2 SHERIANAW1

Solomon nynh Hawnaw A Ngia

1David ccapaw Solomon tuh a peenaw lungkhu kya tynkaring lan a um; Bawipaw a Pachia tuh a kya um zah amaw kha myarya a lesaepaw lang a rae.
2Solomon nynh Israel hae balyn, ccungccaw athong uktu te aza uktu rhawbawi hae, byapiatu hae, Israel hae balyn kya-e cciakhaetu balyn, puizia raveih kya-e lu hae kha a ko hae.3Solomon te a kya pumkuh hae paw balyn tuh Gibeon kya umpaw ahangpaw hmin langkhe a cceih hae; pawccecize Bawipaw ryalahtu Moses nynh ramkaw kya a sakpaw Pachia kya-e tungkunaw bu tuh tuin kya a um.4(Thuasalama Pachia thingkua kha tuh David nynh a paccynpyanaw hmin, Jerusalem kya a sakpyapaw bu kalan khe David nynh Kiriath-jearim kyate phe a cciakhae vae.)5Tuhpiaze Hur ccapaw Uri a ccapaw Bezalel nynh a raepaw sohin silawhang tuh Bawipaw beikbu malang khe a um. Tukeiccuze Solomon te ccungccaw zapi hae nynh tuh-e silawhang kyakhe Bawipaw kha a beik hae.6Tungkunaw bu kya, Bawipaw malang umpaw sohin silawhang kalan khe Solomon nynh cceihthung zah, tuh-e silawhang vawlan khe maee-ute silawnaw thong kheit kha a rae.
7Tuh-e khuazi khe Pachia tuh Solomon kalan yn langkuh zah, “Pawmou kae pya cih, yn ngiakuh,” a cipya.8Solomon nynh Pachia kha, “Ka paaw David kya myarya lepaw te atynpaw sungsahnaw kha na langsakuh zah, amaw ccelang kae hynh siapharan lang nae khang vae.9Pou Bawipaw Pachia, ka paaw David kya bya na kinpyakupaw kha atu beih ccingsah tua, pawccecize kae hynh laenoi zeih alungpaw ccungccaw hae kya siapharan lang nae khang vae.10Kae nynh e ccungccaw hae malang ka pou ka tee kho nawlan hawnaw te nynaw kha beih yn pya, pawccecize myarya lungpaw hynh-e na ccungccaw hae hynh hum nynh mou a uk kho cih hae?” a cipya.11Pachia nynh Solomon kha, “E hynh na thinlung kya um zah, nang nynh hoirumnaw, sisua te sawtuanaw kha thuasah, na rhaw hae hiinnaw kha thuasah, hiinshe saenaw kha heize thuasah ngiaku leite, siapharan lang kae nungnaw ka ccungccaw hae uk kho nawlan, namaw hanlan hawnaw te nynaw kha nae ngiaku keiccuze,12hawnaw te nynaw kha kae pya. Nang na mawze a la um vae hae paw siapharan hae te nang koute a um cih hae paw siapharan hae lu kheit nynh san a hoi boi lei hae paw hoirumnaw, sisua te sawtuanaw kha mah kae pya cih,” a cipya.13Tukeiccuze Solomon tuh Gibeon kya umpaw ahangpaw hmin kya umpaw, tungkunaw bu kyate Jerusalem lang a cceih. Te Israel ram kha a uk. Solomon Rhawkaw hae te Kungkunaw (1Si 10.26-29)
14Solomon nynh marangle hae te marang rhawkaw hae kha a pum hae; aning nynh marangle thong kheit za pali te marang rhawkaw thong haw lae ning kha hoi zah, tuh-e hae tuh marangle khua hae kya te Jerusalem khua siapharan kyakhe a nung hae.15Siapharan nynh Jerusalem khua khe sui te ngun kha lungpyng zeih lungsah zah, sidar thing kha Shefelah kya umpaw thaeku ku zeih a lungsah.16Solomon kya-e marang hae tuh Izip te Kue langte teekhaepaw nynh thua; siapharan a kungkutu hae nynh amee pyate Kue kya-e kha a re hae.17Izip ram kya-e marangle ccangkheit kha ngun shekel za taruh te, marang sa kheit kha za kheit sung pangaw te a re hae; tuhcite Hit siapharan hae te Siria siapharan hae balyn kalan khe a zua pathy hae. Beikinn Sak lan Paccynnaw (1Si 5.1-18)
1Solomon nynh Bawipaw min hanlan beikinn sak lan te amaw hanlan siapharan inn sak lan a paccynku.2Solomon nynh uccaw phutu lang ccungccaw thong sung sari, muaram kya lung-awtu lang thong sung tarya, tuh-e hae a dopahtu lang thong thum za taruh kha a synria hae. Tair Siapharan Huram te Hokheihnaw
3Solomon nynh Tair siapharan Huram kha byataw zah: “Ka paaw David te na la ccuepekuh oh zah a umnaw lanpaw inn a sakku nawlan sidar thing na la pya hawte kae mah beih yn pyabua.4Bawipaw ka Pachia min hanlan inn sak lan atu ka paccynkuh; tuh-e inn tuh Israel hae nynh zungzae cyi lante kawpya athua hawte, Pachia malang mynkhuhpaw kha maee-u nawlan thuasah, nungpyapaw sanlou kha tyty pya nawlan thuasah, awkhua te zete, sabbath nin hae te sawpaw sah thawpaw nin, te Bawipaw ah Pachia kya-e accyh khyapaw poi nin hae kya maee-ute silawnaw rae nawlan thuasah amaw kalan ap lanpaw nynh thua.5Ka Pachia tuh ccangpaw pachia hae laeze a lesaehua keiccuze ka sak cih paw inn tuh ale cih.6Thuasalama vaawlang, ahang huaccepaw vaawlang nynh heize amaw kha accawng khyh keiccuze, hum nynh mou inn kha a sakpah kho cih? Amaw malang silawnaw raepyanawpaw inn laelan, ccangpaw inn kha sakpya lan ciate kae tuh hummou ka thua?7Tukeiccuze atu ka paaw David nynh la bawm hae zah Judah ram te Jerusalem kya kamaw kya umpaw mih kuihhae hoy hae paw ryte ryalawkheih khylan, sui, ngun, sohin, sivaw, sephaphuhpaw boei, asepaw boei te meizong boei ryalawnaw kya a kuihhae hoypaw, karynte ccaw mah a zeithyapaw lu kheit kha ka kalan yn sawpah.8Sidar thing, maeccaw thing te algum thing kha mah Lebanon kyate yn ky, pawccecize na ryalahtu hae nynh Lebanon e thing a awthya hae cipaw ka ny. Ka ryalahtu hae tuh na ryalahtu hae ryte9thing a-awkuhpaw patae kha yn paccynpah cih hae, pawccecize ka sak cih paw inn tuh myarya le zah ngaeangthua lan umpaw inn athua cih.10Thing-awtu hae na ryalahtu hae kha chanvuih ccangphaw kor thong kuin, barli kor thong kuin, misutui bath thong kuin te chitui bath thong kuin kha ka pya cih hae,” a cipya.11Tetuh Tair siapharan Huram nynh Solomon kha ccaw te leih zah, “Bawipaw nynh a ccungccaw hae kha a sungsah hae keiccuze nang kha siapharan lang ae khang,” a cipya.12Huram nynh, “Bawipaw elang beikinn te amaw elang siapharan inn saknaw hanlan tuathyanaw te nythyanaw a hoipaw ccapaw kha David siapharan a pyatu, vaaw te lae a raetu Bawipaw , Israel Pachia tuh thehoyte um sah.13“Atu kya nythyanaw hoi zah a kuihhae hoypaw Huram-abi hynh kae ky,14aning tuh Dan phin nopinung lu kheit ccapaw thua zah, a paaw tuh Tair ccungccaw nynh thua. Aning tuh sui, ngun, sohin, sivaw, lung, thing, sephaphuhpaw boei, meizong boei, asepaw boei te nebaleihpaw laaw te kuakuhpaw boei rya kha law khylan a ccangkuhpaw thua zah, karynte ccawzeipaw rya aphuinphuin balyn te muinsan raenaw miakaw kyakhe na ccungccaw hae kuihhae hoy hae paw, na paaw David ka bawipaw ccungccaw hae kuihhae hoy hae paw ryte rya a lahkheih cih hae.15Tukeiccuze ka bawipaw nynh na ho thyhte chanvuih, barli, chitui te misutui hae tuh na ryalahtu hae hynh la ky hae.16Kaening nynh na pekipaw thing miakaw kha Lebanon kya kae ngepah cih zah rili kyate Joppa khua lang phum te kae thah cih zah nang nynh Jerusalem khua lang na la phu cih,” a cipya.17A paaw David nynh Israel ram kya umpaw ramccang hae balyn kha milu ccazing a lah koute Solomon nynh ccazing lah zah, cciing kheit sung pangaw thong thum za taruh a um hae.18Minmin laku e thong sung sari kha uccaw phutu lang, thong sung tarya kha muaram kya lung-awtu lang, thong thum za taruh kha ryalaw dopahtu lang a nung hae. Solomon nynh Beikinn A Sak
1Jerusalem khua kya Moriah Mua, a paaw David kya Bawipaw nynh a langpyakunaw, David nynh a paccynnaw hmin, Jebus ccungccaw Ornan kya-e huimin kyakhe Solomon nynh Bawipaw inn kha a sak takaw vae.2Ram a uknaw kum palinaw, sawpaw sah ningnaw, nin ning nin khe inn kha a sak takaw vae.3Pachia inn saknaw hanlan Solomon nynh a toupaw tuh hynhte nynh thua: inn tuh tounawpaw dong arynpaw te dong sung taruh sae zah dong kuin ako.4Beikinn akhaanpi malang umpaw tee takawnaw khaan tuh beikinn ako thyhte dong kuin sae zah, za kheit dong kuin ahang. Alungkhu langte sui ccipaw te a thei.5Akhaanpi kha maeccaw thingphe te aring popo ring zah, sui ccipaw te a thei, avawlan khe ungcci ku te sivawrui te a ccaan.6Inn kha aphutepaw lung te a ccaan. Sui tuh Parvaim sui nynh thua.7Tuhcite inn a thingccaw hae, a thuakaw-ua hae, a pang hae, a thuakaw hae kha sui te ccaan hae zah, pang hae kyakhe cherubim zuh hae kha karynte a soi hae.
8Hmin thyaa huaccepaw tuh inn ako thyhte asaepaw dong kuin, akopaw dong kuin te rae zah, sui ccipaw talent za taruh te a thei.9Thingkhia lang mangpaw sui tuh shekel sung pangaw ari. Avawlan khaan hae kha sui te a thei.
10Hmin thyaa huaccepaw kyakhe cherubim ccangning muinsan kha rae zah sui te a thei.11Cherubim hae kya-e mih sake hae nynh dong kuin cia a daw hae: cherub ccangkheit kya-e a sake ccangkheit tuh dong pangaw sae zah inn pang kha a tung, te dong pangaw asaepaw ccangpaw a sake tuh ccangpaw cherub sake te a tungkuh hae;12e cherub ccangkheit kya-e dong pangaw asaepaw a sake ccangkheit nynh inn pang kha a tung, te dong pangaw asae buapaw ccangpaw a sake tuh masaty e cherub sake khate a tungkuh hae.13E cherubim hae kya-e mih sake hae tuh dong kuin cia a daw hae; cherubim hae tuh mih ccu te thadyn hae zah akhaanpi langkhe mih mae a hawi hae.14Te Solomon nynh zokhawpaw boei kha meizong, sephaphuhpaw, asepaw boeisah, nebaleihpaw laaw te kuakuhpaw khate rae zah, tuh-e hae kyakhe cherubim zuh kha a soi.
15Inn malang khe sung thum dong pangaw ahangpaw tungpi ccangning kha rae zah, tung dung raveih khe dong pangaw acihpaw tunglukhung a um.16Akhelekuhpaw sivawrui hae kha rae zah, tung dung hae kyakhe a nung; te ccalee thae za kheit kha tuh-e sivawrui kya a raebia.17Tuh-e tungpi hae tuh inn malang khe voilang tung kheit, ranglang tung kheit bing zah, ranglang e tung tuh Jakhin ci zah voilang e tung tuh Boaz a ci. Beikinn Uccaw hae (1Si 7.23-51)
1Solomon nynh asaepaw dong kuin, akopaw dong kuin te ahangpaw dong haw acihpaw sohin silawhang ccangkheit a rae.2Te sohin tuikua kha apyng lante rae zah, voikheih lang arae te voikheih lang arae tuh dung haw sawkuh zah, dung pangaw ahang. Po voilu lante tou lanze dung sung thum acih.3Tuikua arae zakaw khe po voilu lante dong kheit ze tui-ung ccanghaw ccite, tui-ung tang tangning kha tuikua po voilu lan sohin te a laee.4Tuh-e tuikua tuh tangnuapaw sa haw lae ning vawlan khe a um, tangnuapaw hae sa thum tuh thahlang, sa thum tuh niccaw lang, sa thum tuh alia lang, sa thum tuh nithua lang a hawi hae. Tuikua tuh mih tungvaw khe um zah, alungkhu langkhe mih nulang kha a sangsah hae.5Tuikua tuh zapae thaw zah, arae tuh banang rae hawte thua zah, lili haetapaw te alokuh; tuikua tuh tui kha bath thong ning accawng.6Singku nawlan pakepi ccanghaw rae zah, ccangpangaw kha ranglang khe nung zah, ccangpangaw kha voilang khe a nung. E hae lungkhu hin maee-ute silawnaw kya mangpaw uccaw hae kha a ccikan hae. Tuikua tuh ranpibawi hae nynh a singku nawlan hae paw nynh thua.
7Synriaty athua vae hawte, sui maeekhuatung ccanghaw kha rae zah beikinn lungkhu, alia langsang khe ccangpangaw, thahlang sang khe ccangpangaw a nung.8Ccaboi kha mah ccanghaw rae zah beikinn lungkhu, ranglang sang khe ccangpangaw, voilang sang khe ccangpangaw a nung. Te sui pakepi za kheit a rae.9Ranpibawi hae voidu, voidu lepaw te voidu elang thuakaw hae kha rae zah, thuakaw hae kha sohin te a thei hae.10Tuikua kha inn nithua-alia lang apaki khe a nung.
11Huram nynh ang hae, buhhawlua hae te pakepi hae kha a rae. Tuhcite Huram nynh Solomon Siapharan hanlan Pachia inn kya rya a lawpyapaw kha a lyn:12tungpi ccangning, pakekhupaw hae, tungpi dung hae kya-e tunglukhung ccangning, tungpi dung hae kya umpaw tunglukhung hae bong lanpaw miabu hawte akhelekuhpaw ccangning;13tungpi dung hae kya umpaw tunglukhung hae bong lanpaw miabu hawte akhelekuhpaw ccangning hae hanlan ccalee thae za pali, tuh-e miabu lopaw ccangkheit cci hanlan ccalee thae atang tang ning,14thadynsahnawpaw hae, thadynsahnawpaw hae vawlan umpaw pakepi hae,15tuikua ccangkheit, tuh-e tuikua kaw umpaw tangnuapaw hae sa haw lae ning kha a rae.16Ang hae, buhhawlua hae, phedung hae te hynh-e hae hanlan ahopaw uccaw balyn tuh Huram-abi nynh Solomon Siapharan elang Bawipaw inn hanlan awrarihpaw sohin te a raepya.17Jordan bialae, Sukkoth te Zeredah laku anglae a umnaw hmin kyakhe siapharan nynh tuh-e hae tuh a raesah hae.18Solomon nynh e uccaw hae balyn hynh patae a rae keiccuze sohin tuh hohzeihmou ari cipaw ny kho um khyh.
19Tuhcite Solomon nynh Pachia inn kya umpaw uccaw balyn kha a rae: sui silawhang, nungpyapaw sanlou nungnawpaw ccaboi,20synriaty athua vae hawte, alungkhu lang e hminthyaa malang maee aw nawlan sui ccipaw te raepaw maeekhuatung hae te mih maeeinn hae;21sui ccipaw te raepaw haetapaw hae, maeeinn hae, tetakia hae;22sui ccipaw te raepaw tetakia hae, pakepi hae, angsaw hae, maee-e nungnawpaw pake hae; beikinn lungkhu lang teenaw hae tuh: hmin thyaa huaccepaw kalan teenawpaw alungkhu lang e thuakaw hae te beikinn akhaanpi kya-e thuakaw hae kha sui te a rae.
1Tuhcite Solomon nynh Bawipaw inn hanlan rya a lawpaw balyn kha a thangsah. A paaw David nynh a hlu vae paw uccaw hae kha Solomon nynh teekhae zah Pachia inn e sisuakhaan kyakhe sui, ngun te angphe balyn kha a nung. Beikinn lungkhu lang Thingkua Teekhaenaw (1Si 8.1-9)
2Bawipaw byakin thingkua kha Zion cikuhpaw David khua kyate poukhae khylan, Solomon nynh Israel piccan hae balyn, mih phin raveih kya-e lu hae balyn, Israel ciihan cciakhaetu hae balyn kha Jerusalem khua kya a pum hae.3Israel hae balyn tuh sawpaw sah sarinaw kya tuapaw poi kyakhe siapharan malang a pumkuh hae.4Israel piccan hae balyn tuh oun thua hae zah Levi phin hae nynh thingkua kha a puih hae.5Minmin nynh thingkua, tungkunaw bu te bu lungkhu umpaw athyaapaw angphe balyn kha a cciakhae thung hae; ranpibawi hae te Levi phin hae nynh a cciakhae thung hae.6Solomon Siapharan te a malang pumkuh hae paw Israel zapi balyn tuh thingkua malang khe um hae zah, minmin nynh riatae um lei lan alungpaw tuu hae te tangnuapaw hae khate silawnaw a rae hae.7Ranpibawi hae nynh Bawipaw byakin thingkua kha beikinn alungkhu lang e hminthyaa kya, hmin thyaa huaccepaw kya, cherubim sake hae kaw, amaw hmin kyakhe a nung hae.8Pawccecize cherubim hae nynh mih sake hae kha thingkua umnaw luki khe daw hae zah, thingkua te puihnawpaw ccong hae kha a dawpya hae.9Puihnawpaw ccong hae tuh eih asae keiccuze adung kha alungkhu lang e hminthyaa malang umpaw athyaapaw hmin kyate muih kho athua; thuasalama atolang te muih kho thua khyh; atunin cia tuin kya a um hae.10Israel hae nynh Izip ram kyate a pou lya hae ze, Bawipaw nynh minmin ryte byakinnaw a raenaw Horeb mua kya Moses nynh a la sangpaw lungphe phe ning laelan, thingkua lungkhu kya ccangpaw pawpaw mah um khyh.
11Ranpibawi hae tuh athyaapaw hmin kyate he a pou hae te (tuin kya umpaw ranpibawi balyn tuh a umnaw hae aphu kha peki leite, phe a thyaasakuh vae hae,12te Levi phin hlawsahthya hae paw balyn, Asaf, Heman te Jeduthun, mih ccapaw hae te mih puizia hae kha nebaleihpaw laaw te kuakuhpaw boei khate ccaankuh hae zah, lanchi, tintang te tang-oi hae kha ccyngkute mungkae tu hae paw ranpibawi hae za kheit lu kuin ryte silawhang nithua langkhe a thadyn hae).13Mungkae tu hae paw te hlawsahthya hae paw mih rya tuh Bawipaw luungnaw hlaw te thehoysahnaw hlaw kha roi kheit lante ccaesah lanpaw athua keiccuze mungkae, lanchi te ccangpaw khuakupaw uccaw hae khate,“Pawccecize amaw tuh ahoy,atynpaw a sungsahnaw tuhzungzae atyn,”cite Bawipaw kha thehoysahte hlaw he a sah hae tuh, inn, Bawipaw inn tuh maeking te phe abeih,14maeking keiccuze ranpibawi hae tuh ryalaw lan thadyn kho khyh hae; pawccecize Bawipaw phu-enaw tuh Pachia inn kya phe abeih. Beikinn Thyaasahnaw (1Si 8.12-21)
1Solomon nynh, “Varyng zipingpaw mohnaw kya ka um cih cite Bawipaw nynh a ci.2A sung-epaw inn, zungzae na umnaw lanpaw hmin kha kae sakpya vae,” a ci.
3Te Israel zapi hae balyn tuh a thadyn lya hae khe, siapharan nynh a nulang maeleihkuh zah Israel zapi hae balyn kha hythua a pya hae.4Solomon nynh, “Bawipaw , Israel Pachia tuh thehoyte um sah, pawccecize ka paaw David kyakhe a mung te byakinpakuh zah,5‘Ka ccungccaw Israel hae kha Izip ram kyate ka poukhae nin hae kyate tho zah, ka min a umnaw lanpaw inn kha sak nawlan, Israel phin hae kya-e pawpaw khua kha mah ka po khyh; ka ccungccaw Israel hae uktu lang humhung mah ka po khyh;6thuasalama ka min a um nawlan Jerusalem khua kha ka po zah, ka ccungccaw Israel hae a uktu lang David kha ka po,’ cite a hopaw bya kha a kuih te a ccingsah vae.7Bawipaw , Israel Pachia min hanlan inn sak lanpaw kha ka paaw David thinlung kya a la um.8Thuasalama Bawipaw nynh ka paaw David kha, ‘Ka min hanlan inn sak lan na tuaku keiccuze ahoypaw kha na cyi vae;9thuasalama nang nynh inn kha na sak lan khyh, na saahkuh cih paw na ccapaw nynh ka min hanlan inn kha a sak cih,’ a cipya.10Bawipaw nynh bya a kinkupaw kha a ccingsah vae; pawccecize ka paaw David hmin kya ka um vae; Bawipaw nynh bya a kinku thyhte, Israel bawitungkhung kya ka haung zah, Bawipaw , Israel Pachia min hanlan inn kha ka sak vae.11Israel ccungccaw hae ryte Bawipaw nynh a raepaw byakinnaw a umnahpaw thingkua kha tuh-e inn kya ka nung vae,” a ci. Solomon Sawsangnaw (1Si 8.22-53)
12Solomon tuh Bawipaw silawhang malang, Israel zapi a pumkuh hae paw balyn muihnaw khe thadyn zah a kuih kha tharae a zo.13Solomon nynh asaepaw dong pangaw, akopaw dong pangaw, ahangpaw dong thum acihpaw ccaboi hangpaw ccangkheit kha rae zah voidu kya nung zah tuh-e vawlan khe a thadyn. Te Israel zapi hae balyn malang khe a ccukharutung zah vaawlang khe a kuih tharae a zothung.14Aning nynh, “Pou Bawipaw , Israel Pachia, vaaw te lae kya nang ae lopaw Pachia um khyh, mih thinlung balynte namaw malang a cceih hae paw na ryalahtu hae kya atynpaw na sungsahnaw te na byakinnaw kha na tynsah,15na ryalahtu ka paaw David kya na kinpyakupaw bya kha na tynsah. Thanccingte, na mung te bya na kinpakuh zah na kuih te atunin na ccingsah vae.16Tukeiccuze, pou Bawipaw , Israel Pachia, na ryalahtu ka paaw David kyaze, ‘Nang nynh ka malang na ccia hawte, na ccaaw hae nynh ka malang ccia lan mih laanpi kha a raeringku hae zetuh, Israel bawitungkhung kya ka malang a haung cih paw na ciihan tuh dae lan khyh,’ cite bya na kinpyakupaw kha beih tynsah tua.17Tukeiccuze, pou Israel Pachia, na ryalahtu David kya na kinpyakupaw bya kha beih tynsah tua.
18“Thuasalama Pachia tuh laephi vawlan ccungccaw hae kya um ccaccing vema? Vaawram te ahang huaccepaw vaawram nynh heize nang kha ae ccawng khyh, kae nynh ka sakpaw hynh-e inn thathy tuh hosyn um vae khyh!19Thuasalama, pou Bawipaw ka Pachia, na ryalahtupaw nynh saw ka sangpaw te kae ngiapaw hynh yn ngaepya tua, na ryalahtupaw nynh na kalan ka siapaw te saw ka sangpaw hynh yn thaepya tua;20na min nung nawlan bya na kinkunaw hmin, e inn kalan hin khuazi khuadae yn do lah, na ryalahtupaw nynh hynh-e hmin kalan hawite saw ka sangpaw hynh beih yn thaepya tua.21Na ryalahtupaw te na ccungccaw Israel hae nynh hynh-e hmin kalan hawite saw kae sang vae ze, kae ngiapaw kha yn thaepya tua; na umnaw vaawram te yn thaepah lah, kae seinaw kha oun ngaethya.
22“Lukhakheit nynh ccangpaw lu kheit tungvaw a sei keiccuze thyalawsaku thua zah, e inn kya na silawhang malang poute thya a lawku ze,23nang nynh vaawram te thae lah, rya yn lah lah, na ryalahtu hae hynh bya oun piatua, a seitupaw tuh a cyisahnaw kha amaw lu vawlan ccawsah lah, a dingpaw tuh a dingnaw thyhte thanenaw pya khylan thyaccousah tua.
24“Na ccungccaw Israel hae nynh na tungvaw a sei hae keiccuze mih rhaw hae malang he a shung hae te, namaw kalan bua oun maekuh hae zah na min kha sawtuate, e inn kyahin namaw kalan sawsangte ae ngiaku hae ze,25vaawram te thaepah hae lah, na ccungccaw Israel hae seinaw kha ngaethya hae, te minmin te mih minpaaw hae na pya hae paw ram langkhe bua kikhae hae.
26“Na tungvaw a sei hae keiccuze vaaw kha na khawsung zah khuaa kansah te de he na tah hae te, minmin nynh hynh-e hmin kalan hawite sawsang hae zah na min kha nawccawte mih seinaw kyate a maeleihku hae ze,27vaawram te la thae lah, na ryalahtu hae te na ccungccaw Israel hae seinaw kha ngaethya hae; a zui lan hae paw laanpi hoypaw kha ccangpah hae lah, na ccungccaw hae elang rho lang na pya hae paw na ram kya khuaarawsah tua.
28“Ram lungkhu kya ccakan acci ze thuasah, shethya a thua ze thuasah, looh aphi poute ronaw, khivae keiccu looh ronaw, tungkhipaw te maccaloih keiccu looh ronaw thuasah, rhaw nynh mih khua khuakhakheit kha a koihku ze thuasah, shethya ccangkhakheit, ccinaw ccangkhakheit a um ze thuasah,29na ccungccaw Israel hae nynh mih balynte thuasah, humhung nynh mah lukhakheit te thuasah mih thinlung raveih kya a teing hae paw kha nykute, e inn kalan hin mih kuih a daw hae zetuh,30na umnaw vaawram te la thaepah hae, mih seinaw ngaethya hae lah bawmtua hae, a zui hae paw mih laanpi thyhte mih thinlung na ny hae paw balyn kha pyaru hae, pawccecize ccungccaw thinlung kha nang rou nynh na nyh.31Tuhteze nynh kae minpaaw hae na la pya hae paw ram kya a um lungkhu hae balyn nang kha ae rih cih hae zah na laanpi kha a zui cih hae.
32“Tuhawte, na ccungccaw Israel athua leipaw ramccang hae nynh alesaepaw na min, athungpaw na kuih te na dyngpaw na kuih konglang kha a thae hae keiccuze laansawpi te yn cceih hae zah, e inn kalan hin saw a sang hae ze,33na umnaw vaawram te thaepya tua hae; na ccungccaw Israel hae hawte, laephi ccungccaw balyn nynh na min ae ny nawlan hae te na raw ae ri nawlan hae thuasah, ka sakpaw hynh-e inn kyahin na min kha ko athua cipaw a ny nawlan hae thuasah ramccangpaw nynh ae ngiapaw miakaw kha cyipya tua hae.
34“Na ccungccaw hae nynh mih rhaw hae kha tuk khylan a ccia vae hae ze, pawpaw laanpi kya na zuisah hae zemah, na popaw e khua kalan te na min hanlan ka sakpaw inn kalan hawite na kalan saw a sang hae ze,35mih sawsangnaw te mih ngiakunaw kha vaawram te thaepah hae lah, mih ryalaw kya pankhae hae.
36“A sei leipaw lu kheit san a um khyh keiccuze—minmin nynh na tungvaw sei hae zah minmin elang na thinria keiccuze rhaw hae kuih kalan na pya hae zah, minmin kha asawnaw khyhze anaenaw umpaw mih rhaw hae ram lang kyngte cciakhae athua hae ze thuasah,37a cciakhaenaw hae ram kyakhe minmin nynh mih thinlung kya oun nyhthui hae zah ngaesikute a kyngtu hae ram kyakhe nang kha, ‘Kae sei vae, kae cyisei vae, ahoy leipaw rya kae lawsei vae,’ cite ae ngiaku hae ze thuasah,38kyngte a cciakhaetu hae mih rhaw hae ram kyakhe mih thinlung te mih tuanaw balyn te ngaesikuh hae zah, mih minpaaw hae na pya hae paw mih ram, na popaw khua te na min hanlan ka sakpaw inn kalan hawite na kalan saw oun sang hae ze thuasah,39na umnaw vaawram kyate mih sawsangnaw te mih ngiakunaw kha thaepah hae, mih ryalaw kya pankhae hae lah, na tungvaw a sei hae paw na ccungccaw hae kha ngaethya hae.40Pou ka Pachia, e hmin kyate atu saw ka sangpaw hynh beih muih lah, beih thaetua.41“Pou Bawipaw , thokuh lah,na huhan a umnahpawbyakin thingkua rykhatena umnaw hmin lang cciatua.Pou Bawipaw Pachia,na ranpibawi hae nynhkhumnaw boeining khalawkuh hae sah lah,alungzipaw na ccungccaw hae tuhna hoynaw kyakhemih lungtua sah.42Pou Bawipaw Pachia,chitui thuh athuapawna ccungccapaw kha vua nan.Na ryalahtu David elangatynpaw na sungsahnaw khaliathuitua,” a ci.Beikinn Apnaw (1Si 8.62-66)
1Solomon nynh saw a sang koute, vaawlang te maee yn ccah zah maee-ute silawnawpaw te silawnawpaw hae kha a u hae; te Bawipaw phu-enaw tuh beikinn kya phe abeih.2Bawipaw phu-enaw tuh Bawipaw inn kya phe abia keiccuze ranpibawi hae tuh Bawipaw inn lungkhu lang tee kho khyh hae.3Maee yn ccah zah Bawipaw phu-enaw tuh beikinn vawlan a umpaw kha Israel hae balyn nynh he a muih hae tuh, lung aphaekuhpaw vawlan khe laekhu kya bakhung hae zah, Bawipaw kha beikte lungtuabya ho hae zah,“Amaw tuh ahoy,atynpaw a sungsahnaw tuhzungzae atyn,” a ci hae.
4Te siapharan te ccungccaw hae balyn nynh Bawipaw malang khe silawnaw a rae hae.5Solomon Siapharan nynh tangnuapaw thong kuin lae ning te tuu cciing kheit thong kuin khate silawnaw a rae. Tuhcite siapharan te ccungccaw balyn nynh Pachia inn kha a ap hae.6Ranpibawi hae tuh mih umnaw hmin kya a thadyn hae; Levi phin hae mah David nynh Bawipaw thehoysah nawlan a raepaw khuakupaw uccaw hae kha khuakute thadyn hae zah David nynh rya a naw hae thyhte, “Atynpaw a sungsahnaw tuh zungzae atyn,” cite Bawipaw kha the a hoysah hae. Minmin te arawsekunaw khe ranpibawi hae nynh mungkae tu hae zah, Israel hae balyn tuh a thadyn hae.7Solomon nynh Bawipaw inn malang umpaw voidu angaelung kha a thyaasah; Solomon nynh a raepaw sohin silawhang nynh maee-ute silawnaw, ccathae silawnaw te atho hae kha accawng khyh keiccuze tuin kyakhe maee-ute silawnaw hae te ccawkunaw silawnawpaw atho khate silawnaw a rae.
8Tuin ccyh lyakhe Solomon nynh a kya umpaw Israel hae balyn te myarya lungpaw ccungccaw zapi hae, Hamath khua teenaw kyate Izip Vaw kyacia a um hae paw ryte nin sari lungkhu poi a tua hae.9Nin taryanaw nin khe athyaapaw pumkunaw kha a rae hae; pawccecize nin sari lungkhu silawhang apnaw rae hae zah nin sari lungkhu poi a tua hae.10Sawpaw sah sarinaw, nin kuin lae thum nin khe ccungccaw hae kha mih inn lang a kisah hae, Bawipaw nynh David, Solomon te a ccungccaw Israel hae kya a langsahkupaw hoynaw keiccuze minmin tuh lungtua lungpawte a ki hae.
11Tuhcite Solomon nynh Bawipaw inn te siapharan inn kha a lyn; Solomon nynh Bawipaw inn kya te amaw inn kya cyi lan a paccynpaw balyn kha hoyte a lyn. Solomon kya Pachia Bua A Langkuh
12Bawipaw tuh Solomon kya khuazi khe langkuh zah: “Na sawsangnaw kha ka thae vae, e hmin hynh silawnaw inn lang kamaw elang ka poku vae.13Khuaa araw khyh nawlan vaawlui kha ka khaw ze thuasah, laephi kya-e looh kha ae khylan tungkhipaw hae kha kaw ka pya hae ze thuasah, ka ccungccaw hae kya shethya ka thuasah ze thuasah,14ka min te ko athua hae paw ka ccungccaw hae nynh zakawsangsakute sawsang hae zah ka mae kha ccungte ahoy leipaw mih laanpi kyate a maeleihku hae zetuh, vaawlang te ka thae cih zah mih seinaw kha ngaethyate mih ram kha ka dansah cih.15E hmin kya saw a sang hae paw kha ka mit nynh a muih cih zah ka naw nynh a thae cih.16Ka min tuh hein kya zungzae a um ccaw cite e inn hynh ka po zah ka thyaasah vae; ka mit te ka thinlung tuh hein kya tyty a um cih hae.17Nang tuh na paaw David nynh a la ccia hawte, kaw kae pyapaw balyn thyhte cyite, ka phungbya hae te ka phungzae hae kha zuite ka malang na ccia zetuh,18‘Israel a uk cih paw na ciihan tuh dae lan khyh,’ cite na paaw David ryte byakinnaw ka rae hawte, na siapharan bawitungkhung tuh zungzae ka tynsah cih.
19“Thuasalama ccanglang na maeleihkuh oh zah nae malang ka nungpaw ka kawbya hae te ka phungbya hae kha vuate, ccangpaw pachia hae kalan na cceih oh zah na beik oh zetuh,20nanning kae pya oh paw ram kyate poh kae khaee cih oh; ka min hanlan ka thyaasahpaw e inn hynh ka muihnaw kyate ka vua cih zah ccungccaw hae balyn kya phungtangbya te saryapaw lang ka tangsah cih.21E inn a sung-epaw hynh a pe po a cceihpaw miakaw nynh mih ngaeangthua cih zah, ‘E ram te e inn hynh Bawipaw nynh pawccemou hynhte a cyi?’ cite a ho cih hae.22Te minmin nynh, ‘Mih minpaaw hae kha Izip ram kyate a poukhae hae paw Bawipaw mih Pachia kha vua hae zah, ccangpaw pachia hae kha doliakute beik hae zah rya a lawpya hae keiccu nynh thua; tukeiccuze Bawipaw nynh e ronaw hynh mih tungvaw a thuasah,’ cite a ho cih hae,” a cipya. Ccangpaw Solomon Ryalaw hae (1Si 9.10-28)
1Solomon nynh Bawipaw inn te siapharan inn kha sak zah kum kuin he aro te,2Huram nynh a pyapaw khua hae kha Solomon nynh raethui zah tuin kya Israel hae kha a umsah hae.
3Solomon nynh Hamath-zobah ram kha ccianua zah a law.4Ramkaw kya Tadmor khua kha rae zah, Hamath ram kya uccaw ccakhungnaw khua hae balyn kha a rae.5Khualungrua hae, koikua hae, sakoih ccong hae te akoihkuhpaw khua hae Palung Beth-horon te Alia Beth-horon khua hae kha mah a rae hae,6Baalath khua, Solomon kya-e uccaw ccakhungnawpaw khua hae balyn, marangle hae hanlan khua hae, a marang rhawkaw hae hanlan khua hae te Solomon nynh Jerusalem kya, Lebanon kya te a ukpaw ram hae balyn kyakhe sak a rypaw miakaw kha a sak.7Hit hae, Amor hae, Periz hae, Hiv hae te Jebus hae lungkhu e a laehy hae paw balyn, Israel ccungccaw athua lei hae paw,8ram kya a laehy hae paw mih ciihan hae kya-e Israel ccungccaw hae nynh a ro lei hae paw kha— Solomon nynh nangsete ryalawsahnaw kya nung hae zah, atunin cia tuhcite a um hae.9Thuasalama Israel hae kha tuh Solomon nynh a ryalaw kya see lang mang khyh hae; minmin tuh rhawkaw hae, a kuihkaw e bawi hae, a marangle rhawkaw hae te a marang rhawkaw hae a uktu rhawbawi hae nynh thua hae.10E hae tuh Solomon Siapharan kuihkaw e bawi lepaw hae, ccungccaw hae tungvaw kawhoitu hae za ning sung pangaw nynh thua hae.
11Solomon nynh Faro ccanung kha David khua kyate a sakpyapaw inn kalan khe a cciakhae; pawccecize Solomon nynh, “Bawipaw byakin thingkua a thuanaw hmin tuh athyaa keiccuze ka zu tuh Israel Siapharan David inn kya um lan ccan khyh,” a ci.
12Tee takawnaw akhaan malang kya a raepaw Bawipaw silawhang vawlan khe Solomon nynh Bawipaw kalan maee-ute silawnaw kha a rae,13tuh-e tuh Moses kawbya thyhte sabbath nin hae, sawpaw thawpaw hae te kum kheit ze vae thum tuapaw poi hae—ransi phing leipaw sanlou poi, lonaw poi te bu poi hanlan nin takyhte raepaw silawnaw kha leih a rae hae.14A paaw David phungzae thyhte, ranpibawi hae kha mih rya raveih hanlan aphuphute ryalaw a nee hae, te Levi phin hae tuh nin takyhte law lanpaw rya thyhte, ranpibawi hae ryte thehoysahpaw rya te law lanpaw mih rya kha nee athua hae, sakoih ngawtu hae kha mah sakoih patae hanlan aphuphute rya a nee hae; pawccecize Pachia ccungccapaw David nynh tuhcite kaw a la pya hae.15Ryalaw miakaw te asekuhpaw kong thuasah, sisua hae te asekuhpaw kong thuasah siapharan nynh kaw a pya hae paw kha ranpibawi hae te Levi phin hae nynh ccanglang maetawkuh khyh hae.
16Bawipaw inn aleihpaw bing nin kyate Bawipaw inn marya lyn athua mawlaezung, Solomon rya miakaw kha tuhcite a lyn hae.
17Te Solomon tuh Edom ram kya rili kin a umpaw Eziongeber te Eloth lang a cceih.18Huram nynh sanphalung hae kha tuh-e hae a do-oih hae paw a ryalahtu hae te rili kya ryalah thya hae paw ryte Solomon kalan a saw hae. Minmin tuh Solomon a ryalahtu hae ryte Ofir lang cceih hae zah, tuin kya-e sui talent za pali sung pangaw kha Solomon Siapharan kalan a phupya hae. Sheba Siapharannung nynh Paebuanaw (1Si 10.1-13)
1Sheba siapharannung nynh Solomon a minthaannaw kha he a thae tuh, myarya rupaw byakhianaw khate syntawtua khylan yn cceih; a mikung hae patae ryte amynkhuhpaw hae te sui patae te aphutepaw lung hae aphupaw kalauh hae ryte Jerusalem lang yn cceih. Solomon kya he a thua te, a thinlung kya umpaw miakaw kha a hopya.2Bya a khiapaw miakaw kha Solomon nynh a phipya; siapharan nynh a ny leipaw, a ccaesahpya kho leipaw pawpaw mah um khyh.3Sheba siapharannung nynh Solomon a hawnaw, a sakpaw inn,4a ccaboi vawlan e looh, a kuihkaw e bawi hae a umzia hae, a ryalahtu hae ryalaw synrianaw, mih boeining, a ryalahtu pise hae te Bawipaw inn kya maee-ute si a lawnaw kha he a muih tuh, a ngaeangthua zah a lung phe zo.
5Te aning nynh siapharan kha, “Ka ram kyate ka thaepaw na ryalaw konglang te na hawnaw kong tuh akyh,6thuasalama kamaw po kae thua zah ka mit te ka muih mawlaezung tuh a ho hae paw kha ka zyn khyh. Angankuh sanmah yn la hopah khyh hae; na hawnaw te na hoirumnaw tuh ka la thaepaw kha po a lawe.7Na ccungccaw hae tuh lungtua hae paw nynh thua hae! Nang kha palei ae do-oih hae zah na hawnaw palei a thae hae paw na ryalahtu hae tuh lungtua hae paw nynh thua hae!8Na tungvaw a lungrythua zah Israel bawitungkhung kya ae nungpaw Bawipaw na Pachia tuh thehoyte um sah! Bawipaw nynh Israel kha zungzae sungsah zah a tynsah ry keiccuze nang nynh byading te dingnaw kha na rae nawlan minmin a uktu siapharan lang ae khang vae,” a cipya.9Te Sheba siapharannung nynh Solomon kha sui talent za kheit ccangkuin, amynkhuhpaw patae te aphutepaw lung hae kha a pya; Sheba siapharannung nynh Solomon Siapharan a pyapaw mynkhuhpaw tahawpaw ccangpaw um vae khyh.
10Tuhpiaze Ofir khua kyate sui oun phutu hae Hiram a ryalahtu hae te Solomon a ryalahtu hae nynh algum thing patae te aphutepaw lung hae kha oun phu hae.11Siapharan nynh tuh-e algum thing khate Bawipaw inn dounawpaw tung hae, siapharan inn dounawpaw tung hae te hlawsahthya hae paw elang tang-oi te tintang hae kha mah a rae hae; tuhcihawpaw algum thing tuh Judah ram kya langmawlya muih boi lan um khyh.
12Sheba siapharannung nynh a phupyapaw lasung hanlan Solomon Siapharan nynh a pyarupaw lasung holeite, siapharannung nynh ry zah a ngiakupaw miakaw kha mah a pya. Tukoute siapharannung tuh a ryalahtu hae ryte amaw ram lang a ki vae. Solomon Sisua Patae (1Si 10.14-25)
13Solomon kalan kum kheit lungkhu a teepaw sui nynh aripaw tuh talent za taruh sung taruh ccangtaruh acih,14tuh-e hae apiaze kungku hae te uccaw zuatu hae nynh a teekhae hae paw a um ung; Arabia siapharan hae balyn te ram uktu bawi hae nynh Solomon kalan sui te ngun a thuakhae hae.15Solomon nynh deihpaw sui te khawriaphua alepaw za ning kha rae zah, tuh-e khawriaphua ccangkheit cci elang deihpaw sui shekel za taruh cci athang.16Aning nynh deihpaw sui te khawriaphua za thum kha rae zah, tuh-e khawriaphua ccangkheit cci elang sui shekel za thum cci athang; tuh-e hae tuh siapharan nynh Lebanon Tuhpi Inn kya a nung hae.17Siapharan nynh saepanua te bawitungkhung lepaw kha mah rae zah, sui ccite a thei.18Bawitungkhung tuh kaenawpaw ccusy thyh taruh um zah sui te raepaw phanah a hoi, tuh-e hae tuh bawitungkhung kya a piadekuh hae, te haungnaw voilang ranglang te kuih khangnawpaw um zah tuh-e kuih khangnawpaw pe tuin chindeih sa ning a thadyn hae,19te kaenawpaw ccusy thyh taruh vawlan akin lang voilang ranglang khe chindeih sa kheit ccite sa haw lae ning a thadyn hae. Tuhcihawpaw bawitungkhung tuh teitei ram kya mah rae boi khyh hae.20Solomon Siapharan nynh a nianawpaw banang balyn tuh sui thua zah, Lebanon Tuhpi Inn kya-e angphe hae balyn tuh sui ccite raepaw nynh thua hae; ccangkheit sanmah ngun um khyh, Solomon she lya tuh ngun hynh pawlangria khyh hae.21Siapharan kya-e sanphalung hae tuh Hiram a ryalahtu hae ryte Tarshish lang leih a cceih he hae; Tarshish sanphalung phu tuh kum thum ze vae kheit leih oun thua hae zah sui, ngun, saepanua, zuapaw hae te buatua hae kha leih oun phu hae.
22Tuhcite Solomon Siapharan nynh laephi vaw e siapharan hae balyn kha hoirumnaw te hawnaw kya pong a lawe hae.23Pachia nynh Solomon thinlung kya a pyapaw hawnaw kha thae khylan, laephi vaw e siapharan balyn tuh amaw kalan oun cceih hae.24Tuh-e hae miakaw nynh sui te ngun uccaw hae, boeining hae, zunghe hae, amynkhuhpaw hae, marang hae te lann hae kha kum takyh lasung lang a ccyngpya hae.
25Solomon nynh marangle hae te marang hae hanlan marang inn thong pali, marang rhawkaw thong haw lae ning hoi zah, marangle nungnaw khua hae te Jerusalem umpaw siapharan kya a nung hae.26Zufrates vaw kyate Filistin hae ram kyacia, te Izip ramri cia a um hae paw siapharan hae balyn kha a uk hae.27Siapharan nynh Jerusalem khua khe ngun kha lungpyng zeih lungsah zah, sidar thing kha Shefelah kya umpaw thaeku ku zeih a lungsah.28Solomon hanlan marang hae kha Izip ram te ram takyh kyate a thuakhae hae. Solomon Chinaw
29Tuhlaepaw Solomon nynh rya a lawpaw kha atakaw te athangnaw cia, profeh Nathan phungpaw ccauh, Shilon khuapaw Ahijah profeh ccauh te Nebat ccapaw Jeroboam te asekuh lante muihdaetu Iddo nynh a muihpaw vizin ccauh kyakhe a zei hae.30Solomon nynh Israel ram pynpi kha Jerusalem khua kyate kum sung pali a uk.31Solomon tuh a minpaaw hae ryte ih hae zah a paaw David khua kya a uu hae; te a ccapaw Rehoboam nynh amaw ccelang siapharan lang a tang. Rehoboam kha Dounaw (1Si 12.1-20)
1Israel hae balyn nynh Rehoboam kha siapharan lang khang khylan Shekhem khua lang a ccia hae keiccuze amaw mah a cceihbua.2Tuh-e tuh Nebat ccapaw Jeroboam nynh he a thae tuh (pawccecize aning tuh Solomon Siapharan kyate a ccuenaw Izip ram kya nynh a um ung), Jeroboam tuh Izip ram kyate yn ki.3Israel hae nynh amaw kha a kosah hae; te Jeroboam te Israel zapi balyn nynh oun cceih hae zah Rehoboam kha,4“Na paaw nynh phupaw ripaw kha oun phusah vae. Tukeiccuze na paaw nynh kae tungvaw rya rupaw te phupaw ripaw oun phusahpaw hynh nang nynh oun zawsahpah lah, na rya kae lawpah cih,” a cipya hae.5Aning nynh minmin kha, “Nin thum koute ka kalan bua nae cceih cih oh,” a cipya hae. Tukeiccuze ccungccaw hae tuh a ki hae.
6Tetuh Rehoboam Siapharan nynh a paaw Solomon a hiin lyaze a do-oih hae paw piccan hae kha tuanaw ngia hae zah, “E ccungccaw hae kalan khungru lanpaw bya hynh pawtemou tuanaw nae pya cih oh?” a cipya hae.7Minmin nynh amaw kha, “E ccungccaw hae hynh ngaethya na umsah hae zah mih lungrytungte bya hoypaw te na khung hae zetuh, minmin tuh na ryalahtu lang zungzae a tang cih hae,” a cipya hae.8Thuasalama piccan hae nynh tuanaw a pya hae paw kha pawlangria khyh, amaw te ruikheih bankheih thua hae zah amaw a do-oih hae paw ccangvae hae kha tuanaw a ngia hae.9Aning nynh minmin kha, “ ‘Na paaw nynh phupaw ripaw oun phusahpaw hynh oun zawsahpya tua,’ cite yn hopah hae paw e ccungccaw hae khungru lanpaw hynh pawtemou tuanaw nae pya cih oh?” a cipya hae.10Ruikheih bankheih athua hae paw ccangvae hae nynh amaw kha, “ ‘Na paaw nynh phupaw ripaw oun phusah vae, nang nynh oun zawsahpya tua,’ cite ae hopah hae paw e ccungccaw hae hynh hynhte na khung cih hae; minmin kha, ‘Ka kuihdung taraw hynh ka paaw atae laeze athaawhua.11Ka paaw nynh phupaw ripaw ae phusah oh, kae nynh tuh nae phupaw kha houh kae buchihpah cih oh. Ka paaw nynh ruising te ae thuihei oh, kae nynh tuh zekang te kae thuihei cih oh,’ cite na cipah cih hae,” a cipya hae.
12Tukeiccuze siapharan nynh, “Nin thumnaw nin kya ka kalan bua nae cceih cih oh,” cite a ho thyhte, Jeroboam te ccungccaw balyn tuh nin thumnaw nin khe Rehoboam kalan oun thua hae.13Siapharan nynh ccungccaw hae kha byarepaw te a khung hae. Piccan hae nynh tuanaw a pya hae paw kha Rehoboam Siapharan nynh pawlangria khyh;14ccangvae hae nynh a pya hae paw tuanaw thyhte minmin kha, “Ka paaw nynh phupaw ripaw ae phusah oh, kae nynh tuh nae phupaw kha houh kae buchihpah cih oh; ka paaw nynh ruising te ae thuihei oh, kae nynh tuh zekang te kae thuihei cih oh,” a cipya hae.15Siapharan nynh ccungccaw hae bya kha ngae khyh; pawccecize Bawipaw nynh Shilon khuapaw Ahijah kha mangte Nebat ccapaw Jeroboam kya a hopaw bya kha ccingsah khylan Pachia nynh a ry keiccu nynh thua.
16Siapharan nynh kae bya hynh ngae khyh cipaw kha Israel hae balyn nynh he a muih hae tuh, ccungccaw hae nynh siapharan kha,“Kaening nynh David kyaccoupaw pawmou kae hoi?Jesse ccapaw kyarho kae hoi khyh.Pou Israel, nae bu kalanccarou cceih oh!Pou David, namaw maw nynhna innbyn kha do-oihku tua,”a ci hae. Tukeiccuze Israel hae balyn tuh mih bu raveih lang a ki hae.17Thuasalama Rehoboam nynh Judah khua hae kya umpaw Israel hae kha a uk hae.18Nangsete ryalawsahnaw kyaze uktu bawi athuapaw Adoram kha Rehoboam Siapharan nynh saw zah, Israel hae nynh lung te phe chih lan a deih hae. Rehoboam Siapharan tuh Jerusalem lang ccue khylan a marangle kya arangte a ccikuh.19Tuhcite Israel hae nynh David ciihan kha atunin cia a dou hae. Judah te Benjamin Ram e Akoihkuhpaw Khua hae (1Si 12.21-24)
1Rehoboam nynh Jerusalem khua he a thua te, Israel hae kha tuk lan zah peenaw kha Rehoboam kuih kalan pyathui khylan, Judah phin te Benjamin phin kya-e popaw rhawkaw cciing kheit thong sung tarya kha a pum hae.2Thuasalama Bawipaw bya tuh Pachia ccungccapaw Shemaiah kalan yn thua zah:3Solomon ccapaw, Judah siapharan Rehoboam te Judah ram te Benjamin ram umpaw Israel balyn kyakhe,4“Bawipaw nynh hynhte a ho: Nae uno hae kha tuk lan ccianua nan oh. Nae balynte nae inn lang ki oh, pawccecize e hynh kamaw kyate yn thuapaw nynh thua, a ci cite hopah hae,” a cipya. Tukeiccuze minmin nynh Bawipaw bya kha ngae hae zah Jeroboam kha tuk leite a kitaw hae.
5Rehoboam tuh Jerusalem kya um zah, thungkhawkunaw hanlan Judah ram kya khua hae kha a rae hae.6Bethlehem, Etam, Tekoa,7Beth-zur, Soko, Adullam,8Gath, Mareshah, Zif,9Adoraim, Lakhish, Azekah,10Zorah, Aijalon te Hebron khua kha a rae hae, e hae tuh Judah ram te Benjamin ram e lungrua te akoihkuhpaw khua hae nynh thua.11Rhawlungrua hae kha phe tyn lan rae zah rhawbawi hae kha a nung hae, te looh, chitui te misutui kha a ccakhung hae.12Khua takyh kya khawriaphua hae te ccoi hae kha nung zah khua hae kha myarya tyn lan a rae. Tuhcite Judah ram te Benjamin ram kha a uk. Rehoboam A Bawm hae
13Israel ram balyn kya um hae paw ranpibawi hae te Levi hae nynh mih umnaw miakaw kyate amaw kalan a pan hae.14Levi phin hae nynh a hoi hae paw ram hae te mih hoirumnaw kha cciataw hae zah Judah ram te Jerusalem khua lang a cceih hae, pawccecize Jeroboam te a ccapaw hae nynh minmin kha Bawipaw ranpibawi hae ryalaw lanpaw kha khee hae zah,15ahangpaw hmin hae, miaa-khozi hanlan te amaw nynh a raekupaw vaetuataw hae hanlan amaw a ranpibawi hae kha a khang hae.16Bawipaw , Israel Pachia kha ccung khylan mih thinlung te a ry ccaccing hae paw nynh tuh Israel phin hae balyn kyate pou hae zah Bawipaw , mih minpaaw hae Pachia kalan silawnaw rae khylan Levi phin hae kha a zui hae.17Minmin nynh Judah peenaw kha tynsah hae zah Solomon ccapaw Rehoboam kha kum thum lungkhu a khynsah hae, pawccecize minmin nynh kum thum lungkhu David te Solomon laanpi kha a zui hae. Rehoboam Innbyn
18Rehoboam nynh Mahalath kha zu lang a hoi, Mahalath a paaw tuh David ccapaw Jerimoth thua zah a nung tuh Jesse ccapaw Eliab a ccanung Abihail nynh thua.19Aning nynh a saahpyapaw ccapaw hae tuh: Jeush, Shemariah te Zaham.20Tukoute Absalom ccanung Maakah kha zu lang hoi zah Abijah, Attai, Ziza te Shelomith kha a saah hae.21Rehoboam nynh Absalom ccanung Maakah kha ccangpaw a zu hae te a lovaenung hae balyn laeze a sungsahua (zupi lu haw lae tarya te lovae sung taruh hoi zah, ccapaw lu kuin lae tarya te ccanung sung taruh a saah hae).22Rehoboam nynh Maakah ccapaw Abijah kha siapharan lang a paccyn keiccuze a uno hae kyaze bawi lepaw lan a nung.23Hawrarih lante ryalah zah, Judah ram te Benjamin ram kya a umpaw akoihkuhpaw khua hae miakaw kyakhe a ccapaw hae abang kha pong pazaekuh lan a nung hae; aepaw niapaw looh patae pya hae zah, zu patae a dypya hae. Izip nynh Judah A Tuk (1Si 14.25-28)
1Rehoboam uknaw tuh tyn zah thawzung he a hoithung tuh, aning te a kya umpaw Israel hae balyn nynh Bawipaw kawbya kha a vua hae.2Bawipaw tungvaw mih lungzi khyh keiccuze Rehoboam nynh siapharan lang a tangnaw kum pangawnaw kum khe Izip Siapharan Shishak nynh Jerusalem kha3marangle thong kheit za ning, marang rhawkaw thong sung taruh te tuk lan a ccianua thung. Izip ram te amaw ryte a cceihkheih hae paw tuh riatae um khyh hae—Libia hae, Sukkiim hae te Ethiopia hae nynh thua hae.4Judah ram e akoihkuhpaw khua hae kha lah zah Jerusalem cia a thua.5Tetuh Shishak keiccuze Jerusalem kya a sueluakuh hae paw Rehoboam te Judah bawi hae kalan khe profeh Shemaiah tuh yn thua zah minmin kyakhe, “Bawipaw nynh hynhte a ho: Kae hynh nae vua oh keiccuze nanning kha Shishak kuih kalan kae vua vae oh, a ci,” cite a hopya hae.6Tetuh Israel bawi hae te siapharan nynh zakawsangsakuh hae zah, “Bawipaw tuh a ding,” a ci hae.7Minmin tuh zakaw a sangsakuh hae cipaw kha Bawipaw nynh he a muih tuh, Shemaiah kalan Bawipaw bya yn thua zah, “Minmin tuh zakaw a sangsakuh vae hae; minmin kha ka roh lan khyh hae, luenaw abang ka pya cih hae zah Shishak kuih kha mangte Jerusalem tungvaw kya ka thinrianaw kha bu thua lan khyh.8Tuhzemah minmin nynh kae ka ryalaw te ccangpaw laephi uktu hae ryalaw alaenaw kha a nythya nawlan hae, minmin tuh Shishak a ryalahtu lang a tang cih hae.
9Tuhcite Izip Siapharan Shishak nynh Jerusalem kha ccianua thung zah Bawipaw inn e sisua hae te siapharan inn e sisua hae kha a law; pawpaw balyn kha pong a law. Solomon nynh a raepaw sui khawriaphua hae kha mah a law;10thuasalama Rehoboam Siapharan nynh tuh-e hae hanpaw sohin khawriaphua hae kha raeru zah siapharan inn thuakaw a ngawpaw rhawviatu bawi hae kuih kya a nung.11Siapharan nynh Bawipaw inn lungkhu lang a tee takyh vae ze, rhawviatu hae tuh tuh-e khawriaphua hae kha ccyngte leih oun cceih hae zah, rhawviatu hae khaan langkhe bua leih a kikhae hae.12Rehoboam nynh zakaw a sangsaku keiccuze minmin kha marya ro athua khyh nawlan hae, Bawipaw thinrianaw tuh a kyate a maeleihkuh; tuhpiaze Judah ram kya uccaw a umtuzia ahoy. Rehoboam Chinaw
13Rehoboam Siapharan nynh Jerusalem kya a thawzung tynsakuh zah a uk. Rehoboam tuh sung pali kum kheit acih te ram kha a uk takaw; Jerusalem kya kum haw lae sari a uk, tuh-e khua tuh Bawipaw nynh a min nung nawlan Israel phin hae balyn kyate a popaw khua nynh thua. A nung min tuh Naamah cikuh zah Ammon ccungccaw nynh thua.14Bawipaw kha a thinlung ccaccing te a ry khyh keiccuze aning nynh hoyleinaw kha a rae.
15Tuhlaepaw Rehoboam nynh rya a lawpaw atakaw te athangnaw cia, profeh Shemaiah ccauh te profeh Iddo ccauh kya thokeinaw ccazing thyhte a zei hae. Rehoboam te Jeroboam laku kya rhawtukkunaw po a um.16Rehoboam tuh a minpaaw hae ryte ih hae zah David khua kya a uu hae; te amaw ccelang a ccapaw Abijah nynh siapharan lang a tang. Abijah nynh Judah A Uk (1Si 15.1-8)
1Jeroboam Siapharan nynh ram a uknaw kum haw lae taryanaw kum khe Abijah nynh Judah ram kha uk takaw zah,2Jerusalem kya kum thum a uk. A nung min tuh Mikaiah cikuh zah Gibeah khuapaw Uriel ccanung nynh thua.
Abijah te Jeroboam laku kya rhawtukkunaw a um.3Abijah nynh a popaw rhawkaw arawthungpaw cciing pali te rhaw a tuk; Jeroboam nynh a popaw rhawkaw athungpaw cciing tarya te rhaw a tukru.4Abijah tuh Efraim muaram a umpaw Zemaraim Mua hary apannaw khe thadyn zah, “Jeroboam te Israel hae balyn, ka bya yn ngaepya tua oh!5Bawipaw , Israel Pachia nynh Israel ram kya siapharan lang tangnaw hynh David te a ccapaw hae kalan loi byakinnaw te zungzae a pya vae hae cipaw kha na nyh khyh oh tou?6Tuhzemah David ccapaw Solomon a ryalahtupaw Nebat a ccapaw Jeroboam nynh thokuh zah a bawipaw kha a dou;7Rehoboam tuh dih ung zah pawte ryalaw lan cipaw nythya leite minmin tungvaw cyiru khonaw a hoi khyh lyakhe ccungkia leipaw te ccungccaleipaw hae tuh Jeroboam kalan sueluakuh hae zah Solomon ccapaw Rehoboam kha a rawse hae.
8“Atu nanning tuh ccungccaw na lung oh zah Jerobaom nynh nae hanlan pachia lang ae raepya oh paw sui vaetuataw hae kha na hoi oh keiccuze nanning nynh David ccapaw hae kuih kya umpaw Bawipaw peenaw kha kae dou kho cih cite na tuaku oh.9Nanning nynh Bawipaw ranpibawi hae, Aaron ccapaw hae te Levi phin hae kha na dee oh zah ramccang hae hawte naemaw nynh ranpibawi hae kha na khangkuh khyh oh tou? Tangnua anopaw te thuasah, tuutepaw sa sari te thuasah thyaasaku lan yn cceihpaw miakaw tuh pachia athua lei hae paw kya-e ranpibawi lang a tang hae.10Thuasalama kaening hanlan tuh, Bawipaw hynh kae Pachia thua zah amaw kha kae vua khyh. Bawipaw rya a lahtu lang Aaron ciihan hae kha kae hoi zah, mih rya a lahtu lang Levi phin hae kha kae hoi.11Minmin nynh Bawipaw kalan awkhua takyhte zete takyh kya maee-ute silawnaw rae hae zah mynkhuhpaw kha a u hae, sui thyaapaw ccaboi vawlan khe nungpyapaw sanlou kha thuasah, zete takyh maeekhua a aw ccaw cite sui maeekhuatung kha thuasah a paccyn hae; Bawipaw , kae Pachia nynh oun nawpaw kha kae cyi, thuasalama nanning nynh amaw kha na vua vae oh.12Dotua oh, Pachia tuh kae kya um zah oun cciakhaetu nynh thua, Pachia ranpibawi hae tuh nanning tuknawpaw roi ccaesah khylan rhawtuknawpaw mungkae a hoi hae. Pou Israel hae, Bawipaw , nae minpaaw hae Pachia kha dou nan oh; pawccecize na tae lan khyh oh,” a cipya hae.
13Judah hae kha mih nulang te a pounua lan hae paw buhkhawtu hae kha Jeroboam nynh a saw hae; amaw rhawkaw hae tuh Judah hae malang khe um hae zah buhkhawtu hae tuh mih nulang khe a um hae.14Judah hae nynh maeleihkute he a do hae tuh, nulang malang te rhaw hae a um hae. Tetuh Bawipaw kalan sia hae zah ranpibawi hae nynh mungkae a tu hae.15Te Judah ccungccaw hae tuh rhawdounaw roi a saw hae. Judah hae nynh he a sia hae tuh, Pachia nynh Jeroboam te Israel balyn kha Abijah te Judah hae malang khe rhaw a shungsah hae.16Israel hae tuh Judah hae malang te ccue hae zah, Pachia nynh Judah hae kuih kya a pya hae.17Abijah te a rhawkaw hae nynh minmin kha tae hae zah patae a chia hae; popaw Israel ccungccaw cciing pangaw a chih hae.18Tuhcite Israel hae tuh tuin ccyh kya rhaw a shung hae, Judah hae tuh Bawipaw , mih minpaaw hae Pachia kha a doliaku hae keiccuze rhaw a tae hae.19Abijah nynh Jeroboam kha deehui zah a khua hae kha a lua: Bethel khua te a khua taraw hae, Jeshanah khua te a khua taraw hae, Efron khua te a khua taraw hae kha a lua.20Abijah she lya tuh Jeroboam nynh a thungnaw kha muethui vae khyh; Bawipaw nynh detah zah a chih.21Thuasalama Abijah tuh thawzung houhouh a hoi. Zu lu haw lae pali hoi zah ccapaw lu kuin lae ning te ccanung lu haw lae taruh a saah.22Tuhlaepaw Abijah nynh rya a lawpaw, a ozia te a cyisahnaw tuh profeh Iddo kya-e phungpaw ccauh kya a zei hae. Asa A Uknaw
1Abijah tuh a minpaaw hae ryte ih hae zah David khua kya a uu hae. A ccapaw Asa nynh amaw ccelang siapharan lang a tang. Aning she kya ram tuh kum haw lungkhu adae.2Asa nynh Bawipaw a Pachia muihnaw kya ahoypaw te ahmepaw kha a rae.3Ramccang hae kya-e silawhang hae te ahangpaw hmin hae kha ccaring lah zah, zohtuh hae kha a ro hae, Asherah hae kha nge zah,4Judah hae kyakhe Bawipaw , mih minpaaw hae Pachia kha ccung lan te phungbya te kawbya kha zui lan kaw a pya hae.5Judah ram e khua hae balyn kyate ahangpaw hmin hae te mynkhuhpaw unawpaw silawhang hae kha mah a vua. Aning kuihkaw kya peenaw lungkhu daenaw a um.6Ram kya daenaw a um lyakhe Judah ram kya akoihkuhpaw khua hae kha a rae. Bawipaw nynh amaw kha daenaw a pya keiccuze tuh-e ccyh lya rhawtukkunaw um khyh.7Aning nynh Judah hae kha, “E khua hae hynh rae oh sih lah, khualungrua, innhangpaw, koikua te accaw hae khate koih oh sih; Bawipaw ah Pachia kha ah ccung oh keiccuze ram tuh ahmaw kya-e nynh athua ung, aening nynh amaw kha ah ccung oh zah aning nynh aening kha teitei langte balyn daenaw oun pya,” a cipya hae. Tuhcite khua hae kha rae hae zah a kaethung hae.8Asa nynh Judah phin kya-e khawriaphua lepaw te ccoi a kyngpaw rhawkaw cciing thum hoi zah, Benjamin phin kya-e khawriaphua te li a kyngpaw rhawkaw cciing ning thong sung tarya a hoi; e hae balyn tuh athungpaw rhawkaw hae nynh thua. Ethiopia kha Taenaw
9Ethiopia ccungccaw Zerah nynh rhawkaw cciing haw, marangle za thum ryte minmin kha ccianua hae zah Mareshah kyacia a thua.10Asa nynh amaw kha tungku khylan pounua zah Mareshah kya Zefathah accya khe tukku lan a nounuaku hae.11Asa nynh Bawipaw , a Pachia kha ko zah, “Pou Bawipaw , athungpaw te anyaapaw laku kya bawmnaw pya lanpaw kha nang na hanlan alaenaw um khyh. Pou Bawipaw kae Pachia, beih oun bawmtua, pawccecize nang kha kae doliakuh zah na min te hynh-e ccungccaw patae hynh tuk lan kae ccianua hae. Pou Bawipaw , nang tuh kae Pachia nynh na thua; ccungccaw nynh nang kha ae tae nan sah,” a ci.12Tukeiccuze Bawipaw nynh Ethiopia hae kha Asa te Judah hae malang khe tae hae zah Ethiopia hae tuh a ccue hae.13Asa te a kya umpaw rhawkaw hae nynh Gerar kyacia a dee hae, Ethiopia hae tuh a hiinhypaw lu kheit san a um lei lan ciate a chih hae; pawccecize minmin tuh Bawipaw te a rhawkaw hae malang khe ro athua hae. Judah hae nynh luadepaw uccaw patae kha a phuku hae.14Gerar pepan umpaw khua hae balyn nynh Bawipaw kha a ri hae keiccuze Judah hae nynh tuh-e khua hae kha a tae hae. Khua hae balyn kyakhe luadepaw uccaw patae a um keiccuze thiing hae zah a lawku hae.15Sahiin a hoi hae paw bu kha mah tuk hae zah tuu te miaa patae te kalauh hae kha a lawku hae. Tukoute Jerusalem lang a ki hae.
1Pachia muisaw tuh Oded ccapaw Azariah tungvaw yn thua.2Aning nynh Asa te tungku khylan cceih zah, “Pou Asa te Judah phin hae balyn te Benjamin phin hae balyn, ka bya hynh ngaetua oh: Nanning nynh Bawipaw ryte na um lungkhu oh tuh, Bawipaw tuh nanning ryte a um. Amaw kha na ccung oh ze, na muih cih oh, thuasalama amaw kha na vua oh zetuh, nanning kha ae vua cih oh.3Ccyh hynhsepi cia Israel tuh Pachia ccaccing hoi khyh, ccangpahtu ranpibawi kha hoi khyh, phungbya mah hoi leite a um;4thuasalama riathaenaw he a tung hae te, Bawipaw , Israel Pachia kalan maeleihkuh hae zah he a ccung hae tuh, amaw kha a muih hae.5Tuh ccyh lya tuh a poutupaw hanlan thuasah, a teetupaw hanlan thuasah khynnaw um khyh, pawccecize ram takyh kya um hae paw balyn tungvaw khe thinphangnaw te ccawku leinaw a um.6Minmin tuh palae tui lan a koi hae, ram kheit te ram kheit, khua kheit te khua kheit a doukuh hae, pawccecize Pachia nynh riathaenaw phuinccing te vawsaw a pya hae.7Thuasalama nanning tuh nae rawthungsakuh oh! Nae kuih kha a thawzyasah nan oh, pawccecize nae ryalaw mee na mue cih oh,” a cipya.
8Oded ccapaw Azariah nynh profehbya a hopaw e bya hae hynh Asa nynh he a thae tuh, a rawthungsakuh zah Judah ram, Benjamin ram te Efraim muaram kya-e a lawpaw khua hae balyn kyate anungsikuhpaw zohtuh hae kha a vua hae. Bawipaw inn tee takawnaw khaan malang umpaw silawhang kha a raethui.9Judah phin hae te Benjamin phin hae balyn kha thuasah, Efraim, Manasseh te Simeon ram hae kyate oun thua hae zah ramccang hae hawte a umbua hae paw kha thuasah a pum hae, pawccecize Bawipaw a Pachia tuh amaw kya a um cipaw he a muih hae te, Israel ram kyate ccungccaw patae tuh amaw kalan a nuekuh hae.10Asa nynh ram a uknaw kum haw lae pangawnaw, sawpaw sah thumnaw khe minmin kha Jerusalem kya a pum hae.11Tuin nin khe luadete a thuakhae hae paw tangnuapaw za sari te tuu thong sari khate Bawipaw kalan silawnaw a rae hae.12Bawipaw , mih minpaaw hae Pachia kha mih thinlung balyn te, mih tuanaw balyn te ccung khylan byakinnaw lungkhu lang a tee hae.13Bawipaw , Israel Pachia kha a ccung leipaw miakaw nopi, pise, imua, piccan humhung athua zemah chia athua cih.14Myarya ccaepaw roi te, siaruate, mungkae te saki tu biate Bawipaw kalan thyalawkute byakinkunaw kha a rae hae.15Judah hae balyn tuh tuh-e byakinkunaw a rae hae keiccuze mih lungpaw; pawccecize mih thinlung balyn te byakinkunaw rae hae zah mih rynaw balyn te Bawipaw kha a ccung hae keiccuze a muih hae, te Bawipaw nynh minmin kha teitei langte balyn daenaw a pya hae.
16Asa Siapharan a minnung Maakah nynh Asherah hanlan anungsikuhpaw zohtuh kha a raepya keiccuze Asa nynh siapharan a nung thuanaw kyate a phua. Asa nynh a zohtuh kha ngepah zah palae tui lan a roh koute Kidron Vaw pe khe maee te a soi.17Thuasalama ahangpaw hmin hae kha Israel ram kyate vua khyh. Tuhzemah Asa thinlung tuh a she lungkhu balyn hmerarih lan a um.18A paaw nynh byakinkute a hlupaw lasung hae te amaw nynh byakinkute a hlupaw sui, ngun te angphe hae kha Bawipaw inn lungkhu langkhe a nung.19Asa nynh a uknaw sung thum kum pangawnaw kum cia rhawtukkunaw um khyh. Asa te Benhadad Pankheihnaw (1Si 15.17-22)
1Asa nynh ram a uknaw sung thum kum taruhnaw kum khe Israel siapharan Baasha nynh Judah ram kha tuk lan ccianua zah, Judah siapharan Asa kalan humhung mah a pou lei nawlan te a tee lei nawlan Ramah khua kha a rae.2Asa nynh Bawipaw inn te siapharan inn kya-e sisuakhaan kya umpaw sui te ngun kha lah zah, Damaskas khua umpaw Siria siapharan Benhadad kalan ky zah,3“Ka paaw te na paaw nynh a la pankheih hae hawte, kae te nang mah pankheih sih; sui te ngun hynh kae ky; Israel siapharan Baasha nynh kae hynh yn kitaw nawlan, aning te na pankheihnaw oh kha roh ccavae,” cite bya a taw.4Benhadad nynh Siapharan Asa bya kha ngae zah, Israel khua hae kha tuk khylan a rhawbawi hae sawnua hae zah, Ijon, Dan, Abel-maim te Naftali ram e sisua nungnaw khua balyn kha a tae hae.5Tuh-e tuh Baasha nynh he a thae te, Ramah khua a raepaw rya kha a haeungtaw.6Te Siapharan Asa nynh Judah hae balyn kha cciakhae hae zah, Baasha nynh Ramah khua a raenawpaw lung hae te thing hae kha a law hae, tuh-e tuhte Siapharan Asa nynh Geba khua te Mizpah khua kha a rae.
7Tuh ccyh lyakhe profeh Hanani tuh Judah Siapharan Asa kalan yn thua zah, “Bawipaw na Pachia kha doliaku leite Siria siapharan kha na doliaku keiccuze Siria siapharan a rhawkaw hae tuh na kuih kyate a lue vae hae.8Ethiopia ccungccaw hae te Libia ccungccaw hae tuh marangle te marang rhawkaw patae ryte myaryamaw alungpaw rhawkaw hae thua khyh hae tou? Tuhzemah Bawipaw kha na doliaku keiccuze aning nynh minmin kha na kuih kya ae pya.9Bawipaw nynh amaw kya mih thinlung hmerarih lan a um hae paw kha thawzung pya khylan laephi pynpi hynh marya a do. E na cyipaw hynh ngaeenaw ccaccing nynh thua; atu kyate rhaw na tuk vae cih,” a cipya.10Tetuh Asa tuh profeh tungvaw a thinria keiccuze khii zah thong lungkhu a nung, pawccecize e kong keiccuze tuh-e paw tungvaw a bungpaw. Tuh ccyh lyakhe Asa nynh ccungccaw abang kha a tuaa a sah hae. Asa Ccinaw te Chinaw (1Si 15.23-24)
11Asa a cyisahnaw kha atakaw te athangnaw cia Judah te Israel Siapharan hae Ccauh kya a zei hae.12Asa tuh ram a uknaw sung thum kum takuanaw kum khe a ccu kya ccinaw hoi zah a ccinaw tuh myarya le; tuhcih mang a ccih pite Bawipaw kha ccung leite, sibawi hae kha bawmnaw a ngiaku hae.13Te Asa tuh a minpaaw hae ryte ih hae zah, ram a uknaw sung pali kum kheitnaw kum khe a chih.14David khua kya amaw nynh a raekupaw shawku kya a uu hae. Mynkhuhpaw a raethya hae paw nynh a rae hae paw mynkhuhpaw aphuinphuin te phe abeihpaw taang kyakhe a isah hae; sawtuanaw pyanawpaw maee pipi kha a tua hae. Jehoshafat Uknaw
1Asa ccapaw Jehoshafat nynh a paaw ccelang siapharan lang tang zah Israel kha rawsete a thawzung a umsaku.2Judah ram kya-e akoihkuhpaw khua hae balyn kyakhe rhawkaw a nung, Judah ram te Efraim ram kya a paaw Asa nynh a lawpaw khua hae kyakhe rhawviatu rhawkaw hae kha a nung.3A paaw nynh masaty a la zuipaw laanpi kha a zui keiccuze Bawipaw tuh Jehoshafat kya a um; aning nynh Baal pachia hae kha ccung khyh,4a paaw Pachia kha ccung zah, Israel hae nynh a zui hae paw laanpi kha zui leite, a kawbya kha a zui.5Tukeiccuze Bawipaw nynh peenaw kha a kuih kya a tynsah. Judah hae balyn nynh Jehoshafat kha lasung pya hae zah myarya hoirum zah sawtuanaw a ccou.6Bawipaw laanpi kyakhe a thinlung tuh rawthungnaw a hoi; tuhpiaze ahangpaw hmin hae te Asherah hae kha Judah ram kyate a ro hae.
7Ram a uknaw kum thumnaw kum khe a kuihkaw e bawi hae, Benhail, Obadiah, Zekhariah, Nethanel te Mikaiah kha Judah ram e khua hae kya ccangpahtu lang a saw hae.8Minmin ryte Levi phin Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah te Tobadonijah kha a sawbua hae; e Levi phin hae ryte ranpibawi hae Elishama te Jehoram kha a sawbua hae.9Minmin nynh Bawipaw phungbya ccauh kha ccyngkute Judah ram kya a ccangpya hae; Judah ram e khua hae balyn kalan pong lekuh lan cceih hae zah ccungccaw hae kha a ccangpya hae.
10Judah ram pepan umpaw ram hae balyn tungvaw kya Bawipaw rawrinaw nynh thuanua hae zah Jehoshafat kha rhawtuk ngan khyh hae.11Filistin hae abang nynh Jehoshafat kha lasung ccyngpah hae zah, ngunto lang ngun kha a pya hae; Arab hae nynh mah tuutepaw thong sari za sari te miaatepaw thong sari za sari kha a pya hae.12Jehoshafat tuh byabyate thawzung a hoithung. Judah ram kya rhawlungrua hae te uccaw ccakhungnaw khua hae kha a rae.13Judah ram e khua hae kya rya pipi kha a law. Jerusalem kya rhawkaw hae te athungpaw rhawkaw hae kha a hoi.14E hynh puizia raveih thyhte ataruinte riapaw nynh thua: Judah phin kya-e rhawkaw athong ukpaw rhawbawi hae tuh: rhawbawipaw Adnah te athungpaw rhawkaw hae cciing thum a um hae,15Adnah he a zuipaw rhawbawipaw tuh Jehohanan thua zah, aning kya rhawkaw cciing ning thong sung tarya a um hae,16Jehohanan he a zuipaw rhawbawi tuh Zikhri ccapaw Amasiah nynh thua, aning tuh Bawipaw rya elang amaw lungthote a pyakuhpaw nynh thua, aning kya athungpaw rhawkaw cciing ning a um hae.17Benjamin phin kyate: athungpaw rhawkaw Eliada thua zah, aning kya li te khawriaphua a ccyngkuhpaw rhawkaw cciing ning a um hae,18Eliada he a zuipaw tuh Jehozabad thua zah, aning kya rhawtuk lan paccynkute a um hae paw cciing kheit thong sung tarya a um hae.19E hae hynh siapharan kya rya a lah hae, e hae holeite Judah ram pynpi e akoihkuhpaw khua hae kya siapharan nynh a nung hae paw a um ung hae. Mikaiah nynh Shungnaw Kong A Hodae (1Si 22.1-28)
1Jehoshafat tuh myarya hoirum zah sawtuanaw a ccou; Ahab te zuvaw lang tangnaw khate puizia kyngkunaw a rae.2Kum beihtaraw alia koute Ahab kalan Samaria khua lang a cceih. Amaw te a kya cceihbua hae paw hanlan Ahab nynh tuu te tangnuapaw patae chiapah hae zah, Ramoth-gilead kha ccianuate tuk lan a hyy.3Israel siapharan Ahab nynh Judah siapharan Jehoshafat kha, “Ramoth-gilead lang nae cciakhae cih tou?” a cipya. Jehoshafat nynh, “Nang te kae tuh pynkheihpaw nynh ah thua; ka ccungccaw hae tuh na ccungccaw hae nynh thua hae. Rhawtuknaw kya kae pankhae cih,” a cipya.
4Jehoshafat nynh Israel siapharan kha, “Bawipaw bya kha khiatua ty hin,” a cipya.5Israel siapharan nynh profeh hae za pali kha pum hae zah, “Ramoth-gilead kha tuk lan kae ccianua cih tou, kae ccianua lan khyh tou?” cite khia hae zah, minmin nynh, “Ccianua; pawccecize Bawipaw nynh siapharan nang na kuih kalan ae pya cih,” a ci hae.6Thuasalama Jehoshafat nynh, “Aening nynh khia lanpaw ccangpaw Bawipaw profeh um vae khyh tou?” a cipya.7Israel siapharan nynh Jehoshafat kha, “Bawipaw kha byakhia nawlan ccangpaw lu kheit, Imlah ccapaw Mikaiah a um ung; tuhzemah aning kha ka hua, pawccecize kae ka konglang bya hoypaw ho boi khyh, ronaw kong cci nynh a ho,” a cipya. Jehoshafat nynh, “Tuhcite siapharan nynh byaho nan,” a cipya.8Te Israel siapharan nynh bawi lu kheit kha ko zah, “Imlah ccapaw Mikaiah kha arangte yn thuakhae,” a cipya.9Te Israel siapharan te Judah siapharan Jehoshafat tuh mih angkiccua kikute, Samaria khua koikua teenaw malang huihmin kya umpaw bawitungkhung kya a haung hae; mih malang khe profeh balyn nynh profehbya a ho hae.10Khenaanah ccapaw Zedekiah nynh sivaw ki hae kha raekuh zah, “Bawipaw nynh hynhte a ho: Siria hae kha ro athua mawlaezung hae, e sivaw ki hae hynhte na thuing cih oh, a ci,” cite a ho.11Profeh balyn nynh mah tuhcite hobua hae zah, “Ramoth-gilead kha ccianua thung lah, taetua; Bawipaw nynh siapharan nang na kuih kya ae pya cih,” a cipya hae.
12Mikaiah ko lan a cceihpaw locceihtupaw nynh Mikaiah kha, “Dotua, profeh hae nynh siapharan kyakhe bya hoypaw kha phe lokuh lante a hopya hae; nang nynh mah minmin hawte bya hoypaw kha hopah bua,” a cipya.13Thuasalama Mikaiah nynh, “Bawipaw tuh a hiin thyhte, ka Pachia nynh a hopaw bya kha ka ho cih,” a ci.
14Mikaiah tuh siapharan kya he a thua te, siapharan nynh, “Mikaiah, Ramoth-gilead kha tuk khylan kae ccianua cih tou, kae ccianua lan khyh tou?” a cipya. Mikaiah nynh, “Ccianua thung lah, taetua; minmin kha na kuih kya pya athua cih hae,” a cipya.15Thuasalama siapharan nynh, “Akyhpaw bya laelan ccangpaw bya kha Bawipaw min te nae hopya khyh nawlan, vae hohzeihmou bya kae kinsakuh cih?” a cipya.16Mikaiah nynh, “Israel hae balyn tuh tuurin a hoi leipaw tuu hae hawte mua vawlan phiariphiarae a um hae paw kha ka muih; Bawipaw nynh, ‘E hae tuh bawi hoi khyh hae; mimaw inn raveih lang daebabi lan ki hae sah,’ a ci,” cite a ho.17Israel siapharan nynh Jehoshafat kha, “Aning tuh kae ka konglang hynh bya hoypaw ho boi khyh, ronaw kong cci nynh a ho, cite kae hopah khyh tou?” a cipya.
18Te Mikaiah nynh, “Tukeiccuze Bawipaw bya hynh thaetua: Bawipaw tuh a bawitungkhung kya haung zah, vaaw rhawkaw hae balyn tuh a voi a rang te a pe khe a thadyn hae.19Te Bawipaw nynh, ‘Israel siapharan Ahab tuh cceihthung zah Ramoth-gilead kya a chi nawlan, hum nynh mou a tuhou cih?’ a ci. Lu kheit nynh ccangte, ccangpaw lu kheit nynh ccangte a ho hae,20muisaw lu kheit yn thua zah Bawipaw malang thadyn zah, ‘Kamaw ka tuhou cih,’ a ci. Bawipaw nynh, ‘Pawtemou na tuhou cih?’ cite a khia.21Aning nynh, ‘Ka cceih cih zah a profeh hae balyn munglae kyakhe ahynthyapaw muisaw lang ka tang cih,’ a ci. Te Bawipaw nynh, ‘Aning kha na la tuhou cih, phe na tuhou kho cih; la cceih lah tuhcite la cyih,’ a cipya.22Tukeiccuze Bawipaw nynh ahynthyapaw muisaw kha e na profeh hae munglae kya a nung vae; Bawipaw nynh nang na hanlan ronaw bya a ho vae,” a cipya.
23Tetuh Khenaanah ccapaw Zedekiah nynh Mikaiah kha ccianua zah a byaki kha bia zah, “Bawipaw muisaw tuh nang kha bya hopya khylan ka kyate paw laanpi te mou a pou?” a cipya.24Mikaiah nynh, “Nang nynh alungkhu lang e akhaan lungkhu lang reku khylan he na tee nin khe na muih cih,” a cipya.25Israel siapharan nynh, “Mikaiah kha kyng oh lah, khua uktu Amon te siapharan ccapaw Joash kalan cciakhae oh;26te ‘Siapharan nynh hynhte a ho: E ccungccaw hynh thonginn kya nung oh, daenaw te kae thua mawlaezung tui te looh beihtaraw kyalya la pya oh, a ci,’ cite la hopah oh,” a cipya hae.27Mikaiah nynh, “Daenaw te bua nae ki zetuh, Bawipaw nynh ka kyate bya a ho khyhpaw nynh athua cih. Pou ccungccaw hae, nae balynte thaetua oh!” a ci. Ahab Shungnaw te Chinaw (1Si 22.29-35)
28Israel siapharan te Judah siapharan Jehoshafat tuh Ramoth-gilead khua lang rhawtuk lan a cceih hae.29Israel siapharan nynh Jehoshafat kha, “Ka muinsan rulaekute rhawtuknaw lang ka cceihbua cih, thuasalama nang tuh na angkiccua kha kikuh,” a cipya. Tuhcite Israel siapharan tuh a muinsan rulaekuh zah rhawtuknaw lang a cceih.30Siria siapharan nynh a marangle rhawbawi hae sung thum lu ning kha, “Ccangpaw ccungccaw adihpaw thuasah, alepaw thuasah tuk leite, Israel siapharan kyalya kha tuk oh,” cite kaw a pya hae.31Marangle rhawbawi hae nynh Jehoshafat kha he a muih hae te, “Aning hynh Israel siapharan nynh thua,” a ci hae. Tukeiccuze aning kha tuk khylan a maenuaku hae; te Jehoshafat nynh sia zah Bawipaw nynh a bawm. Pachia nynh minmin kha amaw kyate ccanglang a cciasah hae,32pawccecize Israel siapharan thua khyh cipaw kha marangle rhawbawi hae nynh he a nyh hae te, amaw kha deehui vae leite a kitaw hae.33Lukheitpaw nynh ee tutae leite a li te kaw huataw zah Israel siapharan kha a rhawtuk-uccaw te a bykhaw laku khe a tungsah; tukeiccuze a marangle a mawngtupaw kha, “Vaemaw phe ka mue, tukeiccuze maeleihkuh lah, rhawtuknaw kyate yn poukhae,” a cipya.34Tuin nin tuh thawte rhaw a tukkuh hae, Israel siapharan tuh a marangle lungkhu khe ngeikuh zah Siria hae kalan khe zete cia a hawi; te khuanin ccaw ccyh khe a chih.
1Judah siapharan Jehoshafat tuh Jerusalem umpaw a inn lang khyndadyh lan a ki.2Hanani ccapaw profeh Jehu tuh Siapharan Jehoshafat te tungku khylan cceih zah amaw kha, “Nang nynh ccungccaw hoylei hae paw kha bawm te Bawipaw a huatu hae kha na sungsah cih hae tou? E keiccuze, Bawipaw thinrianaw tuh na tungvaw accah vae.3Tuhzemah Asherah hae kha ram lungkhu te na vua hae zah na thinlung te Pachia ccung lan na zuaku keiccuze na tungvaw kya hoynaw abang kha muih athua,” a cipya. Jehoshafat nynh Raethuinaw
4Jehoshafat tuh Jerusalem kya khua a sah; te Beersheba kyate Efraim muaram kyacia ccungccaw hae kalan cceih zah mih minpaaw hae Pachia, Bawipaw kalan bua a kikhae hae.5Judah ram e akoihkuhpaw khua hae miakaw kya, khua takyh kyakhe byapiatu hae kha nung hae zah,6byapiatu hae kyakhe, “Na cyi oh paw kha hoyte tuabia oh, pawccecize bya na pia oh paw kha ccungccaw ccelang thua leite Bawipaw ccelang bya na pia oh paw nynh thua; bya na pianaw oh kyakhe aning tuh nae kya a um.7Tukeiccuze Bawipaw raw kha rih oh; na cyi oh paw kha raeringkuh oh, pawccecize Bawipaw , aening Pachia kya tuh ahme lei lante byapianaw, mirymihuaponaw, pyaruh lawkunaw um khyh,” a cipya hae.
8Tuhpiaze Jerusalem kyakhe Bawipaw elang byapia khylan te byalungnaw kha byapia khylan, Jehoshafat nynh Levi phin hae, ranpibawi hae te Israel phin hae kya-e lu hae kha a khang hae. Minmin tuh Jerusalem kya a um hae.9Aning nynh kawpya hae zah, “Hynhte rya na lah cih oh: Bawipaw rawri te, lungzinaw te, nae thinlung balyn te rya na lah cih oh;10Mimaw khua kya um hae paw nae uno hae nynh chiise luanaw kong thuasah, phungbya, kawbya, phunglang, phungzae hae kong thuasah nae kalan byathan oun thuakhae hae ze, minmin nynh Bawipaw malang cyiseipaw seinaw a hoi khyh nawlan hae te naemaw te nae uno hae tungvaw kya thinrianaw a um khyh nawlan minmin kha na ccangpah cih oh. Tuhte na cyi oh ze cyiseipaw seinaw kha na hoi lan khyh oh.11Bawipaw ryalaw miakaw kya ranpibawi Amariah tuh nanning uktu lang a um; Judah siapharan ryalaw miakaw kya Judah phin uktu bawi Zebadiah, Ishmael ccapaw tuh nanning uktu lang a um; Levi phin hae nynh bawi hae lante rya ae lawpah cih oh. Rawthungte ryalah oh, Bawipaw tuh ccungccaw hoy hae paw kya um vae sah!” a ci. Moab hae te Ammon hae Taenaw
1E koute Moab hae te Ammon hae nynh Meunim hae abang ryte Jehoshafat kha tuk lan a ccianua hae.2Locceihtu hae nynh oun thua hae zah Jehoshafat kha, “Edom ram kyate, rili khuraw langte ccungccaw zapi patae tuh nang kha tuk khylan oun cceih hae zah Hazazontamar kya nynh a um hae,” cite a hopya hae (tuh-e tuh En-gedi nynh thua).3Jehoshafat tuh rih zah Bawipaw kha ccung khylan paccynkuh zah Judah ram pynpi kya looh-ae sung lan a thaesah hae.4Judah hae balyn tuh Bawipaw bawmnaw kha mue khylan a pumkuh hae; Judah ram e khua hae balyn kyate Bawipaw kha ccung khylan a thua hae. Jehoshafat Sawsangnaw te Taenaw
5Jehoshafat tuh Bawipaw inn, voidu thawpaw malang, Judah hae te Jerusalem khuaccaaw hae a pumkuh hae paw kyakhe thadyn zah,6“Pou Bawipaw , kae minpaaw hae Pachia, nang tuh vaawlang umpaw Pachia na thua khyh tou? Minphuin hae kya-e ram hae balyn tuh nang nynh na uk khyh tou? Humhung nynh mah ae khee ngan khyh nawlan, na kuih kya huhan te thungnaw a um.7Pou kae Pachia, nang nynh e ram kya um hae paw kha na ccungccaw Israel hae malang te na dee hae zah na banpaw Abraham ciihan hae kha zungzae na pya khyh hae tou?8Minmin tuh e ram kya um hae zah na min hanlan beikinnthyaa kha sak hae zah,9‘Hoyleinaw, thaloi, byapianaw, shethya te ccakannaw nynh kae tungvaw oun thuanua ze, e inn malang te namaw malang kae thadyn cih, pawccecize na min tuh e inn kya um zah kaening nynh kae riathaenaw kyate namaw kalan kae sia cih, te nang nynh nae thaepah cih zah nae bawm cih,’ a ci hae.10Atu dotua, Israel hae nynh Izip ram kyate a ccia lya hae ze, tuknaw kaw na pya khyh hae zah Israel hae nynh sibiate a ro lei hae paw Ammon hae, Moab hae te Seir Mua e ccungccaw hae nynh11rho lang nae pyapaw ram kyate kaening hynh dee lan oun ccianua hae zah liaru lan oun paccynnuaku hae.12Pou kae Pachia, minmin tungvaw bya na pia lan khyh hae tou? Pawccecize kaening dou khylan oun ccianuatu hae hynh-e ccungccaw zapi patae rawse nawlan thawzung kae hoi khyh. Pawte cyi lan kae nyh khyh, namaw rou nynh kae do vae,” a ci.
13Tuh lyatuin Judah hae balyn tuh imua hae, mih zu mih ccaaw hae ryte Bawipaw malang khe a thadyn hae.14Tetuh Bawipaw muisaw tuh a pumkuh hae paw laku kya umpaw Jahaziel tungvaw kya a thua; aning tuh Zekhariah ccapaw, Zekhariah tuh Benaiah ccapaw, Benaiah tuh Jeiel ccapaw, Jeiel tuh Mattaniah ccapaw, Mattaniah tuh Levi phin, Asaf ccapaw hae ciihan nynh thua.15Jahaziel nynh, “Judah hae balyn, Jerusalem khuaccaaw hae te Siapharan Jehoshafat, ngaetua oh: Bawipaw nynh hynhte ae hopya oh: ‘E ccungccaw zapi patae hae hynh rih nan oh, nae bungzou nan sah; pawccecize rhawtuknaw tuh nanning kya-e thua khyh, Pachia kya-e nynh thua.16Awkhualan minmin kha tuk khylan ccianua bung oh; minmin tuh Ziz kaethungnaw laanpi kyate oun cceihthung cih hae; Jeruel ramkaw athonaw, accya athangnaw khe na la muih cih oh.17Pou Judah hae te Jerusalem khuaccaaw hae, e rhawtuknaw tuh nanning nynh tuk lanpaw thua khyh; nae umnaw kya phang thadyn oh lah, naemaw ccelang Bawipaw nynh ae taepya oh paw kha do oh,’ a ci. Rih nan oh lah, nae bungzou nan sah; awkhualan minmin kha ccianua oh lah, Bawipaw tuh nae kya a um cih,” a cipya hae.
18Te Jehoshafat tuh laekhu kya bakhung zah Judah hae te Jerusalem khuaccaaw hae balyn tuh Bawipaw malang bakhung hae zah Bawipaw kha a beik hae.19Levi phin Kohath hae te Korah hae tuh Bawipaw , Israel Pachia kha thehoysah khylan myarya ccae lan roisaw hae zah a thadyn hae.
20Awkhua takaw te tho hae zah Tekoa ramkaw lang a cceih hae; a ccia lya hae khe Jehoshafat nynh thadyn zah, “Pou Juda hae te Jerusalem khuaccaaw hae balyn, ka bya hynh ngaetua oh! Bawipaw nae Pachia kha zyn oh lah, tynkaring lan na thadyn kho cih oh; a profeh hae kha zyn oh lah, nae laan nae sui a ua cih,” a cipya hae.21Ccungccaw hae kha tuanaw a ngia kou hae te, rhawkaw hae malang a ccia lya hae khe,“Bawipaw kalanlungtuabya hotua oh,pawccecize atynpawa sungsahnaw tuh zungzae atyn,”cite Bawipaw kalan hlaw a sah cih hae paw te athyaapaw ccaankunaw te the a hoysah cih hae paw kha a nung hae.22Minmin nynh hlawsahnaw te thehoysahnaw kha he a tho hae tuh, Judah hae tuk khylan oun ccianua hae paw Ammon hae, Moab hae te Seir Mua e ccungccaw hae kha rawsete Bawipaw nynh buhkhawtu hae a nungnua hae keiccuze minmin tuh rhaw a shung hae.23Pawccecize Ammon hae te Moab hae nynh Seir Mua e ccungccaw hae kha tuk hae zah marya a ro hae; Seir kya um hae paw kha he a thangsah hae te, mimaw te mimaw tukkuh hae zah pong a chih hae.
24Judah hae tuh ramkaw e rhawvianaw innhangpaw kya a thua hae te, ccungccaw zapi hae kha a do hae; tuh-e hae tuh lu kheit san lue leite, laekhu kya ahuekuhpaw michi rhua lang a tang hae.25Jehoshafat te a ccungccaw hae nynh rhaw hae kya-e luadepaw uccaw kha lawku lan he a cceih hae tuh, sahiin patae, uccaw hae, boeining hae te aphutepaw uccaw hae kha muih hae zah a phu kho lei lan hae ciate a lawku hae. Luadepaw uccaw tuh myarya alung keiccuze a lawnaw hae nin thum cia a rokhaekuh hae.26Nin palinaw nin khe Berakah Accya kya pumkuh hae zah Bawipaw kha the a hoysah hae; tukeiccuze tuh-e hmin tuh atunin cia Berakah Accya a ci hae.27Tetuh Judah hae te Jerusalem khuaccaaw hae balyn tuh Jehoshafat nynh malang cciapah hae zah lungpawte Jerusalem lang a ki hae, pawccecize Bawipaw nynh mih rhaw hae kha taepah hae zah mih lungpawsah hae.28Tintang, tang-oi khuakute mungkae tu hae zah Jerusalem lang, Bawipaw inn lang a cceih hae.29Bawipaw nynh Israel rhaw hae a tuk hae cipaw kha ram takyh e peenaw hae balyn nynh a thae hae tuh, Pachia raw kha a rih hae.30A Pachia nynh teitei langte balyn daenaw a pya keiccuze Jehoshafat peenaw tuh adae. Jehoshafat Uknaw Athangnaw (1Si 22.41-50)
31Tuhcite Jehoshafat nynh Judah ram kha a uk. Jehoshafat tuh sung thum kum pangaw he acih te, ram kha uk takaw zah, Jerusalem khua kya kum kuin lae pangaw a uk. A nung min tuh Azubah cikuh zah Shilhi ccanung nynh thua.32Aning nynh a paaw Asa laanpi kha zui zah tuh-e laanpi kyate cciasei leite, Bawipaw muihnaw kya ahmepaw kha a rae.33Tuhzemah ahangpaw hmin hae kha roh khyh hae; ccungccaw hae nynh mih minpaaw hae Pachia tungvaw kya mih thinlung kha nung loh khyh hae.
34Tuhlaepaw Jehoshafat nynh rya a lawpaw kha atakaw te athangnaw cia a cyipaw balyn tuh Hanani ccapaw Jehu nynh a zeipaw Phungpaw ccauh kya zei hae zah, tuh-e tuh Israel Siapharan hae Ccauh kya a ccakhung hae.
35E koute Judah siapharan Jehoshafat tuh hoyleinaw a raetupaw Israel siapharan Ahaziah ryte ccawkunaw a rae hae.36Tarshish khua lang a cceih cih paw sanphalung hae kha a raekheih hae; Eziongeber kya sanphalung hae kha a rae hae.37Te Mareshah khua umpaw Dodavahu ccapaw Eliezer nynh Jehoshafat kha rawsete profehbya ho zah, “Ahaziah ryte na mungku oh keiccuze na rae vae hae paw kha Bawipaw nynh a roh cih,” a ci. Te sanphalung hae tuh roh hae zah Tarshish khua lang cceih kho vae khyh hae. Jehoram Uknaw (2Si 8.17-24)
1Jehoshafat tuh a minpaaw hae ryte ih hae zah David khua khe a minpaaw hae ryte a uu hae; a ccapaw Jehoram tuh amaw ccelang siapharan lang a tang.2Jehoshafat ccapaw Jehoram a uno hae tuh: Azariah, Jehiel, Zekhariah, Azariah, Mikhael te Shefatiah nynh thua hae; e hae balyn tuh Judah siapharan Jehoshafat ccapaw hae nynh thua.3Mih paaw nynh minmin kha lasung patae, sui, ngun te amee rupaw uccaw hae te Judah ram e koihpaw khua hae kha a pya hae; thuasalama peenaw kha tuh Jehoram kha a pya, pawccecize aning tuh ccatawccaw nynh thua.4Jehoram nynh a paaw bawitungkhung kya kae zah a uknaw he a tynsah te, a uno hae balyn te Israel bawi hae abang kha thaloi te a chia hae.5Jehoram tuh sung thum kum ning acih te ram kha uk takaw zah, Jerusalem kya kum tarya a uk.6Ahab ccanung kha zu lang a hoiku keiccuze Ahab ciihan nynh a la cyi hawte, Israel siapharan hae laanpi kha a zui. Bawipaw muihnaw kya hoyleinaw kha a rae.7Tuhzemah David te a ciihan hae kha maeeinn zungzae kae pya cih oh cite Bawipaw nynh byakinkuh zah David ryte a la raepaw byakinnaw keiccuze aning nynh David ciihan kha roh khyh. Edom nynh Dounaw
8Jehoram she lyakhe Edom hae nynh Judah uknaw kha rawse hae zah mimaw nynh siapharan kha a khangku hae.9Tetuh Jehoram tuh a rhawbawi hae te a marangle hae balyn ryte rhawtuk lan a cceih hae. Khuazi khe thokuh zah amaw te a marangle rhawbawi hae a koihlu hae paw Edom hae kha a tuk hae.10Tukeiccuze Edom hae nynh Judah uknaw kha atunin cia a dou hae. Tuh ccyh lyakhe, Bawipaw , a minpaaw hae Pachia kha a vua keiccuze Libnah khua nynh mah Jehoram uknaw kha a dou. Elijah Ccaw
11Tuhpiaze Judah muaram hae kyakhe ahangpaw hmin hae kha rae zah, Jerusalem khuaccaaw hae kha lungzi leinaw kalan cciakhae hae zah Judah hae kha a cciasah sei hae.12Profeh Elijah kyate Jehoram kalan ccaw yn thua zah: “Bawipaw , na paaw David Pachia nynh hynhte a ho: Nang nynh na paaw Jehoshafat laanpi te Judah siapharan Asa laanpi kha na zui khyh,13Israel siapharan hae laanpi kha na zui zah, Ahab ciihan nynh Israel kha lungzi leinaw kalan a cciakhae hawte, Judah hae te Jerusalem khuaccaaw hae kha lungzi leinaw kalan na cciakhae hae zah, namaw laeze ahoyhua hae paw na paaw ciihan hae, na uno hae kha na chia hae keiccuze,14dotua, na ccungccaw hae, na ccaaw hae, na zu hae te na hoipaw uccaw balyn tungvaw khe Bawipaw nynh myarya lepaw shethya a thuasah cih,15nang tuh myarya ccihpaw vue ccinaw na hoi cih zah, tuh-e ccinaw keiccuze na ring tuh nin kheit laeze nin kheit houhouh a pou cih, a ci,” cite a hopya.
16Bawipaw nynh Jehoram kha rawsete Ethiopia hae te a naekuh hae paw Arab hae te Filistin hae kha mih thin a riasah hae.17Minmin nynh Judah ram kha ccianua thung hae zah a thiing hae, siapharan inn kya a muih hae paw uccaw balyn te siapharan a zu a ccaaw hae kha, a ccasoipaw Jehoahaz laelan, lu kheit san a laehy lei lan a cciakhae hae. Jehoram Ccinaw te Chinaw
18E hae balyn koute Bawipaw nynh Jehoram vue kha a dan kho leipaw ccinaw khate a ccisah.19Kum ning koute tuh-e ccinaw keiccuze a ring tuh toikuh zah a pynsaw myarya ccih lante a chih. A minpaaw hae hanlan maeephupi leih a la tuapya hae hawte, a ccungccaw hae nynh amaw kha sawtuanaw pyate maeephupi tuapah khyh hae.20Jehoram tuh sung thum kum ning acih te, ram kha uk takaw zah, Jerusalem khua kya kum tarya a uk. A chi lya tuh humhung mah a ngaethah khyh. David khua kya a uu hae, thuasalama siapharan hae shawku kya uh khyh hae. Ahaziah Peenaw (2Si 8.25-29, 9.21-28)
1Jerusalem khuaccaaw hae nynh asoi huaccepaw a ccapaw Ahaziah kha amaw ccelang siapharan lang a khang hae; pawccecize Arab hae ryte ryahmin lang oun cceih hae paw rhawkaw hae nynh atawccaw huapaw a ccapaw hae balyn kha a chia vae hae. Tukeiccuze Jehoram ccapaw Ahaziah nynh Judah siapharan lang a tang vae.2Ahaziah nynh sung pali kum ning he acih te, ram kha uk takaw zah, Jerusalem kya kum kheit a uk. A nung min tuh Athaliah cikuh zah, Omri a mintanung nynh thua.3A nung tuh ahoy leipaw rae lan tuanaw a pyatu athua keiccuze Ahaziah tuh Ahab ciihan nynh a zuipaw laanpi kha a zuibua.4Ahab ciihan nynh a la cyi hawte, aning nynh Bawipaw muihnaw kya hoyleinaw kha a rae; pawccecize a paaw a chih koute Ahab innbyn hae tuh Ahaziah a ronaw lang tuanaw a pyatu hae nynh thua.5Minmin nynh tuanaw a pya hae paw kha aning nynh zui zah, Siria siapharan Hazael kha tuk khylan Israel siapharan Ahab ccapaw Jehoram ryte Ramoth-gilead lang a cceih hae. Siria hae nynh Joram kha vaemaw a muesah hae,6Siria siapharan Hazael kha a tuk lyaze, Ramah kya a muepaw vaemaw kha dansaku khylan Jezreel khua lang a ki. Jezreel khua kya umpaw Ahab ccapaw Joram tuh a cci keiccuze via khylan Judah siapharan Jehoram ccapaw Ahaziah tuh a cceihbung.
7Ahaziah nynh Joram via lan a la cciapaw tuh Pachia nynh Ahaziah a ccaw nawlan a la paccynpaw nynh thua. Pawccecize Ahaziah tuh tuin kya he a thua te, Joram ryte pou hae zah Bawipaw nynh Ahab innbyn a rohtu lang chitui a thuhpaw Nimshi, Jehu ccapaw te a tungkuh hae.8Jehu nynh Ahab innbyn kha bya he a pia tuh, Ahaziah a do-oihtu hae Judah bawi hae te Ahaziah uno hae mih ccapaw hae ryte tungkuh hae zah minmin kha a chia hae.9Ahaziah kha ccung zah Samaria kya a reku lyakhe a kyng hae, te Jehu kalan cciakhae hae zah a chia hae. Amaw kha a uu hae, pawccecize minmin nynh, “Aning tuh Bawipaw kha a thinlung balyn te a ccungpaw Jehoshafat ccapaw nynh thua,” a ci hae. Te Ahaziah innbyn kya ram a uk kho lanpaw lu kheit san um khyh. Athaliah nynh Bawitungkhung A Lawde (2Si 11.1-3)
10Ahaziah nung Athaliah nynh a ccapaw a chipaw kha he a nyh tuh, thokuh zah siapharan innbyn hae balyn kha a chia hae.11Thuasalama siapharan ccanung Jehoshabeath nynh Ahaziah ccapaw Joash kha lah zah chia athua vae cih hae paw siapharan ccapaw hae kyate zya ruh zah amaw te a do-oihtu kha inaw khaan kya a nung hae. Tuhcite Siapharan Jehoram ccanung, ranpibawi Jehoiada zu Jehoshabeath tuh Ahaziah ccianung athua keiccuze Athaliah nynh Joash kha a chia khyh nawlan zya a thuruh;12Athaliah nynh ram a uk lya, kum taruh lungkhu Joash tuh Pachia inn kya thuruh hae zah minmin ryte a um hae.
1Thuasalama kum sarinaw kum khe, Jehoiada tuh a rawthungsakuh zah, aza uktu rhawbawi hae, Jehoram ccapaw Azariah, Jehohanan ccapaw Ishmael, Obed ccapaw Azariah, Adaiah ccapaw Maaseiah te Zikhri ccapaw Elishafat ryte byakinkunaw a rae hae.2Judah ram po lekuh lan cceih hae zah Judah khua miakaw kya-e Levi phin hae te Israel innbyn hae raveih kya-e lu hae kha pum hae zah Jerusalem lang a cceih hae.3Te a pumkuh hae paw balyn nynh siapharan ryte Pachia inn kyakhe byakinnaw a rae hae. Jehoiada nynh minmin kha, “Hein kya siapharan ccapaw a um! Bawipaw nynh David ccapaw hae te asekuh lante bya a kinku vae hawte, aning nynh uk sah.4Hynhte na cyih cih oh: sabbath nin kya rya na hoi oh paw ranpibawi hae te Levi phin hae pum thum pum kheit tuh sakoih ngawtu na thua cih oh,5pum thum pum kheit tuh siapharan inn kya na um cih oh zah, pum thum pum kheit tuh Aleihpaw Sakoih kya na um cih oh; te ccungccaw balyn tuh Bawipaw inn voidu lungkhu na um cih oh.6Ranpibawi hae te ryalahpaw Levi phin hae laelan, humhung mah Bawipaw inn lungkhu lang tee nan sah; minmin tuh a thyaa hae keiccuze a tee kho cih hae, thuasalama ccangpaw ccungccaw balyn nynh Bawipaw kaw kha a ngae cih hae.7Levi phin hae tuh mih zunghe kha ccarou ccyngkute siapharan kha a koihlu cih hae; inn lungkhu lang a teepaw miakaw tuh chia athua cih. Siapharan nynh a pou a tee vae ze, amaw kya na um cih oh,” a cipya hae. Joash Siapharan lang Tangnaw (2Si 11.9-12)
8Ranpibawi Jehoiada nynh kaw a pya hae thyhte Levi phin hae te Judah hae balyn nynh marya a cyi hae; minmin lu kheit cci nynh sabbath nin kya rya a hoi cih lei hae paw mih ccungccaw hae te sabbath nin kya rya a hoi cih hae paw mih ccungccaw hae kha a cciakhae hae; pawccecize Jehoiada nynh rya a nee hae paw aphu hae kha roh khyh.9Pachia inn kya umpaw, David Siapharan kya-e ccoi hae te khawriaphua adihpaw te alepaw hae kha ranpibawi Jehoiada nynh rhawbawi hae kha a pya hae;10mih kuih kya zunghe ccarou a ccyngkuh hae paw ccungccaw hae balyn kha siapharan rhawviatu hae lang, inn alia langte inn thahlang cia, inn kya-e silawhang po voilu lan a nung hae.11Te Jehoiada nynh siapharan ccapaw kha yn poukhae zah bawilukhung khungsah zah byakinnaw ccauh kha a pya; siapharan lang khang hae zah Jehoiada te a ccapaw hae nynh chitui thuh hae zah, “Siapharan tuh a hiinshe sae vae sah!” cite a sia hae. Athaliah Chianaw
12Ccungccaw hae nynh ccue hae zah siapharan a thehoysah hae paw roi accaepaw kha Athaliah nynh he a thae tuh, Bawipaw inn lungkhu lang ccungccaw hae kalan a tee;13he a do tuh, siapharan tuh teenaw kya a tungpi pe thadyn zah, rhawbawi hae te mungkae tu hae paw tuh siapharan pe um hae zah, ram lungkhu e ccungccaw balyn tuh lungpawte mungkae tu hae zah, hlawsahthya hae paw nynh khuakupaw mih uccaw hae khate lungtuanaw poi a tua hae paw kha a muih. Athaliah nynh a boeining kha seii zah, “Dounaw nynh thua! Dounaw nynh thua!” cite a sia.14Rhawkaw hae uktu lang khang athua hae paw rhawbawi hae kha ranpibawi Jehoiada nynh poukhae hae zah minmin kyakhe, “Aning hynh rhawkaw hae laku kyate poukhae oh; amaw a zuipaw miakaw kha thaloi te theih oh,” a cipya hae. Pawccecize ranpibawi nynh, “Bawipaw inn lungkhu kya amaw kha theih nan oh,” a ci.15Tukeiccuze minmin nynh a kyng hae; te siapharan inn Marang Sakoih teenaw kya tee zah, tuin kya a chia hae.
16Jehoiada nynh minmin tuh Bawipaw ccungccaw athua nawlan hae, amaw te ccungccaw zapi hae balyn te siapharan laku kya byakinnaw kha a rae.17Te ccungccaw hae balyn tuh Baal beikinn lang cceih hae zah a ro hae; a silawhang hae, a zohtuh hae kha khaleih koi hae zah Baal ranpibawi Mattan kha silawhang hae malang khe a chia hae.18David nynh Bawipaw inn a do-oihtu lang rya a la naw hae paw Levi phin ranpibawi hae kha Jehoiada nynh Bawipaw inn a do-oihtu lang a nung hae; David nynh kaw a pya hae thyhte minmin nynh lungpawte hlawsahpaw rya kha a lah cih hae zah, Moses phungbya kya azeiku hawte, Bawipaw kalan maee-ute silawnaw kha a rae cih hae.19Thyaa leinaw hankhakheit a hoipaw miakaw nynh a tee khyh nawlan, Bawipaw inn sakoih kyakhe sakoih ngawtu hae kha a nung hae.20Rhawbawi hae, bawi hae, ccungccaw uktu hae te ram lungkhu e ccungccaw balyn kha ko hae zah, minmin nynh siapharan kha Bawipaw inn kyate cciakhae bung hae zah, siapharan inn thahlang sakoih kyate a tee hae. Minmin nynh siapharan kha bawilukhung a khungsah hae.21Tukeiccuze ram lungkhu e ccungccaw balyn tuh mih lungpaw; Athaliah kha thaloi te a theih kou hae te, khua tuh daebabi lan a um vae. Joash nynh Beikinn A Cyithui (2Si 11.21—12.21)
1Joash tuh kum sari acih te, ram kha uk takaw zah, Jerusalem khua kya kum sung pali a uk. A nung min tuh Zibiah cikuh zah Beersheba khuanung nynh thua.2Ranpibawi Jehoiada she lungkhu balyn tuh Joash nynh Bawipaw muihnaw kya ahmepaw kha a cyi.3Jehoiada nynh zu zuning hoipah zah ccapaw hae te ccanung hae kha a saah.
4Ccyh sosoh koute Joash nynh Bawipaw inn kha cyithui lan a paccynku.5Aning nynh ranpibawi hae te Levi phin hae kha pum hae zah, “Judah ram e khua hae kalan la cceih oh lah, Bawipaw inn cyithui nawlan Israel hae balyn kya-e phua kha kum kheit vae kheit la khoi oh; arangte ryalah oh,” a cipya hae. Thuasalama Levi phin hae nynh arangte ryalah khyh hae.6Tukeiccuze siapharan nynh lupi huapaw Jehoiada kha ko zah, “Byakinnaw bu hanlan Bawipaw ryalahtu Moses liate Israel ccungccaw zapi hae nynh a pya hae paw ngunto hawte, Levi phin hae nynh Judah ram te Jerusalem khuaccaaw hae kya-e phua kha a thuakhae nawlan hae pawccemou na naw khyh hae?” a cipya.7Pawccecize ccungccaw hoyleinung Athaliah ccaaw hae nynh Pachia inn kha roh hae zah Bawipaw inn kya-e hlupaw uccaw hae balyn kha Baal pachia hae elang a mang hae.
8Tuhcite siapharan nynh kawtho zah, minmin nynh thingkua ccangkheit rae hae zah Bawipaw inn e sakoih atolang khe a nung hae.9Pachia ryalahtu Moses nynh ramkaw kya Israel hae kya a la khoipaw ngunto thyhte, Bawipaw hanlan nae thuakhae cih oh cite Judah ram te Jerusalem khua kya a thaesah hae.10Cciakhaetu hae balyn te ccungccaw hae balyn tuh mih lungpaw zah mih ngunto kha ccyng hae zah thingkua abia mawlaezung a sang hae.11Levi phin hae nynh thingkua kha siapharan kuihkaw e bawi kalan a cciakhae takyh hae te, a lungkhu kya phua patae a umpaw he a muih hae ze, siapharan a ryaccinkhanpaw te ranpibawi lepaw kya-e bawi tuh leih oun cceih hae zah phua kha a lah kou hae te, thingkua kha amaw umnaw hmin kya bua a nung hae. Tuhcite nin takyh cyih hae zah phua kha patae a ccakhung hae.12Siapharan te Jehoiada nynh Bawipaw inn rya a lahtu hae kalan a pya hae, minmin nynh Bawipaw inn cyithui khylan pazan thya hae paw, lehccama hae kha a hoh hae, te Bawipaw inn cyithui khylan sivaw te sohin kya ryalah hae paw kha mah a hoh hae.13Tuhcite ryalaw lan a naw hae paw nynh rya kha lah hae zah, inn cyithuipaw rya tuh a cceihthya, te Pachia inn tuh amaw mamin lang cyihthui hae zah a tynsah hae.14A thangsah hae te, alaepaw phua tuh siapharan te Jehoiada kalan a cciakhae hae, tuh-e phua tuhte Bawipaw inn hanlan angphe hae, beiknaw lanpaw te silawnaw lanpaw angphe hae, angsaw hae, sui angphe hae te ngun angphe hae kha a rae hae. Jehoiada a she lungkhu balyn tuh Bawipaw inn kya maee-ute silawnaw kha tyty a rae hae. Joash A Lungzi Leinaw
15Jehoiada tuh taw vae zah a she dianaw thua vae zah a chih; aning tuh kum za kheit sung thum acih te a chih.16Aning tuh Israel hae kya thuasah, Pachia hanlan te a inn hanlan thuasah rya hoypaw a law keiccuze David khua kya siapharan hae kyakhe a uubua hae.
17Jehoiada a chih koute Judah ram e bawi hae tuh oun thua hae zah siapharan kha sawtuanaw a pya hae; te siapharan nynh mih bya kha a ngae.18Minmin nynh Bawipaw inn, mih minpaaw hae Pachia kha vua hae zah Asherah te zohtuh hae kha rya a lawpya hae. E mih cyiseinaw keiccuze Judah ram te Jerusalem tungvaw kya Bawipaw thinrianaw accah.19Minmin kha Bawipaw kalan kikhae khylan profeh hae kha a sawpya hae; tuh-e profeh hae nynh minmin kha rawsete ccaekia a khan hae zemah ngae khyh hae.
20Te Pachia muisaw nynh ranpibawi Jehoiada ccapaw Zekhariah kha a thuanua; aning nynh ccungccaw hae laeze ahangnaw khe thadyn zah, “Pachia nynh hynhte a ho: Nanning nynh nae laan nae sui a ua lei lan, pawccemou Bawipaw kawbya kha na zui khyh oh? Bawipaw kha na vua oh keiccuze aning nynh mah nanning kha ae vua oh,” a cipya hae.21Minmin nynh amaw kha phee hae zah, siapharan kaw te Bawipaw inn voidu lungkhu khe lung te phe chih lan a deih hae.22Zekhariah a paaw Jehoiada nynh Joash tungvaw kya thawccinaw a la hoipaw kha Siapharan Joash nynh liathui leite a ccapaw kha a chia. Zekhariah nynh a chi dyn khe, “Bawipaw nynh muih sah lah, phulah vae sah!” a ci. Joash Chinaw
23Kum athang khe Siria rhawkaw hae nynh Joash kha oun ccianua thung hae. Judah ram te Jerusalem khua thua hae zah ccungccaw zapi hae laku kya-e mih bawi hae balyn kha roh hae zah luadepaw uccaw balyn kha Damaskas siapharan kalan a ky hae.24Siria rhawkaw hae tuh milu beihtaraw te oun ccia hae zemah, Bawipaw nynh myarya lungpaw Judah rhawkaw hae kha mih kuih kalan a pya hae, pawccecize minmin nynh Bawipaw mih minpaaw hae Pachia kha a vua vae hae.25Rhaw hae nynh he a kitaw hae te, Joash tuh vaemaw myarya ccih lante a kitaw hae, ranpibawi Jehoiada ccapaw chiise kha a luasah keiccuze a ryalahtu hae nynh phee hae zah a ikhung vawlan khe a chia hae. Tuhcite chih zah David khua kya a uu hae, thuasalama siapharan hae shawku kya uh khyh hae.26Amaw a pheetu hae tuh Ammon minphuinpaw Shimeath ccapaw Zabad te Moab minphuinpaw Shimrith ccapaw Jehozabad nynh thua hae.27Joash ccapaw hae konglang te amaw rawsete hopaw bya patae te Pachia inn sakthuinaw kong kha Siapharan hae Ccauh Ccaesahnaw ccauh kya a zei hae. Te a ccapaw Amaziah nynh amaw ccelang siapharan lang a tang. Amaziah Uknaw (2Si 14.1-22)
1Amaziah tuh kum kuin lae pangaw acih te, ram kha uk takaw zah, Jerusalem khua kya kum kuin lae takua a uk. A nung min tuh Jehoaddan cikuh zah Jerusalem khuanung nynh thua.2Aning nynh Bawipaw muihnaw kya ahmepaw kha a cyi, tuhzemah ahmepaw thinlung tetuh thua khyh.3Siapharan kawhoinaw kha a kuih kya tynkaring lan he a um takaw te, a paaw, siapharan a la theihtu hae a ryalahtu hae kha a chia hae.4Thuasalama Moses phungbya ccauh kyaze, “Ccaaw hae ccelang nungpaaw hae kha chia thua lan khyh hae, nungpaaw hae ccelang ccaaw hae kha chia thua lan khyh hae; mimaw seinaw hanlan rou nynh chia athua cih hae,” cite Bawipaw nynh kaw a pya thyhte, a theihtu hae paw mih ccaaw hae kha tuh theih khyh hae. Edom hae kha Chianaw (2Si 14.7)
5Amaziah nynh Judah ccungccaw hae kha pum hae zah Judah phin te Benjamin phin hae hanlan ccungccaw athong uktu hae te aza uktu hae kha mih puizia raveih kya a nung hae. Kum kuin te palung lang kha pum hae zah ccoi te khawriaphua a ccyngkuh kho hae paw, rhaw a tuk kho vae paw popaw rhawkaw hae tuh cciing thum a um hae.6Israel ram e athungpaw rhawkaw cciing kheit kha mah ngun talent za kheit te a hoh hae.7Thuasalama Pachia ccungccapaw tuh a kalan yn thua zah, “Pou siapharan, Israel rhawkaw hae kha na kya cciasah bua nan hae, pawccecize Bawipaw tuh Israel hae—e Efraim hae balyn kya um khyh.8Na cceih zah rhawtuknaw kya na thungsaku zemah, Pachia nynh rhaw hae malang khe ae khulia cih; pawccecize Pachia tuh bawm khonaw te vua khonaw thungnaw a hoi,” a cipya.9Amaziah nynh Pachia ccungccapaw kha, “Israel rhawkaw hae kalan ka pya vae hae paw talent za kheit kong hynh pawtemou ka cyih vae cih?” a cipya. Pachia ccungccapaw nynh, “E laeze patae alung lan Bawipaw nynh nang kha ae pya kho,” cite a khung.10Efraim ram kyate amaw kalan oun thua hae paw rhawkaw hae kha mih inn lang kisah khylan Amaziah nynh a saw hae. Tukeiccuze Judah hae tungvaw myarya mih thinria zah thin-ute mih inn lang a ki hae.
11Amaziah nynh a rawthungsakuh zah a ccungccaw hae kha a cciakhae hae; Loi Accya langkhe cceih hae zah Seir ccungccaw hae thong haw kha a chia hae.12Judah hae nynh ccangpaw ccungccaw thong haw kha ahiinte kyng hae zah Sela khua e chia dung langkhe a cciakhae hae, te chia dung kyate vuabung hae zah mih balynte zoihtatyh lan pong tui hae.13Thuasalama Amaziah nynh rhawtuknaw lang amaw kya cciasah bua leite a kisah hae paw rhawkaw hae nynh Judah ram e khua hae kha Samaria kyate Beth-horon kyacia a tuk hae; tuin kya umpaw ccungccaw thong thum kha theih hae zah luadepaw uccaw patae kha a lawku hae.
14Amaziah tuh Edom hae a chianaw hae kyate he yn ki te, Seir ccungccaw hae kya-e pachia hae kha yn phukuh zah a pachia lang a nungku hae, te mynkhuhpaw upyate a beik hae.15Bawipaw tuh Amaziah tungvaw a thinria zah profeh lu kheit a sawnua, tuh-e profeh nynh, “Mih ccungccaw hae kha na kuih kyate a luesah kho lei hae paw, ccangpaw minphuin hae pachia hae kha pawccemou na beik hae?” a cipya.16Thuasalama bya a ho cciamang lyakhe siapharan nynh, “Nang hynh siapharan tuanaw a pyatu lang kae nung tou? Zya dae! Pawccemou chiaku na ry?” a cipya. Tukeiccuze profeh tuh zya a dae vae, thuasalama aning nynh, “E rya hynh na lah zah tuanaw kae pyapaw kha na ngae khyh keiccuze Pachia nynh nang kha ro lan a tuaku vae cipaw ka ny,” a cipya. Israel nynh Judah A Tae (2Si 14.8-20)
17Judah siapharan Amaziah nynh tuanaw a ngia kou hae te, Israel siapharan Jehu ccapaw Jehoahaz a ccapaw Jehoash kalan khe ccungccaw saw zah, “Yn cceih lah, lu kheit te lu kheit hawiliakute doku tua sih,” a cipya.18Israel siapharan Jehoash nynh Judah siapharan Amaziah kalan byataw zah, “Lebanon mua e hinpawbu nynh Lebanon mua e sidar thingku kalan byataw zah, ‘Na ccanung kha ka ccapaw zu lang yn pya,’ a cipya; te Lebanon e loramsaw sa kheit nynh po a ccia lyakhe, hinpawbu kha a syde.19Nang nynh, ‘Dotua, Edom ram kha ka tae vae,’ na ci zah, pookute na thinlung na hangsahku. Innvaw khe zya umkuh; namaw te Judah ram tuh khuliaku khylan pawccemou vawsawnaw kha na ccungku?” a cipya.
20Thuasalama Amaziah nynh ngae ry khyh—pawccecize minmin nynh Edom pachia hae kha a ccung hae keiccuze minmin kha rhaw hae kuih kalan pya khylan Pachia nynh a cyipaw nynh thua.21Tukeiccuze Israel siapharan Jehoash tuh cceihthung zah, Judah ram Beth-shemesh kyakhe Judah siapharan Amaziah te hawiliakute rhaw a tukkuh hae.22Israel nynh Judah kha tae zah, mih inn raveih lang pong a ccue hae.23Israel siapharan Jehoash nynh Judah siapharan Amaziah kha Beth-shemesh kyakhe a kyng; Amaziah tuh Jehoash ccapaw, Jehoash tuh Ahaziah ccapaw nynh thua; te Jerusalem lang cciakhae zah Jerusalem khualungrua kha Efraim Koikua kyate Apaki Koikua kyacia, dong za pali a ting.24Pachia inn kya a umpaw sui te ngun miakaw, angphe hae balyn kha lah zah, Obed-edom kha mah a kyng; siapharan inn kya-e sisua hae te aamahkhan ccungccaw hae kha mah a kyng hae; te Samaria khua lang a ki. Amaziah Chinaw
25Judah siapharan Joash ccapaw Amaziah tuh Israel siapharan Jehoahaz ccapaw Jehoash a chih koute kum haw lae pangaw a hiin ung.26Tuhlaepaw Amaziah nynh a cyipaw kha atakaw te athangnaw cia, Judah te Israel Siapharan hae Ccauh kya a zei hae.27Amaziah nynh Bawipaw kyate ccanglang a maeku ccyh kyate tho zah Jerusalem kya amaw pheenaw rya kha lah hae zah, Amaziah tuh Lakhish khua lang a ccue. Thuasalama Lakhish khua lang ccungccaw deehuisah hae zah, tuin kya a chia hae.28Marang tungvaw khangte kikhae hae zah, David khua khe a minpaaw hae ryte a uukheih hae. Uzziah Uknaw (2Si 14.21-22, 15.1-7)
1Judah ccungccaw hae balyn nynh kum haw lae taruh acih vae paw Uzziah kha ko hae zah, a paaw Amaziah ccelang siapharan lang a khangku hae.2Siapharan tuh a minpaaw hae ryte a ih kou hae te, Uzziah nynh Eloth khua kha raethui zah Judah ram lungkhu bua a nung.3Aning nynh kum haw lae taruh acih te ram kha uk takaw zah, Jerusalem kya sung pangaw kum ning a uk. A nung min tuh Jekoliah cikuh zah Jerusalem khuanung nynh thua.4A paaw Amaziah nynh a la cyi hawte Bawipaw muihnaw kya ahmepaw kha a cyi.5Bawipaw rawrinaw a ccangpahtu Zekhariah she lya tuh, Uzziah tuh Pachia kalan a naekuh; Bawipaw kalan a naeku lungkhu tuh Pachia nynh laansui-uanaw a pya.
6Uzziah nynh cceih zah Filistin hae kha a tuk hae, Gath khualungrua, Jabneh khualungrua te Ashdod khualungrua kha a tingbung hae; Ashdod ram lungkhu te Filistin hae laku kya hmin ccangpaw kyakhe khua hae kha a rae.7Pachia nynh Filistin hae, Gurbaal kya um hae paw Arab hae te Meunim hae kha rawsete amaw kha a bawm.8Ammon hae nynh Uzziah kha ngunto a pya hae, aning tuh myarya athungpaw lang a tang keiccuze a minthaannaw tuh Izip ram cia heize azeihkuh.9Tuhpiaze Uzziah nynh Jerusalem kya Apaki Koikua, Accya Koikua te khualungrua Akouleihnaw Sakoih kyakhe rhawvianaw innhangpaw hae kha sak zah a koih hae.10Shefelah kya te bialae khe sahiin patae a hoi keiccuze ramkaw khe rhawvianaw innhangpaw hae kha sak zah tuisung patae a thae, te loopho rya kha myarya a rypaw athua keiccuze sangpyng hae te lae ahoynaw hmin hae kyakhe loopho hae te misu khokhu do-oihtu hae kha a nung hae.11Tuhpiaze Uzziah nynh rhawkawphu, rhaw a tuk kho vae paw rhawkaw hae kha a hoi, siapharan a rhawbawi hae kya-e lu kheit athuapaw Hananiah kuihkaw a um hae paw ryaccinkhan Jeiel te rhawbawi Maaseiah nynh milu ccazing a law hae thyhte rhawkaw hae tuh aphuphute a um hae.12Puizia raveih kya-e lu hae athua hae paw athungpaw rhawkaw hae milu abalyn tuh thong ning za taruh acih hae.13Minmin kuihkaw khe, rhaw hae kha tuk khylan siapharan a bawm khopaw, rhaw a tuk khopaw myarya thungpaw rhawkaw hae cciing thum thong sari za pangaw a um hae.14Uzziah nynh rhawkaw hae balyn kha khawriaphua, ccoi, sivawlukhung, sivaw angki, li te zaenawpaw lung hae kha a pya hae.15Athyapaw ryalahtu hae nynh a rae hae paw the te lung pipi hae kawnawpaw seh hae kha mah Jerusalem khua e rhawvianaw innhangpaw hae te khualungrua apaki hae vawlan khe a nung hae. Tuhcite aning tuh athungpaw lang a tang mawlaezung ngaeangthua lan ciate a bawm hae keiccuze a minthaannaw tuh azeihkuh. Lysakunaw te Lungzi Leinaw
16Thuasalama Uzziah tuh athungpaw lang he yn tang tuh, amaw a ro nawlan yn lysakuh vae. Bawipaw a Pachia tungvaw sei zah, mynkhuhpaw unawpaw silawhang vawlan mynkhuhpaw kha u khylan Bawipaw beikinn lungkhu lang a tee.17Thuasalama ranpibawi Azariah nynh Bawipaw ranpibawi hae arawthungpaw sung tarya ryte a nulang te a zui hae;18minmin nynh Siapharan Uzziah kha kang hae zah, “Uzziah, nang nynh Bawipaw kalan mynkhuhpaw kha na u lanpaw thua khyh, mynkhuhpaw a utu lang thyaasah athua hae paw Aaron ciihan ranpibawi hae nynh mynkhuhpaw kha a u cih hae. Beikinnthyaa kyate poutua; phe na cyisei vae, e hynh nynh Bawipaw Pachia kyate sawtuanaw kha ae thuakhaepah lan khyh,” a cipya hae.19Tetuh Uzziah tuh a thinria. Mynkhuhpaw u nawlan pakephepaw kha ccyngkuh zah, ranpibawi hae tungvaw a thin he ria tuh, Bawipaw inn lungkhu, mynkhuhpaw unawpaw silawhang pe, ranpibawi hae malang khe a terui kya vaethya ccinaw a langkuh.20Ranpibawi lepaw Azariah te ranpibawi hae balyn nynh amaw kha he a do hae tuh, a terui kya vaethya ccinaw a kae. Minmin nynh arangte a poukhae hae, Bawipaw nynh de a tah vae keiccuze amaw nynh mah rangsakute a pou.21Siapharan Uzziah tuh a chih cia vaethya ccinaw a kae, vaethya ccinaw a kae keiccuze inn ccangpaw kya a um, Bawipaw inn lang teenaw kaw mue vae khyh. A ccapaw Jotham nynh siapharan inn kha do-oih zah, ram kya-e ccungccaw hae kha a uk hae.
22Tuhlaepaw Uzziah nynh rya a lawpaw kha atakaw te athangnaw cia Amoz ccapaw profeh Isaiah nynh a zei.23Uzziah tuh a minpaaw hae ryte a ih hae; minmin nynh, “Aning tuh vaethya ccinaw a kae,” a ci hae keiccuze, siapharan hae te asekuhpaw shawku kya a minpaaw hae pe khe a uu hae. A ccapaw Jotham nynh amaw ccelang siapharan lang a tang. Jotham Uknaw (2Si 15.32-38)
1Jotham tuh kum kuin lae pangaw acih te, ram kha uk takaw zah, Jerusalem khua kya kum haw lae taruh a uk. A nung min tuh Jerushah cikuh zah Zadok ccanung nynh thua.2A paaw Uzziah nynh a la cyi hawte Bawipaw muihnaw kya ahmepaw kha a cyi—Bawipaw beikinn lungkhu lang kha tuh teenua khyh. Thuasalama ccungccaw hae nynh ahoy leipaw cyisahnaw kha a rae ung hae.3Bawipaw inn e palung sakoih kha rae zah, Ofel khualungrua kha ccavyng a tynsah.4Tuhpiaze Judah muaram kyakhe khua hae kha rae zah, ramkaw khe rhawlungrua hae te rhawvianaw innhangpaw hae kha a sak hae.5Ammon hae siapharan te tukkuh hae zah a tae hae. Tuin kum khe Ammon hae nynh ngun talent za kheit, chanvuih kor thong haw, barli kor thong haw kha a pya hae. Kum ningnaw te kum thumnaw kya mah tuhzeih maminte Ammon hae nynh a pya hae.6Tuhcite Jotham nynh Bawipaw a Pachia malang khe lungzite a ccia keiccuze athungpaw ccungccaw lang a tang.7Tuhlaepaw Jotham nynh rya a lawpaw, rhaw a tukpaw balyn te a hiinzia tuh Judah te Israel Siapharan hae Ccauh kya a zei hae.8Kum kuin lae pangaw acih te, ram kha uk takaw zah, Jerusalem khua kya kum haw lae taruh a uk.9Jotham tuh a minpaaw hae ryte ih hae zah, David khua kya a uu hae; a ccapaw Ahaz nynh amaw ccelang siapharan lang a tang. Ahaz Uknaw (2Si 16.1-4)
1Ahaz tuh kum kuin acih te ram kha uk takaw zah, Jerusalem kya kum haw lae taruh a uk. A minpaaw David hawte thua leite, Bawipaw muihnaw kya ahmepaw kha rae khyh.2Israel siapharan hae laanpi kha a zui. Baal pachia hae hanlan zohtuh hae kha heize laeete a rae;3Hinnom ccapaw accya kyakhe silawnaw rae zah, Bawipaw nynh Israel hae malang te a dee hae paw minphuin hae kya-e anungsikuhpaw cyisahnaw thyhte, a ccapaw hae khate heize maee-ute silawnaw a rae.4Ahangpaw hmin hae vawlan, mua hae vawlan te hinlalyhpaw thingku kaw miakaw khe silawnaw rae zah mynkhuhpaw kha a u. Siria te Israel nynh Judah A Tae hae (2Si 16.5)
5Tukeiccuze Bawipaw a Pachia nynh Ahaz kha Siria siapharan kuih kalan a pya, aning nynh Ahaz kha tae zah a ccungccaw hae patae kha kyng hae zah Damaskas khua lang a cciakhae hae. Israel siapharan kuih kalan mah amaw kha pya thua zah, tuh-e paw nynh tae zah ccungccaw patae a chia.6Mih minpaaw hae Pachia, Bawipaw kha a vua hae keiccuze Remaliah ccapaw Pekah nynh nin kheit lungkhu Judah ram kya cciing kheit thong kuin a chia, tuh-e hae balyn tuh arawthungpaw rhawkaw hae nynh thua.7Athungpaw rhawkaw, Efraim phinpaw Zikhri nynh siapharan ccapaw Maaseiah, siapharan inn e rhawbawipaw Azrikam te kawhoinaw kya siapharan he a zuipaw Elkanah kha a chia hae. Profeh Oded
8Israel ccungccaw hae nynh mih puizia hae athua hae paw nopi hae, ccapaw hae te ccanung hae cciing ning kha kyng hae zah a cciakhae hae; mih uccaw patae kha mah luade hae zah Samaria lang a cciakhae hae.9Thuasalama Oded cikuhpaw Bawipaw profeh lu kheit a um; Samaria khua lang oun cceih hae paw rhawkaw hae kha tungku lan ccianua hae zah, “Nae minpaaw hae Pachia, Bawipaw nynh Judah tungvaw a thinria keiccuze minmin kha nae kuih kalan ae pya oh, thuasalama nanning nynh vaawlui phe phahpaw thin-unaw te minmin kha na chia vae oh.10Atu tuh nanning nynh Judah hae te Jerusalem khuaccaaw hae nopi pise hae kha nae see hae hawte uk lan na paccynku oh. Nanning tuh Bawipaw nae Pachia tungvaw seinaw na rae khyh oh tou?11Ka bya hynh thaetua oh, na kyng oh zah na cciakhae oh paw nae puizia hae kha saw oh, pawccecize Bawipaw thin-unaw myarya lepaw tuh nae tungvaw a um,” a cipya hae.12Tetuh Efraim phin kya-e bawi hae, Johanan ccapaw Azariah, Meshillemoth ccapaw Berekhiah, Shallum ccapaw Jehizkiah te Hadlai ccapaw Amasa nynh rhawtuknaw langte oun cceih hae paw kha thadyn khaw hae zah,13minmin kha, “Na kyng oh paw ccungccaw hae kha hynhlang na thuakhae lan khyh oh, pawccecize atu kae seinaw te kae cyiseinaw vawlan hin Bawipaw tungvaw cyiseinaw kha nanning nynh kae tungvaw thuakhae chih lan na paccynku oh. Kae cyiseinaw tuh myarya le vae zah Israel tungvaw thin-unaw a um vae,” a cipya hae.14Tukeiccuze rhawkaw hae nynh a kyng hae paw te a luade hae paw uccaw hae kha bawi hae te ccungccaw zapi hae malang khe a cciataw hae.15Te mih min te a ko hae paw ccungccaw hae nynh thokuh hae zah a kyng hae paw kha ko hae zah boeining leite a um hae paw balyn kha luadepaw boeining kha a lawsahku hae; boeining lawsakuh hae zah phanah a nawsaku hae, tui te looh pya hae zah chitui a thuhsaku hae; te minmin laku e mih thawzyapaw balyn kha lann ccisakuh hae zah, mih puizia hae a umnaw hae ungcci ku khua a ci hae paw Jeriko khua langkhe a cciakhae hae. Tukoute Samaria lang a ki hae. Assiria nynh Judah Bawm lan A Mya (2Si 16.7-9)
16Tuh ccyh lyakhe Ahaz Siapharan nynh Assiria siapharan kalan khe bawmnaw ngia lan ccungccaw a saw.17Pawccecize Edom hae nynh Judah ram kha bua thiing hae zah a tae hae, ccungccaw hae kha kyng hae zah a cciakhae hae.18Filistin hae nynh Judah ram e Shefelah te Negeb kya umpaw khua hae kha thiing hae zah Beth-shemesh, Aijalon, Gederoth, Soko te a khua taraw hae, Timnah te a khua taraw hae, te Gimzo te a khua taraw hae kha lah hae zah tuin kya a um hae.19Israel siapharan Ahaz keiccuze Bawipaw nynh Judah ram kha a nyaasah bung, pawccecize Judah ram kya hoyleinaw kha lungsah thung zah Bawipaw tungvaw a lungzi khyh.20Tukeiccuze Assiria siapharan Tilgath-pilneser nynh ccianua zah thawzung pya leite a tuaa a sah.21Pawccecize Ahaz nynh Bawipaw inn, siapharan inn te bawi hae inn e uccaw hae kha luade hae zah Assiria siapharan kha ngunto a pya; thuasalama aning nynh Ahaz kha bawm lae khyh. Ahaz Seinaw te A Chinaw
22E Ahaz siapharan tuh a lungriathae ccyh lyakhe mah Bawipaw tungvaw lungzinaw houh hoi khyh.23Pawccecize amaw a taetu Damaskas pachia hae kalan khe silawnaw rae zah, “Siria siapharan hae kya-e pachia hae nynh minmin kha a bawm hae keiccuze kae hynh mah yn bawmbua nawlan hae, mih kalan silawnaw ka rae cih,” a ci. Thuasalama tuh-e pachia hae tuh Ahaz te Israel hae balyn a ro nawlan hae nynh thua.24Ahaz nynh Pachia inn e angphe hae kha suelua hae zah, Pachia inn e angphe hae kha palae tui lan a koi hae. Bawipaw inn thuakaw hae kha khaw zah Jerusalem khua apaki miakaw khe silawhang hae kha a raeku.25Judah ram e khua miakaw kyakhe ccangpaw pachia hae hanlan mynkhuhpaw upya nawlan ahangpaw hmin hae kha rae zah a minpaaw hae Pachia, Bawipaw kha a thin a riasah.26Tuhlaepaw Ahaz nynh a cyipaw te a hiinzia balyn tuh atakaw te athangnaw cia Judah te Israel Siapharan hae Ccauh kya a zei hae.27Ahaz tuh a minpaaw hae ryte ih hae zah, Jerusalem khua kya a uu hae; thuasalama Israel siapharan hae kya-e shawku hae kalan cciakhae khyh hae. A ccapaw Hezekiah nynh amaw ccelang siapharan lang a tang. Hezekiah Uknaw (2Si 18.1-3)
1Hezekiah tuh kum kuin lae pangaw acih te, ram kha uk takaw zah Jerusalem kya kum kuin lae takua a uk. A nung tuh Abijah cikuh zah Zekhariah ccanung nynh thua.2A minpaaw David nynh a la cyi hawte, Bawipaw muihnaw kya ahmepaw kha a cyi. Beikinn A Thyaasah
3Ram a uknaw masaty kum, masaty sawpaw khe, Bawipaw inn thuakaw hae kha hung zah a raethui hae.4Ranpibawi hae te Levi phin hae kha cciakhae hae zah nithua lang e voidu lungkhu khe pum hae zah,5minmin kyakhe, “Levi phin hae, ka bya hynh thaetua oh! Naemaw toulou kha thyaasakuh oh lah, nae minpaaw hae Pachia, Bawipaw inn kha thyaasah oh, athyaapaw hmin kyate athupaw kha vua oh.6Pawccecize ah minpaaw hae tuh lungzinaw hoi khyh hae zah Bawipaw ah Pachia muihnaw kya hoyleinaw kha a rae vae hae; amaw kha vua hae zah mih mae kha Bawipaw umnaw kyate ccanglang hawi hae zah mih nulang a sangsah vae hae.7Beikinn tee takawnaw e thuakaw hae kha khaw hae zah maeekhua hae kha a the hae, athyaapaw hmin kya Israel Pachia kalan mynkhuhpaw kha u khyh hae zah maee-ute silawnaw mah rae khyh hae.8Tukeiccuze Bawipaw thinrianaw tuh Judah te Jerusalem tungvaw ccah zah, nae mit te na muih vae oh hawte, huapaw lang, ngaeangthuapaw lang te saryanaw roi sawnuapaw lang a rae vae hae.9Tukeiccuze e hanlan hynh ah paaw hae tuh thaloi te chih hae zah, ah ccapaw hae, ah ccanung hae te ah zu hae tuh kyng hae zah a cciakhae hae.10Atu tuh a thinrianaw myarya lepaw kha aening kyate ccanglang a maeku nawlan, Bawipaw , Israel Pachia ryte byakinnaw rae lan ka thinlung kya a um.11Ka ccapaw hae, atu tuh sawphahkute um nan vae oh, pawccecize Bawipaw nynh nanning kha amaw malang thadyn lan, amaw ryalawpya lan, a ryalahtu lang tang lan te amaw kalan mynkhuhpaw u lan ae po vae oh,” a cipya hae.
12Tetuh Levi phin hae tuh a thokuh hae, Kohath ciihan hae kyate Amasai ccapaw Mahath, Azariah ccapaw Joel; Merari ciihan hae kyate Abdi ccapaw Kish, Jehallelel ccapaw Azariah; Gershon ciihan hae kyate Zimmah ccapaw Joah, Joah ccapaw Eden;13Elizafan ciihan hae kyate Shimri te Jeuel; Asaf ciihan hae kyate Zekhariah te Mattaniah;14Heman ciihan hae kyate Jehuel te Shimei; Jeduthun ciihan hae kyate Shemaiah te Uzziel.15Mih uno hae kha pum hae zah mimaw te mimaw a thyaasaku hae, te Bawipaw bya thyhte, siapharan nynh kaw a pya hae hawte, Bawipaw inn kha thyaasah khylan a tee hae.16Ranpibawi hae tuh Bawipaw inn kha thyaasah khylan a lungkhu lang tee hae zah, Bawipaw beikinn lungkhu a muih hae paw athyaa leipaw uccaw balyn kha Bawipaw inn voidu kalan a poukhae hae; te Levi phin hae nynh lah hae zah Kidron Vaw lang a cciakhae hae.17Masaty sawpaw, nin kheit nin khe thyaasahnaw kha tho hae zah tuh-e sawpaw nin tarya nin khe Bawipaw inn tee takawnaw khaan kya a thua hae; nin tarya lungkhu Bawipaw inn kha thyaasah hae zah, masaty sawpaw nin haw lae taruh nin khe a lyn hae.18Te Hezekiah Siapharan kalan tee hae zah, “Bawipaw inn kha abalynte, maee-ute silawnawpaw silawhang te a angphe hae balyn, nungpyapaw sanlou nungnawpaw ccaboi te a angphe hae balyn kha kae thyaasah vae.19Ahaz Siapharan nynh lungzinaw hoi leite a uk lyaze a vuapaw angphe balyn kha kae paccyn zah kae thyaasah vae; dotua, Bawipaw silawhang malang a um hae,” cite a hopya hae. Beikinn kya Bua Beiknaw
20Te Hezekiah Siapharan tuh awkhua takaw te tho zah khua lungkhu e bawi hae kha pum hae zah Bawipaw inn lang a cceihthung.21Ram hanlan, beikinnthyaa hanlan te Judah hanlan seithyaanaw silawnaw kha rae nawlan tangnuapaw sa sari, tuutepaw sa sari, tuutaw sa sari te miaatepaw sa sari kha a cciakhae hae. Aaron ciihan hae ranpibawi hae kha Bawipaw silawhang vawlan silawnaw rae lan kaw a pya hae.22Tukeiccuze tangnuapaw hae kha theih hae zah ranpibawi hae nynh achii kha lah hae zah silawhang kha a thei hae; tuutepaw hae kha theih hae zah mih chii khate silawhang kha a thei hae; tuutaw hae kha mah theih hae zah mih chii khate silawhang kha a thei hae.23Te seithyaanaw silawnaw lanpaw miaatepaw hae kha siapharan te ccungccaw zapi hae kalan a cciakhae hae; mih kuih kha tuh-e hae vawlan a khang hae,24te ranpibawi hae nynh tuh-e miaatepaw hae kha theih hae zah mih chii khate Israel hae balyn hanlan seingaethyanaw rae khylan silawhang vawlan khe seishawnaw kha a rae hae.25David te a profeh Gad te profeh Nathan nynh kaw a pya hae thyhte, lanchi, tintang te tang-oi a khua hae paw Levi phin hae kha Bawipaw inn kya a nung hae, pawccecize Bawipaw kyate kawbya tuh a profeh hae kha mangte yn thua.26Levi phin hae tuh David kya-e khuakupaw uccaw hae kha ccyngkute thadyn hae zah ranpibawi hae tuh mungkae hae kha ccyngkute a thadyn hae.27Tetuh Hezekiah nynh silawhang vawlan khe maee-ute silawnaw rae lan kaw a pya hae. Maee-ute silawnaw kha he a rae takaw hae te, Bawipaw kalan hlawsahnaw kha tho hae zah mungkae tu biate, Israel siapharan David kya-e khuakupaw uccaw hae kha a khuaku bia hae.28Ccungccaw zapi balyn nynh a beik hae, hlawsahtu hae nynh hlawsah hae zah mungkae tu hae paw nynh mungkae a tu hae; e hae balyn hynh maee-ute silawnaw athang mawlaezung po a cyi hae.29Silawnaw he athang te, siapharan te a kya um hae paw balyn nynh bakhung hae zah a beik hae.30Hezekiah Siapharan te bawi hae nynh Levi phin hae kha David bya te profeh Asaf bya khate Bawipaw kalan hlawsahte thehoysah lan kaw a pya hae. Lungpawte thehoysahnaw hlaw kha sah biate bakhung hae zah a beik hae.
31Te Hezekiah nynh, “Bawipaw kalan nanning nynh atu na thyaasaku vae oh; rang oh lah, silawnawpaw hae te lungtuanaw silawnawpaw hae kha Bawipaw inn lang oun thuakhae oh,” a cipya hae. Ccungccaw zapi hae nynh silawnawpaw hae te lungtuanaw silawnawpaw hae kha a thuakhae hae; mih lungthopaw balyn nynh maee-ute silawnawpaw kha a thuakhae hae.32Ccungccaw zapi hae nynh a thuakhae hae paw maee-ute silawnawpaw hae tuh tangnuapaw sung sari, tuutepaw za kheit te tuutaw za ning nynh thua; e hae balyn tuh Bawipaw kalan maee-ute silawnaw lanpaw nynh thua.33Thyaasahpaw silawnawpaw hae tuh tangnuapaw za taruh te tuu thong thum nynh thua.34Thuasalama ranpibawi hae tuh eih azya hae keiccuze maee-ute silawnawpaw balyn kha aphua lae kou khyh hae, tukeiccuze ccangpaw ranpibawi hae nynh a thyaasaku mawlaezung hae, mih uno Levi phin hae nynh rya athang makhia a bawm hae—pawccecize Levi phin hae tuh mimaw te mimaw thyaasahkunaw kya ranpibawi hae laeze mih thinlung adinghua.35Maee-ute silawnawpaw hae patae apiaze ccawkunaw silawnaw hanlan atho te maee-ute silawnaw hanlan niapaw silawnaw hae kha a um hae. Tuhcite Bawipaw inn e ryalawnaw kha a umsah thui hae.36Te Pachia nynh ccungccaw hae hanlan a cyipya hae keiccuze Hezekiah te ccungccaw balyn tuh mih lungpaw; pawccecize tuh-e ryalaw tuh arangte acyihkuh. Myarya Lepaw Kawtaw Poi
1Bawipaw , Israel Pachia hanlan kawtaw poi tua khylan Jerusalem umpaw Bawipaw inn kalan oun ccia ccaw hae cite Hezekiah nynh Israel ram te Judah ram kalan ccungccaw saw hae zah Efraim phin te Manasseh phin hae kalan mah ccaw a ky hae.2Pawccecize siapharan te a kuihkaw e bawi hae te Jerusalem kya a pumkuh hae paw balyn nynh kawtaw poi tuh sawpaw sah ningnaw kya tua lante bya a pae vae hae,3(pawccecize ranpibawi hae tuh milu phe zaw lan thyaasakuh loh khyh hae zah ccungccaw hae mah Jerusalem kya a pumku loh khyh hae keiccuze tuh-e poi tuh amaw accyh kya tua kho khyh hae).4Siapharan te a pumkuh hae paw balyn nynh tuh-e khuakhannaw tuh akyh cite a tua hae.5Tukeiccuze Israel ram pynpi, Beersheba kyate Dan kyacia um hae paw ccungccaw hae tuh Bawipaw , Israel Pachia kalan Jerusalem kya thuate kawtaw poi tua khylan thaesah lan kaw a tho hae; pawccecize phungbya kya azeiku thyhte ccungccaw patae te poi tua khyh hae.6Tukeiccuze ccaw phutu hae tuh siapharan te a kuihkaw e a bawi hae kya-e ccaw kha phute Israel te Judah ram pynpi kalan khe siapharan nynh kaw a pya hae thyhte a cceih hae, tuh-e ccaw kyatuin, “Pou Israel ccungccaw hae, Abraham, Isak te Israel Pachia, Bawipaw kalan kithui oh lah, Assiria siapharan hae kuih kyate a lue hae paw nanning a laehy hae paw kalan khe aning tuh bua yn maekuh cih.7Nae minpaaw hae Bawipaw Pachia tungvaw lungzinaw hoi lei hae paw nae minpaaw hae te nae puizia hae te lokuh nan oh, na muih oh hawte aning nynh minmin kha thawte de a tah hae.8Nae minpaaw hae hawte nae lungkhung nan sah, Bawipaw kalan pyakuh oh, zungzae a thyaasahpaw a beikinnthyaa kalan oun cceih oh, te myarya lepaw a thinrianaw tuh nae kyate a maeku nawlan, Bawipaw nae Pachia rya kha lah oh.9Pawccecize Bawipaw kalan na kithui oh zetuh nae puizia hae te nae ccaaw hae tuh a kyngtu hae kya ngaethyaumsahnaw a mue cih hae zah, e ram lang oun ki cih hae. Pawccecize Bawipaw nae Pachia tuh ngaethyaumsah thyapaw te thawccih thyapaw thua zah, amaw kalan na kithui oh ze a mae kha ccanglang ae hawitaw lan khyh oh,” a ci.
10Tukeiccuze ccaw phutu hae tuh Efraim te Manasseh ram po lekuh lan Zebulun ram cia khua kheit koute khua kheit a cceih hae; thuasalama minmin nynh nuinse hae zah a sarya hae.11Asher phin, Manasseh phin te Zebulun phin kya-e ccungccaw beihtaraw kyalya nynh zakawsangsakuh hae zah Jerusalem lang a cceih hae.12Bawipaw bya thyhte siapharan te a kuihkaw e bawi hae nynh kaw a pya hae paw kha cyi khylan lungngingnaw thinlung pya khylan Judah hae kya Pachia thungnaw a um.
13Sawpaw sah ningnaw khe ransi phingkuh leipaw sanlou poi kha tua khylan ccungccaw patae tuh Jerusalem kya oun thua hae zah, a pumkuh hae paw tuh myarya alung hae.14Minmin nynh rya kha tho hae zah Jerusalem kya a umpaw silawhang hae kha a nue hae, mynkhuhpaw unawpaw silawhang balyn kha lah hae zah Kidron Vaw kalan a vua hae.15Sawpaw sah ningnaw nin haw lae pali nin khe kawtaw poi tuutaw kha a chia hae. Ranpibawi hae te Levi phin hae tuh mih maethah zah mimaw toulou kha thyaasakuh hae zah maee-ute silawnaw kha Bawipaw inn lungkhu lang a teekhae hae.16Pachia ccungccapaw Moses kawbya thyhte minmin nynh mih ummaenaw hmin kya a um hae; ranpibawi hae nynh Levi phin hae kuih kya-e a lawku hae paw chiise kha a hei hae.17Pawccecize a pumkuh hae paw kyakhe a thyaasakuh lei hae paw patae a um hae; tukeiccuze a thyaa leipaw miakaw kha Bawipaw hanlan thyaasah nawlan kawtaw poi tuutaw kha Levi phin hae nynh a chia hae.18Pawccecize Efraim phin, Manasseh phin, Issakhar phin te Zebulun phin kya-e ccungccaw patae tuh phungbya kya azeiku thyhte mimaw kha thyaasaku leite kawtaw poi kya a aebua hae. Thuasalama Hezekiah nynh minmin hanlan sawsang zah,19“Pachia, Bawipaw mih minpaaw hae Pachia kha mih thinlung ccaccing te ccung lan a paccynkuh hae paw tuh beikinnthyaa kya-e thyaasahkunaw phung thyhte a thyaa khyh hae zemah ahoypaw Bawipaw nynh mih balynte ngaethya vae hae sah,” a ci.20Bawipaw nynh Hezekiah kha thaepah zah ccungccaw hae kha a dansah hae.21Jerusalem kya um hae paw Israel hae nynh ransi phing leipaw sanlou poi kha nin sari lungkhu myarya lungpawte a tua hae; Levi phin hae te ranpibawi hae nynh Bawipaw hanlan khuakupaw accaepaw uccaw hae kha khuakute Bawipaw kha nin takyh the a hoysah hae.22Bawipaw ryalawnaw kya mih thyanaw ahoypaw a langsah hae paw Levi phin hae balyn kha Hezekiah nynh thawpyanaw bya a hopya hae. Tuhcite ccungccaw hae nynh poi kya-e looh kha nin sari lungkhu ae hae zah, Bawipaw mih minpaaw hae Pachia kalan khe ccawkunaw silawnaw kha raete the a hoysah hae.
23Te a pumkuh hae paw balyn nynh poi kha nin sari bua tuachih lan mih nawccaw; tukeiccuze lungtuanaw te nin sari poi a tua ung hae.24Pawccecize Judah siapharan Hezekiah nynh tangnuapaw thong kheit te tuu thong sari kha silawnaw rae nawlan a pya hae, te bawi hae nynh a pumkuh hae paw kha tangnuapaw thong kheit te tuu thong haw a pya hae. Ranpibawi hae patae nynh mimaw te mimaw kha a thyaasaku hae.25Ranpibawi hae te Levi phin hae ryte Judah hae a pumkuh hae paw balyn, te Israel ram kyate oun thua hae paw a pumkuh hae paw balyn, Israel ram kyate oun thua hae paw ramccang hae, Judah ram kya um hae paw ramccang hae balyn tuh mih lungpaw.26Israel siapharan David ccapaw Solomon she koute Jerusalem kya hynhcihawpaw a um vae khyh keiccuze Jerusalem kya myarya lepaw lungpawnaw a um.27Te ranpibawi hae te Levi phin hae nynh thadyn hae zah ccungccaw hae kha hythuanaw pya hae zah mih roi thae athua; mih sawsangnaw tuh vaawlang khua e a umnaw hmin thyaapaw kya a thua. Zohtuh hae Ronaw
1E hae balyn he athang te, tuin kya um hae paw Israel hae balyn tuh Judah ram e khua hae kalan cceih hae zah zohtuh hae kha roh hae zah Asherah khozinung hae kha a nge hae, te Judah ram, Benjamin ram, Efraim ram te Manasseh ram balyn kya umpaw ahangpaw hmin hae te silawhang hae kha marya a ro mawlaezung hae a nge hae. Te Israel ccungccaw hae balyn tuh mimaw khua lang, mih inn mih loo raveih lang a ki hae.
2Hezekiah nynh ranpibawi hae te Levi phin hae kha aphuphute a phia hae, ranpibawi hae te Levi phin hae kha mimaw rya raveih thyhte maee-ute silawnaw te ccawkunaw silawnaw hanlan, Bawipaw ryahmin sakoih kya ryalaw lan te lungtuanaw byahote thehoysah khylan rya a khang hae.3Siapharan nynh maee-ute silawnaw hanlan amaw a uccaw kya-e a hlupaw tuh: Bawipaw phungbya kya azeiku thyhte, awkhua takyhte zete takyh kya raepaw maee-ute silawnaw, sabbath nin hae, sawpaw thawpaw hae te accyh khyapaw poi hae kya maee-ute silawnawpaw hae kha nynh thua.4Ranpibawi hae te Levi phin hae nynh Bawipaw phungbya kyakhe a pyaku kho nawlan hae, mih hanpaw ahlu kha na pya cih oh cite siapharan nynh Jerusalem khua um hae paw kha kaw a pya hae.5Tuh-e bya tuh he a thae takaw hae te, Israel ccungccaw hae nynh ccathae, misutui, chitui, khoitui te looh kyate apoupaw miakaw kya-e thaety patae kha a pya hae; atyn-are kya-e pumhaw pumkheit kha patae a ccyng hae.6Judah ram e khua hae kya um hae paw Israel hae te Judah hae nynh vaetua te tuu kya-e pumhaw pumkheit kha thuasah, Bawipaw mih Pachia kalan a hlu hae paw athyaapaw uccaw hae kya-e pumhaw pumkheit kha thuasah oun thuakhae hae zah aphuphute a pum hae.7Sawpaw sah thumnaw khe pum takaw hae zah sawpaw sah sarinaw khe a thangsah hae.8Hezekiah te a kuihkaw e bawi hae nynh oun thua hae zah tuh-e a pum hae paw kha a muih hae tuh, Bawipaw te a ccungccaw Israel hae kha the a hoysah hae.9Hezekiah nynh ranpibawi hae te Levi phin hae kha tuh-e apumkuhpaw kong tuh a khia hae.10Zadok ciihan athuapaw ranpibawi lepaw Azariah nynh amaw kha, “Bawipaw inn lungkhu lang ahlu he a thuakhae takaw hae te, kaening tuh ae lanpaw phe zaw lan kae hoi zah alaepaw patae kae hoi ung; pawccecize Bawipaw nynh a ccungccaw hae kha hythua a pya hae keiccuze alaepaw patae kae hoi,” cite a hopya.
11Tetuh Hezekiah nynh minmin kha Bawipaw inn lungkhu kya sisuakhaan hae kha paccyn lan kawpya hae zah minmin nynh a paccyn hae.12Minmin nynh ahlu, pumhaw pumkheit te hlupaw uccaw hae kha lungzite a teekhae hae. Tuh-e hae a do-oihtu bawi lepaw tuh Levi phin Konaniah thua zah a neitaw Shimei tuh lu ningnaw nynh thua;13Hezekiah Siapharan te Pachia inn uktu bawi lepaw Azariah nynh rya a pya hae thyhte Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath te Benaiah tuh Konaniah te a neitaw Shimei kha rya bawmte a do-oihtu hae nynh thua.14Levi phin Imnah ccapaw Kore, nithua lang e sakoih ngawtu tuh Pachia kalan lungthote silawnawpaw lasung kha a do-oihtu thua zah, aning tuh Bawipaw hanlan hlupaw ahlu te athyaa huaccepaw ahlu hae kha a neetu nynh thua.15Ranpibawi hae kya-e khua hae kyakhe mih puizia hae kha imua piccan phe lokuh lante aphuphute mih hanpaw raveih kha nee khylan Eden, Miniamin, Jeshua, Shemaiah, Amariah te Shekaniah nynh Kore kha lungzite rya a bawm hae;16mih thokeinaw ccazing thyhte kum thum te palung lang pise hae, mih ryalaw thyhte mih phu raveihte nin takyh a law hae paw ryalaw thyhte Bawipaw inn lungkhu lang a teepaw miakaw kha tuh neebua khyh hae.17Ranpibawi hae mih min ccazing tuh mih puizia raveihte a law hae; Levi phin kum kuin te palung lang kha tuh mih ryalaw te mih phu raveih thyhte min ccazing a law hae.18Ranpibawi hae kha mih ccaaw taraw hae balyn ryte, mih zu hae, mih ccapaw hae, mih ccanung hae, mih balyn mawte min ccazing law athua hae; pawccecize minmin tuh lungzite mimaw te mimaw kha a thyaasaku hae.19Te Aaron ciihan ranpibawi hae kya-e khua hae te mih loram hae kya a um hae paw kyakhe mih hanpaw a neetu lang mih min te ryalaw khang athua hae paw ccungccaw hae um hae zah, tuh-e hae nynh ranpibawi hae laku e pise miakaw te min ccazing law athuapaw Levi phin miakaw kha a nee hae.
20Hezekiah nynh Judah ram balyn kya tuhcite a cyi; Bawipaw a Pachia malang khe ahoypaw, ahmepaw te lungzipaw rya kha a law.21A Pachia kha ccung khylan Pachia inn e rya kya thuasah, phungbya te kawbya hae zuinaw kya thuasah rya a lawpaw miakaw kha a thinlung balyn te lah zah, a laan a sui a ua. Sennakherib nynh A Tuk hae (2Si 18.13-37, 19.14-19, 35-37; Isa 36.1-22, 37.8-38)
1E hae balyn hynh Hezekiah nynh lungzinaw te rya a lah koute Assiria siapharan Sennakherib nynh Judah ram kha tuk lan a ccianua, akoihkuhpaw khua hae kha ryahmin tahnuakuh hae zah ka tae cih hae cite a tuaku.2Sennakherib tuh yn cceih zah Jerusalem kha tuk lan a paccynku cipaw Hezekiah nynh he a muih tuh,3khua atolang umpaw tuidy hae aluapaw kha pheih lan cite a kuihkaw e bawi hae te rhawkaw hae ryte a paccyn hae; minmin nynh amaw kha a bawm hae.4Ccungccaw patae kha pum hae zah ram lungkhu po aluapaw tuidy hae te vaw taraw hae kha pheih hae zah, “Pawccemou Assiria siapharan hae nynh oun cceih cih hae zah tui patae kha a muihkuh cih hae?” a ci hae.5Hezekiah nynh ryalaw lan tynkaring lan tuakuh zah khualungrua atingpaw balyn kha raethui zah a vawlan khe rhawvianaw innhangpaw hae kha a sak, atolang khe ccangpaw khualungrua kha a rae; David khua khe Millo kha sihkakin lan a rae, te zunghe hae te khawriaphua hae kha patae a rae.6Ccungccaw hae kyakhe rhawtuknaw te asekuhpaw rhawbawi hae kha khang hae zah, khua koikua kya umpaw laanluepi kyakhe amaw kalan a pum hae. Te thawzung pyanaw bya hopah hae zah,7“Nae thawsaesakuh oh lah, nae rawthungsakuh oh. Assiria siapharan te a kya umpaw zapi hae balyn kha rih nan oh, nae bungzou nan sah; pawccecize aning kalan a pankhaepaw laeze aening kalan oun pankhaepaw tuh a thawsaehua.8Aning kya a umpaw tuh ccungccaw thungnaw nynh thua; thuasalama aening kya tuh aening bawm khylan te rhaw tukpya khylan Bawipaw ah Pachia a um,” a cipya hae. Judah siapharan Hezekiah bya liate ccungccaw hae tuh thawzung a mue hae.
9E koute, Assiria siapharan Sennakherib te a rhawkaw hae balyn tuh Lakhish khua kya a um lya hae khe, Jerusalem kya umpaw Judah siapharan Hezekiah te Judah hae balyn kalan khe aning nynh a ryalahtu hae kha saw hae zah,10“Assiria siapharan Sennakherib nynh hynhte a ho: Jerusalem khua lungkhu kya koihluku khylan nanning nynh pawmou na doliaku oh?11Hezekiah nynh, ‘Bawipaw kae Pachia nynh Assiria siapharan kuih kyate oun khum cih,’ cite ae hopah oh zah, nanning kha ccakannaw, tui kanmawnaw te chinaw kalan pyate ae cciakhaesei khyh oh tou?12Ahangpaw a hmin hae te a silawhang hae kha vua hae zah, Judah te Jerusalem kha, ‘Silawhang ccangkheit malang khe na beik cih oh zah, tuh-e vawlan khe nae kya-e mynkhuhpaw kha na u cih oh,’ cite kaw ae pya oh zah ae hopah oh paw tuh khah-e Hezekiah maw kha thua khyh tou?13Kae te ka minpaaw hae nynh ccangpaw ram hae kya-e ccungccaw hae balyn kha pawtemou kae cyi hae cipaw na nyh khyh oh tou? Ccangpaw ram hae kya um hae paw minphuin hae kya-e pachia hae nynh mih ram kha ka kuih kyate a khum kho hae tou?14Ka minpaaw hae nynh marya a ro hae paw ram hae kya-e pachia hae balyn kyaze a ccungccaw hae kha ka kuih kyate a khum kho hae paw pachia a um tou? Nae Pachia nynh nanning kha ka kuih kyate pawtemou ae khum kho cih oh?15Tukeiccuze Hezekiah kha lingsakuh nan oh lah, tuhcite cciakhae seisakuh nan oh, aning kha zyn nan oh, pawccecize pawpaw minphuin pachia thuasah, pawpaw ram pachia thuasah a ccungccaw hae kha ka minpaaw hae kuih kyate thuasah, kamaw kuih kyate thuasah khum kho khyh hae. Nanning Pachia thathy nynh tuh pawtemou ka kuih kyate ae khum kho cih oh!” cite bya a taw hae.
16A ryalahtu hae nynh Bawipaw PACHIA te a ryalahtu Hezekiah kha rawsete bya houh a ho hae.17Aning nynh Bawipaw , Israel Pachia tungvaw rawsenaw byahote theihryanaw ccaw kha mah zei zah, “Ccangpaw ram hae kya um hae paw minphuin hae kya-e pachia hae nynh mih ccungccaw hae kha ka kuih kyate a luesah khyh hae hawte, Hezekiah Pachia nynh a ccungccaw hae kha ka kuih kyate luesah lan khyh hae,” a ci.18Khualungrua vawlan um hae paw Jerusalem khua e ccungccaw hae kha hurawte mih thinphangsah te khua kha law khylan, Judah bya te tuh-e tuh myarya ccae lan a siakhae hae.19Laephi vawlan e ccangpaw minphuin hae kya-e, ccungccaw kuih te raepaw pachia hae hawkhate Jerusalem Pachia kong kha a ho hae. Sennakherib Shungnaw te Chinaw
20E kong keiccuze Hezekiah Siapharan te Amoz ccapaw profeh Isaiah tuh sawsang hae zah vaawlang khe a sia hae.21Te Bawipaw nynh vaawpaw lu kheit kha saw zah, tuh-e paw nynh Assiria siapharan ryahmin kya um hae paw athungpaw rhawkaw hae, rhawbawi hae te bawi hae balyn kha a chia hae. Tukeiccuze maethyate amaw ram lang a ki. A pachia inn lungkhu lang he a tee tuh, amaw a ccapaw hae abang nynh amaw kha thaloi te a chia hae.22Tuhcite Bawipaw nynh Hezekiah te Jerusalem khuaccaaw hae kha Assiria siapharan Sennakherib kuih kyate thuasah, a rhawkaw hae balyn kuih kyate thuasah khum hae zah, pawpaw kya balyn daenaw a pya hae.23Ccungccaw patae nynh Jerusalem khua langkhe Bawipaw hanlan lasung ccyngpah hae zah Judah siapharan Hezekiah hanlan aphutepaw uccaw hae kha a ccyngpya hae, tuin ccyh kyate tho zah Hezekiah tuh minphuin hae balyn malang khe hangthung athua. Hezekiah Ccinaw (2Si 20.1-3, 12-19; Isa 38.1-3, 39.1-8)
24Tuh lyatuin Hezekiah tuh ccih zah vyavya a chih. Aning nynh Bawipaw kalan sawsang zah, Bawipaw nynh aphi pya zah syntawnaw a pya.25Thuasalama Hezekiah tuh a thinlung kya a lysaku keiccuze a tungvaw thanenaw a raepya thyhte a lungtuanaw langsakuh khyh. Tukeiccuze amaw tungvaw te Judah te Jerusalem tungvaw kya thinrianaw accah.26Thuasalama Hezekiah nynh a thinlung kya a lysakupaw konglang te, amaw te Jerusalem khuaccaaw hae nynh zakaw a sangsaku hae keiccuze Bawipaw thinrianaw tuh minmin tungvaw kya Hezekiah she lungkhu ccah khyh. Hezekiah Hoirumnaw te Phu-enaw (2Si 20.12-19; Isa 39.1-8)
27Hezekiah tuh myarya hoirum zah phu-enaw a ccou; sui, ngun, aphutepaw lung hae, mynkhuhpaw hae, khawriaphua hae te amee rupaw sisua phuinccing nung nawlan sisuakhaan hae kha a raeku;28looh, misutui te chitui nung nawlan ccung-inn hae kha a sak; sahiin phuinccing nung nawlan sahiinkhia hae te tuukhia hae kha a sak.29Tuhawte amaw hanlan khua hae kha raekuh zah tuuphu hae te vaetua phu hae kha patae a hoi; pawccecize Pachia nynh hoirumnaw patae a pya.30Hezekiah amaw ccaccei nynh Gihon tui tuh palung lang apounaw kha ping zah David khua niccaw langkhe a luasah bung. Hezekiah tuh a ryalaw miakaw kya a laan a sui a ua.31Tukeiccuze ram lungkhu kya cyihkuh zah ngaeangthua lan umpaw uccaw kong kha byakhiatua khylan Babilon bawi hae nynh locceihtu hae oun saw hae paw kong kya mah, Hezekiah kha syntawtua khylan te a thinlung kya umpaw balyn kha ny khylan Pachia nynh Hezekiah kha a sawbia. Hezekiah Chinaw (2Si 20.20-21)
32Tuhlaepaw Hezekiah nynh a cyipaw te hoynaw a raepaw kha tuh Judah te Israel Siapharan hae Ccauh lungkhu, Amoz ccapaw profeh Isaiah nynh a muihpaw vizin kyakhe a zei hae.33Hezekiah tuh a minpaaw hae ryte ih hae zah, David ciihan hae shawku palung langkhe a uu hae; he a chih tuh, Judah hae te Jerusalem khuaccaaw hae balyn nynh sawtuanaw a pya hae. A ccapaw Manasseh nynh amaw ccelang siapharan lang a tang. Manasseh nynh Judah A Uk (2Si 21.1-9)
1Manasseh tuh kum haw lae ning acih te ram kha uk takaw zah, Jerusalem khua kya sung pangaw kum pangaw a uk.2Bawipaw nynh Israel ccungccaw hae malang te a dee hae paw minphuin hae nynh a cyi hae paw anungsikuhpaw phunglang kha zuite, aning nynh Bawipaw muihnaw kya hoyleinaw kha a rae.3A paaw Hezekiah nynh a la ropaw ahangpaw hmin hae kha a raethui; Baal elang silawhang hae kha raepah zah Asherah kha mah a rae, vaawlui kya umpaw uccaw hae balyn kha beik zah rya a lawpya hae.4Bawipaw nynh, “Jerusalem khua kya ka min tuh zungzae a um cih,” cite a la ci nuathepaw Bawipaw inn kyakhe ccangpaw pachia hae kya-e silawhang hae kha a rae.5Bawipaw inn voidu ccangning kyakhe vaawlui kya umpaw uccaw hae balyn hanlan silawhang hae kha a rae.6Hinnom ccapaw accya kyakhe a ccapaw kha silaw nawlan maee te a u; beidinhonaw, kuihdokunaw te naawthyanaw kha mang zah, chihiinleihthya hae paw te mitleihthya hae paw kha mah a mang hae. Bawipaw muihnaw kya hoyleinaw patae kha rae zah a thin a riasah.7Pachia nynh David te a ccapaw Solomon kyakhe, “Israel phin hae balyn kyate ka popaw Jerusalem khua kya te hynh-e inn kyahin ka min kha zungzae ka tynsah cih; kaw ka pya hae paw balyn, Moses kyate ka pya hae paw phungbya, phunglang hae te phungzae hae balyn thyhte minmin nynh cyi lan a raeringku hae zetuh, mih minpaaw hae ka pya hae paw ram kyate mih ccu kha ccanglang ka cciasah sei vae lan khyh,” cite a hopyanaw hae Pachia inn lungkhu khe amaw nynh karynte azuh soi zah a raepaw zohtuh kha a nung.9Manasseh nynh Judah hae te Jerusalem khuaccaaw hae kha a cciakhaesei hae keiccuze Israel ccungccaw hae malang te Bawipaw nynh a ro hae paw minphuin hae nynh a la cyi hae paw laeze hoyleinaw kha houh lung lan a rae hae. Manasseh A Ngaesikuh
10Bawipaw nynh Manasseh te a ccungccaw hae kha a hopya hae zemah minmin nynh pawlangria khyh hae.11Tukeiccuze Bawipaw nynh Assiria siapharan a rhawbawi hae kha mih kalan ccianua sah hae zah, minmin nynh Manasseh tuh kyng hae zah sivawrui te a khii hae, te Babilon lang a cciakhae hae.12Riathaenaw a teing lyakhe Bawipaw a Pachia kalan thawccinaw kha ngiakuh zah, a minpaaw hae Pachia malang khe myaryamaw zakaw a sangsakuh.13Amaw kalan sawsang zah, Pachia nynh a ngiapaw kha ccoupah zah a sawsangnaw kha a thaepya, te amaw ram lang Jerusalem langkhe bua a kikhae. Tetuh Manasseh nynh Bawipaw tuh Pachia ccaccing nynh thua cipaw a ny.
14Tukoute David khua atolang, Gihon niccaw lang e accya kyakhe, Ngasaw Koikua teenaw kyacia khualungrua kha a rae; te tuh-e lungrua tuh Ofel kha po voilu lan rae zah myarya hangpaw lang a rae. Judah ram e akoihkuhpaw khua balyn kyakhe rhawbawi hae kha a nung hae.15Ramccang pachia hae te zohtuh hae kha Bawipaw inn kyate ccaring lah hae zah, Bawipaw inn a umnaw mua vawlan te Jerusalem lungkhu a raepaw silawhang balyn kha khua atolang khe a vua hae.16Bawipaw silawhang kha mah bua nungthui zah a vawlan khe ccawkunaw silawnaw te lungtuanaw silawnaw hae kha a rae; Bawipaw , Israel Pachia rya kha na lah cih oh cite Judah hae kha kaw a pya hae.17Ccungccaw hae nynh ahangpaw hmin hae kyakhe silawnaw a rae ung hae zemah Bawipaw mih Pachia kalan rou nynh silawnaw a rae vae hae. Manasseh Chinaw (2Si 21.17-18)
18Tuhlaepaw Manasseh nynh rya a lawpaw, Pachia kalan saw a sangpaw te Bawipaw , Israel Pachia min te profeh hae nynh amaw kalan a hopya hae paw bya hae tuh Israel Siapharan hae Phungpaw kya a um.19A sawsangnaw, a ngiapaw kha Pachia nynh a ccoupyanaw, zakaw a sangsaku maw lyaze a seinaw balyn te a lungzi leinaw, ahangpaw hmin hae kha rae zah Asherah te zohtuh hae a nungnaw hmin hae kong kha tuh profeh hae phungpaw ccauh kya a zei hae.20Manasseh tuh a minpaaw hae ryte ih hae zah amaw inn khe a uu hae. A ccapaw Amon nynh amaw ccelang siapharan lang a tang. Amon Uknaw te Chinaw (2Si 21.19-26)
21Amon tuh kum kuin lae ning acih te ram kha uk takaw zah, Jerusalem khua kya kum ning a uk.22A paaw Manasseh nynh a la rae hawte Bawipaw muihnaw kya hoyleinaw kha a rae. A paaw Manasseh nynh a la raepaw zohtuh hae balyn kalan khe Amon nynh silaw zah rya a lawpya hae.23A paaw Manasseh nynh zakaw a sangsaku hawte, aning nynh Bawipaw malang zakawsangsaku leite, e Amon nynh seinaw kha houhouh a rae.24A ryalahtu hae nynh amaw kha phee hae zah a inn kya a chia hae.25Thuasalama ramccungccaw hae nynh Siapharan Amon a pheetu hae balyn kha a chia hae; te ramccungccaw hae nynh a ccapaw Josiah kha amaw ccelang siapharan lang a khang hae. Josiah Uknaw (2Si 22.1-2)
1Josiah tuh kum tarya acih te ram kha uk takaw zah Jerusalem khua kya sung thum kum kheit a uk.2Bawipaw muihnaw kya ahmepaw kha cyih zah a minpaaw David laanpi kha a zui, voilang ranglang maekuh khyh.3Pawccecize ram a uknaw kum taryanaw kum, ccangvae taraw athua lyakhe, a minpaaw David Pachia kha a ccung takaw; kum haw lae ning kum khe Judah te Jerusalem kya umpaw ahangpaw hmin hae, Asherim, karouhpaw zohtuh te laeepaw zohtuh hae kha a vua takaw.4Baal silawhang hae kha a malang khe a ting hae; tuh-e vawlan a thadynpaw mynkhuhpaw unawpaw silawhang hae kha a ro hae. Asherim, karouhpaw zohtuh te laeepaw zohtuh hae kha bae zah zoihtatyh lan a koi koute tuh-e hae kalan silawnaw a la raetu hae shawku vawlan khe a hei.5Ranpibawi hae ru kha mah mih silawhang hae vawlan khe maee te u zah, Judah te Jerusalem kha a thyaasah.6Manasseh ram, Efraim ram, Simeon ram te Naftali ram kyacia a umpaw khua hae te mih pepan e arohpaw khua hae kyakhe tuhmaminte a cyi,7Israel ram balyn kyakhe silawhang hae kha ting hae zah Asherim te zohtuh hae kha zoihtatyh lan a koi hae, te mynkhuhpaw unawpaw silawhang balyn kha a ro. Tukoute Jerusalem lang a ki. Phungbya Ccauh Muihnaw (2Si 22.3-20)
8Ram a uknaw kum haw lae taryanaw kum khe ram te beikinn kha a thyaasah koute, Azaliah ccapaw Shafan, khua uktu Maaseiah te Joahaz ccapaw ccazing kyngtu Joah kha Bawipaw a Pachia inn raethui lan a saw hae.9Minmin nynh ranpibawi lupi Hilkiah kalan cceih hae zah, thuakaw ngawtu Levi phin hae nynh Manasseh phin hae, Efraim phin hae, Israel hae a laehy hae paw balyn, Judah phin hae te Benjamin phin hae balyn te Jerusalem khuaccaaw hae kya-e khoi hae zah Pachia inn lungkhu lang a la thuakhae hae paw phua kha a pya hae.10Bawipaw inn a do-oih hae paw ryalahtu hae kha pya hae zah, Bawipaw inn kya ryalah hae paw nynh inn raethui nawlan te cyithui nawlan a pya hae.11Judah siapharan hae nynh a rosah hae paw inn hae kha raethui nawlan lung adeihkuh vae paw te thingccaw kha re nawlan lehccama hae te inn saktu hae kalan tuh-e phua tuh a pya hae.12Ccungccaw hae nynh lungzite rya a law hae. Tuh-e hae a uktu lang Levi phin Merari ciihan hae Jahath te Obadiah, te Kohath ciihan hae Zekhariah te Meshullam kha ryalaw dopahtu lang a nung hae. Khuakupaw uccaw kha khuakute hlawsahthyapaw ccangpaw Levi phin hae balyn nynh,13uccaw phutu hae te ryalaw aphuinphuin lahtu hae kha a uk hae; Levi phin hae abang tuh ccazi, bawi te sakoih ngawtu nynh thua hae.
14Bawipaw inn lungkhu lang a la nung hae paw phua kha a poukhae lya hae khe, Moses kyate pya athuapaw Bawipaw phungbya ccauh kha ranpibawi Hilkiah nynh a muih.15Hilkiah nynh ryaccinkhan Shafan kha, “Bawipaw inn kya phungbya ccauh kha ka muih,” a cipya; te Hilkiah nynh ccauh kha Shafan kalan a pya.16Shafan nynh ccauh kha siapharan kalan ccyng zah, “Na ryalahtu hae kalan cyi lan kaw na pya hae paw balyn kha minmin nynh a cyih cciamang hae.17Bawipaw inn kya a muih hae paw phua kha lah hae zah, rya a dopahtu hae te ryalahtu hae kha a pya hae,” cite siapharan kha a hopya chih.18Ryaccinkhan Shafan nynh siapharan kha, “Ranpibawi Hilkiah nynh ccauh yn pya,” cipah zah, Shafan nynh siapharan kha accae lante a riapya.
19Siapharan nynh phungbya kya-e bya kha he a thae tuh a boeining kha a seii.20Te siapharan nynh Hilkiah, Safan ccapaw Ahikam, Mikah ccapaw Abdon, ryaccinkhan Shafan te siapharan ryalahtu Asaiah kha kawpya hae zah:21“La cceih oh lah, kamaw hanlan te Israel ram te Judah ram kya a laehy hae paw hanlan, e ccauh lungkhu e bya te asekuh lante Bawipaw kha la khiatua oh; ah minpaaw hae nynh Bawipaw bya kha zui leite, e ccauh kya azeikuhpaw balyn thyhte a cyi khyh hae keiccuze aening tungvaw accahpaw Bawipaw thinrianaw tuh myarya ale,” a cipya hae. Profeh Huldah kha Tuanaw Ngianaw
22Tukeiccuze Hilkiah te siapharan nynh a saw hae paw ccungccaw hae tuh profeh Huldah kalan cceih hae zah tuh-e konglang tuh a hopya hae; Huldah tuh boeining nungnaw a do-oihtu Hasrah ccapaw Tokhath a ccapaw Shallum zu nynh thua (Huldah tuh Jerusalem khua, Zakueh Ccangningnaw kya a umpaw nynh thua).23Huldah nynh minmin kha, “Bawipaw , Israel Pachia nynh hynhte a ho: Ka kalan nanning ae saw oh paw ccungccapaw kha la hopah oh,24Bawipaw nynh hynhte a ho: Judah siapharan malang ria athuapaw ccauh lungkhu e azeikuhpaw thyalawnaw balyn kha, e hmin te a lungkhu um hae paw balyn tungvaw kya ronaw kha ka thuasah ccaccing cih.25Kae kha yn vua hae zah, mih kuih te a raeku hae paw balyn khate ka thinriasah khylan, ccangpaw pachia hae kalan khe silawnaw a rae vae hae, tukeiccuze e hmin kya ka thinrianaw kha ka bu cih zah dae kho vae lan khyh.26Thuasalama Bawipaw kha byakhia khylan nanning ae sawtu oh paw Judah siapharan kha tuh hynhte na la hopah cih oh: Bawipaw , Israel Pachia nynh hynhte a ho: Na thaepaw bya konglang te,27e hmin te hein kya um hae paw tungvaw kya rawsenaw bya ka hopaw kha he na thae te, na thinlung tuh ngaesikuh zah Pachia malang zakawsangsakute na boeining na seii zah ka malang na raw keiccuze kae nynh mah na bya kha kae thaepya vae, cite Bawipaw nynh a ci.28Nang tuh na minpaaw hae kya kae sueluabua cih zah daebabi lan shaw lungkhu na thua cih; e hmin te a lungkhu um hae paw kya ka thuasah cih paw ronaw balyn kha na mit nynh muih lan khyh, a ci cite la hopah oh,” a cipya hae. Tuh-e bya tuh minmin nynh siapharan kalan a kikhae hae. Byakinnaw Raethuinaw (2Si 23.1-20)
29Tetuh siapharan nynh ccungccaw saw hae zah Judah te Jerusalem piccan hae balyn kha a pum hae.30Siapharan tuh Bawipaw inn lang cceihthung zah amaw ryte Judah ccungccaw hae balyn, Jerusalem khuaccaaw hae, ranpibawi hae te Levi phin hae, ccungccaw adih ale balyn a cceihbua hae; Bawipaw inn kya a muih hae paw byakinnaw ccauh kya-e bya balyn kha a thaenaw hae khe a ria.31Siapharan tuh amaw hmin kya thadyn zah, hynh-e ccauh lungkhu azeikuhpaw byakinnaw bya hae thyhte rae khylan, a thinlung balyn te, a hiinnaw balyn te Bawipaw nulang zuiku khylan a kawbya hae, a phunglang hae te a phungbya hae kha zui lan Bawipaw malang khe byakinkunaw a rae.32Te aning nynh Jerusalem khua te Benjamin ram kya um hae paw balyn kha tuh-e byakinnaw tuh bya a kinsaku hae. Jerusalem khuaccaaw hae nynh mih minpaaw hae Pachia, Pachia byakinnaw thyhte a cyi hae.33Josiah nynh anungsikuhpaw uccaw balyn kha Israel hae kya-e ram hae balyn kyate vua zah, Israel ram kya um hae paw balyn kha Bawipaw mih Pachia tuh a beiksah hae. Amaw she lungkhu tuh minmin nynh mih minpaaw hae Pachia, Bawipaw zuinaw kyate ccanglang maekuh khyh hae. Kawtaw Poi Tuanaw (2Si 23.21-23)
1Josiah nynh Bawipaw hanlan Jerusalem khua kya kawtaw poi kha a tua; masaty sawpaw nin haw lae pali nin khe kawtaw poi tuutaw kha a chia hae.2Ranpibawi hae kha mimaw rya raveih kya nung hae zah Bawipaw inn ryalawnaw kyakhe thawzung a pya hae.3Israel hae balyn kha ccangpah hae zah Bawipaw hanlan athyaapaw Levi phin hae kha hopah hae zah, “Israel siapharan David ccapaw Solomon nynh a sakpaw inn lungkhu khe athyaapaw thingkua kha nung oh; nae raw te puih ho vae lan khyh. Atu tuh Bawipaw nae Pachia te a ccungccaw Israel hae kha ryalawpah oh.4Israel siapharan David kya-e muihsahnaw te a ccapaw Solomon kya-e muihsahnaw kha zuite, nae puizia raveihte naemaw phu thyhte paccynkuh oh.5Nae uno athuapaw zapi hae kyaze puizia raveihte phiapaw aphu thyhte athyaapaw hmin kyakhe um oh lah, nae puizia hae aphu raveih hanlan Levi phin hae kha umbua hae sah.6Kawtaw poi tuutaw kha theih oh, naemaw kha thyaasakuh oh lah, Moses kyate oun pyapaw Bawipaw bya thyhte nae puizia hae ccelang paccyntua oh,” a cipya hae.
7Te Josiah nynh ccungccaw hae a um hae paw balyn hanlan kawtaw poi silawnaw lang amaw a sahiin phu kya-e tuutaw hae te miaataw hae thong sung thum te tangnuapaw thong thum kha a hlu; e hae hynh siapharan amaw nynh a hoipaw nynh thua.8A kuihkaw e bawi hae nynh mimaw lungthote ccungccaw hae, ranpibawi hae te Levi phin hae hanlan a hlu hae. Pachia inn kya-e bawi lepaw hae Hilkiah, Zekhariah te Jehiel nynh ranpibawi hae kalan khe kawtaw poi silawnaw hanlan tuutaw te miaataw thong ning za taruh te tangnuapaw za thum kha a pya hae.9Levi phin kya-e lupi hae Konaniah te a uno hae Shemaiah te Nethanel, Hashabiah, Jeiel te Jozabad nynh Levi phin lupi hae kalan khe kawtaw poi silawnaw hanlan tuutaw te miaataw thong pangaw te tangnuapaw za pangaw kha a pya hae.
10Ryalawnaw kha he a paccyn kou hae te, siapharan nynh kaw a pya hae thyhte ranpibawi hae tuh mimaw hmin kya thadyn hae zah Levi phin hae tuh mimaw phu kya a thadyn hae.11Kawtaw poi tuutaw kha a chia hae, te ranpibawi hae nynh Levi phin hae kya-e a law hae paw sachii tuh a hei hae, tuh lyatuin Levi phin hae nynh aphua a lae hae.12Moses ccauh kya azeiku thyhte, Bawipaw kalan hlu khylan, zapi hae kya-e puizia raveihte phiapaw aphu hae kha nee khylan, maee-ute silawnawpaw hae kha taekhiate a nung hae. Te tangnuapaw hae kha mah tuhmaminte a cyi hae.13Phungzae thyhte kawtaw poi tuutaw kha maee te a rua hae; athyaapaw silawnawpaw hae kha laephi ang, sivaw ang te ohkan khate thung hae zah ccungccaw balyn kalan arangte a nee hae.14Tukoute mimaw elang te ranpibawi hae elang a paccyn hae, pawccecize Aaron ciihan hae ranpibawi hae tuh maee-ute silawnaw te atho te silawnaw kha khuazi cia a rae hae; tukeiccuze Levi phin hae nynh mimaw elang te Aaron ciihan hae ranpibawi hae elang kha a paccyn hae.15David, Asaf, Heman te siapharan a profeh Jeduthun nynh kaw a pya hae thyhte, hlawsahthya hae paw Asaf ciihan hae tuh mimaw hmin kya a um hae. Sakoih ngawtu hae tuh sakoih takyh kya a um hae; mih uno Levi phin hae nynh minmin elang a paccyn vae hae keiccuze mih ryalaw kha cciataw ho vae khyh.
16Tuhcite Siapharan Josiah kya-e kawpyanaw thyhte, kawtaw poi tua khylan te Bawipaw silawhang vawlan maee-ute silawnaw rae khylan Bawipaw ryalawnaw balyn kha tuin nin khe a paccyn hae.17Tuin kya umpaw Israel ccungccaw hae nynh tuin ccyh khe kawtaw poi kha tua hae zah ransi phing leipaw sanlou poi kha nin sari a tua hae.18Profeh Samuel she kyate tho zah tuh-e te alokuhpaw kawtaw poi kha Israel ram kya tua boi vae khyh hae; Josiah, ranpibawi hae te Levi phin hae, tuin kya umpaw Judah hae te Israel hae balyn te Jerusalem khuaccaaw hae nynh a tua hae paw kawtaw poi tahawpaw tuh Israel siapharan humhung nynh mah tua boi khyh.19Josiah nynh ram a uknaw kum haw lae taryanaw kum khe e kawtaw poi hynh a tua hae. Josiah Chinaw (2Si 23.28-30)
20E hae balyn koute, Josiah nynh beikinn kha he a paccyn koute, Izip siapharan Neko nynh Zufrates vaw kin umpaw Karkhemish khua kha tuk lan a ccianua thung, te Josiah nynh Neko tuh a ccianua.21Thuasalama Neko nynh a kalan khe locceihtu saw zah, “Judah siapharan, nang te kae tuh pawmou cyiku lanpaw a um? Atunin nang kha tuk lan kae ccianua khyh, kae te rhaw kae tukkuhpaw innbyn kha tuk khylan nynh kae ccia; Pachia nynh arangte cyi lan kaw yn pya. Ka kya a umpaw Pachia kha rawse leite zya umtua, tuhteze nynh nang kha ae roh lan khyh,” a cipya.22Thuasalama Josiah nynh ccanglang maetawku leite, aning te tukku khylan a muinsan a rulaeku. Pachia mung kyate apoupaw bya Neko bya kha ngae khyh zah Megiddo bialae kya rhawtukku lan a cceih.23Thekawthya hae paw nynh Siapharan Josiah kha a kaw hae; te siapharan nynh a ryalahtu hae kha, “Vaemaw myarya ccih lan ka mue vae keiccuze yn cciakhae oh,” a cipya hae.24Tukeiccuze a ryalahtu hae nynh marangle kyate poukhae hae zah a marangle ccangningnaw kyakhe khang hae zah Jerusalem lang a cciakhae hae. Tuin kyakhe chih zah a minpaaw hae shawku kyakhe a uu hae. Judah hae te Jerusalem khuaccaaw hae balyn tuh Josiah hanlan a rah hae.25Jeremiah nynh mah Josiah kha rawkhuinaw hlawphua zah, hlawsahthyapaw pise hae te nopi hae balyn nynh Josiah kha atunin cia mih rawkhuinaw hlaw kya a mang hae. E hynh Israel phungzae lang a mang hae; Rawnaw Hlaw kya a zei hae.26Tuhlaepaw Josiah nynh rya a lawpaw, Bawipaw phungbya kya azeiku thyhte lungzite a cyipaw,27a ryalawnaw atakaw te athangnaw cia Israel te Judah Siapharan hae Ccauh kya a zei hae. Jehoahaz Uknaw (2Si 23.30-35)
1Ram lungkhu e ccungccaw hae nynh Josiah ccapaw Jehoahaz kha ko hae zah Jerusalem kya a paaw ccelang siapharan lang a khang hae.2Jehoahaz tuh kum kuin lae thum acih te, ram kha uk takaw zah Jerusalem kya sawpaw sah thum a uk.3Te Izip siapharan nynh Jerusalem kya amaw kha phoh zah, ram kya ngun talent za kheit te sui talent ccangkheit kha ngunto lang a ngia.4A upaw Eliakim kha Izip siapharan nynh Judah ram te Jerusalem a uktu siapharan lang khang zah a min kha Jehoiakim cite a paleih; a neitaw Jehoahaz kha tuh Neko nynh Izip ram lang a cciakhae. Jehoiakim Uknaw te Kyngnaw (2Si 23.36—24.7)
5Jehoiakim tuh kum kuin lae pangaw acih te, ram kha uk takaw zah, Jerusalem khua kya kum haw lae kheit a uk. Bawipaw a Pachia muihnaw kya hoyleinaw kha a rae.6Babilon siapharan Nebukhadnezzar nynh ccianua thung zah, Babilon lang cciakhae khylan sivawrui te a khii.7Bawipaw inn kya-e angphe abang kha mah Nebukhadnezzar nynh Babilon lang cciakhae zah Babilon khua e a siapharan inn khe a nung.8Tuhlaepaw Jehoiakim nynh rya a lawpaw, anungsikuhpaw a la cyipaw te ahoy leipaw a cyisahnaw kha Israel te Judah Siapharan hae Ccauh kya a zei hae; a ccapaw Jehoiakhin nynh amaw ccelang siapharan lang a tang. Jehoiakhin A Uknaw te Kyngnaw (2Si 24.8-11)
9Jehoiakhin tuh kum tarya acih te ram kha uk takaw zah, Jerusalem khua kya sawpaw sah thum te nin haw a uk. Aning nynh Bawipaw muihnaw kya hoyleinaw kha a rae.10Tuh-e kum hawnin khe Nebukhadnezzar Siapharan nynh ccungccaw saw hae zah amaw kha Bawipaw inn e aphutepaw angphe hae ryte Babilon lang a cciakhae, te Jehoiakhin a unopaw Zedekiah kha Judah ram te Jerusalem a uktu siapharan lang a khang. Zedekiah Uknaw (2Si 24.18-20; Jer 52.1-3a)
11Zedekiah tuh kum kuin lae kheit acih te, ram kha uk takaw zah, Jerusalem kya kum haw lae kheit a uk.12Aning nynh Bawipaw a Pachia muihnaw kya hoyleinaw kha a rae. Bawipaw mung kyate apoupaw bya a hotupaw Jeremiah malang kya zakawsangsakuh khyh.13Pachia min phyate bya a kinkuhpaw Nebukhadnezzar Siapharan kha mah a dou; Bawipaw , Israel Pachia kalan maeleihkuh ry khyh zah a lungkhungsakuh zah a thinlung a tansaku.14Ranpibawi hae kyaze alehua hae paw te ccungccaw hae balyn tuh minphuin ccangpaw hae kya-e anungsikuhpaw balyn kha zuibua hae zah myaryamaw mih lungzi khyh; Bawipaw nynh Jerusalem kya a thyaasahpaw a inn kha a thusah hae. Jerusalem Shungnaw
15Bawipaw , mih minpaaw hae Pachia nynh a ccungccaw hae te a umnaw hmin kha ngaethya a umsah keiccuze a locceihtu hae kha apaekuh lei lan a sawnua hae.16Thuasalama a ccungccaw hae tungvaw accahpaw Bawipaw thinrianaw tuh myarya le zah adae kho lei lan ciate minmin nynh Pachia locceihtu hae kha a sarya hae, a bya kha pawlangria khyh hae zah a profeh hae kha a theihrya hae.
17Tukeiccuze aning nynh Babilon hae siapharan kha minmin kalan ccianua sah hae zah, tuh-e paw nynh mih ccangvae hae kha mih beikinnthyaa kyakhe thaloi te a chia hae; ccangvae, liaccaw, kum tang hae paw te thawzya hae paw kha ngaethyaumsah khyh hae; Pachia nynh mih balyn mawte tuh-e siapharan kuih kalan a pya hae.18Pachia inn e angphe adih alepaw balyn, te Bawipaw inn e sisua hae, siapharan te a kuihkaw e bawi hae kya-e sisua hae, e hae balyn hynh Babilon lang a cciakhae.19Pachia inn kha maee te a soi hae, Jerusalem khualungrua kha ting hae zah a siapharan inn balyn kha maee te a soi hae, te khua kya-e aphutepaw uccaw balyn kha a ro hae.20Thaloi kyate a lue hae paw kha kyngte Babilon lang cciakhae hae zah, Persia peenaw atyn mawlaezung minmin kha amaw te a ccapaw hae see lang a tang hae.21E hynh, Israel ram nynh a sabbath nin hae kha a lungpawsah mawlaezung, cite Jeremiah nynh a hopaw Bawipaw bya kha accing nawlan nynh thua. Tuh-e ram nynh ccungccaw adae ccyh balyn, kum sung sari phe ccing lan sabbath kha a sung. Sairas nynh Luenaw Kong A Thaesah hae (Ezr 1.1-4)
22Jeremiah nynh a hopaw Bawipaw bya tuh ccingsah khylan, Persia siapharan Sairas nynh siapharan lang a tangnaw masaty kum khe, Bawipaw nynh Persia siapharan Sairas thinlung kha a tuhou keiccuze aning nynh a peenaw balyn kalan kaw a thopaw ccaw kha kyte thaesah hae zah:23“Persia siapharan Sairas nynh hynhte a ho: Bawipaw , vaaw Pachia nynh laephi peenaw balyn kha yn pya vae zah, Judah ram Jerusalem khua kya amaw hanlan inn sakpya lan kae kha yn naw. Tukeiccuze Pachia ccungccaw athuapaw miakaw nanning balyn tuh tuhlang tuin la cceihthung oh lah, Bawipaw nae Pachia tuh nae kya la um vae sah!” a ci.

Bible Society of Myanmar

https://app.library.bible/content/1a340f5ae072b2f4

expand_more
chevron_leftCapítulo anterior
chevron_rightPróximo capítulo