1 Timothy6
1Lĕq săq khây tamun cồ gŭq a tĕh yơu dĭch năc, căh sên tơm nhi nơm nhâng pành lĕq nuih talaq ta-iơq prĭh, chĕq săq Siđăch Trôq nggâm sinlơ pađau tăm ti đăng vlam vu nhai viêm.2Sĭq măt ndây, khây dĭch năc gĕh khây tamun sên vôq cồ tôq Cô Voq nŏq đăng gĕh pành khây nĕh cồ pôp ŏh nŏq sên đăng lŭh păch lây, en căh ôp vrŭq yăh dông wŏq, mvăc khây nĕh cồ con sinau Siđăch bây tamun gĕh sinđach, tamun tăm doq ti lăp sinlơ ôp vrŭq. Con căh pađau tăm ti bây pân ca'hya ăp sinlơ nŏq.3Hê vu lây pađau tăm ti ca-ayh bây đăng wŏq ăp camvŭm cồ yăh, nŏq cồ camvŭm Siđăch vơn de, cồ Candranh Krit Yêsu, nggâm bây camvŭm pađau sĭq sinlơ tôq wŏq,4nŏq vu nŏq cồ tamun lơq săq nơm, đăng gưt păch lây, nŏq nĕh cơnh ayh păch nrui sŭng sinlơ tăm cammlăh bây tăm chih tăm măq nuih sĭq camvŭm nhai, a nŏq en ôp lŭh sinlơ tăm canănh, tăm chŏl, chih viêm, sinâng vrŭq đăng yăh,5tăm cammlăh, u sŭng khây tamun tih viêm sŭng chhu vôq bây pŏh pât pachĕq sinlơ dip gal, sên sinlơ tôq phŭng cồ du vrŭq chĕq wŏng sa. 6Nhâng sinlơ tôq phŭng nggâm bây sinlơ vayh nuih cồ vôl tuyh twơ măq.7Mvăc vơn đăng văt păch lây lăp dưnya, nŏq vơn khoi đăng văt păch lây saq gĕh.8Măt ndây, lăm gĕh piêng sa, ao chuq, nŏq vơn nhâng gĕh vayh nuih sĭq khây sinlơ nŏq.9Hôm khây tamun cồ cơnh di gĕh jina nŏq vông lăp sŭng sinlơ lamvoch soch se bây tăm văc dăq, bây gŏq sinlơ cơnh can'hir vôt gala vatwŏq, rabăh rabơp, nŏq cồ khây sinlơ yâl tavŭq nĕh nŏq lăp sŭng sinlơ vông jŏch bây phơi chĕq.10Mvăc tơm diyĕh vưt lôch ăp sinlơ viêm chhât cồ sinlơ cơnh can'hir jên caih, gĕh takiq ndu, mvăc cơnh can'hir nĕh, mŏh vlam sinlơ têch iau lŭh ntrăch a sinlơ tôq camvân bây ôp lŏh sat an nơm nggâm gŏq sinlơ ji nuih.11Nŏq ơ con, tamun Siđăch Trôq de, căh diêr di ngai a khây sinlơ nŏq, nŏq saq ndap bây sinlơ yăh sŏng, tôq phŭng, tôq camvân, sinlơ sinđach, mbêr nuih, yăh lamut lamit.12Căh tăm chŏl sŭng vrŭq tăm mprăng yăh rom sinlơ tôq camvân de, căh jơ di jăp sinlơ rĭh wân lawân, nŏq sinlơ cồ con gĕh cuôl tât bây gĕh raq săq camvŭm nhai lŭh yăh rom u vôq gŏq tamun candân.13Ănh gĕh camvŭm pân an con u vôq măt Siđăch Trôq, Candranh ôp an ăp sinlơ gĕh hôm mrĭh, bây u vôq măt Candranh Krit Yêsu, Candranh cồ dơp lŭh camvŭm nhai yăh rom u Bôn-sơ Phi-lat,14pành con căh ôp bây camvŭm pađau heq an đăng sâq vơm, đăng tŭq lây chĕq vu cammlăh, di tât năr lŭh măt Siđăch vơn de, cồ Candranh Krit Yêsu,15nŏq Candranh cồ Siđăch Trôq Măq Mi gĕh tapơ payom bây ayh muôi, cồ Vatau vlơ khây vatau nggâm Siđăch vlơ khây siđăch, nhâng gĕh văt lŭh sŭng năr khay cồ tât,16ayh du mvu Siđăch cồ gĕh sinlơ đăng chưt, gŭq sŭng sinlơ silang đăng saq tât mơch gĕh, cồ Candranh đăng vu lây sên sây gĕh, khoi đăng vu lây lôch prơn sây gĕh, ngwân sinlơ tôq phŭng nggâm prơn gŭn wân lawân sĭq Siđăch. A-men.17Căh pân ca'hya tamun jina sŭng dưnya heq vâng iơq nơm, bây vâng camvân u păch caya đăng kram gajăp, nŏq câp camvân u Siđăch Trôq, Candranh paq an vơn ăp sinlơ vênh rămvi chĕq vui wŏq,18en pân ca'hya khây nĕh ôp vrŭq yăh, vênh rămvi sŭng vrŭq yăh, gĕh nuih talaq simăh, rom nuih chĕq tăm paq,19chĕq prăp an nơm iưn du gatŭq yăh rom an păch mơch tât, chĕq khây nĕh jơ jăp sinlơ rĭh nhâng.20Ơ Ti-mô-thê, con căh jơ sên sinlơ gĕh dơp an con, diêr ngai a khây prau gala vatwŏq u dưnya, bây khây sinlơ tăm cammlăh sĭq ăp sinlơ vu sinâng pành nŏq cồ vanŏh,21nŏq takiq ndu, mvăc gĕh nhai caheq, lăq saq tih trong sinlơ tôq camvân.
Ngwân păch yăh an ngăn gŭq bây khây pôp ŏh.
Ngwân păch yăh an ngăn gŭq bây khây pôp ŏh.
FAR EAST BROADCASTING COMPANY