1 Corinthians16
1Ekw che aayimuutamaatakuch an shuuliyaau chipaa maamuushtinikanuu chechii wiichihaakanuutwaau kaa taapwehtahkwaau anite aniyuu aschiiyuu Judea kaa ishinihkaateyich kaa ihtaatwaau. Mwehch maak kaa itashumakwaau anichii umaamuuayimihaauch anite Galatia kaa ishinihkaateyich aschiiyuu kaa ihtaatwaau chechii ihtitwaau ekun kaye chiyawaau ihtikw.2An e chihchipayihch e tuushtech, misiwe awen anit e tashiyekw chipaa pahkaanishtaau shuuliyaayuu e nanaakataweyihtamihiikut taan maamuu kaa ishi miikut Chishemanituuh chechii uhchistamaasut. Misiwe chipaa maamuu kanuweyihtaakanuu. Ekw maak namui chipaa uhchi ihtakun e maamuushtinikanuuhch shuuliyaau takushiniyaane.3Takushiniyaane maak anite e ihtaayekw, nika itishahwaauch naapeuch Jerusalemihch chechii ituhtataatwaau chishuuliyaamuwaayuu. Chiyawaau chinitaweyimitinaawaau chechii wiyaapamekuch uchii naapeuch che itishahukwaau anite. Nika miyaauch masinahiikanh che ituhtataatwaau anite ayimiheukamikuhch Jerusalemihch, chiyawaau e aayimuumitakuch kaye maak wiyawaau anichii naapeuch e aayimuumakwaau.4Ekw maak iteyihtaakuhche kaye niya chechii ituhteyaan Jerusalemihch kiipaa che wiicheukwaau.5Macedonia kaa ishinihkaatech aschii nika shaapuhtawehten. Ekw maak che nituwaapamitakuch iskutak chii ituhteyaane anite.6Maaskuuch weipishchiish nika ihtaan anit e ihtaayekw, nesht iskan pipun che ihtaawaane anit e ihtaayekw. Ekw maak chechii wiichihiyekw taan che ishi nitaweyihtamuwaane taanite miin che ituhtewaane.7Namui anuhchiish chiwii pechi nituwaapamitinaawaau. Wesh aat anuhchiish nituwaapamitakuch mikw weipishchiish nipaa chii ihtaan. Nipukuseyihten maak chineushiish chechii ihtaayaan anit e ihtaayekw iteyihtahke Utipeyihchikeu chechii ihtaauch anit e ihtaawekw.8Mikw ekut utah Ephesus che ihtaayaan anuhchiish wii paatish utihchipayihche Pentecost.9Mekwaach naashch nihiipayuu chechii miyu aapatisiyaan utah aat e mihchetitwaau awenich e wii machipayihkahtuutwaau.10Chek pechi nituwaapamitaakwe Timothy suuhk che wii miyuuhkuwekw wesh kaye wiya atushkuweu Utipeyihchikeuh mwehch niya e ishi atushkaamach.11Namui awen chipaa uhchi aatuweyimeu aniyuuh Timothy. Teyakuch wiichihaahkw chechii takushinit ute e ihtaauch ekaa chekwaayuu chipishkaakut. Wesh nipukuseyimaau chechii pechi chiiwe wiichewaat aniyuuh kutak chiichishaanuuh.12Ekw maak chiichishaanuu Apollos che aayimuumak. Muush nichii siihchimaau chechii chiiutamitaakw iskutak kaautamitaakw aniyuuh kutak chiichishaanuuh. Namui uhchii wiya ituhteu anuhchiish wii. Wiipach kiipaa nihiipayite chika nituwaapamikuwaau.13Waaskamisiikw, ahchaahkuwinihch ishi yaakwaamiikw. Suuhk yaaichikaapuukw taan e ishi taapwehtamekw. Ekaawii kushtaachikw. Suuhk suuhchikaapuukw.14Nuukuhtaakw chisaachihiiwewinawaau misiwe chekwaan e ihtuutamekw.15Niichishaanitikw, chichischeyihtenaawaau anit e peyakuteusiit Stephanas eukw anichii niishtam kaa taapweyihtahkwaau anite aniyuu aschiiyuu Achaia kaa ishinihkaateyich. Chii pachishtinisuuch chechii atushkuwaatwaau kaa taapwehtamiitwaauh.16Niichishaanitikw, naashch taapweh chisiihchimitinaawaau chechii pachishteyimititisuustawekuch anichii awenich uyuu kaa iteyihtaakusitwaau. Pachishteyimitisuustuumaahkw kaye misiwe aniyuuh kaa wiichihiikutwaau aniyuu utitaapatisuwinawaau nesht suuhk kaa aahchiistamiyich aniyuu e ishi wiichihiikutwaau.17Nimiyeyihtamuwaan Stephanas, Fortunatus ekw maak Achaicus e chii takushihkwaau ute e ihtaauch. Muyaam chiyawaau e ihtaayekw utah e ihtaayaan ekun kaa iteyihtamuch kaa ihtaatwaau utah e ihtaauch.18Wesh chii ihtakuniyuu kaa ishi miyeyihtamihiitwaau mwehch kaa ishi ihtakuniyich kaa ishi chii miyeyihtamihiitaakuch kaye chiyawaau. Chipaa chisteyimaakanuuch naapeuch uyuu e iteyihtaakusitwaau.19Anichii umaamuuayimihaauch anite Asia kaa ishinihkaateyich aschiiyuu kaa ihtaatwaau chiwaachiyemikuwaauch. Kaye Aquila ekw maak Priscilla nesht aniyuuh umaamuuayimihaauh kaa nishtawiyich anite e ihtaatwaau e ayimihaayich chiwaachiyemikuwaauch.20Misiwe chiichishaanuuch utah kaa ihtaatwaau chiwaachiyemikuwaauch. Chiyawaau kaa wiichishaanihtuyekw uchemitukw e waachiyemituyekw.21Niya Paul. Niya tipiiwe nitihchii nitaapachihtaan uu e masinahamaatakuch neshta e waachiyemitakuch.22Awen ekaa saachihaate Utipeyihchikeu, ekush chika waweshihiikuu Chishemanituu. Takushin maa, Utipeyihchikeu.23Nitutamuwaau Utipeyihchikeu Jesus chechii shaweyimitaakw.24Misiwe chisaachihiitinaawaau Jesus Christ uhchi. Amen.
Canadian Bible Society