1 Corinthians6
1E ihtakuniyikwe e iteyimat e chii ishi wanituutaask chiichishaan namui wii ekaa kweskaatisiit wiyaaskunichesuu chipaa uhchi ituhtatuwaau chechii waweshihtwaataakw aniyuu. Teyakuch kaa taapwehtahkwaauh e ihtaatwaau ituhtataah.2Namui aa chichischeyihtenaawaau kaa taapwehtahkwaau eshkw anite niishtamihch che wiyaaskunaatwaau misiwe aweyuuh utah aschiihch kaa ihtaayich. Chiishpin maak che wiyaaskunichewekwe utah aschiihch eshkw anite niishtamihch, namui aa waawaach chichii ihtinaawaau chechii nihiipayihtaatuyekw chekwaan naashch ekaa wiyaahpacheyihtaakuhch taan e ishi mamachipayekw anit e ihtaayekw.3Kaye namui aa chichischeyihtenaawaau, waawaach enchilich che wiyaaskunahkwaau. Ekw maak an waawaach enchilich che wiyaaskunahkwaau etituu chipaa chischeyihtenaanuu taan che ishi nihiipayihtaayihkw aniyuuh chekwaayuuh ati wehchi machipayinaanuuhch mekwaach utah aschiihch e pimaatisiihkw.4Ekw maak taapwe wenituutaaskwe chiichishaan namui chipaa uhchi ituhtahaau wiyaaskunichesuu e ihtaayich chechii wiyaaskunikut. Wesh wiyaaskunichesuuch taapaa ayaauch uchimaawiniyuu anite umaamuuayimihaauh e ihtaayich.5Namui aa chimamahteyimunaawaau uu e ihtiyekw. Namui aa mechim ihtaau peyakw wiichishaanimaau anit e tashiyekw e kachehtaaweyihtahk chechii wiichihiitaakw taan chechii ishi nihiipayihtaatuwekw taan e ishi mamachipayihkahtaatuwekw.6Teyakuch wiyaaskunicheukamikuhch e ituhtahaat awen wiichishaan chechii wiyaaskunikuyich ekaa kaa taapwehtamiyich wiyaaskunichesuu.7Uu e ihtiyekw nuukun mitun e wanipayekw. Uste chipaa miywaau chechii wanituutaakuyekw maak chechii chimutamaakuyekw, ishpish wii chechii wanituutuwekw chiichishaanawaau wiyaaskunicheukamikuhch e piihtakahekw.8Maau teyakuch e ihtiyekw. Chiwanituutaatunaawaau kaye chichimutamaatunaawaau, e wiichishaanihtuyekw an kaa ihtiyekw.9Ekaawii wiyeshihiisukw. Chichischeyihtenaawaache anichii awenich kaa machaatisiitwaau namui chika uhchi miikuuch Chishemanituu anite uchimaawiniihch chechii ihtaatwaau. Maak anichii awenich misiwe wiinisuwinihch kaa ishi pimaatisiitwaau, kaye anichii kaa nuuchiishtuwaatwaau manituuhkaan, kaye anichii kaa wanituutuwaatwaau uwiichimaakanawaauh kaye anichii kaa chiishiihkuwaakanuutwaau naapeuch e wiihpemaakanuutwaau kaye maak anichii naapeuch kaa wiihpemitutwaau, kaye iskweuch kaa wiihpemitutwaau.10Kaye maak anichii kaa kachemutitwaau, nesht anichii muush kaa mushteneyihtahkwaau chekwaayuuh, anichii kaa wiihchipetwaau, nesht anichii nitamukw kaa itaachimaatwaau kutak aweyuuh, kaye maak kaa chimutitwaau, namui waachi peyakw uchii chika uhchi aanische ayaauch Chishemanituu uchisheuchimaawiniyuu.11Pasch anit e tashiyekw ekun kaa chii ishi pimaatisiyekw. Mikw maak shaash chichii chishtaapawiikunaawaau, chichii payehchihiikunaawaau, kaye chichii kuiskunaakuhiikunaawaau Utipeyihchikeu Jesus Christ utishinihkaasuwinihch neshta Chishemanituu Utahchaahkuhch ishi.12Mikw maak eshkw chika chii ihtaau awen anite e ihtaayekw e pechi iishit, “Kuiskw nitihtin nititeyihten mikw waa ihtiyaan e ihtiyaan e kweskaatisiyaan.” Ehe, taapwe. Mikw maak namui misiwe chekwaan e ihtiyin chika uhchi wiichihiikun. E itwewane mikw waa ihtiyaan nika chii ihtin wii chischeyihta ekaa chekwaan chipaa uhchi pachishtinen chechii tipeyimikuyin.13Nika chii itikw awen, “Chii ushihtaakanuu miichim mitaahch chechii ihtakuhch. Ekw utai kaa ishihtaakanuuhch chechii utinichemakahch miichim.” Taapwe kiipaa. Mikw maak taapishkun uyuuh kata wanaachihtaau Chishemanituu. Taapaa wiinisuwinihch chipaa uhchi ishi aapachihtaanaanuu chiiyuunuuh. Utipeyihchikeu e atushkuukw chipaa itaapachihtaanaanuu wesh wiya tipeyihtam chiiyuunuu.14Chishemanituu chii wanishkaaneu Utipeyihchikeu Jesus nipuwinihch usuuhkaatisiiwinihch uhchi. Ekun maak mwehch kaye chiyaanuu che ishi wanishkaanihtahk nipuwinihch uhchi.15Namui aa chichischeyihtenaawaau uyuuh chiiyuunuuh Christ e ihtaat e ishi tipeyihtaakuhkwaauh. Eukw uu che uhchi ekaa wiiskaat aapachihtaayaan niyuu chechii wiihpemak ishkwesh kaa chiishiihkuwaakanuut e wiihpemaakanuut.16Namui aa chichischeyihtenaawaau naapeu e wiihpemaat ishkwesha kaa chiishiihkuwaakanuyich e wiihpemaakanuyich, mwehch peyakw miiyuu ishinaakusuuch. Masinahiikan itashteu, “Iskweu ekw maak naapeu e wiihpemitutwaau, peyakw miiyuu ishinaakusuuch.”17Ekw maak awen e wiichewaat Utipeyihchikeu, peyakw ahchaahkw ishinaakusuuch.18Ushimututamukw wiinisuu pimaatisiiwin. Kutak machituutamuwinh namui wiyesh ihtuutaachemakanh miiyuuhch. Wiinisuwinihch e ishi pimaatisiit awen wiya tipiiwe wiiyuu wanituutam.19Kaye maak namui aa chichischeyihtenaawaau Kaa payehchisiit Ahchaahkw e utayimiheukamikut chiiyuuwaauh. Eukw uyuuh Ahchaahkwa Chishemanituu kaa miitaakw. Namui chii chitipiyeusiin chiiyuu. Chishemanituu tipiweusiyu chiiyuuyuu.20Wesh chekwaayuu chii ishi tipahiicheu chechii ayaausk. Aapachihtaa chiiyuu Chishemanituu chechii chisteyihtaakuhiit.
Canadian Bible Society