1 Corinthians7
1Ekw maak che nishkweushihiitakuch taan kaa ishi aayimuutamekw utah kaa pechi masinahamuuyekw. Chichii itwenaawaau e miywaashiyich naapeu ekaa chechii pischeyimaat iskweuh.2E mishaach maak kakwechihiiwewin chechii wiinisuu pimaatisiinaanuuhch, misiwe naapeu tipiiwe chipaa wiichiskweuu, kaye maak iskweu tipiiwe chipaa unaapemuu.3Naapeu chipaa ishi pischeyimeu wiichiskweu aniyuu e ishi nitaweyihtaakusit chechii ihtit. Kaye maak iskweu ekun chipaa ihtuutuweu unaapem.4Wesh iskweu kaa unaapemit, namui mikw wiya tipeyihtam wiiyuu. Eyuu unaapemh tipeyihtamiyuu. Ekun maak kaye naapeu, namui mikw wiya tipeyihtam wiiyuu. Eyuu wiichiskweu tipeyihtamiyuuh.5Namui chipaa uhchi ihtinaawaau ekaa chechii pischeyimituyekw. Mikw kiipaa niyaakan taapishkun ishi wiyeyihtamekwe weipishchiish ekaa chechii pischeyimituyekw mikw chechii ayimihaayekw. Ekw maak iskutak utihchipayihche anit kaa itweyekw che ishpish ekaa pischeyimituyekw ekw miin chipaa chii pischeyimitunaawaau. Wesh siipiiwesiyekwe namui chika uhchi shaakuuchihiikuwaau machimanituu nitamukw chechii ihtuwekw.6Ekun kiipaa chechii ihtiyekw uu wii ihtiyekwe. Namui chititashumitinaawaau yaaitei uu chechii ihtiyekw mikw chiwii ititinaawaau e pachishtinitakuch uu chechii ihtuutamekw.7Uste maak nipaa miyeyihten misiwe awen ishinaakusit niya taan e ishinaakusiyaan. Misiwe awen tipiiwe ayaau miiwewiniyuu Chishemanituuh e chii miikut, misiwe awen aahchiiuh ishinaakuniyuu taan kaa ishi miyaakanuut e ishinaakuniyich kutak aweyuuh kaa miyaakanuyich.8Ekw anichii ekaa kaa niipuutwaau kaye anichii kaa peyakutwaau niwii itaauch. Uste miywaau ekaa miin chechii niipuuyekw muyaam niya taan e ishinaakusiyaan.9Mikw maak e iteyihtamukwe awen e aayimihiikut ekaa niipuut uste miywaayuu chechii niipuut. Uste miywaayuu chechii niipuut awen ishpish wii chechii mushteneyihtahkw nitamukw chechii ihtit.10Ekw anichii kaa niipuutwaau che wiihtamuukwaau taan chipaa ihtuuch. Utipeyihchikeu itashuweu uyuu, namayeu niya uu kaa itweyaan. Namui chipaa uhchi nakateu iskweu unaapemh.11Uyuu ihtite iskweu, ekush ekaa miin chika uhchi niipuu. Maak kaau chipaa nituu wiichimeu aniyuuh unaapem. Ekw naapeu namui chipaa uhchi wepineu wiichiskeu.12Ekw maak kutakach awenich che ayimihiikwaau. Uu maak che ishi aayimuutamaan anuhchiish namayeu Utipeyihchikeu kaa itashuwet. Niya uu e iteyihtamaan chipaa ihtinaawaau. E ihtaakwe chiichishaanuu e taapwehtahk wiichiskweu maak ekaa taapwehtamiyich namui chipaa uhchi wepineu aniyuu yaapach waa wiichimikuukwe.13Maak iskweu e taapwehtahk ekaa maak taapwehtamiyich unaapem, naheyihtamiyichen maak yaapach chechii wiichimikut namui chipaa uhchi wepineu.14Wesh naapeu ekaa kaa taapwehtahk payehchihiikuu wiichiskweuh aniyuu uhchi e taapwehtamiyich. Kaye maak iskweu ekaa kaa taapwehtahk payehchihiikuu aniyuuh uhchi e taapwehtamiyich unaapem. Ekaa maak tiyaapwemakanikwe uu kaa itweyaan kiipaa mwehch ekaa payehchisiitwaau chipaa ishi kanawaapameu Chishemanituu chitawaashiimuwauh. Anuhchiish maak e payehchisiyich chitawaashiimh ishi kanawaapameu Chishemanituu.15Waa wepinaakwe maak uwiichimaakan an awen ekaa kaa taapwehtahk ekun kiipaa che ishinaakuniyich. Uu maak ispayihche, an chiichishaanuu maak chiichishaaniskweminuu kaa taapwehtahk chika chii pachishtineu chechii nakatikut aniyuuh uwiichimaakan. Wesh Chishemanituu chinitaweyimikunuu chiyaameyihtamuwinihch chechii ishi pimaatisiyuuhkw.16Chiya iskweu kaa taapweyimat Jesus, maaskuuch kata chii ishinaakun chechii pimaachihut chinaapem chii uhchi, kaye maak chiya naapeu kaa taapweyimat Jesus, kata chii ishinaakuniyuu chechii pimaachihut chiichiskweu chiya uhchi.17Misiwe awen chipaa ishi pimaatisiyuu taan kaa ishi miyaakanuut chechii ishi pimaatisiit, aniyuu kiipaa kaa ishi wiyaapamikut Chishemanituuh che ishi pimaatisiikupane. Eukw uyuu e ishi siihchimakwaau chechii ishi nanaakatuweyihtahkwaau misiwe umaamuuayimihaauch.18Muyaam naapeu kaa chischinuwaachishwaakanuukwe wiiyuuhch, namui chipaa uhchi iteyihtaakusuu aniyuu taan e iteyihtaakusiyich ekaa kaa chischinuwaachishwaakanuwiitwaauh. Kaye maak naapeu ekaa kaa chischinuwaachishwaakanuut iskutak maak e kweskaatisiit, namui chipaa uhchi wii chischinuwaachishukusiyuu.19Namui chekwaan iteyihtam Chishemanituu kaa chischinuwaachishwaakanuwiikwenh naapeuh maak ekaa uhchi chischinuwaachishwaakanuwiikwenh. An chekwaan chihchiwe e iteyihtaakuhch eukuu chechii nanihiihtaakanuyikwaauh Chishemanituu ukacheskwewinh.20Misiwe awen ekun yaapach chipaa ishi pimaatisiyuu taan kaa ishihtaayich Chishemanituuh upimaatisiiwin eshkw ekaa uhchi pimaachihut.21Aapachihaakan kaa itaapachihiikuwane iskutak kaa pimaachihuyin ekaawii wiyesh iteyihta. Mikw maak miyupayihche ekaa ekw chechii utaapachihaakanitutaakuyin kiipaa chechii utinaman an ishi nihiipayihche.22Wesh an awen kaa utaapachihaakanitutuuwaakanuut iskutak kaa pimaachihiikut Utipeyihchikeuh, kaa tipeyimisut ishi kanawaapamikuu Utipeyihchikeuh, ekw an awen wiya kaa tipeyimisut kaa pimaachihaakanuut eukun an Christ wetaapachihaakanitutaakut.23Mistahii chii ispitikuu Christ wiya chechii tipeyimisk. Ekaawii maak pachishtin naapeu chechii tipeyimisk.24Ekw maak niichishaanitikw, ekun yaapach chipaa ishi pimaatisiyuu awen taan kaa ishihtaayich Chishemanituuh upimaatisiiwin eshkw ekaa uhchi pimaachihut Chishemanituuh e wiichewaat.25Ekw maak anichii uschiniichuuch ekaa kaa uwiichimaakanitwaau waa ayimihiikwaau. Uu maak che ishi wiihtamaatakuch namui Utipeyihchikeu uhchi itashuweu. Niya ekun e iteyihtamaan chipaa miywaau ihtiyekw uu che ititakuch. Nitepicheyihtaakusin maak chechii taapweucheyimiyekw wesh Chishemanituu nichii chistimaacheyimikw.26Anuhchiish kiipaa e ishpish mistahii aayimuhunaanuuhch uste chipaa miywaayuu awen ekaa kaa niipuut ekaa chechii niipuut, maak anichii kaa niipuutwaau ekaa chechii nakatitutwaau.27Shaash maak kaa niipuuwane, ekaawii kuchihtaa chechii piikunaman chiwiichihtuwin. Ekaa maak naapuuwane, namui wiyesh iin ekaa kuchihtaayine chechii niipuuyin.28Mikw maak niipuuyine namui chimachituuten. Kaye maak ishkwesh niipuute namui machituutam. Mikw maak anichii kaa niipuutwaau chika ihtakuniyuu che ishi aayimuhutwaau. Uste maak nipaa miyeyihten ekaa uu ishi aayimuhuyekw.29Niichishaanitikw, maau netaweyimitakuch chechii chischeyihtamekw. Namui naashch shaash tawaau anit chechii atushkuwaakanuut Utipeyihchikeu. Anichii maak kaa ihtaayich wiichiskweuwaau ekaawii chika uhchi utamihiikuuch aniyuu e niipuutwaau chechii ihtitwaau taan aniyuuh chihchiwe e ishi nituweyihtaakusitwaau chechii ihtitwaau eukw chechii atushkuwaatwaau Utipeyihchikeuh.30Anichii kaa misimeyihtahkwaau ekaawii chika uhchi utamihiikuuch aniyuu e misimeyihtahkwaau e wii atushkuwaatwaau Utipeyihchikeuh. Anichii kaa muuchicheyihtahkwaau ekaawii chika uhchi utamihiikuuch aniyuu e muuchicheyihtahkwaau. Ekw anichii kaa utinaasutwaau ekaa wesaa chihchiwe chika uhchi iteyihtamihiikuuch aniyuuh chekwaayuu kaa utinahkwaau. E misimeyihtahk awen maak e muuchicheyihtahk maak e weyuuchihtaat chekwaayuuh namui chipaa uhchi chipishkaakuu uyuuh e wii atushkuwaat Chishemanituuh.31Anichii kaa uhtaapachihutwaau taan e itaapatisinaanuyich utah aschiihch anit chechii uhchi pimaachihiisutwaau ekaawii chika uhchi utamihiikuuch e atushkuwaatwaau Utipeyihchikeuh wesh uu aschii kaye taan e iteyihtaakuhch chika miyaaupayuu.32Uu misiwe nititwen ekaa nitaweyimitakuch chechii aayimeyihtamekw. Ekaa niipuut naapeu, uste iteyihtamihiikuu taan e ishi nitaweyimikut Chishemanituu chechii ihtit.33Ekw maak naapeu e niipuut muush maamituneyihtam taanite chechii ishi nanihiiwehaat wiichiskweu.34Niishuyich ihtakuniyuu waa ishi nanihiiwehiiwet, wii ihtuutam taan e itashumikut Chishemanituu eyuu maak wiichiskweu wii nanaakatuweyimeu. Ekw maak iskweu maak ishkwesh ekaa niipuut uste iteyihtamihiikuu Chishemanituu chechii nanihiiwehaat, tekash wii payehtisiyuu wiiyuuhch kaye utahchaahkuhch. Ekw maak an iskweu kaa niipuut aschiiyuu pimaatisiiwiniyuu naashch maamituneyihtamihiikuu unaapem e wii nanihiiwehaat.35Namui nititwen uu chechii waawiishumitakuch, nititwen uu chechii wiichihiitakuch chechii ishi pimaatisiyekw e nanihiihtuwekw Utipeyihchikeu nesht ekaa chechii utamihiikuyekw chekwaan e atushkuwekw.36E ihtaakwe naapesh ekw maak ishkwesh e chii niskumutwaau chechii niipuuhaakanuutwaau, an maak naapesh ekaa wii maayeyimaate aniyuu ishkwesha eshkw ekaa niipuutwaau uste kata miywaayuu wiipach chechii niipuutwaau. Namui chika uhchi machituutamuch wiipach niipuutwaawenich.37Ekw maak naapesh wiya tipiiwe kaa ishi wiyeyihtamukwe ekaa che uhchi niipuut kaye mitun kaa wiyeyihtamukwe ekaa nitamukw che uhchi ihtit, mitun shaash e chii wiyeyihtahk taan che ihtit ekush ekaa kata uhchi siihchimaakanuu chechii niipuut.38Namui wiyesh iiniyuu naapeu e wii niipuut chechii niipuut, mikw maak uste miyupayiyuu an naapeu ekaa kaa wii niipuut.39E niipuut iskweu namui iteyihtaakusuu chechii wiichimaat kutak naapeu eshkw e pimaatisiyich unaapem. Mikw maak nipiichen unaapemh chika chii wiichimeu mikw e ishinaakusiyich naapeu e kweskaatisiikwen.40Niya maak wii e iteyihtamaan uste chipaa miyeyihtam ekaa miin niipuut iskweu e peyakut. Namui chiwii wiishuwaatitinaawaau mikw maak ekun e iteyihtamaan chipaa ishi miywaau ihtiyekw kaye maak nititeyihten e ayaaumach Chishemanituu Utahchaahkwa uu kaa itweyaan.
Canadian Bible Society