2 Corinthians2
1Shaash nichii iteyihten ekaa che uhchi wii misimeyihtamihiitakuch miin nituwaapamitakuche,2wesh Chimiyeyihtamihiinaawaau. Misimeyihtamihiitakuche maak, awen miin e ihtaat che miyeyihtamihiit. Namui awen.3Ekun wehchii masinahamaatakuch an kaa masinahamaatakuch. Namui nuuhchi nitaweyihten chechii misimeyihtamihiyekw nituwaapamitakuche, wesh chiyawaau chipaa miyeyihtamihiinaawaau. Mitun nichii chischeyihten miyeyihtamaane kaye chiyawaau che miyeyihtamekw.4Utah kaa masinahamaatakuch mekwaach naashch taapwe nichii mukushkaateyihten. Nichii piikutehen. Mistahii kaye nichii uhchikuwaapin. Taapaa kuuhchi wii misimeyihtamihiitinaawaau an kaa masinahamaatakuch mikw chichii wii chischeyihtamihiitinaawaau taan e ishpish mista saachihiitakuch.5E ihtaakwe awen e chii misimeyihtamihaat aweyuu, namui niya nuuhchi misimeyihtamihiikw. Chiyawaau maak misiwe e tashiyekw chii ihtakuniyuu taan kaa ishi misimeyihtamihiitaakw. Namui etituu niwii aayimuuten uu.6Shaash chichii wiyeyihtenaawaau taan che ishi waweshihaakanuut. Ispayuu maak aniyuu taan kaa ishi waweshihaakanuut.7Utihchipayuu maak chechii wepeyihtamuwekw ekw. Kaye chipaa kaachiichihaawaau ekaa chechii iteyihtahk chihchiwe chechii puuniit wesaa e mista macheyihtahk.8Ekun wehchi siihchimitakuch chechii chischeyihtamihekw taapwe eshkw e saachihekw.9Chichii wii nituu chischeyimitinaawaau an kaa masinahamaatakuch. Che nanihiihtamuwaakwenich aahch misiwe taan e itashumikwaau nichii iteyihten.10Wesh tahtwaau e wepeyihtamuwekw awen taan kaa ihtit kaye niya niwepeyihtamuwaau. Netuweyihtaakunikwe chechii wepeyihtamuuk awen niwepeyihtamuwaau chiyawaau chechii wiichihiikuyekw e chischeyihtamaan Christ e ihtaat utah e ihtaayaan.11Uu maak chitihtinaanuu ekaa chechii pisiiwiitahkw machimanituu. Wesh chichischeyimaanuu taan waa ihtit.12Troas kaa ishinihkaatech ihtaawin ekute kaa nituu waawiihtamuch Christ umiywaachimuwin. Kaa paapayaan maak anite mitun chii nisituunaakun Utipeyihchikeu shaash e chii ayeskuushtaakupane anit chechii kacheskweuch.13Mikw maak yaapach chii ihtakun taan kaa ishi mukushkaateyihtamaan wesh taapaa nuuhchi waapamaau niichishaan Titus anite chechii ihtaat. Ekw maak kaa nakatakwaau anichii iinuuch anit kaa ihtaatwaau. Macedonia kaa ishinihkaatech aschii ekute miin kaa ituhteyaan.14Mikw maak taapwe ninanaaskumaau Chishemanituu wesh muush wii nichischinuhtahiikw taanite e ituhteuch e wiichihiit e aayimuumach Christ chechii uhchi chischeyimaakanuyich, wesh Christ muush pascheyaachewinihch chit ishi pimuhtahiikunuu. Chishemanituu chiwiichihiikunuu chechii tipaachimihkw Christ misiwe awen chechii chischeyimaat. E chischeyimaakanuut Christ mwehch kaa wiihchimaakusich chekwaan iteyihtaakun.15Uu e ihtiihkw mwehch Christ e pachishtinamuwaat Chishemanituuh kaa wiihchimaakusiyich chekwaayuu ekun e ishinaakuhch. An maak e wiihchimaashtech anite anichii che pimaachihutwaau awenichii kaye anichii awenichii che wanishihkwaau ekute e itaapahtech.16Anichii maak che wanishihkwaau awenichii mwehch chekwaan kaa nipahiiwech ekun e ishimaahtahkwaau uyuu kaa wiihchimaakusiyich, ekw anichii che pimaachihutwaau awenichii mwehch an chekwaan che pimaachihiiwech ekun e ishimaahtahkwaau uyuu. Awen maak tiyepicheyihtaakusit uyuu chechii itaapatisit miywaachimuwiniyuu e waawiihtahk.17Pasch awenichii kaa papaa kacheskwetwaau muyaam e papaa ataawewaatwaau Chishemanituuh utayimuwiniyuu ekun e ishinaakusitwaau, e wii uhtisiitwaau shuuliyaayuu e ihtitwaau. Namui wii niyaan uu nitishinaakusinaan. Nikuiskutehenaan kaye chihchiwe nititeyihtenaan taan e itashumiyimiht Christ chechii ishi atushkuwachiht wesh nichischeyimikunaan taan e ihtuuchiht.
Canadian Bible Society