Luke19
1Lăm lăp sŭng di lăm, Siđăch saq găn ntrăch palây Yê-ri-cô.2En sô deng sên du mvu, gĕh cuôl săq pành Sa-chê, nĕh sên vôq vrŭq pâng ya, bây nĕh gan'hăp jina lŭng.3Nĕh wŏng trong sên disây Siđăch Yêsu ade vu lây, en nĕh chơh cồ piêt truh a mintan văl gŏq săq, mvăc rup nơm nĕh dêh ken.4En lăm mprăng lor avôq, nĕh hao vlơ chhơ ra chĕq tămhơch disây Siđăch mvăc Siđăch saq găn ju trong nŏq.5Lăm Siđăch saq tât gatŭq nŏq, tămhơch hao, Siđăch Yêsu nhai bây nĕh: “Sa-chê, jưr di sô, mvăc năr heq ănh gŭq vlâq u nhi pôp de.”6Aheq nĕh mrưm nrâm mpŏh jưr bây hơn vui roc wŏq Siđăch.7Lăm sây canŏq, văl ganơ ayh a raphut a raphit, nhai pành: “Cô nŏq lăp gŭq simơ bây du mvu bưn bap.”8En lăm Sa-chê lŭh tao yăq, nĕh pơq camvŭm bây Siđăch: “Cŭh Siđăch, wĭnh sên heq, ănh paq vanăc caya ănh je an tamun lŏh sat, bây hê ănh sa vôq nco vu de păch lây, ănh song vlâq puôn vadâq canŏq.”9Lăm nŏq, Siđăch Yêsu nhai bây nĕh pành: “Năr heq sinlơ yơt wŏq gĕh tât nhi heq èn, mvăc pôp heq khoi cồ con sinau Ap-ra-ham de.10Mvăc Con Tamun gĕh tât chĕq wŏng bây yơt tamun phiêt chĕq.”11Sŭng lăm khây nĕh chăng khây camvŭm nŏq, Siđăch pơq mŭnh đơm du păch prŭp, mvăc Siđăch gŭq mơch palây Yê-ru-sa-lem, en vu sinâng pành daq Cô Voq de mơch tât lawân èn.12Payh canŏq, Siđăch đơm: “Du mvu sĭq njang vatau tĭq saq tât vi ngai chĕq nơm nĕh wŏq ganwâr vatau en palâq sĭq.13Alưr lăm cuôl mât ndu dĭch năc nĕh tât, nĕh dơp an khây nĕh mât mi-na bây nhai bây khây nĕh: ‘Sô tăch vro sŭng lăm anh saq ngai.’14En Khây văl ganơ nĕh de ncom nĕh bây iơq du mintan iau vôq saq dăh alưr nĕh nhai: ‘Khananh đăng cơnh tamun heq sên vôq vlơ khananh.’15Vrŭq sẫy lŭh lăm nĕh palâq sĭq alưr lăm wŏq ganwâr vatau, nĕh pân cuôl tât vlam nĕh khây dĭch cồ nĕh gĕh dơp jên, chĕq nĕh cơnh gưt ăp ndu ôp lŭh gĕh păch lây a vrŭq tăch vro nŏq.16En nŏq, tamun di muôi tât, nhai: ‘Khwây cô, păndŏh cô de gĕh ôp săch lŭh mât păndŏh.’17Nơm nhi nhai bây pôp nŏq: ‘Dĭch năc cồ yăh sŏng, yăh lŭng. Mvăc pôp gĕh ôp gân yăh a vrŭq ken, nŏq pôp gĕh sên vôq sŭng mât palây.’18En tamun di var tât, nhai: ‘Khwây cô, mi-na cô de gĕh ôp lŭh prăm păndŏh mi-na.’19En nơm nhi khoi nhai bây pôp nŏq: ‘Pôp sô sên vôq prăm palây.’20Du mvu ndây tât, nhai: ‘Khwây cô, wĭnh sên hèq păndŏh mi-na cô de cồ ănh gĕh jơ, gĕh chŭm prăp sŭng nseng,21payh ănh phŭng cô, mvăc cô cồ tamun vrưng kranh. Cô uĕh sŏq sŭng tŭq cồ đăng chĕq, bây jwŏq sŭng gatŭq nơm đăng vrŏh.’22Nơm nhi nhai bây pôp nŏq: ‘Pănggơih vlơ camvŭm nhai pôp de, ănh ôp dôih pôp, săq dĭch năc viêm chhâc. Pôp gưt pành ănh cồ tamun vrưng kranh, uĕh nhŭp sŭng vi cồ ănh đăng chĕq, bây jwŏq sŭng gatŭq cồ ănh đăng vrŏh.23En păch n'hya di tơm pôp đăng dơp jên ănh je lăp tŭq tănlŭh gĕh jên, chĕq hê lăm ănh sĭq, ănh khoi cabôm vlâq jên nŏq nggâm păch sach-e?’24En nĕh nhai bây khây vu cồ tao yăq u nŏq: ‘Sô nhŭp păndŏh mi-na a nĕh heq en dơp an nĕh cồ gĕh mât păndŏh.’25Khây nĕh nhai bây cô nŏq: ‘Khwây cô, pôp nŏq lĕq gĕh mât păndŏh mi-na en.’26‘Ănh nhai an pôp ŏh di gưt, vu lây gĕh en nŏq gĕh an wŏq, en a nĕh cồ đăng gĕh, mŏh vu nhŭp sŏq văt lawân păch cồ nĕh gĕh wŏq.27En cồ khây tamun tăm chŏl bây ănh tĭq, cồ tamun đăng cơnh ănh sên vôq vlơ khây nĕh, sô têch rawĭq khây nĕh tât heq bây tangân khây nĕh u măt ănh.’”28Alưr lăm nhai khây camvŭm nŏq, Siđăch pơq jâng dăh bây tanrong dâl tât vôq mvôq, cơ jưt njưt hao tât Yê-ru-sa-lem.29Vrŭq sẫy lŭh lăm Siđăch saq mơch tât Bêt-pha-yê bây Bê-tha-ni, tât tŭq gŭng gĕh cuôl pành Ô-liu, Siđăch pađăr var ndu con tuyh,30pân pành: “Saq lăp palây sŏng vôq măt, lăm lăp sŭng nŏq, pôp ŏh sây du lâm asĕh răch con vu nchăp, u vlơ asĕh răch nŏq ndŏh gĕh vu lây hao nĕh. Alưr lăm đŏh chhe nchăp nĕh, têch sĭq heq.31Hê vu lây lŭp pôp ŏh: ‘Di tơm khây pôp đŏh chhe nĕh?’ nŏq pôp ŏh nhai pành: ‘Siđăch cơnh don nĕh.’”32Payh cồ, lăm var ndu gĕh pađăr chĕq lŭh saq, khây nĕh sây ăp vrŭq dân ca Siđăch gĕh nhai bây khây nĕh.33Lăm khây nĕh đŏh chhe tănchăp asĕh răch con, khây nơm nhi asĕh nhai bây khây nĕh: “Lŭh khây pôp đŏh chhe asĕh con lŭh lòh?”34Khây nĕh âh pành: “Siđăch gĕh vrŭq cơnh don nĕh.”35En khây nĕh têch asĕh sĭq an Siđăch Yêsu bây alưr lăm lăq ao jong nơm hao vlơ ncơi asĕh răch, khây nĕh iơq Siđăch Yêsu gŭq vlơ nĕh.36Lăm Siđăch saq ntrăch, vu lăq ao jong khây nĕh u vlơ trong.37Lăm Siđăch tât mơch tabôq gŭng Ô-li-ve, lĕq mintan con tuyh gŏq săq pơq camvŭm vui hơn, măq mŭnh simơ payom Cô Voq sĭq lĕq khây vrŭq prơn gŭn cồ khây nĕh gĕh sây,38pành: “Yăh vŏq âr cồ Vatau tât sŭng săq Cô Voq! Iên yăh u vlơ trôq, bây sindraq sindil u vlơ lawang prĭh!”39Takiq ndu tamun Pha-ri-si a sŭng mintan văl ganơ nŏq nhai bây Siđăch: “Khwây gru, wĭnh chih lăh khây con tuyh gru.”40Âh bây khây nĕh, Siđăch nhai: “Ănh đơm bây khây cô, pành hê khây nĕh gŭq krap nŏq khây tamô heq sec tayh hao.”41Lăm Siđăch tât mơch èn, mŏh deng sây palây măq, Siđăch nhim sĭq nĕh,42nhai pành: “Payh pành may di gưt hàh sŭng năr heq, nhâng di nơm may gưt di dân, khây sinlơ văt tât iên yăh! Cồ canŏq, khây nĕh avrêq vlam sinlơ khlop khăq ôp nđâp ntrăch a măt may.43Mvăc gĕh năr sẫy tât vlơ may, khây nĕh cồ tăm chŏl bây may payh khwai ntĕh vŭq di prĭh rawênh may, khây nĕh talong rawênh may, en pâm lăp tât may lam ăp maq.44Khây nĕh pâm sa may nggâm ŏh con may cồ gŭq bây may. En khây nĕh đăng chĕq vlâq cồ du palang tamô lây tăm cơl vlơ du palang tamô ndây u tŭq may, payh mvăc may đăng gưt lăm cồ nơm gĕh mơq dom.”45En lăm lăp sŭng nhi cŭh, Siđăch dăh lĕq khây tamun tăch vro u nŏq,46nhai bây khây nĕh: “Gĕh camvŭm chêr: ‘Nhi Ănh cồ nhi vơu ngwân,’ en khamay wâr nĕh jêng lŭh ‘ndăng vơc can'hưn avlăh.’”47Ăp năr Siđăch gât pađau tămti u sŭng nhi cŭh. En khây sipăm măq, khây gru tămti ravwŏq bây khây nĕh cồ sên vôq văl ganơ payh gât wŏng trong tachưt Siđăch,48en khây nĕh ndŏh wŏng gĕh vrŭq lây chĕq khây nĕh lŭh ti, mvăc lĕq săq văl ganơ mrŏng mrŏng chăng iêt Siđăch.
FAR EAST BROADCASTING COMPANY