Read 2 PETER 1

2 PETER1

Beihlangnaw

¹Jesu Khri seepaw te locceihtupaw kae, Simon Peter nynh ah Pachia te Khumtu Jesu Khri kya-e dingnaw liate kae zynnaw te alokuhpaw, aphutepaw zynnaw a hoi hae paw kalan ccaw kae ky oh.

²Pachia te ah Bawipaw Jesu nynaw liate thawccinaw te daenaw tuh nae kya la lungthung sah. Pachia Konaw te Ponaw

³A phu-enaw te a hoynaw kha ccoubua khylan aening oun kotupaw amaw kha nynaw liate, hiinnaw te Pachia rawrinaw te asekuhpaw uccaw balyn kha Pachia a thungnaw nynh aening oun pya vae.⁴Tuh-e phu-enaw te hoynaw liate aphutepaw te myarya alesaepaw byakinpyakunaw hae kha aening oun pya vae; tuh-e byakinpyakunaw liate nanning tuh chiisaw rynaw keiccu laephi kya a umpaw ronaw kyate na lue oh zah, Pachia thuanaw a neethungkuh bua hae paw na thua nawlan oh nynh thua.⁵Hynh-e keiccuze nae zynnaw kya hiinzia hoypaw kha thuasah, hiinzia hoynaw kya nynaw kha thuasah biachih lan zuakuh oh,⁶nynaw kya ahmaw sungku khonaw kha thuasah, ahmaw sungku khonaw kya ngaesangnaw kha thuasah, ngaesangnaw kya Pachia rawrinaw kha thuasah biachih oh.⁷Pachia rawrinaw kya uteno thawccikunaw kha biachih oh lah, uteno thawccikunaw kya sungsakunaw kha biachih oh.⁸Pawccecize hynh-e uccaw hae hynh nanning kya um zah alungthung lanze, tuh-e hae nynh ah Bawipaw Jesu Khri nynaw kya athae thaesah leite, thanenaw pya leite ae nung lan khyh oh.⁹Hynh-e uccaw hae ahoboupaw ccungccaw tuh a mitmoh zah asawnaw lang muih kho khyh; arynpaw seinaw kyate thyaasah ka thua vae cipaw kha phe a ning.¹⁰Tukeiccuze uteno hae, nanning konaw te ponaw kha tynsah khylan zuakuh paleih oh; pawccecize tuhte na cyi oh ze, na khuliakuh boi lan khyh oh.¹¹Tuhcite nanning tuh ah Bawipaw te oun Khumtu Jesu Khri kya-e zungzae atynpaw peenaw lungkhu lang teenaw kaw kha phe ccing lan ae pya cih oh.

¹²Tukeiccuze tuh-e uccaw hae tuh na nyh oh zah na kyngku oh paw byaccing kya na tyn vae oh zemah, nanning kha tuh-e uccaw hae kong zungzae liathuisah lan kae tuh ka paccynkuh.¹³Hynh-e pyn kya ka um lungkhu balyn, nanning kha tuhcite liathuisahte lungthosah lanpaw tuh ahmepaw nynh thua cite ka tua.¹⁴Ah Bawipaw Jesu Khri nynh kae kha yn muihsah vae hawte, hynh-e ka pyn tuh aro mawze ka cciataw cih cipaw ka ny.¹⁵Ka chih koute hynh-e uccaw hae hynh palei na liathui nawlan oh thawte ka zuakuh cih. Khri Phu-enaw Muihtu hae

¹⁶Pawccecize ah Bawipaw Jesu Khri a thungnaw te yn thuanaw kong kha nae kalan he kae hopya vae oh ze, thyaruhhahi lante rae huatawpaw phungpaw hae kha kae mang khyh, kaening tuh amaw a lesaenaw kong kha mit te a muih hae paw ccaekia hae nynh kae thua.¹⁷Pawccecize sawtuanaw te phu-enaw kha Paaw Pachia kyate aning nynh he a mue tuh, “E paw tuh ka sungsahpaw ka Ccapaw nynh thua, amaw kya ka lungrythua,” cite Alesaepaw Phu-enaw kyate amaw kalan roi yn thua.¹⁸Vaawlang te yn thuapaw tuh-e roi tuh athyaapaw mua vawlan amaw ryte kae um lyakhe kae thae.

¹⁹Tuhpiaze aening nynh houh ariapaw profeh hae bya kha mah ah hoi ung oh. Nae thinlung kya khua yn dae zah nizy yn langku makhia, tuh-e bya tuh mohnaw kya a awpaw awnaw hawkhate pekite na ngae oh aho.²⁰Ccathyaa kya-e profehbya hynh lukhakheit nynh amaw a rynaw te asuilan a leihkupaw thua khyh cipaw hynh masaty nyh oh.²¹Pawccecize profehbya tuh ccungccaw rynaw thyhte yn thua boi khyh, Pachia kya-e athyaapaw ccungccaw hae tuh Thyaa Muisaw nynh a cciakhae hae thyhte nynh a ho hae. Lingthya Profeh hae te Detahnaw

¹Thuasalama Israel hae laku kya lingthya profeh hae mah a la um hae, tuhawte ahme leipaw ccangpahtu hae mah nae kya oun langkuh cih hae. Minmin nynh ccungccaw arosah thyapaw ahme leipaw ccangpyakunaw kha aphiruh lante yn teekhae cih hae; mimaw a shawkhawtu hae paw Bawipaw kha heize phe vuate, mimaw tungvaw arangte ronaw kha a thuakhaekuh cih hae.²Ccungccaw patae nynh anungsikuhpaw mih ziazae kha a zui cih hae zah minmin keiccuze byaccing laanpi tuh thethya a ho cih hae.³Karankunaw thinlung keiccuze nanning kha hynbya te amia ae ccungnahkuh cih oh. Langmawlya mawte minmin byapianaw tuh amaw um lan um huataw khyh, minmin kya-e ronaw mah ih khyh.

⁴Pawccecize Pachia nynh seinaw a raepaw vaaw hae kha haang khyh hae; hell lungkhu lang sah hae zah byapia khylan nungdete mohnaw sivawrui te a khii hae.⁵Langmawlya laephi hynh mah la haang khyh, Pachia rawrih lei hae paw a umnaw hae laephi vawlan tuipayn a ynsaku lyaze dingnaw phung a hotu Noah te ccangpaw lu sari kha a khum hae.⁶Sodom te Gomorrah khuapi hae kha detah hae zah buhhaw lang tangsahte a ro hae, Pachia rawri leite a hiin cih hae paw hanlan dosuinku lante a rae.⁷Ccungccaw hoylei hae paw kya-e ohhuaku rynaw nynh a lungvaw a sawsahpaw midingpaw Lot kha a luesah,⁸(pawccecize tuh-e midingpaw tuh minmin kya a um lyaze kawbya pawlangria lei hae paw mih cyisahnaw hae kha nin takyh a muih a thae keiccuze midingpaw tuh a lungvawsaw).⁹Pachia rawrih hae paw kha tuhounaw kyate pawcihtemou luesah lan cipaw te atazae lei hae paw kha detah khylan byapianaw nin hanlan pawcihtemou nungde lan cipaw kha Bawipaw nynh a ny.

¹⁰Abyapi lante, anungsikuhpaw pynsaw rynaw te asekuhpaw chiisaw rynaw a zui hae paw te kawhoinaw pawlangria lei hae paw kha pawcihtemou detah lan cipaw kha Bawipaw nynh a ny. Minmin tuh apua-atho hae paw, mih ry thyhte a um hae paw, mih phu-epaw kha thethya ho lan a rih lei hae paw nynh thua hae.¹¹Vaaw hae tuh minmin laeze thunghua hae zah mih thawsaehua zemah, Bawipaw muihnaw kya tuh minmin tungvaw saryate seibenaw kha rae khyh hae.¹²Thuasalama minmin tuh kyng khylan te chia khylan rae athuapaw, tuanaw hoi leipaw loramsaw hae hawte, mimaw nynh a ny lei hae paw uccaw hae kong kha thethya a ho hae; minmin tuh tuh-e loramsaw hae ryte ro athua cih hae.¹³Mih cyiseinaw hanlan detahnaw a mue cih hae. Khuadae ccyh kya hoysahpaw kha minmin nynh lungrythuanaw lang a ria hae. Nanning ryte poi na tuakheih lya oh khe, ccungccaw lingte a hoysah hae, minmin tuh akalouhkuhpaw te athupaw abekuhpaw nynh thua hae.¹⁴Mih mit tuh milae zu milae vawpaw kya sei rynaw te phe beih zah, sei leite um kho khyh hae, mih lungtyn leipaw ccungccaw hae kha soih hae zah, mih thinlung tuh karankunaw a hoi, minmin tuh thyalawpaw ccaaw hae nynh thua hae.¹⁵Minmin nynh ahmepaw laanpi kha vua hae zah a cceihsei vae hae. Beor ccapaw Balaam laanpi kha a zui hae. Balaam tuh hoyleinaw raenaw kyate muepaw amee kha a rypaw nynh thua.¹⁶Thuasalama a cyiseinaw hanlan aning tuh thuihei athua; byaho leipaw lann nynh ccungccaw roi lante byaho zah tuh-e profehpaw a ngaeenaw kha a khee.

¹⁷Hynh-e hae tuh tui a um leipaw tuisung hae, khisan nynh a mungpaw maeking hae nynh thua hae. Minmin hanlan marae zipaw mohnaw kha zungzae nungpya athua.¹⁸Pawccecize a cceihseipaw ccungccaw hae kyate oun lue takaw hae paw kha accakaepaw pookunaw bya te thuasah, pynsaw rynaw te thuasah, ohhuakunaw te thuasah minmin nynh a soih hae.¹⁹Ming hae kha luenaw kong byakinpakuh hae salamah, mimaw tuh ronaw see hae nynh thua hae; pawccecize ccungccaw tuh hankhakheit nynh a tae lanze, aning tuh tuh-e see nynh athua.²⁰Pawccecize Bawipaw te Khumtu Jesu Khri nynaw liate laephi nungsikunaw kyate a lue kou hae te, tuh-e hae kya kaang bua kae hae zah tuh-e hae nynh a tae hae lanze, nyalang e minmin thuanaw tuh atakaw laeze houh a seihua vae.²¹Pawccecize adingpaw laanpi kha a nyh kou hae te, minmin kalan pya athuapaw athyaapaw kawbya kyate paleihtawku lae tuh tuh-e adingpaw laanpi kha a la ny khyh hae ze mih hanlan ahoyhua.²²Thuasalama,“Ui nynh amaw a lua kha bua a ae,”te,“Voh tuh sing koute tuiccua kyabua a ohkuh,”a ci hae paw ahmepaw phungtangbya thyhte minmin kya acyikuh. Bawipaw Rungnaw Byakinpyakunaw

¹Sungsah hae paw, hynh-e vaeningnaw ccaky hynh atu nae kalan kae zei. Ccaky ccangning kyahin nanning kha bua nysah thui te athyaapaw nae thinlung kha kae thosah oh.²Langmawlya athyaapaw profeh hae nynh a hoty hae paw bya te Bawipaw Khumtu nynh nae locceihtu hae kyate a hopaw kawbya kha na liathui nawlan oh nynh kae zei.³Masaty na ny lan oh paw tuh: nyathyakou ccyh kya, mimaw ryduaanaw thyhte a hiin hae paw ccungccaw saryatu hae oun langkuh cih hae.⁴Minmin nynh, “Amaw yn thuanaw lanpaw byakinpyakunaw tuh teimou a um? Pawccecize minpaaw hae a i ccyh hae kyate tho zah pawpaw balyn tuh raenaw athonaw kya hawmawte nynh atu mah po acyiku,” cite oun ho cih hae.⁵Pawccecize langmawlya Pachia bya liate vaawlang tuh la um zah, laephi hynh mah tui kyate yn langkuh zah tui te raepaw nynh thua,⁶tuh lyaze laephi tuh tui nynh khaleih vu zah phe aroh cipaw kha minmin nynh a ny hae zemah pawlangria khyh hae.⁷Thuasalama atu a umpaw vaawlang te laephi hynh byapianaw nin te Pachia pawlangria leipaw ccungccaw hae ronaw nin kyacia maee te ro khylan tuh-e bya liate phang ccy athua.

⁸Thuasalama sungsah hae, Bawipaw hanlan nin kheit tuh kum thong kheit hawte, kum thong kheit tuh nin kheit hawte athuapaw hynh-e uccaw ccangkheit hynh ning nan oh.⁹Ccungccaw abang nynh a thysung cite a tua hae hawte, Bawipaw tuh byakinpyakunaw kong lante a thysung khyh. Lu kheit san ro leite ccungccaw balyn a ngaesiku nawlan hae a ry keiccu nynh aening kya a lungsae.¹⁰Thuasalama Bawipaw Nin tuh khuazi kya miruh a thua hawte nynh yn thua cih. Tuh-e Nin kya vaawlang tuh myarya ccaepaw siaruanaw khate azo cih, vaawlang a umpaw uccaw hae tuh maee nynh oun u cih hae zah marya oun roh cih. Laephi te a vawlan um hae paw mah phe athang cih hae.

¹¹E uccaw hae balyn tuh ro athua cih keiccuze athyaapaw hiinzia te Pachia rawrinaw kya pawcihawpaw ccungccaw lang mou thua lan na ccan oh?¹²Pachia Nin yn thua lanpaw kha na ngaw oh keiccuze tuh-e Nin tuh arangte yn thuasah nawlan hoyte zuakuh oh. Tuh-e nin kya vaawlang tuh maee te ro athua cih, vaawlang e uccaw hae kha maee nynh oun u cih hae.¹³Tuhzemah aening tuh bya oun kinpyaku thyhte dingnaw a umnaw vaaw thawpaw te laephi thawpaw kha nynh ah ngaw oh. Nyathyakou Hyynaw te Athangnaw Sawsang

¹⁴Tukeiccuze sungsah hae, tuh-e uccaw hae tuh na ngaw oh keiccuze athupaw um leite, ccaenaw hoi leite daenaw kya amaw nynh ae muih nawlan oh thawte zuakuh oh.¹⁵Aening ah sungsah oh paw, ah unopaw Paul nynh mah amaw kya pya athuapaw hawnaw thyhte nae kalan phe a zei vae hawte, ah Bawipaw kya-e ngaesangnaw tuh khumnaw nynh thua cipaw la nyh oh.¹⁶Aning nynh a ccaky hae balyn kya mah hynh-e uccaw hae kong hynh a la ho. A ccaky hae kya thaethya lan arupaw abang a um. Tuanaw a zya hae paw te thinlung atyn lei hae paw nynh ccangpaw Ccathyaa hae kha asuilan a mae hae hawte mimaw ronaw hanlan a maeku hae.

¹⁷Tukeiccuze, sungsah hae paw nanning, hynh-e uccaw hae hynh na nyty vae oh hawte, ccungccaw hoylei hae kya-e cyiseinaw khate cciakhaesei na thua khyh nawlan oh, naemaw na tynnaw oh kyate na khuliaku khyh nawlan oh la raeringkuh oh.¹⁸Ah Bawipaw te Khumtu Jesu Khri a thawccinaw te amaw nynaw kyakhe lethung oh. Amaw kyakhe phu-enaw tuh atu te zungzae cia la um sah. Amen.

Bible Society of Myanmar

https://app.library.bible/content/1a340f5ae072b2f4