Sofoníasi1
Luéyuri ligañi Wabureme
1Anihán uganu le líchugubei Wabureme lun Sofoníasi lidan dan le Hosíasi lan le liráü Amón lurúeitebei Hudá. Liráü bugaha Kusí Sofoníasi, Kusí liráü Gedalíasi, Gedalíasi liráü Amaríasi, Amaríasi liráü Esekíasi.2Lariñahare Wabureme: «Nagünrinchaguaali sun le ligibuagubei ubóu sunsuinagubei.3Nagünrinchagubaña gürigia, animaalugu, dunuru hama úduraü, nachugeraguagüdübaña gürigia wuribatiña, ábame nagumuchaguagüdüniña gürigia ubouagugiñe».Lariñahare Wabureme:4«Niñurubei núhabu luagun Hudá hama sun ha aganóubaña Herusalén. Nagidarubei sun lárigirugu Baali lídangiñe fulasu le, íbini hiri lufadirinigu nagidarubei ñéingiñe.5Nagünrinchagubaña ha awarihabaña tábulugun muna lun háhuduragun houn waruguma hama ha áhuduragubaña áfiñureina luagu niri úareina luma luagu liri bungiu Milükómu.6Nagünrinchagubaña giñe ha adireirubaña nuéi, ha máluahanbalina, miabin hagía álügüdaha numa».7Maní humá ligibugiñe Wabureme, ladüga yarafaali luéyuri! Aranseli Bungiu aban adagaragüdüni ani anúadira laaña ha lagunbirahabaña!8Lariñahare Wabureme: «Lidan weyu ligía nabeichubaña ábutigu, nabeichagubaña giñe lirahüñü urúei hama sun ha afalarubalin hechun gibe tubungiutegu.9Lídanmeme weyu ligía, nabeichagubaña giñe ha achubaragubalin bena hama ha abuinchagüdübarun haban hamadagu lau anarimeni luma iyeeni».10Lariñahare Bungiu: «Lídanme weyu ligía, laganbuba agúarahani amuriaha ídemuei lúmagiñe luéigiñe bena le gíribei Habenari Úduraü. Hagúarahaba gürigia lídangiñe le aban louba Herusalén, ñeinbei óunwenbu liréin günringuaü luéigiñe burí wübü.11Hayahua, huguya le aganóubei lidan uburugu ǘnabuti, ladüga hóunwegua sun alugurahatiña, günrinwagua hagíame sun ha adaagubaña marasun lau seinsu!»12«Lídanme dan ligía, nanügüba aban lanpu ábame nakurukuhani Herusalén. Ábameti nabeichaguniña gürigia ha darangilubei hasandiragun houngua, ha ariñagubaña hóunguarügü: “Madügünbei Wabureme ni kata, ni buiti ni wuribati!”13Ligía lasagarahóuba lubéi harisin, günrinwagua tuguyame haban. Hábunaguba muna, gama lumoun maganóunbaña tidan, hábunaguba beibei, gama lumoun matun baña diwéin».14Yarafaali lanarime luéyuri Wabureme! Yarafaali, furesegueina liña liabin! Gífibei ligaburi luéyuri Wabureme: Íbini ha ganigitimabaña hagúarahaba!15Ábanbei weyu lánina igañi, íruni luma idiheri, günringuaü, luburiga luma lanarime lamuñounga;16ábanbei weyu tánina fidu luma agúarahani ábürüheina luagun burí uburugu le derebugubei lau burí liñun luayelesin.17Lariñahare Wabureme: «Níchugubaña gürigia lidoun lénrengunga. Héibuguba kei marihintiña, ladüga hafigouhan nigibugiñe. Láwiyuruba hata kei duna, lóundaraguba hágürügü kei hádiga animaalugu».18Lídanme luéyuri ligañi Wabureme, mesefubaña gürigia ni lau pülata ni lau golu, ladüga lágudubei ligañi Wabureme sun fulasu. Lagünrinchagubaña sun lílana ubóu lidan murusun oura!
Bible Society of Honduras