Hebrews8
1Payh canŏq, gatŭq măq vlơ lĕq sĭq vrŭq cồ gĕh nhai nĕh caheq: Khây vơn gĕh du gru sipăm măq canŏq, cồ Candranh gŭq a maq ma gatŭq gŭq Candranh Măq Mi de vlơ khây tăp trôq,2du mvu dĭch năc sŭng gatŭq gŭn bây padai sưmvăh nhâng bâng cồ nơm Siđăch tatao hao, đăng gal con tamun.3Mvăc ăp ndu gru sipăm măq nŏq gĕh iơq hao chĕq pađăc lĕq khây păch pađăc nggâm khây con pađăc, cồ payh u nŏq, Candranh nŏq khoi cơnh gĕh păch lây nŏq chĕq Siđăch pađăc hao gĕh.4Nŏq, pành payh Siđăch hôm gŭq u dưnya heq, nŏq payh pành Siđăch tât daq đăng ôp sipăm, mvăc lĕq gĕh khây tamun pađăc păch pađăc dăh bây ravwŏq;5cồ khây tamun ôp sipăm nŏq tăm simơ du haih cồ bây ca rup gui khây vrŭq vlơ trôq; dân ca Môi-se gĕh pân lăm mơch jêng en padai sưmvăh, mvăc Siđăch Trôq gĕh nhai: “Căh jơ di yăh, con nhâng ôp ăp vrŭq bây tơm têr cồ gĕh nhai pân con u vlơ gŭng.”6En vrêq heq, Siđăch gĕh wŏq du vrŭq ôp măq mi dông dâng lây, Siđăch khoi cồ Candranh Gŭq Canđal vrŭq tăm lăp ti yăh dông dâng nŏq, cồ sinlơ tăm lăp ti gĕh tayh jêng pănggơih vlơ khây camvŭm pănggân yăh dông.7Mvăc hê vrŭq tăm lăp ti di muôi nŏq cồ đăng tih wil, nŏq nhâng pành gatŭq an vrŭq tăm lăp ti di var nŏq đăng wŏng sây gĕh.8Mvăc lăm chih lăh văl ganơ, Siđăch Trôq pành:“Deng sên hèq, khây năr nŏq saq tât, Cô Voq nhai:en Ănh ôp jêng gayh du tăm lăp ti mebây nhi I-sơ-ra-ên nggâm bây nhi Yu-đa;9đăng pănggơih bây vrŭq tăm lăp ticồ Ănh gĕh panh bây khây cô jây khây nĕhsŭng năr cồ Ănh văt ti khây nĕhchĕq têch khây nĕh lŭh ntrăch ntĕh Ai-câp,mvăc khây nĕh đăng gŭq diêt sŭng vrŭq tăm lăp ti Ănh je,Ănh khoi lĕq hwât tabayh khây nĕh,Cô Voq nhai.10Mvăc heq cồ vrŭq tăm lăp ticồ Ănh ôp lŭh bây nhi I-sơ-ra-ênalưr khây năr nŏq,Siđăch nhai,lăm chĕq khây ravwŏq ănh je lăp sŭng vôq tôr khây nĕh,Ănh khoi chêr khây ravwŏq nŏq lăp sŭng nuih talaq khây nĕh,en Ănh heq cồ Siđăch Trôq ndăl khây nĕh,en khây nĕh cồ du văl chĕq an Ănh.11Nhâng bâng khây nĕh đăng gĕh pađau ăp ndu sŭng ganai nơmnggâm bây ăp ndu pôp ŏh nơm, pành: ‘Căh singgal gưt Cô Voq,’mvăc lĕq săq khây nĕh gưt Ănh,a khây tamun ken dông lĕq sŭng khây nĕh di tât tamun măq dông lĕq.12Mvăc Ănh nhâng nkhơch ti bây khây vrŭq ôp đăng yăh sŏng khây nĕh de,en Ănh nhâng bâng đăng hôm căh tât bưn bap khây nĕh de wŏq.”13Mvăc vrŭq nhai lŭh cồ “me”, nŏq Siđăch ôp an vrŭq tăm lăp ti di muôi jêng lŭh păch dâm tabayh èn; en vrŭq cồ ôp an đăng hôm tăm răp bây lŭh dâm sam nŏq sên dân ca cồ păch lĕq lêch lawăch èn.
FAR EAST BROADCASTING COMPANY