Luke18
1En Siđăch đơm an khây nĕh ju sinlơ prŭp chĕq an sây vrŭq cơnh vlơ lĕq bây khây nĕh nŏq cồ căh wân lawân vơu ngwân, bây vâng n'hyoq vông nuih,2pành: “U sŭng palây tĭq gĕh du mvu ganwâr săc si heq đăng phŭng Cô Voq, khoi đăng phŭng vu lây lĕq.3Sŭng palây nŏq gĕh du mvu ur mrô, bây nĕh gât tât bây ganwâr nŏq, pành: ‘Wĭnh sên sŏq sinlơ sŏng gal an ănh u vôq măt tamun tăm chŏl ănh.’4Pành du vông khay mva ganwâr nŏq đăng chĕq nuih tât, en alưr nŏq, nĕh nhai ayh bây di nơm: ‘Cồ pành ănh đăng phŭng Cô Voq đăng sên vu lŭh păch lây,5en ur mrô heq gât tât jilŏq n'jĕh diêt ănh, nŏq ănh tayh vrŭq sŏng yăh an nĕh, chĕq nĕh đăng ôp ănh vuyh n'hyoq cơ tât diêt vôq lưr di tât lăm en vrŭq heq.’”6En Siđăch nhai: “Iêt chăng camvŭm ganwâr cồ đăng sŏng yăh nŏq nhai.7Payh canŏq, pành vaih Siđăch Trôq đăng lŭh ti ôp sinlơ yăh sŏng an khây tamun gĕh sŏq săch Siđăch de, cồ khây tamun năr măng cuôl wĭnh Siđăch, pành Siđăch lĭh jâq bây khây nĕh?8Gru nhai bây pôp ŏh pành Cô Voq nhâng ôp vrŭq yăh sŏng an khây nĕh di jăc. Payh canŏq, lăm Con Tamun tât, Nĕh nhâng wŏng sây sinlơ tôq camvân u dưnya đăng?”9En Yêsu khoi đơm du sinlơ prŭp chĕq an takiq ndu, cồ khây nĕh uĕh sên camvân ayh u nơm pành vơn cồ yăh sŏng bây sên vu ndây atĕh can'hâm:10“Var ndu saq hao tât nhi cŭh vơu ngwân — du mvu tamun Pha-ri-si, bây ndu tĭq tamun sŏq jên pâng ya.11Tamun Pha-ri-si tao yăq vơu ngwân khây camvŭm heq sĭq bây nơm: ‘Cŭh Cô Voq, con may mo Cô mvăc con đăng gal dân ca khây vu ndây — nĕh cồ avlăh, nĕh cồ đăng sŏng yăh, nĕh cồ cani camăn — ha cồ ca tamun sŏq jên pâng ya heq.12Con krêng sa du twâng var dâq. Con pađăc du phân mât sŭng ăp sinlơ cồ wŏng gĕh.’13En nĕh cồ sŏq jên pâng ya, lăm tao yăq a ngai, tât daq đăng thêng tămhơch măt hao vlơ trôq, palâq vlâq nĕh pâm gatâh nơm, bây pành: ‘Cŭh Cô Voq, wĭnh sinđach con, cồ ndu bưn bap heq.’14Gru nhai bây pôp ŏh, tamun heq saq sĭq nhi nơm gĕh pành yăh sŏng đăng gal nĕh tĭq uy, mvăc vu lây iơq nơm hao prĭh nŏq cồ vlam sinlơ tănjưr, en vu lây tănjưr nơm nŏq gĕh iơq hao prĭh.”15Lăm nŏq, Khây vu văt khây con se tât bây Siđăch chĕq an Nĕh rapâq khây nĕh, lăm sây canŏq, khây con tuyh chih khây tamun văt nŏq.16Aheq Siđăch Yêsu cuôl khây nĕh tât, nhai: “Chĕq mŏq con se tât bây gru, bây vâng pâh khăq khây nĕh. Mvăc daq Cô Voq sĭq ndăl khây tamun canŏq.17Nhâng canŏq, gru nhai bây pôp ŏh, hê vu lây đăng wŏq tôq daq Cô Voq dân ca con se, nĕh nŏq payh nhâng đăng gĕh lăp sŭng nŏq.”18Du mvu ganwâr tĭq lŭp Siđăch, pành: “Ơ gru cồ yăh sinđach, ănh don wŏq sinlơ rĭh wân lawân lăm ôp păch lây?”19En Siđăch Yêsu nhai bây tamun nŏq: “Lŭh pôp cuôl ănh pành yăh sinđach? Đăng gĕh vu lây cồ yăh sinđach ayh du mvu Siđăch Trôq vŏq.20Pôp gĕh gưt khây ravwŏq — đăng tagoq bưn bap cani camăn, đăng tachưt tamun, đăng can'hưn avlăh, đăng candân mvâr, căh phŭng sinđach vap mê nơm.”21Phŭch cồ pôp nŏq âh: “Ănh gĕh jơ lĕq khây ravwŏq nŏq a lăm hôm klô dlu răch.”22Payh canŏq, lăm chăng sinlơ nŏq, Siđăch Yêsu nhai bây tamun nŏq: “Hôm mo du sinlơ ndŏh lôch u pôp. Sô tăch lĕq khây păch lây pôp gĕh bây sŏq paq an khây tamun lŏh sat, nŏq pôp gĕh păch caya yăh u vlơ Trôq — bây nŏq tât heq, saq bây ănh.”23En lăm chăng khây camvŭm nŏq, pôp nŏq camhơi nuih tôr canjŏq canjơng, mvăc nĕh jina valay lŭng.24En alưr lăm sên pôp nŏq, Siđăch Yêsu nhai: “Khây tamun gĕh gŏq păch caya lăp sŭng daq Cô Voq de đăng dê dŭng uy!25Mvăc nhâng cồ dê dông an con lạc đà đŭh lăp chhŭng jrŭm, wĕh bây du mvu jina lăp sŭng daq Cô Voq de.”26Payh en, Khây vu chăng sinlơ nŏq, lŭp: “Canŏq vu lây cồ gĕh yơt?”27Yêsu âh: “Khây vrŭq đăng gĕh prơn chĕq ôp bây con tamun nŏq gĕh prơn bây Cô Voq.”28En Phi-e-rơ pơq mŭnh: “Gru sên, khananh hwât lĕq ăp sinlơ saq bây gru.”29Nŏq, Yêsu nhai bây khây nĕh: “Nhâng bâng, gru nhai bây pôp ŏh pành đăng gĕh du mvu lây cồ hwât chĕq nhi la, si-ur, pôp ŏh, mê vap, ha con sinau, mvăc ju vrŭq daq Cô Voq de30en cồ tamun đăng pành wŏq sŏq vênh rămvi dông sŭng vri heq, bây sŭng vri ĭh au, nŏq cồ sinlơ rĭh wân lawân.”31Alưr nŏq, lăm iau văt ayh mât var ndu con tuyh, Yêsu nhai bây khây nĕh: “Heq, vơn lŭh saq hao palây Yê-ru-sa-lem nggâm bây ăp sinlơ gĕh chêr sĭq Con Tamun don ju khây tamun nhai lor en heq gĕh jêng gayh.32Mvăc Yêsu en heq vu nhŭp dơp lăp ti văl daq ndây, vu gơm chhŏh, ôp pagơq pahơn, bây vu chhŏh phŭch.33Alưr lăm pâm gông Siđăch, vu tachưt chĕq Nĕh, bây tât năr di pe Nĕh tao rĭh sĭq vlâq.”34Khây con tuyh đăng sinâng lŭh khây vrŭq heq, bây camvŭm nŏq gât hôm khlop nđâp sưt ntrăch a khây nĕh, nŏq khây nĕh đăng dân gưt khây vrŭq gĕh nhai lŭh.35Vrŭq sẫy lŭh lăm Siđăch saq mơch tât palây Yê-ri-cô, du mvu khlông măt nĕh gŭq wĭnh sa u vĕq trong.36Lăm chăng camvŭm mintan văl ganơ saq găn ju nŏq, nĕh lŭp pành păch vrŭq lây nŏq.37Vu an nĕh gưt pành: “Yêsu cồ tamun Na-sa-ret saq găn heq.”38En nŏq nĕh cuôl tayh, pành: “Ơ Yêsu, Con Vatau Đa-vit, wĭnh sinđach ănh.”39Khây vu cồ saq avôq chih raq nĕh, chĕq nĕh krap mŭnh. En nĕh cuôl tayh vlơ a nŏq wŏq: “Ơih! Con Vatau Đa-vit, wĭnh sinđach nơm ănh.”40Vadâq nŏq, lăm pâh sĭq vlâq, Siđăch Yêsu săng dơp pôp nŏq tât Siđăch. En lăm pôp nŏq tât mơch, Siđăch lŭp nĕh:41“Pôp cơnh ănh ôp păch lây an pôp?” Nŏq en nĕh âh: “Cŭh Siđăch, nŏq cồ wĭnh an ănh gĕh deng sây.”42Siđăch Yêsu nhai bây nĕh: “Sô sên sây sĭq vlâq! Sinlơ tôq camvân pôp de ranăm yăh an pôp.”43Sưmmrât, pôp sên sây sĭq vlâq en nĕh saq bây Siđăch, pađăc sinlơ sindraq sindil an Siđăch Trôq. Lăm sây canŏq, ăp ndu ayh pađăc camvŭm payom tapơ Siđăch Trôq.
FAR EAST BROADCASTING COMPANY