Read 2 SIAPHARAN 1

2 SIAPHARAN1

Elijah te Ahaziah

¹Ahab a chih koute Moab nynh Israel kha a dou.

²Ahaziah tuh Samaria khua kya a inn palung khaan thanlan-aw kyate ccah zah maw a mue; tukeiccuze locceihtu hae kha saw hae zah, “Ekron khua e pachia Baal-zebub kalan la cceih oh lah, e vaemaw kyate ka danthui cih tou, ka danthui lan khyh tou cipaw kha la khia oh,” a cipya hae.³Thuasalama Bawipaw vaawpaw nynh Tishbe khuapaw Elijah kha, “Thokuh lah, Samaria siapharan a locceihtu hae te tungku khylan la cceih lah, minmin kha, ‘Israel ram kya Pachia a um khyh keiccu tou, Ekron khua pachia Baal-zebub kalan byakhia khylan nae ccia oh?’ cite la hopah hae.⁴Tukeiccuze Bawipaw nynh hynhte a ho, ‘Na kaenaw ikhung kyate na rung vae lan khyh, na chih ccaccing cih,’ a ci cite la ho,” a cipya. Tukeiccuze Elijah tuh a cceih.

⁵Locceihtu hae tuh siapharan kalan ki hae zah, aning nynh minmin kha, “Pawccemou nae ki oh?” a cipya hae.⁶Minmin nynh, “Kaening te tungku khylan ccungccapaw lu kheit yn cceih zah, aning nynh kaening kha, ‘Nanning ae saw oh paw siapharan kalan la ki oh lah, la hopah oh: Bawipaw nynh hynhte a ho: Israel ram kya Pachia a um khyh keiccu tou, Ekron khua pachia Baal-zebub kha byakhia khylan nang nynh nae saw hae? Tukeiccuze na kaenaw ikhung kyate na rung vae lan khyh, na chih ccaccing cih,’ a ci cite la hopah oh, oun cipya,” cite a hopya hae.⁷Siapharan nynh minmin kha, “Nanning te tungku khylan yn cceih zah, tuhcite ae hopah oh paw tuh pawcihawpaw ccungccaw mou athua?” cite a khia hae.⁸Minmin nynh, “A mingrungpaw ccungccaw, a tae kya saphua taeccia a cciakuhpaw nynh thua,” cite a khung hae. Siapharan nynh, “Tishbe khuapaw Elijah latu athua,” a ci.

⁹Tetuh siapharan nynh ccungccaw sung pangaw uktu rhawbawipaw kha a ccungccaw hae sung pangaw ryte Elijah kalan a saw. Rhawbawipaw tuh mua dung kya a haungpaw Elijah kalan kaethung zah, “Pou Pachia ccungccapaw, siapharan nynh, ‘Yn rungbung sah,’ ae ci,” cite a hopya.¹⁰Elijah nynh ccungccaw sung pangaw uktu rhawbawipaw kha, “Kae tuh Pachia ccungccapaw ka thua lanze, vaawlang te maee yn ccahbung sah lah, nang te na ccungccaw hae sung pangaw kha ae u oh sah,” a cipya. Te vaawlang te maee yn ccahbung zah, amaw te a ccungccaw hae sung pangaw kha a u hae.

¹¹Siapharan nynh ccungccaw sung pangaw uktu ccangpaw rhawbawipaw kha a ccungccaw hae sung pangaw ryte bua a saw. Tuh-e rhawbawipaw nynh kaethung zah Elijah kha, “Pou Pachia ccungccapaw, e hynh siapharan nynh kaw a thopaw nynh thua: Arangte yn rungbung!” a cipya.¹²Elijah nynh, “Kae tuh Pachia ccungccapaw ka thua lanze, vaawlang te maee yn ccahbung sah lah, nang te na ccungccaw hae sung pangaw kha ae u oh sah,” a cipya hae. Tetuh Pachia maee tuh vaawlang te yn ccahbung zah amaw te a ccungccaw hae sung pangaw kha a u hae.

¹³Siapharan nynh ccungccaw sung pangaw uktu lu thumnaw rhawbawipaw kha a ccungccaw hae sung pangaw ryte bua a saw. Tukeiccuze ccungccaw sung pangaw uktu lu thumnaw rhawbawipaw tuh cceihthung zah Elijah malang khe a ccukharutung zah, “Pou Pachia ccungccapaw, ka hiinnaw te na ryalahtu hynh-e sung pangaw hae hiinnaw hynh namaw malang aphutepaw beih thua hae sah.¹⁴Dotua, vaawlang te maee yn ccahbung zah ccungccaw sung pangaw uktu rhawbawi hae lu ning te mih ccungccaw hae sung pangaw cci kha a u hae; thuasalama atu tuh ka hiinnaw hynh na muihnaw kya aphutepaw beih thua sah,” cite a ngiaku.¹⁵Bawipaw vaawpaw nynh Elijah kha, “Amaw ryte cceihbung oh; aning kha rih nan,” a cipya. Tukeiccuze Elijah tuh thokuh zah amaw ryte siapharan kalan cceihbung hae zah,¹⁶aning nynh siapharan kha, “Bawipaw nynh hynhte a ho: Nang nynh Ekron khua pachia Baal-zebub kha byakhia khylan locceihtu hae kha na saw hae keiccuze—tuh-e tuh Israel ram kya byakhia lanpaw Pachia a um khyh keiccu tou?—tukeiccuze na kaenaw ikhung kyate na rung vae lan khyh, na chih ccaccing cih, a ci,” cite a hopya. Ahaziah Chinaw

¹⁷Tuhcite Elijah nynh a hopaw Bawipaw bya thyhte Ahaziah tuh a chih. Aning tuh ccapaw a hoi khyh keiccuze Judah siapharan Jehoshafat ccapaw Jehoram nynh siapharan lang a tangnaw kum ningnaw kum khe a neitawpaw Jehoram tuh amaw ccelang siapharan lang a tang.¹⁸Tuhlaepaw Ahaziah nynh rya a lawpaw te a cyipaw kha Israel Siapharan hae Sherianaw Ccauh kya a zei hae. Elijah Vaawlang A Kae

¹Bawipaw nynh Elijah kha khiccung te vaawlang a hangthung dyn khe Elijah te Elisha tuh Gilgal khua kyate a cceih hae.²Elijah nynh Elisha kha, “Hein kya la um; pawccecize Bawipaw nynh kae hynh Bethel kyacia ccia lan yn naw,” a cipya. Elisha nynh, “Bawipaw tuh a hiin thyhte, nang mah na hiin thyhte, nang kha kae cciataw lan khyh,” a cipya. Tukeiccuze Bethel lang a cceihbung hae.³Bethel khua um hae paw profeh hae phu kheit tuh Elisha kalan oun cceih hae zah, “Bawipaw nynh na bawipaw kha atunin na kyate ccaring a lah cih cipaw na nyh tou?” a cipya hae. Te aning nynh, “Ou, ka nyh; daebabi lan um oh,” a cipya hae.

⁴Elijah nynh, “Elisha, hein kya la um; pawccecize Bawipaw nynh kae hynh Jeriko lang ccia lan yn naw,” a cipya. Thuasalama Elisha nynh, “Bawipaw tuh a hiin thyhte, nang mah na hiin thyhte, nang kha kae cciataw lan khyh,” a cipya. Tukeiccuze minmin tuh Jeriko khua lang a cceih hae.⁵Jeriko khua um hae paw profeh hae phu kheit tuh Elisha kalan oun cceih hae zah, “Bawipaw nynh na bawipaw kha atunin na kyate ccaring a lah cih cipaw na nyh tou?” a ci hae. Elisha nynh, “Ou, ka nyh; daebabi lan um oh,” cite a khung hae.

⁶Tetuh Elijah nynh Elisha kha, “Hein kya la um; pawccecize Bawipaw nynh kae hynh Jordan vaw lang ccia lan yn naw,” a cipya. Thuasalama Elisha nynh, “Bawipaw tuh a hiin thyhte, te nang mah na hiin thyhte, nang kha kae cciataw lan khyh,” a cipya. Tukeiccuze mih lu ning mawte po a cceih hae.⁷Jordan vaw pe parouhte a thadyn lya hae khe, a cceih buapaw profeh hae sung pangaw tuh minmin te hary asawkunaw khe a thadyn hae.⁸Te Elijah nynh a angkiccua kha lawkuh zah a kue koute tui kha a bua; mih lu ning te laerou kalan a zua kou makhia hae, tui tuh voikheit lang voikheit lang thoh aphiakuh.

⁹Vaw he a zua kou hae te, Elijah nynh Elisha kha, “Na kyate law ka thua maw, pawmou kae cyipah cih, yn hopah,” a cipya. Elisha nynh, “Na muisaw kha leit ning beih yn ccousah,” a cipya.¹⁰Elijah nynh, “Nae ngiapaw tuh myarya aru; tuhzemah na kyate law ka thua lyakhe nae muih lan athua ze, tuh-e tuh na mue cih; nae muih khyh zetuh na mue lan khyh,” a cipya.¹¹Ccia lalia te bya a hoku cciamang lya hae khe, maee marangle te maee marang nynh minmin lu ning kha thoh phia hae zah, Elijah tuh khiccung te vaawlang a kae.¹²Elisha nynh tuh-e tuh muih zah, “Apang, apang! Israel marangle hae te marang rhawkaw hae!” cite a sia. Tukoute vae tuh Elijah kha muih vae khyh, te a boeining kha kyng zah ccangning lang a seii. Elijah koute Elisha

¹³Te Elijah kyate yn ccahpaw angkiccua kha Elisha nynh a khuin, te ki zah Jordan vaw kin khe a thadyn.¹⁴Elijah kyate yn ccahpaw angkiccua kha lah zah tui kha bua zah, “Elijah Pachia, Bawipaw tuh teimou a um?” a ci. Tui kha he a bua te, tui tuh voikheit lang voikheit lang thoh phiakuh zah, Elisha tuh khuraw lang po a zua.

¹⁵Jeriko khua kya um hae paw profeh hae phu kheit nynh asawnaw langte Elisha kha he a muih hae tuh, “Elijah muisaw tuh Elisha tungvaw kya a um,” a ci hae. Te amaw kha tungku khylan cceih hae zah a malang laekhu kya a bakhung hae.¹⁶Minmin nynh, “Dotua, na ryalahtu hae kaening kya athawsaepaw ccungccaw sung pangaw a um hae; minmin nynh cceih hae sah lah, na bawipaw kha a ccung nawlan hae kaw beih pya hae; Bawipaw muisaw nynh amaw kha hangthung zah mua ccangkhakheit vawlan tou, tuhkhyhze accya ccangkhakheit kya tou poh a sah kho,” a cipya hae. Elisha nynh, “Thua khyh, minmin kha saw nan oh,” cite a khung hae.¹⁷Thuasalama minmin nynh a mae phe thah lan cia a soihbia hae tuh, aning nynh, “Saw oh,” a cipya hae. Tukeiccuze ccungccaw sung pangaw kha saw hae zah, nin thum lungkhu amaw kha ccung hae zahmah muih khyh hae.¹⁸Jeriko khua a um ungpaw Elisha kalan oun ki hae zah, aning nynh minmin kha, “Cceih nan oh cite kae hopah khyh oh tou?” a cipya hae. Elisha nynh Ngaeangnaw A Rae

¹⁹Jeriko khuaccaaw hae nynh Elisha kha, “Dotua, ka bawipaw nynh na muih vae hawte, hynh-e khua a umnaw hmin tuh ahoy; thuasalama tui hoy khyh zah ram kya loohvoi khyh,” a cipya hae.²⁰Elisha nynh, “Athawpaw pakekhupaw kya loi ruin oh lah, yn pya oh,” a cipya hae. Tukeiccuze minmin nynh tuh-e tuh a pya hae.²¹Te tui apounaw tuidy kalan cceih zah loi phing zah, “Bawipaw nynh hynhte a ho, e tui hynh ka thyaasah vae; atu te vae tuh chinaw thuasah, ccaaw ronaw thuasah hynh-e tui kyate pou vae lan khyh, a ci,” cite a ho.²²Tukeiccuze Elisha nynh a ho thyhte, tuh-e tui tuh atunin cia athyaa.

²³Elisha tuh tuin kyate Bethel lang a cceihthung; a cciathung cciamang lyakhe khua lungkhu te pise imua hae beihtaraw oun toikuh hae zah, “Lu-opaw, la cceih ccavae! Lu-opaw, la cceih ccavae!” cite a sarya hae.²⁴Aning nynh maeleihkuh zah he a muih hae te, Bawipaw min te thya a law hae. Te ramkaw langte vong api sa ning oun pou hae zah pise imua hae sung pali lu ning kha a tei hae.²⁵Tuin kyate Karmel Mua lang a cceih, tukoute Samaria khua lang a ki. Jehoram nynh Israel A Uk

¹Judah siapharan Jehoshafat nynh ram a uknaw kum haw lae taryanaw kum khe, Ahab ccapaw Jehoram tuh Samaria khua kya Israel siapharan lang tang zah, kum haw lae ning a uk.²Bawipaw muihnaw kya hoyleinaw kha a rae, thuasalama a nung te a paaw hawte tuh thua khyh, pawccecize a paaw nynh a la raepaw Baal zohtuh kha a vua.³Thuasalama Israel hae kha seinaw a raesah hae paw Nebat ccapaw Jeroboam seinaw kha kyngkuh zah cciataw khyh. Moab te Rhawtukkunaw

⁴Moab siapharan Mesha tuh tuu a kuatu thua zah, aning nynh Israel siapharan kha tuutaw cciing kheit te tuutepaw cciing kheit kya-e tuuming kha leih a pya.⁵Thuasalama Ahab he a chih tuh, Moab siapharan nynh Israel siapharan kha a dou.⁶Tukeiccuze tuh ccyh lyakhe Siapharan Jehoram tuh Samaria khua kyate pou zah Israel hae balyn kha a pum hae.⁷Judah siapharan Jehoshafat kalan bya cciasah zah, “Moab siapharan nynh kae hynh yn dou vae; Moab ram kha tuk khylan nae cciakhae cih tou?” a cipya. Aning nynh, “Kae cciakhae cih, kae pankhae cih, ka ccungccaw hae tuh na ccungccaw hae thua hae zah, ka marang hae tuh na marang hae nynh thua hae,” a cipya.⁸Te aning nynh, “Tei laanpi te mou ccia lan?” cite khia zah, Jehoram nynh, “Edom ramkaw laanpi te ccia lan,” cite a khung.

⁹Tukeiccuze Israel siapharan, Judah siapharan te Edom siapharan tuh a cceih hae; minmin nynh avoikuh lante nin sari a cceih hae tuh, rhawkaw hae elang te mih kya umpaw sahiin hae elang tui um vae khyh.¹⁰Tetuh Israel siapharan nynh, “Ezou! Bawipaw nynh aening siapharan hae lu thum hynh Moab hae kuih kalan pya khylan hynhsa oun la ko,” a ci.¹¹Thuasalama Jehoshafat nynh, “Bawipaw kalan byakhiasah lanpaw Bawipaw profeh tuh hein kya um khyh tou?” a ci. Te Israel siapharan a ryalahtupaw lu kheit nynh, “Elijah kuih tui a bupahtupaw Elisha, Shafat ccapaw tuh hein kya a um,” a cipya.¹²Jehoshafat nynh, “Bawipaw bya tuh amaw kya a um,” a ci. Tukeiccuze Israel siapharan, Jehoshafat te Edom siapharan tuh Elisha kalan a cceihbung hae.

¹³Elisha nynh Israel siapharan kha, “Nang te kae tuh pawmou ah sekuh? Na paaw profeh hae te na nung profeh hae kalan la cceih,” a cipya. Thuasalama Israel siapharan nynh, “Thua khyh; Moab siapharan kuih kalan pya khylan siapharan hae lu thum oun kotupaw tuh Bawipaw nynh thua,” a cipya.¹⁴Elisha nynh, “Rya ka lawpyapaw vaaw Bawipaw tuh a hiin thyhte, Judah siapharan Jehoshafat hynh pawlang ka la ria khyh zetuh, nanning hynh do mah kae do ry lan khyh oh, muih mah kae ry lan khyh oh.¹⁵Thuasalama tintang khuathyapaw kha oun kotua oh,” a cipya hae. Te tintang khuathyapaw nynh a khua lyakhe Bawipaw thungnaw tuh a tungvaw yn thua.¹⁶Elisha nynh, “Bawipaw nynh hynhte a ho, ‘E accya hynh tuili hae te phe ka biasah cih,’ a ci.¹⁷Bawipaw nynh hynhte a ho, ‘Nanning nynh khisan te khuaa kha na muih lan khyh oh, thuasalama naemaw, nae sahiin hae te nae sarangpaw hae nynh na nia lan oh paw tui kha hynh-e accya kyahin phe ka biasah cih,’ a ci.¹⁸E hynh tuh Bawipaw muihnaw kya hosyn leipaw rya nynh thua, Moab hae kha mah nae kuih kya ae pya cih oh.¹⁹Khualungrua te koihkuhpaw khua miakaw te ahoypaw khua miakaw kha na tae cih oh; thingku hoypaw miakaw kha na nge cih oh zah tuisung balyn kha laephi na thei cih oh zah laephi hoynaw hmin balyn kha lung te na roh cih oh,” a cipya hae.²⁰Awkhualan, awkhua silawnaw rae ccyh loukaw khe, tui tuh Edom langte vaekheitmawte yn lua zah ram kha pong avu.

²¹Siapharan hae nynh tuk lan oun ccianua thung vae hae cipaw kha Moab hae balyn nynh he a nyh hae tuh, rhawtuk-uccaw a lawkuh khopaw balyn, adih huapaw kyate ale huapaw kyacia ko hae zah ramri lang a cciakhae hae.²²Awkhua takaw he a tho hae tuh, tui vawlan khe khuanin nynh ak zah minmin te arawsekuh lante tui tuh chiise hawte asepaw kha Moab hae nynh a muih hae.²³Minmin nynh, “E hynh chiise nynh thua; siapharan hae tuh lu kheit te lu kheit tukkuh hae zah a theihkuh hae hynhsa. Tukeiccuze Moab hae, luade ccavae oh!” a ci hae.²⁴Thuasalama Israel hae ryahmin kya he a thua hae tuh, Israel hae nynh thonuakuh hae zah Moab hae kha tuk hae zah mih malang khe a ccue hae; Moab ram a tee hae cia Israel hae nynh po a tuk hae.²⁵Khua hae kha roh hae zah laephi ahoynaw hmin miakaw kha lung vuathin hae zah a bongsah hae. Tuisung miakaw kha laephi thei hae zah, thingku hoypaw miakaw kha a nge hae. Kir-hareseth khua kyalya kha khualungrua um zah, tuh-e khua tuh lung te azaethya hae paw nynh koihlu hae zah a zae hae.²⁶Moab siapharan nynh ka tukru kho vae lan khyh hae cipaw he a nyh tuh, thaloi kyngpaw ccungccaw za sari kha ko hae zah Edom siapharan kha ro lan a rawse zemah roh kho khyh.²⁷Tetuh amaw ccelang siapharan lang a tang cih paw a ccatawccaw kha lah zah, rhawlungrua vawlan khe maee-ute silawnaw kha a raenaw. Tukeiccuze Israel hae tuh myarya mih thinria zah amaw kyate mih ram lang a ki vae hae. Elisha te Nomaenung Chitui

¹Profeh hae phu kya-e lu kheitpaw zu nynh Elisha kha, “Na ryalahtu ka vawpaw tuh a chih vae; na ryalahtupaw tuh Bawipaw rawrihpaw nynh thua cipaw kha nang nynh na ny, laebah oun umsahtupaw tuh ka ccaaw hae lu ning kha see lang lawku lan yn thua vae,” cite sia zah a hopya.²Elisha nynh amaw kha, “Pawmou kae cyipah cih? Yn hopah, na inn kya pawmou na hoi?” cite khia zah aning nynh, “Na ryalahtunung nynh ka inn kya chitui ang kheit laelan pawpaw mah ka hoi vae khyh,” a cipya.³Elisha nynh, “Atolang la cceih lah, na innpaw hae balyn kya-e ang hae, accawnghanpaw ang hae patae kha la hoh hae.⁴Te inn lungkhu lang tee lah, namaw te na ccaaw hae nynh thuakaw khawsungkuh oh lah, ang hae lungkhu langkhe chitui ruin oh; chitui he abeihpaw ang miakaw kha akin lang nung oh,” a cipya.⁵Tukeiccuze amaw kyate cceih zah amaw te a ccaaw hae tuh thuakaw a khawsungkuh hae; minmin nynh ang hae kha lawpah hae zah aning nynh chitui a ruin.⁶Ang hae tuh he abeih hae te, a ccapaw kha, “Ccangpaw ang yn lawpah,” cipah zah, aning nynh, “Um vae khyh,” a cipya. Tetuh chitui tuh lua vae khyh.⁷Tuh-e nopinung nynh Pachia ccungccapaw kalan cceih zah, tuh-e paw nynh, “La cceih lah, chitui kha la zua lah, na laebah kha la sangkuh, te alaepaw chitui khate nang te na ccaaw hae nynh khua la sah oh,” a cipya. Elisha nynh Imuapaw A Thosah

⁸Nin kheit tuh Elisha tuh Shunem khua lang cceih zah, tuin khua kya umpaw mihoinung lu kheit nynh Elisha kha looh-ae a kopya. Tukeiccuze tuh-e laanpi kya a ccia takyh vae ze looh ae khylan tuin kya leih a teepaw.⁹Aning nynh a vawpaw kha, “Dotua, aening laanpi tyty a cceih bungthungpaw hynh-e ccungccapaw hynh Pachia ccungccaw mithyaapaw nynh thua.¹⁰Inn tungvaw kya pang thungkuhpaw akhaan taraw rae oh sih lah, amaw elang ikhung, ccaboi, haungnaw te maeekhua ccangkheit kha nungpah oh sih, aening kalan yn thua ze tuin kya a um cih,” a cipya.

¹¹Nin kheit tuh Elisha tuh tuin kya yn thua zah, tuh-e akhaan kalan kae zah a ih.¹²A ryalahtupaw Gehazi kyakhe, “Shunam nopinung kha yn kotua,” a cipya. Aning nynh yn ko zah nopinung tuh amaw malang a thadyn.¹³Elisha nynh Gehazi kha, “Nopinung kyakhe, kaening hynh hynhcih ciate nae do-oih zah, pawmou kae cyipah cih? Siapharan kalan thuasah, rhawkaw hae a uktu rhawbawipaw kalan thuasah hopya na ry hae paw bya a um tou? cite hopya tua,” a cipya. Nopinung nynh, “Kae tuh ka ccungccaw hae laku kya nynh ka um,” a cipya.¹⁴Elisha nynh, “Tuhte athua ze, aning elang pawmou cyipya lanpaw a um?” cite khia zah, Gehazi nynh, “Ahoy, e nopinung hynh ccapaw hoi khyh, a vawpaw tuh ataw vae,” a cipya.¹⁵Elisha nynh, “Nopinung kha yn ko,” a cipya. Aning nynh yn ko zah nopinung tuh thuakaw kya a thadyn.¹⁶Elisha nynh, “Khuavae atu ccyh kya, khyapaw accyh yn thua te, ccapaw na pom cih,” a cipya.Nopinung nynh, “Pou Pachia ccungccapaw, ka bawipaw, na ryalahtunung hynh yn ling nan,” a cipya.

¹⁷Nopinung tuh ccaawpoi zah Elisha nynh a hopya thyhte, khyapyapaw accyh he yn thua tuh ccapaw a saah.

¹⁸Imua tuh yn lethung zah nin kheit tuh loohruetu hae kalan a paaw kalan a cceih.¹⁹A paaw kha, “Ka lu ccih, ka lu ccih!” a cipya. A paaw nynh a ryalahtupaw kha, “A nung kalan cciakhae,” a cipya.²⁰Aning nynh a nung kalan a cciakhae; imua tuh a nung phae vawlan ninthu cia duakuh zah a chih.²¹Nopinung nynh cceih zah a rhua kha Pachia ccungccapaw a ikhung vawlan a nung koute thuakaw khawsung zah a cciataw.²²Te a vawpaw kha ko zah, “Pachia ccungccapaw kalan arangte ka cceih cih zah bua kae ki kho nawlan, ryalahtu lu kheit te lann sa kheit kha yn sawpah hae,” a cipya.²³A vawpaw nynh, “Pawccemou amaw kalan atunin na cceih cih? Sawpaw thawpaw mah thua khyh, sabbath nin mah thua khyh,” a cipya. Aning nynh, “Phe hoy cih,” a cipya.²⁴Te lann kha khungnin de zah a ryalahtupaw kha, “Lann hynh cciasah, kae hopah leite byabyate yn cciasahpah nan,” a cipya.²⁵Tuhcite nopinung tuh cceih zah Karmel Mua kya Pachia ccungccapaw kya a thua.
Pachia ccungccapaw nynh nopinung yn cciapaw kha he a muih tuh, a ryalahtu Gehazi kha, “Dotua, Shunam nopinung yn cceih;²⁶tungku khylan ccuenua lah, Na dan tou? Na vawpaw so a dan tou? Imua so a dan tou? cite la khiatua,” a cipya. Nopinung nynh, “Ka dan,” a cipya.²⁷Mua vawlan Pachia ccungccapaw kya he a thua te, a ccu kha a pom. Nopinung kha ccaring tuu khylan Gehazi nynh yn naenuaku. Thuasalama Pachia ccungccapaw nynh, “Amaw um lan um sah, pawccecize aning tuh a lungria myarya athae; e kong hynh Bawipaw nynh kae yn muihsah khyh zah yn hopah khyh,” a cipya.²⁸Tetuh nopinung nynh, “Ka bawipaw, ccapaw kae ngiakuh zawtou? Kae hynh yn ling nan, cite kae hopah khyh tou?” a cipya.²⁹Elisha nynh Gehazi kha, “Taevoiboei voikuh lah, ka hoitang kha ccyngkute cceih. Lukhakheit na tungku oh ze byabeih nan, lukhakheit nynh bya ae beih zemah khungru nan; te ka hoitang kha imua a mae vawlan khe na la khang cih,” a cipya.³⁰Te imua a nung nynh, “Bawipaw tuh a hiin thyhte, namaw mah na hiin thyhte, nang kha kae cciataw lan khyh,” a cipya. Tukeiccuze Elisha nynh thokuh zah nopinung kha a zui.³¹Gehazi nynh malang cceihlo zah hoitang kha imua mae vawlan a khang zemah pawpaw roi mah ccae khyh, hiinnaw muihsahnawpaw pawpaw mah um khyh. Tukeiccuze Elisha kha tungku khylan yn kinua zah, “Imua tuh tho khyh,” a cipya.

³²Elisha nynh inn lungkhu lang he a tee tuh, achihpaw imua, a ikhung vawlan a ihpaw kha a muih.³³Tukeiccuze tee zah thuakaw khaw zah mih lu ning te a um hae, te Bawipaw kalan saw a sang.³⁴Te ikhung vawlan thokuh zah imua vawlan bakhung zah a mung kha imua mung te, a mit kha imua mit te, a kuih kha imua kuih te a tungsaku; tuhcite imua vawlan a bakhung lyakhe imua ngesaw tuh yn so.³⁵Te Elisha tuh tho zah akhaan lungkhu kya cciabung cciathung a cceih, te imua vawlan bua a bakhung; imua tuh vae sari hachi zah a mit yn dae.³⁶Elisha nynh Gehazi kha ko zah, “Shunam nopinung kha yn ko,” cipah zah a ko. Nopinung he yn thua te, Elisha nynh, “Na ccapaw hynh hoei ccavae,” a cipya.³⁷Nopinung tuh yn thua zah Elisha a cculeihpaw laekhu kya a bakhung; te a ccapaw kha hoei zah a pou. Elisha nynh Ang A Thyaasah

³⁸Elisha nynh Gilgal khua lang a ki lyakhe, tuh-e ram kya ccakan accih. Profeh hae phu kheit tuh amaw malang a haung lya hae khe, aning nynh a ryalahtupaw kha, “Profeh hae phu elang ang pipi khang lah, ehang sahtua,” a cipya.³⁹Minmin laku e lukheitpaw tuh enaw-eho lo khylan ramkaw lang a cceih; ram tui-ung ku kha muih zah, athae kha a phu kho zeihte a boei te a poi, te yn thua zah tuh-e tuh aw zah, paw nynh athua cipaw nytaw leite, ehang ang te a thung.⁴⁰A ae ccaw hae cite a suapya hae. Tuh-e tuh a ae lya hae khe, “Pou Pachia ccungccapaw, ang lungkhu kya chinaw a um!” cite sia hae zah, ae kho vae khyh hae.⁴¹Elisha nynh, “Vaekhui beihtaraw oun cciakhae oh,” cipah hae zah, tuh-e tuh ang lungkhu thung zah, “Ccungccaw hae kha dang oh, ae hae sah,” a ci. Te ang lungkhu kya ri lanpaw pawpaw mah um vae khyh. Elisha nynh Looh A Dang hae

⁴²Baal-shalishah khua e ccungccapaw lu kheit nynh yn cceih zah, athae typaw barli te raekuhpaw sanlou phe kuin te a sohrae lungkhu a sangpaw pawhaleihpaw ccathae kha Pachia ccungccapaw kalan a ccyngpya. Elisha nynh, “Ccungccaw hae kha pya hae lah, ae hae sah,” a cipya.⁴³Thuasalama a ryalahtupaw nynh, “Hynh-e te ccungccaw za kheit kha pawtemou ka dang kho cih hae?” a ci. Tukeiccuze Elisha nynh, “Ccungccaw hae kha pya hae lah, ae hae sah, pawccecize Bawipaw nynh hynhte a ho, ‘Minmin nynh a ae cih hae zah, beihtaraw alae ung cih,’ a ci,” cite a hopya.⁴⁴Aning nynh minmin kha dang hae zah, Bawipaw bya thyhte, minmin nynh ae hae zah beihtaraw alae. Naaman Dannaw

¹Siria siapharan a rhawkaw hae a uktu rhawbawipaw Naaman tuh a bawipaw malang maehoynaw myarya a ccoupaw te a lesaepaw nynh thua, pawccecize aning liate Bawipaw nynh Siria ram kha taenaw a pya. Naaman tuh thung zah a rawhoypaw athua zemah vaethya ccinaw a hoi.²Siria hae nynh rhaw thiing hae zah a ccia lya hae khe, vae kheit tuh Israel ram e nopinung taraw lu kheit kha kyng hae zah, aning nynh Naaman zu kha rya a lawpya.³Tuh-e nopinung nynh a bawinung kha, “Ka bawipaw hynh Samaria khua umpaw profeh kalan la cceih sah ci kou ka ry! A vaethya ccinaw hynh a dansah mamin cih,” a cipya.⁴Naaman nynh a bawipaw kalan cceih zah, Israel ram e nopinung taraw nynh a hopaw bya kha a hopya.⁵Siria siapharan nynh, “La cceih, Israel siapharan kha ccaw ka ky cih,” a cipya.
Naaman tuh cceih zah ngunphua talent ccanghaw, sui shekel thong taruh te boeining zung haw kha a phu.⁶Aning nynh Israel siapharan kalan ccaw a phupya, tuh-e ccaw kyakhe, “E ccaw hynh na kya he yn thua te, ka ryalahtu Naaman hynh a vaethya ccinaw na dansah nawlan, na kalan kae saw cipaw la nyh,” a cipya.⁷Israel siapharan nynh tuh-e ccaw he a ria te, a boeining kha seii zah, “Kae tuh chinaw te hiinnaw a pya khopaw Pachia ka thua zah tetou, e ccungccapaw nynh vaethyakaepaw ccungccaw kha dansah khylan ka kalan yn saw? Aning nynh pekunaw yn hyypaw hynh dotua oh,” a ci.

⁸Israel siapharan nynh a boeining a seiiku cipaw kha Pachia ccungccapaw Elisha nynh he a thae tuh, siapharan kha byataw zah, “Pawccemou na boeining na seiiku? Tuh-e ccungccapaw tuh kamaw kalan yn cceih sah lah, Israel ram kya profeh a um cipaw a nyh cih,” a cipya.⁹Tukeiccuze Naaman tuh a marang hae te a marangle hae ryte yn cceih zah Elisha inn teenaw kya a thadyn.¹⁰Elisha nynh Namaan kalan locceihtupaw kha saw zah, “La cceih lah, Jordan vaw kya vae sari tui la singkuh, te na ngesaw tuh amaw mamin lang a tang cih zah na thyaa cih,” cite a hosah pya.¹¹Namaan tuh thinriate cceih zah, “Profeh tuh ka kalan yn pou cih zah te khaw, a thadyn cih zah Bawipaw a Pachia min kha kote ka vaethya ccinaw luki khe a kuih te a zaw cih zah vaethya ccinaw hynh yn dansah cih cite ka tua.¹²Damaskas vaw hae Abana te Pharpar tuh Israel ram e vaw hae balyn laeze hoyhua khyh hae tou? Tuh-e vaw hae kya tui singkute ka thyaa kho lan khyh tou?” a ci. Te maeleihkuh zah thinriate a ki vae.¹³A ryalahtu hae nynh amaw kalan naekuh hae zah, “Apang, profeh nynh ryalaw rupaw law lan kaw ae pya ze, law leite tou na um cih? Aning nynh, ‘Tui la singkuh lah, la thyaa,’ ae cipyapaw hynh hohcihmou cyi lan houh accanhua?” a cipya hae.¹⁴Tukeiccuze aning nynh cceihbung zah Pachia ccungccapaw bya thyhte, Jordan vaw kya vae sari a phungku; a ngesaw tuh imua taraw ngesaw hawte thuathui zah, aning tuh athyaa.

¹⁵Tetuh amaw te a ccungccaw hae balyn tuh Pachia ccungccapaw kalan kite a malang khe thadyn hae zah, “Israel ram kya laelan, laephi pynpi kya Pachia um khyh cipaw ka ny; na ryalahtupaw kya-e lasung hynh beih yn lawpakuh,” a cipya.¹⁶Thuasalama Elisha nynh, “Rya ka lawpyapaw Bawipaw tuh a hiin thyhte, pawpaw mah ka lawkuh lan khyh!” a cipya. Lawku lan a soihbia zemah aning nynh phe a mya.¹⁷Te Namaan nynh, “Na mya lan athua ze, na ryalahtupaw hynh lann sa ning phu khinpaw laephi beih yn pya; pawccecize na ryalahtupaw nynh Bawipaw kalan laelan, ccangpaw pawpaw pachia kalan mah maee-ute silawnaw te silawnaw hae kha ka rae vae lan khyh.¹⁸Thuasalama Bawipaw nynh na ryalahtupaw hynh ccangkheit tuh beih yn ngaethya sah: ka bawipaw nynh ka kuihbaw kya ngeikute Rimmon inn lungkhu lang tee zah beik khylan a bakhung lyakhe, kae mah Rimmon inn kya ka bakhung bua ze, Bawipaw nynh na ryalahtupaw kae hynh yn ngaethya vae sah,” a cipya.¹⁹Elisha nynh amaw kha, “Ngaengante la cceih,” a cipya.
Thuasalama Naaman tuh syntaraw he a cceih te,²⁰Pachia ccungccapaw Elisha a ryalahtupaw Gehazi nynh, “Siria ccungccaw Naaman nynh a pyapaw lasung kha ka bawipaw nynh lawku leite hung a kisah. Bawipaw tuh a hiin thyhte, a nulang te ka deehui cih zah a kya-e hankhakheit kha ka lawkuh cih,” a ci.²¹Tukeiccuze Gehazi nynh Naaman kha a deehui. Ka nulang te lukhakheit nynh yn deehui cipaw kha Naaman nynh he a muih tuh, tungku khylan marangle kyate sahkuh zah, “Atyn-are ahoy tou?” cite a khia.²²Gehazi nynh, “Ahoy, ka bawipaw nynh, ‘Efraim muaram kyate profeh hae phu kya-e lu ning tuh atasy khe ka kalan oun thua hae; ngunphua talent ccangkheit te boeining zung ning kha minmin beih pya hae,’ cite hopya khylan kae hynh yn saw,” a cipya.²³Naaman nynh, “Talent ccangning beih lawkuh,” a cipya. Te ngunphua talent ccangning kha boeining zung ning ryte sungkua ccangning khate tungbia hae zah, a ryalahtu hae lu ning kha a pya hae, te minmin nynh Gehazi malang khe phu hae zah a cceih hae.²⁴Khualungrua kya he a thua hae te, mih tungvaw kya-e sungkua hae kha lah zah inn lungkhu kya a nung; te minmin kha cciasah hae zah a cceih hae.

²⁵Gehazi tuh tee zah a bawipaw malang a thadyn; te Elisha nynh, “Gehazi, teimou na um?” cite a khia. Aning nynh, “Na ryalahtupaw kae tuh teitei lang mah ka cceih khyh,” cite a khung.²⁶Thuasalama Elisha nynh, “Nang te tungku khylan ccungccapaw nynh a marangle kyate a sawku lya kha ka muisaw te na kya ka cceihbua khyh tou? Phua te boeining, oliv khokhu hae te misu khokhu hae, tuu hae te tangnuapaw hae, seenung hae te seepaw hae kha lawku ccyh athua zawtou?²⁷Tukeiccuze Naaman kya-e vaethya ccinaw tuh nang te na ciihan hae kalan zungzae a kaekuh cih,” a cipya. Tukeiccuze Gehazi tuh vaethyakae zah vuiraw hawte raw zah, a bawipaw kyate a pou. Hae kha Bua Muenaw

¹Profeh hae phu nynh Elisha kha, “Dotua, namaw ryte atu ah umnaw oh hmin tuh myaryasankae aby.²Jordan vaw lang cceih oh sih lah, khuing kya thingpyng ccangkheit cci byngte, umnaw hmin sakkuh oh sih,” a cipya hae. Aning nynh, “La cceih oh,” a ci.³Minmin laku e lu kheit nynh, “Na ryalahtu hae kaening kya cceihbua,” cipah zah, Elisha nynh, “Ka cceihbua cih,” a cipya.⁴Tukeiccuze minmin kya a cceihbua. Jordan vaw he a thua hae te, thing hae kha a nge hae.⁵Lukheitpaw nynh thing a ryng lyakhe a hae tuh tui lungkhu lang accah; aning nynh sia zah, “Ezou, ka bawipaw! Ka hohpaw hae nynh thua,” a cipya.⁶Pachia ccungccapaw nynh, “Teikyamou a ccaw?” cite a khia. A ccawnaw hmin kha he a muihsah te, ccungngue kha khya zah tuin kya a saw, te hae tuh yn phaly vae.⁷Elisha nynh, “Lah ccavae,” cipah zah, tuh-e paw nynh a kuih kha dyng zah a law. Elisha te Siria hae

⁸Vae kheit tuh Siria siapharan nynh Israel kha a tuk, a kuihkaw e bawi hae ryte khuakhan hae zah, “Tuin hmin, khe hmin kyakhe ka ryahmin tuh tah athua cih,” a ci.⁹Pachia ccungccapaw nynh Israel siapharan kha byataw zah, “E hmin kya na ccia khyh nawlan oh raeringkuh oh, pawccecize Siria hae tuh tuin hmin kya a cceih cih hae,” a cipya.¹⁰Pachia ccungccapaw nynh a hopaw hmin langkhe Israel siapharan nynh ccungccaw saw zah bya a taw hae. Aning nynh tuh-e hmin tuh a raeringku nawlan hae raeringnaw a pya hae keiccuze vae kheit vae ning lae alung lan a lue hae.

¹¹Hynh-e keiccuze Siria siapharan tuh myarya a bungzou; a kuihkaw e bawi hae kha ko hae zah, “Aening laku kya hummou Israel siapharan kalan a pan cipaw nae hopah lan khyh oh tou?” a cipya hae.¹²A kuihkaw e bawi lu kheit nynh, “Siapharan ka bawipaw, lu kheit san um khyh, na inaw khaan kya na hopaw bya kha Israel ram umpaw profeh Elisha nynh Israel siapharan kha a hopya,” cite a cipya.¹³Siria siapharan nynh, “Cceih oh lah, a umnaw hmin kha la ccung oh; ccungccaw ka saw cih zah ka kyng cih,” a ci. Amaw kha, “Dothan khua kya nynh a um,” cite a hopya hae.¹⁴Tukeiccuze tuh-e khua langkhe marang hae, marangle hae te rhawkaw patae kha a saw hae; khuazi khe thua hae zah khua kha a koihlu hae.

¹⁵Pachia ccungccapaw a ryalahtupaw tuh awkhua takaw te tho zah atolang he a pou tuh, rhawkaw hae tuh marang hae te marangle hae ryte khua po voilu lan a um vae hae. A ryalahtupaw nynh, “Ezou, ka bawipaw! Pawtemou ah cyih cih oh?” a ci.¹⁶Elisha nynh, “Rih nan, pawccecize aening kya um hae paw tuh minmin kya um hae paw laeze a lunghua hae,” a cipya.¹⁷Te Elisha nynh sawsang zah, “Pou Bawipaw , a muih kho nawlan a mit beih awsah tua,” a ci. Tukeiccuze Bawipaw nynh tuh-e ryalahtupaw tuh a mit awsah zah a muih vae; Elisha a pepan po voilu lan, mua tuh marang hae, maee marangle hae khate phe abeih.¹⁸Siria hae nynh he a ccianua bung hae tuh, Elisha nynh Bawipaw kalan sawsang zah, “E ccungccaw hae hynh mih mit beih mohsah hae,” a ci. Tukeiccuze Elisha nynh saw a sang thyhte, mih mit a mohsah hae.¹⁹Elisha nynh minmin kha, “E laanpi thua khyh, e khua mah thua khyh; yn zui oh lah, na ccung oh paw ccungccapaw kalan kae saw cih oh,” a cipya hae. Te Samaria khua lang a cciakhae hae.

²⁰Samaria khua he a tee takaw hae te, Elisha nynh, “Pou Bawipaw , e ccungccaw hae nynh ngaw a muih kho nawlan hae, mih mit beih awsah hae,” a ci. Bawipaw nynh mih mit kha awsah zah, minmin nynh Samaria khua lungkhu a um hae paw kha a nyku hae.²¹Israel siapharan nynh minmin kha he a muih hae tuh, Elisha kha, “Apang, minmin hynh ka theih cih hae tou? Ka theih cih hae tou?” a cipya.²²Elisha nynh, “Na theih lan khyh hae! Na thaloi te na li te na kyng hae paw kha na theih cih hae tou? Minmin nynh ae hae zah a nia ccaw hae, looh te tui kha mih malang khe nungpah hae; te mih bawipaw kalan cceih hae sah,” a cipya.²³Tukeiccuze minmin elang loohdangnaw poi pi kha a raepya hae; a ae a neih kou hae te cciasah hae zah mih bawipaw kalan a cceih hae. Tuin koute tuh Siria hae nynh thiing khylan Israel ram lungkhu lang tee vae khyh hae. Benhadad nynh Samaria A Koihlu

²⁴Ccyh syntaraw aro koute, Siria siapharan Benhadad nynh a rhawkaw hae balyn kha pumte Samaria khua kha ccianua zah a koihlu.²⁵Ccyh khaw cia a koihlu keiccuze Samaria khua kya ccakan myarya ccih, lann lu ccangkheit kha ngunphua shekel sung tarya lang zua hae zah, vahu ia kab pum pali pum kheit kha shekel ccangpangaw lang a zua hae.²⁶Israel siapharan nynh khualungrua vawlan a ccia cciamang lyakhe nopinung lu kheit nynh ko zah, “Siapharan ka bawipaw, beih yn bawm!” a cipya.²⁷Siapharan nynh, “Bawipaw nynh ae bawm khyh ze, kae nynh pawtemou kae bawm kho cih? Huimin kya-e tou, tuhkhyhze misu mianaw khu kya-e tou kae muepah kho cih?” a cipya.²⁸Siapharan nynh, “Pawmou na vawsaw?” cite khia zah, nopinung nynh, “E nopinung nynh, ‘Na ccapaw kha atunin ae sih lah, awkhualan ka ccapaw kha ae lan,’ yn cipya.²⁹Tukeiccuze ka ccapaw kha kae thungkuh zah kae ae. Awkhualan tuh kae nynh, ‘Na ccapaw kha ae lan vae,’ ka cipya. Thuasalama a ccapaw kha zya a thuruh vae,” cite a hopya.³⁰Siapharan nynh nopinung bya he a thae tuh, a boeining kha a seii—khualungrua vawlan a ccia lya thua zah, a pyn kya kawdah lang buriboei a lawkupaw kha ccungccaw hae nynh a muih kho hae—³¹te aning nynh, “Shafat ccapaw Elisha a lu tuh a raw vawlan atunin a um zetuh Pachia nynh ka tungvaw kya tuh-e ciate thuasah, tuhlaeze alung lante mah thuasah cyih vae sah,” a ci.³²Te a umnaw kyate ccungccapaw lu kheit kha a saw.
Elisha tuh a inn kya haung zah piccan hae tuh amaw kya a haungbua hae. Locceihtupaw yn thua mawkhe, Elisha nynh piccan hae kha, “E ccungccatheihpaw nynh ka lu pae khylan lukhakheit kha yn saw cipaw na nyh oh tou? Locceihtupaw he yn thua te, thuakaw khaw oh lah, thuakaw kin khe phang umkhaw oh. A bawipaw laanccia roi tuh a nulang khe ccae khyh tou?” a ci.³³Minmin kya bya a ho cciamang lyakhe siapharan tuh amaw kalan yn thua zah, “E vawsawnaw hynh Bawipaw kyate nynh yn thua! Bawipaw bawmnaw kha pawccemou ka ngaehoi ung cih?” a ci.

¹Te Elisha nynh, “Bawipaw bya hynh ngaetua: Bawipaw nynh hynhte a ho, Awkhualan atu ccyh loukaw kya Samaria khua koikua kyakhe chanvuih khui kha tounawpaw te kaw kheit ze shekel ccangkheit, barli kha tounawpaw te kaw ning ze shekel ccangkheit lang a zua cih hae, a ci,” cite a ho.²Siapharan nynh a ngeikunawpaw rhawbawipaw nynh Pachia ccungccapaw kha, “Bawipaw nynh vaawlui kya thanlan-aw a la rae ze heize, tuhcihawpaw tuh thua kho vema?” a ci. Elisha nynh, “Na mit ccaccei te tuh-e tuh na muih cih, thuasalama nang tuh na ae lan khyh,” a cipya. Siria hae A Ccue hae

³Koikua atolang khe vaethyakae hae paw lu pali um hae zah minmin nynh, “Ah chi mawlaezung oh hein kyahin pawccemou ah haung cih oh?⁴‘Khua lungkhu lang tee oh sih,’ ci lanze, khua lungkhu ccakanccih zah ah chih cih oh; hein kya ah haung oh zemah chi mamin lan. Tukeiccuze Siria hae ryahmin kalan cceih oh sih; minmin nynh ah hiinnaw oun haang hae ze hiin lan zah, oun chia hae ze chi lan,” cite a hoku hae.⁵Tukeiccuze zetepakaw khe Siria hae ryahmin lang ccia lan a thokuh hae; thuasalama Siria hae ryahmin kin a thua hae tuh, lu kheit san la um vae khyh hae.⁶Pawccecize Bawipaw nynh Siria rhawkaw hae kha marangle siho, marang hae siho te rhawkaw patae siho kha a thaesah hae, tukeiccuze minmin nynh, “Israel siapharan nynh aening kha tuk khylan Hit siapharan hae te Izip siapharan hae kha a hohku vae hae,” cite lu kheit te lu kheit a hoku hae.⁷Tukeiccuze minmin tuh zetepakaw khe ccue hae zah mih bu hae, mih marang hae te mih lann hae kha a vuasya hae, mih ryahmin kha ccuetaw hae zah, mih hiinnaw lue khylan a ccue hae.⁸E vaethyakae hae paw nynh ryahmin kin he a thua hae te, bu lungkhu lang tee hae zah a ae a neih kou hae te, sui, ngun te boeining kha a lawku hae, te cciakhae hae zah a thuruh hae. Tukoute ki hae zah ccangpaw bu lungkhu lang a tee hae, te tuin kya-e uccaw hae kha lawkute cceih hae zah a thuruh hae.

⁹Te minmin nynh, “Ah cyisei vae oh. Atunin hynh thongpang hoypaw nin nynh thua; daebabi lan ah um oh zah khua yn dae lanpaw kha ah ngaw oh zetuh, detahnaw nynh oun thuanua cih; tukeiccuze cceih oh sih lah, siapharan innbyn hae kha hopah oh sih,” cite a hoku hae.¹⁰Tukeiccuze cceih hae zah khua koikua ngawtu hae kha ko hae zah, “Siria hae ryahmin kalan kae cceih zah, lu kheit sanmah kae muih khyh, roi mah kae thae khyh, a khii hae paw marang hae te lann hae, te bu hae tuh a um mintute a um hae,” cite a hopya hae.¹¹Te koikua ngawtu hae nynh sia hae zah siapharan innbyn hae kha a hopya hae.¹²Siapharan tuh khuazi khe tho zah a ryalahtu hae kha, “Siria hae nynh aening oun paccynnuaku hae paw hynh kae hopah cih oh. Aening ah ccakan accipaw hynh a ny hae; tukeiccuze ramkaw kya reku khylan mih ryahmin kyate pou hae zah, minmin nynh, ‘Khua kyate he oun pou hae te, mih hiin pite kyng lan hae zah khua lungkhu lang tee lan,’ cite a tuaku hae,” cite a hopya hae.¹³A ryalahtupaw lu kheit nynh, “A laehypaw marang hae sa pangaw hynhte ccungccaw beihtaraw kha saw oh sih lah, dotua oh sih, pawccecize a chih vae hae paw Israel zapi hae balyn hawkhate hein kya a laehy hae paw hynh mah a teing mamin cih hae,” a ci.¹⁴Tukeiccuze marangle ccikuh hae paw lu ning kha ko hae zah, “La cceih oh lah, la dotua oh,” cite siapharan nynh hopah hae zah, Siria rhawkaw hae nulang deehui khylan a saw hae.¹⁵Tukeiccuze minmin nynh Jordan vaw kyacia a deehui hae; Siria hae nynh a rangsakunaw hae ze a vuasya hae paw boeining hae te zunghe hae tuh laanpi kya azung-anaw phe abeih. Locceihtu hae nynh oun ki hae zah siapharan kha a hopya hae.

¹⁶Tetuh khuaccaaw hae nynh pou hae zah Siria hae ryahmin kha a thiing hae. Tukeiccuze Bawipaw bya thyhte, chanvuih khui kha tounawpaw te kaw kheit ze shekel ccangkheit, barli kha tounawpaw te kaw kheit ze shekel ccangkheit lang a zua hae.¹⁷Siapharan nynh a ngeikunawpaw rhawbawipaw kha koikua ngawtu lang a nung; siapharan nynh amaw kalan a ccia lyaze Pachia ccungccapaw nynh a ho hawte, ccungccaw hae nynh tuh-e rhawbawipaw kha koikua kya phe chih lan a syde hae.¹⁸Pawccecize Pachia ccungccapaw nynh siapharan kha, “Awkhualan atu ccyh loukaw kya Samaria koikua kyakhe barli kha tounawpaw te kaw kheit ze shekel ccangkheit, chanvuih khui kha tounawpaw te kaw kheit ze shekel ccangkheit lang a zua cih hae,” cite a hopya lyaze,¹⁹tuh-e rhawbawipaw nynh Pachia ccungccapaw kha, “Bawipaw nynh vaawlui kya thanlan-aw a la rae ze heize, tuhcihawpaw tuh thua kho vema?” cite a khung. Te aning nynh, “Na mit ccaccei te tuh-e tuh na muih cih, thuasalama nang tuh na ae lan khyh,” a cipya.²⁰A tungvaw kya tuhcite acyihkuh ccaccing; koikua kyakhe ccungccaw hae nynh amaw kha phe chih lan a syde hae. Shunam Nopinung nynh Loo A Muethui

¹Te Elisha nynh a ccapaw a la hiinsahpyapaw nopinung kha, “Thokuh lah na innbyn hae ryte la cceih oh, khua na sah khonaw hmin miakaw kya la um; pawccecize Bawipaw nynh ccakannaw kha ko vae zah, ram lungkhu kya kum sari lungkhu ccakanccih cih,” a cipya.²Tukeiccuze nopinung nynh thokuh zah Pachia ccungccapaw bya thyhte a cyi; a innbyn hae ryte cceih hae zah Filistin hae ram kya kum sari lungkhu a um hae.³Kum sari he accing te, nopinung nynh Filistin hae ram kyate ki zah, a inn te a loo bua mue kho nawlan ngiaku khylan siapharan kalan a cceih.⁴Siapharan nynh Pachia ccungccapaw a ryalahtu Gehazi kha bya hokhae zah, “Elisha nynh alesaepaw rya a lawpaw balyn kha yn hopya tua,” a cipya.⁵Elisha nynh a chihpaw a hiinsah thuinaw kong kha Gehazi nynh a hopya cciamang lyakhe, a ccapaw a hiinsahpyapaw nopinung nynh a inn te a loo kha bua mue kho nawlan siapharan kha a ngiaku. Gehazi nynh, “Siapharan ka bawipaw, e nopinung hynh kae hopyapaw nopinung thua zah, e ccapaw hynh Elisha nynh a hiinsahpyapaw a ccapaw nynh thua,” a cipya.⁶Siapharan nynh nopinung kha he a khia tuh, nopinung nynh a hopya. Tukeiccuze siapharan nynh nopinung elang bawi lu kheit kha naw zah, “A uccaw balyn kha, e ram kyate a pou nin te atu cia a loo kyate a poupaw balyn ryte, amaw kha pyathui oh,” a cipya. Benhadad Chinaw

⁷Siria siapharan Benhadad acci cciamang lyakhe Elisha tuh Damaskas khua lang a cceih. “Hein kya Pachia ccungccapaw yn thua,” cite he a hopah hae tuh,⁸siapharan nynh Hazael kha, “Lasung ccyngkuh lah, Pachia ccungccapaw kha tungku khylan la cceih. E ccinaw kyate ka dan cih tou cipaw kha aning nynh Bawipaw kalan yn la khiapya tua sah,” a cipya.⁹Tukeiccuze Hazael tuh Damaskas khua e uccaw ahoyhoypaw kha kalauh sung pali te lasung lang phusah zah, amaw kha tungku khylan a cceih. He a thua te, a malang khe thadyn zah, “Na ccapaw Siria siapharan Benhadad nynh kae hynh na kalan yn saw zah, ‘E ccinaw kyate ka dan cih tou?’ a ci,” cite a hopya.¹⁰Elisha nynh, “La cceih lah, ‘Solei na dan cih,’ cite la hopah; thuasalama aning tuh solei a chih cih cipaw kha Bawipaw nynh phe yn muihsah vae,” a cipya.¹¹Elisha nynh Hazael kha a maesue phe roh lan phang a do. Te Pachia ccungccapaw tuh a rah.¹²Hazael nynh, “Ka bawipaw, pawccemou na raw?” cite khia zah, Elisha nynh, “Israel hae tungvaw na cyi lanpaw hoyleinaw kha ka ny keiccu nynh thua; mih rhawlungrua hae kha maee te na soi cih, mih ccangvae hae kha thaloi te na theih cih hae, mih imua hae kha phe tui lan na noinae cih hae zah ccaawpoipaw mih nopi hae kha mih vue na koi cih hae,” a cipya.¹³Hazael nynh, “Ui sasaw hung ka thuapaw na ryalahtupaw kae nynh pawtemou e ryalaw lepaw hynh ka lah kho cih?”a cipya. Elisha nynh, “Nang nynh Siria siapharan lang na tang lanpaw kha Bawipaw nynh yn muihsah vae,” a cipya.¹⁴Te aning nynh Elisha kha cciataw zah a bawipaw Benhadad kalan a cceih, te “Elisha nynh paw bya mou ae hopya?” cite a bawipaw nynh khia zah, “Solei a dan cih, yn cipya,” cite a khung.¹⁵Thuasalama awkhualan khe Hazael nynh boei thaawkalaepaw kha lah zah tui kya a dung koute siapharan mae kha bong zah a chih. Te Hazael tuh siapharan lang a tang. Jehoram nynh Judah A Uk (2Sh 21.1-20)

¹⁶Ahab ccapaw Joram nynh Israel siapharan lang a tangnaw kum pangawnaw kum khe, Judah siapharan Jehoshafat ccapaw Jehoram nynh ram kha a uk takaw.¹⁷Sung thum kum ning he cih te, siapharan lang tang zah, Jerusalem khua kya kum tarya a uk.¹⁸A zu tuh Ahab ccanung athua keiccuze Ahab ciihan hae nynh a cyi hae hawte, Israel siapharan hae laanpi kha a zui. Aning nynh Bawipaw muihnaw kya hoyleinaw kha a rae.¹⁹Tuhzemah Bawipaw nynh a ryalahtu David kyakhe amaw te a ciihan hae kha maeeinn zungzae pya lan bya a la kinpyaku vae keiccuze David liate Judah kha roh khyh.

²⁰Jehoram she lyakhe Edom hae nynh Judah uknaw kha dou hae zah mimaw ccungccaw kha siapharan lang a khangku hae.²¹Te Joram nynh a marangle hae balyn ryte Zair langkhe a cceih. Khuazi khe pou zah amaw a koihlu hae paw Edom hae te mih marangle uktu bawi hae kha a tuk hae; te a rhawkaw hae tuh inn lang a ccue hae.²²Tukeiccuze Edom nynh Judah uknaw kha atunin cia a dou. Libnah nynh mah tuh ccyh lyakhe a doubua.²³Tuhlaepaw Joram nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.²⁴Joram tuh a minpaaw hae ryte ih hae zah, minmin ryte David khua khe a uukheih hae; a ccapaw Ahaziah tuh amaw ccelang siapharan lang a tang. Ahaziah nynh Judah A Uk (2Sh 22.1-6)

²⁵Ahab ccapaw Joram nynh Israel siapharan lang a tangnaw kum haw lae ningnaw kum khe, Judah siapharan Jehoram ccapaw Ahaziah nynh ram kha a uk takaw.²⁶Ahaziah nynh kum kuin lae ning he cih te, ram kha uk takaw zah, Jerusalem kya kum kheit a uk. A nung min tuh Athaliah cikuh zah, Israel siapharan Omri a mintanung nynh thua.²⁷Ahaziah tuh Ahab ciihan paeepaw athua keiccuze Ahab ciihan laanpi kha zui zah Ahab ciihan hawte Bawipaw muihnaw kya hoyleinaw kha a rae.

²⁸Ahab ccapaw Joram ryte cceih hae zah Siria siapharan Hazael kha Ramoth-gilead kya a tuk hae, tuin kyakhe Siria hae nynh Joram kha maw a muesah hae.²⁹Siria siapharan Hazael kha tuk zah Siria hae nynh Ramah khua kya a muesah hae paw vaemaw kha dansaku khylan Jezreel khua lang a ki. Judah siapharan Jehoram ccapaw Ahaziah tuh Ahab ccapaw Joram vaemaw a mue keiccuze via khylan Jezreel khua lang a cceih. Jehu kha Chitui Thuhnaw

¹Tetuh profeh Elisha nynh profeh hae phu kya-e lu kheit kha ko zah, “Na taevoiboei kha voikuh; e chitui bawng hynh lawkuh lah, Ramoth-gilead lang la cceih.²He na thua te, Nimshi ccapaw Jehoshafat a ccapaw Jehu kha la ccung; te la tee lah, a ruiban hae kyate na pousah cih zah, alungkhu lang e akhaan lungkhu langkhe na teekhae cih.³Te chitui bawng kha lawte a lu kha na bu cih zah, ‘Bawipaw nynh hynhte a ho: Nang hynh Israel siapharan lang chitui kae thuh, a ci,’ cite la hopah. Te thuakaw kha na hung cih zah na ccue cih; na thysung nan sah,” a cipya.

⁴Tukeiccuze ccangvaepaw, profehpaw taraw tuh Ramoth-gilead lang a cceih.⁵Rhawkaw hae a uktu rhawbawi hae a la pumku lya hae khe aning tuh thua zah, “Pou rhawbawipaw, nang kae hopya lanpaw bya ka hoi,” a cipya. Jehu nynh, “Kaening laku e hummou na hopah cih?” cite khia zah, “Pou rhawbawipaw, namaw kha nynh thua,” a cipya.⁶Tukeiccuze Jehu tuh thokuh zah alungkhu lang a tee; ccangvaepaw nynh a lu vawlan chitui bu zah, “Bawipaw Israel Pachia nynh hynhte a ho: Nang hynh Bawipaw ccungccaw hae, Israel hae siapharan lang chitui kae thuh.⁷Ka ryalahtu profeh hae chiise te Bawipaw ryalahtu hae balyn chiise kha a luasah keiccuze Jezebel tungvaw phu ka law nawlan, na bawipaw Ahab ciihan hae kha na theih cih hae.⁸Ahab ciihan balyn tuh a roh cih hae; Israel ram kya umpaw a luepaw thuasah, a lue leipaw thuasah Ahab ciihan pise miakaw kha ka vua cih hae.⁹Ahab ciihan kha Nebat ccapaw Jeroboam ciihan hawte thuasah, Ahijah ccapaw Baasha ciihan hawte thuasah ka cyih cih.¹⁰Ui nynh Jezebel kha Jezreel ram kya a ae cih, humhung nynh mah amaw kha uh lan khyh,” a cipya. Tukoute thuakaw kha hungkuh zah a ccue.

¹¹Jehu tuh a bawipaw ryalahtu hae kalan he yn thua te, minmin nynh, “Atyn-are ahoy tou? Mingaeepaw kha pawccemou na kalan yn ccia?” cite a khia hae. Aning nynh, “Khah-e paw te a bya kha phe na ny oh,” cite a khung hae.¹²Minmin nynh, “Thua khyh! Oun hopya tua!” a ci hae. Tukeiccuze Jehu nynh, “Aning nynh kae yn hopyapaw bya tuh: ‘Bawipaw nynh hynhte a ho, nang hynh Israel siapharan lang chitui kae thuh,’ a ci,” cite a hopya hae.¹³Tetuh mih balynte mih angkiccua kha palou lah hae zah ccu synaw kyakhe Jehu kha a phaepya hae; te mungkae tu hae zah, “Jehu tuh siapharan nynh thua,” cite a sia hae. Israel Siapharan Joram Chianaw

¹⁴Tuhcite Nimshi ccapaw Jehoshafat a ccapaw Jehu nynh Joram kha rawse zah a phee. Joram tuh Israel hae balyn ryte Siria siapharan Hazael kha dou khylan Ramoth-gilead kya a um hae;¹⁵thuasalama Siapharan Joram tuh Siria siapharan Hazael a tuk lyaze Siria hae nynh a muesah hae paw maw kha dansaku khylan Jezreel lang a ki vae. Te Jehu nynh, “E hynh na ry oh zetuh, e thongpang hynh Jezreel khua kya ho khylan, e khua kyate humhung mah ccia sah nan oh,” a ci.¹⁶Jehu tuh a marangle kha ccikuh zah, a dan leipaw Joram a umnaw Jezreel khua lang a cceih. Judah siapharan Ahaziah tuh Joram via khylan a cceih.

¹⁷Jezreel khua rhawviainn kya a thadynpaw rhawviatu nynh Jehu te a ccungccaw hae oun ccia hae paw kha he a muih tuh, “Ccungccaw phu kheit ka muih,” a ci. Joram nynh, “Marang rhawkaw lu kheit ko lah, minmin te tungku khylan la sawtua, te aning nynh, ‘Daenaw te athua tou?’ cite khia hae sah,” a cipya.¹⁸Tukeiccuze marang rhawkawpaw nynh Jehu kha tungku khylan ccianua zah, “Siapharan nynh, ‘Daenaw te athua tou?’ a ci,” cite a hopya. Jehu nynh, “Nang nynh daenaw tuh pawmou na se? Maeleihkuh lah, ka nulang te yn zui,” a cipya. Rhawviatu nynh, “Locceihtupaw tuh minmin kya a thua vae, thuasalama yn ki vae khyh,” a cipya.¹⁹Te lu ningnaw marang rhawkawpaw kha a saw, tuh-e paw tuh minmin kya thua zah, “Siapharan nynh, ‘Daenaw te athua tou?’ a ci,” cite a hopya hae. Jehu nynh, “Nang nynh daenaw tuh pawmou na se? Maeleihkuh lah, ka nulang te yn zui,” a cipya.²⁰Rhawviatu nynh, “Locceihtupaw tuh minmin kya a thua vae, thuasalama yn ki vae khyh. Marangle kha mingaeepaw hawte a mawng keiccuze Nimshi ccapaw Jehu nynh a mawngpaw te nynh aloku,” a cipya.

²¹Joram nynh, “Paccyn oh,” a ci keiccuze a marangle kha a paccyn hae. Israel siapharan Joram te Judah siapharan Ahaziah tuh mih marangle raveih kha ccikute Jehu te tungku lan cceih hae zah, Jezreel khuapaw Naboth khokhu khe a tungkuh hae.²²Joram nynh Jehu kha he a muih te, “Jehu, daenaw te athua tou?” a cipya. Jehu nynh, “Na nung Jezebel nynh a raepaw ohhuakunaw te naawthyanaw patae a um lungkhu balyn tuh daenaw a um kho cih zawtou?” cite a khung.²³Te Joram nynh maeleihkute ccue zah Ahaziah kha, “Pheekunaw nynh thua, Ahaziah!” a cipya.²⁴Jehu nynh a thawzung balynte a li kha suete Joram kha a raw te a raw laku kya a kaw; the nynh a bung kha tung zah Joram tuh a marangle kyate a khuliakuh.²⁵Jehu nynh amaw a bawmtu Bidkar kha, “Hang lah, Jezreel khuapaw Naboth laephi kyakhe vua; nang te kae nynh a paaw Ahab nulang marang ah cciku lyaze, Bawipaw nynh amaw kha rawsete hynh-e bya a hopaw kha na syntaw ung cih:²⁶‘Naboth chiise te a ccapaw hae chiise kha inkhawnin ka muih, e laephi kyahin nang kha liaru lan bya ka kinku,’ cite Bawipaw nynh a ci. Tukeiccuze a rhua kha hang lah, Bawipaw bya thyhte laephi kyakhe vua,” a cipya. Judah Siapharan Ahaziah A Chia hae

²⁷Judah siapharan Ahaziah nynh tuh-e tuh he a muih tuh, Beth-haggan langkhe a ccue. Jehu nynh deehui zah, “Amaw kha mah kaw oh!” cipah hae zah, Ibleam pe Gur khua lang kaenaw laanpi kya marangle kyakhe a kaw hae. Te Megiddo khua lang ccue zah, tuin kya a chih.²⁸A kuihkaw e bawi hae nynh a rhua kha marangle te Jerusalem lang phu hae zah, David khua kya amaw shawku kyakhe a minpaaw hae ryte a uukheih hae.

²⁹Ahab ccapaw Joram nynh Israel siapharan lang a tangnaw kum haw lae kheitnaw kum khe Ahaziah nynh Judah ram kha a uk takaw. Jezebel Chinaw

³⁰Jehu tuh Jezreel khua a thua cipaw kha Jezebel nynh a thae; a mit kha asi thuhkute a lu kha ccaankuh zah thanlan-aw kyate ngaw a do.³¹Jehu nynh sakoih kya a tee lyakhe, Jezebel nynh, “A bawipaw a theihtupaw Zimri, daenaw te athua tou?” a cipya.³²Jehu nynh thanlan-aw kalan khe do zah, “Hummou ka kalan a pan? Hummou?” a ci. Tinriapaw ccungccaw hae lu ning lu thum nynh amaw kha thanlan-aw kyate a do hae.³³Jehu nynh, “Khah-e nung kha yn vua oh,” a cipya hae. Tukeiccuze vua hae zah a chii nynh pang te marang hae kha pia hae zah tuh-e hae nynh a syde hae.³⁴Te aning nynh tee zah a ae a neih koute, “Thyalawnaw a muepaw nopinung hynh do oh lah, uh oh, pawccecize aning tuh siapharan ccanung nynh thua,” a ci.³⁵Thuasalama uu lan cite he a cceih hae tuh, a luru, a ccu te a kuihphe laelan pawpaw mah muih vae khyh hae.³⁶Oun ki hae zah Jehu kha he a hopah hae tuh, aning nynh, “E hynh Bawipaw nynh a ryalahtu Tishbe khuapaw Elijah kyate ho zah, ‘Ui hae nynh Jezebel saw kha Jezreel ram kya a ae cih hae;³⁷e hynh Jezebel shawku nynh thua, cite humhung nynh mah a ho khyh nawlan hae, Jezebel rhua tuh ia hawte Jezreel ram loo kya a um cih,’ a ci,” cite a ho. Ahab Ciihan hae Chianaw

¹Ahab nynh Samaria khua kya ccapaw hae sung sari a hoi. Tukeiccuze Jehu nynh ccaw zei zah Jezreel khua uktu hae, piccan hae te Ahab ccapaw hae a do-oihtu hae a umnaw hae Samaria khua langkhe ccaw ky hae zah,²“Nae bawipaw ccapaw hae tuh nae kya um hae zah, marangle hae, marang hae, koihpaw khua hae te zunghe hae mah nae kya a um hae keiccuze,³nae bawipaw ccapaw hae kyaze asung-e huaccepaw kha po oh lah, a paaw bawitungkhung kya haungsah oh lah, nae bawipaw ciihan elang rhawtukpah oh,” a cipya hae.⁴Minmin nynh myarya rih hae zah, “Dotua oh, siapharan hae lu ning tuh amaw malang thadyn kho khyh hae, pawtemou aening nynh ah thadyn kho cih oh?” a ci hae.⁵Tukeiccuze siapharan inn do-oihtu, khua a uktu, piccan hae te imua do-oihtu hae nynh Jehu kha byataw hae zah: “Kaening tuh na ryalahtu hae nynh kae thua; na hopaw miakaw kae cyih cih. Humhung mah siapharan lang kae khangkuh lan khyh; ahoy na ci hawte cyih ccaleih,” a cipya hae.⁶Te Jehu nynh minmin kalan vae ningnaw ccaw zei zah, “Kamaw kalan na pan oh zah, ka bya na ngae oh zetuh, nae bawipaw a ccapaw hae lu kha pae oh lah, awkhualan atu ccyh kya ka kalan Jezreel khua lang oun cceih oh,” a cipya hae.⁷Tuh-e ccaw tuh minmin kya he a thua te, siapharan ccapaw hae kha ko hae zah milu sung sari a chia hae; mih lu hae kha shua kya sang hae zah, Jezreel khua lang Jehu kalan a ky hae.⁸Locceihtu hae tuh oun thua hae zah, “Siapharan ccapaw hae lu kha oun thuakhae vae hae,” cite hopah hae zah, Jehu nynh, “Koikua teenaw kyakhe awkhualan awkhua cia san ning lang pum oh,” a cipya hae.⁹Awkhualan awkhua khe Jehu tuh he a pou te, thadyn zah ccungccaw hae balyn kha, “Nanning tuh seinaw na hoi khyh oh. Ka bawipaw a pheetu te a theihtu tuh kamaw nynh ka thua; thuasalama hynh-e hae balyn hynh hum nynh mou a theih hae?¹⁰Bawipaw nynh Ahab ciihan te asekuh lante a hopaw Bawipaw bya tuh ccangkheit sanmah laephi kalan ccah lan khyh cipaw nyh oh; pawccecize Bawipaw nynh a ryalahtu Elisha kyate a hopaw kha a cyi vae,” cite a hopya hae.¹¹Tukeiccuze Jezreel khua kya a laehypaw Ahab ciihan hae balyn, a kuihkaw e bawi hae, a ruiban hoypaw hae te ranpibawi hae kha lu kheit san hiin leite a chia hae.

¹²Te thokuh zah Samaria lang a cceih. Laanpi kya Tuurin hae hmin Beth-eked kya he a thua tuh,¹³Judah siapharan Ahaziah puizia hae ryte tungkuh hae zah, Jehu nynh, “Hum hae mou na thua oh?” cite khia hae zah, minmin nynh, “Ahaziah puizia hae nynh kae thua; siapharan ccapaw hae te siapharannung a ccapaw hae kha tungku khylan nynh kae ccia,” a cipya hae.¹⁴Jehu nynh, “Minmin hynh ahiinte kyng oh,” a cipya hae. Minmin kha ahiinte kyng hae zah Beth-eked hunghua kyakhe mih balynte sung pali lu ning a chia hae; aning nynh lu kheit sanmah hiin khyh hae.

¹⁵Tuin kyate he a cceih te, Rekhab ccapaw Jehonadab tuh amaw te tungku khylan yn cceih; Jehu nynh byabeih zah, “Ka thinlung tuh na tungvaw ading hawte, nang na thinlung so ka tungvaw ading tou?” cite khia zah, Jehonadab nynh, “Ou, ading,” a cipya. Jehu nynh, “Athua lanze, na kuih kha yn pya,” a cipya. Tukeiccuze a kuih kha pya zah, Jehu nynh amaw kalan marangle lungkhu lang a suebua.¹⁶Jehu nynh, “Ka kya cceihbua lah, Bawipaw elang ka lungthawsaenaw hynh dobua tua,” a cipya. Tukeiccuze a marangle kya a ccisaku bua.¹⁷Samaria khua he a thua te, Bawipaw nynh Elijah kya a hopaw a bya thyhte, Samaria khua kya Ahab ccungccaw a hiinhy hae paw miakaw kha mih cii phe mih lan a chia hae. Baal Beik hae paw Chianaw

¹⁸Te Jehu nynh ccungccaw balyn kha pum hae zah, “Ahab nynh Baal kha beihtaraw kyalya rya a lawpya; thuasalama kae, Jehu nynh rya patae ka lawpah cih.¹⁹Tukeiccuze Baal profeh hae balyn, a beiktu hae balyn te a ranpibawi hae balyn kha ka kalan oun ko oh; lu kheit sanmah mesei nan oh, pawccecize Baal elang myarya lepaw silawnaw kha ka raepah cih; mesei athuapaw miakaw tuh hiin lan khyh,” a ci. Thuasalama Jehu nynh Baal a beik hae paw kha chiathya nawlan a phee hae paw nynh thua.²⁰Jehu nynh, “Baal elang athyaapaw pumkunaw kha rae oh,” cite kaw a tho. Tukeiccuze tuh-e tuh a thaesah hae.²¹Jehu nynh Israel ram pynpi kya byataw hae zah, Baal a beikpaw miakaw tuh khaleih a thua hae, a thua leipaw lu kheit san um khyh. Baal beikinn lungkhu lang tee hae zah, Baal beikinn tuh voikheit lang te voikheit lang cia phe abeih hae.²²Jehu nynh boeining nungnaw a do-oihtu kha, “Baal a beik hae paw balyn elang boeining hae kha yn thuaa hae,” cipah zah, aning nynh a thuaapya hae.²³Te Jehu tuh Rekhad ccapaw Jehonadab ryte Baal beikinn lungkhu lang tee hae zah, “Nanning laku kya Bawipaw a beikpaw lu kheit san a um khyh nawlan ccungtua oh, Baal a beikpaw kyalya um hae sah,” a ci.²⁴Te silawnaw hae te maee-ute silawnaw hae kha rae khylan a tee hae.
Jehu nynh ccungccaw sung tarya kha atolang khe nung hae zah, “Nae kuih kya kae pya oh paw hynh-e hae lukhakheit a luesahpaw ccungccaw tuh a hiinnaw a shung cih,” a cipya hae.²⁵Maee-ute silawnaw kha he a thangsah takaw te, Jehu nynh rhawviatu hae te bawi hae kha, “Tee oh lah, theih oh; lu kheit sanmah luesah nan oh,” a cipya hae. Tukeiccuze minmin nynh thaloi te a bae hae. Rhawviatu hae te bawi hae nynh minmin kha atolang vua hae zah, Baal beikinn alungkhu lang e akhaan kalan a tee hae.²⁶Baal beikinn lungkhu umpaw zohtuh hae kha lah hae zah maee te a soi hae.²⁷Baal zohtuh te Baal beikinn kha roh hae zah, ia-inn lang atunin cia a mang hae.

²⁸Tuhcite Jehu nynh Baal kha Israel ram kyate a maemih.²⁹Thuasalama Nebat ccapaw Jeroboam nynh Israel hae kha seinaw a raesahnaw hae paw sui vaetuataw hae, Bethel khua te Dan khua a um hae paw kha Jehu nynh vua khyh.³⁰Bawipaw nynh Jehu kha, “Ka muihnaw kya ahmepaw kha hoyte na cyih zah, ka thinlung kya a umpaw balyn thyhte Ahab ciihan hae kya na cyi keiccuze na ccapaw hae tuh she pali cia Israel bawitungkhung kya a haung cih hae,” a cipya.³¹Thuasalama Jehu nynh Bawipaw Israel Pachia kawbya kha a thinlung balyn te zui lan raeringkuh khyh; Jeroboam nynh Israel hae a raesah hae paw seinaw kha vua khyh. Jehu Chinaw

³²Tuin ccyh lyakhe Bawipaw nynh Israel ram abang kha a aw bang. Hazael nynh Israel ram kha:³³Jordan vaw nithua lang, Gilead ram abalyn, Gad phin hae, Reuben phin hae te Manasseh phin hae ram, Arnon Vaw pe umpaw Aroer khua kyate Gilead ram te Bashan ram kyacia a tae.³⁴Tuhlaepaw Jehu nynh rya a lawpaw, a cyipaw balyn te a huhan balyn tuh Israel Siapharan hae Sherianaw Ccauh kya a zei hae.³⁵Jehu tuh a minpaaw hae ryte ih hae zah Samaria kya a uu hae. A ccapaw Jehoahaz nynh amaw ccelang siapharan lang a tang.³⁶Jehu nynh Samaria khua kyate Israel ram kha kum kuin lae tarya a uk. Athaliah nynh Judah A Uk (2Sh 22.10—23.15)

¹Ahaziah a nung Athaliah nynh a ccapaw a chipaw kha he a nyh tuh, thokuh zah siapharan innbyn hae balyn kha a chia hae.²Thuasalama siapharan Joram ccanung, Ahaziah ccianung nynh Ahaziah ccapaw Joash kha chia athua vae cih hae paw siapharan ccaaw hae kyate zya ruh zah amaw te a do-oihtu kha inaw khaan kya a thuruh hae. Tuhcite amaw kha chia athua khyh nawlan, Athaliah kyate zya a thuruh;³Athaliah nynh ram a uk lungkhu balyn, Joash tuh Jehosheba ryte kum taruh lungkhu Bawipaw inn kya a rekuh hae. Jehoiada nynh Imua Joash Chitui A Thuh

⁴Kum sarinaw kum khe ranpibawi Jehoiada nynh Karet ccungccaw hae kya-e rhawbawi hae, rhawviatu hae kya-e rhawbawi hae kha amaw kalan Bawipaw inn lang a kosah hae. Minmin ryte byakinnaw rae zah Bawipaw inn kyakhe bya a kinsaku hae; te siapharan ccapaw kha a muihsah hae.⁵Jehoiada nynh, “Hynhte na cyih cih oh: sabbath nin kya rya na hoi oh paw nanning laku e pum thum pum kheit nynh siapharan inn kha na ngaw cih oh,⁶(ccangpaw pum kheit nynh Sur sakoih kya na ngaw cih oh zah ccangpaw pum thum pum kheit nynh rhawviatu hae nulang umpaw sakoih kyakhe na ngaw cih oh); tuhcite siapharan inn kha na ngaw cih oh;⁷sabbath nin kya rya na hoi lei oh paw phu ning nynh siapharan kha thungkhaw khylan Bawipaw inn kha na ngaw cih oh,⁸zunghe ccarou ccyngkute siapharan kha na koihlu cih oh; te a koihlutu rhawkaw hae kalan yn naekuhpaw miakaw tuh chia athua cih. Siapharan nynh a pou a tee vae ze, tyty na zui cih oh,” a cipya hae.

⁹Ranpibawi Jehoiada nynh kaw a pya hae thyhte rhawbawi hae nynh marya a cyi hae; minmin lu kheit cci nynh sabbath nin kya rya a hoi cih lei hae paw mih ccungccaw hae te sabbath nin kya rya a hoi cih hae paw mih ccungccaw hae kha cciakhae hae zah ranpibawi Jehoiada kalan ccarou a thuakhae hae.¹⁰Bawipaw inn kya umpaw ccoi hae te khawriaphua hae kha ranpibawi nynh rhawbawi hae kalan a pya hae;¹¹rhawviatu hae tuh zunghe ccarou ccyngkute siapharan kha voikheit voikheit langte thungkhaw khylan, silawhang te beikinn kha po voilu lan alia te palung cia a thadyn hae.¹²Te ranpibawi nynh siapharan ccapaw kha yn poukhae zah bawilukhung khungsah zah byakinnaw ccauh kha a pya; siapharan lang khang hae zah chitui a thuh hae; mih kuihbia hae zah, “Siapharan tuh a hiinshe sae vae sah!” cite a sia hae. Athaliah Chinaw

¹³Rhawviatu hae roi te ccungccaw hae roi kha Athaliah nynh he a thae tuh, Bawipaw inn lungkhu lang ccungccaw hae kalan a tee;¹⁴he a do tuh, aphung thyhte siapharan tuh tungpi pe thadyn zah, rhawbawi hae te mungkae tu hae paw tuh siapharan pe um hae zah, ram lungkhu e ccungccaw balyn tuh mih lungpaw zah mungkae a tu hae paw kha a muih. Athaliah nynh a boeining kha seii zah, “Pheekunaw nynh thua! Pheekunaw nynh thua!” cite a sia.¹⁵Rhawkaw hae uktu lang khang athua hae paw rhawbawi hae kha Jehoiada nynh, “Aning hynh rhawkaw hae laku kyate poukhae oh, amaw a zuipaw miakaw kha thaloi te theih oh,” a cipya hae. Pawccecize ranpibawi nynh, “Bawipaw inn lungkhu kya amaw kha chia thua nan sah,” a ci.¹⁶Tukeiccuze minmin nynh a kyng hae; te siapharan inn lang teenaw marang sakoih kyate poukhae hae zah tuin kya a chia hae.

¹⁷Jehoiada nynh minmin tuh Bawipaw ccungccaw athua nawlan hae, Bawipaw te siapharan te ccungccaw zapi hae laku kya byakinnaw kha a rae; siapharan te zapi hae laku kya mah a rae.¹⁸Te ramccungccaw hae balyn nynh Baal beikinn kha ccianua hae zah a ro hae; a silawhang hae, a zohtuh hae kha palae tui lan koi hae zah Baal ranpibawi Mattan kha silawhang hae malang khe a chia hae. Ranpibawi nynh Bawipaw inn kya rhawviatu hae kha a nung hae.¹⁹Aning nynh rhawbawi hae, Karet ccungccaw hae, rhawviatu hae te ramccungccaw hae balyn kha a cciakhae hae; te minmin nynh siapharan kha Bawipaw inn kyate siapharan inn langkhe rhawviatu hae sakoih kyate a cciakhae hae. Te siapharan hae kya-e bawitungkhung kyakhe Joash kha a haungsah.²⁰Tukeiccuze ramccungccaw hae balyn tuh mih lungpaw; Athaliah kha thaloi te siapharan inn kya a theih kou hae te tuh, khuapi kya daenaw a um vae.

²¹Joash tuh kum sari acih te, ram kha a uk takaw. Beikinn Sakthuinaw (2Sh 24.1-16)

¹Jehu nynh Israel siapharan lang a tangnaw kum sarinaw kum khe, Joash nynh ram kha a uk takaw; Jerusalem khua kya kum sung pali a uk. A nung min tuh Zibiah cikuh zah Beersheba khuanung nynh thua.²Ranpibawi Jehoiada nynh a ccangpya keiccuze Joash nynh a she lungkhu balyn Bawipaw muihnaw kya ahmepaw kha a cyi.³Thuasalama ahangpaw hmin hae kha tuh roh khyh hae; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae.

⁴Joash nynh ranpibawi hae kha, “Bawipaw inn lungkhu lang athyaapaw ahlu lante thuakhaepaw phua, khyapya thyhte milu raveih nynh a pya hae paw phua—khyapya thyhte ccungccaw hae kyate muepaw phua te Bawipaw inn lungkhu lang lungthote a thuakhae hae paw phua hae balyn kha⁵ranpibawi hae nynh a hlutu hae raveih kya-e kha lah hae sah; te beikinn kha cyithui ahonaw miakaw cyihthui hae sah,” a cipya hae.⁶Thuasalama Siapharan Joash nynh ram a uknaw kum kuin lae thum accing cia ranpibawi hae nynh beikinn kha cyihthui loh khyh hae.⁷Tukeiccuze Siapharan Joash nynh ranpibawi Jehoiada te ccangpaw ranpibawi hae kha ko hae zah, “Pawccemou beikinn kha na cyithui khyh oh? Tukeiccuze atu tuh a hlutu hae kya-e phua kha lah nan vae oh, beikinn cyithuinaw hanlan pya ccavae oh,” a cipya hae.⁸Tukeiccuze ranpibawi hae nynh ccungccaw hae kya-e phua kha law leite, inn kha mah cyithui lei lante mih nawccah.

⁹Te ranpibawi Jehoiada nynh thingkua kha lah zah ahu kyakhe akhu vih zah, Bawipaw inn lungkhu lang teenaw ranglang sang, silawhang pe khe a nung; Bawipaw inn lang oun thuakhae hae paw phua miakaw kha thuakaw ngaw hae paw ranpibawi hae nynh tuh-e thingkua lungkhu lang a sang hae.¹⁰Thingkua lungkhu kya phua patae a um cipaw he a nyh hae te, siapharan a ryaccinkhanpaw te ranpibawi lupi nynh oun cceih hae zah, Bawipaw inn kya a muih hae paw phua kha ria hae zah sungkua lungkhu a sang hae.¹¹A ria vae hae paw phua kha Bawipaw inn a do-oihpaw ryalahtu hae kuih kya a pya hae; te minmin nynh Bawipaw inn kya ryalah hae paw lehccama hae, inn sak hae paw,¹²pazan thya hae paw, lung-awthya hae paw kha pya hae zah, Bawipaw inn cyithuinaw lanpaw thing a-awkuh vae paw te lung adeihkuh vae paw re nawlan te inn cyithuinaw elang ahoboupaw miakaw kya a mang hae.¹³Thuasalama Bawipaw inn elang ngun banangpi, tetakia hae, pakekhupaw hae, mungkae hae, sui angphe hae te ngun angphe hae kha tuh Bawipaw inn lungkhu lang a thuakhae hae paw phua hae te rae khyh hae,¹⁴pawccecize tuh-e phua tuh Bawipaw inn cyithuinaw kya ryalah hae paw kha pya athua hae.¹⁵Ryalahtu hae pya lan cite mih kuih kya phua pya athua hae paw ccungccaw hae nynh hmerarih lan rya a law hae keiccuze minmin kha phua ccazing khia vae khyh hae.¹⁶Cyiseinaw silawnaw phua te seithyaanaw silawnaw phua kha Bawipaw inn lungkhu lang teekhae khyh hae; tuh-e phua tuh ranpibawi hae nynh a lawku hae. Hazael nynh Jerusalem A Huraw

¹⁷Tuh ccyh lyakhe Siria siapharan Hazael nynh Gath khua kha ccianuate tuk zah a law. Hazael nynh Jerusalem kha ccianua lan he a nounuakuh tuh,¹⁸Judah siapharan Joash nynh a minpaaw hae, Judah siapharan hae Jehoshafat, Jehoram te Ahaziah nynh byakinkute a hlu hae paw uccaw hae te amaw nynh byakinkute a hlupaw uccaw hae, Bawipaw inn te siapharan inn kya-e sisuakhaan kya muih athuapaw sui balyn kha lah zah Siria siapharan Hazael kalan a ky. Tetuh Hazael nynh Jerusalem kha a kitaw. Joash Chinaw

¹⁹Tuhlaepaw Joash nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.²⁰A kuihkaw e ryalahtu hae nynh aruh lante phee hae zah, Silla khua lang ccianaw laanpi kya umpaw Millo inn kyakhe Joash kha a chia hae.²¹Amaw a theihtu hae tuh a ryalahtu hae, Shimeath ccapaw Jozakar te Shomer ccapaw Jehozabad nynh thua hae. David khua khe a minpaaw hae ryte a uukheih hae; te a ccapaw Amaziah nynh amaw ccelang siapharan lang a tang. Jehoahaz nynh Israel A Uk

¹Ahaziah ccapaw Joash nynh Judah siapharan lang a tangnaw kum kuin lae thumnaw kum khe, Jehu ccapaw Jehoahaz nynh Israel ram kha Samaria khua kyate a uk takaw; aning nynh kum haw lae sari a uk.²Bawipaw muihnaw kya hoyleinaw kha a rae, Nebat ccapaw Jeroboam nynh Israel hae a raesah hae paw seinaw hae kha cciataw leite a zui.³Bawipaw thinrianaw tuh Israel tungvaw maee lang rua zah, Siria siapharan Hazael te Hazael ccapaw Benhadad kuih kalan Israel hae kha atu te atu a pya hae.⁴Te Jehoahaz nynh Bawipaw kha ngia zah, Bawipaw nynh a thaepya; pawccecize Siria siapharan nynh Israel hae kha tuaasah hae zah, tuaasahkunaw a teingnaw hae kha aning nynh a muih.⁵Tukeiccuze Siria hae kuih kyate a lue nawlan hae, Bawipaw nynh Israel kha khumtu a pya; Israel ccungccaw hae tuh langmawlya hawte mimaw inn kya khua a sah hae.⁶Thuasalama Jeroboam nynh Israel a raesahpaw Jeroboam ciihan seinaw kha cciataw leite a zui hae; Asherah zohtuh kha mah Samaria khua kya a um ung.⁷Tukeiccuze Jehoahaz a rhawkaw hae tuh marang rhawkaw sung pangaw, marangle ccanghaw te ccu rhawkaw thong haw laeze alung lan um vae khyh hae; pawccecize Siria siapharan nynh minmin kha roh hae zah huimin kya-e vuiping hawte a syde hae.⁸Tuhlaepaw Jehoahaz nynh rya a lawpaw, a cyipaw balyn te a thungnaw tuh Israel Siapharan hae Sherianaw Ccauh kya a zei hae.⁹Jehoahaz tuh a minpaaw hae ryte ih hae zah, Samaria khua kya a uu hae; a ccapaw Joash nynh amaw ccelang siapharan lang a tang. Jehoash nynh Israel A Uk

¹⁰Judah siapharan Joash nynh Judah ram a uknaw sung thum kum sarinaw kum khe, Jehoahaz nynh Israel ram kha Samaria khua kyate a uk takaw; aning nynh kum haw lae taruh a uk.¹¹Aning nynh zemah Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw balyn kha cciataw leite a zui hae.¹²Tuhlaepaw Joash nynh rya a lawpaw te a cyipaw balyn, Judah siapharan Amaziah a dou lya-e a thungnaw tuh Israel Siapharan hae Sherianaw Ccauh kya a zei hae.¹³Joash tuh a minpaaw hae ryte ih hae zah, a bawitungkhung kya Jeroboam nynh a haung; Joash tuh Israel siapharan hae ryte Samaria khua kya a uu hae. Elisha Chinaw

¹⁴Elisha tuh a chisah cih paw ccinaw te he a ccih tuh, Israel siapharan Joash nynh ccianua zah a malang khe rah zah, “Apang, apang! Israel marangle hae te a marang rhawkaw hae!” cite a sia.¹⁵Elisha nynh amaw kha, “The te li yn lah,” cipah zah, aning nynh the te li kha a law.¹⁶Te Elisha nynh Israel siapharan kha, “Li kha sue,” cipah zah, aning nynh li kha a sue. Elisha nynh a kuih kha siapharan kuih vawlan a khang.¹⁷Te Elisha nynh, “Nithua lang e thanlan-aw kha hung,” cipah zah, aning nynh a hung. Elisha nynh, “Kaw” cipah zah a kaw. Te aning nynh, “Bawipaw kya-e taenaw the, Siria taenawpaw the! Pawccecize Afek khua e Siria hae kha phe thang lan na tuk cih hae,” a cipya.¹⁸Te Elisha nynh po ho zah, “The hae kha lah hae,” cipah zah aning nynh a law. Israel siapharan kha, “Khah-e hae khate laephi kha bua,” cipah zah, aning nynh vae thum a bua koute a umtaw.¹⁹Tetuh Pachia ccungccapaw tuh aning tungvaw a thinria zah, “Vae pangaw, vae taruh cia na bua lanpaw khaw athua; tuhcite na bua zetuh Siria hae kha phe thang lan na tae cih hae, thuasalama atu tuh Siria hae kha vae thum cia kyalya na tae cih hae,” a cipya.

²⁰Elisha tuh chih zah a uu hae. Moab ccungccaw aphu hae nynh Israel ram kha hawnin ccyh lyakhe leih a thiing hae.²¹Ccungccapaw lu kheit a uu lya hae khe, ccungccaw hoylei hae paw phu kheit kha muih hae zah, tuh-e michi rhua tuh Elisha shaw lungkhu lang a vua hae; tuh-e paw nynh Elisha ru kha he a ty miakaw te, hiinthui zah a thadyn. Israel nynh Khua hae A Lawthui

²²Siria siapharan Hazael nynh Jehoahaz she lungkhu balyn tuh Israel kha a tuaa a sah.²³Thuasalama Bawipaw nynh minmin kha thawccih hae zah ngaethya a umsah hae; Abraham, Isak te Jakob kya a la raepaw a byakinnaw keiccuze minmin kalan khe maekuh zah minmin kha roh khyh hae, amaw malang te atu cia dee khyh hae.

²⁴Siria siapharan Hazael he a chih te, a ccapaw Benhadad nynh amaw ccelang siapharan lang a tang.²⁵Hazael nynh tuk zah Jehoash a paaw Jehoahaz kuih kyate a la lawpaw khua hae kha Jehoahaz ccapaw Jehoash nynh Hazael ccapaw Henhadad kuih kyate bua a law. Joash nynh Benhadad kha vae thum cia tae zah Israel khua hae kha bua a law. Amaziah nynh Judah A Uk (2Sh 25.1-24)

¹Joahaz ccapaw Joash nynh Israel siapharan lang a tangnaw kum ningnaw kum khe, Joash ccapaw Amaziah tuh Judah siapharan lang a tang takaw.²Ram a uk takaw lya tuh kum kuin lae pangaw acih vae, Jerusalem khua kya kum kuin lae takua a uk. A nung min tuh Jehoaddin cikuh zah Jerusalem khuanung nynh thua.³Aning nynh Bawipaw muihnaw kya ahmepaw kha a cyi, tuhzemah a minpaaw David hawte tuh thua khyh; atyn-are kya a paaw Joash nynh a cyi hawte a cyi.⁴Thuasalama ahangpaw hmin hae kha tuh roh khyh; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae.⁵Siapharan kawhoinaw kha a kuih kya tynkaring lan he a um takaw te, a paaw, siapharan a la theihtu hae a ryalahtu hae kha a chia hae.⁶Thuasalama Moses phungbya ccauh kyaze, “Ccaaw hae hanlan nungpaaw hae kha chia thua lan khyh hae, nungpaaw hae hanlan ccaaw hae kha chia thua lan khyh hae; mimaw seinaw hanlan rou nynh chia athua cih hae,” cite Bawipaw nynh kaw a pya thyhte, a theihtu hae paw mih ccaaw hae kha tuh theih khyh hae.

⁷Amaziah nynh Loi Accya kyakhe Edom hae kha thong haw a chia hae, Sela khua kha lah zah Jokthe-el cite minphu zah atunin cia a min lang a tang.

⁸Amaziah nynh Israel siapharan, Jehu ccapaw Jehoahaz a ccapaw Jehoash kalan khe locceihtu hae saw hae zah, “Yn cceih lah, lu kheit te lu kheit hawiliakute doku tua sih,” a cipya.⁹Israel siapharan Jehoash nynh Judah siapharan Amaziah kalan byataw zah, “Lebanon mua e hinpawbu nynh Lebanon mua e sidar thingku kalan byataw zah, ‘Na ccanung kha ka ccapaw zu lang yn pya,’ a cipya; te Lebanon e loramsaw sa kheit nynh po a ccia lyakhe hinpawbu kha a syde.¹⁰Edom ram kha na tae ccaccing zah, na thinlung na hangsakuh vae. Na phu-enaw khate na lungryachikhaekuh sah lah, innvaw khe zya um; pawccecize namaw te Judah ram tuh khuliaku khylan pawccemou vawsawnaw kha na ccungku?” a cipya.

¹¹Thuasalama Amaziah nynh ngae ry khyh. Tukeiccuze Israel siapharan Jehoash tuh cceih zah, Judah ram Beth-shemesh kyakhe Judah siapharan Amaziah te hawiliakute rhaw a tukkuh hae.¹²Israel nynh Judah kha tae zah, mih inn raveih lang pong a ccue hae.¹³Israel siapharan Jehoash nynh Judah siapharan Amaziah kha Beth-shemesh kyakhe a kyng; Amaziah tuh Jehoash ccapaw, Jehoash tuh Ahaziah ccapaw nynh thua; te Jerusalem lang cceih zah Jerusalem khualungrua kha Efraim Koikua kyate Apaki Koikua kyacia dong za pali a ro.¹⁴Bawipaw inn kya a umpaw te siapharan inn e sisuainn kya a umpaw miakaw sui, ngun te angphe balyn kha lah zah, rhaw hae nynh a la kyng hae paw ccungccaw hae ryte Samaria khua lang a ki.

¹⁵Tuhlaepaw Jehoash nynh a cyipaw, a thungnaw te Judah siapharan Amaziah a tuknaw kong kha Israel Siapharan hae Sherianaw Ccauh kya a zei hae.¹⁶Jehoash tuh a minpaaw hae ryte ih hae zah, Israel siapharan hae ryte Samaria khua kya a uu hae; te a ccapaw Jeroboam nynh amaw ccelang siapharan lang a tang.

¹⁷Judah siapharan Joash ccapaw Amaziah tuh Israel siapharan Jehoahaz ccapaw Jehoash a chih koute kum haw lae pangaw a hiin ung.¹⁸Tuhlaepaw Amaziah nynh a cyi hae paw kha Judah Siapharan hae Sherianaw Ccauh kya a zei hae.¹⁹Jerusalem khua kya Amaziah kha phee hae zah Lakhish khua lang a ccue. Lakhish khua lang ccungccaw deehuisah hae zah, tuin kya a chia hae.²⁰A rhua kha marang te Jerusalem lang phusah hae zah, a minpaaw hae ryte David khua khe a uukheih hae.²¹Judah ccungccaw hae balyn nynh kum haw lae taruh acih vae paw Amariah kha ko hae zah, a paaw Amaziah ccelang siapharan lang a khang hae.²²Siapharan Amaziah tuh a minpaaw hae ryte a ih kou hae te, Amariah nynh Elath khua kha raethui zah Judah ram lungkhu lang bua a nung. Jeroboam II nynh Israel A Uk

²³Joash ccapaw Amaziah tuh Judah siapharan lang a tangnaw kum haw lae pangawnaw kum khe, Joash ccapaw Jeroboam tuh Israel siapharan lang tang zah Samaria khua kyate ram kha a uk takaw; aning nynh sung pali kum kheit a uk.²⁴Aning nynh Bawipaw muihnaw kya hoyleinaw kha rae zah, Nebat ccapaw Jeroboam nynh Israel hae a raesah hae paw seinaw balyn kha cciataw khyh.²⁵Bawipaw , Israel Pachia nynh a ryalahtu Gath-hefer khuapaw Amattai ccapaw, profeh Jonah kyate a la hopaw bya thyhte, aning nynh Israel ram kha Hamath khua teenaw kyate Arabah Rili kyacia bua a law.²⁶Pawccecize Israel hae nynh a teing hae paw riathaenaw tuh myarya accih cipaw kha Bawipaw nynh a muih; kyngpaw ccungccaw thuasah, a luepaw thuasah Israel a bawm lanpaw lu kheit san um vae khyh.²⁷Thuasalama Bawipaw nynh Israel min kha vaawlui zakaw te ka thee cih cite ho khyh, tukeiccuze Joash ccapaw Jeroboam kuih khate a khum hae.

²⁸Tuhlaepaw Jeroboam nynh rya a lawpaw, a cyipaw balyn te a thungnaw, rhaw a tuknaw, Judah kya-e a la thuapaw Damaskas te Hamath khua hae kha Israel elang pawtemou bua a law cipaw kha Israel Siapharan hae Sherianaw Ccauh kya a zei hae.²⁹Jeroboam tuh Israel siapharan hae, a minpaaw hae ryte a ih hae; te a ccapaw Zekhariah tuh a paaw ccelang siapharan lang a tang. Azariah nynh Judah A Uk (2Sh 26.1-23)

¹Jeroboam nynh Israel siapharan lang a tangnaw kum kuin lae sarinaw kum khe, Amaziah ccapaw Azariah tuh Judah siapharan lang a tang takaw.²Aning nynh kum haw lae taruh a ci lyate ram kha uk takaw zah, Jerusalem kyate sung pangaw kum ning a uk. A nung min tuh Jekoliah cikuh zah Jerusalem khuanung nynh thua.³A paaw Amaziah nynh a cyi hawte Bawipaw muihnaw kya ahmepaw kha a cyi.⁴Thuasalama ahangpaw hmin hae kha roh khyh hae; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae.⁵Bawipaw nynh siapharan kha de a tah keiccuze a chih cia vaethya ccinaw kae zah taekhiate inn ccangpaw kya a um. Siapharan ccapaw Jotham nynh siapharan inn kha do-oih zah ram kya-e ccungccaw hae kha a uk hae.⁶Tuhlaepaw Azariah nynh rya a lawpaw te a cyipaw balyn kha Judah Siapharan hae Sherianaw Ccauh kya a zei hae.⁷Azariah tuh a minpaaw hae ryte ih hae zah, a minpaaw hae ryte David khua kya a uu hae; a ccapaw Jotham nynh amaw ccelang siapharan lang a tang. Zekhariah nynh Israel kha A Uk

⁸Siapharan Azariah nynh Judah ram a uknaw sung thum kum taryanaw kum khe, Jeroboam ccapaw Zekhariah nynh Israel ram kha Samaria khua kyate sawpaw sah taruh a uk.⁹A minpaaw hae nynh a cyi hae hawte Bawipaw muihnaw kya hoyleinaw kha a rae. Nebat ccapaw Jeroboam nynh Israel hae a raesah hae paw seinaw hae kha cciataw khyh.¹⁰Jabesh ccapaw Shallum nynh phee zah ccungccaw zapi hae malang khe phe chih lan bua zah, tuh-e paw ccelang ram kha a uk.¹¹Tuhlaepaw Zekhariah nynh a cyipaw kha Israel Siapharan hae Sherianaw Ccauh kya a zei hae.¹²E hynh Bawipaw nynh Jehu kya, “Na ccapaw hae nynh Israel bawitungkhung vawlan she pali cia a haung cih hae,” cite bya a kinpyaku thyhte acyihkuhpaw nynh thua. Shallum nynh Israel A Uk

¹³Judah siapharan Uzziah nynh ram a uknaw sung thum kum takuanaw kum khe, Jabesh ccapaw Shallum nynh Israel ram kha a uk takaw; aning nynh Samaria khua kyate sawpaw sah kheit a uk.¹⁴Te Gadi ccapaw Menahem tuh Tirzah khua kyate cceihthung zah Samaria khua a thua; aning nynh Jabesh ccapaw Shallum kha Samaria khua kya bua zah a theih koute tuh-e paw ccelang ram kha a uk.¹⁵Tuhlaepaw Shallum nynh a cyipaw te ccungccaw a pheenaw kha Israel Siapharan hae Sherianaw Ccauh kya a zei hae.¹⁶Tuh ccyh lyakhe Menahem nynh Tappuah khua te a lungkhu um hae paw balyn, Tirzah khua kyate tho zah Tappuah khua pepan um hae paw kha a ro hae; koikua a hungpya khyh hae keiccuze khua kha a ro. Ccaawpoipaw nopi hae balyn kha mih vue a pawsah hae. Menahem nynh Israel A Uk

¹⁷Judah siapharan Azariah nynh ram a uknaw sung thum kum takuanaw kum khe, Gadi ccapaw Menahem nynh Israel ram kha a uk takaw; aning nynh Samaria khua kya kum haw a uk.¹⁸Aning nynh Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw miakaw kha a she lungkhu balyn cciataw khyh.¹⁹Assiria siapharan Pul nynh Israel ram kha a dou; Menahem nynh a siapharan thungnaw a kyngpaw kha atyn kho nawlan, Pul kha ngun talent thong kheit a pya.²⁰Assiria siapharan pya lanpaw phua tuh Menahem nynh Israel hae, mihoi hae balyn kha lu kheit ze ngun shekel sung pangaw ccite nangsete a ngia hae. Tukeiccuze Assiria siapharan tuh ki zah, tuin ram kya um khyh.²¹Tuhlaepaw Menahem nynh rya a lawpaw te a cyipaw balyn tuh Israel Siapharan hae Sherianaw Ccauh kya a zei hae.²²Menahem tuh a minpaaw hae ryte ih hae zah, a ccapaw Pekahiah nynh amaw ccelang siapharan lang a tang. Pekahiah nynh Israel A Uk

²³Judah siapharan Azariah nynh ram a uknaw kum sung pangawnaw kum khe Menahem ccapaw Pekahiah nynh Israel ram kha Samaria khua kyate uk takaw zah kum ning lungkhu a uk.²⁴Aning nynh Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw hae kha cciataw khyh.²⁵A rhawbawipaw Pekah, Remaliah ccapaw nynh Argob te Arieh ryte Gilead ccungccaw hae sung pangaw ryte Pekahiah kha phee hae zah, Samaria khua kya siapharan inn rhawlungrua koihkuhpaw lungkhu khe theih hae zah, Pekah nynh tuh-e paw ccelang ram kha a uk.²⁶Tuhlaepaw Pekahiah nynh rya a lawpaw te a cyipaw balyn tuh Israel Siapharan hae Sherianaw Ccauh kya a zei hae. Pekah nynh Israel A Uk

²⁷Judah siapharan Azariah nynh ram a uknaw sung pangaw kum ningnaw kum khe, Remaliah ccapaw Pekah nynh Israel ram kha Samaria khua kyate uk takaw zah, kum kuin lungkhu a uk.²⁸Aning nynh Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw hae kha cciataw khyh.

²⁹Israel siapharan Pekah ccyh lyakhe Assiria siapharan Tiglath-pileser tuh yn thua zah Ijon, Abel-besh maakah, Janoah, Kedesh, Hazor, Gilead te Galilee, Naftali ram balyn kha a law; ccungccaw hae kha kyngte Assiria ram lang a cciakhae hae.³⁰Uzziah ccapaw Jotham nynh Judah siapharan lang a tangnaw kum kuinnaw kum khe, Elah ccapaw Hoshea nynh Pekah kha phee zah a theih koute ram kha amaw nynh a uk.³¹Tuhlaepaw Pekah nynh rya a lawpaw te a cyipaw balyn tuh Israel Siapharan hae Sherianaw Ccauh kya a zei hae. Jotham nynh Judah A Uk (2Sh 27.1-9)

³²Remaliah ccapaw Pekah nynh Israel siapharan lang a tangnaw kum ningnaw kum khe, Judah siapharan Uzziah ccapaw Jotham nynh ram kha a uk takaw.³³Aning tuh kum kuin lae pangaw acih te, ram kha uk takaw zah Jerusalem khua kya kum haw lae taruh a uk. A nung min tuh Jerusha cikuh zah Zadok ccanung nynh thua.³⁴A paaw Uzziah nynh a cyi hawte Bawipaw muihnaw kya ahmepaw kha a cyi.³⁵Tuhzemah ahangpaw hmin hae kha roh khyh hae; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae. Aning nynh Bawipaw inn thahlang sakoih kha a rae.³⁶Tuhlaepaw Jotham nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.³⁷Tuh ccyh lyakhe Bawipaw nynh Siria siapharan Rezin te Remaliah ccapaw Pekah kha Judah ram dou khylan a saw takaw hae.³⁸Jotham tuh a minpaaw hae ryte ih hae zah, a minpaaw David khua kyakhe a minpaaw hae ryte a uukheih hae; a ccapaw Ahaz nynh amaw ccelang siapharan lang a tang. Ahaz nynh Judah A Uk (2Sh 28.1-27)

¹Remaliah ccapaw Pekah nynh Israel ram a uknaw kum haw lae sarinaw kum khe, Jotham ccapaw Ahaz tuh Judah siapharan lang a tang takaw.²Aning nynh kum kuin acih te, ram kha uk takaw zah Jerusalem khua kya kum haw lae taruh a uk. A minpaaw David hawte thua leite, Bawipaw a Pachia muihnaw kya hoynaw kha rae khyh zah,³Israel siapharan hae laanpi kha a zui. Bawipaw nynh Israel hae malang te a dee hae paw minphuin hae kya-e anungsikuhpaw cyisahnaw thyhte, a ccapaw khate heize maee-ute silawnaw a rae.⁴Ahangpaw hmin hae vawlan, mua hae vawlan te hinlalyhpaw thingku kaw miakaw khe silawnaw rae zah mynkhuhpaw kha a u.

⁵Tetuh Siria siapharan Rezin te Israel siapharan Remaliah ccapaw Pekah nynh Jerusalem kha tuk khylan a ccianua hae; Ahaz kha a koihlu hae zemah tae kho khyh hae.⁶Tuh ccyh lyakhe Edom siapharan nynh Edom elang Elath khua kha bua lah zah, Judah hae kha a dee hae; te Edom hae tuh Elath khua lang oun thua hae zah tuin kya atunin cia a um hae.⁷Ahaz nynh Assiria siapharan Tiglath-pileser kalan locceihtu hae saw hae zah, “Kae tuh na ryalahtu te na ccapaw nynh ka thua. Yn cceihthung lah, kae yn tuk hae paw Siria siapharan te Israel siapharan kuih kyate beih yn luesah tua,” a cipya.⁸Bawipaw inn lungkhu te siapharan inn sisuakhaan hae lungkhu umpaw sui te ngun kha mah lah zah Assiria siapharan kha lasung lang a ky.⁹Assiria siapharan nynh a bya ngaepyate Damaskas kha ccianua zah a law; a ccungccaw hae kha kyngte Kir khua lang a cciakhae hae, te Siapharan Rezin kha a chia.

¹⁰Ahaz Siapharan tuh Assiria siapharan Tiglath-pileser kha tungku khylan he a cceih tuh, Damaskas khua umpaw silawhang kha a muih. Ahaz Siapharan nynh ranpibawi Uriah kalan silawhang pungsan, adi-ale te raezia balyn kha akaw-aleih asasite a ky.¹¹Ranpibawi Uriah nynh silawhang kha a rae; Siapharan Ahaz nynh Damaskas khua kyate a ky thyhte, Damaskas khua kyate Ahaz Siapharan yn thua mawkhe Uriah nynh a rae vae.¹²Siapharan tuh Damaskas khua kyate he yn thua te, siapharan nynh silawhang kha a do. Te siapharan nynh silawhang tuh naenuakuh zah a vawlan kae zah,¹³maee-ute silawnaw te ccathae silawnaw kha rae zah niapaw silawnaw kha a bu; ccawkunaw silawnawpaw achii khate silawhang kha a thei.¹⁴Bawipaw malang umpaw sohin silawhang kha beikinn malang te, amaw silawhang te Bawipaw inn laku kyate nue zah a silawhang thahlang sang khe a nung.¹⁵Ahaz Siapharan ranpibawi Uriah kha kawpya zah, “Silawhang lepaw vawlan khe awkhua maee-ute silawnaw te zete ccathae silawnaw, siapharan kya-e maee-ute silawnaw te a ccathae silawnaw, ramccungccaw balyn kya-e maee-ute silawnaw, mih ccathae silawnaw te mih niapaw silawnaw kha na rae cih; te maee-ute silawnawpaw achii miakaw te silawnawpaw achii miakaw khate silawhang kha na thei cih; thuasalama sohin silawhang tuh kae nynh Pachia bya ka khianawpaw lang a um cih,” a cipya.¹⁶Ahaz Siapharan nynh kaw a pyapaw miakaw atyn-are kha ranpibawi Uriah nynh a cyi.

¹⁷Ahaz Siapharan nynh beikinn lungkhu umpaw a thadynnawpaw tung hae kha moi hae zah, tuh-e hae vawlan umpaw pakekhupaw hae kha mah a nue hae; tui tungnawpaw kua kha sohin tangnuapaw hae vawlan khate nue zah, aphaekuhpaw lung vawlan khe a nung.¹⁸Sabbath nin looh-aesung nawlan siapharan inn kya a sak hae paw avawlan adawkuhpaw kha thuasah, siapharan nynh atolang te a teenaw kha thuasah Siria siapharan keiccuze Bawipaw inn kyate a nue.¹⁹Tuhlaepaw Ahaz nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.²⁰Ahaz tuh a minpaaw hae ryte ih hae zah, a minpaaw hae ryte David khua khe a uukheih hae; a ccapaw Hezekiah nynh amaw ccelang siapharan lang a tang. Hoshea nynh Israel A Uk

¹Judah siapharan Ahaz nynh ram a uknaw kum haw lae ningnaw kum khe, Elah ccapaw Hoshea nynh Samaria khua kyate Israel ram kha uk takaw zah, kum takua a uk.²Aning nynh Bawipaw muihnaw kya hoyleinaw kha a rae, thuasalama aning maw e Israel siapharan hae zeih tuh hoyleinaw rae khyh.³Assiria siapharan Shalmaneser nynh amaw kha a tuk; Hoshea tuh a kuihkaw umpaw lang tang zah, ngunto kha a pya.⁴Thuasalama Assiria siapharan nynh Hoshea tungvaw kya hynhunaw a muih; pawccecize Izip siapharan So kalan khe locceihtu hae kha saw zah, Assiria siapharan kalan kum takyh a la pyapaw ngunto thyhte pya vae khyh; tukeiccuze Assiria siapharan nynh Hoshea kha kyng zah thong a saw. Assiria lang Israel Cciakhaenaw

⁵Assiria siapharan nynh Israel ram balyn kha tuk zah Samaria khua kya thua zah kum thum lungkhu a koihlu.⁶Hoshea nynh ram a uknaw kum takuanaw kum khe, Assiria siapharan nynh Samaria khua kha lah zah, Israel hae kha kyngte Assiria lang a cciakhae hae. Minmin kha Halah ram, Gozan vaw pe, Habor ram kya te Media ccungccaw hae kya-e khua hae kyakhe a nung hae.

⁷Izip ram te Izip siapharan Faro kuih kyate a poukhae hae paw Bawipaw mih Pachia tungvaw kya Israel ccungccaw hae nynh a sei hae. Ccangpaw pachia hae kha beik hae zah,⁸Bawipaw nynh Israel hae malang te a dee hae paw minphuin hae phung te Israel siapharan hae nynh a raepya hae paw phung hae kha a zui hae.⁹Israel hae nynh Bawipaw mih Pachia kha rawsete ahme leipaw kha aruh lante a rae hae. Mih khua takyh kyakhe rhawviainn kyate khualungrua kyacia ahangpaw hmin hae kha a raeku hae;¹⁰ahangpaw mua miakaw vawlan te hinlalyhpaw thingku miakaw kaw khe zohtuh hae te Asherah kha a bingku hae;¹¹mih malang te Bawipaw nynh a deepya hae paw minphuin hae nynh a cyi hae hawte, ahangpaw hmin hae balyn vawlan khe silawnaw a rae hae. Bawipaw kha a thinriasahte hoyleinaw kha a rae hae;¹²Bawipaw nynh, “E hynh na cyih lan khyh oh,” cite a hopya hae paw zohtuh hae kha minmin nynh a beik hae.¹³Thuasalama Bawipaw nynh Israel te Judah kha profeh miakaw te muihdaetu miakaw kyate raeringnaw pya hae zah, “Ahoy leipaw nae laanpi kyate maekuh oh lah, nae minpaaw hae kya kaw ka pya hae paw te ka ryalahtu profeh hae kyate kae pya oh paw ka phunglang hae balyn thyhte, ka kawbya hae te ka phungbya hae kha zui oh,” a cipya hae.¹⁴Thuasalama minmin nynh ngae ry khyh hae, Bawipaw mih Pachia a zyn lei hae paw mih minpaaw hae nynh mih lungkhung hawte mih lungkhungbua.¹⁵A phungbya hae, mih minpaaw hae ryte a la raepaw a byakinnaw te raeringnaw a pya hae paw kha pawlangria khyh hae. Ahme leipaw zohtuh hae kha zui hae zah mimaw mah ahme leipaw lang a tang hae; Bawipaw nynh minmin a cyi hae hawte na cyihbua lan khyh oh, cite kaw a pya hae paw mih pepan e minphuin hae kha a zui hae.¹⁶Minmin nynh Bawipaw mih Pachia kawbya kha vua hae zah alaeekuhpaw vaetuataw zohtuh hae ccangning te Asherah kha a raeku hae; vaawlang umpaw aphuinphuin kha beik hae zah Baal kha rya a lawpya hae.¹⁷Mih ccapaw hae te mih ccanung hae khate silawnaw a rae hae; apawepaw te kuihdothyanaw kha a mang hae; Bawipaw muihnaw kya hoyleinaw kha rae khylan mimaw toulou kha zuakuh hae zah a thin a riasah hae.¹⁸Tukeiccuze Bawipaw tuh Israel tungvaw myarya a thinria zah a muihnaw kyate a dee hae; Judah phin laelan phin kheit san um vae khyh hae.

¹⁹Judah phin hae mah Bawipaw mih Pachia kawbya hae kha zui khyh hae, Israel hae nynh a raeku hae paw phung hae kha a zui hae.²⁰Bawipaw nynh Israel ciihan balyn kha a vua hae; minmin kha a muihnaw kyate a zosah makhia hae, detah hae zah luadetu hae kuih kalan a pya hae.

²¹Bawipaw nynh Israel kha David ciihan kyate he a seii te, minmin nynh Nebat ccapaw Jeroboam kha siapharan lang a khang hae. Jeroboam nynh Israel kha Bawipaw zuinaw kyate cciakhaesei zah, seinaw lepaw kha a raesah.²²Jeroboam nynh a seipaw seinaw balyn kha Israel ccungccaw hae nynh seibua hae zah, cciataw khyh hae;²³Bawipaw nynh a ryalahtu profeh hae balyn kyate a la hoty vae hawte, Israel kha a muihnaw kyate a dee mawlaezung, minmin nynh tuh-e seinaw kha cciataw khyh hae. Tukeiccuze Israel hae tuh mih ram kyate Assiria ram lang atunin cia see lang a kyng hae. Samaria kya Umsathuinaw

²⁴Assiria siapharan nynh Babilon, Kuth, Avva, Hamath te Sefarvaim khua kyate ccungccaw hae kha cciakhae hae zah Samaria ram e khua hae kyakhe Israel ccungccaw hae ccelang a nung hae; minmin nynh Samaria ram kha lawkuh hae zah a khua hae kyakhe a um hae.²⁵Tuin kya he a um takaw hae te, Bawipaw kha beik khyh hae; tukeiccuze Bawipaw nynh chindeih hae kha sawnua hae zah minmin abang kha a tei hae.²⁶Tukeiccuze Assiria siapharan kyakhe, “Nang nynh na cciakhae hae zah Samaria ram e khua hae kya na nung hae paw minphuin hae nynh tuin ram e pachia phunglang kha nyh khyh hae; tukeiccuze aning nynh chindeih hae kha sawnua hae zah minmin kha a chia hae; pawccecize tuin ram e pachia phunglang kha nyh khyh hae,” cite a hopya hae.²⁷Tetuh Assiria siapharan nynh, “Tuin ram kyate na cciakhae oh paw ranpibawi hae laku e lu kheit kha tuin ram lang bua saw oh; la cceih sah lah, tuin kya la um sah, tuin ram e pachia phunglang kha la ccangpah hae sah,” cite kaw a pya hae.²⁸Tukeiccuze Samaria khua kyate a cciakhae hae paw ranpibawi hae laku e lu kheit tuh ki zah Bethel khua kya a um; aning nynh Bawipaw kha pawtemou beik lan cipaw a ccangpya hae.

²⁹Thuasalama minphuin miakaw nynh mimaw pachia raveih kha raekuh hae zah, Samaria hae nynh a la rae hae paw ahangpaw hmin hae kya umpaw hminthyaa hae kyakhe a nung hae, minphuin miakaw nynh mih umnaw khua raveih kyakhe a nung hae;³⁰Babilon ccungccaw hae nynh Sukkoth-benoth pachia, Kuth ccungccaw hae nynh Nergal pachia, Hamath ccungccaw hae nynh Ashima pachia kha a raeku hae;³¹Avva ccungccaw hae nynh Nibhaz pachia te Tartak pachia kha a raeku hae; Sefarvaim ccungccaw hae nynh Sefarvaim pachia hae Adrammelek te Anammelek pachia hae kalan khe mih ccaaw hae kha maee-ute si a lawnaw hae.³²Bawipaw kha mah beik hae zah, mimaw laku e ccungccaw huataw hae kha hmin hangpaw hae kya-e ranpibawi hae lang a khangku hae, tuh-e hae nynh minmin elang hmin hangpaw hae kya umpaw hminthyaa hae kyakhe silawnaw a raepya hae.³³Tukeiccuze Bawipaw kha a beik hae zemah oun ccianaw hae minphuin hae nynh a la cyi hae hawte, mih pachia hae kha mah rya a lawpya hae.³⁴Langmawlya e mih cyisahnaw phung kha atunin cia a zui hae.
Minmin nynh Bawipaw kha beik khyh hae, Bawipaw nynh Israel cite min a phupaw Jakob a ccaaw hae kya kaw a pya hae paw kawbya, phunglang, phungzae hae te phungbya hae kha zui khyh hae.³⁵Bawipaw nynh minmin ryte byakinnaw raete kawpya hae zah, “Nanning nynh ccangpaw pachia hae kha na beik lan khyh oh, mih malang na bakhung lan khyh oh, rya na lawpah lan khyh oh zah si na law lan khyh oh,³⁶Izip ram kyate myarya lepaw a thungnaw te a dyngpaw a kuih te ae poukhae oh paw Bawipaw kha na beik cih oh; amaw malang na bakhung cih oh zah, amaw kalan si na law cih oh.³⁷Nae hanlan a zeipaw kawbya, phunglang, phungzae hae te phungbya hae kha zui lan tyty na raeringkuh cih oh. Ccangpaw pachia hae kha na beik lan khyh oh;³⁸nanning ryte ka raepaw byakinnaw kha na ning lan khyh oh. Ccangpaw pachia hae kha na beik lan khyh oh,³⁹Bawipaw nae Pachia kha na beik cih oh; aning nynh nae rhaw hae balyn kuih kyate ae luesah cih oh,” a cipya hae.⁴⁰Thuasalama minmin nynh ngae khyh hae, langmawlya e mih cyisahnaw phung kha a zui mamin hae.

⁴¹Tuhcite hynh-e minphuin hae nynh Bawipaw kha a beik hae zemah a laeeku hae paw mih zohtuh hae kha mah a beik mamin hae; mih ccaaw hae te mih ccaaw hae ccaaw hae nynh atunin cia mih minpaaw hae nynh a la cyi hae hawte a cyi hae. Hezekiah nynh Judah A Uk (2Sh 29.1-2, 31.1)

¹Elah ccapaw Hoshea nynh Israel siapharan lang a tangnaw kum thumnaw kum khe, Ahaz ccapaw Hezekiah tuh Judah siapharan lang a tang takaw.²Aning tuh kum kuin lae pangaw he acih te, ram kha uk takaw zah, Jerusalem khua kya kum kuin lae takua a uk. A nung min tuh Abi cikuh zah Zekhariah ccanung nynh thua.³Aning nynh a minpaaw David nynh a cyi hawte Bawipaw muihnaw kya ahmepaw kha a cyi.⁴Ahangpaw hmin hae kha a ro hae, zohtuh hae kha tingsah hae zah Asherah kha a nge hae. Moses nynh a la raepaw daw hupaw kha palae tui lan a koi, pawccecize Israel hae nynh tuin ccyh kyacia tuh-e hupaw kalan silawnaw a rae hae; tuh-e hupaw tuh Nehushtan a ci hae.⁵Hezekiah nynh Bawipaw , Israel Pachia kha a doliaku; tukeiccuze Judah siapharan hae balyn laku kya amaw tahawpaw lu kheit san um khyh, aning maw e siapharan hae laku kya mah la um khyh.⁶Bawipaw kha tynkaring lan a kyngku; amaw nulang tyty zuikuh zah, Bawipaw nynh Moses kaw a la pyapaw kawbya hae kha a zui hae.⁷Bawipaw tuh amaw kya um zah a ccianaw takyh kya a laan a sui a ua. Assiria siapharan kha dou zah ryalawpah khyh.⁸Filistin hae kha tuk hae zah Gaza khua te a ukpaw ram kyacia, rhawviainn kyate akoihkuhpaw khua kyacia a tae hae.

⁹Hezekiah Siapharan nynh ram a uknaw kum palinaw kum, Israel siapharan Elah ccapaw Hoshea nynh ram a uknaw kum sarinaw kum khe, Assiria siapharan Shalmaneser nynh Samaria khua kha ccianuate koihlu zah,¹⁰kum thum athangnaw khe a law. Hezekiah siapharan nynh ram a uknaw kum taruhnaw kum, Israel siapharan Hoshea nynh ram a uknaw kum takuanaw kum khe Samaria kha a law.¹¹Assiria siapharan nynh Israel hae kha kyngte Assiria ram lang cciakhae hae zah, Gozan vaw pe, Halah ram, Habor ram kya te Media ccungccaw hae kya-e khua hae kyakhe khua a sahsah hae,¹²pawccecize minmin nynh Bawipaw mih Pachia bya kha ngae leite a byakinnaw kha a ei hae—Bawipaw nynh a ryalahtu Moses kya kaw a pyapaw balyn kha a ei hae; minmin nynh ngae khyh hae zah zui mah zui khyh hae. Sennakherib nynh Judah A Thiing (2Sh 32.1-19; Isa 36.1-22)

¹³Hezekiah Siapharan nynh Judah ram a uknaw kum haw lae palinaw kum khe, Assiria siapharan Sennakherib nynh Judah ram e rhawlungrua te akoihlukuhpaw khuapi hae balyn kha ccianua thung hae zah a law hae.¹⁴Judah siapharan Hezekiah nynh Lakhish khua umpaw Assiria siapharan kalan ccungccaw saw hae zah, “Ka cyisei vae; kae hynh yn kitaw; ka tungvaw nae khangpaw miakaw ka phu cih,” cite bya a taw. Assiria siapharan nynh Judah siapharan Hezekiah kha ngunphua talent za thum te sui talent sung thum kha a ngia.¹⁵Hezekiah nynh Bawipaw inn lungkhu te siapharan e sisuakhaan lungkhu umpaw ngunphua balyn kha a pya.¹⁶Tuh ccyh lyakhe Hezekiah nynh Bawipaw beikinn thuakaw kya-e sui te Judah siapharan Hezekiah nynh thuakawtung hae kya a theinawpaw sui kha amaw nynh lah zah Assiria siapharan kha a pya.¹⁷Assiria siapharan nynh Tartan, Rabsaris te Rabshakeh kha rhawkaw patae ryte Lakhish khua kyate Jerusalem umpaw Hezekiah Siapharan kalan a saw hae. Minmin nynh cceih hae zah Jerusalem a thua hae. He a thua hae te, Boeikuatu hae Loo lang cceihpaw laanluepi pe umpaw, palung tuili kya-e tuizypi pe khe a thadyn hae.¹⁸Siapharan kha he a ko hae tuh, Hilkiah ccapaw, siapharan inn a do-oihtu Eliakim, ryaccinkhan Shebnah te Asaf ccapaw ccawzeitu Joah tuh minmin kalan oun cceih hae.

¹⁹Rabshakeh nynh minmin kyakhe, “Hezekiah kha hynhte la hopah oh: Alesaepaw siapharan, Assiria siapharan nynh hynhte a ho: E na zynkunaw hynh paw tungvaw kya mou na tynsah?²⁰Bya maesae hynh rhawtuknaw elang hawnaw te thungnaw nynh thua cite tou na tua? Nang nynh kae hynh dou lan ciate hummou na doliaku?²¹Amaw kya a ngeikuhpaw ccungccaw miakaw kuih a thuingtupaw, akhyapaw phaeku hoitang athuapaw Izip ram kha na doliaku. Tuhcite Izip siapharan Faro nynh amaw a doliakuh hae paw balyn kha a cyi hae.²²Thuasalama nanning nynh, ‘Bawipaw kae Pachia kha kae doliaku,’ na ci oh ze, aning tuh Hezekiah nynh Judah hae te Jerusalem khuaccaaw hae kha, ‘Jerusalem umpaw hynh-e silawhang malang hin na beik cih oh,’ cite hopah hae zah, a hmin hangpaw hae te a silawhang hae a ropyapaw pachia kha thua khyh tou?²³Tukeiccuze atu ka bawipaw Assiria siapharan kyakhe byakinkuh oh: Nanning nynh marang a ccikuh khopaw na mue oh ze, marang thong ning kae pya cih oh.²⁴Nanning nynh marangle te marang rhawkaw hae kha mue khylan Izip ram kha doliakute, ka bawipaw kya-e ryalahtu adihhua hae paw laku e rhawbawi lu kheit sankaw kha pawtemou na dou kho cih oh?²⁵Tuhpiaze, e ram ro khylan kae ccianua thungpaw hynh Bawipaw bawmnaw leite athua zawtou? Bawipaw nynh, E ram hynh ccianua thung lah, rotua, yn cipya,” cite a hopya hae.

²⁶Tetuh Hilkiah ccapaw Eliakim, Shebnah te Joah nynh Rabshakeh kyakhe, “Thawccinawte na ryalahtu hae hynh Aramaik bya te beih oun hopah, pawccecize mang kae thae; khualungrua vawlan a um hae paw nynh a thae lan hae te, Judah bya te oun hopah nan,” a cipya hae.²⁷Rabshakeh nynh, “Ka bawipaw nynh e bya hynh nae bawipaw te nanning kalan ho lan yn saw zawtou? Khualungrua vawlan haung hae zah, nanning ryte mih ia kha aete mih zuin a neih cih hae paw kalan yn saw khyh tou?” a ci.

²⁸Te Rabshakeh nynh thadyn zah Judah bya te thawte sia zah, “A lesaepaw siapharan, Assiria siapharan bya hynh ngaetua oh!²⁹Siapharan nynh hynhte a ho: ‘Hezekiah kha lingsakuh nan oh, pawccecize aning nynh nanning kha ka kuih kyate ae luesah kho lan khyh oh.³⁰Bawipaw nynh aening hynh oun luesah ccaccing cih; e khuapi hynh Assiria siapharan kuih kalan pya lan khyh, cite hopyate Hezekiah nynh nanning kha Bawipaw tungvaw ae doliasakuh nan oh sah,’ a ci.³¹Hezekiah bya kha ngae nan oh; pawccecize Assiria siapharan nynh hynhte a ho: ‘Kae te ccawkunaw rae oh lah, ka kalan oun cceih oh; nanning nynh chi leite na hiin nawlan oh, nae ram te alokuhpaw ram, ccathae te misutui apounaw ram, sanlou te misu khokhu a umnaw ram, oliv chitui te khoitui a umnaw ram lang nanning kha cciakhae khylan kae thua mawlaezung, naemaw misu ku te naemaw thaeku raveih kya-e kha na ae cih oh zah, naemaw tuisung kya-e tui kha na neih cih oh. Bawipaw nynh oun khum cih, cite hopyate ae la cciakhaesei oh ze, Hezekiah bya kha la ngae nan oh.³³Minphuin hae kya-e pachia hae nynh tuh-e ram kha Assiria siapharan kuih kyate a khum boi hae tou?³⁴Hamath khua te Arpad khua mih pachia hae tuh teimou a um hae? Sefarvaim khua, Hena khua te Ivvah khua kya-e mih pachia hae tuh teimou a um hae? Tuh-e pachia hae nynh Samaria ram kha ka kuih kyate a luesah hae tou?³⁵E ram hae kya-e mih pachia hae balyn nynh mih ram hae kha ka kuih kyate a khum boi paw pachia a um tou? Bawipaw nynh ka kuih kyate Jerusalem kha pawtemou a khum kho cih?’ a ci,” cite a hopya hae.

³⁶Ccungccaw hae tuh bya kaw kheit san khungru leite yccae leite a um hae, pawccecize Hezekiah siapharan nynh, “La khungru nan oh,” cite kaw a pya hae.³⁷Tetuh siapharan inn do-oihtu Hilkiah ccapaw Eliakim, ryaccinkhan Shebna te Asaf ccapaw ccawzeitu Joah nynh mih boeining seiikute Hezekiah kalan oun thua hae zah, Rabshakeh nynh a hopaw bya kha a hopya hae. Hezekiah nynh Isaiah Tuanaw A Ngia (Isa 37.1-7)

¹Hezekiah Siapharan nynh tuh-e bya kha he a thae te, a boeining kha seii zah buriboei kha a zingku, te Bawipaw inn lang a cceih.²Siapharan inn do-oihtu Eliakim, ryaccinkhan Shebna te buriboei a zingkuh hae paw ranpibawi piccanhua hae kha Amoz ccapaw profeh Isaiah kalan a saw hae.³Minmin nynh Isaiah kyakhe, “Hezekiah nynh hynhte a ho, Atunin tuh lungriathae nin, thuihei nin te thethya nin nynh thua; imua pui zaw zah a pui nawlan thawzung um khyh.⁴Ahiinpaw Pachia kha sarya khylan Assiria siapharan nynh yn sawpaw a ryalahtu Rabshakeh bya balyn kha Bawipaw na Pachia nynh la thae vae sah, te Bawipaw na Pachia nynh a thaepaw bya kha detah vae sah; tukeiccuze a laehypaw ccungccaw hae hanlan saw la sang,” a cipya hae.⁵Hezekiah Siapharan a ryalahtu hae nynh Isaiah kya he a thua hae te,⁶Isaiah nynh minmin kha, “ ‘Bawipaw nynh hynhte a ho: Assiria siapharan a ryalahtu hae nynh ka thethya oun ho hae paw bya na thae keiccuze rih nan.⁷Aning nynh laanbya kha thae zah amaw ram lang a ki nawlan, a thinlung kya ka sang cih; amaw ram kyakhe thaloi te ka chisah cih, a ci,’ cite nae bawipaw kha la hopah oh,” a cipya hae. Sennakherib nynh Hurawnaw (Isa 37.8-20)

⁸Rabshakeh tuh yn ki zah, Assiria siapharan nynh Libnah khua a tuk cciamangpaw kha a muih; pawccecize siapharan tuh Lakhish khua kyate a pou vae cipaw kha a thae vae.⁹Te Ethiopia Siapharan Tirhakah tuh Assiria rhawkaw kha dou khylan yn thokuh vae cipaw kha Assiria siapharan nynh he a thae te, locceihtu hae kha Hezekiah kalan bua saw hae zah,¹⁰“Judah Siapharan Hezekiah kha hynhte na la hopah cih oh: Jerusalem tuh Assiria siapharan kuih kalan pya thua lan khyh, cite ae kinpyakupaw bya khate na doliakupaw na Pachia kha lingsakuh nan.¹¹Assiria siapharan hae nynh ram hae balyn kha khaleih roh hae zah pawtemou a cyi hae cipaw kha phe na thae vae. Na lue cih zawtou?¹²Ka minpaaw hae nynh a la ro hae paw Gozan, Haran, Rezef khua hae te Telassar khua a um hae paw Eden ccungccaw hae kha mih pachia hae nynh a khum hae zawtou?¹³Hamath siapharan, Arpad siapharan, Sefarvaim khuapi e siapharan, Hena siapharan te Ivvah siapharan kha teimou a um hae?” cite bya a taw. Hezekiah Sawsangnaw

¹⁴Hezekiah nynh tuh-e ccaw tuh locceihtu hae kuih kyate lawkuh zah a ria; oute Hezekiah nynh Bawipaw inn lang cceihthung zah, tuh-e ccaw tuh Bawipaw malang a daw.¹⁵Hezekiah nynh Bawipaw kalan sawsang zah a hopaw tuh: “Pou vaaw Bawipaw , cherubim vawlan a haungpaw, Israel Pachia, nang tuh Pachia nynh na thua, laephi vaw e peenaw balyn kyaze nang rou nynh Pachia na thua; vaaw te lae kha na rae.¹⁶Pou Bawipaw , na nakaring kha beih yn tuakuh lah thaetua; pou Bawipaw , na mit kha dae lah beih muihtua; Sennakherib nynh ahiinpaw Pachia kha sarya khylan ccungccaw sawte a hosah hae paw bya kha thaetua.¹⁷Thanccingte, pou Bawipaw , Assiria siapharan hae nynh minphuin hae te mih ram hae balyn kha roh hae zah,¹⁸mih pachia hae kha maee lungkhu lang a phungpya hae, tuh-e pachia hae tuh pachia thua khyh hae, ccungccaw kuih te raepaw thing te lung athua hae keiccuze ro athua vae hae.¹⁹Tukeiccuze, pou Bawipaw kae Pachia, kaening hynh Assiria siapharan kuih kyate oun khumtua cite na kalan saw ka sang, tuhteze nynh laephi vaw e peenaw balyn nynh, pou Bawipaw , nang rou nynh Pachia na thua cipaw kha a nyh cih hae,” a ci.

²⁰Tetuh Amoz ccapaw Isaiah nynh Hezekiah kalan ccungccaw saw hae zah, “Bawipaw , Israel Pachia nynh hynhte a ho: Assiria Siapharan Sennakherib te asekuh lante ka kalan saw na sang keiccuze,²¹Bawipaw nynh aning te asekuh lante bya a hopaw tuh hynhte nynh thua:‘Ccanung liaccady Zion nynhnang kha pawlang ae ria khyh zahae nuinse;Jerusalem ccanung nynhna nulang te a lu ae henua.

²²‘Nang nynh hummou nuinsetena san na ruin?Na sianua zah lysakunaw mit tena dopaw khahum cite mou na tua?Israel Pachia Athyaapaw lakhana rawse!²³Na locceihtu hae kha mangteBawipaw kha na sarya zah,“Ka marangle patae rytemua ahangnaw kalan,ahang huapaw Lebanon mua dung haekalan ka kaethung vae;ahang huaccepaw a sidar ku hae teahoy huaccepawa maeccaw ku hae khaka nge hae;ahang huaccenaw,thingku athaaw huaccenawtuhpi kya phe ka thua.²⁴Tuisung ka thae zahramccang tui kha ka nia,Izip ram e vawkhu balyn khaka ccukaw te ka rousah,” na ci.

²⁵‘E hynh langmawlya teka la paccynku vae cipawna thae boi khyh tou?Lungrua te koihlupaw khuapi hae khaaronahpaw apumkuhpaw langna rae nawlan,khawlya te ka la paccynpaw khaatu tuh ka ccingsah vae;²⁶tuin kya a um hae paw tuhmih thawzya, siikuh hae zahmih lung pong mangkhaekuh vae;minmin tuh loo lungkhu eaku hae hawte thuasah,nebaleihpaw lonua hawte thuasah,innccukaly umpawlonua hawte thuasah,ale kheccung mawze baleih anaanpawaku hawte thuasah athua hae.

²⁷“ ‘Thuasalama na thokunaw tena haungnaw,na pounaw te na teenaw,te ka tungvaw na thinrianaw khaphe ka ny.²⁸Ka tungvaw na thinria zahna lysakunaw kha ka naw teka thae vae keiccuze,na napaw kae tho cih zah,na mung kha rangtei kae teisah cih;nae ccianaw laanpi mawkhatekae kisah cih.

²⁹“ ‘Nang na hanlan muihsahnaw tuh hynhcite athua cih: Atu kum tuh amaw le lan alethungpaw ccathae kha ae oh, khuavae kya mah tuhcite alethungpaw kha ae oh; hankum kya tuh ccathae kha ccoukuh oh lah, rue oh, misu khokhu kya lin oh lah, misu thae kha ae oh.³⁰Ahiinhypaw Judah phin hae tuh akawlan mih tharui a sawthui cih zah, avawlan khe mih thae athae cih;³¹pawccecize a laehy hae paw tuh Jerusalem kyate oun pou cih hae zah, ahiin hae paw phu tuh Zion Mua kyate oun pou cih hae. E hynh vaaw Bawipaw nynh lungthote a cyih cih.

³²“ ‘Tukeiccuze Assiria siapharan te asekuh lante Bawipaw nynh hynhte a ho: Aning nynh e khua lungkhu lang tee lan khyh, khuapi lungkhu kya the ccangkheit san kaw lan khyh, khawriaphua ccyngkute khuapi malang langkuh lan khyh, khuapi kha rawsete po voilu lan laephi adohpaw kha pumnua lan khyh hae.³³Yn ccianaw laanpi mawkhate a kithui cih; aning nynh e khuapi lungkhu lang tee lan khyh, cite Bawipaw nynh a ci.³⁴Kamaw hanlan te ka ryalahtu David hanlan, e khua hynh khum khylan ka thungkhaw cih,’ a ci,” cite a hopya.
Sennakherib Shung zah A Chih

³⁵Tuh-e khuazi ccaccei khe Bawipaw vaawpaw tuh yn langkuh zah, Assiria rhawkaw ryahmin kya-e milu cciing kheit sung tarya thong pangaw kha a chia hae; awkhua takaw khua he yn dae tuh, michi rhua lang pong a tang hae.³⁶Tetuh Assiria Siapharan Sennakherib tuh toikuh zah, inn lang ki zah Nineveh khua kya a um vae.³⁷A pachia Nisrok inn kya a beik cciamang lyakhe a ccapaw hae Adrammelek te Sharezer nynh amaw kha thaloi te phe a chia hae, minmin tuh Ararat ram lungkhu lang po a ccue hae. A ccapaw Esar-haddon nynh a paaw ccelang siapharan lang a tang vae. Hezekiah Ccinaw (Isa 38.1-8, 21-22; 2Sh 32.24-26)

¹Tuh lyatuin Hezekiah tuh ccih zah vyavya a chih. Amoz ccapaw profeh Isaiah nynh a kalan cceih zah, “Bawipaw nynh hynhte a ho: Na inn ryalaw kha hoyte synriasya, pawccecize na chih vae cih; na dan vae lan khyh,” a cipya.²Tetuh Hezekiah nynh pan kalan khe a mae kha hawi zah Bawipaw kalan saw a sang:³“Pou Bawipaw , ka thinlung balyn te lungzite na malang ka hiin zah, na muihnaw kya ahoypaw uccaw ka cyipaw kha atu beih liathuitua, namaw kha kae ngiaku,” ci zah, thawte a rah.⁴Isaiah tuh siapharan inn angaelung e voidu kyate a pou mawkhe, Bawipaw bya tuh a kalan yn thua zah:⁵“Ki lah, ka ccungccaw hae bawipaw Hezekiah kha la hopah, Bawipaw , na minpaaw David Pachia nynh hynhte a ho: Na sawsangnaw kha ka thae zah, na mitphi kha ka muih vae; kae dansah ccaccing cih; nin thumnaw nin khe Bawipaw inn lang na cceihthung cih.⁶Na hiinnaw kha kum haw lae pangaw kae piapah chih cih. Nang te hynh-e khua hynh Assiria siapharan kuih kyate kae luesah cih oh; kamaw liate thuasah, ka ryalahtu David liate thuasah e khua hynh ka thungkhaw cih,” a cipya.⁷Te Isaiah nynh, “Thaeku thae ange nge kheit kha oun lah oh. Te cciakhae hae sah lah, siapharan a danthui nawlan a vaemaw kha la bongpah hae sah,” a ci.

⁸Hezekiah nynh Isaiah kha, “Bawipaw nynh yn dansah cih zah, nin thumnaw nin kya Bawipaw inn lang ka cceihthung cih cinawpaw muihsahnaw tuh pawmou athua cih?” a cipya.⁹Isaiah nynh, “Bawipaw nynh bya ae kinpyakupaw kha a cyih cih cinawpaw Bawipaw kyate na kalan yn thuapaw muihsahnaw tuh hynh-e hynh nynh thua: mynlyh tuh malang tou kaw haw a cceih cih, nulang tou kaw haw a ki cih?” cite a khia.¹⁰Hezekiah nynh, “Mynlyh hanlan malang kaw haw saehua tuh huatawpaw nynh thua; mynlyh tuh nulang kaw haw ki vae sah,” cite a khung.¹¹Profeh Isaiah nynh Bawipaw kalan he a sia tuh, Ahaz kya-e khuanin tounawpaw vawlan phe anuekuh vae paw mynlyh kha nulang kaw haw a kisah. Babilon Ram kyate Locceihtu hae (Isa 39.1-8)

¹²Tuh ccyh lyakhe Baladan ccapaw, Babilon Siapharan Merodak Baladan nynh Hezekiah tuh ccih zah a dan vae cipaw a thae keiccuze ccaw te lasung phusahpyate locceihtu hae kha Hezekiah kalan a saw hae.¹³Hezekiah nynh minmin kha hoyte do-oih hae zah, a sisuainn, ngun, sui, amynkhuhpaw, aphutepaw chitui, a zunghe inn abalyn, a uccaw ccynawpaw inn kya a umpaw balyn kha a dosah hae. A inn kya te a uknaw ram kya a umpaw balyn kha Hezekiah nynh a dosah lei hae paw ccangkheit san um khyh.¹⁴Tetuh profeh Isaiah tuh Hezekiah Siapharan kalan yn thua zah, “E ccungccaw hae nynh pawtemou a ho hae? Paw kyate mou na kalan oun thua hae?” a cipya. Hezekiah nynh, “Myarya asawnaw Babilon ram kyate nynh ka kalan oun thua hae,” a cipya.¹⁵Isaiah nynh, “Na inn kya pawmou a muih hae?” a cipya. Hezekiah nynh, “Ka inn umpaw miakaw pong a muih hae; ka uccaw ccynawpaw inn kyaze minmin ka dosah lei hae paw ccangkheit san um khyh,” a cipya.

¹⁶Tetuh Isaiah nynh Hezekiah kha, “Bawipaw bya kha ngaetua:¹⁷Na inn kya a umpaw balyn te na minpaaw hae nynh atunin cia a ccakhung hae paw balyn kha Babilon lang cciakhaenaw ccyh yn thua cih; pawpaw sanmah cciataw thua lan khyh, cite Bawipaw nynh a ci.¹⁸Na saahku hae paw na ccapaw hae abang tuh ccaring a cciakhae cih hae zah, Babilon siapharan inn kya ryalaw khylan mih tin a reih cih hae,” a cipya.¹⁹Tetuh Hezekiah nynh Isaiah kha, “Na hopaw Bawipaw bya tuh ahoy,” a cipya. Pawccecize aning nynh, “Ka she lungkhu daenaw te khynnaw a um cih,” cite a tua. Hezekiah Chinaw (2Sh 32.32-33)

²⁰Tuhlaepaw Hezekiah a cyisahnaw te a thungnaw balyn kha thuasah, pawtemou tuili te tuizypi kha rae zah khua lungkhu lang tui a thuasah cipaw kha thuasah Judah Siapharan hae Sherianaw Ccauh kya a zei hae.²¹Hezekiah tuh a minpaaw hae ryte a ih hae; te a ccapaw Manasseh nynh amaw ccelang siapharan lang a tang. Manasseh nynh Judah A Uk (2Sh 33.1-20)

¹Manasseh tuh kum haw lae ning acih te, ram kha uk takaw zah, Jerusalem kyate sung pangaw kum pangaw a uk. A nung min tuh Hefzibah acikuh.²Bawipaw nynh Israel hae malang te a dee hae paw minphuin hae nynh a cyi hae paw anungsikuhpaw cyisahnaw kha zuite, aning nynh Bawipaw muihnaw kya hoyleinaw kha a rae.³A paaw Hezekiah nynh a la ropaw ahangpaw hmin hae kha a raethui; Israel siapharan Ahab nynh a cyi hawte Baal elang silawhang hae kha raepah zah Asherah kha mah a rae, vaawlui kya umpaw uccaw hae balyn kha beik zah rya a lawpya hae.⁴Bawipaw nynh, “Jerusalem khua kya ka min kha ka nung cih,” cite a la ci nuathepaw Bawipaw inn kyakhe silawhang hae kha a rae.⁵Bawipaw inn voidu ccangning kyakhe vaawlui kya umpaw uccaw hae balyn hanlan silawhang hae kha a rae.⁶A ccapaw kha silaw nawlan maee te a u; beidinhonaw te kuihdokunaw kha mang zah, chihiinleihthya hae paw te mitleihthya hae paw kha mah a mang hae. Bawipaw muihnaw kya hoyleinaw patae kha rae zah a thin a riasah.⁷Bawipaw nynh David te a ccapaw Solomon kyakhe, “E inn kya thuasah, Israel phin hae balyn kyate ka popaw Jerusalem khua kya thuasah ka min kha zungzae ka tynsah cih; kaw ka pya hae paw balyn thyhte thuasah, ka ryalahtu Moses nynh kaw a pya hae paw kawbya balyn thyhte thuasah minmin nynh raeringkute a cyi hae zetuh, mih minpaaw hae ka pya hae paw ram kyate mih ccu kha ccanglang ka cciasah sei vae lan khyh,” cite a hopyanaw hae inn lungkhu khe amaw nynh karouhte azuh soi zah a raepaw Asherah zohtuh kha a nung.⁹Minmin nynh a bya ngae khyh hae; Israel ccungccaw hae malang te Bawipaw nynh a ro hae paw minphuin hae nynh a la cyi hae paw laeze hoyleinaw kha houh rae khylan Manasseh nynh a cciakhaesei hae.

¹⁰Bawipaw nynh a ryalahtu profeh hae kyate ho zah,¹¹“Judah siapharan Manasseh nynh hynh-e anungsikuhpaw hae hynh cyih zah, aning mawze a la um hae paw Amor hae nynh a cyi hae paw balyn laeze hoyleinaw kha houh rae zah, a zohtuh hae khate Judah hae kha mah seinaw a raesah hae;¹²tukeiccuze Bawipaw , Israel Pachia nynh hynhte a ho, a thaepaw miakaw a nakaring kya ringtering lan accae cih paw hoyleinaw kha Jerusalem te Judah tungvaw kya ka thuasah cih.¹³Jerusalem luki te Samaria tounawpaw rui te Ahab ciihan tounawpaw rui kha ka raw cih; lukhakheit nynh pake kha huh zah a bunglung hawte Jerusalem kha ka bunglung cih.¹⁴A laehypaw ka rho ccungccaw hae kha ka vua cih hae zah mih rhaw hae kuih kalan ka pya cih hae; minmin tuh mih rhaw hae balyn hanlan teipaw saw te luadepaw uccaw lang a tang cih hae,¹⁵pawccecize Izip ram kyate mih minpaaw hae a pou nin hae te atunin cia ka muihnaw kya hoyleinaw kha rae hae zah ka thin yn riasah hae,” a ci.

¹⁶Tuhpiaze Manasseh nynh Judah hae kha seinaw a raesah hae keiccuze Bawipaw muihnaw kya seinaw a rae hae, tuh-e amaw a seinaw apiaze, seinaw a hoi lei hae paw chiise patae kha luasah zah, Jerusalem khua voikheit langte voikheit lang adianaw cia tuh-e chiise te a biasah.

¹⁷Tuhlaepaw Manasseh nynh rya a lawpaw, a cyipaw balyn te seinaw a la raepaw kha Judah Siapharan hae Sherianaw Ccauh kya a zei hae.¹⁸Manasseh tuh a minpaaw hae ryte ih hae zah, Uzza khokhu lungkhu, amaw khokhu kyakhe a uu hae. A ccapaw Amon nynh amaw ccelang siapharan lang a tang. Amon nynh Judah Ram A Uk (2Sh 33.21-25)

¹⁹Amon tuh kum kuin lae ning acih te, ram kha uk takaw zah, Jerusalem khua kya kum ning a uk. A nung min tuh Meshullemeth cikuh zah Jotbah khuapaw Haruz ccanung nynh thua.²⁰A paaw Manasseh nynh a la rae hawte Bawipaw muihnaw kya hoyleinaw kha a rae.²¹A paaw nynh a zuipaw laanpi balyn kha a zui, a paaw nynh rya a la lawpya hae paw zohtuh hae kha ryalawpah hae zah a beik hae;²²Bawipaw , a minpaaw hae Pachia kha vua zah Bawipaw laanpi kha zui khyh.²³Amon tuh amaw a ryalahtu hae nynh phee hae zah a inn kya a chia hae.²⁴Thuasalama ramccungccaw hae balyn nynh Siapharan Amon a pheetu hae kha theih hae zah, a ccapaw Josiah kha amaw ccelang siapharan lang a khang hae.²⁵Tuhlaepaw Amon nynh rya a lawpaw kha Judah Siapharan hae Sherianaw Ccauh kya a zei hae.²⁶Amon kha Uzza khokhu umpaw amaw shawku kya a uu hae; a ccapaw Josiah nynh amaw ccelang siapharan lang a tang. Josiah nynh Judah Ram A Uk (2Sh 34.1-2)

¹Josiah tuh kum tarya acih te, ram kha uk takaw zah Jerusalem kyate sung thum kum kheit a uk. A nung min tuh Jedidah cikuh zah Bozkath khuapaw Adaiah ccanung nynh thua.²Bawipaw muihnaw kya ahmepaw kha cyih zah a minpaaw David laanpi balyn kha a zui, voilang ranglang maekuh khyh. Hilkiah nynh Kawbya Ccauh A Ccung (2Sh 34.8-28)

³Siapharan Josiah nynh ram a uknaw kum haw lae taryanaw kum khe, Meshullam ccapaw Azaliah a ccapaw, ryaccinkhan rya a lahpaw Shafan kha siapharan nynh Bawipaw inn lang saw zah,⁴“Ranpibawi lupi Hilkiah kalan la cceihthung lah, thuakaw ngawtu hae nynh ccungccaw hae kya-e ahlu a khoi hae paw phua, Bawipaw inn lungkhu lang a thuakhae hae paw balyn kha aning nynh ria sah;⁵tuh-e phua tuh Bawipaw inn a do-oihpaw ryalahtu hae kuih kalan pya hae sah lah, minmin nynh Bawipaw inn a raethui hae paw ryalahtu hae,⁶lehccama hae, inn saktu hae te pazan thya hae paw kha pya hae sah; te inn raethuinaw lanpaw thing a awkuh vae paw te lung adeihkuh vae paw re nawlan mang hae sah.⁷Mih kuih kya phua pya athua hae paw ccungccaw hae nynh hmerarih lan rya a law hae keiccuze minmin kha phua ccazing khiathui thua vae lan khyh hae,” a cipya.

⁸Ranpibawi lupi Hilkiah nynh ryaccinkhan Shafan kha, “Bawipaw inn kya kawbya ccauh kha ka muih vae,” a cipya. Hilkiah nynh ccauh kha pya zah, aning nynh a ria.⁹Te ryaccinkhan Shafan nynh siapharan kalan cceih zah, “Na ryalahtu hae nynh inn lungkhu umpaw phua kha marya lah hae zah, Bawipaw inn a do-oihpaw ryalahtu hae kuih kya a pya vae hae,” cite a hopya.¹⁰Ryaccinkhan Shafan nynh siapharan kha, “Ranpibawi Hilkiah nynh ccauh yn pya vae,” a cipya. Shafan nynh siapharan kha accae lante a riapya.

¹¹Siapharan nynh kawbya ccauh lungkhu e bya hae kha he a thae tuh, a boeining kha a seii.¹²Te siapharan nynh ranpibawi Hilkiah, Shafan ccapaw Ahikam, Mikaiah ccapaw Akhbor, ryaccinkhan Shafan te siapharan ryalahtu Asaiah kha kawpya hae zah,¹³“La cceih oh lah, muih athuapaw hynh-e ccauh lungkhu e bya hae te asekuh lante kamaw hanlan, ccungccaw hae hanlan te Judah hae balyn hanlan Bawipaw kha la khiatua oh; aening elang hynh-e ccauh kya azeikuhpaw bya hae balyn thyhte, ah minpaaw hae nynh la zui khyh hae zah la cyi khyh hae keiccuze aening tungvaw maee lang ruapaw Bawipaw thinrianaw tuh myaryamaw ale,” a cipya hae.

¹⁴Tukeiccuze ranpibawi Hilkiah, Ahikam, Akhbor, Shafan te Asaiah tuh boeining nungnaw a do-oihtu Harhas ccapaw Tikvah a ccapaw Shallum zu profehnung Huldah kalan a cceih hae; tuh-e profehnung tuh Jerusalem khua Zakueh Ccangningnaw kya um zah, tuin kyakhe amaw kha tuanaw a ngia hae.¹⁵Aning nynh minmin kha, “Bawipaw , Israel Pachia nynh hynhte a ho: Ka kalan nanning ae saw oh paw ccungccapaw kha la hopah oh,¹⁶Bawipaw nynh hynhte a ho, Judah siapharan nynh a riapaw ccauh lungkhu e bya hae balyn thyhte, e hmin te a lungkhu um hae paw balyn tungvaw kya ronaw kha ka thuasah ccaccing cih.¹⁷Kae kha yn vua hae zah mih kuih te a raeku hae paw balyn khate ka thinriasah khylan ccangpaw pachia hae kalan khe silawnaw a rae vae hae, tukeiccuze hynh-e hmin elang ka thinrianaw tuh maee lang rua zah chih kho vae lan khyh.¹⁸Thuasalama Bawipaw kha byakhia khylan nanning ae sawtu oh paw Judah siapharan kha tuh hynhte na la hopah cih oh, Bawipaw , Israel Pachia nynh hynhte a ho: Na thaepaw bya konglang te,¹⁹e hmin te e kya um hae paw tuh arohpaw lang te thyalawnaw a teing hae paw lang a tang cih hae cite minmin rawsenaw bya ka hopaw kha he na thae te, na thinlung tuh ngaesikuh zah Bawipaw malang zakaw na sangsaku keiccu thuasah, na boeining na seii zah ka malang na raw keiccu thuasah kae nynh mah na bya kha kae thaepya vae, cite Bawipaw nynh a ci.²⁰Tukeiccuze nang tuh na minpaaw hae kya kae sueluabua cih zah daebabi lan na shaw lungkhu sueluabua na thua cih; e hmin kya ka thuasah cih paw ronaw balyn kha na mit nynh muih lan khyh, a ci cite la hopah oh,” a cipya hae. Tuh-e bya tuh minmin nynh siapharan kalan a kikhae hae. Josiah nynh Raethuinaw (2Sh 34.3-7, 29-33)

¹Tetuh siapharan nynh Judah te Jerusalem piccan hae balyn kha amaw kalan a kosah hae.²Siapharan tuh Bawipaw inn lang cceihthung zah amaw ryte Judah ccungccaw hae balyn, Jerusalem khuaccaaw hae balyn, ranpibawi hae, profeh hae, ccungccaw adih ale hae balyn a cceihbua hae; Bawipaw inn kya a muih hae paw byakinnaw ccauh kya-e bya balyn kha a thaenaw hae khe a ria.³Siapharan tuh tungpi pe thadyn zah, Bawipaw kha zui khylan, a kawbya hae, a phunglang hae te a phungbya hae kha a thinlung balyn te, a hiinnaw balyn te zui khylan te e ccauh lungkhu azeikuhpaw hynh-e byakinnaw bya hae hynh cyi khylan Bawipaw malang khe byakinkunaw a rae. Ccungccaw hae balyn nynh mah tuh-e byakinnaw tuh a raebua hae.

⁴Ranpibawi lupi Hilkiah, ccangningnaw ranpibawi hae, thuakaw ngawtu hae kha Baal pachia, Asherah te vaawlui umpaw uccaw hae balyn hanlan a raepya hae paw angphe balyn kha Bawipaw beikinn kyate poukhae lan siapharan nynh kaw a pya hae; tuh-e hae tuh Jerusalem khua atolang, Kidron loo kyakhe maee te u hae zah mih buhhaw kha Bethel lang a cciakhae hae.⁵Judah ram e khua hae te Jerusalem pepan umpaw ahangpaw hmin hae kya mynkhuhpaw a utu lang Judah siapharan hae nynh a la nung hae paw zohtuh ranpibawi hae kha mih ryalaw kyate a phua hae; Baal kalan, khuanin kalan, sawpaw kalan, aphuphute um hae paw awsi hae te vaawlui kya umpaw uccaw hae balyn kalan silawnaw a raetu kha mah mih ryalaw kyate a phua hae.⁶Asherah zohtuh kha Bawipaw inn kyate poukhae zah Jerusalem khua atolang, Kidron Vaw kalan a cciakhae; Kidron Vaw khe maee te u zah palae tui lan a bua koute akhui kha huatawpaw ccungccaw hae shawku vawlan khe a hei.⁷Bawipaw inn kya umpaw beiknaw lante a ohhuakuhpaw pise hae inn hae kha a ro, tuh-e inn hae kyakhe nopi hae nynh Asherah hanlan boei a kuapya hae.⁸Judah ram e khua hae kyate ranpibawi hae balyn kha poukhae hae zah, ranpibawi hae nynh si a lawnaw hae ahangpaw hmin hae kha, Geba khua kyate Beersheba khua kyacia a thusah hae; Jerusalem khua uktu bawi Joshua koikua teenaw, khua koikua voilang um hae paw koikua kya-e ahangpaw hmin hae kha a tingbung hae.⁹Ahangpaw hmin hae kya-e ranpibawi hae tuh Jerusalem umpaw Bawipaw silawhang kalan cceihthung bua khyh hae, thuasalama ransi phingkuh leipaw sanlou kha tuh mih uno hae kya a aebua hae.¹⁰Humhung nynh mah Molek pachia kalan a ccapaw khyhze a ccanung khate maee-ute silawnaw a rae khyh nawlan, Ben-hinnom accya kya umpaw Tofeth kha anungsikuhpaw lang a rae.¹¹Bawipaw inn teenaw, voidu thuakaw kin umpaw tinriapaw Nathan-melek a khaan pe a umpaw, Judah siapharan hae nynh khuanin hanlan a pya hae paw marang hae kha mah ccaring a nue; te khuanin a marangle hae kha maee te a soi.¹²Ahaz kya-e palung khaan innccuvaw kya umpaw silawhang hae, Judah siapharan hae nynh la rae hae paw kha thuasah, Bawipaw inn voidu ccangning kya Manasseh nynh a la raepaw silawhang hae kha thuasah siapharan nynh tingbung zah zoihtatyh lan a koi, te tuh-e athupaw tuh Kidron Vaw lungkhu langkhe a vua.¹³Jerusalem nithua lang, Ronaw Mua alia lang umpaw ahangpaw hmin hae kha siapharan nynh anungsikuhpaw lang a rae hae, tuh-e ahangpaw hmin hae tuh Israel hae siapharan Solomon nynh Sidon hae pachia anungsikuhpaw Ashtoreth, Moab hae pachia anungsikuhpaw Khemoh te Ammon hae pachia anungsikuhpaw Milkom hanlan a la raepaw nynh thua hae.¹⁴Zohtuh hae kha zoihtatyh lan koi hae zah Asherim kha thoh pae lan a bae hae, tuh-e hmin hae kyakhe ccungccaw ru kha phe a biasah.

¹⁵Tuhpiaze Israel hae kha seinaw a raesah hae paw Jeroboam, Nebat ccapaw nynh Bethel khua kya a raepaw ahangpaw hmin te silawhang kha a tingbung; ahangpaw hmin kha tingbung zah palae tui lan maee te a soi; Asherah kha mah maee te a soi.¹⁶Josiah nynh maeleihkuh zah mua vawlan umpaw shawku hae kha a muih; te ccungccaw saw hae zah shaw lungkhu e ccungccaw ru kha lah hae zah silawhang vawlan khe maee te soi hae zah anungsikuhpaw lang a rae hae, tuh-e tuh poi tua lyaze Jeroboam nynh silawhang pe a thadyn lyakhe Pachia ccungccapaw nynh a la hopaw Bawipaw bya thyhte nynh athua; aning nynh maeleihkuh zah tuh-e konglang a la hodaepaw Pachia ccungccapaw shawku kha a muih.¹⁷Te Josiah nynh, “Khuh-e ka muihpaw liathuinaw lungpum khuh pawmou athua?” a ci.Khua kya-e ccungccaw hae nynh, “Bethel khua kya silawhang tungvaw na cyipaw miakaw kha a la hodaetupaw, Judah ram kyate yn thuapaw Pachia ccungccapaw shawku nynh thua,” cite a hopya hae.¹⁸Aning nynh, “Amaw tuh um sah; humhung nynh mah a ru kha nue nan sah,” a ci. Tukeiccuze a ru tuh Samaria kyate yn thuapaw profehpaw ru ryte tuhcihmawte a umsah hae.¹⁹Tuhpiaze, Israel siapharan hae nynh rae hae zah Samaria ram e khua hae kya a umpaw, Bawipaw thin a riasahpaw ahangpaw hmin hae kya-e hmin thyaapaw hae balyn kha Josiah nynh a nue hae; Bethel khua kya a la cyi hawte khah-e hae kha mah a cyi hae.²⁰Ahangpaw hmin hae kya-e ranpibawi hae, tuin kya um hae paw balyn kha silawhang hae vawlan khe theih hae zah, mih ru kha tuh-e silawhang hae vawlan khe maee te a soi. Tukoute Jerusalem lang a ki. Kawtaw Poi Tuanaw (2Sh 35.1-19)

²¹Siapharan nynh ccungccaw balyn kha, “E byakinnaw ccauh kya azeiku hawte Bawipaw nae Pachia kalan kawtaw poi kha tua oh,” cite kaw a pya hae.²²Israel hae a uktu byapiatu hae she lyate thuasah, Israel siapharan hae te Judah siapharan hae she lya balyn te thuasah tuhcihawpaw kawtaw poi tuh la tua boi vae khyh hae;²³thuasalama Siapharan Josiah nynh ram a uknaw kum haw lae taryanaw kum khe, e kawtaw poi hynh Bawipaw kalan Jerusalem kya a tua hae.

²⁴Tuhpiaze ranpibawi Hilkiah nynh Bawipaw inn lungkhu a muihpaw ccauh kya azeikuhpaw kawbya hae kha a tynsah nawlan, Josiah nynh chihiinleihthya hae paw, mitleihthya hae paw, tera zohtuh hae, zohtuh hae kha thuasah, Judah ram te Jerusalem kya muih athuapaw anungsikuhpaw balyn kha thuasah marya a vua hae.²⁵Josiah mawze Josiah hawte a thinlung balyn te, a hiinnaw balyn te, a thawzung balyn te, Moses kawbya balyn thyhte, Bawipaw kalan a maekuhpaw siapharan um boi khyh; amaw koute mah amaw alopaw siapharan langkuh vae khyh.

²⁶Thuasalama Manasseh nynh Bawipaw thinria nawlan a la cyipaw balyn keiccuze Judah tungvaw a thinrianaw tuh maee lang rua zah, myarya lepaw a thinrianaw kyate a lungdae loh khyh.²⁷Bawipaw nynh, “Israel kha ka dee hawte, Judah kha mah ka muihnaw kyate ka dee cih; ka la popaw hynh-e khuapi Jerusalem thuasah, ‘E kya ka min a um cih,’ cite ka la cipaw inn thuasah ka vua cih hae,” a ci. Rhawtuknaw kya Josiah A Chih (2Sh 35.20—36.1)

²⁸Tuhlaepaw Josiah nynh rya a lawpaw te a cyipaw balyn kha Judah Siapharan hae Sherianaw Ccauh kya a zei hae.²⁹Josiah ccyh lyakhe Izip siapharan Faro Neko nynh Assiria siapharan kalan Zufrates vaw lang a cceihthung. Siapharan Josiah tuh amaw te tungku khylan a cceih; Faro Neko tuh Josiah ryte Megiddo kya he a tungkuh hae tuh, Josiah kha a chia.³⁰A ryalahtu hae nynh a rhua tuh Megiddo kyate marangle te phu hae zah Jerusalem lang cciakhae hae zah amaw shawku kya a uu hae. Ramccungccaw hae nynh Josiah ccapaw Jehoahaz kha kokute chitui thuh hae zah a paaw ccelang siapharan lang a khang hae. Jehoahaz nynh Judah Ram Uknaw (2Sh 36.2-4)

³¹Jehoahaz tuh kum kuin lae thum acih te, ram kha uk takaw zah Jerusalem kyate sawpaw sah thum a uk. A nung min tuh Hamutal cikuh zah Libnah khuapaw Jeremiah ccanung nynh thua.³²A minpaaw hae nynh a la rae hae hawte, aning nynh Bawipaw muihnaw kya hoyleinaw kha a rae.³³Jerusalem khua kya a uk khyh nawlan, Faro Neko nynh Hamath ram Riblah khua khe thong sah zah, Judah ram kha ngunto lang ngun talent za kheit te sui talent ccangkheit kha a ngia.³⁴Faro Neko nynh Josiah ccapaw Eliakim kha a paaw ccelang siapharan lang khang zah a min kha Jehoiakim cite a paleih. Thuasalama aning nynh Jehoahaz kha Izip ram lang cciakhae zah tuin ram kya a chih.³⁵Jehoiakim nynh Faro kha sui te ngun a pya, thuasalama Faro nynh a ngiapaw phua kha ccingsah khylan a ram kha ngunto a khoi. Faro Neko pya lanpaw sui te ngun tuh a ramccungccaw hae kha khyapyapaw thyhte ccarou a ngiade hae. Jehoiakim nynh Judah Ram A Uk (2Sh 36.5-8)

³⁶Jehoiakim tuh kum kuin lae pangaw acih te, ram kha uk takaw zah, Jerusalem khua kya kum haw lae kheit a uk. A nung min tuh Zebidah cikuh zah Rumah khuapaw Pedaiah ccanung nynh thua.³⁷A minpaaw hae balyn nynh a la rae hae hawte, Bawipaw muihnaw kya hoyleinaw kha a rae. Rhaw hae nynh Judah Taenaw

¹Jehoiakim she lyakhe Babilon siapharan Nebukhadnezzar tuh yn cceihthung zah, Jehoiakim tuh kum thum lungkhu a ryalahtu lang a tang; tukoute rawse zah a dou.²Bawipaw nynh a ryalahtu profeh hae kyate a la hopaw bya thyhte, Judah ram kha ro khylan Babilon hae, Siria hae, Moab hae te Ammon hae kha Judah kalan a sawnua hae.³Manasseh nynh a la seipaw a seinaw balyn keiccu te seinaw a hoi lei hae paw chiise a la luasahpaw seinaw keiccuze a ccungccaw hae kha a muihnaw kyate dee khylan Bawipaw kawpyanaw te hynh-e uccaw hynh Judah tungvaw yn thua; pawccecize Jerusalem khua kha seinaw a hoi leipaw chiise khate biasah zah Bawipaw nynh a seinaw kha ngaethya ry khyh.⁵Tuhlaepaw Jehoiakim nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.⁶Tuhcite Jehoiakim tuh a minpaaw hae ryte ih hae zah, a ccapaw Jehoiakim nynh amaw ccelang siapharan lang a tang.⁷Izip siapharan tuh a ram kyate pou vae khyh, pawccecize Izip Vaw kyate Zufrates Vawpi kyacia Izip siapharan kya-e ram balyn kha Babilon siapharan nynh a law vae. Jehoiakhin Kyngnaw (2Sh 36.9-10)

⁸Jehoiakhin tuh kum haw lae tarya acih te, ram kha uk takaw zah, Jerusalem kyate sawpaw sah thum a uk. A nung min tuh Nehushta cikuh zah Jerusalem khuapaw Elnathan ccanung nynh thua.⁹A paaw nynh a la rae hawte Bawipaw muihnaw kya hoyleinaw kha a rae.

¹⁰Tuh ccyh lyakhe Babilon siapharan Nebukhadnezzar a ryalahtu hae nynh Jerusalem kha oun ccianua thung hae zah a koihlu hae.¹¹A ryalahtu hae nynh khua a koihlu lya hae khe, Babilon siapharan Nebukhadnezzar tuh Jerusalem khua lang a thua;¹²Judah siapharan Jehoiakhin nynh amaw, a nung, a ryalahtu hae, a kuihkaw e bawi hae te a siapharan inn e bawi hae ryte Babilon siapharan kalan a apku. Babilon siapharan nynh ram a uknaw kum taryanaw kum khe Jehoiakhin kha thong a saw. Jerusalem Lawnaw

¹³Bawipaw inn kya-e sisua balyn te siapharan inn kya-e sisua balyn kha Nebukhadnezzar nynh Babilon lang a phu; Israel siapharan Solomon nynh a raepaw, Bawipaw inn kya umpaw sui angphe hae balyn kha zoihtatyh lan a koi, e balyn hynh Bawipaw nynh a la hoty vae hawte nynh thua.¹⁴Jerusalem khuaccaaw hae balyn, bawi hae balyn, a rawthung hae paw balyn, kyngpaw ccungccaw abalyn thong haw, kuihhae hoy hae paw balyn te sosuhthya hae paw balyn kha marya a cciakhae hae; ram lungkhu e a ryachi huaccepaw ccungccaw hae laelan, lu kheit sanmah laehy khyh hae.¹⁵Jehoiakhin kha Babilon lang a cciakhae; siapharan a nung, siapharan zu hae, a kuihkaw e bawi hae te ram lungkhu e ccungkiahua hae paw kha kyngte Jerusalem kyate Babilon lang a cciakhae hae.¹⁶Arawthungpaw ccungccaw thong sari, kuihhae hoy hae paw te sosuhthya hae paw thong kheit, a thawsae zah rhaw a tuk kho cih hae paw kha mih balynte Babilon siapharan nynh kyng hae zah Babilon lang a cciakhae hae.¹⁷Babilon siapharan nynh Jehoiakhin a paaw neitawpaw Mattaniah kha Jehoiakhin ccelang siapharan lang khang zah, a min kha Zedekiah cite a paleih. Zedekiah nynh Judah A Uk (2Sh 36.11-12; Jer 52.1-3a)

¹⁸Zedekiah tuh kum kuin lae kheit acih te, ram kha uk takaw zah, Jerusalem kya kum haw lae kheit a uk. A nung min tuh Hamutal cikuh zah Libnah khuapaw Jeremiah ccanung nynh thua.¹⁹Jehoiakim nynh a la rae hawte, Zedekiah nynh Bawipaw muihnaw kya hoyleinaw kha a rae.²⁰Jerusalem te Judah nynh Bawipaw kha myaryamaw a thinriasah hae zah, aning nynh minmin kha a muihnaw kyate ccaring a dee hae. Judah Shungnaw te Kyngnaw
Zedekiah nynh Babilon siapharan kha a dou. Jerusalem Ronaw (2Sh 36.13-21; Jer 52.3b-11)

¹Zedekiah nynh ram a uknaw kum takuanaw, sawpaw sah hawnaw, nin haw nin khe Babilon Siapharan Nebukhadnezzar tuh a rhawkaw hae balyn ryte Jerusalem kha oun ccianua hae zah a koihlu hae; khuapi po voilu lan laekarung kha a thaenuaku hae.²Zedekiah Siapharan nynh ram a uknaw kum haw lae kheitnaw cia khuapi kha a koihlu hae.³Tuh-e kum, sawpaw sah palinaw, nin takua nin khe khuapi kya ccakan myarya ccih zah, ram kya-e ccungccaw hae hanlan looh um vae khyh.⁴Tetuh Babilon hae nynh khualungrua kha uasakuh hae zah khuapi po voilu lan a um hae zemah, Judah rhawkaw hae balyn tuh khuazi khe ccue hae zah, siapharan khokhu pe umpaw khualungrua ccangning laku e koikua kyate khuapi atolang poute Arabah langkhe a cceih hae.⁵Thuasalama Babilon rhawkaw hae nynh siapharan Zedekiah kha deehui hae zah, Jeriko bialae khe a phya hae; a rhawkaw hae balyn nynh amaw kha ccuetaw hae zah pong phiakuh hae.⁶Tetuh siapharan kha kyng hae zah, Hamath ram Riblah khua umpaw Babilon siapharan kalan a thuakhae hae, te aning nynh Zedekiah kha bya a pia.⁷Zedekiah ccapaw hae kha mih paaw muihnaw khe a chia hae, te Zedekiah mit kha a khoi hae, sivawrui te khii hae zah Babilon lang a cciakhae hae. Beikinn Ronaw (Jer 52.12-23)

⁸Nebukhadnezzar nynh Babilon siapharan lang a tangnaw kum haw lae takuanaw kum, sawpaw sah pangawnaw, nin sari nin khe Babilon siapharan a ryalahtu, a pyn rhawviapahtu hae rhawbawipaw Nebuzaradan tuh Jerusalem lang a cceih.⁹Aning nynh Bawipaw inn, siapharan inn te Jerusalem e inn balyn kha maee te a soi; inn lepaw miakaw kha maee te khaleih a soi.¹⁰Rhawviatu rhawkaw hae bawipaw ryte a umkheih hae paw Babilon rhawkaw hae balyn nynh Jerusalem akoihlupaw khualungrua balyn kha pong a tingsah hae.¹¹Rhawviatu hae bawipaw Nebuzaradan nynh khuapi kya a laehy hae paw, Babilon siapharan kalan a ccue hae paw te a laehy hae paw balyn kha kyng hae zah a cciakhae hae.¹²Thuasalama rhawviatu hae rhawbawipaw Nebuzaradan nynh ram lungkhu e mih ryachiccih huacce hae paw abang kha misu khokhu kya ryalahtu lang te loophotu lang a cciataw hae.

¹³Bawipaw inn kya umpaw sohin tung hae, tui nungnawpaw rahung te a thadynnawpaw atung hae kha Babilon hae nynh zoihtatyh lan khya hae zah, sohin balyn kha Babilon lang a cciakhae hae.¹⁴Ang hae, buhhawlua hae, tetakia hae, mynkhuhpaw unawpaw pake hae, beikinn ryalawnaw kya mangpaw sohin te raekuhpaw angphe balyn kha a cciakhae hae,¹⁵maee-e nungnawpaw pake hae te pakepi hae kha mah a law hae. Rhawviatu hae rhawbawipaw nynh sui te raekuhpaw kya-e sui te ngun te raekuhpaw kya-e ngun kha a cciakhae.¹⁶Solomon Siapharan nynh Bawipaw inn elang a raepaw tung tungning, tuikua kua kheit te a thadynnawpaw hae, e sohin angphe hae balyn tuh aripaw tou kho um lei lan ciate alung.¹⁷Tung tungkheit ze dong haw lae tarya hang zah tung adung khe sohin te raekuhpaw tunglukhung a um; tuh-e tunglukhung tuh dong thum hang zah, adung tuh po voilu lan sohin te raekuhpaw sivaw te ccalee thae a um hae. Te tung tungningnaw tuh mah sohin te raekuhpaw sivaw ryte tuhcih maminte a um.

¹⁸Rhawviatu rhawkaw hae bawipaw Nebuzaradan nynh ranpibawi lepaw Seraiah, lu ningnaw ranpibawi Zefaniah te beikinn thuakaw ngawtu lu thum kha a cciakhae hae;¹⁹khuapi kyate rhawkaw hae a uktu rhawbawi lu kheit, khuapi kya muih athua hae paw siapharan kungsi kya-e lu pangaw, ramccungccaw hae a sueluatu rhawbawi athuapaw ryaccinkhan lu kheit, khuapi kya muih athua hae paw ramccungccaw sung taruh kha a cciakhae hae.²⁰Te rhawviatu hae rhawbawipaw Nebuzaradan nynh minmin kha Riblah khua umpaw Babilon siapharan kalan a thuakhae hae.²¹Te Babilon siapharan nynh Hamath ram Riblah khua khe minmin kha bua hae zah a chia hae. Tuhcite Judah hae tuh kyng hae zah mih ram kyate ramccang lang a cciakhae hae. Judah hae A Uktu Gedaliah (Jer 40.7-9, 41.1-3)

²²Babilon siapharan Nebukhadnezzar nynh nungsya hae zah Judah ram kya a laehy hae paw kha a uktu lang Shafan ccapaw Ahikam a ccapaw Gedaliah kha a khang.²³Babilon siapharan nynh Gedaliah kha uktu lang a khang cipaw kong kha rhawkaw hae kya-e rhawbawi hae te mih ccungccaw hae nynh he a thae hae tuh, Mizpah khua umpaw Gedaliah kalan a cceih hae, tuh-e hae tuh Nethaniah ccapaw Ishmael, Kareah ccapaw Hohanan, Netofah ccungccaw Tanhumeth ccapaw Seraiah te Maakah ccungccapaw ccapaw Jaazaniah nynh thua hae.²⁴Gedaliah nynh minmin te mih ccungccaw hae kha byakinpakuh hae zah, “Babilon ccungccaw bawi hae keiccu rih nan oh; ram lungkhu um oh lah, Babilon siapharan rya kha lawpah oh, naemaw elang ahoy cih,” a cipya hae.²⁵Thuasalama sawpaw sah sarinaw khe Elishama ccapaw Nethaniah a ccapaw Ishmael, siapharan ciihan athuapaw nynh ccungccaw lu haw ryte oun cceih hae zah, Gedaliah te Mizpah khua kya amaw kya a umbua hae paw Judah hae te Babilon hae kha phe chih lan a bua hae.²⁶Tetuh ccungccaw balyn tuh adih ale, rhawkaw hae kya-e rhawbawi hae tuh Babilon hae raw a ri hae keiccuze thokuh hae zah Izip ram lang a cceih hae. Jehoiakhin tungvaw Thawccinaw (Jer 52.31-34)

²⁷Judah siapharan Jehoiakhin kha a kyngnaw hae te sung thum kum sarinaw, sawpaw sah haw lae ningnaw, nin kuin lae sari nin, Babilon siapharan Evil-merodak nynh ram a uk takaw kum khe, Judah siapharan Jehoiakhin kha thonginn kyate a luesah;²⁸aning kha hoyte byabeih zah, Babilon khua amaw kya a um hae paw ccangpaw siapharan hae mih haungnaw laeze ahang huapaw haungnaw kha a pya.²⁹Tukeiccuze Jehoiakhin nynh thonginn lungkhu a lawkupaw boeining kha khahkuh zah, a hiin lungkhu balyn siapharan ccaboi kya nin takyhte looh a ae.³⁰A hiin lungkhu balyn, nin takyhte a ae lanpaw looh kha Babilon siapharan nynh a pya.

Bible Society of Myanmar

https://app.library.bible/content/1a340f5ae072b2f4