Read 1 SIAPHARAN 1

1 SIAPHARAN1

David Siapharan A Taw Vae

¹Siapharan tuh taw vae zah a kum myarya tang vae; boei a thy hae zemah a khualung kho vae khyh.²Tukeiccuze a ryalahtu hae nynh amaw kha, “Siapharan ka bawipaw elang a kum nopaw liaccady kha kae ccungpah sah, aning nynh nang kha ae umkhae sah lah, ae do-oih sah; siapharan ka bawipaw tuh na khualung ccaw, na by vawlan ih sah,” a cipya hae.³Tukeiccuze Israel ram pynpi phe lekuh lan apuithyapaw liaccaw kha ccungpah hae zah, Shunam khuanung Abishag kha a muih hae, te siapharan kalan a cciakhae hae.⁴Liaccanung tuh myarya puithya; siapharan kha umkhae zah a do-oih, thuasalama siapharan nynh amaw kha ikhae khyh.

⁵Te Haggith ccapaw Adonijah nynh amaw te amaw hangsakuh zah, “Siapharan lang ka tang cih,” ci zah, amaw hanlan marangle hae, marang rhawkaw hae te a malang a ccue lanpaw ccungccaw sung pangaw kha a paccyn.⁶A paaw nynh, “Pawccemou hynhte khahte na cyi?” cite mah hohtutuh mah amaw kha a lunghoy lei lante hopah boi khyh. Aning tuh myarya puithya zah, Absalom he a zui lante a puipaw nynh thua.⁷Aning tuh Zeruiah ccapaw Joab, ranpibawi Abiathar ryte hobung hae zah, minmin nynh Adonijah kha a pankhae hae.⁸Thuasalama ranpibawi Zadok, Johoiada ccapaw Benaiah, profeh Nathan, Shimei, Rei te David rhawviatu rhawkaw hae tuh Adonijah kalan pan khyh hae.

⁹Adonijah nynh Enrogel pe umpaw Zoheleth lungpi pe khe tuu hae, tangnuapaw hae te athopaw sahiin hae khate silawnaw rae zah, a uno hae balyn, siapharan ccapaw hae te Judah ram umpaw siapharan kuihkaw e bawi hae balyn kha a ko hae,¹⁰thuasalama profeh Nathan, Benaiah, rhawviatu rhawkaw hae te a neitaw Solomon kha tuh ko khyh hae.

¹¹Tetuh Nathan nynh Solomon nung Bathsheba kha, “Haggith ccapaw Adonijah tuh ah bawipaw David ny leite siapharan lang a tang vae cipaw na thae khyh tou?¹²Tukeiccuze yn cceih lah, na hiinnaw te na ccapaw Solomon hiinnaw kha khum khylan tuanaw kae pyatua sah.¹³David siapharan kalan arangte la cceih lah, amaw kha, ‘Siapharan ka bawipaw, nang nynh na seenung kyaze: Na ccapaw Solomon tuh kamaw koute siapharan lang a tang cih zah, ka bawitungkhung kya a haung cih, cite bya nae kinpakuh khyh tou? Pawccemou Adonijah hynh siapharan lang a tang?’ cite la hopah.¹⁴Tuhcite siapharan kya bya na hopya lyakhe, kae nynh kae teethin cih zah na bya kha kae tynsah cih,” a cipya.

¹⁵Tukeiccuze Bathsheba nynh siapharan kalan a khaan lungkhu lang a tee. Siapharan tuh myarya taw vae; Shunam khuanung Abishag nynh siapharan kha a do-oih.¹⁶Bathsheba nynh bakhung zah siapharan kha sawtuanaw a pya, te siapharan nynh, “Pawmou na ry?” a cipya.¹⁷Aning nynh siapharan kha, “Ka bawipaw, Bawipaw na Pachia min phyate na seenung hynh bya nae kinpakuh zah: Na ccapaw Solomon tuh kamaw koute siapharan lang a tang cih zah, ka bawitungkhung kya a haung cih, na ci.¹⁸Thuasalama siapharan ka bawipaw, atu tuh namaw mah ny leite, Adonijah tuh siapharan lang a tang vae.¹⁹Aning nynh tangnuapaw hae, athopaw sahiin hae te tuu hae patae khate silawnaw rae zah, siapharan ccapaw hae balyn, ranpibawi Abiathar te rhawkaw hae bawipaw Joab kha a ko hae; thuasalama na seepaw Solomon tuh ko khyh.²⁰Siapharan ka bawipaw, namaw koute siapharan ka bawipaw kya-e bawitungkhung kya hummou a haung cih cipaw kha oun hopah sah cite, Israel hae balyn nynh nang kha ae do hae.²¹Tuhkhyhze tuh siapharan ka bawipaw tuh na minpaaw hae kya he na ihbua te, kae te ka ccapaw Solomon tuh seinaw a raetu hae lang oun ria vae cih hae,” a cipya.

²²Tuhcite siapharan te bya a hoku cciamang lya hae khe, profeh Nathan tuh yn teebua.²³Siapharan kha, “E kya profeh Nathan a um,” cite a hopya hae. Aning nynh siapharan malang he a tee te, laekhu kya bakhung zah siapharan kha sawtuanaw a pya.²⁴Nathan nynh, “Siapharan ka bawipaw, ‘Kamaw koute Adonijah nynh siapharan lang a tang cih zah ka bawitungkhung kya a haung cih,’ cite na ho tou?²⁵Pawccecize atunin kya aning nynh cceih zah tangnuapaw hae, athopaw sahiin hae te tuu hae patae khate silawnaw rae zah, siapharan ccapaw hae balyn, rhawkaw hae bawipaw Joab te ranpibawi Abiathar kha a ko hae, minmin tuh amaw malang khe ae hae neih hae zah, ‘Siapharan Adonijah tuh a hiinshe sae vae sah!’ a ci hae.²⁶Thuasalama na ryalahtupaw kae, ranpibawi Zadok, Jehoiada ccapaw Benaiah te na ryalahtupaw Solomon tuh oun ko khyh.²⁷Namaw koute siapharan ka bawipaw kya-e bawitungkhung kya hummou a haung cih cipaw kha na ryalahtupaw kae hynh nysah leite, siapharan ka bawipaw nynh e ryalaw hynh phe na law vae tou?” a cipya. Solomon Siapharan lang Tangnaw

²⁸David Siapharan nynh, “Bathsheba kha ka kalan yn kotua,” a cipya. Tukeiccuze Bathsheba tuh siapharan umnaw lang yn tee zah siapharan malang khe a thadyn.²⁹Siapharan nynh, “Vawsawnaw miakaw kyate ka hiinnaw yn khumpaw Bawipaw tuh a hiin thyhte,³⁰Bawipaw , Israel Pachia min phyate bya kae kinpakuh zah, ‘Na ccapaw Solomon tuh kamaw koute siapharan lang a tang cih zah, kamaw ccelang ka bawitungkhung kya a haung cih,’ kae cipya hawte, atunin ka cyih cih,” a cipya.³¹Tetuh Bathsheba nynh laekhu kya bakhungte siapharan kha sawtuanaw pya zah, “Ka bawipaw David Siapharan tuh zungzae hiin vae sah!” a ci.

³²David Siapharan nynh, “Ranpibawi Zadok, profeh Nathan te Jehoiada ccapaw Benaiah kha ka kalan oun ko oh,” a ci. Minmin tuh siapharan malang he a thua hae te,³³Siapharan nynh minmin kha, “Nae bawipaw kya-e ryalahtu hae kha ko oh lah, ka ccapaw Solomon kha ka lann kya ccisakuh oh lah, Gihon lang cciakhae bung oh.³⁴Ranpibawi Zadok te profeh Nathan nynh tuin kyakhe Israel hae balyn a uktu siapharan lang chitui thuh hae sah; te mungkae tu oh lah, ‘Solomon Siapharan tuh a hiinshe sae vae sah!’ cite sia oh.³⁵Nanning nynh amaw kha na zui cih oh. Aning tuh yn tee cih zah ka bawitungkhung kya a haung cih; kamaw ccelang siapharan lang a tang cih; pawccecize aning kha Israel te Judah a uktu lang ka khang vae,” a cipya hae.³⁶Jehoiada ccapaw Benaiah nynh siapharan kha, “Amen! Bawipaw , siapharan ka bawipaw Pachia nynh mah tuhcite ho vae sah.³⁷Bawipaw tuh siapharan ka bawipaw kya a um hawte, Solomon kya mah um vae sah, te a bawitungkhung tuh ka bawipaw David Siapharan kya-e bawitungkhung laeze mah lesaehua vae sah,” a cipya.

³⁸Te ranpibawi Zadok, profeh Nathan, Jehoiada ccapaw Benaiah, Khereth hae te Peleth hae nynh cceih hae zah Solomon kha David Siapharan lann tungvaw ccisakuh hae zah Gihon lang a cciakhae hae.³⁹Ranpibawi Zadok nynh bu kya-e chitui ruinkuhpaw saki kha lah zah Solomon kha a thuh. Te mungkae kha tu hae zah ccungccaw balyn nynh, “Solomon Siapharan tuh a hiinshe sae vae sah!” cite a sia hae.⁴⁰Ccungccaw balyn nynh amaw kha zui hae zah phyly tu biate, myaryamaw mih lungpaw zah laephi phe hy lan cia mih roi a saw hae.

⁴¹Adonijah te a kya umpaw mikhia hae balyn nynh loohdangnaw poi a thangsah lya hae khe, tuh-e roi tuh a thae hae. Joab nynh mungkae roi he a thae tuh, “Khuapi lungkhu kya siarisiaraepaw roi tuh pawkeiccumou athua?” a ci.⁴²Bya a ho cciamang lyakhe, Ranpibawi Abiathar ccapaw Jonathan tuh yn thua. Adonijah nynh, “Yn tee, nang tuh mihoypaw na thua zah, thehoypaw kha nae thuakhae mamin cih,” a cipya.⁴³Jonathan nynh Adonijah kha, “Thua khyh, ah bawipaw David Siapharan nynh Solomon kha siapharan lang a khang vae;⁴⁴siapharan nynh ranpibawi Zadok, profeh Nathan, Jehoiada ccapaw Benaiah, Khereth hae te Peleth hae kha Solomon ryte saw hae zah, minmin nynh siapharan lann kha a ccisaku vae hae;⁴⁵ranpibawi Zadok te profeh Nathan nynh amaw kha Gihon kya siapharan lang chitui a thuh vae hae; tuin kyate lungtua lungpawte a cceihthung vae hae, tukeiccuze khuapi tuh siarisiarae um zah, tuh-e roi tuh nynh na thae.⁴⁶Solomon tuh siapharan bawitungkhung kya a haung.⁴⁷Tuhpiaze siapharan a ryalahtu hae nynh ah bawipaw David Siapharan kha sawtuanaw pya lan cceih hae zah, ‘Pachia nynh Solomon min kha na min laeze athaanhua lante rae sah lah, a bawitungkhung kha na bawitungkhung laeze alesaehua lante rae vae sah,’ a ci hae. Siapharan tuh ikhung vawlan a lu bakhungte beik zah,⁴⁸‘Ka ciihan lu kheit kha ka bawitungkhung kya haungsah zah, tuh-e tuh yn muihsahtupaw Bawipaw , Israel Pachia tuh thehoyte um sah,’ cite saw a sang,” a cipya.

⁴⁹Tetuh Adonijah a mikhia hae balyn tuh thyngkute thokuh hae zah mih laanpi raveih lang a cceih vae hae.⁵⁰Adonijah tuh Solomon raw a ri keiccuze thokuh zah silawhang a ki hae kalan khe cceih zah a kyng.⁵¹“Adonijah nynh Solomon raw a ri keiccuze silawhang a ki hae kha kyng zah, ‘Solomon Siapharan nynh a ryalahtupaw kae hynh thaloi te kae theih lan khyh cite masaty bya yn kinpakuh sah,’ a ci,” cite Solomon kha a hopya hae.⁵²Tukeiccuze Solomon nynh, “Mihoypaw a thuanaw kha a langsah zetuh, a sangrua ccangkheit sanmah laekhu lang ccah lan khyh; thuasalama a tungvaw kya hoyleinaw muih athua zetuh a chih cih,” a ci.⁵³Te Solomon Siapharan nynh ccungccaw saw hae zah aning kha silawhang kyate a kosah hae. Aning tuh yn thua zah Solomon Siapharan kha sawtuanaw a pya; te Solomon nynh amaw kha, “Na inn lang la cceih,” a cipya. David nynh Solomon Thuiheisyanaw

¹David tuh a chinaw ccyh nae vae zah a ccapaw Solomon kha byatawsya zah:²“Laephi ccungccaw balyn nynh a ccianaw hae laanpi langkhe vyavya ka cceih vae cih. Na thawsae sah lah, na rawthung sah,³na cyipaw miakaw te na ccianaw miakaw kya na laan na sui a ua nawlan, Moses phungbya kya azeiku hawte, Bawipaw na Pachia nynh ae hopyapaw kha ngae lah, a laanpi kha zuite, a phunglang hae, a kawbya hae, a phungzae hae, ccaekia a khangkunaw hae kha zuitua.⁴Bawipaw nynh kamaw konglang ho zah: ‘Na ccapaw hae nynh mih thinlung balyn te, mih hiinnaw balyn te ka malang khe lungzinaw te ccia khylan, mih laanpi kha a raeringku hae zetuh, Israel bawitungkhung vawlan a haung cih paw na ciihan tuh dae lan khyh,’ a cipaw bya kha a tynsah cih.

⁵“Tuhpiaze Zeruiah ccapaw Joab nynh ka tungvaw a cyipaw kha mah phe na ny: aning nynh Israel rhawkaw hae a uktu rhawbawi hae lu ning, Ner ccapaw Abner te Jether ccapaw Amasa kha a chia hae, rhawtuk lya chiise aluapaw hanlan kha rhaw adae ccyh lyakhe phulah hae zah, a tae kya-e taeccia kya te a ccu kya-e phanah kyakhe rhawtuk chiise kha a noi.⁶Tukeiccuze na hawnaw thyhte cyitua, thuasalama a sang apaw vae paw a lu kha Sheol khua lang daebabi lan cciasah nan.⁷Thuasalama Gilead ccungccaw Barzillai ccapaw hae kha tuh lungzinaw te ccuepe hae lah, na ccaboi kya looh ae hae paw kyakhe umbua hae sah; pawccecize na upaw Absalom kyate ka ccue lyaze minmin nynh tuhcihawpaw lungzinaw khate yn cciadue hae.⁸Mahanaim khua lang ka ccia nin ze, kae kha thawte thya yn lawpaw Benjamin ccungccaw Bahurim khuapaw Gera ccapaw Shimei kha mah a um; thuasalama kae te tungku khylan Jordan vaw lang he yn cceihbung tuh, ‘Nang kha thaloi te kae theih lan khyh,’ cite Bawipaw min phyate bya ka kinpyaku vae.⁹Tukeiccuze seinaw a hoi leipaw lang ria nan, pawccecize nang tuh a hawpaw nynh na thua; a tungvaw pawtemou cyi lan accan cipaw kha na nyh zah, a sang apaw vae paw a lu kha chiise te Sheol lang na cciasah cih,” a cipya. David Chinaw

¹⁰David tuh a minpaaw hae ryte ih zah David khua khe a uu hae.¹¹David nynh Israel ram kha kum sung pali a uk; Hebron kya kum sari uk zah Jerusalem kya sung thum kum thum a uk.¹²Solomon tuh a paaw David kya-e bawitungkhung kya haung zah, a peenaw kha tynkaring lan a tynsah. Solomon nynh A Peenaw A Tynsah

¹³Te Haggith ccapaw Adonijah nynh Solomon nung Bathsheba kalan yn cceih. Bathsheba nynh, “Daenaw tetou nae thua?” a cipya. Aning nynh, “Daenaw te nynh kae thua,” a cipya.¹⁴Te aning nynh, “Na kya hopya lanpaw bya ka hoi,” a cipya. Bathsheba nynh, “Hotua,” a cipya.¹⁵Aning nynh, “Peenaw hynh kamaw kya-e thua zah, Israel hae balyn nynh ukku khylan yn ngaehoi hae paw kha na ny; tuhzemah peenaw tuh ka kuih kyate nuekuh zah, ka neitaw kuih kya a thua, pawccecize tuh-e tuh Bawipaw nynh a pyapaw nynh thua.¹⁶Te atu na kya ngiaku kae rypaw ccangkheit um zah, tuh-e tuh beih yn ei nan,” a cipya. Bathsheba nynh, “Hotua,” a cipya.¹⁷Aning nynh, “Solomon Siapharan kha beih yn ngiapya tua—nang tuh ae ei lan khyh—Shunam khuanung Abishag kha ka zu lang beih yn pya sah,” a cipya.¹⁸Bathsheba nynh, “Ahoy; namaw ccelang siapharan kha ka hopah cih,” a cipya.

¹⁹Tukeiccuze Adonijah ccelang bya hopya khylan Bathsheba tuh Solomon Siapharan kalan a cceih. Siapharan nynh amaw kha tungku khylan thokuh zah a malang khe a bakhung; te a bawitungkhung kya haung zah siapharan a nung elang haungnaw lawsah hae zah a ranglang khe a haung.²⁰Te a nung nynh, “Ngia lanpaw adihpaw ccangkheit ka hoi; yn myapah nan,” a cipya. Te siapharan nynh, “Anung, yn ngiakuh; kae ei lan khyh,” a cipya.²¹A nung nynh, “Shunam khuanung Abishag kha na upaw Adonijah kalan a zu lang beih pya,” a cipya.²²Solomon Siapharan nynh a nung kha, “Adonijah hanlan Shunam khuanung Abishag kha pawccemou nae ngia? Peenaw hynh mah aning elang ngiapya bia! Pawccecize aning tuh ka upaw nynh thua; aning elang kyalya ngia leite ranpibawi Abiathar te Zeruiah ccapaw Joab elang mah ngiabia!” a cipya.²³Solomon Siapharan nynh Bawipaw min phyate byakinkuh zah, “Adonijah nynh hynh-e a ngiapaw hanlan a hiinnaw kha a pya khyh zetuh, Pachia nynh ka tungvaw kya tuh-e ciate thuasah, tuhlaeze alung lante mah thuasah cyih vae sah.²⁴Tukeiccuze kae kha yn tynsah zah ka paaw David kya-e bawitungkhung kya yn nung zah bya a kinku hawte ka ciihan yn raepahtupaw Bawipaw tuh a hiin thyhte, atunin Adonijah tuh chia athua cih,” a ci.²⁵Tukeiccuze Solomon Siapharan nynh Jehoiada ccapaw Benaiah kha a saw; aning nynh Adonijah kha theih zah a chih.

²⁶Siapharan nynh ranpibawi Abiathar kha, “Anathoth khua lang, na inn na loo lang la cceih; nang tuh chi lan atekuhpaw nynh na thua. Thuasalama Bawipaw PACHIA thingkua kha ka paaw malang na la puih keiccu thuasah, ka paaw nynh vawsawnaw a teingpaw miakaw kha na la teingkhae keiccu thuasah atu tuh kae theih lan khyh,” a cipya.²⁷Tukeiccuze Solomon nynh Abiathar tuh Bawipaw a ranpibawi ryalaw kyate a phua, tuhcite Bawipaw nynh Eli ciihan te asekuh lante Shiloh khua kya bya a la hopaw kha a ccingsah.

²⁸Joab nynh Absalom kha a la bawm khyh zemah Adonijah kha tuh a la bawm keiccuze, tuh-e the kha he a thae tuh, Joab nynh Bawipaw bu kalan ccue zah, silawhang a ki hae kha phang a kyng hae.²⁹Solomon Siapharan kyakhe, “Joab tuh Bawipaw bu kalan ccue zah, atu silawhang pe phang um,” cite he a hopah hae tuh, Solomon nynh Jehoiada ccapaw Benaiah kha saw zah, “La cceih lah, Joab kha la theih,” a cipya.³⁰Tukeiccuze Benaiah tuh Bawipaw bu kalan cceih zah, Joab kyakhe, “Siapharan nynh, ‘Yn pou sah,’ ae ci,” a cipya. Joab nynh, “Ka pou lan khyh, e kya maw ka chih cih,” a ci. Te Benaiah nynh siapharan kalan khe bya kha cciakhae zah, “Joab nynh hynhte ho zah hynhte bya yn khung,” a cipya.³¹Siapharan nynh, “Amaw nynh a ho hawte la cyih, la theih lah, la uh; tuhcite akonglang um leite Joab nynh a luasahpaw chiise hanlan seinaw kha ka tungvaw te ka paaw ciihan kyate thyaasah tua.³²Aning nynh amaw laeze dinghua hae zah a hoyhua hae paw lu ning, Ner ccapaw Abner, Israel rhawkaw hae a uktu rhawbawipaw te Jether ccapaw Amasa, Judah rhawkaw hae a uktu rhawbawipaw kha ka paaw David a ny lei lante, thaloi te chiise a luasahpaw cyisahnaw kha amaw lu vawlan khe Bawipaw nynh a ccawsah cih.³³Tuhcite tuh-e hae chiise tuh Joab lu vawlan te a ciihan hae lu vawlan khe zungzae accah thui cih; thuasalama David tungvaw te a ciihan hae tungvaw thuasah, a inn te a bawitungkhung kya thuasah Bawipaw kyate yn thuapaw daenaw tuh zungzae a um cih,” a ci.³⁴Te Jehoiada ccapaw Benaiah nynh cceihthung zah Joab kha a theih koute ramkaw e amaw a inn kyakhe a uu hae.³⁵Siapharan nynh Jehoiada ccapaw Benaiah kha Joab ccelang rhawkaw hae a uktu lang nung zah, ranpibawi Zadok kha Abiathar ccelang ranpibawi lang a nung.

³⁶Te siapharan nynh Shimei kha kosah hae zah, “Jerusalem kya inn sakkuh lah, umbua; tuin khua kyate teitei lang mah pou nan.³⁷Pawccecize na pou zah Kidron vawkhu he na zua nin khe, na chih ccaccing cih cipaw kha nyku tua; na chiise tuh namaw lu vawlan accah cih,” a cipya.³⁸Shimei nynh siapharan kha, “Na hopaw tuh ahoy; siapharan ka bawipaw nynh na ho hawte, na ryalahtupaw nynh ka cyih cih,” a cipya. Tukeiccuze Shimei tuh Jerusalem kya khaw cia a um.

³⁹Thuasalama kum thum he aro te, Shimei see hae lu ning tuh Gath siapharan Maakah ccapaw Akhish kalan a ccue hae. Shimei kha, “Gath khua kya na see hae a um hae,” cite he a hopah hae tuh,⁴⁰Shimei nynh thokuh zah lann kha khungnin a dekuh koute a see hae kha ccung khylan Gath khua lang Akhish kalan a cceih; Shimei nynh cceih zah Gath khua kyate a see hae kha a kikhae hae.⁴¹Shimei tuh Jerusalem kyate Gath lang cceih zah yn ki vae cite Solomon kha he a hopah hae tuh,⁴²siapharan nynh Shimei kha kosah hae zah amaw kha, “Khua kyate na pou zah ccanglang na ccia nin kya na chih cih cipaw ccaerarih lan nykuh, cite Bawipaw min phyate bya kae kinsakuh zah, ccaerarih lan kae hopah khyh tou? Nang nynh kae kha, ‘Na hopaw tuh ahoy, ka nawccah,’ nae cipya.⁴³Te Bawipaw kalan bya na kinkupaw te kae nynh kae hopyapaw kawbya kha pawccemou na zui khyh?” a cipya.⁴⁴Siapharan nynh Shimei kha, “Ka paaw David tungvaw na cyipaw hoyleinaw balyn kha na thinlung kya phe na ny; tukeiccuze na hoyleinaw kha namaw lu vawlan Bawipaw nynh a ccawsah cih.⁴⁵Thuasalama Solomon Siapharan tuh hythuapya athua cih zah, David kya-e bawitungkhung tuh Bawipaw malang zungzae atyn cih,” a cipya.⁴⁶Te siapharan nynh Jehoiada ccapaw Benaiah kha kaw a pya; te Benaiah nynh cceih zah Shimei kha theih zah a chih.
Tuhcite peenaw tuh Solomon kuih kya atyn. Solomon nynh Hawnaw A Ngiaku (2Sh 1.3-12)

¹Solomon nynh Izip siapharan Faro ryte nawccawkheihnaw kha zudynaw te a rae; aning nynh Faro ccanung kha dykuh zah amaw inn, Bawipaw inn te Jerusalem khualungrua kha a lyn mawlaezung David khua khe a umsah.²Bawipaw min hanlan inn kha sak athua loh khyh keiccuze ccungccaw hae nynh ahangnaw hmin khe silawnaw kha a rae hae.

³Solomon nynh Bawipaw kha sungsah zah, a paaw David phungbya hae kha a zui; thuasalama ahangnaw hmin khe silaw zah mynkhuhpaw kha maee te a u.⁴Siapharan tuh silaw khylan Gibeon lang a cceih, pawccecize tuh-e tuh alepaw hmin hangpaw nynh thua; Solomon nynh tuh-e silawhang vawlan khe maee-ute silawnaw thong kheit kha leih a rae.⁵Gibeon khua kya khuazi a mang kyakhe Bawipaw tuh Solomon kalan yn langkuh zah, Pachia nynh, “Pawmou kae pya cih, yn ngiakuh,” a cipya.⁶Te Solomon nynh, “Na ryalahtupaw ka paaw David tuh namaw malang lungzinaw te, dingnaw te, thinlung hmerarih te a um keiccuze alepaw te atynpaw sungsahnaw kha na langsapyaku vae; amaw hanlan hynh-e alepaw te atynpaw sungsahnaw kha na nungpah zah, atunin a bawitungkhung kya a haung cih paw ccapaw kha na pya vae.⁷Atu tuh, pou Bawipaw ka Pachia, imua taraw ka thua zemah, na ryalahtupaw hynh ka paaw David hmin kya siapharan lang nae nung vae; kae tuh pawtemou pou lan zah pawtemou tee lan cipaw ka nykuh khyh.⁸Te milu riatae leipaw myarya lung hae paw minphuin pi, namaw nynh na popaw ccungccaw hae laku kya nynh na ryalahtupaw tuh ka um.⁹Tukeiccuze na ccungccaw hae hynh uk kho nawlan, ahoypaw te athahpaw phia khonawpaw nythyanaw thinlung kha na ryalahtupaw hynh beih yn pya; pawccecize hynh-e na minphuin pi hynh hum nynh mou a uk kho cih?” a ci.

¹⁰Tuhcite Solomon nynh a ngiapaw bya nynh Bawipaw kha a lungry a thuasah.¹¹Pachia nynh amaw kha, “Nang nynh hiinshe saenaw, hoirumnaw te na rhaw hae hiinnaw kha ngiaku leite, namaw hanlan ahmepaw nythya nawlan hawnaw kha nae ngiaku,¹²na bya thyhte ka cyih cih. Hawnaw te nythyanaw thinlung kha kae pya; nang na mawze nang ae lopaw lu kheit san la um boi khyh zah, nang na koute mah nang ae lopaw lu kheit san langkuh vae lan khyh.¹³Te nae ngiaku leipaw hoirumnaw te sawtuanaw kha na hiin lungkhu balyn kae pya; nang te touse lanpaw ccangpaw siapharan humhung mah um lan khyh.¹⁴Na paaw David nynh a zui hawte, ka laanpi kha na zui zah ka phungbya hae te ka kawbya hae kha na zui zetuh, na hiinshe kae saesah cih,” a cipya.

¹⁵Te Solomon tuh a inaw kyate thaekuh zah, tuh-e tuh a mang nynh thua. Jerusalem lang cceih zah Bawipaw kya-e byakin thingkua malang khe a thadyn. Aning nynh maee-ute silawnaw te ccawkunaw silawnaw kha rae zah, a ryalahtu hae balyn kha loohdangnaw a raepya hae. Byapianaw kya Solomon Hawnaw

¹⁶Te ohhuanung hae lu ning nynh oun cceih hae zah siapharan malang a thadyn hae.¹⁷Lu kheit nung nynh, “Ka bawipaw, e nopinung te kae tuh inn kheit kya kae umkheih; inn kya kae umkheih lyakhe ccaaw ka saahku.¹⁸Ka ccaaw a pui koute nin thumnaw nin khe e nopinung nynh mah ccaaw saahkuh zah, pynkheihlan kae umkheih; tuh-e inn kya kaemaw lu ning kyalya kae um zah, milae humhung mah umbua khyh.¹⁹E nopinung nynh khuazi khe a ccapaw kha a nethin keiccuze phe a chih.²⁰Ziraccyng khe aning nynh tho zah, ka pe e ka ccapaw kha na ryalahtunung ka itheih lyakhe zya lah zah, a by vaw khe a nung, te achihpaw a ccapaw kha ka by vaw khe a nung.²¹Awkhualan awkhua khe ka ccapaw kha matei zusah lan he ka tho tuh, a chihpaw kha ka muih; thuasalama awkhua khe hoyte ka do tuh, ka saahkupaw ccapaw thua khyh cipaw phe aria,” a cipya.²²Thuasalama ccangpaw nopinung nynh, “Thua khyh, ahiinpaw imua tuh ka ccapaw thua zah, achihpaw imua tuh na ccapaw nynh thua,” a ci. Masaty e nopinung nynh, “Thua khyh, achihpaw imua tuh na ccapaw thua zah, ahiinpaw imua tuh ka ccapaw nynh thua,” a ci. Tuhcite siapharan malang khe a eikuh hae.

²³Te siapharan nynh, “Lu kheit nynh, ‘E a hiinpaw hynh ka ccapaw thua zah, a chihpaw hynh na ccapaw nynh thua,’ na ci oh; te ccangpaw lu kheit nynh, ‘Tuhte thua khyh! Na ccapaw tuh a chih, a hiinpaw hynh ka ccapaw nynh thua,’ na ci oh,” a ci.²⁴Tukeiccuze siapharan nynh, “Thaloi yn pya oh,” ci zah thaloi kha a malang a thuakhaepya hae.²⁵Siapharan nynh, “Ahiinpaw imuapaw hynh ccangning lang thoh bua oh lah, e nopi hae lu ning hynh anganngankuhte pya oh,” a ci.²⁶Thuasalama a hiinpaw imua a nung nynh—a ccapaw kha myarya ngaethya a umsah keiccuze—siapharan kha, “Ka bawipaw, ahiinpaw imua hynh amaw kha pya ccaleih; beih theih nan!” a cipya. Ccangpaw lu kheit nynh, “Ka kya-e mah thua nan sah, na kya-e mah thua nan sah; thoh bua oh,” a ci.²⁷Tetuh siapharan nynh khung hae zah, “Ahiinpaw ccaaw kha theih nan oh, masaty e nopinung kha pya oh. Aning tuh imua a nung nynh thua,” a ci.²⁸Siapharan nynh bya a piapaw kha Israel hae balyn nynh thae hae zah siapharan tungvaw rawri sawtuanaw a hoi hae, pawccecize byading te byapia kho nawlan Pachia hawnaw tuh a tungvaw a um cipaw a ny hae. Solomon Kuihkaw e Bawi hae

¹Solomon Siapharan tuh Israel ram pynpi a uktu siapharan thua zah,²e hae hynh a kuihkaw e bawi hae nynh thua hae: Zadok ccapaw Azariah tuh ranpibawi nynh thua;³Shisha ccapaw hae Elihoref te Ahijah tuh ryaccinkhan hae nynh thua; Ahilud ccapaw Jehoshafat tuh ccazing kyngtu nynh thua;⁴Jehoiada ccapaw Benaiah tuh rhawkaw hae a uktu rhawbawi nynh thua; Zadok te Abiathar tuh ranpibawi hae nynh thua;⁵Nathan ccapaw Azariah tuh bawi hae a uktupaw bawi nynh thua; Nathan ccapaw Zabud tuh ranpibawi thua zah siapharan a banpaw mah athua;⁶Ahishar tuh siapharan inn a do-oihtu nynh thua; Abda ccapaw Adoniram tuh nangsete ryalawsahnaw kya a uktu nynh thua.

⁷Solomon nynh Israel ram pynpi a uktu bawi lu haw lae ning a hoi, minmin nynh siapharan te a innbyn hae hanlan looh kha a paccynpya hae; kum kheit lungkhu kya lu kheit nynh sawpaw sah kheit cci hanlan looh a paccynpya hae.⁸Tuh-e hae min tuh: Efraim muaram kyaze Ben-hur;⁹Makaz, Shaalbim, Beth-shemesh te Elon-beth-hanan khua hae kyaze Bendeker;¹⁰Arubboth khua kyaze Benhesed, (Sokoh khua te Hefer ram balyn tuh amaw kya-e nynh thua);¹¹Nafath-dor ram pynpi kyaze Ben-abinadab (a zu tuh Solomon ccanung Tafath nynh thua);¹²Taanak khua, Megiddo khua te Jezreel khua akawlan e Zarethan khua pe umpaw Beth-shean khua pepan balyn, Beth-shean khua kyate Abelmeholah khua kyacia, te Jokmeam khua akhung lang kyacia looh a paccyntu tuh Ahilud ccapaw Baana nynh thua;¹³Ramoth-gilead kyaze Ben-geber (aning nynh Gilead ram kya Manasseh ccapaw Jair kya-e khua hae kha a hoi hae, te Bashan ram umpaw Argob pee lungkhu kya-e khualungrua te sohin thuakawccaw a umpaw khua lepaw sung taruh);¹⁴Mahanaim khua kyaze Iddo ccapaw Ahinadab;¹⁵Naftali ram kyaze Ahimaaz (a zu tuh Solomon ccanung Basemath nynh thua);¹⁶Asher ram te Bealoth khua kyaze Hushai ccapaw Baana;¹⁷Issakhar ram kyaze Paruah ccapaw Jehoshafat;¹⁸Benjamin ram kyaze Ela ccapaw Shimei;¹⁹Amor hae siapharan Sihon te Bashan siapharan Og nynh a la uk hae paw Gilead ram kyaze Um ccapaw Geber nynh thua. Te Judah ram kya bawi lu kheit a um. Solomon Uknaw kha Kosahnaw

²⁰Judah hae te Israel hae tuh rili kin e laesia zeih acih hae; ae hae neih hae zah lungpawte a um hae.²¹Solomon nynh Zufrates kyate Filistin hae ram te Izip ramri kyacia ram balyn kha a uk; Solomon a hiin lungkhu balyn ngunto pya hae zah amaw kha rya a lawpya hae.

²²Solomon hanlan nin kheit athangpaw looh tuh ahoypaw vaekhui kor sung thum, chanvuih kor sung taruh,²³tangnuapaw athopaw sa haw, rampaeekunaw kya-e vaetua sa kuin te tuu za kheit te sazuh, sakhi, sazaw te thobaleih lan kuapaw pavaw phuin nynh thua.²⁴Pawccecize aning nynh Zufrates vaw kyate niccaw lang ram balyn, Tifsah kyate Gaza khua kyacia, Zufrates vaw niccaw lang e siapharan hae balyn kha uk hae zah, teitei lang balyn daenaw a um.²⁵Solomon a hiin lungkhu balyn tuh Judah hae te Israel hae tuh Dan kyate Beersheba kyacia, mih misu ku te mih thaeku ku raveih khate khyndadyh lan khua a sah hae.²⁶Solomon nynh a marangle a suepaw marang hae kunawpaw marang inn thong sung pali te marang rhawkaw thong haw lae ning kha mah a hoi.²⁷Te Solomon Siapharan te Solomon Siapharan a aenaw ccaboi kalan a thua hae paw balyn hanlan looh kha tuh-e bawi hae nynh lu kheit ze sah kheit ccite ahobounaw a um lei lan a paccyn hae.²⁸Minmin nynh mimaw rya raveih thyhte, marang hae te ahyhpaw marang hae hanlan barli te ccatanphue kha ahonaw hmin takyh lang a thuakhaepya hae. Solomon Hawnaw Minthaannaw

²⁹Pachia nynh Solomon kha myarya lepaw hawnaw, nythyanaw, rili kin e laesia zeih acihpaw thaethyanaw akopaw kha a pya.³⁰Tukeiccuze Solomon hawnaw tuh nithua lang ccungccaw balyn hawnaw te Izip hae hawnaw balyn laeze alehua.³¹Aning tuh humhung laeze a hawhua, Ezrah ccungccaw Ethan te Mahol ccapaw hae Heman, Kalkol te Darda laeze a hawhua; a minthaannaw tuh a pepan e minphuin hae balyn kya pong zeihkuh.³²Phungtangbya thong thum te hlawphua thong kheit hlaw pangaw a rae.³³Lebanon kya apopaw sidar thing kyate tho zah lungrua kya apopaw hyssop ku kyacia thingku kong kha a ho; sarangpaw, pavaw, avawpaw te ngasaw kong kha mah a ho.³⁴Solomon hawnaw kha thaetua khylan minphuin takyh kya-e ccungccaw hae nynh oun ccianua hae; minmin tuh a hawnaw kong a thaepaw laephi vaw e siapharan balyn nynh oun saw hae zah oun thua hae. Beikinn Sak lan Paccynkunaw (2Sh 2.1-18)

¹Solomon kha a paaw ccelang siapharan lang chitui a thuh vae hae cipaw kha Tair siapharan Hiram nynh he a thae tuh, a ryalahtu hae kha a kalan a saw hae; pawccecize Hiram tuh David a banpaw lang po a tangpaw nynh thua.²Solomon nynh Hiram kha byataw zah,³“Ka paaw David tuh a rhaw hae nynh po voilu lante a tuk hae keiccuze, Bawipaw nynh a rhaw hae tuh a ccuphe kaw a nung mawlaezung hae, Bawipaw a Pachia min hanlan inn kha sak kho khyh cipaw phe na ny.⁴Thuasalama atu tuh Bawipaw ka Pachia nynh pawpaw kya balyn haeungnaw yn pya vae zah, rawsenaw thuasah, vethyanaw thuasah um khyh.⁵Tukeiccuze Bawipaw nynh ka paaw David kha, ‘Namaw ccelang na bawitungkhung kya ka nung cih paw na ccapaw nynh ka min hanlan inn kha a sak cih,’ cite a hopya thyhte, Bawipaw ka Pachia min hanlan inn sak lan ka paccynkuh.⁶Tukeiccuze kamaw elang Lebanon mua e sidar thing kha nge khylan kawpya hae. Ka ryalahtu hae nynh na ryalahtu hae kha a bawm cih hae zah, nang nynh na ryalahtu hae hanlan ryalaw mee na khya thyhte kae pya cih; pawccecize Sidon hae hawte thing nge athyapaw kaening kya humhung mah um khyh cipaw na ny,” a cipya.

⁷Hiram nynh Solomon bya kha he a thae tuh, myarya a lungtua zah, “E minphuin pi a uktu lang David kha ccapaw ahawpaw a pyatupaw Bawipaw tuh thehoyte um sah,” a ci.⁸Hiram nynh Solomon kha byataw zah, “Bya nae tawpaw kha ka thae vae; sidar thing te maeccaw thing kha na ry zeih kae ccingsahpah cih.⁹Ka ryalahtu hae nynh Lebanon mua kyate rili kalan a cciakhae bung cih hae; tuh-e thingtung hae kha phum lang ka rae cih zah, na paccynnaw hmin langkhe rili kyate a cciakhae cih hae, te tuin kyakhe ka phousah cih hae zah nang nynh na lawkuh cih; nang nynh ka innbyn hae kha looh pyate ka rynaw kha nae ccingsahpah cih,” a cipya.¹⁰Tuhcite Solomon nynh a rypaw miakaw sidar thing te maeccaw thing kha Hiram nynh a pya.¹¹Solomon nynh mah Hiram kha a innbyn hae elang aepaw chanvuih kor thong kuin te chitui hoypaw kor ccangkuin kha a pyaru. Solomon nynh Hiram kha tuh-e tuh kum takyh a pya.¹²Bawipaw nynh bya a kinpyaku thyhte, Solomon kha hawnaw a pya. Hiram te Solomon laku kya daenaw um zah, mih lu ning te nawccawthungkunaw kha a rae hae.

¹³Solomon Siapharan nynh Israel hae balyn kya-e ccungccaw thong sung thum kha nangsete ryalawnaw kya a nung hae;¹⁴Sawpaw sah kheit ze thong haw ccite palei rulaete Lebanon lang a saw hae; Lebanon kya sah kheit, innvaw sah ning leih a um hae; Adoniram tuh nangsete ryalawsahnaw kya a uktu nynh thua.¹⁵Solomon nynh phupaw ryalahtu thong sung sari te muaram kya lung-awtu thong sung tarya a hoi;¹⁶tuhpiaze, Solomon nynh ryalahtu hae a dopahtu ccungccaw thong thum za thum a hoi.¹⁷Siapharan nynh kaw a pya hae thyhte, inn aleihpaw kha cyithuipaw lung te rae khylan, alepaw lung te amee rupaw lung kha a khyh hae.¹⁸Tuhcite innsakthya hae paw Solomon ccungccaw hae, Hiram ccungccaw hae te Gebal khuaccaaw hae nynh beikinn sak nawlan lung hae te thing hae kha a paccyn hae. Solomon nynh Beikinn A Sak

¹Israel hae nynh Izip ram kyate a pounaw hae te kum za pali sung taryanaw kum, Solomon nynh Israel hae a uknaw hae kum palinaw kum, sawpaw sah ningnaw athuapaw Ziv saw kyakhe, Bawipaw inn sak kha a tho.²Solomon Siapharan nynh a sakpaw Bawipaw inn tuh asaepaw dong sung taruh, akopaw dong kuin te ahangpaw dong sung thum acih.³Beikinn akhaanpi malang umpaw tee takawnaw khaan tuh beikinn akopaw te lokuh zah asaepaw dong kuin, akopaw dong haw acih.⁴Beikinn a aw ccaw cite abypaw thanlan-aw hae kha a rae.⁵Inn akhaanpi atolang pang te alungkhu lang e hminthyaa atolang pang kha po voilu lan akhaan taraw hae kha a rae.⁶Akaw khang tuh dong pangaw ko zah, angaelung khang tuh dong taruh ako, te khang thumnaw tuh dong sari ako; a doupaw thingccaw hae tuh inn pang lungkhu lang a tee khyh nawlan, inn atolang pang kha palung khang tuh alia khang laeze apahhua lante po voilu lan a rae.

⁷Beikinn saknawpaw lung hae kha lung lawnaw hmin kya raety vae paw lung athua keiccuze beikinn a sak lya hae khe alungkhu kya khynlyng roi, hae roi, sivaw zunghe roi pawpaw mah thae lan um khyh.

⁸Angaelung khang teenaw tuh beikinn alia lang khate nynh a um; akuekuhpaw nawkui khate angaelung khang lang thuasah, angaelung khang kyate khang thumnaw kalan thuasah kae athua.⁹Tuhcite beikinn kha sak zah a lyn; te beikinn kha sidar thingccaw te thingphe khate a daw.¹⁰Beikinn po voilu lan pang kya a sakpaw akhaan taraw hae tuh dong pangaw cci hang zah, sidar thing hae khate inn kya a kyngsaku.

¹¹Bawipaw bya tuh Solomon kalan yn thua zah,¹²“E na sak cciamangpaw inn te asekuh lante, ka phungbya kha ngaete ka phungzae hae kha na zui zah, ka kawbya balyn kha na zui zetuh, na paaw David kya bya ka kinpyakupaw kha na tungvaw ka tynsah cih.¹³Israel hae kya ka um cih zah, ka ccungccaw Israel hae kha ka vua lan khyh hae,” a ci.

¹⁴Solomon nynh inn kha sak zah a lyn.¹⁵Beikinn pang kha alungkhu langte suarui kyate siling adawkuhpaw kyacia sidar thingphe a be; suarui kha maeccaw thingphe te a rae.¹⁶Inn nulang dong kuin kha suarui kyate adawkuhpaw kyacia sidar thingphe te rae zah, e hynh alungkhu lang e hminthyaa lante, hmin thyaa huaccepaw lang a rae.¹⁷Alungkhu lang e hminthyaa malang umpaw inn akhaanpi tuh dong sung pali asae.¹⁸Inn lungkhu e sidar thing hae tuh tui-ung thae te haetapaw zuh kha a soi hae; abalyn mawte sidar thing nynh thua, lung tuh lang khyh.¹⁹Bawipaw byakin thingkua nung nawlan, inn alungkhu lang kou khe alungkhu lang e hminthyaa kha a paccyn.²⁰Alungkhu lang e hminthyaa alungkhu tuh dong kuin asae, dong kuin ko zah, dong kuin ahang; tuh-e akhaan tuh sui ccipaw te a thei. Silawhang kha mah sidar thing te a rae.²¹Solomon nynh inn alungkhu kha sui ccipaw te thei zah, alungkhu lang e hminthyaa malang khe sui rui kha po raw zah, sui te a thei.²²Inn pynpi tuh accingpaw athua nawlan, inn kha abalynte sui a thei; alungkhu lang e hminthyaa kya-e silawhang kha heize abalynte sui a thei. Beikinn Ccaannaw

²³Alungkhu lang e hminthyaa lungkhu khe dong haw cci ahangpaw cherubim ccangning kha oliv thing te a rae.²⁴Cherub sake ccangkheit tuh dong pangaw sae zah, cherub sake ccangpaw ccangkheit tuh dong pangaw asae; tukeiccuze a sake voikheit lang dung kyate voikheit lang kyacia dong haw acih.²⁵Ccangpaw cherub ccangkheit tuh mah dong haw acihbua; ccangning mawte mih muinsan te adi-ale hae paw phe lokuh hae.²⁶Cherub ccangkheit tuh dong haw ahang, ccangpaw cherub mah tuhmaminte ahangbua.²⁷Cherubim hae kha inn alungkhu lang kou khe a nung; cherub sake hae tuh daw hae zah, cherub ccangkheit sake nynh pang voikheih lang kha dia zah, ccangpaw cherub ccangkheit sake nynh pang voikheih lang kha adia; ccangpaw mih sake hae tuh inn ngaelung khe ccangkheit te ccangkheit a tungkuh hae.²⁸Cherubim kha mah ccangning mawte sui te a thei hae.

²⁹Inn pang hae kyakhe akhaan alungkhu lang te thuasah, atolang te thuasah po voilu lan cherubim zuh, ungcci ku zuh te haetapaw zuh hae a soi hae.³⁰Inn kya-e suarui kha akhaan alungkhu lang te thuasah, atolang te thuasah sui te a thei.

³¹Alungkhu lang e hminthyaa kalan teenaw thuakaw hae kha oliv thing te a rae; thuakawccaw te thuakawtung hae tuh apaki ccangpangaw a hoi hae.³²Oliv thing te raekuhpaw thuakaw ccangning kha cherubim zuh, ungcci ku zuh te haetapaw hae zuh kha soi hae zah sui te a thei hae, te cherubim te ungcci ku hae kha sui te a ccaan hae.

³³Tuhawte inn khaanpi kalan teenaw thuakaw tung hae kha mah oliv thing te, apaki ki pali a um lante a rae hae,³⁴maeccaw thing te thuakaw ccangning rae zah, thuakaw voikheit lang elang pahta ccangning cci a rae keiccuze khawthya hungthya a um hae.³⁵Thuakaw hae kyakhe cherubim zuh, ungcci ku zuh te haetapaw hae zuh kha karynte soi zah, azuh apyaanaw kyakhe sui te a thei.³⁶Alungkhu lang e voidu kha raethuipaw lung thyh thum te sidar thingphe thyh kheit khate a rae.

³⁷Kum palinaw, Ziv sawpaw kyakhe Bawipaw inn aleihpaw kha a bing hae.³⁸Kum haw lae kheitnaw, sawpaw sah taryanaw Bul sawpaw kyakhe inn kha paccyn thyhte akhaan riadawpaw ryalaw balyn kha a lyn hae. Solomon nynh kum sari lungkhu inn kha a sak. Solomon Inn te Ccangpaw Inn hae

¹Solomon nynh amaw inn kha kum haw lae thum lungkhu sak zah, a inn kha abalyn mawte a lyn.

²Lebanon Tuhpi Inn a ci hae paw kha sak zah, asaepaw dong za kheit, akopaw dong sung pangaw, ahangpaw dong sung thum acih; tuh-e inn tuh tang pali lang bingpaw sidar thingtung hae te tuh-e tung hae kya huepaw sidar thingccaw hae khate a sak.³Tang kheit kyaze tung haw lae pangaw cci um zah, tung sung pali tung pangaw vawlan umpaw dawnawpaw accaw hae vawlan khe sidar thing te a daw hae.⁴Tang thum kyakhe thanlan-aw accaw hae um hae zah, ccangkheit te ccangkheit tuh tang thum kyakhe a hawiliakuh hae.⁵Thuakaw hae te thanlan-aw hae balyn tuh apaki ki pali umpaw thua hae zah, tang thum kyakhe ccangkheit te ccangkheit a hawiliakuh hae.

⁶Tungpi Khaan a ci hae paw kha rae zah, tuh-e tuh dong sung pangaw sae zah dong sung thum ako. Tung hae malang khe zekaw taraw um zah, tuh-e hae malang khe zokhawboei a um.

⁷Bawitungkhung Khaan a ci hae paw kha a rae, byapianaw lanpaw thua zah Byading Khaan cite mah acikuh, suarui ccangkheit kyate ccangkheit kyacia sidar thing te a daw hae.

⁸Solomon a umnaw lanpaw inn, Byading Khaan anulang a umpaw kha mah tuhmaminte a sak hae. Zu lang a dykupaw Faro ccanung elang inn kha mah tuh-e Byading Khaan hawte a sakpya.

⁹E inn hae balyn tuh atolang te voidu lepaw kyacia, aleihpaw kyate adung kyacia amee rupaw lung te a sak hae; lung hae tuh tounawpaw te tou thyhte awpaw, nulang malang thing-aw te awpaw nynh thua hae.¹⁰Inn aleihpaw e lung tuh dong tarya te dong haw sae zah, amee rupaw lung lepaw nynh thua hae.¹¹A vawlan khe amee rupaw lung, tounawpaw te tou thyhte raepaw lung te sidar thing a um hae.¹²Voidu lepaw tuh cyithuipaw lung thyh thum, sidar thingccaw thyh kheit te po voilu lan koihpaw nynh thua; Bawipaw inn alungkhu lang e voidu te tuh-e inn tee takawnaw khaan kha tuhmaminte a rae hae. Hiram A Ryalaw

¹³Solomon Siapharan nynh Tair khua umpaw Hiram kha byataw zah a ko.¹⁴Aning tuh Naftali phin nomaenung ccapaw thua zah, a paaw tuh Tair khuapaw a kuihhae hoypaw nynh thua; aning tuh sohin raenaw kya a puakuhpaw, hawnaw te nythyanaw a hoipaw nynh thua. Solomon kalan cceih zah a rya miakaw kha a lawpya.

¹⁵Hiram nynh sohin tung tungning kha sohin te a laee. Tung tungkheit tuh dong haw lae tarya hang zah, dong haw lae ning asaepaw arui te a voi; tung ningnaw tuh mah tuhmaminte a cyi.¹⁶Tung dung kya nung lanpaw tunglukhung ccangning kha sohin te a rae; tuh-e ccangkheit tuh dong pangaw hang zah, ccangpaw ccangkheit mah dong pangaw ahang.¹⁷Tung dung hae kya umpaw tunglukhung hae elang miabu hawte akhelekuhpaw sohinrui hae kha a rae; tunglukhung ccangkheit cci hanlan tuh-e akhelekuhpaw ccangsari cci kha a rae.¹⁸Tung vawlan umpaw lukhung a vawlan khe, tuh-e lukhung ccangkheit elang sohin ccalee thae atang tang ning kha a rae; ccangpaw lukhung elang mah tuhmaminte a rae.¹⁹Tee takawnaw khaan kya-e tung hae dung a bongpaw lukhung hae tuh lili haetapaw te lokuh zah dong pali ahang.²⁰Tuh-e lukhung hae tuh atung tung ning vawlan te miabu hawte akhelekuhpaw pe umpaw athualaepaw vawlan khe a um hae; tung dung ccangkheit kyaze ccalee thae za ning ccite atang po voilu lante a um hae.²¹Tung hae tuh beikinn tee takawnaw khaan kyakhe a bing hae; alia langsang khe tung kha bing zah Jakhin cite min a phu; thahlang sang khe mah tung kha bing zah Boaz cite min a phu.²²Tung dung hae vawlan khe lili haetapaw alo lante a rae; tuhcite tung ryalaw kha a lyn.

²³Te sohin tuikua kha apyng lante rae zah, voikheih lang arae te voikheih lang arae tuh dong haw sawkuh zah, dong pangaw ahang. Po voilu lan tou lanze dong sung thum acih.²⁴Tuikua arae zakaw khe po voilu lante dong kheit ze tui-ung ccanghaw ccite tui-ung atang tang ning kha tuikua po voilu lan sohin te a laee.²⁵Tuh-e tuikua tuh tangnuapaw sa haw lae ning vawlan khe a um, tangnuapaw hae sa thum tuh thahlang, sa thum tuh niccaw lang, sa thum tuh alia lang, sa thum tuh nithua lang a hawi hae. Tuikua tuh mih tungvaw khe um zah, atolang khe pong a hawi hae.²⁶Tuikua tuh zapae thaw zah, arae tuh banang rae hawte thua zah, lili haetapaw te alokuh; tuikua tuh tui kha bath thong ning accawng.

²⁷Te Hiram nynh sohin le ccanghaw a rae; le ccangkheit tuh dong pali asae, dong pali ko zah dong thum ahang.²⁸E hynh tuh-e le pungsan raenaw nynh thua: le hae tuh po voilu lante atang hoi hae zah, tuh-e atang hae tuh tung hae laku kya nynh a um hae;²⁹tuh-e tung hae laku umpaw atang hae kyakhe chindeih hae, tangnuapaw hae te cherubim zuh kha a rae hae. A tung kyakhe mah chindeih hae te tangnuapaw hae zuh mih vawlan te mih zakaw khe haetapawsi zuh a um.³⁰Le ccangkheit cci nynh sohin leccu ccangpali ccite sohin leccaw a hoi hae; pakepi khang nawlan apaki ki pali kyakhe a doutu um hae zah, tuh-e hae tuh haetapawsi hae ryte mih umnaw raveih khe a ccaande hae.³¹Zalung pake arae tuh dong kheit ko; aleihpaw hawte pyng zah dong kheit lae angankuh acih. Arae kyakhe deihthuite ccaanpaw a um hae; atang hae tuh apaki ki pali um zah pyng khyh.³²Leccu ccupali tuh atang hae zakaw um hae zah, leccaw hae tuh le kaw khe a um hae; leccu tuh dong kheit lae angankuh ahang.³³Leccu tuh marangle ccu hawte rae athua; leccaw hae, leccu khu arae hae, accu kya bingpaw ccungngue hae te accu kya bingpaw ccungngue a khawtu hae balyn kha sohin te a laee hae.³⁴Le apaki ki pali kyakhe dounawpaw ccangpali cci um hae zah, le te po kyngkuh hae.³⁵Le adung khe khaw kheit acihpaw sohin pyngkalynpaw a um; le dounawpaw te atang hae tuh le te po kyngkuh hae.³⁶Dounawpaw hae te atang hae tuh cherubim, chindeih te ungcci ku zuh te a ccaan hae; accawnghannaw miakaw kyakhe haetapaw zuh kha a soi hae.³⁷Tuhcite le ccanghaw kha a rae; mih balyn mawte a muinsan te adi-ale pong lokuh lante a laee hae.

³⁸Hiram nynh pakepi ccanghaw kha sohin te a rae; tuh-e zalung ccangkheit cci tuh dong pali ko zah, bath sung pali cci accawng. Le ccanghaw hae tuh ccangkheit cci kya pakepi ccangkheit cci kha a um.³⁹Beikinn alia langkhe le ccangpangaw nung zah, thahlang khe le ccangpangaw a nung; tuikua kha inn nithua-alia lang apaki khe a nung.

⁴⁰Hiram nynh ang hae, buhhawlua hae te pakepi hae kha a rae hae. Tuhcite Hiram nynh Solomon Siapharan elang Bawipaw inn kyakhe rya balyn kha a lyn.⁴¹Tuh-e hae tuh: tung tungning, tung dung kya umpaw tunglukhung ccangning, tung dung hae kya umpaw tunglukhung hae bong lanpaw miabu hawte akhelekuhpaw hae,⁴²tung vawlan umpaw tunglukhung ccangning kha a bong lanpaw miabu ccangning elang ccalee thae za pali, tuh-e miabu ccangkheit cci elang ccalee thae atang tang ning,⁴³le ccanghaw, le vawlan umpaw pakepi ccanghaw,⁴⁴tuikua ccangkheit te tuikua kaw umpaw tangnuapaw ahaw lae ning nynh thua.

⁴⁵Ang hae, buhhawlua hae, pakepi hae, e hae balyn hynh Hiram nynh Bawipaw inn hanlan Solomon Siapharan elang awrarihpaw sohin te a raepya.⁴⁶Jordan accya, Sukkoth te Zarethan laku umpaw anglae laephi kyakhe siapharan nynh e hae hynh a laee hae.⁴⁷Tuh-e angphe hae balyn tuh eih alung keiccuze Solomon nynh aripaw tou leite a nung hae; tuh-e sohin nynh aripaw tuh ny kho um khyh.

⁴⁸Tuhcite Solomon nynh Bawipaw inn kya umpaw uccaw hae balyn kha a rae: sui silawhang, Nungpyapaw sanlou nung nawlan sui ccaboi,⁴⁹alungkhu lang e hminthyaa malang umpaw sui ccite raepaw maeekhuatung hae—alia lang ccangpangaw, thahlang ccangpangaw; sui haetapaw hae, sui maeekhua hae, sui tetakia hae;⁵⁰sui ccite raepaw banang hae, tetakia hae, pakepi hae, mynkhuhpaw hanlan pake hae, maee-e nungnawpaw pake hae; beikinn alungkhu lang kou, hmin thyaa huaccepaw kya-e thuakaw hae elang te beikinn inn khaanpi kya-e thuakaw hae elang sui pahta hae kha a rae.

⁵¹Tuhcite Solomon Siapharan nynh Bawipaw inn elang rya a lawpaw balyn tuh a thangsah. A paaw David nynh a hlupaw uccaw hae: sui, ngun te angphe hae kha teekhae zah, Bawipaw inn lungkhu e sisuainn kyakhe a ccy. Beikinn Apnaw (2Sh 5.2—6.2)

¹Te Bawipaw byakin thingkua kha Zion cikuhpaw David khua kyate cciakhae khylan, Solomon nynh Israel piccan hae balyn, mih phin raveih kya-e lu hae balyn, Israel ciihan cciakhaetu hae balyn kha Jerusalem khua, Solomon Siapharan malang a pum hae.²Israel ccungccaw balyn tuh sawpaw sah sarinaw Ethanim saw lungkhu poi kyakhe Solomon Siapharan malang a sueluakuh hae.³Israel piccan hae balyn tuh oun cceih hae zah, ranpibawi hae nynh thingkua kha a puih hae.⁴Bawipaw thingkua, tungkunaw bu te bu kya umpaw athyaapaw angphe hae balyn kha ranpibawi hae te Levi phin hae nynh a cciakhae hae.⁵Solomon Siapharan te a malang pumkuh hae paw Israel zapi hae balyn nynh amaw ryte thingkua malang khe myarya lungpaw tuu hae te tangnuapaw hae riatae um leipaw khate si a law hae.⁶Ranpibawi hae nynh Bawipaw byakin thingkua kha beikinn alungkhu lang e hminthyaa kya, hmin thyaa huaccepaw kya, cherubim sake hae zakaw, amaw hmin kyakhe a nung hae.⁷Pawccecize cherubim hae nynh mih sake hae kha thingkua umnaw luki khe daw hae zah, thingkua te puihnawpaw ccong hae kha a dawpya hae.⁸Puihnawpaw ccong hae tuh eih asae keiccuze adung kha alungkhu lang e hminthyaa malang, hminthyaa kyate muih kho athua; thuasalama atolang te muih kho thua khyh; atunin cia tuin kya a um hae.⁹Israel hae nynh Izip ram kyate a pou lya hae ze, Bawipaw nynh minmin ryte byakinnaw a raenaw Horeb mua kya Moses nynh a la sangpaw lungphe phe ning laelan, thingkua lungkhu kya ccangpaw pawpaw mah um khyh.¹⁰Ranpibawi hae nynh hminthyaa kyate he a pou hae tuh, Bawipaw inn tuh maeking phe abeih,¹¹maeking keiccuze ranpibawi hae tuh ryalaw lan thadyn kho khyh hae; pawccecize Bawipaw phu-enaw tuh Bawipaw inn kya phe abeih.

¹²Te Solomon nynh,“Varyng zipingpaw mohnaw kyaka um cih cite Bawipaw nynh a ci.¹³A sung-epaw inn,zungzae na umnaw lanpawhmin kha kae sakpya vae,” a ci.Solomon Bya (2Sh 6.3-11)

¹⁴Te Israel zapi hae balyn a thadyn lya hae khe, siapharan nynh a nulang maeleihkuh zah Israel zapi hae balyn kha hythua a pya hae.¹⁵Solomon nynh, “Bawipaw , Israel Pachia tuh thehoyte um sah, pawccecize ka paaw David kyakhe a mung te byakinpakuh zah,¹⁶‘Ka ccungccaw Israel hae kha Izip ram kyate ka poukhae nin hae kyate tho zah, ka min a umnaw lanpaw inn kha sak nawlan, Israel phin hae kya-e pawpaw khua kha mah ka po khyh; thuasalama ka ccungccaw Israel hae a uktu lang David kha ka po,’ cite a hopaw kha a kuih te a ccingsah vae.¹⁷Bawipaw , Israel Pachia min hanlan inn sak lanpaw kha ka paaw David thinlung kya a la um.¹⁸Thuasalama Bawipaw nynh ka paaw David kha, ‘Ka min hanlan inn sak lan na tuaku keiccuze ahoypaw kha na cyi vae;¹⁹thuasalama nang nynh inn kha na sak lan khyh, na saahkuh cih paw na ccapaw nynh ka min hanlan inn kha a sak cih,’ a cipya.²⁰Bawipaw nynh bya a kinkupaw kha a ccingsah vae; pawccecize ka paaw David umnaw kya ka um vae; Bawipaw nynh bya a kinku thyhte, Israel bawitungkhung kya ka haung zah, Bawipaw , Israel Pachia min hanlan inn kha ka sak vae.²¹Ah minpaaw hae kha Izip ram kyate a poukhae lya hae ze, Bawipaw nynh minmin ryte a raepaw a byakinnaw a umnahpaw thingkua elang hmin kha ka paccyn vae,” a ci. Solomon Sawsangnaw (2Sh 6.12-42)

²²Solomon tuh Bawipaw silawhang malang, Israel zapi hae balyn muihnaw khe thadyn zah, vaawlang khe a kuih kha daw zah,²³“Pou Bawipaw , Israel Pachia, ahangnaw vaawram te anenaw laephi kya nang ae lopaw Pachia um khyh, mih thinlung balynte namaw malang a cceih hae paw na ryalahtu hae hanlan byakinnaw te atynpaw sungsahnaw kha na langsah vae,²⁴na ryalahtu ka paaw David hanlan na tynsahpaw byakinnaw kha na hopya thyhte na zui; na mung te bya na kinpakuh zah na kuih te atunin na ccingsah vae.²⁵Tukeiccuze, pou Bawipaw , Israel Pachia, na ryalahtu ka paaw David kyaze, ‘Nang nynh ka malang na ccia hawte, na ccaaw hae nynh ka malang ccia lan mih laanpi kha a raeringku hae zetuh, Israel bawitungkhung kya kamaw malang a haung cih paw na ciihan tuh dae lan khyh,’ cite na kinpyakupaw bya kha beih tynsah tua.²⁶Tukeiccuze, pou Israel Pachia, na ryalahtu ka paaw David kya na kinpyakupaw na bya kha beih tynsah tua.

²⁷“Thuasalama Pachia tuh laephi vawlan um ccaccing vema? Vaawram te ahang huaccepaw vaawram nynh heize nang kha ae ccawng khyh, kae nynh ka sakpaw e inn thathy tuh hosyn um vae khyh!²⁸Thuasalama, pou Bawipaw ka Pachia, na ryalahtupaw nynh saw ka sangpaw te kae ngiapaw hynh yn ngaepya tua, na ryalahtupaw nynh atunin namaw malang ka siapaw te saw ka sangpaw hynh yn thaepya tua;²⁹‘Hein kya ka min a um cih,’ na cinaw hmin, e inn kalan hin khuazi khuadae yn do lah, na ryalahtupaw nynh hynh-e hmin kalan hawite saw ka sangpaw hynh beih yn thaepya tua.³⁰Na ryalahtupaw te na ccungccaw Israel hae nynh e hmin kalan hawite saw kae sang vae ze, kae ngiapaw kha yn thaepya tua; na umnaw vaawram te yn thaepah lah, kae seinaw kha oun ngaethya.

³¹“Lukhakheit nynh a innpaw tungvaw a sei keiccuze thyalawsaku thua zah, e inn kya na silawhang malang poute thya a lawku ze,³²nang nynh vaawram te thae lah, rya yn lah lah, na ryalahtu hae hynh bya oun piatua, a seitupaw tuh a cyisahnaw kha amaw lu vawlan ccah sah lah, a dingpaw tuh a dingnaw thyhte thanenaw pya khylan thyaccousah tua.

³³“Na ccungccaw Israel hae nynh na tungvaw a sei hae keiccuze mih rhaw hae malang he a shung hae te, namaw kalan bua oun maekuh hae zah na min kha sawtuate, e inn kyahin namaw kalan sawsangte ae ngiaku hae ze,³⁴vaawram te thaepah hae lah, na ccungccaw Israel hae seinaw kha ngaethya hae, te mih minpaaw hae na pya hae paw ram langkhe bua kikhae hae.

³⁵“Na tungvaw a sei hae keiccuze vaaw kha na khawsung zah khuaa kansah te de he na tah hae te, minmin nynh e hmin kalan hawite sawsang hae zah, na min kha sawtuate, mih seinaw kyate a maeleihku hae ze,³⁶vaawram te la thae lah, na ryalahtu hae te na ccungccaw Israel hae seinaw kha ngaethya hae; a zui lan hae paw laanpi hoypaw kha ccangpah hae lah, na ccungccaw hae elang rho lang na pya hae paw na ram kya khuaarawsah tua.

³⁷“Ram lungkhu kya ccakan acci ze thuasah, shethya a thua ze thuasah, looh aphi poute ronaw, khivae keiccu looh ronaw, tungkhipaw te khung-angroh keiccu looh ronaw thuasah, rhaw nynh mih khua khuakhakheit kha a koihku ze thuasah, shethya ccangkhakheit, ccinaw ccangkhakheit a um ze thuasah,³⁸na ccungccaw Israel hae nynh mih balynte thuasah, humhung nynh mah lukhakheit te thuasah mih thinlung raveih kya a teing hae paw kha nykute, e inn kalan hin mih kuih dawte pawpaw sawsangnaw thuasah, pawpaw ngianaw thuasah oun rae hae ze,³⁹na umnaw vaawram te la thaepah hae, mih seinaw ngaethya hae lah bawmtua hae, mih thinlung na ny hae paw balyn kha a zui hae paw mih laanpi thyhte pyaru hae, pawccecize ccungccaw miakaw thinlung kya pawmou a um cipaw kha nang rou nynh na nyh;⁴⁰tuhteze nynh kae minpaaw hae na la pya hae paw ram kya um hae zah a hiin lungkhu hae balyn nang kha ae rih cih hae.

⁴¹“Tuhawte, na ccungccaw Israel athua leipaw ramccangpaw nynh alesaepaw na min, athungpaw na kuih te na dyngpaw na kuih konglang kha a thae keiccuze na min liate laansawpi te yn thua zah,⁴²tuh-e ramccangpaw nynh e inn kalan hawite saw a sang ze,⁴³na umnaw vaawram te thaepah lah, ramccangpaw nynh ae ngiapaw balyn thyhte cyipya tua; tuhteze nynh laephi ccungccaw balyn nynh na ccungccaw Israel hae hawte na min kha a nyh cih hae zah nang kha ae rih cih hae; te ka sakpaw e inn kyahin na min kha ko athua cipaw a nyh cih hae.

⁴⁴“Na ccungccaw hae nynh mih rhaw hae kha tuk khylan a ccia vae hae ze, pawpaw laanpi na zuisah hae zemah, na popaw khua kalan te na min hanlan ka sakpaw inn kalan hawite Bawipaw kalan saw a sang hae ze,⁴⁵mih sawsangnaw te mih ngiakunaw kha vaawram te thaepah hae lah, mih ryalaw kya pankhae hae.

⁴⁶“A sei leipaw lu kheit san a um khyh keiccuze—minmin nynh na tungvaw sei hae zah minmin elang na thinria keiccuze rhaw hae kuih kalan na pya hae zah minmin kha asawnaw khyhze anaenaw umpaw mih rhaw hae ram lang kyngte cciakhae athua hae ze thuasah,⁴⁷a cciakhaenaw hae ram kyakhe minmin nynh mih thinlung kya oun nyhthui hae zah ngaesikute a kyngtu hae ram kyakhe nang kha, ‘Kae sei vae, kae cyisei vae, ahoy leipaw rya kae lawsei vae,’ cite ae ngiaku hae ze thuasah,⁴⁸kyngte a cciakhaetu hae mih rhaw hae ram kyakhe mih thinlung te mih tuanaw balyn te ngaesikuh hae zah, mih minpaaw hae na pya hae paw mih ram, na popaw khua te na min hanlan ka sakpaw inn kalan hawite namaw kalan saw oun sang hae ze thuasah,⁴⁹na umnaw vaawram kyate mih sawsangnaw te mih ngiakunaw kha thaepah hae, mih ryalaw kya pankhae hae lah,⁵⁰na tungvaw a sei hae paw na ccungccaw hae kha ngaethya hae lah, na tungvaw a cyiseinaw hae balyn kha ngaethya hae; minmin kha kyngte a cciakhaetu hae nynh mih tungvaw ngaethya a umsah nawlan hae, a cciakhaetu hae kya ngaethyaumsahnaw thinlung kha hoisah hae,⁵¹(pawccecize minmin tuh sivaw somaee laku, Izip ram kyate na poukhae hae paw na ccungccaw hae te na rho nynh thua hae).⁵²Na ryalahtupaw nynh kae ngianaw te na ccungccaw Israel hae nynh ae ngianaw hae kalan hin na mit kha beih dotua, minmin nynh ae ko takyh hae te beih ngaepah hae.⁵³Pawccecize pou Bawipaw PACHIA, kae minpaaw hae kha Izip ram kyate na poukhae lya hae ze, na ryalahtu Moses kyate bya na kinpyaku hae thyhte, Israel hae kha namaw rho lang tang khylan, laephi ccungccaw hae balyn laku kyate minmin kha na phia vae hae,” a ci. Solomon nynh Zapi hae Hythuapya hae

⁵⁴Solomon nynh Bawipaw kalan hynh-e sawsangnaw te ngianaw balyn kha he a thangsah tuh, a ccukharutungte vaawlang khe a kuih a dawnaw Bawipaw silawhang malang te a thokuh;⁵⁵te thadyn zah Israel zapi hae balyn kha roi myarya ccae lante hythua a pya hae:

⁵⁶“Bya a kinkupaw balyn thyhte a ccungccaw Israel hae kha daenaw a pyatu Bawipaw tuh thehoysah oh; a ryalahtu Moses kyate a hopaw a byakin hoypaw balyn kha ccangkheit san roh khyh.⁵⁷Bawipaw ah Pachia tuh ah minpaaw hae kya a um hawte, aening kya mah um vae sah; aning nynh aening hynh oun cciataw nan sah lah, oun vua nan sah,⁵⁸a laanpi hae balyn kha ah zui nawlan oh thuasah, aning nynh ah minpaaw hae kaw a la pya hae paw a kawbya hae, a phungbya hae te a phungzae hae kha ah zui nawlan oh thuasah ah thinlung kha amaw kalan oun mae vae sah.⁵⁹Bawipaw malang ka ngianawpaw ka bya hae hynh Bawipaw ah Pachia pe khe khuazi khuadae um vae sah; a ryalahtupaw kae ka ryalaw te a ccungccaw Israel hae ryalaw hynh nin takyh aho thyhte oun pankhae vae sah;⁶⁰tuhteze nynh laephi ccungccaw balyn nynh Bawipaw tuh Pachia thua zah ccangpaw Pachia um khyh cipaw a nyh cih hae.⁶¹Tukeiccuze a kawbya hae te a phungbya hae kha zuite, atunin na cyi oh hawte, Bawipaw ah Pachia kalan nae thinlung kha khaleih pyakuh oh,” a ci. Solomon nynh Silawnaw A Rae (2Sh 7.4-10)

⁶²Te siapharan te a kya umpaw Israel hae balyn nynh Bawipaw malang khe silawnaw a rae hae.⁶³Solomon nynh tangnuapaw thong kuin lae ning te tuu cciing kheit thong kuin khate Bawipaw kalan ccawkunaw silawnaw kha a rae. Tuhcite siapharan te Israel ccungccaw hae balyn nynh Bawipaw inn kha a ap hae.⁶⁴Tuin nin khe siapharan nynh Bawipaw inn malang a umpaw voidu angaelung kha a thyaasah; pawccecize tuin kyakhe maee-ute silawnaw, ccathae silawnaw te ccawkunaw silawnawpaw kya-e satho kha a pya, pawccecize Bawipaw malang umpaw sohin silawhang tuh maee-ute silawnaw, ccathae silawnaw te ccawkunaw silawnawpaw kya-e satho kha pya nawlan myaryamaw adi keiccu nynh thua.

⁶⁵Tuhcite Solomon te a kya umpaw Israel hae balyn, Lebo-hamath khua kyate Izip Vaw kyacia um hae paw myarya lungpaw zapi hae nynh Bawipaw ah Pachia malang khe nin sari lungkhu poi a tua hae.⁶⁶Nin taryanaw nin khe ccungccaw hae kha a cciasah hae; minmin nynh siapharan kha hythuapya hae zah, Bawipaw nynh a ryalahtu David te a ccungccaw Israel hae tungvaw a langsahkupaw hoynaw balyn keiccuze lungtua lungpawte mih inn raveih lang a ki hae. Solomon kya Pachia Bua A Langkuh (2Sh 7.11-22)

¹Solomon nynh Bawipaw inn, siapharan inn te Solomon nynh sak a rypaw balyn kha he a sak koute,²Gibeon khua kya a langpyaku hawte, Bawipaw tuh Solomon kalan vae ningnaw a langkuh.³Bawipaw nynh amaw kha, “Ka malang saw na sangpaw te nae ngiapaw kha ka thae vae; na sakpaw hynh-e inn hynh ka thyaasah vae zah, a lungkhu kya ka min kha zungzae ka nung vae; ka mit te ka thinlung tuh tuin kya tyty a um cih.⁴Na paaw David nynh a la ccia hawte, nang nynh accingpaw thinlung te dingnaw te ka malang na cceih zah, kaw kae pyapaw balyn thyhte na cyi zah ka phungbya hae te ka phungzae hae kha na zui zetuh,⁵‘Israel bawitungkhung kya a haung cih paw na ciihan tuh dae lan khyh,’ cite na paaw David kha bya ka kinpyaku hawte, Israel hae kya na siapharan bawitungkhung tuh zungzae ka tynsah cih.

⁶“Namaw thuasah, na ccaaw hae thuasah kae kha zui leite na cceihsei oh zah, nae malang ka nungpaw ka kawbya hae te ka phungbya hae kha zui leite, ccangpaw pachia hae kalan cciate ryalawpyate na beik oh zetuh,⁷ka pya hae paw ram kyate Israel hae kha ka vua cih hae; ka min hanlan ka thyaasahpaw inn hynh ka muihnaw kyate ka vua cih; Israel tuh ccungccaw hae balyn kya phungtangbya te saryapaw lang a tang cih.⁸E inn hynh arohpaw apumkuhpaw lang a tang cih; a pe po a cceih hae paw miakaw nynh mih ngaeangthuate saryanaw roi a sawnua cih hae zah, ‘E ram te e inn hynh Bawipaw nynh pawccemou hynhte a cyi?’ cite a ho cih hae.⁹Te minmin nynh, ‘Mih minpaaw hae kha Izip ram kyate a poukhae hae paw Bawipaw mih Pachia kha vua hae zah, ccangpaw pachia hae kha doliakute beik hae zah rya a lawpya hae keiccu nynh thua; tukeiccuze Bawipaw nynh e ronaw hynh mih tungvaw a thuasah,’ cite a ho cih hae,” a cipya.

¹⁰Solomon nynh inn innning, Bawipaw inn te siapharan inn kha sak zah kum kuin he aro te,¹¹Tair Siapharan Hiram nynh Solomon kha sidar thing, maeccaw thing te sui kha a ry zeihte a la pya keiccuze Solomon Siapharan nynh Hiram kha Galilee ram e khua khuakuin a pya.¹²Thuasalama Solomon nynh a pyapaw ram kha do khylan Hiram nynh Tair kyate cceih zah he a do tuh, a lungryccing khyh.¹³Tukeiccuze aning nynh, “Ka unopaw, nae pyapaw hynh-e khua hae hynh pawcihawpaw khua hae mou athua hae?” a cipya. Tukeiccuze tuh-e hae tuh atunin cia Kabul ram a ci hae.¹⁴Hiram nynh siapharan kha sui talent za kheit ccangkuin a pya. Ccangpaw Solomon Ryalaw hae (2Sh 8.3-18)

¹⁵Solomon Siapharan nynh Bawipaw inn te amaw inn kha sak khylan te Millo khua, Jerusalem khualungrua, Hazor khua, Megiddo khua te Gezer khua kha rae khylan nangsete rya a lawsah hae.¹⁶(Izip siapharan Faro nynh Gezer khua kha tuk zah a lah koute maee te a soi, khua kya um hae paw Kanaan hae kha a chia hae, te Solomon zu lang a tangpaw a ccanung kha tuh-e khua tuh a thosakhaeku;¹⁷tukeiccuze Solomon nynh Gezer khua kha a raethui), Alia Beth-horon,¹⁸Baalath khua, Judah ram lungkhu ramkaw umpaw Tamar khua,¹⁹Solomon nynh a hoipaw uccaw a ccakhungnawpaw khua hae, a marangle hae elang khua hae, a marang rhawkaw hae elang khua hae te Jerusalem kya, Lebanon kya te a ukpaw ram hae balyn kyakhe Solomon nynh a rae rypaw khua miakaw kha a rae.²⁰Amor hae, Hit hae, Periz hae, Hiv hae te Jebus hae lungkhu e a laehypaw ccungccaw hae, Israel hae athua lei hae paw—²¹Israel hae nynh khaleih a ro kho lei hae paw, ram lungkhu kya a laehy hae paw mih ciihan hae kha Solomon nynh nangsete see lang a mang hae, tukeiccuze atunin cia a um hae.²²Solomon nynh Israel hae kha tuh see lang mang khyh hae; minmin tuh rhawkaw hae, a kuihkaw e bawi hae, a rhawbawi hae, a rhawkaw uktu hae, a marangle bawi hae te marang rhawkaw hae lang a mang hae.

²³Solomon rya a lahtu hae kha a dopahtu lupi hae, za pangaw sung pangaw a um hae.

²⁴Faro ccanung tuh David khua kyate Solomon nynh a sakpyapaw amaw inn langkhe a cceih; tukoute Solomon nynh Millo khua kha a rae.

²⁵Solomon nynh Bawipaw elang a raepaw silawhang kyakhe maee-ute silawnaw te ccawkunaw silawnaw kha kum kheit ze vae thum leih rae zah Bawipaw malang mynkhuhpaw kha leih a u. Tuhcite inn tuh a lyn.

²⁶Solomon Siapharan nynh Edom ram kya, Rili Se kin e Eloth khua pe umpaw Eziongeber khua kyakhe sanphalung phu kheit kha a rae.²⁷Hiram nynh a ryalahtu hae, rili kong a nyhthya hae paw sanphalung kya ryalahtu hae kha Solomon a ryalahtu hae ryte a sawkheih hae.²⁸Ofir lang cceih hae zah tuin kya-e sui talent za pali ccangkuin kha Solomon Siapharan kalan oun phu hae. Sheba Siapharannung nynh Paebuanaw (2Sh 9.1-12)

¹Sheba siapharannung nynh Solomon a minthaannaw kha he a thae tuh, (Bawipaw min keiccuze a minthaan), myarya rupaw byakhianaw khate syntawtua lan yn cceih.²A mikung hae patae ryte amynkhuhpaw hae, sui patae te aphutepaw lung hae a phupaw kalauh hae ryte Jerusalem lang yn cceih; Solomon kya he a thua te, a thinlung kya umpaw miakaw kha a hopya.³Bya a khiapaw miakaw kha Solomon nynh a khungru; siapharan nynh a ny leipaw, a ccaesahpya kho leipaw pawpaw mah um khyh.⁴Sheba siapharannung nynh Solomon a hawnaw, a sakpaw inn,⁵a ccaboi vawlan e looh, a kuihkaw e bawi hae mih umtuzia, a ryalahtu hae ryalaw dopyanaw, mih boeining, a ryalahtu pise hae te Bawipaw inn kya maee-ute si a lawnaw kha he a muih tuh, a ngaeangthua zah a lung phe mua.

⁶Te aning nynh siapharan kha, “Ka ram kyate ka thaepaw na ryalaw konglang te na hawnaw kong tuh akyh,⁷thuasalama kamaw po kae thua zah ka mit te ka muih mawlaezung tuh a ho hae paw kha ka la zyn khyh. Angankuh sanmah yn la hopah khyh hae; na hawnaw te na hoirumnaw tuh ka la thaepaw kha po a lawe.⁸Na zu hae tuh lungtua hae paw nynh thua hae! Nang kha palei ae oihsah hae zah na hawnaw palei a thae hae paw na ryalahtu hae tuh lungtua hae paw nynh thua hae!⁹Na tungvaw a lungrythua zah Israel bawitungkhung kya ae nungpaw Bawipaw na Pachia tuh thehoyte um sah! Bawipaw nynh Israel kha zungzae a sungsah keiccuze nang nynh byading te dingnaw kha na rae nawlan siapharan lang ae khang vae,” a cipya.¹⁰Te Sheba siapharannung nynh Solomon kha sui talent za kheit ccangkuin, amynkhuhpaw patae te aphutepaw lung hae kha a pya; Sheba siapharannung nynh Solomon Siapharan a pyapaw zeih alung lante amynkhuhpaw kha bua yn thua boi vae khyh.

¹¹Tuhpiaze, Ofir khua kyate sui oun phupaw Hiram sanphalung hae phu nynh Ofir khua kyate almuk thing patae te aphutepaw lung hae kha oun phu hae.¹²Siapharan nynh tuh-e almuk thing khate Bawipaw inn dounawpaw tung hae, siapharan inn dounawpaw tung hae te hlawsahthya hae paw elang tang-oi te tintang hae kha mah a rae hae; tuhcihawpaw almuk thing tuh thua boi vae khyh zah, atunin cia muih boi um vae khyh.

¹³Solomon Siapharan nynh lungthote a pyapaw lasung holeite, Sheba siapharannung nynh ry zah a ngiakupaw miakaw kha mah a pya. Tukoute siapharannung tuh a ryalahtu hae ryte amaw ram lang a ki vae.

¹⁴Solomon kalan kum kheit ze a teepaw sui nynh aripaw tuh talent za taruh sung taruh ccangtaruh acih.¹⁵E hae hynh kungku hae, uccaw zuatu hae, Arabia siapharan hae balyn te ram uktu bawi hae kyate a teepaw laelan nynh thua.¹⁶Solomon nynh sui khawriaphua alepaw za ning kha rae zah, tuh-e khawriaphua ccangkheit cci elang deihpaw sui shekel za taruh cci athang.¹⁷Aning nynh deihpaw sui te khawriaphua za thum kha rae zah, tuh-e ccangkheit cci elang sui mina ccangthum cci athang; tuh-e hae tuh siapharan nynh Lebanon Tuhpi Inn kya a nung hae.¹⁸Siapharan nynh saepanua te bawitungkhung lepaw kha mah rae zah, sui ccite a thei.¹⁹Bawitungkhung tuh kaenawpaw thyh taruh a um. Bawitungkhung adung anulang tuh apyng, haungnaw voilang ranglang te kuih khangnawpaw um zah, tuh-e kuih khangnawpaw pe tuin chindeih sa ning a thadyn hae,²⁰te kaenawpaw thyh taruh vawlan akin lang voilang ranglang khe chindeih sa kheit ccite sa haw lae ning a thadyn hae. Tuhcihawpaw bawitungkhung tuh teitei ram kya mah rae boi khyh hae.²¹Solomon Siapharan nynh a nianawpaw banang balyn tuh sui thua zah, Lebanon Tuhpi Inn kya-e angphe hae balyn tuh sui ccite raepaw nynh thua hae; ccangkheit sanmah ngun um khyh, Solomon she lya tuh ngun hynh pawlangria khyh hae.²²Siapharan nynh Hiram kya-e sanphalung phu ryte rili kya a cceih bungthung hae paw Tarshish sanphalung phu phukheit a hoi. Tarshish sanphalung phu tuh kum thum ze vae kheit leih oun thua hae zah, sui, ngun, saepanua, zuapaw hae te buatua hae kha leih oun phu hae.

²³Tuhcite Solomon Siapharan nynh laephi vaw e siapharan hae balyn kha hoirumnaw te hawnaw kya pong a lawe hae.²⁴Pachia nynh Solomon thinlung kya a pyapaw hawnaw kha thae khylan, laephi pynpi nynh amaw kalan oun ccia hae.²⁵Tuh-e hae miakaw nynh sui te ngun uccaw hae, boeining hae, zunghe hae, amynkhuhpaw hae, marang hae te lann hae kha kum takyh lasung lang a ccyngpya hae.

²⁶Solomon nynh marangle hae te marang rhawkaw hae kha a pum hae; aning nynh marangle thong kheit za pali te marang rhawkaw thong haw lae ning kha hoi zah, tuh-e hae tuh marangle khua hae kya te Jerusalem khua siapharan kyakhe a nung hae.²⁷Siapharan nynh Jerusalem khua khe ngun kha lung zeih lungsah zah, sidar thing kha Shefelah kya umpaw thaeku ku zeih a lungsah.²⁸Solomon nynh a repaw marang hae tuh Izip te Kue kya-e nynh thua; siapharan a kungkutu hae nynh amee pyate Kue kya-e kha leih a re hae.²⁹Izip ram kya-e marangle ccangkheit kha ngun shekel za taruh te, marang sa kheit kha za kheit sung pangaw te re kho athua; tuhcite Hit siapharan hae te Siria siapharan hae balyn kalan khe siapharan a kungkutu hae kyate a zua pathy hae. Solomon A Cyiseinaw

¹Solomon Siapharan nynh ramccang nopi patae kha a ry: Faro ccanung, Moab hae, Ammon hae, Edom hae, Sidon hae te Hit hae kya-e nopi hae kha a ry hae;²Bawipaw nynh Israel hae kha, “Nanning nynh ramccang hae kha zuvaw lang na umkhae lan khyh oh, minmin nynh mah zuvaw lang ae umkhae nan oh sah; pawccecize minmin nynh nae thinlung kha mih pachia hae kalan solei ae maekhaekuh cih oh,” cite a la hopya hae paw minphuin hae kya-e nopi hae kha Solomon nynh ry hae zah a sungsah hae.³Bawi ccanung athua hae paw zu za sari te lovae za thum kha a hoi; a zu hae nynh a thinlung kha ccanglang a maesaku hae.⁴Solomon he a taw tuh, a zu hae nynh a thinlung kha ccangpaw pachia hae kalan a maesaku hae; a paaw David thinlung hawte thua leite, Bawipaw a Pachia tungvaw kya a lungtyn khyh.⁵Pawccecize Solomon nynh Sidon hae khozinung Astartes te Ammon hae pachia anungsikuhpaw Milkom kha a zui hae.⁶Tuhcite Solomon nynh Bawipaw muihnaw kya ahoy leipaw kha rae zah, a paaw David nynh a cyi hawte cyi leite, Bawipaw kha a thinlung balynte zui khyh.⁷Solomon nynh Jerusalem nithua lang e mua vawlan khe Moab hae khozi anungsikuhpaw Khemosh hanlan te Ammon hae pachia anungsikuhpaw Molek hanlan ahangpaw hmin kha a rae.⁸Tuhmaminte ramccang ccungccaw a zu hae balyn hanlan raepah hae zah, minmin nynh mih pachia hae kalan mynkhuhpaw u hae zah si a law hae.

⁹Bawipaw tuh Solomon tungvaw a thinria, pawccecize amaw kalan vae ning yn langkuh zah,¹⁰ccangpaw pachia hae kha na zui lan khyh cite kaw a pyatupaw Bawipaw , Israel Pachia kyate a thinlung tuh ccanglang maekuh zah Bawipaw nynh kaw a pyapaw kha zui khyh.¹¹Tukeiccuze Bawipaw nynh Solomon kha, “E hynh na thinlung kya um zah, kaw kae pyapaw ka byakinnaw te ka phungbya hae kha na zui khyh keiccuze na kyate peenaw hynh ka lah ccaccing cih zah na ryalahtupaw kalan ka pya cih.¹²Thuasalama na paaw David keiccuze tuh-e tuh na she lungkhu kya ka cyih lan khyh, na ccapaw kuih kyate ram hynh ka lah cih.¹³Tuhzemah ram hynh abalynte ka lah lan khyh, ka ryalahtu David te ka popaw Jerusalem khua keiccuze minphuin phuin kheit kha na ccapaw kalan ka pya cih,” a cipya. Solomon Rhaw hae

¹⁴Bawipaw nynh Solomon a rawsepaw Edom ccungccaw Hadad kha a tuhou; aning tuh Edom ram kya bawi phin nynh thua.¹⁵Pawccecize David nynh Edom ram a um lyaze a rhawbawipaw Joab nynh a chih hae paw rhua uu khylan he a cceih tuh, Edom ram e pise miakaw kha a chia hae,¹⁶(pawccecize Joab te Israel hae balyn tuh Edom ram e pise miakaw a chia mawlaezung hae tuin kya sah taruh a um hae);¹⁷thuasalama Hadad tuh a di lyaze a paaw ryalahtu Edom hae abang ryte Izip ram lang a la ccue hae.¹⁸Midian ram kyate pou hae zah Paran ram a thua hae; Paran kyate ccungccaw abang hoeikute Izip siapharan Faro kya a thua hae; aning nynh inn te looh kha pya zah laephi kha mah a pya.¹⁹Hadad nynh Faro kha myarya a lung a tung; tukeiccuze a zu Tahpenes a neitawnung kha zu lang a pya.²⁰Tahpenes neitawnung nynh ccapaw Genubath kha saah zah, imua tuh Faro inn kyakhe Tahpenes nynh mateitui a phia; Genubath tuh Faro ccaaw hae ryte Faro inn kya a umkheih hae.²¹David tuh a minpaaw hae kya ihbua vae zah rhawbawipaw Joab tuh a chih vae cipaw kha Hadad nynh he a thae tuh, Hadad nynh Faro kha, “Kamaw ram lang kinaw kaw beih yn pya,” a cipya.²²Thuasalama Faro nynh, “Namaw ram lang ki ry lan ciate ka kya ahoboupaw pawmou a um?” cite khia zah, Hadad nynh, “Um khyh, kinaw kaw beih yn pya,” a cipya.

²³Pachia nynh Solomon a rawsetu lang mingccangpaw, Eliada ccapaw Rezon kha a tuhou, aning tuh a bawipaw Zobah siapharan Hadadezer kyate a ccuepaw nynh thua.²⁴David nynh Zobah khuapaw kha a theih koute, aning nynh zuitu hae kha amaw kalan pum hae zah, luadetu phu kya lu lang a tang; minmin tuh Damaskas khua lang cceih hae zah tuin kya a um hae, te amaw kha Damaskas khua kya siapharan lang a khang hae.²⁵Solomon she balyn kya Rezon tuh Israel rhaw lang tang zah, Hadad nynh a cyi hawte vawsawnaw kha a rae; Siria ram kha uk zah Israel kha a hua. Jeroboam nynh Rawsenaw

²⁶Solomon ryalahtu lu kheit, Efraim phin, Zeredah khuapaw, Nebah ccapaw Jeroboam nynh mah siapharan kha a dou, a nung tuh Zeruah cikuhpaw nomaenung nynh thua.²⁷Aning nynh siapharan a rawsenaw kong tuh akawlan thyhte nynh thua. Solomon nynh Millo khua kha rae zah, a paaw David khua kya-e khualungrua a uanaw kha a ping.²⁸Jeroboam tuh rya a lah khopaw nynh thua, ryalaw a zuakuhpaw ccangvae nynh thua cipaw kha Solomon nynh he a muih tuh, Josef ciihan hae nynh a law hae paw nangsepaw ryalaw balyn kyakhe a do-oihtu lang a nung.²⁹Tuh lya loukaw khe, Jeroboam tuh Jerusalem lang a ccia lyakhe Shilon khuapaw profeh Ahijah nynh laanpi kya a muih. Ahijah tuh boeining thawpaw a lawkuh. Mih lu ning kyalya te ramkaw a um lya hae khe,³⁰Ahijah nynh a lawkupaw boeining thawpaw kha kyng zah ccanghaw lae ning lang a seii.³¹Aning nynh Jeroboam kha: E aseiikuhpaw ccanghaw hynh lawkuh; pawccecize Bawipaw , Israel Pachia nynh, “Dotua, peenaw hynh Solomon kuih kyate ka seii cih zah, minphuin phuin haw kha nang kae pya cih.³²Ka ryalahtu David te Israel phin hae balyn kyate ka popaw Jerusalem khua keiccuze phin phinkheit hynh tuh Solomon nynh a ccou cih.³³Aning nynh kae kha yn vua zah Sidon hae khozinung Astartes, Moab hae pachia Khemosh te Ammon hae pachia Milkom kha beik zah ka laanpi kha zui khyh, a paaw David nynh ka muihnaw kya ahmepaw a cyi hawte aning nynh cyi khyh zah, ka phungbya hae te ka phungzae hae kha a paaw nynh a zui hawte zui khyh.³⁴Tuhzemah a kuih kyate peenaw kha abalynte ka lah lan khyh; ka po zah ka kawbya hae te ka phungbya hae a zuipaw ka ryalahtu David keiccuze Solomon tuh a she lungkhu balyn uktu lang ka nung cih;³⁵thuasalama a ccapaw kuih kyate peenaw kha ka lah cih zah nang kha kae pya cih—minphuin phuin haw kha kae pya cih.³⁶Thuasalama ka min nung nawlan ka popaw Jerusalem khua kya ka malang khe ka ryalahtu David nynh maeekhua zungzae a hoi nawlan, a ccapaw kha minphuin phuin kheit ka pya cih.³⁷Nang kha kae po cih zah na rypaw balyn kha na uk cih; nang tuh Israel hae a uktu siapharan lang na tang cih.³⁸Nang nynh kaw kae pyapaw balyn kha na ngae zah, ka ryalahtu David hawte ka laanpi kya zuite, ka phungbya hae te ka kawbya hae kha na zui zah ka muihnaw kya ahmepaw kha na cyi zetuh, na kya ka um cih zah David elang ka sak hawte atynpaw inn kae sakpah cih zah Israel kha kae pya cih.³⁹E keiccuze David ciihan hae kha de ka tah cih hae, thuasalama zungzae tuh thua lan khyh,” a cipya.⁴⁰Tukeiccuze Solomon nynh Jeroboam kha chia lan a zuaku; thuasalama Jeroboam tuh Izip ram lang, Izip siapharan Shishak kalan palou ccue zah Solomon a chi mawlaezung Izip ram kya a um. Solomon Chinaw (2Sh 9.29-31)

⁴¹Solomon nynh a cyipaw tuhlaepaw balyn te a hawnaw tuh Solomon Ryalawnaw Ccauh kyakhe a zei hae.⁴²Solomon nynh Jerusalem khua kya um zah Israel ram balyn kha kum sung pali a uk.⁴³Solomon tuh a minpaaw hae kya ihbua zah a paaw David khua kya a uu hae; a ccapaw Rehoboam tuh amaw koute siapharan lang a tang. Thahlang e Minphuin hae Phiakunaw (2Sh 10.1-19)

¹Israel hae balyn nynh Rehoboam kha siapharan lang khang khylan Shekhem khua lang a ccia hae keiccuze amaw mah Shekhem khua lang a cceih.²Tuh-e tuh Nebat ccapaw Jeroboam nynh he a thae tuh (pawccecize aning tuh Solomon Siapharan kyate a ccuenaw Izip ram kya nynh a um ung), Jeroboam tuh Izip ram kyate yn ki.³Israel hae nynh amaw kha a kosah hae; te Jeroboam te Israel zapi balyn nynh oun cceih hae zah Rehoboam kha,⁴“Na paaw nynh phupaw ripaw kha oun phusah vae. Tukeiccuze na paaw nynh kae tungvaw rya rupaw te phupaw ripaw oun phusahpaw hynh nang nynh oun zawsahpah lah, na rya kae lawpah cih,” a cipya hae.⁵Aning nynh minmin kha, “La cceih oh lah, nin thum koute ka kalan bua nae cceih cih oh,” a cipya hae. Tukeiccuze ccungccaw hae tuh a cceih hae.

⁶Tetuh Rehoboam Siapharan nynh a paaw Solomon a hiin lyaze a do-oih hae paw piccan hae kha tuanaw ngia hae zah, “E ccungccaw hae kalan khungru lanpaw bya hynh pawtemou tuanaw nae pya cih oh?” a cipya hae.⁷Minmin nynh amaw kha, “Atunin hynh-e ccungccaw hae hanlan ryalahtu na thua zah minmin hanlan rya na lah zah bya he na khungru hae te, bya hoypaw te na khung hae zetuh, minmin tuh na ryalahtu lang zungzae a tang cih hae,” a cipya hae.⁸Thuasalama piccan hae nynh tuanaw a pya hae paw kha pawlangria khyh, amaw te ruibankheih thua hae zah amaw a do-oih hae paw ccangvae hae kha tuanaw a ngia hae.⁹Aning nynh minmin kha, “ ‘Na paaw nynh phupaw ripaw oun phusahpaw hynh oun zawsahpya tua,’ cite oun hopah hae paw e ccungccaw hae khungru lanpaw hynh pawtemou tuanaw nae pya cih oh?” a cipya hae.¹⁰Ruibankheih athua hae paw ccangvae hae nynh amaw kha, “ ‘Na paaw nynh phupaw ripaw oun phusahpaw hynh nang nynh oun zawsahpya tua,’ cite ae hopah hae paw e ccungccaw hae hynh hynhte na khung cih hae; minmin kha, ‘Ka kuihdung taraw hynh ka paaw tae laeze athaawhua.¹¹Ka paaw nynh phupaw ripaw ae phusah oh, kae nynh nae phupaw kha houh ka buchih cih. Ka paaw nynh ccungngue te ae thuihei oh, kae nynh tuh zekang te kae thuihei cih oh,’ cite na cipah cih hae,” a cipya hae.

¹²Tukeiccuze siapharan nynh, “Nin thumnaw nin kya ka kalan bua nae cceih cih oh,” cite a ho thyhte, Jeroboam te ccungccaw balyn tuh nin thumnaw nin khe Rehoboam kalan oun thua hae.¹³Siapharan nynh ccungccaw hae kha bya repaw te a khung hae. Piccan hae nynh tuanaw a pya hae paw kha pawlangria leite¹⁴ccangvae hae nynh a pya hae paw tuanaw thyhte minmin kha, “Ka paaw nynh phupaw ripaw ae phusah oh, kae nynh nae phupaw kha houh ka buchih cih; ka paaw nynh ccungngue te ae thuihei oh, kae nynh tuh zekang te kae thuihei cih oh,” a cipya hae.¹⁵Siapharan nynh ccungccaw hae bya kha ngae khyh; pawccecize Bawipaw nynh Shilon khuapaw Ahijah kha mangte Nebat ccapaw Jeroboam kya a hopaw bya kha ccingsah khylan Bawipaw nynh a ry keiccu nynh thua.

¹⁶Siapharan nynh kae bya hynh ngae khyh cipaw kha Israel hae balyn nynh he a muih hae tuh, ccungccaw hae nynh siapharan kha,“Kaening nynh David kyaccoupaw pawmou kae hoi?Jesse ccapaw kya rho kae hoi khyh.Pou Israel, nae bu kalan cceih oh!Pou David, namaw maw nynhna innbyn kha do-oihku tua,”cite a khung hae. Tukeiccuze Israel hae tuh mih bu raveih lang a ki hae.¹⁷Thuasalama Rehoboam nynh Judah khua hae kya umpaw Israel hae kha a uk hae.¹⁸Nangsete ryalawsahnaw kyaze uktu bawi athuapaw Adoram kha Rehoboam Siapharan nynh saw zah, Israel hae balyn nynh lung te phe chih lan a deih hae. Rehoboam Siapharan tuh Jerusalem lang ccue khylan a marangle kya arangte a ccikuh.¹⁹Tuhcite Israel hae nynh David ciihan kha atunin cia a dou hae. Jeroboam nynh Israel A Uk

²⁰Jeroboam yn ki vae cipaw kha Israel hae balyn nynh he a thae hae tuh, ccungccaw sawte zapi pumkunaw kalan kosah hae zah Israel balyn a uktu siapharan lang a khang hae. Judah phin laelan, David ciihan a zuipaw hum sanmah um khyh.

²¹Rehoboam nynh Jerusalem khua he a thua te, Israel hae kha rhawtuk lan zah peenaw kha Solomon ccapaw Rehoboam kalan bua pyathui khylan, Judah phin balyn te Benjamin phin kya-e popaw rhawkaw cciing kheit thong sung tarya kha a pum hae.²²Thuasalama Pachia bya tuh Pachia ccungccapaw Shemaiah kalan yn thua zah:²³Solomon ccapaw, Judah siapharan Rehoboam te Judah phin te Benjamin phin balyn te tuhlaepaw ccungccaw hae kyakhe,²⁴“Bawipaw nynh hynhte a ho: Nae uno Israel hae kha tuk khylan ccianua thung nan oh. Nae balynte nae inn lang ki oh, pawccecize e hynh kamaw kyate yn thuapaw nynh thua, a ci cite hopah hae,” a cipya. Tukeiccuze minmin nynh Bawipaw bya kha ngae hae zah Bawipaw bya thyhte mih inn lang bua a ki hae. Jeroboam kya-e Sui Vaetuataw

²⁵Te Jeroboam nynh Efraim muaram khe Shekhem khua kha rae zah tuin kya a um; te tuin kyate pou zah Penuel khua kha mah a rae.²⁶Te Jeroboam nynh a thinlung kyakhe, “Atu tuh peenaw hynh David ciihan kalan a kithui mamin cih.²⁷E ccungccaw hae nynh Jerusalem khua umpaw Bawipaw inn kyakhe silawnaw rae lan a ccia hae zetuh, e ccungccaw hae thinlung hynh mih bawipaw, Judah siapharan Rehoboam kalan bua a paleihkuh cih; kae hynh yn theih cih hae zah Judah siapharan Rehoboam kalan a ki cih hae,” cite a tua.²⁸Tukeiccuze siapharan nynh tuanaw ngia hae zah sui vaetuataw ccangning kha a rae. Aning nynh ccungccaw hae kha, “Jerusalem lang palei na cciathung oh paw hynh azaw vae. Pou Israel hae, Izip ram kyate ae poukhae oh paw nae pachia hae hynh dotua oh,” a cipya hae.²⁹Ccangkheit kha Bethel khua kya nung zah ccangpaw ccangkheit kha Dan khua kya a nung.³⁰E uccaw hynh seinaw lang a tang, pawccecize ccungccaw hae nynh Bethel kya umpaw sui vaetuataw ccangkheit kalan te Dan kya umpaw ccangpaw ccangkheit kalan cia beik lan a ccianua hae.³¹Jeroboam nynh ahangnaw hmin khe inn hae kha sak zah ccungccaw balyn kya-e Levi phin athua leipaw kha ranpibawi lang a khang hae.³²Jeroboam nynh Judah ram kya tuapaw poi hawte, sawpaw sah taryanaw nin haw lae pangaw nin khe poi tua zah silawhang kyakhe si a law; tuhcite Bethel kya cyih zah, a raepaw sui vaetuataw hae kha si a law. A raepaw hmin hangpaw hae elang a khang hae paw ranpibawi hae kha Bethel kya a nung hae.³³Amaw makhaete a khyakupaw sawpaw sah taryanaw nin haw lae pangaw nin khe Bethel khua umpaw, amaw nynh a raepaw silawhang kalan khe a cceihthung; Israel hae elang poi ccangkheit tua zah mynkhuhpaw u khylan silawhang kalan a cceihthung. Judah Ram e Pachia Ccungccapaw

¹Jeroboam tuh mynkhuhpaw u khylan silawhang pe a thadyn lyakhe, Pachia ccungccapaw lu kheit tuh Bawipaw bya thyhte Judah ram kyate Bethel khua yn thua zah,²Bawipaw bya thyhte silawhang kha sianua zah, “Pou silawhang, silawhang, Bawipaw nynh hynhte a ho: ‘David ciihan kyate a min Josiah cikuhpaw ccapaw lu kheit yn pui cih; nang na vawlan mynkhuhpaw u hae zah hmin hangpaw kya ranpibawi rya a lah hae paw kha tuh-e ccungccapaw nynh nang na vawlan khe si a lawnah cih hae zah, ccungccaw ru hae tuh na vawlan khe u athua cih hae,’ a ci,” cite a hopya.³Tuin nin khe muihsahnaw ccangkheit pya zah, “E hynh Bawipaw nynh a hopaw muihsahnaw nynh thua; ‘Silawhang tuh a koi cih zah a vawlan umpaw buhhaw tuh alaekuh cih,’ a ci,” cite a ho.⁴Pachia ccungccapaw nynh Bethel khua kya silawhang a sianuapaw bya kha Jeroboam siapharan nynh he a thae tuh, silawhang kyate a kuih kha dyng zah, “Khah-e paw kha kyng oh!” a ci. Te a dyngpaw a kuih tuh karae rou zah khin kho vae khyh.⁵Bawipaw bya nynh Pachia ccungccapaw a pyapaw muihsahnaw thyhte, silawhang tuh mah koi zah silawhang kyate buhhaw tuh alaekuh.⁶Siapharan nynh Pachia ccungccapaw kha, “Ka kuih hynh a danthya nawlan, Bawipaw na Pachia thawccinaw kha yn ngiapah lah, saw yn sangpya tua,” a cipya. Tukeiccuze Pachia ccungccapaw nynh Bawipaw kha a ngiapya; te siapharan kuih tuh bua danthya zah atakaw lya hawte a dan vae.⁷Te Siapharan nynh Pachia ccungccapaw kha, “Kamaw ryte ka inn lang cceihbua lah, looh aebua hin, lasung kae pya cih,” a cipya.⁸Pachia ccungccapaw nynh siapharan kha, “Na peenaw angankuh kha nae pya zemah, na kalan ka cceihbua lan khyh; e hmin kya looh ka ae lan khyh, tui mah ka neih lan khyh.⁹Pawccecize Bawipaw bya nynh kaw yn pya zah: Looh na ae lan khyh, tui mah na neih lan khyh, na ccianaw laanpi te na ki lan khyh, yn cipya,” cite a hopya.¹⁰Tukeiccuze ccangpaw laanpi te cceih zah, Bethel lang yn ccianaw laanpi te ki vae khyh.

¹¹Tuh lyatuin Bethel khua kya ataw vae paw profeh lu kheit a um. A ccapaw hae oun thua hae zah, Pachia ccungccapaw nynh tuin nin Bethel khua kya a cyipaw balyn kha a hopya hae; siapharan a hopyapaw bya kha mah mih paaw kya a hopya hae.¹²Mih paaw nynh minmin kha, “Paw laanpi kyate mou a ccia?” cite a khia hae. Judah ram kyate yn thuapaw Pachia ccungccapaw nynh a ccianaw laanpi kha a ccapaw hae nynh a hopya hae.¹³Te a ccapaw hae kyakhe, “Lann kha khungnin yn depah oh,” a cipya hae. Tukeiccuze minmin nynh lann kha khungnin depah hae zah a ccikuh.¹⁴Pachia ccungccapaw kha deehui zah phaesi ku kaw a haungpaw kha a muih; te aning nynh, “Nang hynh Judah ram kyate yn thuapaw Pachia ccungccapaw na thua tou?” cite khia zah, tuh-e paw nynh, “Ka thua,” cite a khung.¹⁵Te aning nynh, “Ka inn lang kamaw kya cceihbua lah, looh ae hin,” a cipya.¹⁶Thuasalama tuh-e paw nynh, “Na kya ka kibua lan khyh, na inn lang mah ka teebua lan khyh; e hmin kyahin nang na kya looh ka ae lan khyh, tui mah ka neih lan khyh;¹⁷pawccecize Bawipaw bya nynh yn hopah zah: Tuin hmin kya looh na ae lan khyh, tui mah na neih lan khyh, na ccianaw laanpi te na ki lan khyh, yn cipya,” cite a hopya.¹⁸Te aning nynh tuh-e paw tuh, “Kae mah nang hawte profeh nynh ka thua; vaawpaw nynh Bawipaw bya thyhte yn hopah zah: Aning nynh looh ae zah tui mah a nia ccaw, na inn lang kikhae, yn cipya,” cite a hopya. Thuasalama aning nynh tuh-e paw kha a lingpaw nynh thua.¹⁹Tukeiccuze Pachia ccungccapaw tuh tuh-e profehpaw ryte kikheih hae zah, a inn kya looh ae zah tui mah a neih.

²⁰Aenaw ccaboi kya a haung lya hae khe, a kikhaetupaw profehpaw kalan khe Bawipaw bya tuh yn thua zah,²¹Judah ram kyate yn thuapaw Pachia ccungccapaw kyakhe, “Bawipaw nynh hynhte a ho: Bawipaw bya kha na ngae khyh zah, Bawipaw na Pachia nynh kaw ae pyapaw kawbya kha zui leite,²²na ki zah, ‘Looh ae nan, tui neih nan,’ cite ae hopyanaw hmin kyakhe looh na ae zah tui na nia keiccuze na pyn tuh na minpaaw hae shawku kya thua lan khyh, a ci,” cite a sia.²³Pachia ccungccapaw tuh looh ae zah tui a neih koute, a kikhaetupaw profehpaw kya-e lann kha khungnin a depya hae.²⁴Te a ccia lyakhe laanpi kya chindeih te tungkuh hae zah chindeih nynh phe a tei. A rhua tuh laanpi kya huekuh zah, lann tuh a pe a thadyn; chindeih tuh mah a rhua pe a thadyn.²⁵A rhua tuh laanpi kya huekuh zah chindeih tuh a rhua pe a thadynpaw kha khuaccong hae paw nynh a muih hae. Te cceih hae zah atawpaw profeh a umnaw khua kyakhe tuh-e tuh a ho hae.

²⁶Laanpi te yn kikhaetupaw profehpaw nynh tuh-e bya he a thae tuh, “Bawipaw bya a zui leipaw Pachia ccungccapaw nynh thua; tukeiccuze Bawipaw nynh a hopyapaw bya thyhte, Bawipaw nynh amaw kha chindeih kalan pya zah chindeih nynh tei zah a chia,” a ci.²⁷Te aning nynh a ccapaw hae kyakhe, “Lann kha khungnin yn depah oh,” a cipya hae. Tukeiccuze minmin nynh khungnin a depya hae,²⁸te cceih zah laanpi kya a rhua huekuh zah, a pe kya lann te chindeih a thadyn hae paw kha a muih. Chindeih nynh a rhua kha ae khyh, lann kha mah tei khyh.²⁹Profehpaw nynh Pachia ccungccapaw rhua kha lah zah lann tungvaw khang zah, rawhui khylan te uu khylan khualae lang a kikhae.³⁰A rhua kha amaw shawku kya a uu; te rawhui zah, “Ezou, ka neitawpaw!” a ci.³¹A rhua kha a uh koute a ccapaw hae kyakhe, “He ka chih te, Pachia ccungccapaw a uukunaw shaw kya nae la uh cih oh; ka ru hae kha a ru hae pe khe na la nung cih oh.³²Pawccecize Bethel khua e silawhang te Samaria khua hae kya umpaw hmin hangpaw hae kya-e inn hae balyn kha rawse zah Pachia bya thyhte a sianuapaw bya tuh solei a la ccing cih,” cite a hopya hae.

³³E acyihkuhpaw koute mah Jeroboam tuh a cciaseinaw laanpi kyate maeku leite, hmin hangpaw elang ranpibawi hae kha ccungccaw hae balyn laku e kha a khang hae; hmin hangpaw elang ranpibawi lang a tang rypaw miakaw kha a thyaasah hae.³⁴E hynh Jeroboam ciihan a zosahpaw te laephi vawlan kyate a rosahpaw seinaw lang a tang. Jeroboam Ciihan Detahnaw

¹Tuh ccyh lyakhe Jeroboam ccapaw Abijah tuh a ccih.²Jeroboam nynh a zu kha, “Thokuh lah, Jeroboam zu na thuapaw kha ae ny khyh ccaw hae, na muinsan rulaekuh lah, Shiloh khua lang la cceih; pawccecize hynh-e ccungccaw hae kya siapharan lang na tang cih cite yn hopahpaw profeh Ahijah tuh tuin khua kya a um.³Sanlou apyngpaw ccanghaw, sanlou aphepaw beihtaraw te khoitui ling kheit la ccyngpah lah a kalan la cceih; imua tungvaw acyihkuh lanpaw kha ae hopah cih,” a cipya.

⁴Jeroboam zu nynh tuhcite a cyi; thokuh zah Shiloh khua lang cceih zah Ahijah inn kya a thua. Ahijah tuh a taw vae keiccuze a mitmoh vae zah ngawmuih kho vae khyh.⁵Thuasalama Bawipaw nynh Ahijah kha, “Jeroboam zu tuh a ccapaw a cci keiccuze a ccapaw konglang byakhia khylan na kalan yn cceih cciamang. Aning kha tuhte khahte na hopah cih,” a cipya.
Aning he yn thua tuh, ccangpaw nopi lante a muinsan a rulaeku.⁶Thuasalama thuakaw kya yn tee zah a laanccia siho kha Ahijah nynh he a thae tuh, “Jeroboam zu, yn tee; pawccemou mingccangpaw hawte na umsaku? Pawccecize nang na elang thethyapaw hopya lan kae hynh naw ka thua.⁷La cceih lah, Jeroboam kha, ‘Bawipaw , Israel Pachia nynh hynhte a ho: Ccungccaw hae laku kyate nang kha kae hangthung zah, ka ccungccaw Israel hae cciakhaetu lang kae rae,⁸David ciihan kyate peenaw kha ka lah zah nang kha kae pya; tuhzemah ka kawbya kha zui zah a thinlung balynte kae kha yn zui zah ka muihnaw kya akyhpaw kyalya a cyihtupaw ka ryalahtu David hawte na thua khyh,⁹nang tuh nang na maw e ccungccaw hae balyn laeze hoyleinaw kha na raehua vae, ka thinriasah khylan ccangpaw pachia hae kha raekute azuh hae kha na raekuh zah kae kha na nulang nae vua;¹⁰tukeiccuze Jeroboam ciihan kya hoyleinaw kha ka thuasah cih. Jeroboam kya-e pise miakaw, Israel ram kyaze a luepaw thuasah, a lue leipaw thuasah ka vua cih hae zah, ccungccaw nynh ia kha marya a phi hawte Jeroboam ciihan kha ka maemih cih.¹¹Jeroboam te asekuhpaw ccungccaw miakaw khualae lungkhu a chihpaw kha ui nynh a ae cih; ramkaw kya a chihpaw miakaw kha azouthyapaw pavaw nynh a ae cih; pawccecize Bawipaw nynh phe a ho vae,’ cite la hopah.¹²Tukeiccuze thokuh lah, na inn lang la cceih. Na ccu nynh khua lungkhu he a sy te, imua tuh a chih cih.¹³Israel hae balyn nynh amaw hanlan a rah cih hae zah a uh cih hae; pawccecize Jeroboam innbyn kyaze amaw kyalya hynh shawku kya uu athua cih, pawccecize Jeroboam ciihan kyaze amaw tungvaw kya rou nynh Bawipaw , Israel Pachia tuh ccapyh a lungrythua.¹⁴Tuhpiaze atunin, atu ccyh kya maw hin, Jeroboam ciihan a zosah cih paw Israel siapharan lu kheit kha Bawipaw nynh amaw elang a langsakuh cih.

¹⁵“Phaeku kha tui lungkhu kya hy athua hawte, Bawipaw nynh Israel kha a hy cih; mih minpaaw hae a pya hae paw hynh-e ram hoypaw kyate Israel kha poh a khaee cih, Zufrates vaw khuraw lang cia phiariphiarae a nung cih hae, pawccecize minmin nynh Asherah zohtuh hae kha raekute Bawipaw thin a riasah hae.¹⁶Jeroboam nynh amaw a seinaw keiccu te Israel hae kha seinaw a raesah hae keiccuze Israel kha a vua cih,” a cipya.

¹⁷Te Jeroboam zu tuh thokute cceih zah Tirzah khua a thua. Inn thuakaw kya he a tee lyakhe imua tuh a chih.¹⁸Bawipaw nynh a ryalahtu profeh Ahijah kyate a hopaw bya thyhte, Israel hae balyn nynh imua kha uh hae zah a rah hae. Jeroboam Chinaw

¹⁹Tuhlaepaw Jeroboam a ryalawnaw hae, pawtemou rhaw a tuk cipaw te pawtemou a uk cipaw balyn tuh Israel Siapharan hae Phungpaw Ccauh kya a zei hae.²⁰Jeroboam nynh kum kuin lae ning a uk; a minpaaw hae ryte ih hae zah a ccapaw Nadab tuh amaw ccelang siapharan lang a tang. Rehoboam nynh Judah A Uk (2Sh 11.5—12.15)

²¹Solomon ccapaw Rehoboam nynh Judah ram kha a uk. A uk takaw lya tuh sung pali kum kheit acih vae, Bawipaw nynh amaw min kha nung nawlan Israel phin hae balyn kyate a popaw Jerusalem khua kya kum haw lae sari a uk. A nung tuh Ammon minphuin Naamah nynh thua.²²Judah hae nynh Bawipaw muihnaw kya hoyleinaw kha a rae hae; mih minpaaw hae nynh a rae hae paw seinaw balyn laeze alunghua lante a rae hae paw mih seinaw khate Bawipaw kha a thinriasah hae.²³Pawccecize ahangpaw mua miakaw te hinlalyhpaw thingku kaw miakaw khe hmin hangpaw hae, zohtuh hae te Asherah zohtuh hae kha a raeku hae;²⁴beikinn kya a ohhuakuhpaw pise hae kha mah ram lungkhu kya a um hae. Bawipaw nynh Israel hae malang kyate a dee hae paw minphuin hae nynh a cyi hae paw anungsikuhpaw balyn kha a cyibua hae.

²⁵Rehoboam nynh siapharan lang a tangnaw kum pangawnaw kum khe Izip siapharan Shishak nynh Jerusalem kha tuk lan a ccianua thung;²⁶Bawipaw inn kya-e sisua hae te siapharan inn kya-e sisua hae kha a law hae. Atyn-are pong a law. Solomon nynh a raepaw sui khawriaphua balyn kha mah pong a law;²⁷tukeiccuze Rehoboam Siapharan nynh sohin khawriaphua hae kha raeru zah, siapharan inn thuakaw a ngaw hae paw rhawviatu hae kya-e bawi hae kha a ap hae.²⁸Siapharan nynh Bawipaw inn lungkhu lang a tee takyh vae ze, rhawviatu hae nynh khawriaphua hae kha a ccyngku hae, te rhawvianaw khaan kyakhe bua leih a nung hae.

²⁹Tuhlaepaw Rehoboam nynh rya a lawpaw te a cyipaw balyn tuh Judah Siapharan hae Phungpaw Ccauh kyakhe a zei hae.³⁰Rehoboam te Jeroboam tuh rhaw po a tukkuh hae.³¹Rehoboam tuh a minpaaw hae ryte ih hae zah David khua kyakhe a minpaaw hae ryte a uukheih hae. A nung tuh Ammon minphuin Naamah nynh thua. A ccapaw Abijam nynh amaw ccelang siapharan lang a tang. Abijam nynh Judah A Uk (2Sh 13.1—14.1)

¹Nebat ccapaw Jeroboam Siapharan nynh ram a uknaw kum haw lae taryanaw kum khe Abijam nynh Judah ram kha uk takaw zah,²Jerusalem kya kum thum a uk. A nung tuh Abishalom ccanung Maakah nynh thua.³Aning mawze a paaw nynh a la raepaw seinaw balyn kha a raebua; a minpaaw David thinlung hawte thua leite, Bawipaw a Pachia kya a thinlung a lungzi khyh.⁴Thuasalama David keiccuze Bawipaw a Pachia nynh Jerusalem kya maeekhua ccangkheit a pya, amaw koute a ccapaw kha hangthung zah, Jerusalem khua kha a tynsah;⁵pawccecize David nynh Hit ccungccaw Uriah kong laelan, Bawipaw muihnaw kya ahmepaw kha cyih zah, kaw a pyapaw miakaw kha a she lungkhu balyn ccangkheit sanmah maetawkuh khyh.⁶A she lungkhu balyn, Rehoboam te Jeroboam tuh rhaw po a tukkuh hae.⁷Tuhlaepaw Abijam nynh rya a lawpaw te a cyipaw balyn tuh Judah Siapharan hae Phungpaw Ccauh kya a zei hae.⁸Abijam tuh a minpaaw hae ryte ih hae zah, David khua kya a uu hae. Te a ccapaw Asa tuh amaw ccelang siapharan lang a tang. Asa nynh Judah A Uk (2Sh 15.16—16.6)

⁹Israel Siapharan Jeroboam nynh ram a uknaw kum kuinnaw khe, Asa nynh Judah ram kha a uk takaw;¹⁰Jerusalem kyate sung pali kum kheit a uk. A minnung tuh Abishalom ccanung Maakah nynh thua.¹¹A minpaaw David nynh a la cyi hawte, Asa nynh Bawipaw muihnaw kya ahmepaw kha a cyi.¹²Beikinn kya a ohhuakuhpaw pise hae kha ram kyate dee hae zah a minpaaw hae nynh a la rae hae paw zohtuh hae balyn kha a nue hae.¹³A minnung Maakah kha mah Asherah elang anungsikuhpaw zohtuh a rae keiccuze siapharan a nung thuanaw kyate a haeungsah; a zohtuh kha Asa nynh ropah zah Kidron Vaw pe khe maee te a soi.¹⁴Hmin hangpaw hae kha a ro khyh hae zemah, a she lungkhu balyn Asa thinlung tuh Bawipaw kya a lungzi.¹⁵A paaw nynh byakinkute a hlupaw lasung hae te amaw nynh byakinkute a hlupaw sui, ngun te angphe hae kha Bawipaw inn lungkhu langkhe a nung. Asa te Benhadad A Pankheih hae

¹⁶Judah siapharan Asa te Israel siapharan Baasha tuh mih she lungkhu balyn rhaw po a tukkuh hae.¹⁷Israel siapharan Baasha nynh Judah ram kha tuk lan ccianua zah, Judah siapharan Asa kalan humhung mah a pou lei nawlan te a tee lei nawlan Ramah khua kha a rae.¹⁸Bawipaw inn te siapharan inn kya-e sisuakhaan kya umpaw alaepaw sisua hae, sui te ngun balyn kha Asa nynh marya lah zah, a ryalahtu hae kuih kya a pya hae. Damaskas khua umpaw Siria siapharan, Hezion ccapaw Tabrimmon a ccapaw Benhadad kalan khe ccungccaw saw hae zah,¹⁹“Ka paaw te na paaw nynh a la pankheih hae hawte, kae te nang mah pankheih sih; sui te ngun hynh lasung lang kae ky; Israel siapharan Baasha nynh kae hynh yn kitaw nawlan, aning te na pankheihnaw oh kha roh ccavae,” cite bya a taw.²⁰Benhadad nynh Siapharan Asa bya kha ngae zah, Israel khua hae kha tuk khylan a rhawbawi hae kha sawnua hae zah, Ijon, Dan, Abel-beth-maakah, Khinneroth balyn te Naftali ram balyn kha a tae hae.²¹Tuh-e tuh Baasha nynh he a thae te, Ramah khua a raepaw kha haeungtaw zah Tirzah khua kya a um.²²Te Siapharan Asa nynh Judah ram balyn kha thaesah hae zah, lu kheit san a lue lei lante, Baasha nynh Ramah khua a raenawpaw lung hae te thing hae kha a law hae, tuh-e tuhte Siapharan Asa nynh Mizpah khua te Benjamin ram e Geba khua kha a rae.²³Tuhlaepaw Asa nynh rya a lawpaw balyn, a huhan balyn, a cyipaw balyn te khua hae a raepaw tuh Judah Siapharan hae Phungpaw Ccauh kya a zei hae. Thuasalama he a taw te, a ccu kya ccinaw a hoi.²⁴Te Asa tuh a minpaaw hae ryte ih hae zah, a minpaaw David khua kyakhe a minpaaw hae ryte a uukheih hae; a ccapaw Jehoshafat tuh amaw ccelang siapharan lang a tang. Nadab nynh Israel A Uk

²⁵Judah siapharan Asa nynh ram a uknaw kum ningnaw kum khe Jeroboam ccapaw Nadab nynh Israel ram kha a uk takaw; aning nynh Israel ram kha kum ning a uk.²⁶Aning nynh Bawipaw muihnaw kya hoyleinaw kha a rae, a paaw laanpi kha zui zah Israel hae seinaw raesahpaw laanpi kha a zui.

²⁷Issakhar phin, Ahijah ccapaw Baasha nynh Nadad kha aruh lante paccynnuakuh zah, Filistin hae khua athuapaw Gibbethon khua kya a chia; pawccecize Nadad te Israel balyn nynh Gibbethon khua kha a koihlu hae.²⁸Tuhcite Judah siapharan Asa nynh ram a uknaw kum kumthumnaw khe Baasha nynh Nadab kha theih zah, amaw ccelang siapharan lang a tang.²⁹Siapharan lang he a tang takaw te, Jeroboam ciihan balyn kha a chia hae; Bawipaw nynh a ryalahtu Shiloh khuapaw Ahijah kyate a hopaw bya thyhte, marya a ro mawlaezung Jeroboam ciihan kha a hysuepaw lu kheit san haang khyh,³⁰pawccecize Jeroboam nynh amaw a seipaw seinaw te Israel hae kha seinaw a raesahpaw seinaw khate Bawipaw , Israel Pachia kha a thin a riasah keiccu nynh thua.

³¹Tuhlaepaw Nadad nynh rya a lawpaw te a cyipaw balyn tuh Israel Siapharan hae Phungpaw Ccauh kya a zei hae.³²Asa te Israel Siapharan Baasha tuh mih she lungkhu balyn rhaw a tukkuh hae. Baasha nynh Israel A Uk

³³Judah siapharan Asa nynh ram a uknaw kum kumthumnaw khe Ahijah ccapaw Baasha nynh Tirzah khua kyate Israel balyn kha kum kuin lae pali a uk.³⁴Aning nynh Bawipaw muihnaw kya hoyleinaw kha a rae, Jeroboam laanpi kha zui zah, Israel hae seinaw raesahpaw laanpi kha a zui.

¹Baasha konglang te Bawipaw bya tuh Hanani ccapaw Jehu kalan yn thua zah,²“Nang kha laenoi kyate kae hangthung zah ka ccungccaw Israel hae cciakhaetu lang kae rae salamah, Jeroboam laanpi kha na zui zah ka ccungccaw Israel hae kha seinaw na raesah hae zah mih seinaw khate ka thin nae riasah,³tukeiccuze nang Baasha te na ciihan hae kha kae maemih cih oh zah, na innbyn tuh Nebat ccapaw Jeroboam ciihan hawte ka thuasah cih.⁴Baasha te asekuhpaw ccungccaw miakaw khualae lungkhu a chihpaw kha ui nynh a ae cih; ramkaw kya a chihpaw miakaw kha azouthyapaw pavaw nynh a ae cih,” a ci.

⁵Tuhlaepaw Baasha nynh rya a lawpaw, a cyipaw te a huhan kha Israel Siapharan hae Phungpaw Ccauh kya a zei hae.⁶Baasha tuh a minpaaw hae ryte ih hae zah, Tirzah khua kya a uu hae; te a ccapaw Elah nynh amaw ccelang siapharan lang a tang.⁷Tuhpiaze Baasha tuh a kuih ryalawnaw khate Bawipaw kha a thinriasah zah, a muihnaw kya a cyipaw hoyleinaw balyn keiccu thuasah, Jeroboam ciihan te lokuh hae zah, tuh-e ciihan a ropaw seinaw keiccu thuasah, Baasha te a ciihan konglang kha Bawipaw bya tuh Hanani ccapaw profeh Jehu kyate yn thua. Israel Siapharan Elah

⁸Judah siapharan Asa nynh ram a uknaw kum kuin lae taruhnaw kum khe Baasha ccapaw Elah nynh Tirzah khua kyate Israel ram kha kum ning a uk.⁹Thuasalama a marangle angankuh a uktupaw a ryalahtu Zimri nynh aruh lante a phee. Tirzah khua a um lya, a innbyn a do-oihtu Arza inn kya phe rui lan a nia lyakhe,¹⁰Zimri tuh yn tee zah, Elah kha bua zah phe a theih koute amaw ccelang siapharan lang a tang. E tuh Judah siapharan Asa nynh ram a uknaw kum kuin lae sarinaw kum kya nynh thua.

¹¹Ram he uk takaw zah a bawitungkhung kya he a haung takaw te, Baasha ciihan hae kha marya a chia hae; a puizia te a ruiban hae kha pise lu kheit sanmah haang khyh hae.¹²Tuhcite Bawipaw nynh Baasha konglang profeh Jehu kyate a hopaw bya thyhte, Zimri nynh Baasha ciihan balyn kha marya a ro,¹³pawccecize Baasha te a ccapaw Elah nynh a rae hae paw mimaw seinaw te Israel hae a raesah hae paw seinaw, te mih zohtuh hae khate Bawipaw , Israel Pachia kha a thinriasah hae keiccu nynh thua.¹⁴Tuhlaepaw Elah nynh rya a lawpaw te a cyipaw balyn tuh Israel Siapharan hae Phungpaw Ccauh kya a zei hae. Israel Siapharan Zimri

¹⁵Judah siapharan Asa nynh ram a uknaw kum kuin lae pangaw kum khe, Zimri nynh Tirzah khua kya nin sari a uk. Te Israel rhawkaw hae nynh Filistin hae kya-e Gibbethon khua kha ryahmin a tahnuaku hae,¹⁶te tuh-e ryahmin tahnuakuh hae paw rhawkaw hae nynh, “Zimri nynh aruh lante paccynkuh zah siapharan kha a chia vae,” cipaw a thae hae; tukeiccuze tuin nin khe Israel balyn nynh rhawbawipaw Omri kha Israel siapharan lang ryahmin kya a khang hae.¹⁷Tukeiccuze Omri nynh Israel hae balyn ryte Gibbethon khua kyate cceihthung hae zah Tirzah khua kha a koihlu hae.¹⁸Khua kha a law vae hae cipaw Zimri nynh he a nyh tuh, siapharan inn kya-e rhawlungrua koihkuhpaw lungkhu lang tee zah, siapharan inn kha maee te soi zah amaw mah a chih,¹⁹pawccecize Jeroboam laanpi kha zui zah Bawipaw muihnaw kya hoyleinaw kha rae zah amaw nynh a raepaw seinaw te amaw nynh Israel hae kha seinaw a raesah hae keiccu nynh thua.²⁰Tuhlaepaw Zimri nynh rya a lawpaw te aruh lante a paccynpaw tuh Israel Siapharan hae Phungpaw Ccauh kya a zei hae. Israel Siapharan Omri

²¹Israel hae tuh phu ning lang a phiakuh hae; ccungccaw angankuh nynh Ginath ccapaw Tibni kha siapharan lang khangku lan zui hae zah, angankuh nynh Omri kha a zui hae.²²Omri a zui hae paw nynh Ginath ccapaw Tibni a zui hae paw kha a tae hae; tukeiccuze Tibni tuh chih zah Omri tuh siapharan lang a tang.²³Judah siapharan Asa nynh ram a uknaw sung thum kum kheitnaw kum khe Omri nynh Israel kha a uk takaw; kum haw lae ning uk zah kum taruh tuh Tirzah khua kya a uk. Khuapi Thawpaw Samaria

²⁴Omri nynh Shemer kya-e Samaria mua kha ngun talent ccangning te a re; te rhawlungrua te koihkuhpaw khua kha a rae koute mua a la hoitupaw Shemer min kha lee zah khua tuh Samaria cite min a phu.

²⁵Omri nynh Bawipaw muihnaw kya hoyleinaw kha a rae; aning mawze a la um hae paw balyn laeze hoyleinaw kha a raehua.²⁶Pawccecize Nebat ccapaw Jeroboam laanpi miakaw kha zui zah, mih zohtuh hae khate Bawipaw , Israel Pachia kha a thinriasahte, Israel hae a raesah hae paw seinaw laanpi kha a zui.²⁷Tuhlaepaw Omri nynh a cyipaw, huhan a langsahkupaw kha Israel Siapharan hae Phungpaw Ccauh kya a zei hae.²⁸Omri tuh a minpaaw hae ryte ih hae zah, Samaria khua kya a uu hae; a ccapaw Ahab nynh amaw ccelang siapharan lang a tang. Israel Siapharan Ahab

²⁹Judah siapharan Asa nynh ram a uknaw sung thum kum taryanaw kum khe, Omri ccapaw Ahab nynh Israel ram kha a uk takaw; Omri ccapaw Ahab nynh Samaria khua kyate Israel ram kha kum kuin lae ning a uk.³⁰Omri ccapaw Ahab nynh Bawipaw muihnaw kya aning mawze a la um hae paw balyn laeze hoyleinaw kha a raehua.

³¹Nebat ccapaw Jeroboam nynh a raepaw seinaw laanpi kya zui tuh amaw hanlan zawbahaepaw uccaw lang ria zah, aning nynh Sidon hae siapharan Ethbaal ccanung Jezebel kha zu lang a hoiku, te cceih zah Baal pachia kha ryalawpah zah a beik.³²Samaria khua kya a sakpaw Baal pachia inn lungkhu khe Baal pachia elang silawhang kha a raepya.³³Ahab nynh Asherah kha mah a rae. Ahab nynh aning mawze a la um hae paw Israel siapharan balyn laeze Bawipaw , Israel Pachia kha a thin a riasah hua.³⁴Ahab she lyakhe Bethel khuapaw Hiel nynh Jeriko khua kha a rae; Bawipaw nynh Nun ccapaw Joshua kyate a la hopaw bya thyhte, khua aleihpaw bing lyakhe a ccatawccaw Abiram hiinnaw kha zosah zah, khua koikua a rae lyakhe a ccasoi Segub hiinnaw kha a zosah. Elijah nynh Khuaakan lanpaw A Hodae

¹Gilead ram Tishbe khuapaw Tishbe ccungccaw Elijah nynh Ahab kha, “Ka beikpaw Bawipaw , Israel Pachia tuh a hiin thyhte, kae ka bya leite, e kum hae kya dangtui ccah lan khyh zah khuaa mah rah lan khyh,” a cipya.²Bawipaw bya tuh Elijah kalan yn thua zah,³“E hmin kyate pou lah, nithua langsang la cceih, te Jordan vaw nithua lang umpaw Kherith Vaw pe khe zya la rekuh.⁴Vaw kya-e tui kha na neih cih, tuin kyakhe nang kha looh pya khylan va-aw hae kha kaw ka pya vae hae,” a cipya.⁵Tukeiccuze cceih zah Bawipaw bya thyhte a cyi; aning nynh cceih zah Jordan nithua lang umpaw Kherith Vaw pe khe a um.⁶Va-aw hae nynh awkhua takyh zete takyhte sanlou te saw kha a pya hae; te vaw kya-e tui kha a nia.⁷Sosoh aro koute ram lungkhu kya khuaa araw khyh keiccuze vaw tuh akan vae. Zarefath Nomaenung

⁸Te Bawipaw bya tuh Elijah kalan yn thua zah,⁹“Thokuh lah, Sidon ram e Zarefath khua lang cceih lah, tuin kya la um; nang kha looh dang khylan tuin khua umpaw nomaenung kha kaw ka pya vae,” a cipya.¹⁰Tukeiccuze thokuh zah Zarefath khua lang a cceih. Khua koikua kya he a thua te, nomaenung lu kheit tuh thingpareih kha a la khu cciamang; Elijah nynh nopinung kha ko zah, “Ka nia lanpaw tui beihtaraw kha banang te yn pyatua,” a cipya.¹¹Nopinung nynh tui law lan a ccia lyakhe, aning nynh kohui zah, “Na kuih te sanlou beihtaraw nae ccyngpah cih,” a cipya.¹²Nopinung nynh, “Bawipaw na Pachia tuh a hiin thyhte, aruakuh vae paw sanlou phe kheit sankaw ka hoi khyh, ang lungkhu kya vaekhui kuihphe kheit kyalya te chitui-ung lungkhu kya chitui beihtaraw rou nynh ka hoi; inn lang kite tuh-e tuh kae te ka ccapaw elang anghyngnaw lanpaw thingpareih beihtaraw nynh ka la khu cciamang; tuh-e kae ae koute tuh kanmawte kae chi lanpaw nynh um vae,” a cipya.¹³Elijah nynh aning kha, “Na thawsia nan sah; cceih lah, kae hopya hawte la cyih; thuasalama masaty lan kamaw elang sanlou phe kheit yn raepah lah yn pyaty, tukoute namaw te na ccapaw elang ccangkhakheit kha na cyih cih.¹⁴Pawccecize Bawipaw , Israel Pachia nynh hynhte a ho: Bawipaw nynh laephi vawlan khuaa a rawsah mawlaezung, ang kya vaekhui thang lan khyh zah chitui-ung kya chitui thang lan khyh,” a ci.¹⁵Te nomaenung nynh cceih zah Elijah nynh a ho thyhte a cyi; te amaw ry, Elijah ryte a innbyn hae nynh khaw cia a ae hae.¹⁶Bawipaw nynh Elijah kyate a hopaw a bya thyhte, vaekhui ang kya vaekhui thang khyh zah, chitui-ung kya chitui thang khyh. Elijah nynh Nomaenung Ccapaw A Dansah

¹⁷Tuh-e koute, innzuaanung nopinung ccapaw tuh ccih zah, myaryamaw a cci keiccuze a hy phe thang.¹⁸Tetuh nomaenung nynh Elijah kha, “Pou Pachia ccungccapaw, pawccemou kae hynh nae rawse? Ka seinaw kha liathuisah lan te ka ccapaw kha chisah khylan tou ka kalan nae thua!” a cipya.¹⁹Elijah nynh nomaenung kha, “Na ccapaw kha yn pya,” a cipya. Aning nynh nomaenung by vaw e ccapaw kha lah zah, a inaw palung khaan langkhe kaekhae zah a ikhung kyakhe a nung.²⁰Elijah nynh Bawipaw kalan sia zah, “Pou Bawipaw ka Pachia, innccong ka thuanaw nomaenung tungvaw kya heize a ccapaw kha chiapyate vawsawnaw na thuakhae tou?” a ci.²¹Te imua kha vae thum bakhungnua zah Bawipaw kalan khe, “Pou Bawipaw ka Pachia, e imua hiinnaw hynh a lungkhu lang bua tee sah,” cite a sia.²²Bawipaw nynh Elijah roi kha thaepah zah, imuapaw hiinnaw tuh a lungkhu lang bua teethui zah a hiinthui.²³Elijah nynh imua kha lah zah palung khaan kyate inn lungkhu lang rungkhae bung zah a nung kha a pya; te Elijah nynh, “Dotua, na ccapaw tuh a hiin,” a cipya.²⁴Tetuh nopinung nynh Elijah kha, “Atu tuh nang tuh Pachia ccungccaw nynh na thua cipaw te na munglae kya umpaw Bawipaw bya tuh byaccing nynh thua cipaw ka ny vae,” a cipya. Elijah nynh Ahab A Hopyapaw Bya

¹Ccyh khaw cia ro zah kum thumnaw kum khe, Bawipaw bya tuh Elijah kalan yn thua zah, “La cceih lah, Ahab kha la muihsakuh; laephi vawlan khuaa ka rawsah cih,” a cipya.²Tukeiccuze Elijah tuh Ahab kalan muihsahku khylan a cceih. Samaria ram kya ccakan accih.³Ahab nynh siapharan inn do-oihtu Obadiah kha a ko. (Obadiah tuh Bawipaw kha myarya saw a tuapaw nynh thua;⁴Jezebel nynh Bawipaw profeh hae kha he a theih hae tuh, Obadiah nynh profeh za kheit kha ko hae zah, sung pangaw ccite lungkarung kya thuruh hae zah tui te looh a pya hae.)⁵Te Ahab nynh Obadiah kha, “Ram lungkhu po lekuh lan, tuidy hae balyn te vaw hae balyn kalan khe la cciatua; sahiin hae abang kha shung leite, marang hae te lann hae a hiin nawlan hae, aening nynh lonua hae kha ah muihpah kho oh,” a cipya.⁶Tukeiccuze ram kha po lekuh lan ccia khylan neekuh hae zah, Ahab tuh amaw ccangte voikheih lang cceih zah, Obadiah mah amaw ccangte ccanglang a cceih.

⁷Obadiah tuh laanpi kya a ccia lyakhe Elijah nynh amaw kha yn tungku; Obadiah nynh Elijah kha a syntaw, te bakhungpah zah, “Nang hynh ka bawipaw Elijah na thua khaw?” a cipya.⁸Elijah nynh, “Kamaw nynh ka thua. Na bawipaw kalan la cceih lah, e kya Elijah mang um cite la hopah,” a cipya.⁹Te Obadiah nynh, “Na ryalahtupaw kae hynh chia khylan Ahab kuih kalan pya lan ciate pawtemou ka sei?¹⁰Bawipaw na Pachia tuh a hiin thyhte, nang kha ccung khylan ka bawipaw nynh yn saw leinaw ram te minphuin um vae khyh; minmin nynh, ‘E kya Elijah um khyh,’ cite a ho vae hae ze, nang kha kae muih khyh cite tuh-e ram te minphuin kha thya leih a lawsahku hae.¹¹Te atu tuh nang nynh, ‘La cceih lah, e kya Elijah mang um cite na bawipaw kha la hopah,’ nae cipya.¹²Namaw kyate he ka cceih takaw te, Bawipaw muisaw nynh nang kha ka ny leinaw hmin lang ae cciakhae cih; tukeiccuze Ahab kha ka hopah zah nang kha he ae muih kho khyh te, kae hynh yn theih vae cih, na ryalahtupaw kae tuh ka di lya mawte Bawipaw kha saw ka tua vae.¹³Jezebel nynh Bawipaw profeh hae a chia lya hae ze, pawtemou Bawipaw profeh hae za kheit kha sung pangaw ccite lungkarung kya ka thuruh hae zah tui te looh ka pya hae cipaw kha ka bawipaw nang hynh ae hopah khyh hae tou?¹⁴Atu tuh nang nynh, ‘La cceih lah, e kya Elijah mang um cite na bawipaw kha la hopah,’ nae cipya; aning nynh solei yn theih vae cih,” a cipya.¹⁵Elijah nynh, “Ka beikpaw Bawipaw tuh a hiin thyhte, atunin Ahab malang ka langkuh ccaccing cih,” a ci.¹⁶Tukeiccuze Obadiah nynh Ahab kalan cceih zah a hopya; te Ahab tuh Elijah te tungku khylan a cceih.

¹⁷Ahab nynh Elijah kha he a muih te, “Nang hynh Israel kha vawsaw a pyatu na thua tou?” a cipya.¹⁸Elijah nynh, “Kae nynh Israel kha vawsaw ka pya khyh; nang te na paaw ciihan hae nynh khaw na pya oh, pawccecize Bawipaw kawbya hae kha na vua oh zah Baal hae kha na zui oh.¹⁹Tukeiccuze Israel balyn, Baal profeh hae za pali sung pangaw te Jezebel ccaboi kya a ae hae paw Asherah profeh hae za pali kha kamaw kalan Karmel Mua kya oun pum oh,” a cipya hae. Elijah nynh Baal Ranpibawi hae Taenaw

²⁰Tukeiccuze Ahab nynh Israel hae balyn kalan ccungccaw saw zah, profeh hae tuh Karmel Mua kya a sueluakuh hae.²¹Elijah tuh ccungccaw balyn kalan yn naekuh zah, “Alokuh leipaw tuanaw ccangning khate hohseciamou ccubae te na cceih ung cih oh? Bawipaw tuh Pachia athua ze, amaw kha zui oh; thuasalama Baal tuh Pachia athua ze, amaw kha zui oh,” a cipya hae. Te ccungccaw hae nynh bya kaw kheit san khung khyh hae.²²Tetuh Elijah nynh ccungccaw hae kha, “Bawipaw profeh tuh kamaw kyalya nynh ka um vae; thuasalama Baal profeh hae tuh za pali sung pangaw a um hae.²³Tangnuapaw sa ning kha kaening kalan oun cciakhae oh; minmin nynh tangnuapaw sa kheit kha pokuh hae sah, ditaraw lan pong be hae sah lah, thing vawlan khe nung hae sah, maee tyh nan hae sah; te kae nynh mah ccangpaw tangnuapaw sa kheit kha ka be cih zah thing vawlan khe ka nung cih, maee ka tyh lan khyh.²⁴Te nanning nynh nae pachia min kha na ko cih oh zah kae nynh Bawipaw min kha ka ko cih; maee te oun leihrupaw pachia tuh Pachia ccaccing nynh thua,” a cipya hae. Ccungccaw hae balyn nynh, “Na hopaw tuh ahoy!” a ci hae.²⁵Te Elijah nynh Baal profeh hae kha, “Nanning tuh na lung oh keiccuze tangnuapaw sa kheit kha pokuh ty oh lah paccyn oh, te maee tyh leite nae pachia min kha ko oh,” a cipya hae.²⁶A pya hae paw tangnuapaw kha minmin nynh lah hae zah a paccyn hae, te Baal min kha awkhua te ninthu cia ko hae zah, “Pou Baal, kaening hynh beih oun leihtua!” a ci hae. Thuasalama pawpaw roi mah ccae khyh zah leih mah leihru khyh hae. Mimaw nynh a rae hae paw silawhang pepan khe a law hae.²⁷Ninthu khe Elijah nynh sarya hae zah, “Thawte sia oh! Aning tuh pachia ccaccing nynh thua; ccangpaw kha tah a tua cciamang, tuhkhyhze ccanglang tah a khiavuiku, tuhkhyhze khycce lang tah a ccia, tuhkhyhze a i keiccuze tho aho ccamah,” a cipya hae.²⁸Te minmin nynh thawte sia hae zah, mimaw phung thyhte mih chii alua mawlaezung tangpaw te thaloi khate mimaw toulou kha a awku hae.²⁹Ninthu laeleih zah zetesang silaw ccyh cia a sia a rua hae zemah, pawpaw roi mah ccae khyh, khungrupaw bya te leihrupaw bya um khyh.

³⁰Tetuh Elijah nynh ccungccaw balyn kha, “Ka kalan oun naekuh oh,” cipah hae zah ccungccaw balyn tuh amaw kalan a naekuh hae. Te aning nynh a ro vae hae paw Bawipaw silawhang kha masaty a raethui;³¹Bawipaw bya tuh amaw kalan yn thua zah, “Na min tuh Israel acikuh cih,” cite a cipyapaw Jakob a ccapaw hae mih phin zeihte, Elijah nynh lung ccanghaw lae ning kha a law;³²tuh-e lung hae khate Bawipaw min te silawhang kha a rae. Te ccacii tounawpaw te kaw ning accawng lante tuh-e silawhang po voilu lan tuizy a zy.³³Thing kha po nung zah, tangnuapaw kha pong a be koute tuh-e thing vawlan khe a khang. Te aning nynh, “Ang ccangpali kha tui phe biasah oh lah, maee-ute silawnawpaw te thing kha tui bu oh,” a cipya hae.³⁴Te aning nynh, “Vae ningnaw tui bu oh,” cipah hae zah minmin nynh vae ningnaw tui a bu hae. Te aning nynh, “Vae thumnaw tui bu oh,” bua cipah hae zah minmin nynh vae thumnaw tui a bu hae,³⁵te tui tuh silawhang po voilu lan lua zah tuizy kya tui phe abeih.

³⁶Zetesang silawnaw rae ccyh kyakhe, profeh Elijah tuh silawhang kalan yn naekuh zah, “Pou Bawipaw , Abraham, Isak te Israel Pachia, nang tuh Israel hae kya Pachia na thuapaw kha thuasah, kae tuh na ryalahtu ka thua zah hynh-e uccaw balyn hynh namaw bya thyhte nynh ka cyi cipaw kha thuasah atunin nyh hae sah.³⁷Pou Bawipaw , e ccungccaw hae nynh nang tuh Pachia na thuapaw kha ae ny nawlan hae te mih thinlung kha na paleih nawlan hae, ka bya hynh beih yn thaepya tua, pou Bawipaw , beih yn thaepya tua,” cite saw a sang.³⁸Tetuh Bawipaw maee tuh yn ccah zah, maee-ute silawnawpaw, thing, lung te laenoi kha u zah, tuizy kya-e tui kha heize phe a rousah.³⁹Ccungccaw balyn nynh tuh-e tuh he a muih hae te, bakhung hae zah, “Bawipaw tuh Pachia athua ccaccing; Bawipaw tuh Pachia athua ccaccing,” a ci hae.⁴⁰Elijah nynh minmin kha, “Baal profeh hae kha kyng oh; lu kheit sanmah zuasah nan oh,” a cipya hae. Te minmin nynh tuh-e profeh hae kha a kyng hae; Elijah nynh minmin kha Kishon Vaw kalan cciakhae bung hae zah a chia hae. Khuaakannaw Athang

⁴¹Elijah nynh Ahab kha, “Cceihthung lah, la ae lah la neih, pawccecize khuaa myarya ccanpaw roi accae,” a cipya.⁴²Tukeiccuze Ahab tuh ae lan te nia lan a cceihthung. Elijah tuh Karmel mua dung lang a kaethung, tuin kyakhe laephi kya bakhung zah a mae kha a ccukharu hae laku kya a nung.⁴³Te a ryalahtupaw kha, “Cceihthung lah, rili kalan khe dotua,” a cipya. Aning nynh cciathungte do zah, “Pawpaw mah um khyh,” a cipya. Te Elijah nynh, “Vae sari cia buabua cciatua,” a cipya.⁴⁴Vaesarinaw kyakhe, “Dotua, ccungccaw kuih ciapaw maeking taraw tuh rili lungkhu te yn kaethung,” a cipya. Te Elijah nynh, “La cceih lah, Ahab kha, ‘Khuaa nynh phang ae khaw mawkhe na marangle kha paccynkuh lah, cceihbung ccavae,’ cite la hopah,” a cipya.⁴⁵Sosoh aro te vaawlui tuh maeking te khisan te pong yn moh zah khuaa myarya accan. Ahab tuh marangle ccikuh zah Jezreel khua lang a cceih.⁴⁶Bawipaw kuih tuh Elijah tungvaw um zah, a taevoiboei kha voikuh zah Ahab malang khe Jezreel teenaw kalan a ccue. Jezebel kyate Elijah A Ccue

¹Elijah nynh a cyipaw balyn te thaloi te profeh hae balyn a chiapaw kha Ahab nynh Jezebel kya marya a hopya.²Te Jezebel nynh Elijah kalan khe locceihtu lu kheit saw zah, “Na hiinnaw kha awkhualan atu ccyh kya tuh-e profeh hae hiinnaw hawte ka cyi khyh lanze, pachia hae nynh ka tungvaw kya tuh-e ciate thuasah, tuhlaeze alung lante mah thuasah cyih vae hae sah,” a cipya.³Tetuh Elijah tuh a ri keiccuze thokuh zah a hiinnaw lue khylan Judah ram e Beersheba khua lang a ccue; tuin kyakhe a ryalahtupaw kha a cciatawsya.

⁴Amaw tuh nin kheit laanccia ramkaw lang cceih zah innphi ku kaw a thua te a haung. Te a chi nawlan ngia zah, “Pou Bawipaw , azaw vae; atu tuh ka hiinnaw hynh yn lah ccavae, pawccecize kae tuh ka minpaaw hae laeze ahoy huapaw ka thua khyh,” a ci.⁵Te innphi ku kaw marya a ih. Vaekheitmawte vaawpaw nynh hae zah, “Thokuh lah ae,” a cipya.⁶Elijah nynh do zah a luki khe lung asopaw vawlan aruakuhpaw sanlou phe kheit te tui ling kheit kha a muih. Ae zah a neih koute bua a ih.⁷Bawipaw vaawpaw tuh vae ningnaw yn thua zah aning kha hae zah, “Na cceih cihnaw laanpi tuh myarya asaw keiccuze thokuh lah ae hin,” a cipya.⁸Thokuh zah a ae a neih; tuh-e looh thawzung tuhte nin sung pali te zi sung pali, Pachia mua Horeb langkhe a cceih.⁹Tuin hmin kya umpaw lungkarung kya thua zah a rya.
Te Bawipaw bya tuh a kalan yn thua zah, “Elijah, e kya pawmou na cyi?” cite a khia.¹⁰Elijah nynh, “Bawipaw , vaaw Pachia kha ccavyng ka pankhae; pawccecize Israel hae nynh na byakin kha vua hae zah na silawhang hae kha a ro hae, thaloi te na profeh hae kha theih hae zah, ka makhae nynh ka laehy vae, ka hiinnaw kha yn ccung hae,” a cipya. Horeb Mua kya Elijah te Pachia

¹¹Aning nynh, “Pou lah, Bawipaw malang mua vawlan khe la thadyn, pawccecize Bawipaw tuh po yn cceih cih,” a cipya. Tetuh athawsaepaw khise tuh yn tho zah mua hae tuh paw hae zah Bawipaw malang khe lungpi hae tuh a koi hae, thuasalama Bawipaw tuh khisan kya um khyh; khisan azaw koute innry asuekuh, thuasalama Bawipaw tuh innrysuekunaw kya mah um khyh;¹²innrysuekuh koute maee a um; thuasalama Bawipaw tuh maee kya mah um khyh; maee koute nevyalyapaw roi yn ccae.¹³Tuh-e roi tuh Elijah nynh he a thae te, a mae kha a angkiccua te a bongku, te pou zah lungkarung kalan teenaw arae khe a thadyn. Te amaw kalan khe, “Elijah, e kya pawmou na cyi?” cite roi yn ccae.¹⁴Elijah nynh, “Bawipaw , vaaw Pachia kha ccavyng ka pankhae; pawccecize Israel hae nynh na byakin kha vua hae zah na silawhang hae kha a ro hae; thaloi te na profeh hae kha theih hae zah, ka makhae nynh ka laehy vae, ka hiinnaw kha yn ccung hae,” a cipya.¹⁵Te Bawipaw nynh, “La ki lah, Damaskas ramkaw langkhe la cceih; he na thua te, Hazael kha Siria siapharan lang chitui na thuh cih.¹⁶Nimshi ccapaw Jehu kha mah Israel siapharan lang chitui na thuh cih; te Abelmeholah khuapaw Shafat ccapaw Elisha kha namaw ccelang profeh lang chitui na thuh cih.¹⁷Hazael a thaloi kyate a luepaw miakaw kha Jehu nynh a theih cih; Jehu a thaloi kyate a luepaw miakaw kha Elisha nynh a theih cih.¹⁸Tuhzemah Baal malang ccukharutung lei hae paw balyn, Baal a myng leipaw miakaw, Israel hae thong sari kha ka haang bang cih hae,” a cipya. Elisha tuh Elijah Zuitu lang Tang

¹⁹Tukeiccuze Elijah tuh tuin kyate cceih zah, Shafat ccapaw Elisha, leithue cciamangpaw kha a muih; a malang khe tangnua toi haw lae ning um hae zah amaw tuh toi haw lae ningnaw kyakhe a um. Elijah nynh a pe langkhe po cceih zah a angkiccua kha Elisha tungvaw a khang.²⁰Te Elisha nynh a tangnua hae kha cciatawte Elijah kalan ccue zah, “Ka nung te ka paaw kha ka la myngsya hin hae, tukoute nang kha kae zui cih,” a cipya. Te Elijah nynh, “La ki ccaleih; pawccecize na tungvaw kya paw ka cyih zawtou?” a cipya.²¹Elisha nynh ki zah tangnuapaw toi kheit kha cciakhae zah a chia; leithuenawpaw thing khate tangnuapaw saw kha a thung, te ccungccaw hae kha dang hae zah a ae hae. Te thokuh zah Elijah kha zui zah a ryalahtu lang a tang. Ahab te Siria hae Doukunaw

¹Siria siapharan Benhadad nynh a rhawkaw hae balyn kha a pum hae; siapharan hae sung thum lu ning, marang hae, marangle hae ryte Samaria kha ccianua hae zah koihlute a tuk hae.²Locceihtu hae kha Israel siapharan Ahab kalan, khua lungkhu lang saw hae zah, “Benhadad nynh hynhte a ho:³Na sui te na ngun hae tuh ka kya-e nynh thua; apuithya huaccepaw na zu hae te na ccaaw hae mah ka kya-e nynh thua hae,” a cipya.⁴Israel siapharan nynh, “Pou siapharan, ka bawipaw, na ho hawte kamaw te ka hoipaw balyn tuh namaw kya-e nynh thua,” a cipya.⁵Locceihtu hae tuh bua oun thua hae zah, “Benhadad nynh hynhte a ho: Na kalan ccungccaw hae kae saw zah, ‘Na sui te na ngun, na zu na ccaaw hae kha ka kalan yn pya,’ cite bya kae taw;⁶awkhualan atu ccyh kya ka ryalahtu hae kae saw cih hae, minmin nynh na inn te na ryalahtu hae inn lungkhu kya a ccung cih hae, a ry hae paw miakaw kha a lah cih hae zah a cciakhae cih hae,” cite bya a taw.

⁷Tetuh Israel siapharan nynh ram lungkhu e piccan hae balyn kha ko hae zah, “E ccungccapaw nynh pawtemou vawsawnaw a ccung cipaw hynh dotua oh! Aning nynh ccungccaw yn sawnua zah ka zu ka ccaaw hae, ka sui te ka ngun kha yn ngia zah ka ei khyh,” a cipya hae.⁸Te piccan hae balyn te ccungccaw hae balyn nynh, “A bya ngaepah nan, na nawccah nan sah,” a cipya hae.⁹Tukeiccuze Benhadad a locceihtu hae kha, “Siapharan ka bawipaw kha la hopah oh: Masaty nae ngiapaw miakaw kha tuh na ryalahtupaw nynh ka cyih cih; thuasalama e hynh tuh ka cyih kho khyh,” a cipya. Locceihtu hae nynh cceih hae zah bya kha a phu hae.¹⁰Benhadad nynh ccungccaw saw zah, “Kamaw yn zui hae paw lu kheit cci nynh Samaria khua e laenoi kha kuihphe kheit te a peih hae ze, pachia hae nynh ka tungvaw kya tuh-e laeze mah cyih vae sah,” cite bya a taw.¹¹Israel siapharan nynh, “Aning kha la hopah oh: Rhawtuk-uccaw a lawkuhpaw nynh rhawtuk-uccaw a khahkuhpaw hawte pookuh nan sah,” cite bya a khung hae.¹²Benhadad tuh siapharan hae ryte bu lungkhu kya a nia lya hae khe, tuh-e bya he a thae tuh, a ccungccaw hae kha, “Rhawtuk lan paccynkuh oh!” a cipya hae. Te minmin nynh khua kha tuk khylan a paccynkuh hae.

¹³Te profeh lu kheit tuh Israel siapharan Ahab kalan yn thua zah, “Bawipaw nynh hynhte a ho, hynh-e myarya lungpaw zapi hae hynh na muih vae hae tou? Dotua, atunin minmin kha na kuih kya kae pya cih; te nang nynh kae tuh Bawipaw ka thuapaw kha na nyh cih,” a cipya.¹⁴Ahab nynh, “Hum liate mou pya athua cih hae?” cite a khia. Aning nynh, “Bawipaw nynh hynhte a ho, pee a uktu bawi hae kya-e ryalahtu ccangvae hae liate pya athua cih,” a cipya. Te Ahab nynh, “Rhawtuk tuh hum nynh mou a thoty cih?” cite a khia. Profeh nynh, “Namaw,” a cipya.¹⁵Te Ahab nynh pee uktu bawi hae kya-e ryalahtu ccangvae hae kha pum hae zah za ning sung thum lu ning acih hae; tuh-e hae koute Israel hae balyn kha pum hae zah thong sari acih hae.

¹⁶Benhadad te a pan hae paw siapharan sung thum lu ning hae tuh bu kya phe rui lan a nia lya hae ninthu ccyh khe minmin tuh a cceih hae.¹⁷Pee uktu bawi hae kya-e ryalahtu ccangvae hae tuh masaty a cceih hae. Benhadad nynh rhawviatu hae kha saw hae zah tuh-e hae nynh, “Samaria khua kyate ccungccaw hae oun cceih hae,” cite a hopya hae.¹⁸Aning nynh, “Daenaw rae khylan oun ccia hae ze, ahiinte na kyng cih oh; rhawtuk khylan oun ccia hae zemah, ahiinte na kyng cih oh,” a cipya hae.

¹⁹Pee uktu bawi hae kya-e ryalahtu ccangvae hae te minmin a zuitu rhawkaw hae tuh khua kyate oun cceih vae hae.²⁰Te Israel hae lu kheit cci nynh rhaw hae lu kheit cci kha a chia hae; Siria hae tuh ccue hae zah Israel hae nynh a deehui hae, Siria siapharan Benhadad tuh marang ccikuh zah marang rhawkaw hae ryte phe a lue hae.²¹Israel siapharan tuh pou zah marang hae te marangle hae kha a tuk hae, Siria ccungccaw patae kha a chia hae.

²²Te profeh nynh Israel siapharan kalan yn cceih zah, “Na thawsaesakuh lah, na cyi lanpaw kha hoyte tuakuh; pawccecize hawnin ccyh yn thua te Siria siapharan nynh tuk lan ae ccianua cih,” a cipya. Siria hae Shungnaw

²³Siria siapharan a ryalahtu hae nynh, “Israel hae mih pachia hae tuh mua pachia hae nynh thua, tukeiccuze minmin tuh aening laeze a thunghua hae; thuasalama minmin kha bialae kya tuk oh sih lah, aening tuh minmin laeze solei ah thunghua cih oh.²⁴E hynh mah cyitua: siapharan hae hynh phoh hae lah, rhawbawi hae kha khangru hae;²⁵na la shungpaw rhawkaw hae tahawpaw rhawkaw hae, marang hae tahawpaw marang hae te marangle hae tahawpaw marangle hae kha pum hae; te bialae kya tuk lan hae zah, aening tuh minmin laeze solei thunghua lan,” a cipya hae. Mih bya kha ngae zah tuhcite a cyi.

²⁶Hawnin ccyh khe Benhadad nynh Siria hae kha pum hae zah Israel hae kha tuk khylan Afek khua lang a cceihthung hae.²⁷Israel hae kha pum hae zah looh mah dang hae zah rhawtuk lan a cceih hae; Israel hae tuh miaa phu phuning taraw hawte Siria hae te arawsekunaw khe a rya hae, Siria hae tuh ram kya phe abeih hae.²⁸Pachia ccungccapaw tuh Israel siapharan kalan yn cceih zah, “Bawipaw nynh hynhte a ho: Siria hae nynh, ‘Bawipaw tuh mua pachia thua zah, accya pachia thua khyh,’ a ci hae, tukeiccuze e myarya lung hae paw zapi hae balyn hynh na kuih kalan kae pya cih zah, kae tuh Bawipaw ka thuapaw kha na nyh cih oh,” a cipya.²⁹Minmin tuh nin sari lungkhu phu kheit te phu kheit hawiliakute ryahmin a tahku hae. Nin sarinaw nin khe rhawtuk a thotakaw hae; Israel hae nynh Siria ccu rhawkaw hae cciing kheit kha nin kheit lungkhu a chia hae.³⁰Tuhlaepaw hae tuh Afek khua lang a ccue hae; tuhlaepaw thong kuin lae sari kha khualungrua nynh a tingthin hae.
Benhadad mah ccuebua zah khua lungkhu kya a rekuh.³¹A ryalahtu hae nynh, “Dotua, Israel ciihan siapharan hae tuh ngaethyaumsah thyapaw siapharan hae nynh athua hae cite kae thae; ah tae kya buriboei voikuh oh sih lah, ah lu vawlan liarui khangkute Israel siapharan kalan cceih oh sih; na hiinnaw hynh poh ae haang kho,” a cipya hae.³²Tukeiccuze buriboei kha mih tae kya voikuh hae zah liarui kha mih lu vawlan khangkute Israel siapharan kalan cceih hae zah, “Na ryalahtu Benhadad nynh, ‘Kae hynh beih yn hiin sah,’ ae ci,” cite a hopya hae. Te Ahab nynh, “A hiin ung tou? Aning tuh ka unopaw nynh thua,” a cipya hae.³³Tuh-e hae nynh bya a cciazia kha hoyte ngae hae zah, tuh-e bya tuh palou lawkuh hae zah, “Athua, Benhadad tuh na unopaw nynh thua,” a cipya hae. Te Ahab nynh, “Cceih oh lah, amaw kha yn cciakhae oh,” a cipya hae. Tukeiccuze Benhadad tuh amaw kalan yn cceih; te Ahab nynh marangle tungvaw a ccisaku.³⁴Benhadad nynh, “Ka paaw nynh na paaw kya-e a lawpaw khua hae kha kae pyathui cih; ka paaw nynh Samaria khua kya kungku a la raeku hawte nang nynh mah Damaskas khua kya kungku na raekuh cih,” a cipya. Israel siapharan nynh, “E byakinnaw liate kae cciasah cih,” a cipya. Tukeiccuze nawccawthungkunaw kha rae hae zah a cciasah. Profeh nynh Ahab A Pe

³⁵Bawipaw kawpyanaw thyhte profeh phu kya-e lu kheit nynh a banpaw lu kheit kha, “Kae hynh yn bua!” a cipya. Thuasalama tuh-e paw nynh bua lan a mya.³⁶Te aning nynh, “Bawipaw bya kha na ngae khyh keiccuze ka kyate he na cceih takaw te, chindeih nynh ae tei cih,” a cipya. Te a kyate he a cceih takaw te, chindeih te tungkuh hae zah phe a tei.³⁷Te ccangpaw lu kheit kha muih zah, “Kae hynh yn bua!” a cipya. Tukeiccuze tuh-e paw nynh thawte bua zah vaemaw a muesah.³⁸Tuh-e profeh tuh cceih zah a mae kha boei taraw bongkute a muinsan rulaekuh zah laante langkhe siapharan kha a ngaw.³⁹Siapharan yn ccia lyakhe siapharan kha ko zah, “Na ryalahtupaw kae tuh rhawtuknaw lang ka cceih; rhawkaw lu kheit tuh yn ki zah ka kalan ccungccapaw lu kheit kha yn cciakhae zah, ‘E paw hynh la do-oih; aning hynh he a zosei ze, a hiinnaw hanlan na hiinnaw kha chia athua cih, tuhkhyhze ngunphua talent ccangkheit na rung cih,’ yn cipya.⁴⁰Na ryalahtupaw kae tuh voikheit voikheit lang ka ryasuh cciamang lyakhe aning tuh phe la cceih vae,” a cipya. Israel siapharan nynh, “Na byathan tuh tuhcihmawte byapia lanpaw nynh thua; namaw toulou nynh tuh-e byathan tuh bya phe na pae vae,” a cipya.⁴¹Tuh-e profeh nynh a mae a bongkupaw boei taraw kha lyngkuh kangmaw zah, Israel siapharan nynh profeh hae laku e lu kheit nynh thua cipaw a syntaw.⁴²Te profeh nynh amaw kha, “Bawipaw nynh hynhte a ho, ‘Chia lan ka cipaw ccungccapaw kha na cciasah keiccuze na hiinnaw tuh a hiinnaw hanlan, na ccungccaw hae hiinnaw tuh a ccungccaw hae hiinnaw hanlan athua cih,’ a ci,” cite a hopya.⁴³Israel siapharan tuh thinriate maesuerote a inn lang cceih zah Samaria khua a thua. Naboth Misu Khokhu

¹Tukoute akawlan e hynh acyihkuh: Jezreel khuapaw Naboth nynh Jezreel khua kya Samaria siapharan Ahab inn pe khe misu khokhu a hoi.²Ahab nynh Naboth kha, “Na misu khokhu tuh ka inn pe a um keiccuze enaw-rohnaw khokhu lang ka mang ccaw, kamaw yn pya; ahoy huapaw misu khokhu kae pyaru cih; tuhkhyhze na ry ze, amee tuh phua lante kae pya cih,” a cipya.³Thuasalama Naboth nynh Ahab kha, “Ka minpaaw hae rho kha nang kae pya lanpaw tuh Bawipaw nynh yn khee vae sah,” a cipya.⁴Naboth nynh Ahab kha, “Ka minpaaw hae rho tuh kae pya lan khyh,” a cipya keiccuze Ahab tuh thinria maesuerote a inn lang a cceih. A ikhung kya ih zah a mae kha ccanglang hawi zah looh mah ae khyh.

⁵A zu Jezebel nynh a kalan yn cceih zah, “Looh ae lei lan ciate pawccemou hynhcih baban na lunghoy khyh?” a cipya.⁶Ahab nynh, “Jezreel khuapaw Naboth kyakhe, ‘Na misu khokhu kha phua te kae re; tuhkhyhze na ryhua ze, ccangpaw misu khokhu mah kae pyaru cih,’ cite ka hopah zah, aning nynh, ‘Ka misu khokhu kha kae pya lan khyh,’ cite yn khung keiccu nynh thua,” a cipya.⁷A zu Jezebel nynh, “Atu lya Israel hynh nang nynh na uk khaw? Thokuh, looh beihtaraw ae lah, na lungpawsaku tua; Jezreel khuapaw Naboth misu khokhu kha kae pya cih,” a cipya.

⁸Tukeiccuze Ahab min te ccaw zei zah a tazeih khate tazeih a khia; te tuh-e ccaw tuh Naboth te a khua kya umkheih hae paw piccan hae te bawi hae kalan a ky.⁹Aning nynh ccaw lungkhu khe, “Looh-aesungnaw kha thaesah oh lah, ccungccaw zapi malang khe Naboth kha haungsah oh;¹⁰a ccouseikuh hae paw lu ning kha a malang khe nung oh lah, tuh-e hae nynh, ‘Nang nynh Pachia te siapharan kha thya na law hae,’ cite seibe hae sah. Te aning kha poukhae oh lah, lung te phe chih lan deih oh,” a cipya hae.¹¹A khuaccaaw hae, a khua kya umpaw piccan hae te bawi hae nynh Jezebel nynh bya a taw hae thyhte a cyi hae. Aning nynh a ky hae paw ccaw kya azeiku thyhte,¹²minmin nynh looh-aesungnaw kha thaesah hae zah ccungccaw zapi malang khe Naboth kha a haungsah hae.¹³A ccouseikuh hae paw lu ning tuh oun cceih hae zah a malang khe a haung hae; tuh-e ccousei hae lu ning nynh ccungccaw hae malang khe Naboth kha seibe hae zah, “Naboth nynh Pachia te siapharan kha thya a law hae,” a ci hae. Tukeiccuze khua atolang cciakhae hae zah lung te phe chih lan a deih hae.¹⁴Tetuh Jezebel kalan ccungccaw saw hae zah, “Naboth tuh lung te deih thua zah a chih vae,” a cipya hae.

¹⁵Naboth tuh lung te deih hae zah a chih vae cipaw kha Jezebel nynh he a thae takaw te, Ahab kha, “Cceih lah, Jezreel khuapaw Naboth nynh phua te ae zuapya ry leipaw a misu khokhu kha lawkuh ccavae; pawccecize Naboth tuh hiin vae khyh, phe chih vae,” a cipya.¹⁶Ahab nynh Naboth a chih vae cipaw he a thae takaw te, Jezreel khuapaw Naboth misu khokhu kha lawku lan a cceihbung.

¹⁷Bawipaw bya tuh Tishbe ccungccaw Elijah kalan yn thua zah:¹⁸Samaria khua umpaw Israel siapharan Ahab kha tungku khylan la cceihbung; aning tuh lawku lan a ccianuapaw Naboth misu khokhu kya nynh atu a um.¹⁹Nang nynh amaw kha, “Bawipaw nynh hynhte a ho: Na theih zah a uccaw kha na lawku vae tou? a ci,” cite hopah. Te nang nynh amaw kha, “Bawipaw nynh hynhte a ho: Ui hae nynh Naboth chii a lyanaw hae hmin kyakhe na chii kha mah ui hae nynh a lya cih hae, a ci,” cite hopah, a cipya.

²⁰Ahab nynh Elijah kha, “Pou ka rhawpaw, phe nae muih vae tou?” a cipya. Elijah nynh, “Bawipaw muihnaw kya ahoy leipaw cyi khylan namaw toulou na zuaku vae keiccuze phe kae muih vae;²¹na tungvaw hoyleinaw ka thuasah cih; nang kha kae maemih cih zah, Israel ram kya Ahab kya-e pise miakaw tuh a luepaw thuasah, a lue leipaw thuasah marya ka roh cih hae;²²ka thin nae riasah keiccu thuasah, Israel kha seinaw na raesah keiccu thuasah na ciihan hae kha Nebat ccapaw Jeroboam ciihan te Ahijah ccapaw Baasha ciihan hawte ka thuasah cih hae.²³Jezebel te asekuh lante Bawipaw nynh, ‘Jezreel khua akoihkuhpaw lungkhu khe ui hae nynh Jezebel kha a ae cih hae,’ a ci.²⁴Ahab te asekuhpaw ccungccaw miakaw tuh khualae lungkhu a chihpaw kha ui nynh a ae cih; ramkaw kya a chihpaw miakaw kha azouthyapaw pavaw nynh a ae cih,” a ci.

²⁵(Ahab tahawpaw humhung mah um khyh, aning tuh a zu nynh a tou keiccuze Bawipaw muihnaw kya ahoy leipaw rae khylan amaw toulou a zuakuhpaw nynh thua.²⁶Bawipaw nynh Israel hae malang te a dee hae paw Amor hae nynh a cyi hae hawte, zohtuh hae nulang zuikute anungsikuh huaccepaw kha Ahab nynh a rae.)

²⁷Ahab nynh tuh-e bya he a thae tuh, a boeining kha seii zah a ngesaw ccakaepaw vawlan khe buriboei kha a zingku; looh-aesung zah buriboei kyakhe a ih, te lungrote a cceih bungthung.²⁸Te Bawipaw bya tuh Tishbe ccungccaw Elijah kalan yn thua zah:²⁹“Ahab nynh ka malang zakaw a sangsakupaw kha na muih vae tou? Aning nynh ka malang zakaw a sangsaku keiccuze a she lungkhu kya ronaw ka thuasah lan khyh; thuasalama a ccapaw she kya a ciihan tungvaw ronaw ka thuasah cih,” a ci. Profeh Mikaiah nynh Ahab Raeringnaw A Pya (2Sh 18.2-27)

¹Siria ram te Israel ram tuh kum thum lungkhu rhawtukkuh khyh hae.²Thuasalama kum thumnaw kyakhe Judah siapharan Jehoshafat tuh Israel siapharan kalan a cceihbung.³Israel siapharan nynh a ryalahtu hae kha, “Ramoth-gilead tuh aening kya-e nynh thua cipaw na nyh oh tou? Tuhzemah aening nynh Siria siapharan kuih kyate law leite daebabi lan ah umpya oh,” a cipya hae.⁴Aning nynh Jehoshafat kha, “Ramoth-gilead kha tuk khylan ka kya na cceihbua cih tou?” a cipya. Jehoshafat nynh Israel siapharan kha, “Nang te kae tuh pynkheihpaw nynh ah thua; ka ccungccaw hae tuh na ccungccaw hae thua hae zah, ka marang hae tuh na marang hae nynh thua,” a cipya.

⁵Jehoshafat nynh Israel siapharan kha, “Bawipaw bya kha khiatua ty hin,” a cipya.⁶Israel siapharan nynh profeh hae za pali kha pum hae zah, “Ramoth-gilead kha tuk lan ka ccianua cih tou, ka ccianua lan khyh tou?” cite khia hae zah, minmin nynh, “Ccianua thung; pawccecize Bawipaw nynh siapharan na kuih kalan ae pya cih,” a ci hae.⁷Thuasalama Jehoshafat nynh, “Aening nynh khia lanpaw ccangpaw Bawipaw profeh um vae khyh tou?” a cipya.⁸Israel siapharan nynh Jehoshafat kha, “Bawipaw kha byakhia nawlan ccangpaw lu kheit, Imlah ccapaw Mikaiah a um ung; tuhzemah aning kha ka hua, pawccecize kamaw konglang bya hoypaw ho boi khyh, ronaw kong cci nynh a ho,” a cipya. Jehoshafat nynh, “Tuhcite siapharan nynh byaho nan,” a cipya.⁹Te Israel siapharan nynh bawi lu kheit kha ko zah, “Imlah ccapaw Mikaiah kha arangte yn thuakhae,” a cipya.¹⁰Te Israel siapharan te Judah siapharan Jehoshafat tuh mih angkiccua kikute, Samaria khua koikua teenaw malang huihmin kya umpaw bawitungkhung kya a haung hae; mih malang khe profeh balyn nynh profehbya a ho hae.¹¹Khenaanah ccapaw Zedekiah nynh sivaw ki hae kha raekuh zah, “Bawipaw nynh hynhte a ho: Siria hae kha ro athua mawlaezung hae, e sivaw ki hae hynhte na thuing cih oh, a ci,” cite a ho.¹²Profeh balyn nynh mah tuhcite hobua hae zah, “Ramoth-gilead kha ccianua thung lah, taetua; Bawipaw nynh siapharan na kuih kya ae pya cih,” a cipya hae. Shung lanpaw Mikaiah nynh A Hodae

¹³Mikaiah ko lan a cceihpaw locceihtupaw nynh Mikaiah kha, “Dotua, profeh hae nynh siapharan kyakhe bya hoypaw kha phe lokuh lante a hopya hae; nang nynh mah minmin hawte bya hoypaw kha hopah bua,” a cipya.¹⁴Thuasalama Mikaiah nynh, “Bawipaw tuh a hiin thyhte, Bawipaw nynh yn hopyapaw kyalya kha ka ho cih,” a ci.

¹⁵Mikaiah tuh siapharan kya he a thua te, siapharan nynh, “Mikaiah, Ramoth-gilead kha tuk khylan kae ccianua cih tou, kae ccianua lan khyh tou?” a cipya. Mikaiah nynh, “Ccianua thung lah, taetua; Bawipaw nynh siapharan na kuih kya ae pya cih,” a cipya.¹⁶Thuasalama siapharan nynh, “Byaccingpaw laelan ccangpaw bya kha Bawipaw min te nae hopya khyh nawlan, vae hohzeihmou bya kae kinsakuh cih?” a cipya.¹⁷Mikaiah nynh, “Israel hae balyn tuh tuurin a hoi leipaw tuu hae hawte mua vawlan phiariphiarae a um hae paw kha ka muih; Bawipaw nynh, ‘E hae tuh bawi hoi khyh hae; mimaw inn raveih lang daebabi lan ki hae sah,’ a ci,” cite a ho.¹⁸Israel siapharan nynh Jehoshafat kha, “Aning tuh kae ka konglang hynh ahoypaw profehbya ho boi khyh, ronaw kong cci nynh a ho, cite kae hopah khyh tou?” a cipya.

¹⁹Te Mikaiah nynh, “Tukeiccuze Bawipaw bya hynh thaetua: Bawipaw tuh a bawitungkhung kya haung zah, vaaw rhawkaw hae balyn tuh a voi a rang te a pe khe a thadyn hae.²⁰Te Bawipaw nynh, ‘Ahab tuh cceihthung zah Ramoth-gilead kya a chi nawlan, hum nynh mou a tuhou cih?’ a ci. Lu kheit nynh ccangte ho zah, ccangpaw lu kheit nynh ccangte a ho,²¹muisaw lu kheit yn thua zah Bawipaw malang thadyn zah, ‘Kamaw ka tuhou cih,’ a ci.²²Bawipaw nynh, ‘Pawtemou na tuhou cih?’ cipah zah, aning nynh, ‘Ka cceih cih zah profeh hae munglae kyakhe ahynthyapaw muisaw lang ka tang cih,’ a ci. Te Bawipaw nynh, ‘Aning kha na la tuhou cih, phe na tuhou kho cih; la cceih lah tuhcite la cyih,’ a cipya.²³Tukeiccuze Bawipaw nynh ahynthyapaw muisaw kha e na profeh hae balyn munglae kya a nung vae; Bawipaw nynh nang na hanlan ronaw kaw a tho vae,” a cipya.

²⁴Tetuh Khenaanah ccapaw Zedekiah nynh Mikaiah kha ccianua thung zah a mae kha bia zah, “Bawipaw muisaw tuh nang kha bya hopya khylan ka kyate paw laanpi te mou a pou?” a cipya.²⁵Mikaiah nynh, “Nang nynh alungkhu lang e akhaan lungkhu lang reku khylan he na tee nin khe na muih cih,” a cipya.²⁶Israel siapharan nynh, “Mikaiah kha kyng oh lah, khua uktu Amon te siapharan ccapaw Joash kalan cciakhae oh lah,²⁷‘Siapharan nynh hynhte kaw a tho: E ccungccaw hynh thonginn kya nung oh, daenaw te kae thua mawlaezung tui te looh beihtaraw kyalya la pya oh, a ci,’ cite la hopah oh,” a cipya hae.²⁸Mikaiah nynh, “Daenaw te bua nae ki zetuh, Bawipaw nynh ka kyate bya a ho khyhpaw nynh athua cih. Pou ccungccaw hae, nae balynte thaetua oh!” a ci. Ahab Shungnaw te Chinaw (2Sh 18.28-34)

²⁹Israel siapharan te Judah siapharan Jehoshafat tuh Ramoth-gilead khua lang a cceihthung hae.³⁰Israel siapharan nynh Jehoshafat kha, “Ka muinsan rulaekute rhawtuknaw lang ka cceihbua cih, thuasalama nang tuh na angkiccua kha kikuh,” a cipya. Tuhcite Israel siapharan tuh a muinsan rulaekuh zah rhawtuknaw lang a cceih.³¹Siria siapharan nynh a marangle rhawbawi hae sung thum lu ning kha, “Ccangpaw ccungccaw adihpaw thuasah, alepaw thuasah tuk leite, Israel siapharan kyalya kha tuk oh,” cite kaw a pya hae.³²Marangle rhawbawi hae nynh Jehoshafat kha he a muih hae te, “Aning hynh Israel siapharan ccaccing nynh thua,” a ci hae. Tukeiccuze aning kha tuk khylan a maenuaku hae; te Jehoshafat nynh a sia.³³Israel siapharan thua khyh cipaw kha marangle rhawbawi hae nynh he a nyh hae te, aning kha deehui vae leite a kitaw hae.³⁴Lukheitpaw nynh ee tutae leite a li te kaw huataw zah, Israel siapharan kha a rhawtuk-uccaw te a bykhaw laku khe a tungsah; tukeiccuze a marangle a mawngtupaw kha, “Vaemaw phe ka mue, tukeiccuze maeleihkuh lah, rhawtuknaw kyate yn poukhae,” a cipya.³⁵Tuin nin tuh thawte rhaw a tukkuh hae, siapharan tuh zete a chih cia, a marangle lungkhu khe ngeikuh zah Siria hae kalan khe a hawi; a vaemaw kyate a chii tuh marangle lungkhu khe alua.³⁶Khuanin he ccah tuh, “Nae khua raveih lang, nae ram raveih lang ki ccavae oh!” cite rhawkaw hae balyn kya roi accae.

³⁷Tuhcite siapharan Ahab tuh chih zah Samaria khua lang a cciakhae hae; siapharan tuh Samaria khua kya a uu hae.³⁸A marangle kha Samaria tuili pe khe a sing hae, Bawipaw nynh a la hopaw bya thyhte, ui hae nynh a chii kha lya hae zah, ohhuanung hae nynh tuin kya tui a singku hae.³⁹Tuhlaepaw Ahab nynh rya a lawpaw te a cyipaw balyn, saepanua te a sakpaw inn te a raepaw khua hae balyn tuh Israel Siapharan hae Phungpaw Ccauh kya a zei hae.⁴⁰Tuhcite Ahab tuh a minpaaw hae ryte a ih hae; te a ccapaw Ahaziah tuh amaw ccelang siapharan lang a tang. Jehoshafat nynh Judah A Uk (2Sh 20.31—21.1)

⁴¹Israel siapharan Ahab nynh ram a uknaw kum palinaw kum khe Jehoshafat nynh Judah ram kha a uk takaw.⁴²Jehoshafat tuh sung thum kum pangaw he acih te, ram kha uk takaw zah, Jerusalem khua kya kum kuin lae pangaw a uk. A nung min tuh Azubah cikuh zah Shilhi ccanung nynh thua.⁴³Aning nynh a paaw Asa laanpi miakaw kha a zui; tuh-e laanpi kyate cciasei leite, Bawipaw muihnaw kya ahmepaw kha a rae; tuhzemah hmin hangpaw hae kha roh khyh hae, ccungccaw hae nynh tuh-e hmin hangpaw hae kyakhe palei silaw hae zah mynkhuhpaw kha leih a u hae.⁴⁴Jehoshafat nynh Israel siapharan te mah ccawkunaw a rae.

⁴⁵Tuhlaepaw Jehoshafat nynh rya a lawpaw, a thungnaw a langsahkupaw te rhaw a tukpaw kha Judah Siapharan hae Phungpaw Ccauh kya a zei hae.⁴⁶A paaw Asa she lya-e a laehy hae paw beikinn kya a ohhuakuhpaw pise hae kha ram kyate a maemih hae.

⁴⁷Edom ram kya tuh siapharan um khyh; Judah siapharan nynh a khangpaw siapharan a bawmtu nynh ram kha a uk.⁴⁸Jehoshafat nynh Ofir ram lang cceih zah sui a phu lanpaw Tarshish sanphalung hae kha a rae hae; thuasalama cceih khyh hae; pawccecize sanphalung hae tuh Eziongeber kya aroh hae.⁴⁹Tetuh Ahab ccapaw Ahaziah nynh Jehoshafat kha, “Ka ryalahtu hae tuh na ryalahtu hae ryte sanphalung kya cceihkheih hae sah,” a cipya, thuasalama Jehoshafat nynh ry khyh.⁵⁰Jehoshafat tuh a minpaaw hae ryte ih hae zah, a minpaaw David khua khe a minpaaw hae ryte a uukheih hae; a ccapaw Jehoram nynh amaw ccelang siapharan lang a tang. Ahaziah nynh Israel A Uk

⁵¹Judah siapharan Jehoshafat nynh ram a uknaw kum haw lae sarinaw kum khe Ahab ccapaw Ahaziah nynh Israel kha Samaria khua kyate a uk takaw; aning nynh Israel kha kum ning a uk.⁵²Aning nynh Bawipaw muihnaw kya hoyleinaw kha rae zah, a paaw te a nung laanpi kha thuasah, Israel hae kha seinaw a raesah hae paw Nebat ccapaw Jeroboam laanpi kha thuasah a zui.⁵³Aning nynh Baal kha ryalawpah zah a beik; a paaw nynh a cyi hawte Bawipaw , Israel Pachia kha a thin a riasah.

Bible Society of Myanmar

https://app.library.bible/content/1a340f5ae072b2f4