Read 1 JOHAN 1

1 JOHAN1

Hiinnaw Bya

¹Athotakawnaw kyate a um vae paw, kaening nynh kae thaepaw, kae mit te kae muihpaw, hoyte kae do zah kae kuih te phe kae haetuapaw hiinnaw Bya te asekuhpaw uccaw kha kae hopya oh.²Tuh-e hiinnaw tuh yn langkuh vae, kaening nynh kae muih zah ccaekia kae khan vae; Paaw ryte la um hae zah kaening kya yn langkuhpaw tuh-e zungzae hiinnaw kong tuh nae kalan kae langsahpya oh.³Nanning mah kaening ryte vaeccawkunaw na hoibua ccaw oh cite kae muihpaw te kae thaepaw kha kae hopya oh; kaening tuh Paaw te a Ccapaw Jesu Khri ryte vaeccawkunaw kae hoi.⁴Kae lungtuanaw accing nawlan kaening nynh hynh-e hae hynh nae kalan kae zei. Pachia tuh Awnaw

⁵Amaw kyate kae thae zah nae kalan kae hopya oh paw bya tuh hynh-e nynh thua: Pachia tuh awnaw thua zah amaw kya mohnaw kharouh um khyh.⁶Aening nynh amaw ryte vaeccawkunaw ah hoi oh cite ah ho oh zah mohnaw kya ah um oh ze, ah hyn oh paw thua zah byaccing kya ah hiin khyh oh.⁷Thuasalama Pachia tuh awnaw kya a um hawte, aening nynh awnaw kya ah um oh ze, aening tuh lu kheit te lu kheit vaeccawkunaw ah hoi oh zah, a Ccapaw Jesu Khri chiise nynh seinaw balyn kyate oun thyaasah.⁸Aening nynh seinaw ah hoi khyh oh cite ah ho oh ze, ahmaw te ahmaw ah lingkuh oh paw thua zah, byaccing tuh aening kya um khyh.⁹Aening nynh ah seinaw kha ah phyku oh ze, Pachia tuh a lungzipaw te a dingpaw athua keiccuze ah seinaw kha oun ngaethya cih zah dingleinaw balyn kyate oun thyaasah cih.¹⁰Aening nynh ah sei khyh oh cite ah ho oh ze, Pachia tuh hynbya a hopaw lang ah tangsah oh zah, a bya tuh aening kya um khyh. Khri tuh Oun Bawmtu

¹Ka ccaaw taraw hae, nanning nynh na sei khyh ccaw oh cite hynh-e hae hynh nae kalan kae zei. Lukhakheit nynh a sei ze, aening oun bawmtupaw ah hoi oh; aning tuh Paaw ryte a umkheih hae paw adingpaw Jesu Khri nynh thua.²Aning tuh aening seinaw hanlan seishawnaw silawnawpaw nynh thua; aening seinaw hanlan kyalya thua leite, laephi ccungccaw hae balyn mih seinaw hanlan mah athua.

³Aening nynh a kawbya hae kha ah zui oh ze, amaw kha ah ny oh cipaw phe ria lan ah ho kho oh.⁴Amaw kha ka nyh cite ho zah a kawbya hae a zui leipaw ccungccaw tuh mihynpaw nynh thua; tuh-e paw kya byaccing um khyh.⁵Thuasalama humhung zemah a bya a zuipaw tuh Pachia sungsahnaw kha a kya accing ccaccing. Hynhcite nynh aening tuh amaw kya ah um oh cipaw ah ny oh.⁶Pachia kya ka um cite a hopaw nynh tuh Jesu Khri a hiin hawte a hiinbua aho. Kawbya Thawpaw

⁷Ka sungsah hae, nae kalan kawbya thawpaw kha ka zei khyh; atakaw te na hoi vae oh paw kawbya rynpaw kha nynh ka zei. Kawbya rynpaw tuh atakaw te na thae vae oh paw bya kha nynh thua.⁸Amaw kya te nanning kya ahmepaw kawbya thawpaw kha nae kalan ka zei, pawccecize mohnaw tuh zo zah ahmepaw awnaw tuh atu a aw vae.⁹Awnaw kya nynh ka um ci zah a uno kha a huapaw tuh mohnaw kya nynh a um ung.¹⁰A uno a sungsahpaw tuh awnaw kya tyn zah, ccungccaw khuliasaku lanpaw kha a lungkhu kya um khyh.¹¹Thuasalama a uno a huapaw ccungccaw tuh mohnaw kya um zah mohnaw kya nynh a ccia.Tuh-e mohnaw nynh a mit a mohsah keiccuze teilang nynh ka ccia cipaw nyhkuh khyh.¹²Ka ccaaw hae, Bawipaw min liatenae seinaw kha ngaethyaathua vae keiccuzenae kalan ccaw ka zei.¹³Paaw hae, atakaw tea la um vae paw amaw khana ny vae oh keiccuzenae kalan ccaw ka zei.Ccangvae hae, Satan khana tae vae oh keiccuzenae kalan ccaw ka zei.Ka ccaaw hae, Paaw khana ny vae oh keiccuzenae kalan ccaw ka zei.¹⁴Paaw hae, atakaw tea la um vae paw amaw khana ny vae oh keiccuzenae kalan ccaw ka zei.Ccangvae hae, nae thawsae zahPachia bya tuh nae kyaatyn keiccuze Satan khana tae vae oh, tukeiccuzenae kalan ccaw ka zei.

¹⁵Laephi te laephi kya a umpaw uccaw hae hynh sungsah nan oh. Ccungccaw lukhakheit nynh laephi kha a sungsah ze, Paaw sungsahnaw tuh tuh-e paw kya um khyh.¹⁶Pawccecize laephi kya a umpaw uccaw hae athuapaw pynsaw rynaw, mit te rynaw, te hiinnaw kong lante lysakunaw balyn tuh Paaw kya-e thua leite, laephi kya-e nynh thua hae.¹⁷Laephi te laephi uccaw duaanaw tuh azothya; thuasalama Pachia rynaw hawte a hiinpaw ccungccaw tuh zungzae atyn. Antikhri

¹⁸Ka ccaaw hae, atu ccyh tuh nyathyakou ccyh nynh thua. Antikhri yn thua cih cite na thae vae oh hawte, atu lya antikhri patae um vae hae; tukeiccuze atu ccyh tuh nyathyakou ccyh nynh thua cipaw ah ny oh.¹⁹Minmin tuh aening kyate a pou hae, thuasalama aening te sekuh bua khyh hae; pawccecize minmin tuh aening te aseku hae ze, aening ryte po a um cih hae. Thuasalama minmin nynh a pou hae paw tuh, aening te minmin balyn tuh ah sekuh vae khyh oh cipaw a langsaku hae paw nynh thua.²⁰Thuasalama Athyaapaw nynh nanning kha chitui ae thuh vae oh zah, pawpaw balyn kha na ny oh.²¹Nanning nynh byaccing kha na ny khyh oh keiccu nae kalan ccaw ka zei cipaw thua khyh. Nanning nynh byaccing kha na nyh oh zah, hynbya tuh byaccing te sekuh khyh cipaw na ny keiccu oh nynh nae kalan ccaw ka zei.²²Hummou mihynpaw tuh? Jesu tuh Khri thua khyh cite a eipaw ccungccaw tuh mihynpaw nynh thua. Paaw te Ccapaw kha a eipaw ccungccaw tuh antikhri nynh thua.²³Humhung zemah Ccapaw a eipaw ccungccaw tuh Paaw kha hoi khyh. Ccapaw kha a lehkhanpaw tuh Paaw kha mah a hoi.²⁴Tukeiccuze atakaw te na thae vae oh paw bya kha nae kya la tynsah oh. Atakaw te na thae vae oh paw bya nynh nae kya atyn lanze, nanning mah Ccapaw kya te Paaw kya na tyn cih oh.²⁵Khri nynh aening oun kinpyakupaw tuh zungzae hiinnaw nynh thua.

²⁶Nanning ling lan ae ry oh paw ccungccaw hae kong te asekuhpaw hynh-e ccaw hynh nae kalan ka zei.²⁷Thuasalama Athyaapaw kyate na mue oh paw chitui thuhnaw tuh nae kya atynpaw thua zah, nanning tuh lukhakheit nynh ccangpyaku na ho vae khyh oh. Tuh-e chitui thuhnaw nynh pawpaw balyn kha nanning ae ccangpya oh, tuh-e tuh akyhpaw thua zah hynpaw thua khyh; tuh-e nynh ae ccangpya oh thyhawte nanning nynh amaw kya na tyn cih oh.

²⁸Ka ccaaw hae, atu Ccapaw kya la tyn oh, tuhteze tuh Ccapaw he yn langku vae ze aening nynh zynkunaw ah hoi cih oh zah, he yn thua vae ze amaw malang maethyanaw ah ccou lan khyh oh.

²⁹Khri tuh ading cipaw na ny oh ze, dingnaw a raepaw ccungccaw miakaw tuh Pachia kyate a puipaw nynh thua cipaw na ny oh.

¹Aening tuh Pachia ccaaw hae cite ko ah thua nawlan oh, pawcihawpaw sungsahnaw mou Paaw Pachia nynh oun pya cipaw kha tuatua oh; aening tuh Pachia ccaaw hae nynh ah thua ccaccing oh. Laephi ccungccaw hae nynh Pachia kha a ny khyh hae keiccuze aening kha mah oun nyh khyh hae.²Sungsah hae, atu aening tuh Pachia ccaaw hae nynh ah thua oh. Nyalang aening tuh pawte nynh ah thua cih oh cipaw langkuh loh khyh. Thuasalama Khri he yn langkuh te, aening tuh amaw te loku bua lan cipaw ah ny oh; pawccecize aening nynh amaw kha athuanaw thathyhte ah muih cih oh.³Khri kya ngaehoinaw a hoipaw miakaw tuh Khri nynh ccipapya lan a um hawte ccipapya lan nynh a umbua.

⁴Humhung zemah a seipaw tuh kawbya a lawepaw nynh thua; seinaw tuh kawbya lawenaw nynh thua.⁵Khri tuh ccungccaw seinaw cciakhae khylan nynh yn langku cipaw na ny oh, amaw kya seinaw um khyh.⁶Khri kya atynpaw miakaw tuh seinaw rae khyh; seinaw palei a raepaw miakaw tuh Khri kha muih khyh zah ny mah nyh khyh.⁷Ka ccaaw hae, hum sanmah la lingsakuh nan oh. Khri tuh ading hawte dingnaw rya a lahpaw tuh miding nynh thua.⁸Seinaw a raepaw ccungccaw tuh Satan kya-e nynh thua, pawccecize Satan tuh atakaw te palei a seipaw nynh thua. Pachia Ccapaw yn langkupaw tuh Satan ryalaw kha ro khylan nynh thua.⁹Pachia kyate yn puipaw ccungccaw miakaw nynh tuh seinaw kha rae khyh; pawccecize Pachia ccacii kha tuh-e paw kya atyn, aning tuh Pachia kyate yn puipaw athua keiccuze sei kho khyh.¹⁰Pachia ccaaw hae te Satan ccaaw hae tuh hynhcite alangkuh: Humhung zemah dingnaw rya a lah leipaw te a uno a sungsah leipaw ccungccaw tuh Pachia kya-e thua khyh. Sungsakuh Oh

¹¹Pawccecize atakaw te na thae vae oh paw phungbya tuh hynhte nynh thua: Aening lu kheit te lu kheit sungsaku lanpaw nynh thua.¹²Satan kya-e thua zah amaw a neitaw a theihpaw Kain hawte thua nan oh sih. Pawccemou a neitaw kha a chia ci ze, amaw a cyisahnaw tuh hoy khyh zah, a neitawpaw a cyisahnaw tuh ading keiccu nynh thua.¹³Uteno hae, laephi ccungccaw hae nynh ae hua oh ze nae ngaeangthua nan sah.¹⁴Aening nynh ah uno hae kha ah sungsah oh keiccuze chinaw kyate hiinnaw kalan ah thua vae oh cipaw ah ny oh. A uno a sungsah leipaw ccungccaw tuh chinaw kya nynh atyn.¹⁵Humhung zemah a uno a huapaw tuh ccungccaw a theihtu nynh thua; ccungccaw a theihtupaw kya tuh zungzae hiinnaw um khyh cipaw na ny oh.¹⁶Khri nynh a hiinnaw kha aening hanlan a pyaku; tuhcite aening nynh Pachia sungsahnaw kha ah nythya oh; aening mah ah uno hae hanlan ah hiinnaw kha pyaku lan accan.¹⁷Thuasalama ccungccaw lu kheit nynh e laephi uccaw hae hynh mang a hoi pite a ryachipaw a uno kha muih zah ngaethyaumsahnaw a hoi khyh lanze, pawtemou Pachia sungsahnaw tuh tuh-e paw kya a um kho cih?

¹⁸Ka ccaaw hae, aening nynh ah bya te kyalya, khalang te kyalya sungsaku leite cyisahnaw te thanccingte sungsakuh oh sih.¹⁹Tuhteze nynh aening tuh byaccing te ah sekuh oh cipaw ah nyh cih oh zah Pachia malang ah thinlung zynkunaw ah hoi cih oh.²⁰Pawccecize ah thinlung nynh ahmaw kha sei oun be lanze, Pachia tuh aening thinlung laeze lesaehua zah pawpaw balyn kha pong a nyhpaw nynh thua.²¹Ka sungsah hae, ah thinlung nynh ahmaw hynh sei oun be khyh ze, Pachia malang zynkunaw ah hoi oh.²²Aening nynh a kawbya hae kha ah zui oh zah a lungrythuapaw ryalaw hae kha ah law oh keiccuze ah ngiaku oh paw miakaw kha amaw kyate ah mue oh.

²³A kawbya tuh e hynh nynh thua: Aening nynh a Ccapaw Jesu Khri min kha zyn lanpaw te Khri nynh kaw yn pya thyhawte lu kheit te lu kheit sungsaku lanpaw nynh thua.²⁴Pachia kawbya a zuipaw ccungccaw tuh Pachia kya tyn zah Pachia mah tuh-e paw kya atyn. Aening oun pyapaw Thyaa Muisaw liate Pachia tuh aening kya atyn cipaw ah ny oh. Ahmepaw te Ahme leipaw Muisaw

¹Ka sungsah hae, muisaw miakaw kha la zyn nan oh; muisaw hae kha Pachia kyate yn thuapaw tou, yn thua leipaw tou cipaw kha la syntawtua oh; pawccecize lingthya profeh hae patae tuh laephi vawlan oun langkuh vae hae.²Pachia Muisaw tuh hynhte na nyh cih oh: Jesu Khri tuh pynsaw lante nynh yn thua cite ccaekia a khanpaw muisaw miakaw tuh Pachia kya-e nynh thua.³Jesu Khri tuh pynsaw lante nynh yn thua cite ccaekia a khan leipaw muisaw miakaw tuh Pachia kya-e thua khyh. Tuh-e muisaw tuh antikhri kya-e nynh thua; antikhri tuh yn thua cih cite na thae vae oh hawte atu laephi kya a um vae.⁴Ka ccaaw hae, nanning tuh Pachia kya-e na thua oh zah minmin kha phe na tae vae oh; pawccecize nae kya a umpaw Muisaw tuh laephi kya a umpaw muisaw laeze alehua.⁵Minmin tuh laephi kya-e nynh athua hae, tukeiccuze minmin nynh laephi te asekuhpaw uccaw hae kong kha a hothya hae. Laephi ccungccaw hae nynh mih bya kha a ngaepya hae.⁶Aening tuh Pachia kya-e nynh ah thua oh. Pachia a nyhpaw ccungccaw nynh ah bya kha a ngae. Pachia kya-e athua leipaw ccungccaw nynh tuh aening bya kha ngae khyh. Tuhcite aening nynh ahmepaw muisaw te ahynpaw muisaw kha ah ny oh. Pachia tuh Sungsakunaw

⁷Ka sungsah hae, lu kheit te lu kheit sungsakuh oh sih, pawccecize sungsakunaw tuh Pachia kyate yn thuapaw nynh thua. Ccungccaw a sungsahpaw miakaw tuh Pachia kyate yn puipaw thua zah Pachia kha a ny.⁸Ccungccaw a sungsah leipaw tuh Pachia kha nyh khyh; pawccecize Pachia tuh sungsakunaw nynh thua.⁹Pachia nynh aening oun sungsahnaw alangkunawpaw tuh: Ccapaw liate aening nynh hiinnaw ah mue nawlan oh, Pachia nynh a hoi thypaw Ccapaw kha laephi vawlan yn saw.¹⁰Sungsakunaw cipaw tuh: Aening nynh Pachia kha ah sungsah oh cipaw thua leite, Pachia nynh aening kha oun sungsah zah a Ccapaw kha aening seinaw ngaethyanaw elang yn saw.¹¹Ka sungsah hae, Pachia nynh aening hynh myarya oun sungsah lanze, aening mah lu kheit te lu kheit sungsaku lan accan.¹²Hum nynh sanmah Pachia kha muih boi khyh. Aening nynh lu kheit te lu kheit ah sungsaku oh ze, Pachia tuh aening kya um zah, a sungsahnaw tuh aening kya accing.

¹³Pachia nynh a Muisaw kha aening oun pya vae keiccuze aening tuh Pachia kya ah um oh zah Pachia tuh aening kya a um cipaw ah ny oh.¹⁴Paaw nynh Ccapaw kha laephi Khumtu lang yn saw cipaw kaening nynh kae muih zah ccaekia kae khan.¹⁵Humhung zemah Jesu tuh Pachia Ccapaw nynh thua cite ccaekia a khanpaw tuh a kya Pachia um zah aning mah Pachia kya a um.¹⁶Pachia nynh aening hanlan a hoipaw sungsahnaw kha aening nynh ah nyh oh zah ah zyn oh.
Pachia tuh sungsakunaw nynh thua; sungsakunaw kya a tynpaw ccungccaw tuh Pachia kya tyn zah, Pachia mah tuh-e paw kya atyn.¹⁷Aening nynh byapia nin kya rawhoynaw ah hoi nawlan oh, sungsakunaw kha aening kya a ccingsah vae. Pawccecize e laephi vawlan aening tuh Khri hawte ah hiinbua oh.¹⁸Sungsakunaw kya tuh rinaw um khyh, accingpaw sungsakunaw nynh tuh rinaw kha ccaring a dee. Pawccecize rinaw tuh detahnaw te akyngkuhpaw thua zah, rinaw a hoipaw ccungccaw tuh sungsakunaw phe ccing lan hoi loh khyh.¹⁹Pachia nynh aening kha oun sungsah ty keiccuze aening nynh amaw kha ah sungsah oh.²⁰Ccungccaw lu kheit nynh, “Pachia ka sungsah,” ci zah, a uno kha a hua lanze, aning tuh mihynpaw nynh thua. Pawccecize phang a muihpaw a uno kha a sungsah leipaw ccungccaw nynh a muih leipaw Pachia kha pawtemou a sungsah kho cih?²¹Pachia a sungsahpaw nynh tuh a uno kha mah a sungsah hahe cih, acikuhpaw kawbya hynh Khri kyate ah mue oh. Zynnaw nynh Laephi A Tae

¹Humhung zemah Jesu tuh Khri nynh thua cite a zynpaw miakaw tuh Pachia ccaaw nynh thua. A saahtupaw Paaw kha a sungsahpaw miakaw nynh tuh Paaw kyate yn puipaw ccaaw kha mah a sungsah.²Aening nynh Pachia kha ah sungsah oh zah a kawbya hae kha ah zui oh ze, Pachia ccaaw hae kha ah sungsah oh cipaw ah ny oh.³Pawccecize Pachia sungsah cipaw tuh aening nynh a kawbya hae kha ah zui oh paw hynh nynh thua. A kawbya hae tuh phuripaw thua khyh.⁴Pawccecize Pachia kyate a puipaw miakaw nynh tuh laephi kha a tae. Laephi a tae khopaw taenaw tuh aening zynnaw nynh athua.⁵Laephi a taepaw tuh hummou? Jesu tuh Pachia Ccapaw nynh thua cite a zynpaw ccungccaw kha thua khyh tou? Pachia Ccapaw Kong Ccaekia

⁶Tui te chiise te yn thuapaw tuh Jesu Khri nynh thua. Tui te kyalya thua leite tui te chiise te nynh yn thua; ccaekia a khantupaw tuh Muisaw nynh thua, pawccecize Muisaw tuh byaccing nynh thua.⁷Pawccecize vaawlang kya ccangthum a um hae:⁸Muisaw, tui te chiise thua hae zah tuh-e ccangthum hae tuh mih lungnging.⁹Ccungccaw nynh ccaekia a khanpaw kha aening nynh ah lawku oh ze, Pachia ccaekia tuh houh alesaepaw nynh thua; pawccecize hynh-e tuh Pachia nynh a Ccapaw kong ccaekia a khanpaw Pachia ccaekia nynh thua.¹⁰Pachia Ccapaw a zynpaw tuh a lungkhu kya ccaekia a hoi. Pachia a zyn leipaw tuh Pachia kha hynbya a hosah, pawccecize Pachia nynh a Ccapaw kong ccaekia a khanpaw kha aning nynh zyn khyh.¹¹Ccaekia tuh e hynh nynh thua: Pachia nynh aening kha zungzae hiinnaw oun pya vae, tuh-e hiinnaw tuh a Ccapaw kya nynh a um.¹²Ccapaw a hoipaw tuh hiinnaw a hoi. Pachia Ccapaw kha a hoi leipaw tuh hiinnaw hoi khyh. Thangsahnaw

¹³Pachia Ccapaw min na zyn oh paw nanning nynh zungzae hiinnaw na hoi oh paw kha na nyku nawlan oh, hynh-e ccaw hynh nae kalan kae zei.

¹⁴Pachia kya aening rawhoynaw ah hoi oh paw tuh e hynh nynh thua: Aening nynh amaw rynaw thyhte ccangkhakheit kha ah ngiaku oh ze, Pachia nynh oun thaepya.¹⁵Aening nynh ah ngiaku oh paw miakaw kha aning nynh oun thaepya cipaw ah ny oh ze, amaw kalan ah ngiaku oh paw kha ah mue oh cipaw ah ny oh.¹⁶Chinaw kalan a phyasah leipaw seinaw a rae cciamangpaw a uno kha lukhakheit nynh a muih lanze, a hanlan saw a sangpah cih. Chinaw kalan a phyasah leipaw seinaw a raetu hae kha Pachia nynh hiinnaw a pya cih hae. Chinaw kalan a phyasahpaw seinaw a um, tuh-e seinaw hanlan sawsangpah sah cite ka ho khyh.¹⁷Cyiseinaw miakaw tuh seinaw nynh thua, thuasalama chinaw kalan a phyasah leipaw seinaw a um.

¹⁸Humhung zemah Pachia kyate a puipaw tuh sei khyh cipaw ah ny oh. Pachia kyate a puipaw tuh amaw te amaw rinkuh zah, Satan nynh ty kho khyh.¹⁹Aening tuh Pachia kya-e nynh ah thua oh cipaw te laephi balyn tuh Satan kuih kya nynh a um cipaw ah ny oh.²⁰Ahmepaw Pachia kha ah ny nawlan oh, Pachia Ccapaw tuh yn thua vae zah, aening kha thaethyanaw oun pya vae cipaw ah ny oh; aening tuh ahmepaw Pachia kya te a Ccapaw Jesu Khri kya nynh ah um oh. Aning tuh ahmepaw Pachia thua zah zungzae hiinnaw mah athua.

²¹Ka ccaaw hae, zohtuh hae kha la sibia oh. Amen.

Bible Society of Myanmar

https://app.library.bible/content/1a340f5ae072b2f4