Read 2 KORIN 1

2 KORIN1

Beihlangnaw

¹Pachia rynaw liate Jesu Khri Locceihtu athuapaw Paul te kae unopaw Timote nynh Korin khua kya umpaw Pachia khriccaawbuu te Akhai ram balyn kya umpaw mithyaa hae balyn kalan ccaw kae ky oh:

²Ah Paaw Pachia te Bawipaw Jesu Khri kya-e thawccinaw te daenaw tuh nae kya la um sah!
Teingnaw koute Paul nynh Luungnaw

³Ngaethyaumsahnaw Paaw te ngaengansahnaw balyn Pachia athuapaw, ah Bawipaw Jesu Khri a Paaw, Pachia tuh thehoyte um sah.⁴Pachia nynh aening ah ngae oun ngansahnawpaw, ngaengansahnaw khate vawsawnaw aphuinphuin a tung hae paw kha aening nynh ngaengannaw ah pya kho nawlan oh, ah vawsawnaw balyn kya aening kha ngaengannaw oun pya.⁵Pawccecize aening hanlan Khri teingnaw tuh myarya alung hawte, Khri liate aening ngaengannaw mah myarya alung.⁶Vawsawnaw kae teing ze, tuh-e tuh nanning ngaengannaw te khumnaw hanlan nynh thua; kaening nynh ngaengannaw kae mue ze, tuh-e tuh nanning ngaengannaw hanlan thua zah, tuh-e ngaengannaw tuh kaening kae teingpaw vawsawnaw phuin kha phang ngaesang kho nawlan thawzung ae muesah oh paw nynh thua.⁷Nanning hanlan kaening ngaehoinaw tuh tynkaring; pawccecize nanning tuh kaening teingnaw a neethungkuh bua hae paw na thua oh hawte, kaening ngaengannaw mah a neethungkuh bua hae paw nynh na thua oh cipaw kae ny.

⁸Uteno hae, Asia ram kya kae teingpaw vawsawnaw kha ny leite na um lan oh paw kae ry khyh; pawccecize kae taening kho leipaw vawsawnaw kha thawmawte kae teing keiccuze hiin lante sanmah kae tuakuh vae khyh.⁹Kaemaw te kaemaw kha doliaku leite, chinaw kyate a thoosahpaw Pachia kha kae doliaku nawlan, kaening tuh chi lan byapae vae paw nynh kae thua cite kae tuaku.¹⁰Pachia nynh kaening kha ri lan umpaw chinaw kyate oun luesah zah malang mah oun luesah cih; amaw nynh bua oun luesah ung cih cite a tungvaw kya ngaehoinaw kae hoi.¹¹Ccungccaw patae nynh saw a sangnaw hae liate kae ccoupaw hythuanaw hanlan, ccungccaw patae nynh kaening ccelang lungtuabya a ho nawlan hae, nanning nynh mah sawsangnaw te nae bawm oh. Paul Khuaccongnaw Ccyh Nuenaw

¹²Pawccecize kaening kae pookunaw tuh e hynh nynh thua: Pynsaw hawnaw te thua leite Pachia thawccinaw liate, Pachia nynh oun pyapaw lungthyaanaw te thyaararih lante laephi kya kae hiin cipaw tuh kaemaw nykunawpaw thinlung nynh ccaekia a khan—nae kyakhe tuhcite nynh houh kae hiin.¹³Pawccecize na ria kho oh zah na thaethya oh paw laelan, ccangpaw pawpaw mah nae kalan kae zei khyh; phe thang lan na thaethya cih oh cite ka ngaehoi.¹⁴Nanning nynh kaening hynh abang-asung nae ny vae oh hawte, Bawipaw Jesu Nin kya nanning tuh kaening kae pookunaw na thua oh hawte, kaening mah nanning na pookunaw oh paw nynh kae thua.

¹⁵E hynh phe ria lan ka ny keiccuze, hythuanaw vae ning na ccou ccaw oh cite nae kalan thuaty lan ka ry;¹⁶Mesidonia ram lang ka cceihpaw te kae teepaw cih, te Mesidonia ram kyate nae kalan bua kae ki cih zah nanning nynh Judea ram lang khua ka ccongnaw kya nae saw cih oh.¹⁷Tuhte ka paccynku lya kha zawphalae lante tou ka paccyn? Ka paccynkupaw kha “Athua, athua” cite thuasah, “Thua khyh, thua khyh” cite thuasah hung ho lan cite ccungccaw lante tou ka paccynku?¹⁸Pachia tuh a lungzipaw ccaccing athua thyhawte, nae kya kae hopaw bya tuh “Athua te Thua khyh” cite apydekuhpaw thua khyh.¹⁹Pawccecize Silvanas, Timote te kae nynh nae kya kae hopaw Pachia Ccapaw Jesu Khri tuh “Athua te Thua khyh” apydekuhpaw thua khyh; amaw kya tuh “Athua” ci mawcci.²⁰Pawccecize amaw kya Pachia kya-e byakinkupaw balyn tuh “Athua” ci thua zah, hynh-e keiccuze Jesu Khri liate Pachia phu-enaw hanlan aening nynh “Amen,” ah ci oh.²¹Nanning te kaening kha Khri kya oun tynsah zah chitui oun thuhpaw tuh Pachia nynh thua.²²Tuh-e Pachia nynh aening kha tazeih oun khia zah, ah thinlung kya a Muisaw kha aamahkhan lante phe oun pya vae.

²³Nanning kha ngaethya kae umsah oh pawte nynh Korin khua lang ka ccia vae khyh cipaw Pachia kha ccaekia lang nungkute ka ho.²⁴Kaening nynh nae zynnaw kha kae uk khyh oh, nae lungtuanaw elang naemaw ryte ryalahkheihtu hae nynh kae thua; pawccecize nanning tuh zynnaw kya tynkaring lan na thadyn oh.

¹Tukeiccuze nanning kha bua ngaethyasah khylan nae kalan thua lei lante bya ka paeku.²Pawccecize kae nynh nae ngae kae thyasah oh ze, nae ngae ka thyasah oh paw nanning laelan ka lung yn tuasah lanpaw hummou a um?³He kae thua te, ka lung yn tuasah lan hae paw ccungccaw hae nynh ka ngae yn thyasah khyh nawlan hae nynh nae kalan khahcite ccaw ka zei; pawccecize ka lungtuanaw tuh nae balyn lungtuanaw nynh thua cipaw nae balyn konglang te ccaerarih lan ka zyn.⁴Pawccecize myarya ngaethyate, lungriathaete, mitphi patae luate nynh nae kalan ccaw ka zei, nae thinlungccisah khylan ka zei khyh, nanning kha pawcih nynh kae sungsah oh cipaw nysah khylan nynh ka zei. A Seipaw Ngaethyanaw

⁵Lukhakheit nynh thinlungccinaw a pousah lanze, kae kyalya thua leite nanning balyn kha hankhakheit lante nae thinlung ae ccisah bua oh; e kong hynh patae ka ho ry khyh.⁶Ccungccaw alunghua nynh a pya hae paw detahnaw tuh tuhcihawpaw ccungccaw hanlan azaw;⁷atu tuh nanning nynh tuh-e paw tuh ngaethya paleih oh lah lungtangnaw pya paleih oh; tuhteze nynh aning tuh myarya lepaw ngaethyanaw kya phungkuh lan khyh.⁸Tukeiccuze tuh-e paw na sungsahnaw oh kha na langsahpya nawlan oh kae ngia oh.⁹Pawpaw balyn kya nanning kha syntawtua khylan te kaw na ngae oh ta cipaw ny khylan nynh nae kalan hynhte ccaw ka zei.¹⁰Nanning nynh na ngaethya oh paw ccungccaw kha kae nynh mah ka ngaethya. Kae nynh ccangkhakheit kha ka la ngaethya ze, Khri malang nanning liate nynh ka ngaethya.¹¹Tuhte ah cyi oh paw tuh, Satan nynh aening kha oun tae khyh nawlan nynh thua; pawccecize a paccynkunaw kha aening nynh ah ny oh. Troas kya Paul Lungriathaenaw

¹²Khri thehoypaw ho lan Troas khua kya he ka thua tuh Bawipaw nynh thuakaw yn hungpya.¹³Ka neitaw Titu kha tuin kya ka muih khyh keiccuze ka lungdae khyh. Tukeiccuze minmin kha ka beihsya hae zah Mesidonia ram lang ka cceih. Khri liate Taenaw

¹⁴Khri kya aening kha taenaw kalan zungzae oun cciakhaepaw te aening kha mangte amaw nynaw mynkhuhpaw kha hmin takyh kya a zeihsakuhpaw Pachia kya thehoynaw um sah.¹⁵Pawccecize kaening tuh khum athua hae paw kya thuasah, aroh hae paw kya thuasah, Pachia elang Khri kya-e mynkhuhpaw nynh kae thua.¹⁶Ccungccaw lu kheit hanlan chinaw kyate chinaw kalan a cciakhaepaw mynkhuhpaw kae thua zah, mingccangpaw hanlan hiinnaw kyate hiinnaw kalan a cciakhaepaw mynkhuhpaw nynh kae thua. E ryalaw hae hanlan hummou a zawpaw a um?¹⁷Pawccecize kaening tuh ccungccaw patae hawte Pachia bya kha amia lang a zuakuh hae paw kae thua khyh; thuasalama Pachia kyate sawpaw ccungccaw hae lante Pachia malang thadynte Khri kya thinlung ccaccingte kae ho. Byakin Thaw kya-e Ryalahtu hae

¹Kaening tuh kaemaw te kaemaw tou bua kae thehoysakuh? Abang ccungccaw hae hawte, thehoysahnawpaw ccaw hae kha nae kalan thuasah, tuhkhyhze nanning kyate thuasah phuku lan kae peki tou?²Nanning tuh kae thinlung kya azeikuhpaw ccaw, ccungccaw balyn nynh ny lanpaw te ria lanpaw kae ccaw nynh na thua oh;³nanning tuh Khri kya-e ccaw, kaening nynh kae phupaw nynh na thua oh cipaw ccaerarih lan alang; tuh-e ccaw tuh ccatui te zeipaw thua leite, a hiinpaw Pachia Muisaw te zeipaw nynh thua, lungphe kya zeipaw thua leite, ccungccaw thinlung lungphe kya zeipaw nynh thua.

⁴Kaening tuh Khri liate Pachia malang khe tuhcihawpaw zynkunaw kae hoi.⁵Ccangkhakheit tuh kaening kyate nynh yn thua cite ho lan ciate kaemaw nynh kae cyi khopaw um khyh, kaening cyi khonaw tuh Pachia kyate nynh yn thua,⁶byakin thaw kya-e ryalahtu hae lang tang khylan Pachia nynh kaening kha cyi khonaw oun pya vae; tuh-e byakin thaw tuh zeipaw kawbya kya-e thua leite, Muisaw kya-e nynh thua; pawccecize zeipaw kawbya nynh tuh hiinnaw kha a chia, thuasalama Muisaw nynh tuh hiinnaw kha a pya.

⁷Azopaw Moses mae kya-e phu-enaw keiccuze Israel ccungccaw hae nynh a mae kha riri a do kho lei lan hae ciate, lungphe vawlan khiate zeipaw, chinaw a thuakhaepaw ryalawnaw tuh tuhcite a phu-e lan thua ze,⁸Muisaw ryalawnaw tuh phu-enaw te houh beih lan khyh tou?⁹Pawccecize seibenaw ryalawnaw kya phu-enaw a um lanze, dingnaw ryalawnaw tuh phu-enaw te houh abeih cih.¹⁰Tuh-e ale huapaw phu-enaw keiccuze langmaw lyaze phu-enaw a la hoi boi paw uccaw kha tuh a phu-enaw azo vae.¹¹Pawccecize azopaw uccaw nynh a phu-e lanze, po atynpaw uccaw tuh houh a phu-e cih!

¹²Tuhcihawpaw ngaehoinaw kae hoi keiccuze kaening tuh rawhoyte nynh kae ho.¹³Azo cciamangpaw phu-enaw athangnaw kha Israel hae nynh riri do nan hae sah cite a mae a bongkuhpaw Moses hawte kae thua khyh.¹⁴Thuasalama mih lungkhung zah, atunin cia byakin rynpaw kha he a ria vae hae ze, tuh-e mae bongkupaw tuh lawpya leite phang a um ung; tuh-e mae bongkupaw tuh Khri kya rou nynh zosah athua.¹⁵Atunin cia Moses Kawbya kha he a ria vae hae ze, mih thinlung kha mae bongkupaw nynh phang a bong ung.¹⁶Tuhzemah ccungccaw lu kheit nynh Bawipaw kalan he a paleihku vae ze, mae bongkupaw kha lawpya athua vae.¹⁷Bawipaw tuh Muisaw nynh thua; Bawipaw Muisaw a umnaw kya tuh luenaw a um.¹⁸Aening balyn tuh ah mae bongku leite muinsado kya lang hawte Bawipaw phu-enaw kha ah langsah oh, aening tuh phu-enaw ccangkheit kyate ccangkheit kalan lethungte amaw muinsan alo lante rulae ah thua oh; pawccecize tuh-e rulaenaw tuh Muisaw athuapaw Bawipaw kyate yn thuapaw nynh thua. Anglae Ang lungkhu e Sisua

¹Tukeiccuze Pachia nynh ngaethya oun umsahnaw liate hynh-e ryalaw hynh kae law keiccuze kae lungthang khyh.²Aruh lante kae cyipaw maethya lan umpaw uccaw hae kha kae vua vae; thyaruhnaw te hiin leite, Pachia bya kha ccungccaw ling nawlan kae mang khyh; byaccing kha ccaerarih lan langsakunaw liate Pachia malang khe ccungccaw miakaw thinlung kya thehoysah lan umpaw ozia khate nynh kae hiin.³Kae phypaw thehoypaw tuh phang bong athua lanze, tuh-e tuh azo cciamang hae paw hanlan rou nynh phang bong athua.⁴Pachia muinsan athuapaw Khri kya-e aphu-epaw thehoypaw awnaw tuh a zyn lei hae paw kya a aw khyh nawlan, mih thinlung kha hynh-e laephi pachia nynh phe a mohsah.⁵Pawccecize kaening nynh kae hopaw tuh kaemaw kong thua khyh; Khri Jesu tuh Bawipaw nynh thua cipaw te Jesu keiccuze kaening tuh nae see hae nynh kae thua cipaw kha nynh kae ho.⁶Pawccecize, “Mohnaw kyate awnaw tuh phaephae aw sah,” cite a hotupaw Pachia nynh Jesu Khri mae kyakhe Pachia phu-enaw nynawpaw awnaw kha pya khylan, ah thinlung kya phaephae a awsah vae.

⁷Thuasalama hynh-e ahang huaccepaw thungnaw tuh kaening kya-e thua leite Pachia kya-e nynh thua cipaw langsaku nawlan, kaening nynh laephi ang hae kya hynh-e sisua hynh kae hoi.⁸Vawsawnaw aphuinphuin kae tung salamah koi tuh kae koi khyh; kae lungvawsaw salamah kae lungthang khyh;⁹tuaasahnaw kae ing salamah ccaring vua kae thua khyh; oun khulia hae salamah ro kae thua khyh.¹⁰Jesu a hiinnaw kha mah kae pyn kya a langku ccaw cite Jesu a chinaw kha kae pyn kya zungzae kae phubia.¹¹Pawccecize Jesu a hiinnaw kha a chihthyapaw kae pynsaw kya a langku ccaw cite, kae hiin lungkhu balyn Jesu keiccuze chinaw kalan palei oun ap hae.¹²Tukeiccuze kaening kya tuh chinaw nynh ryalah zah, nanning kya tuh hiinnaw nynh rya a lah.

¹³Ccathyaa nynh, “Kae tuh ka zyn keiccuze ka ho,” cite a ho thyhte, tuh-e te alokuhpaw zynnaw muisaw kha kae hoi pawte, kaening mah kae zyn keiccuze kae ho.¹⁴Bawipaw Jesu a thoosahtupaw nynh kaening kha mah Jesu ryte oun thoosah bua cih zah, nanning ryte amaw a umnaw kalan oun teekhae cih cipaw kae ny.¹⁵Pawpaw balyn tuh nanning hanlan nynh thua; tuhcite a thawccinaw tuh ccungccaw alunghua kya a pazaeku keiccuze Pachia phu-enaw hanlan lungtuabya honaw tuh houhouh alung cih. Zynnaw liate Hiinnaw

¹⁶Tukeiccuze kae lungthang khyh. Atolang e kae pyn tuh roh salamah, alungkhu lang e kae muisaw tuh nin kheit koute nin kheit thawsah athua.¹⁷Pawccecize sosohtari kae teingpaw, zawbahaepaw hynh-e vawsawnaw nynh khinkhia kho leipaw, myarya akhinccipaw zungzae phu-enaw kha kae hanlan oun paccynpya.¹⁸Tukeiccuze muih khopaw uccaw hae kha do leite muih kho leipaw uccaw hae kha nynh kae do; pawccecize muih khopaw uccaw hae tuh sosoh nynh atyn, thuasalama muih kho leipaw uccaw hae tuh zungzae atyn.

¹Pawccecize aening ah umnaw oh paw laephi bu hynh ro athua lanze, vaawlang khua kya kuih te rae leipaw inn, zungzae atynpaw inn kha Pachia kyate ah mue cih oh cipaw ah ny oh.²Pawccecize vaawlang a umpaw ah inn te ccaanku lanpaw kha myarya ah ry oh keiccuze hynh-e laephi bu kya ah hawkhaekuh oh.³Tuhte phe ah ccaanku vae oh ze, aening tuh ah sasete oun muih vae lan khyh hae.⁴Pawccecize e bu kya ah um lya oh tuh ah phupaw nynh phang oun ne zah ah hawkhaekuh oh; laephi boeining hynh khahku ah ry oh keiccuze ah hawkhaeku oh paw thua khyh; a chihthyapaw kha hiinnaw nynh po a laang ccaw cite, aening tuh houh ccaan ah thua oh.⁵E uccaw hanlan aening oun paccyntupaw tuh Pachia nynh thua. Tuh-e Pachia nynh Muisaw kha aamahkhan lante oun pya vae.

⁶Tukeiccuze aening tuh zynkunaw ah hoi zungzae oh; hynh-e pyn inn kya ah um lya oh tuh, Bawipaw te ah sawkuh oh cipaw ah ny oh;⁷pawccecize aening tuh muihnaw liate hiin leite, zynnaw liate nynh ah hiin oh.⁸Aening tuh zynkunaw ah hoi oh zah, pyn hynh cciatawte Bawipaw ryte inn kya umkheih lanpaw kha ah ryhua oh.⁹Tukeiccuze hynh-e inn kya ah um oh zemah, ah um khyh oh zemah, Pachia lungrytung lanpaw kha nynh ah paccynku oh.¹⁰Pawccecize aening lu raveih nynh pyn kya ah um lya oh, ah cyi oh paw thathyhte ahoypaw thuasah, athahpaw thuasah amee mue khylan aening balyn tuh Khri kya-e byapianaw tungkhung malang ah langkuh cih oh. Bua Ccawkunaw Ryalaw

¹¹Tukeiccuze Bawipaw rawrinaw kha ny biate, ccungccaw hae kha kae soih hae; thuasalama kaening tuh Pachia nynh hoyte oun nypaw nynh kae thua, nanning nynh mah nae thinlung kya hoyte nae nyh cih oh cite ka ngaehoi.¹²Nae kyakhe kaemaw te kaemaw kha bua kae thehoysakuh khyh, thuasalama thinlung kha do leite atolang muihpaw kha dote a pookuh hae paw bya kha na khung kho nawlan oh, kaening konglang kha pookunaw kaw kae pya oh.¹³Pawccecize kaening tuh lungkyh lei hae paw kae thua ze, Pachia hanlan nynh thua; lungkyh hae paw kae thua ze, nanning hanlan nynh thua.¹⁴Pawccecize Khri sungsahnaw nynh kaening kha phe oun uk vae, pawccecize ccungccaw lu kheit nynh ccungccaw balyn hanlan a chi keiccuze ccungccaw balyn tuh a chih vae hae cipaw kaening nynh kae ny.¹⁵A hiin hae paw nynh mimaw hanlan hiin vae leite, mih hanlan chih zah bua a thoothuipaw hanlan a hiin ccaw hae cite nynh aning tuh ccungccaw balyn hanlan a chi.

¹⁶Tukeiccuze atu te vae tuh hum sanmah ccungccaw thuanaw mit te kae do vae khyh; vaekheih lyaze ccungccaw thuanaw mit te Khri kha kae la do zemah atu vae tuh tuhte kae do vae khyh.¹⁷Tukeiccuze humhung zemah Khri kya a um lanze, aning tuh rae thawpaw ccungccaw nynh thua; arynpaw uccaw miakaw tuh marya zo zah, pawpaw balyn tuh athawpaw lang a tang vae.¹⁸E hae balyn tuh Pachia kyate nynh thua; Pachia nynh Khri liate aening kha amaw ryte bua oun ccawsakuthui zah, ccawkuthuinawpaw rya kha kaening oun pya;¹⁹tuh-e tuh, Pachia nynh laephi ccungccaw hae mih cyiseinaw kha ccuinpya vae leite, Khri liate minmin kha amaw te bua a ccawsakuthui hae, tuh-e ccawsakuthuinawpaw bya tuh kaening kya phe oun ap vae.²⁰Tukeiccuze kaening tuh Khri hanlan locceihtu hae nynh kae thua; Pachia nynh kaening kha mangte ae hyy oh; nanning nynh Pachia te bua na ccawkuthui nawlan oh, kaening nynh Khri ccelang kae ngia oh.²¹Pawccecize Pachia nynh seinaw a hoi leipaw kha aening keiccuze seinaw a hoipaw lang a tangsah, tuhteze nynh aening tuh tuh-e paw kya Pachia miding lang ah tang kho cih oh.

¹Kaening tuh Pachia ryte pynkheihlan ryalah hae paw kae thua keiccuze nanning nynh mah Pachia thawccinaw kha alakaw lan na ccou khyh nawlan oh kae ngia oh.²Pawccecize Pachia nynh hynhte a ho:“Lehkhan lan accan ccyh kyana bya kha kae thaepya vae,khumnaw nin kya nang khakae bawm vae,” a ci.Dotua, atu hynh lehkhan lan accan ccyh nynh thua; dotua, atu hynh khumnaw nin nynh thua!³Kae ryalaw tuh ccae athua khyh nawlan, ming hae laanpi kya khuliakunawpaw kha kae nungkhaw khyh hae.⁴Pachia ryalahtu hae kae thuanawpaw kha pawpaw kya balyn langsaku khylan: riathaenaw, vawsawnaw, myarya ccihpaw vawsawnaw,⁵ziaku buakunaw, thongsawnaw, keisukeilae nungnaw, arupaw ryalawnaw, i leite umnaw te haedangte umnaw kha phang kae ngaesang;⁶thinlung thyaanaw, nynaw, lungsaenaw, thawccithyanaw, muisaw kya-e thyaanaw, ahmepaw sungsakunaw,⁷byaccing honaw, Pachia thungnaw, voilang kuih te ranglang kuih kya kyngpaw dingnaw zunghe liate,⁸sawtuanaw te sawtua leinaw kha thuasah, thehoynaw te thethyanaw kha thuasah kaening nynh kae tung. Kaening kha hynbya ho hae paw hawte oun ccuepe hae zemah ahmepaw ccungccaw hae nynh kae thua;⁹a ny lei hae paw hawte kae thua zemah, hoyte a ny hae paw nynh kae thua; a chih hae paw hawte kae thua zemah, dotua oh, kaening tuh kae hiin; detahnaw a ing hae paw hawte kae thua zemah, chia tuh oun theih khyh hae;¹⁰ngaethah hae paw hawte kae thua zemah zungzae kae lungtua; ryachi hae hawte kae thua zemah ccungccaw patae kha kae hoirumsah hae; pawsang a hoi lei hae paw hawte kae thua zemah, pawpaw balyn marya kae hoi.

¹¹Pou Korin hae, ccaerarih lan kae hopya vae oh; kae thinlung kha kobalae lan kae hungpya oh.¹²Kaening nynh kae khawsung khyh oh, naemaw rynaw te nynh na khawsungku oh.¹³Nanning nynh zemah liaru nawlan nae thinlung kha kobalae lan hungbua oh, tuh-e tuh ccaaw hae hawte nynh kae hopya oh. Ahiinpaw Pachia Beikinn

¹⁴Zynleitu hae ryte anginkuh leipaw puihnawpaw ccong kha puihkheih nan oh. Pawccecize adingpaw te ading leipaw tuh pawtemou a mungkuh kho cih hae? Awnaw te mohnaw tuh pawtemou a vaeccawkuh kho cih hae?¹⁵Khri tuh Belial te paw nawccawnaw mou a hoi? Tuhkhyhze zyntu nynh zynleitu te paw neethungkunaw mou a hoi?¹⁶Pachia beikinn nynh zohtuh hae te paw nawccawnaw mou a hoi? Pawccecize Pachia nynh,“Minmin kya ka um cih zahminmin laku ka cceih cih,kae tuh mih Pachia ka thua cih zahminmin tuh ka ccungccaw haeathua cih hae,” a ci hawte,nanning tuh ahiinpawPachia beikinn nynh na thua oh.¹⁷Tukeiccuze Bawipaw nynh,“Minmin kyate pou oh lahphiakuh oh;athyaa leipaw kha hae nan oh;tetuh nanning khakae ccou cih oh.¹⁸Kae tuh nae Paawka thua cih zah nanning tuhka ccapaw hae teka ccanung hae na thua cih oh,cite Alesaepaw Bawipaw nynha ci,” cite a ho.

¹Sungsah hae, hynh-e byakinpyakupaw hae hynh ah hoi oh keiccuze pynsaw te muisaw nungsikunaw miakaw kyate ahmaw te ahmaw hynh ccikankuh oh sih lah, Pachia rawri te thyaanaw kha ccingsah oh sih. Korin hae Ngaesikunaw

²Kaening hynh thinlung oun hungpah oh; kaening tuh hum kya sanmah kae cyihsei khyh, hum sanmah kae roh khyh, hum kya sanmah kaemaw thanenaw kae ccungkuh khyh.³Hynh-e hynh nanning kha seibe khylan ka ho khyh; pawccecize nanning tuh kaening te chi ze chikheih hiin ze hiinkheih, kae thinlung kya na um oh cite langmawlya phe kae hopya vae oh.⁴Nanning konglang te myarya leih ka pookuh; nanning liate myarya ka lunglekhaekuh, ngaengannaw te phe ka beih. Riathaenaw kae teingnaw kya balyn kae tuh myaryamaw ka lungtua.

⁵Pawccecize Mesidonia ram lungkhu lang he kae thua te, kae pynsaw haeungnaw ccyh hoi khyh, aphuinphuin te riathaenaw kae tung—atolang tuh doukunaw um zah, alungkhu lang tuh rinaw a um.⁶Thuasalama mih lungthawthang hae paw kha ngaengannaw a pyatu Pachia nynh Titu yn thuanaw liate kaening kha kae ngae oun ngansah.⁷Titu yn thuanaw liate kyalya thua khyh, Titu nynh nae kyate a muepaw ngaengannaw liate mah kaening tuh kae thawmuin; nae pekinaw, nae rawnaw te ka hanlan na zuakunaw oh kong kha aning nynh oun hopya keiccuze kae tuh ka lung houh tua.⁸Pawccecize ka ccaky te nanning kha nae ngae kae la thyasah oh zah ka la ngaesiku ze heize, atu tuh ka ngaesikuh vae khyh; pawccecize tuh-e ccaky nynh sosoh rou nynh nae ngae ae thyasah oh cipaw ka ny.⁹Atu ka lungtuapaw hynh nae ngae ae thyasah oh keiccu thua khyh, nae ngaethyanaw nynh ngaesikunaw ae hoisah oh keiccu nynh thua; pawccecize kaening keiccuze pawpaw mah na shung khyh nawlan oh, nanning kha Pachia rynaw thyhte nae ngae ae thyasah oh.¹⁰Pawccecize Pachia rynaw thyhte athuapaw ngaethyanaw nynh tuh khumnaw kalan a thuakhaepaw ngaesikunaw kha thuakhae zah, ngaethyanaw kha thuakhae khyh; thuasalama laephi te asekuhpaw ngaethyanaw nynh tuh chinaw kha a thuakhae.¹¹Pawccecize Pachia rynaw thyhte hynh-e ngaethyanaw nynh nae lungkhu kya pawcihawpaw lungthonaw mou a thuakhae cipaw dotua oh: naemaw te naemaw sei thyaasahkunaw, atazae leipaw kya thinrianaw, rawrinaw, myarya pekinaw, thawte zuapyakunaw, detahnaw hae kha nae kya a thuakhae. Hynh-e uccaw kya nanning tuh seinaw na hoi vae khyh oh cipaw kha pawpaw kya balyn phe na langsaku vae oh.¹²Tukeiccuze nae kalan ccaw ka zei zemah a cyihseipaw keiccu ka zei khyh, cyiseinaw a teingpaw keiccu mah ka zei khyh, nanning nynh kae tungvaw kya lungthonaw na hoi oh paw kha Pachia malang hoyte na ny nawlan oh nynh ka zei.

¹³Tukeiccuze hynh-e nae ngaengannaw kya kaening mah kae ngaenganbua. Tuh-e kae ngaengannaw apiaze, Titu a lungtuanaw liate kaening mah myarya kae lungtuabua, pawccecize nanning balyn nynh Titu kha a lung na tuasah oh.¹⁴Titu kyakhe nanning konglang ccangkhakheit ka pooku vae ze, ka maethah khyh; nae kya kae hopaw miakaw tuh ahmepaw athua hawte, Titu kya kae pookunaw tuh mah ahmepaw nynh thua cipaw alang.¹⁵Nae balynte a bya na ngae oh zah, rawri thyngkute na cciadue oh paw kha he a liathui tuh, nanning ae sungsahnaw oh kha houh ale.¹⁶Kae nynh nanning kha atyn-are kya kae zyn oh keiccuze ka lungtua. Khriccaaw hae elang Khoipyapaw

¹Uteno hae, Mesidonia ram e khriccaawbuu hae kya pya athuapaw Pachia thawccinaw kong kha nysah kae ry oh;²minmin tuh myarya lepaw vawsawnaw khate syntawnaw a teing hae zemah, myarya lepaw mih lungtuanaw te myarya ccihpaw mih ryachinaw nynh minmin kha hysahnaw hoirumnaw te phe a biasah hae.³Pawccecize minmin nynh a pya khonaw hae ciate pya hae zah a pya khonaw hae laelan heize mimaw lungthote a pya hae cipaw kha kae nynh ccaekia ka khan;⁴mithyaa hae elang ryalawpyanaw kya bawmku buanaw ccyhhoy kha mue khylan minmin nynh thawmawte oun ngia hae,⁵e hynh kae la ngaehoinaw laeze houh cyih hae zah, Pachia rynaw thyhte mimaw te mimaw kha Bawipaw kalan masaty a pyaku hae, tukoute kaening kalan mah a pyaku hae.⁶Tukeiccuze Titu nynh a tho vae paw hynh-e thawccikunaw rya hynh nanning kya mah phe a thangsah nawlan, kaening nynh thawte kae ngia.⁷Atu lya nanning tuh zynnaw, byahonaw, nynaw, zuakunaw kya te kaening nae sungsahnaw oh kya, pawpaw kya miakaw na hoirum oh hawte, hynh-e thawccikunaw rya kya mah hoirumbua oh ci kae ry.

⁸E hynh kawpya hawte ka ho khyh, thuasalama mingccang hae nynh hysahte a zuakunaw hae liate, nae kya-e sungsakunaw tuh ahmepaw athua tou cipaw kha nynh kae syntawtua oh.⁹Pawccecize nanning nynh ah Bawipaw Jesu Khri a thawccinaw kha na ny oh, aning tuh a hoirum zemah aning a ryachinaw liate nanning na hoirum nawlan oh, nanning keiccuze a ryachipaw lang a tang.¹⁰Hynh-e kya tuanaw kae pya oh: inkhawkum lyaze na tho oh zah po cyi lan na ry oh paw rya kha phe na thangsah oh ze naemaw hanlan ahoy,¹¹tuhteze nynh tuh-e ryalaw kya nae lungtho thyhte, na hoi oh paw khate tuh-e rya tuh na thangsah kho cih oh.¹²Pawccecize pya rynaw thinlung a um lanze, ccungccaw nynh a hoi leipaw kha do leite a hoipaw uccaw kha dote, Pachia nynh a lasung kha a ccoupya.¹³Pawccecize mingccang hae kha luesah lan zah nanning kha phurisah lan cite ka ho rypaw thua khyh;¹⁴atu lya nanning hoirumnaw te minmin hobounaw laku kya nginkunaw a um nawlan nynh thua; tuhteze nynh minmin hoirumnaw nynh nanning hobounaw kha a bawmbua cih, tuhcite nginkunaw a um nawlan nynh ka ho ry.¹⁵Ccathyaa kyaze,“Patae a hoipaw nynheih alung lan hoilae khyh,beihtaraw a hoipaw nynheih azya lan hoilae khyh,”cite azeiku hawte nynh thua. Paul nynh Titu A Saw

¹⁶Thuasalama nanning hanlan ka hoipaw bawm rynaw thinlung tahawpaw kha Titu thinlung kya a sangtupaw Pachia kya thehoynaw um sah.¹⁷Pawccecize kaening nynh kae hyypaw kha a nawccaw kyalya thua leite, myarya ae bawm ry oh keiccuze amaw lungthote nae kalan yn cceih cih.¹⁸Khriccaawbuu hae balyn kya thehoypaw honaw kya a minthaanpaw uno lu kheit kha Titu ryte kaening nynh kae saw cih;¹⁹tuh kyalya thua khyh, Bawipaw phu-enaw te kaening bawmnaw kha langsaku khylan hynh-e thawccikunaw rya kae law lyaze aning tuh kaening ryte khuaccongkheih lan khriccaawbuu hae nynh a po hae paw mah athua.²⁰Hynhcite kae synriapaw thawccikunaw lasung kong kyahin hum nynh sanmah oun ccae khyh nawlan kae raeringkuh.²¹Bawipaw muihnaw kya kyalya thua leite, ccungccaw hae muihnaw kya mah ahmepaw kha cyi lan kae paccynkuh.²²Minmin ryte kae unopaw kha kaening nynh kae saw; aning tuh avae patae kae syntawtua zah ryalaw miakaw kya a zuakuhpaw nynh thua cipaw kae muih, atu lya hynh nanning kha myarya ae zyn oh keiccuze houh a zuakuh.²³Titu hynh kamaw te kae mungkuhpaw thua zah nanning bawmnaw rya kya kae lahkheihpaw nynh thua; ccangpaw kae uno hae hynh mah khriccaawbuu hae kya-e locceihtu thua hae zah, Khri phu-enaw nynh thua hae.²⁴Tukeiccuze nae kya-e sungsakunaw ccaekia te nanning konglang kae pookunaw kha khriccaawbuu hae malang khe minmin kha ccaerarih lan muihsah oh. Jerusalem e Khriccaaw hae elang Khoipyanaw

¹Mithyaa hae elang ryalawpyanaw te asekuh lante nae kalan ccaw zei lanpaw tuh ka hanlan ho khyh.²Pawccecize na bawm ry oh paw kha ka ny, tuh-e hanlan inkhawkum te Akhai ram um hae paw tuh paccynkute a um vae hae cite Mesidonia hae kya nanning kong ka pooku vae; te nae lungthonaw nynh ccungccaw patae kha myarya mih lungthosah bua hae.³Tuhzemah nanning kong kae pookupaw hynh alakaw lan a tang khyh nawlan, ka hopaw bya thyhte na paccynku ccaw oh cite uno hae kha nae kalan kae nynh kae saw hae.⁴Tukhyhze tuh, Mesidonia hae tuh kamaw ryte oun thuabua hae zah paccynku leite na um oh paw kha oun muih hae ze, nanning maethyanaw tuh la um hin sah, rawhoyte kae la pookupaw kha kae maethahsei cih.⁵Tukeiccuze bya phe na kinku vae oh paw, hysahte na pya oh paw lasung kha paccyn ty khylan uno hae kha nae kalan cciaty lan hyy aho cite ka tua. Tuhte tuh-e lasung tuh hysah leipaw uccaw hawte thua leite, hysahnaw te paccyn typaw athua nawlan nynh thua.

⁶Ccacii pyhtari a tupaw nynh looh pyhtari nynh a rue cih, ccacii patae a tupaw nynh looh patae a rue cih cipaw hynh nyh oh.⁷Ccungccaw miakaw nynh a thinlung kya a khyaku thyhte pya sah, hysah leinaw te pya nan sah, pya khyh ze hoy khyh cipaw thinlung te pya nan sah, pawccecize lungtuate a pyatupaw kha Pachia nynh a sungsah.⁸Pachia nynh nanning kha myarya lungpaw hythuanaw aphuinphuin ae bawm kho oh, tuhte nanning tuh atyn-are phe zaw lan zungzae na hoi cih oh zah, ahoypaw ryalaw miakaw kya patae na bawm kho cih oh.⁹Ccathyaa kyaze,“Aning nynh hysahteryachi hae kha a pya hae;a dingnaw tuh zungzae atyn,”cite azeiku hawte nynh thua.¹⁰Ccacii a tupaw kha ccacii a pyatu te ae lanpaw sanlou a pyatu Pachia nynh nae ccacii kha ae pya cih oh zah ae pungsahpah cih oh; nae dingnaw athae kha ae lungsahpah cih oh.¹¹Hysahnaw te patae na pya nawlan oh nanning tuh pawpaw kya balyn hoirumsah na thua cih oh zah, kae kyate a mue hae paw nae lasung liate Pachia kha a thehoysah cih hae,¹²pawccecize hynh-e bawmpaw ryalaw nynh mithyaa hae hobounaw kyalya kha a bawm buapaw thua leite, Pachia kalan lungtuabya honaw patae kha mah a thuakhae.¹³E bawmnaw ryalaw langsakunaw liate, Khri thehoypaw na kyngku oh paw kawngaenaw liate thuasah, mithyaa hae te mingccang hae balyn kha hysahte na bawm oh paw liate thuasah ccungccaw patae nynh Pachia kha a phu-esah hae.¹⁴Pachia nynh ae pya oh paw a thawccinaw asung-epaw keiccuze minmin nynh nanning kha ae ngae oh zah nae hanlan saw ae sangpya oh.¹⁵Ho kho um leipaw a lasung hanlan Pachia kya thehoynaw um sah! Paul nynh A Daangsaku

¹Nanning ryte ah muihku vae oh ze zakaw a sangsaku zemah nanning te ah sawku vae oh ze rawthungte bya a hopaw kae, Paul nynh Khri kya-e nevyalyanaw te lungnenaw khate nanning kha kae ngia oh.²Kaening kha pynsaw rynaw thyhte a hiin hae paw cite oun tua hae paw ccungccaw hae kha rawse khylan rawhoysaku lan ka tuakupaw kha nae kya he kae thua te rawhoysaku aho vae khyh nawlan kae ngia oh.³Pawccecize kaening tuh pynsaw lante kae hiin zemah, pynsaw rynaw thyhte rhaw kae dou khyh,⁴pawccecize rhaw kae dounawpaw zunghe tuh pynsaw zunghe thua leite, rhawlungrua hae a tingsah khopaw Pachia thungnaw zunghe nynh thua.⁵Pachia nynaw a rawsepaw eikunaw hae te khawtu athuapaw lysakunaw miakaw kha kae roh zah, Khri kaw kha ngaesah khylan tuanaw miakaw kha kae kyng.⁶Nanning kawngaenaw tuh he accing te, kawngae lei hae paw balyn kha detah lan paccynkute kae um.

⁷Nae malang umpaw kha dotua oh. Lukhakheit nynh Khri kya-e nynh ka thua cite amaw te amaw a zynku lanze, aning tuh Khri kya-e athua hawte kaening mah Khri kya-e nynh kae thua cipaw kha aning nynh tuabia sah.⁸Nanning ro nawlan thua leite, nanning tynsathung nawlan Bawipaw nynh kaening oun pyapaw kae kya-e kawhoinaw kong kha kae nynh alawe lante ka pooku zemah, ka maethyakhaekuh lan khyh.⁹Ka ccaky hae khate nanning kha hurawpaw hawte athua lanpaw kha ka ry khyh.¹⁰Pawccecize, minmin nynh, “A ccaky hae tuh a khincci zah a thung, thuasalama a pyn phang umnaw kya tuh a nyaa, a byaho pawlang um khyh,” a ci hae.¹¹Kaemaw kae um khyh lyaze ccaky kya umpaw kae bya thyhte kaemaw kae um zemah kae cyi mamin cipaw kha khahcihawpaw ccungccaw hae nynh thaethya hae sah.

¹²Pawccecize mimaw te mimaw the a hoysakuh hae paw abang ryte kae riakuh bua ngan khyh, kae khinkhiakuh ngan khyh. Thuasalama minmin tuh mimaw te mimaw toukuh hae zah mimaw te mimaw khinkhiakute mih ngaeenaw kha a langsaku hae.¹³Thuasalama kaening nynh eih alawe lante kae pookuh lan khyh, Pachia nynh oun pyapaw aloori lungkhu nynh kae pooku, tuh-e aloori tuh nanning kyacia phe a thua.¹⁴Nae kalan kae thuapaw hynh kae loori kha po lawe lan kae cciapaw thua khyh; kaening tuh Khri thehoypaw hote nae umnaw lang masaty oun thua hae paw nynh kae thua.¹⁵Kaening nynh kae loori po alawe lante milae ryalaw kya kae pookuh khyh; thuasalama nae zynnaw a kaethung thyhte nanning laku kya kae ryalaw mah myarya ako cih cite kae ngaehoi,¹⁶tuhcite milae loo kya law vae paw ryalaw kyakhe pooku leite, nae umnaw khunglang umpaw ram hae kyakhe thehoypaw kha kae ho kho cih.¹⁷Ccathyaa nynh, “A pookuhpaw ccungccaw tuh Bawipaw kyakhe pookuh sah,” a ci.¹⁸Pawccecize amaw te amaw the a hoysakuhpaw tuh Bawipaw nynh nawccawkhaepaw thua khyh, Bawipaw nynh the a hoysahpaw rou kha nynh nawccawkhaepaw athua. Paul te Ahme leipaw Locceihtu hae

¹Ka ngaeenaw hynh sosoh oun ngaesangpah oh ci ka ry. Beih yn ngaesangpah oh!²Pachia nynh a thawsia hawte kae mah nae hanlan ka thawsia, pawccecize nanning kha athyaapaw liaccady hawte Khri kalan pya khylan, Khri athuapaw vawpaw lu kheit te chiapya lan phe kae haaw vae oh.³Thuasalama hupaw nynh a thyaruhnaw khate Evi kha a ling hawte nae thinlung kha thyaararih lan Khri na zuinaw oh kyate ae cciakhaesei cih oh cipaw ka thinphang.⁴Pawccecize lukhakheit nynh nae kalan yn thua zah kaening nynh kae ho leipaw ccangpaw Jesu kong kha a ho ze thuasah, na mue oh paw te alokuh leipaw muisaw kha na mue oh ze thuasah, na lawku oh paw te alokuh leipaw thehoypaw kha na lawku oh ze thuasah kou hoy lan la ngaesang oh.

⁵Kae tuh hynh-e abyapi huapaw locceihtu hae laeze kharouh ka nyaahua khyh cite ka tuaku.⁶Kae tuh byaho a thya leipaw ka thua zemah, nynaw kya tuh tuhte ka thua khyh; hynh-e konglang hynh pawpaw kya balyn aphuinphuin te nae kya kae langsaku vae.

⁷Nanning kha hangthung khylan kamaw te kamaw zakawsangsakute, amee mue leite Pachia thehoypaw kae hopya oh keiccu kae tuh seinaw ka rae tou?⁸Nanning hanlan ryalaw khylan ccangpaw khriccaawbuu hae kya-e bawmnaw kha lawte minmin kha ka luade hae cite heize ho kho athua.⁹Nae kya ka um lya ka hanlan ahobou lya kha hum sanmah phupaw ka risah khyh; pawccecize ka hanlan ahoboupaw kha Mesidonia langte oun thua hae paw uno hae nynh yn bawm hae. Tukeiccuze kae tuh nanning kha phupaw ae risah oh paw ka thua khyh nawlan pawpaw balyn kya ka raeringkuh, tuhte po ka raeringkuh cih.¹⁰Khri kya-e byaccing tuh ka kya a um thyhawte, Akhai ram hae kya hynh-e ka pookunaw hynh hum nynh sanmah yn khee kho lan khyh.¹¹Pawccemou? Nanning kha kae sungsah khyh oh keiccu tou? Kae sungsah oh paw kha Pachia nynh phe ny.

¹²Kaening hawte pooku lanpaw ccyhhoypaw a mue ry hae paw nynh tuh-e ccyhhoypaw tuh a muebua khyh nawlan hae, ka cyipaw kha po ka cyih ung cih.¹³Pawccecize khahcite a pookuh hae paw tuh ahme leipaw locceihtu hae, ahynpaw ryalahtu hae, Khri locceihtu hae lang mimaw te mimaw a umsakuh hae paw nynh thua hae.¹⁴Ngaeangthua lanpaw thua khyh! Pawccecize Satan nynh heize awnaw kya-e vaawpaw o-ang lante amaw te amaw kha a umsaku.¹⁵Tukeiccuze Satan a ryalahtu hae nynh mah dingnaw ryalahtu hae hawte a umsaku hae paw tuh ngaeang lanpaw thua khyh; minmin athangnaw tuh mih ryalawnaw hae thyhte athua cih. Paul A Teingnaw

¹⁶Hum nynh sanmah kae hynh mingaeepaw hawte yn tua nan sah cite bua ka ho; tuhte nae tua oh ze, kae nynh ccapyh ka pooku nawlan kae hynh mingaeepaw hawte oun ccou oh.¹⁷Hynh-e pookunaw kong ka hopaw hynh Bawipaw kya-e kawhoinaw te ka hopaw thua leite, a ngaeepaw hawte nynh ka ho.¹⁸Ccungccaw patae nynh pynsaw lante a pooku hae keiccuze kae mah ka pookuh bua cih.

¹⁹Pawccecize nanning tuh na haw oh keiccuze mingaee hae kha lungtuate na ngaesangpya oh.²⁰Lukhakheit nynh see lang ae mang oh ze thuasah, ae zuaku oh ze thuasah, ae luade oh ze thuasah, ae theihrya oh ze thuasah, nae mae ae bia oh ze thuasah nanning nynh na ngaesang oh.

²¹Kaening tuh tuhte cyi lan myarya kae la nyaa cipaw kae maethyanaw kha nynh ka ho! Thuasalama a ngaeepaw hawte ka ho lanze, lukhakheit nynh hankhakheit kong a pooku ngan ze, kae mah ka pookuh ngan.²²Minmin tuh Hebru hae athua hae tou? Kae mah Hebru paw nynh ka thua. Minmin tuh Israel hae athua hae tou? Kae mah Israel paw nynh ka thua. Minmin tuh Abraham ciihan athua hae tou? Kae mah Abraham ciihan nynh ka thua.²³Minmin tuh Khri ryalahtu athua hae tou? Kae tuh houh a hoy huapaw ryalahtu nynh ka thua cite a ngaeepaw hawte ka ho—kae tuh thawmawte rya houh a lahpaw, avae patae thong a ccahpaw, riatae lei a zia a bua hae paw, vyavya leih a chihpaw nynh ka thua.²⁴Vae sung pali accing nawlan vae kheit ary lante Judah hae nynh vae pangaw yn bua hae.²⁵Ruising te buakunaw vae thum, lung te deihkunaw vae kheit, sanphalung nynh rokhaekunaw vae thum ka tung; zi kheit nin kheit rili vawlan ka phaly.²⁶Atu te atu khua ka ccong zah vawpi kya vawsawnaw, damiah hae kyate vawsawnaw, kamaw ccungccaw hae kyate vawsawnaw, Zenta hae kyate vawsawnaw, khuapi kya vawsawnaw, ramkaw kya vawsawnaw, rili kya vawsawnaw, ahme leipaw uno hae kyate vawsawnaw kha ka tung.²⁷Thawbangte rya rupaw lawnaw, i leite azi patae umnaw, vuelawnaw te tuihawnaw, atu te atu looh leite umnaw, akyaapaw teingnaw te boeining leite umnaw kha ka tung.²⁸Tuhpiaze khriccaawbuu hae balyn hanlan ka thawsianaw nynh mah nin takyh phang yn ne.²⁹Lukhakheit nynh a thawzya ze, kae mah thawzyabua leite ka um zawtou? Lukhakheit nynh a thy a pawku ze, kae mah lungriathae leite ka um zawtou?

³⁰Ka pooku lanze, kamaw ka thawzyanaw a langsakuhpaw uccaw kong kha nynh ka pookuh cih.³¹Kae tuh ka hyn khyh cipaw kha zungzae thehoysah athuapaw Bawipaw Jesu a Paaw te a Pachia nynh phe a ny.³²Damaskas khuapi kyakhe Aretas siapharanpaw kuihkaw e uktu bawi nynh kae kha kyng khylan Damaskas khuapi kha rhawviatu hae a ngawsah hae.³³Kae kha shua lungkhu yn phang hae zah thanlan-aw kyakhate khualungrua kyate yn sahbung hae zah a kuih kyate phe ka lue. Paul A Vizin hae te Byaphy hae

¹Ka pooku aho ung; tuh-e pookunaw liate mue lanpaw pawsang a um khyh zemah, Bawipaw kya-e vizin te byaphy kong kha ka ho ung cih.²Anuhlang kum haw lae pali lyakhe Khri kya a tynpaw lu kheit tuh vaawlang khang thumnaw kalan lawthung athuapaw kha ka ny—pyn ryte tou, pyn umbia leite tou cipaw ka nyh khyh; Pachia nynh a nyh.³Tuh-e paw tuh paradis lungkhu lang lawthung thua zah ccungccaw nynh ho lan accan leipaw bya te ho kho leipaw bya kha aning nynh a thae. Tuhcihawpaw ccungccaw tuh ka ny—pyn ryte tou, pyn umbia leite tou cipaw ka nyh khyh; Pachia nynh a nyh.⁵Tuhcihawpaw ccungccaw ccelang ka pookuh cih, tuhzemah kamaw hanlan tuh ka thawzyanaw kong laelan ccangpaw kong ka pookuh lan khyh.⁶Pawccecize ka pooku ry zemah byaccing kha ka ho cih zah mingaeepaw ka thua lan khyh. Ccungccaw lu kheit nynh kamaw yn muihpaw laelan, kamaw kong a thaepaw laelan kae kha ahang lante yn tuasei khyh nawlan pooku leite ka sungku.⁷Ka muihpaw byaphy hae tuh myarya alung keiccuze ka lysaku sei khyh nawlan ka ngesaw kya hinpaw kha yn pya, tuh-e tuh ka lysaku sei khyh nawlan vawsaw yn pyapaw Satan a locceihtupaw nynh thua.⁸Hynh-e konglang te tuh-e uccaw nynh kae kha yn poutaw nawlan Bawipaw kalan vae thum ka ngiaku,⁹thuasalama Bawipaw nynh kae kha, “Ka thawccinaw tuh na hanlan azaw; pawccecize ka thungnaw tuh thawzyanaw kyakhe ccingsah athua,” yn cipya. Tukeiccuze Khri thungnaw tuh ka tungvaw atyn nawlan, ka thawzyanaw kyakhe lungtuate houh ka pookuh cih.¹⁰Tukeiccuze Khri hanlan thawzyanaw, saryanaw, vawsawnaw, tuaasahkunaw te vawsawrunaw hae kha ka lungrythuakhaekuh. Pawccecize ka thawzya vae ze, thawzung ka hoi. Korin Khriccaawbuu elang Paul Thinphangnaw

¹¹Kae tuh ka ngaee vae; nanning nynh tuhte nae nangse oh. Thanccingte nanning nynh kae hynh thehoysah lan ka ccan, pawccecize kae tuh pawsang ka thua khyh zemah abyapi huapaw locceihtu hae laeze ka nyaahua khyh.¹²Locceihtu ccaccing ka thuanawpaw syntawnaw hae tuh, lungsaenaw balyn te nae kya ka langsakupaw syntawnaw hae, ngaeangnaw hae te athungpaw ryalaw hae kha nynh thua.¹³Ccangpaw khriccaawbuu hae laeze nanning tuh pawtemou na nyaahua oh? Kae tuh nae hanlan phupaw ripaw ka thua khyhpaw kyalya thua khyh tou? Hynh-e ka meseinaw hanlan yn ngaethya oh!

¹⁴Atu nae kalan vae thumnaw ccia lan ka paccynkuh. Nae hanlan phupaw ripaw ka thua lan khyh; pawccecize ka rypaw tuh nae uccaw kha thua leite naemaw kha nynh thua; pawccecize ccaaw hae nynh nungpaaw hae hanlan uccaw ccakhungpya lan ccan khyh, nungpaaw hae nynh ccaaw hae hanlan ccakhungpya lan accan.¹⁵Kae tuh nanning hanlan ka hoipaw kha myarya lungtuate ka mang cih zah ka pyn hynh mah ka mang ung cih; kae nynh myarya mang kae sungsah oh pite kae hynh beihbeihte tou nae sungsah cih oh?¹⁶Tuhte athua ze la thua sah, nanning kha phupaw kae risah khyh oh. Tuhzemah kae tuh ka thyaruh keiccuze nanning kha hynbya te nynh oun kyng na ci oh.¹⁷Nae kalan kae saw hae paw lukhakheit liate nae kyate amia kha ka lawkuh tou?¹⁸Titu kha nae kalan ccia lan ka ngia zah uno lu kheit kha amaw kya kae sawbua. Titu nynh nae kya-e amia a lawkuh tou? Kaening tuh alokuhpaw tuanaw te rya kae lahkheih khyh tou? Alokuhpaw laanpi kha kae zuikheih khyh tou?

¹⁹Kaening nynh kaemaw te kaemaw hynh nae malang kae daangsaku cite tou po nae tua oh? Pachia malang khe Khri min te nynh bya kae ho. Ka sungsah hae, kaening nynh kae cyipaw miakaw hynh nanning bawmnaw hanlan nynh thua.²⁰He kae thua te, nanning kha ka ry hawte kae muih lan khyh oh paw te kae kha na ry oh hawte nae muih lan khyh oh paw kha ka thinphang; nae kya pekunaw, eiungkunaw, thinrianaw, karankunaw, thethya hokunaw, thanrynaw, tansakunaw, keisukeilae umnaw a umsei cih cipaw mah ka thinphang.²¹Bua kae thua te, ka Pachia nynh kae kha maethyate yn umsah cih cipaw ka thinphang; nungsikunaw, ohhuakunaw, ohhuaku rynaw khate sei hae zah a ngaesikuh lei hae paw patae hanlan ka raw lanpaw kha mah ka thinphang. Raeringnaw Bua Pyanaw

¹Atu hynh nae kalan kae thuapaw vae thumnaw athua cih. Ccathyaa nynh, “Seibenaw miakaw tuh ccaekia lu ning khyhze lu thum nynh a ho hae paw bya te rou nynh tynsah athua cih,” a ci.²Nae kalan bua kae thua ze hum sanmah ngaethya ka umsah lan khyh cite vae ningnaw kae thua lyaze langmaw a sei hae paw te tuhlaepaw balyn kha raeringnaw ka pya hae, atu nae kya ka um khyh lya mah minmin kha raeringnaw ka pya hae;³pawccecize Khri nynh kae ka kyate bya a ho cipaw ccaekia kha na ry oh; Khri tuh nanning te na kyngkunaw oh kya nyaa khyh, nae kya a thungpaw nynh thua.⁴Pawccecize aning tuh nyaanaw te vaelantung kya khiade athua zemah, Pachia thungnaw liate a hiin; tuhawte kaening mah amaw kya kae nyaa zemah nanning te ah kyngkunaw oh kya Pachia thungnaw liate amaw ryte kae hiin cih.

⁵Zynnaw kya na hiin oh tou, na hiin khyh oh tou cipaw naemaw te naemaw sihseikuh oh. Naemaw te naemaw syntawku tua oh. Tuhte na syntawkuh oh zah na shung ccaccing khyh oh ze, nae kya Jesu Khri a um cipaw na nyhkuh khyh oh tou?⁶Kaening tuh kae shung khyh cipaw na nyh cih oh cite ka zyn.⁷Nanning nynh ahoy leipaw kha kharouh na cyi khyh nawlan oh Pachia kalan saw kae sang— kaening tuh syntawkunaw kya kae shung khyh cite langsaku rypaw thua khyh, kaening tuh a shung hae paw hawte kae la thua zemah nanning nynh ahmepaw kha na cyi ccaw oh cite nynh saw kae sang.⁸Pawccecize kaening tuh byaccing rawsete pawsang mah kae cyih kho khyh, byaccing hanlan rou nynh kae cyi.⁹Kaening tuh kae nyaa zah nanning tuh nae thawsae ze, kae lungtua. Accingpaw lang na tang nawlan oh saw kae sangpya oh.¹⁰Tukeiccuze ronaw hanlan thua leite thawzung tynsahnaw hanlan Bawipaw nynh kae yn pyapaw kawhoinaw kha he kae thua te rehahan lante ka mangsei khyh nawlan, nanning te ah sawku lya oh hynh-e ccaw hynh nae kalan kae zei. Nyathya Beihlangnaw

¹¹Uteno hae, nyathyakou kya kae beihsya oh. Accingpaw lang tang lan zuakuh oh; kae ngia oh paw kha la ngae oh, lu kheit te lu kheit lungngingte um oh lah, lungdaete la um oh; sungsakunaw te daenaw Pachia tuh nanning ryte a um cih.¹²Athyaapaw myngkunaw khate lu kheit te lu kheit byabeihkuh oh.

¹³Mithyaa hae balyn nynh nanning kha ae beihlang oh.¹⁴Bawipaw Jesu Khri thawccinaw, Pachia sungsahnaw te Thyaa Muisaw vaeccawkunaw tuh nae balyn tungvaw kya la um sah. Amen.

Bible Society of Myanmar

https://app.library.bible/content/1a340f5ae072b2f4