Revelation7
1Iskutak kaa chiishipayihch uu kaa ishi waapahtiikuyaan ekw kaa waapamakwaau neu enchilich e niipuutwaau misiwe anite newiich e uhchiiwech. Chii aakuschikaapuuch ekaa chechii yuutiniyich anite aschiihch ishi maak anite chihchikamiihch ishi maak anite ishi mistikuh e ihtaayich.2Miin maak kutak enchil nichii waapamaau anite waapanuutaahch e uhtuhtet. Chishemanituuh uchiisaawaachihchikaniyuu chii pechi tahkunamuweu. Chii chisheweu e tepwaataat aniyuuh neu enchilh kaa miyaakanuyich chechii wanaachihtaayich aschiiyuu ekw maak chihchikamiyuu. Chii iteu aniyuuh enchilh,3“Ekaawii wanaachihtaakw aschii kaye chihchikamii maak mistikuch paatish chii chiishaawaachihiimachenh Chishemanituu utaapachihaakanh uskahtikuwaahch.”4Ekw kaa pehtamaan taan kaa tashitwaau anichii kaa chiishaawaachihaakanuutwaau Chishemanituuh uchiisaawaachihchikaniyuu uskahtikuwaahch. Peyakwaau mihtaahtumitanuu miin nemitanuu neuwaau chishe mitaahtumitanuu chii tashuuch. Misiwe anite e niishushaap piihtau itiskaanesiyich Israel iinuuh chii uhchiyuuch anichii kaa chiishaawaachihaakanuutwaau.5Niishushaapwaau chishemitaahtumitanuu chii chiishaawaachihaakanuuch anichii anite Judah e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Reuben e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Gad e ihtaayich kaa uhtitapechisihkwaau.6Niishushaapwaau chishemitaahtumitanuu chii chiishaawaachihaakanuuch anichii anite Asher e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Naphtali e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Manasseh e ihtaayich kaa uhtitapechisihkwaau.7Niishushaapwaau chishemitaahtumitanuu chii chiishaawaachihaakanuuch anichii anite Simeon e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Levi e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Issachar e ihtaayich kaa uhtitapechisihkwaau.8Niishushaapwaau chishemitaahtumitanuu chii chiishaawaachihaakanuuch anichii anite Zebulun e ihtaayich kaa uhtitapechisihkwaau. Niishushaapwaau chishemitaahtumitanuu chii chiishaawaachihaakanuuch anichii anite Joseph e ihtaayich kaa uhtitapechisihkwaau. Ekw maak anichii anite Benjamin e ihtaayich kaa uhtitapechisihkwaau niishushaapwaau chishemitaahtumitanuu chii chiishaawaachihaakanuuch.9Iskutak kaa chiishipayihch uu maahchishtai kaa ishi waapahtiikuyaan ekw kaa waapamakwaau e mista mihchetitwaau awenichii, ekaa mechim chii achimaakanuutwaau kaa ishpish chii mihchetitwaau. Misiwe e itiskaanesinaanuyich e uhchiitwaau, misiwe e ishi maamuuteushiinaanuyich, kaye misiwe e ishi ayiminaanuyich misiwe chii uhchishkuukaapuushtamuweuch Chishemanituuh uchisheuchimaau tehtapuwiniyuu ekw maak aniyuuh maanishchaansha. Misiwe e tashitwaau chii waapaaspisuuch kaye chii tahkunamuch niipisiyaahtikw utihchiiwaahch e muuchicheyihtahkwaau.10Chii iteuch maak e chishewetwaau, “Chishemanituu an kaa apit chisheuchimaau tehtapuwinihch ekw maak an Maanishchaanish ekute wehchipayihch pimaachihiiwewin.”11Misiwe maak enchilich chii waaskaakaapuushtamuch aniyuu chisheuchimaau tehtapuwiniyuu kaye anichii kaa chisteyihtaakusitwaau chisheinuuh chii waaskaakaapuushtamuch kaye anichii kaa neutwaau kaa pimaatisiitwaau awenich. Chii uchihchiihkunipayihuuch uhchishkuu aniyuu chisheuchimaau tehtapuwiniyuu e nuuchiishtuwaatwaau Chishemanituu12E itwetwaau, “Taapwe ekun e ishinaakuhch. Ayaau Chishemanituu shaweyihchichewiniyuu, kachehtaaweyihtamuwiniyuu, chisteyihtaakusuwiniyuu kaye maskuusiiwiniyuu. Eukw maak wehchi maamihchimikut aweyuu, kaye eukw uyuu wehchi nanaaskumikut kaye chishtaachimikut kaachiche kaye kaachiche. Amen.”13Ekw peyakw an kaa chisteyihtaakusit chisheinuu kaa pechi iishit, “Anichii maa kaa waapaaspisutwaau, awenich anichii kaye maak taanite wehchiitwaau.”14Ekw kaa itak, “Namui niya nichischeyimaauch. Chii eukw chescheyimatwaau.” Nichii itikw maak, “Eukunich uchii kaa shaapushkahkwaau taan kaa ishi nanehkaachihaakanuutwaau. Chii chishtaapautaauch utakuhpuwaauh aniyuu Maanishchaanisha umihkuyich ekw maak kaa waapaayikwaauh aniyuuh utakuhpuwaauh.15Eukw maak uyuu wehchi uhchishkuukaapuushtamuwaatwaau Chishemanituuh uchisheuchimaau tehtapuwiniyuu kaye wehchi tasine atushkuwaatwaau anite uchisheayimiheukamikuwiihch. An maak kaa apit anit chisheuchimaau tehtapuwinihch kata akuniskuweu e miyu kanuweyimaat.16Namui maak miin wiiskaat kata uhchi siiweyuuch. Namui miin wiiskaat kata uhchi nuuhteyaapaakweuch. Namui kata uhchi ishkwaasukuuch piisim maak chekwaayuu e mista chishiteyich.17Wesh an Maanishchaanish tetaauch anit e ihtakuniyich aniyuu chisheuchimaau tehtapuwiniyuu eukuu Maanishchaanishuiinuu che miyu kanuweyimaat uyuuh. Kaye chika ituhtaheu anit e ihtakuniyich e muuschichuuniyich pimaatisiyuu nipiiyuu. Ekw maak Chishemanituu che kaasiihamuwaat uschiishikuyuuh misiwe aniyuuh kaa uhchihkuwaapiitwaauh.”
Canadian Bible Society