1 Corinthians5
1Nichii wiihtamaakun e ihtaat awen anit e ihtaayekw nitawiin e itaatisiit. Namui waawaach anichii ekaa kaa taapweyimaatwaau Chishemanituu chipaa uhchi ishi pimaatisiyuuch taan e ishi pimaatisiyich aniyuuh naapeuh. Nichii wiihtamaakun uhtaawiih wiichiskweuyuu e wiichimaat an naapeu.2Naashch aa maak chihchiwe chititeyimisunaawaau. Teyakuch chipaa macheyihtenaawaau. Chipaa iichenaawaau an naapeu uyuu kaa ihtit anit uhchi e ihtaayekw.3Aat eshkw ekaa ihtaayaan nete e ihtaayekw, naashch chichischisiitutaatinaawaau muyaam shaash e ihtaayaan nete e ihtaayekw ekun e iteyihtamaan. Shaash maak nichii wiyeyihten taan chipaa ihtuutawaakanuu an naapeu uyuu kaa ihtit,4Utipeyihchikeu Jesus e chii pechi miit chechii ishi wiyeyihtamuch. Nishtuwiyekwe che ayimihaayekw, mwehch anit e ihtaayekw e ihtaayaan chika iteyihtaakun kaye maak Utipeyihchikeu Jesus usuuhkaatisiiwin chika ihtakuniyuu.5Pachishtinaakw an naapeu anite machimanituu e ihtaayich chechii nishuuwanaachihtaakanuyich taan e ishi machi nituweyihtamuumakaniyich wiyaas. Ekw maak utahchaahkwa che pimaachihaakanuyich aniyuu e chiishikaayich pechi takushiniyichenh Utipeyihchikeuh Jesus.6Namui mitun ishinaakun chihchiwe chechii iteyimisuyekw. Chichischeyihtenaawaau apishiish uhpisikan e pachishtinikanuuch aaihkunaahch misiwe e ispichishtit an aaihkunaau uhpiyuu.7Ekaawii pachishtinamukw machihtwaawin chechii ihtakuhch anit e ihtaayekw. Wesh mwehch uhpisikan iteyihtaakun machihtwaawin, eukw uyuu kaa ihtuutaakut aaihkunaau chechii uhpiit ekun maak mwehch e ihtuutaachemakahch machihtwaawin pimaatisiiwinihch. Namui chipaa uhchi ayaanaawaau machihtwaawin chipimaatisiiwiniwaahch wesh chichii wiihkuchihiikunaawaau machihtwaawinihch uhchi. Wesh Christ chimiyaaskaacheu maanishchaanishiminuu chii nipahaakanuu chiyaanuu uhchi chechii pimaachihuyihkw.8Ekw maak kanuweyihtahtaau e chii pimaachihiikuyihkw. Wepinihtaau an weskach uhpisikan eukw machihtwaawin kaye maak misiwe taan e ishi maayaatahch. An maak e ishpish miyeyihtamuhkw e chii pimaachihiikuyihkw kuiskw ishi pimaatisiitaau nesht taapwewinihch ishi ayimitaau.9Chichii wiihtamaatinaawaau utah kaa masinahamaatakuch, ekaa chechii wiichewekuch anichii nitamukw kaa itaatisiitwaau.10Namayeuch kiipaa wii anichii ekaa kaa taapwehtahkwaau kaa aayimuutamaatakuch an kaa ititakuch. Namayeuch kaye anichii kaa mushtenamaachetwaau chekwaayuuh kaye kaa kachemutitwaau maak anichii kaa nuuchiishtuwaatwaau manituuhkaan kaa aayimuumakwaau. Wesh an ekaa wii ihtaayihkw anit e itaatwaau anichii ekaa kaa taapwehtahkwaau, paatish tekash chipaa iichesinaanuu uu aschii wesh misiwe utah waaskaa e ihtaayihkw ihtaauch uchii.11Miin maak peyakwaau nika masinahen cheshtinaash chechii nisituhtamekw awenich kaa aayimuumakwaau. Ekaawii wiichewaakanikw awen e itwet e taapweyimaat Jesus, misiwe nanaahkuu wiinisuwinihch e ishi pimaatisiikwe, e mushtenamaachekwe chekwaayuuh kaye maak e nuuchiishtuwaakwe manituuhkaanh kaye maak nitamukw e itaachimaakwe aweyuuh, maak e wiihchipekwe maak e wiihchi kechemutikwe. Ekaawii mechim wiich miichisumaahk awen uyuu e itaatisiit.12Namayeu niya nipaa wiyaaskunaauch anichii ekaa kaa taapwehtahkwaau. Namui aa mikw anichii chiyaanuu chiichishaanuuch kaa taapwehtahkwaau chipaa uhchi wiyaaskunaanuuch.13Chishemanituu eukw weyaaskunaat aniyuuh ekaa kaa taapwehtamiyich. Itashteu anite Chishemanituu utayimuwinihch, “Iichenaahkw an naapeu kaa machaatisiit anit e ihtaayekw kaa ihtaat.”
Canadian Bible Society