Read GALATI 1

GALATI1

Beihlangnaw

¹Ccungccaw nynh naw liate thua leite, ccungccaw kawhoinaw liate mah thua leite, Jesu kha chinaw kyate a thoosahpaw Paaw Pachia te Jesu Khri liate saw athuapaw locceihtu kae, Paul—

²Kamaw te kae umkheihpaw Pachia innbyn hae balyn nynh Galatia ram e khriccaawbuu hae kalan ccaw kae ky oh.

³Ah Paaw Pachia te Bawipaw Jesu Khri kyate thawccinaw te daenaw tuh nae kya la um sah.⁴Ah Paaw Pachia rynaw thyhte ahoy leipaw atu she kyate aening kha luesah khylan Jesu nynh aening seinaw hanlan amaw te amaw kha a pyaku.⁵Pachia kya phu-enaw tuh zungzae te zungzae la um sah. Amen. Ccangpaw Thehoypaw Um Khyh

⁶Khri thawccinaw liate nanning ae kotu oh paw kha arangte na vua oh zah ccangpaw thehoypaw kalan na paleihku oh paw tuh ka ngaeangthua.⁷Ccangpaw thehoypaw um khyh; thuasalama nanning kha vawsaw ae pya oh zah Khri thehoypaw kha ahme leipaw lang a paleih rypaw ccungccaw abang a um hae.⁸Thuasalama kaening zemah thuasah, vaawlang te yn thuapaw vaawpaw zemah thuasah nae kya kae ho vae paw thehoypaw te arawsekuhpaw thehoypaw kha a ho lanze, aning tuh thyalaw thua sah!⁹Na kyngku vae oh paw thehoypaw te arawsekuh lante a hopaw tuh thyalaw thua sah cite langmawlya kae ho vae hawte, atu kae nynh bua ka ho.

¹⁰Pawccecize atu kae tuh ccungccaw kya-e maehoynaw tou ka ccungku? Tuhkhyhze Pachia kya-e tou? Tuhkhyhze ccungccaw hae lungrythuasah lan tou ka ccungku? Pawccecize ccungccaw hae lungrythuasah lan atu cia ka ccungku lanze, kae tuh Khri ryalahtu ka thua lan khyh. Locceihtu lang Paul A Tangnaw

¹¹Uteno hae, kae nynh ka hopaw thehoypaw tuh ccungccaw nynh thopaw thua khyh cipaw kae nysah ry oh;¹²pawccecize tuh-e thehoypaw tuh ccungccaw kyate ka mue khyh, ka ccangkupaw mah thua khyh, Jesu Khri kya-e byaphy liate ka muepaw nynh thua.

¹³Judah hae beiknaw kya langmawlya ka hiinnaw kong kha phe na thae vae oh. Pachia khriccaawbuu kha vawsawnaw ka pya zah ro lan ka la zuakuh.¹⁴Judah phung zuinaw kyaze ka minphuin hae laku kya kamaw te kae ruikheih hae paw patae laeze ka zuakuh hua zah ka minpaaw hae phungzae kha myaryamaw ka pankhae.¹⁵Thuasalama ka pui mawze kae kha yn po zah a thawccinaw liate yn kotupaw Pachia nynh¹⁶Zenta hae laku kya a Ccapaw kong kha phy khylan tuh-e a Ccapaw tuh ka kya yn langsahpyaku, te kae nynh hum sanmah tuanaw ka ngiakuh khyh.¹⁷Kae ka mawze locceihtu lang a la tangty hae paw kalan Jerusalem lang mah ka cceihthung khyh; Arabia ram lang nynh palou ka ccia; oute Damaskas khua lang bua ka ki.

¹⁸Tukoute kum thum aro koute Peter te tungku khylan Jerusalem lang ka cceihthung zah, amaw te nin haw lae pangaw kae umkheih.¹⁹Bawipaw a neitaw James holeite ccangpaw locceihtu hae hum sanmah ka muih khyh.²⁰Nae kalan ka zeipaw hynh ka hynpaw thua khyh cipaw Pachia malang ka ho ngan.²¹Tukoute Siria ram te Silisia ram lang ka cceih.²²Judea ram kyaze Khri kya um hae paw khriccaawbuu hae nynh kae kha yn muih loh khyh hae.²³Ming hae nynh, “Langmawlya aening oun tuaa oun sahtupaw nynh atu tuh langmawlya ro lan a zuakupaw zynnaw kong kha a ho cciamang,” cite a ho hae paw kyalya kha minmin nynh a thae hae.²⁴Kae ka keiccuze minmin nynh Pachia kha the a hoysah hae. Paul te Ccangpaw Locceihtu hae

¹Kum haw lae pali aro koute kae tuh Titu kha ka hoeibua zah Barnabas ryte Jerusalem lang bua kae cceihthung.²E hynh byaphy thyhte ka cciathungpaw nynh thua. Te ka cyi cciamangpaw te ka la cyi vae paw kha alakaw lan a tang khyh nawlan, Zenta hae laku ka hopaw thehoypaw kha minhoy ccoupaw cciakhaetu hae kyakhe ka makhaete ka hopya hae.³Thuasalama kamaw te kae umkheihpaw Titu tuh Grikpaw athua zemah vingdungawku lan nangse thua khyh.⁴Khri Jesu liate kae muepaw luenaw kha dophi lan zah kaening kha see lang tangsah lan hae cite aruh lante oun tee hae paw ahme leipaw zyntu hae keiccu nynh tuhte a cyi hae.⁵Ahmepaw thehoypaw tuh nae kya zungzae atyn ccaw cite kaening nynh ahme leipaw zyntu hae kalan sosoh sanmah kae apkuh khyh.⁶Minhoy ccoupaw cciakhaetu hae tuh pawcihawpaw ccungccaw athua hae zemah ka hanlan alaenaw um khyh. Pachia tuh ccungccaw maedo khyh, tuh-e cciakhaetu hae nynh kae kha pawsang yn biapah chih khyh hae.⁷Thuasalama vingdungawkuh hae paw kalan thehoypaw ho lan Peter kha a pya hawte, vingdungawkuh lei hae paw kalan thehoypaw ho lan kae kha yn pya cipaw kha minmin nynh a ny hae,⁸(pawccecize vingdungawkuh hae paw hanlan Peter kha mangte locceihtu rya a lahtupaw nynh Zenta hae kalan kae kha sawte yn mang zah rya a lah kalang)⁹Tungpi hawte a tua hae paw James, Peter te Johan nynh ka muepaw thawccinaw kha he a nyh hae te, vaeccawkunaw langsaku nawlan kae te Barnabas kha ranglang kuih oun pya hae zah kae kuih oun kyng hae; mimaw tuh vingdungawkuh hae paw kalan ccia lan zah kaening tuh Zenta hae kalan cciasah lan mih nawccah.¹⁰Minmin nynh oun ngia hae paw ccangkheit tuh, kaening nynh ryachi hae kae ning lei lanpaw kha thua zah, tuh-e tuh kae nynh mah lungthote ka cyi rypaw nynh thua. Antiok kya Paul nynh Peter A Pe

¹¹Thuasalama Antiok khua lang Peter he yn thua tuh, a tungvaw ccae lanpaw a um keiccuze mitmae hawiliakute ka pe.¹²Pawccecize James kyate ccungccaw abang oun thua maw hae tuh, Peter tuh Zenta hae ryte leih a aekheih hae; thuasalama minmin he oun thua hae tuh, Peter tuh vingdungawkuh hae paw raw a ri keiccuze nulang sihkuh zah Zenta hae kyate a phiakuh.¹³Ccangpaw Judah hae mah Peter hawte a thyaruhbua hae; tuh-e mih thyaruhnaw nynh Barnabas kha heize a cciaseisah bua.¹⁴Minmin tuh ahmepaw thehoypaw thyhte hmerarih lan hiin khyh hae cipaw he ka muih tuh, mih balyn malang khe Peter kha, “Nang tuh Judah paw mang na thua pite Judah hae hawte hiin leite Zenta hae hawte na hiin ze, pawtemou Zenta hae tuh Judah hae hawte hiin lan na nangse kho cih hae?” ka cipya. Zynnaw liate Khumnaw

¹⁵Aening tuh thokeinaw lante Judah hae ah thua oh zah Zenta misei hae ah thua khyh oh.¹⁶Ccungccaw tuh Kawbya cyisahnaw liate thua leite, Jesu Khri zynnaw liate nynh thyaaccouku cipaw ah ny oh. Kawbya cyisahnaw liate thua leite Khri zynnaw liate thyaaccou khylan aening nynh Jesu Khri kha phe ah zyn vae oh, pawccecize Kawbya cyisahnaw liate hum sanmah thyaaccou kho thua lan khyh.¹⁷Thuasalama aening nynh Khri liate thyaaccou khylan ah zuaku cciamang lya oh khe, ahmaw te ahmaw kha misei hae cite ah muihku oh lanze, Khri tuh seinaw ryalahtu tou athua? Tuhte thua khyh!¹⁸Pawccecize phe ka ro vae paw uccaw kha bua ka sakthui lanze, misei ka thuanaw kha phe ka langsaku vae.¹⁹Pawccecize Pachia hanlan ka hiin kho nawlan, kae tuh Kawbya liate tuh-e Kawbya kyakhe ka chih vae. Kae tuh Khri ryte vaelantung kya khiade ka thua vae;²⁰tukeiccuze a hiinpaw tuh kamaw thua leite ka lungkhu kya a hiinpaw Khri nynh thua. Atu pynsaw kya ka hiinpaw hiinnaw tuh kae yn sungsah zah ka hanlan amaw te amaw a pyakuhpaw Pachia Ccapaw zynnaw liate nynh ka hiin.²¹Pachia thawccinaw kha ka vua khyh; pawccecize thyaaccounaw tuh Kawbya liate athua lanze, Khri tuh alakaw lan nynh a chihan vae. Kawbya khyhze Zynnaw

¹Pou Galati mingaee hae! Hum nynh mou nanning kha phe ae mua oh? Vaelantung kya a khiade hae paw Jesu Khri kha nae malang khe ccaerarih lan langsahpya athua vae khaw!²Hynh-e kyalya hynh nynh nae kyate ny ka ry: Kawbya cyisahnaw liate tou Muisaw kha na mue oh? Tuhkhyhze na zyn oh zah na thaenaw oh liate tou na mue oh?³Myaryamaw na ngaee oh tou? Muisaw te ryalaw na tho oh zah, atu pynsaw tetou na thangsah cih oh?⁴Vawsawnaw patae na tung oh paw kha accakaepaw lang tou pong a tang? Accakaepaw lang tou atanghan cih?⁵Pachia nynh Muisaw ae pya oh zah nae kya ngaeangnaw a raepaw kha nanning nynh Kawbya na zui keiccu oh tou? Tuhkhyhze thehoypaw na thae oh zah na zyn keiccu oh tou?

⁶Tuhawte, “Abraham nynh Pachia kha zyn zah tuh-e a zynnaw tuh dingnaw lang a riapya,” cite Ccathyaa kya a um.⁷Tukeiccuze zynnaw a hoi hae paw tuh Abraham ccaaw hae nynh thua hae cipaw nyh oh.⁸Pachia nynh Zenta hae kha zynnaw liate thyaaccousah cih hae cite Ccathyaa nynh muihty zah Abraham kyakhe, “Nang na liate Zenta hae balyn tuh hythua a ccou cih hae,” cite thehoypaw kha a hopya ty vae.⁹Tukeiccuze zynnaw a hoi hae paw tuh a zynpaw Abraham ryte hythua a ccoukheih hae.

¹⁰Pawccecize Kawbya cyisahnaw a doliakuhpaw balyn tuh thyalawnaw zakaw nynh a um hae; pawccecize, “Kawbya ccauh kya azeikuhpaw abalynte a zui leipaw miakaw tuh thyalaw thua sah,” cite azeikuh.¹¹Atu tuh Pachia malang Kawbya liate hum sanmah thyaaccoupaw um khyh cipaw tuh ccaerarih lan alangkuh. Pawccecize, “Adingpaw ccungccaw tuh zynnaw liate a hiin cih,” acikuh.¹²Kawbya tuh zynnaw te sekuh khyh; thuasalama Ccathyaa nynh, “Kawbya hae a zuipaw ccungccaw tuh Kawbya hae liate a hiin cih,” a ci.¹³Pawccecize, “Thing kya sae athuapaw ccungccaw miakaw tuh thyalawnaw a ccoupaw nynh thua,” cite azeikuh hawte, Khri tuh aening hanlan thyalawnaw a ccoupaw thua zah, aening kha Kawbya kya-e thyalawnaw kyate oun shawkhaw vae,¹⁴tuhte oun shawkhawpaw tuh Abraham nynh a ccoupaw hythuanaw kha Jesu Khri liate Zenta hae hanlan athua bua nawlan te aening nynh zynnaw liate byakinpyakupaw Muisaw kha ah mue nawlan oh nynh thua. Abaraham kha Byakinpyakunaw

¹⁵Uteno hae, nin takyh ah tung oh paw kya-e kha tousenaw lang kae hopya oh: Ccungccaw nynh raepaw byakinnaw kha heize tynsah athua koute hum nynh sanmah roh vae khyh, bia mah biachih vae khyh.¹⁶Byakinpyakunaw hae kha Abraham te a ciihan hanlan raepaw nynh thua; “Ciihan hae hanlan,” cite pataepaw elang ho khyh; “Na ciihan hanlan,” cite lu kheit elang nynh a ho, tuh-e paw tuh Khri nynh thua.¹⁷Ka ho rypaw tuh hynhte nynh thua: Pachia nynh Khri kya phe a tynsah vae paw byakinnaw kha kum za pali sung thum koute a umpaw Kawbya nynh roh kho vae khyh; byakinpyakunaw kha Kawbya nynh accakaepaw lang tangsah kho khyh.¹⁸Pawccecize rho tuh Kawbya liate athua lanze, byakinpyakunaw liate thua vae khyh, thuasalama byakinpyakupaw liate nynh Pachia nynh Abraham kha rho a pya. Kawbya Eenaw

¹⁹Tuhteze pawkeiccumou Kawbya tuh yn thua? Kawbya tuh cyiseinaw cipaw hynh pawmou athua cipaw langsaku nawlan thua zah, Pachia nynh bya a kinkupaw Abraham ciihan yn langkuh cia atyn lante pyapaw nynh thua. Kawbya tuh vaaw hae nynh ccungccaw kya pyapaw thua zah vaaw hae te ccungccaw laku kya hopiatu lu kheit a um.²⁰Ccungccaw phu kheit laeze alung ze rou nynh hopiatu aho, thuasalama Pachia tuh ccangkheit nynh thua.

²¹Tuhteze Kawbya nynh Pachia kya-e byakinpyakunaw kha a rawse tou? Rawse khyh! Pawccecize hiinnaw a pya khopaw Kawbya kha pya a la thua lanze, dingnaw tuh tuh-e Kawbya liate mue athua ccaccing vae cih.²²Thuasalama a zynpaw ccungccaw hae nynh Jesu Khri zyn liate byakinpyakupaw kha a ccou nawlan hae, Ccathyaa nynh pawpaw balyn kha seinaw huhan zakaw kya pong a khong.

²³Zynnaw yn thua maw tuh aening hynh Kawbya nynh thongccahpaw hawte oun khong zah, zynnaw a langkuh cia phang oun khawsung.²⁴Tukeiccuze aening tuh zynnaw liate thyaaccoupaw ah thua nawlan oh, Kawbya tuh Khri yn thua cia aening oun ccangpahtu nynh thua.²⁵Thuasalama atu tuh zynnaw phe yn thua vae zah aening tuh oun ccangpatupaw zakaw kya ah um vae khyh oh,²⁶pawccecize nanning balyn tuh zynnaw liate Khri Jesu kya Pachia ccaaw hae nynh na thua oh.²⁷Pawccecize Khri kya baptisma a in vae hae paw nanning balyn tuh Khri kha boeining hawte phe na lawkuh vae oh.²⁸Khri kya Judah paw te Grikpaw ci um vae khyh, see te a luepaw ci um vae khyh, pise te nopi ci um vae khyh; pawccecize nanning balyn tuh Khri Jesu kya ccangkheitpaw nynh na thua vae oh.²⁹Nanning tuh Khri kya-e na thua oh ze, Abraham ciihan nynh na thua vae oh, te byakinpyakupaw thyhte rhoccoutu hae nynh na thua vae oh.

¹Ka ho rypaw tuh hynhte nynh thua: rhoccoutu tuh uccaw balyn kha a hoitupaw mang athua zemah, imua athua lungkhu balyn tuh see te alaenaw um khyh.²A paaw nynh a khyapaw ccyh azaw mawlaezung tuh do-oihtu hae te rintu hae kuihkaw nynh a um ung.³Tuhawte aening mah imua ah thua lya oh tuh laephi a uktu muisaw hae see nynh ah thua oh.⁴Thuasalama accyh ccingnaw he yn thua te, nopinung vue kya poisah zah Kawbya zakaw yn puisahpaw a Ccapaw kha Pachia nynh yn saw.⁵Tuh-e tuh Kawbya zakaw um hae paw kha shawkhaw khylan nynh thua; tuhteze nynh aening tuh ccaaw lang tang khylan ccaaw thuanaw kha ah mue cih oh.⁶Nanning tuh ccaaw hae na thua oh keiccuze, “Abba! Ka Paaw!” cite a kopaw a Ccapaw kya-e Muisaw kha aening thinlung kalan Pachia nynh a saw vae.⁷Tukeiccuze nang tuh see na thua vae khyh, ccaaw nynh na thua vae, ccaaw na thua vae ze Pachia liate rhoccoutu nynh na thua vae. Galati hae hanlan Paul Thinphangnaw

⁸Langmawlya, nanning nynh Pachia na la nyh khyh oh, tukeiccuze Pachia athua leipaw pachia hae kha aphungpaw lante see lang na tangpya oh.⁹Thuasalama atu tuh Pachia kha na ny vae oh, tuhkhyhze mah Pachia nynh phe ae ny vae oh; pawccemou a thawzya zah anyaapaw muisaw hae kalan bua na ki ry oh? Pawccemou tuh-e hae see lang bua na tang ry oh?¹⁰Nanning nynh abyapi huapaw nin hae, saw hae, kumvaelori hae te kum hae kha na sung oh.¹¹Nae hanlan rya ka lawpaw hynh alakaw lan tangsei zya cite ka thinphang.

¹²Uteno hae, kae tuh nanning hawte ka thua keiccuze kae hawte thuabua oh cite kae ngia oh; nanning nynh ka tungvaw kya na cyisei oh paw um khyh.¹³Ka pynsaw acci keiccuze nae kalan thehoypaw masaty ka ho cipaw kha na ny oh.¹⁴Ka pynsaw ccinaw tuh nae hanlan uccaw ripaw athua zemah kae kha pawlangria leite nae um khyh oh zah doih mah nae doih khyh oh; thuasalama Pachia vaawpaw hawte thuasah, Jesu Khri hawte thuasah nae lehkhan oh.¹⁵Na ccou oh paw hoynaw tuh pawlangmou a tang vae? Pawccecize athua kho ze nae mit kha heize khoikute pya lan nae ry oh cite nanning konglang ccaekia ka khan.¹⁶Atu kae nynh byaccing kae hopya oh keiccuze kae tuh nae rhawpaw lang tou ka tang?¹⁷Ming hae nynh nanning ae lungmung oh paw tuh ahoypaw eenaw te thua khyh; nanning nynh minmin kha lungmung khylan ka kyate phia lan ae ry oh pawte nynh thua.¹⁸Nae kya ka um lya kyalya thua leite accyh takyh kya ahoypaw eenaw te lungmungpaw tuh ahoypaw nynh thua.¹⁹Ka ccaaw taraw hae, Khri kha nae lungkhu kya um zah atyn mawlaezung ccaaw a pui dyn e neitangia ccinaw hawte bua kae teingpya oh,²⁰atu nanning ryte umkheih lan ka ry zah ka byaho rulaeku lan ka ry, pawccecize nanning konglang ka lungriathae. Hakar te Sarah Tousenaw

²¹Kawbya zakaw a um ry hae paw nanning, yn hopya tua oh. Kawbya kha na ngae lan khyh oh tou?²²Pawccecize Abraham nynh ccapaw lu ning a hoi, lu kheit tuh seenung ccaaw thua zah, lu kheit tuh a luenung nopinung ccaaw nynh thua cite Ccathyaa kya azeikuh.²³Seenung ccaaw tuh pynsaw lante a puipaw nynh thua, thuasalama a luenung nopinung ccaaw tuh byakinpyakupaw liate a puipaw nynh thua.²⁴Hynh-e hae kong hynh tousenawpaw nynh thua: hynh-e nopi hae lu ning tuh byakin ccangning nynh thua; Hakar athuapaw byakin ccangkheit tuh Sinai mua kyate yn thua zah a ccaaw hae kha see lang a saah hae.²⁵Hakar tuh Arabia ram kya umpaw Sinai mua nynh thua, aning tuh a ccaaw hae ryte seetangnaw kya a um hae keiccuze atu a umpaw Jerusalem te nynh aloku.²⁶Thuasalama ccangpaw nopinung tuh vaawlang umpaw Jerusalem nynh thua; aning tuh a luepaw nopi thua zah aening nung nynh thua.²⁷Pawccecize Ccathyaa kyaze,“Ccaaw a saah leinung,a tiinnung nang, na lungtua sah;neitangia a teing leinung nang,roisaw lah siatua;pawccecize a lanmenungnopinung ccaaw hae tuhvawpaw a hoinungnopinung ccaaw hae laezea lunghua hae,”cite azeikuh.²⁸Uteno hae, atu nanning tuh Isak hawte byakinpyakupaw kya-e ccaaw hae nynh na thua oh.²⁹Thuasalama pynsaw lante a puipaw ccaaw nynh Muisaw liate a puipaw ccaaw kha a tuaa a sah hawte, atu mah tuhawte nynh athua.³⁰Thuasalama Ccathyaa nynh paw a ci mou? “Seenung te a ccapaw kha po dee hae; pawccecize seenung a ccapaw tuh a luenung nopinung ccapaw ryte rhoccoukheih lan khyh hae,” a ci.³¹Tukeiccuze uteno hae, aening tuh seenung ccaaw hae ah thua khyh oh, a luenung nopinung ccaaw hae nynh ah thua oh.

¹Khri nynh aening kha phe oun luesah vae. Tukeiccuze luenaw kyakhe tynkaring lan thadyn oh lah, seetangnaw kya-e puihnawpaw ccong kha bua puihthui nan vae oh. Khriccaaw Luenaw

²Ngaetua oh! Kae, Paul nynh kae hopya oh paw tuh, nanning tuh vingdungawkuh hae paw na thua oh ze, Khri tuh nanning hanlan pawsang athanenaw um khyh.³Vingdung a awkuhpaw miakaw nynh Kawbya balyn kha marya a zui cih cite raeringnaw bua kae pya oh.⁴Kawbya liate thyaaccou a ry hae paw nanning tuh Khri kyate na phiakuh vae oh; thawccinaw kyate phe na khuliakuh vae oh.⁵Pawccecize aening tuh zynnaw liate dingnaw kya thua lan cipaw ngaehoinaw kha Muisaw liate phang ah ngaw oh.⁶Pawccecize Jesu Khri kya tuh vingdungawkunaw thuasah, vingdungawku leinaw thuasah pawsang thane khyh; sungsakunaw liate ryalahpaw zynnaw rou nynh athane.

⁷Nanning tuh kou hoy lan na ccue vae oh, nanning kha byaccing zuinaw kyate hum nynh mou ae khee oh?⁸Tuhcihawpaw soihnaw tuh nanning ae kotu oh paw kyate yn thua khyh.⁹Ditaripaw ransi nynh vaedi balyn kha pong a thosah.¹⁰Nanning tuh lungccang na hoi lan khyh oh cite Bawipaw liate nanning konglang zynkunaw ka hoi. Thuasalama vawsawnaw ae pya oh paw ccungccaw miakaw tuh detahnaw a ing cih.¹¹Uteno hae, vingdungawkunaw hynh aho ung cite ka ho ung lanze, pawccemou tuaasahkunaw tuh palei ka ing ung? Tuhte ka la ho lanze, vaelantung te asekuhpaw cyiseinaw tuh um vae lan khyh.¹²Nanning vawsaw ae pya oh paw ccungccaw hae tuh mih tiin heize reihkuh hae sah ci ka ry!

¹³Uteno hae, nanning tuh luenaw kalan ko na thua vae oh, thuasalama tuh-e nae luenaw tuh pynsaw rynaw ccyhhoypaw hanlan mang nan oh, sungsakunaw liate lu kheit te lu kheit ryalawpakuh oh.¹⁴Pawccecize Kawbya balyn tuh, “Na innpaw kha namaw hawkhate na sungsah cih,” cikuhpaw kawbya ccangkheit kyahin phe accing.¹⁵Thuasalama lu kheit te lu kheit na teikuh oh zah na laangku oh ze, lu kheit te lu kheit na roku khyh nawlan oh la raeringkuh oh. Pynsaw Ryalawnaw

¹⁶Kae hopya oh paw tuh, Muisaw te hiin oh lah, pynsaw rynaw kyakhe nae lungryachih nan sah.¹⁷Pawccecize pynsaw rynaw tuh Muisaw rynaw te rawsekuh zah Muisaw rynaw mah pynsaw rynaw te arawsekuh; hynh-e hae tuh ccangkheit te ccangkheit arawsekuh hae; tukeiccuze na cyi ry oh paw kha na cyih khyh oh.¹⁸Thuasalama Muisaw nynh ae cciakhae oh ze, Kawbya zakaw na um vae khyh oh.¹⁹Pynsaw cyisahnaw hae tuh raerae a langkuh, tuh-e hae tuh: ohhuakunaw, nungsikunaw, ohhuaku rynaw;²⁰zohtuh beiknaw, naawthyanaw, huakunaw, pekunaw, eiungnaw, thinrianaw, byalungnaw, lungnging leinaw, buu phiakunaw,²¹duaanaw, ruinaw, zu-aete siaruanaw te tuhcihawpaw cyisahnaw hae nynh thua. Langmawlya raeringnaw kae pya vae oh hawte atu mah raeringnaw bua kae pya oh: tuhcihawpaw uccaw hae a cyihpaw ccungccaw hae tuh Pachia peenaw kha ccou lan khyh hae. Muisaw Thae

²²Muisaw thae tuh sungsakunaw, lungpawnaw, daenaw, lungsaenaw, ngaethyaumsakunaw, hoynaw, lungzinaw,²³lungnenaw te sungku khonaw nynh thua. Hynhcihawpaw te a rawsekuhpaw kawbya um khyh.²⁴Khri Jesu kya-e ccungccaw hae nynh tuh pynsaw kha thuasah, pynsaw rynaw te duaanaw hae kha thuasah vaelantung kya phe a khiade vae hae.²⁵Aening tuh Muisaw liate ah hiin oh athua ze, Muisaw cciakhaenaw thyhte cceih oh sih.²⁶Lysakunaw, lu kheit te lu kheit thinriasakunaw, lu kheit te lu kheit eiungkunaw kha sibia oh sih. Nae Phupaw Duekuh Oh

¹Uteno hae, lukhakheit nynh seinaw a raeseipaw kha na muih oh ze, Muisaw ccungccaw hae nanning nynh nebaleihpaw thinlung te tuh-e ccungccaw tuh a umtynaw kya bua umsah oh; naemaw mah tuhounaw kya na ccaw khyh nawlan oh la raeringkuh oh.²Lu kheit te lu kheit nae phupaw aripaw kha duekuh oh lah, tuhcite Khri kawbya kha na ccingsah cih oh.³Pawccecize ccungccaw lu kheit nynh pawsang athua leite thanccingpaw maman lante a tuaku lanze, amaw te amaw a lingkuhpaw nynh thua.⁴Ccungccaw miakaw nynh a ryalaw kha sihseikuh sah; tetuh ming hae ryalaw kya thua leite, amaw ryalaw kyakhe lungpawnaw a hoi cih.⁵Pawccecize ccungccaw miakaw nynh amaw a phupaw kha a phu cih.

⁶Pachia bya a ccangkuhpaw nynh a ccangpatupaw kha ahoypaw uccaw balyn neethungbua sah.

⁷Lingsakuh nan oh; Pachia tuh pawlangria leite um kho thua khyh; pawccecize na tupaw thyhte na rue cih.⁸Na pynsaw hanlan ccacii na tu ze pynsaw kya-e ronaw kha na rue cih; thuasalama Muisaw hanlan ccacii na tu ze Muisaw kya-e zungzae hiinnaw kha na rue cih.⁹Tukeiccuze ahoypaw ryalawnaw kya thawbang lungthang nan oh sih; pawccecize tuhte ah lungthang khyh zetuh rue ccyh yn zaw te ah rue cih oh.¹⁰Tukeiccuze ccyhhoypaw ah mue takyh oh te, ccungccaw balyn hanlan ahoypaw rya kha lawpah oh sih lah, abyapi lante zyntu innbyn hae hanlan ahoypaw rya kha lawpah oh sih. Nyathya Raeringnaw Pyanaw

¹¹Kamaw ka kuih te nae kalan kae zeipaw hynhcih alepaw ccaw hynh la dotua oh!¹²Vingdungawku lan ae nangse oh paw ccungccaw hae tuh pynsaw kya dohoy lante langku ry hae zah, Khri vaelantung hanlan tuaasahkunaw a teing ry khyh hae keiccu nynh thua.¹³Pawccecize vingdungawkuh hae paw mimaw mah Kawbya kha zui khyh hae, nanning nae pynsaw liate pooku a ry hae keiccuze nanning kha vingdungawkuh hae sah ci ae ry oh.¹⁴Ah Bawipaw Jesu Khri kya-e vaelantung kya laelan pawpaw kya mah ka pooku lanpaw um nan vae sah; tuh-e vaelantung liate laephi tuh kae ka hanlan vaelantung kya khiade thua vae zah, kae mah laephi hanlan khiade ka thua vae.¹⁵Pawccecize Khri Jesu kya tuh vingdungawkunaw thuasah, vingdungawku leinaw thuasah pawsang thane khyh, rae thawpaw thuanaw kha nynh athane.¹⁶Hynh-e phung thyhte a zuipaw ccungccaw hae balyn tungvaw kya thuasah, Pachia kya-e Israel hae tungvaw kya thuasah, daenaw te ngaethyaumsahnaw tuh la um vae sah.

¹⁷Atu te vae tuh, hum nynh sanmah vawsaw yn pya nan vae sah; pawccecize Jesu vaemaw adaelaepaw kha ka pyn kya ka phubia vae.

¹⁸Uteno hae, ah Bawipaw Jesu Khri thawccinaw tuh nae thinlung kya la um vae sah. Amen.

Bible Society of Myanmar

https://app.library.bible/content/1a340f5ae072b2f4