2 Timothy1

1Phao-lô, con tuyh Candranh Krit Yêsu de don nuih cơnh Siđăch Trôq de, bây camvŭm pănggân sĭq sinlơ rĭh sŭng Candranh Krit Yêsu,2dơp an Ti-mô-thê, con sinđach ănh je: Ngwân păch yăh an ngăn, sinlơ sinđach bây iên sŭc a Siđăch Trôq, cồ Vap bây Candranh Krit Yêsu, Siđăch vơn.
3Ănh pađăc camvŭm may mo Siđăch Trôq, Candranh cồ ănh ôp vrŭq tăm ratênh a khây vap khây cô, bây nuih talaq soch jrŏh, lăm măng năr ănh đăng n'hyơch căh tât con sŭng khây camvŭm vơu ngwân ănh je,4căh yâh vlam con, căh tât daq măt con, chĕq ănh gĕh vênh rămvi sinlơ vui hơn,5mvăc gĕh sinlơ tacăh sĭq sinlơ tôq camvân nhâng bâng sŭng con, cồ sinlơ tôq camvân a daq vôq gŭq sŭng Lô-ít, un a mê con, en Ơ-nít, mê con, ănh tôq pành sinlơ tôq camvân nŏq khoi gĕh gŭq sŭng con,6nŏq payh tu tơm nŏq, ănh tacăh con căh vajŭm sĭq vlâq sinăc Siđăch Trôq de cồ sinăc gŭq sŭng con don a sinlơ chĕq ti ănh je.7Mvăc Siđăch Trôq nhâng đăng paq an vơn nuih wênh la-ui uy, nŏq cồ prơn camhlăng, sinlơ sinđach de bây sinlơ gưt jơ nơm.8Canŏq, con vâng prênh sĭq vrŭq ôp candân an Siđăch vơn, bây vâng prênh poq sĭq ănh, tamun sŭng nhi jingo Siđăch de, ala lăp nŏq, căh wŏq simơ lŏh sat mvăc Sipơp Yăh, don a prơn gŭn Siđăch Trôq de,9Candranh lăq yơt vơn nggâm cuôl panh vơn don a sinlơ cuôl panh jrŏh soch, đăng gal bây vrŭq ôp vơn de, nŏq bây vrŭq tanrong ca-ayh Siđăch de nggâm bây sinlơ yăh an ngăn, cồ sinlơ lăq gĕh paq an vơn sŭng Candranh Krit Yêsu a vôq an tât wân lawân,10nŏq vrêq heq lăq gĕh tănlŭh don ju sinlơ lŭh măt Candranh Yơt vơn de, cồ Candranh Krit Yêsu, lăm gĕh ôp an sinlơ chưt jêng lŭh đăng hôm von nŏq sŏh silang sinlơ rĭh nggâm bây sinlơ rĭh wân lawân don a Sipơp Yăh,11mvăc Sipơp Yăh nŏq cồ ănh lăq gĕh pađau lŭh cồ tamun yảng pađau, con tuyh, nggâm gru pađau tăm ti, 12nhâng mvăc tu tơm nŏq nŏq ănh vlam sŏq chŏl bây ăp sinlơ heq. Nŏq ănh đăng prênh poq mvăc ănh gưt Candranh nơm tôq nggâm ănh nhai camhlăng pành Siđăch gĕh chin'hâu jơ sên sinlơ tôq camvân ănh je an tât năr nŏq.
13Con căh jơ mŏq sinlơ dip gal sĭq ăp camvŭm pađau yăh rom cồ con lăq gĕh iêt u ănh, bây sinlơ tôq camvân nggâm sinlơ sinđach sŭng Candranh Krit Yêsu.14Căh jơ sên sinlơ paq an yăh rom don Siđăch Wênh, cồ Candranh rĭh sŭng vơn.
15Con gưt sinlơ heq, nŏq cồ lĕq săq khây tamun u A-si lăq hwât chĕq ănh, cồ sŭng nŏq gĕh Phi-gen bây Hẹt-mô-gen.
16Wĭnh Siđăch paq sinăc sinđach an caniêp Ô-nê-si-phô-rơ, mvăc nĕh gĕh jrông jrâng ănh diêt bây đăng prênh haih sĭq chhe krêh tăn ănh je,17palâq sĭq vlâq, lăm gŭq u Rô-ma, nĕh gĕh dŭh dăh saq lŭp wŏng ănh en lăq wŏng vlam.18Ngwân Siđăch paq sinăc an nĕh chĕq wŏng gĕh sinlơ sinđach a tŭq Siđăch sŭng năr nŏq. En con gưt dân nĕh lăq ôp vrŭq gŏq dân lây u Ê-phê-sô.

FAR EAST BROADCASTING COMPANY

https://app.library.bible/content/0303570f15afd95e