EZRA1

Sairas nynh Judah hae Kisahnaw

1Jeremiah nynh a hopaw Bawipaw bya kha ccingsah khylan, Persia siapharan Sairas nynh siapharan lang a tangnaw masaty kum khe, Bawipaw nynh Persia siapharan Sairas thinlung kha a tuhou keiccuze aning nynh kaw a thopaw ccaw kha a peenaw balyn kalan thaesah hae zah:
2“Persia siapharan Sairas nynh hynhte a ho: Bawipaw , vaawlang Pachia nynh laephi peenaw balyn kha yn pya vae zah, Judah ram Jerusalem khua kya amaw hanlan inn sakpya lan kae kha yn naw.3Nanning laku kya Pachia ccungccaw athua hae paw miakaw—minmin kyakhe mih Pachia tuh um vae sah! Judah ram umpaw Jerusalem khua langkhe cceihthung hae sah lah, Bawipaw , Israel Pachia inn kha sak hae sah—aning tuh Jerusalem kya umpaw Pachia nynh thua;4a hiinhy hae paw balyn tuh, pawpaw kya a um hae zemah, mih umnaw e ccungccaw hae nynh Jerusalem khua umpaw Pachia inn elang lungthote silawnawpaw apiaze sui, ngun, uccaw te sahiin hae kha bawm hae sah,” a ci.
5Tetuh Judah phin te Benjamin phin puizia hae kya-e lu hae, ranpibawi hae te Levi phin hae—Pachia nynh mih thinlung kya a tuhou hae paw miakaw tuh Jerusalem khua umpaw Bawipaw inn kha sakthui khylan a cceihthung hae.6Mih innpaw hae balyn nynh lungthote a hlu hae paw balyn apiaze, ngun angphe hae, sui, uccaw hae, sahiin hae te amee rupaw lasung hae khate a bawm hae.7Nebukhadnezzar nynh Jerusalem kyate la phu zah a pachia hae inn kya a la nungpaw Bawipaw inn e angphe hae kha siapharan Sairas nynh a poukhae.8Tuh-e uccaw hae tuh Persia siapharan Sairas nynh sisuakhaan a ngawtu Mithredath kha a thuaasah, te Judah bawi Sheshbazzar kha riapah zah a pya.9Uccaw ccazing tuh: sui pakekhupaw sung thum, ngun pakekhupaw thong kheit, tangpaw ccangkuin lae takua;10sui pakekhupaw sung thum, ccangpaw ngun pakekhupaw za pali ccanghaw, ccangpaw angphe hae thong kheit;11sui te ngun angphe abalyn tuh thong pangaw za pali acih. Kyng hae zah a cciakhae hae paw kha Babilonia kyate Jerusalem lang he a cciakhae hae te, e uccaw hae balyn hynh Sheshbazzar nynh a cciakhae thung. A Ki hae paw Ccazing (Neh 7.4-73)
1Babilon Siapharan Nebukhadnezzar nynh kyng hae zah Babilonia ram lang a cciakhae hae paw a kyng hae paw ccungccaw hae kyate a ki hae paw Judah ram e ccungccaw hae tuh e hae hynh nynh thua; minmin tuh Jerusalem te Judah ram langkhe mimaw khua raveih lang pong a ki hae.2Minmin tuh Zerubbabel, Jeshua, Nehemiah, Seraiah, Reelaiah, Mordekai, Bilshan, Mispar, Bigvai, Rehum te Baanah hae ryte a ki hae.
Israel ccungccaw hae milu tuh:3Parosh ciihan hae tuh thong ning za kheit sung sari lu ning,4Shefatiah ciihan hae tuh za thum sung sari lu ning,5Arah ciihan hae tuh za sari sung sari lu pangaw,6Pahath-moab ciihan hae lungkhu e Jeshua te Joab ciihan hae tuh thong ning za tarya lu haw lae ning,7Elam ciihan hae tuh thong kheit za ning sung pangaw lu pali,8Zattu ciihan hae tuh za takua sung pali lu pangaw,9Zakkai ciihan hae tuh za sari sung taruh,10Bani ciihan hae tuh za taruh sung pali lu ning,11Bebai ciihan hae tuh za taruh lu kuin lae thum,12Azgad ciihan hae tuh thong kheit za ning lu kuin lae ning,13Adonikam ciihan hae tuh za taruh sung taruh lu taruh,14Bigvai ciihan hae tuh thong ning sung pangaw lu taruh,15Adin ciihan hae tuh za pali sung pangaw lu pali,16Ater ciihan hae lungkhu e Hezekiah ciihan hae tuh sung takua lu tarya,17Bezai ciihan hae tuh za thum lu kuin lae thum,18Jorah ciihan hae tuh za kheit lu haw lae ning,19Hashum ciihan hae tuh za ning lu kuin lae thum,20Gibbar ciihan hae tuh sung takua lu pangaw,21Bethlehem ciihan hae tuh za kheit lu kuin lae thum,22Netofah khuaccaaw hae tuh sung pangaw lu taruh,23Anathoth khuaccaaw hae tuh za kheit lu kuin lae tarya,24Azmaveth ciihan hae tuh sung pali lu ning,25Kiriatharim, Khefirah Beeroth ciihan hae tuh za sari sung pali lu thum,26Ramah te Geba ciihan hae tuh za taruh lu kuin lae kheit,27Mikmash khuaccaaw hae tuh za kheit lu kuin lae ning,28Bethel te Ai khuaccaaw hae tuh za ning lu kuin lae thum,29Nebo ciihan hae tuh sung pangaw lu ning,30Magbish ciihan hae tuh za kheit sung pangaw lu taruh,31ccangpaw Elam ciihan hae tuh thong kheit za ning sung pangaw lu pali,32Harim ciihan hae tuh za thum lu kuin,33Lod, Hadid te Ono ciihan hae tuh za sari lu kuin lae pangaw,34Jeriko ciihan hae tuh za thum sung pali lu pangaw,35Senaah ciihan hae tuh thong thum za taruh sung thum acih hae.
36Ranpibawi hae tuh: Jeshua puizia athua hae paw Jedaiah ciihan hae tuh za takua sung sari lu thum,37Immer ciihan hae tuh thong kheit sung pangaw lu ning,38Pashhur ciihan hae tuh thong kheit za ning sung pali lu sari,39Harim ciihan hae tuh thong kheit lu haw lae sari acih hae.
40Levi phin hae tuh: Hodaviah ciihan hae Jeshua te Kadmiel mih ciihan hae tuh sung sari lu pali acih hae.41Hlawsahthya hae paw tuh: Asaf ciihan hae za kheit lu kuin lae tarya acih hae.42Sakoih ngawtu hae ciihan hae tuh: Shallum ciihan hae, Ater ciihan hae, Talmon ciihan hae, Akkub ciihan hae, Hatita ciihan hae te Shobai ciihan hae mih balynte za kheit sung thum lu takua acih hae.
43Beikinn ryalahtu hae tuh: Ziha ciihan hae, Hasufa ciihan hae, Tabbaoth ciihan hae,44Keros ciihan hae, Siaha ciihan hae, Padon ciihan hae,45Lebanah ciihan hae, Hagabah ciihan hae, Akkub ciihan hae,46Hagab ciihan hae, Shamlai ciihan hae, Hanan ciihan hae,47Giddel ciihan hae, Gahar ciihan hae, Reaiah ciihan hae,48Rezin ciihan hae, Nekoda ciihan hae, Gazzam ciihan hae,49Uzza ciihan hae, Paseah ciihan hae, Besai ciihan hae,50Asnah ciihan hae, Meunim ciihan hae, Nefisim ciihan hae,51Bakbuk ciihan hae, Hakufa ciihan hae, Harhur ciihan hae,52Bazluth ciihan hae, Mehida ciihan hae, Harsha ciihan hae,53Barkos ciihan hae, Sisera ciihan hae, Temah ciihan hae,54Neziah ciihan hae te Hatifa ciihan hae.
55Solomon a ryalahtu hae ciihan hae tuh: Sotai ciihan hae, Hassofereth ciihan hae, Peruda ciihan hae,56Jaalah ciihan hae, Darkon ciihan hae, Giddel ciihan hae,57Shefatiah ciihan hae, Hattil ciihan hae, Pokhereth-hazzebaim ciihan hae te Ami ciihan hae.
58Beikinn ryalahtu hae te Solomon a ryalahtu hae ciihan hae tuh mih balynte za thum sung takua lu ning acih hae.
59Akawlan e hae tuh Israel hae athua hae te thua khyh hae, mih puizia hae te mih thokeinaw kha a ny kho khyh hae zemah, Tel-melah, Tel-harsha, Kherub, Addan te Immer khua hae kyate oun thua hae paw nynh thua:60Delaiah ciihan hae, Tobiah ciihan hae te Nekoda ciihan hae tuh za taruh sung pangaw lu ning acih hae.61Ranpibawi hae ciihan hae tuh: Habaiah ciihan hae, Hakkoz ciihan hae te Barzillai ciihan hae (Barzillai tuh Gilead ccungccaw Barzillai ccanung lu kheit kha zu lang a la dyku keiccuze Barzillai ciihan cite ko athua hae).62E hae nynh thokeinaw ccauh kya mih min ccazing kha ccung hae zah a muih khyh hae keiccuze minmin kha thyaa khyh hae cite ranpibawi thuanaw kyate a vua hae;63Urim te Thummim khate ryalahpaw ranpibawi a um makhia tuh athyaa huaccepaw looh kha na ae lan khyh oh cite uktu bawi nynh minmin kha a hopya hae.
64Ccungccaw zapi hae tuh sung pali thong ning za thum sung taruh acih hae,65tuhpiaze mih ryalahtu hae nopi pise thong sari za thum sung thum lu sari a um hae; hlawsahthya hae paw nopi pise za ning a hoi hae.66Minmin nynh marang za sari sung thum sa taruh, lann dihpaw za ning sung pali sa pangaw,67kalauh za pali sung thum sa pangaw te lann thong taruh za sari sa kuin a hoi hae.
68Jerusalem khua umpaw Bawipaw inn kya he a thua takaw hae te, puizia hae kya-e lu hae abang nynh Pachia inn kha amaw hmin kya sak nawlan mimaw lungthote a hlu hae.69Mih cyi khonaw thyhte inn sak nawlan sui darik sung taruh thong kheit, ngun mina thong pangaw te ranpibawi angkiccua za kheit kha a pya hae.
70Ranpibawi hae, Levi phin hae te Jerusalem khua um hae paw ccungccaw abang tuh Jerusalem te a pepan khe a um hae; te hlawsahthya hae paw, sakoih ngawtu hae te beikinn rya a lah hae paw tuh mimaw khua raveih kya a um hae, Israel hae balyn tuh mimaw khua raveih kya a um hae. Jerusalem kya Bua Beikthuinaw
1Sawpaw sah sarinaw yn thua zah Israel hae tuh mih khua raveih kya he a um hae te, ccungccaw hae tuh Jerusalem khua kya a pumkuh hae.2Tetuh Jozadak ccapaw Jeshua te a ban hae ranpibawi hae, te Shealtiel ccapaw Zerubbabel te a puizia hae nynh Pachia ccungccapaw Moses kawbya kya azeiku hawte, maee-ute silawnaw raenaw lanpaw Israel Pachia silawhang kha rae lan a thokuh hae.3Mih pepan e ccungccaw hae kha a ri hae keiccuze silawhang kha amaw hmin kyakhe nung hae zah, a vawlan khe Bawipaw kalan silawnaw kha awkhua zete a rae hae.4Phungbya kya azeiku hawte, bu poi kha tua hae zah, phungzae thyhte nin takyh hanlan ahopaw nin takyh raepaw maee-ute silawnaw kha ahopaw milu zeihte a rae hae,5tukoute tyty raepaw maee-ute silawnaw, sawpaw thawpaw kya raepaw silawnaw, Bawipaw hanlan tuapyapaw athyaapaw poi miakaw kya raepaw silawnaw te Bawipaw kalan lungthote silawnaw a raepaw miakaw nynh a rae hae paw silawnaw hae kha a rae hae.6Sawpaw sah sarinaw nin kheit nin kyate Bawipaw kalan maee-ute silawnaw kha a tho hae. Thuasalama Bawipaw beikinn aleihpaw kha tuh bing loh khyh hae.7Tukeiccuze pazan rya a lah hae paw te lehccama hae kha phua a pya hae, te Persia Siapharan Sairas nynh kaw a ua hae thyhte, sidar thing kha Lebanon mua kyate rili kalan, Joppa khua lang phu khylan Sidon hae te Tair hae kha aepaw, niapaw te chitui kha a pya hae. Beikinn Leihpaw Bingnaw
8Jerusalem khua Pachia inn kya a thua kou hae te kum ningnaw, sawpaw sah ningnaw khe Shealtiel ccapaw Zerubbabel te Jozadak ccapaw Jeshua nynh tuhlaepaw mih ccungccaw hae, ranpibawi hae, Levi phin hae te a kyngnaw hae kyate Jerusalem lang a thua hae paw balyn ryte rya a tho hae. Kum kuin te palung lang Levi phin hae kha Bawipaw inn ryalawnaw kya a do-oihtu lang a khang hae.9Te Jeshua nynh a ccapaw hae te a puizia hae ryte, Kadmiel te a ccapaw hae, Binnui te Hodaviah nynh Henadad ccapaw hae ryte, Levi phin hae, mih ccapaw hae te mih puizia hae nynh Pachia inn e ryalaw kha pynkheihlan a law hae.
10Inn saktu hae nynh Bawipaw beikinn aleihpaw kha he a bing hae te, Israel Siapharan David nynh a la hopya hae hawte, Bawipaw kha thehoysah khylan ranpibawi hae tuh mih boeining lawkute mungkae kha a ccyngkuh hae, te Levi phin hae, Asaf ccapaw hae nynh lanchi a ccyngku hae;11Bawipaw kha lungtuate thehoysah hae zah,“Bawipaw tuh ahoy,atynpaw a sungsahnaw tuhIsrael tungvaw kya zungzae atyn,”cite liakute hlaw a sah hae. Bawipaw inn aleihpaw kha bing athua vae keiccuze ccungccaw balyn nynh Bawipaw kha thehoysah hae zah thawte a sia hae.12Thuasalama langmawlya e inn a la muih boi hae paw ranpibawi hae, Levi phin hae te puizia raveih kya-e lu hae nynh atu e inn aleihpaw abingkuhpaw kha he a muih hae tuh, ccungccaw patae nynh lungpawte a sia hae zemah, minmin tuh thawte a rah hae,13tukeiccuze lungtuanaw roi kha ccungccaw hae rawnaw roi kyate phiathya khyh hae; pawccecize ccungccaw hae tuh myarya ccae lan sia hae zah mih roi tuh laansawpi te thae lan phe um. Beikinn Sakthuinaw kha Rawsenaw
1Seetangnaw kyate a ki hae paw nynh Bawipaw , Israel Pachia elang beikinn a sak hae cipaw kha Judah phin hae te Benjamin phin hae a rawsetu hae nynh he a thae hae tuh,2Zerubbabel te puizia raveih kya-e lu hae kalan cceih hae zah, “Nanning ryte inn hynh sakkheih oh sih, pawccecize nae Pachia kha nanning hawte kaening nynh mah kae beik, hein kya oun thuakhaepaw Assiria siapharan Esar-haddon she lya mawte Pachia kalan silawnaw kha po kae la rae vae,” a cipya hae.3Thuasalama Zerubbabel, Jeshua te Israel ram e tuhlaepaw puizia raveih kya-e lu hae nynh, “Kae Pachia hanlan inn saknaw kya kaening ryte na sakbua lan khyh oh; Persia Siapharan Sairas nynh kaw oun pya thyhte Bawipaw , Israel Pachia hanlan kaemaw kyalya nynh kae sak cih,” a cipya hae.
4Tetuh ram kya-e ccungccaw hae nynh Judah hae kha thawthyanaw hopah hae zah inn sak lan a risah hae,5Judah hae paccynnaw kha ro khylan Persia Siapharan Sairas a uk ccyh kyate Persia Siapharan Darias a uk ccyh kyacia minmin nynh bawi hae kha pyaruh a pya hae. Jerusalem Raethuinaw Rawsenaw
6Ahasuerus nynh a uk lungkhu, ram he a uk takaw kum khe, Judah te Jerusalem kya um hae paw tungvaw kya seibenawpaw ccaw kha a zei hae.
7Artazaksis she lyakhe Bishlam, Mithredath, Tabeel te tuhlaepaw mih ban hae nynh Persia Siapharan Artazaksis kalan ccaw a zei hae; ccaw tuh Aramaik bya te zei hae zah a leih hae.8Ram uktu Rehum te ccazipaw Shimshai nynh Siapharan Artazaksis kalan khe Jerusalem rawsenawpaw ccaw kha akawlan thyhte a zei hae9(ram uktu Rehum, ccazipaw Shimshai te tuhlaepaw mih ban hae, byapiatu hae, locceihtu hae, bawi hae, Persia ccungccaw hae, Erek ccungccaw hae, Babilon ccungccaw hae, Susa ccungccaw hae, tuh-e hae tuh Elam ccungccaw hae nynh thua,10te alesaepaw te athungpaw Osnappar nynh dee hae zah Samaria khua hae te Vawpi Khuraw niccaw lang ram a umsah hae paw ccangpaw ccungccaw hae nynh ccaw tuh a zei hae,11e hynh minmin nynh a ky hae paw ccaw khawpi nynh thua):
“Artazaksis siapharan kalan: Vawpi Khuraw niccaw lang ram um hae paw na ryalahtu hae nynh ccaw te kae beihlang.12Na kyate kaening kalan oun cceihthung hae paw Judah hae tuh Jerusalem lang a cceih hae cipaw kha siapharan nynh beih nytua; rhawtho a mangpaw te ahoy leipaw khua kha raethui hae zah khualungrua hae kha a lyn bia vae hae, khua aleihpaw kha a raethui cciamang hae.13E khua hynh raethui hae zah khualungrua kha a lyn vae hae zetuh, minmin nynh ngunto, uccaw hoi mee te laanpi mang mee kha pya vae lan khyh hae zah siapharan phua muenaw tuh azya vae cih cipaw kha siapharan nynh nyh vae sah.14Kaening tuh siapharan inn e loi a ae hae paw kae thua keiccuze siapharan a thethya lanpaw kha kae ry khyh, tukeiccuze na kalan ccaw kae ky zah kae thaesah.15Na minpaaw hae phungpaw ccauh kya la ccungtua lah, e khua tuh langmawlya mawte rhawtho a mangpaw khua, siapharan te ram kha vawsaw a pyapaw khua te khua lungkhu kya rhawtho lan leih a paccynkuhpaw khua cipaw kha tuh-e phungpaw ccauh kya ccahe na la muih cih. Tuh-e keiccu nynh hynh-e khua hynh ro a la thua.16E khua hynh raethui thua zah khualungrua hae kha lyn athua vae zetuh, Vawpi Khuraw lang ram kya uknaw kaw na hoi vae lan khyh cipaw kha kae nysah,” a cipya hae.
17Siapharan nynh ccaw leihru hae zah: “Uktu bawi Rehum, ccazipaw Shimshai, te Samaria te Vaw Khuraw lang ram um hae paw tuhlaepaw mih ban hae kalan ccaw te kae beihlang oh.18Kaening kalan ccaw nae ky oh paw kha bya oun leihpah hae zah ka malang a ria vae hae.19Te kaw ka pya hae zah a ccung hae, langmawlya mawte e khua hynh siapharan hae kha a rawse hae, rhawtho hae zah khua lungkhu kya rhawtho lan leih a paccyn hae cipaw kha a muih hae.20Vawpi Khuraw lang ram balyn kha uk hae zah ngunto, uccaw hoi mee te laanpi mang mee a lawkuh hae paw siapharan hae athung hae paw tuh Jerusalem kya a la um boi hae.21Tukeiccuze kae nynh kaw ka tho mawlaezung, e ccungccaw hae hynh zya daesah thua hae zah, e khua hynh bua a raethui khyh nawlan hae kawtho oh.22Tuhpiaze, e ryalaw kyahin na sawphahku khyh nawlan oh raeringkuh oh; pawccemou siapharan kha vawsawnaw pya khylan ronaw tuh alethung cih?” a cipya hae.
23Siapharan Artazaksis ccaky khawpi tuh Rehum, ccazipaw Shimshai te mih ban hae malang khe he a ria kou hae tuh, minmin nynh Jerusalem umpaw Judah hae kalan arangte cceih hae zah huhan te nangsete mih ryalaw kha a haeungsah hae.24Tuin ccyh khe Jerusalem umpaw Pachia inn sakpaw rya kha umtaw hae zah Persia Siapharan Darias nynh ram a uknaw kum ningnaw kum kyacia rya kha po lah khyh hae. Beikinn Sakthuinaw Bua A Tho hae
1Profeh Haggai te Iddo ccapaw profeh Zekhariah nynh mih tungvaw umpaw Israel Pachia min te Judah te Jerusalem kya um hae paw Judah hae kyakhe profehbya a ho hae.2Tetuh Shealtiel ccapaw Zerubbabel te Jozadak ccapaw Jeshua nynh thokuh hae zah Jerusalem khua e Pachia inn sakthuinaw rya kha bua a tho hae; Pachia profeh hae tuh minmin ryte um hae zah minmin kha a bawm hae.
3Tetuh Vaw Khuraw lang ram a uktu Tattenai, Shethar-bozenai te mih ban hae nynh minmin kalan oun cceih hae zah, “E inn hynh sak lan te e inn a uccaw hae hynh raethuite phe lyn lan cite hum nynh mou kaw ae pya oh?” a cipya hae.4“E inn a sak hae paw min tuh humhungmou athua hae?” cite mah a khia hae.5Thuasalama mih Pachia nynh Judah piccan hae kha tyty a do hae, Darias kalan thaesahnawpaw ccaw a thua mawlaezung te tuh-e kong kha leihrunawpaw ccaw yn thua mawlaezung tuh rya kha umtaw khyh hae.
6Vaw Khuraw lang ram a uktu Tattenai, Shethar-bozenai te Vaw Khuraw lang ram a um hae paw mih ban hae uktu bawi hae nynh khawpi ccaw kha Darias siapharan kalan a ky hae;7tuh-e a ky hae paw ccaw kyakhe akawlan thyhte a zei hae: “Siapharan Darias tungvaw daenaw tyty um vae sah!8Kaening nynh Judah ram lang, alesaepaw Pachia inn lang kae la cceih. Inn kha a-awkuhpaw lung pipi te sak hae zah pang kyakhe thing awkuhpaw kha a khang hae; e rya hynh pekite lah hae zah mih ryalaw tuh kou a cceihthya cipaw kha siapharan nynh beih la nytua.9Te kaening nynh tuh-e piccan hae kha, ‘E inn sak lan te e inn a uccaw hae hynh raethuite phe lyn lan cite hum nynh mou kaw ae pya oh?’ cite kae khia hae.10Mih piccan hae min kha lawte namaw kalan thaesah khylan mih min kha mah kae khia hae.11E hynh kaening kalan oun leihru hae paw nynh thua: ‘Kaening tuh vaaw te lae Pachia a ryalahtu hae kae thua zah, alesaepaw Israel siapharan nynh la sak zah la lynpaw inn, langmawlya te a la sakpaw inn kha nynh kae sakthui.12Kae minpaaw hae nynh vaaw Pachia kha a thin a riasah hae keiccuze minmin kha Khaldi ccungccaw Babilon siapharan Nebukhadnezzar kuih kalan a pya hae, te tuh-e paw nynh e inn hynh roh zah ccungccaw hae kha Babilon lang a cciakhae hae.13Tuhzemah Babilon Siapharan Sairas nynh ram a uknaw masaty kum khe, e Pachia inn hynh sakthui athua cih, cite kaw a tho.14Tuhpiaze, Nebukhadnezzar nynh Jerusalem beikinn lungkhu a umpaw kha lah zah Babilon beikinn lungkhu lang a cciakhaepaw Pachia inn e sui te ngun angphe hae kha Siapharan Sairas nynh Babilon beikinn kyate thuaa zah uktu bawi lang a khangpaw a min Sheshbazzar cikuhpaw ccungccapaw kha a pya.15Sairas nynh amaw kha, “E angphe hae hynh lah hae lah, Jerusalem kya umpaw beikinn lungkhu khe la nung hae, te Pachia inn tuh amaw hmin khe sakthui thua sah,” a cipya.16Tetuh Sheshbazzar nynh cceih zah Jerusalem kya umpaw Pachia inn aleihpaw kha a bing; tuin ccyh kyate atu cia inn kha po kae sak zah kae lyn loh khyh,’ a ci hae.17Tukeiccuze Jerusalem kya umpaw e Pachia inn sakthuinaw kong hynh Siapharan Sairas nynh kaw a tho tou tho khyh tou cipaw ny khylan, Babilon khua umpaw siapharan ccaw ccakhungnaw khaan kyakhe na ccung ry ze la ccungsah tua hae. E kong hynh siapharan nynh a ry hawte kae kalan oun ky sah,” a ci hae. Darias nynh Kawthonaw
1Tetuh Siapharan Darias nynh kawtho zah, Babilon khua kya ccauh hae a nungnaw hae ccaw ccakhungnaw khaan kyakhe a ccung hae.2Media ram khuapi athuapaw Ekabatana khua khe ccakue kha muih hae zah, a lungkhu khe hynhte a la zei hae: “Bya ccynawpaw ccaw ccangkheit.3Ram a uknaw masaty kum khe, Siapharan Sairas nynh kaw ccangkheit a tho: Jerusalem khua umpaw Pachia inn te asekuh lante, silawnaw a la raenaw hae te maee-ute silawnaw a la thuakhaenaw hae hmin, inn kha sakthui thua sah; inn ahangpaw tuh dong sung taruh athua cih zah akopaw tuh dong sung taruh athua cih,4a-awkuhpaw lung pipi hae tang thum te thing a-awkuhpaw tang kheit a um cih; amee tuh siapharan phua kha pya athua cih.5Tuhpiaze, Nebukhadnezzar nynh Jerusalem beikinn lungkhu a umpaw kha lah zah Babilon lang a cciakhaepaw Pachia inn e sui te ngun angphe hae kha Jerusalem kya umpaw beikinn kalan kikhae athua cih zah amaw hmin raveih kya nungthui athua cih; Pachia inn lungkhu kya na nung cih oh,” cite a la um.
6“Tukeiccuze Vaw Khuraw lang ram a uktu Tattenai, Shethar-bozenai te nae ban hae athua hae paw Vaw Khuraw lang ram e bawi hae, nanning tuh beikinn kalan la naekuh nan oh;7e Pachia inn rya hynh la khee nan oh; Judah uktu te Judah piccan hae nynh e Pachia inn hynh amaw hmin kya sakthui hae sah.8Tuhpiaze e Pachia inn sakthuinaw hanlan Judah piccan hae elang na cyipya lan oh paw kong hynh kaw ka tho: e ccungccaw hae hynh amee kha phe ccing lan, accyh aro lei lante Vaw Khuraw lang ram nynh ngunto a pyapaw siapharan phua kya-e kha na pya cih oh.9Minmin nynh vaawlang Pachia kalan amynkhuhpaw silawnaw rae hae zah siapharan te a ccaaw hae hiinnaw hanlan saw a sang ccaw hae, vaawlang Pachia kalan maee-ute silawnaw rae nawlan ahopaw miakaw tangnua nopaw, tuutepaw te tuu thuasah, chanvuih, loi, misutui te chitui thuasah Jerusalem e ranpibawi hae nynh aho a ci hae thyhte nin takyh apaekuh lei lan na pya cih oh.11Tuhlae lanze e kawthopaw hynh lukhakheit nynh a ei lanze, a inn kya-e thingccaw ccangkheit kha law athua cih zah, tuh-e thingccaw adung khate amaw kha thuing athua cih.12E kawthopaw hynh ei lan te Jerusalem kya umpaw e Pachia inn kha ro lan a kuih a hangpaw miakaw siapharan thuasah, minphuin thuasah Jerusalem kya a min a tynsahpaw Pachia nynh roh vae sah. Kae, Darias nynh kaw ka tho; hynh-e inn tuh pekite sak thua sah,” a ci. Beikinn Lynnaw te Apnaw
13Tetuh Siapharan Darias nynh a ky hae paw bya thyhte, Vaw Khuraw lang ram a uktu Tattenai, Shethar-bozenai te mih ban hae nynh pekite a cyi hae.14Profeh Haggai te Iddo ccapaw Zekhariah nynh profehbya a ho hae liate, Judah piccan hae nynh sak hae zah mih rya a cceihthya. Israel Pachia kawpyapaw te Persia siapharan Sairas, Darias te Artazaksis kawthonaw liate minmin nynh inn sakpaw kha a lyn hae;15Siapharan Darias nynh ram a uknaw kum taruhnaw, sawpaw sah thumnaw Adar saw nin thum nin khe e inn tuh a lyn hae.
16Israel ccungccaw hae, ranpibawi hae, Levi phin hae te tuhlaepaw seetangnaw kyate a ki hae paw nynh e Pachia inn apnaw poi hynh lungpawte a tua hae.17E Pachia inn apnaw poi kya tangnuapaw sa kheit, tuutepaw za ning te tuutaw za pali khate silawnaw a rae hae, te Israel phin haw lae ning a um thyhte, Israel balyn hanlan miaatepaw sa haw lae ning te seithyaanaw silawnaw kha a rae hae.18Moses ccauh kya azeiku thyhte, Jerusalem khua kya Pachia ryalaw khylan ranpibawi hae kha mimaw phu raveihte, Levi phin hae kha aphuphute a nung hae. Kawtaw Poi Tuanaw
19Masaty sawpaw, nin haw lae pali nin khe seetangnaw kyate a ki hae paw nynh kawtaw poi kha a tua hae.20Ranpibawi hae te Levi phin hae nynh thyaasakuh hae zah mih balyn mawte a thyaa hae. Tukeiccuze seetangnaw kyate a ki hae paw balyn hanlan, mih ban hae ranpibawi hae hanlan te mimaw hanlan kawtaw poi tuutaw kha a chia hae.21Seetangnaw kyate a ki hae paw Israel ccungccaw hae nynh thuasah, Bawipaw , Israel Pachia kha beik khylan minmin kya mungkuh bua hae zah ram lungkhu e ccangpaw minphuin hae kya-e nungsikunaw kyate a phiakuh hae paw balyn nynh thuasah a ae hae.22Ransi phing leipaw sanlou poi kha nin sari lungkhu lungpawte a tua hae; pawccecize Bawipaw nynh mih lungpawsah hae; Pachia, Israel Pachia inn rya kha Assiria siapharan nynh a bawm nawlan a thinlung kha minmin kalan a mae vae. Ezra Yn Thuanaw te Ryalawnaw
1E koute, Persia Siapharan Artazaksis nynh ram a uk lyakhe Ezra tuh Babilon khua kyate a cceihthung; Ezra tuh Seraiah ccapaw, Seraiah tuh Azariah ccapaw, Azariah tuh Hilkiah ccapaw;2Hilkiah tuh Shallum ccapaw, Shallum tuh Zadok ccapaw, Zadok tuh Ahitub ccapaw,3Ahitub tuh Amariah ccapaw, Amariah tuh Azariah ccapaw, Azariah tuh Meraioth ccapaw,4Meraioth tuh Zerahiah ccapaw, Zerahiah tuh Uzzi ccapaw, Uzzi tuh Bukki ccapaw,5Bukki tuh Abishua ccapaw, Abishua tuh Finehas ccapaw, Finehas tuh Eleazar ccapaw, Eleazar tuh ranpibawi lepaw Aaron ccapaw nynh thua—6Ezra tuh Bawipaw , Israel Pachia nynh a pyapaw Moses kawbya kha myarya nyh zah a thyapaw ccazi nynh thua; Bawipaw a Pachia thungnaw tuh a tungvaw a um keiccuze a ngiapaw miakaw kha siapharan nynh a pya.
7Siapharan Artazaksis nynh ram a uknaw kum sarinaw kum khe Israel hae abang, ranpibawi hae te Levi phin hae abang, hlawsahthya hae paw te sakoih ngawtu hae, te beikinn ryalahtu hae mah Jerusalem lang a cceihthung hae.8Siapharan nynh ram a uknaw kum sarinaw, sawpaw sah pangawnaw khe Jerusalem khua a thua hae.9Masaty sawpaw nin kheit nin khe Babilon khua kyate pou hae zah, sawpaw sah pangawnaw nin kheit nin khe a Pachia thawccinaw thungnaw tuh a tungvaw a um keiccuze Jerusalem a thua hae.10Pawccecize Ezra nynh Bawipaw kawbya kha ccangku lan te zui lan thuasah, phungbya hae te phungzae hae kha Israel hae kya ccangpya lan thuasah a thinlung kha a pyaku. Artazaksis nynh Ezra A Kypaw Ccaw
11E hynh Bawipaw nynh Israel hae hanlan a pya hae paw kawbya hae te a phungbya hae myarya athyapaw sazae, ranpibawi Ezra kalan Siapharan Artazaksis nynh a pyapaw ccaw khawpi nynh thua:12“Siapharan hae siapharan Artazaksis nynh vaawlang Pachia kawbya sazae, ranpibawi Ezra kya: Daenaw um vae sah.13Ka ram lungkhu umpaw Israel ccungccaw miakaw, mih ranpibawi hae, Levi phin hae kyaze Jerusalem lang amaw lungthote a cceih rypaw miakaw tuh na kya a cceihbua kho, cite kaw ka tho.14Pawccecize na kuih kya umpaw na Pachia kawbya thyhte Judah te Jerusalem kong kha akaw-aleih dotua khylan siapharan te tuanaw a pyatu hae lu sari nynh nang kha kae saw,15te siapharan te tuanaw a pyatu hae nynh Jerusalem kya umpaw Israel Pachia hanlan mimaw lungthote a hlu hae paw sui te ngun thuasah,16Babilonia ram pynpi kya na mue cih paw sui te ngun balyn thuasah, ccungccaw hae te ranpibawi hae nynh Jerusalem kya umpaw mih Pachia inn hanlan lungthote a pya hae paw lungthote silawnawpaw thuasah na la phu cih.17E phua hynhte tangnuapaw hae, tuutepaw hae, tuutaw hae ryte mih ccathae silawnawpaw te mih niapaw silawnawpaw hae kha arangte na re cih zah, tuh-e hae tuhte Jerusalem kya umpaw na Pachia inn silawhang vawlan khe si na law cih.18Tuhlaepaw sui te ngun kha nang te na uno hae nynh ahoy na ci oh hawte, nae Pachia rynaw hawte na mang cih oh.19Na Pachia inn ryalawnaw hanlan ae pya hae paw angphe hae kha Jerusalem khua Pachia malang khe na la pya cih.20Na Pachia inn hanlan ccangpaw aho ungpaw miakaw, nang nynh mang lan accanpaw kha siapharan phua kya-e kha na la mang cih.
21“Kae, Artazaksis nynh Vaw Khuraw lang ram kya umpaw phua ccytu hae balyn kalan kaw ka tho: Vaawlang Pachia kawbya sazaepaw, ranpibawi Ezra nynh ae ngia oh paw miakaw kha22ngun talent za kheit cia, chanvuih kor za kheit cia, misutui bath za kheit cia, chitui bath za kheit cia, te loi aho zeih kha pekite na pya cih oh.23Vaawlang Pachia nynh kaw a pyapaw miakaw tuh, siapharan te a rhoccoutu hae peenaw kya a thinrianaw accaw khyh nawlan, Pachia inn hanlan zuakute cyi thua sah.24Ranpibawi hae, Levi phin hae, hlawsahtu hae, thuakaw ngawtu hae, beikinn ryalahtu hae, e Pachia inn e ccangpaw ryalahtu hae humhung kalan mah ngunto, uccaw hoi mee te laanpi mang mee hae kha na khoi lan khyh oh cipaw kae thaesah bia oh.
25“Nang, Ezra nynh na hoipaw Pachia pyapaw hawnaw thyhte, na Pachia kawbya a thaethya hae paw Vaw Khuraw lang ram e ccungccaw balyn kha bya a pia cih hae paw uktu bawi hae te byapiatu hae kha rya na khang cih hae; tuh-e kawbya a nyh lei hae paw kha na ccangpah cih hae.26Na Pachia kawbya te siapharan kawbya a zui leipaw balyn tuh chianaw, ram kyate deenaw, mih uccaw luanaw, thongsawnaw hae khate athathyhte byapianaw palou a ing cih hae,” a ci.
27Bawipaw , kae minpaaw hae Pachia tuh thehoyte um sah. Jerusalem kya umpaw Bawipaw inn kha phu-esah khylan e uccaw hynh aning nynh siapharan thinlung kya sang zah,28siapharan te tuanaw a pyatu hae malang te siapharan kuihkaw e athungpaw bawi hae balyn malang khe atynpaw a sungsahnaw kha ka tungvaw a lesah. Bawipaw , ka Pachia thungnaw tuh ka tungvaw a um keiccuze kae tuh ka rawthung zah kamaw ryte cciathung khylan Israel ccungccaw cciakhaetu hae kha ka suelua hae. Ezra ryte A Ki hae paw Lu hae
1Siapharan Artazaksis nynh ram a uk lyaze Babilonia ram kyate ka kya a cceihthung bua hae paw mih thokeinaw te mih puizia raveih kya-e lu hae ccazing tuh:2Finehas ciihan kya-e Gershom. Ithamar ciihan kya-e Daniel. David ciihan kya-e Shekaniah ccapaw Hattush,3Parosh ciihan kya-e Zekhariah, amaw ryte ccazing kya umpaw pise za kheit sung pangaw.4Pahath-moab ciihan kya-e Zerahiah ccapaw Eliehoenai, amaw ryte pise za ning.5Zattu ciihan kya-e Jahaziel ccapaw Shekaniah, amaw ryte pise za thum.6Adin ciihan kya-e Jonathan ccapaw Ebed, amaw ryte pise sung pangaw.7Elam ciihan kya-e Athaliah ccapaw Jeshaiah, amaw ryte pise sung sari.8Shefatiah ciihan kya-e Mikhael ccapaw Zebadiah, amaw ryte pise sung tarya.9Joab ciihan kya-e Jehiel ccapaw Obadiah, amaw ryte pise za ning lu haw lae tarya.10Bani ciihan kya-e Josifiah ccapaw Shelomith, amaw ryte pise za kheit sung taruh.11Bebai ciihan kya-e Bebai ccapaw Zekhariah, amaw ryte pise lu kuin lae tarya.12Azgad ciihan kya-e Hakkatan ccapaw Johanan, amaw ryte pise za kheit lu haw.13Adonikam ciihan kya-e nulang te oun thuabua hae paw, mih min tuh Elifelet, Jeuel te Shemaiah thua zah minmin ryte pise sung taruh.14Bigvai ciihan kya-e Uthai te Zakkur, minmin ryte pise sung sari. Beikinn Ryalahtu hae
15Minmin kha Ahava khua lang aluapaw vaw pe khe ka pum hae zah, tuin kya nin thum kae um. Ccungccaw te ranpibawi hae kha he ka dotua thui hae tuh, Levi ciihan hae lu kheit san ka muih khyh.16Tetuh cciakhaetu hae Eliezer, Ariel, Shemaiah, Elnathan, Jarib, Elnathan, Nathan, Zekhariah te Meshullam, te mihaw hae Joiarib te Elnathan kha ka ko hae zah,17Kasifia khua e cciakhaetu athuapaw Iddo kalan ka saw hae zah, Kasifia khua um hae paw Iddo te a uno hae beikinn ryalahtu hae nynh kae Pachia inn hanlan ryalahtu hae kha oun sawpya nawlan hae, minmin kya a ho lan hae paw bya kha ka taw hae.18Kae Pachia a thawccinaw kuih tuh kae tungvaw a um keiccuze Israel ccapaw Levi a ccapaw Mahli ciihan hae kya-e ahawpaw ccungccaw Sherebiah te a ccapaw hae te a puizia hae lu haw lae tarya,19Hashabiah te Merari ciihan hae kya-e Jeshaiah te a puizia hae te mih ccapaw hae lu kuin,20tuhpiaze David te a kuihkaw e bawi hae nynh Levi phin hae do-oih khylan taekhiate a nung hae paw beikinn ryalahtu hae za ning lu kuin tuh kaening kalan oun thuakhae hae. E hae hynh mih min marya zei athua hae. Looh-aesungnaw te Sawsangnaw
21Te kaemaw hanlan, kae ccaaw hae hanlan te kae hoipaw uccaw balyn hanlan akhynpaw laanccia kha Pachia kalan ngia khylan kae Pachia malang zakaw kae sangsaku nawlan, Ahava vaw pe khe looh-aesungnaw kha ka hopya hae.22Pawccecize kae Pachia kuih tuh amaw a ccung hae paw miakaw kya thawccinaw hoi zah, amaw a vua hae paw miakaw kha tuh a thungnaw te a thinrianaw nynh a rawse hae, cite siapharan kha phe kae hopya vae keiccuze kae laanpi kya rhaw hae oun thungkhaw lanpaw rhawkaw hae te marang rhawkaw hae phu kheit kha siapharan kalan ngia lan ka maethah vae.23Tukeiccuze tuh-e hanlan looh-ae kae sung zah kae Pachia kalan saw kae sang, te kae ngiapaw kha aning nynh oun thaepya. Beikinn hanlan Lasung hae
24Te ranpibawi lepaw hae lu haw lae ning, Sherebiah, Hashabiah te mih uno hae lu haw kha taekhiate ka nung hae.25Siapharan te tuanaw a pyatu hae, a kuihkaw e bawi hae te tuin kya umpaw Israel hae balyn nynh kae Pachia inn hanlan a hlu hae paw sui, ngun te angphe hae kha ka khinpah hae zah ka pya hae;26mih kuih kalan ka khinpya hae paw tuh: ngun talent za taruh sung pangaw, ngun angphe talent za kheit mee, sui talent za kheit,27sui pakekhupaw ccangkuin, darik thong kheit mee, te sui hawte aphutepaw sohin ang awrarihpaw ccangning.28Kae nynh minmin kha, “Nanning tuh Bawipaw hanlan na thyaa oh, angphe hae mah athyaa hae; sui te ngun hynh Bawipaw , nae minpaaw hae Pachia hanlan lungthote a hlu hae paw nynh thua.29Jerusalem khua Bawipaw inn akhaan lungkhu kya ranpibawi lupi hae, Levi phin hae te Israel hae puizia raveih kya-e lu hae malang khe tuh-e ahlu hae tuh na khinpya mawlaezung oh, na ccy cih oh zah na rin cih oh,” ka cipya hae.30Tukeiccuze ranpibawi hae te Levi phin hae nynh a khin hae paw sui, ngun te angphe hae kha Jerusalem lang, kae Pachia inn lang cciakhae khylan a law hae. Jerusalem lang Kinaw
31Kaening tuh Jerusalem lang ccia khylan masaty sawpaw nin haw lae ning nin khe Ahava vaw kyate kae thokuh; Pachia thungnaw tuh kae tungvaw um zah, rhaw hae kuih te buhkhawtu hae kuih kyate laanpi kya po oun luesah.32Jerusalem khua kae thua zah nin thum kae um.33Nin palinaw nin khe kae Pachia inn lungkhu kya sui, ngun te angphe hae kha Uriah ccapaw ranpibawi Meremoth kuih kalan kae khinpah zah kae pya, amaw ryte Finehas ccapaw Eleazar, Levi phin hae Jeshua ccapaw Jozabad te Binnui ccapaw Noadiah mah a umbua hae.34Abalynte ria hae zah a khin hae, te atyn-are hohzeih nynh ari cipaw kha ccazing kya a nung hae.
35Tuin ccyh lyakhe kyngkunaw kyate oun thua vae hae paw, seetangnaw kyate oun ki hae paw nynh Israel Pachia kalan maee-ute silawnaw kha rae hae zah Israel hae balyn hanlan tangnuapaw sa haw lae ning, tuutepaw sung takua sa taruh, tuutaw sung sari sa sari, te seithyaanaw silawnaw lang miaatepaw sa haw lae ning te silawnaw a rae hae; e hae balyn hynh Bawipaw kalan raepaw maee-ute silawnaw nynh thua.36Siapharan nynh a khangpaw bawi lepaw hae kalan te Vaw Khuraw lang ram e uktu bawi hae kalan khe siapharan nynh a zeipaw kawthopaw ccaw kha mah minmin nynh a pya hae; te tuh-e hae nynh ccungccaw hae te Pachia inn kha a bawm hae. Minphuin Ccangpaw Zudynaw Seisahnaw
1E uccaw hae hynh cyi athua koute, bawi hae nynh ka kalan oun cceih hae zah, “Israel ccungccaw hae, ranpibawi hae te Levi phin hae tuh e ram kya-e ccungccaw hae Kanaan hae, Hit hae, Periz hae, Jebus hae, Ammon hae, Moab hae, Izip hae te Amor hae kyate thuasah, khah-e hae nungsikunaw kyate thuasah phiakuh khyh hae.2Pawccecize minmin nynh khah-e hae ccanung hae kha mimaw zu lang te mih ccaaw hae zu lang a dyku hae. Tukeiccuze athyaapaw minphuin tuh e ram kya-e ccungccaw hae ryte pyde athua vae; e lungzi leinaw kyahin bawi hae te cciakhaetu hae tuh laandyhoeitu hae nynh thua hae,” cite yn hopya hae.3E bya hynh he ka thae te, ka boeining te ka angkiccua kha ka seiiku, te ka lu kya-e ka sang te ka khawming kha ka khaeekuh zah haungte phang ka tuakuh.4Tetuh zete silawnaw rae ccyh cia tuakute phang ka haung lyakhe Israel Pachia bya keiccu a thyngkuh hae paw balyn tuh seetangnaw kyate a ki hae paw mih lungzi leinaw keiccuze ka kalan oun sueluakuh hae. Ezra Sawsangnaw
5Zete silawnaw rae ccyh khe ka boeining te ka angkiccua aseiikuhpaw ryte looh-ae ka sungnaw kyate ka thokuh zah, ka ccukharutungte Bawipaw ka Pachia kalan ka kuih ka daw zah,
6“Pou ka Pachia, na kalan ka mae hawi lanpaw hynh myaryamaw ka maethah zah ka hawi ngan khyh, pawccecize ka Pachia, kae hoyleinaw tuh kae lu po lawe zah kae cyiseinaw tuh vaawlui phe aphah.7Kae minpaaw hae she kyate atunin cia myarya kae sei vae; kae hoyleinaw keiccuze kaemaw, kae siapharan hae te kae ranpibawi hae tuh atunin cia kae teing hawte ramccang siapharan hae kuih kalan, thaloi kalan, kyngkunaw kalan, thiingkunaw kalan te maethyanaw kalan khe ap kae thua.8Thuasalama atu sosoh tuh Bawipaw kae Pachia nynh kae tungvaw kya thawccinaw langsakuh zah, kaening hynh luesahte oun laehysah zah athyaapaw amaw hmin kyakhe khyndadyh lan oun umsah; aning nynh kae mit oun awsah zah see lang kae tangnaw kyakhe hiinthuinaw kha oun pya.9Kaening tuh see hae nynh kae thua; tuhzemah kae Pachia nynh see lang kae tangnaw kyakhe oun vua khyh, kae Pachia inn kha thadynsah lan hiinnaw thawpaw pya khylan thuasah, a ronaw kha raethui khylan thuasah, Judea ram te Jerusalem khua kyakhe rekunaw pya khylan thuasah Persia siapharan hae malang khe atynpaw a sungsahnaw kha kaening hanlan oun pya vae.
10“Pou kae Pachia, atu tuh hynh-e koute pawmou kae ho ung cih? Pawccecize na ryalahtu profeh hae kyate kaw nae pya zah,11‘Ccou khylan na teenua cih oh paw ram tuh tuin ram kya a umpaw ccungccaw hae thunaw te mih nungsikunaw te athyaa leipaw ram nynh thua. Ram voikheit langte voikheit lang adianaw cia mih thyaa leinaw te phe a biasah hae.12Tukeiccuze nae ccanung hae kha mih ccapaw hae kalan pya nan oh lah, mih ccanung hae kha nae ccapaw hae zu lang dy nan oh; nanning tuh na thung oh zah ram lungkhu e apaw-athae kha na ae oh zah ram kha nae ccaaw hae hanlan rho lang zungzae na rhopya nawlan oh, minmin kya-e ccawkunaw te sisua kha papin ccung nan oh,’ cite nae hopyapaw na kawbya hae kha kae vua hae.13Ahoy leipaw kae cyisahnaw hanlan te myarya lepaw kae cyiseinaw hanlan kae tungvaw accahpaw balyn koute, pou kae Pachia, kae hoyleinaw te atekuhpaw laeze azyahua lante de nae tah zah, kaening hynh hynhcite nae laesah hy,14na kawbya hae kha bua rote, e anungsikuhpaw a raepaw ccungccaw hae ryte zuvaw lang kae tang ung cih tou? A laehypaw thuasah, a hiinhypaw thuasah kae um lei lan ciate kaening hynh nae ro mawlaezung kae tungvaw na thinria lan khyh tou?15Pou Bawipaw , Israel Pachia, nang tuh na ding zah, atunin kya kaening tuh a laehypaw ccungccaw hae lang kae lue vae. E cyiseinaw keiccuze lu kheit nynh san namaw malang a thadyn kho khyh zemah, kae cyiseinaw hynh namaw malang kae ngiaku,” cite ka ngia. Ccungccaw hae nynh Khungrunaw
1Ezra tuh Pachia inn malang khe bakhung zah rawkhuite saw a sang lyakhe, myarya lungpaw Israel ccungccaw zapi, pise, nopi hae te imua hae tuh amaw kalan oun pumkuh hae; ccungccaw hae mah thawmawte a rah hae.2Elam ciihan, Jehiel ccapaw Shekaniah nynh Ezra kha hopah zah, “Kaening nynh kae Pachia tungvaw lungzinaw hoi leite, e ram kya um hae paw ramccang nopi hae kha zu lang kae hoi hae, thuasalama atu lya hynhte acyiku zemah Israel hanlan ngaehoinaw a um ung.3Tukeiccuze ka bawipaw kya-e tuanaw pyanaw te ah Pachia kawbya keiccu a thyngkuh hae paw kya-e tuanaw pyanaw thyhte, e zu hae te mih ccaaw hae balyn hynh kae vua cih hae cite ah Pachia kalan byakinkunaw rae oh sih; kawbya thyhte cyi thua sah.4Thokuh lah cyitua, e hynh na rya nynh thua, kaening nynh kae bawm cih; rawthungte cyitua,” a cipya.5Tetuh Ezra nynh thokuh zah ranpibawi piccan hae, Levi phin hae te Israel hae balyn kha tuh-e bya thyhte cyi lan thyalawsakute bya a kinsaku hae. Tukeiccuze minmin nynh thyalawkute bya a kinku hae. Ramccang Ccungccaw Zu hae te Mih Ccaaw hae Vuanaw
6Tukoute Ezra tuh Pachia inn malang te toikuh zah Eliashib ccapaw Jehohanan khaan lang a cceih, tuin kyakhe khuazi a rya. Looh mah ae khyh zah tui mah neih khyh, pawccecize seetangnaw kyate a ki hae paw nynh lungzinaw a hoi khyh hae keiccuze a rah a khui.7Seetangnaw kyate a ki hae paw balyn tuh Jerusalem kya pumku khylan Jerusalem khua te Judah ram pynpi kya thaesah hae zah,8nin thum lungkhu a thua leipaw miakaw tuh bawi hae te piccan hae nynh kaw a tho hae thyhte a uccaw balyn kha lua athua cih zah amaw kha seetangnaw kyate a ki hae paw phu kyate dee athua cih.
9Tetuh Judah te Benjamin ccungccaw hae balyn tuh nin thum lungkhu Jerusalem kya a pumkuh hae; tuh-e tuh sawpaw sah takuanaw, nin kuin nin nynh thua. Ccungccaw balyn tuh tuh-e rya keiccu thuasah, khuaa myarya accan keiccu thuasah thyngkute Pachia inn malang accawnghannaw hmin khe a haung hae.10Te ranpibawi Ezra nynh thadyn zah minmin kyakhe, “Nanning tuh na sei oh zah ramccang nopi hae kha zu lang na hoiku vae oh, tuhcite Israel seinaw kha na lungsah thung oh.11Atu tuh nae minpaaw hae Pachia, Bawipaw kalan sei phykunaw rae oh lah, a rynaw kha rae oh; e ram lungkhu e ccungccaw hae te ramccang hae nae zu hae kyate phiakuh oh,” a cipya hae.12Te ccungccaw zapi balyn nynh roi accae lante, “Athua sasaw; na ho hawte kae cyih cih.13Thuasalama ccungccaw hae tuh lung hae zah khuaa tuh myarya accan ccyh nynh thua; atolang kae thadyn kho khyh. E rya hynh nin kheit nin ning rya thua khyh, pawccecize e konglang kya kaening patae tuh kae sei vae.14Ah bawi hae nynh ccungccaw zapi ccelang ryalah hae sah, ah khua raveih kyaze ramccang ccungccaw kha zu lang a hoipaw miakaw tuh khua takyh kya-e piccan hae te byapiatu hae ryte e kong keiccuze ah Pachia thinriapaw myarya lepaw tuh aening kyate a nueku mawlaezung khyapaw accyh kya oun thua hae sah,” a ci hae.15Asahel ccapaw Jonathan te Tikvah ccapaw Jahzeiah kyalya nynh tuh-e tuh ei hae zah, Levi phin hae Meshullam te Shabbethai nynh minmin kha a bawm hae.
16Tuhcite seetangnaw kyate a ki hae paw nynh a cyi hae. Ranpibawi Ezra nynh ccungccaw hae kha puizia raveih thyhte, puizia hae kya-e lu hae min kha ccarou lah hae zah a po hae. Sawpaw sah hawnaw, nin kheit nin khe tuh-e kong tuh akaw-aleih do khylan a haung hae.17Masaty sawpaw nin kheit nin khe ramccang nopi hae kha zu lang a hoi hae paw balyn konglang tuh a thangsah hae.
18Ramccang nopi hae kha zu lang a hoikuh hae paw ranpibawi hae ciihan hae tuh Jehozadak ccapaw Joshua te a uno hae ciihan hae: Maaseiah, Eliezer, Jarib te Gedaliah.19Minmin nynh mih zu hae te phiaku lan byakinkuh hae zah mih cyiseinaw hanlan tuuphu kya-e tuutepaw sa kheit khate cyiseinaw silawnaw kha a rae hae.20Immer ciihan hae kya-e: Hanani te Zebadiah.21Harim ciihan hae kya-e: Maaseiah, Elijah, Shemaiah, Jehiel te Uzziah.22Pashhur ciihan hae kya-e: Elioenai, Maaseiah, Ishmael, Nethanel, Jozabad te Elasah.
23Levi phin hae kya-e: Jozabad, Shimei, Kelaiah, (tuh-e tuh Kelita nynh thua), Pethahiah, Judah te Eliezer.24Hlawsah hae paw kya-e: Eliashib. Sakoih ngawtu hae kya-e: Shallum, Telem te Uri.
25Israel ccungccaw kya-e: Parosh ciihan hae kya-e: Ramiah, Izziah, Malkhijah, Mijamin, Eleazar, Hashabiah te Benaiah.26Elam ciihan hae kya-e: Mattaniah, Zekhariah, Jehiel, Abdi, Jeremoth te Elijah.27Zattu ciihan hae kya-e: Elioenai, Eliashib, Mattaniah, Jeremoth, Zabad te Aziza.28Bebai ciihan hae kya-e: Jehohanan, Hananiah, Zabbai te Athlai.29Bani ciihan hae kya-e: Meshullam, Malluk, Adaiah, Jashub, Sheal te Jeremoth.30Pahath-moab ciihan hae kya-e: Adna, Khelal, Benaiah, Maaseiah, Mattaniah, Bezalel, Binnui te Manasseh.31Harim ciihan hae kya-e: Eliezer, Isshijah, Malkhijah, Shemaiah, Shimeon,32Benjamin, Malluk, te Shemariah.33Hashum ciihan hae kya-e: Mattenai, Mattattah, Zabad, Elifelet, Jeremai, Manasseh te Shimei.34Bani ciihan hae kya-e: Maadai, Amram, Uel.35Benaiah, Bedeiah, Kheluhi,36Vaniah, Meremoth, Eliashib,37Mattaniah, Mattenai, Jaasu.38Binnui ciihan hae kya-e: Shimei,39Shelemiah, Nathan, Adaiah,40Makhnadebai, Shashai, Sharai,41Azarel, Shelemiah, Shemariah,42Shallum, Amariah te Josef.43Nebo ciihan hae kya-e: Jeiel, Mattithiah, Zabad, Zebina, Jaddai, Joel te Benaiah.44E hae balyn nynh ramccang nopi hae kha zu lang hoikuh hae zah, mih zu hae kha mih ccaaw hae ryte a deebia hae.

Bible Society of Myanmar

https://app.library.bible/content/1a340f5ae072b2f4

expand_more
chevron_leftPrevious Chapter
chevron_rightNext Chapter