1 TIMOTE1
Beihlangnaw
1Aening oun Khumtu Pachia te aening ngaehoinaw athuapaw Khri Jesu kawpyanaw liate Khri Jesu locceihtu athuapaw kae, Paul nynh,2Zynnaw kya ka ccaaw ccaccing na thuapaw Timote nang kha ccaw kae ky. Paaw Pachia te ah Bawipaw Khri Jesu kyate thawccinaw, ngaethyaumsahnaw te daenaw tuh na tungvaw la um sah. Ccangpyaseinaw Raeringnaw Pyanaw3Mesidonia ram lang ka ccia lyaze kae hopya sya hawte, nang tuh Efesa khua kya na la umhy cih zah ccungccaw abang nynh ahme leipaw ccangpyanaw kha a ccangpya khyh nawlan hae thuasah,4phungpaw huataw hae te athangthya leipaw thokeinaw phungpaw hae kha a ngae ry khyh nawlan hae thuasah la hopah hae; tuh-e uccaw hae nynh zynnaw liate ny athuapaw Pachia paccynnaw laeze eikunaw kha a thuakhae.5Hynhte bya kae tawsyanawpaw eenaw tuh, athyaapaw thinlung, ahoypaw mawtemaw nykunaw te thyaruhnaw um leipaw zynnaw kyate yn thuapaw sungsakunaw nynh thua.6Ccungccaw abang nynh tuh-e ccangpyanaw hae tuh cciataw hae zah accakaepaw byahokupaw kalan a paleihkuh hae.7Minmin tuh mimaw toulou nynh a ho hae paw te tynkaring lan a kyngku hae paw kong sanmah a thaethya lei hae pite kawbya sazae lang tang a ry hae.8Lukhakheit nynh kawbya kha hmerarih lan a mang ze, kawbya tuh ahoy cipaw ah ny oh.9Kawbya tuh adingpaw ccungccaw hanlan raepaw thua khyh, thuasalama kawbya pawlangria lei hae paw te kawngae lei hae paw hanlan, Pachia pawlangria lei hae paw te misei hae hanlan, a thyaa lei hae paw te beiknaw pawlangria lei hae paw hanlan, paaw hae te nung hae a theihtu hae hanlan, ccungccaw theihtu hae hanlan,10a ohhuakuh hae paw hanlan, pise te pise, nopi te nopi a sei hae paw hanlan, ccungccaw ruh hae paw hanlan, mihyn hae hanlan, ahme leipaw ccaekia lang tang hae paw hanlan te ahmepaw ccangpyakunaw te arawsekuhpaw miakaw hanlan nynh kawbya tuh rae athua cipaw ah ny oh.11Tuh-e ahmepaw ccangpyakunaw tuh thehoy ccoupaw Pachia kya-e aphu-epaw thehoypaw te accawkuh; tuh-e thehoypaw tuh phy lan kae kha yn pya. Ngaethyaumsahnaw hanlan Lungtuanaw12Thawzung yn pyatu ah Bawipaw Khri Jesu kha ka thehoysah, pawccecize kae hynh a ryalaw lan yn khang zah a lungzipaw lang yn riabua.13Kae tuh langmawlya Pachia saryanaw bya a hopaw, a tuaa a sahtupaw te a puathopaw nynh ka thua. Thuasalama zynnaw hoi leite nythya leite ka la cyipaw athua keiccuze ngaethyaumsahnaw kha ka mue.14Ah Bawipaw kya-e thawccinaw tuh Khri Jesu kya umpaw zynnaw te sungsakunaw ryte ka hanlan myaryamaw alung.15Khri Jesu tuh misei hae khum khylan nynh laephi kalan yn thua cipaw tuh ahmepaw bya thua zah khaleih lawku lan accanpaw nynh thua. Tuh-e misei hae kyaze kae tuh a sei huaccepaw nynh ka thua.16Thuasalama zungzae hiinnaw hanlan amaw a zyn vae cih paw ccungccaw hae nynh dosuinkupaw thua khylan, Jesu Khri nynh a sei huaccepaw kae ka tungvaw kya accingpaw ngaesangnaw kha langsaku khylan, kae tuh ngaethyaumsahnaw kha ka mue.17Zungzae atynpaw Siapharan, a chih kho leipaw, muih kho um leipaw, amaw kyalya Pachia athuapaw tungvaw kya sawtuanaw te phu-enaw tuh zungzae te zungzae cia um sah. Amen.18Ka ccapaw Timote, nang na konglang langmawlya a la ho hae paw profehbya thyhte nang nynh ahoypaw rhaw kha na dou nawlan, hynh-e kawbya hynh kae pya.19Zynnaw te ahoypaw mawtemaw nykunaw kha varyng la kyngkuh. Ccungccaw abang nynh tuh-e nykunaw tuh a vua hae keiccuze zynnaw kya arohpaw sanphalung hawte nynh thua hae.20Tuh-e hae laku kya Himenias te Alexanda a umbua hae, minmin nynh Pachia saryanaw bya a ho khyh nawlan hae, ccangku khylan Satan kalan ka ap vae hae.Sawsangpyanaw Kong Thuiheinaw1Ngiapyanaw, sawsangpyanaw, alaku te ngiapyanaw te lungtuabya honaw kha ccungccaw balyn hanlan na raepya nawlan oh masaty lan kae ngia oh,2aening nynh Pachia nyhpaw hiinnaw kya te sawtua lan umpaw hiinnaw balyn kyakhe daenaw te ah hiin kho nawlan oh te daebabipaw hiinnaw ah hoi kho nawlan oh, siapharan hae te kawhoitu hae balyn hanlan saw la sangpah oh cite kae ngia oh.3Tuh-e cyisahnaw tuh aening oun Khumtu Pachia malang ahoypaw te ry lan umpaw nynh thua.4Ccungccaw balyn nynh khumnaw mue hae sah lah byaccing kha nyh hae sah cite Pachia nynh a ry.5PawccecizePachia ccangkheit nynh a um;Pachia te ccungccaw hae laku kyaHopiatu CcungccapawKhri Jesu lu kheit rou nynh a um.6Aning nynh ccungccaw balynshawkhaw nawlanamaw kha a pyaku,—tuh-e tuh accyh azawpaw kya ccaekia a khanpaw nynh thua.7Tuh-e khylan kae tuh phunghotu lang, locceihtu lang, zynnaw te byaccing kha Zenta hae kya ccangpahtu lang khangpaw nynh ka thua. Byaccing nynh ka ho, ka hyn khyh. Khriccaawbuu kya Nopi hae8Te pise hae nynh hmin takyh kya thinrianaw te eikunaw um leite athyaapaw kuih kha hangte sawsang hae sah ci ka ry.9Tuhawte nopi hae nynh mah maethyaum leipaw boeining dohoypaw kha lawkute, ozia hoypaw te angaekuh lante ccaankuh hae sah lah, akhekuhpaw sang, sui, palee hae te amee rupaw boeining te ccaankuh nan hae sah;10Pachia tungvaw rawri sawtuanaw a hoipaw nopi hae nynh cyi lan accan thyhte ahoypaw cyisahnaw khate ccaankuh hae sah ci ka ry.11Nopi nynh tuh kawngaenaw abalynte daebabi lan ccangkuh sah.12Nopi nynh ccangpya lan, pise tungvaw kaw hoi lan ka ua khyh, daebabi lan zya um sah.13Pawccecize Adam tuh masaty rae athua, tukoute nynh Evi kha rae athua.14Adam kha hynpya thua khyh; nopinung kha hynpya thua zah misei lang a tang.15Thuasalama nopi hae nynh ningccehoyte zynnaw, sungsakunaw te thyaanaw kya atyn hae ze, ccaawsaahnaw kya khum athua cih hae. Khriccaawbuu Pastor hae1Ccungccaw lu kheit nynh pastor lang a tang ry ze, ahoypaw ryalaw kha a rypaw nynh thua cipaw tuh akyhpaw bya nynh thua.2Khriccaawbuu pastor tuh ccaenaw um leipaw athua hahe cih, zu lu kheit kyalya a hoipaw, a sungkuh khopaw, a lungkyhrarihpaw, a ozia hoypaw, mikhia do-oihthyapaw te a ccangpah thyapaw athua cih;3a zu-ae leipaw, a puatho leipaw, a lungnepaw, pekumaeku mang leipaw, phua eih duaa leipaw athua cih,4a innbyn kha kou hoy lan a ukpaw, a ccaaw hae kha aphuinphuin te kawngae thyanaw te sawtua thyanaw a hoisah hae paw athua cih;5pawccecize lukhakheit nynh a innbyn kha a ukthya khyh ze, pawtemou Pachia khriccaawbuu tuh a do-oih kho cih?6Zyntu thawpaw thua lan khyh, tuhte athua ze, a lysakuh sei cih zah Satan hawte detahnaw lungkhu lang a phungkuh sei cih.7Tuhpiaze atolang e ccungccaw hae kya thehoy ccoupaw athua cih; tuhkhyhze tuh thethyanaw te Satan kaang lungkhu lang a phungkuh sei cih. Khriccaaw Piccan hae8Tuhawte Khriccaaw piccan hae tuh sawtua lan umpaw athua cih hae, a lae pheipaw, misutui eih neihpaw te phua elang a karankuhpaw thua lan khyh hae.9Mawtemaw nykunaw thinlung athyaapaw khate zynnaw byakhupaw kha varyng a kyngkuhpaw athua cih hae.10Minmin tuh masaty syntawtua athua cih hae zah, ccaenaw a um khyh hae ze Khriccaaw piccan rya kha lah hae sah.11Tuhawte mih zu hae mah sawtua lan umpaw athua cih hae, ming hae thethya ho hae paw thua lan khyh hae, a sungkuh khopaw, pawpaw balyn kya a lungzipaw athua cih hae.12Khriccaaw piccan hae tuh zu lu kheit kyalya a hoipaw athua cih hae, mih ccaaw hae te mih innbyn kha kou hoy lan a ukpaw athua cih hae.13Pawccecize Khriccaaw piccan rya kha kou hoy lan a lah hae paw tuh mimaw elang ahoypaw thadynnaw kha mue hae zah Khri Jesu kya umpaw zynnaw kya myarya lepaw rawhoynaw kha a hoi hae. Myarya Lepaw Byakhupaw14Aro mawze na kalan thua lan ka ngaehoi, thuasalama na kalan hynh-e ccaw kae zei rynawpaw tuh,15taloi kae thua khyh ze, byaccing kya-e atungpi te abingkunaw athuapaw, a hiinpaw Pachia kya-e khriccaawbuu athuapaw Pachia innbyn kya pawtemou um lan accan cipaw na nyku nawlan nynh thua.16Ah beiknaw kya-e byakhupaw alenaw zia hynh eiku lanpaw um khyh:Pachia tuh pynsaw lanteyn langkuh vae zah,Muisaw liate thyaaccousah athua vae,vaaw hae nynh a muih vae hae.Zenta hae kya ho athua vae,laephi pynpi kya amaw khaa zyn vae hae.Phu-enaw te vaawlanglawthung athua vae.Ahme Leipaw ccangpahtu hae1Nyalang ccyh kya ccungccaw abang nynh lingthyapaw muisaw hae te raerangsaro hae ccangpyanaw kha oun ngae cih hae zah zynnaw kha oun vua cih hae cite Muisaw nynh ccaerarih lan a ho.2Tuh-e ccangpyanaw tuh mimaw nykunaw thinlung kha zaezae linpaw sivaw te pingsah athua hae paw mihyn hae kya-e thyaruhnaw kyate nynh a mue hae.3Minmin nynh zuvaw tangnaw kha a khee hae, byaccing kha nyte a zyn hae paw nynh lungtuabya hote ae lan cite Pachia nynh a raepaw looh hae kha sung lan kaw a pya hae.4Pawccecize Pachia nynh a raepaw miakaw tuh marya ahoy; lungtuabya hote lawku lanze pawpaw mah sung lanpaw um khyh.5Pawccecize pawpaw balyn tuh Pachia bya liate thuasah, sawsangnaw liate thuasah thyaasah athua. Khri kya-e Ryalahtu Hoypaw6E ccangpyanaw hae hynh nang nynh uteno hae kha na hopya hae ze, nang tuh Khri Jesu ryalahtu hoypaw na thua cih zah, na zui vae paw zynnaw te ahoypaw ccangpyanaw kya-e bya hae khate kua na thua cih.7Thuasalama Pachia te asekuh leipaw phungpaw huataw hae kha vua lah, Pachia te asekuhpaw hiinnaw kya hiin lan la ccangkuh.8Pawccecize pynsaw te asekuhpaw ccangkupaw tuh ccapyh nynh athane, thuasalama Pachia te asekuhpaw hiinnaw tuh pawpaw balyn kya athane, pawccecize tuh-e tuh atu e hiinshe te yn thua cih paw hiinshe hanlan athane cih cite byakinkunaw a um.9Tuh-e tuh ahmepaw bya thua zah khaleih lawku lan accanpaw bya nynh thua.10Tuh-e thanenaw hanlan aening tuh thawbang zuakute rya ah lah oh; pawccecize aening tuh ccungccaw balyn hanlan, abyapi lante zyntu hae hanlan Khumtu athuapaw, a hiinpaw Pachia kyakhe ngaehoinaw ah hoi oh.11E uccaw hae kong hynh tynkaring lan hopah hae lah la ccangpah hae.12Na kum ano keiccuze hum nynh san ae la dothatheih nan sah; thuasalama nang tuh bya kya, ozia kya, sungsakunaw kya, zynnaw kya te thyaapapingnaw kya zyntu hae nynh dosuinkupaw la thua.13Kamaw kae thua makhia ccungccaw hae kya Ccathyaa riapyanaw, phunghonaw te ccangpyanaw kha pekite la rae.14Khriccaawbuu pastor hae nynh na tungvaw mih kuih a khan lya hae ze, profehbya liate phypya na thua zah na muepaw muisaw lasung kha pawlangria leite la um nan.15Ccungccaw balyn nynh na kaethungnaw kha a muih ccaw hae, e uccaw hae hynh palei la tua lah, thawte la zuakuh.16Namaw te namaw thuasah, na ccangpyanaw kya thuasah raeringkuh lah, tuh-e ccangpyanaw kya po la tyn; pawccecize tuhcite na cyinaw liate namaw kha thuasah, na hopaw a thaetu hae kha thuasah parouhte na khum cih hae.
Zyntu hae Ryalaw1Kum tang huapaw kha la pe nan, paaw hawte la soihbia. Kum no huapaw pise hae kha neitaw hae hawte,2kum tang huapaw nopi hae kha nung hae hawte, kum no huapaw nopi hae kha ccia hae hawte thinlung thyaararih lante la ccuepe hae.3Nomae ccaccing athuapaw nomae hae kha saw la tua hae.4Thuasalama nomae lukhakheit nynh ccaaw hae tuhkhyhze mintaw hae a hoi lanze, tuh-e ccaaw hae te mintaw hae nynh mih innbyn elang cyi lanpaw mih beiknaw rya kha masaty ccangkuh hae sah lah, mih nung mih paaw hae te mih minnung mih minpaaw hae kha do-oihru hae sah; pawccecize tuh-e tuh Pachia lungrypaw nynh thua.5Nomae ccaccing thua zah a makhaete a umpaw nopi tuh Pachia kha ngaehoikuh zah sawsangnaw te ngianaw kyakhe nynh khuazi khuadae po atyn.6Thuasalama pynsaw hoysahnaw kya a hiinpaw nomaenung tuh a hiin pite a chihpaw nynh thua.7Minmin tuh ccaenaw a um khyh ccaw hae, hynh-e kawbya hae hynh la pya hae.8Lukhakheit nynh a puizia hae kha a do-oih khyh lanze, abyapi lante a innbyn hae kha a do-oih khyh lanze, zynnaw a vuapaw thua zah zynleitu laeze houh athah huapaw nynh thua.9Kum sung taruh kaw e nomae tuh nomae ccazing kya teebua nan sah, pise lu kheit kyalya zu a la thuapaw,10ahoypaw ryalaw hae hanlan thehoy ccousah hae paw; imua hae kha a kua ze, mikhia hae kha a thuasah hae ze, mithyaa hae ccu kha a singpya ze, riathae hae paw kha lunghoysah ze, ahoypaw ryalaw miakaw kha zuakute a law ze, ccazing kya la teebua sah.11Thuasalama kum ano huapaw nomae hae kha tuh la nuee hae. Pawccecize ohhuaku rynaw he a hoi hae tuh Khri kha rawsete vawpaw bua a hoi ry hae,12masaty e mih zynnaw kha a vua vae hae keiccuze minmin tuh seibenaw a mue hae.13Tuhlaeze, inn kheit kyate inn kheit kalan pae hae zah thawnawpaw kha a ccangku hae. Mih thawnaw kyalya thua leite thanry hae paw mah thua hae zah ho lan accan leipaw a hopaw, a ccukuh buapaw nynh athua hae.14Tukeiccuze a rhawtupaw nynh saryanaw lanpaw kha ccyhhoy a pya khyh nawlan, kum a nohua hae paw nomae hae tuh vawpaw la hoi hae sah, ccaaw la sah hae sah, innloo la do-oih hae sah cite ka ry.15Pawccecize abang tuh cceihsei hae zah Satan nulang a zuikuh vae hae.16Zyntu lukhakheit nynh nomae hae a hoi ze, amaw nynh minmin kha do-oih hae sah lah, khriccaawbuu kha tavuan pya thua nan sah. Tuhteze nynh nomae ccaccing hae kha khriccaawbuu nynh a do-oih kho cih.17Ahoyte a uk hae paw pastor hae, abyapi lante phunghonaw kya te ccangpyanaw kya ryalah hae paw tuh sawtuanaw leit ning te ccou lan angaekuh hae cite tua lanpaw nynh thua.18Pawccecize Ccathyaa nynh, “Ccatan a tin cciamangpaw tangnuapaw mung kha na bucceih lan khyh,” a ci, te “Ryalahtupaw tuh a ryalaw mee mue lan accan,” bua a ci.19Ccaekia lu ning, tuhkhyhze lu thum a um khyh ze, pastor sei a benaw hae kha nawccawpah nan hae.20Mingccang hae nynh mah a ri ccaw hae, a sei hae paw kha ccungccaw balyn malang khe pe hae.21Lu kheit laeze lu kheit kha maedo huanaw kharouh hoi leite, laesahnaw te pawpaw sanmah na cyi khyh nawlan, Pachia te Bawipaw Jesu Khri malang thuasah, popaw vaaw hae malang thuasah e uccaw hae hynh nang nynh na zui nawlan, bya kae tawsya.22Hum ccungccaw tungvaw sanmah na kuih palou la khang nan. Milae seinaw kha mah la neethungkuh bua nan, namaw te namaw kha la thyaasakuh.23Na vue elang te leih na ccinawpaw hanlan, tui kyalya kha la neih nan, thuasalama misutui beihtaraw kha la mangbia.24Ccungccaw abang seinaw tuh raerae alangkuh, mih seinaw hae tuh byapianaw kalan laanmawty vae. Ccungccaw abang seinaw tuh nyalangte nynh alangku.25Tuhawte ccungccaw abang kya-e ahoypaw ryalaw tuh raerae alangkuh, te alangkuh loh leipaw ahoypaw ryalaw hae mah thuruh kho thua lan khyh.1Pachia a min te a ccangpyanaw kha thethyaccou khyh nawlan, see hae balyn nynh mih bawi hae kha myarya sawtua lan accan cite tua hae sah.2See hae nynh zyntu athua hae paw mih bawi hae kha uteno nynh kae thua cite pawlangria leite um nan hae sah. Thanenaw a ccou hae paw tuh zyntu hae te sungsah hae paw athua hae keiccu mih bawi hae kha houh ryalawpah hae sah. Ccangpyaseinaw te Ahmepaw Hoirumnaw
Hynh-e uccaw hae hynh la ccangpah hae lah la hyy hae.3Lukhakheit nynh ccanglang te a ccangpya ze thuasah, ah Bawipaw Jesu Khri bya ahmepaw kha a nawccaw khyh ze thuasah, Pachia lante ccianaw te accawkuhpaw ccangpyakunaw kha a nawccaw khyh ze thuasah,4aning tuh pawsang ny leite a lysakuhpaw nynh thua. Aning tuh byalungnaw te bya-eikunaw a rypaw nynh thua. Tuh-e hae kyate eiungnaw, pekunaw, thethyahonaw, ahoy leipaw lunghiinnaw,5byaccing a hoi leipaw te thinlung kya bya a tuathya lei hae paw ryte thawte eikunaw kha a pousah, Pachia rawrinaw tuh muenawpaw nynh thua cite a tua hae. Khahcihawpaw ccungccaw hae kha la sibia hae.6Lungryachikhaekute Pachia lante cciapaw tuh myarya lepaw muenaw nynh thua.7Pawccecize aening nynh laephi kalan pawsang mah ah thuakhae khyh oh; pawsang mah ah poukhae kho lan khyh oh.8Aepaw te boeiningsungpue ah hoi oh paw khate ah lungryachikhaeku lanpaw nynh thua.9Thuasalama hoirum a ry hae paw tuh tuhounaw lungkhu lang, kaang lungkhu lang, ngaeenaw patae te ronaw a thuakhaepaw ryduaanaw lungkhu lang nynh a phungkuh cih hae. Tuh-e hae nynh ccungccaw hae kha ronaw te zonaw kya a phungsaku hae.10Pawccecize phua eih rynaw tuh hoyleinaw phuin balyn kya-e atharuipi nynh thua. Ccungccaw abang nynh phua eih a ry hae keiccuze zynnaw kyate a cceihsei vae hae, te mimaw te mimaw kha ngaethyanaw pataepi khate a thuingku hae. Zynnaw kya-e Ahoypaw Rhawtuknaw11Thuasalama, pou Pachia ccungccapaw, nang tuh tuh-e uccaw hae kha sibia lah dingnaw, Pachia rawrinaw, zynnaw, sungsakunaw, ngaesangnaw te lungnenaw kha hoi lan zuaku tua.12Zynnaw khungtaekunaw kya na thawzung balyn kha thuatua, zungzae hiinnaw kha varyng kyngkuh. Tuh-e kalan nang tuh ko na thua zah ccaekia patae malang ahoypaw ccaekia phe na khan vae.13Pawpaw balyn hiinnaw a pyatupaw Pachia malang te Pontias Pilat malang ahoypaw ccaekia a khangtupaw Khri Jesu malang, nang kha bya kae tawsyapaw tuh,14ah Bawipaw Jesu Khri yn langkuh cia nang nynh athupaw beku leite, seibe lanpaw a um lei lante, kawbya kha la zui cipaw nynh thua.15Tuh-e langkunaw tuh Pachia nynh amaw accyh kya yn langsakuh cih. Aning tuh thehoy ccoupaw, amaw kyalya Uktu athuapaw, siapharan hae Siapharan te bawi hae Bawipaw nynh thua.16Amaw rou nynh chi kho leinaw a hoi, hum nynh san a naeku kho leipaw awnaw kya a umpaw nynh thua; amaw kha hum nynh san muih boi khyh zah muih kho khyh; sawtuanaw te zungzae thungnaw tuh amaw kya um sah. Amen.17Atu she kya a hoirum hae paw nynh a lysaku khyh nawlan hae, atyn leipaw hoirumnaw kha a doliaku khyh nawlan hae kawpya hae, thuasalama aening ah lungtua nawlan pawpaw balyn phe beih lan oun pyatupaw, a hiinpaw Pachia kha a doliaku nawlan hae kawpya hae.18Minmin nynh ahoypaw ryalaw kya a hoirum nawlan hae, a hysahpaw athua nawlan hae te neethungbua lan a paccynku nawlan hae ahoypaw ryalaw lan kawpya hae.19Hiinnaw ccaccing kha a ccou nawlan hae, malang ccyh elang ahoypaw sisua tungpi kha mimaw hanlan a ccakhungkuh cih hae. Athangnaw Byataw20Timote, na kya ae apsya hae paw kha la rin. Anungsikuhpaw te accakaepaw byahokupaw te ahme lei lante nynaw a ci hae paw konglang eikunaw kha la sibia.21Tuh-e ahme leipaw nynaw kha lawkute ccungccaw abang nynh zynnaw kha a poutaw vae hae.
Thawccinaw tuh nae tungvaw la um vae sah.
Bible Society of Myanmar