Revelation9
1Ekw miin kutak enchil kaa puutaatahk upuutaachikan. Eukw ekw Niyaayin enchilch kaa puutaatahkwaau upuutaachikanawaauh. Ekw kaa waapamak achahkush aschiihch e chii ishi pachishinikupane chiishikuhch uhchi. Chii miyaakanuu aapahiikaniyuu chechii aapahahk aniyuu kaa mista pukuneyaayich anite ishi nitaamihch aschiihch.2Iskutak maak kaa aapahahk aniyuu kaa mista pukuneyaayich chii uhchi wiiwiiyaapahtepayuu e mista akwaapahteyich muyaam anite e mista pasitech kaa chii ishpish akwaapahtech. Chii wiipaapahteu maak anite chiishikuhch. Piisim kaye chii ati ukaashtepayuu e ishpish akwaapahteyich.3Anite maak an e akwaapahtech ekute kaa uhchipayitwaau manichuushiishach muyaam kwaaskwaaskuhchishiishach e ishinaakusitwaau anite aschiihch e ati ihtaatwaau. Mwehch maak e ihtiyich aniyuu manichuushiisha e pachiskahwaayich aweyuuh kaa chii uhchi wanaachihaayich ekun kaa ishi miyaakanuutwaau uchii chechii ihtitwaau.4Chii itaakanuuch ekaa chechii wanaachihtaatwaau mashkushiih anite aschiihch kaye mistikw ekaa chechii wanaachihaatwaau kaye taan e ishi nihtaauchiniyikwaauh nihtaauchihchikan. Mikw aniyeyuuh aweyuuh ekaa kaa ayaayich Chishemanituuh uchiisaawaachihchikaniyuu anite uskahtikuwiihch eukunh aniyuuh kaa miyaakanuutwaau wiyesh chechii ihtuutawaatwaau.5Namui uhchi pachishtinaakanuuch chechii nipahaatwaau uyuuh aweyuuh, mikw chechii wawiisacheyihtamihaatwaau niyaayinuu piisim ishpish. Aniyuu maak e ishi wawiisacheyihtamihiiwetwaau muyaam e ishi wawiisacheyihtamihiiweyihch manichuushiisha e patiskahwaayich aweyuuh kaa chii uhchi wanaachihaayich ekun kaa iteyihtaakuniyich.6Niyaayin piisim maak ishpish chika naanituu miskamuch anichii awenichii taanite chechii uhchi nipitwaau mikw maak namui chika uhchi miskamuch. Chika nituweyihtamuch chechii nipitwaau namui mikw chika uhchi nipuuch.7Anichii maak manichuushiishach muyaam kwaaskwaaskuhchishiishach kaa ishinaakusitwaau muyaam anite kaapalakaskweuch e chii ayeskuhaakanuutwaau anite e maasihchaanuyich chechii ispahiitutwaau ekun kaa ishinaakusitwaau. Anite ustikwaaniwaahch chii chichishkamuch chekwaayuuh muyaam chisheuchimaau astutinh e ushaaushuuliyaaunaapiskuuniyikwaauh e ishinaakuniyikwaauh. Utaashtamuhkuwaauh muyaam iinuu mitaastamuhkwah chii ishinaakuniyuuh.8Ustikwaaniyaapiiwaauh muyaam iskweu ustikwaaniyaapiih chii ishinaakuniyuu ekw wiipitwaau muyaam mistatimuh wiipit ekun kaa ishinaakuniyikwaauh.9Chii uskaaschikanaapiskuuch maak. Aniyuuh maak uskaaschikanaapiskuwaauh muyaam piyiwaapiskw miskaaschikanaapiskwa ekun kaa ishinaakuniyikwaauh. Utihtahkunawaauh maak mwehch e mihchetitwaau tihtipitaapaanaaskuch e pimipahtwaatwaau kaapalakaskweuch ekun kaa itihtaakuniyikwaauh.10Usuuwaauh muyaam aamuu upachishkahiikan kaa iteyihtaakuniyich ekun kaa iteyihtaakuniyikwaauh. Kaye muyaam anichii manichuushach kaa patiskahwaatwaau aweyuu kaa ishinaakuniyikwaauh usuuwaauh ekun kaa ishinaakuniyikwaauh usuuwaauh uchii kwaashkwaashkuhchishiishach. Eukunh maak aniyuuh usuuwaauh kaa aapachihtaatwaau chechii wawiisacheyihtamihaatwaau aweyuuh niyaayin piisim ishpish.11Aniyuuh enchilh kaa uchimaaututamiyich aniyuu kaa mista pukuneyaayich ekun aniyuuh kaa uchimaamitwaau. Hebrew e ishi ayiminaanuyich Abaddon chii ishinihkaasuyuuh. Greek maak e ishi ayiminaanuyich Apollyon chii ishinihkaasuyuuh. Kaa wanaachihiiwet ishi itweshtamuwaataakanuuyuu aniyuu utishinihkaasuwin.12An niishtam che ishi nanehkaateyimunaanuuhch shaash chiishipayuu. Eshkw maak niishu chekwaayuu e kushtaatikuhkwaau kata paapayuuh che ispayitwaau awenichii.13Ekw an kutwaashch e ihtaat enchil kaa puutaatahk upuutaachikan. Nichii pehtawaau maak awen e ayimit anite newiich e ishi kachiihcheyaayich aniyuu kaa ushaaushuuliyaaunaapiskuuniyich pachishtinicheu miichisuunaahtikuyuu uhchishkuu Chishemanituu e ihtaayich kaa ihtakuniyich e uhchi pehtaakusit.14Chii itaakanuu an kutwaashch kaa ihtaat enchil, “Aapihkunich anichii neu enchilich kaa maahkupisutwaau anite Euphrates kaa ishinihkaateyich mista siipiiyuu.”15Ekw kaa aapuhkunaakanuutwaau anichii neu enchilich. Wesh eukw uyuu tipahiikaniyuu, eukw uyuu e chiishikaayich, eukw uyuuh piisimh kaye eukw uyuu e pipuniyich kaa ishi ayeskuhaakanuwaakupanenich chechii aapihkunaakanuutwaau kaye chechii nipahaatwaau peyakw eshikum nishtu misiwe e itiskaanesiyich aweyuuh.16Nichii pehtamuwaan maak taan kaa tashitwaau anichii shimaakanishach. Niishwaau mitaahtumitanuu chishe mihtaahtumitanewaau chishemitaahtumitanuu.17An maak kaa ishi waapahtiikuuyaan nichii waapamaauch kaapalakaskweuch ekw maak anichii kaa tehtapitwaau aniyuuh kaapalakaskweuh. Miskaaschikanaapiskw chii chichishkamuch anichii kaa tehtapitwaau aniyuuh kaapalakaskweuh, e mihkwaayikwaau taapishkuuch ishkuteu kaa ishpish mihkwaach kaye e pachiskanaayikwaauh kaye e ushaawaayikwaauh. Anichii maak kaapalakaskweuch ustikwaanawaau mwehch mistatim mistikwaanh chii ishinaakuniyuuh. Utuuniwaahch chii uhchi saakaapahtepayuu e akwaapahteyich kaye ishkuteyuu chii uhchi nuukuniyuu ekw maak e usaawaapahteyich chekwaayuu.18Chekaat aapihtuu e tashitwaau awenichii anite aschiihch chii nipahiikuuch aniyuu e akwaapahteyich, aniyuu ishkuteyuu ekw maak aniyuu kaa usaawaapahteyich chekwaayuu utuuniihch aniyuuh kaapalakaskweuh kaa uhchipayiniyich.19Anichii maak kaapalakaskweuch utuuniwaahch ekw maak usuuwaahch chii ihtakuniyuu umaskuusiiwinawaau. Aniyuuh maak usuuwaauh taapishkuuch mistachinepukw chii ishinaakuniyuuh, e chii ushitikwaanuuniyikwaauh. Eukun maak aniyuuh kaa aapachihtaatwaau e waawiisacheyihtamihaatwaau aweyuuh.20Anichii maak awenichii ekaa uhchi wanaachihiikutwaau kaa wanaachihiiwemakaniyikwaau chekwaayuu namui yaapach uhchi mihchiiweyihtamuch kaye namui uhchi puuniyuuch taan kaa ishi machituutahkwaau. Namui uhchi kweskaatisiyuuch kaye namui uhchi puuniyuuch e nuuchiishtuwaatwaau machiahchaahkwa kaye aniyuu manituuhkaan kaa ushaaushuuliyaaunaapiskuyich, kaa waaseyaapichisiyich, kaye kaa ushaawaapischisiich kaa ishinaakusiyich, kaye aniyuu kaa asiniiyuyich, kaye aniyuu kaa mistikuyich. Namui uhchi mihchiiweyihtamuch kaye namui uhchi puuniyuuch e nuuchiishtuwaatwaau aniyuuh manituuhkaan ekaa waapahtamiyich kaye ekaa pehtamiyich kaye ekaa pimuhteyich.21Namui kaye uhchi mihchiiweyihtamuch kaye namui uhchi puuniyuuch e nipahiiwetwaau, e matewaatisiitwaau, e wiinisuu pimaatisiitwaau kaye e kachemutitwaau.
Canadian Bible Society