2 Corinthians1
1Niya Paul, Jesus Christ utapastalimh kaa masinahiicheyaan. Wiya Chishemanituu kaa wiyaapamit apastal chechii itaapatisuuch. Niya ekw maak chiichishaanuu Timothy taapishkun chimasinahamaatinaan. Chiyawaau Chishemanituu e ihtaat kaa ishi maamuuayimihaayekw anite Corinth kaa ishinihkaatech ihtaawin kaa ihtaayekw chimasinahamaatinaan. Kaye maak misiwe anichii kaa taapwehtahkwaau anite Achaia kaa ishinihkaateyich aschiiyuu kaa ihtaatwaau nimasinahamuwaanaanich.2Chishemanituu Kuuhtaawiinuu kaye maak Jesus Christ Chitipeyihchikeminuu chika shaweyimikuwaauch kaye chika miikuwaauch chiyaameyihtamuwiniyuu.3Kata wii maamihchimaakanuu Chishemanituu Chitipeyihchikeminuu Jesus Christ Uhtaawiih. Eukw uu uhtaawiimaau muush kaa chishewaatutawaat aweyuu kaye kaa kaachiichihaat aweyuuh misiwe e ishi aayimuhuyich.4Eukw uu muush meyeyimuhiitahkw tahtwaau e aayimuhuyihkw. Ekut wehchipayihch chechii chischeyihtamuhkw taan che ishi wiichihiihkwaau chiyaanuu kutakach awenichii e aayimuhutwaau. Chishemanituu e chii kaachiichihiitahkw taanit kaa aayimuhuyihkw ekw maak chescheyihtamuhkw kaye chiyaanuu chechii kaachiichihiihkwaau awenichii e aayimuhutwaau.5Chinachishkenaanuu mistahii nanehkaateyimuwin mwehch Christ kaa ishi nachishkahk, chika miikunuu maak kaye Chishemanituu kaachiichihiiwewiniyuu Christ uhchi.6Ekw maak tahtwaau e nachishkamaahch naashch e aayimihch, nichischeyihtenaan che kaachiichihiikuyekw uu kaye ekut che uhchi pimaachihuyekw. Wesh nikaachiichihiikunaan Chishemanituu ekw maak chiyawaau chechii kaachiichihiitaahch. Kaachiichihiiwewin maak e ayaayekw chika chii siipiiwesiistenaawaau kaye chika chii ishikaapushtenaawaau aniyuu chekwaayuu mwehch niyaan e ishi aayimihiikuyaahch.7Nicheshtinaahunaan maak che suuhchikaapuuyekw aat e nanehkaateyimuhiikuyekw mwehch niyaan e ishi nanehkaateyimuhiikuyaahch, kaye maak cheshtinaash kaye chiyawaau che kaachiichihiitaakw Chishemanituu mwehch niyaan kaa ishi kaachiichihiyimiht.8Niichishaanitikw chiwii chischeyihtamihiitinaan taan kaa ispayaahch nete ane aschii Asia kaa ishinihkaatech kaa ihtaayaahch. Naashch taapwe nichii kusikushkaakunaan taan kaa ishi nachishkamaahch. Shaash nichii iteyihtenaan ekaa chechii ihtiyaahch.9Shaash mitun nichii iteyihtenaan ekw wetihchipayihch che puunipimaatisiyaahch. Chii pachishtinam Chishemanituu uyuu chechii ispayuuchiht e chii wii chischeyihtamihiikuyaahch ekaa niyaan chechii aspeyimitutaasuyaahch, mikw wiya chechii aspeyimituuchiht, wiya kaa kaschihut chechii wanishkaanaat aweyuuh shaash e chii nipiyich.10Aat e chii ishinaakuhch muyaam che nipiyaahch, Chishemanituu nichii kanuweyimikunaan. Wiya maak nikanuweyimikunaan anuhchiish. Eukw uyuu e ishi cheshtinaateyimachiht anite niishtamihch, cheshtinaash muush che kanuweyimiyimiht namui wiyeshin taan che ishi aayimuhuwaahche.11Chiyawaau maak kaye chika chii wiichihiinaan e ayimiheshtamuuyaahch. Uu maak ihtiyekwe paatimaa kata nuukun taan che ishi shaweyimiyimiht Chishemanituu. Ekut maak che uhchipayiyich mihchetu awen che nanaaskumaat Chishemanituu.12Maau maak e ishi maamihchisiyaahch, mitun nicheshtinaahunaan muush kuiskw e chii ihtiyaahch taanite mikw kaa ati ihtaayaahch, etituu maak mekwaach anite e ihtaayekw kaa ihtaayaahch. Kaye maak muush e chii taapweucheyihtaakusiyaahch. Chishemanituu nichii miikunaan ushaweyihchichewin uu chechii ihtiyaahch. Namui niyaan nikachehtaaweyihtamuwinaahch uhchipayuu.13Mesinahamaataahch maak mikw an chechii ayimihtaayekw kaye chechii nisituhtamekw ekun e ishi masinahamaataahch.14Maaskuuch namui tekash chinisituhtuunaan anuhchiish. Nipukuseyimun maak tekash chechii ati nisituhtuuyaahch. Ekw maak aniyuu e chiishikaayich Jesus Chitipeyihchikeminuu takushihke ekw che maamihchihiitaahch mwehch chiyawaau che ishi maamihchihiyaahch.15Kaa ishpish chii cheshtinaateyihtamihiikuyaan misiwe uu, nichii wiyeyihten chiyawaau niishtam chechii chiiutamitakuch. Ekw maak chipaa nihiipayuu niishwaau chechii wiichihiitakuch.16Wesh anite an aschii Macedonia kaa ishinihkaatech kaa ituhteyaan nichii iteyihten chiyawaau niishtam chechii nituwaapamitakuch. Ekw maak iskutak kaau pechi chiiweyaane ekw miin chipaa nituwaapamitinaawaau. Ekut maak anit chipaa chii wiichihiinaawaau Judea kaa ishinihkaatech aschii chechii ituhteyaan, ekun kiipaa kaa ishi wiyeyihtamaan nipaa ihtin.17Mikw maak namui nuuhchi nihiipayin ekw kaa aahchihtaayaan taan an niishtam kaa ishi wiyeyihtamaan che ihtiyaan. Chititeyihtenaawaau aa maak mikw napaach e chii ihtiyaan iskutak kaa wiyeyihtamaan taanite che ituhteyaan. Taapaa mikw naapeu e ihtaat uhchipayuu iskutak weyeyihtamaan taan che ihtiyaan. Taapaa nihtaa nitishinaakusin chechii itak awen, “Ehe, cheshtinaash ekun che ihtiyaan,” e cheshtinaahuyaan maak ekaa taapwe wii ihtuutamaan an taan kaa itweyaan.18Mwehch Chishemanituu muush e taapwet taan e itwet, nichischeyimikw taapwe e taapweuch kaye niya taan e iteuch. “Ehe” e itweyaan, taapwe ehe nititwen, “Namui” e itweyaan, taapwe namui nititwen.19Wesh Jesus Christ Chishemanituu Ukusisa an kaa aayimuutamaataahch, niyaan kiipaa Silas, Timothy ekw maak niya, cheshtinaateyihtaakusuu taan e itwet, namui wiiskaat nanatayuu. “Ehe” e itwech, cheshtinaateyihtaakuniyuu aniyuu ehe e itwet.20Chishemanituu aapachiheu Jesus cheshtinaash chechii ihtuutahk taan kaa itwet che ihtuutahk kaye che ati chisteyihtaakuhaakanuut.21Chishemanituu eukw yaaichikaapuhiikuyaahch kaye chiyawaau maak Chiyaaichikaapuuhiikuwaau. Aniyuu e taapweucheyimahkw Jesus ekut wehchi yaaichikaapuhiitahkw. Chishemanituu chichii wiyaapamikunuu chechii papaamuhtataauhkw miywaachimuwiniyuu.22Chichii miikunuu kaye Utahchaahkwa chitehiinaahch chechii ihtaayich kaye chechii cheshtinaateyihtamihiikuuhkw taapwe e tipiyeusiitutaatahkw. Ekut kaye wehchi cheshtinaateyihtamahkw cheshtinaash misiwe che miskamuhkw taan e ishi ayeskuushtamaatahkw.23Nitaapwen taan e itweyaan Chishemanituu e pehtuut e taapweuch. E manaachihiitakuch ekun wehchi iteyihtamaan ekaa pitamaa chechii takushiniyaan anite Corinth chechii nituwaapamitakuch.24Namui kiipaa wii chiwii wawiishuwaatitinaan chechii wiihtamaataahch chekwaan chipaa taapwehtenaawaau wesh chiyaaichikaapuunaawaau taapwehtamuwinihch ishi. Teyakuch wesin chiwii wiichaapatisiimitinaan chiyawaau chechii uhchi miyeyihtamekw.
Canadian Bible Society