau hawte Pachia pawlangria leipaw na thua khyh nawlan oh raeringkuh oh.17Pawccecize Esau nynh nyalangte hythuanaw rho kha he a ccou ry tuh mue kho vae khyh, hythuanaw kha mitphi te thawte a ccung zemah a paaw kya-e ngaesikunaw kha mue kho vae khyh cipaw na ny oh.18Pawccecize nanning nynh kuih te ty khopaw mua kalan na thua khyh oh, tuh-e mua kyatuin maee aruapaw, maeking amanpaw te mohnaw a um, khise tho zah19mungkae roi te bya roi accae; tuh-e roi a thae hae paw nynh mih kalan bya bua a ho vae khyh nawlan a ngia hae.20Pawccecize, “Sahiin nynh heize tuh-e mua tuh a ty ze, lung te deih athua cih,” cikuhpaw kawbya kha minmin nynh ngae ngan khyh hae.21Tuh-e muih tuh myarya ri lan um zah Moses nynh, “Myaryamaw ka rih zah ka thyngkuh,” a ci.22Thuasalama nanning tuh Zion mua lang, ahiinpaw Pachia khuapi athuapaw vaaw Jerusalem lang, riatae lei vaaw hae lungpawte a tungkunaw hae kalan,23vaawlang kya min zei athuapaw ccatawccaw hae a pumkunaw hae kalan, ccungccaw balyn bya a piatupaw Pachia kalan, accingpaw lan rae athuapaw adingpaw ccungccaw hae muisaw hae kalan,24byakinnaw thawpaw kya-e hopiatu Jesu kalan te Abel chiise nynh a hopaw uccaw laeze ahoy huapaw uccaw kong a hopaw theipaw chiise kalan na thua vae oh.25Nanning nynh a hotupaw bya kha na ei khyh nawlan oh raeringkuh oh; pawccecize laephi vawlan a hotupaw bya a ei hae paw tuh detahnaw kyate a lue khyh hae ze, vaawlang te a hotupaw bya kha aening nynh ah ei oh ze, pawtemou ah lue kho cih oh?26Tuh ccyh lyakhe amaw roi nynh laephi kha a hysah; thuasalama atu aning nynh, “Tuhzemah laephi kyalya thua leite, vaawlang kha mah vaekheit bua ka hy ung cih,” cite byakinkute a ho.27Hynh-e, “Tuhzemah vaekheit bua,” cipaw bya nynh a langsakupaw tuh hy kho a um leipaw uccaw hae tuh po a um cih zah, ahy khopaw uccaw hae athuapaw raepaw uccaw hae tuh nue athua cih cinawpaw nynh thua.28Tukeiccuze ahy kho leipaw peenaw kha ah ccou oh keiccuze lungpawte um oh sih, sawtuanaw te rawrinaw ryte douccah lante Pachia kha beik oh sih.29Pawccecize aening ah Pachia tuh aruapaw maee nynh thua. Pachia Lungtungpaw Rya1Uteno sungsakunaw kha po tynsah oh.2Mikhia hae do-oihnaw kha la ning nan oh. Pawccecize tuhte mikhia do-oihnaw kya abang nynh vaaw hae kha tualeipite innccong a la thuasah hae.3Thongccah hae paw kha ning nan oh; minmin ryte thongccahkheih hae paw hawte tuakuh oh; vawsawnaw a teing hae paw kha la ning nan oh, naemaw nae pyn kya tuhcite a teingpaw hawte tuakuh oh.4Ccungccaw balyn nynh zuvaw tangnaw hynh sawtua lanpaw nynh thua, te zuvaw tangnawpaw ikhung mah thusah lanpaw thua khyh; a ohhuakuh hae paw te milae zu milae vawpaw ryte a sei hae paw tuh Pachia nynh byapia cih hae.5Nae hiinzia tuh phua a duaa leipaw thua sah lah, na hoi oh paw uccaw hae khate nae lungryachih sah. Pawccecize Pachia nynh, “Nang kha kae cciataw boi lan khyh zah kae vua boi lan khyh,” a ci.6Tukeiccuze,“Bawipaw tuhkae yn bawmtu thua zahka rih lan khyh.Ccungccaw nynhpawmou yn cyih kho cih?”cite rawhoyte ah ho kho cih oh.7Nae kya Pachia bya ae la hopah oh paw, nanning ae la cciakhae oh paw kha la ning nan oh. Mih hiinzia nynh a poukhaepaw kha tua biate, mih zynnaw kha thydokuh oh.8Jesu Khri tuh inkhawnin, atunin te zungzae cia rulaekuh khyh.9Alokuh leipaw ccangpyakunaw aphuinphuin nynh ae cciakhaesei nan oh sah; pawccecize aepaw te thua leite, thawccinaw liate lungthawsaesahpaw tuh ahoypaw nynh thua. Aepaw kyalya phang a tua hae paw tuh thanenaw mue khyh hae.10Beikhang ccangkheit ah hoi oh zah, tuh-e kya tuh beikbu ryalahtu hae nynh aenaw kaw hoi khyh hae.11Pawccecize ranpibawi lupi nynh sahiin chii kha beikinnthyaa lungkhu lang teekhae zah seinaw hanlan silawnaw a rae vae ze, sahiin pyn hae kha ryabu atolang khe maee te a u hae.12Tukeiccuze Jesu mah amaw a chii te ccungccaw hae kha thyaasah khylan koikua atolang khe a teing.13Tukeiccuze aening nynh amaw kalan ryabu atolang cceih oh sih lah, a teingpaw saryanaw kha teingbua oh sih.14Pawccecize aening tuh hein kya po atynpaw khuapi ah hoi khyh oh, yn thua cih paw khuapi kha nynh ah ccung oh.15Tukeiccuze amaw liate Pachia kalan thehoysahnawpaw silawkunaw kha palei rae oh sih, tuh-e tuh amaw min kya lungtuabya hopaw khalang athae nynh thua.16Ahoypaw cyi lanpaw te neethungbua lanpaw kha la ning nan oh; pawccecize tuhcihawpaw silawnaw hae kya Pachia tuh a lungrythua.17Nanning ae uktu oh paw kaw kha ngae oh lah, mih bya kha zui oh. Pawccecize minmin tuh mih ryalaw kong a phykuh cih hae paw athua hawte, nanning kha ae do-oih oh. Ngaethyanaw te thua leite lungtuanaw te ryalah hae sah; pawccecize tuhte ngaethyanaw te rya a law hae paw tuh nae hanlan thanenaw um lan khyh.18Kaening hanlan saw oun sangpah oh; kaening tuh mawtemaw nykunaw thinlung athyaapaw kae hoi zah pawpaw kya balyn kou hoy lante hiin lan kae ry cipaw kha kae nyku ccaccing.19Kae tuh nae kalan taloi bua kae thua nawlan, saw yn la sangpah oh cite pekite kae ngia oh. Athangnaw Sawsang20Zungzae atynpaw byakinnaw chiise liate, tuu hae kya-e alesaepaw Tuurintu, ah Bawipaw Jesu kha chinaw kyate a thoosahpaw, daenaw Pachia nynh,21amaw malang a lungrythuapaw rya kha Jesu Khri liate nae kya lah zah a rynaw kha na rae kho nawlan oh, ahoypaw ryalaw miakaw kya nanning kha ae ccingsah vae oh sah. Jesu Khri kya zungzae te zungzae cia phu-enaw um sah. Amen. Athangnaw Bya22Uteno hae, hyynawpaw bya hynh la ngaesang oh cite kae ngia oh; pawccecize nae kalan ccaw hynh adynnaw te nynh ka zei.23Ah unopaw Timote tuh a luesah vae hae cipaw la nyh oh. Aning tuh aro maw yn thua ze naemaw ryte kae muihkheih cih oh.24Nanning ae cciakhaetu oh paw balyn te mithyaa hae balyn kha la beihlang oh. Italy ram kya a um hae paw nynh nanning kha ae beihlang oh.25Nae balyn tungvaw kya thawccinaw la um sah. Amen.
Bible Society of Myanmar