Hebrews9
1Vrêq heq, vrŭq tăm lăp ti di muôi nŏq gĕh khây sinlơ pađau sĭq vrŭq cŭh sưmvăh, saq bây du gatŭq jrŏh soch u ntĕh,2mvăc du padai sưmvăh cồ gĕh tatao hao, maq di muôi, sŭng nŏq gĕh lawân jâng ŭnh bây nra, nggâm bây bănh pađăc hao, cồ gatŭq gĕh cuôl pành “Gatŭq Soch Jrŏh”,3en alưr du păng cŭmvai di var cồ maq padai sưmvăh, gatŭq gĕh cuôl pành “Gatŭq Mơ Jrŏh Soch”,4gĕh du mvrăh pađăc n'hŭm ôp a mơh, bây dor tăm lăp ti gĕh pưt lam rawênh a mơh, sŭng di lăm nŏq cồ du lâm sitôq ôp a mơh vadâng ma-na, chhơ gadông lŭh ncao A-rôn de, nggâm khây păng tăm lăp ti,5hôm avlơ dor, khây chê-ru-bim sindraq tang tŏq sitŭq thi ân, en sĭq khây păch nŏq đăng gal lăm chĕq nhai lŭh a sinlơ uy.6En lăm khây păch nŏq gĕh sŭmmrăp canŏq, khây gru sipăm uĕh saq lăp u sŭng padai pănggơih di muôi, chĕq ôp khây vrŭq cồ nơm gĕh wŏq sŏq.7En ayh gru sipăm măq lăp sŭng maq di var du dâq sŭng du mva, bây gĕh n'ham, cồ con pađăc cồ nĕh pađăc hao ala an nơm nĕh khoi ca khây bưn bap văl ganơ de.8Siđăch Wênh ju vrŭq nŏq an sây dân pành trong lăp sŭng gatŭq gŭn khoi hôm ndŏh gĕh pơq lŭh, lăm padai sưmvăh di muôi khoi hôm tao yăq,9sinlơ nŏq cồ du vrŭq tăm wĕh chĕq an khây nggơih vrêq heq, en bây trong nŏq, lawân păch pađăc nggâm con pađăc gĕh pađăc hao đăng gĕh prơn chĕq ôp jêng yăh an tamun cŭh sưmvăh chĕq tabaq sĭq nuih talaq,10ayh ratênh tât păch sa bây păch huch, nggâm khây lễ chhat rao tăm ca-ayh, nŏq cồ khây ganơt sĭq săq swan, chĕq tănchăp di tât năr tăm pagâl.11Cồ canŏq Siđăch Yơt Dưnya, lăm lŭh măt sŭng gatŭq gru sipăm măq an khây sinlơ yăh rom lĕq gĕh jŏq èn, don ju padai sưmvăh măq mi dông nggâm jêng yăh dông đăng gal ti con tamun tatao hao, nŏq cồ đăng sĭq maq dưnya gĕh sun lŭh heq,12khoi đăng gal payh ơ n'ham dive kwŏng de nggâm lamo con de, aheq don ju n'ham nơm, Siđăch gĕh lăp sŭng khây gatŭq gŭn du dâq lôch lawân, ayh u nơm wŏng gĕh sinlơ têch yơt wân lawân.13Mvăc hê n'ham ve ve kwŏng bây lamo kwŏng nggâm vrŭq vrŏh vuh lamo vang drŭh vlơ tamun cồ sŭq cavơm hôm mo văt tât sinlơ jêng jrŏh, don sŭng vrŭq chhat rao săq swan khây nĕh,14nŏq n'ham Siđăch Yơt Dưnya de, cồ Candranh don Siđăch Wênh wân lawân gĕh pađăc nơm Nĕh ôp păch pađăc đăng chŏh laq an Siđăch Trôq, nhâng ôp jrŏh nuih talaq pôp ŏh de gưt dâng lây chĕq ntrăch khây vrŭq chưt chĕq tachŏq an Siđăch Trôq hôm mrĭh wân lawân!15Payh canŏq, Siđăch cồ Candranh Vlăc Canđal sĭq vrŭq tăm lăp ti me, chĕq alưr sinlơ chưt chĕq ân an vrŭq song yơt khây sinlơ tabaq bưn bap pănggơih vlơ vrŭq tăm lăp ti di muôi gĕh ôp lŭh, khây tamun gĕh cuôl panh gĕh wŏq sŏq camvŭm pănggân sĭq păch caya wân lawân.16Mvăc tŭq lây gĕh sirăq pân chĕq don, u nŏq nhŭp tănh sinlơ chưt tamun chêr sirăq pân don vlâq nŏq gĕh candân.17Mvăc sirăq pân chĕq dơn vlâq ayh jêng gayh don u sinlơ chưt, payh canŏq nĕh đăng don gĕh lăm tamun cồ chêr sirăq pân dơn vlâq hôm mrĭh.18Payh canŏq, sŏng lawân vrŭq tăm lăp ti a vôq lĕq khoi đăng gĕh ôp lŭh en đăng gĕh n'ham.19Mvăc lăm ăp camvŭm pân bây ravwŏq gĕh Môi-se nhai lŭh an lĕq văl ganơ, alưr lăm sŏq n'ham lamo con bây ve ve kwŏng, nggâm bây daq, chhe paih paho bây singging chhơ nthôr, nĕh gĕh vrŏh lawân vlơ păng sirăq taklôn nggâm lawân lĕq con văl,20nhai pành: “Heq cồ n'ham tăm lăp ti cồ Siđăch Trôq gĕh pân pađau an pôp ŏh.”21En bây tanrong simơ canŏq, nĕh vrŏh n'ham vlơ padai sưmvăh bây khây păch cồ sŏq chĕq ôp sŭng vrŭq pađăc.22Dăh bây ravwŏq, pành mơch lĕq ăp sinlơ gĕh chhat rao ayh a n'ham, en đăng gĕh sinlơ tapinh n'ham nŏq đăng gĕh sinlơ bôih hwât bưn bap.23Payh canŏq, du maq, vrŭq nhâng cơnh di gĕh nŏq cồ khây sinlơ sŏq ôp dŭng sĭq khây sinlơ vlơ trôq gĕh chhat rao don ju con pađăc heq, en măt ndây, payh cồ khây păch u vlơ trôq phải gĕh chhat rao a khây con pađăc yăh dông găn ntrăch vlơ khây con pađăc nŏq,24mvăc nhâng, Siđăch Yơt Dưnya đăng lăp sŭng di lăm khây gatŭq gŭn cồ ti con tamun ôp lŭh — cồ khây sinlơ sŏq ôp dŭng sĭq khây păch gĕh nhâng — palâq sĭq vlâq nŏq cồ lăp sŏng sŭng Daq Trôq, chĕq vrêq heq lŭh măt u vôq măt Siđăch Trôq ala an vơn,25khoi đăng gal chĕq pađăc nơm vơn gŏq dâq, dân ca gru sipăm măq ăp mva saq lăp sŭng khây gatŭq gŭn nggâm bây n'ham tamun ndây de;26Mvăc hê đăng gal canŏq, nŏq vrŭq cơnh vlơ lĕq an Siđăch nŏq cồ phải vlam lŏh sat gŏq dâq alăm tatao tơm dưnya. En vrêq heq, ayh du dâq lăm chôch khây nggơih, payh ơ vrŭq ôp panjwăch jrŏh bưn bap, Siđăch gĕh pơq an sây don ju sinlơ chưt Nĕh de.27En bây vrŭq cồ gĕh sŭmmrăp sindăc an con tamun phải chưt du dâq, en alưr nŏq cồ sinlơ ôp dôih,28en khoi canŏq, alưr lăm gĕh pađăc hao ayh du dâq chĕq văq nong bưn bap an gŏq ndu, Siđăch Yơt Dưnya gĕh deng sây sŭng dâq di var, đăng gal chĕq văq nong bưn bap, en chĕq sinlơ wŏq yơt tât bây khây vu lây lĕq nuih câp nggơ Nĕh.
FAR EAST BROADCASTING COMPANY