Revelation8
1Ekw an Maanishchaanish miin kaa manahk chiishaawaach pasakuhiikaniyuu anit masinahiikanihch uhchi. Eukw ekw aniyuu maahchishtai chiishaawaach pasakuhiikaniyuu. Iskutak maak kaa manahk apihtuu tipahiikan namui mitun chekwaan uhchi pehtaakun anite kihchikiishikuhch.2Ekw kaa waapamakwaau anichii niishwaashch enchilich muush uhchishkuu Chishemanituuh e ihtaayich kaa niipuutwaau. Niishwaashch puutaachikanh chii miyaakanuuch.3Chii ihtaau miin kutak enchil e tahkunahk e ushaaushuuliyaanaapiskaayich wiyaakaniyuu kaa wiihchimaakuniyich chekwaayuu kaa chii ishkwaasikanuyich e ihtakuniyich anit. Chii pechi niipuu uhpime anit aniyuu pachishtinicheunaapiskuyuu. Mistahii maak chii miyaakanuu aniyuu kaa wiichimaakusiyich chekwaayuu chechii chiikaunahk utayimichikewiniihch kaa taapwehtamiitwaauh kaye chechii pachishtinamuwaat Chishemanituuh anit kaa ushaaushuuliyaanaapiskuuhch pachishtinicheunaapiskuhch.4Aniyuu kaa wiihchimaakusiyich kaa ishkwaateyich kaa tahkunahk an enchil uhchishkuu Chishemanituu e ihtaayich kaa niipuut, anite Chishemanituu e ihtaayich chii itaapihtepayiniyuu, eyuu aniyuuh kaa taapwehtamiyich utayimihchikewiniyuuh e asichipayiniyikwaauh.5Ekw an enchil kaa saakaschinitaat aniyuu kaa ushaaushuuliyaaunaapiskaayich wiyaakaniyuu ishkuteyuu e ashtaat anit pachishtinicheunaapiskuhch e uhtinahk. Ekw anite aschiihch kaa ishiwepinahk aniyuu ishkuteyuu, Tiiwehch maak chii pehtaakusuuch nimischuuch kaye chii mista waaswaastepayuu kaye chii kuihkun.6Ekw anichii niishwaashch enchilch niishwaashch puutaachikanh kaa tahkunihkwaau kaa ayeskuwiitwaau chechii puutaatahkwaau aniyuuh puutaachikanh.7Ekw an niishtam kaa ihtaat enchil kaa puutaatahk upuutaachikan. Chii miskumiyuuhtaan kaye ishkuteu chii pahchishtin e chiikuupayihch mihkw anite aschiihch e ishi pahchishtihch. Chekaat aapihtuu e ispichiskamikaach aschii chii ishkwaateu. Chekaat maak aapihtuu chii ishpish ishkwaasuuch mistikuch. Misiwe kaye mashkushuuh chii ishkwaateuh.8Ekw miin kutak enchil kaa puutahk upuutaachikan. Muyaam mista wachiih e ishkuteuhch chii ishinaakun chekwaan chihchikamiihch e ishiwepinikanuuhch. Chekaat maak aapihtuu an chihchikamii chii ati mihkuun.9Misiwe taan kaa ishi pimaatisiimakahch nipiihch chekaat aapihtuu chii nipiimakan. Kaye peyakw eshikum nishtu chiimaanh anit kaa ihtakuhkwaauh chii wanaatan.10Ekw an nishtu kaa ihtaat enchil kaa puutaatahk upuutaachikan. E misichihtit achahkush chii pahchishinuu chiishikuhch uhchi anite ishi aschiihch. Muyaam anite e waniskwaahtikuut mistikw e pasut ekun kaa ishinaakusit an achahkush. Chekaat maak aapihtuu e tahtihkwaau siipiih kaye maak taanit pemaachuuhch nipiih ekute kaa ishi pahchishihk an achahkush.11An maak achahkush wiisakan chii ishinihkaasuu. Chekaat maak aapihtuu taanit e ati ihtakuhch nipiih chii wiisakaakamuu. Mihchetu awenichii chii nipahiikuuch aniyuu nipiiyuu e minihkwetwaau ekaa uhchi miywaakamiyich.12Ekw an neu kaa ihtaat enchil kaa puutaatahk upuutaachikan. Chekaat aapihtuu an piisim, kaye chekaat aapihtuu tipischipiisim kaye chekaat aapihtuu e tashitwaau achahkushach chii ihtakuniyuu kaa ishi wanaachihaakanuutwaau ekw namui tekash aapihtuu e iskwaayich e ishpish chihkaashtuwetwaau uhchi ishpish chihkaashtuweuch. Chekaat aapihtaachiishikaauh ishpish namui uhchi chihkaashtuweu piisim. Tipischipiisim kaye maak achahkushach kaye wiyawaau namui uhchi chihkaashtuweuch chekaat aapihtaatipiskaauh ishpish.13Mekwaach maak e iitaapiyaan, nichii waapamaau mischisuu e papaamihiyaat anite chiishikuhch e chishewet e itwet, “Kushtaatikun, kushtaatikun, kata kushtaatikun taan che ispayit misiwe awen utah aschiihch kaa ihtaat iskutak puutaatahkwaawenich upuutaachikanawaauh anichii nishtu enchilich eshkw ekaa uhchi puutaatahkwaau upuutaachikanawaauh.”
Canadian Bible Society