TITU1
Beihlangnaw
1Pachia rya a lahtu te Jesu Khri locceihtu athuapaw Paul nynh ccaw kae ky oh. Pachia nynh a popaw a ccungccaw hae zynnaw kha tynsah khylan te ah beiknaw nynh oun ccangpyapaw byaccing kalan cciakhae khylan popaw te sawpaw nynh ka thua,2tuh-e ah beiknaw tuh zungzae hiinnaw ngaehoinaw kya a bingkuhpaw nynh thua; a hyn boi leipaw Pachia nynh hynh-e hiinnaw tuh laephi thotakaw mawte bya oun kinpyakupaw thua zah,3accyh azaw te phunghonaw liate a bya kha a langsaku vae, tuh-e tuh aening oun Khumtu Pachia kya-e kawbya thyhte kamaw kya pya athua.4Phe lokuh lante ah hoipaw zynnaw kya ka ccaaw ccaccing athuapaw Titu:Paaw Pachia te aening oun Khumtu Khri Jesu kyate thawccinaw te daenaw tuh na kya la um vae sah.
Krete kya Titu Ryalawnaw5Nang kha kaw kae pya vae thyhte, ahobou ungpaw ryalaw kha kou hoy lan law khylan te khua takyh kya pastor hae kha khang khylan Krete tuikoih kya nang kha kae cciataw;6Khriccaaw piccan tuh ccaenaw um leipaw athua cih, zu lu kheit kyalya a hoipaw athua cih, a ccaaw hae tuh zyntu athua cih hae zah, a ccouseikuh hae paw te kawngae lei hae paw cite a ccae lei hae paw athua cih.7Pastor tuh Pachia kya-e synriatu athua hawte ccaenaw um leipaw athua cih; amaw rynaw te um leipaw, a thindyn leipaw, misutui a ran leipaw, peku a mang leipaw, phua elang a karankuh leipaw athua cih,8tukoute mikhia do-oihthyapaw, ahoypaw a rypaw, a tuathyapaw, hmerarihpaw, beiknaw lang a zuakuhpaw te a sungkuh khopaw athua cih,9ahmepaw ccangpyanaw khate ming hae kha a hyy kho nawlan hae te tuh-e ccangpyanaw a rawse hae paw kha mih seinaw a muihsahku kho nawlan hae, aning tuh ccangpya athua vae thyhawte zyn lan umpaw bya kha varyng a kyngkuhpaw athua hahe cih.10Pawccecize kawngae lei hae paw, accakaepaw bya a hotu hae te lingtu hae patae a um hae. Abyapi lante vingdungawkuh hae paw nynh thua hae.11Tuh-e hae mih khalang tuh phang hu athua hahe cih, minmin nynh ahme leipaw muenaw a ry hae keiccuze ccangpya lan accan leipaw kha ccangpah hae zah innbyn mawte phe a buleih hae.12Mimaw kyaze minphuin kheit athuapaw, mih profeh lu kheit nynh,“Krete ccungccaw hae tuhpalei a hyn hae paw,arepaw sarangpaw hae,mih thawnawpawaemoh hae nynh thua hae,” a ci.13Hynh-e bya tuh ahmepaw nynh thua. Tukeiccuze minmin tuh zynnaw kya atyn nawlan hae thawte la pe hae.14Byaccing a vuapaw ccungccaw hae kya-e kawbya hae te Judah hae phungpaw huataw hae kha pawlang a ria khyh nawlan hae nynh thua.15Athyaapaw ccungccaw hae hanlan tuh pawpaw balyn marya athyaa, thuasalama anungsikuhpaw te a zyn lei hae paw hanlan tuh pawsang mah thyaa khyh. Thuasalama mih thinlung te mimaw nykunawpaw thinlung mah anungsikuh.16Minmin nynh Pachia kae nyh cite ho hae salamah mih cyisahnaw te Pachia kha a vua hae; pawccecize minmin tuh luathua-ae-ui lan um hae paw, kawngae lei hae paw te ahoypaw ryalaw miakaw kya ccungkia lei hae paw nynh thua. Ahmepaw Ryalahtu Ryalaw1Thuasalama nang tuh ahmepaw ccangpyanaw te angaekuhpaw kha la ccangpah hae:2Paawpi hae tuh a sungkuh khopaw, sawtua lan umpaw, lungkyhrarihpaw athua nawlan hae, te zynnaw, sungsakunaw te ngaesangnaw kya atynpaw athua nawlan hae la ccangpah hae.3Tuhawte nungpi hae kha mah umtu ziazae kya sawtua lan umpaw athua nawlan hae, milae thanthya a hopaw athua khyh nawlan hae, misutui eih a ranpaw athua khyh nawlan hae, ahoypaw kha a ccangpahtu athua nawlan hae la ccangpah hae.4Nungpi hae nynh a kum no huapaw nopi hae kha, mih vawpaw hae a sungsahpaw, mih ccaaw hae a sungsahpaw,5a sungkuh khopaw, athyaapaw, innloo a do-oihthyapaw, ahoypaw, mih vawpaw hae kawngae hae paw athua nawlan hae a thuihei cih hae; tuhcite Pachia bya tuh thethya a ccou khyh nawlan nynh thua.6Tuhawte a kum nopaw pise hae kha a sungkuh khopaw athua nawlan hae la tuhou hae.7Pawpaw balyn kya ahoypaw ryalaw hae khate dosuinkupaw lang la umpah hae. Ccangpyakunaw kya ccirarihnaw, thanccing thuanaw,8seibe kho leipaw ahmepaw byaho kha la mang; aening oun rawsetupaw tuh aening konglang athahpaw a ho lanpaw hoi vae leite, maethya a bongkuh vae cih.9See hae nynh mih bawi hae kaw a ngae nawlan hae, pawpaw kya balyn mih lunghoysah nawlan hae, bya a khungru khyh nawlan hae,10a rupya khyh nawlan hae, pawpaw kya balyn zyn lan a umnaw hae balyn kha hoyte a langsaku nawlan hae la tuhou hae, tuhteze nynh aening oun Khumtu Pachia ccangpyanaw kha pawpaw kya balyn minmin nynh a paccan cih hae.11Pawccecize khumnaw yn thuakhaepaw Pachia thawccinaw tuh ccungccaw balyn kya a langkuh vae.12Pachia pawlangria leinaw te laephi uccaw duaanaw kha vua lan zah, aening tuh mawtemaw ukku kho te dingrarih lante, Pachia rawrite atu she kya ah hiin nawlan oh, tuh-e thawccinaw nynh oun ccangpya.13Alesaepaw ah Pachia te oun Khumtu Jesu Khri a phu-enaw yn langku lanpaw kha aening nynh ah ngaehoi oh, tuh-e tuh lungtua lan umpaw aening ngaehoinaw nynh thua.14Jesu Khri tuh hoyleinaw balyn kyate aening kha shawkhaw khylan thuasah, amaw elang ccungccaw hae kha thyaasah khylan te tuh-e ccungccaw hae nynh ahoypaw cyisahnaw kha mih lungzua nawlan thuasah amaw te amaw kha aening hanlan a pyaku.15Hynh-e uccaw hae hynh la ccangpah hae; kawhoinaw balyn khate thawzung pyate la hyy hae lah, pe biate la thuihei hae. Hum nynh sanmah ae dothatheih nan sah. Ahoypaw Cyisahnaw Kyngkuh1Uktu hae te kawhoitu hae nynh oun uknaw hae kha zakawsangsakute kaw a ngae nawlan hae thuasah, ahoypaw ryalaw miakaw hanlan paccynkute a um nawlan hae thuasah minmin kha bua la hopah hae,2hum ccungccaw kong sanmah thethya a ho khyh nawlan hae, a peku khyh nawlan hae, nevyalyapaw athua nawlan hae te ccungccaw miakaw kya lungnenaw kha a langsaku nawlan hae la hopah hae.3Pawccecize langmawlya tuh aening mah mingaee hae, kawngae lei hae paw, a cceihsei hae paw, ryduaanaw aphuinphuin te hoysahnaw hae see nynh ah la thua oh, ahoy leipaw te eiungnaw kya hiinte, ming hae nynh a hua hae paw te lu kheit te lu kheit a huakuh hae paw nynh ah la thua oh.4Thuasalama aening oun Khumtu Pachia a hoynaw te a thawcci sungsahnaw kha ccungccaw hae kya he yn langkuh tuh,5aening nynh ah rae oh paw dingnaw cyisahnaw hae liate thua leite, amaw ngaethyaumsahnaw liate oun khum, puithuinaw te asekuhpaw singpyanaw te Thyaa Muisaw nynh thawsahthuinaw liate aening kha oun khum.6Aening oun Khumtu Jesu Khri liate tuh-e Muisaw tuh aening tungvaw kya phe beih lan oun bu.7Tuhcite a thawccinaw liate thyaaccousah ah thua oh zah, zungzae hiinnaw ngaehoinaw thyhte rhoccoutu hae ah thua nawlan oh nynh thua.8E tuh zyn lan umpaw bya nynh thua. Pachia a zyn hae paw nynh ahoypaw rya hae kha law lan a raeringku nawlan hae hynh-e uccaw hae hynh pekite la ho ci ka ry; e uccaw hae tuh ccungccaw hae hanlan hoy zah athanepaw nynh thua.9Thuasalama ngaeepaw bya-eikunaw, thokeinaw kong, lungloku leinaw te kawbya kong pekunaw hae kha la sibia, pawccecize tuh-e hae tuh ccungkia leipaw te athane leipaw nynh thua.10Phiakunaw a raepaw ccungccaw kha vae kheit, vae ning thuiheinaw na pya koute tuh la dee ccavae.11Tuhcihawpaw ccungccaw tuh amaw te amaw seibekuhpaw, a lungzi leipaw te a seipaw nynh thua cipaw na ny. Nyathyakou Byataw12Artemas khyhze Tikhikas kha na kalan he kae saw te, Nikopolis khua cia ka kalan thua khonaw te yn zuakuh, pawccecize khuaccihsaw lungkhu tuin kya um lante ka tuaku vae.13Kawbya a thyapaw Zenas te Apollos kha mih khuaccongnaw kya mih hanlan pawsang ahobou khyh nawlan la zuapakuh hae lah la cciakhae hae.14Aening ah ccungccaw hae mah athae thae leipaw athua khyh nawlan hae, mih hanlan ahoboupaw kya mang lanpaw a hoi nawlan hae, ahoypaw ryalaw law lan la ccangkuh hae sah.15Ka kya a umbua hae paw balyn nynh nang kha ae beihlang hae. Zynnaw kya aening oun sungsah hae paw kha la beih hae. Thawccinaw tuh nae balyn kya la um vae sah. Amen.
Bible Society of Myanmar