2 TIMOTE1
Beihlangnaw
1Khri Jesu kya a umpaw hiinnaw kya-e byakinpyakupaw thyhte, Pachia rynaw liate Jesu Khri kya-e locceihtu athuapaw Paul nynh,2Kou ka sungsahpaw ka ccapaw, Timote: Paaw Pachia te ah Bawipaw Jesu Khri kyate thawccinaw, ngaethyaumsahnaw te daenaw tuh na kya la um sah. Timote A Zynnaw3Khuazi khuadae ka sawsangnaw kya apaekuh lei lan nang kha kae liathui zah, ka minpaaw hae nynh a beik hae hawte mawtemaw nykunaw thinlung athyaapaw te ka beikpaw Pachia kha ka luung.4Na mitphi kha ka tuathui tuh lungtuanaw te phe ka bia nawlan nang kha muih lan myarya kae ry.5Na minnung Lois te na nung Zunis kya masaty a la umpaw zynnaw hawte, thyaararihpaw na zynnaw kha ka liathui; tuh-e zynnaw tuh nang na kya mah a um cipaw ccaerarih lan ka ny.6Tukeiccuze ka kuih khangnaw liate na kya umpaw Pachia lasung kha po na hiinsah nawlan nang kha kae nysah thui ry.7Pawccecize Pachia nynh rawthyanaw muisaw kha aening oun pya khyh, thuasalama thungnaw, sungsakunaw, te mawtemaw yhku khonaw muisaw kha nynh oun pya.8Tukeiccuze ah Bawipaw kya-e ccaekia kha thuasah, amaw keiccu thong a ccahpaw kamaw kha thuasah mae oun thyakhae nan; thuasalama Pachia thungnaw liate thehoypaw hanlan kamaw ryte teingbua.9Tuh-e Pachia nynh aening kha phe oun khum vae zah athyaapaw konaw te oun ko vae; tuh-e tuh aening ah ryalawnaw keiccu thua leite, amaw a eenaw te a thawccinaw keiccu nynh thua. Tuh-e a thawccinaw tuh laephi atho mawze Khri Jesu liate aening kha oun pya vae.10Tuh-e thawccinaw tuh aening oun Khumtu Khri Jesu yn langkunaw liate atu alangkuh vae. Tuh-e Jesu nynh chinaw kha zosah zah hiinnaw te chi kho leinaw kha thehoypaw liate awnaw kalan a thuakhae.11Tuh-e thehoypaw phunghotu lang, locceihtu lang te Zenta hae ccangpahtu lang kae tuh khang ka thua.12Tuh-e keiccu nynh hynh-e vawsawnaw hae hynh ka teing. Tuhzemah ka maethah khyh. Pawccecize hum nynh ka zyn cipaw kha ka ny, amaw kalan ka appaw uccaw kha tuh-e Nin kyacia a khynsah kho cipaw ka ny.13Khri Jesu kya a umpaw zynnaw te sungsakunaw te asekuhpaw, kamaw kyate na thae vae paw dosuinku lan umpaw ahmepaw bya kha varyng la kyngkuh.14Nang na kya pya athuapaw, ahoypaw uccaw kha aening kya a umpaw Thyaa Muisaw liate la khynsah.15Asia ram kya a um hae paw balyn nynh kae kha oun cciataw vae hae cipaw phe na ny, tuh-e hae kya Fikelas te Hemokene a umbua hae.16Onesiforas innbyn kha Bawipaw nynh ngaethya la umsah vae sah, pawccecize aning tuh ka thaw yn muinsah hepaw thua zah, sivawrui te yn khii hae zemah a mae yn thyakhae khyh.17Rom khua he a thua te, kae kha thawmawte yn ccung zah yn muih.18Tuh-e Nin kya Bawipaw kya-e ngaethyaumsahnaw kha a mue nawlan Bawipaw nynh la pyabua vae sah. Efesa khua kya ka hanlan pawcih nynh rya yn lawpya cipaw kha hoyte na ny. Khri Jesu Rhawkaw Hoypaw1Tukeiccuze ka ccapaw, nang tuh Khri Jesu kya a umpaw thawccinaw kyakhe na thaw la sae sah.2Ccaekia hae patae malang kamaw kyate na thae vae paw uccaw hae kha ming hae a ccangpah kho cih hae paw, a lungzipaw ccungccaw hae kalan la ap hae.3Tukeiccuze Khri Jesu kya-e rhawkaw hoypaw hawkhate, vawsawnaw kha la ngaesang.4Rhawkaw nynh tuh rhawkaw lang a potupaw a bawipaw kha a lungrytung khylan ccungccaw huataw bya kya suakuh bua khyh.5Khungtaekunaw kya a taekuh buapaw nynh aphung thyhte a taeku khyh ze, lasung kha mue khyh.6Thawte a reihkuhpaw loophopaw tuh masaty looh a muepaw athua cih.7Ka hopaw kha hoyte la tua, Bawipaw nynh pawpaw balyn kya thaethyanaw ae pya cih.8Ka hopaw thehoypaw thyhte David ciihan athuapaw Jesu Khri tuh chinaw kyate a thoothui cipaw kha la liathui.9Tuh-e thehoypaw hanlan kae tuh misei hawte sivawrui te khii ciate vawsaw ka teing; thuasalama Pachia bya tuh khii kho thua khyh.10Tukeiccuze popaw ccungccaw hae nynh mah Khri Jesu kya a umpaw khumnaw kha zungzae phu-enaw ryte a muebua nawlan hae, minmin hanlan pawpaw balyn kha ka ngaesang.11Hynh-e tuh ahmepaw bya nynh thua:Pawccecize amaw ryteah chikheih oh ze,amaw ryte ah hiinkheih cih oh.12Aening ah teing kho oh ze,amaw ryte ah ukkheih cih oh;amaw kha ah vua oh ze,aning nynh mah oun vua cih.13Aening tuh zyn lanah um khyh oh zemah,aning tuh a lungzipaw nynh thua,pawccecize amaw te amaw khavuakuh kho khyh.Pachia Nawccawpaw Ryalahtu14Hynh-e uccaw hae kong hynh la tuasah thui hae. Athane leipaw te a thaetu hae a rosahpaw bya kong kha minmin nynh a peku khyh nawlan hae Pachia malang raeringnaw pya hae.15Byaccing bya kha hmerarih lan phiathyate, maethya lanpaw a hoi leipaw ryalahtu na thua zah, Pachia nynh a nawccawpaw lang tangte, Pachia kalan pyaku lan thawte zuakuh.16Anungsikuhpaw, accakaepaw bya ccohkunaw kha la sungkuh, pawccecize tuh-e bya nynh ccungccaw hae kha Pachia kyate houhouh a sawsaku hae.17Mih bya tuh vaemaw hawte apazaekuh cih. Tuh-e hae kya Himenias te Filetas a umbua hae.18Minmin nynh thoothuinaw tuh phe thang vae paw nynh thua a ci hae keiccuze byaccing kyate a cceihsei vae hae, te ccungccaw abang zynnaw kha a buleihpya hae.19Thuasalama Pachia kya-e atynpaw tungpi tuh a thadyn; tuh-e tungpi kyatuin, “Bawipaw nynh a ccungccaw hae kha a ny,” cipaw te, “Bawipaw min a phukuhpaw miakaw nynh tuh hoyleinaw kha cciataw sah,” cipaw kha tazeihkhia athua.20Myarya lepaw inn kyakhe sui angphe hae te phua angphe hae kyalya um khyh, thing angphe hae te lae angphe hae mah a umbua. Abang tuh abyapipaw kya mang lanpaw thua zah abang tuh huatawpaw kya mang lanpaw nynh thua.21Tukeiccuze lukhakheit nynh anungsikuhpaw uccaw kyate amaw te amaw kha a ccikanku lanze, aning tuh abyapipaw kya mang lanpaw angphe, thyaa zah inn hoitu nynh mang lan asypaw angphe, ahoypaw ryalaw miakaw hanlan paccynpaw athua cih.22Ccangvae lya-e chiisaw rynaw kha sibia lah, athyaapaw thinlung te Bawipaw a ko hae paw ryte dingnaw, zynnaw, sungsakunaw te daenaw hoi lanpaw kha la zuaku.23Ngaeenaw te pawsang ny tutae leite bya-eikunaw kha la sibia. Tuh-e nynh pekunaw kha a thuakhae cipaw na ny.24Bawipaw rya a lahtu tuh ming hae ryte pekuh hahe lan khyh hae, ccungccaw miakaw kya thawccinaw a hoi cih, a ccangpah thya cih zah a lungsae cih,25amaw a rawsetu hae kha lungnenaw te a thuihei cih hae; minmin nynh byaccing a ny nawlan hae Pachia nynh ngaesikunaw kha a pya ze a pya cih hae,26te minmin nynh tuathya-nythyanaw oun hoi cih hae zah Satan nynh a rynaw raesah khylan a kyngnaw hae paw kaang kyate a lue cih hae. Nyathya Nin hae1Nyathya nin kya tuh vawsawnaw ccyh yn thua cih cipaw kha la nyh.2Pawccecize ccungccaw hae tuh mimaw a sungsakuh hae paw, phua a duaa hae paw, a pookuh hae paw, a lysakuh hae paw, milae thethya ho hae paw, nungpaaw kawngae lei hae paw, lungtuabya a hothya lei hae paw, athyaa lei hae paw,3sungsahnaw hoi lei hae paw, ccungccaw ngaethya lei hae paw, milae thanho hae paw, a sungkuh kho lei hae paw, eih rei kaesy hae paw, ahoypaw a hua hae paw,4lungzi lei hae paw, paw peki lei hae paw, a lysakuh hae paw, Pachia sungsahpaw laeze hoysahnaw a ryhua hae paw,5Pachia rawrihpaw o-ang lante a umsaku hae zemah tuh-e thungnaw kha a vua hae paw nynh thua hae. Tuhcihawpaw ccungccaw hae kha la sibia hae.6Pawccecize minmin laku e ccungccaw abang tuh inn lungkhu lang tee hae zah, mih seinaw nynh phang ne hae paw te zoikadeih lan ling kho umpaw nopi hae kha rynaw aphuinphuin te cciakhaesei hae zah see lang a kyngtu hae nynh thua.7Tuh-e nopi hae tuh palei ccangkuh hae salamah byaccing a nyh kho lei hae paw nynh thua.8Jannes te Jambres nynh Moses kha a dou hae hawte tuh-e ccungccaw hae nynh byaccing kha a dou hae. Minmin tuh thinlung ahme lei vae paw thua hae zah mih zynnaw mah pawsang thua vae khyh.9Thuasalama tuh-e lu ning hae mih ngaeenaw tuh alangku vae hawte hynh-e hae mih ngaeenaw mah ccungccaw miakaw kya a langkuh cih. Tukeiccuze minmin tuh tuhlaeze lethung kho vae lan khyh hae.10Thuasalama ka ccangpyanaw, ka ziazae, ka hiinnaw kya ka eenaw, ka zynnaw, ka lungsaenaw, ka sungsahnaw, ka ngaesangnaw kha thuasah,11Antiok khua, Ikonium khua te Lystra khua kya ka tungpaw tuaasahkunaw te teingnaw hae kha thuasah, pawcihawpaw tuaasahkunaw hae kha nynh ka teing cipaw kha marya na ny; thuasalama tuh-e hae balyn kyate Bawipaw nynh yn luesah.12Thanccingte, Khri Jesu kya Pachia rawrinaw te a hiin rypaw ccungccaw balyn nynh tuh tuaasahkunaw kha a teing cih hae.13Thuasalama ccungccaw hoylei hae te a hynhupaw ccungccaw hae tuh ahoy leipaw lang houhouh a tang cih hae; ming hae kha a phee cih hae zah mimaw mah phee athua cih hae.14Thuasalama nang tuh na ccangku vae paw te tynkaring lan na zyn vae paw kyakhe po la tyn, pawccecize hum kyate nynh na ccangku cipaw kha na ny.15Na imua lya mawte Ccathyaa kha phe na ny vae, tuh-e Ccathyaa nynh Khri Jesu zynnaw liate khumnaw mue nawlan hawnaw kha ae pya kho.16Ccathyaa balyn tuh Pachia hysawnuapaw thua zah, ccangpyakunaw hanlan, seinaw langsaku nawlan, raethuinaw hanlan, dingnaw kya thuiheikunaw hanlan athanepaw nynh thua.17Tuhcite Pachia ccungccaw tuh accingpaw athua nawlan te ahoypaw ryalaw miakaw hanlan paccynpaw athua nawlan nynh thua.1Pachia malang te Khri Jesu malang thawte kae ngia. Khri nynh amaw yn langkunaw kya te a peenaw kya michi te mihiin kha bya a pia cih.2Kae ngiapaw tuh: Pachia Bya kha la ho. Accyh accanthya zemah, accanthya khyh zemah la zuakuh, mih seinaw kha la muihsakuh hae, la pe hae lah thawzung la pya hae, myarya lungsaete la ccangpah hae.3Pawccecize ccungccaw hae nynh ahmepaw ccangpyakunaw kha a ngae ry khyh hae ccyh yn thua cih, mih rynaw hawte a ho lanpaw ccangpahtu hae kha oun suelua cih hae.4Mih nakaring kha byaccing ngaenaw kyate ccanglang oun mae cih hae zah phungpaw huataw hae kha oun ngae ry cih hae.5Thuasalama nang tuh pawpaw balyn kya la raeringkuh, riathaenaw kha la ngaesang, evangelist ryalaw kha la lah lah, na ryalaw kha phe ccing lan la lah.6Pawccecize kae tuh silawnaw kya mang lanpaw niapaw silawnaw hawte paccyn ka thua vae, laephi vaw hiinnaw hynh ka cciataw ccyh yn thua vae.7Kae nynh ahoypaw rhawtukkunaw kha ka tuk vae, ccuetaekunaw kha ka thangsah vae, zynnaw kha ka tynsah vae.8Atu te vae tuh dingnaw bawilukhung kha kamaw hanlan nungpya athua vae. Tuh-e tuh adingpaw byapiatu, Bawipaw nynh tuh-e Nin kya kae kha yn pya cih. Kamaw kyalya thua leite amaw yn langku lanpaw a ngaehoi hae paw balyn kha mah a pya cih hae.9Kamaw kalan aro maw thua lan thawte yn zuakuh.10Pawccecize Demas nynh hynh-e atu she hynh sungsahte, kae kha yn vuasya zah, Thesalonika khua lang a cceih vae. Kresen tuh Galatia ram lang cceih zah, Titu tuh Dalmatia ram lang a cceih vae.11Luka kyalya nynh ka kya a um. Marka kha yn kobua lah namaw ryte oun cceih oh. Pawccecize aning tuh ka ryalawnaw kya a ccungkia.12Taikhikas kha Efesa khua lang ka saw vae.13Troas khua umpaw Karpas kya ka cciatawpaw angkiccua kha nae ccia vae ze yn phubia, te ccauh hae kha mah yn phubia lah, abyapi lante saving-ccauh hae kha yn phubia.14Sohinlaeetupaw, Alexanda nynh myarya lepaw vawsawnaw yn pya; Bawipaw nynh tuh-e paw tuh a ryalaw thyhte amee pyaru vae sah.15Amaw kha la raeringkuh, pawccecize aning nynh kae bya kha thawmawte a rawse.16Byapianaw kya masaty ka pou lyaze hum nynh san yn pankhae khyh, mih balyn te phe oun vua hae; tuh-e hanlan mih tungvaw seibe thua nan sah.17Thuasalama thehoypaw kha phe ccing lan ka ho zah Zenta hae balyn nynh a thae nawlan hae Bawipaw nynh yn pankhae zah thawzung yn pya. Kae tuh chindeih khalang kyate luesah ka thua.18Bawipaw nynh ahoy leipaw ryalaw miakaw kyate kae kha yn luesah cih zah, a vaawlang peenaw kalan khyndadyh lan yn cciakhae cih. Amaw kya phu-enaw tuh zungzae te zungzae cia um sah. Amen. Nyathya Beihlangnaw19Prisilla te Akuila, te Onesiforas innbyn kha la beihlang hae.20Erastas tuh Korin khua nynh a um; Trofimas tuh a cci keiccu Miletas khua kya ka cciataw.21Khuaccihsaw athua maw kamaw kalan thua lan thawte yn zuakuh. Zubulas, Puden, Linas, Klaudia te uteno hae balyn nynh nang kha ae beihlang hae.22Bawipaw tuh na muisaw kya la um sah. Thawccinaw tuh na kya la um sah. Amen.Bible Society of Myanmar